Romans

Romans

¹ Siginan angku, Fandak, Isus Fagtayukan At fanuguan at sadi. Anway Kanya At nafili angku, laman aw At-Suguan at sadi. Laman nanfoyung aw Funbalugu At Masine-Fag-Barita. ² Tuy wan ebi Funbalugu At nafatuyanan fag Masine-Fag-Barita sas taw siginan At-Rirukan. Ay At ngay taglong at nariruk ebi Funbalugu At longan. ³ At Masine-Fag-Barita nafoyung antam sa tam Funbalugu At Baguama baliwa. Ay sa At Baguama At bilug at aguyangan, fun Fakafanyuun. ⁴ Ay At-Masine-Fag-Falad e fagmadaragangun mafafoyung te, Kanya Funbalugu-At-Baguama. Anway igdog yay e nafaleleg Anya siginan At fagmatianan. Ay Kanya Isus Fagtayukan tam Fun. ⁵ Siginans Isus At fagbulun, laman Isus e fanambagun, Funbalugu At fagnafamanyunun sa angku te, laman aw At-Suguan at sadi. Ay laman ban sasa ngay talun at taw umfandiug ay maning sas Isus. ⁶ Ay am sigon. E nafili yangay ayu, laman Isus Fagtayukan yangay am At taw. ⁷ Nariruk aw sa ayu, Funbalugu At fakesugun fag ngay taw sas fulan Ruma. Anway Funbalugu nafili wa ayu te, am wan At ngay taw. Funbalugu tam Tama ay tam Fun Isus Fagtayukan At mamanyun nangus sa ayu. Ay At nanfanabayan ayu. ⁸ Taguna taguna, guseganan aw sa tam Funbalugu, anway Isus Fagtayukan At fagbulun, teway kafandiug tuwam. Ay anway infandiug tuwam ay, at ngay taw sas fagdaul daga nadungug ay fakafandiugun. ⁹ Igfaning akwa fiya sas Funbalugu, ku fagnafoyungun at Masine-Fag-Barita sa At Baguama baliwa. Ay Funbalugu nasaful yangay te, da kdi kaliam nu gdarangin aw sa ayu. ¹⁰ Ay get aw sas Funbalugu te, laman nus nga ginain, madasug aktuwa sa ayu, Funbalugu nu kaumsig. Dewa aw yud madasug ebi. ¹¹ Anway kaumsig akwa gananlagun sa ayu. Laman nanfoyung aw ayu sik fagmasineun siginan At-Masine-Fag-Falad, laman nanfatvngvd aw ay fakafandiugun. ¹² At masuad, iglong aw sa ayu te, tanan tam fadfatvngvdan tam fakafandiugun. Ay fakafandiugun ay anggan ku fakafandiugun. ¹³ Ku ngay fadugsay, kaumsig aw nu sumaful am te, ngayu ginan akwa gananlagun sa ayu. Ay roro e gsalag yay angku. At masuad ku fagananlagun sa ayu, ku fasadan laman e fanambagun ban am, gina aw moyung ayu. Kata yangay sa at Yud-Naseg-Fag-Taw nu e fanambagun siginan ku nafoyungan. ¹⁴ Anway e bedan akyay, ku fagnanfoyungun at Masine-Fag-Barita sas fagayu taw. Dewa sas taw lod, ay dewa sas taw buid. Ay dewa sa at naadal, ay dewa sa at yud naadal. ¹⁵ Ay katanya tuway, gumsiganan akyay nanfoyung at Masine-Fag-Barita sa ayu, sas Taw-Ruma. ¹⁶ Aw gdi kapla nu nanfoyung aw at Masine-Fag-Barita. Teway at Masine-Fag-Barita, Funbalugu wa At fagmadaragangun. Laman umbalabag nus nga sinu fag taw nu kafandiug tuwa. Taw-Naseg taguna, ay anggan at Yud-Naseg-Fag-Taw. ¹⁷ Anway at Masine-Fag-Barita tagfasure Funbalugu At fagmasineun at fanfasadi at taw sa Anya. Siginan sik taw bagu kafandiug anggan intvngvd at fakafandiugun. Kata yangay sa At-Rirukan te, Sik taw at kinsadi sas Funbalugu anway kafandiug tuwa, e leleg tuwa ban faggugat. ¹⁸ Funbalugu At fandotamaan indasug siginans Banwa sas fagayu taw at yud gfaning Anya, ay anggan sa at ke mauri. Madyay kanya fag ngay taw igsalag way at matuyan fag longan anway e mauri. ¹⁹ Anway ka fag ngay taw nasaful wan fagayu Funbalugu nu maugalian. Anway Funbalugu nafasure sa anya. ²⁰ Siginan ngays fagsigadan tam fagdaul daga, at ngay taw dan wa gsaful tam Funbalugu At ugali dewa mafalyu. Tenday At fagmadaragangun at yud e fakatabuan, ay At fage Funbaluguun. Anway matignaun nu nafasure siginan tam Funbalugu At naawat. Nu katanya, sik taw at ke mauri dua mafabalus. ²¹ Ka fag ngay mauri fag taw dewa nasaful te, e Funbalugu, kanya dua gseg Anya te, Kanya tuwa At matuyan fag Funbalugu. Ay kanya dua guseganan sas Funbalugu. Ay at amatanganan du e fanambagun. Ay at amatanganan at yud e masuad kata way nu marum. ²² Kanya dewa nalong te, Mamatanganan akwan. Roro ngap du e fagsafulun. ²³ Ay at fagsegan natubus way siginan At yud kate fag Funbalugu At fagmasineun. Ay at fagsegan sa ways tawtawan, takata sik taw, ay takata sik manuk, ay takata sik balan, ay anggan takata sik ubianun. ²⁴ Katanya wayay, Funbalugu nafabayan yay ka fag ngay taw te, laman gfaning yay sat amatanganan at fagalabianun at mauri. Laman kanya gfadfagbulunan yay sa at mapla fag fagbulun sat bilug. ²⁵ Ay kanya dua kaumsig gfaning sat matuyan fag foyungan sas Funbalugu baliwa. At fagfaningun sa ways famuagan. Ay at fagsegan ay at fagfaningun sa ways Funbalugu At naawat. Ay dua gseg sa Takawat. At Takawat anwa tam fagsegan faggugat. Kin, katanyai tuwa. ²⁶ Katanya wayay, Funbalugu nafabayan yay anya te, laman gfaning yay sa at mapla fag fagalabianun. Ay sik mangena dua kaumsig sa at mangama. At fagfasegseganun sa tibak mangena, dewa yud masine. ²⁷ Ay anggan at mangama naubun wan at mangena. Ay at fakaumsigun fiya fiya sa way tibak mangama. Madyay igfatunglus way at mapla fag fagbulun sa tibak mangama. Ay e faurianan wa ban fiya sa at bilug katvngvd at asalanan. ²⁸ Ka fag ngay taw dua kaumsig nangamatangan sas Funbalugu baliwa. Ay fakatanyaun, Funbalugu At fagnafabayanun anya. Laman at amatanganan mauri yap faggugat. Ay at fagbulun mapla yap faggugat. ²⁹ Ay ka fag ngay taw sa at amatanganan tanan wa mauri. Kayu tuy. At mauri at fagbulun, ay kamilug, ay manga kabalo. Ay matvngvd yangay nu galabian. Ay manga igfate tiba. Ay manga igfaringangan sa tiba. Ay manga gfanluk sa tiba. Ay manga gfansulup sa tiba. Ay manga gfaibugan sa tiba. ³⁰ Ay manga kamuagan dawdaw sa tiba. Ay manga kadotama sas Funbalugu. Ay manga dua malukme nu gbalus sa tiba. Ay manga gfandaragang at fagbulun. Ay manga gfalabi at longan. Ay manga gfainbaguan at mauri. Ay manga kamabo sa at mangaguyang. ³¹ Ay kanya kata way sik yud mamatanganan fag taw. Ay manga dua gfaning at longan mandi. Ay manga dua gfantarabang sa tiba. Ay manga dua kafanyu sa tiba. ³² Ka fag ngay mauri fag taw nasaful wan Funbalugu At longan te, Fagayu takatanya at fagbulun gkasakan wa umkate. Ay dewa nasaful katanya, igfaning yay at mauri. Ay igseg yay ngap karo tibak taw tagfaning takatanya fag mauri.

¹ Nus nga sinu o nu sik tagsarap o am iba at asalanan, ay at fagintoan sa yay emu sigon am asalanan, ay du o mafabalus anya. Dewo nalong te, Faurii anya. At fagfauriun anggan yay o. Anway o oma tagsarap, sud yay am fagbulun sa anya. ² Nasaful watam te, matuyan Funbalugu nu gfauri sik taw takatanya at fagbulun. ³ Ay o, sama, go am amatanganan, dewa o gsarap am iba at fagbulun at mauri, ay nu katanya yangay am fagbulun, go nu gfasad o mafabalabag o Funbalugu At faurianan. ⁴ Go gamatangan o te, Funbalugu gdi gfauri emu, anway Funbalugu malukme ay glugo tuwa nu gfanya. Labon du o nasaful te, Funbalugu At fagmalukmeun at masuad anyay te, laman gubun yay o am asalanan. ⁵ Matvngvd am amatanganan nu gyud o gaubunun am mauri fag fagbulun. Ay katanya wayay, famut yay o am faurianan, gina ban umdasug At fandotamaan fag ngay menit gina ban fiya fiya Funbalugu igfauri at ngay taw. ⁶ Anway Funbalugu nu gfon sas fagayu taw nus nga setvngvd wa ban at nafagbulun. ⁷ Ay sik fulan taw faggugat at fagbulun masine tuwa, anway kanya kaumsig tuway Funbalugu At nafon anya fag fagmasineun, ay fagusegananun, ay anggan leleg at yud katabu. Ay Funbalugu mon ban anya leleg faggugat. ⁸ Ay sik fulan taw gfangesug way, ay kamabo way sat matuyan fag longan, ay gfaning way sat mauri, Funbalugu kadotama ban ay gfauri anya. ⁹ E faurianan ay e fakalimuun way ban sas fagayu taw kayu at mauri at fagbulun. Sas Taw-Naseg taguna, ay anggan sa at Yud-Naseg-Fag-Taw. ¹⁰ Ay roro ngap kayu at masine at fagbulun, e fagmasineun, ay e fagmanabayanun, ay anggan e fagusegananun ban sigon. Sas Taw-Naseg taguna, ay anggan sa at Yud-Naseg-Fag-Taw. ¹¹ Anway Funbalugu di e filian taw. ¹² Fagayu taw nu e asalanan wayay nu dway nasaful Ku-Unga At-Longan, kanya dua ban umbalabag, Ku-Unga At-Longan dewa gyud nafauri anya. Ay fagayu taw dewa at nasaful sa Ku-Unga At-Longan, ay nu e asalanan way, at fanfauri siginan yangay At-Longan. ¹³ Anway sik taw nu sik tagsaful way fagtvngvd sa At-Longan, dia gfadiuganan sas Funbalugu. At tagfaning fiya fiya sa At-Longan, Funbalugu natap anya kata sik taw matuyan. ¹⁴ At Yud-Naseg-Fag-Taw dewa gyud nasaful sa At-Longan, at ugali kata nu gfaning sa At-Longan. Nu katvngvd yay anya, kanya nasaful sat masine ay sat mauri, dewa gyud gsaful sa At-Longan. ¹⁵ Nu katanya, ka fag taw at fagbulun gfasaful sa tibak taw te, sa at amatanganan e fagsafulun wa fiya sa At-Longan at masuad. Ay anggan sa at amatanganan sat masine baliwa katanya yangay nu gfoyung. Dewa gfainfolian sa at amatanganan te, lag katanya ay ate, dewa. ¹⁶ Katanya ban, ku nafoyung sa ayu fag Masine-Fag-Barita at foyungan te, Ginanya ban fag ngay menit Funbalugu sumugu ban tam Fagtayukan Isus. Laman nanfasure fagayu taw at masuksukan fag fagbulun. ¹⁷ O wan tagayup te, o sik Taw-Naseg wo. Ay gamatangan o te, igfaning wo sa Ku-Unga At-Longan. Ay manga te, o wan Funbalugu At fakesugun fag taw. ¹⁸ Ay manga te, nasaful wo Funbalugu At fakaumsigun. Ay manga te, kaumsig tuwo sat masine, anway ebi e nafoyung tuwemu Ku-Unga At-Longan. ¹⁹ Ay manga gamatangan tuwo te, sik takamoyung tuwo sa takata at yud glag. Ay anggan kata tuwo sik salung sa at ngay taw takata sasad marum. ²⁰ Ay anggan sik tagfangatulun wo sa at yud mamatanganan fag taw. Ay anggan sik takamoyung wo sas sisian. Ay gamatangan o te, o wan at ke fagsafulun fiya ay at nasaful at matuyan siginan Ku-Unga At-Longan. ²¹ Ay nu katanya, am fagfoyungan sa way tibak taw, ay o yo gfaning, dewo gsalag te, Lag kamul. Go o sigon kamul yay o. ²² Ay dewo gsalag te, Lag kamayun. Go o sigon kamayun yay o. Ay dewo kalimata tawtawan, go kamul yay o siginans tawtawan at bale fakafulan. ²³ Ay dewo guseganan igfoyung te, Masine Ku-Unga At-Longan. Go takalimata yay o sas Funbalugu, anway kamabo yay o sa At-Longan. ²⁴ Madyay At-Rirukan nalong wa te, At Yud-Naseg-Fag-Taw nalong mauri sas Funbalugu baliwa, gina nalag Taw-Naseg at fagbulun. ²⁵ Taw-Naseg at fagtoglagan sat bilug e fanambagun tuwa, nu nafaning tuwo sa At-Longan fagayu. Ay roro nu kamabo way o sa At-Longan, kata way o yud e fagtoglagan, dewa o e fagtoglagan. ²⁶ Nu katanya, sik taw dewa yud e fagtoglagan ay nu nafaning tuwa sa At-Longan at masuad. Go Funbalugu tumap yangay anya kata at ke fagtoglagan, dewa yud e fagtoglagan. Ay go kin. ²⁷ Nu katanya, at yud e fagtoglagan fag taw nu gfaning tuwa sa At-Longan, at nafaningan tagfasaful sa tiba te, am Taw-Naseg sik tagasalanan yay am. Anway dewa am e fagtoglagan ay dewa am nasaful sa At-Longan, kamabo yay am sa At-Longan. ²⁸ Du e kalingaman te, kanya sik matuyan fag Taw-Naseg dewa e fagtoglagan. Ay at matuyan fag fagtoglagan bundi sa sik taw at bilug fagtvngvd. ²⁹ At matuyan fag Taw-Naseg si tuwa at amatanganan. Ay at matuyan fiya fiya fag fagtoglagan si tuwa sik taw at amatanganan siginan At-Masine-Fag-Falad. Ay bundi siginan Ku-Unga At-Longan. At ngay taw dewa gyud gasegun sa ka fag taw. Roro Funbalugu guseganan tuwa ka fag taw.

¹ Ay nu katanya, go sik Taw-Naseg way at ke fanambagun glabi yay tibak taw. Ay go at ke fagtoglagan way fag taw at ke fanambagun. Ay go kin. ² Ay Kin. Ngayu tuwa Taw-Naseg at fanambagun. At tiba tungud at ke fanambagun antuwa te, siginan ngay ebi Taw-Naseg nafatvngvdun Funbalugu At longan fagayu. ³ Taw ro at masuad tibak Taw-Naseg at fagyudun kafandiug. Go ate, Funbalugu At longan dua mafanud. Ay go muag. ⁴ Muag. Mafanud wa fiya. Funbalugu faggugat matuyan tuwa, dewa tibak taw gfanlamangan. Anway At-Rirukan nalong te, Fagalay O At nalong, fagayu taw nasaful te, Matuyan wa fiya. Ay nu taw way baliwa tagsarap Am asalanan, O way tagbabo. ⁵ Nu tam fagbulun wa at mauri tagfasaful sa tibak taw te, matuyan Funbalugu. Nu katanya, go dua masine Funbalugu nu gfauri way antam anway e asalanan way tam. Go igdi. (Ku longan kata yangay at ngay taw at amatanganan.) ⁶ Igdi, Funbalugu masine tuwa. Nu dway ro masine, dua ban matuyan nu gtap fagayu taw ste swa daga at asalanan. ⁷ Nu tam nafamuagan wa tagfasaful sa tibak taw te, Funbalugu matuyan tuwa. Nu katanya, taw way sangay fagfauriun antam kata sa sik tagasalanan. ⁸ Go masine nu gfaayu tam tam mauri, laman sik fagmasineun umkayu ban. Lag glong takatanya. Dewa tibak taw kamuagan te, katanya Fandak at longan. E faurianan wa ban fiya sanya fag ngay takamuag. ⁹ Tain tam amatanganan. Go at Taw-Naseg nalabi yay at tibak taw nu masine. Go yaya. Yaya, anway aro nafoyung kwa te, Fagayu taw, dewa Taw-Naseg ay dewa at Yud-Naseg-Fag-Taw, asalanan yay tagmagurang anya. ¹⁰ Anway At-Rirukan nalong te, Du e taw masine fiya fiya nus di sadi. ¹¹ Du e taw gsaful sat masine. Du e taw gsarap Funbalugu. ¹² Fagayu taw naguyuyan way sas Funbalugu. Fagayu taw gsud yay yud e fagmasineun. Du e taw gfagbulun masine, nus di sadi. ¹³ At bibig kata sik fagsandigan at yud e alad. Ay at famaleleg faggugat igfanluk. Ay at nalfas siginan at bibig kata sik dot e fangkate. ¹⁴ Ay at bibig mapnu fakabaloun ay fakadotamaun. ¹⁵ Ay Kanya fag taw dua kalimu gfataguk. ¹⁶ Ay kanya igrasras ay igfauri nus nga nday. ¹⁷ Ay kanya dua gsaful sas fagmanabayanun baliwa. ¹⁸ Ay kanya dua kalimu te, e Funbalugu. ¹⁹ Nasaful watam te, Ku-Unga At-Longan fagayu e masuad tuwa kayu tagfaning sa At-Longan. Ay laman ban fagayu taw du e mafabalus. Ay manga Funbalugu tumap wa fiya fagayu taw ste swa daga at asalanan. ²⁰ Katanya wayay, Funbalugu dua natap sik taw kata at yud e asalanan, dewa tagfaning sa Ku-Unga At-Longan. Anway Ku-Unga At-Longan at masuad te, nanfoyung way baliwa te, sik taw e asalanan. ²¹ Katsi insure wan Funbalugu At fagmasineun at fanfasadi at ngay taw sa Anya. Ay bundi Ku-Unga At-Longan at fanfasadi. Dewa katanya, ebia taw Ku-Unga At-Longan ay anggan sigon ebi Funbalugu At ngay taglong nafoyung wan sas taw Funbalugu At fagmasineun. ²² Funbalugu nafasadi sa Anya fagayu takafandiug sas Isus Fagtayukan. Anway katsi fagayu taw kata tuwa at sadi. ²³ Anway fagayu taw e asalanan ay di e fagmasineun kata Funbalugu. ²⁴ Siginans Funbalugu At nafamanyunan, Funbalugu natap long fagayu taw kata at yud e asalanan, nu kafandiug tuwa sas Fagtayukan Isus At nabalabag anya. ²⁵ Ebi Funbalugu nasugu Isus kata sik anyun. Laman At taguk at fanfaliam taw at asalanan, nus nga sinu fag taw takafandiug. Katanya tuway laman nanfasaful sas fagayu taw Funbalugu At fagmasineun at fanfasadi at taw sa Anya. Anway ebi Funbalugu nafabayan yay te, dewa e asalanan, ay dia nafauri anya. ²⁶ Nu katanya, laman fagayu taw katsi sumaful yangay te, masine tuwa mangaro Funbalugu At fagbulun. Ay Kanya natap sik taw kata at yud e asalanan nu kafandiug tuwa sas Isus. ²⁷ Ay go nu katanya, itam Taw-Naseg, mafafalabi tam tam iba. Go yaya. Yaya, anway dewa tam igfaning sa Ku-Unga At-Longan di e masuad. Siginan tuwa tam fakafandiugun at ke masuad. ²⁸ Anway nasaful watam te, Funbalugu igtap tuwa sik taw kata at yud e asalanan nu kafandiug tuwa. Ay bundi fagtvngvd sa nu gfaning sa Ku-Unga At-Longan. ²⁹ Go Funbalugu go Taw-Naseg way fagtvngvd at ke Funbalugu. Go igdi. Igdi. Anggan tuwa at Yud-Naseg-Fag-Taw at ke Funbalugu. Ay kin. Sadi tuwa. Anggan at Yud-Naseg-Fag-Taw at Funbalugu. ³⁰ Anway sadi tuway tam Funbalugu, Kanya natap sik Taw-Naseg at ke fagtoglagan kata at yud e asalanan nu kafandiug tuwa. Ay katanya yangay at taw at yud e fagtoglagan nu kafandiug yangay. ³¹ Go nu kafandiug watam, go tam fakafandiugun igfasirut way sa Ku-Unga At-Longan. Go yaya. Yaya long. Tam fakafandiugun gfatvngvd tuwa baliwa sa Ku-Unga At-Longan.

¹ Nataw tam nasaful itam Taw-Naseg siginan tam aguyangan Abrayam. Nataw at kindasug sa anya. ² Nu Abrayam way ro at masine fag fagbulun at fanfasadi anya sas Funbalugu, nu tengap mafafalabi way ro at fagbulun sa tiba. Ay sas Funbalugu yaya. ³ Anway At-Rirukan nalong te, Anway Abrayam kafandiug tuway sas Funbalugu, Funbalugu natap anya kata sik taw at yud e asalanan. ⁴ Sik taw nu gbul at nalufuyan, siginan tuwa at nafagbulun. Ay at nafon fag salafi bunwa sik famanyun, sik fansali tuwa. ⁵ Saman tuwa tiba sik takafandiug. Anway di gafanud te, at fagbulun at fanfasadi anya sas Funbalugu. At fakafandiugun antuwa te, Funbalugu nafamanyun sa sik taw at yud gfaning Anya, laman fanfafasadi sa Anya. Ay anway kafandiug tuway, Funbalugu natap ka fag taw kata at yud e asalanan. ⁶ Katanya yangay fun Fakafanyuun at foyungan ebi te, sik taw guseganan tuwa, Funbalugu nu natap tuwa anya kata sik taw at yud e asalanan. At fagtapun anya bunwa at fagbulun at masine. Kata tuy tuwa at longan te, ⁷ Sik taw guseganan tuwa, Funbalugu nu nafaliam tuwa at mauri, ay nu natabun tuwa at asalanan. ⁸ Sik taw guseganan tuwa, Funbalugu nu gdi ban natap at asalanan. ⁹ Go ka fag longan at masine sat ke fagtoglagan way fagtvngvd. Ay go igdi. Ay go anggan tuwa sat yud e fagtoglagan. Ay go kin. Kin, anggan tuwa sat yud e fagtoglagan. Anway tam longan te, Funbalugu natap Abrayam kata at yud e asalanan anway kafandiug. ¹⁰ Go seduge manga Funbalugu nu natap Abrayam. Go gina yay Abrayam yud e fagtoglagan. Ay go ate gina wa Abrayam e fagtoglagan. Bunya gina e fagtoglagan. Gina yay yud e fagtoglagan. ¹¹ Anway ebi Funbalugu natap anya, ay bandi Abrayam wan at nafasigad Taw-Naseg at fagtoglagan, sik fanagi siginans Funbalugu. Ay anggan sik fanfatuyanan te, ebi Funbalugu natap anya kata at yud e asalanan anway kafandiug. Dewa te, ye fagtoglagan ginanya. Nu katanya, Funbalugu wan At ke fasadan te, Abrayam fagayu takafandiug at katungudan. Anggan at yud e fagtoglagan fag takafandiug. Anway Funbalugu natap fagayu takafandiug kata at yud e asalanan. ¹² Ay Abrayam yangay at katungudan anggan sat ke fagtoglagan. Ay dewa ka fag ngay taw at ke fagtoglagan, kanya igfaning tuwa sa tam katungudan Abrayam, kata sik fagulitan nu kafandiug tuwa gina yud e fagtoglagan. ¹³ Funbalugu At fatuyanan sas Abrayam ay sa at ngay kadagdagan te, Am ban tagagbilug at fagdaul daga. Funbalugu At fagnafatuyananun sas Abrayam bunwa baliwa te, igfaning Ku-Unga At-Longan. Antuwa te, kafandiug tuwa sas Funbalugu. Ay Kanya natap Abrayam kata at yud e asalanan. ¹⁴ Anway Funbalugu At fagfatuyananan nut sa way tagfaning Ku-Unga At-Longan fagtvngvd, tam fakafandiugun du e masuad. Ay anggan Funbalugu At fatuyanan du e masuad. ¹⁵ Anway Ku-Unga At-Longan gfadasug way faurianan. Nu dia man e longan, di kamabo. ¹⁶ Funbalugu At fagfatuyananun sas Abrayam antuwa kafandiug. Ay nu katanya, Funbalugu At fatuyanan, sik famanyun. Ay umdasug wa fiya sas Abrayam at ngay kadagdagan. Bundi sa tagfaning Ku-Unga At-Longan fagtvngvd. Anggan tuwa sigon sas fagayu takafandiug kata Abrayam nu kafandiug. Anway Abrayam kata wa tam katungudan fagayu tam. ¹⁷ Anway At-Rirukan at longan te, Aw nafasik magurang Aw emu, laman o wa ban fagayu talun at ngay taw at katungudan. Funbalugu natap Abrayam kata tam katungudan. Ay Abrayam kafandiug sas Funbalugu, At nafaleleg at kinkate. Ay At e longan mafafasure tuwa dewa yud sanya. ¹⁸ Abrayam gafanud tuwa sas Funbalugu ay igfanya tuwa. Dewa kata yud e fagfanyaun. Anway e fagafanudun tuwa te, kanya ban fagayu talun at ngay taw at katungudan. Katanya Funbalugu At longan ebia taw sa anya gina glong te, Ngayu ban am kadagdagan. ¹⁹ Abrayam di mafanalo nu gafanud, dewa gayup te, at bilug gakateun wan. Madyay at mangune nu ndain 100 wan. Ay manga at mangena glugo wan nu gyud gfangigusan. ²⁰ Abrayam di gfainbalian nu gafanud sas Funbalugu At nafatuyanan. Ay at fakafandiugun kaugat tuwa nu gseg sas Funbalugu. ²¹ Anway matvngvd tuwa at fagafanudun te, Funbalugu mafafon nus nge wain aro taw At nafatuyanan. ²² Katanya tuway Funbalugu natap Abrayam at fakafandiugun te, Abrayam kata sik taw at yud e asalanan. ²³ Aro at longan te, Natap Abrayam kata sik taw at yud e asalanan, bundi Abrayam fagsadi. ²⁴ At faglongan anggan tuwa sa antam, nu kafandiug tuwa tam sas Funbalugu te, Kanya nafaleleg Isus tam Fun siginan At fagmatianan. ²⁵ At faginkateun tam Isus anway tam nafamaboan. Ay At fage nafalelegun tam Isus laman at fanfasadi antam sas Funbalugu.

¹ Ay Funbalugu natap antam kata at yud e asalanan anway kafandiug tuwa tam. Ay e fagmasadiun wa long tam sas Funbalugu, anway tam Fun Isus Fagtayukan At fagbulun. ² Anway siginan tam Isus At fagbulun, tam fagnafabulun tam Funbalugu At famanyun sa antam katsi. Ay guseganan watam, kaduge tam gfanya Funbalugu nu gfon antam At fagmasineun ban. ³ Ay bundi katvngvd anya fagtvngvd. Guseganan yangay tam dewa e gfauri antam. Anway nasaful watam te, sik faurianan way tagfatvngvd antam, nu gsungatan tuwa tam. ⁴ Ay tam nasungatan tagfasine tam ugali. Ay ka fag ugali at masine tagfatvngvd antam kaduge tam gfanya. ⁵ Ay dangai tam kabalu kaduge tam gfanya. Anway Funbalugu nafat si wa antam At-Masine-Fag-Falad. Ay Kanya tagfaamatanganan antam te, setvngvd Funbalugu At fakafanyuun sa antam. ⁶ Kaduge tam gyud e fagsegun, Fagtayukan nkate wan sas Funbalugu At nafamasadan fag menit. Laman at ngay taw at yud gfaning sas Funbalugu umbalabag ban. ⁷ Sik taw dua kaumsig nangate, laman at masine fag taw e fanambagun. Ay nu ndain muag, sik taw nanangate yay laman at masine fag taw e fanambagun. ⁸ Roro ngap, Funbalugu nafoyung yay At fakafanyuun sa antam. Anway dewa tam e asalanan, Fagtayukan inkate yay, laman e fanambagun tuwa tam. ⁹ Ay katsi e natap wan tam kata at yud e asalanan, anway Isus At taguk. Gurungan, Isus malabag wa ban fiya antam siginans Funbalugu At fandotaman. ¹⁰ Ay ebi gfalimatan way tam ay, sas Funbalugu, At Baguama At faginkateun at famasadi antam sas Funbalugu. Ay katsi nafasadi wan tam ay, Isus malabag wa ban fiya antam anway Isus inleleg tuway. ¹¹ Ay bundi katvngvd anya fagtvngvd. Katsi guseganan yangay tam sa tam Funbalugu, anway tam Fun Isus Fagtayukan At fagbulun. Anway Isus nafasadi tuwa antam ay sas Funbalugu. ¹² Ebi sadik taw yay at mauri at fagbulun ay nafastiye swa daga asalanan. Ay siginans asalanan nafe fakateun. Ay fagayu taw kate way, anway fagayu taw inke asalanan wayay. ¹³ Ebi dewa gyud batang e nafoyung Ku-Unga At-Longan sasa ngay taw, at taw dan wa e asalanan ste swa daga. Ay ginanya, di e gtap te, kamabo wa sa Ku-Unga At-Longan, anway di e longan. ¹⁴ Katanya wayay, fakateun yay tagmagurang sas fagayu taw. Siginan yay ebi sik taw Karaska at menit, ay anggan wa sa Ku-Unga at menit. Sas fagayu taw dewa gyud kata Karaska at asalanan nu kamabo way Funbalugu. Karaska kata sik fafaskudanan te, e Kadasug yangay ban sa antam. ¹⁵ Ay saman tuwa Funbalugu At nafamanyun, ay Karaska nu kamabo. Dewa ngayuk taw inkate siginans sik taw at nafamaboan, Funbalugu At nafamanyun nalabi yay Karaska at asalanan. Funbalugu At fagnafamanyunun sasa ngay taw, madyay sik Taw, At ngayan Isus Fagtayukan, infanyu yay sas fagayu taw. ¹⁶ Funbalugu At famanyun di kata ka fag sadik taw at asalanan. Ka fag taw kamabo wayay, ay e nalong te, e asalanan wayay, faurii wa anya. Bundi katanya Funbalugu At famanyun. At famanyun sasa ngay taw antuwa te, dewa e asalanan, Funbalugu natap yay anya kata sik taw at yud e asalanan. ¹⁷ At matuyan, sanya ginan wa fiya fag sadik taw at asalanan, at nafadasug fakateun. Ay gmagurang sas fagayu taw. Ay roro, amatvngvd yap sadik taw, Isus Fagtayukan, At fagbulun. Ay sanya ginan fag sadik taw, ngayuk taw at nababo ay e leleg tuwa. Kayu at nabul Funbalugu At famanyun, ay Funbalugu natap anya kata sik taw at yud e asalanan. ¹⁸ Sadik taw nafamabo wayay, igfadasug way faurianan sas fagayu taw. Ay roro siginan yangay fiya sadik taw At ke fagbulun at masine, Funbalugu natap tuwa at ngay taw kata at yud e asalanan. Ay anggan nafon anya at leleg faggugat. ¹⁹ Sadik taw nafamabo wayay, fagayu taw inke asalanan sanya ginan fag sadik taw. Ay roro siginan yangay fiya sadik taw tagfaning sas Funbalugu, at ngay taw inke fagmasadiun wa fiya sas Funbalugu. ²⁰ Ay bandi Funbalugu At fagnafonun At-Longan sa Ku-Unga, laman fagayu taw sumaful te, mauri way mangaro nu kamabo way sa At-Longan. Ay katanya wayay, fakamaboun inkayu yay. Ay dewa fakamaboun inkayu, roro Funbalugu At famanyun nalabi yay. ²¹ Ay dewa asalanan tagmagurang, ay fagayu taw inkate. Ay roro glabi yay Funbalugu At famanyun at fanbabo. Laman at ngay taw e fagmasadiun sas Funbalugu. Ay e leleg tuwa faggugat, siginan Isus Fagtayukan tam Fun At fagbulun.

¹ Nu katanya, tain tam amatanganan. Go masine nu gfatunglus watam sas asalanan, laman Funbalugu At famanyun umkayu ban. Go lagi. ² Lagi long. Anway ebi kata watam ay inkate. Ay bandi lag ban tam gfaning sas asalanan. ³ Go di am nasaful te, fagayu tam nu nsurung watam, kata watam insadi sas Fagtayukan Isus sa At naatean. ⁴ Anway insurung watam ay, sa At fakateun, insadi yangay tam sa nu kasandig. Anway tam Tama At fagmadaragangun nafaleleg tam Fagtayukan siginan At fagmatianan, ay anggan itam e leleg yangay tam siginan at bagu fag ugali. ⁵ Ay insadi watam ay, sa tam Fagtayukan At naatean, insadi yangay tam sa Anya sa At nadogan gleleg. ⁶ Ay nasaful watam te, ebi inkate wan tam dan fag taw gasfuan Fagtayukan sas salibagan kayu. Ay ebi tam ugali at mauri naliam wan. Ay katsi, bundi asalanan tagfanuguanan antam. ⁷ Anway sik taw nu batang wa kate, bunwa asalanan tagmagurang anya. ⁸ Nu nkate watam gasfuan Fagtayukan, e fagsegun watam te, nu nleleg watam e fagmasadiun watam sa Anya. ⁹ Ay nasaful yangay tam te, Fagtayukan inleleg tuway, Kanya dua ban gdog kate. Ay bundi ban fakateun tagmagurang Anya. ¹⁰ Anway Isus nu kate saiginan wadi, laman bundi asalanan tagmagurang Anya. Ay manga At fagnafalelegun laman Funbalugu e fanambagun. ¹¹ Kata yangay Fagtayukan, amatangani ayu mandi te, inkate wam. Laman bundi ban asalanan tagmagurang ayu. Ay ay faginlelegun ay insadi sas Fagtayukan Isus laman Funbalugu e fanambagun. ¹² Nu katanya, salagi tuwa asalanan laman di gmagurang ayu. Ay laman ay bilug di gfaning sas fagalabianun. ¹³ Lag ge nafon ay bilug sik afud sas asalanan, laman nanfagbulun mauri. Foni tuwa ay bilug fagdaul sas Funbalugu, kata at kinkate nu gdog yay gleleg. Ay fagayu afud ay bilug foni sas Funbalugu, laman nanfagbulun tuwa sa at masine. ¹⁴ Anway bundi asalanan tagmagurang ayu. Anway ay fagfaningun bundi sa Ku-Unga At-Longan. Antuwa Funbalugu At famanyun tagmagurang ayu. ¹⁵ Nu katanya, tain tam. Go masine nu gfaning watam sas asalanan, nu dway tam gfaning sa Ku-Unga At-Longan. Ay Funbalugu nafamanyun wa ngap antam. Go lagi. Lagi long. ¹⁶ Go di am nasaful te, nus nga nday nu nafon am ay bilug laman nanfaning am, am wan at fanuguan. Dewa ay fagfaningun sas asalanan, ay nafadasug ayu sas fakateun. Ay dewa ay fagfaningun sas Funbalugu ay insadi wam sas Funbalugu. ¹⁷ Guseganan ami sas Funbalugu. Anway ebi dewa am asalanan at fanuguan, katsi igfaning tuwam sa at masine fag foyungan ay nadungug. ¹⁸ Ay e nafalfas tuwa ayu siginans asalanan, ay katsi insik fanuguan tuwam sas fagmasineun. ¹⁹ Katsi gfoyung akyay ayu sik fafaskudanan, anway mafanalo yay ay fagsafulun. Kata ebi nu nafon am ay bilug sas fagmafuratun, ay ay fagmafuratun indaul. Katsi foni tuwa ay bilug sas fagmasineun baliwa, laman ban Funbalugu tuwam At taw. ²⁰ Ebi kaduge am asalanan at fanuguan, bunya fagmasineun tagsi ayu. ²¹ Nataw sangay ay fanambagun sanya ginan fag fagbulun ay kapla way am katsi. At matuyan, sik taw takatanya at fagbulun e fakateun wa ban fiya. ²² Ay katsi e nafalfas tuwa ayu ay, siginans asalanan. Katsi insik fanuguan tuwam sas Funbalugu. Ay e fanambagun ban am. Ay manga am wan Funbalugu At taw, ay e leleg tuwam faggugat. ²³ Anway sik taw tagfaning sas asalanan, at fansali ban sa anya fakateun way. Ay roro Funbalugu At famanyun sa antam takafandiug, antuwa leleg faggugat, at nafasadi antam sas Isus Fagtayukan tam Fun.

¹ Ku ngay fadugsay, sumaful tuwa nangus ro am ku foyungan ro, madyay nasaful tuwam Ku-Unga At-Longan. Ku-Unga At-Longan nu e masuad kaduge way kanya fag taw gleleg. ² Madyay Ku-Unga At-Longan nasalag way sa sik mangena at kindaduwa te, Agi yap gubun am mangama ay nangadaduwa sa tiba, am mangama nu gleleg yay. Ay dewa katanya, Ku-Unga At-Longan du e masuad sa anya, at mangama nu inkate wan. ³ Ka fag mangena nu ndaduwa way sa tibak mangama, at taguna fag mangama nu dyay nkate, kanya fag mangena sik takamayun way. Ay roro ebia taw at mangama nu nkate wan, ka fag longan du e masuad sa anya. Ay ka fag mangena dewa ban indaduwa sa tibak mangama, bundi sik takamayun. ⁴ Ku ngay fadugsay, katanya yangay am. Kata wam inkate gasfuan Isus. Nu katanya, bunwa Ku-Unga At-Longan tagmagurang ayu. Katsi tiba wan tagmagurang ayu, Kanya wa At nadog gleleg. Laman ban fagayu ay fagbulun masine sas Funbalugu. ⁵ Ebi gina tam ugali at mauri tagmagurang antam, Ku-Unga yay At- Longan tagfatvngvd sa tam fagalabianun baliwa. Ay tam fagalabianun si tam bilug tagfasure at ngay mauri fag fagbulun. Ay nu katanya way, umkate ban tam. ⁶ Ay katsi bunwa tam sik fanuguan sa Ku-Unga At-Longan. Kata watam inkate sanya ginan, dewa ebi ka fag Longan tagmagurang antam. Laman nu gfaning tam sa tam Funbalugu, bundi siginan ebi tam ugali siginan ebi fag Longan. Siginan tuwa tam bagu fag ugali siginan At-Masine-Fag-Falad. ⁷ Go nu gfasad tam, sadi way Ku-Unga At-Longan ay asalanan. Go igdi. Igdi long. Ku-Unga At-Longan nu gdi nafoyung angku te, katanya asalanan, da kwa ro gsaful asalanan. At masuad, da kdi ro gsaful fagalabianun, Ku-Unga At-Longan nu dia man nafoyung te, lag galabian am musama at nanuranan. . ⁸ Ku-Unga At-Longan nafoyung wayay te, lag galabian. Ay katanya wayay, asalanan yay tagmagurang angku laman nangalabian aw. Anway nu dia man e longan, asalanan kata wa nu nkate. ⁹ Ebi gina aw gyud nasaful Ku-Unga At-Longan, e fagmanabayanun akyay mandi. Ay roro gina aw nasaful ka fag Longan te, lag galabian, asalanan indaragang sa angku. Ay umkate kwa ban fiya. ¹⁰ Funbalugu At fasadan anyama, ka fag Longan nanfaleleg angku. Ay roro mangaro ka fag Longan wan tagfate angku. ¹¹ Anway ka fag asalanan sa ku basad nafanluk angku. Ay taba wa nafate angku sanya ginan fag Longan. ¹² Dewa katanya, at matuyan antuwa te, Ku-Unga At-Longan siginans Funbalugu, ay anggan fagayu Funbalugu At longan matuyan tuwa ay masine. ¹³ Go sanya ginan wa manga fag Longan at masine tagfate angku. Go yaya. Yaya, bunwa long sanya ginan. Asalanan way tagfate angku sanya ginan fag Longan at masine. Laman fagayu taw nasaful ban te, kanya anway mangaro asalanan. Ay Ku-Unga At-Longan tagfasaful tuwa baliwa te, mauri way dawdaw asalanan. ¹⁴ Nasaful watam te, fagayu Ku-Unga At-Longan e masuad wa fiya laman gamatangan tuwa tam sas Funbalugu. Ay roro mangaro, ku fagamatanganun sa way ku bilug baliwa at fakaumsigun, anway asalanan akyay at fanuguan. ¹⁵ Aw da kwa nasaful fiya ku fagbulun. Anway dewa aw gananfagbulunun sat masine, da kwa mafafabul. Ay dewa aw kauri, katanya wa ngap karo ku fagbulun. ¹⁶ Ay nu nafagbulun aktuwa sa ku fakauriun, ku amatanganan gfadiuganan tuwa sa Ku-Unga At-Longan te, masine at foyungan. ¹⁷ Katanya wayay, bunwa aw tagfagbulun sa ku fakauriun. Ku asalanan yay tagfagbulun si angku. ¹⁸ Anway nasaful kwa te, bunwa at masine tagsi angku. Anway kaumsig akyama nanfaning at masine. Roro ngap kua mafafaning. ¹⁹ Roro ngani kwa mafafaning ku fakaumsugun sat masine. Gfaning akway sat mauri, anakwayay kauri. ²⁰ Ay nu gfaning aw sa ku fakauriun sa ku fagyudun kaumsig, bunwa aw tagfaning. Ku asalanan yay tagfagbulun si angku. ²¹ Anway katanya ku fagnasafulun te, gina akyama kaumsig gfaning sat masine, roro at mauri way at kinsure. ²² Sa ku amatanganan guseganan akyama sas Funbalugu At longan ²³ Dewa katanya, tagsi angku tiba wayk ugali. Ay ka fag ugali igsalag way sa ku amatanganan at masine fag ugali. Ay anggan insik fanuguan aw sas asalanan at fagmadaragangun tagsi angku. ²⁴ Sek sek. Kabalu aw dawdaw. Sinu manga at mafafalfas angku ste ginan fag ugali si ku bilug at nanfate ban angku. ²⁵ Guseganan aw sa tam Funbalugu. Anway Kanya mafafalfas angku, anway Isus Fagtayukan tam Fun At fagbulun. Kata tuy aw. Nafaning aw sas Funbalugu At longan sa ku amatanganan. Ay ku bilug at fakaumsigun igfaning way sas asalanan at ugali.

¹ Katsi di ban e faurianan sa sik taw at kinsadi sas Fagtayukan Isus. ² Anway At-Masine-Fag-Falad At fagmadaragangun at nafon leleg laman insadi sas Fagtayukan Isus. Ay Kanya At nafalfas angku siginans asalanan ay fakateun at fagmadaragangun. ³ Ku-Unga At-Longan dua mafafalfas antam siginans asalanan anway tam bilug at fakaumsigun igsalag wayay. Ay roro tam Funbalugu long mafafalfas tuway antam anway nasugu At Baguama. Ay At Baguama e bilug kata yangay antam, at nasaman antuwa te, di e asalanan. Ay At fagindasugun laman nanfaliam tam asalanan. Katanya wayay Funbalugu nafasaful antam te, e faurianan way ban sa tagfaning sas asalanan sat bilug. ⁴ Katanya tuway Funbalugu At fagbulun, tam fagfaningun sa tuwa at matuyan fag longan fagayu siginan Ku-Unga At-Longan. Ay gfaning watam sa At-Masine-Fag-Falad At ugali, ay bundi sa tam bilug at ugali. ⁵ Nus nga sinu tagfaning sa at bilug at ugali, at amatanganan faggugat sa way at bilug at fakaumsigun. Ay nus nga sinu tagfaning sa At-Masine-Fag-Falad, at amatanganan faggugat sa yangay At-Masine-Fag-Falad At fakaumsigun. ⁶ Sik taw at amatanganan faggugat nut sa way at bilug at fakaumsigun, umdasug ban sas fakateun. Ay sik taw at amatanganan faggugat nut sa tuwa At-Masine-Fag-Falad, e leleg ay e fagmanabayanun ban. ⁷ Anway sik taw at amatanganan faggugat nut sa way at bilug at fakaumsigun, kalimata way sas Funbalugu. Ay ka fag taw dua gfaning Funbalugu At longan, anway dua mafafaning. ⁸ Anway at fagfaningun sa way at bilug at fakaumsigun, ay dua mafafauseganan sas Funbalugu. ⁹ Ay bundi am sik tagfaning sa ay bilug at fakaumsigun. Antuwa am sik tagfaning sa At-Masine-Fag-Falad, Funbalugu At-Masine-Fag-Falad nut si tuwa ayu. Ay sik taw nu dway e Masine-Fag-Falad siginans Fagtayukan, kanya bunwa Fagtayukan At taw. ¹⁰ Fagtayukan nut si tuwa ayu, dewa ay bilug gakateun anway ebia taw e asalanan way am, ay falad gleleg tuwa anway Funbalugu nafasadi wa ayu sa Anya. ¹¹ Funbalugu At nafaleleg Isus siginan At fagmatianan. Ay At-Masine-Fag-Falad nut si tuwa ayu, Kanya At nafaleleg Fagtayukan Isus siginan At fagmatianan, nanfon yangay ban leleg sa ay bilug siginan At-Masine-Fag-Falad tagsi ayu. ¹² Katanya wayay, ku ngay fadugsay, e bedan way tam. Ay tam bedan bunwa sa tam bilug te, laman igfaning tam tam bilug at fakaumsigun at mauri. ¹³ Anway nu gfaning way am sa ay bilug at fakaumsigun at mauri, umkate wa ban am. Roro ay fanfate sa ay bilug at fakaumsigun at mauri, At-Masine-Fag-Falad wan. Ay nu nafate wan, gleleg tuwa ban am. ¹⁴ Anway nus nga sinu fag taw nu At-Masine-Fag-Falad tuwa At nafaamatanganan anya, kanya anwa Funbalugu At unga. ¹⁵ Anway Funbalugu At fagnafatsiun ayu At-Masine-Fag-Falad bunwa te, nanfasik fanuguan ayu sas fakalimuun. At masuad antuwa te, nanfasik unga ayu. Laman lumong tam sas Funbalugu te, Ku Mama. Ku Mama. ¹⁶ Ay At-Masine-Fag-Falad nafadiuganan sa tam amatanganan gina tam gamatangan te, itam wan Funbalugu At unga. ¹⁷ Ay nu Funbalugu watam At unga, Funbalugu mon ban antam fagayu At fagafonun sa At ngay unga. Ay gfasfuan watam Fagtayukan gina tam gbul Funbalugu At fagafonun. Ay nu e gfauri yangay antam kata sa tam Fagtayukan nu e gfauri, e fagmasineun yangay ban tam kata tam Fagtayukan nu e fagmasineun. ¹⁸ Nu gfasad aw sa at ngay faurianan sa antam katsi, kanya di e masuad. Anway at kumsure ban fag fagmasineun sa antam glabi yay ban dawdaw. ¹⁹ Ay fagayu Funbalugu At naawat kaumsig nu mafali Funbalugu nu nafasure At ngay unga. ²⁰ Anway katsi Funbalugu At naawat fagayu dua mesug. Bunwa At naawat at ke fasadan. Funbalugu tuwa At ke fasadan. Dewa katanya, At naawat fagayu e fagsegun yay. ²¹ Anway fagayu Funbalugu At naawat e fangalfasan yay laman di ban karuas. Ay fage fagmasineun ban laman di kafanuguanan sas mauri, kata tuwa Funbalugu At ngay unga. ²² Ay nasaful watam te, At naawat fagayu glugo wan nu gfanguni, kata sik mangena nu gafalangfeun. ²³ Ay bunwa At naawat fagtvngvd. Anggan itam takafandiug, katanya yangay tam. Dewa Funbalugu nafon antam taguna At-Masine-Fag-Falad te, laman si antam, nafanguni yangay tam sa tam amatanganan. Anway igfanya yay tam Funbalugu nu gfaful ban antam, itam At ngay unga. Ay nu gfabagu ban tam bilug. ²⁴ Kaduge tam gfanya Funbalugu At fagbulun ban sa antam, inbalabag watam. Sik taw nu nalag at fagfanyaun, dua gfanya. Go sinu tagfanya dewa nalag. ²⁵ Kaduge tam gfanya tam fagfanyaun, igsungatan yay tam igfanya dewa glugo. ²⁶ Ay At-Masine-Fag-Falad yangay tagtarabang antam nu mafanalo yay tam fakafandiugun. Anway dua tam nasaful te, inday at masine tam fagdaranginun. Ay At-Masine-Fag-Falad tagbuknga antam sa tam Funbalugu gina tam gdarangin. Ay At-Masine-Fag-Falad nu gfanguni ginanya, ayu yap antam at longan. ²⁷ Ay Funbalugu At tagsaful taw at amatanganan, Kanya nasaful yangay At-Masine-Fag-Falad At fagfanguniun. Anway At-Masine-Fag-Falad At tagbuknga sas Funbalugu ay sa At ngay taw, igfaning Funbalugu At fakaumsigun. ²⁸ Nasaful watam te, Funbalugu wan tagfagbulun laman masine ban fagayu at kindasug sa takesug Anya, sas fagayu Funbalugu At nafili fag taw, laman nafaning At fasadan. ²⁹ Anway Funbalugu dan wa gsaful te, kanya ban Ku ngay taw, dewa gyud e taw. Ay Funbalugu wan At ke fasadan ebi laman At ngay taw inkata yangay ban At Baguama. Ay At Baguama at tiba Kaka ay ngayu tuwa At fadugsay. ³⁰ Funbalugu dan wa e fasadan te, nanfili Akban sik ngay taw. Ay nafili wa fiya. Ay Funbalugu natap wa At ngay nafili te, kata tuwa at yud e asalanan. Ay Funbalugu nafasadi wa sa Anya fagayu At natap. Ay anggan nafon anya At fagmasineun. ³¹ Katanya tuway, tain sa tam amatanganan. Nu Funbalugu tuwa tagsi antam, sinu at nanfabarangian antam. ³² Funbalugu di nasuksuk At Baguama dewa kesug. Ay nafon tuwa ay inkate. Laman fagayu tam e fanambagun tuwa tam. Ay Funbalugu nafon tuwa antam At Baguama, go Funbalugu nanfamanyun yangay ban sa antam fagayu fagayu At fanambagun. Go kin. ³³ Go e kafoyung way te, Funbalugu At ngay nafili e asalanan. Go igdi. Igdi. Anway Funbalugu wan At nafoyung te, Kanya natap At ngay taw kata at yud e asalanan. ³⁴ Go e kafoyung way te, at ngay nafili e asalanan. Go igdi. Igdi. Anway Fagtayukan Isus inkate wan. Ay kin wa fiya e nafaleleg wa fiya Anya siginan At fagmatianan. Ay katsi Kanya sa wa At Tama At siun baliwa fag day tigyangan. Laman tam Tagbuknga sa tam Funbalugu ay sa antam. ³⁵ Go taw manga at mafafasaruwayan antam siginans Fagtayukan At fakesugun sa antam. Go manga natakan. Ay go manga fagafanawaun. Ay go manga sik faurianan. Ay go manga nu kalunus. Ay go manga nu dway e lanbung. Ay go manga sas fakalimuun. Ay go manga nu e gafateun. Ay go igdi manga fagayu. ³⁶ Ay At-Rirukan nalong yangay te, Faggugat e gafateun way emi, anway gfaning ami sa Emu. E natap emi te, Kata way ami sik ngay tupa at ke gafateun. ³⁷ Dewa kayu niya, e fanbabo yay tam fagayu takatanya, anway tam Isus Fagtayukan kesug tuwa ay igtarabang antam. ³⁸ Anway nasaful akwa te, Du e mafafasaruwayan antam siginans Fagtayukan At fakesugun sa antam. Dewa tam umkate ay dewa tam gleleg. Dewa Funbalugu At ngay tagbukngan ay dewa at ngay mafurat fag falad. Dewa at kindasug katsi ay dewa at tagadasugun ban. Dewa at ke fagmadaragangun. ³⁹ Dewa siginan am tungud ay dewa siginan sad daga. Dewa nus nge wayin Funbalugu At naawat. Di e mafafasaruwayan antam siginan tam Funbalugu At fakesugun sa antam siginan tam Fun Fagtayukan Isus.

¹ Matuyan ro ku longan katsi ro te, Aw wan at kinsadi sas Fagtayukan ay kwa kamuagan. Ay anggan wa At-Masine-Fag-Falad At nafaamatanganan yangay angku te, matuyan ku longan. ² Kata tuy ku longan te, kabalu aw dawdaw. Ay da kwa maaliaman nu kabalu aw sa ku ngay kalongan sas Taw-Tagagbuan baliwa. ³ Nu angku way ro ku fakaumsigun, aw dewa aw yud umbalabag ay umyayu siginans Fagtayukan, laman ku ngay kalongan e fanambagun yangay. ⁴ Ku ngay kalongan, Taw-Tagagbuan fiya fiya. Ebi Funbalugu nafili anya laman At ngay unga. Ay Funbalugu nafon sa anya At fagmasineun. Ay nafoyung anya At ngay fatuyanan. Ay nafon yangay anya Ku-Unga At-Longan. Ay Funbalugu nafoyung anya te, kata tuyi nu gseg am fiya fiya sa Anya. Ay manga naguna nafoyung At fagafonun. ⁵ Ay Taw-Tagagbuan siginan at madaragang fag ngay katungudan, Funbalugu At nafili ebi. Ay anggan Fagtayukan At bilug sanya ginan yangay fag ngay katungudan. Ay Fagtayukan tuwa tagmagurang fagayu. Gseg watam tam Funbalugu faggugat. Kin, katanyai tuwa. ⁶ Funbalugu di naliam At fatuyanan sas Taw-Tagagbuan, dewa at tiba yud kafandiug. Anway tibak Tagagbuan at kadagdagan, bunwa fiya fiya Taw-Tagagbuan. ⁷ Ay anggan tiba Abrayam at kadagdagan, bunwa fiya fiya Abrayam At kadagdagan. Anway Funbalugu nafoyung sas Abrayam te, Am kadagdagan ban fiya fiya siginan tuwa Kanya-At-Naasean at kadagdagan. ⁸ At masuad at longan te, bunwa fagayu Abrayam at kadagdagan, Funbalugu At unga. Ay at kadagdagan ban fiya fiya siginan tuwa ebia taw Funbalugu At nafatuyanan sas Abrayam. ⁹ Anway kata tuy Funbalugu At nafatuyanan sas Abrayam te, Gdog Akyangay ste nu ndasug wa ginanya ban fag menit. Ay am mangena, Fun-At-Baguina, gfalangfe yay ban sik ngenge, sik ama. ¹⁰ Bundi kanya fagtvngvd. E sik mangena ya, at ngayan Sik-Baka, ay at fagbubaun duwak unga siginan tam katungudan at ngayan Kanya-At-Naasean. ¹¹ Ay ka fag duwak unga dewa gyud inlangfe ay dewa gyud batang igfagbulun masine ay mauri, ¹² Funbalugu nalong sanya fag mangena te, At kaka maning ban at arian. Katanya tuwa Funbalugu nu gfili. Igfaning tuwa At fasadan mandi, ay bundi sis taw at fagbulun. ¹³ Kata yangay At-Rirukan at longan te, Kesug Aktuwa Takamilug, ay kalimata Akway Tagraska. ¹⁴ Katanya wayay, go gamatangan tam te, dua matuyan tam Funbalugu At fagbulun. Go yaya. Yaya long. ¹⁵ Anway Funbalugu nalong sa Ku-Unga te, Nanfamanyun Aw sa nus nga sinu Ku fasadan. Ay kafanyu Aw sa nus nga sinu Ku fakaumsigun. ¹⁶ Katanya tuway, Funbalugu nu nafili sik taw, bundi sis taw at fakaumsigun ay bundi sis taw at fagbulun. Ay At fagnafiliun antuwa nanfamanyun sanya fag taw. ¹⁷ Katanya yangay At-Rirukan at foyungan sas fun Bale-Daul te, Kata tuy Ku fasadan Ku fagnafiliun emu sik fun sas talun Eiptu. Laman nanfasure Aw Ku fagmadaragangun Ku fanbabo emu. Laman fagayu taw sas fagdaul daga dumungug Ku fagmadaragangun. ¹⁸ Nu katanya, Funbalugu nu kaumsig kafanyu sa sik taw, katanya wa fiya. Ay nu kaumsig faugat sik taw at fakamaboun, katanya wa fiya. Igfaning tuwa At fasadan mandi. ¹⁹ Nu ndain at sadi sik taw sa ayu mabalus ban angku te, Nu katanya, taw way sangay tam Funbalugu At fagnalongun te, Mauri way ka fag taw at fagbulun. Anway du e taw madaragang sak mafasalag Funbalugu At fakaumsigun. ²⁰ Malus aw emu te, Sinu wo. Anway sik taw way o. Taw ro am fagmafabalusun sas Funbalugu. Go sangay sik naawat mafalong sa at takawat te, Taw ro fakatatuyun nu kawat o angku. ²¹ Go sik takawat bisu madaragang at fangawat bisu. Ay masine nu kalag at naawat at sadi. Ay tiba dua bangan masine nu kalag. Dewa siginan sadik ramyuk daga. Go kin. ²² Katanya yangay Funbalugu At fagbulun. Anway Kanya kaumsig nafasure At fandotamaan ay At fagmadaragangun. Ay dewa katanya Kanya igbaris yay at fagafauriun fag ngay taw. ²³ Ay Funbalugu kaumsig yangay igfasure At madaragang fag fagmasineun sa At fakafanyuun fag ngay taw. Ebia taw Funbalugu nafili wa anya laman nafon anya At fagmasineun. ²⁴ Ay itam wan kanya fag ngay taw At fakafanyuun, anway Funbalugu wan At nafili antam. Ay bundi siginans Taw-Naseg fagtvngvd, anggan tuwa siginan at Yud-Naseg-Fag-Taw. ²⁵ Katanya yangay At-Rirukan siginan At taglong, Fagbalabagun, at longan te, Nanfangayan Akyay ban ka fag ngay taw te, Ku-Taw, ebi dewa yud Ku taw. Ay nanfangayan Akyangay ban sanya fag talun at ngay taw te, Ku fakesugun, ebi dewa yud Ku fakesugun. ²⁶ Ay, Sanya wa fag talun, ebi Funbalugu At faglongan sanya fag ngay taw te, Bunwa am Ku Taw, Ay sanya e nafangayan yangay ban anya te, Am wan At Tagleleg-Faggugat-Fag-Funbalugu At Unga. ²⁷ Ay At-Rirukan siginans Funbalugu-Nabalabag at longan matvngvd sas Taw-Tagagbuan baliwa te, Taw-Tagagbuan dewa kayus lagnas sas tigyangan lino daul, dua ban ngayu at kumbalabag. ²⁸ Anway tam Fun nu gfagurungan At longan sas fagdaul daga at ngay taw baliwa, mafali tuwa ay dua gfabagu. ²⁹ Ay kata yangay Funbalugu-Nabalabag ebi at naguna nafoyung te, Tam Tiba-Tungud-At-Madaragang-Fag-Fun nu dway nadingding tam sawad sirut fag kadagdagan, Umkata yangay tam sas fulan Sik-Afugan at ngay taw, ay anggan sas fulan Inlubgub at ngay taw, at yud e sawad. ³⁰ Katanya wayay, tain tam amatanganan sas Taw-Tagagbuan baliwa. Ay kata tuy way long te, at Yud-Naseg-Fag-Taw, dewa gyud gsarap te, laman umsadi sas Funbalugu, roro masadi tuwa. At faginsadiun anway kafandiug tuwa sas Funbalugu. ³¹ Ay Taw-Tagagbuan dewa nasefu te, insadi wa long sas Funbalugu, madyay gfaning wa sa Ku-Unga At-Longan. Roro ngap dia nsadi. ³² Taw ro Taw-Tagagbuan at fagyudun insadi sas Funbalugu. Anway kanya nasefu te, masine wan at fagbulun. Ay dua gamatangan te, at faginsadiun anway kafandiug tuwa sas Funbalaugu. Katanya wayay kanya intaid sa sik famataid. ³³ At-Rirukan nafoyung sik fafaskudanan te, Amatangani. Igturuk Aw sik Batu sas fulan Malanggangan, at famataid sa at ngay taw. Ay kanya fag Batu At fanfatong at ngay taw. Ay nus nga sinu takafandiug sa Angku, di gafanaliyuan.

¹ Ku ngay fadugsay, ku fakaumsigun dawdaw ay ku darangin sas Funbalugu te, laman Taw-Tagagbuan umbalabag ban. ² Ay nafoyung aw te, Taw-Tagagbuan dewa gfandaragang sas Funbalugu baliwa, roro du e fagsafulun. ³ Anway kanya dua nasaful nangasadi sas Funbalugu. Ay roro ngap kanya igfaning way at fasadan mandi. Madyay dua gfaning sas Funbalugu At fasadan laman umsadi sa Anya. ⁴ Anway Fagtayukan yay At nafagurungan fagayu Ku-Unga At-Longan. Laman Funbalugu tumap nus nga sinu takafandiug sa Anya, kata sik taw at yud e asalanan. ⁵ Ebi ebi Ku-Unga At-Longan nafoyung sa baliwa sik taw nu gfaning sa At-Longan fagtvngvd laman insadi sas Funbalugu. Kata tuy at foyungan te, Sik taw nu gfaning tuwa sa Ku-Unga At-Longan, e leleg tuwa. ⁶ Saman tuwa at foyungan sa baliwa sik taw nu kafandiug fiya laman insadi sas Funbalugu. Kata tuy At-Rirukan at foyungan te, Lag gadayuwan te, Sinu ban at nanlag sas Banwa, laman nanfastiye tam Fagtayukan. ⁷ Ay lag gadayuwan te, Sinu at nanlag sa at kinbul at talun, laman nanfastiye Fagtayukan siginan at kinbul at talun. ⁸ Tain At-Rirukan at longan. Ay kata tuy te, Funbalugu At foyungan dua ngayayu emu. Anway gamatangan tuwo, Ay am fanfasulitanan Nut siginan tuwa ka fag foyungan baliwa. Kanya fag foyungan em foyungan sa emu sas fakafandiugun baliwa te, ⁹ Nu nafoyung tuwo te, Isus ku Fun. Ay nu kafandiug tuwo sa am amatanganan te, Funbalugu nafaleleg Isus siginan At fagmatianan. Umbalabag tuwo. ¹⁰ Anway sa am amatanganan nu kafandiug tuwo, Funbalugu tumap emu kata at yud e asalanan. Ay am bibig nu nafoyung tuwa am fakafandiugun, Funbalugu malabag emu. ¹¹ Anway At-Rirukan nalong te, Nus nga sinu fag taw nu kafandiug tuwa sa Anya, di gafanaliyuan. ¹² Anway du e fagsamanun, dewa Taw-Naseg ay dewa at Yud-Naseg-Fag-Taw. Sadi tuwa at Fun tagmagurang fagayu. Ay ngayu tuwa At famanyun sas fagayu taget siginan Anya. ¹³ Anway At-Rirukan nalong yangay te, Fagayu taget siginan tam Fun umbalabag tuwa. ¹⁴ Dewa katanya, tain ro sik taw nu mafaet sa Anya, nu dway kafandiug. Ay tain ro sik taw nu mfandiug sa Anya, nu dway batang gdungug. Ay tain ro sik taw nu dumungug, nu dway e takamoyung. ¹⁵ Ay tain ro sik takamoyung nu gfoyung, nu dway e nasugu anya. At-Rirukan nalong yangay te, Masine tuwa sik taw nu glo laman nanfoyung at Masine-Fag-Barita sa tibak taw. ¹⁶ Dewa e takamoyung, bunwa fagayu at Taw-Tagagbuan at nafaning sa at Masine-Fag-Barita. Kata Funbalugu-Nabalabag at longan ebi te, Ku Fun, sinu takafandiug sa em nafoyung anya. ¹⁷ Nu katanya, at fakafandiugan siginan at nadungug. Ay at fagdungugan siginans Fagtayukan At longan. ¹⁸ Ay katsi ginto aw te, Go Taw-Tagagbuan dia nadungug. Ay go muag. Muag, nadungug wan. Madyay At longan indasug wa sas fagayu talun. Ay anggan at foyungan indasug anggan sas fungfung daga. ¹⁹ Ay gdog kyangay ginto te, Go manga Taw-Tagagbuan dia nasaful. Ay go muag. Muag, nasaful wan. Ku-Unga at taguna at famalus te, Nanfalabianan ban Aw ayu sa sik ngay taw at yud maful sa sik fun. Ay nanfadotaman ban Aw ayu sa sik talun at ngay taw at yud mamatanganan. ²⁰ Ay anggan Funbalugu-Nabalabag dua kapla nu nafoyung te, At taw dewa yud gsarap Angku, nasaful wa Angku. Ay insure Akyangay sa anya, sa at yud get Angku. ²¹ Ay Funbalugu At longan sas Taw-Tagagbuan baliwa te, Fagngabak menit gfalugde Akwa Ku take te, Stei. Katanya Ku longan sa at yud gfaning ay sa takamabo fag ngay taw.

¹ Nu katanya, katsi ginto kyangay te, Go Funbalugu kalimata way At filian fag ngay taw, Taw-Tagagbuan. Go igdi. Igdi long. Anway aw sik Taw-Tagagbuan akyangay. Ay aw yangay at sadi Abrayam at kadagdagan siginans Tagagbuan at baguama at ngayan, Sik-Baguama-Sa-Ku-Siun. ² Funbalugu di kalimata ebi taguna At filian fag ngay taw. Go du am nasaful At-Rirukan sa baliwas Funbalugu At taglong at ngayan, Funbalugu-Tam-Taw-Yabi-At-Masine. Anway kanya matvngvd nu get sas Funbalugu laman nanfauri at ngay Taw-Tagagbuan te, ³ Ku Fun, ka fag ngay taw nafate wan Am ngay taglong. Ay manga narasras wan at ngay fagyagoan anyun sa Emu. Ay katsi aw way sesadi at sawad. Ay katsi kanya gafateun yangay anggan angku. ⁴ Ay tain Funbalugu at famalus sa At taglong. Ay At famalus te, E, idia. Ku fagdingdingun Ku ngay taw, 7000k taw. Ay kayu niya at yud inlub ay igseg sa ka fag taw yabi at mauri at ngayan te, Tagagbilug-Tam-Daga. ⁵ Katanya yangay katsi. E sik afud yangay taw Funbalugu At nafili, anway nafamanyun anya. ⁶ Ay Funbalugu At fagnafiliun sik taw antuwa siginans Funbalugu At famanyun, ay bundi siginans sik taw at masine fag fagbulun. Anway nu nafili nut siginan way sik taw at masine fag fagbulun, kanya bunwa siginan At famanyun. ⁷ Taw fakatanyaun. Taw-Tagagbuan at fagyudun nafabul at fagsarapun. Funbalugu way At nafili fag ngay taw at nafabul. Ay at tibak Taw-Tagagbuan dua gadunguganun. ⁸ Kata yangay At-Rirukan at longan te, Funbalugu nafabuslugan kanya fag ngay taw laman du e fagamatanganun. Ay anggan nafaarum at mata laman dua glag. Ay anggan yangay nafabungul anya te, laman dua gdungug. ⁹ Ay anggan ebi fun Fakafanyuun nalong yangay te, Nafabayan nafauri ka fag ngay taw te, At ngay yafun daul dewa ban kata sik balud. Ay dewa kata sik awatan, Ay dewa kata sik lusung. Ay anggan dewa kata sik faurianan taginfolian. ¹⁰ Ay nafabayan yangay te, At mata dewa ban inkarum laman dua glag. Ay at guyuy dewa ban mabarukung faggugat. ¹¹ Katanya wayay, ginto kyangay te, Go Taw-Tagagbuan intaid wayay ay taba wa ban magfuan faggugat. Go igdi. Igdi long. Taw Tagagbuan at nafamaboan at masuad te, laman at Yud-Naseg-Fag-Taw umbalabag ban. Ay katanya tuway, Taw-Tagagbuan galabian anya. ¹² Ay Taw-Tagagbuan at nafamaboan at masuad te, nanfadasug at famanyun sas fagdaul daga at ngay taw. Ay at fagnababawanun at masuad te, nanfadasug at famanyun sa at Yud-Naseg-Fag-Taw. Amatangani seyu nu kin, at famanyun ban sas fagayu taw ayu yap ban fiya fiya ebia taw, gina ban at ngay Taw-Tagagbuan umbalabag. ¹³ Katsi nanlong aw sa ayu, at Yud-Naseg-Fag-Taw. Anway aw wan At-Suguan sas fagayu at Yud-Naseg-Fag-Taw. Ay igfoyung aw ku fagusegananun sa ku fagbulun. ¹⁴ Laman nanfalabianan aw sa ku kalongan, Taw-Tagagbuan. Nu ndain at tiba umbalabag yay manga. ¹⁵ Funbalugu At faginlimataun sas Taw-Tagagbuan, at masuad, laman tibak taw umkaakbang sas Anya. Amatangani nu kin. Nataw at masuad Funbalugu At fagnafakbangun Taw-Tagagbuan sa anya. At masuad kata sik taw at nadog gleleg. ¹⁶ Nu e nafon at fasadik ramyuk fafa sas Funbalugu, e masuad yay sas Funbalugu fagdaul ka fag fafa. Ay nu e nafon sik lalid kayu sas Funbalugu, anggan at sanga e masuad yangay sas Funbalugu. ¹⁷ E nalifung sik kayu ulibu-tanum at sanga tiba. Ay e nafasugfun yangay sik ulibu-talun at salingsingan sas ulibu-tanum. Laman at safa siginans ulibu-tanum nafatvngvd ulibu-talun at salingsingan at nafasugfun. Taw-Tagagbuan kata yangay ka fag ulibu-tanum at ngay sanga. Ay, o at Yud-Naseg-Fag-Taw, kata yangay o ka fag ulibu-talun at salingsingan at nafasugfun. Laman e fanambagun yangay o gasfuan Taw-Tagagbuan tagsanya. ¹⁸ Nu katanya o, lag kalimata sa at nalifung fag ngay sanga. Nu kalimata yay o anya, amatangani te, go sangay o wan tagfatvngvd sa at lalid. Go yaya. Yaya, anway at lalid tuwa tagfatvngvd emu. ¹⁹ Ay nabalus o te, At fagnalifungun tibak sanga laman aw way at masugfun. ²⁰ Katanya wa ngaro fiya. Fakatanyaun ay, at fage nalifungun anya anway kanya dua kafandiug. Ay o, am faginsugfunun anway kafandiug tuwo. Dewa katanya, lag gfalabi sa am amatanganan. Alimui tuwa. ²¹ Anway Funbalugu nu di gfabayan at sanga turungan, Kanya di gfabayan anggan emu. ²² Amatangani Funbalugu At fakafanyuun ay anggan At fagfandotamanun. Matvngvd Funbalugu nu kadotama sanya fag taw at magfuan anway e asalanan. Ay matvngvd yangay At fakafanyuun sa emu nu antuwo igfatunglus sas Funbalugu At fakafanyuun nu gfaning tuwo Anya. Ay nu dway o nafatunglus, e lumifung yangay emu. ²³ Ay Taw-Tagagbuan, kata ebi at nalifung fag sanga, nu gdi gfatunglus sa at fagyudun kafandiug, nanfafoli yangay sa ebia taw. Anway Funbalugu mafafasugfun yangay anya. ²⁴ Ebi o kata way o siginan sik ulibu-talun, ay e nafasugfun emu sa sik ulibu-tanum, dewa yud katanya fiya ka fag kayu. Nu katanya, amafali yap kanya fag ulibu-tanum ebia taw at nalifung fag sanga urungan nu gdog yay kasugfun sa ebia taw fag ulibu-tanum. ²⁵ Ku ngay fadugsay, kaumsig aw nu sumaful am tuy fag masuksukan fag longan, laman du am gfalabi te, ami sik mamatanganan tuwami. Ka fag longan at masuksukan te, tibak Taw-Tagagbuan dua gadunguganun yap ngay fagayu at nafili fag Yud-Naseg-Fag-Taw gfaning sas Fagtayukan. ²⁶ Ay nu katanya long, anggan fagayu Taw-Tagagbuan umbalabag yangay. Anway At-Rirukan nalong te, Umdasug ban sik Tagbalabag siginans fulan Malanggangan. Ay Kanya nafaliam Taw-Takamilug at kadagdagan at mauri. ²⁷ Katanya ban Ku fatuyanan kaduge Aw nanfaliam at asalanan. ²⁸ Taw-Tagagbuan gfalimatan tuway sas Funbalugu sa at Masine-Fag-Barita baliwa. Ay katanya tuway, e fanambagun yangay am. Ay roro sa baliwa At nafilian, Funbalugu kesug tuwa at Taw-Tagagbuan, anway sa At nafatuyanan ebi sa at ngay aguyangan. ²⁹ Anway Funbalugu nu nafon wan ay nu nafili wan, bandi dua gfasaman. ³⁰ Ebi sik takamabo yay am sas Funbalugu. Ay katsi Funbalugu kafanyu tuwa ayu, anway siginans Taw-Tagagbuan at nafamaboan. ³¹ Ay katsi Taw-Tagagbuan at fagnafamaboun at masuad te, laman ban Funbalugu kafanyu yangay anya, kata Funbalugu nu kafanyu ayu. ³² Anway katsi Funbalugu nafabayan yay fagayu taw te, laman fagayu taw sa yays fakamaboun. Laman bandi Funbalugu mamanyun yangay sas fagayu taw. ³³ Ngayu tuwa Funbalugu At famanyun. Ay Kanya mamatanganan tuwa. Ay manga e fagsafulun tuwa dawdaw. Du e taw maasaful Funbalugu At ngay fasadan. Ay manga du e taw mafafoyung At ngay ugali. ³⁴ Sinu sangay tagsaful sas Funbalugu At amatanganan. Ay manga sinu at mafafoyung sas Funbalugu. ³⁵ Ay manga sinu at mafafon sas Funbalugu te, laman Funbalugu e bedan sa anya. ³⁶ Anway Funbalugu yay At naawat fagayu. Ay Kanya yay tagfatvngvd fagayu. Ay anggan laman Funbalugu e fanambagun siginan anya. Gseg watam sas Funbalugu faggugat faggugat. Kin, katanyai tuwa.

¹ Ku ngay fadugsay, anway matvngvd Funbalugu At fakafanyuun, matvngvd nu nalong aw sa ayu te, Foni ay bilug at fagmabitsugun sas Funbalugu. Kata sik tagleleg fag anyun. Laman sas Funbalugu yakman fag sadi, ay laman gkasakan sa Anya. Ay manga te, katanya tuwa nu gseg am sas Funbalugu. ² Ay lag gfaning ste swa daga at ngay ugali. Ay fabagui tuwa ay amatanganan ay manga ay ugali fasamani wan. Laman sumaful tuwam sas Funbalugu At fakaumsigun. At masuad te, tain at masine, ay at kasakan sas Funbalugu, ay manga at matuyan fagayu. ³ Funbalugu nafamanyun tuway sa angku, laman nanfoyung akyangay sa ayu fagayu te, lag gfandaragang sa am amatanganan te, aw wan at tiba tungud, nu bunway o tiba tungud. Nu gamatangan o sa emu, at matuyan yakman fagayu. Laman am amatanganan nus nga setvngvd yakman Funbalugu At nafon emu fag fakafandiugun. ⁴ Sik taw at bilug ngayu at afud. Ay fagayu afud saman wan at fagbulun. ⁵ Itam takafandiug dewa tam ngayu, kata way tam sik bilug, anway insadi sas Fagtayukan. Fagayu tam at maful kata tam sik bilug at afud tagsadsamanan. ⁶ Ay nu sik taw wan, saman wan at nabul Funbalugu At nafon, nus nga setaw wa Funbalugu At famanyun sa anya. Ay katanya tuway, fagbuluni wa nus nga setvngvd am fagmafabulun. Funbalugu At nafon emu laman nanfoyung o Funbalugu At longan, foyungi wa nus nga setvngvd am fakafandiugun. ⁷ Ay Funbalugu At nafon emu nu sik tagtarabang o am iba, tarabangi wan. Ay At nafon emu laman nu sik takamoyung, nanfoyungi wan. ⁸ Ay Funbalugu At nafon emu nu sik tagfatvngvd am iba at amatanganan, fatvngvdi wan. Ay Funbalugu At nafon emu nu sik takamon o sa am iba, famoni wan. Ay Funbalugu At nafon emu nu sik tagmagurang, maseganamai. Ay Funbalugu At nafon emu nu sik takafanyu, fangafanyui tuwa ay useganani. ⁹ Matuyani tuwa ay fakafanyuun. Ay alimatai sa at mauri. Ay esugi sa at masine. ¹⁰ Ay adkafanyuani kata nu dugsay am. Ay mafalii nu kedkesugan am. ¹¹ Ay dangai gfafanaloun nu gfagbulun am. Ay fainkugatani tuwa nu gfaning am tam Fun. ¹² Ay useganani tuwa kaduge am gfanya. Ay sungatani tuwa dewa e gfauri emu. Ay darangini tuwa faggugat. ¹³ Ay foni tuwa sas Funbalugu At ngay taw snga ginain nu gayudan. Ay fasakboi tuwa nu bagu kadasug. ¹⁴ Ay darangini laman Funbalugu kafanyu sa tagfauri ayu. Ay am lag kadotama anya. ¹⁵ Ay useganani fasfuani sa sik taw taguseganan. Ay sa sik taw takabalu, anggan am abalui. ¹⁶ Ay asadii ay amatanganan. Ay dangai gfangalimata sa ay iba. Ay fasulitanani tuwa sa sik taw at yud katvngvd tiba. Ay lag gfalabi sa ay amatanganan te, ami sik mamatanganan wami. ¹⁷ Ay lag gfabali nus nga sinu at ke mauri sa ayu. Ay nu gfagbulun am, katai tuwa at ngay taw at fakaumsigun at masine. ¹⁸ Ay nu mabanwan am, e fagmanabayanuni tuwa sas fagayu taw. ¹⁹ Ku fakafanyuun fag ngay taw, lag gfabali nus nga sinu tagfauri ayu. Fabayani wan Funbalugu yay ban tagfauri anya. Anway At-Rirukan nalong te, Aw yay ban tagfabali. Ay Aw yay ban tagfafoli at ngay mauri sa at mauri fag ngay taw, Funbalugu nalong te. ²⁰ Ay katanya wayay, Takadotama ayu nu kalunus, faoni anya. Ay nu kadanum, fainumi anya. Anway nu katanya tuwa ay fagbulun, gfaplan am anya. ²¹ Lag galabawan at mauri. Am baboi tuwa at mauri. Ay ay fanbabo siginan wa ay fagmasineun.

¹ Fagayu tam faningi tam ngay fun si tam talun. Anway dua ro e magurang Funbalugu nu dway nafat sanya. Funbalugu tuwa At ke fasadan At nafili tam ngay fun. ² Ay nu katanya, sik taw nu kamabo way sa at fun si at talun, kamabo way sa tam Funbalugu At nafili. Ay nus nga sinu takamabo, e gfauri ban anya. ³ At ngay fun dua gfalimuanan at ngay taw nu masine tuwa at fagbulun. At ke mauri way at fagbulun takalimu. Go kaumsig o nu gyud o e fakalimuun am fun. Nu katanya, faningi at masine ay am fun guseganan tuwa emu. ⁴ Am fun tam Funbalugu wa At fanuguan, laman gfadasug at masine sa emu. Roro ngap nu mauri way am fagbulun, alimui. Anway am fun e fagmadaragangun wa fiya. Ay kanya Funbalugu At fanuguan, laman gfadasug Funbalugu At fandotamaan sa at mauri fag taw. ⁵ Ay nu katanya, faningi am fun si tam talun. Laman di gfadasug sa emu Funbalugu At fandotamaan, ay anggan laman di o e fakabaluun te, mauri way o. ⁶ Ay katanya yangay at masuad, nu nafon am ay famanyun sa ay ngay fun. Anway ka fag ngay fun, Funbalugu At fanuguan kaduge gmagurang at ngay taw. ⁷ Salii wan nu e bedan yay am. Ay bedan nu sik famanyun sa ay fun, salii wan. Ay ay bedan nu sik famanyun sa ay fun anway sa ay daga, salii yangay. Ay ay bedan nut sa nu gseg am ay fun, segi anya. Ay ay bedan nut sa nu kesug am anya, esugi anya. ⁸ Fasalii wan ay bedan nus nga nday fag taw. Ay bedan anyakman adkafanyuani. Anway nus nga sinu takafanyu sa at iba, katanya igfaning wa sa Ku-Unga At-Longan. ⁹ Ku-Unga At-Longan te, lag kamayun, ay lag gfate, ay lag kamul, ay lag galabian, ay anggan nus nga nday tiba Funbalugu At longan, kanya fagayu fagayu at masuad te, esugi am iba katvngvd nu kesug o emu. ¹⁰ Sik taw nu kesug tuwa at iba, di gfagbulun at mauri sa at iba. Nu katanya, at takesug igfaning wa fiya sa Ku-Unga At-Longan. ¹¹ Katanyai tuwa tam fagbulun, anway nasaful watam te, dua ban glugo. Mafuluwani wan anway tam fagbalabagun fag ngay menit gadasugun wan. At kadugayan katsi ban dua kaduge siginan ebi nu bagu tam kafandiug. ¹² Makbang wan at yabi nu gakayamagun. Ay at menit gakasureun wan. Ay gubun watam tam fagbulun tagsisad marum. Ay buli wa tam tam ngay famalabag laman tam famabarangian at mauri gina swa menit. ¹³ Ay tam ngay ugali masinei tuwa, kata gina swa menit. Lag kaful sa at yud maabaris fag ngay taw te, anam nangasigun. Ay lag kamalabiun sa sik mangena ay sa sik mangama. Ay lag kamayun. Ay lag gfaringangan. Ay lag galabian si am iba at fagagbilugun. ¹⁴ Ay am, faudgufudan tam Fun Isus wa Fagtayukan tagdingding antam. Ay lag gamatangan ay bilug at fagalabianun laman di am nanfaning.

¹ Fasulitanani tuwa ay iba dewa gyud matvngvd nu kafandiug. Ay ay famasulitanan lag sas famaringangan baliwa. ² Sik taw gamatangan te, dewa aw kon nus nge wain. Ay tibak taw at yud matvngvd nu kafandiug, gamatangan yangay te, lag aw kon faknul. ³ Ay ka fag taw dewa kon nus nge wayin, lag kalimata sa at yud kon. Ay at yud kon, lag kalimata at fagbulun sa takon te, mafurat am ugali. Anway tam Funbalugu kaumsig tuwa dewa takon. ⁴ Ay sinu o, go nu gfasad o, mafafalong o sa am iba fanuguan te, mafurat ay ate masine am fagbulun. Go yaya. Yaya long. Kanya tuwa fag fanuguan at fun at mafafalong. Katanya yangay sik takafandiug at ugali. Tam Fun mafafatvngvd yangay at takafandiug laman matvngvd. ⁵ Sik taw gamatangan te, sik menit nu masine glabi yay tibak menit nu masine. Ay tibak taw gamatangan yangay te, kata yay at sadi fagayu menit. Roro nus nga se taw nu gfasad am, asafuli tuwa te, katanya at masine. ⁶ Sik taw at fagnafiliun sik menit, laman e gseg Funbalugu. Ay katanya yangay sik taw takon faknul, laman e gseg yangay Funbalugu. Ay kanya guseganan sas Funbalugu. Ay sik taw dewa gyud kon faknul, at masuad te, laman e gseg Funbalugu. Ay anggan kanya guseganan sas Funbalugu. ⁷ Di tam e taw si antam katanya te, laman at faglelegun sa nu anya way mandi. Ay nu nkate wan, bunwa te, tiba nanfabayan way anya. ⁸ Tam faglelegun laman tam Fun antuwa e fanambagun. Ay dewa tam inkate, laman tam Fun e fanambagun yangay. Katanya tuway, dewa tam gleleg ay dewa tam inkate, tam Fun watam At taw. ⁹ Katanya tam Fagtayukan At faginkateun ay At fagnadogun gleleg. Laman kanya tuwa fagayu taw at Fun, sa at kinkate ay sa tagleleg. ¹⁰ Taw ro am fagnanfoyungun sa tibak taw te, am fadugsay at fagbulun mafurat way. Ay taw ro am fakalimataun sa am fadugsay. Anway fagayu ban tam suma yay tam tam Funbalugu At Fagnansarapan-Asalanan-Fag-Faglunggungan at akbang. ¹¹ Anway At-Rirukan nalong te, Funbalugu nalong te, Aw wan At nafatuyanan te, Fagayu taw ban umlub sa Ku akbang ay sumeg Angku. Ay fagayu moyung ban sa tiba sa Angku baliwa te, Aw wan Funbalugu. ¹² Nu katanya, moyung ban tam sumesadian tam fagbulun fagayu sas Funbalugu. ¹³ Nu katanya, lag tam fodfoyungan tam iba at fagbulun sa tibak taw te, kanya mafurat way. Roro ngap, masine nu gamatangan tam te, laman dangai gsalag ay dangai gfe asalanan tam fadugsay. ¹⁴ Anway nasaful kwa fiya fiya siginan tam Fun Isus te, nus nge wain fag fakonun du e mafafurat taw. Roro ngap sik taw nu gamatangan way te, tuy fag fakonun mafurat way sa angku, kin, ka fag fakonun gfafurat wa fiya sa anya. ¹⁵ Am fadugsay nu kalimata way am naonan, o du o kafanyu anya. Lag gfe asalanan am fadugsay siginan am fakonun. Anway tam Fagtayukan At faginkateun laman am fadugsay e fanambagun. ¹⁶ Mamatangani tuwa am fagbulun at masine, laman tibak taw di gayup te, ka fag taw at fagbulun mauri way. ¹⁷ Anway Funbalugu-Nu-Gmagurang-Taw bundi sas fakonun ay sas fanginum fagtvngvd. At masuad antuwa sas fagfaningun sas Funbalugu ay sas fagmanabayanun ay sas fagusegananun siginan At-Masine-Fag-Falad. ¹⁸ Anway nus nga sinu fag taw nu gfaning tuwa sas Fagtayukan takatanya tuwa at fagbulun, Funbalugu kaumsig tuwa anya. Ay anggan tibak taw gseg yangay anya anway at fagbulun. ¹⁹ Ay nu katanya, tanan tam faseganamaun laman manabayan tuwa tam ay gfadfatvngvdan tam tam fakafandiugun. ²⁰ Lagi yap kon ka fag fakonun nu gfaliaman way Funbalugu At fagbulun. Dewa katanya, fagayu fakonun masine tuwa. At mauri, sik taw nu gfe asalanan way tibak taw siginan at naonan. ²¹ At masine ngap, agi yap kon faknul, ay agi yap ginum siginans uwat buadan safa nu gfe asalanan way am ay fadugsay. Ay lag e fagbulun nus nge wain, nu gfe asalanan way am anya. ²² Nu katanya, nus nga se taw am amatanganan sas fakonun ay sas fanginum, lag gfasaful sa am iba. Sas Funbalugu yakman am faglongan. Ka fag taw guseganan tuwa nu nasaful tuwa te, da kdi e asalanan, anway gfaning tuwa sat masine fag fagbulun. ²³ Anway sik taw nu gfaduwa way at amatanganan gina ganangonun, e tumap anya te, sik tagasalanan way, madyay kon way. Anway nu nda kanya dua bangan kafandiug, nu kon yay. Fagayu at fagbulun nu dway gfaning sat fakafandiugun, kanya asalanan way.

¹ Nus nga sinu tam at matvngvd takafandiug, tarabangi tam iba at yud matvngvd at fakafandiugun. Ay tam fagfaningun dangai sa tam fasadan mandi. ² At masine fauseganani tuwa tam iba, laman kaugat tuwa at fakafandiugun. ³ Madyay anggan tam Fagtayukan At fagfausegananun bundi Anya mandi. Kata At-Rirukan at longan te, Ka fag ngay taw at famalingun sas Funbalugu indasug wa sa Angku. ⁴ Anway fagayu ebi At-Rirukan at fagnarirukun sa antam, laman at famasaful antam. Laman e fagsegun ban tam. Anway siginan At-Rirukan tam fagmadaragangun laman maasungatan tam, ay tagfatvngvd sa tam amatanganan. ⁵ Ay Funbalugu sik tagfon sik fagmaasungatanun ay sik fagmatvngvdun. Kanya At mon ban nangus sa ayu ay fagmasadiun ay ay fagmanabayanun, anway gfaning wam sas Fagtayukan Isus. ⁶ Laman kaduge am gseg tam Funbalugu, tam Fun Isus Fagtayukan At Tama, masadi tuwa ay amatanganan ay ay longan. ⁷ Fagayu takafandiug, fasulitanani nu e bagu kadasug, kata tam Fagtayukan nu kafanyu ayu. Laman e gseg tuwa sa tam Funbalugu. ⁸ Ay igfoyung aw ayu te, Fagtayukan infanuguan sasa ngay Taw-Naseg. Laman nanfoyung te, Funbalugu At longan matuyan tuwa. Ay laman Funbalugu At fatuyanan sas Taw-Naseg at aguyangan umgurungan wa fiya. ⁹ Ay laman anggan at Yud-Naseg-Fag-Taw sumeg yangay sas Funbalugu, anway Funbalugu At fakafanyuun. Kata At-Rirukan at longan te, Nu katanya, igfauseganan aw Emu gfasfuan sa at Yud-Naseg-Fag-Taw. Ay gdanyu aw igseg aw Emu te, O At madaragang. ¹⁰ Ay At-Rirukan nalong yangay te, Useganani, am at Yud-Naseg-Fag-Taw, fasfuani Funbalugu At ngay taw. ¹¹ Ay At-Rirukan nalong yangay te, Segi yangay sas Funbalugu, fagayu am at Yud-Naseg-Fag-Taw. Danyui sa Anya, am fag ngay taw fagayu. ¹² Ay Funbalugu-Nabalabag, Funbalugu At taglong, nalong yangay te, Umdasug ban sik kadagdagan siginans Sik-Ama-Madaragang. Ay e nafatiba tungud Anya, laman nanmagurang at Yud-Naseg-Fag-Taw. Ay siginan Anya at Yud-Naseg-Fag-Taw e fagsegun ban. ¹³ Tam Funbalugu wan At nafon sasa ngay takafandiug at fagmaafanyaun. Kanya nangus At mon ayu ay fagusegananun dawdaw ay anggan ay fagmanabayanun, kaduge am kafandiug sa Anya. Laman matvngvd tuwa nu gfanya am, anway At-Masine-Fag-Falad At fagmadaragangun si wa ayu. ¹⁴ Ku ngay fadugsay, e fagafanudun aw sa ayu te, e fagmasineun tuwam. Ay manga e fagsafulun wam. Ay anggan mafafoyung wam sa ay iba. ¹⁵ Dewa katanya, anway Funbalugu nafamanyun sa angku, ay da kua kapla igriruk sa ayu ay nanfaamatang akyay ayu tibak foyungan. Laman di am kaliam. ¹⁶ Funbalugu At fagnafamanyunun sa angku anway aw wan Fagtayukan Isus At fanuguan. Ay kata akyangay sik taganyun ay nanfoyung aw at Masine-Fag-Barita sa at Yud-Naseg-Fag-Taw. Laman anggan at Yud-Naseg-Fag-Taw kata sik anyun, gkasakan sas Funbalugu. Anway At-Masine-Fag-Falad tagfasadi anya sas Funbalugu. ¹⁷ Nu katanya, guseganan aktuwa ku ngay fagbulun sas Funbalugu baliwa anway masadi aktuwa sas Fagtayukan Isus. ¹⁸ Aw da kwa gananfoyungun tiba ku fagbulun. Ku foyungan antuwa, Fagtayukan At nafon angku fag fagbulun. Madyay at Yud-Naseg-Fag-Taw nafaning Funbalugu siginan ku nafoyungan ay anggan ku fagbulun. ¹⁹ At Yud-Naseg-Fag-Taw at fagfaningun ay, siginan at madaragang fag fagbulun ay at ke masuad fag fagbulun siginan At-Masine-Fag-Falad At fagmadaragangun. Nu katanya, nafoyung akwan Fagtayukan At Masine-Fag-Barita sas fagayu talun siginan ngays fulan Erusalem anggan sas talun Iliriku. ²⁰ Ku fasadan faggugat nu gfoyung aw at Masine-Fag-Barita sa ways talun at gyud batang gdungug Fagtayukan At ngayan. Anway kua kaumsig nanbale sa tibak taw at naturuk. ²¹ Gfaning aktuwa At-Rirukan at longan te, At yud batang e gfoyung sas Fagtayukan baliwa, sumaful yay ban sa Anya. Ay at yud batang gdungug sas Fagtayukan baliwa, sumaful wa ban fiya. ²² Fakatanyaun at masuad ku faglugoun nu kadasug aw sa ayu. Gasalagan aw anway ngayu ku fagfoyungan fag ngay talun iste. ²³ Roro mangaro, du e talun iste laman nanfoyung aw. Ay ebi glugo wan nu ganansiboun aw ayu. ²⁴ Nu katanya, ku fasadan katsi, nandalan aw ayu gina ban aw glo sas talun Espanya. Ay gina ban aw indasug sa ayu, guseganan aw gufud ayu. Ay nu glo aw sas talun Espanya, kaumsig aw nangus ay fanarabangun sa angku. ²⁵ Roro katsi guli kyay sas Erusalem. Nanguba akyay tibak taw at famanyun sas Funbalugu At ngay taw sanya. ²⁶ Anway at Yud-Naseg-Fag-Taw at takafandiug sas talun Masedunia ay sas talun Akaya, kaumsig nanfon at fantarabang sas Taw-Naseg, Funbalubu At ngay taw, at yud e kwa sas Erusalem. ²⁷ At Yud-Naseg-Fag-Taw guseganan igfon. Ay kin wa fiya, at tagfon kata e bedan sas Taw-Naseg. Anway ebi Taw-Naseg nafoyung at Masine-Fag-Barita sa at Yud-Naseg-Fag-Taw. Laman kanya nabul tuwa sik fagmasineun siginans Funbalugu, kata Taw-Naseg at fagmasineun. Ay katsi masine kanya nu gtarabang Taw-Naseg siginan at fagmabalanun ste swa daga. ²⁸ Nu ntabu wa ku fagbulun sas Erusalem, ay nu nafon akwa at nafaful fag famanyun sanya, natunglus akwa sas talun Espanya. Ay dumalan akban ayu ginanya. ²⁹ Ay nasaful aw te, gina aw umdasug sa ayu, nanfat sa aw ayu sik fagmasineun ban dawdaw siginans Fagtayukan. ³⁰ Ku ngay fadugsay, matvngvd nu nalong aw ayu, anway kesug tuwam tam Fun Isus Fagtayukan. Ay anway tam fakadkafanyuanun siginan At-Masine-Fag-Falad te, tarabangan tam dumarangin gugat gugat sas Funbalugu. ³¹ Laman Funbalugu dumingding angku siginan at yud kafandiug fag ngay taw sas talun Naseg. Ay laman Funbalugu At ngay taw sas Erusalem kaumsig tuwa ku fagbulun ban sa anya. ³² Ay laman guseganan akyangay nu mdasug aw sa ayu, Funbalugu nu kaumsig. Ay ginanya ban kamato way tam. ³³ Tam Funbalugu, At tagfon fagmanabayanun, At nangufud nangus ayu. Kin, katanyai tuwa.

¹ Nanfoyung aw ayu te, masine fag mangena, tam fadugsay at ngayan At-Malayun. Kanya sik tagtarabang sas Funbalugu bale sas fulan Dawa. ² Fasakboi tuwa anya kata nu gfasakbo am tibak Funbalugu At taw. Ay tarabangi anya nus nge wain at nayudanan siginan ayu. Anway kanya sik tagtarabang sas ngayuk taw, ay anggan sa angku. ³ Igfadasug aw ku fagusegananun sa Sik-Fufuina-Sirut ay sa Takata-Sik-Biyo-Mabaludan te, gamatangan aktuwa ayu. Ka fag daduwa ku tagtarabang sas Fagtayukan Isus At fagbulun. ⁴ Ebi e gafateun way ka fag daduwa, gina gbalabag siginan tagafateun angku. Ay bundi aw fagsadi taguseganan anya. Ay anggan tuwa sas fagayu at Yud-Naseg-Fag-Taw at ngay Funbalugu bale at taw taguseganan yangay anya. ⁵ Ay gfadasug akyangay ku fagusegananun sa at ngay takafandiug, at maful sa ka fag daduwa at bale te, gamatangan aktuwa ayu. Ay anggan sa ku fakesugun fag taw at ngayan Maseganama te, gamatangan aktuwa emu. Kanya at taguna at kinfandiug sas Fagtayukan sas talun Asia. ⁶ Ay gfadasug akyangay ku fagusegananun sas Taglu te, gamatangan aktuwa emu. Anway kanya matvngvd nu e fagbulun sa ayu. ⁷ Ay anggan sas Tagbabo-Taw ay Unia te, gamatangan aktuwa ayu. Kanya ku kalongan Taw-Naseg ay ku ufud ebi sas bale fakasungsungan. Fagayu Isus At-Suguan naseg anya. Ay kanya naguna tuwa angku nu kafandiug sas Fagtayukan. ⁸ Ay gfadasug akyangay ku fagusegananun sa ku fakesugun fag taw sa tam Fun at ngayan Tagfadaul te, gamatangan aktuwa emu. ⁹ Ay anggan sa Sik-Taw-Malukme te, gamatangan aktuwa emu. Kanya tam ufud sas Fagtayukan At fagbulun. Ay anggan sa ku fakesugun fag taw at ngayan Sik-Baybay. ¹⁰ Ay gfadasug akyangay ku fagusegananun sas Apeles te, gamatangan aktuwa emu. Tiba at nalag at ugali nasaful te, kanya kesug wa fiya sas Fagtayukan. Ay anggan sa at ngay taw sanya si Sik-Takamoyung-Masine fag basad bale te, gamatangan aktuwa ayu. ¹¹ Ay anggan sa ku kalongan Taw-Naseg at ngayan Erudiun te, gamatangan aktuwa emu. Ay anggan sa at ngay takafandiug sis Narsisu fag basad bale te, gamatangan aktuwa ayu. ¹² Ay anggan sa Sik-Ina-Sirut ay sa At-Yud-Biya-Bangan te, gamatangan aktuwa ayu. Kanya e fagbulun sa tam Fun At fagbulun. Ay anggan sa ku fakesugun fag taw fag mangena at ngayan Fersida te, gamatangan aktuwa emu. Kanya maseganina sa tam Fun At fagbulun. ¹³ Ay anggan sa At-Mararay-Fag-Taw te, gamatangan aktuwa emu. Kanya tam Fun At nafili fag taw. Ay anggan sa At-Mararay-Fag-Taw at tina te, gamatangan aktuwa emu. Kanya kata ku mina. ¹⁴ Ay gfadasug akyangay ku fagusegananun sa At-Yud-E-Gfasud-Anya, ay sa Sik-Taw-Madangdang, ay sas Ermes, ay sas Fatrubas, ay sas Ermas, ay anggan sa at ngay takafandiug tagufud anya te, gamatangan aktuwa ayu. ¹⁵ Ay gfadasug akyangay ku fagusegananun sas Takaumsig-Gulit, ay sas Ulia, ay sas Tagagbilug-Lino, ay sas Tagagbilug-Lino at fadugsay fag mangena, ay sas Ulimpas, ay anggan sas fagayu Funbalugu At taw tagufud anya te, gamatangan aktuwa ayu. ¹⁶ Nu nafablang am ay iba, famatuani tuwa ay adkafanyuani tuwa. Ay at ngay bale fakafulan at taw ste igfadasug yangay at fagusegananun sa ayu te, gamatangan tuwami ayu. ¹⁷ Ku ngay fadugsay, matvngvd nu glong aw ayu te, Tagaki siginan at ngay tagfasaruwayan at ngay takafandiug, ay anggan tagfe asalanan. Kanya igsalag ebi ay nadungug at matuyan fag foyungan. Lag kaakbang anya. ¹⁸ Anway takatanya fag ngay taw dua gfaning sa tam Fun Fagtayukan. At fagfaningun sa ways fagalabianun baliwa. Ay at fanlongan dewa kata masine ay malukme, roro gfanluk sa at yud mamatanganan. ¹⁹ Ay nadungug wan nu gfaning am sa tam Funbalugu. Ay nu katanya, guseganan aw dawdaw sa ayu. Dewa katanya, kaumsig akyangay nu mamatanganan tuwam sa at masine, ay nu gdi am gfaning sas asalanan. ²⁰ Nu katanya, dua ban glugo tam Funbalugu, tam tagfanabayan, nu mabo Tagfansalag laman du e fagmadaragangan sa ayu. Tam Fun Isus Fagtayukan At mamanyun nangus sa ayu. ²¹ Tagseg-Funbalugu, ku tagtarabang sas Funbalugu At fagbulun, gfadasug at fagusegananun sa ayu fagayu te, gamatangan tuwa ayu. Ay Lusiu, ay Famafiya, ay anggan Sik-Tama-At-Ke-Nabalabag, ku kalongan Taw-Naseg, gfadasug yangay at fagusegananun sa ayu te, gamatangan tuwa ayu. ²² Ay anggan aw yangay, At-Fatuluan, at nagubuk Fandak nu griruk. Anway sik takafandiug akyangay, gfadasug akyangay ku fagusegananun sa ayu te, gamatangan aktuwa ayu. ²³ Aw, Fandak, namanwan aw sas Gayu bale. Ay sanya wan fagayu takafandiug nu maful. Ay anggan Gayu gfadasug yangay at fagusegananun sa ayu te, gamatangan tuwa ayu. Ay Sik-Nesugan, at fulan Kurintu at tagtanud-salafi, ay anggan At-Faufatan, tam fadugsay. Kanya fag duwama gfadasug at fagusegananun sa ayu te, gamatangan tuwa ayu. ²⁵ Gseg watam sa tam Funbalugu. Kanya At mafafatvngvd ay fakafandiugun. Igfadiuganan sa ku nafoyung ayu at Masine-Fag-Barita, ay anggan ku nafoyung ayu sas Isus Fagtayukan baliwa. Ay igfadiuganan yangay sa at kinsure fag masuksukan, ebi ebi taglugo nu masuksukan. ²⁶ Ay katsi insure wan siginan Funbalugu At ngay taglong ebi at narirukan. Ay nafasure at nasuksuk sas fagayu talun at ngay taw. Anway At Yud-E-Fakatabuan-Fag-Funbalugu At nasugu katanya. Laman ngayuk taw umfandiug ban ay maning ban Anya. ²⁷ Gseg watam tam Funbalugu faggugat. Tam Funbalugu way fagsadi At mamatanganan fiya fiya. Du e tiba. Gseg watam Anya, anway Isus Fagtayukan At fagbulun. Kin, katanyai tuwa.