Titus

Titus

¹ Siginan angku, Fandak, Funbalugu At fanuguan at sadi, ay anggan Isus Fagtayukan At-Suguan at sadi. Ay nasugu angku laman nanfoyung aw sas taw, laman Funbalugu At nafili ebi fag ngay taw umfandiug ban. Ay laman sumaful wa fiya at matuyan fag longan, tagfakbang ban sik taw sas Funbalugu. ² Ay e fagsegun ban leleg faggugat at yud katabu. Anway Funbalugu matuyan tuwa faggugat, ay Kanya ebi At nafatuyanan fag leleg siginan ngay ebi ebi. ³ Ay katsi gina si at filian fag ngay menit, Funbalugu nafasure At fasadan sas taw siginan At longan. Ay aw, nanfoyung aw At longan sas taw, anway tam Funbalugu wan tam Tagbalabag At nasugu angku. ⁴ Nanriruk aw sa emu, Titu, at matuyan ku unga sa tam fakafandiugun baliwa. Funbalugu tam Tama ay Fagtayukan Isus tam Tagbalabag At mamanyun nangus sa emu ay At nanfanabayan emu. ⁵ Kata tuy at masuad ku fagnafamatoun emu sas furu Kreta. Laman o fatabui yap ban fagayu at yud intabu fag fagbulun sanya. Ay laman nanfilii ban at ngay magurang sasa ngay Funbalugu bale sanya fag ngay fulan, kata ebi ku longan sa emu. ⁶ Kata tuyi tuwa nangus am nafili at ngay magurang, laman di e mauri at fagbulun nus nge wain. Ay sadi yakman at mangena. Ay laman at sisian kafandiug tuwa, ay di e foyungan te, kanya kamabo ay dua maabaris. ⁷ Anway tagmagurang sas Funbalugu bale di e fagbulun at mauri nus nge wain, anway Funbalugu wan At nafili anya. Ay kata tuyi at ugali. Laman di gfandaragang at fagbulun. Laman di mafali nu kadotama. Laman di ginum fangasigung. Laman di gfangadotama. Laman di giafaayuun at salafi. ⁸ Laman igfasakbo tuwa at bagu kadasug fag taw. Laman kaumsig tuwa sat masine. Laman maamatanganan tuwa fagayu nu gfagbulun. Laman masine fiya fiya at fagbulun fagayu. Laman igfaning tuwa fiya fiya sas Funbalugu. Laman maabaris tuwa. ⁹ Laman matvngvd tuwa nu kafandiug sa ebi at nadungug Funbalugu At longan at matuyan, laman mafafoyung tuwa sa tibak taw At longan at matuyan. Laman nababo tuwa at tagsalag At longan at matuyan. ¹⁰ Anway ngayu takamabo, ay ngayu tage longan at yud e masuad, ay ngayu tagfanluk tiba. Ngayu takatanya siginan sik afud tagfaning Taw-Naseg at fagtoglagan. ¹¹ Salagi anya nu ge longan. Anway at foyungan igfasirut way at ngay kalongan nu kafandiug. Anway at foyungan dua matuyan. Ay at fagnanfoyungun at masuad anway te, nanfaayu way at salafi. ¹² Sadik taglong Taw-Kreta sanya, at mamatanganan fag taw, nalong te, Faggugat Taw-Kreta kamuagan way. Ay at ugali kata way tagfangagat fag balan. Ay kanya mafanalo way fag taw ay manga gfadaulun way nu kon sigon. ¹³ Ay matuyan ka fag mamatanganan fag taw at longan. Ay nu katanya, matvngvdi nu gsalag o kanya fag ngay taw at yud matuyan. Laman kanya gdog yay fiya kafandiug sat matuyan fag longan. ¹⁴ Ay laman lag gdungugan sas Taw-Naseg at ngay fakamansulitun sat yud matuyan. Ay anggan lag gdungugan sa sik taw at longan takalimata sat matuyan fag longan. ¹⁵ Sik taw nu masine tuwa at amatanganan, kanya faggugat gamatangan tuwa sat masine dewa nus nge wain at nalag. Roro sik taw nu mauri way at amatanganan, ay nu dway kafandiug, dewa nalag at masine, gamatangan way sat mauri. Anway at amatanganan mauri way. Ay kanya dua kapla dewa e asalanan. ¹⁶ Ay kanya fag ngay mauri fag taw nalong te, nasaful wami Funbalugu. Roro ngap tibak taw e nalag way at fagbulun at mauri ay nasaful te, gfanlamangan way nu glong. Ay ka fag ngay taw mauri way at fagbulun, ay kamabo way sas Funbalugu, ay nus di sirut dua mafabul at masine.

¹ Ay am foyungan gfadiuganani tuwa sas Funbalugu At longan. ² Foyungi sat ngay magurang fag ngay mangama sanya te, kata tuyi at ugali. Laman maamatanganani tuwa nu gfagbulun. Laman sik matuyan tuwa fag taw. Laman maabaris tuwa. Laman matvngvdi tuwa nu kafandiug sas Funbalugu, ay nu kafanyu sa tiba, ay nu gsungatan sigon. ³ Ay foyungi yangay sat ngay magurang fag ngay mangena te, kata tuyi tuwa at ugali. Laman masinei tuwa at ugali sa tiba. Laman dangai glong at mauri sa tiba baliwa. Laman di ginum fangasigung. Laman at foyungan sa tiba at masinei tuwa fag ugali. ⁴ At masuad te, laman at ngay magurang fag ngay mangena nanfoyungi yangay sat yud magurang fag ngay mangena at masine fag ugali. Laman kanya afanyui tuwa sat mangama ay anggan sat sisian. ⁵ Laman maabaris tuwa. Laman at ugali fagayu malayuni tuwa sa at masine baliwa. Laman masinei tuwa at fagbulun fagayu si at bale. Laman malukmei tuwa. Laman faningi tuwa sat mangama. Nu katanya tuwa at fagbulun, tibak taw di e longan mauri sa tam Funbalugu At longan baliwa. ⁶ Ay foyungi yangay sat ngay baguama te, laman gbaris yangay. ⁷ Ay o yangay, Titu, fasineuni am ugali laman sik fagulitan sasa ngay takafandiug nus nga se taw am fagbulun. Ay am foyungan, matuyani tuwa ay lag fanlamangan. ⁸ Ay anggan masinei tuwa fagayu am longan. Laman di e foyungan te, dua masine am longan. Ay nu katanya tuwa, at tagsalag emu kapla tuwa, anway di e foyungan te, mauri way tam. ⁹ Foyungi sat ngay takafandiug fag fanuguan te, kata tuyi tuwa at ugali. Laman gfaning tuwa sat fun, laman at fun guseganan tuwa fagayu at fagbulun. Laman di kamalusan sat fun. ¹⁰ Laman di kamul. Laman faggugat matuyan tuwa fagayu at ugali. Laman tibak taw kaumsig tuwa ban dawdaw sas Funbalugu tam Tagbalabag At foyungan, anway nalag at fanuguan at fagbulun at masine. ¹¹ Anway Funbalugu At fagnafasureun At fakafanyuun laman fagayu taw nangus umbalabag. ¹² Ay At fakafanyuun at fagnafoyungun sa antam, laman di tam kamabo sas Funbalugu. Ay laman di tam gfaning ste swa daga fag taw at fagalabianun. Ay laman maabaris tuwa ban tam. Ay laman masine tuwa tam ugali fagayu. Ay laman gfaning tuwa tam tam Funbalugu, dewa tam ste swa daga. ¹³ Ay kaduge tam ste swa daga, e fagfanyaun yay tam at masine ban dawdaw tam fagsegun. At masuad, tam Funbalugu At madaragang, tam Tagbalabag Isus Fagtayukan, Kanya gdog yay ban stiye, ay e fagmasineun ban dawdaw. ¹⁴ Kanya ebi At fasadan At faginkateun, laman umbalabag tam dewa tam e asalanan. Ay Kanya nafalayun sik ngay taw sat masine, laman At taw ban. Ay laman At nafalayun fag ngay taw madaragang tuwa ban nu gfagbulun sat masine. ¹⁵ Foyungi sas taw kanya fag foyungan. Ay fatvngvdi nu kafandiug. Ay salagi nu e asalanan, anway e fagmadaragangun wo. Ay masinei tuwa am ugali fagayu, laman tibak taw di gfalingun emu.

¹ Faamatangi tuwa sat ngay takafandiug te, laman kanya gfaning tuwa sat ngay fun ay sat ngay magurang si at talun. Ay laman mafamasadan tuwa ban nu gfaning sat masine fag fagbulun. ² Ay salagi laman kanya di glong mauri sa tiba baliwa, nus nga sinu. Ay laman di kamaringangan tiba, ay maran tuwa nu glong. Ay laman malukmei tuwa fagayu at ugali sas fagayu taw. ³ Anway ebia taw fagayu tam dia tam e fagsafulun. Ay kamabo yay tam. Ay igfaning yay tam tagfanluk. Ay gfaning yay tam dawdaw sa tam bilug at fakaumsigun ay at fagalabianun. Ay fagayu menit tam fagbulun mauri yay ay galabian yay tam tam iba. Ay tanan yay tam kadkadotamaan sigon sa tam iba. ⁴ Roro Funbalugu tam Tagbalabag nafasure At fakafanyuun ay At fakesugun sas fagayu taw. ⁵ Ay siginan wa ginanya, Kanya nu gbalabag antam. At fasadan At fagnanbalabagun antam bundi te, sa tam nafasineun tam fagbulun. At fasadan At fagbalabagun antam an tuwa te, infanyu antam. Ay At-Masine-Fag-Falad nafegus tam asalanan, laman sik bagu tuwa tam fag taw. ⁶ Funbalugu madaragang nu nafat si antam At-Masine-Fag-Falad, siginan Isus Fagtayukan tam Tagbalabag At fagbulun. ⁷ Laman Kanya tumap antam kata at yud e asalanan anway kafanyu tuwa antam. Ay laman fabul ban tam Funbalugu At fagafonun, at masuad te, e fagsegun ban tam tam leleg faggugat at yud katabu. ⁸ Matuyan wa fiya kanya fag foyungan. Ay kaumsig aw nu gfoyung o faggugat kanya fag longan. Laman ban at ngay takafandiug sas Funbalugu nu gamatangan tuwa dawdaw, masine tuwa at ugali sa tiba. Nu katanya, masine tuwa faggugat ay e fanambagun tuwa sas fagayu taw. ⁹ Ay lag kaful sa sik ngay taw tagfaringangan tiba at yud e fagsafulun. Ay anggan at foyungan nut sa way at ngay katungudun at ngayan at yud manga tabu. Ay anggan sigon tagaringangan sa Ku-Unga At-Longan baliwa. Anway fagayu takatanya du e masuad ay du e fanambagun. ¹⁰ Sik taw nu gfaringangan way at ngay takafandiug, o salagi anya te, lag katanya. Ay kanya nu dway kafoli, dewa duwa ginan nu glong o anya, ayayui wan sanya ginan fag taw. ¹¹ Anway nasaful wo te, takatanya fag taw mauri way faggugat igfaning way sas asalanan. Ay at asalanan sak gfadasug anya sas faurianan. ¹² Sumugu ban aw sa emu tuy fag duwak takafandiug at sadi. Ay ka fag duwak taw at ngayan te, Artemas ay ate At-Masine-Insure-Wa-Daw. Ay at sadi nu ndasug wa sanya, satu rodi o loi wa stiye sa angku sas Tagbabo-At-Fulan. Anway ku fasadan igbanwan akyay iste kaduge matis fag ngay magdanun. ¹³ Katsi tagsi emu fag duwak takafandiug. At ngayan at sadi te, Taw-Yabi-At-Fun-At-Nafon, ay kanya sik tagsaful tam magurang at longan. Ay at ngayan at sadi te, Tagfon-Danyu-At-Taw. Madaragangi nu gtarabang o kanya fag duwak takafandiug nu glo, laman di e fagayudanun sa at ngaba dalan. ¹⁴ Ay foyungi sa ta ngay taw te, laman at ugali faggugat sa tuwa at masine fag fagbulun. Laman kanya gtarabang ban nus nga sinu at ke fagayudanun. Laman at fagbulun fagayu e masuad tuwa. ¹⁵ Fagayu ku ufud ste nafadasug at fagusegananun sa emu te, gamatangan tuwa emu. Ay o fadasugi em fagusegananun sanya takesug emi fag ngay takafandiug te, gamatangan tuwa ami ayu. Ay Funbalugu At mamanyun nangus sa ayu fagayu.