Mark

Mark

¹ Kata tuy at fagsigadan at Masine-Fag-Barita sa baliwas Isus Fagtayukan, Funbalugu-At-Baguama, At fagbulun. ² Funbalugu At taglong at ngayan Funbalugu-Nabalabag, ebi ebi at nariruk te, Amatangani. Nansugu ban Aw Ku suguan at nanguna Emu. Laman nanfamasadan ban am dalan. ³ Anway tuy sik fanlongan Sas talun tyud e gbanwan. At longan maurunganan Te, antam kamasadan Laman tam Fun e dalan. ⁴ Ay nu katanya, Uan Tagfasurung indasug wa fiya sas talun at yud e taw. Ay at foyungan te, laman at ngay taw umsurung sasad safa. Sik fagsafulan te, naubun wan at ngay mauri laman Funbalugu nafaliam at asalanan. ⁵ Ay at ngay taw siginans fagdaul talun Naseg ay siginans fulan Erusalem indasug sas Uan. Ay gina ka fag ngay taw nafoyung at asalanan, Uan nasurung anya sasad safa Mababaun. ⁶ Ay sanya Uan at fangawat at lanbung siginan sik idu mabugsul guyuy at sigyu. Ay at ginawang sigon balat balan wa at balyu. Ay at fakonun liung ay kamalong. ⁷ Ay Uan gfoyung te, E mdasug yay ban sik taw siginan ku guyan, glabi yay angku nu madaragang. Aw, ki e fagmasineun an aw oma garungan gluas at fansalod at fanguskus darafa. ⁸ Nafasurung aw ayu sasad safa. Ay Kanya fag taw nanfasurung yangay ban ayu sa At-Masine-Fag-Falad. ⁹ Ay ginanya fag ngay menit, Isus indasug yangay sas talun Balulangan siginans fulan Nasaret. Ay Uan nasurung Anya sasad safa Mababaun. ¹⁰ Ay Isus nu nlakwi wa sas day safa, rodi manlag di banwa inluwang wan. Ay At-Masine-Fag-Falad indaga ay intarubung sa Anya kata sik linatad. ¹¹ Ay ginanya e nae longan wa sigon siginans Banwa te, O wan Ku fakesugun Ku Baguama. Guseganan Aw dawdaw Emu. ¹² Ay rodi At-Masine-Fag-Falad naayiyan wa Isus sa sik talun at yud e taw. ¹³ Ay Isus nut sas talun at yud e taw, 40k menit. Ay Tagfansalag igfaskud Anya. Ay ngayu sanya at mela at makbang Anya. Ay Funbalugu At ngay tagbukngan tagtarabang Anya. ¹⁴ Uan Tagfasurung nu nsungsung wan, Isus nalo wa sas talun Balulangan. Nanfoyung wa Funbalugu At Masine-Fag-Barita sanya. ¹⁵ Ay Isus nafoyung te, Katsi makbang wan Funbalugu-Nu-Gmagurang-Taw. Ubuni wan ay asalanan. Ay faningi wa sas Funbalugu At Masine-Fag-Barita. ¹⁶ Ay gina Isus nalo sasa ngaba tigyangan Lino-Balulangan, At nalag Simun ay anggan at arian Butuan. Ka fag dugsay nafalayug at fanggamat uyang sasad lino ay gfanguyang. Anway kanya dan wa sik tagfanguyan faggugat. ¹⁷ Ay Isus nalong anya te, Gewan. Aloi wa Angku. Nanfoyung ban Aw ayu nu gfaful am at ngay taw, kata nu gamat am uyang katsi. ¹⁸ Ay rodi ka fag dugsay nafamato wa at fanggamat uyang ay nangalo wa Isus. ¹⁹ Ay Isus nalo yama sirut nalag yangay fiya sik dugsay. Santiagu, Funbalugu-Nafon at baguama, ay anggan at arian Uan. Ay ka fag dugsay igfasine at fakarasrasan at fanggamat uyang sanya sis balutu. ²⁰ Ay rodi Isus nagewan ka fag dugsay. Ay kanya naubun wa at tama, Funbalugu-Nafon, ay anggan at ngay tagfalu anya sis balutu. Ay nangalo wa Isus. ²¹ Ay Isus ay At ngay ufud indasug sas Takafanyu-At-Fulan. Ay sa bans Fakamatoun-Menit, Isus igsakbo sas Taw-Naseg at bale fakafulan ay igfoyung yay sanya. ²² Ay at ngay tagdungugan nadulawan sas Isus At foyungan. Teway Isus nu gfoyung kata tuwa daw sik fun at ke fagmadaragangun. Ay di kata Taw-Naseg at ngay tagfasaful nu nafoyung. ²³ Ay rodi sik ama at ke mafurat fag falad nasakbo sas bale fakafulan. ²⁴ Ay kanya gbiya nu ge longan te, Taw ro Am fagstiyeun sa emi, Isus siginans fulan Nasaret. Go Am fagstiyeun Am fasadan nanfatinas wa ro O emi. Nasaful akwa Emu te, O wan Funbalugu At Masine-Fag-Taw. ²⁵ Ay matvngvd Isus nu gsalag te, Lag ge longan. Alfasi wan sanya ginan fag ama. ²⁶ Ay ka fag mafurat fag falad igfafanggong ka fag ama, ay guro dawdaw, ay nalfas wan sanya ginan fag ama. ²⁷ Ay sanya fag ngay taw nu nalag, nadulawan dawdaw, ay gfangintuanan te, Taw fakatanyaun At foyungan. Go kanya sik foyungan yay bagu. Madyay Kanya e fagmadaragangun tuwa nu gsugu at mafurat fag falad. Ay igfaning wa fiya Anya. ²⁸ Ay rodi indungug Isus At madaragang fag fagbulun sas fagdaul talun Balulangan. ²⁹ Ay rodi Isus nalaklo wa siginans Taw-Naseg at bale fakafulan. Ay Kanya ay anggan At ufud, Santiagu ay Uan, nasakbo sa Simun ay Butuan at bale. ³⁰ Ay sanya Simun at nugangina sisad igian gadailan masugba daw at bilug. Ay rodi tv tiba nananfoyung wa sas Isus. ³¹ Ay Isus nangakbang sanya fag mangena. Ay nated at daluap ay nafalunggung anya. Ay ginanya infiya wa daw nu masugba. Ay rodi kanya tuwa fag mangena tagtarabang Isus ay anggan sa At ngay ufud. ³² Ginanya fag fafun, gina bagu nfalyu at menit, e nataban yay sas Isus sik ngay taw at ke dailan ay manga at ke mafurat fag falad fag taw. ³³ Ay sanya fag fulan at taw fagayu maful sisad sakbawan bale. ³⁴ Ay Isus nafafiya sanya fag ngay taw, nus nga setaw at dailan. Ay naayiyan ngayuk mafurat fag falad. Ay Isus nasalag yangay at mafurat fag falad nu ge longan. Fakatanyaun at mafurat fag falad nasaful wa te, katanya fagalay Isus. ³⁵ Balabag dis daga kamenit, Isus infulo ay nalo wa sas talun at yud e taw, ay nandarangin. ³⁶ Ay Simun ay anggan at ngay ufud igsarap Isus. ³⁷ Ay nu nalag wan, nalong sas Isus te, Fagayu taw igsarap emu. ³⁸ Ay Isus nalong sa anya te, Bastam. Glo watam sat fadogan tv fag ngay fulan daul. Laman nanfoyung Aw sanya fag ngay taw. Katanya Ku fasadan Ku fagindasugun stiye. ³⁹ Ay Isus nalo sasa ngay fulan sas fagdaul talun Balulangan. Ay nafoyung sasa ngay bale fakafulan sas Taw-Naseg. Ay manga naayiyan at ngay mafurat fag falad. ⁴⁰ Ay sik taw tagabangbang inkakbang ay inlub sas Isus At akbang, ay matvngvd nu gseg sas Isus te, Nasaful aw te, mafafiya O angku nu kaumsig O. ⁴¹ Ay Isus kafanyu anya ay nafalugde At take ay natayuk sat ke dailan te, Kin. Kaumsig Aw. Afiyai wan. ⁴² Ay rodi tv du e bangbang. Ay infiya wa fiya aro tagabangbang. ⁴³ Ay rodi matvngvd Isus nu gsalag sa ka fag taw, gina igfalo anya te, ⁴⁴ Lag kamansulit sa tibak taw. Loi way fagtvngvd ay falagi way am bilug sas taganyun. Ay foni tuwa anya sik famanyun kata ebi Ku-Unga At-Longan at suguan. Laman am famasaful sasa ngay taw te, nfiya wo. ⁴⁵ Ay dewa katanya, ka fag ama nalo wa ngaro ay nafamansulit ngap karo. Ay nafarapyag ka fag longan sas fagayu taw. Ay katanya wayay, Isus dua mafasurianan nu nalo nus nga nday fag fulan. Nu nalo, sa ways talun at yud e taw. Ay sanya yangay at ngay taw nu ndasug sas Isus nus nga ndaginan.

¹ Nu nlangfe wa ginanya fag ngay menit, Isus infoli wa sas Takafanyu-At-Fulan. Ay sanya fag ngay taw nadungug te, Isus sa yay At bale. ² Ay sik ngay taw inful sanya. Ay kayu te, anggan sisad sakbawan du e fagsakan. Ay Isus nafoyung Funbalugu At-Longan sanya fag ngay taw. ³ Ay indasug yangay tibak taw. Ay at ufat taw guba sik taw at yud malelegan si sik tagbung. ⁴ Ay dua mafafakbang sas Isus teway ngayu wayay at taw sanya. Ay kanya nasulat at ugun sis Isus tungud. Ay nafatagbung at yud malelegan si sik tagbung. ⁵ Ay Isus nalag at bagu kadasug te, kafandiug tuwa. Ay nalong yangay sa at yud malelegan te, Sama, naliam wan am ngay asalanan. ⁶ Ay rodi Taw-Naseg at tibak tagfasaful at malunggung sanya gamatangan te, ⁷ Taw ro Ka fag taw fagnalongun katanya. At longan mauri way sas Funbalugu baliwa. Yaya. Funbalugu way fag sadi At mafafaliam taw at asalanan. ⁸ Ay roro Isus nasaful wa mangaro ka fag ngay Taw-Naseg at amatanganan. Ay Isus ginto sa anya te, Taw ro ay fagamatanganun katanya at masuad. ⁹ Amatangani. Inday fag longan at madaragang at kumsure. Nu lumong Aw sa at yud malelegan te, Naliam wan am ngay asalanan. Ay nu lumong Aw te, Malindugi. Fasani am tagbung ay loi wan. ¹⁰ Laman ro sumaful am te, Aw, Taw-At-Baguama, e fagmadaragangun Akwa fiya ste swa daga nanfaliam taw at asalanan. Ay rodi Isus glong wa ngani sa at yud malelegan te, ¹¹ Glong Aw sa emu te, Alindugi. Ay fasani wa am tagbung. Ay ulii wa sa ay bale. ¹² Ay kanya fag taw inlindug wa fiya. Ay nafasan wa fiya at tagbung. Ay nalo wan. Ay at naulit fag ngay taw nadulawan ay naseg sas Funbalugu. Ay nalong te, Dua tam batang glag takatanya. ¹³ Ay Isus gdog yay nalo sas tigyangan Lino-Balulangan. Ay ngayuk taw nangaful Anya. Ay Isus igfoyung anya. ¹⁴ Ay rodi Isus natunglus wa nalo. Ay nalag sik taw at ngayan At-Famaalo, Alfeu at baguama, nu malunggung sas bale fagfonan famanyun sat fun. Ay Isus nalong anya te, Gewan. Aloi Angku. Ay At-Famaalo inlindug ay nangalo wa Isus. ¹⁵ Ay rodi Isus igfangon sa At-Famaalo at bale. Ay ginanya ngayuk tagbul famanyun sat fun, ay ngayu at yud gfaning Taw-Naseg at ugali takon gasfuan Isus ay At ngay tagadal. Anway ngayuk taw nangalo Isus. ¹⁶ Ay Taw-Tagfalayun at ngay tagfasaful nalag Isus nu gfasfuan gfangon sa at ngay yud gfaning Taw-Naseg at ugali, ay anggan at ngay tagbul famanyun sat fun. Ay kanya nainto sas Isus At ngay tagadal te, Taw ro Isus fagfasfuanun gfangon sanya fag ngay tagbul famanyun sat fun ay anggan sa tagasalanan. ¹⁷ Ay Isus nu nadungug at longan, nafafaskudanan te, Sik taw at yud e dailan dua long kaumsig sik tagfafiya. Kayu way at ke dailan takaumsig. Ku fagnastiyeun Ku faggewanun sa Angku kayu way at ke asalanan. Ay yaya at masine fag taw. ¹⁸ Ginanya fag menit, Uan Tagfasurung at ngay tagadal ay Taw-Tagfalayun sigon e fagyudun gfangon fag ngay menit. Ay tibak taw inkakbang sas Isus ay nainto Anya te, Taw manga Uan at ngay tagadal ay Taw-Tagfalayun sigon at ngay tagadal e fagyudun way gfangon fag ngay menit. Ay madyay Am ngay tagadal du e fagyudun gfangon fag ngay menit. ¹⁹ Ay Isus nafafaskudanan te, Go at bagu indaduwa fag mangama at ngay fagues e fagyudun gfangon ginanya fag ngay menit dewa te, sanya wan ka fag mangama. Ay go yaya. At ngay fagues di e fagyudun gfangon fag menit kaduge ka fag mangama sanya. ²⁰ Ay roro sa bans tibak menit gina ban e tumaban kanya fag mangama. Ay kaduge yay ban anya nu e fagyudun gfangon fag ngay menit. ²¹ Ay sik taw dua nafagamut sik yud mafegusan fag falefe sa at dan fag lanbung laman at fanfaut at sulbung. Anway nu nafagamut tuwa, ay bandi nu nafegus wan ka fag lanbung, at bagu fag falefe umkitut yay ban. Ay rodi ngap umdaul wan at sulbung. ²² Ay manga sik taw dua gtalin at bagu fag uwat buadan safa sa at dan fag fagsuadan balat balan. Anway nu natalin way sanya, gina at bagu fag buadan safa lumafas, fabaga wa ngap at fagsuadan. Ay ka fag fagsuadan umbaltak wan. Ay at talinan umbusbus wan. Ay at fagsuadan umrufa wan. Yaya, di katanya. Sik taw at fagtalinan antuwa sat bagu fag buadan safa sa at bagu fag fagsuadan balat balan. ²³ Sadik Fakamatoun-Menit, Isus ay At ngay tagadal nalo wa sa sik ngabak tanuman. Ay ginanya At ngay tagadal nadalan sirut nabul tiba at buadan. ²⁴ Ay at ngay Taw-Tagfalayun nalong sas Isus te, Linggati Am ngay tagadal at fagbulun igbul way at buadan. Taw ro at fakamaboun sa Ku-Unga At-Longan sas Fakamatoun-Menit baliwa. ²⁵ Ay Isus nainto sasa ngay Taw-Tagfalayun te, Go sangay di am natap fun Fakafanyuun at fagbulun ebi, gina yud e fakonun ay kalunus way. Ay anggan at ngay ufud sigon gina kalunus. ²⁶ Ay fun Fakafanyuun nasakbo sas Funbalugu Bale gina at taganyun daul At-Tama-Tiba-Tungud. Ay naon Tagsis-Funbalugu-Salubangan-Fag-Fafa. Dewa Ku-Unga At-Longan ebi igsalag te, dua masine tibak taw nu kon ka fag fafa. Kayu yakman at ngay taganyun fagtvngvd. Ay fun Fakafanyuun naon wan ay nafon yangay anggan sa at ngay ufud. ²⁷ Ay Isus nalong yay te, Funbalugu nafili sik menit laman at taw kamato, laman at fanambagun. Funbalugu dua naawat taw te, laman at Fakamatoun-Menit e fanambagun. ²⁸ Nu katanya, Aw wan, Taw-At-Baguama, tagmagurang anggan sis Fakamatoun-Menit.

¹ Ay Isus gdog yay nasakbo sas Taw-Naseg at bale fakafulan. Ay sanya sik ama at daluap at kingong. ² Ay tibak taw tagsanya gulit sas Isus te, go Isus mafafiya ka fag ama gina sis Fakamatoun-Menit. Fakatanyaun ka fag ngay taw at fagulitun, anway kaumsig way nu e foyungan sa tibak taw te, Isus long e asalanan. ³ Ay Isus nalong sat kingong at daluap te, Stiyei. ⁴ Ay Isus nainto sat ngay taw te, Inday fag fagbulun tagfaning sa Ku-Unga At-Longan sis Fakamatoun-Menit. Nu gfagbulun masine ay ate mauri. Tenday, nu gfalangfe, ay ate nu gfate sik taw. Ay at ngay taw dua mafabalus. ⁵ Kaduge Isus iglingaman sat ngay taw, Isus kadotama sa At amatanganan, ay kabalu. Anway matvngvd dawdaw at ngay taw at amatanganan sat yud masine. Ay Isus nalong sa at kingong at daluap te, Falugdei am take. Ay kanya nafalugde at take ay at daluap nfiya wan. ⁶ Ay at ngay Taw-Tagfalayun nalo wan. Ay rodi nanfasulitanan wa sasa ngay Taw-Naseg tagseg fun Sik-Madaragang-At-Baguama-Sirut te, tain tam fagbulun ban laman nanfate tam ka fag Isus. ⁷ Ay Isus nalo sanya ginan gfaigaluan at ngay tagadal ay indasug sas tigyangan lino. Ay sik ngay taw nangalo Anya siginans talun Balulangan. Ay anggan siginans talun Naseg. ⁸ Ay siginans fulan Erusalem. Ay siginans talun Tagraray. Ay siginans dife safa Mababaun. Ay siginans tagsafungan fulan Batu-Luguy ay fulan Faggamatan-Uyang. Ngayu wa ngayu fag taw, anway nadungug ebia taw Isus At fagbulun. Ay katsi nangakbang Anya. ⁹ Ay Isus At fagnasuguun sa At ngay tagadal nanfamasadan sik balutu sa Anya. Laman takadasug fag ngay taw di ro magit Anya. ¹⁰ Anway ngayu ebi Isus At nafafiya, katsi fagayu at ke dailan gtudtuludan nantayuk Isus. ¹¹ Ay nus nga ginain at ngay mafurat fag falad, nu glag Isus, namalub sa At akbang. Ay gbiya nu ge longan te, O wan Funbalugu-At-Baguama. ¹² Ay matvngvd Isus nu gsalag sa ka fag ngay mafurat fag falad. Laman dua gfoyung sa tiba te, Kanya Isus. ¹³ Ay Isus naulul saswa bilug tubi. Ay nafaful sa Anya At fasad fagafiliun fag ngay taw. Ay kanya nangakbang sas Isus. ¹⁴ Ay Isus nafaful 12k tagadal, laman nangufud Anya. Ay laman At fagsuguan At nanfoyung sa tibak taw. ¹⁵ Ay manga laman e fagmadaragangun mafaayiyan at ngay mafurat fag falad. ¹⁶ Ay kata tuy Isus At 12k tagadal at ngayan te, Simun, Isus nafamut yay at ngayan te, Takata-Sik-Batu. Ay ¹⁷ Santiagu. Ay at arian, Uan, Funbalugu-Nafon at baguama fag duwa. Ay Isus nafamut yay sa ka fag dugsay at ngayan te, Buanerges, at masuad te, Kata-Sik-Talafun. Ay ¹⁸ Butuan, ay Takesug-Kabayu, ay Sik-Takali-Sirut, ay Funbalugu-At-Nafon, ay Duwak-Nasfuan, ay Santiagu, Alfeyu at baguama, ay At-Masusuan, ay Nadungug, kanya siginans talun Maloban. Ay anggan ¹⁹ Segi, kanya siginans Ufat-Fulan-Sirut. Ay kanya at namoyung ban Isus sas mauri fag taw. Ay Isus noli wa sa sik bale. ²⁰ Ay sik ngay taw gdog yay maful sas Isus. Ay katanya wayay, Isus ay At ngay tagadal dua mafafangon. ²¹ Ay Isus At kalongan nu nasaful katanya, kanya nangakbang sas Isus laman nanted ay nantaban Anya sat dayu. Anway tibak taw nalong te, Isus naliam At amatanganan. ²² Ay roro sik Taw-Naseg at ngay tagfasaful tagsiginans Erusalem nalong te, Lango-At-Fun way tagmagurang sas Isus. Ay At fagmafaayiyanun at mafurat fag falad, At fagmadaragangun siginan ways Lango-At-Fun. Anway kanya fag fun, mafurat way fag falad at fun. ²³ Ay Isus nafakbang sa anya at ngay taw ay nainto anya te, Setain ro Tagfansalag nu gayiyan Tagfansalag. ²⁴ Ay Isus nafafaskudanan sat ngay taw te, Sik fun ay at ngay taw nu garingangan way faggugat, bandi ban ka fag fun du e fanuguan. ²⁵ Ay sik talafuan nu garingangan way ro faggugat, bandi ban du et sanya. ²⁶ Ay Tagfansalag nu gayiyan way Tagfansalag at ngay mafurat fag falad, at fagmagurangan umkafud wan. Ay du e fagmatvngvdun at fagmagurangan. Ay manga tabuan wa fiya. ²⁷ Du e takamul maasakbo sa sik madaragang fag taw at bale ay nanfamul at nanuranan, taguna yap ngay nasalod at madaragang fag taw. Ay nu nasalod tuwa, mafafamul wa long at nanuranan. ²⁸ Matuyan iglong Kwa ayu te, Fagayu taw at asalanan mafafaliam tuwa. Ay anggan nus nge wain taw at mauri fag longan sas Funbalugu baliwa mafafaliam yangay. ²⁹ Ay roro nus nga sinu at nalong mauri sa At-Masine-Fag-Falad baliwa, kanya dua mafafaliam faggugat. Kanya fag taw e asalanan way faggugat. ³⁰ Fakatanyaun Isus At longan, anway tibak taw nalong te, Isus way At ke mafurat fag falad. ³¹ Ay indasug Isus At tina talnayan sas day bale, ay kanya e nasugu sas Isus te, Galagun Emu. ³² Sik ngay taw malunggung gsafungan Isus sis bale, ay nalong Anya te, Snay Am mina talnayan sday bale, gananlagun Emu. ³³ Ay Isus nalong te, Sinu Ku mina ay Ku ngay fadugsay. ³⁴ Ay Isus glingaman sat malunggung tagsafungan Anya ay nalong te, Nin sigon Ku mina wan ay Ku ngay fadugsay wan. ³⁵ Anway nus nga sinu tagfaning sas Funbalugu At fakaumsigun, kanya Ku fadugsay wa fag mangama, ay Ku fadugsay wa fag mangena, ay Ku mina wan.

¹ Ay Isus gdog yay nafoyung sas tigyangan lino Balulangan. Ay sik ngay taw ayuwayu maful sa Anya. Ay nu katanya, Isus nasakbo yay sasad balutu ay malunggung sanya. Ay at ngay taw si ways tigyangan lino. ² Ay Isus nu gfoyung sanya fag ngay taw, ngayu at foyungan at fafaskudanan. Ay kata tuy at foyungan te, ³ Dungugani. Ebi e sik taw nu gtanum at fungsuan gfangukasan way. ⁴ Ay nu nafangukasan wan, ay at tiba at fungsuan intong sasad dalan. Ay at ngay manuk mela inful sanya ay nasinduk ay nafamin wan at kintong sanya. ⁵ Ay at tiba at fungsuan intong saswa batu. Ay sanya dua matukba at daga. Ay mafali nu gtugbung, teway mayangfis wayay at daga sanya. ⁶ Ay nu nsure wa at menit, at bagu gtugbung kasugba yay. Anway dia ngaba at lalid, ay nyango yay. ⁷ Ay at tiba at fungsuan intong saswa madugi. Ay at madugi indaul ay nafaut. Ay at fungsuan dua nabuadan. ⁸ Ay at tiba at fungsuan intong sat masine fag daga. Kanya natugbung ay indaul ay nabuadan. Ay siginan sik bugas sadi, at nabul at buadan 30k bugas. Ay at tiba 60k bugas. Ay at tiba 100 bugas. ⁹ Ay Isus nalong yay te, Nu e talinga tuwam, dungugani. ¹⁰ At ngayu daw noli wan. Ay e sawad yay sirut anggan At Labi-Duwa. Ay kanya nainto sas Isus sa aro At fafaskudanan at masuad. ¹¹ Ay Isus nalong anya te, Sa ayu nafon tuwa ayu ay fagmaasafulun te, laman sumaful am at masuksukan sa baliwas Funbalugu-Nu-Gmagurang-Taw. Ay sa tibak taw nu gfoyung, sik fafaskudanan wadi. ¹² Laman kanya fag ngay taw, Dewa glinggat, dua glag. Ay dewa gdungug, dua nasaful. Nu gdi katanya, Labon umfoli yay sas Funbalugu, Ay gfaliam yay at asalanan. ¹³ Ay Isus nainto sa at ngay taw te, Go du am nasaful aro fag fafaskudanan. Go yaya. Nu dway am nasaful katanya, tain ban nu sumaful am fagayu tibak fafaskudanan. ¹⁴ At nafangukasan kata wa Funbalugu At-Longan. ¹⁵ Ay at tiba at fungsuan at kintong sasad dalan kata wa Funbalugu At-Longan sa sik taw at bagu gdungug. Ay rodi Tagfansalag indasug ay nabul At-Longan siginan ka fag taw at amatanganan. ¹⁶ Ay at tiba at fungsuan at kintong saswa batu, katanya yangay Funbalugu At-Longan sa sik taw at nadungug. Ay kanya mafali tuwa nu gafanud ay nu guseganan. ¹⁷ Ay katanya wayay, dia ntvngvd anway dia ngaba at amatanganan, kata sik lalid. Ay dua glugo nu gafanud. Ay nu ndasug ban sik mataka ay sik faurianan anway gafanud sa At-Longan, ay rodi ka fag taw at nadungug naliam wan. ¹⁸ Ay at tiba at fungsuan at kintong saswa madugi, katanya yangay Funbalugu At-Longan sa sik taw at nadungug. ¹⁹ Ay roro matvngvd wayay ka fag taw at fagafanawaun ste swa daga. Ay at fagusegananun sa way at fagmabalanun. Ay anggan at fakaumsigun sa at ngay nanuranan. Nu katanya, kata wa nu nafautan at nadungug At-Longan sat amatanganan. Ay dua nabuadan. ²⁰ Ay at tiba at fungsuan at kintong sat masine fag daga, katanya yangay Funbalugu At-Longan sa sik taw at nadungug. Ay kanya kafandiug tuwa. Ay kata tuwa nu e buadan. At tiba at buadan 30. Ay at tiba 60. Ay at tiba 100. ²¹ Ay Isus nainto yangay sa anya te, Go sik taw dewa nasulsul at salung, nansuklub way sasad sabi ay ate sat daga fag tiyugan. Go igdi. Roro sik taw fagsulsulun at salung, nanfatsa tuwas fagfasayugan. Go kin. ²² Nus nge wain at nafafaliyu, du e yud umsure. Ay nus nge wain at nasuksuk, du e yud sumasad mayamag. ²³ Nu e talinga tuwa am, dungugani. ²⁴ Ay Isus nalong yangay te, Amatangani ay asafuli ay nadungug. Nus nga seyu ay nafon, kayu yangay ban anya nu e mon ayu, ay e gfamut yay. ²⁵ Anway sik taw nu e kwa tuwa, igfamut yay ban. Ay sik taw nu dway e kwa, nu alay way, e mul wa ban siginan anya. ²⁶ Ay Isus nalong yangay te, Funbalugu-Nu-Gmagurang-Taw kata yangay sa sik taw at nafangukasan at fungsuan sat gamasun. ²⁷ Ay gina nyabi, ka fag taw gtiug yay. Ay gina nmenit, igfatunglus yay sa tiba at gfagbulun. Ay ginanya fag ngay menit at fungsuan natugbung ay indaul. Ay ka fag taw dua nasaful te, tain at tanum nu kadaul. ²⁸ At daga nafatugbung at fungsuan. Ay indaul wan. Ay bandi igfangkagud wan. Ay bandi intaba wan. ²⁹ Ay at buadan nu mataba wan, rodi ka fag taw gfatsanya wa at nanbul, anway indasug wan at famulan. ³⁰ Ay Isus nalong yangay te, Tain ro nu gfasudan tam Funbalugu-Nu-Gmagurang-Taw. Ay tain tam fafaskudanan, laman ro tuy mayamag. ³¹ Funbalugu-Nu-Gmagurang-Taw kata yangay sa sik rigrig lunga. Kanya wan tiba daga at alay fag fungsuan sas fagayu fungsuan taw at natanum. ³² Ay dewa katanya, nu nafangukasan wan, natugbung ay indaul. Ay bandi nalabi yay fiya fiya tibak mababa fag ngay tanum. Ay gbiya at sanga. Ay at manuk mela kasubuk tuwa ay sak tuwa gfugad sat sanga. ³³ Ngayu Isus nu gfafaskudanan katanya, gina gfoyung Funbalugu At-Longan sat ngay taw. Ay nu gfoyung gfatugan way at taw nu sumaful. ³⁴ Ay faggugat Isus nu gfoyung sat ngay taw, igfafaskudanan way. Ay sa long At ngay tagadal, Isus nafayamag tuwa anggan at masuad. ³⁵ Ginanya, nu nfalyu wa at menit, Isus nalong sa At ngay tagadal te, Bastam. Gdife watam lino. ³⁶ Ay At ngay tagadal naubun wa at ngay taw. Ay nasakbo wa sasad balutu sa aro taw Isus At fagsakayan. Ay gina glo, anggan tibak balutu nangufud yangay anya. ³⁷ Ay rodi gina sasa ngaba lino, indasug sik bagyu fulug. Ay at lumbak igtabun wayu daw sa at balutu. Ay arvs at safa gakapnuun sasad balutu. ³⁸ Ay Isus gtiug way gtangilan sis balutu at iyug. Ay at ngay tagadal gfanguwig Isus te, Takamoyung, go du Wo gafanawa te, umkafuy waro tam. ³⁹ Ay Isus nfulo, ay nasalag sas tagmara ay sas lumbak te, Lag fawas. Atuwasi wan. Ay at tagmara igfaning Anya ay anggan at lumbak. ⁴⁰ Ay rodi tv Isus nalong sa At ngay tagadal te, Taw ro ay fakalimuun. Go di am e fakafandiugun. ⁴¹ Ay At ngay tagadal kalimu gfanlinggatanan, ay igsulitanan sit dayu te, Sinu Tuy fag taw takatvngvd anya At fagbulun. Madyay dewa at tagmara ay at lumbak nafaning tuwa dewa sa At longan.

¹ Ay Isus ay At ngay tagadal indasug sas dife lino sas Taw-@Gerasa fag talun. ² Ay Isus nu nalfas wa siginans balutu. Rodi sik ama ke mafurat fag falad insure siginan sa ngay fagsandigan fag luib ay nanfablang Isus. ³ Ka fag ama nu gbanwan sa way sa ngay fagsandigan fag luib. Ay katsi du e mafasalod anya, dewa at fansalod sanbung. ⁴ Ebi ngayu ginan wa e git at bitis ay e gsalod sanbung. Ay ka fag ama nafanlifungan wan at salod ay nafud wan at tiba fanggit anya. Ay at taw du e fagmadaragangun mafafagup anya. ⁵ Kayu menit ay kayu yabi, ka fag ama guro way sasa ngay fagsandigan ay sas muyud. Ay anggan gfe fakarukan anya mandi batu. ⁶ Dewa ngayayu ka fag ama nabantay wa Isus. Ay mafali nu nangakbang ay igseg. ⁷ Ay gbiya nu ge longan te, Isus, Tiba-Tungud-Fag-@Funbalugu-At-Baguama. Matvngvd nu glong aw Emu sas Funbalugu At fagdungugan te, Taw ro Am fagstiyeun sa angku. Lag nanfauri angku. ⁸ Anway aro Isus nalong wa te, O fag mafurat fag falad, alfasi wan sanya ginan fag ama. ⁹ Ay Isus ginto te, Nataw am ngayan. Ay kanya nabalus te, Ku ngayan Tagngayu, anway ngayu ami. ¹⁰ Ay matvngvd nu glong sas Isus te, Lag gayiyan emi sanya ginan fag talun. ¹¹ Ay roro sanya sik ngay bukbuk gfangudkudan sisa ngaba tubi. ¹² Ay matvngvd ka fag ngay mafurat fag falad nu glong sas Isus te, Afanyui yap emi. Fatsai yap emis bukbuk. Ay fasakboi emi sanya. ¹³ Ay Isus nafaning at fasadan. Ay ka fag ngay mafurat fag falad nalfas wa fiya. Ay nafatsa wa fiyas bukbuk, nu ndain 2,000k bukbuk. Ay rodi tv ka fag ngay bukbuk fagayu mafali nu nafandugsunan. Ay taba wa ntong sasad abat. Ay fagayu inkafuy wa sasad lino. ¹⁴ Ay at ngay tagtanud bukbuk nalagyu. Ay nanfamansulit yay sas fulan daul ay sasa ngay fulan sirut aro at nalag. Ay nu katanya, ngayuk taw indasug laman nanlag te, taw katanya. ¹⁵ Ay ka fag ngay taw inkakbang sas Isus. Ay nalag aro fag ama at ke ngay mafurat fag falad. Kanya malunggung tuwa. Ay e lanbung. Ay e amatanganan tuwa. Ay ka fag ngay taw kalimu yay daw glag anya. ¹⁶ Ay ka fag ngay taglag nanfamansulit sa tibak taw aro at nalag fag ama at ke ngay mafurat fag falad ay anggan at ngay bukbuk. ¹⁷ Ay at ngay tagdungug matvngvd nu gayiyan Isus te, laman duat sanya si at talun. ¹⁸ Ay gina Isus gsakbo sasad balutu, aro fag ama at ke ngay mafurat fag falad matvngvd nu get sas Isus. Anway kaumsig nangufud Anya. ¹⁹ Ay Isus igsalag way anya te, Lagi. Ulii way sa am iba. Ay nanfamansulit way o sa anya tam Fun At matvngvd fag fagbulun sa emu. Ay anggan At fakafanyuun sa emu. ²⁰ Ay ka fag ama nalo wan. Ay nanfamansulit wa fiya sa sik talun at ngayan Safuluk-Fulan-Daul, aro Isus At matvngvd fag fagbulun sa anya. Ay at ngay tagdungug nadulawan daw. ²¹ Isus gdog yay nasakay sa sik balutu ay nfoli sas dife lino. Ay gina sis tigyangan lino, sik ngay taw insafung Anya. ²² Ay indasug Taw-Naseg at magurang bale fakakafulan at sadi, at ngayan At-Nafafulo. Ay nu nalag Isus, namalub sa At akbang ay igseg. ²³ Ay matvngvd nu glong sas Isus te, Ku baguina gakateun wan. Ay saturo adasugi ngay ro sa ku bale. Ay fatayuki ngay ro Am daluap sa anya umfiya yay ro ay gleleg tuwa. ²⁴ Ay Isus nangufud wa fiya anya. Ay sik ngay taw ayuwayu galo anya ay gtudtuludan, arvs Isus ingit wan. ²⁵ Ay sanya sik mangena, 12k banwa yud batang katuas nu gfangigusan. ²⁶ Ay mason wan nu gatakan. Dewa ngayu at naanu anya, ay dewa nafamin at nanuranan, dua nfiya. Fangkabat inkugat way baliwa. ²⁷ Ay ka fag ina ebi nadungug tibak taw nu nafoyung sas Isus At fagbulun baliwa. Ay nu katanya, katsi gingitan wa sa tiba buknga anggan inkaakbang sas Isus day guyuy. Ay kanya nalangbud sumyu sas Isus At lanbung. ²⁸ Anway ka fag ina gamatangan te, nus di ro aw tumayuk At lanbung, nafafiya wa ro angku. ²⁹ Ay rodi tv intuwas wan nu gfangigusan. Ay nu gamatang anya infiya wan. ³⁰ Ay anggan Isus nasaful te, At fagmadaragangun, At nafafiya, at nalfas siginan Anya. Ay rodi tv Isus inbiling daw sa tiba baliwa te, Sinu tagtayuk Ku lanbung. ³¹ Ay At ngay tagadal nabalus sas Isus te, Go nalag O aro ste sik ngay taw tagtudtuludan ay tagit Emu. Ay go nalong O te, Sinu tagtayuk Angku. ³² Ay Isus gfatunglus yay glidlinggatan te, sinu tagtayuk Angku. ³³ Ay ka fag ina namatang tuway anya te, nfiya wan. Ay kanya kudkulugan kalimu nangakbang sas Isus. Ay inlub sas Isus akbang ay gseg. Ay nafoyung at matuyan fagayu. ³⁴ Ay Isus nalong anya te, Sena, am fakafandiugun tagfafiya emu. Loi wan. Mabayan tuwa o. Infiya wo fiya fiya. ³⁵ Ay kaduge Isus ge longan, sik taw indasug siginan aro fag magurang at bale. Ay nafoyung sat magurang te, Nkate wan am baguina. Taw ro am fagfasalagun tam Takamoyung. ³⁶ Isus dua nasalagan si tibak taw longan, ay nalong sa ka fag magurang te, Lag kalimu. Afandiugi tuwa. ³⁷ Ay Isus igsalag at ngay taw nu nangalo Anya. Dasday Takata-Sik-Batu, ay Santiagu, ay anggan Uan, Santiagu arian. ³⁸ Ay Isus ay anggan At ngay tagadal nu ndasug sa at magurang bale, Isus nalag sik ngay taw gbiya nu gfangaringang anway guyway dawdaw. ³⁹ Ay Isus nu nasakbo, nalong te, Nataw ay fagfangaringangun ay ay faguywayun. At baguina dia nkate. Gtiug wadi. ⁴⁰ Ay ka fag ngay taw kase gafayudun sas Isus. Ay Isus nafalaklo fagayu taw siginan sad bale. Ay Isus At nataban sat baguina fag salug at tama ay at tina wadi, ay anggan aro taw Isus At ngay ufud. ⁴¹ Ay Isus gina nated ka fag baguina at daluap, nalong anya te, Talita kumi. At masuad te, Fagina, glong Aw sa emu te, Alunggungi. ⁴² Ay rodi ka fag baguina inlindug ay iglo. Kanya at banwa anwa 12. Ay at ngay taw nadulawan dawdaw. ⁴³ Ay matvngvd Isus nu gsalag sanya fag ngay taw laman tibak taw dua gdungug At fagbulun. Ay Isus nasugu tiba laman nafafangon ka fag baguina.

¹ Isus nalo wan sanya ginan fag talun ay ndasug wa sa At fulan turungan. Ay At ngay tagadal nangalo Anya. ² Ay gina sis Fakamatoun-Menit, Isus nafoyung sas Taw-Naseg at bale fakafulan. Ay at ngay tagdungugan namatangan daw ay gidgintoan sa tiba te, Daginan ro Kanya fag taw At foyungan takatanya. Taw ro At fagnasafulun katanya. Setain nu mafafabul At matvngvd fag fagbulun. ³ Ud, nu ndain ro Kanya wa manga ka fag takawat bale, Taglu at baguama. Go kin. Nu ndain ro At arian at ngayan Santiagu, ay At-Fakafamutan, ay Segi, ay anggan Nadungug. Go kin. Ay go At fadugsay fag ngay mangena ste yangay sa antam. Go kin. Ay ka fag ngay taw kalimata way sas Isus. ⁴ Ay Isus nalong sanya fag ngay taw te, Funbalugu At taglong e gseg tuwa anya. Ay roro mangaro sanya fag talun at taglong at taw, ay at talafuan, ay anggan tagsit bale at taw dua gseg anya. ⁵ Ay Isus dua mafafasure At matvngvd fag fagbulun sanya. Anway fagtvngvd, Isus nafatayuk At daluap sa tiba at ke dailan, ay gsadsadian way at nafafiya. ⁶ Ay Isus gamatangan daw, anway sanya fag ngay taw dua ngap kafandiug. Ay Isus nalo sat fakbangan fag ngay fulan laman nanfoyung sat ngay taw. ⁷ Ay Isus nafakbang Anya At Labi-Duwa ay nafalo nafasaruwayan fagayu ay nafaudgufudan duwa. Ay Isus nafon tuwa sa anya at fagmadaragangun. Laman mafaayiyan at ngay mafurat fag falad. ⁸ Ay Isus nasugu At Labi-Duwa te, Lag e buba nus nge wain gina am glo. Nus di fafa, ay nus di buyug, ay nus di salafi sa ay fagsuadan. Sik suan dalan yakman ay buba. ⁹ Suluni ay fanguskus darafa ay lag faduwa ay lanbung. ¹⁰ Ay Isus nalong yangay te, Nus nga nday fag bale ay fagsakboan, sanyai yap fag bale nu gtiug am, ginanya mandi fag glo. ¹¹ Ay sik fulan at ngay taw at yud gfasakbo ayu, ay anggan at yud kaumsig nandungugan ay foyungan, gina am bagu lumo sanya ginan fag fulan, farikfiki yap at dafug siginan ay darafa. Sik famasaful sanya fag taw. ¹² Ay At Labi-Duwa nalo wan ay nanfoyung sas taw te, Ubuni ay asalanan. ¹³ Ay kanya naayiyan at ngay mafurat fag falad. Ay nafatayuk sik safa mataba sirut sat ke dailan, ay nafafiya anya. ¹⁴ Fun Sik-Madaragang-At-Baguama-Sirut nadungug Isus At fagbulun. Anway Isus At fagmadaragangun indungug. Ay tibak taw iglong te, Kanya Uan way Tagfasurung nadog yay gleleg. Fakatanyaun madaragang At fagbulun. ¹⁵ Ay tiba iglong te, Kanya Funbalugu wa At taglong ebi at ngayan te, Funbalugu-Tam-Taw-Yabi-At-Masine. Ay anggan tiba iglong te, Kanya Funbalugu wa At taglong ebi ebi at sadi. Kata yangay ebi ebi At ngay taglong. ¹⁶ Ay fun Sik-Madaragang-At-Baguama-Sirut nu nadungug, nalong te, Uan ebi ku nalifung at alfuyu, katsi gdog yay gleleg. ¹⁷ Anway ebia taw fun Sik-Madaragang-At-Baguama-Sirut nasugu laman e nafated, ay e nafasalod, ay e nafasungsung Uan Tagfasurung laman ka fag mangena Erudias e fanambagun. Anway ka fag fun indaduwa sas Erudias, at fun at fadugsay, Takesug Kabayu mangena. ¹⁸ Ay ginanya Uan nasalag ka fag fun te, Kamabo way o Ku-Unga At-Longan nu gmangenan way o am fadugsay at mangena. ¹⁹ Ay anggan Erudias kadotina sas Uan ay kaumsig igfate anya. Ay dua mafabul. ²⁰ Anway fun Sik-Madaragang-At-Baguama-Sirut kalimu Uan, anway nasaful wa te, Uan masine tuwa at ugali ay du e asalanan. Ay kanya nadingding Uan. Ay ka fag fun guseganan tuwa nu nadungug Uan at foyungan. Dewa yud fiya fiya intuyan sas Uan at foyungan. ²¹ Ay bandi indasug ka fag menit, Erudias nabul at fakaumsigun. Fun Sik-Madaragang-At-Baguama-Sirut e fagmafulun gina at fagamatanganun fag menit nu kalangfe. Ay kanya e tagbiya fag yafun daul. Ay nagewan at ngay fun sirut, ay at ngay fun tagbarangian, ay anggan at ngay madaragang fag taw sas talun Balulangan. ²² Ay Erudias at baguina nasakbo ay igfaumsiganan sat fun Sik-Madaragang-At-Baguama-Sirut ay anggan sa ka fag ngay mangama at maful sanya. Ay fagayu kaumsig dawdaw glag. Ay fun Sik-Madaragang-At-Baguama-Sirut nalong sa ka fag baguina te, Nus nga setaw am fagetun, eti wa angku. Ay nanfon aw emu. ²³ Ay at fun nafatuyanan dawdaw sa ka fag baguina te, Nus nga seyu am fagetun, mon aw emu. Dewa gwabilug ku fagmagurangan. ²⁴ Ay ka fag baguina nalaklo ay nangakbang sat tina te, Natawi ku fagetun. Ay at tina nabalus te, Uan Tagfasurung at alfuyu. ²⁵ Ay rodi ka fag baguina mafali nu kafoli sas fun Sik-Madaragang-At-Baguama-Sirut ay get te, Kaumsig aw nu gfon o angku rodi Uan Tagfasurung at alfuyu sa sik lamaan. ²⁶ Ay fun Sik-Madaragang-At-Baguama-Sirut dewa kaumsig gfate Uan ebi, katsi kabalu yay dawdaw. Ay dewa katanya, ka fag fun dua kaumsig kamayud sanya fag baguina. Anway aro taw nafatuyanan wan. Ay manga ka fag ngay mangama at maful sanya nadungug yangay nu gfatuyanan. ²⁷ Ay rodi ka fag fun nasugu sa sik tagbarangian te, Ubai sa anya Uan at alfuyu. Ay ka fag tagbarangian nalaklo ay nalifung Uan at liug ay nabul wan at alfuyu sasad sungsungan. ²⁸ Ay naubanan at alfuyu sa sik lamaan. Ay nafon sa ka fag baguina. Ay ka fag baguina nafon sat tina. ²⁹ Ay Uan at ngay tagadal nu nadungug te Uan nkate wan, kanya nananlag sas sungsungan. Ay nabul at bilug. Ay nasandig sas fagsandigan sa sik luib. ³⁰ Fagayu Isus At-Suguan noli wan, ay nanfamansulit wa sas Isus fagayu at fagbulun ay at foyungan. ³¹ Ay Isus nalong sa At ngay tagadal te, Bastam. Ay glo way ro tam fagtvngvd sa sik talun at yud e taw. Ay fafiyani yap sirut ay lufuy. Isus fagnalongun katanya anway ngayu at taw sanya takadasug ay taglo. Ay Isus ay At ngay tagadal dua mafafangon anway du e buknga. ³² Ay kanya nalo wan ay nasakay sa sik balutu. Laman umdasug sa sik talun at yud e taw. ³³ Ay ngayuk taw natoglag gina glo, ay nasaful anya. Ay nu katanya, at ngay taw matarung nu nalo siginan sa ngay fulan, laman nanguna sas Isus At fakadasugan ro. Ay at ngay taw naguna wa fiya nu kadasug sanya. ³⁴ Ay Isus nu ndasug wa sat dife, nalag wa fiya ka fag ngay taw ayuwayu. Ay Isus kafanyu sanya fag ngay taw, anway kata way sik ngay tupa yud e gtanud. Ay Isus igfoyung wa sanya nus nge wain At fagafoyungun. ³⁵ Ay nu kayabi wan, At ngay tagadal nangakbang sas Isus ay nalong te, Ste fag talun si way at yud e taw. Ay laman kayabi wan katsi. ³⁶ Faloi wa ka fag ngay taw sasa ngaba day fulan sirut laman nanbul yay at fafa. ³⁷ Ay Isus nasugu sa At ngay tagadal te, Am waro tagfayafun ka fag ngay taw. Ay At ngay tagadal nainto sas Isus te, Go nanbul yap ami tenday, 200k menit sik taw at nalufuyan, em fansali fafa. Laman em famayafun ka fag ngay taw. ³⁸ Ay Isus nainto yangay te, Seyu ay nauba ay ba fafa iste. Linggati te seyu. Ay At ngay tagadal nu nalinggat, nabalus te, Lima. Ay duwa way sirutk uyang. ³⁹ Ay Isus nalong sanya fag ngay taw te, Malunggungi, maafudani sanya swa makmak. ⁴⁰ Ay ka fag ngay taw malunggung wa fiya maafudan. Tibak afud 100k taw, ay tiba 50k taw. ⁴¹ Ay Isus nagalumutan ka fag limak fafa ay ka fag duwak uyang sigon. Ay natangda sas banwa, ay nauseganan sas Funbalugu. Ay nafanramyukan yay ka fag fafa. Ay nafon sa At ngay tagadal laman naafud sasa ngay taw. Ay Isus naafud yangay anggan at uyang fag duwa, laman sas fagayu taw. ⁴² Ay fagayu taw sanya at naon, napsug wan. ⁴³ Ay at ngay tagadal nafaful yay at nagsawadan, ay 12 yak sabi at kinkapnu at nafanramyukan fag ngay fafa, ay anggan at uyang. ⁴⁴ Ay 5000k mangama at naon ka fag fafa. ⁴⁵ Ay rodi Isus nafasakay wa At ngay tagadal sas balutu. Laman At ngay tagadal nangguna wa Anya nangadasug sas dife lino, sas fulan Fagfanguyangan. Ay Isus nafalo wan anggan at ngay taw. ⁴⁶ Ay Isus nu naubun wa sanya fag ngay taw, naulul wa sa sik ngabak tubi. Laman nandarangin sanya. ⁴⁷ Ay gina gakarumun, aro At ngay tagadal at balutu sa yay swa bilug lino. Ay Isus gsesadian yay sanya swa bilug tubi. ⁴⁸ Ay Isus naulit te, mayon way At ngay tagadal nu kiyang nu gfalo at balutu. Anway nu gfalo, gfablang wayay sas tagmara. Ay balabag di sdaga kamenit, Isus nalo sasa ngaba tungud lino. Ay nangakbang sa At ngay tagadal. Ay satu ro Isus kata wa lumangfe At ngay tagadal. ⁴⁹ Ay At ngay tagadal nu gulit wa Isus nu glo sasa ngaba tungud lino, nafanguruan, nu gfasad sik labang way. ⁵⁰ Anway fagayu wa At tagadal at nalag Isus. Ay kalimu dawdaw. Ay rodi Isus nalong anya te, Fatvngvdi ay amatanganan. Aw wan. Lag kalimu. ⁵¹ Ay Isus nasakbo sasad balutu, inful sa anya. Ay rodi nsiwang wan at bagyu. Ay At ngay tagadal nadulawan dawdaw. ⁵² Anway dua nasaful aro at nafaayu fag ngay fafa at masuad. Ay katanya wayay, gfatalfiun way si at amatanganan. ⁵³ Isus ay At ngay tagadal nu ndife wan, at fakadasugan sas talun Genesaret. Ay sanya nu gfatungkud at balutu. ⁵⁴ Ay Isus ay At ngay tagadal nu nalfas wa siginans balutu, sanya fag talun at ngay taw natoglag te, Kanya anwa Isus. ⁵⁵ Ay ka fag ngay taw mafali nu glo sas fagdaul talun. Laman nanguba ro sas Isus fagayu at ke dailan sit basad igian. Nus nga nday nu dumungug te, sanya Isus. ⁵⁶ Ay nus nga nday Isus At fakadasugan, dewa sas fulan sirut, ay dewa sas fulan daul, ay dewa sas talun, at ngay taw gfat sanya swa taw at ke dailan. Ay kanya get sas Isus anway e gatayukun sas Isus fungfung lanbung. Ay fagayu at natayuk infiya wan.

¹ Ay ginanya, at ngay Taw-Tagfalayun ay anggan tibak Taw-Naseg at tagfasaful siginans Erusalem inful sas Isus. ² Ay kanya naulit tiba Isus At tagadal nu gfangon dewa yud nafegus at daluap, anway dua gfaning at ngay aguyangan at ugali nu gfegus baliwa. ³ Anway Taw-Tagfalayun ay anggan at ngay Taw-Naseg ya gfangon yap ngay nafegus at daluap, igfaning at ngay aguyangan at ugali. ⁴ Ay dewa noli siginans swa taw, dia gfangon yap ngay nafegus at daluap. Ay ngayu yay at fagnanfaningun at ngay aguyangan at ugali. Tenday nu gfegus at taya, ay at bisu, ay anggan tibak fagsuadan fakonun. ⁵ Ay at ngay Taw-Tagfalayun ay at ngay tagfasaful nainto sas Isus te, Taw way manga am ngay tagadal fagyudun gfaning tam ngay aguyangan at ugali. Madyay gina gfangon at fagyudun gfegus at daluap. ⁶ Ay Isus igbalus te, Am sik ngay tagfanluk way am. Matuyan ka fag taglong, at ngayan Funbalugu-Nabalabag, ebi ebi at naguna nafoyung sa ayu baliwa. Madyay kata tuy At-Rirukan te, Katsi fag ngay taw nu gseg sa Angku, si at bibig way fagtvngvd. Roro ngap sat amatanganan ngayayu way Angku. ⁷ Nu katanya way, du e masuad nu gseg sa Angku. Anway ka fag ngay taw at foyungan siginan way sik taw at longan. Ay gfanluk way te, Tuy Funbalugu wa longan. ⁸ Nafayudun way am Funbalugu At-Longan. Ay ay fagfaningun sa sik taw way at ugali. ⁹ Ay Isus nalong yangay sa anya te, Ay fagmamatangananun sas fagfanlukun way baliwa. Madyay gafayudun way am dawdaw Funbalugu At-Longan. Ay ay fagfaningun sa wayay ay ngay aguyangan at ugali. ¹⁰ Kata tuy Ku-Unga At-Longan ebi ebi te, Esugi tuwa am mama ay am mina. Ay, sik taw nu mauri way at longan sa at tama ay ate sa at tina, e fate wa anya. ¹¹ Ay roro ay foyungan nu anway te, At masine sik taw nu nafoyung sat tama ay sat tina te, Kurbun. At masuad te, Ku fasad fantarabang ayu, nafon akwa sas Funbalugu. ¹² Nu katanya way ay longan, am yay tagsalag sik sisian te, laman dua gtarabang at tama ay at tina. ¹³ Nu katanya way ay longan, nanyud fefanambagun way am Funbalugu At longan. Anway nafoyung wam ay ugali sa ay sugfun. Ay e tiba yay takatanya ay fagbulun. ¹⁴ Ay Isus gdog yay igfaful sa Anya at ngay taw, ay nalong sa anya te, Fagayu am, dungugani ro Ku foyungan, ay asafuli. ¹⁵ Bunwa sik taw at nafat sat basad bibig baliwa tagfafurat anya, tenday fakonun. At tagfafurat sa sik taw at nafalfas way siginan at bibig. ¹⁶ Nu e talinga tuwam, dungugani. ¹⁷ Ay Isus naubun wa at ngay taw ay nasakbo sas bale. Ay At ngay tagadal ginto Anya aro At fafaskudanan at masuad. ¹⁸ Ay Isus nabalus sa At ngay tagadal te, Go dua manga ro am gfangasaful. Ay go dua am nasaful te, nus nge wain sik taw at naon dua mafafurat sa at amatanganan. Go kin. ¹⁹ Anway fakonun nu ndasug sa ways ungdan ay naafun. Ay dua ndasug sas amatanganan. Isus At fagnafoyungun katanya, fagayu fakonun masine tuwa. ²⁰ Ay Isus nalong yangay te, At tagfafurat sa sik taw at nafalfas way siginan at bibig ay siginan at amatanganan. ²¹ Anway siginan ways taw at amatanganan tagfasure at mauri fag fasadan. Tenday, nu kamayun way sa at yud batang e mangama. Ay nu kamul way. Ay nu gfate way tiba. Ay nu kamayun way sat tibama mangena. ²² Ay nu galabian way. Ay nu mauri dawdaw at fagbulun. Ay nu gfanluk way. Ay nu kalimata way sat masine. Ay nu kalimata way sat mabalan fag taw. Ay nu kamuagan way sa at tiba baliwa. Ay nu gfandaragang way at fagbulun. Ay nu dway maabaris. ²³ Kayu niya fag mauri tagsiginan sik taw at amatanganan, ay tagfafurat sa anya. ²⁴ Ay Isus nalo wan sanya ginan, ay indasug way sigad sasa ngaba day fulan Batu-Luguy ay fulan Faggamatan-Uyang. Ay Kanya nasakbo sa sik bale. Ay satu ro dua kaumsig nu e sumaful Anya te sanya. Ay dewa katanya, dua maasuksuan. ²⁵ Ay sik mangena e baguina sirut e mafurat fag falad. Ay ka fag mangena nadungug te, sanya Isus. Ay rodi tv kanya inkakbang sas Isus ay inlub ay igseg Anya. ²⁶ Ka fag mangena at talun urungan sas talun Maraska sas talun Datag-Buid at fagmagurangun. Ay nu ge longan, Taw-Gresia at fanlongan. Ay matvngvd nu get sas Isus, laman mayiyan at mafurat fag falad siginan at baguina. ²⁷ Ay Isus igfafaskudanan yay sa ka fag mangena te, At masine at ngay sisian yap sirut taguna tagfangon. Anway dua masine nu e nabul sisian at fafa ay naukas sasa ngay idu riangan. ²⁸ Ay ka fag mangena nabalus sas Isus te, Em Magurang. Matuyan am longan. Ay dewa katanya, at ngay idu riangan sas daga fagfangonan naon at sisian at nagdakdakan. ²⁹ Ay Isus nalong anya te, Anway sa am nalongan at masine, loi wan katsi. Ka fag mafurat fag falad naubun wa am baguina. ³⁰ Ay ka fag mangena noli wan. Ay nu ndasug, nalag at baguina sirut si yay sad igyan. Ay at mafurat fag falad naubun wa fiya at baguina. ³¹ Ay Isus infoli wan siginans fulan Batu-Luguy fag talun. Ay nadalan sas fulan Faggamatan-Uyang ay sas Safuluk-Fulan-Daul fag talun. Ay anggan indasug sas Lino-Balulangan. ³² Ay e nataban sas Isus sik taw yud gdungug ay gutal ya. Ay matvngvd at tagtaban nu get sas Isus te, Fatayuki Am daluap sa anya. ³³ Ay Isus nataban ka fag taw sas day fagngayuan. Ay Isus nautkut sa ka fag taw at duwa talinga. Ay natufe. Ay nafatayuk sa ka fag taw at famaleleg. ³⁴ Ay Isus natangda sas banwa, ay namatangan daw, ay nalong sa ka fag taw te, Efata. At masuad te, Aluangi. ³⁵ Ay rodi ka fag taw gdungug tuwa, manga di gutal. Ay masnug tuwa daw nu ge longan. ³⁶ Ay Isus matvngvd nu gsalag sat ngay taw te, laman at ngay taw dua gfoyung sa tibak taw aro fag fagbulun. Nus nga seyu ginan Isus nu gsalag, kayu ginan yangay anya ka fag ngay taw at foyungan. ³⁷ Ay at ngay taw nadulawan dawdaw te, Agbvt nu masine At fagbulun fagayu. Madyay at yud gdungug, gdungug tuwa. Ay at yud mafae longan, mafae longan tuwa.

¹ Ay ginanya sik ngay taw gdog yay inful. Ay du e ba yafun, namin wan. Ay Isus nafakbang At ngay tagadal sa Anya, ay nalong anya te, ² Kafanyu Aw nin fag ngay taw. Anway katsi tulu wak menit nu maful ste si Angku. Ay katsi du e fakonun. ³ Nu fauli Akwa ro sat bale, umkarum waro at mata sat ngaba dalan. Anway tibak taw siginan wa at ngayayu fag fulan. ⁴ Ay at ngay tagadal ginto sas Isus te, Daginan ro tam famaon nin fag ngay taw. Ay nu ste way ngap daw swa bilug talun at yud e taw. ⁵ Ay Isus nainto sa At ngay tagadal te, Seyu ay ba fafa iste. Ay kanya nabalus te, Fitu. ⁶ Ay Isus nafalunggung wa at ngay taw sanya sa ngaba daga. Ay Isus nagalumutan wa long ka fag fituk fafa. Ay nauseganan sas Funbalugu, ay nafanramyukan ka fag fafa. Ay nafon wa sa At ngay tagadal laman naafud ro sasa ngay taw. Ay At ngay tagadal nafon yangay sa at ngay taw. ⁷ Ay dua ngayu anggan at uyang sirut. Ay Isus nauseganan yangay sas Funbalugu. Ay nalong sa At ngay tagadal te, laman nafon sa at ngay taw. ⁸ Ay fagayu taw naon wan ay napsug wan. Ay At ngay tagadal nafaful yay at nagsawadan at nakaramyukan, fitu yak sabi inkapnu. ⁹ Ay at taw sanya, manga 4000k taw. ¹⁰ Ay Isus nafalo wa ka fag ngay taw. Ay rodi Isus nasakay wa sa sik balutu gasfuan At ngay tagadal. Ay nalo wa sas talun Dalmanuta. ¹¹ Ay sik ngay Taw-Tagfalayun indasug, ay igfabadbabuan sas Isus. Ay ka fag ngay taw kaumsig Isus nu nafalag anya sik ke masuad fag fagbulun siginans Banwa. Anway kaumsig igfaskud Isus. ¹² Ay Isus namatangan daw ay nalong te, Taw ro katsi fag ngay taw at fagialagun sik ke masuad fag fagbulun fagtvngvd. Matuyan iglong Kwa ayu te, Dua ban e gfalag sa katsi fag ngay taw. ¹³ Ay Isus naubun wa ka fag ngay taw. Ay nasakay yangay sa sik balutu, ay nalo wa sat dife. ¹⁴ Ay Isus At ngay tagadal naliam nu guba at ba yafun. Ay sadi way fiya fiya at ba fafa sas balutu. ¹⁵ Ay Isus nalong nafatagak sa At ngay tagadal te, Tagaki at famabaga tinafay siginan at ngay Taw-Tagfalayun ay siginans fun Sik-Madaragang-At-Baguama-Sirut. ¹⁶ Ay At ngay tagadal gsulitanan way sit dayu te, Isus aro At fagnalongun katanya, anway dua tam e ba fafa. ¹⁷ Ay roro Isus nasaful wan At ngay tagadal at sulitanan, ay nainto anya te, Taw ro ay fagsulitananun te, Dua tam e ba fafa. Go sangay di am nalag. Ay di am nasaful. At fagmatvngvdun daw ay amatanganan. ¹⁸ E mata wam. Go sangay du am nalag. Ay e talinga wam. Go sanya dua am nadungug. Ay go du am namatang. ¹⁹ Ebi gina Aw gfanramyukan limak fafa. Ay nafayafun Aw 5000k mangama, go seyu ya nu kink sabi at kinkapnu ay nafaful at nagsawadan. Ay At ngay tagadal nabalus te, Sik 12k sabi. ²⁰ Ay Isus nainto yangay te, Ay gina Aw gfanramyukan fituk fafa sas 4000k taw, go seyu ya nu kink sabi at kinkapnu ay nafaful at nagsawadan. Ay at ngay tagadal nabalus te, Fitu yak sabi. ²¹ Ay Isus nainto yangay te, Taw ro ay fagyudun nasaful. ²² Ay Isus ay At ngay tagadal indasug sas fulan Fagfanguyangan. Ay e nataban sas Isus sik taw yud glag. Ay nanget sas Isus laman fatayuk ro At daluap sat yud glag. ²³ Ay Isus nated at yud glag at daluap ay nataban sas day fulan. Ay Isus natufe sa at yud glag at mata. Ay nafatayuk At daluap sa anya. Ay ginto sa anya te, Go glag wo nus nge wain. ²⁴ Ay ka fag ama kamantayan ay nabalus te, Nu glag aw at ngay taw nu glo, kata yay sik ngay kayu. ²⁵ Ay Isus gdog yay nafatayuk At daluap sa at yud glag at mata. Ay rodi ka fag taw nalinggat ay infiya wan. Ay maliyo tuwa daw nu glag. ²⁶ Ay gina Isus nafalo ka fag taw sat bale, nalong anya te, Lag gdalan sas fulan. Saruyani wan. ²⁷ Isus ay At ngay tagadal nalo yangay sasa ngay fulan at makbang sas Takesug-Kabayu-Fun-Sesar fag fulan. Ay kaduge glo, Isus ginto sa At ngay tagadal te, Sinu Aw, unu, at ngay taw at longan. ²⁸ Ay At ngay tagadal nabalus te, Tiba nalong te, Uan Tagfasurung O. Ay tiba nalong te, Ka fag Funbalugu At taglong, at ngayan Funbalugu-Tam-Taw-Yabi-At-Masine O. Ay tiba nalong yangay te, At sadi ebi Funbalugu At taglong O. ²⁹ Ay Isus nainto yangay fiya sa At ngay tagadal te, Ay am magngay. Sinu Aw, nu gfasad am. Ay Takata-Sik-Batu nabalus wa long daw te, O wan Fagtayukan. ³⁰ Ay Isus matvngvd nu gsalag sa At ngay tagadal, laman dua gfoyung Anya sa tibak taw. ³¹ Ay Isus gfasigad nafaguna nafoyung sa At ngay tagadal te, Aw, Taw-At-Baguama, maris kban ngayuk mataka. Ay Taw-Naseg at ngay magurang, ay at ngay taganyun daul, ay anggan at ngay tagfasaful kalimata ban Angku. Ay e fate wa ban Angku. Ay sa bans fatuluk menit gdog kyangay gleleg. ³² Ay Isus nafatignaun nu glong. Ay Takata-Sik-Batu nataban Isus sat dayu ay igsalag Anya. ³³ Ay Isus inbiling ay nalinggat sa At ngay tagadal. Ay igbaya yangay sas Takata-Sik-Batu te, Lag ste o, kata way o Tagfansalag. Anway am amatanganan kata way sik taw at amatanganan. Ay wa kata Funbalugu At amatanganan. ³⁴ Ay Isus nafakbang sa Anya at ngay taw, ay anggan At ngay tagadal, ay nalong anya te, Sik taw nu kaumsig nangalo Angku, ubuni tuwa at fakaumsigun mandi. Ani way fasani at salibagan kayu, ay aloi Angku. ³⁵ Anway nus nga sinu fag taw nu kesug way at leleg katsi, maliam wa ban at leleg. Ay nus nga sinu nu naanyun tuwa at leleg katsi, laman Aw At ke fanambagun, ay laman at Masine-Fag-Barita nu e nafadungug tuwa, ka fag taw ban e leleg tuwa faggugat. ³⁶ Tain, nu kin ban, sik taw at fanambagun, dewa nafabul at fagdaul daga at nanuranan ay nu naliam way ngap ban at leleg. ³⁷ Ay dewas nga seyu seyu sik taw at nafon, dua ban mafafaleleg anya nu nkate wan. ³⁸ Nus nga sinu fag taw nu kapla way gfoyung Angku ay anggan Ku longan sa katsi at takamayun ay tagasalanan fag ngay taw, anggan Aw, Taw-At-Baguama, kapla Akyangay ban anya. Gina ban Aw kadasug stiye, e fagmadaragangun aw siginan Ku Mama, gfasfuan Funbalugu At ngay tagbukngan.

¹ Ay Isus nalong sa At ngay tagadal te, Matuyan iglong Ku ayu te, Am tiba at malindug ste di am umkate dyap ngay nalag Funbalugu-Nu-Gmagurang-Taw ke fagmadaragangun daw. ² Ay sas faunumk menit, Isus nataban Takata-Sik-Batu, ay Santiagu, ay anggan Uan. Ay kayu way niya at naulul sa sik muyud ngabat yud e taw. Ay inbali wan Isus At bilug gina sit tibama buknga. ³ Ay Isus At lanbung masulo, ay inlagsi dawdaw. Ste swa daga du e taw mafafalagsi katvngvd anya. ⁴ Ay rodi tv insure yay ebi fag duwak taw at ngayan te, Funbalugu-Tam-Taw-Yabi-At-Masine ay Ku-Unga. Ay kanya igfamatuan sas Isus. ⁵ Ay Takata-Sik-Batu nalong sas Isus te, Em Takamoyung. Masine iste yangay ami. Ay nangawat yay ami tuluk fagfanlanbungan. At sadi sa Emu. Ay at sadi sa Ku-Unga. Ay at sadi sas Funbalugu-Tam-Taw-Yabi-At-Masine. ⁶ Takata-Sik-Batu at fagnalongun katanya dua nasaful te, tain at longan at masine. Anway Isus At ngay tagadal kalimu yangay dawdaw. ⁷ Ay rodi sik linyabu nalanbung sanya fag ngay taw. Ay e nae longan sanya ginan sad linyabu te, Kanya wan Ku fakesugun Ku Baguama. Dungugani tuwa ro Anya. ⁸ Ay rodi ka fag tuluk tagadal gina nalinggat, du e nalag ya at duwa. Isus way fagsadi. ⁹ Ay kaduge Isus ay At tuluk tagadal iglo kadaga siginans muyud, Isus nalong anya te, Agi yap gfoyung sa tibak taw aro ay nalag. Yap ngay ban Aw, Taw-At-Baguama, gdog yay gleleg. ¹⁰ Ay At tuluk tagadal igfaning tuwa Isus At longan. Dewa igsulitanan sit dayu sa baliwa aro Isus At nalongan at masuad te, gdog yay gleleg. ¹¹ Ay At tagadal fag tulu nainto sas Isus te, Nataw at masuad Taw-Naseg at ngay tagfasaful fagnalongun te, Ka fag taglong at ngayan Funbalugu-Tam-Taw-Yabi-At-Masine umdasug ban taguna. ¹² Ay Isus nabalus te, Matuyan ebi at longan te, Umdasug yay ban Funbalugu-Tam-Taw-Yabi-At-Masine, laman taguna nanfamasadan yay fagayu. Ay nu katanya, taw ro At-Rirukan at fagnalongun te, E matvngvd ban fag faurianan sa Angku, Taw-At-Baguama. Ay anggan e gfalingun ban Angku. ¹³ Ay iglong Ku ayu te, Funbalugu-Tam-Taw-Yabi-At-Masine indasug wan. Ay ka fag ngay taw at fagbulun sa anya igfaning way mandi anya at fakaumsigun. Kata At-Rirukan ebi at longan sa anya baliwa. ¹⁴ Ay Isus ay At tuluk tagadal gdog yay infoli sa tibak tagadal. Ay nalag sik ngay taw ayuwayu nu kaful sa aro at naubun fag ngay tagadal. Ay Taw-Naseg at ngay tagfasaful gfabadbabuan sas Isus At ngay tagadal. ¹⁵ Ay ka fag ngay taw nu nalag Isus, inlipsik daw. Ay mafali nu kakbang sas Isus, ay gfamatuan Anya. ¹⁶ Ay Isus ginto sa At ngay tagadal te, Nataw aro ay famasulitanan sanya fag ngay taw. ¹⁷ Ay sadik taw siginan swa taw nabalus Isus te, Em Takamoyung. Aro nataban aw ku baguama sa Emu. Anway e mafurat fag falad ay dua mafae longan. ¹⁸ Ay kayu ginan at mafurat fag falad igmagurang sa ku baguama, ay nafagfu anya sas daga. Ay glafas at bibig. Ay gfaringgit at bagang. Ay taba wa intigas at bilug. Ay aro naet akyama sa Am ngay tagadal laman mayiyan. Ay kanya dua mafaayiyan. ¹⁹ Ay Isus nalong te, E, go katanya. Anway te, am katsi fag ngay taw at yud way am kafandiug. Seduge ya ban nu gufud Aw ayu. Ay seduge ya ban nu gfanya Aw ayu nu an am kafandiug. Tabani wa ka fag baguama sa Angku. ²⁰ Ay e nataban anya sas Isus. Ay ka fag mafurat fag falad nu nalag Isus, rodi igfafanggong ka fag baguama. Ay ka fag baguama nagfu sas daga. Ay nafadfarang. Ay iglafas at bibig. ²¹ Ay Isus nainto sa ka fag baguama tama te, Seduge wan nu katanya. Ay at tama igbalus te, Siginan wa alay. ²² Ay ebi ginan ngayu ginan wan ka fag mafurat fag falad nu kukas ku baguama sas afuy ay sasad safa. Laman igfate anya. Ay roro nu mafabul yay O, afanyui yap emi ay tarabangi emi. ²³ Ay Isus nalong anya te, Taw ro am fagnalongun te, nu mafabul yay O. Sik taw nu kafandiug tuwa, nus nge wain umsure wa fiya sa anya. ²⁴ Ay rodi at tama matvngvd nu gbalus sas Isus te, Kafandiug akwan. Ay fatvngvdi yap nangus ku fakafandiugun. ²⁵ Ay Isus nalag sik ngay taw matarung nu kaful sa Anya. Ay rodi matvngvd Isus nu gsalag ka fag mafurat fag falad te, O fag mafurat fag falad at yud mafae longan ay tagabungul. Nalong Aw emu te, Ubuni wa ka fag baguama. Ay lag gdog katayuk sa anya faggugat. ²⁶ Ay rodi ka fag mafurat fag falad nauro daw. Ay matvngvd nu igfafanggong ka fag baguama. Ay rodi naubun wa anya. Ay ka fag baguama kata wa nu nkate. Ay nu katanya ngayuk taw nalong te, Nkate wa long. ²⁷ Ay roro Isus nated yay ka fag baguama at daluap ay nafalindug anya. Ay kanya malindug tuwa mandi. ²⁸ Ay Isus nu nasakbo sas bale, at ngay tagadal ginto sas Isus sat dayu te, Taw way manga aro em fagyudan mafaayiyan ka fag mafurat fag falad. ²⁹ Ay Isus nabalus anya te, Darangin wadi at mafaayiyan takatanya fag mafurat fag falad. ³⁰ Isus ay At ngay tagadal nalo wan ay nadalan wa talun Balulangan. Ay Isus dua kaumsig nu e sumaful te, sanya Aw. ³¹ Anway Isus gfoyung ginanya sa At ngay tagadal te, Aw, Taw-At-Baguama, e tumaban ban Angku sa sik ngay taw laman tumed wa fiya Angku. Ay anggan igfate ban angku. Ay nu mkate Akwan, sis fatuluk menit gdog Kyay ban gleleg. ³² Ay At ngay Tagadal dua nasaful At longan at masuad. Ay manga kalimu wayay nanginto sas Isus. ³³ Isus ay At ngay tagadal indasug sas Takafanyu-At-Fulan. Ay gina ndasug sas bale, Isus nainto sa At ngay tagadal te, Taw aro ay sulitanan sasa ngaba dalan. ³⁴ Ay At ngay tagadal maragangan way dua gbalus. Anway sasa ngaba dalan at sulitanan anway te, sinu ban tam at tiba tungud. ³⁵ Ay Isus malunggung ay nafaful sa Anya At Labi-Duwa. Ay nalong anya te, Sik Taw nu kaumsig ban at tiba tungud, at masine ka fag taw katai way tiba daga fag taw, ay manga katai way tiba fanuguan. ³⁶ Ay Isus nabul sik sisian sirut, ay gfalindug anya si At ngay tagadal buknga. Ay Isus nasalilian ka fag sisian ay nalong sa At Labi-Duwa te, ³⁷ Nus nga sinu fag taw nu nafasakbo tuwa sik sisian sirut anway kanya igseg Angku, ay kata wa nu nafasakbo Angku. Ay bundi Aw fag sadi, kata yangay nu nafasakbo At nasugu Angku. ³⁸ Ay Uan nalong sas Isus te, Em Takamoyung. Nalag ami sik mangama nu gayiyan sik ngay mafurat fag falad sa Am fagmadaragangun. Ay igsalag ami anya, anway kanya dua nangufud antam. ³⁹ Ay roro Isus nalong te, Lag salag anya. Anway sik taw nu e matvngvd fag fagbulun sa Ku fagmadaragangun, di ban glong mauri sa Angku baliwa. ⁴⁰ Anway kanya fag taw nu gdi gsalag antam, kanya kata wa nu gtarabang antam. ⁴¹ Matuyan iglong Aw ayu te, Nus nga sinu fag taw at nafon ayu nus di sik taya mamam, anway am wan Fagtayukan At taw, di ban maliam ka fag taw at fanambagun. ⁴² Ay nus nga sinu fag taw tagfe asalanan sa sik sisian sirut takafandiug sa Angku, at masine nu e siuk sa sik fagligisan batu daul sa ka fag tagfe asalanan at liug. Ay e mukas anya sasad lino. ⁴³ Ay am daluap at sadi nu gfe asalanan way emu, lifungi wan. Anway amasine yap nu mdasug tuwa ban o sas leleg at yud katabu, dewa yud o e daluap at sadi. Ay at yud masine nu mdasug way o sas Lino-Afuy at yud kalayung, nu fagduwa way am daluap. ⁴⁵ Ay am darafa at sadi nu gfe asalanan way emu, lifungi wan. Anway amasine yap nu mdasug tuwa ban o sas leleg at yud katabu, dewa yud o e darafa at sadi. Ay at yud masine nu e mukas way emu sas Lino-Afuy, nu fagduwa way am darafa. ⁴⁷ Ay am mata at sadi nu gfe asalanan way emu, guladi wan. Anway amasine yap nu mdasug tuwa ban o sas leleg at yud katabu, dewa yud o e mata at sadi. Ay at yud masine nu e mukas way emu sas Afuy-Daul, nu fagduwa way am mata. ⁴⁸ Sanya at ulud dua kate. Ay at afuy dua ban kalayung faggugat. ⁴⁹ E fanfaskud ban sas fagayu taw katvngvd sik afuy. Laman at fanfasine sa sik taw at ugali. Kata sik asing at fanyud karuas sik fakonun. ⁵⁰ Masine sik asing. Ay roro sik asing nu dway e matamis, tain ro nu gdog yangay tam gfatamis. Fasinei ay ugali kata sik asing nu gfasine sik fakonun. Ay e fagmanabayanuni tuwa sa ay ngay iba.

¹ Ay Isus nalo wan sanya ginan ay indasug wa sa sik afud talun Naseg sas dife safa Mababaun. Ay at ngay taw gdog yay maful sa Anya. Ay Isus fagnafoyungun anya anway katanya wan faggugat At fagbulun. ² Ay tibak Taw-Tagfalayun nangakbang sas Isus, ay nanfaskud Anya te, Go sik mangama nu naubun at mangena, go katanya gfaning manga sa Ku-Unga At-Longan. ³ Ay Isus nainto anya te, Tain ebi Ku-Unga At-Longan sa ayu. ⁴ Ay ka fag Taw-Tagfalayun nabalus sas Isus te, Ku-Unga nafabayan wa te, laman sik taw nu gaubunun wa at mangena, riruki ay foni ngay anya sik famasaful te, katsi naubun kwan. ⁵ Ay roro ngap Isus nalong anya te, Ku-Unga at fagnarirukun sa ayu, anway at katvngvdan wa nu gfatalfiun am si ay fasadan. ⁶ Ay siginan ngays fagsigadan, gina Funbalugu naawat tam fagdaul daga, Funbalugu At fagnaawatun ama ay ina. ⁷ Ay anway katanya, sik mangama mubun ban at tama ay at tina, ay umkalo sat mangena. ⁸ Ay kanya fag duwa insadi wan. Ay nu katanya, bunwa duwa, sadi wadi. ⁹ Ay nus nga sinu Funbalugu At nafasadi fag taw, lag ban e nanfasadsamanan anya. ¹⁰ Ay nu ndasug wa sat bale, Isus At ngay tagadal ginto yay Anya aro at foyungan at masuad. ¹¹ Ay Isus nalong anya te, Nus nga sinu at naubun at mangena ay nangadaduwa yay sa tiba, kanya kamayun way, ay kata nu nke faurianan sat mangena dan. ¹² Ay anggan sik mangena nu naubun way at mangama ay nu ndaduwa way sa tiba, kanya kamayun way. ¹³ Ay rodi tibak taw nataban sik ngay sisian sirut sas Isus, laman Isus nanfatayuk At daluap sa anya. Ay Isus At ngay tagadal nasalag at tagtaban ka fag ngay sisian. ¹⁴ Ay Isus kadotama nu nalag At ngay tagadal at fagbulun. Ay igbaya sa At ngay tagadal te, Fabayani wan ka fag ngay sisian. Ay lag gsalag anya nu kakbang sa Angku. Anway Funbalugu-At-Fagmagurangan-Taw kata wa ka fag ngay sisian ¹⁵ Matuyan iglong Ku ayu te, Nus nga sinu fag taw at yud kaumsig Funbalugu-Nu-Gmagurang-Taw kata sik sisian sirut nu kaumsig, ka fag taw dua ban umful sanya. ¹⁶ Ay Isus nasalilian sanya fag sisian sirut. Ay nafadait anya gina nafatayuk at daluap sa anya. ¹⁷ Ay gina Isus bagu iglo sanya ginan, sik baguama matarung nangakbang sa Anya. Ay naarungan sas daga ay igseg sas Isus akbang. Ay ginto sas Isus te, Masine fag Takamoyung. Tain manga ban ku fagbulun at masine, laman e leleg aktuwa ban at yud katabu. ¹⁸ Ay Isus nabalus anya te, Taw ro am fagnalongun Angku te, Masine. Du e taw masine. Funbalugu way fagsadi At masine. ¹⁹ Nasaful wo Ku-Unga At-Longan te, Lag gfate taw. Ay lag kamayun. Ay lag kamul. Ay lag kamuagan nu gfoyung o sa am iba tibak taw at fagbulun. Ay lag fanluk te, laman fabul o am iba at fagagbilugun. Ay esugi am mama ay am mina. ²⁰ Ay ka fag baguama nalong sas Isus te, Takamoyung. Nafaning kua gugat kayu niya am longan fagayu siginan ngay aw bagu kadaul. ²¹ Ay Isus nu nalinggat sa ka fag baguama, kesug tuwa anya. Ay nalong anya te, E yud yay o nafaning sadi. Loi wan ay fesalii am nanuranan fagayu. Ay faafudani am nafabul sasa ngay taw at yud e kwa. Ay e fagmabalanun ban o sas Banwa. Ay katsi gewan. Aloi wa Angku. ²² Ka fag baguama nu nadungug Isus At longan, at mata mafatoglagan way kabalu. Ay kanya nalo wan mabaluanan way aba, anway mabalan dawdaw ay kesug way. ²³ Ay Isus glingaman sa At ngaba dayu ay nalong sa At ngay tagadal te, Mataka ban dawdaw sik mabalan fag taw nu kaful sas Funbalugu-At-Fagmagurangan-Taw. ²⁴ Ay At ngay tagadal nadulawan nu nadungug Isus At longan. Ay Isus gdog yay nalong te, Ku ngay sisian, mataka dawdaw nu kaful sas Funbalugu-At-Fagmagurangan-Taw. ²⁵ Mataka sik idu mabugsul guyuy nu gsulun sa sik fansulbung at sulung. Ay amataka yap sik mabalan fag taw nu kaful sas Funbalugu-At-Fagmagurangan-Taw. ²⁶ Ay at ngay tagadal namatangan dawdaw, ay nalong sas Isus te, Ay nu katvngvd wa anya Am longan, sinu ban at kumbalabag. ²⁷ Ay Isus nalinggat sa At ngay tagadal ay nalong anya te, Nu sik taw way, dua mafafabul. Ay roro di katanya sas Funbalugu. Anway Funbalugu mafafabul fagayu. ²⁸ Ay rodi Takata-Sik-Batu nalong sas Isus te, Ami, naubun wami fagayu ay nangalo wami Emu. ²⁹ Ay Isus nalong te, Matuyan iglong Aw ayu te, Nus nga sinu fag taw at naubun at bale. Ay at ngay fadugsay. Ay at tina. Ay at tama. Ay at ngay sisian. Ay anggan at gamasun laman e fanambagun Aw. Ay anggan e fanambagun at Masine-Fag-Barita. ³⁰ Takatanya fag taw katsi fag ngay menit fafabul ban sik 100 ginan at bale. Ay anggan at fadugsay. Ay at anggan tina. Ay anggan at tama. Ay anggan at sisian. Ay anggan at gamasun. Ay gasfuan at faurianan. Ay bandi e leleg tuwa ban at yud katabu. ³¹ Ay at tiba tungud fag taw katsi, kanya ban tiba daga. Ay at tiba daga fag taw katsi, kanya ban tiba tungud. ³² Ay Isus ay At ngay ufud nalo wan nangadasug sas Erusalem. Ay Isus taguna tibama. Ay At ngay ufud nadulawan. Ay at ngay taw tagalo Anya kalimu. Ay Isus gdog yay nafaful sa Anya At Labi-Duwa. Ay nafoyung at kumdasug ban sa Anya. ³³ Ay Isus nalong te, Katsi sa watams Erusalem. Ay sanya e moyung ban Angku, Taw-At-Baguama, sas Taw-Naseg at ngay taganyun daul ay at ngay tagfasaful. Ay ka fag ngay taw wa ban at fataban ban Angku te, laman nanfate wa Anya. Ay e tumaban yangay ban Angku sa at ngay Yud-Naseg-Fag-Taw. ³⁴ Ay kanya wa ban fag ngay taw at malingun Angku. Ay at tumufe sa Angku. Ay at malang Angku. Ay at fate Angku. Ay dewa katanya, nu nlangfe wa ban tuluk menit, gdog Kyay gleleg. ³⁵ Ay Santiagu ay Uan, Funbalugu-Nafon at duwak baguama, nangakbang sas Isus ay get Anya te, Em Takamoyung. Kaumsig ami nu gfaning O em fasadan, nus nge wain em fagetun. ³⁶ Ay Isus ginto te, Nataw ay fagetun sa Angku. ³⁷ Ay ka fag dugsay nabalus sas Isus te, Satu, falunggungi ban emi fasumbaliani Emu sa Am Fagmagurangan ban. ³⁸ Ay Isus nalong yangay sa ka fag dugsay te, Yaya. Wam nasaful ay fagetun at masuad. Go sangay mafainum ban am siginan Ku faginumun fag taya. Ay go maasurung ban am kata nu kasurung Aw. ³⁹ Ay ka fag dugsay nabalus sas Isus te, Kin. Mafainum wami fiya. Ay masurung wami fiya. Ay Isus nalong yangay anya te, Kin. Kata nu ginum Aw siginan ku faginumun fag taya, katanya yangay ban anggan am, minum yangay ban am. Ay kata nu kasurung Aw, katanya yangay anggan am, umsurung yangay ban am. ⁴⁰ Ay roro nus nga sinu ban at kumlunggung sumabalian Angku, bundi Aw At nalong. Ku Mama tuwa At ke fasadan at kumlunggung sanya. ⁴¹ Ay At 10k tagadal nu nadungug katanya, indotama sas Santiagu ay sas Uan. ⁴² Ay Isus nafaful yay At ngay tagadal sa Anya, ay nalong anya te, Nasaful wam sat Yud-Naseg-Fag-Taw at fun, matvngvd dawdaw nu gsugu. Ay anggan tiba daga fag fun nu gsugu, matvngvd yangay. ⁴³ Ay roro di katanya sa ayu. Anway baliwa te, nus nga sinu am takaumsig nanmagurang ban, kanya katsi katai ay tagtarabang. ⁴⁴ Ay nus nga sinu am takaumsig at tiba tungud ban, kanya katsi katai sik fanuguan sas fagayu. ⁴⁵ Anway Aw, Taw-At-Baguama, Ku fagindasugun bundi te, Ku iba nantarabang Angku. Ku fagindasugun an tuwa te, laman nantarabang Aw at ngay taw. Ay nanfon Aw Ku leleg, laman Ku naatean nabalabag at ngay taw siginans fakateun. ⁴⁶ Ay Isus ay At ngay tagadal ndasug sas fulan Bangluan. Ay rodi Isus nu nalo wa sanya ginan At ufud At ngay tagadal ay anggan sik ngay taw ayuwayu. Ay sanya sik ama at yud glag, ay at dan wa taget faggugat, malunggung sis day dalan. At ngayan At-Fakesugun-Sirut, At-Fakesugun at baguama. ⁴⁷ Ay at yud glag nadungug te, Sanya wan Isus, sik Taw-Nasaret. Ay kanya nauro te, Isus, fun Fakafanyuun-At-Kadagdagan. Afanyui yap angku. ⁴⁸ Ay ngayuk taw sanya matvngvd nu gsalag anya laman maragangan way. Ay fangkabat glabi yay aro taw nu guro te, Fun Fakafanyuun-At-Kadagdagan. Afanyui yap angku. ⁴⁹ Ay rodi Isus intuas nu glo, ay nalong sa tiba te, Fastei anya. Ay tiba nalong sat yud glag te, Malindugi wan. Lag kalimu. Isus wan At ke longan te, sanya wo. ⁵⁰ Ay kanya mafali nu naubun at lanbung. Ay natulbu wa daw ay inkakbang wa sas Isus. ⁵¹ Ay Isus nainto sa anya te, Tain am fakaumsigun Ku fagbulun ro sa emu. Ay at yud glag nabalus te, Takamoyung. Kaumsig aw nangus glag. ⁵² Ay Isus nalong sa anya te, Loi wan. Am fakafandiugun wan tagfafiya emu. Ay rodi kanya glag wa fiya. Ay nangalo wa fiya sas Isus gina glo.

¹ Ay Isus ay At ngay ufud indasug wa sas Muyud-Tagakayuun-Ulibu, makbang wa sas Erusalem, ay sas fulan Kayu-Buadan-Ya-Ntaba, ay sas fulan At-Yud-E-Kwa. Ay Isus nasugu At tagadal at duwa. ² Ay nalong anya te, Nanlag wam sanya am dayu fag fulan. Ay nu mdasug am sanya, rodi lumag ro am sik asnu riangan masiukan. Di e taw batang nasakay sanya. Ay luasi at siuk. Ay tabani ka fag riangan stiye sa Angku. ³ Ay gina am gluas, sik taw nu gsalag wa ayu te, Taw ro ay fagluasun. Am, longi anya te, Tam Fun kaumsig yay sirut katsi. Ay gfafoli yay ro stiye rodi. ⁴ Ay ka fag duwama nalo wa fiya. Ay nalag wa fiya sik asnu riangan masiukan sis day dalan, si sik day sakbawan bale. Ay kanya igluas wan. ⁵ Ay at taw sanya igsalag ka fag duwama te, Taw ro ay fagbulun ka fag asnu riangan. ⁶ Ay at duwama nafoyung anya aro taw Isus At longan. Ay at taw sanya dua gsalag ka fag duwama nu gbul. ⁷ Ay rodi ka fag duwama nataban wa fiya ka fag asnu riangan sas Isus. Ay nasagmak at ngay lanbung sat tungud balan guyuy. Ay Isus malunggung wa sanya. ⁸ Ay tibak taw at fanagmak sasa ngaba dalan at lanbung wan. Ay tiba at fanagmak nauba falungfung kayu siginans gamasun. ⁹ Ay at ngay taw, dewa at naguna sas Isus ay dewa tagaguyanan, gfanguruan te, Gseg watam. Masine tuwa Kanya At fagindasugun At fagmadaragangun siginan was Funbalugu. ¹⁰ Ay masine yangay tam aguyangan, fun Fakafanyuun, at fagmagurangun gasureun wa daw. Gseg watam Kanya tagsiginans Banwa. ¹¹ Ay Isus indasug wa sas Erusalem. Ay nasakbo sas Tagbvt-Fag-Bale-Funbalugu. Ay nu nalingaman wan fagayu, Kanya nalo wa sas fulan At-Yud-E-Kua gfaudgufudan At Labi-Duwa, anway nyabi wan. ¹² Ay balabag di, Isus ay At ngay tagadal nalo wan siginans fulan At-yud-E-Kwa. Ay Isus kalunus wan. ¹³ Ay Isus nu nabantay sik kayu marabung nu gdonan, nangakbang yama nanlinggat te, go e buadan. Roro manlag di, du e buadan, at don wadi. Anway dia ndasug famuadanun. ¹⁴ Ay Isus nalong sa ka fag kayu te, Dua ban e umon am buadan faggugat. Ay At ngay tagadal nadungug nu glong. ¹⁵ Ay Isus ay At ngay tagadal ndasug sas Erusalem. Ay Isus nasakbo sas Tagbvt-Fag-Bale-Funbalugu ay naayiyan at tagfesali ay anggan at nansali sas Funbalugu bale. Ay Isus nafalub at ngay nafabangsi salafi at fagsandigan. Ay manga at ngay tagfesali linatad at faglunggungan. ¹⁶ Ay Isus nasalag fagayu taguba, nus nge wain at buba sasa ngaba basad Tagbvt-Fag-Bale-Funbalugu. ¹⁷ Ay Isus nafoyung sat ngay taw te, At-Rirukan nalong wa te, E nafangayan wa Ku bale sik Bale-Daranginan. Anway sanya fagayu talun at taw nu nandarangin. Ay yaya, roro mangaro Ku bale nafasik luib way am, fakamulan. ¹⁸ Ay Taw-Naseg at ngay taganyun daul ay at ngay tagfasaful nadungug Isus At longan. Ay igsarap te, tain ban nu fafate Isus. Anway kanya kalimu Isus, teway at ngay taw nadulawan nu nadungug Isus At foyungan. ¹⁹ Ay nu kayabi wan, Isus ay At ngay tagadal nalo wan siginans Erusalem. ²⁰ Ay balabag di sdaga kamenit Isus ay At ngay tagadal nalo wan. Ay manlag di egmenit at nalag fag kayu at yud buadan, nyango wan. Anggan wa sa at lalid. ²¹ Ay Takata-Sik-Batu namatang egmenit ataw Isus At longan sas kayu, ay nalong sas Isus te, Em Takamoyung. Damai egmenit am fakalimataun fag kayu at yud buadan, nyango wan. ²² Ay Isus nalong sa At ngay tagadal te, Afandiugi ngani sas Funbalugu. ²³ Matuyan iglong Aw sa ayu te, Nus nga sinu at lumong ban snay fag bugsul te, E falin emu ay e mukas emu sasad dagat. Ay ka fag taglong nu gdi gadayuan sa at amatanganan. Ay nu gafanud tuwa te, Umsure wa ban fiya ku longan. Umsure wa fiya. ²⁴ Nu katanya, iglong Aw sa ayu te, Nus nge wain ay fagetun gina am gdarangin, afanudi tuwa te, fabul wam. Ay fafabul yangay ban am fiya. ²⁵ Ay gina am malindug igdarangin, aliami ay iba nus nge wain at mauri at fagbulun sa ayu. Laman anggan ay Tama sas Banwa nafaliam yangay ban ay fakamaboun sa At longan. ²⁷ Ay Isus ay At ngay tagadal gdog yay indasug sas Erusalem. Ay kaduge Isus iglo sasa ngaba Tagbvt-Fag-Bale-Funbalugu, Taw-Naseg at ngay taganyun daul ay at ngay tagfasaful ay anggan at ngay magurang inkakbang sas Isus. ²⁸ Ay kanya nainto sas Isus te, Sinu At nasugu Emu te, nanfagbulun O katanya. Ay anggan daginan sangay Am fagmadaragangun. ²⁹ Ay Isus nabalus anya te, Anggan Aw, e fagintoun Akyangay sa ayu. Balusi ro Angku. Ay nu nabalus tuwa ro am Angku, anggan Aw, igbalus Akyangay ayu te, Kanya At nasugu Angku Ku fagmafafagbulunun katanya. ³⁰ Ay kata tuy Ku fagintoun sa ayu. Go daginan Uan Tagfasurung at fagmadaragangun at fagsurungun taw. Go siginans Banwa. Ay go siginans taw. Balusi Angku. ³¹ Ay ka fag ngay Taw-Naseg igsulitanan yay gadayuan sit dayu te, Nu lumong maro tam te, Siginans Banwa, Kanya malus ro antam te, Ay taw madyay ay fagyudun gafanud sas Uan at longan. ³² Ay nu lumong maro tam te, Siginans taw... Katanya ka fag ngay Taw-Naseg at longan, anway kanya kalimu at ngay taw te, manlimata ban antam. Anway at ngay taw gafanud te, Uan Tagfasurung sik taglong siginans Funbalugu. ³³ Ay anway katanya ka fag ngay Taw-Naseg nabukngan, ay nabalus sas Isus te, Yaya, du ami nasaful te, go daginan. Ay Isus nalong yangay te, Ay kin. Anggan Aw. Da Kua gfoyung ayu te, Kanya At nasugu Angku Ku fagmafafagbulunun katanya.

¹ Ay Isus igfafaskudanan sat ngay taw te, E sik mangama natanum sik ngay uwat sa at gamasun. Ay anggan naalad at natanum. Ay kanya naali sasad daga at fagturisan buadan. Ay anggan naawat sik bale ngabat, at fagbantayan. Ay kanya nafatanud at tanuman uwat sa sik ngay tagtanud. Ay at tagbilug nalo wan sa sik talun ngayayu. ² Ay nu ndasug wa sis famulan, ka fag tagbilug nasugu at fanuguan at sadi sa at ngay tagtanud at tanuman uwat. Laman nanbul siginan at ngay tagtanud at tiba at buadan siginan at tanuman uwat. ³ Ay at ngay tagtanud nayukfu ka fag fanuguan. Ay nafalang anya. Ay naayiyan wa anya ay du e uba. ⁴ Ay at tagbilug gdog yay nasugu sadi yak fanuguan. Ay at ngay tagtanud nafe fakarukan at alfuyu. Ay anggan nafalingun anya. ⁵ Ay at tagbilug gdog yay fiya nasugu sadi ya fiyak fanuguan. Ay at ngay tagtanud nafate wan. Ay gsud yay at fagbulun sas fagayu at nasugu fag fanuguan. Tiba nafalang. Ay tiba nafate. ⁶ Ay at tagbilug e sadi yak taw, at fakesugun wa at baguama. Ay at fakatabuan, at tagbilug nasugu wa at baguama te, nu ndain ku ngay tagtanud sumeg manga sa ku baguama. ⁷ Ay roro at ngay tagtanud igsulitanan way sat dayu te, Labon ban at baguama nangagbilug way at tama at daga. Gewan. Nanfate watam anya. Laman antami wa ban at daga. ⁸ Ay katanya wayay. Kanya nated wa ka fag baguama. Ay nafate. Ay naukas at bilug sas day tanuman. ⁹ Tain ban at tagbilug tanuman at fagbulun. Kanya umdasug ban ay nanfate ban ka fag ngay tagtanud. Ay nanfatanud yay ban at tanuman sa tibak tagtanud. ¹⁰ Go di am natap At-Rirukan te, Dewa at ngay takawat bale kalimata Ka fag Batu at fangawat bale, Kanya tuwa fag Batu At tiba tungud at famatvngvd fagdaul at bale. ¹¹ Katanya wan tam Fun At fagbulun. Ay nu nalag tam, nasaful tam te, Madaragang wa fiya At fagbulun. ¹² Ay Taw-Naseg at ngay taganyun daul ay at ngay tagfasaful ay anggan at ngay magurang kaumsig nanyugfu Isus. Anway natuluyan te, sa wa siring emi baliwa Isus At fafaskudanan at masuad. Dewa katanya, at ngay Taw-Naseg kalimu way sanya fag ngay taw. Ay nu katanya, at ngay Taw-Naseg naubun wa Isus ay nalo wan. ¹³ At Taw-Naseg nasugu tibak Taw-Tagfalayun ay tiba at tagseg fun Sik-Madaragang-At-Baguama-Sirut. Laman nanfaskud Isus te, go mamatanganan Isus At longan. ¹⁴ Ay nu ndasug, nalong sas Isus te, Em Takamoyung, nasaful wami te, Matuyan Am longan. Ay du wo e filian taw, anway du O naseg sas taw at fagmadaragangun. Ay am foyungan antuwa Funbalugu At ugali. Go manga sik taw nu nafon sik famanyun sas fun Sesar. Go katanya manga igfaning wa Ku-Unga At-Longan. Ay go yaya. ¹⁵ Go masine nu gfon ami ay go lag ami gfon. Ay Isus nasaful ka fag ngay Taw-Naseg te, gfanluk way. Ay katanya wayay, Isus nabalus anya te, Taw ro ay fagnanfaskudun Angku. Foni Angku sik salafi, nanlingaman Aw. ¹⁶ Ay kanya nafon at salafi at sadi. Ay Isus igfalag te, Sinu at ke aninu ay at ke rirukan iste sis salafi. Ay tiba nabalus Anya te, fun Sesar. ¹⁷ Ay Isus nalong te, Kin. Foni fun Sesar at nanuranan sas fun Sesar mandi. Ay foni Funbalugu At nanuranan sas Funbalugu mandi. Ay fagayu taw nadulawan daw sa At longan. ¹⁸ Ay rodi ro at ngay Taw-Saduseu nangakbang sas Isus laman nanginto Anya. Ay Taw-Saduseu dan wa igfoyung te, taw at kinkate dua ban gdog gleleg. Ay ka fag ngay Taw-Saduseu nanginto sas Isus te, ¹⁹ Takamoyung, ebi Ku-Unga nariruk sa antam te, Sik mangama nu nkate wan. Ay at sawad at mangena way, dia nke unga. At masine at kinkate at fadugsay fag mangama adaduwai yap sa ebia taw at fadugsay mangena. Laman umke unga yay bilang sa ebia taw at fadugsay at unga. ²⁰ Ay ebi e sik sisian, fituk ama. Ay at turungana inke mangena wan. Ay ka fag mangama nkate wan, dua nke unga. ²¹ Ay sik daga tv fag fadugsay indaduwa yay fiya sanya fag mangena. Ay inkate yay fiya, dua nke unga. Ay katanya yangay anggan sat fatuluk fadugsay. ²² Ay ka fag fituk sisian nasugfunanan wa namangenan ka fag mangena. Ay fagayu sisian dua nafe unga, ay inkate wan. Ay bandi anggan ka fag mangena inkate wan. ²³ Ay go gina ban fagayu taw gdog yay gleleg, sinu ban at ke mangena. Anway fagfituk sisian namangenan wa sa anya. ²⁴ Ay Isus nalong sa ka fag ngay Taw-Saduseu te, Ay fagnasalanun at masuad te, di am nasaful Funbalugu At-Rirukan. Ay manga di am nasaful Funbalugu At fagmadaragangun. Go kin. ²⁵ Anway at ngay taw gina nadog gleleg, dua ban igdaduwa. Ay dua ban igfantaw sa at unga. Ginanya ban ka fag ngay taw kata yangay Funbalugu At ngay tagbukngan sas Banwa. ²⁶ Ay sa baliwas taw nu gdog yay gleleg. Go di am natap Ku-Unga At-Rirukan sa baliwas Funbalugu nu ge longan anya gina sa takalabe fag fun kayu. Sanya Funbalugu iglong sa Ku-Unga te, Aw wan Abrayam at Funbalugu. Ay Aw wan Kanya-At-Naasean at Funbalugu. Ay Aw wan Takamilug at Funbalugu. ²⁷ Ay dewa ka fag tuluk taw nkate wan ebi, kanya gdog yay gleleg. Anway Funbalugu bundi at matean fag taw at Funbalugu. Kanya At tagleleg tuwa fag taw at Funbalugu. Nasalan wam dawdaw. ²⁸ Ay Taw-Naseg at tagfasaful at sadi indasug sanya ay nadungug ka fag ngay taw nu garingangan. Ay kanya fag tagfasaful nasaful te, masine tuwa Isus At famalus. Ay kanya ginto sas Isus te, Inday Ku-Unga At-Longan at tiba tungud at matvngvd. ²⁹ Ay Isus nabalus anya te, Kata tuy at tiba tungud at matvngvd At-Longan te, Dungugani am at ngay Taw-Tagagbuan. Tam Fun tam Funbalugu, Kanya way fagsadi. ³⁰ Ay esugi am Fun am Funbalugu sas fagdaul am fakaumsigun. Ay sas fagdaul am amatanganan. Ay sas fagdaul am fagsafulun. Ay sas fagdaul am fagmadaragangun. ³¹ Ay sit daga tv fag Longan kata tuy te, Esugi am iba katvngvdi nu kesug o emu. Du e tibak Longan iglabi kanya fag duwa. ³² Ay ka fag tagfasaful nalong yangay sas Isus te, Em Takamoyung, gurungan matuyan ngaro Am longan te, sadi way Funbalugu, du e tiba, Kanya way fagsadi. ³³ Ay nu kesug wo tam Funbalugu sas fagdaul am fakaumsigun. Ay sas fagdaul am amatanganan. Ay sas fagdaul am fagmadaraganagun. Ay nu kesug wo am iba katvngvd nu kesug o emu. Kanya amasine yap sa at fagyagoun anyun ay anggan sa at nafilas fag anyun. ³⁴ Ay Isus nu nasaful te, mamatanganan tuwa ka fag tagfasaful at longan, Isus nalong sa anya te, Makbang wo nu gakafulun o sas Funbalugu-At-Fagmagurangan-Taw. Ay siginan ginanya du e taw ganangintoun sas Isus nus di sadik fagintoun. ³⁵ Ay Isus gina gfoyung sas Tagbvt-Fag-Bale-Funbalugu, nainto sa tiba te, Taw ro Taw-Naseg at ngay tagfasaful at fagnalongun te, sadi yay Fagtayukan ay fun Fakafanyuun at kadagdagan. ³⁶ Fun Fakafanyuun wan at taglong, ay At-Masine-Fag-Falad At nafaamatanganan anya te, Tam Fun nalong sa ku Fun te, Malunggungi sa Ku siun baliwa fag day tigyangan, Ay fatsa Akyay Am daga fagmadaragangun at tagfabarangian Emu. ³⁷ Taw ro fun Fakafanyuun fagnafangayanun Fagtayukan te, ku Fun. Ay nu fun Fakafanyuun way ngap at kadagdagan. Ay at ngay taw guseganan nu nadungug sas Isus At longan. ³⁸ Ay Isus igfoyung te, Tagaki siginans Taw-Naseg at ngay tagfasaful. Anway kanya gina nalo, kaumsig nu ngaba at lanbung. Ay nu glo sa tuwas bilug fulan te, laman at ngay taw at nafablang anya, igseg anya. ³⁹ Ay manga at fakaumsigun si tuwa tiba tungud fag faglunggungan nus nga nday nu ndasug fag bale fakafulan. Ay manga gina e yafun daul at fakaumsigun si tuwas fagunan fag faglunggungan. ⁴⁰ Ay manga kanya igfamin way burangday at fagagbilugun. Ay manga dewa gfalugo nu gdarangin, sik famalagan way. Umdasug way ban sa anya at matvngvd fag faurianan. ⁴¹ Ay Isus malunggung sas Tagvbvt-Fag-Bale-Funbalugu sis day fagsuadan famanyun. Ay gulit sat ngay taw nu nafon at salafi sat fagsuadan. Ay at mabalan fag ngay taw at nafon ngayu yangay. ⁴² Ay sik yud e kwa fag burangday indasug. Ay at nafon duwak salafi daga way. Bunya sik singku. ⁴³ Ay Isus nafakbang Anya At ngay tagadal ay nalong anya te, Matuyan iglong Ku ayu te, kanya at yud e kwa fag burangday at nafon, glabi yay sa tiba fagayu at nafon sas fagsuadan famanyun. ⁴⁴ Anway si tiba at nafon fag ngayuun at labi wan. Ay roro sanya fag burangday dewa yud ngayu at nafon, kayu wa niya fagdaul. Anggan wa at fasad famul at fakonun.

¹ Gina Isus nalaklo siginans Tagbvt-Fag-Bale-Funbalugu, At tagadal at sadi iglong Anya te, Em Takamoyung, linggati. Agbvt fag ngay batu at fangawat sas Tagbvt-Fag-Bale-Funbalugu. Ay masine dawdaw nin fag bale at ngay afud. ² Ay Isus iglong sa anya te, Nalag wo ngaro isna fag ngay afud. Roro dua ban e batu magamut, nus di duwa. Fagayu e fatong wa sas daga. ³ Ay gina Isus malunggung sas Muyud-Tagakayuun-Ulibu, sas day Tagbvt-Fag-Bale-Funbalugu, Takata-Sik-Batu ay Santiagu ay Uan ay anggan Butuan nangakbang sa Anya. Ay nanginto sas Isus sat dayu te, ⁴ Foyungi emi te, seduge ban nu msure aro Am ngay nafoyung emi. Ay tain ban em faglagan, nu sumaful ami te, insure wan. ⁵ Ay Isus nabalus anya te, Tagaki siginan at ngay tagfanluk. Laman di ban am malukan. ⁶ Anway ngayu yay bank taw at kumdasug yangay kata Angku te, Aw wan Fagtayukan. Ay roro kanya at ngay tagfanluk way sat ngay taw. ⁷ Ay dewa ban am e dungganan te, E gbarangian wa sasa ngay talun. Ay dewa ban am e dungganan te, Nu ndain e gbarangian yangay sat dayu. Lag kalimu. Dewa ban katanya, bunya ginanya at fakatabuan fag ngay menit. ⁸ Anway tibak talun ban at ngay taw at fagfabarangianun tibak talun yangay daw at ngay taw. Ay sik fun at ngay taw gfabarangian yangay ban sa sik fun at ngay taw. Ay sa ban tibak talun guwigan ban dawdaw tam daga. Ay sa tibak talun at taw kalunus ban dawdaw. Kayu niya at fagsigadan yay at faurianan. Kata sik mangena nu gafalangfeun at ngenge ay galuwat yay ayu daw. ⁹ Tagaki ay fatvngvdi ay amatanganan. Anway e yumugfu ban ayu ay mon ban ayu sa ay talun at ngay magurang. Ay e malang ban ayu sas Taw-Naseg at ngay bale fakafulan. Ay anway kafandiug way am sa Angku, e tumaban ban ayu sa at ngay fun sirut ay sa at ngay fun daul at akbang. Ay ginanya wan at fasakan wa te, laman moyung ban am at matuyan fag longan sanya fag ngay fun. ¹⁰ Ay taguna e nafoyung wan at Masine-Fag-Barita sas fagayu talun at ngay taw, bagu umdasug at fakatabuan. ¹¹ Ay dewa ban e nataban ayu ay e nanginto ayu, lag am gafanawa te, tain ro siring ku longan. Longi nus nge wain at nafoyung ayu sa ay amatanganan ginanya. Anway bunwa am tage longan. At-Masine-Wa-Fag-Falad tage longan. ¹² Ay ginanya ban, sik fadugsay tumaban ban at fadugsay sa tiba, laman e fate anya. Ay sik ama tumaban way sigad at unga sa tiba, laman e fate anya. Ay sik ngay sisian kadotama ban sa at mangaguyang ay igfafate anya. ¹³ Ay fagayu taw umdotama wa ayu, anway kafandiug way am sa Angku. Ay nus nga sinu fag taw nu gsungatan tuwa gbaris anggan sat fakatabuan, umbalabag ban. ¹⁴ Ay lumag wa ban am at Mafurat-Tagfarasras nu e nafalindug anya sit yud matuyan fag faglindugan. (At natap, asafuli tuwa at masuad). Ginanya ban, fagayu taw tagsis talun Naseg, lagyui yap sas muyud. ¹⁵ Ay sik taw nut si was tungud ugun bale, lag nansakbo sa at basad bale laman nanbul at ngay nanuranan sanya. ¹⁶ Ay sik taw nut si wa at gamasun, lag nanguli sa at bale laman nanbul at nasandig fag lanbung sanya. ¹⁷ Ay mafanyu ban dawdaw tagbuba ay tagfasusu ginanya fag ngay menit. ¹⁸ Ay darangini tuwa te, laman nu glagyu am fag buknga bundi gina sis abagat. ¹⁹ Anway ginanya ban at mason wa ban dawdaw fag ngay faurianan. Glabi yay ban fiya fiya ebi ginan fag ngay faurianan, siginan oma ebi Funbalugu nu naawat tam fagdaul daga, ay anggan katsi. Ay bandi ban dua gdog takatvngvd anya. ²⁰ Ay tam Fun nu dua fafungkuk at faurianan fag ngay menit, fagayu tagleleg du e sawad nus di sadi. Ay roro muag. Tam Fun mafafafungkuk way daw ka fag ngay menit. Laman At ngay filian fag taw e fanamabagun tuwa. ²¹ Ay ginanya dewa e nafoyung ayu te, Iste wan tam Fagtayukan. Ay dewa e nalong te, Sanya wan. Lag gafanud. ²² Anway umsure wa ban ayuwayu ginanya at yud matuyan fag fagtayukan, ay at yud matuyan fag ngay taglong. Ay kanya ban gfasure at ke masuad fag fagbulun ay at madaragang fag fagbulun. Laman nanfaliaman Funbalugu At ngay filian fag taw. Ay igdi, di gfaliam. ²³ Ay tagaki tuwa. Iguna Akwa igfoyung sa ayu at kumdasug ban. ²⁴ Gina ban umlangfe ka fag faurianan daul, tam menit umlayung ban. Ay tam magdanun sigon dua gdamlag. ²⁵ Ay manga at galeme e mtong wa siginans banwa. Ay fagayu at ke fagmadaragangun sis banwa muwigan wa ban dawdaw. ²⁶ Ay rodi at ngay taw lumag wa Angku, Taw-At-Baguama, nu kadasug Aw gasfuan sik linyabu. Ay e fagmadaragangun Aw, ay anggan e fagmasineun Aw dawdaw. ²⁷ Ay rodi sumugu Akwa Ku ngay tagbukngan. Laman kanya nanfaful wa Ku filian fag ngay taw siginans fagdaul daga, nus nga ndaginan baliwa fag fungfung daga. ²⁸ Amatangani at fafaskudanan sa sik alibas. At don nu karabas wan, ay at sanga nu malumak yay, nasaful wam te, gakamanguneun wan. ²⁹ Katanya yangay ban nu lumag am Ku longan nu kagurungan. Nasaful yangay am te, gadasugun wa fiya at nafamasadan fagayu. ³⁰ Ay matuyan iglong Aw sa ayu te, Katsi fag ngay taw dia mkate taguna, yap ngay umgurungan fagayu Ku longan. ³¹ Tam banwa ay tam daga maliam yay ban. Ay roro Ku ngay longan fagayu dua ban maliam faggugat. ³² Du e taw gsaful te, Go ginain ban fag menit, ay seduge ban fiya fiya fag lungud menit nu msure. Ay anggan at ngay tagbukngan sigon sas Banwa dia nasaful. Ay anggan Aw oma, At-Baguama, Kia nasaful. Ay roro mangaro Ku Mama way sesadi at nasaful. ³³ Tagaki. Ay mafamasadani. Anway du am nasaful te, ginanya ban fag buknga nu msure. ³⁴ Kata sik taw nu galoun ngayayu. Ay bagu lumo, nanfon yay at ngay fagmadaragangun sa At ngay fanuguan. Ay nananfafudan at ngay fagbulun sa at ngay fanuguan. Ay anggan nasugu yangay sa at tagtanud sakbawan bale laman igtanud wa fiya. ³⁵ Ay anggan am. Matagakani faggugat. Anway du am nasaful te, ginanya ban tagbilug bale nu guli. Nu ndain kayabi wan. Ay nu ndain swa bilug yabi. Ay nu ndain sdaga kamenit. Ay nu ndain sbalabag wan. ³⁶ Tagaki. Laman dewa mafali nu kadasug, manlag di, di am gtiug. ³⁷ Iglong Aw sa ayu ay anggan sas fagayu taw te, Matagakani.

¹ Duwa yak menit bagu umdasug at fagamatanganun fag ngay menit at ngayan te, Famalangfe. Ay anggan at tagbiya fag yafun at ngayan te, Tinafay-At-Yud-E-Famabaga. Ay Taw-Naseg at ngay taganyun daul ay at ngay tagfasaful gasarapan te, tain ban nu msuksuk laman fayugfu tam ka fag Isus ay fatei. ² Ay igsulitanan te, Agi yap gina e Famalangfe fag ngay menit. Laman at maful sanya fag ngay taw di ban maringangan ginanya. ³ Ay Isus sas fulan At-Yud-E-Kwa, sa sik tagabangbang at bale, at ngayan Nadungug. Ay gina Isus malunggung sis fagfangonan, sik mangena ndasug e ba fagsuadan fangawat batu. Ka fag batu at ngayan te, alabastru. At masuad sanya sik lumad bebanglu, at ngayan nardu. Ay ngayu dawdaw kanya nu kasali. Ay ka fag mangena nalifung at fagsuadan. Ay nabusbus ka fag lumad fagdaul sas Isus alfuyu. ⁴ At tibak taw tagulit sanya kadotama, ay gsulitanan sit dayu te, Taw ro fagfangulananun lumad. ⁵ Ay nu nafesali di ngap ro tam ka fag lumad, tam nafabul glabi yay 300k menit sik taw at nalufuyan. Ay manga mafafon yay tam sa at yud e kwa. Ay tiba gfangabaya sa ka fag mangena. ⁶ Ay Isus nalong anya te, Lag gsalag anya. Taw ro ay fagfangabayaun sa anya. Anway masine tuwa dawdaw ka fag mangena at fagbulun sa Angku. ⁷ Anway faggugat e taw way at yud e kwa si ayu. Ay nus nga ginain nu kaumsig am, mafatarabang am anya. Ay roro Aw nu ste Aw si ayu da Kwa faggugat. ⁸ Ka fag mangena nabul wan katvngvd at fagmafabulun. At fagnabusbusun sa Ku bilug ka fag lumad, at masuad te, laman gfasine Ku bilug siginan ngay katsi, anway e sumandig ban Angku. ⁹ Ay matuyan iglong Aw sa ayu te, Nus nga nday ban nu e moyung at Masine-Fag-Barita sas fagdaul daga, igfoyung yangay ban ka fag mangena at fagbulun. Laman sik fagamatanganun sa kanya fag mangena. ¹⁰ Kaduge niya, Segi, siginans fulan Ufat-Fulan-Sirut, dewa kanya at sadi At Labi-Duwa, nanangakbang sas Taw-Naseg at ngay taganyun daul, laman namoyung ban Isus sa anya. ¹¹ Ay at ngay taganyun daul kaumsig gdungug. Ay e famasegan Segi te laman nanfon ban anya sik ngay salafi. Ay Segi gsarap wa long sik masine fag menit laman namoyung ban Isus sa anya. ¹² Sas fasadik menit sas tagbiya fag fakonun at ngayan te, Tinafay-At-Yud-E-Famabaga. Ay nu nafate wa at Famalangfe fag tupa riangan. Isus At ngay tagadal ginto sas Isus te, Dada ro Am fakaumsigun nu kamasadan ro ami. Laman Am fagnangonan ro at Famalangfe fag yafun. ¹³ Ay Isus nasugu At tagadal at duwa, ay nalong anya te, Loi wa sas fulan daul. Ay sanya gfablang ro am sik ama tagubanan sik baringan safa. Aloi yangay anya. ¹⁴ Ay nus nga nday fag bale ka fag ama nu gsakbo, intoi tuwa sa tagbilug bale te, Tam Takamoyung ginto sa emu te, dada unu manga ro fag salug nu gfangon Aw at Famalangfe fag yafun ay anggan Ku ngay tagadal. ¹⁵ Ay kanya moyung ro sa ayu sa tagbiya fag salug sat tungud sat ke nesugan. Sanya at nafamasadan sa ayu. Ay sanyai nu kamasadan am tam yafun. ¹⁶ Ay ka fag duwak tagadal nalo wan ay ndasug sas fulan daul. Ay at nalag kata wa fiya aro taw Isus longan sa anya. Ay sanya wa fiya nu gfamasadan at Famalangfe fag yafun. ¹⁷ Ay nu nyabi wan Isus indasug, ay anggan At Labi-Duwa. ¹⁸ Ay gina fagayu gfangon sis fagfangonan, Isus iglong wa te, Matuyan iglong Aw sa ayu te, Am waro at sadi at moyung ro Angku sas mauri fag taw. Ay kanya wa at sadi tagfasfuan Angku kon katsi. ¹⁹ Ay At ngay tagadal nu nadungug, igfasigad wa kabalu. Ay igsadsadian wa ginto sas Isus te, Go aw wan. ²⁰ Ay Isus igbalus te, Am wa fiya fag Labi-Duwa at sadi. Laman kanya tagfasfuan Angku tagfasurung at fafa sa sadik taya. ²¹ Anway Aw, Taw-At-Baguama, Ku faglumoun ro sanya laman umgurungan At-Rirukan. Ay roro e nanfauri way ban ay, sa at namoyung Angku sas mauri fag taw. Ay saturo amasine yap ka fag taw nu gdi nangus inlangfe. ²² Ay gina Isus ay At ngay tagadal gfangon, Isus nabul yangay fiya sik fafa. Ay nauseganan sas Funbalugu. Ay nafanramyukan ay nafon sa At ngay tagadal. Ay nalong anya te, Na. Buli. Tuy Ku bilug wan. ²³ Ay Isus nabul yangay sik taya e uwat buadan safa. Ay nauseganan yangay sas Funbalugu. Ay nafon sa At ngay tagadal. Ay fagayu nainum sanya ginan. ²⁴ Ay Isus nalong anya te, Tuy Ku taguk. At famatuyan sas Funbalugu At fatuyanan sa At ngay taw. Anway e musbus ro Ku taguk laman ngayuk taw e fanambagun. ²⁵ Matuyan iglong Aw sa ayu te, Katsi Kua ban gdog ginum uwat buadan safa. Nu gdog Kyay ban ginum sa was Funbalugu-At-@Fagmagurangan-Taw. ²⁶ Ay Isus ay At ngay tagadal nu nadanyu wa sik danyu, nalo wa sas Muyud-Tagakayuun-Ulibu. ²⁷ Ay Isus iglong sa At ngay tagadal te, Fagayu am mubun waro am Angku. Anway At-Rirukan nalong wa te, Fate Akban at Tagtanud, Ay at ngay tupa sumaruwayan ban. ²⁸ Ay gina ban Aw gdog gleleg, gumuna Akyay ban ayu sas talun Balulangan. ²⁹ Ay Takata-Sik-Batu nalong sas Isus te, Dewa ku iba fagayu umyayu Emu, aw da kwaro umyayu Emu. ³⁰ Ay Isus nalong anya te, Matuyan iglong Aw emu te, Katsi ro fag yabi, bagu e tumarakit duwa ginan, mamayud yangay ro o Angku at fatulu ginan. ³¹ Ay Takata-Sik-Batu matvngvd nu glong te, Dewa aw umkate fasfuan Emu, da kwa ro mamayud Emu. Ay kata yay at sadi fagayu At tagadal at longan. ³² Ay Isus ay At ngay tagadal nalo wa sa sik nagabian at ngayan Faglafian-Buadan. Ay Kanya nalong sa At ngay tagadal te, Am, malunggungi yap iste. Aw nandarangin Akyay snay am dayu. ³³ Ay Isus nataban wa Takata-Sik-Batu ay Santiagu ay anggan Uan. Ay Isus gfasigad wa matvngvd dawdaw nu kabalu ay gatakan. ³⁴ Ay Isus nalong sa At ufud fagtulu te, Matvngvd wa dawdaw nu kabalu Aw katsi. Kata wa nu nkate Aw sas kabalu. Ay am stei way. Ay mafuluani way kata Angku. ³⁵ Ay Isus inyayu yay sirut. Ay garungan sas daga. Ay igdarangin laman nu masine tuwa sa At Tama, falangfe yay tagadasugun ban sa Anya. ³⁶ At longan te, Ku Mama. Mafabul O fagayu nus nge wain. Falangfei yap Angku ka fag taya at ke mauri ro sa Angku. Ay roro lag gfaning Ku fakaumsigun. Fadasugi way Emu Am fakaumsigun. ³⁷ Ay Isus gdog yangay kakbang sa At tuluk tagadal. Ay manlag di gtiug way. Ay Isus iglong sas Takata-Sik-Batu te, Simun. Go gtiug way mangaro o. Go kin. Ay nalong sanya fag tuluk tagadal te, Go dua am mafuluan kata Angku kaduge oma sik kadugayun. ³⁸ Tagaki ay darangini way. Laman di am kaumsig gananfaskudun sas asalanan. Ay nu tengap, kaumsig tuwam sat masine. Ay nus nga ay bilug mafanalo way. ³⁹ Ay Isus gdog yay fiya nalo sat dayu ay igdarangin yay fiya. Ay At longan kata yangay fiya aro taw. ⁴⁰ Ay Isus gdog yangay inkakbang sa At tuluk tagadal at faduwa ginan. Ay manlag di gtiug way, teway gaymataun way gugat. Ay At tagadal dua gsaful at famalus at masine. ⁴¹ Ay katanya yangay at fatulu ginan. Ay Isus nu gdog yay fiya inkakbang sa At tuluk tagadal, nalong anya te, Go anggan katsi gtiug way am. Ay go ate gfafiyan yay am ay lufuy. Go kin. Sak wan nu gtiug am. Katsi wan gadasugun wa dawdaw at namoyung ro Angku, Taw-At-Baguama, sat ngay tagasalanan. ⁴² Afuloi wan. Alindugi wan. Bastam wan. Linggati. At namoyung Angku gadasugun wan. ⁴³ Ay gina Isus ge longan, rodi tv indasug wa daw Segi, at sadi At Labi-Duwa. Ay at ufud sik ngay taw e fiso ay e famalang. Ay kanya fag ngay taw Taw-Naseg at ngay taganyun daul ay at ngay tagfasaful ay anggan at ngay magurang at suguan. ⁴⁴ Ay at namoyung Isus nafatuyanan aro taw sas Taw-Naseg at ngay magurang te, Nus nga sinu ro ku naayuk fag Taw At fingi, Kanya wan. Tedi wa Anya ay tabani. Ay lag gfalfas. ⁴⁵ Ay Segi nu ndasug, rodi tv nangakbang sas Isus ay nalong te, Ku Takamoyung. Ay naayuk Isus At fingi. ⁴⁶ Ay at ngay taw nated wa daw Isus ay dua gfalfas. ⁴⁷ At rodi sik taw siginan at dayu naguyud at fiso. Ay nabasing at Taguna-Fag-Taganyun-Daul at fanuguan, ay naayas at talinga at sadi. ⁴⁸ Ay Isus nainto sanya fag ngay taw te, Go gubanan am ay ngay fiso ay ay ngay famalang, anway ay fasadan laman nansungsung am Angku kata sik takamul. ⁴⁹ Ay madyay kayu menit kayu menit gufud Akway ayu sas Tagbvt-Fag-Bale-Funbalugu, anway igfoyung Aw ayu. Ay madyay du am nated Angku ginanya. Ay dewa katanya, katsi umgurungan wa fiya At-Rirukan. ⁵⁰ Ay rodi fagayu Isus At ngay tagadal naubun wa Isus ay nalagyu wan. ⁵¹ Ay sik baguama way tagguyan Isus. Ay gamakan way fag sadi sik falefe malagsi. Ay at tiba nated ka fag baguama at amak. ⁵² Ay ka fag baguama naubun wan at amak, ay nalagyu wan, du e fangubaun. ⁵³ Ay at ngay taw aro at nated Isus, nataban wa Anya sa at Taguna-Fag-Taganyun-Daul. Ay fagayu Taw-Naseg at taganyun daul, ay at ngay magurang, ay anggan at ngay tagfasaful inful sanya. ⁵⁴ Ay Takata-Sik-Batu ngayayu yay nu gaguyanan Isus. Ay indasug sas Taguna-Fag-Taganyun-Daul at faglanuan. Ay malunggung way sanya maful at ngay tagbarangian. Ay anggan gfangenbung sas afuy. ⁵⁵ Ay Taw-Naseg at ngay taganyun daul ay anggan at ngay magurang inful laman faggugat igsarap te, Go ro e foyungan sas Isus At fagbulun sak tam nanfate Anya. Ay roro du e nalag. ⁵⁶ Madyay dewa ngayu tagfoyung kamuagan way sas Isus At fagbulun. Ay dua gdiuganan. ⁵⁷ Ay roro tiba at malindug sanya nu nafoyung kamuagan te, ⁵⁸ Ebi nadungug wami tuy wa fiya fag Taw at nafoyung te, Farasras Aw ban tuy fag Tagbvt-Fag-Bale-Funbalugu, taw way at naawat. Ay nu mlangfe wa tuluk menit, gdog Kyangay ban kawat ay gfatabu Kwan. Ay bunwa taw at naawat. ⁵⁹ Ay dewa katanya tiba at foyungan, dua gdiuganan fiya fiya at longan. ⁶⁰ Ay Taguna-Fag-Taganyun-Daul inlindug siswa taw ay ginto sas Isus te, Go taw Am fagyudun gbalus. Madyay tuy fag ngay taw e foyungan way siginan Emu baliwa. ⁶¹ Ay Isus maragangan way dua gbalus. Ay Taguna-Fag-Taganyun-Daul gdog yay ginto sas Isus te, Go O wan Fagtayukan. Go yaya. Go O wan at Tiba-Tungud-@Fag-Fagsegan At Baguama. Go yaya. ⁶² Ay Isus bagu nabalus te, Kin, Aw wan. Ay lumag ban am Angku, Taw-At-Baguama, nu malunggung Aw sa At-@Madaragang At siun baliwa fag day tigyangan. Ay bandi umdasug Akyay stiye gasfuan sik linyabu sas kiwang. ⁶³ Ay Taguna-Fag-Taganyun-Daul nagirat at lanbung mandi ay nalong sa at ngay ufud te, Katsi dewa yud e gfoyung yangay Isus At asalanan. ⁶⁴ Anway nadungug watam te, mauri wa fiya At longan sas Funbalugu baliwa. Setain ay fasadan sa Anya. Ay fagayu taw nadiuganan wa te, Insak wan, sak wa long e gfate Anya. ⁶⁵ Ay tiba nafantufean sas Isus. Ay nu natabun wa At mata, nafalang Anya, ay nalong te, Foyungi wemi katsi te, sinu at nafalang Emu. Ay anggan at ngay tagbarangian nu nataban wa Anya, nafalang Anya dawdaw. ⁶⁶ Ay ginanya Takata-Sik-Batu sisad faglanuan. Ay sik baguina fag fanuguan, indasug. ⁶⁷ Ay ka fag baguina nu nalag Takata-Sik-Batu gina gfangenbung, nafatuyanun anya ay iglong te, O wa fiya aro ginan at sadi at tagufud Isus, sik Taw siginans Nasaret. ⁶⁸ Ay Takata-Sik-Batu kamayud te, Yaya long. Kwa gsaful kanya am longan at masuad. Ay Takata-Sik-Batu nalo yay siginan sad faglanuan. Ay si yay sad sakbawan alad. ⁶⁹ Ay ka fag baguina nalag yay fiya anya. Ay gdog yay nalong sat ngay malindug sanya te, Kanya wa fiya fag taw at sadi At ufud. ⁷⁰ Ay Takata-Sik-Batu gdog yay fiya kamayud. Ay rodi at ngay malindug sanya iglong sas Takata-Sik-Batu te, At matuyan, o wa fiya ebi ginan at sadi At ufud. Madyay o sik Taw-Balulangan way o. ⁷¹ Ay Takata-Sik-Batu amatvngvd yap aro taw nu glong te, Dewa ro ndasug sa angku at mauri nu dway matuyan ku longan te, Aw da kua gsaful Kanya fag taw aro am longan. ⁷² Ay ginanya at tabag natarakit wa fiya at faduwa ginan. Ay Takata-Sik-Batu bagu namatang aro taw Isus At longan sa anya te, Tulu ginan nu kamayud o Angku gina bagu sik tabag tumarakit duwa ginan. Ay Takata-Sik-Batu bagu namatang, ay guyway dawdaw.

¹ Gina sbalabag sirut, Taw-Naseg at ngay taganyun daul ay sik ngay magurang, ay at ngay tagfasaful, ay anggan fagdaul Taw-Naseg-At-Ngay-Magurang inful ay igsulitanan. Ay rodi kanya nasalod Isus At take, ay nantaban sas fun At-Ke-Bangko at akbang. ² Ay fun At-Ke-Bangko nainto sas Isus te, Go O wan Taw-Naseg at Fun. Ay Isus nabalus anya te, Kin. Kata wa ngaro fiya am longan. ³ Ay Taw-Naseg at ngay taganyun daul matvngvd nu nafoyung nafamuagan Isus At ngay asalanan. ⁴ Ay fun At-Ke-Bangko gdog yay nainto sas Isus te, Tain Am famalus. Anway ngayu wa unu fiya Am asalanan. ⁵ Ay Isus dua gbalus. Ay At-Ke-Bangko gamatangan daw te, taw katanya. ⁶ Kaduge e Famalangfe fag yafun daul fag buknga, fun At-Ke-Bangko at ugali faggugat, igfalfas yay at sadi at kinsungsung. Nus nga sinu at sadi at ngay taw at fasadan. ⁷ Ay ginanya ngayu at masungsungan at tagfate taw teway gfabarangian sat fun daul. Ay sadi at ngayan, Sik-Takamoyung-Baguama. ⁸ Ay at ngay taw nangakbang sas fun At-ke-Bangko ay nanget, laman at fun at fagbulun nanfaning tuwa kata ebia taw at ugali. ⁹ Ay At-Ke-Bangko nainto sa ka fag ngay taw te, Go kaumsig am nu gfalfas ban aw sa ayu Taw-Naseg at Fun. ¹⁰ Anway At-ke-Bangko nasaful wa te, Taw-Naseg at ngay taganyun daul at fagnantabanun Isus sa anya, anway te galabian Isus. ¹¹ Ay roro Taw-Naseg at ngay taganyun daul matvngvd nu gatul sa at ngay taw. Laman nanget dawdaw sa At-Ke-Bangko laman nanfalfas Sik-Takamoyung-Baguama ay nafaungbus Isus. ¹² Ay At-Ke-Bangko gdog yay nainto sat ngay taw te, Setain ro ku fagbulun sanya fag taw, ay nafangayan te, Taw-Naseg at Fun. ¹³ Ay at ngay taw nafanguruan dawdaw te, Kanya, tuktuki wa sas salibagan kayu. ¹⁴ Ay At-Ke-Bangko ginto te, Taw ro at masuad ku fagnantuktukun Isus. Nataw sangay At asalanan. Dewa katanya at longan, at ngay taw glabi yay aro taw nu guro te, Tuktuki wa Anya sas salibagan kayu. ¹⁵ Ay At-Ke-Bangko at fagnafalfasun Sik-Takamoyung Baguama laman gfalukmianan sat ngay taw. Ay nu nafafusfus wa dawdaw Isus, rodi nanfataban wa Anya. Laman nanfatuktuk wa Anya sas salibagan kayu. ¹⁶ Ay at ngay tagbarangian nafasakbo Isus sat fun basad bale daul. (At bale at ngayan Preturyu.) Ay e nafasakbo yangay tibak tagbarangian sanya. ¹⁷ Ay ka fag ngay tagbarangian nafasulun sas Isus sik lanbung maloban. Ay nabugyas sik sangbo madugi ay nafasangboan sas Isus At alfuyu. ¹⁸ Ay kanya igfanlamangan gseg sas Isus te, Masine O, Taw-Naseg at Fun. ¹⁹ At famusfus sik anyamu sas Isus At alfuyu. Ay natufe Anya. Ay natudan sas Isus At akbang kata nu gseg Anya. ²⁰ Ay nu ntabu wa nu gfanlamangan sas Isus, at ngay tagbarangian nabul at lanbung maloban. Ay nafasulun aro taw at lanbung. Ay rodi nataban wa long Isus, laman nantuktuk sas salibagan kayu. ²¹ Ay gina sis dalan at ngay tagbarangian nalag Nadungug, sik taw signans fulan Sirene, nu glo siginans gamasun. Kanya at baguama at ngayan te, Tagdingding-Taw ay At-Mararay-Fag-Taw. Ay at ngay tagbarangian nafaubanan way sigad Isus At salibangan kayu sas Nadungug. ²² Ay at ngay tagbarangian nataban Isus sa sik talun at ngayan Gulguta. (At masuad te, Talun-Butul-Alfuyu.) ²³ Ay e nafon sas Isus sik uwat buadan safa nafagamutan sik lune fili. Ay Isus dua nabul. ²⁴ Ay at ngay tagbarangian natuktuk Isus sas salibagan kayu. Ay rodi naafudan wa Isus At ngay lanbung, gina ntabu nu gfagsafulan te, dada ro sik afud. ²⁵ Ay sbalabag gina manalangtang nu gtuktuk Isus sas salibagan kayu. ²⁶ Ay e sik rirukan sik fagsafulan Isus At asalanan sis Isus tungud te, TAW-NASEG AT FUN. ²⁷ Ay ginanya e natuktuk ya duwak takamul gsumbalian Isus. ²⁹ Ay kayu at nadalan sanya nu glinggat sas Isus, igfabalitang way at mata, igfalingun sas Isus te, E. Sangay O ban mafarasras O at Tagbvt-Fag-Bale-Funbalugu. Ay gdog yay O mafatabu nu kawat O dewa tuluk menit. ³⁰ Katsi balabagi Am balyu. Alfasi nu kin siginans salibagan kayu. ³¹ Ay anggan Taw-Naseg at ngay taganyun daul ay at ngay tagfasaful glodlongan igfalingun sas Isus te, Kanya mafabalabag tuwa nu tiba tuwak taw. Ay roro ngap dua mafabalabag At balyu. ³² Ay Kanya laman nu Fagtayukan tuwa, ay nu Taw-Naseg tuwa at Fun, alfasi nu kin siginans salibagan kayu. Ay nu malfas di ro, ay nu nalag di ami, kin, bagu yay ami gafanud. Ay anggan at natuktuk fag duwama tagsumbalian Anya, gfalingun yay sas Isus. ³³ Ay gina maturuk at menit, inkarum wa daw sas fagdaul sanya fag talun, anggan at menit inbalitang. ³⁴ Ay nu inbalitang wan, Isus nauro yay dawdaw te, Elui, Elui. Lama sabaktani. At masuad te, Ku Funbalugu, Ku Funbalugu. Taw ro Am fagnaubunun Angku. ³⁵ Ay at ngay taw tagsanya nu nadungug At longan, nalong te, Dungugani. Kanya guro yay ebi ebi fag taglong at ngayan te, Funbalugu-Tam-Taw-Yabi-At-Masine. ³⁶ Ay rodi sadik taw nalo mafali ay gfasurung sik fanrarus sas uwat buadan safa mayat. Ay natugdan sa sik anyamu laman nanfasupsup sas Isus. Ay ka fag ama nalong sa tiba te, Toi yap. Gfanya yay tam te, go ro Funbalugu-Tam-Taw-Yabi-At-Masine umdasug yay ro ay, nanfalfas yay manga Anya. ³⁷ Ay gbiya Isus nu guro ay nu gengasan taguyan. ³⁸ Ay at Famalabag-Fag-Sinyag sas Tagbvt-Fag-Bale-Funbalugu ingirat wan, siginan at tungud anggan wa sat daga. ³⁹ Ay at fun tagbarangian at malindug sis alungudan Isus. Ay nu nalag wa Isus nu gengasan taguyan, kanya nalong te, Matuyan Tuy wa fiya Funbalugu-At-Baguama. ⁴⁰ Ay sanya yangay sik ngay mangena ngayayu sirut nu gbantay. Kata tuy at ngay ngayan tiba. At sadi, Taglu sik mangena siginans fulan At-Ke-Bale-Ngabat. Ay anggan e sadi yak Taglu, Santiagu-At-Alay ay At-Fakafamutan at tina. Ay anggan sadi at ngayan te, Mabayan. ⁴¹ Ay kanya fag ngay mangena ebi ginan wa tagalo ay tagfalu Isus gina sas talun Balulangan. Ay e tiba yay at mangena sanya, ebi at kindasug sas Erusalem tagfaygaluan Isus. ⁴² Ay ginanya fag menit Nu-Kamasadan-Fag-Menit. At masuad te, at fadogan fag menit sik Fakamatoun-Menit. Ay nu kayabi wan. ⁴³ Ay sik taw siginans fulan Maabat, at ngayan At-Fakafamutan, namalimuanan yay nangakbang sas fun At-Ke-Bangko. Ay get sa anya Isus At bilug. Kanya At-Fakafamutan wa at Ngay-@Magurang at sadi, ay e gseg anya. Ay anggan kanya wan at nafanya Funbalugu-Nu-Gmagurang-Taw. ⁴⁴ Ay fun At-Ke-Bangko gamatangan te, ay ate ro manga Isus nkate wan. Ay go idia. Ay anway dua nasaful, At-Ke-Bangko iggewan yay sik fun tagbarangian laman nanginto ro anya te, go Isus inkate wan, ay go idia. ⁴⁵ Ay ka fag fun tagbarangian nananfoyung yay sas fun At-Ke-Bangko te, Isus nkate wan. Ay anway katanya, fun At-Ke-Bangko nasugu laman At-Fakafamutan nanbul waro Isus At bilug. ⁴⁶ Ay ebia taw At-Fakafamutan nasali sik tagbiya fag sinyag malagsi. Ay nu nafadaga wa Isus At bilug, nasifig At bilug sanya fag sinyag. Ay anggan nasandig At bilug sa sik fagsandigan fag luib, sa ebi at nafaali sasad batu. Ay At-Fakafamutan nafafulid sasad sakbawan sik batu daul at fandingding at sakbawan luib. ⁴⁷ Ay Taglu tagsiginans fulan At-Ke-Bale-Ngabat, ay sadi yak Taglu, At-Fakafamutan at tina, nalag at fagsandigan Isus.

¹ Nu nalangfe wa at Fakamatoun-Menit, Taglu tagsiginans fulan At-Ke-Bale-Ngabat, ay Mabayan, ay anggan Taglu, Santiagu tina, nasali sik ngay bebanglu. Laman gina sbalabag, nanfatayuk yay sas Isus At bilug. ² Ay gina sbalabag sirut sas taguna fag menit sis fafitu, nu bagu insure at menit, ka fag ngay ina nalo sanya fag fagsandigan fag luib. ³ Ay ka fag ngay ina gina glo igsulitanan te, Sinu ro tagfalu antam gligang at batu daul siginans sakbawan luib. ⁴ Ay rodi nu nabantay, manlag di maligangan wa gugat at fandingding sakbawan fag batu, dewa biya daul. ⁵ Ay ka fag ngay ina nu nasakbo sanya sad fagsandigan fag luib, manlag di sanya sik baguama malunggung sas siun baliwa. Ay malaksi ay ngaba at lanbung. Ay ka fag ngay mangena gadulawan daw. ⁶ Ay ka fag baguama nalong sanya fag ngay ina te, Lag gadulawan. Nasaful aw te, gasarapan wam Isus, sik Taw-Nasaret, ebi At natuktuk sas salibagan kayu. Ay roro Kanya dua ste, anway Kanya gdog yay gleleg. Bali wan linggati wan ebi At fagfatungkudan Anya. ⁷ Ay loi wan laman foyungi sas Isus At ngay tagadal anggan sas Takata-Sik-Batu te, Isus gumuna wa ayu sas talun Balulangan. Sanya wan nu glag am Anya, gfaning ebia taw At longan sa ayu. ⁸ Ay ka fag ngay ina nalaklo siginan sad fagsandigan ay nalagyu wa fiya. Teway kudkulugan ay gfalinggatun yay. Ay dua mafafoyung at nalag sa oma sadik taw, teway kalimu yayay. ⁹ Isus gdog yay gleleg gina sad surip sas taguna fag menit sis fafitu. Ay Kanya insure taguna sas Taglu, sik ina siginans fulan At-Ke-Bale-Ngabat. Ebi Taglu at ke fituk mafurat fag falad ay Isus naayiyan. ¹⁰ Ay rodi Taglu nu nalag Isus, nalo wan laman nanfoyung sa ebia taw Isus At ngay ufud. Anway At ngay ufud kabalu dawdaw ay guyway. ¹¹ Ay dewa at tiba nadungug at longan, dua gafanud sas Taglu at longan te, Isus gdog yay gleleg ay nalag wa Anya. ¹² Ay bandi, Isus insure yay sa ebia taw At ufud at duwa, kaduge glo sasa ngaba dalan. Ay Isus At mata inbali wan, dua kata ebia taw. ¹³ Ay ka fag duwama noli wan ay nafoyung wa sa at tiba. Ay at tiba dua gafanud at longan. ¹⁴ Ay bandi tv Isus insure yay sa At tagadal At Labi-Sadi, gina gfangon. Ay Kanya gbaya Sa At Labi-Sadi, teway dua gafanud. Ay manga at katvngvdan wa nu gafayudun. Dewa at tiba nalag ay nafoyung te, Isus gdog yay gleleg. ¹⁵ Ay Isus nasugu sa At ngay tagadal te, Fagdaul fagdaul daga loi wan. Ay foyungi at Masine-Fag-Barita sas fagayu taw. ¹⁶ Sik taw nu kafandiug tuwa ay nu nsurung, umbalabag ban. Ay sik taw nu dway kafandiug, at fakadasugan ban sa ways faurianan. ¹⁷ Ay kata tuy at ngay takafandiug at ngay ke masuad fag fagbulun. Sa Ku fagmadaragangun kanya mafaayiyan ban at ngay mafurat fag falad. Ay mafalong ban sat bagu fag fanlongan. ¹⁸ Ay dewa ban nated at ngay ubianun. Ay dewa ban nainum sik fangkate, di mauri sat bilug. Ay nu nafatayuk ban at daluap sat ke dailan, infiya wan. ¹⁹ Tam Fun Isus nu ntabu wa nu gfoyung sa At ngay tagadal, e naurug wa Anya sas Banwa. Ay nanmalunggung wa sanya sas Funbalugu At siun baliwa fag day tigyangan. ²⁰ Ay At ngay tagadal nalo wan ay nanfoyung wa at Masine-Fag-Barita sas fagayu talun. Ay tam Fun natarabang anya laman e madaragang wa fiya fag fagbulun, sik fagsafulan te, matuyan at foyungan.