Philippians

Philippians

¹ Siginan emi, Fandak ay anggan Tagseg-Funbalugu, Fagtayukan Isus At fanuguan fag duwa. Nanriruk ami sa ayu, sas fagayu Funbalugu At taw, at takafandiug sas Fagtayukan Isus sas fulan Takesug-Kabayu. Ay anggan sas Funbalugu bale at ngay magurang ay anggan sat ngay tagtanud. ² Tam Funbalugu tam Tama ay anggan tam Fun Isus Fagtayukan At mamanyun nangus sa ayu ay At nanfanabayan ayu. ³ Guseganan aktuwa sa tam Funbalugu kayu ginan aw namatang ayu. ⁴ Ay faggugat kayu ginan aw gdarangin ayu, guseganan aw dawdaw ayu. ⁵ Anway siginan ngay am bagu kafandiug anggan katsi natarabang tuwam angku gina aw gfoyung at Masine-Fag-Barita. ⁶ Ay nasaful akwa te, Funbalugu At nafasigad at masine fag fagbulun sa ayu fagayu. Ay Kanya mafafatunglus wa fiya ka fag fagbulun ay fafatabu wa fiya nu ndasug Isus Fagtayukan-At-Menit. ⁷ Ay masine tuwa mangaro katanya ku amatanganan sa ayu, anway kesug aktuwa ayu. Ay anway gtarabang tuwam angku nu gfagbulun aw sas Funbalugu At nafon angku fag fagbulun. Dewa aw masungsungan. Ay dewa matvngvd nu gfoyung aw te, matuyan tuwa at Masine-Fag-Barita. Laman fagayu taw umfandiug ban. ⁸ Ay Funbalugu wan tagsaful sa ku amatanganan te, kaumsig aw gananlagun ayu. Ay kesug aw ayu kata yangay Fagtayukan Isus nu kesug ayu. ⁹ Ay gdarangin aw sa ayu te, laman fagayu am fainkugatan tuwam nu kadkafanyuan am sa ay iba, nu nasaful tuwam te, katanya tuwa at masine. ¹⁰ Ay laman ay nafili antuwa sat masine. Ay laman masine tuwa ban fagdaul ay ugali. Ay laman di ban am e mauri anggan umdasug Fagtayukan-At-Menit. ¹¹ Laman ay ugali masine, anway e fagmasineun wam siginan Isus Fagtayukan. Ay kanya ban fag fagmasineun sik fagsegan sas Funbalugu. ¹² Ay ku fakaumsigun laman sumaful am te, ku fagmasungsunganun at masuad te, laman ngayuk taw dumungug at Masine-Fag-Barita. ¹³ Anway fagayu tagbarangian at tagtanud ste fag fun daul at bale, ay anggan fagayu tibak taw, nadungug wa te, ku fagmasungsunganun iste anway igfaning aw Fagtayukan. ¹⁴ Ay at ngay takafandiug iste, gina nasaful te, e nasungsung angku, kanya nafatvngvd at fakafandiugun sa tam Tama. Ay inkugat yay nu nanfoyung Funbalugu At longan sa tibak taw, ay di kalimu. ¹⁵ Ay tibak takafandiug at fagnanfoyungun Fagtayukan At fagbulun anway te, galabian angku ay gfaringangan yay tiba. Ay tibak takafandiug at fagnanfoyungun gurungan tuwa masine at fasadan. ¹⁶ Kanya at ke fasadan at masine, kanya takafanyu angku. Anway kanya nasaful te, Funbalugu At nafili angku laman nanfoyung aw at Masine-Fag-Barita fagtvngvd. ¹⁷ Ay roro kanya aro tagalabian angku, kanya fagnanfoyungun Fagtayukan At fagbulun dewa yud matuyan at amatanganan. Anway te, laman nabul at fanambagun mandi. Ay anway at fasadan nanfauri way angku gina aw masungsungan. ¹⁸ Dewa katanya at fagbulun. Dewa sik tagalabian sa angku at nanfoyung, ay dewa sik matuyan fag taw at nanfoyung, tiba nadungug tuwa Fagtayukan At fagbulun. Ay dewa katanya, guseganan aktuwa. ¹⁹ Kin. Ay guseganan kyangay. Anway nasaful aw te, igdarangin tuwam angku, laman Isus Fagtayukan At-Masine-Fag-Falad igtarabang angku te, laman e nanfalfas ban angku. ²⁰ Kata tuy ku fagsegun ay ku fakaumsigun, laman ban da kdi kalimu nus nge wain at kumdasug. Ay manga te nanmalimuanan aktuwa nanfoyung. Laman tibak taw nu nalag ku fagbulun, sumeg ban sas Funbalugu. Dewa te gleleg kyay, ay dewa te umkate kwan. ²¹ Anway fagayu ku ugali kaduge aw gleleg sa tuwas Fagtayukan baliwa. Ay nu nkate kwan, at ke fanambagun ban aw. ²² Ay nu gleleg akyay ban, nanfagbulunan akyay ban. Ay kua nasaful fiya fiya te, inday kanya fag duwa at sadi ku filian. ²³ Ay mason kanya fag duwa nu naaguan angku. Anway ku fakaumsigun fiya fiya galoun akwan ste ginan swa daga ay nangaful akwa Fagtayukan. Anway sanya tuwa at tiba tungud at masine. ²⁴ Ay roro nu gleleg akyay, masine yay sa ayu. ²⁵ Ay katsi nasaful akyay te, katanya mangaro. Ay nasaful akyangay te, iste akyay ban gufud ayu fagayu. Laman nanfatvngvd akyay ay fakafandiugun ay manga nanfamut akyay ay fagusegananun. ²⁶ Ay laman gina ban aw umdasug sa ayu umtvngvd yay ay fagusegananun ay ay fakafandiugun sas Fagtayukan Isus. ²⁷ Ay ugali fagayu kasakani tuwa sas Fagtayukan At Masine-Fag-Barita baliwa. Laman dewa aw nat sanya nanlag ayu, ay dewa aw yud nat sanya sa ayu, laman ku dungganan dumungug aktuwa ayu te, nafatvngvd tuwam ay amatanganan. Anway nafasadi tuwam ay fasadan. Ay nafasadi tuwam ay fakaumsigun. Laman tanani tuwa fantarabanganani ay ngay fagbulun sat nanfoyung at Masine-Fag-Barita laman at taw kafandiug. ²⁸ Ay lag kalimu nus nge wain at nansalag ayu. Anway ay namalimuanan tagfalag sa at ngay nansalag ayu te, kanya mamin ban. Ay ami at kumbalabag. Katanya Funbalugu At fagbulun. ²⁹ Anway at fagnafiliun ayu laman Fagtayukan e fanambagun ban. At masuad te, kafandiug am sas Fagtayukan, ay anggan e faurianan way ban sa ayu anway e fagbulun am sas Fagtayukan. ³⁰ Ay at nansalag ban sa ayu kata yangay ay nalag ebi at nansalag sa angku. Ay anggan kata yangay ay nadungug at nansalag sa angku katsi.

¹ Ay Fagtayukan nu nafatvngvd wa ay amatanganan, ay nu nafataluan wayu anway kesug ayu. Ay At-Masine-Fag-Falad nu nafasadi wayu. Ay am nu kedkesugan wam ay nu kadkafanyuan wam. ² Katanya tuway, famuti sa ku fagusegananun. At masuad te, faggugat masadii tuwa ay amatanganan. Ay masadi tuwa ay fakafanyuun. Ay gdiuganan tuwam anway nafasadi wam ay fasadan. ³ Lag e fagbulun tagfangesug ay tagfalabi ay iba. Ay fababauni way sa ay amatanganan laman antuwa baliwa te, kanya taglabi ayu. ⁴ Ay fagamatanganun bundi si ayu ay fasadan fagtvngvd. Amatangani tuwa anggan si ay iba at fasadan sigon. ⁵ Ay ay amatanganan katai tuwa Fagtayukan Isus At amatanganan. ⁶ Anway Fagtayukan dewa masadi sas Funbalugu, Kanya nafasadanan tuwa te, agi yap si anya Funbalugu At fagmadaragangun gina stiye swa daga. ⁷ Ay Kanya naubun yay sas Funbalugu At fagmadaragangun. Ay insure stiye swa daga kata way sik taw at fanuguan. ⁸ Ay nu nsure wa kata sik taw, Kanya kata way tiba daga fag taw. Ay Kanya igfaning Funbalugu, anggan umdasug sa At fakateun, dewa inkate sa sik salibagan kayu. ⁹ Ay anway Fagtayukan At fagfaningun, Funbalugu At nafatiba tungud Anya. Ay At nafangayan Anya te, amadaragang yap tibak taw at ngayan. ¹⁰ Laman ban fagayu taw umlub ay sumeg Anya nu dumungug At ngayan, anggan tagsas Banwa ay anggan tagste swa daga, ay anggan tagsas sad daga. ¹¹ Ay laman ban nus nga ndaginan fag talun at taw moyung tuwa ban te, Isus Fagtayukan tam Fun. Ay kanya fag longan igseg sas Funbalugu tam Tama. ¹² Ku fakesugun fag ngay taw. Nu katanya, kata ebi nu nafaning wam ku longan ayu kaduge aw sanya, katsi faningi yangay ku longan, dewa aw gyud sanya. Ay faggugat fagbuluni sat masine anway inbalabag wam. Ay alimui, ay utkulugani, laman di am fagbulun at mauri. ¹³ Anway Funbalugu wan At ke fagbulun sa ayu. Laman ay amatanganan ay ay fagbulun igfaning tuwa Funbalugu At fakaumsigun at masine. ¹⁴ Nus nga se taw ay fagbulun, dangai gfangalimataun ay dangai kamaringangan. ¹⁵ Laman di am e nasalan. Ay laman ay ugali fagdaul malayun tuwa sat masine. Anway Funbalugu wam At unga ay di am e mauri. Ay am wan takata sik salung sisad marum ste swa daga. Anway nu gbanwan am si yay swa tagfanluk ay siswa tagalabian fag ngay taw. ¹⁶ Gina am gfoyung ka fag Longan tagfaleleg taw. Laman ban museganan aw ayu anway ay fagbulun gina mdasug Fagtayukan-At-Menit. Ay kanya sik famasaful te, ku nafagbulunan ay ku nalufuyan at masuad di maliam. ¹⁷ Ay dewa e nafate angku ay nabusbus ku taguk, laman ay fakafandiugun umtvngvd, ku fakateun kata wa sik anyun sas Funbalugu. Ay nu katanya, guseganan aktuwa ay fauseganan akyangay ayu. ¹⁸ Ay anggan am, katai yangay angku. Useganani ay fauseganani yangay angku. ¹⁹ Ay ku fasadan ay Fun Isus nu kaumsig, dua glugo nu sumugu aw Tagseg-Funbalugu sa ayu. Laman gfatvngvd ku amatanganan gina aw nadungug ayu te, setain am. ²⁰ Anway du e tibak taw iste si angku kata Tagseg-Funbalugu, at tagamatanganan te, go setain manga am. ²¹ Anway fagayu taw ste at fagsarapun sa way at fasadan mandi. Ay dua gsarap sas Isus Fagtayukan At fasadan. ²² Ay am wan at nalag sa baliwas Tagseg-Funbalugu te, go masine tuwa at ugali. Anway kanya igtarabang angku gina aw gfoyung at Masine-Fag-Barita, kata sik sisian nu gtarabang at tama. ²³ Ay ku fasadan nangasaful akyay te, katanya iste si angku, ay sumugu aw Tagseg-Funbalugu sa ayu. ²⁴ Ay gafanud aw siginan tam Fun te, laman mafali tuwa nu nanlag aw sa ayu. ²⁵ Ay gamatangan aw te, masine nu nansugu aw sa ayu Sik-Ama-Masine katsi. Kanya ku fadugsay ay ku ufud sas Isus At fagbulun, ay ku ufud yangay gina e nansalag. Ay kanya ebi ay suguan sa angku laman nantarabang angku gina aw e fagayudanun. ²⁶ Ay ku fagnasuguun Sik-Ama-Masine sa ayu, anway kanya kabalu ayu. Ay kanya dua guseganan gina nasaful te, am nadungug am anya te, kanya e dailan way. ²⁷ Ay matuyan, kanya gakateun wan ebi. Ay Funbalugu kafanyu tuwa anya ay nafafiya tuwa anya. Ay kafanyu yangay anggan sa angku laman ku fakabaluun di ginfamutan. ²⁸ Guseganan aw dawdaw nansugu Sik-Ama-Masine sa ayu, laman nu nalag am anya, guseganan yangay am. Ay laman manga aw da kdi e amatanganan gafanawa sa ayu. ²⁹ Ay nu katanya, fasakboi Sik-Ama-Masine ay useganani tuwa. Ay useganani yangay fagayu taw takata anya. ³⁰ At matuyan, ebi Sik-Ama-Masine gakateun wan, anway matvngvd at fagbulun sas Fagtayukan nu gtarabang angku. Ay kanya igfatunglus yangay igtarabang angku anway am dua am mafafatunglus.

¹ Katsi glong akyangay sa ayu te, useganani anway tam Fun At fagbulun. Dewa ku longan katsi kata ebi ku rirukan, da kia kalimata. Anway kanya ku famatagak yay ayu. ² Am, tagaki tuwa at ngay taw takata sik ngay idu. Anway kanya mauri way at fagbulun fagayu. Ay kanya igfilas way at balyu, igfaning Taw-Naseg at ugali. ³ Itam at matuyan tagfaning Taw-Naseg at ugali at masine, anway igseg watam tam Funbalugu anway si tuwa antam At-Masine-Fag-Falad. Ay guseganan tuwa tam anway kafandiug tuwa tam sas Fagtayukan Isus. Ay itam lag tam fagbulun sa tam bilug baliwa te, laman antam umbalabag. ⁴ Aw ebi ku fakafandiugun si way ku bilug fagtvngvd. Ay dewa tibak taw at fakafandiugun si yangay at bilug, aw glabi kyay anya nu kafandiug aw si ku bilug fag ugali. ⁵ Anway ku mangaguyang igfaning tam ugali mandi Taw-Naseg sa ku bilug gina aw sis fawaluk menit. Ay ku mangaguyang sik Taw-Tagagbuan, siginan Sik-Baguama-Sa-Ku-Siun at ngay sugfun. Ay aw ay anggan ku aguyangan fagayu siginans Taw-Atsi-Baliwa. Ay aw igfaning aw fagayu fagayu Ku-Unga At-Longan, anway sik Taw-Tagfalayun aw. ⁶ Ay sa ku kadaragangan baliwa, nafauri aw at ngay takafandiug. Ay sa ku kasinean baliwa, igfaning aw fagayu fagayu Ku-Unga At-Longan, ay da kdi e nasalan. ⁷ Ay ebi ku fagbulun fagayu, dewa nu gfasad aw ebi e fanambagun sa angku, roro katsi natap akyay te, katanya mangaro fag fagbulun di e masuad sa angku. Anway katsi kaumsig akwa igfaning Fagtayukan. ⁸ Ay katsi natap akwa te, fagayu fagayu kanya ebi ku ugali du e masuad sa angku katsi. Anway tuy tuwa tiba tungud at masine sa angku, nu sumaful aw sas Fagtayukan Isus baliwa ku Fun. Ay laman Fagtayukan At ke fanambagun, ay naukas akwan fagayu at ke fanambagun sa angku, kata sik naginautan. Laman ban Fagtayukan si tuwa angku. ⁹ Ku fakaumsigun nangasadi akwa sas Fagtayukan. Ay aw, da kia mangaro e fagmasineun dewa aw igfaning Ku-Unga At-Longan. Roro ku fagmasineun anway kafandiug akwa sas Fagtayukan. Ka fag fagmasineun siginans Funbalugu, sik taw nu kafandiug tuwa. ¹⁰ Ku fakaumsigun sumaful aknangus Fagtayukan ay anggan At fagmadaragangun ebi at nafaleleg Anya. Ay kaumsig aw gufud Anya dewa nanfauri angku kata Anya ebi. Ay kaumsig aw laman nu mkate aw, kata kyangay ebi Kanya nu nkate. ¹¹ Anway ku fagsegun nus nga ginain ban nu mkate aw, gdog kyangay ban gleleg. ¹² Ay dewa katanya, da kia nafafabul katanya fag fagbulun. Ay bun akwa sik taw at yud e nasalan. Dewa katanya nanfatunglus akwan laman fafabul akban. Anway katanya at masuad Fagtayukan At fagnafiliun angku. ¹³ Ku ngay fadugsay, aw kua gamatangan te, fafabul aknangus. Ay kata tuy yap ku fagbulun. Maliam akyap ebi fagayu ku fagbulun. Ay fagdaul ku fasadan nanfatunglus akwa long nangadasug sa ku fakadasugan ban. ¹⁴ Nanfatunglus aw anggan sas fakatabuan, laman mul akban ku fanambagun. Ay kanya ban ku fanambagun, Funbalugu At fanggewan angku sas Banwa, anway Fagtayukan Isus At fagbulun. ¹⁵ Ay kayu tam at mabul tungud sas Funbalugu At fagbulun, katanyai wan tam amatanganan. Ay nu dyay katanya ay amatanganan, Funbalugu yay ban tagfoyung ayu at matuyan. ¹⁶ Ay katsi gfaning watam at matuyan, kata ebi nu nafafaning tam. ¹⁷ Ku ngay fadugsay, faningi kata angku, nus nga setaw ay nalag ku fagbulun. Ay uliti yangay ay iba tagfaning em ugali at masine. ¹⁸ Ebi ngayu ginan wan nu nafatagak aw ayu. Ay katsi gdog kyangay nanfatagak ayu gina aw guyway. Anway ngayuk taw tagsalag nu gfoyung tam tam Fagtayukan At naatean sas salibagan kayu. ¹⁹ Ay kanya fag ngay taw umdasug ban sa tagbiya fag faurianan. Anway at fagfaningun sa way at bilug at fagalabianun. Ay manga dua kapla nu gfoyung at mauri fag fagbulun, anway faggugat at fagamatanganun ste way swa daga fag ngay ugali. ²⁰ Roro sa antam, at matuyan ban tam fagbanwanan sa yays Banwa. Ay sanya ginans Banwa tam fagfanyaun tam Tagbalabag, tam Fun Isus Fagtayukan. ²¹ Ay Fagtayukan nanfasaman yay ban tam bilug at mafanalo. Laman ban katvngvd yangay ban tam Fagtayukan At bilug nu masine. Anway Kanya e fagmadaragangun laman fagayu nus nge wayin mafafaning tuwa Anya.

¹ Am wan ku fakesugun ku ngay fadugsay. Ay katsi kaumsig aw dawdaw galagun ayu. Am way ku fagusegananun ay ku fage fanambagun. Ay am wan ku fakesugun ku ngay taw, sungatani tuwa nu gfaning am sa tam Fun. ² Matvngvd nu glong aw sa ka fag duwena at ngayan te, Masine-At-Loan ay Masine-At-Kumdasug. Fag duwa am, fasadii ay amatanganan anway igfaning wam tam Fun. ³ Ay iglong aw emu te, o, ku Matuyan-Tagtarabang, tarabangi ka fag duwena laman umsadi ban. Anway ebi kanya fag duwena maseganina nu gufud angku gina aw gfoyung at Masine-Fag-Barita. Ay tibak ufud at ngayan At-Malukme ay e tiba yay ku ufud. Ay fagayu kanya e ngayan sas Funbalugu At fagtapan at ngayan te, Kayu-Tagleleg-Faggugat. ⁴ Faggugat useganani tuwa anway tam Fun At fagbulun. Ay gdog kyay glong te, useganani. ⁵ Masine tibak taw nu nasaful te, malukme tuwa mangaro am. Anway gadasugun wan tam Fun. ⁶ Lag gafanawa nus nge wain sa ay amatanganan. Ay darangini ay eti fagayu ay fagetun sas Funbalugu. Ay gina am get, segi tuwa Anya. ⁷ Ay nu katanya, Funbalugu nanfanabayan sa ay amatanganan anway Fagtayukan Isus At fagbulun. Ay ka fag fagmanabayanun du e manga saful. ⁸ Ku ngay fadugsay am, tuy at fakatabuan ku longan sa ayu te, amatangani kayu tuy. Nus nge wain at mafanud. Ay nus nge wain at masine. Ay nus nge wain at matuyan. Ay nus nge wain at malayun sat masine. Ay nus nge wain at masine nu kalag. Ay nus nge wain at malukme. Ay nu e tiba tungud at masine. Ay nu e tibak tage longan masine. Ay amatangani kayu niya. ⁹ Ay fagayu ay naadal, ay ay nabul, ay ay nadungug, ay ay nalag siginan angku, faningi kayu niya. Ay tam Funbalugu wan, At Tagfanabayan nus nga nday fag taw, tagufud ban ayu. ¹⁰ Matvngvd nu guseganan aw anway tam Fun At fagbulun. Anway katsi gdog yangay am fiya kafanyu angku. At matuyan kafanyu tuwam angku ebi, anway te, ngayu ay fanlonganan, ay fagyudun nanfon angku. ¹¹ Dewa katanya, aw da kdi gfangalimata dewa aw e fagayudanun. Anway ebi batang akwa gdalan katanya, ay katsi nasaful aw te, dewa nus nga se taw, guseganan aktuwa. ¹² Anway guseganan akwa katanya, dewa gina alay ay dewa gina ngayu. Nus nga se taw at kumdasug sa angku, nasaful akwa te, katanya ban ku fagbulun. Dewa aw gina kapsug ay dewa aw gina kalunus. Ay dewa gina ngayu at sawad, ay dewa gina aw e fagayudanun. ¹³ Mafafagbulun aktuwa nus nge wain, anway Fagtayukan nafat sa wa angku At fagmadaragangun. ¹⁴ Dewa aw nalong kata aro, masine tuwa ay fagbulun ebi anway kafanyu tuwam angku gina e gfauri angku. ¹⁵ Anway am wan Taw-Takesug-Kabayu fag fulan, nasaful am te, gina aw bagu glo siginans talun Masedunia, laman bagu aw nanfoyung at Masine-Fag-Barita, du e tibak bale fakafulan at taw takaumsig gtarabang angku gina aw e fagayudanun ay dewa aw gina e fasawadan. Am way fagsadik fulan at natarabang angku ginanya. ¹⁶ Ay bundi saiginan nu gfauba am sa angku gina aw e fagyudanun sas fulan Tesalunika. ¹⁷ Ay ku fakaumsigun katsi bunwa te, faayui sa angku. Ku fakaumsigun antuwa te, laman ban gbiya ay fanambagun. ¹⁸ Nabul akwan fagayu ay nafauba sa angku. Ay balikam yap nu gfon am angku, anway e sawad yay. Anway nabul akwan ay nafauba sas Sik-Ama-Masine. Ay sa ay nafonan kata sik bebanglu fag anyun sas Funbalugu. Ay Funbalugu guseganan dawdaw. ¹⁹ Ay tam Funbalugu mon yangay ban ayu fagayu ay fagayudanun, nus nga setvngvd At fagmabalanun. Anway katanya tam Fagtayukan Isus At fagbulun. ²⁰ Segi tuwa sa tam Funbalugu tam Tama faggugat faggugat. Kin, katanyai tuwa. ²¹ Nafadasug aw ku fagusegananun sas fagayu takafandiug sas Fagtayukan Isus tagsanya si ayu te, gamatangan aktuwa ayu. Ay fagayu tam fadugsay tagste si angku nafadasug yangay sa ayu at fagusegananun te, gamatangan tuwa ayu. ²² Ay fagayu Funbalugu-At-Taw tagste fag fulan, ay anggan sigon at ngay takafandiug sas Fun Sesar at bale, nafadasug yangay at fagusegananun sa ayu te, gamatangan tuwami ayu. ²³ Tam Fun Isus Fagtayukan At mamanyun nangus sa ayu fagayu.