Philemon
11 Siginan angku, Fandak, sik masungsungan fag taw anway igfaning aw sas Fagtayukan Isus. Ay anggan tam fadugsay Tagseg-Funbalugu. Nanriruk ami sa emu, Takesug, em fakesugun em ufud sas Fagtayukan At fagbulun. 2 Ay anggan sat ngay takafandiug at maful si am bale. Ay anggan sas Apia, tam fadugsay fag mangena. Ay anggan sas Tagfun-Sas-Kabayu, em ufud yangay fag tagbarangian. 3 Funbalugu tam Tama ay tam Fun Isus Fagtayukan At mamanyun nangus sa ayu ay At nanfanabayan ayu. 4 Faggugat guseganan aktuwa sa ku Funbalugu kayu ginan aw gdarangin sa emu. 5 Anway nadungug aw te, kafandiug tuwo sa tam Fun Isus. Ay anggan kafanyu tuwo fagayu Funbalugu At taw. 6 Ay igdarangin aw emu te, laman nanfoyung ban o sa tibak taw am fakafandiugun sas Fagtayukan. Laman tiba nasaful te, tam nabul fagayu menit fag ngay fagmasineun siginan was Fagtayukan. 7 Ku fadugsay, guseganan aktuwa emu anway nafatvngvd tuwo ku amatanganan. Anway nasaful aw te, kafanyu tuwo am iba. Ay anggan nafatvngvd tuwo Funbalugu At ngay taw at amatanganan laman guseganan yangay. 8 Ay nu katanya, aw mafalong aktuwa emu, Takesug, laman nanfaning o ku longan, anway Fagtayukan At fagmadaragangun. 9 Ay roro, dewa katanya, malukme aktuwa nu get aw emu. Aw wan Fandak, kafufuama akwa dawdaw. Ay anggan sik masungsungan kyangay fag taw, anway igfaning aw Fagtayukan Isus. 10 Ay get aw sa emu te, laman ku unga at ngayan, At-Ke-Masuad, e fanambagun ban siginan emu. Ay aw kata aw at tama, dewa aw masungsungan. 11 Ebi yo e fanambagun siginan anya, dewa te kanya am fanuguan wan. Ay katsi aw e fanambagun aktuwa siginan anya. Ay anggan o, e fanambagun yangay ban o siginan anya. 12 Ay katsi nanfafoli akyay anya sa emu, dewa aw dawdaw kesug anya. 13 Satu ro kaumsig akway dawdaw nu ste nangus si angku. Laman gtarabang way angku. Kata nu o tagtarabang angku nu ste di o, gina aw masungsungan anway igfoyung aw at Masine-Fag-Barita. 14 Dewa aw kaumsig gfatawad At-Ke-Masuad, da kua gfaning ku fasadan anway te, da kua nasaful am fasadan. Laman nu gtarabang o angku, bunwa siginan ku fasadan, siginan tuwa fiya fiya emu am fasadan. 15 Nu ndain katsi masine yay sa emu, dewa taw sama glugo nu gyud si emu. Anway gina ban umfoli, si way ban emu faggugat. 16 Ay katsi bundi fagtvngvd am fanuguan. Anggan tuwa sigon ta fakesugun ta fadugsay. Sa angku ay glabi yay sa emu. Anway katsi kanya gdog yay am fanuguan ay anggan am fadugsay sa tam Fun Isus. 17 Nu gamatangan o nu an aktuwa am fagues fiya, fasakboi At-Ke-Masuad kata nu gfasakbo o angku. 18 Ay nu gamatangan yay o te, At-Ke-Masuad ebi e mauri yay fagbulun sa emu, ay ate e bedan yay sa emu, am fagetan sai yap angku at fansali. 19 Aw Fandak, ay ku daluap yay at nariruk tuy fag rirukan te, sumali akyay ban ka fag bedan. Dewa katanya, kapla aw gfoyung emu te, e bedan yay o sa angku. At masuad te, anway aw wan tagtarabang emu laman e leleg ban o at yud katabu. 20 Kin tuwa, ku fadugsay. Ay katsi kaumsig aw nu e fanambagun aw siginan emu, anway kafandiug tuwa ta sa tam Fun Isus. Fatvngvdi ku amatanganan laman guseganan aktuwa sa tam Fagtayukan. 21 Ku fagnarirukun sa emu, anway gafanud aw te, mon wa ban o fiya sa angku ku fagetun. Ay nasaful kyangay te, am fagabulun ban glabi yay ku fagetun sa emu. 22 Ay tuy yangay ku fagetun. Famasadani sanya sik fagtiugan sa angku. Anway ku fagsegun te, Funbalugu nabalus ban am darangin, ay nangafoli akyangay ban sa emu. 23 Sik-Masine-Fag-Ama, ku ufud sasad sungsungan, anway kanya kafandiug sas Fagtayukan Isus, nafadasug sa emu at fagusegananun te, gamatangan aktuwa emu. 24 Ay anggan ku ngay ufud sa ku fagfoyungan, at ngayan te, Takata-Sik-Fanuktuk-Daul, ay Tiba-Tungud-Nu-Gmagurang, ay Tagfadaragang-Tanum-At-Fanuguan ay Lukas. Kanya yangay at nafadasug sa emu at fagusegananun te, gamatangan tuwa emu. 25 Tam Fun Isus Fagtayukan At mamanyun nangus sa ayu fagayu.