Revelation

Revelation

¹ Tuy fag rirukan Isus Fagtayukan At foyungan siginans Funbalugu. Laman nanfoyung sa At ngay tagfaning Anya at yud glugo at kumdasug ban. Kata tuy Isus nu nafoyung sa angku, Uan, Isus At fanuguan. Kanya nasugu At tagbukngan at sadi sa angku. ² Nafatuyan akwan fagayu ku nalag siginans Funbalugu At longan ay siginans Isus Fagtayukan At fagbulun. Ay nanfoyung kyangay fagayu ku nalag. ³ Sik taw guseganan tuwa ban nu tumap di tuy fag rirukan laman tibak taw dumungug. Ay anggan at tagdungug ay tagfaning tuy fag rirukan guseganan tuwa. Anway makbang wan nu kadasug ku foyungan fag ngay menit. ⁴ Siginan angku, Uan. Ku fagrirukan sa yap ayu fag fituk Funbalugu bale at ngay taw sas talun Asia. E mamanyun nangus sa ayu, ay e nanfanabayan ayu siginan tam Funbalugu At tagleleg katsi, ay anggan ebi, ay anggan faggugat ban. Ay anggan siginan yangay At-Masine-Fag-Falad ke fituk ugali masine sas Funbalugu At akbang faglunggungan daul. ⁵ Ay anggan siginan yangays Isus Fagtayukan, tagfoyung at mafanud, ay anggan taguna tagdog gleleg, ay anggan tagfun sas fagayu fun daul sas daga. Kanya takesug antam. Ay At taguk at nafalfas antam siginan tam asalanan at fagmadaragangun. ⁶ Ay Kanya nafaful antam sa At-Fagmagurangan-Taw, laman fagayu tam, tam Fun tuwa tam At taganyun. Ay sik tagfaning yangay tam sa tam Isus At Tama, tam Funbalugu. Gseg watam sa tam Isus Fagtayukan, anway Kanya At tiba tungud at ke fagmasineun, ay anggan sik magurang faggugat faggugat. Kin, katanyai tuwa. ⁷ Amatangani. Tam Isus umdasug ban gasfuan sik linyabu. Ay fagayu taw lumag ban Anya, ay anggan ebi sigon at natubuk Anya. Ay fagayu fulan at ngay taw muyway wa mabaluanan anway sa Anya. Kin, katanyai tuwa. ⁸ Aw wan takata sik A ay anggan takata sik Ya, tam Fun tam Funbalugu nalong te. Kanya tagleleg katsi ay anggan ebi ay anggan faggugat ban. Ay Kanya Tiba-Tungud-At-Madaragang. ⁹ Aw ay fadugsay, Uan. Anway insadi watam sas Isus, aw wan ay ufud sas faurianan, ay sas Funbalugu-At-Fagmagurangan-Taw, ay anggan sa nu gsungatan tam. Ay ku faginsungsungun katsi sas furu Fatmus, anway nafoyung aw Funbalugu At longan ay Isus At fagbulun. ¹⁰ Sas Funbalugu At Fakamatoun-Menit At-Masine-Wa-Fag-Falad tagfaamatanganan angku. Ay nadungug aw kata sik budyung siginan ku guyan. Ay gbiya nu ge longan te, ¹¹ Riruki am nalag laman sik fagtapan. Ay faubai sanya fag fituk Funbalugu bale fakafulan. Sas fulan Efesu, ay sas fulan Lune-Fili, ay sas fulan Fergamu, ay sas fulan Tiatira, ay sas fulan Sardis, ay sas fulan Takesug-At-Fadugsay ay sas fulan At-Ngay-Taw-Nafili. ¹² Ay ku faginbilingun nanlinggat aw te, taw kanya tage longan sa angku. Ay inbiling kyama, ku nalag fituk fagfasayugan salung at fangawat sanbung fanumyu. ¹³ Ay sisad buknga fagfasayugan salung e malindug kata sik taw. E lanbung ngaba anggan sat darafa. Ay e lanbung yangay sik sanbung fanumyu sit dubdub. ¹⁴ Ay malagsi dawdaw At buk, katvngvd sik linyabu nu malagsi. Ay At mata nu malinggat katvngvd sik afuy nu gdamlag. ¹⁵ Ay At darafa katvngvd sik sanbung maraska nu madalusan, nu nafaraska sasad afuy. Ay Kanya nu ge longan, kadaul sik safa nu gfawas nu gbararusan. ¹⁶ Ay si At siun fag daluap mafagalumutan way fituk galeme. Ay insure siginan At bibig kata sik fiso at uyup wan fag duwa tigyangan. Ay sit tuwa mata katvngvd tam menit nu masulo. ¹⁷ Ay nu nalag aw Anya, inlufut aw sa At akbang. Ay kata akwa sik matian. Ay Kanya nafatayuk At daluap at siun sa angku ay nalong te, Lag kalimu. Aw wan takata sik Taguna ay anggan takata sik Taguyan. ¹⁸ Ay anggan Tagleleg faggugat. Inkate Akwan ebi, ay gleleg Akyangay katsi anggan faggugat ban. Ay Aw wan At ke fagmadaragangun dewa sas Fakateun ay dewa sa at Kinbul-At-Talun. ¹⁹ Riruki tuwa am nalag at kindasug katsi, ay anggan at kumdasug ban. ²⁰ Kata tuy at masuksukan at masuad sa ka fag fituk galeme, am nalag si Ku siun. Ay anggan sa ka fag fituk fagfasayugan salung at fangawat sanbung fanumyu. Ka fag fituk galeme at masuad te, fituk tagbukngan sanya fag fituk Funbalugu bale sas Asia. Ay ka fag fituk fagfasayugan salung at masuad te, ka fag fituk Funbalaugu bale.

¹ Riruki sanya fag Funbalugu bale sat tagbukngan sas fulan Efesu te, Kanya aro At tagalumutan ka fag fituk galeme sat siun, ay anggan At taglo sas buknga ka fag fituk fagfasayugan salung. Kata tuy At longan te, ² Nasaful Akwan ay ugali. Madaragang wa fiya nu gfagbulun am. Ay maasungatan yangay am. Ay nasaful Kyangay te, kalimata tuwam at mauri fag taw. Anway batang wam gfaskud ka fag ngay taw at longan te, ami Funbalugu wami At nafalo, ay roro yaya. Anway nalag wam te, kanya sik takamuag way. ³ Ay nasaful Akyangay te, ay fagmaasungatanun ay ay fagmaabarisun, anway kafandiug tuwam sa Angku. Ay di am mafanalo anggan sa ay amatanganan. ⁴ Dewa katanya, e fagalongunun Akyay sa ayu anway dua katvngvd ebi taguna nu kesug am Angku. ⁵ Amatangani tuwa anggan ebi taguna ay ugali. Ay fasamani yap ay ugali katsi, ay faningi yap kata ebi ay ugali. Nu dway am katanya, gina Aw umdasug, mul akwan ay fagfasayugan salung ste ginans fulan Efesu, nu dway am tumubus ay ugali. ⁶ Dewa katanya, e fagmasineun yay am sadi. Madyay kalimata tuwam at ngay Taw-Tagbabo-Tiba at ugali. Ay anggan Aw, kalimata Akyangay ka fag ngay taw at ugali. ⁷ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw. Nus nga sinu at nababo sat mauri, nanfon ban Aw anya at fagmadaragangun te, laman mafaon ka fag kayu at buadan at ngayan Tagfon-Leleg, sas Funbalugu-At-Fagfanafiyan. ⁸ Riruki sanya fag Funbalugu bale sat tagbukngan sas fulan Lune-Fili te, At taguna ay At taguyan, At kinkate ay At tagdog yay gleleg, kata tuy At longan te, ⁹ Nasaful Aw te, e gfauri way ayu ay du am e kwa. Ay dewa katanya, mabalan tuwam. Ay nasaful Akyangay te, mauri way ka fag ngay taw at longan sa ayu baliwa. Ay dewa nalong te, ami sik Taw-Naseg wami, ay roro yaya. At matuyan ka fag ngay taw at bale fakafulan sas Tagfansalag way. ¹⁰ Lag kalimu sat kumdasug ban fagfaurianan sa ayu. Takamuagan-Tiba-At-Fagbulun igfasungsung ban ayu tiba. At fagnasungsungun ayu anway te igfaskud ay fakafandiugan. Sik safulu bank menit nu e gfauri ayu. Sungatani tuwa, nus nga am umkate. Ay mon ban Aw ayu sik fanambagun fag sangbo at ngayan te, E-Leleg-Faggugat. ¹¹ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw. Nus nga sinu at nababo sat mauri, di ban umkate sas faduwak fakateun. ¹² Riruki sanya fag Funbalugu bale sat tagbukngan sas fulan Fergamu te, At ke fiso at uyup wan fag duwa tigyangan, kata tuy At longan te, ¹³ Nasaful Aw te, ay fagbanwanan sanya si yay Tagfansalag at fagmagurangan. Dewa katanya, kafandiug tuwam sa Angku. Ay di am naubun ay fakafandiugun sa Angku, dewa ebi kaduge Tagtubus-At-Tama, Ku takamoyung at matuyan, e nafate anya sa ay buknga sas Tagfansalag at talun. ¹⁴ Dewa katanya, e fagalongunun Akyay sa ayu. Ay am tiba igfaning way am Tam-Taw-Inkayu-Wan at foyungan. Ebi kanya nafoyung sas Takamamin. Laman Takamamin igfe asalanan at ngay Taw-Tagagbuan, gina gfamaumsiganan Taw-Tagabuan te, laman umon at anyun at nafon sas tawtawan, ay anggan kamayun. ¹⁵ Ay anggan am tiba igfaning way am at ngay Taw-Tagbabo-Tiba at foyungan. ¹⁶ Ubuni yap takatanya ay ugali. Ay nu dway am mubun ay ugali, umdasug Kyay sa ayu, ay nanbasing Akyay ban anya siginan Ku bibig fag fiso. ¹⁷ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw. Nus nga sinu at nababo sat mauri, nanfon ban Aw sa anya sik fakonun at yud batang e glag, at ngayan te, Taw-Tuy. Ay nanfon Kyangay anya sik batu malagsi e rirukan at ngayan bagu sanya fag batu. Ay du e gsaful ka fag ngayan, dasday ka fag taw at nabul ka fag batu. ¹⁸ Riruki sanya fag Funbalugu bale sat tagbukngan sas fulan Tiatira te, Funbalugu At Baguama At ke mata at malinggat katvngvd sik afuy nu gdamlag. Ay At darafa katvngvd sik madalusan fag sanbung maraska. Kata tuy At longan te, ¹⁹ Nasaful Aw ay ugali te, kesug tuwam, ay kafandiug tuwam, ay gtarabang tuwam, ay gsungatan tuwam. Ay nasaful Akyangay te, ay ugali katsi amasine yap ay ugali ebi gina am bagu kafandiug. ²⁰ Dewa katanya, e fagalongunun Akyay sa ayu. Anway gfabayan way am ka fag mangena at ngayan te, At-Yud-E-Mangama. Kanya nafoyung te, aw wan Funbalugu At taglong at sadi. Ay roro dewa glong katanya, at foyungan igfanluk way Ku ngay taw. Madyay kanya kamayun way, ay kon way at anyun at nafon sas tawtawan. ²¹ Nafanya Akyama ka fag mangena nu gubun at ugali at mauri. Yaya, kanya dua kaumsig gubun at fakamayunun. ²² Ay katanya wayay, Aw wa ban tagfe dailan dawdaw anya. Ay Aw yangay tagfauri ban dawdaw at natsa anya, nu dway natubus at ugali nu gfaning way sa ka fag mangena. ²³ Ay gfate Akwa ban ka fag mangena at ngay sisian. Laman fagayu Funbalugu bale at taw sumaful te, Aw gsaful Aktuwa taw at amatanganan ay at fakaumsigun. Ay nanfasure Akyangay ban nus nga setaw sik taw at ugali sa ayu. ²⁴ Ay am tiba sas fulan Tiatira, at yud gfaning ka fag mangena at foyungan at mauri, ay at yud gdungugan sas Tagfansalag at matvngvd at masuksukan fag mauri. Nalong Aw sa ayu te, da Kwa gfamut Ku longan sa ayu. ²⁵ Anway te, fatawadi tuwa ay ugali at masine dewa te da Kia ndasug sa ayu. ²⁶ Nus nga sinu at nababo sat mauri ay at nafaning Ku fakaumsigun anggan sas fakatabuan, nanfon ban Aw anya at fagmadaragangun te, laman mafamagurang ban sas fagayu talun at ngay taw. ²⁷ Katvngvd ebi Ku nabul fag fagmadaragangun siginan Ku Mama. Ay kanya gina ban igmagurang ka fag ngay taw, e famalang ban sik sanbung. Ay kanya nu gfalang sa sik takamabo, katvngvd nu nafayamas sik bisu daga. ²⁸ Ay mon Kyangay sa anya at Tagurabas. ²⁹ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw.

¹ Riruki sanya fag Funbalugu bale sat tagbukngan sas fulan Sardis te, Kanya At ke fagmasadiun sa At-Masine-Fag-Falad ke fituk ugali masine, ay At taggalumutan fituk galeme, kata tuy At longan te, Nasaful Akwan ay ugali. Dewa e gamatangan te, sik tagleleg wam, roro kata yay am sik matian. ² Afuloi wan. Ay fatvngvduni ay ugali at masine dewa alay sirut at sawad, anway gakaliamun wan. Anway nalag Akwa ay ugali te, di am gfaning fiya sa Ku Funbalugu At fasadan. ³ Fakayui tuwa at sadi. Fasudsudani ay ugali ay ay nadungug. Faningi ay nadungug, ay ubuni ay ugali at yud masine. Ay nu dway am umfulo ay maning, umdasug Akyay kata sik takamul nu kadasug, gina at tagbilug bale gtiug. Ay du am sumaful nu an Aw umdasug. ⁴ Dewa katanya, gsadsadian e sawad yay am at yud mafurat at lanbung. Ay kanya nangufud ban Angku nu e lanbung wa malagsi. Anway gkasakan tuwa at ugali at masine. ⁵ Nus nga sinu at nababo sat mauri, e fasulun ban sa anya sik lanbung malagsi. Ay faggugat da Kdi ban rumarus at ngayan siginan ka fag fagtapan at ngayan te, Kayu-Tagleleg-Faggugat. Ay nanfoyung ban Aw at ngay ngayan sa Ku Mama ay sa At ngay tagbukngan te, kanya Ku taw. ⁶ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw. ⁷ Riruki sanya fag Funbalugu bale sat tagbukngan sas fulan Takesug-At-Fadugsay te, At ke ngayan te, At-Masine ay At-Mafanud nagalumutan Fun Fakafanyuun at fanluang. Ay Kanya nu naluang wan, du e mafadingding. Ay Kanya nu nadingding wan, du e mafaluang. Kata tuy At longan te, ⁸ Nasaful Akwan ay ugali. Ay naluang Aw sik fandingding sakbawan laman masakbo wam, ay du e taw mafadingding. Nasaful Akwa te, dia matvngvd ay fagmabitsugun. Dewa katanya, nafaning tuwam Ku longan ay di am kamayud sa Angku. ⁹ Ay amatangani tuy Ku longan. Ka fag ngay taw siginan ways Tagfansalag at bale fakafulan at nafoyung te, ami sik Taw-Naseg wami, ay roro yaya. Sik ngay takamuagan way. Ay nanfat sa ban Aw ayu sanya fag ngay taw. Laman kanya sumeg ban ay umlub sa ay akbang. Laman kanya sumaful ban te, Aw wan Takesug ayu. ¹⁰ Anway nafaning tuwam Ku longan te, sungatani tuwa. Ay anggan Aw dumingding Aw ayu. Laman di ban umdasug sa ayu at faurianan ginanya fag ngay menit. Dewa ban at faurianan umdasug sas fagdaul daga, laman nanfaskud ban sas fagayu taw ste swa daga. ¹¹ Dua ban glugo nu kadasug Aw. Fatawadi tuwa ay ugali at masine, laman di ban e mago ayu at nafon ayu fag sangbo. ¹² Nus nga sinu at nababo sat mauri, nanfakata Aw anya sik turuk sa Ku Funbalugu At tagbvt fag bale. Ay kanya dua ban umyayu sanya ginan faggugat. Ay nanriruk Aw sa anya Ku Funbalugu At ngayan, ay Ku Funbalugu At fulan at ngayan te, At-Bagu-Fag-Erusalem, at kumdaga ban siginan Ku Funbalugu siginans Banwa. Ay anggan rumiruk Aw Ku ngayan bagu sanya fag taw. ¹³ Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw. ¹⁴ Riruki sanya fag Funbalugu bale sat tagbukngan sas fulan At-Ngay-Taw-Nafili te, Kanya At ke ngayan te, Kin-Katanyai-Tuwa, ay Kanya At mafanud ay At matuyan fag Tagfatuyan, ay Kanya At naawat fagayu Funbalugu At fagaawatun. Kata tuy At longan te, ¹⁵ Nasaful Aw fagayu ay ugali te, di am matis fiya fiya, ay ngapdi du am masugba fiya fiya. At masine nu masugba tuwa am, ay ate ngap matis iwan. ¹⁶ Ay kata way am sik safa at malukme. Nu katanya, mulub Akwa ayu siginan Ku bibig. ¹⁷ Dewa am nalong te, mabalan wami. Ay e kwa wami. Ay du ami e fagayudanun. Roro du am nasaful te, e fagafanawaun yay am. Ay sik mafanyu yay am. Ay du am e kwa. Ay du am glag. Ay du am e lanbung. ¹⁸ Ay katanya wayay, iglong Aw ayu te, masine nu gsali am siginan Angku ay sanbung fanumyu at sugba sasad afuy at nafasine. Laman e kwa tuwa ban am. Ay anggan buli sik ngay lanbung malagsi. Laman di am kapla ay iba te, malanu way am. Ay anggan manga buli sik lumad ay famafiya sa ay mata. Laman glag tuwa ban am. ¹⁹ Fagayu Ku nesugan fag taw igbaya Aktuwa anya ay igfegan Aw sigon anya. Ay anway katanya, maseganamai tuwa sat masine fag ugali ay ubuni ay ugali at mauri. ²⁰ Ay namalindug Aw sis day sakbawan bale ay gfadunguganan Aw. Nus nga sinu at nadungug Angku ay lumuang at sakbawan bale, sumakbo Aw sanya fag bale. Ay rodi gasfuan wami gfangon. ²¹ Nus nga sinu at nababo sat mauri, nanfon ban Aw anya at fagmadaragangun laman umlunggung ban gfasfuan Angku sa Ku faglunggungan daul. Kata yangay Aw nu gbabo Aw at mauri ay malunggung Aw gasfuan Ku Mama sa At faglunggungan daul. ²² Nu e talinga tuwam, dungugani sa At-Masine-Fag-Falad At longan sasa ngay Funbalugu bale at taw.

¹ Ay rodi manlag akdi sik sakbawan sas Banwa maluangan wan. Ay ka fag longan aro ku nadungug takata sik budyung, katsi gdog yay fiya glong angku te, Sakboi ste. Ay nanfoyung Aw emu at kumdasug ban. ² Ay rodi tv At-Masine-Wa-Fag-Falad tagfaamatanganan angku. Ay si ku akbang e sik fun at faglunggungan daul sas Banwa. Ay e malunggung sanya. ³ Ay At Malunggung sanya katvngvd sik batu at mameluan nu madalusan, ay anggan kata sik batu maraska. Ay sanya fag faglunggungan daul e gsafungan balango katvngvd sik batu at mameluan nu ganuno. ⁴ Ay sanya fag faglunggungan daul e gsafungan yay 24k faglunggungan daul. Ay at malunggung sanya 24k magurang. Ay at lanbung malagsi. Ay at sangbo sanbung fanumyu. ⁵ Ay siginan aro taguna fag faglunggungan daul nafangkilat ayuwayu. Ay e nae longan ayuwayu. Ay anggan natalafun ayu daw. Ay sanya fag faglunggungan daul at akbang e fituk salung gigang. Kanya fag ngay salung, Funbalugu At-Masine-Fag-Falad At fituk ugali at masine. ⁶ Ay sanya fag faglunggungan daul at akbang e kata sik lino malio ay kata sik batu tagtalfusan nu kalag. Ay sanya fag faglunggungan daul e masafungan yangay sas ufatk suluk, ufatk tagleleg. Ngayu at mata sa at ngaba bilug, dewa sat salubangan ay dewa sat guyuy. ⁷ At taguna tagleleg kata sik idu daul tagfangagat. Ay at faduwak tagleleg kata sik baka. Ay at fatuluk tagleleg at mata kata sik taw. Ay at faufatk tagleleg kata sik biyo gina glayug. ⁸ Ay ka fag ufatk tagleleg sit sadi e umumk fakfak. Ay ngayu at mata sa at ngaba bilug. Ay dewa mayabi, ay dewa mamenit, kanya dua katuas nu gdanyu te, Mafangibuk wa mafangibuk, malayun wa mafangibuk, Tam Fun tam Funbalugu, At Tiba-Tungud-At-Madaragang, Ebi ay katsi ay anggan faggugat ban. ⁹ Ay ka fag ufatk tagleleg igseg tuwa sa At Malunggung sas faglunggungan daul, sa Tagleleg faggugat faggugat ban te, O wan At tiba tungud at ke fagmasineun, ay Tagkasakan fag fagsegan, ay anggan nu e gfauseganan Emu. ¹⁰ Ay kayu ginan ka fag ufatk tagleleg igseg, ka fag 24k magurang namalub sas daga sa At Malunggung At akbang faglunggungan daul. Ay ka fag ngay magurang igseg tuwa sa Tagleleg faggugat faggugat ban. Ay nafatungkud at ngay sangbo sanbung fanumyu sas akbang faglunggungan daul. Ay kaduge niya, igdanyu te, ¹¹ Kasakan O, tam Fun tam Funbalugu, Laman e gseg tuwa sa Emu te, O wan At tiba tungud At ke fagmasineun, ay Tagkasakan fag fagsegan, ay anggan At madaragang. Anway O wan At naawat fagayu. Am fasadan wan Am fagnaawatun ay Am fagnafasteun fagayu.

¹ Ay nalag aw at fagtapan at mabilug sa At Malunggung sas faglunggungan daul nu ggalumutan sa at siun fag daluap. Ay sit fagtapan e rirukan si at basad ay anggan sit guyuy. Ay sanya fitu at fandafut, sik taru, laman du e glugde. ² Ay nalag akyangay sik madaragang fag tagbukngan, ay gbiya nu ge longan te, Sinu At kasakan at ke fagmadaragangun laman mafafalunggab at ngay fandafut, ay mafafalugde ka fag fagtapan at mabilug. ³ Ay du e nalag sik tagkasakan nus di sadi. Dewa tagsas Banwa, ay dewa tagsas daga, ay dewa tagsas Kinbul-At-Talun, laman lugdei nangus ka fag fagtapan at mabilug, laman tumap. ⁴ Ay aw guyway aw dawdaw. Anway du e nalag sik tagkasakan laman mafafalugde ka fag fagtapan at mabilug ay tumap. ⁵ Ay rodi sik magurang nalong angku te, Lag guyway. Amatangani. Kanya At ke ngayan te, Taw-Naseg-At-Idu-Daul-Tagfangagat, ay anggan Fun-Fakafanyuun-At-Takadungug-Fag-Kadagdagan, kanya nababo wan. Ay katanya tuway, Kanya mafafalunggab at fituk fandafut ay mafafalugde yay ka fag fagtapan at mabilug. ⁶ Ay nalag aw sik Tupa-Riangan. Ay dewa kata nu e nafate, Kanya malindug wa sisad buknga faglunggungan daul. Ay ka fag ufatk tagleleg, ay anggan ka fag 24k magurang insafung Anya. Ay Tupa-Riangan fitu at sunge, ay fitu at mata. Ka fag fitu at masuad te, Funbalugu At-Masine-Fag-Falad ke fituk ugali masine, at fagsuguun sas fagdaul daga. ⁷ Ay Tupa-Riangan inkakbang ay nabul ka fag fagtapan at mabilug siginan At Malunggung sa at siun fag daluap. ⁸ Ay Tupa-Riangan nu nabul wa ka fag fagtapan at mabilug, ka fag ufatk tagleleg ay ka fag 24k magurang inlub sas daga sa at Tupa-Riangan At akbang. Ay fagayu e sik famaawangan, ay anggan sik taya sanbung fanumyu mapnu at nayago fag bebanglu. Ka fag bebanglu at masuad, Funbalugu At ngay taw at darangin. ⁹ Ay fagayu igdanyu sik danyu bagu sas Tupa-Riangan te, Kasakan O, laman nabul O ka fag fagtapan at mabilug, ay mafalunggab O at fandafut. Anway ebi e nafate wa Emu, Ay Am taguk at fagsaliun. Laman at ngay taw saswa daga Funbalugu tuwa At ngay taw, siginan sik ngay magurang at kadagdagan, ay siginans fagayu fulan, ay siginans fagayu fanlongan, ay anggan siginans fagayu talun. ¹⁰ Ay Am fagnafafulun ka fag ngay taw, laman tam Funbalugu At ngay taganyun, ay kanya tagmagurang ban sas fagdaul daga. ¹¹ Ay rodi nalinggat aw. Ay nadungug aw sik ngay tagbukngan ayuwayu nu ge longan. Ay ngayu wa ngayuk libu, wa manga tap. Ay ka fag faglunggungan daul, ay anggan ka fag ufatk tagleleg, ay anggan sigon ka fag 24k magurang, ay ka fag ngay tagbukngan insafung anya. ¹² Ay gbiya ka fag ngay tagbukngan nu gdanyu te, Tupa-Riangan at ke nafate ebi, Kanya kasakan wan laman e gseg tuwa Anya te, O wan At tiba tungud At madaragang, ay At mabalan, ay At ke fagsafulun, ay Tagsik magurang, ay Tagkasakan fag fagsegan, ay At ke fagmasineun, ay anggan nu e gfauseganan Emu. ¹³ Ay nadungug aw fagayu at ngay tagleleg sas Banwa ay sas daga ay sat Kinbul-At-Talun ay sasad lino daul, fagayu fagayu nu gdanyu te, Gseg watam sa At Malunggung sas faglunggungan daul, ay anggan sas Tupa-Riangan. Anway Kanya At tiba tungud nu e gfauseganan Anya, ay Tagkasakan fag fagsegan, ay At ke fagmasineun, ay anggan At madaragang, faggugat faggugat ban. ¹⁴ Ay ka fag ufatk tagleleg glong yangay te, Kin, katanyai tuwa. Ay ka fag 24k magurang namalub sas daga ay igseg Anya.

¹ Ay nalag aw Tupa-Riangan nu nalunggab ka fag fituk fandafut at fasadi. Ay nadungug aw ka fag ufatk tagleleg at sadi nu ge longan kadaul sik fangalong te, Adasugi ste. ² Ay manlag akdi sik kabayu malagsi. Ay at tagsakay sanya nagalumutan sik busuy e bay. Ay e nafon anya sik fun sangbo. Ay kanya nalo wan laman nanfabarangian, ay nababo wa fiya. ³ Ay kaduge Tupa-Riangan nalunggab at faduwak fandafut, nadungug aw ka fag ufatk tagleleg at faduwa nu ge longan te, Adasugi ste. ⁴ Ay at kinsure wa kata aro fag kabayu, maraska way dawdaw. Ay e nafon sik fagmadaragangun sa tagsakay, laman nanfafurat at fagdaul daga at fagmanabayanun. Laman at ngay taw gfadfatean wa tiba. Ay e nafon yangay sa tagsakay sik fangawe dawdaw. ⁵ Ay Tupa-Riangan nu nalunggab wa at fatuluk fandafut, nadungug aw ka fag ufatk tagleleg at fatulu nu ge longan te, Adasugi ste. Ay manlag akdi sik kabayu malayung. Ay at tagsakay sanya nagalumutan sik fagfaskudan te se mabiat. ⁶ Ay nadungug aw kata sik taw nu ge longan siginan sad buknga ufatk tagleleg te, At nabul ban fag fakonun at masine kayuan sik buyug, at fansali kayu tam nalufuyan sik menit. Ay at nabul ban fag fakonun at yud masine kayuan tuluk buyug, at fansali kayu yangay tam nalufuyan sik menit. Ay lag gfarasras at ngay safa mataba ay at ngay buadan safa. ⁷ Ay Tupa-Riangan nu nalunggab at faufatk fandafut, nadungug aw ka fag ufatk tagleleg at faufat nu ge longan te, Adasugi ste. ⁸ Ay manlag akdi sik kabayu galagsiun. Ay at tagsakay sanya at ngayan te, Fakateun. Ay at taguyan anya, at ngayan te, Kinbul-At-Talun. E nafon sanya fag duwa sik fagmadaragangun nu gfate at faufatk afud sas fagdaul daga at taw. At famate sik fiso ay sik fanlunus dawdaw ay sik dailan ay anggan sik ngay mela sasa ngaba talun. ⁹ Ay Tupa-Riangan nu nalunggab at falimak fandafut, manlag akdi sik ngay taw at falad sis daga fagyagoan anyun. At fage nafateun anway kanya nafoyung Funbalugu At longan ay anggan igfaning wa fiya. ¹⁰ Ay kanya gbiya nu guro te, Em Fun At tiba tungud nu madaragang, ay At malayun sat masine, ay At mafanud. Seduge ban nu tumap O at ngay taw tagbanwan sas daga at asalanan. Ay nu gfafoli ban O at mauri sa anya, anway kanya nafate emi. ¹¹ Ay rodi e nafon sanya fag ngay takamoyung sik lanbung malagsi. Ay e nalong anya te, Fafiyani yap sirut fanyai. Yap ngay e nafate ay ufud fag ngay fanuguan ay ay fadugsay at tiba, kayu ban at ke nafate, kata nu e nafate yangay ayu. ¹² Ay Tupa-Riangan nu nalunggab at faunumk fandafut, mangamatang akdi guwigan wa dawdaw tam daga. Ay manlag akdi tam menit inlayung katvngvd sik sinyag at malayung. Ay gina tam magdanun mabalulang, inraska katvngvd sik taguk. ¹³ Ay tam ngay galeme tiba nafangatongan wan. Kata sik kayu at buadan at yud intaba nafangarabasan wan nu nabagyu dawdaw. ¹⁴ Ay du e nalag tam kiwang, naliam wan. Kata wa sik fagtapan at mafoli nu kabilug. Ay fagayu bugsul ay fagayu furu naalin wan siginan aro taw at fagtungkudan. ¹⁵ Ay rodi tam fagdaul daga at ngay fun daul, ay at ngay magurang, ay at ngay fun tagbarangian, ay at ngay mabalan fag taw, ay at ngay madaragang fag taw, ay anggan nus nga sinu fag taw, dewa sik fanuguan ay dewa yud sik fanuguan. Fagayu nasuksuan wa sasa ngay luib ay sasa ngay buknga batu daul sasa ngay bugsul. ¹⁶ Ay fagayu taw nauro sanya fag ngay bugsul ay fag ngay batu daul te, Atongi wa ngap sa emi laman gdingding emi. Laman At Malunggung sat faglunggungan daul dua lumag emi. Ay anggan Tupa-Riangan At fandotamaan dua mdasug sa emi. ¹⁷ Anway at malimu fag ngay menit, At fandotamaan, indasug wan. Ay nu katanya, sinu yay ban at makaduge niya.

¹ Ay rodi gina aw gbantay, nalag aw ufatk tagbukngan nu malindug sa tam fagdaul daga sis ufatk suluk. Ay kanya igsalag at ufatk tagmara te, laman nus nga ndaginan at tagmara, di mdasug sas daga ay sas lino daul ay anggan sa sik kayu nus di sadi. ² Ay nalag akyangay fiya sadi yak tagbukngan nu kasure siginans fakamenitan. Ay kanya nauba tam Tagleleg-Fag-Funbalugu At fagtoglagan at fanfatayuk. Ay kanya nauro sa ka fag ufatk tagbukngan ke fagmadaragangun laman gfarasras at fagdaul daga ay at lino daul. Ay gbiya at tagbukngan at sadi nu ge longan te, ³ Agi yap gfarasras at fagdaul daga, ay at lino daul, ay at ngay kayu. Yap ngay ami nafatayuk Funbalugu At fagtoglagan sa At ngay fanuguan at angas. ⁴ Ay e nalong angku te, Kayu niya at ke fagtoglagan, 144, 000k taw siginans fagayu Tagagbuan at baguama at kadagdagan at ke fagtoglagan sat angas. ⁵ Siginans Naseg at kadagdagan, 12000k taw at ke fagtoglagan. Ay siginans Damai-Sik-Baguama at kadagdagan, 12,000k taw. Ay siginans Indasug-Masine at kadagdagan, 12,000k taw. ⁶ Ay siginans Taguseganan at kadagdagan, 12,000k taw. Ay siginans Gagbun at kadagdagan, 12,000k taw. Ay siginan At-Nafaliaman at kadagdagan, 12,000k taw. ⁷ Ay siginans Dunug at kadagdagan, 12,000k taw. Ay siginan At-Famaalo at kadagdagan, 12,000k taw. Ay siginan Ku-Fansali at kadagdagan, 12,000k taw. ⁸ Ay siginans Famaumsiganan at kadagdagan, 12,000k taw. Ay siginan At-Fakafamutan at kadagdagan, 12,000k taw. Ay anggan siginan Sik-Baguama-Sa-Ku-Siun at kadagdagan, 12,000k taw. ⁹ Ay rodi manlag akdi sik ngay taw ayuwayu, at yud manga tap. Kanya siginan was fagayu talun, ay siginan sik ngay magurang at kadagdagan, ay siginans fagayu fulan, ay siginans fagayu fanlongan. Kayu niya inlindug sas faglunggungan daul ay sas Tupa-Riangan At akbang. Ay fagayu taw at lanbung malagsi. Ay kanya at nabitbitan kata sik don dario, anway guseganan. ¹⁰ Ay ka fag ngay taw gbiya nu ge longan te, At nabalabag antam tam Funbalugu At Malunggung sis faglunggungan daul, ay anggan Tupa-Riangan. ¹¹ Ay fagayu tagbukngan inlindug insafung sa ka fag faglunggungan daul, ay ka fag 24k magurang, ay anggan ka fag ufatk tagleleg. Ay kanya inlub nafatayuk at angas sas daga sas faglunggungan daul at akbang. Ay igseg sas Funbalugu te, ¹² Kin, katanyai tuwa. E gseg tuwa Emu te, O wan At tiba tungud At ke fagmasineun, ay At ke fagsafulun, ay nu e gfauseganan Emu, ay Tagkasakan fag fagsegan, ay At madaragang, ay tagsik magurang, Faggugat faggugat ban. Kin, katanyai tuwa. ¹³ Ay rodi ka fag 24k magurang at sadi nainto angku te, Sinu kanya fag ngay taw ke lanbung malagsi. Ay daginan. ¹⁴ Ay nabalus aw anya te, Em magurang, o way tagsaful. Ay kanya nabalus angku te, Ka fag ngay taw indasug yay ste dewa siginans tagbiya fag faurianan ay gleleg yay. Ay fagayu nafafegus at lanbung sas Tupa-Riangan At taguk. ¹⁵ Katanya tuway, dewa mamenit ay dewa mayabi, Ka fag ngay taw sis akbang Funbalugu At faglunggungan daul. Ay Kanya igseg tuwa Anya sa At Tagbvt-Fag-Bale-Funbalugu sas Banwa. Sanya At Malunggung sas faglunggungan daul ay At nadingding anya. ¹⁶ Ay ka fag ngay taw di ban kalunus, ay di ban kadanum. Ay tam menit di ban gfasugba anya, ay di ban e gfafangenit anya. ¹⁷ Anway Tupa-Riangan tagsis sad buknga ka fag faglunggungan daul, Kanya kata sik tagtanud tupa sa At ngay taw. Ay Kanya nataban At ngay taw sat masine fag mata bulbug. Ay Funbalugu rumarus wan fagayu at luon siginan at mata.

¹ Gina Tupa-Riangan nalunggab at fafituk fandafut, du e mawang sas Banwa kaduge sik alinan menit. ² Ay rodi nalag akyangay ka fag fituk tagbukngan nu malindug sas Funbalugu At akbang. Ay e nafon sa anya fituk fagbudyungan sa sadi sadi. ³ Ay e sadi ya fiyak tagbukngan at kindasug ay namalindug sas akbang fagyagoan bebanglu at fangawat sanbung fanumyu. Ay kanya nauba sik taya sanbung fanumyu. Ay e nafon anya sik ngay nayago fag bebanglu ay nafasagbatan Funbalugu At ngay taw at darangin. Ay nafat sanya wan at nafasagbatan sas fagyagoan bebanglu sas Funbalugu akbang faglunggungan daul. ⁴ Ka fag bebanglu at anus, gfasfuan Funbalugu At ngay taw at darangin, indasug sas Funbalugu At akbang siginan ka fag tagbukngan at bitbitan fag taya. ⁵ Ay ka fag tagbukngan igbitbitan yay ka fag taya ay nafapnu sanya sik ngay baga siginan at fayagoan bebanglu. Ay kanya naukas ka fag ngay baga sas daga. Ay rodi nafangkilat ayuwayu. Ay natalafun ayuwayu. Ay e nae longan ayuwayu. Ay anggan nauwigan dawdaw tam daga. ⁶ Ay ka fag fituk tagbukngan at ke fagbudyungan, kamasadan gabudyungun. ⁷ Ay at fasadik tagbukngan nabudyung. Ay rodi sik moyan batu ay afuy ay anggan sik taguk nafasagbatan sanya ay intong sas daga. Ay at fatuluk afud tam daga inbatas wan. Ay at fatuluk afud at kayu inbatas yangay. Ay anggan fagayu at melo fag ngay makmak inbatas wan. ⁸ Ay at faduwak tagbukngan nabudyung. Ay rodi kata sik bugsul at ke afuy sas fagdaul bugsul e naukas sasad lino daul. ⁹ Ay at fatuluk afud tam lino daul inke taguk fagdaul. Ay at fatuluk afud at ngay tagleleg tagsasad lino daul inkate wan. Ay at fatuluk afud at ngay balutu inrasras wan. ¹⁰ Ay at fatuluk tagbukngan nabudyung. Ay rodi sik galeme daul tagdamlag kata sik salung intong siginans Banwa. Ay ka fag galeme at fakatongan sa at fatuluk afud safa ay at ngay bulbug saswa daga. ¹¹ Ay ka fag galeme at ngayan te, Mayat. At fatuluk afud at safa sas daga inkayat wan. Ay ngayuk taw inkate wan nu nainum ka fag safa at mayat. ¹² Ay at faufatk tagbukngan nabudyung. Ay rodi at fatuluk afud tam menit e nafalang, ay anggan at fatuluk afud tam magdanun, ay anggan at fatuluk afud tam galeme. Ay sa ka fag tuluk afud at buknga inkarum wan. Ay at fatuluk afud sa sik menit nu siaba inkarum. Ay anggan at fatuluk afud sa sik yabi nu siaba du e mayamag. ¹³ Kaduge aw glinggat, nalag aw sik biyo nu glayug sas kiwang. Ay nadungug aw nu guni te, E fanfauri ban. E fanfauri ban. E fanfauri ban sas fagayu tagbanwan sas daga, gina ban e ngay nabudyung. Anway at tuluk tagbukngan gabudyungun yangay katsi.

¹ Ay at falimak tagbukngan nabudyung. Ay rodi nalag aw sik galeme aro at kintong sas daga siginans banwa. Ay e nafon sa ka fag galeme sik fanluang sa at fandingding sa ka fag sulat tabiu at yud e bangsi. ² Ay ka fag galeme nu naluang wa at dingding ka fag sulat tabiu, sik ngay anus nalfas siginan sad sulat tabiu. Ay at anus kadaul siginan sik labian. Ay rodi nafaraska tam menit ay inkarum at kiwang anway at kadaulan at anus at nalfas sanya ginan fag tabiu. ³ Ay sik ngay liung indasug sas daga sanya ginan fag anus. Ay e nafat sa ka fag ngay liung sik fagmadaragangun, katvngvd sik agipan nu gsugud. ⁴ Ay e nasalag sa ka fag ngay liung te, Lag grabrab at ngay makmak sas daga, ay fagayu nus nge wain at melo, ay anggan fagayu kayu. Ay fagfauriun kayu yakman at yud e nafatayuk Funbalugu At fagtoglagan sat angas. ⁵ Ay e nafabayan ka fag ngay liung laman igfasaitan yay dawdaw sa ka fag ngay taw limak magdanun. At nasalag anway fagsadi te, lag gfate anya. Ay nu masait, katvngvd sik agipan nu nasugud sik taw. ⁶ Ay ginanya fag ngay magdanun ka fag ngay taw igsarap ban te, tain nu mkate aw nangus. Ay yaya, du e nalag at fangate. Ay dewa dawdaw kaumsig nangate, roro yaya, ay inlangfe yay ka fag fakateun. ⁷ Nu kalag ka fag ngay liung kata daw sik kabayu nu gananfabarangianun. Sit alfuyu kata sik sangbo at fangawat sanbung fanumyu. Ay si tuwa mata kata sik taw at mata. ⁸ Ay at buk kaba sik mangena buk. Ay at bagang urungan kaba sik idu daul tagfangagat at bagang urungan. ⁹ Ay sit dubdub e lanbung sanbung. Ay at fakfak nu gfakfakan, katvngvd sik ngay kabayu nu guyud sik sakayan gina matarung sat fagfabarangianan. ¹⁰ Ay ka fag ngay liung at iyug e fansugud katvngvd sik agipan nu gsugud. Ay at fagmadaragangun siginan way at iyug, laman at fanfasaitan sas taw limak magdanun. ¹¹ Ay ka fag liung e fun tuwa. Ay at fun sik mauri fag tagbukngan tagmagurang sa ka fag tabiu at yud e bangsi. Ay at ngayan sas Taw-Atsi-Baliwa at fanlongan at masuad te, At-Fagrasrasan. Ay sas Taw-Gresia at fanlongan at masuad te, Tagfarasras. ¹² Inlangfe wan at taguna fag fanfauri. Ay amatangani. Duwa ya ro at kumdasug. ¹³ Ay rodi at faunumk tagbukngan nabudyung. Ay nadungug aw nu ge longan siginan sad buknga ufatk sunge sas fagyagoan anyun sanbung fanumyu, tagsas Funbalugu At akbang. ¹⁴ E nalong sat faunumk tagbukngan at ke fagbudyungan te, Falfasi wan ka fag ufatk tagbukngan at ke salod sanya sas tagbiya fag safa at ngayan te, Safa-Daul. ¹⁵ Ay rodi e nafalfas wa fiya ka fag ufatk tagbukngan. Ebi at nasalod, yap ngay umdasug at nafamasadan fag banwa, ay fag magdanun, ay fag menit, ay anggan fag lungud menit. Laman kanya fag ufat nanfate yay ban at fatuluk afud taw sas fagdaul daga. ¹⁶ Ay e nalong angku te, kayu niya tagbarangian at tagsakay sis kabayu. Ay at kayu wan 200, 000, 000k taw. ¹⁷ Ay kata tuy ku nalag fag ngay kabayu kata sik taginfanan. At ngay tagsakay at fandingding fag lanbung sat dubdub at tiba maraska katvngvd sik afuy. Ay at tiba manyang. Ay at tiba galagsiun kata sik kaysukri. Ay ka fag ngay kabayu at alfuyu kata sik idu daul tagfangagat. Ay siginan at bibig insure sik afuy ay sik anus ay sik kaysukri. ¹⁸ Ay kanya fag tulu, afuy ay anus ay anggan kaysukri siginan ka fag ngay kabayu at bibig, nafate at fatuluk afud taw sas daga. ¹⁹ Ay ka fag ngay kabayu at fagmadaragangun sat bibig ay sat iyug. Ay at iyug kata tuwa sik dot alfuyu ay mafe fakarukan wa fiya. ²⁰ Ay at taw at sawad, kayu at yud inkate siginan ka fag tuluk mauri, dia naubun nu gseg sa at awatan fag tawtawan, ay anggan sat mafurat fag falad. Ay anggan at awatan fag tawtawan fag sanbung fanumyu, ay sa sanbung salafi, ay sa sanbung maraska, ay sa at awatan batu, ay anggan sa at awatan kayu. Dewa ka fag ngay tawtawan yud glag, ay yud gdungug, ay yud glo. ²¹ Ay anggan dia naubun nu gfate tibak taw, ay nu mabara, ay nu kamayun, ay anggan nu kamul.

¹ Ay rodi nalag aw sadi yak madaragang fag tagbukngan nu kadasug siginans Banwa. At lanbung sik linyabu. Ay at sangbo sik balango. Ay si tuwa mata katvngvd tam menit nu masulo. Ay at bitis katvngvd sik afuy nu maraska. ² Ay igalumutan sik fagtapan sirut mabilug, malunggaban. Ay at darafa at siun nafagsiadan sas tungud lino daul. Ay at darafa at wala nafagsiadan sas daga. ³ Ay kanya nu guro kadaul sik idu daul tagfangagat nu guni. Ay nu nauro wan, e natalafun yangay fitu ginan. ⁴ Ay nu natalafun wa fitu ginan, gananrirukun akyama ku nadungug sanya ginan fag fituk talafun. Ay rodi nadungug akyangay sik longan siginans Banwa te, Agi yap griruk. Ay agi yap gfoyung am nadungug sanya ginan fag fituk talafun at longan. ⁵ Ay ka fag tagbukngan ku nalag at malindug tagfagsiadan sas lino daul ay sas daga, igfaturuk at take at siun sas Banwa. ⁶ Ay kanya nafatvngvd at longan siginans Funbalugu At fagmadaragangun. Anway Kanya At tagleleg faggugat faggugat. Ay At naawat Banwa ay fagayu tagsanya, ay daga ay fagayu tagsanya, ay anggan lino daul ay fagayu tagsanya. Ay ka fag tagbukngan nalong te, Dua ban glugo nu gfanya. ⁷ Anway kaduge ban at fafituan tagbukngan nabudyung, umsure wa fiya Funbalugu At masuksukan fag fasadan, nanfaning At longan ebi ebi sa At ngay fanuguan, ay sa At ngay taglong. ⁸ Ay rodi at nae longan ku nadungug siginans Banwa, nalong yangay sa ankgu te, Loi wan ay buli ka fag fagtapan sirut mabilug at malunggaban, siginan ka fag tagbukngan at daluap at malindug sas lino daul ay sas daga. ⁹ Ay rodi inkaakbang aw sanya fag tagbukngan, ay get aw anya te, Kuya. Foni angku ka fag fagtapan sirut at mabilug. Ay kanya nalong angku te, Na. Oni yap. Ay nu naamsak wo, matamis tuwa sa am bibig katvngvd sik deut. Ay roro, nu natulun wo, mayat dawdaw sa am ungdan. ¹⁰ Ay nabul akwa fiya ka fag fagtapan sirut at mabilug sanya ginan fag tagbukngan. Ay naon aw. Ay nu naamsak akwan, matamis dawdaw sa ku bibig katvngvd sik deut. Ay nu natulun kwan, kadvk akway fiya ku ungdan. ¹¹ Ay e nalong sa angku te, Dogi yangay foyungi at kumdasug ban sas taw sas fagayu talun ay sas fagayu fanlongan. Ay anggan at kumdasug sa at ngay fun daul.

¹ Ay rodi e nafon sa angku sik famasud kaba sik suan, ay e nafoyung sa angku te, Loi wan ay fasudi At-Tagbvt-Fag-Bale-Funbalugu ay anggan at fagyagoan anyun. Ay tapi yangay sanya at ngay tagseg. ² Ay langfei wan at faglanuan sas day Funbalugu-Bale. Lag gfasud sanya. Anway e nafon wa sa at Yud-Naseg-Fag-Taw. Ay ka fag ngay taw lumo wa ban lumo lumo sas fagdaul Funbalugu-At-Fulan 42k magdanun. ³ Ay mon Akban sik fagmadaragangun sa Ku duwak takamoyung. Laman kanya nanfoyung ban Ku longan at kadugayan 1260k menit gina e lanbung tagfantaras. ⁴ Ka fag duwak takamoyung kata duwak kayu ulibu. Ay anggan kata duwak fagfasayugan salung sas Funbalugu, sas fagdaul daga at Fun, At akbang. ⁵ Nus nga sinu takaumsig gfe fakarukan ka fag duwak takamoyung, e malfas afuy siginan ka fag duwak takamoyung at bibig ay matas tagananfe fakarukanun anya. Nus nga sinu tagananfe fakarukanun kanya fag duwa, e fate yangay ban fiya anya. ⁶ Ay ka fag duwak takamoyung e fagmadaragangun mafadingding at moyan kaduge gfoyung. Ay e fagmadaragangun yangay gfe taguk sasa ngay safa. Ay anggan e fagmadaragangun yangay gfe dailan sas fagdaul daga at taw, nus nga seyu ginan at fakaumsigun. ⁷ Ay nu ntabuan ka fag duwak takamoyung nu gfoyung, sik mela, at nalfas sanya ginan fag tabiu at yud e bangsi, nanfabarangian ban anya. Ay ka fag mela mabo ban ka fag duwak takamoyung, ay anggan nafate ban anya. ⁸ Ay nu nkate wa ban, at bilug mafulidan way ban sisad dalan sanya sat fulan daul. Ay nu gfangayan ka fag fulan, nafafaskudanan way, kata fulan Sik-Afugan ay anggan kata talun Eiptu. Ay ebi sanya fag fulan e natuktuk at Fun sas salibagan kayu. ⁹ Ay tuluk menit mabugtung ay sit dayu ban gwabilug sik menit, at ngay taw luminggat ban ka fag duwak mabulan at bilug. Ay nasalag ban nu e gsandig. Ka fag ngay taglinggat siginan bans fagayu fulan, ay siginan sik ngay magurang at kadagdagan, ay siginans fagayu fanlongan, ay anggan siginans fagayu talun. ¹⁰ Ay at ngay tagbanwan saswa daga guseganan ban anway ka fag duwak takamoyung inkate wan. Ay gudguseganan ban, ay manga gfodfonan tuwa ban sat tiba. Anway ebi ka fag duwak takamoyung nafalimuanan sa at ngay tagbanwan saswa daga. ¹¹ Ay nu nlangfe wa tuluk menit ay sit dayu sik wabilug menit, Funbalugu nauyup nafaleleg sanya fag duwak takamoyung at dungus. Ay rodi kanya inlindug. Ay kayu at nalag anya, kalimu dawdaw. ¹² Ay at kinleleg nadungug nu e ge longan dawdaw siginans Banwa sa anya te, Sakboi wa stiye. Ay gina at ngay takadotama anya glinggat dawdaw, e naurug wa anya sas linyabu sas Banwa. ¹³ Ay rodi tv guwigan wa dawdaw at daga. Ay at fasafuluk afud at fulan inlafi wan. Ay 7, 000k taw inkate wan siginan at nauwigan at daga. Ay at sawad kalimu dawdaw, ay igseg Funbalugu tagsas Banwa te, At tiba tungud At madaragang. ¹⁴ Inlangfe wan at faduwak fanfauri. Ay amatangani. At fatuluk fanfauri gadasugun yay. ¹⁵ Ay at fafituk tagbukngan nabudyung, ay rodi sas banwa gbiya nu e ge longan te, Katsi Funbalugu wan tagmagurang sas fagdaul daga, ay anggan yangay Fagtayukan tagmagurang. Ay tagmagurang faggugat faggugat ban. ¹⁶ Ay ka fag 24k magurang, at malunggung sat ngay faglunggungan daul sas Funbalugu At akbang, namalub sas daga ay naseg Funbalugu te, ¹⁷ Gseg ami Emu, em Fun em Funbalugu, At-Tiba-Tungud-At-Madaragang, Ay At tagleleg siginan ngay ebi ay anggan katsi. Anway O wan At ke fagmadaragangun, At nafasigad namagurang. ¹⁸ At ngay taw sas fagayu talun kadotama dawdaw sa Emu. Ay Am fandotamaan insure sa anya. Ay indasug wan at ngay menit, laman e tumap at ngay kinkate at asalanan. Ay laman e mon sik ngay fanambagun, sa Am ngay fanuguan, ay sa Am ngay taglong, ay sa Am ngay taw, ay anggan sas fagayu at takalimu Emu, dewa e fagmadaragangun, ay dewa at yud e fagmadaragangun. Ay laman e nafamin ban At ngay taw tagfauri tibak taw saswa daga. ¹⁹ Ay rodi Tagbvt-Fag-Bale-Funbalugu sas Banwa e naluang at fandingding. Ay sanya sad bale e nalag sik Fagsuadan-Fatuyanan. Ay rodi sanya nafangkilat ayuwayu. Ay e nae longan ayuwayu. Ay natalafun ayuwayu. Ay nauwigan dawdaw at daga. Ay anggan namoyan ayuwayu batu.

¹ Ay sik ke masuad fag fagtoglagan insure sas banwa. Sik mangena at lanbung tam menit. Ay at darafa sa tam magdanun. Ay igsangbuan, sik safulu ay labi duwak galeme. ² Ay ka fag mangena igbuba dawdaw. Ay kanya nauro, anway ganini gakalangfeun. ³ Ay e sadi ya fiya at ke masuad fag fagtoglagan at kinsure sas banwa. Sik tagbiya fag yaw maraska. Fitu at alfuyu. Ay safulu at sunge. Ay fagayu at alfuyu e sangbo, kata sik fun at sangbo. ⁴ Ay ka fag yaw daul at iyug nairus at fatuluk afud at galeme sas Banwa ay naukas sas daga. Ay kanya inturuk sa ka fag mangena tagafalangfeun at akbang. At fakakbangun laman tumulun at ngenge gina bagu nlangfe. ⁵ Ay ka fag mangena nafalangfe wa sik ama. Ay kanya tagmagurang ban fagayu talun sas fagayu afud daga. Ay gina ban igmagurang, at famalang ban sik sanbung. Ay rodi gina at ngenge bagu inlangfe, e nabul ay e nataban sas Funbalugu sa At faglunggungan daul. ⁶ Ay ka fag mangena nalagyu wa sas talun at yud e taw. Ay sanya fag talun Funbalugu At nafamasadan ebia taw sa anya. Laman kaduge niya e nafagut yay anya 1260k menit. ⁷ Ay rodi e nabarangian wa sas Banwa. Ka fag tagbukngan at ngayan te, Du-E-Gfasud-Funbalugu, ay anggan at ufud fag ngay tagbukngan, igfabarangian ka fag yaw daul. Ay ka fag yaw daul ay anggan at ngay fanuguan fag tagbukngan, igfabarangian yangay anya. ⁸ Ay ka fag yaw daul ay anggan at ngay fanuguan nalabawan wan. Ay dua ban sanya sis Banwa at fagbanwanan. ⁹ Anway e naukas wa anya siginans Banwa. Kanya ebi yay taguna fag yaw. Ay at ngayan tiba te, Takamuag-Tiba-At-Fagbulun ay anggan Tagfansalag. Ay kanya faggugat tagfanluk sas fagdaul daga at taw. Ay katsi e naukas anya sas daga. Ay anggan at ngay fanuguan fag tagbukngan e naukas yangay gasfuan anya. ¹⁰ Ay rodi nadungug akyangay dawdaw sik longan sas Banwa te, Katsi Funbalugu wan tagbalabag taw. Ay Kanya madaragang tuwa. Ay igmagurang fagayu. Ay anggan Fagtayukan igmagurang yangay. Ay e naukas wan ka fag Takamuagan sa tam ngay fadugsay at fagbulun baliwa. Faggugat kanya dan wa kamuagan sa tam ngay fadugsay at fagbulun baliwa. Dewa mamenit ay dewa mayabi, sa tam Funbalugu At akbang. ¹¹ Katsi tam ngay fadugsay nababo wan sa Takamuagan, anway Tupa-Riangan At taguk. Ay anway kanya nafodfoyungan yangay sa tiba. Ay manga kanya dua kesug dawdaw at leleg, dewa e gafateun anya. ¹² Useganani am, fagayu tagsis Banwa. Ay e faurianan way sa ayu, fagayu tagbanwan sas daga ay sas lino daul. Anway Takamuag-Tiba-At-Fagbulun indasug wa sa ayu. Ay kanya gfandotamaan wa dawdaw. Anway kanya nasaful te, at menit ban dua ngayu. ¹³ Ay ka fag yaw daul nu nasaful wa te, e naukas wa anya sas daga, kanya matarung nu nangalo ka fag mangena, ebi at nafalangfe sik ngenge sik ama. ¹⁴ Ay e nafon sanya fag mangena at fangalayug fag duwa siginans sik tagbiya fag biyo. Laman kanya lumayug wa siginan ka fag yaw daul at akbang. Ay laman umdasug wa sas talun at yud e taw. Ay sanya e nafagut tuwa anya tuluk banwa ay sit dayu gwabilug. ¹⁵ Ay ka fag yaw daul gulub sik safa daul siginan at bibig sanya fag mangena baliwa. Laman lumimus anya. ¹⁶ Ay rodi at daga natarabang ka fag mangena. Anway at daga inkaldi ay at safa daul, ka fag yaw at naulub siginan at bibig, infalyu sanya. ¹⁷ Ay ka fag yaw daul ginkugatan yay nu kadotama sanya fag mangena. Ay kanya nalo yay, laman nanfabarangian yay sa ka fag mangena at kadagdagan tiba. At masuad te, sas fagayu at tagfaning Funbalugu-At-Longan ay tagfoyung Isus At fagbulun. ¹⁸ Ay ka fag yaw daul inturuk sas tigyangan lino daul.

¹ Ay rodi nalag aw sik mela nu kasure siginan sad lino daul. Fitu at alfuyu. Ay safulu at sunge. Ay fagayu sunge e sangbo, kata sik fun at sangbo. Ay at marirukan si at ngay alfuyu, sik ngayan at masuad igfalingun sas Funbalugu baliwa. ² Ay ka fag mela at bilug kata sik fusa daul tagfangagat. Ay at darafa kadaul sik tagbiya fag mela at darafa ay ngaba at u. Ay at bibig kadaul yangay sik idu daul tagfangagat at bibig. Ay aro fag yaw daul nafon at fagmadaragangun sa ka fag mela. Ay anggan nafon at faglunggungan daul, ay anggan nafon yangay anya te, laman mafamagurang. ³ Ay ka fag mela at alfuyu at sadi e fakarukan makbang wa nu gakateun. Ay roro nfiya yay daw at fakarukan. Ay fagayu taw sas fagdaul daga nadulawan dawdaw ay nafaning sa ka fag mela. ⁴ Ay at ngay taw naseg sa ka fag yaw daul, anway kanya tagfon at fagmadaragangun sanya fag mela. Ay naseg yangay sa ka fag mela te, du e katvngvd ka fag mela. Ay du e gbabo anya. ⁵ Ay e nafanusetaw yay sa ka fag mela. Laman gfalabi yay at longan. Ay anggan glong yay mauri sas Funbalugu baliwa. Ay e nafanusetaw yangay sa ka fag mela te, laman gmagurang yay 42k magdanun. ⁶ Ay ka fag mela igfasigad wa iglong mauri sas Funbalugu baliwa, ay sas Funbalugu At ngayan, ay sas Funbalugu At fagbanwanan, ay anggan sa at ngay tagbanwan sas Banwa baliwa. ⁷ Ay e nafanusetaw yangay ka fag mela. Laman igfabarangian sas Funbalugu At ngay taw, ay anggan nababo anya. Ay e nafon yangay sa ka fag mela at fagmadaragangun. Laman mafamagurang sik ngay magurang at kadagdagan, ay anggan sik ngay taw sas fagayu fulan, ay sas fagayu fanlongan, ay anggan sas fagayu talun. ⁸ Ay fagayu taw tagbanwan sas fagdaul daga sumeg ban sa ka fag mela. At masuad, kayu at yud e nariruk at ngayan ebi gina yud e daga, sa ka fag fagtapan at ngayan te, Kayu-Tagleleg-Faggugat. At tagbilug ka fag fagtapan Tupa-Yay-Riangan ebi at nafate. ⁹ Nu e talinga tuwam, dungugani. ¹⁰ Nus nga sinu at sumungsung, umsungsung yangay ban fiya anggan kanya. Ay nus nga sinu at kinkate ban sa sik fiso, umkate yangay ban fiya sa sik fiso anggan kanya. Ay anway katanya, fagayu Funbalugu At ngay taw sungatani ay fatvngvdi ay fakafandiugun. ¹¹ Ay rodi nalag akyangay sadi yak mela, ay kanya siginan sad daga. Ay duwa at sunge, kata way sik tupa riangan at sunge. Ay nu ge longan, kata yangay fiya sik yaw daul. ¹² Ay kanya e fagmadaragangun katvngvd yangay at taguna fag mela, gina e nangakbang anya. Ay madaragang nu gfabulun sas fagayu taw sas fagdaul daga te, laman sumeg sa taguna fag mela, at kinke fakarukan ay gakateun, ay infiya yay daw. ¹³ Ay at faduwak mela nafasure sik ngay matvngvd fag faglagan. Madyay nafasure sik afuy siginans kiwang sasa ngay taw at akbang. ¹⁴ E nafanusetaw yangay sa ka fag mela. Laman nafasure yay at matvngvd fag faglagan sa taguna fag mela at akbang. Ay anway katanya, at faduwak mela igfanluk wan fagayu tagbanwan sas fagdaul daga. Laman gatul yay sas fagayu taw te, awati sik tawtawan kata at taguna fag mela, at kinke fakarukan sa sik fiso, ay gleleg yay. ¹⁵ Ay e nafanusetaw yangay sa at faduwak mela. Laman ro gfaengasan yay ka fag tawtawan. Laman ro ka fag tawtawan ge longan tuwa, ay mafasugu tuwa te, fatei sa at yud gseg anya. ¹⁶ Ay at faduwak mela tagfariruk sas fagayu taw si at siun fag daluap, ay ate si at angas. Dewa sa sik taw at ke fagmadaragangun, ay dewa sat yud e fagmadaragangun. Ay dewa sa sik mabalan fag taw, ay dewa sat yud e kwa. Ay dewa sa at yud sik fanuguan, ay dewa sa sik fanuguan wadi. ¹⁷ Laman sik taw dua mafasali ay dua mafafesali, yap ngay e rirukan si anya. Ka fag rirukan at masuad, ka fag mela at ngayan, ay ate at ngayan at kayuan fag ngaba. ¹⁸ Ay katanya wayay, mamatanganani tuwa. Ay nus nga sinu at mamatanganan, nasaful tuwa ka fag mela at ngayan at kayuan at masuad. Anway at masuad te, kayu niya sik taw at ngayan at kayuan. At kayuan te, 666.

¹ Ay rodi manlag akdi Tupa-Riangan nu malindug sas tungud bugsul Malanggangan. Ay at ufud sanya 144,000k taw at ke rirukan si at angas, At Tupa-Riangan At ngayan ay anggan At Tama At ngayan. ² Ay nadungug aw nu e ge longan siginans Banwa kadaul sik safa nu gfawas nu gbararusan, ay kadaul yangay sik fangalong dawdaw. Ku nadungug fag longan kata yangay sik ngay ke famaawangan gina e gtuktuk ay guni. ³ Ay ka fag 144,000k taw nadanyu sik danyu bagu sa at faglunggungan daul at akbang. Ay sa ka fag ufat tagleleg at akbang. Ay anggan sa ka fag 24k magurang at akbang. Ay di e taw nasaful ka fag danyu, dasday ka fag 144, 000k taw at kinbalabag siginans fagdaul daga at ngay taw. ⁴ Kayu niya at yud tuwa batang kamayun sa sik mangena. Anway at ugali malayun tuwa sat masine. Ay kanya nangalo tuwa sas Tupa-Riangan nus nga nday Kanya nu glo. Ay kayu niya at kinbalabag siginan at ngay taw, kata sik taguna fag anyun at nafon sas Funbalugu ay sas Tupa-Riangan. ⁵ Ay kayu niya di batang kamuag. Anway at ngay ugali malayun sat masine. ⁶ Ay rodi nalag aw sik tagbukngan nu glayug sasad kiwang. Ay faggugat matuyan at foyungan ro sasa ngay tagbanwan sas daga, sas fagayu talun, ay sas fagayu magurang at kadagdagan, ay sas fagayu fanlongan, ay anggan sas fagayu fulan. ⁷ Ay rodi gbiya ka fag tagbukngan nu ge longan te, Malimuani Funbalugu, ay segi Anya anway sat kamadaragangan. Anway gadasugun wan ka fag ngay menit Funbalugu nu ganantapun tuwa sas fagayu taw at asalanan. Segi sa takawat Banwa, ay daga, ay lino daul, ay anggan fagayu mata bulbug. ⁸ Ay rodi sadi ya fiyak tagbukngan, at faduwa, igguyan sa aro taguna, ay iglong te, Nafangarasrasan wan ka fag fulan at madaragang, at ngayan Ke-Aringang. Ay nafangalafian wan. Ebi sanya fag fulan daul nafon sas fagayu talun at ngay taw at fanginum fag fangasigung. At masuad te, igfaning sanya ginan fag fulan daul at ugali sas fakamayunun. ⁹ Ay rodi sadi ya fiyak tagbukngan, at fatulu, igguyan yangay sa aro fag duwa, ay gbiya nu ge longan te, Nus nga sinu tagseg sa ka fag mela ay anggan sat tawtawan. Ay anggan at ke rirukan ka fag mela at ngayan si at angas ay ate si at daluap. ¹⁰ Kanya fag taw minum ban ka fag fansigung at masuad te, Funbalugu At fandotamaan. Ay ka fag fansigung du e fasagbatan gina gbusbus sas Funbalugu At taya at fandotamaan. At masuad te, siginan sik afuy ay sik kaysukri tagfauri ban ka fag taw, sas Funbalugu At ngay tagbukngan at akbang, ay sa Tupa-Riangan At akbang. ¹¹ Ay ka fag faurianan kanus ban sas kiwang faggugat faggugat. Ay kanya fag ngay taw du e nafafiyan at lufuy, dewa mamenit ay dewa mayabi. Katanya way sas fagayu tagseg sa ka fag mela ay anggan sat tawtawan. Ay anggan at ke rirukan ka fag mela at ngayan si at angas ay ate si at daluap. ¹² Ay katanya wayay, fagayu Funbalugu At taw, at tagfaning sas Funbalugu At longan, ay takafandiug fiya fiya sas Isus, sungatani tuwa. ¹³ Ay rodi nadungug aw nu e ge longan siginans Banwa te, Riruki kata tuy te, siginan katsi, guseganan wan at kinkate, ebi nu masadi tuwa sa tam Fun. Ay At-Masine-Fag-Falad nalong yangay te, Kin, guseganan tuwa. Anway kanya e fafiya ban at lufuy. Ay e nafoyung ban ka fag ngay fagbulun at masine nus nga nday kanya nu nalo. ¹⁴ Ay rodi manlag akdi e sik linyabu malagsi. Ay at malunggung sanya kata sik taw, ay e sangbo sanbung fanumyu. Ay igalumutan sik mataga fag fanggufas. ¹⁵ Ay e sik tagbukngan at nalaklo siginans Tagbvt-Fag-Bale-Funbalugu sis Banwa. Ay gbiya nu guro sa at malunggung sas linyabu te, Gufasi wan ay buli at buadan. Anway indasug wan at fanggufasan fag menit sas daga. Inraska wan at buadan sasa ngaba daga. ¹⁶ Ay at malunggung sas linyabu naawe at fanggufas sasa ngaba daga. Ay nabul wan fagayu at buadan siginans daga. ¹⁷ Ay e sadi ya fiyak tagbukngan at nalaklo siginans Tagbvt-Fag-Bale-Funbalugu sis Banwa. Ay kanya igalumutan yangay sik mataga fag fanggufas. ¹⁸ Ay e sadi ya fiyak tagbukngan, at tagmagurang sas afuy baliwa, at nalaklo siginans day fagyagoan anyun. Ay gbiya dawdaw kanya nu guro sa tagalumutan at mataga fag fanggufas te, Gufasi wan. Ay buli wan at uwat at mabaybay fag buadan sas fagdaul daga. Anway at buadan inlesan wan. ¹⁹ Ay at ke fanggufas fag tagbukngan naawe at fanggufas sasa ngaba daga. Ay nabul wan at mabaybay fag ngay buadan. Ay nafat sas Funbalugu At tagbiya fag fagturisan. At masuad sanya te, Funbalugu At fandotamaan at fanfauri at mauri fag taw. ²⁰ Ay e nasiad sanya fag fagturisan sas day fulan. Ay naugwag sik ngay taguk siginan at fagturisan. Ay ka fag taguk at kabasadan kabat sis kabayu at famaturun at dalan fag lubid. Ay at kaabaan 150,000k dufa.

¹ Ay rodi nalag akyangay sadi yak ke masuad fag fagtoglagan sas Banwa, at madaragang ay at madulawan. Fituk tagbukngan e uba fituk fanfauri. Ay ka fag fituk fanfauri at fakatabuan wa fag fanfauri. Anway gina ban intabu nu gfauri, Funbalugu di ban kadotama. ² Ay nalag akyangay kata sik lino malio, at famasagbatan kata sik afuy. Ay at ngay malindug tagsis tigyangan lino malio, ebi at nababo sa ka fag mela, ay anggan at tawtawan at ke ngayan at kayuan fag ngaba. Ay at ngay tagbabo nagalumutan sik ngay famaawangan siginans Funbalugu. ³ Ay kanya fagayu igdanyu Ku-Unga, Funbalugu At fanuguan, at danyu. Ay anggan Tupa-Riangan At danyu te, Em Fun em Funbalugu, At Tiba-Tungud-At-Madaragang. Am ngay fagbulun madaragang ay madulawan. Ay Am ngay ugali matuyan ay mafanud. Ay Am wan fagayu talun at ngay taw at Fun, faggugat faggugat. ⁴ Em Fun, fagayu taw kalimu Emu. Ay fagayu taw igseg Emu te, O At tiba tungud at madaragang. Anway O way fagsadi at malayun sat masine. Fagayu talun at ngay taw umkakbang ban sa Emu ay sumeg ban sa Emu. Anway fagayu Am filian at masine fag fagbulun insure wa fiya sas fagayu taw. ⁵ Ay rodi nalinggat aw sas Tagbvt-Fag-Bale-Funbalugu tagsis Banwa, ay sanya sad basad Taglabi-Nu-Mafangibuk fag salug. Ay naluang wan at sakbawan. ⁶ Ay nalag aw ka fag fituk tagbukngan nu nalaklo sanya ginan at ke uba fituk fanfauri. Ay ngaba at lanbung, ay mayung, ay malagsi, ay anggan masulo. Ay e lanbung yangay sit dubdub, sik sanbung fanumyu. ⁷ Ay aro fag ufatk tagleleg at sadi nafon sa ka fag fituk tagbukngan fituk taya at fangawat sanbung fanumyu. Sanya fag taya mapnu Funbalugu, At tagleleg faggugat faggugat ban, at fandotamaan. ⁸ Ay sasad Tagbvt-Fag-Bale-Funbalugu inkapnu kata sik anus siginans Funbalugu At fagmasineun ay anggan siginan At fagmadaragangun. Ay du e masakbo sanya, yap ngay namin ka fag fituk tagbukngan at nauba fag fanfauri.

¹ Ay rodi nadungug aw sik tagbiya fag longan siginans Tagbvt-Fag-Bale-Funbalugu. Ay kanya nasugu sanya fag fituk tagbukngan te, Loi wan. Ay busbusi sasa ngaba daga ka fag fituk taya at mapnu Ku fandotamaan. ² Ay at fasadik tagbukngan nalo wan. Ay nabusbus at suadan sit ba taya sas fagdaul daga. Ay rodi sanya fag ngay taw at ke rirukan aro fag mela at ngayan, ay at tagseg at tawtawan, gabakukang wayuwayu. ³ Ay at faduwak tagbukngan nabusbus at suadan sit ba taya sas lino daul. Ay rodi at lino daul inraska wan, kata sik kinkate at taguk. Ay fagayu tagleleg sasad lino daul inkate wan. ⁴ Ay at fatuluk tagbukngan nabusbus at suadan sit ba taya sasa ngay safa ay sasa ngay mata bulbug. Ay fagayu inraska yangay kata sik taguk. ⁵ Ay nadungug aw sik tagbukngan at tagmagurang sas safa baliwa, nu glong te, O wan At matuyan, madyay katanya Am fagnafasureun Am fanfauri. O wan At tagleleg katsi, ay anggan siginan ngay ebi. ⁶ Anway ebi at ngay taw nafate Am ngay taw ay Am ngay Taglong, ay nabusbus at taguk. Ay O wan tagfainum sik taguk sa tagfate. Anway inkayu wan at asalanan, ay katanya at fanfauri. ⁷ Ay nadungug aw tagbiya fag longan siginans fagyagoan anyun te, Kin tuwa, em Fun em Funbalugu, At Tiba-Tungud-At-Madaragang. Mafanud ay gkasakan fagayu Am nafasure Am fanfauri. ⁸ Ay at faufatk tagbukngan nabusbus at suadan si at ba taya sas menit. Laman nafaugat nu masugba. Ay nafasugba at ngay taw katvngvd sik afuy. ⁹ Ay at ngay taw kasugba dawdaw anway inkugat yay nu masugba. Ay ka fag ngay taw nalong mauri sas Funbalugu baliwa, At ke fagmadaragangun At nafasure ka fag fanfauri. Ay dewa katanya, ka fag ngay taw dua gfasaman at ugali at mauri. Ay dua nafoyung te, Funbalugu At tiba tungud at madaragang. ¹⁰ Ay at falimak tagbukngan nabusbus at suadan si at ba taya sa aro fag mela at faglunggungan. Ay rodi inkarum wan sa ka fag mela at fagmagurangan. Ay at ngay taw kagat at bebad, anway at katvngvdan nu kasait at bilug. ¹¹ Ay ka fag ngay taw nalong mauri tagsas Banwa fag Funbalugu baliwa. Anway at katvngvdan nu kasait sa at bilug anway ngayu at famaga. Ay dewa katanya, dua gfasaman at fagbulun at mauri. ¹² Ay at faunumk tagbukngan nabusbus at suadan si at ba taya sas tagbiya fag safa, at ngayan Safa-Daul. Ay rodi ka fag Safa-Daul inlanggang wan. Laman nafamasadan ka fag ngay fun daul siginans fakamenitan at fagdifean. ¹³ Ay rodi nalag aw tuluk mafurat fag falad kata sik fiyo. Kanya nalfas siginan aro fag yaw at bibig, ay siginan aro fag mela at bibig, ay anggan siginan aro fag taglong at yud matuyan at bibig. ¹⁴ Ay ka fag tuluk mafurat fag falad nafasure sik ngay faglagan fag fagbulun. Ay kanya nalo sas fagdaul daga sa at ngay fun daul. Laman nanfaful ka fag ngay fun daul. Laman nanfabarangian kaduge indasug Funbalugu, At-Tiba-Tungud-At-Madaragang, At madaragang fag menit. ¹⁵ Funbalugu nalong te, Amatangani. Umdasug ban Aw kata sik takamul. Sik taw guseganan tuwa ginanya nu gdi gtiug. Ay nu kamasadan tuwa at lanbung. Laman gina Aw kadasug, kanya di malanu gina glo. Ay di kapla sat tiba. ¹⁶ Ay ka fag tuluk mafurat fag falad nafaful ka fag ngay fun daul sa sik talun, Taw-Atsi-Baliwa nu gngayan te, Fulan-Megidu-At-Bugsul. ¹⁷ At fafituk tagbukngan nabusbus at suadan si at ba taya sas kiwang. Ay rodi gbiya nu e ge longan siginans Tagbvt-Fag-Bale-Funbalugu siginan At faglunggungan daul te, Intabu wan. ¹⁸ Ay rodi nafangkilat ayuwayu. Ay e nae longan ayuwayu. Ay natalafun ayuwayu. Ay anggan nauwigan dawdaw tam daga. Tam daga dia batang nauwigan takatvngvd anya siginan ngay ebi ebi yud e taw. ¹⁹ Ay ka fag fulan at madaragang at ngayan Ke-Aringang nafangaafudan tuluk afud. Ay at ngay fulan sas tibak talun sigon inrasras wan. Ay Funbalugu dia naliam ka fag fulan at madaragang Ke-Aringang. Laman nanfainum yay fagdaul at suadan fag fansigung siginan ka fag taya. At masuad te, Funbalugu At fandotamaan dawdaw. ²⁰ Ay fagayu furu infalyu wan. Ay anggan fagayu bugsul du e nalag. ²¹ Ay sik ngay moyan batu ayuwayu siginans kiwang intong sasa ngay taw. Ay sadik moyan batu kamabiat sik taw. Ay at ngay taw nalong mauri sas Funbalugu baliwa. Anway intong wayay ka fag ngay batu sa anya, at fanfauri ay at famalimuanan dawdaw.

¹ Ay at sadi ka fag fituk tagbukngan at ke fituk taya nangakbang sa angku ay nalong te, Basta wan. Ay nanfalag aw emu at fanfauri ban sanya fag fakamayunan fag mangena at madaragang. At tagbanwan at makbang sasa ngay fakagamutan safa. ² At ngay fun daul sas fagdaul daga kamayun sanya fag mangena. Ay anggan at ngay tagbanwan sas fagdaul daga takata takasigung fag taw gina ka fag mangena gafamayunun sa anya. ³ Ay ka fag tagbukngan nataban angku sa sik talun at yud e taw, gina At-Masine-Fag-Falad igfaamatanganan angku. Ay sanya nalag aw sik mangena nu gsakay sa sik mela maraska. Sa ka fag mela at ngaba bilug marirukan sik ngay ngayan mauri sas Funbalugu baliwa. Ay fitu at alfuyu. Ay safulu at sunge. ⁴ Ay ka fag mangena at lanbung maloban ay maraska. Ay ngayu at famasinean. Tiba at fangawat sanbung fanumyu. Ay tiba at fangawat sik batu masine. Ay anggan tiba at fangawat at mesug fag ale batu. Ay ka fag mangena nagalumutan sik taya sanbung fanumyu at mapnu at mafurat ay at mapla fag fakamayunun. ⁵ Ay e rirukan sa ka fag mangena at angas, sik fafaskudanan fag ngayan te, Fulan At Madaragang at ngayan Ke-Aringang. Fagayu taw at tina sas takamayun baliwa. Ay fagayu taw at tina sas fagmafuratun baliwa. ⁶ Ay nalag aw ka fag mangena gina kasigung siginan aro at nainuman Funbalugu At ngay taw at taguk. Ay anggan at nainuman at taguk siginan at kinkate tagfaning Isus. Ay kaduge aw glinggat sa ka fag mangena, gadulawan aw dawdaw. ⁷ Ay ka fag tagbukngan nalong angku te, Lag gadulawan. Nanfoyung akyay emu at fafaskudanan at masuad sa ka fag mangena. Ay anggan sat fagsakayan fag mela ke fituk alfuyu ay ke safuluk sunge. ⁸ Aro am nalag fag mela tagleleg ebi, ay katsi inkate wan. Ay bandi ban kanya umsure yay fiya siginans ka fag sulat tabiu at yud e bangsi. Ay e fadasug ban anya sa tagbiya fag faurianan. Ay at ngay tagbanwan sas daga, kayu at yud e rirukan at ngayan, ebi gina yud e daga, sa ka fag fagtapan at ngayan te, Kayu-Tagleleg-Faggugat, kanya ban gadulawan dawdaw gina glinggat sa ka fag mela. Anway ka fag mela gleleg yay ebi, ay katsi nkate wan, ay bandi umsure yay fiya. ⁹ Ay nu katanya, mamatanganani tuwa sa ku longan at masuad. Ka fag fituk alfuyu at masuad te, fituk bugsul. Ay ka fag mangena igbanwan yay sanya. ¹⁰ Ay ka fag fituk alfuyu at masuad anyangay te, fituk fun. At lima sanya fag fun inkate wan. Ay at sadi gleleg yay. Ay at sadi di at sanya. Ay dewa ban umdasug, dua glugo nu gmagurang sanya. ¹¹ Ay ka fag mela at tagleleg ebi ay katsi inkate wan, kanya at fawalu wak fun. Ay ka fag fituk fun at sadi ka fag mela wan. Anway ka fag mela duwa ginan nu gmagurang. Ay e fadasug ban anya sa tagbiya fag faurianan. ¹² Am nalag aro fag safuluk sunge, at masuad te, safuluk fun at yud mafamagurang. Ay e nafon ban anya te, laman mafamagurang yay sik lungud menit sirut, gfasfuan ka fag mela. ¹³ Ka fag safuluk fun insadi at amatanganan. Ay kanya mon ban sa ka fag mela at fagmadaragangun ay at fagmafamagurangun sigon. ¹⁴ Ay ka fag mela ay anggan ka fag safuluk fun nanfabarangian ban sas Tupa-Riangan. Ay Tupa-Riangan yay At mabo. Anway Tupa-Riangan tuwa At Fun sas fagayu fun sirut, ay At Fun Daul sas fagayu fun daul. Ay at ngay tagufud sas Tupa-Riangan, Funbalugu At ngay nafili, ay At ngay nasugu, ay at ngay takafandiug sa Anya. ¹⁵ Ay ka fag tagbukngan iglong sa angku te, Aro nalag wo ka fag fakamayunan fag mangena at madaragang, nu gbanwan at maakbang sisa ngay fakagamutan safa. Ay sanya sa ngay fakagamutan safa at masuad te, sik ngay fulan at taw, ay sik ngay taw ayuwayu, ay sik ngay talun at taw, ay anggan sik ngay saman wak fanlongan at taw. ¹⁶ Ay ka fag mela ay anggan am nalag aro fag safuluk sunge, umlimata ban sa ka fag fakamayunan fag mangena. Ay kanya mul ban nus nge wain ka fag mangena at nanuranan, ay anggan at lanbung, laman malanu way. Ay kanya umon ban ka fag mangena at bilug. Ay matas wa sasad afuy at balyu. ¹⁷ Katanya wa ban fiya, anway Funbalugu wan tagfaamatanganan sa ka fag ngay sunge. Laman ka fag ngay sunge maning sas Funbalugu At fasadan te, laman ka fag ngay sunge umsadi at amatanganan. Ay kanya mon yay sa ka fag mela te, laman mafamagurang yay ban. Yap ngay Funbalugu At ngay longan umgurungan. ¹⁸ Sat fafaskudanan am nalag fag mangena at masuad te, ka fag fulan daul at tagmagurang sasa ngay fun daul sas fagdaul daga.

¹ Ay rodi nalag aw sadi yak tagbukngan at madaragang dawdaw gina kadaga siginans Banwa. Ay ka fag tagbukngan masulo dawdaw ay nadamlag sas daga. ² Ay gbiya nu ge longan te, Nafangarasrasan wan ka fag fulan at madaragang at ngayan Ke-Aringang. Nafangalafian wan. Ay sanya insik fagbanwanan wa sas fagayu mafurat fag falad, ay sas fagayu mafurat fag taw yabi, ay anggan sas fagayu at mafurat ay at malimata fag manuk tungud. ³ Anway at ngay taw siginans fagayu fulan nainum wa sanya ginan fag fulan at fangasigung. At masuad te, mauri dawdaw at fagalabianun. Ay at ngay fun daul siginans fagdaul daga sanya at fagnanfamayunan fag fulan. Ay at ngay tagfesali siginans fagdaul daga indaul at fagmabalanun sanya ginan fag fulan. Anway ka fag fulan mason dawdaw at fagalabianun. ⁴ Ay rodi nadungug akyay fiya sadi yak longan siginans banwa te, Kayu Ku ngay taw, Alfasi wan sanya ginan fag fulan. Laman di ban am maguyudan sanya fag ngay tagasalanan. Ay laman di ban am maful gina e gfauri. ⁵ Anway sanya fag fulan at ngay asalanan inbugsul wan anggan insuy sas Banwa. Ay Aw, ay Funbalugu, da Kwa ban kaliam ka fag fulan at mauri. ⁶ Nus nga setvgnvd ka fag fulan at fagbulun sa tiba, katvngvdi yangay anya ay fagbulun sa anya. Ay am duwa ginani tuwa nu gfafoli am sa anya. Ay at nafon sa tiba nu sik taya fangasigung, am nu gfon am sa anya, fasoni katvngvd anya duwa ginan. ⁷ Madaragang kanya nu gfalabi at fagbulun, ay nu nafaning sas fagayu at fagalabianun. Katvngvdi yangay anya nu gfasait am anya. Ay nu gfabaluanan am anya. Kanya nu gamatangan sa way mandi anya te, aw sik fun daul aktuwa, madyay si aw ku faglunggungan daul, ay bun akdi sik burangday, ay da kdi ban kabalu faggugat. ⁸ Ay anway katanya, umdasug ban sik ngay faurianan sa anya sik menit way sadi. Umke sik famate fag dailan, ay umke fakabaluun dawdaw, ay umke sik fanlunus dawdaw, ay umke sik afuy dawdaw laman lumabe. Anway Aw wan ay Fun ay Funbalugu, ay madaragang Aktuwa. Ay Aw wa ban tagtap ka fag fulan at asalanan ay tagfauri ban anya. ⁹ At ngay fun daul sas fagdaul daga, ebi at nafamayun sanya fag fulan daul ay at nafaning sat fagalabianun dawdaw. Ay kanya gina ban lumag ka fag fulan nu kanus gina kalabe, muyway wa ban anway kabalu dawdaw. ¹⁰ Ay ka fag ngay fun daul ngayayu yay ban nu gbantay sanya, anway kalimu dawdaw te, ma kanya sigon at kumfauri. Ay kanya lumong ban te, Fangulan. Fangulan. O fag fulan daul. O fulan at madaragang at ngayan Ke-Aringang. Sik lungud menit way sirut, nu e natap am asalanan ay nu gfauri emu. ¹¹ Ay at ngay tagfesali siginans fagdaul daga guyway wa kabalu sa ka fag fulan. Anway sanya du e taw nabul at ngay famabangsi. ¹² Kata tuy at ngay famabangsi. Sanbung fanumyu, ay sanbung salafi, ay at masine fag batu, ay anggan at ke fanambagun fag ale batu. Ay sik mayung fag sinyag, ay at tiba maloban, ay at tiba manyang, ay anggan at tiba maraska. Ay sik ngay kayu mabebanglu. Ay at ngay naawat. Ay tiba at fangawat sunge ay bagang urungan. Ay tiba at fangawat kayu at mabiat nu kasali. Ay tiba at fangawat sanbung maraska, ay sanbung fiso, ay anggan batu malagsi. ¹³ Ay tiba at famabangsi, sik lukba aninge. Ay sik lumad bebanglu. Ay sik dafug bebanglu. Ay sik lune fili. Ay sik kamangyan. Ay sik fangasigung. Ay sik safa mataba. Ay sik fare ay anggan at nalubuk fag fare. Ay at ngay baka. Ay at ngay tupa. Ay at ngay kabayu. Ay at ngay fagguyudanun at faguban. Ay anggan at ngay nafesali fag fanuguan, at masuad sik taw. ¹⁴ Ay at ngay tagbantay nalong sanya fag fulan te, Fagayu am ngay naumsigan ebi, naliam wan. Ay fagayu am fagmabalanun ay am famasinean ebi, naliam yangay. Kayu niya dua ban e lumag faggugat. ¹⁵ Sanya ginan way fag fulan ka fag ngay tagfesali at salafi nu kaayu. Ay ngayayu yay ban nu gbantay. Anway kalimu te, anggan kanya manfauri. Ay kanya muyway wa ban mabaluanan dawdaw. ¹⁶ Ay lumong ban te, Fangulan. Fangluan. Ka fag fulan at madaragang. Ebi sanya fag ngay taw at fangawat at lanbung sik mayung fag sinyag, ay sik maloban fag sinyag, ay sik maraska fag sinyag. Ay at fangawat at famasinean sanbung fanumyu, ay at masine fag batu, ay anggan at ke fanambagun fag ale batu. ¹⁷ Ay sik lungud menit wadi fagayu nu kaliam. Ay fagayu balutu at ngay fun, ay fagayu tagsakay sasa ngay balutu, ay fagayu tagfaleleg balutu, ay anggan fagayu at nabul salafi siginans balutu, kayu niya ngayayu yay nu gbantay sa ka fag fulan. ¹⁸ Ay gina glinggat sa ka fag fulan nu kanus gina kalabe, kanya nalong te, Go e tibak fulan yangay kamadaragang anya. Go yaya. ¹⁹ Ay kanya nagalumut at madafug fag daga ay nafat sa at alfuyu. Ay kanya guyway wa mabaluanan. Ay gbiya nu glong te, Fangulan. Fangulan. Ka fag fulan at madaragang. Dewa mangaro fagayu tagbilug balutu e fagmabalanun siginan way ka fag fulan at fagmabalanun. Sik lungud menit ka fag fulan nu karasras. ²⁰ Ay e longan yangay te, Useganani am, at ngay taw Banwa, ay am, Funbalugu At ngay taw, ay am, At-Ngay-Suguan, ay anggan am, At ngay taglong. Anway Funbalugu wan tagfauri ka fag fulan, anway kanya ebi nafauri ayu. ²¹ Ay rodi sik madaragang fag tagbukngan nabul sik batu kata sik fagligisan fag batu daul. Ay nafanggong naukas sasad lino daul. Ay nalong te, Katanya yangay ban ka fag fulan at madaragang at ngayan Ke-Aringang, Nu e rumarasras ban, ay dua ban e lumag anya faggugat. ²² Ay nalong yangay sa ka fag fulan te, Dua ban e dungganan siginan emu, nu e gfaawang gfauni, ay nu e gdanyu, ay nu e gtulali, ay nu e gbudyung. Ay dua ban e nalag siginan emu at takawat nus nge wain fagfangawatun. Ay dua ban e dungganan siginan emu nu e gfaawang siginans fagligisan batu gina grufa at fakonun. ²³ Ay dua ban e dumamlag salung siginan emu. Ay dua ban e dungganan siginan emu sik bagu indaduwa nu gsulitanan. Katanya wayay, anway am tagfesali taglabi tiba, ay am fagmabaraun igfanluk way fagayu taw sas fagayu talun. ²⁴ Ay e nalag sanya fag fulan Funbalugu At ngay taglong at taguk, ay Funbalugu At ngay taw at taguk, ay anggan fagayu at nafate ebi sas fagdaul daga at taguk.

¹ Ay rodi, nadungug aw kata sik ngay taw ayuwayu tagbiya nu ge longan siginans Banwa, ay igdanyu te, Gseg watam tam Funbalugu. Tam Funbalugu wan tagbalabag taw. Ay Kanya tuwa At madaragang, ay At ke fagmasineun. ² Ay Funbalugu nu gfauri tagasalanan mafanud ay gkasakan. Kanya nafauri sa ka fag fakamayunan fag mangena at madaragang. Anway kanya nafafurat sas fagdaul daga at taw anway at nafamayunan, ay kanya nabusbus wayay Funbalugu At ngay fanuguan at taguk. Funbalugu nafafoli yangay at mauri sa ka fag mangena. ³ Ay kanya gdog yay fiya gdanyu dawdaw te, Gseg watam tam Funbalugu. Anway sanya ginan fag madaragang fag fulan at anus igturugan faggugat faggugat ban. ⁴ Ay ka fag 24k magurang ay anggan ka fag ufatk tagleleg namalub sas daga ay igseg Funbalugu, At Malunggung sat faglunggungan daul te, Kin, katanyai tuwa. Gseg watam tam Funbalugu. ⁵ Ay siginan At faglunggungan daul at akbang e nalong te, Segi tam Funbalugu, fagayu am, At fanuguan, ay fagayu am, at takalimu Anya, ay dewa gyud am e fagmadaragangun, ay dewa am e fagmadaragangun. ⁶ Ay rodi nadungug aw kata sik ngay taw ayuwayu nu ge longan. Kadaul sik safa nu gfawas nu gbararusan. Ay kadaul yangay sik ngay fangalong ayu daw. Ay igdanyu te, Gseg watam tam Funbalugu. Anway tam Fun tam Funbalugu, At-Tiba-Tungud-At-Madaragang, tagmagurang fagayu. ⁷ Fagayu tam, useganani. Ay fagayu tam, aumsigi. Ay gseg watam Anya anway sa At kamadaragangan. Anway Tupa-Riangan nu nangadaduwa gadasugun wan. Ay At fasad mangena nafamasadan wa mandi. ⁸ Ay e nafon anya sik mayung fag lanbung, masulo ay at yud e layung. Ka fag mayung fag lanbung at masuad te, Funbalugu At ngay taw at masine fag fagbulun. ⁹ Ay sik tagbukngan nalong angku te, Riruki kata tuy te, Guseganan at nagewan fag taw nu nanlag sas Tupa-Riangan At fagnangdaduwan fag yafun. Ay ka fag tagbukngan nafamut yay te, Kanya ku longan Funbalugu At ke longan fiya. ¹⁰ Ay rodi inlub aw sas tagbukngan at akbang ay iseg aw anya. Ay kanya nasalag angku te, Lagi. Lag katanya. Kata way ta at sadi, sik fanuguan way ta. Ay anggan am ngay fadugsay, sik fanuguan way. Ay anggan fagayu takafandiug sas Isus At foyungan, sik fanuguan way. Tam fagsegan sas Funbalugu yakman fagsadi. Anway Isus At foyungan at nafon at fagmadaragangun sas Funbalugu At ngay taglong, laman kanya mafafoyung. ¹¹ Ay rodi nalag aw sik sakbawan sas Banwa nu maluangan. Ay manlag akdi sanya sik kabayu malagsi. Ay At tagsakay At ngayan fag duwa te, At-Mafanud ay At-Matuyan. Madyay masine tuwa At ugali nu gtap taw at asalanan ay nu gfabarangian. ¹² Ay At mata nu malinggat katvngvd sik afuy nu gdamlag. Ay si At alfuyu sik ngay sangbo kata sik fun at sangbo. Ay e nariruk wa daw At ngayan mandi si Anya. Ay nus nga sinu du e nasaful ka fag ngayan. Kanya way mandi At nasaful. ¹³ Ay At lanbung nafasurung sas taguk. Ay e nangayan Anya te, Funbalugu-At-Longan. ¹⁴ Ay Banwa at ngay tagbarangian e sik mayung fag lanbung, malagsi ay di e layung. Ay kanya nasakay sa sik ngay kabayu malagsi. Ay igguyan sa aro taguna fag tagsakay. ¹⁵ Ay aro taguna fag tagsakay e nsure siginan At bibig sik fiso mataga, at fanbabo sas fagayu talun at ngay taw. Ay Kanya gina ban igmagurang sas fagayu talun, At famalang ban sik sanbung fiso. Ay Kanya sumiad ban at ba buadan sas Funbalugu At fagturisan buadan. Ay ka fag buadan safa at masuad te, Funbalugu At Tiba-Tungud-At-Madaragang At mason fag fandotamaan. ¹⁶ Ay si At lanbung ay anggan si At balangbang e rirukan ka fag ngayan te, At-Fun-Sas-Fagayu-Fun-Sirut, ay At-Fun-Daul-Sas-Fagayu-Fun-Daul. ¹⁷ Ay rodi nalag akyangay sik tagbukngan nu malindug sisad sudyang. Ay gbiya dawdaw nu guro sas fagayu manuk taglayug sas kiwang te, Stei. Afuli. Ay oni Funbalugu At nafamasadan ban fag yafun daul. ¹⁸ Nangoni ban sik ngay faknul siginan at ngay kinkate fag ngay fun daul. Ay fag ngay fun tagbarangian. Ay fag ngay madaragang fag taw. Ay fag ngay kabayu. Ay anggan ka fag ngay tagsakay sis kabayu. At masuad, fagayu taw kinkate at faknul. Dewa sik fanuguan ay dewa sik yud fanuguan. Dewa sik madaragang fag taw ay dewa sik yud madaragang fag taw. ¹⁹ Ay nalag akyay fiya ka fag mela, ay anggan fagdaul daga at ngay fun daul, ay anggan at ngay tagbarangian sigon nu maful. Ay at fagmafulun sanya laman igfabarangian sa aro taguna fag tagsakay sas kabayu ay anggan At ngay tagbarangian. ²⁰ Ay e nasungsung wa ka fag mela, gfasfuan ka fag taglong at yud matuyan. Kanya ebi at nafasure sik ngay faglagan fag fagbulun sa ka fag mela at akbang. Laman nafanluk fagayu taw takaumsig e rirukan si at bilug siginan ka fag mela. Ay anggan fagayu tagseg sa ka fag tawtawan. Ay ka fag mela ay anggan ka fag taglong at yud matuyan e naukas anya gina gleleg sas Lino-Afuy at ke glabe kaysukri. ²¹ Ay ka fag mela at sawad at ngay tagbarangian way, at kinkate sas fiso at kinsure siginan At bibig tagsakay sis kabayu. Ay fagayu manuk tungud inroy wa dawdaw at naonan ka fag ngay kinkate at faknul.

¹ Ay rodi nalag akyangay sik tagbukngan gina kadaga siginans Banwa. Ay kanya nagalumutan at fanluang sa at fandingding sas sulat tabiu at yud e bangsi. Ay anggan e sik tagradrabingan fag sanbung ngaba. ² Ay ka fag tagbukngan nababo ka fag yaw, ebi ebi taguna fag yaw. Ay at ngayan te, Takamuag-Tiba-At-Fagbulun, ay anggan Tagfansalag. Ay kanya nasalod dawdaw ka fag yaw, laman ban dua malfas anban sik libuk banwa. ³ Ay anggan wa, naukas ka fag yaw sas tabiu at yud e bangsi. Ay nadingding wan at sulat tabiu. Ay anggan nadafut sik taru te, laman dua kaluang tuy fag sungsungan. At fagnasungsungun laman ban kanya dua nanfanluk sas fagayu talun at ngay taw. Yap ngay umlangfe ka fag libuk banwa. Ay nu mlangfe ban, kadudge niya falfasi yap ban ka fag yaw sik gadugayun. ⁴ Ay rodi nalag aw sik ngay faglunggungan daul. Ay e nafon sa at ngay malunggung sanya at fagmadaragangun. Laman igsarap taw at fagbulun te, go masine ay go mauri. Ay nalag akyangay sik ngay falad, ebi at kinkate at ke nalifung at liug. At fagnafateun anway kanya igfoyung Isus At fagbulun, ay anggan Funbalugu At longan. Ay kayu niya at yud naseg sa ka fag mela ay anggan sa at tawtawan. Ay kayu niya at yud e rirukan ka fag mela at ngayan si at angas ay ate si at daluap. Ay rodi kayu niya gdog yay gleleg. Ay nanmagurang ban gfasfuan Isus kanya fag libuk banwa. ⁵ Ay at tiba fagayu at kinkate dia ban gdog gleleg yap ngay ban umlangfe ka fag libuk banwa. Ay kata aro at taguna fag nadog gleleg. ⁶ Guseganan tuwa kayu at kinleleg sis taguna fag nadog gleleg, ay manga Funbalugu tuwa At ngay taw. Ay at faduwa ban fakateun dua ban e fagmadaragangun sanya fag kinleleg. Ay kanya ban Funbalugu ay anggan Fagtayukan ban At ngay taganyun. Ay kayu niya nanmagurang yangay ban gfasfuan Fagtayukan kanya fag libuk banwa. ⁷ Nu mlangfe wa ban ka fag libuk banwa, e falfas yay ban Tagfansalag siginan at fagmasungsunganan. ⁸ Ay kanya malfas yay ban laman nanfanluk yay ban at ngay taw sas fagayu talun sas fagdaul daga. At masuad te, talun At-Nesugan ay Magug. Ay Tagfansalag nanfaful yay ban at ngay taw laman nanfabarangian yay ban. Ay at ngay taw at kayuan, kayus lagnas sas tigyangan lino daul. ⁹ Ka fag ngay taw lumo ban sas fagdaul daga. Ay umsafung ban sas Funbalugu At ngay taw at fagbanwanan. Ay anggan sas Funbalugu At fakesugun fag fulan. Ay bandi ban sik afuy umtong siginans Banwa ay nafamin kanya fag ngay taw. ¹⁰ Ay Takamuag-Tiba-At-Fagbulun, at nafanluk fag ngay taw, ay e mukas ban anya sas Lino-Afuy at ke kaysukri. Sanya wan ka fag mela ay anggan ka fag taglong at yud matuyan nu maukasan. Ay e gfauri ban anya dewa mamenit ay dewa mayabi, faggugat faggugat ban. ¹¹ Ay rodi nalag aw sik faglunggungan daul malagsi. Ay anggan At Malunggung sanya. Ay fagdaul daga ay anggan banwa maliam wan. Ay dua ban e nalag sanya. ¹² Ay nalag akyangay at ngay kinkate, at madaragang ay anggan at yud madaragang. Kanya malindug sis akbang faglunggungan daul. Ay sanya sik ngay fagtapan malunggaban wan. Ay sadi ya fiyak fagtapan at malunggaban yangay. Ay kanya at ngayan te, Kayu-Tagleleg-Faggugat. Ay sanya fag ngay fagtapan e gsarap at ngay kinkate at fagbulun te, go masine ay go mauri. Anway fagayu at ngay kinkate at fagbulun fagayu e nariruk wa sanya. ¹³ Ay at lino daul nafasure at ngay kinkate sanya ginan. Ay Fakateun ay Kinbul-At-Talun nafasure at kinkate sanya ginan. Ay fagayu at kinkate e nasarap wan at fagbulun fagayu te, go masine ay go mauri. ¹⁴ Ay e naukas Fakateun ay Kinbul-At-Talun sas Lino-Afuy. Ka fag Lino-Afuy at masuad te, anwa at faduwak fakateun. ¹⁵ Ay kayu at yud e rirukan at ngayan sa ka fag fagtapan Kayu-Tagleleg-Faggugat e naukas wa anya sas Lino-Afuy.

¹ Ay rodi nalag aw sik bagu fag banwa ay sik bagu fag daga. Anway at taguna fag banwa ay anggan at taguna fag daga naliam wan. Ay anggan du e lino daul. ² Ay nalag akyangay Funbalugu-At-Fulan, At bagu fag Erusalem, nu kadaga siginans Banwa, siginans Funbalugu. Ay ka fag fulan nafamasadan wa kata sik fasad mangena nu nafamasineun anya anway galadlaganun wa sat fasad mangama. ³ Ay nadungug aw sik tagbiya fag longan siginan At faglunggungan daul te, Amatangani. Katsi ban Funbalugu At fagbanwanan si wa at ngay taw. Funbalugu igbanwan ban si anya. Ay sanya Funbalugu wa At taw. Ay Funbalugu wan tagufud anya faggugat. ⁴ Ay Funbalugu rumarus ban fagayu at luon si at mata. Ay di ban e fakateun. Ay di ban kabalu. Ay di ban galuonun. Ay anggan di ban e fakasaitun. Anway ebi mandi fagayu naliam wan. ⁵ Ay At Malunggung sa At faglunggungan daul iglong te, Amatangani. Nafabagu Akwan fagayu. Ay kanya iglong yay te, Riruki kata tuy te, Fagayu aro Ku longan mafanud ay matuyan. ⁶ Ay Kanya iglong yangay sa angku te, Intabu wan. Aw wan takata sik A ay anggan takata sik Ya. Aw wan takata sik Fagsigadan ay anggan takata sik Fakatabuan. Ay mon ban Aw sa takadanum sik safa at yud e fansali, siginan ka fag mata bulbug at ngayan te, Safa-Tagfon-Leleg. ⁷ Nus nga sinu at nababo sat mauri, kanya aro Ku longan fagayu umgurungan wa fiya sa anya. Ay Aw wa ban ka fag ngay taw at Funbalugu. Ay kanya wa ban Ku ngay unga. ⁸ Ay fagayu tagfangalimu, ay fagayu at yud kafandiug, ay fagayu at mafurat siginan at asalanan, ay fagayu tagfate taw, ay fagayu takamayun, ay fagayu at mabara fag taw, ay fagayu tagseg sas tawtawan, ay anggan fagayu takamuag, kayu niya at kumdasug ban sas Lino-Afuy at ke kaysukri. Sanya at faduwak fakateun. ⁹ Ay rodi ka fag fituk tagbukngan at sadi tagalumutan ebi fag fituk taya at mapnu at fituk fakatabuan fag fanfauri, nangakbang sa angku. Ay iglong sa angku te, Glo wata. Laman lumag o At Fasad-Ban-Mangena, Tupa-Riangan ban At mangena. ¹⁰ Ay gina At-Masine-Fag-Falad igfaamatanganan angku, ka fag tagbukngan nataban angku sa tagbiya ay ngabat fag bugsul. Ay kanya nafabantay angku Funbalugu-At-Fulan, Erusalem, gina kadaga siginans Banwa, siginans Funbalugu. ¹¹ Ay Funbalugu At fagmasineun sanya wa fag fulan. Ay ka fag fulan at kamasuloan katvngvd at ke fanambagun fag batu. Ay kata sik batu at mameluan nu madalusan, ay kata sik batu tagtalfusan nu kalag. ¹² Ay ka fag fulan at alad matukba ay ngabat. Ay at ngay sakbawan alad sik safulu ay labi duwa. Ay sik safulu ay labi duwa yangay tagbukngan tagtanud si sadi sadi sasa ngay sakbawan. Ay si at ngay dingding sakbawan e nariruk sanya Tagagbuan at kadagdagan, at labi duwak baguama at ngayan. ¹³ Sas fakamenitan baliwa fag tigyangan alad, tulu at sakbawan. Ay sas fakayabian fag tigyangan, tulu yangay. Ay sis duwa tigyangan, sit sadi, tulu. Ay sit sadi, tulu yangay at sakbawan. ¹⁴ Ay sanya fag fulan tagfatvngvd at alad, sik safulu ay labi duwak batu daul. Ay sanya fag batu e nariruk Tupa-Riangan At sik safulu ay labi duwa At-Suguan at ngayan. ¹⁵ Ay aro fag tagbukngan, at nafamatuan angku, igbitbitan sik famasud at fangawat sik sanbung fanumyu kaba sik suan. At fanfasud sanya fag fulan, ay sa at ngay sakbawan, ay anggan sa at alad. ¹⁶ Ka fag fulan at kadaulan ay at kabaan sigon, kaba way at sadi. Ay at nafasud sanya fag fulan sat famasud, 1,200,000k dufa. Ay at kabaan ay at kadaulan ay at kabatan, kaba way at sadi. ¹⁷ Ay nafasud yangay at alad, 144k siyu. At famasud kata yangay ste swa daga sik taw at famasud. At masuad yangay te, sik tagbukngan ke famasud. ¹⁸ Ka fag alad at fangawat sik ngay batu melo madalusan. Ay ka fag fulan at fangawat sanbung fanumyu at yud e fasagbatan, ay mafayasan. ¹⁹ Si at fagfatvngvdan at alad e ngay famasinean, sik ngay ke fanambagun fag batu. At fasadi, sik batu melo madalusan. At faduwa, sik batu ganyang mafayasan. At fatulu, sik batu gradraskaun mafayasan. At faufat, sik batu melo mafayasan. ²⁰ At falima, sik batu maraska ladlagsiun madalusan. At faunum, sik batu maraska madalusan. At fafitu, sik batu galagsiun mafayasan. At fawalu, sik batu melo gaanyangun mafayasan. At fasiam, sik batu melo galagsiun mafayasan. At fasafulu, sik batu melo gamalayungun mafayasan. At falabi sadi, sik batu garaskaun mafayasan. At falabi duwa, sik batu maloban mafayasan. ²¹ Ay at labi duwak fandingding sakbawan alad, sik ke fanambagun fag ale batu daul. At fandingding fagayu anwa sik ale batu. Ay at fulan at fangawat at dalan sanbung fanumyu at yud e fasagbatan. Ay igtalfusan nu kalag. ²² Ay da kwa e nalag sik Tagbvt-Fag-Bale-Funbalugu sanya. Anway fagdaul at fulan kata wa nu sik Tagbvt-Fag-Bale-Funbalugu. Anway sanya wan tam Fun tam Funbalugu At-Tiba-Tungud-At-Madaragang, ay anggan Tupa-Riangan. Ay sanya wan at taw nu gseg Anya. ²³ Ay ka fag fulan dua gayudan tam menit ay tam magdanun nu nadamlag sanya. Anway Funbalugu wa At fagmasineun tagdamlag anya. Anway Tupa-Wa-Riangan At salung yangay sanya. ²⁴ Siginan ka fag fulan nafayamag yangay sas fagayu talun at ngay taw sas fagdaul daga. Ay fagdaul daga at ngay fun daul muba ban sanya at ngay fagmabalanun. ²⁵ Ay faggugat dua ban madingdingan at ngay sakbawan alad anway mamenit way. Ay dua ban e yabi sanya. ²⁶ Ay fagayu talun at ngay taw muba ban ayuwayu sanya at ngay fagmasineun ay at ngay fagmabalanun. ²⁷ Ay faggugat dua ban umdasug sanya nus nge wain at mafurat. Ay sik taw at mafurat at fagbulun, ay anggan takamuagan dua ban umdasug sanya. At kumdasug ban kayu way at ke marirukan at ngayan sas Tupa-Riangan At fagtapan at ngayan te, Kayu-Tagleleg-Faggugat.

¹ Ay aro fag tagbukngan rodi nananfalinggat sa angku sa sik safa at ngayan te, Safa-Tagfon-Leleg. Ay ka fag safa malio kata sik batu tagtalfusan nu kalag. Ay ka fag safa kalimus siginans Funbalugu ay Tupa-Riangan At faglunggungan daul. ² Ay kalimus yangay sasa ngaba wa bilug dalan sis fulan. Ay sis duwa tigyangan safa e sik kayu at ngayan te, Kayu-Tagfon-Leleg. Ay ka fag kayu nu gbuadan sik banwa, sik safulu labi duwa ginan. Fagayu magdanun e buadan wan. Ay at don e fanambagun yangay laman at famafiya sas fagayu talun at ngay taw. ³ Faggugat du e mdasug sanya fag fulan Funbalugu At fakadotamaun. Anway sanya wan Funbalugu ay Tupa-Riangan At faglunggungan daul. Ay sanya At ngay fanuguan nu gseg ban Anya. ⁴ Ay At ngay fanuguan lumag wa ban Funbalugu At mata. Ay Funbalugu At ngayan e nariruk si At ngay fanuguan at angas. ⁵ Ay dua ban e yabi sanya. Ay at ngay taw sanya dua ban gayudan at damlag siginan sik salung ay siginan tam menit. Anway at Fun, at Funbalugu wan, tagyamag ban sanya. Ay At ngay fanuguan wan tagmagurang ban sanya faggugat faggugat. ⁶ Ay rodi ka fag tagbukngan nalong angku te, Mafanud ay matuyan iste at ngay longan. Ay tam Fun tam Funbalugu, At nafaamatanganan sa ebi At ngay taglong, ay nasugu angku, At tagbukngan, sa at ngay fanuguan. Laman nafoyung anya tagadasugun ban. ⁷ Amatangani. Makbang wan nu gadasugun Aw. Guseganan wan nus nga sinu tagfaning at foyungan at nariruk ste fag fagtapan. ⁸ Aw Uan. Ay aw wan at nadungug aro fag ngay foyungan ay at nalag fagayu. Ay nu nadungug akwa ay nu nalag akwa katanya, inlub aw sa ka fag tagbukngan at nafoyung angku at daga salubangan. Ay igseg aw anya. ⁹ Ay kanya nasalag angku te, Lagi. Lag katanya. Kata way ta at sadi, sik fanuguan way ta. Ay anggan am ngay fadugsay, Funbalugu At ngay taglong, sik fanuguan way. Ay anggan fagayu tagfaning at longan ste fag fagtapan, sik fanuguan way. Tam fagsegan sas Funbalugu yakman fagsadi. ¹⁰ Ay kanya nalong yangay sa angku te, Lag gsuksuk at naguna nafoyung ste fag fagtapan. Anway makbang wan ka fag foyungan nu kagurungan. ¹¹ Anway katanya, e nafanusetaw yay sa sik taw tagfagbulun at mauri, laman gfaugat yay ban at mauri. Ay sa sik taw tagfagbulun at mafurat, laman gfaugat yay ban at mafurat. Ay sa sik taw tagfagbulun at masine, laman gfaugat yay ban at fagbulun at masine. Ay sa sik taw at kinsadi sas Funbalugu, laman gfaugat yay at fagmasadiun sas Funbalugu. ¹² Amatangani. Makbang wan nu gadasugun Aw. Nanguba Aw Ku fagnanfonun fag fanambagun. Ay nanfainfaluan Akyangay ban sas taw, nus nga setaw ka fag taw at fagbulun. ¹³ Aw wan takata sik A, ay anggan takata sik Ya. Ay Aw wan takata sik Taguna ay anggan takata sik Taguyan. Ay Aw wan takata sik Fagsigadan ay anggan takata sik Fakatabuan. ¹⁴ Guseganan tuwa kanya fag taw nu nafegus tuwa at lanbung, laman gkasakan mafaon Kayu-Tagfon-Leleg at buadan. Ay laman gkasakan masakbo sa ka fag fulan daul. ¹⁵ Sa way ka fag fulan at day alad, at ngay tagfaning at bilug at mauri fag fagalabianun. Ay at ngay mabara fag taw. Ay at ngay takamayun. Ay at ngay tagfate taw. Ay at ngay tagseg tawtawan. Ay anggan fagayu taw takaumsig gfatunglus sas fakamuaganun. ¹⁶ Aw wan Isus. Ay nasugu Aw Ku tagbukngan laman nanfoyung Ku longan sasa ngay Funbalugu bale at taw. Aw wan Fun Fakafanyuun At kadagdagan. Ay Aw wan at Madamlag-Fag-Tagurabas. ¹⁷ Ay At-Masine-Fag-Falad ay Tupa-Riangan At Fasad-Mangena nalong te, Stei. Ay am, fagayu tagdungug, longi yangay te, Stei. Ay am, fagayu takadanum, akbangi. Ay nus nga sinu takaumsig, buli ka fag Safa-Tagfon-Leleg, at yud e fansali. ¹⁸ Gfatagak Aw sas fagayu tagdungug at foyungan at nariruk ste fag fagtapan. Nus nga sinu at nafamut sat foyungan, Funbalugu mamut yangay ban sa anya at ngay fanfauri sat nafoyung ste fag fagtapan. ¹⁹ Ay nus nga sinu at nafasirut sat foyungan at nariruk ste fag fagtapan, Funbalugu igsalag yangay ban anya te, laman dua mafaon ka fag Kayu-Tagfon-Leleg at buadan. Ay anggan igsalag yangay ban anya te, laman dua mful sas Funbalugu-At-Fulan at nafoyung ste fag fagtapan. ²⁰ Ay Aw wan Isus, At tagfatuyan sas fagayu at foyungan ste fag fagtapan. Ay iglong Akyangay te, gurungan matuyan wa fiya. Makbang wan nu gadasugun Aw. Kin, katanyai tuwa. Adasugi wan, em Fun Isus. ²¹ Tam Fun Isus At mamanyun nangus sa ayu fagayu Funbalugu At taw. Kin, katanyai tuwa.