Matthew

Matthew

¹ Tuy fag fagtapan nafoyung antam tam Isus Fagtayukan, fun Fakafanyuun at kadagdagan, ay anggan Abrayam at kadagdagan at talagtagan. ² Abrayam inke unga at ngayan Kanya-At-Naasean. Ay bandi, Kanya-At-Naasean inke unga yangay, at ngayan Takamilug. Takamilug inke unga yangay, at ngayan Naseg, ay e ngay fadugsay yay. ³ Naseg inke unga yangay, at ngayan At-Nafaintubuanan ay Bagu-Nyamag. Ay at tina at ngayan Sik-Tagayun. At-Nafaintubuanan inke unga yangay, at ngayan Masungsungan. Ay bandi, Masungsungan inke unga yangay, at ngayan Datag-Buid. ⁴ Datag-Buid inke unga yangay, at ngayan Ayi-Takamon. Ay bandi, Ayi-Takamon inke unga yangay, at ngayan Sik-Ubianun-Sirut. Ay bandi, Sik-Ubianun-Sirut inke unga yangay, at ngayan Salmun. ⁵ Salmun inke unga yangay, at ngayan Buas. At tina at ngayan At-Marafad. Ay bandi, Buas inke unga yangay, at ngayan Tagseg. At tina at ngayan At-Ufud. Ay bandi, Tagseg inke unga yangay, at ngayan Sik-Ama-Madaragang. ⁶ Sik-Ama-Madaragang inke unga yangay, at ngayan Fakafanyuun. Kanya ebi fag fun daul at sadi. Fun Fakafanyuun inke unga yangay, at ngayan Mabayan. Ay Mabayan at tina, Funbalugu-Sik-Salung at mangena taguna. ⁷ Mabayan inke unga yangay, at ngayan Fakaayuan-Taw. Ay bandi, Fakaayuan-Taw inke unga yangay, at ngayan Funbalugu-Sik-Tama. Ay bandi, Funbalugu-Sik-Tama inke unga yangay, at ngayan Tagfafiya. ⁸ Tagfafiya inke unga yangay, at ngayan Funbalugu-Nafili. Ay bandi, Funbalugu-Nafili inke unga yangay, at ngayan Funbalugu-Matvngvd. Funbalugu-Matvngvd inke unga yangay, at ngayan Funbalugu-Mabitsug. ⁹ Funbalugu-Mabitsug inke unga yangay, at ngayan Funbalugu-Du-E-Nafanluk. Ay bandi, Funbalugu-Du-E-Nafanluk inke unga yangay, at ngayan Funbalugu-Naago. Ay bandi, Funbalugu-Naago inke unga yangay, at ngayan Funbalugu-Tagfatvngvd. ¹⁰ Funbalugu-Tagfatvngvd inke unga yangay, at ngayan At-Nafaliaman. Ay bandi, At-Nafaliaman inke unga yangay, at ngayan Tagmatuyan. Ay bandi, Tagmatuyan inke unga yangay, at ngayan Funbalugu-Tagfafiya. ¹¹ Funbalugu-Tagfafiya inke unga yangay, at ngayan Funbalugu-Gfatvngvd ay anggan e ngay fadugsay yangay kaduge e nataban sas talun Datag-Sinar. ¹² Ay nu ntabua nu gtaban, Funbalugu-Gfatvngvd inke unga yangay, at ngayan At-Nainto. Ay bandi, At-Nainto inke unga yangay, at ngayan Datag-Sinar-At-Taw. ¹³ Datag-Sinar-At-Taw inke unga yangay, at ngayan Masine-Tam-Tama. Ay bandi, Masine-Tam-Tama inke unga yangay, at ngayan Funbalugu-Mawat. Ay bandi, Funbalugu-Mawat inke unga yangay, at ngayan Asuru. ¹⁴ Asuru inke unga yangay, at ngayan At-Matuyan. Ay bandi, At-Matuyan inke unga yangay, at ngayan Kanya-Tagurug. Ay bandi, Kanya-Tagurug inke unga yangay, at ngayan Funbalugu-Du-E-Gtiba-Tungud. ¹⁵ Funbalugu-Du-E-Gtiba-Tungud inke unga yangay, at ngayan Funbalugu-Tagtarabang. Ay bandi, Funbalugu-Tagtarabang inke unga yangay, at ngayan Sik-Nafon. Ay bandi, Sik-Nafon inke unga yangay, at ngayan Takamilug. ¹⁶ Takamilug inke unga yangay, at ngayan At-Fakafamutan. At-Fakafamutan, Taglu mangama. Ay tuy fag Taglu tam Isus tina. Ay tam Isus At ke ngayan Fagtayukan. ¹⁷ Kayu niya at katungudan. Siginans Abrayam anggan sas fun Fakafanyuun, 14k gsugfun taw. Ay siginans fun Fakafanyuun anggan e nataban at ngay Taw-Tagagbuan sas talun Datag-Sinar, 14k yangay gsugfun taw. Ay siginan e nataban sas talun Datag-Sinar anggan sa tam Fagtayukan, 14k yangay gsugfun taw. ¹⁸ Kata tuy Isus Fagtayukan nu bagu ke taw. Ebi gina At tina ban, Taglu, e fasad ban mangama at ngayan At-Fakafamutan. Ay gina gyud batang e natsa anya, roro at mangama nasaful te, igbuba wan. Ay at fagbubaun siginan wa At-Masine-Fag-Falad At madaragang fag longan. ¹⁹ Ay kanya, At-Fakafamutan, Taglu at fasad ban mangama, kanya faggugat gfaning tuwa at matuyan. Ay anway katanya tuway, at fasadan ya nangadaduwa. Ay dewa katanya, dua kaumsig gfaplan at fasad mangena. Ay anway te ya gfoyung at fasadan sa tiba. ²⁰ Ay roro gina namatanganan katanya, rodi tv sik tagbukngan siginans Funbalugu insure sa anya gina gtiug. Ay gfataginfanan anya te, At-Fakafamutan, fun Fakafanyuun at kadagdagan, lag kalimu nu nangadaduwa ban o sa am fasad mangena. Anway at fagbubaun siginan way At-Masine-Fag-Falad At madaragang fag longan. ²¹ Ay kanya gfalangfe ban sik ama. Ay fangayani ban Anya te, Isus. Anway Kanya At mafabalabag ban sa At ngay taw siginan at asalanan. ²² At faginsureun ay, ingurungan tam Fun At longan ebi ebi siginan At taglong at sadi te, ²³ Amatangani tuwa tuy fag longan. E sik diaga igbuba ban dewa gyud e natsa anya. Ay kanya igfalangfe ban sik ama. Ay e fangayan ban Anya te, Emanuel. At masuad te, Funbalugu-Nansi-Antam. ²⁴ Ay gina At-Fakafamutan infulo, kanya nafaning Funbalugu At tagbukngan at longan, ay nanbul wa Taglu ay nangadaduwa wan. ²⁵ Ay At-Fakafamutan dia batang natsas Taglu yap ngay inlangfe at fagbubaun, sik ama. Ay At-Fakafamutan nafangayan Anya te, Isus.

¹ Isus nu kalangfe wan sas Fulan-Ke-Fafa sas talun Naseg, kaduge Sik-Madaragang-At-Baguama-Daul at fun. Ay bandi sik ngay mamatanganan fag taw siginans menit at fakasurean fag talun indasug sas fulan Erusalem ay nanginto sanya te, ² Go dada Taw-Naseg at bagu inlangfe fag Fun. Madyay nalag wami ka fag Fun At galeme kaduge mi sas fakamenitan fag talun. Ay em fagindasugun katsi laman nanseg ami ka fag Fun. ³ Ay fun Sik-Madaragang-At-Baguama-Daul nu nadungug te inlangfe wan, fainfolian at amatanganan. Ay anggan fagayu taw sas fulan Erusalem gfainfolian yangay at amatanganan, gfadiuganan at fun. ⁴ Ay fun Sik-Madaragang-At-Baguama-Daul igfaful fagayu Taw-Naseg at taganyun daul ay at ngay tagfasaful ay nanginto te, Dada tam Fagtayukan nu kalangfe. ⁵ Ay ka fag ngay Taw-Naseg igbalus anya te, Sas Fulan-Ke-Fafa sas talun Naseg. Anway katanya Funbalugu At taglong ebi at rirukan te, ⁶ O wan Fulan-Ke-Fafa, Talun Naseg’t matuyan, O tuwa fiya fiya, At matuyan fag fulan. Anway siginan emu, At kumsure sik Fun ban. Kanya namagurang ban, Ku ngay Taw-Tagagbuan. ⁷ Ay fun Sik-Madaragang-At-Baguama-Daul gsuksuanan gfaful ka fag ngay mamatanganan fag taw laman nanginto te, Seduge nu nsure ay nu glag am ka fag galeme. ⁸ Ay ka fag fun nu nasaful, nasugu ka fag ngay mamatanganan fag taw sas Fulan-Ke-Fafa te, Loi wan. Ay matvngvdi tuwa nu gsarap am Ka fag Ngenge. Ay nu nalag tuwam, afolii yap stiye nanfoyungi yap angku. Laman anggan aw lumag akyangay Anya ay sumeg akyangay Anya. ⁹ Ay ka fag ngay mamatanganan fag taw nu nadungug ka fag fun at longan, nalo wan. Ay rodi ka fag galeme, at nalag ebi sas fakamenitan fag talun, naguna wa anya. Anggan wa At galeme ndasug sa ka fag Ngenge tungud bale. ¹⁰ Ay ka fag ngay mamatanganan fag taw guseganan dawdaw te, nalag yangay fiya ebi at nalag fag galeme. ¹¹ Ay nu nasakbo wa sanya fag bale, ay nu nalag wa sanya at Ngenge ay anggan At tina, Taglu, kanya fag ngay mamatanganan fag taw namalub saswa salug ay gseg sa Ka fag Ngenge. Ay kanya nalapsu at fagsuadan at fagmabalanun. Ay nafamanyun sa Ka fag Ngenge sik ngay sanbung fanumyu, ay sik ngay kamangyan, ay anggan sik ngay lune fili. ¹² Ay Funbalugu nasalag ka fag ngay mamatanganan fag taw sat taginfanan te, Lag am kafoli sas fun Sik-Madaragang-At-Baguama-Daul. Ay nu katanya, ka fag ngay mamatanganan fag taw nu kafoli sat talun turungan, sa wa tibak dalan. ¹³ Ay kaduge ka fag ngay mamatanganan fag taw nalo, rodi Funbalugu At tagbukngan at sadi insure sas At-Fakafamutan sat taginfanan ay nalong anya te, Afuloi wan. Ay ubanani mafali am Ngenge bilang ay tabani At tina sas talun Eiptu. Ay sanyai yap, yap ngay aw gdog iglong sa emu. Anway fun Sik-Madaragang-At-Baguama-Daul ganansarapun am Ngenge bilang te laman nanfate. ¹⁴ Ay At-Fakafamutan infulo. Ay rodi naubanan at Ngenge ay nataban At tina, dewa sad yabi. Laman umdasug ban sas talun Eiptu. ¹⁵ Ay kanya fag talanan igbanwan yay sanya, yap ngay fun Sik-Madaragang-At-Baguama-Daul umkate. At faginsureun ay, ingurungan tam Fun At longan ebi ebi siginan At taglong at sadi te, Nanfaste Akwan Ku Baguama siginans talun Eiptu. ¹⁶ Ay bandi, fun Sik-Madaragang-At-Baguama-Daul nu nasaful te, kanya fag ngay mamatanganan fag taw nafanluk way mangaro anya, kanya kadotama dawdaw. Ay kanya nasugu, laman nanfate wa ngap fagayu at ngay unga nu sik ama ya sas Fulan-Ke-Fafa ay anggan tagsit ngaba dayu fag ngay talun. Kanya fag ngay unga siginan bagu kalangfe anggan induwak banwa. At fun fagananfateun fag ngay unga at kadaulan anggan duwak banwa, anway ebi at ngay mamatanganan fag taw nafoyung te, kaduge niya ka fag galeme nu kasure. ¹⁷ Katanya tuway, ingurungan Funbalugu At taglong, at ngayan Funbalugu-At-Nafatvngvd, ebi ebi at longan te, ¹⁸ Indungu’t faguywayun, Ay’t fakabaluun dawdaw. Sas Maabat fag fulan, Sik-Tupa-Tina guyway. Ay kanya dua kaumsig, Nu e gfaliaman anya. Anway’t ngay kadagdagan, Fagayu inkate wan. ¹⁹ Ay nu nkate wan fun Sik-Madaragang-At-Baguama-Daul, Funbalugu At tagbukngan at sadi insure yay fiya sas At-Fakafamutan sat taginfanan gina sas talun Eiptu, ay nalong te, ²⁰ Afuloi wan. Ay ubanani wa am Ngenge bilang, ay tabani At tina sas talun Tagagbuan. Anway katsi nkate wan at ngay tagananfateun ay Ngenge. ²¹ Ay At-Fakafamutan infulo ay naubanan at Ngenge ay nataban At tina, ay nangadasug sas talun Tagagbuan. ²² Ay gina At-Fakafamutan nadungug te, Ebi fag fun at baguama, at ngayan Sik-Magurang, natubus yay at tama, fun Sik-Madaragang-At-Baguama-Daul nu gmagurang sas talun Naseg. Ay nu katanya, At-Fakafamutan kalimu nu nangadasug sanya. Ay Funbalugu nasalag yangay anya sat taginfanan, ay At-Fakafamutan nalangfe wa talun Naseg ay indasug sas talun Balulangan. ²³ Ay ka fag talanan nu ndasug wa sanya, namanwan sa sik fulan at ngayan, Nasaret. Laman nanfagurungan Funbalugu At ngay taglong ebi ebi at naguna nafoyung te, Tiba nanfangayan ban Anya, Sik-Taw-Nasaret.

¹ Ay bandi ban Uan Tagfasurung bagu inke fagbulun sas talun Naseg sa sik talun sirut at yud e taw, laman nanfoyung sasa ngay taw te, ² Ubuni wan ay asalanan. Anway makbang wan Funbalugu-Nu-Gmagurang-Taw. ³ Tuy Uan Tagfasurung yay, ay Funbalugu-Nabalabag, sik Funbalugu At taglong ebi ebi, at naguna nafoyung at masuad te, Anway tuy sik fanlongan, Sas talun tyud e gbanwan. At longan maurunganan, Te, antam kamasadan, Laman tam Fun e dalan. ⁴ Ay sanya Uan at fangawat at lanbung siginan sik idu mabugsul guyuy at sigyu. Ay at ginawang sigon balat balan wa at balyu. Ay at fakonun liung ay kamalong. ⁵ Ay at ngay taw siginans Erusalem, ay siginans fagdaul talun Naseg, ay anggan siginans day safa Mababaun indasug sas Uan. ⁶ Ay gina ka fag ngay taw nafoyung at asalanan, Uan nasurung anya sasad safa Mababaun. ⁷ Ay kaduge Uan nalag te, ngayu at Taw-Tagfalayun ay Taw-Saduseu takadasug laman ganangasurungun, kanya nalong yay te, Kata way am sik ngay dot riangan. Sinu at nasalag ayu te, laman umlagyu am siginan at kumdasug ban fag faurianan. ⁸ Fagbuluni masine kata sik buadan kayu at masine. Sik fagsafulan te, Naubun wam ay asalanan. ⁹ Ay agi yap am masegan te, masine wam anway Abrayam wanay ay katungudan. Anway igfoyung aw ayu te, Funbalugu e fagmadaragangun nu naawat Abrayam at ngay kadagdagan dewa ste ginan fag ngay batu. ¹⁰ Ay katsi wan e gawaseun wan kayu at lalid. Fagayu kayu at yud masine at buadan, e muan wa ban. Ay e mukas wa ban sasad afuy. ¹¹ Igfasurung aw ayu sasad safa. Laman at fagsafulan te, naubun wam ay asalanan. Ay saman wan taguyan angku fag Taw. Kanya amadaragangan yap angku. Aw, ki e fagmasineun an aw oma guba At fanguskus darafa. Ay Kanya nanfasurung yangay ban ayu sa At-Masine-Fag-Falad ay sa sik afuy. ¹² Ay Kanya iggalumutan wa At fanlanu laman malanu At fagrabasan. Ay Kanya igfaful at ke bilug fagayu sa At bale fagrabasan. Ay Kanya igbatas at mafis sas afuy at yud kalayung faggugat. ¹³ Ay bandi daw tv Isus indasug sas safa Mababaun siginans talun Balulangan. At fagindasugun sanya laman Uan nanfasurung Anya. ¹⁴ Ay Uan nasalag Anya te, Yaya. At masine, Oi tuwa tagfasurung angku. ¹⁵ Ay Isus nabalus anya te, Dewa, surungi wa Angku. Anway nu katanya tuwa, igfaning Wata fagayu Funbalugu At fakaumsigun. Ay Uan nafaning wa fiya At longan. ¹⁶ Ay Isus nu nsurung wan, ay nu nlakwi wa sas day safa, rodi banwa inluang daw. Ay Isus nalag Funbalugu At-Masine-Fag-Falad nu kadaga kata sik linatad. Ay intarubung sa Anya. ¹⁷ Ay ginanya e nae longan wa sigon siginans Banwa te, Kanya wan Ku fakesugun Ku Baguama. Guseganan Aw dawdaw Anya.

¹ Ay rodi At-Masine-Fag-Falad nataban Isus sa sik talun at yud e taw, laman Takamuag-Tiba-At-Fagbulun nanfaskud Isus sanya. ² Ay 40k menit ay 40k yabi Isus nu gyud gfangon. Ay nu nlangfe wa, kaduge niya kalunus wa dawdaw. ³ Ay at tagfaskud kadasug wa ngani ay iglong sas Isus te, Nu O wa fiya Funbalugu-At-Baguama, longi wa daw stiye fag ngay batu te, Asik fafai wan. ⁴ Ay Isus igbalus te, Yaya. At-Rirukan nalong wa te, Sik taw at leleg bundi siginans fafa fagtvngvd. Sik taw at leleg siginan tuwas Funbalugu-At-Longan fagayu. ⁵ Ay at fadogan, Takamuag-Tiba-At-Fagbulun nataban Isus sat Masine-Fag-Fulan. Ay nafat sanya Isus sas Tagbvt-Fag-Bale-Funbalugu sas tungud fungfung sub. ⁶ Ay Takamuag-Tiba-At-Fagbulun iglong yangay fiya sas Isus te, Nu Funbalugu-At-Baguama Wo, arabangi wa daw, anway At-Rirukan nalong wa te, Funbalugu’t tagbukngan, Tumarabang ban Emu. Ay anway at daluap, E fagmadaragangun. Kanya sumangfut Emu. Laman di O umtuktuk, Nus di’t sadi am sumyu. Dewo’t sumas wa batu. ⁷ Ay Isus igbalus yangay te, Yaya. At-Rirukan nalong yangay te, Lag gfaskud am Fun am Funbalugu. ⁸ Ay at fadogan, Takamuag-Tiba-At-Fagbulun nantaban Isus sa sik tungud bugsul ngabat dawdaw. Ay nanfabantay Anya fagayu ke fun daul at talun sas fagdaul daga ay anggan nus nge wain at ngay fagmabalanun sanya. ⁹ Ay Takamuag-Tiba-At-Fagbulun nanlong yangay fiya sas Isus te, Mon ban aw sa Emu fagayu Am nalag nu gurungan tuwa nu sumeg O angku. ¹⁰ Ay Isus nabalus yangay sas Takamuag-Tiba-At-Fagbulun te, Loi wan, O Tagfansalag. Lag ngani ste. Anway At-Rirukan nalong wa te, Segi am Fun am Funbalugu. Ay sanyai tuwa am fagfaningun. ¹¹ Ay rodi Takamuag-Tiba-At-Fagbulun naubun Isus. Ay rodi ndasug sik ngay tagbukngan laman nantarabang Isus. ¹² Ay bandi Isus nu nadungug te, Uan Tagfasurung insungsung wan, Isus noli wa sas talun Balulangan. ¹³ Ay Kanya nalo wa inyayu siginans fulan Nasaret ay namanwan yangay sas Takafanyu-At-Fulan. Ka fag fulan sas tigyangan Lino-Balulangan sas Famaumsiganan ay Gagbun fag talun. ¹⁴ Katanya tuway, ingurungan Funbalugu-Nabalabag, Funbalugu At taglong ebi ebi, at naguna nafoyung te, ¹⁵ Talun Famaumsiganan Ay anggan talun Gagbun, Sanyas tigyangan lino. Sas safa Mababaun, Ay talun Balulangan E duwak maafudan, Anggan’t Yud-Naseg-Fag-Taw. ¹⁶ At malunggung sad marum, Nalag’t mayamag dawdaw. Ay tiba at malunggung, Sas talun fakateun, Insure yangay sanya, Tam Fun fagmayamagun. ¹⁷ Siginan ginanya fag menit, Isus gfasigad nanfoyung te, Ubuni wan ay asalanan, anway makbang wan Funbalugu-Nu-Gmagurang-Taw. ¹⁸ Ay gina Isus nalo sasa ngaba tigyangan Lino-Balulangan, At nalag sanya sik dugsay. Simun, tiba at ngayan Takata-Sik-Batu, ay anggan at arian Butuan. Ka fag dugsay nafalayug at fanggamat uyang sasad lino ay gfanguyang. Anway kanya dan wa sik tagfanguyang faggugat. ¹⁹ Ay Isus nalong anya te, Gewan. Aloi wa Angku. Nanfoyung ban Aw ayu nu gfaful am at ngay taw, kata nu gamat am uyang katsi. ²⁰ Ay rodi kanya fag dugsay nafamato wa at fanggamat uyang ay nangalo wa sas Isus. ²¹ Ay sanya ginan Isus nalo yama sirut, ay nalag yangay fiya sik dugsay. Santiagu, Funbalugu-Nafon at baguama, ay anggan at arian Uan. Ka fag dugsay ay anggan at tama, Funbalugu-Nafon, sanya way sad balutu igfasine at fakarasrasan at fanggamat uyang. Ay Isus nagewan ka fag dugsay. ²² Ay rodi kanya naubun wa at balutu ay anggan at tama, ay nangalo wa sas Isus. ²³ Ay Isus glodluan sas fagdaul talun Balulangan ay nanfoyung sanya fag Taw-Naseg at ngay bale fakafulan. Ay At foyungan sanya at Masine-Fag-Barita sas Funbalugu-Nu-Gmagurang-Taw baliwa. Ay Isus nafafiya nus nge wain at taw at dailan sanya. Ay Kanya nafabitsug yangay at malukme at bilug fagayu. ²⁴ Ay indungug tuway Isus At fagbulun sas fagdaul talun Datag-Buid. Ay at ngay taw nataban sas Isus fagayu at ke dailan, dewa nga setaw at dailan ay at fakasaitun. Ay anggan at ke mafurat fag falad, ay anggan at tagfadfarangan sigon fag taw, ay anggan at yud malo. Ay Isus nafafiya tuwa fagayu. ²⁵ Ay sik ngay taw ayuwayu nangalo wa sas Isus. Siginans talun Balulangan, ay siginans fulan Safuluk-Fulan-Daul, ay siginans fulan Erusalem, ay siginans talun Naseg, ay anggan siginan sik taluns dife safa Mababaun.

¹ Ay Isus nu nalag wa sik ngay taw, Kanya naulul saswa bilug tubi ay malunggung yay sanya. Ay At ngay tagadal nangakbang sa Anya. ² Ay Isus nanfoyung sanya fag ngay taw te, ³ Sik taw guseganan nu gfababaun tuwa at amatanganan. Anway anggan kanya inful tuwa sas Funbalugu-At-Fagmagurangan-Taw. ⁴ Sik taw guseganan tuwa dewa kabalu katsi. Anway Funbalugu ban nafaaliaman yay anya. ⁵ Sik taw guseganan nu gdi gfandaragang at longan. Anway kanya at mul ban Funbalugu At nafamasegan. ⁶ Sik taw guseganan nu kaumsig tuwa dawdaw nu malayun sat masine at ugali. Kata sik taw takalunus kaumsig dawdaw at fafa. Ay sik taw takadanum kaumsig dawdaw nanginum. Anway Funbalugu yay ban tagfasine ban anya. ⁷ Sik taw guseganan nu kafanyu tuwa tiba katsi. Anway e mfanyu yangay ban anya. ⁸ Sik taw guseganan, at amatanganan nu malayun tuwa sat masine. Anway kanya lumag ban Funbalugu. ⁹ Sik taw guseganan nu mafafalukmianan tuwa tiba. Anway e fangayan ban anya te, Funbalugu At unga. ¹⁰ Sik taw guseganan dewa e gfauri anya nu masine tuwa at fagbulun, anway anggan kanya umful tuwa sas Funbalugu-At-Fagmagurangan-Taw. ¹¹ Guseganan tuwam, dewa e gfalingun ayu. Ay dewa e gfauri ayu. Ay dewa e glong mauri sa ayu baliwa. Ay nus nge wain at yud matuyan sa ayu baliwa, anway kafandiug wam sa Angku. ¹² Useganani ay aumsigi dewa katanya. Anway gbiya ban ay fanambagun sas Banwa. Anway katanya yangay ebi at ngay taw at fagbulun nafauri yangay Funbalugu At ngay taglong, at naguna ayu. ¹³ Am wan takata sik asing ste swa daga. Ay roro sik asing nu dway e matamis, tain ro nu gdog yangay tam gfatamis. Yaya, ka fag asing du e masuad. Ukasi wan ay dewa ro e nasiad. ¹⁴ Am wan takata sik salung ste swa daga. Dua masuksukan sik fulan daul at ngay salung nut si tuwas tungud bugsul. ¹⁵ Katanya yangay sik taw nu nasulsul tuwa sik salung, di nansuklub sasad sabi. Ay roro igdi. Nanfat sa tuwas fagfasayugan salung, laman dumamlag fagayu taw sanya fag basad bale. ¹⁶ Ay ugali katai sik salung nu gdamlag sas fagayu taw. Ay at ngay taw nu lumag te, masine ay ugali, sumeg ban ay Tama sas Banwa. ¹⁷ Lag am gamatangan te, Ku fagindasugun at masuad nanfasaman Akyay Ku-Unga At-Longan ay anggan ebi Funbalugu At ngay taglong at foyungan. Yaya. Ku fagindasugun at masuad da Kwa nanfasaman, an Aktuwa nanfagurungan Funbalugu At longan ¹⁸ Matuyan iglong Kwa ayu te, Dewa ban gyud e banwa ay gyud e daga, nus di sadik siksik ay nus di sadik afud sirut longan du e maliam siginan At-Longan, yap ngay ban umgurungan fagayu fagayu. ¹⁹ Nu katanya, nus nga sinu nu kamabo way nus di sik afud sirut sas Funbalugu At longan, ay manga nu nafoyung ya tiba te, Katanyai anggan am, e mili wa ban ka fag taw te, at yud way katvngvd tiba sas Funbalugu-At-Fagmagurangan-Taw. Ay roro ngap, nus nga sinu tagfaning fiya fiya sas Funbalugu At longan ay nu gfoyung tuwa At longan, e mili tuwa ban anya te, at madaragang tuwa fag taw sas Funbalugu-At-Fagmagurangan-Taw. ²⁰ Anway igfoyung Kwa ayu te, Ay fagmasineun nu di yap ngay lumabi sas Taw-Naseg at ngay tagfasaful ay sa at ngay Taw-Tagfalayun at fagmasineun, dia ban am umful sas Funbalugu-At-Fagmagurangan-Taw. ²¹ Nadungug wam ebi at foyungan siginan tam magurang te, Lag gfate taw. Anway nus nga sinu at nafate taw e sumarap yay ban te, go ka fag taw e asalanan. ²² Ay nalong Akyangay sa ayu te, Nus nga sinu takadotama sat tiba, e sumarap yangay ban te, go ka fag taw e asalanan. Ay nus nga sinu at lumong sat tiba te, Rafas, e tumaban anya sat ngay magurang. Ay nus nga sinu at lumong sat tiba te, Du am e amatanganan, e sumarap yangay ban anya te, go sak ban nanfadasug anya sas Lino-Afuy. ²³ Anway katanya, kaduge o gafonun am anyun sas Funbalugu sas fagfonan anyun, ay nu e namatangan yay o am nasalan sa am iba. ²⁴ Famatoi yap sanya am anyun. Ay loi wan, laman fasinei yap am fagbulun sa am iba. Ay nu nsine wa long, afoli yangay fiya ay foni wa long am anyun sas Funbalugu. ²⁵ Kaduge o glo gfaigaluan takadotama emu sas tagsarap asalanan, gina am sasa ngaba dalan, mafalii nu gfalukmianan anya. Laman takadotama emu wa fasa fadasug emu sas tagsarap asalanan. Ay tagsarap asalanan wa fasa fadasug emu sat tagtanud laman ro dua sumungsung emu. ²⁶ Matuyan iglong Aw emu katsi te, Dia ban o malfas siginans sungsungan yap ngay ban o nafon at fakatabuan fag salafi daga sa am fansali am naasalanan. ²⁷ Ay nadungug wam ebi at foyungan te, Lag kamayun. ²⁸ Ay katsi iglong Kyangay sa ayu te, Nus nga sinu fag ama nu e linggatan way sa sik mangena ay kaumsig wa anya, roro katanya kamayun wan sa at amatanganan. ²⁹ Ay am mata at sadi nu gfe asalanan way emu, guladi wan ay ukasi wan. Anway masine yay dewa maliam sik afud am bilug, nu gdi e mukas am bilug fagdaul sas Lino-Afuy. ³⁰ Ay am daluap at sadi nu gfe asalanan way emu, lifungi wan ay ukasi wan. Anway masine yay dewa maliam sik afud am bilug, nu gdi e mukas am bilug fagdaul sas Lino-Afuy. ³¹ Ay ebi at foyungan te, Nus nga sinu at tagaubunun at mangena, e foni ngay anya sik famasaful te, katsi naubun kwan. ³² Ay katsi iglong Akyangay sa ayu te, Sik taw dewa nafon sa at mangena sik famasaful, at mangena nu gdi kamayun, at mangama way gfafamayun at mangena. Ay nus nga sinu at kumdaduwa sanya fag mangena kaduge at dan fag mangama gleleg, anggan kanya kamayun yangay. ³³ Ay nadungug yangay am ka fag foyungan at nafoyung ebia taw sa tam aguyangan te, Lag fatuyanan nu dway am gfagurungan. Fagurungani tuwa ay nafatuyanan fagayu sas Funbalugu. ³⁴ Ay katsi iglong Aw ayu te, Lag fatvngvd ay longan fagayu. Lag sak glong te, Tam Banwa wan at nasaful ku longan. Anway tam Banwa, tam Funbalugu wa At faglunggungan daul. ³⁵ Ay lag sak glong te, Tam fagdaul daga at nasaful ku longan. Anway tam fagdaul daga Funbalugu wa At fagsiadan. Ay lag sak glong te, Fulan Erusalem nasaful wa ku longan. Anway kanya fag fulan Tiba-Tungud-Fag-Fun At fulan. ³⁶ Ay lag fatvngvd ay longan siginan am alfuyu. Madyay dua am mafafalagsi ay buk mandi. Ay manga dua am mafafalayung ay buk nus di sadi. ³⁷ At masine ay longan nu kin, kin wa fiya. Ay ay longan nu yaya, yaya. Ay ay longan nu lumabi wa sanya, siginan was Tagmauri. ³⁸ Ay nadungug yangay am ebi at foyungan te, Fabalii yangay nu e nafauri ayu. Fabalii nu e nafaarum ay mata. Ay fabalii nu e narabas ay bagang. ³⁹ Ay roro katsi iglong Akyangay sa ayu te, Lag gsalag at nanfauri ayu. Sik taw nu nafalang ay fingi at sadi, falagi yangay ay fingi sik tigyangan. ⁴⁰ Sik taw nu nataban emu sa at ngay magurang, ay sanya nu nabul wa am lanbung tagsit daga, foni yap anggan am lanbung tagsit tungud sigon. ⁴¹ Ay sik taw nu nafabulun dawdaw emu te, ubanani at fangubaun saiginan kafalin tam menit, ubanani yangay kaduge duwa kalinan menit. ⁴² Foni nus nga sinu taget siginan emu. Ay lag kalimata nu e gulbus siginan emu. ⁴³ Ay nadungug yangay am ebi at foyungan te, Esugi ay iba. Ay lag kafanyu tagfabarangian ayu. ⁴⁴ Ay katsi igfoyung Akyangay sa ayu te, Esugi tuwa tagfabarangian ayu. Ay darangini tuwa tagfauri ayu. ⁴⁵ Laman fagayu taw sumaful ban te, Am wan Tagsas-Banwa-Fag-Funbalugu At ngay unga. Anway Funbalugu yay tagfasure at menit sa at mauri fag taw ay sa at masine yangay fag taw. Ay anggan tagfamoyan sa at matuyan fag taw ay sa at mauri fag taw. ⁴⁶ Go nu kesug wam at takesug ayu, go am way ban at ke fanambagun siginans Funbalugu. Go yaya. Anway anggan at ngay tagbul famanyun sat fun kesug yangay at takesug anya. ⁴⁷ Ay nu gfamatuan tuwam ay fagues, go e faglabiun yay am tibak taw. Go yaya. Anggan at Yud-Naseg-Fag-Taw gfamatuan yangay at fagues. ⁴⁸ At masine fiya fiya nu gdi am e fagayudanun sat masine nus nge wain. Kata yangay ay Tama sas Banwa nu gyud e fagayudanun sat masine.

¹ Lag gfasure am masine fag fagbulun nu am famalagan way am iba te, Masine aw. Nu katanya way am fagbulun, dia ban o e fanambagun siginan am Mama sas Banwa. ² Ay nu katanya, gina o gfon sat yud e kwa, lag o gbudyung sa am ngaba dalan kata tagfanluk at fagbulun gina sas Taw-Naseg at bale fakafulan ay gina sasa ngaba dalan. Anway ka fag taw at fagbudyungun at masuad anway te, laman tiba sumeg anya. Ay katsi matuyan iglong Aw sa ayu te, Katsi wan takatanya fag taw nu nabul at fanambagun fagayu. ³ Ay o nu gfon o sa at yud e kwa, lag gfasaful sa am daluap at wala te, at sadi e nafon. ⁴ Kata yakman masuksukan nu gfon o. Anway am Mama nalag wan fagayu nus nge wain, ay nafon yangay ban sa emu. ⁵ Ay nu gdarangin o, lag gfaning tagfanluk nu gdarangin. Anway kanya at fakaumsigun nu gdarangin namalindug tuwa, dewa sa at ngay bale fakafulan ay dewa sasad sagbatan dalan, laman fagayu taw nalag anya. Ay katsi matuyan iglong Aw sa ayu te, Katsi wan kanya nu nabul at fanambagun fagayu. ⁶ Ay o nu gdarangin o, sakboi way sa am basad bale, ay dingdingi wan am sakbawan. Ay darangini wa long sa am fagyudun glag fag Mama. Ay am Mama nadungug wan am darangin at masuksukan, ay nafon ban sa emu. ⁷ Ay gina o gdarangin, lag ayuwayu glong fagayu nu dway e masuad, kata at Yud-Naseg-Fag-Taw at ugali. Anway kanya gamatangan te, Nu nafaayu aktuwa long ku longan, dumungug wa ro fiya ku darangin. ⁸ Lag gfaning takatanya fag ngay taw. Anway am Mama nasaful wan nus nge wain am fagayudanun fagayu, bagu o gaetun siginan Anya. ⁹ Ay nu katanya, ay darangin kata tuyi tuwa te, Em Mama sas Banwa, Masine at ngay taw nu gseg Emu. ¹⁰ Ay at masine, Oi tuwa tagmagurang at ngay taw. Ay nus nga se taw Am fasadan, masine nu umsure ban ste swa daga kata nu nsure sas Banwa. ¹¹ Ay foni emi em fakonun katsi fag menit. ¹² Ay faliami em asalanan kata nu naliam ami em iba at asalanan sa emi. ¹³ Ay lag taban emi laman nangae asalanan ami. Ay roro dingdingi tuwa emi siginan at mauri. ¹⁴ Nu naliam tuwam ay iba at asalanan sa ayu, anggan ay Tama sas Banwa nafaliam yangay ban ay asalanan. ¹⁵ Ay nu dway am naliam ay iba at asalanan, anggan ay Tama sas Banwa dua ban nafaliam ay asalanan. ¹⁶ Ay gina am e fagyudun gfangon fag menit, dangai ay mata mabaluanan kata sik tagfanluk. Anway tagfanluk dua nafasineun at mata, laman nanfasaful tiba te, kanya nu nda e fagyudun gfangon ginanya fag ngay menit. Ay katsi matuyan iglong Aw sa ayu te, Katsi wan takatanya fag ngay taw nu nabul at fanambagun fagayu. ¹⁷ Ay roro gina am e fagyudun gfangon fag menit, fasineuni tuwa ay buk ay fegusi yangay ay mata. ¹⁸ Laman at ngay taw dua tumoglag ayu te, katsi mangaro e fagyudun gfangon fag menit. Nu katanya tuwa ay fagyudun glag fag Mama nalag wan fagayu. Ay mon ban sik fanambagun sa ayu. ¹⁹ Lag gfaful ay ngay fagmabalanun ste swa daga. Anway ste at ulud kon way. Ay at nenay gfamin way. Ay takamul masakbo way dewa madingdingan, e mafabul way. ²⁰ Ay ay fagfafulun ay fagmabalanun ani tuwa tagsas Banwa. Anway sanya di e ulud. Ay di ganenayun. Ay di e gfamin ay nafaful. Ay di e takamul gsakbo sanya laman nanfamul. ²¹ Sanyai tuwa ay fagfafulun, anway nus nga nday ay ngay fagmabalanun, sanya wa fiya anggan ay amatanganan. ²² Ay bilug at salung ay mata wan. Ay ay mata nu malio tuwa nu glag, fagdaul ay bilug mayamag tuwa. ²³ Ay roro ay mata nu dway malio nu glag, anggan fagdaul ay bilug kata way nu marum. Ay ay fagmayamagun nu kata way nu marum, sek, marum yay ban dawdaw fagdaul ay bilug. ²⁴ Go sik taw mafafaning tuwa sas duwak fun. Go yaya. Madyay nu kesug wa sat sadi, kalimata way sat sadi. Ay nu gfaning wa sat sadi, sat sadi dua mafafaning. Ay katanya wa ngaro fiya. Du am mafafasfuan mafafaning fag duwa, sas Funbalugu ay sas fagmabalanun. ²⁵ Nu katanya, katsi iglong Aw sa ayu te, Lag gafanawa te, daginan ban ay fakonun ay ay fanginum. Ay lag gafanawa sa ay bilug te, daginan ban ay lanbung. Anway ay leleg nu mesug, glabi yay sa sik fakonun. Ay ay bilug nu mesug, glabi yangay sa sik lanbung. ²⁶ Linggati, nu kin, nin fag ngay manuk tungud. Kanya du e tanum, ay du e nabul, ay du e fagrabasan. Ay madyay dewa manuk, ay Tama sas Banwa e famaon tuwa anya. Ay ay kamesugan glabi yay am fiya fiya sik manuk tungud. Go kin. ²⁷ Go sangay nu mafanawa tuwa ro am, mafafamut yay am ay leleg te, sadi yak menit. Go yaya. ²⁸ Ay taw ro ay fagafanawaun te, du am e lanbung. Linggati, nu kin, nin fag ngay sariksik sa ngaba talun, madyay kadaul tuwa mandi. Kanya dua nanbalbe ay dua nangawat sik lanbung. ²⁹ Ay iglong Aw sa ayu te, Nus nga fun Mabayan nasulun at tiba tungud at masine fag lanbung nu kalag, dua kamasine sik sariksik. ³⁰ Funbalugu nafatugbung at makmak at ke sariksik sasa ngaba talun te, laman masine nu kalag. Dewa at ngay makmak melo katsi, balabag ban e mukas wa sasad afuy. Ay am, glabi yay am sik makmak, madyay Funbalugu nafon tuwa ayu ay lanbung. Go kin. Am mangaro sik ngay taw way am at yud matvngvd nu kafandiug. ³¹ Nu katanya, lag gafanawa te, daginan ro ay fakonun. Ay daginan ro ay fanginum. Ay anggan, daginan ro ay lanbung. ³² At Yud-Naseg-Fag-Taw at fagasarapanun fiya fiya takatanya way fagayu. Ay roro ay Tama sas Banwa nasaful wa gugat ay fagayudanun nus nge wain. ³³ Ay roro taguna taguna ay fagbulun, faningi tuwa Funbalugu At fakaumsigun. Ay sarapi at masine fag fagbulun, laman ban ngayu tuwa sas Funbalugu-At-Fagmagurangan-Taw. Ay Funbalugu nafon ban sa ayu fagayu ay nayudanan ginanya. ³⁴ Anway katanya tuway, dangai gafanawa katsi te, Tain ban balabag. Katsi agi yap gfamut ay fagafanawaun. Balabag yap ban nu gamatangan am tiba.

¹ Lag gfansulup ay iba te, nu ndain ro, mauri at fagbulun. Laman di e kafoyung te, mauri anggan ayu ay fagbulun. ² Anway nus nga se taw ay fagbulun sa ay iba, katanya yangay ban nu e magbulun sa ayu. Ay nus nga seyu ay nafon sa ay iba, kayu yangay ban anya at fagfonun sa ayu. ³ Taw ro am fagnalongun sa am fadugsay te, Ganamata wo. Ay si emu ngap nu sik fun kayu tuwa daw si am mata. ⁴ Ay taw ro am fagnalongun yangay te, Aw wan tagbul am namata. Ay roro nu sik fun kayu yay daw si am mata. ⁵ Am tagfanluk way am fag taw. Buli yap taguna ka fag fun kayu si am mata. Ay nu nabul tuwo, malio tuwa am mata ay mafabul long o am fadugsay at namata. ⁶ Lag gfon Funbalugu At nanuranan sas idu. Ay lag kukas at ke fanambagun fag dalag sas bukbuk. Laman at bukbuk di nasiad ka fag dalag, ay at idu di magat ayu. ⁷ Eti. Ay e mon sa ayu. Sarapi. Ay lumag ban am. Fangkemkemi. Ay e lumuang sa ayu. ⁸ Anway fagayu at naet, e nabul wa ban fiya. Ay fagayu at nasarap, lumag wa ban fiya. Ay fagayu at nafangkemkem, e lumuang wa ban fiya sa anya. ⁹ Ay amatangani ayu, am fag ngay tama te, Go ay unga nu naet waro sa ayu sik fakonun. Go ay nafon sa anya sik batu. Ay go yaya. ¹⁰ Ay nu naet waro sa ayu sik uyang matama. Go ay nafon ro sa anya sik ubianun mafungkuk tagleleg. Ay go yaya. ¹¹ Ay dewa am sik ngay mauri fag taw, gsaful tuwam gfon at masine sa ay sisian. Ay roro ay Tama sas Banwa glabi yay dawdaw sa sik taw tama ste swa daga nu gsaful gfon at masine sa taget Anya. Go kin. ¹² Ay nus nge wain ay fakaumsigun ay iba at fagbulun ban nu masine tuwa sa ayu, katanyai yangay ban anggan ayu ay fagbulun sa anya. Anway katanya yangay fagayu Ku-Unga At-Longan ay fagayu Funbalugu At ngay taglong ebi at foyungan at masuad. ¹³ Ay ay fagsakboan sai tuwa at munsirut fag sakbawan alad. Anway at tagbvt fag sakbawan ay at malbang fag dalan, kanya at fungfung sa ways fakaminan. Ay ngayuk taw sanya way nu nalo. ¹⁴ Ay roro ngap, at munsirut fag sakbawan alad ay at yud gbiya fag dalan, kanya at fungfung sa tuwas leleg faggugat. Ay satsadian wayk taw at nalag ay at nalo sanya fag dalan. ¹⁵ Tagaki sa at yud matuyan fag ngay taglong. Kanya gina kadasug sa ayu kata yangay sik tupa. Ay roro mangaro ka fag ngay taw sa at amatanganan kata way sik ngay tagfangagat fag idu talun. ¹⁶ Ay sumaful ban am anya anway at ugali kata sik buadan kayu. Madyay du am batang gbul sik uwat buadan siginans sik sabinit. Ay du am batang gbul sik matamis fag buadan siginans sik uwe agubak. ¹⁷ Katanya yangay, fagayu at masine fag kayu, at buadan masine yangay. Ay at kinyango fag kayu, at buadan mayango yangay. ¹⁸ Sik masine fag kayu dua mafafabuadan mayango. Ay sik mayango fag kayu dua mafafabuadan melo. ¹⁹ Ay fagayu kayu nu dway mafafabuadan masine, e muan wa ban ay e mukas wa sasad afuy. ²⁰ Katanya yangay sumaful yangay am te, go matuyan sik ngay taglong at foyungan. Anway at ugali kata yangay aro fag buadan kayu. ²¹ Bunwa ban fagayu at nalong sa Angku te, ku Fun, ku Fun, at kumful sas Funbalugu-At-Fagmagurangan-Taw. At kumful ban kayu way ban fiya fiya tagfaning sa Ku Mama sas Banwa At fasadan. ²² Ay gina ban igtap asalanan fag ngay menit, ngayu bank taw at lumong sa Angku te, Em Fun, em Fun, madyay anggan ami igfoyung yangay ami Am longan siginan Am fagmadaragangun. Go kin. Ay siginan Am fagmadaragangun mafaayiyan yangay ami at ngay mafurat fag falad. Go kin. Ay anggan mafafabul yangay ami at ngay madaragang fag fagbulun madyay siginan yangay Am fagmadaragangun. Go kin. ²³ Ay malus ban Aw ayu te, Yaya. Kua nasaful ay ngayan. Ayayui wan ste ginan Ku akbang. Am sik ngay takamabo way am fag ngay taw. ²⁴ Fagayu at nadungug ay at nafaning Ku longan kata sik taw at mamatanganan nu gbale. Kanya fag taw nalusung at kabasadan anggan ndasug sas batu. ²⁵ Ay dewa gbiya dawdaw nu galsak. Ay at safa indaul. Ay at tagmara nafusfus sa at bale. Ay at bale di nlayug. Anway at turuk at kabasadan ndasug tuway sas batu. ²⁶ Ay fagayu taw dewa at nadungug Ku longan ay nu dway nafaning, kanya kata way sik taw at yud e fagsafulun. Anway nu kamale mafadfalianan way sigad sisad lagnas. ²⁷ Ay gbiya yangay dawdaw nu galsak. Ay at safa indaul. Ay at tagmara nafusfus sa at bale. Ay ka fag bale nagfuan ay taba wa inrasras. ²⁸ Ay Isus nu ntabu wa nu gfoyung, at ngay tagdungugan nadulawan sas Isus At foyungan. ²⁹ Teway Isus nu gfoyung, kata tuwa daw sik fun at ke fagmadaragangun. Ay di kata Taw-Naseg at ngay tagfasaful nu nafoyung.

¹ Ay Isus gina indaga siginans muyud, ngayuk taw nangalo Anya. ² Ay rodi sik ama tagabangbang inkakbang ay inlub sas Isus At akbang. Ay igseg Anya te, Ku Fun, ku Fun. Nasaful aw te, mafafiya O angku, nu kaumsig O. ³ Ay Isus nafalugde At take ay natayuk sat ke dailan te, Kin. Kaumsig Aw. Afiyai wan. Ay rodi tv infiya wa fiya aro tagabangbang. ⁴ Ay rodi Isus taba wa nalong anya te, Lag kamansulit sa tibak taw. Loi way fagtvngvd ay falagi way am bilug sas taganyun. Ay foni tuwa anya sik famanyun, kata ebi Ku-Unga At-Longan at suguan. Laman am famasaful sasa ngay taw te, nfiya wo. ⁵ Ay gina Isus indasug sas Takafanyu-At-Fulan, sanya sik fun tagbarangian inkakbang sas Isus. Ay matvngvd nu get sas Isus te, ⁶ Ku Magurang. Ku fanuguan matagilid way sasad igian sa ku bale ay dua malelegan. Ay kasait way dawdaw at bilug fagdaul. ⁷ Ay Isus igbalus anya te, Kin. Nangufud Akro emu, laman nanfafiya Aw am fanuguan. ⁸ Ay kanya fag fun tagbarangian igbalus Isus te, Lagi, ku Magurang. Anway aw ku e fagmasineun nu sak waro O daw sumakbo sa ku bale. Balikam, e longani way fagtvngvd ay, umfiya waro ku fanuguan. ⁹ E fun akyay si ku tungud. Ay e ngay tagbarangian akyay si ku daga tv. Ay nu lumong aw sat sadi te, Loi wa sanya. Kanya lumo wa fiya. Ay nu lumong aw sat sadi te, Stei. Kanya stumiye wa fiya. Ay nu lumong aw sa ku fanuguan te, Buli. Kanya ro nanbul wa fiya. ¹⁰ Ay Isus nu nadungug katanya at longan, nailatan dawdaw. Ay nalong sa at ngay tagalo Anya te, Matuyan iglong Aw ayu te, Kwa batang e nadungug at kinfandiug takatvngvd anya dewa sas fagayu Taw-Naseg. ¹¹ Ay matuyan iglong Aw ayu te, At ngayuk taw umdasug ban siginans fakamenitan ay siginans fakayabian ay malungung fangon gasfuan Abrayam ay Kanya-At-Naasean ay anggan Takamilug sas Funbalugu-At-Fagmagurangan-Taw. ¹² Ay at ngay Taw-Naseg dewa gamatangan te, Ami way long fagfulan Funbalugu-At-Fagmagurangan-Taw, roro e mukas way ban anya sat ngaba dayu sasad marum. Sas faguywayan ban dawdaw, ay anggan sas fagfaringgitan at bagang. ¹³ Ay Isus nalong sanya fag fun tagbarangian te, Ulii wan. Umsure wa ro sa emu nus nga setvngvd am fakafandiugun. Ay gina Isus ge longan, at fanuguan roro infiya wan. ¹⁴ Ay Isus nu nasakbo sas Takata-Sik-Batu at bale, nalag Takata-Sik-Batu at nugangina sisad igian gadailan masugba daw at bilug. ¹⁵ Ay Isus natayuk ma sat daluap infiya wa daw. Ay ka fag mangena inlindug ay kanya tuwa tagtarabang Isus. ¹⁶ Ay dewa mayabi, e nataban yay sas Isus sik ngay taw at ke mafurat fag falad. Ay Isus At e longan mafaayiyan ka fag mafurat fag falad siginans ka fag ngay taw. Ay mafafiya fagayu at ke dailan. ¹⁷ Laman ingurungan Funbalugu-Nabalabag, Funbalugu ebi At taglong, at naguna nafoyung te, Kanya wan tagbul tam fagmamomuyun ay anggan At mafafasat dayu tam dailan. ¹⁸ Ay bandi ban Isus nu nalag sik ngay taw ayuwayu nu kadasug ay nu kasafung Anya, Kanya nalong sa At ngay tagadal te, Bastam. Lumo watam sas dife lino. ¹⁹ Ay rodi sik Taw-Naseg at tagfasaful nangakbang sas Isus ay nalong te, Em Takamoyung. Nangalo akwa Emu nus nga nday nu glo O. ²⁰ Ay Isus nalong anya te, Amatangani. Sik idu talun e faglutan tuwa si sik buknga. Ay sik manuk tungud e fagsubukan tuwa mandi. Ay roro Aw, Taw-At-Baguama, da Kwa batang e faglugoan si sik buknga laman nantangilan. ²¹ Ay sadi ya fiyak taw at tagaaloun sas Isus ay nalong Anya te, Anggan aw, Ku Fun. Nangalo akyay ban Emu. Ay katsi igfanya akyay, ay nansandig akyay ban ku mama. ²² Ay Isus nalong anya te, Aloi wa Angku. At masine tagakateun yangay fag taw at nansandig ro at kinkate. ²³ Ay Isus nasakay wa sa sik balutu, ay At ngay tagadal nangufud Anya gina glo. ²⁴ Ay rodi gina sasa ngaba lino, indasug sik bagyu fulug. Ay at lumbak gtabun wayu daw sa at balutu. Ay Isus igtiug wadi. ²⁵ Ay At ngay tagadal inkakbang sas Isus ay igfanguwig Anya te, Em Fun, em Fun. Balabagi emi. Umkafuy wa ro tam. ²⁶ Ay Isus iglong anya te, Taw ro ay fakalimuun. Sik ngay taw way am at yud matvngvd at fakafandiugun. Ay Isus inlindug ay igsalag at tagmara ay at lumbak. Ay rodi tv insiwang wa daw. ²⁷ Ay Isus At ngay ufud nafanlinggatanan te, Sinu Tuy fag taw takatvngvd anya At fagbulun. Madyay dewa tagmara ay at lumbak nafaning tuwa dewa sa At longan. ²⁸ Ay Isus ay At ngay tagadal indasug sas dife lino sas Taw-Gerasa fag talun. Ay rodi duwak ama at ke ngay mafurat fag falad insure siginan sa ngay fagsandigan fag luib ay nanfablang Isus. Ay ka fag duwak ama mason nu fangadotama. Ay du e taw malangfe sanya. ²⁹ Ay rodi kanya fag duwak ama nafadaul ngani nu ge longan te, Taw ro Am fagstiyeun sa emi, O Funbalugu-At-Baguama. Go Am fagstiyeun Am fasadan nanfauri wa ro O emi, dewa yud indasug sas fagfaurian fag menit. ³⁰ Ay ginanya sik ngay bukbuk gfangudkudan si mdayu mdayu. ³¹ Ay ka fag ngay mafurat fag falad matvngvd nu glong sas Isus te, Am fasadan nu nangayiyan way O emi, fasakboi tuwa emi sas bukbuk. ³² Ay Isus nalong anya te, Kin. Loi wan. Ay ka fag ngay mafurat fag falad nalfas wa fiya ay natsa wa fiyas basad bukbuk. Ay rodi tv ka fag ngay bukbuk fagayu mafali nu nafandugsunan. Ay taba wa ntong sasad abat. Ay fagayu inkafuy wa sasad lino. ³³ Ay ka fag ngay tagtanud bukbuk nalagyu wan. Ay indasug sas fulan daul. Ay nanfamansulit yay sa tibak taw aro at nalag fag duwak ama ke ngay mafurat fag falad. ³⁴ Ay rodi fagayu taw sas fulan daul nalo wan laman nanlag sas Isus. Ay nu nalag wan, matvngvd nu gayiyan Isus te laman duat sanya si at talun.

¹ Ay Isus nasakay wa sa sik balutu nandife ay ndasug wa sa At fulan. ² Ay rodi e nauba sas Isus sik taw at yud malelegan sisad tagbung at faguban. Ay Isus iglingaman sa ka fag ngay taw te, kafandiug tuwa. Ay nalong yangay sa at yud malelegan te, Sama, lag gafanawa sa am amatanganan. Anway naliam wan am ngay asalanan. ³ Ay rodi Taw-Naseg at tibak tagfasaful igsulitanan sat dayu te, Kanya fag taw At longan mauri way sas Funbalugu baliwa. ⁴ Ay roro Isus nasaful wa mangaro ka fag ngay Taw-Naseg at amatanganan. Ay Isus ginto sa anya te, Taw ro fagmauriun ay amatanganan. ⁵ Amatangani. Inday fag longan at madaragang at kumsure. Nu lumong Aw te, Naliam wan am ngay asalanan. Ay nu lumong Aw te, Malindugi wan ay loi wan. ⁶ Laman ro sumaful am te, Aw, Taw-At-Baguama, e fagmadaragangun Akwa fiya ste swa daga nanfaliam taw at asalanan. Ay rodi Isus glong wa ngani sa at yud malelegan fag taw te, Alindugi. Ay fasani wa am tagbung. Ay ulii wa sa ay bale. ⁷ Ay kanya fag taw inlindug ay noli wa fiya. ⁸ Ay at ngay taw nu nalag, nadulawan dawdaw. Ay igseg Funbalugu te, anway Kanya At nafon fagmadaragangun takatanya sas taw. ⁹ Ay gina Isus nalo sanya ginan, nalag sik taw at ngayan Funbalugu-At-Nafon nu malunggung sas bale fagfonan famanyun sat fun. Ay Isus nalong anya te, Gewan. Aloi Angku. Ay rodi Funbalugu-At-Nafon inlindug ay nangalo wa Isus. ¹⁰ Ay rodi gina Isus igfangon sa sik bale, ngayuk tagbul famanyun sat fun ay manga at yud gfaning sas Taw-Naseg at ugali nasakbo yangay sanya. Ay kanya kon gasfuan Isus ay At ngay tagadal. ¹¹ Ay at ngay Taw-Tagfalayun nu nalag, ginto sas Isus At ngay tagadal te, Taw ro fakatanyaun. Ay Takamoyung nu kon fagfasfuanun sa at ngay tagbul famanyun sat fun ay anggan sa tagasalanan. ¹² Ay Isus nu nadungug at longan, nafafaskudanan te, Sik taw at yud e dailan dua long kaumsig sik tagfafiya. Kayu way at ke dailan takaumsig. ¹³ Amatangani ay sarapi tuy fag Longan at masuad te, Ku fakaumsigun nu kafanyu tuwam ay iba. Anway fakafanyuun amasine yap nu gfon am ay famanyun sa Angku. Anway Ku fagnastiyeun Ku faggewanun sa Angku kayu way at ke asalanan. Ay yaya at masine fag taw. ¹⁴ Ay rodi Uan Tagfasurung at ngay tagadal nangakbang sas Isus ay ginto te, Taw manga ami ay anggan at ngay Taw-Tagfalayun e fagyudun way ami gfangon fag ngay menit. Ay madyay Am ngay tagadal du e fagyudun gfangon fag ngay menit. ¹⁵ Ay Isus nafafaskudanan te, Go at bagu indaduwa fag mangama at ngay fagues kabalu way dewa te sanya wan ka fag mangama. Ay go igdi. Ay roro sa bans tibak menit gina e tumaban kanya fag mangama. Ay kaduge yay ban anya nu e fagyudun gfangon fag ngay menit. ¹⁶ Ay sik taw dua nafagamut sik yud mafegusan fag falefe sa at dan fag lanbung laman at fanfaut at sulbung. Anway nu nafagamut tuwa, ay bandi nu nafegus wan ka fag lanbung, at bagu fag falefe umkitut yay ban. Ay rodi ngap umdaul wan at sulbung. ¹⁷ Ay manga sik taw dua gtalin at bagu fag uwat buadan safa sa at dan fag fagsuadan balat balan. Anway nu natalin way sanya, gina at bagu fag buadan safa lumafas, fabaga wa ngap at fagsuadan. Ay ka fag fagsuadan umbaltak wan. Ay at talinan umbusbus wan. Ay at fagsuadan du e fanambagun. Yaya, di katanya. Sik taw at fagtalinan antuwa at bagu fag buadan safa sa at bagu fag fagsuadan balat balan. Laman fagduwa masine tuwa. ¹⁸ Kaduge Isus ge longan, indasug Taw-Naseg at magurang bale fakafulan at sadi. Ay kanya inlub sas Isus akbang ay igseg. Ay igfoyung sas Isus te, Ku baguina bagu yay inkate. Ay saturo adasugi ngay ro sa ku bale. Ay fatayuki ngay ro Am daluap sa anya umleleg yay ro. ¹⁹ Ay Isus inlindug ay nangalo wa ka fag magurang, ay anggan At ngay tagadal. ²⁰ Ay sanya sik mangena, 12k banwa yud batang katuas nu gfangigusan. Ay rodi kanya inkakbang sas Isus day guyuy. Ay nalangbud sumyu sas Isus At fungfung lanbung. ²¹ Anway at amatanganan te, Dewa ro fagtvngvd At umut ku natayuk, nafafiya ro angku. ²² Ay Isus inbiling wa daw ay nalag ka fag ina, ay nalong anya te, Fagina, lag kalimu. Am fakafandiugun tagfafiya emu. Ay rodi tv ka fag ina infiya wan at dailan. ²³ Ay Isus gina indasug sa aro fag magurang at bale, nalag at ngay tagfauni tulali ay anggan sik ngay taw tagfangaringang ayuwayu. ²⁴ Ay Isus nalong te, Loi wan, anway tuy fag magurang at baguina dia nkate. Gtiug wadi. Ay ka fag ngay taw kase gafayudun sas Isus. ²⁵ Ay gina e nafalaklo fagayu taw siginan sad bale, Isus nasakbo ay nated ka fag baguina at daluap. Ay ka fag baguina inlunggung. ²⁶ Ay ka fag fagbulun indungug sas fagdaul sanya fag talun. ²⁷ Ay gina Isus nalo sanya ginan, roro duwak taw yud glag galo Anya. Ay ka fag duwama nauro te, Afanyui emi, O fun Fakafanyuun-At-Kadagdagan. ²⁸ Ay Isus nu nasakbo sa sik bale, anggan kanya fag duwama at yud glag nasakbo yangay, ay inkakbang sa Anya. Ay Isus nainto sa anya te, Go gafanud tuwam te, Mafabul Aw. Ay ka fag duwama nabalus Isus te, Kin, em Fun. ²⁹ Ay Isus natayuk sanya fag duwama mata te, Kin. Umsure waro sa ayu nus nga setvngvd ay fakafandiugun. ³⁰ Ay rodi ka fag duwama glag wa daw. Ay matvngvd Isus nu glong sa anya te, Dungugani Angku. Lag foyung sas taw aro Ku fagbulun. ³¹ Ay dewa katanya, ka fag duwama nalo wan ay nafoyung ngap karo nus nga sinu at nalag fag taw sanya fag talun. ³² Ay gina aro fag duwama at yud glag nalo, e nataban yangay fiya sas Isus sik taw yud mafae longan ay e mafurat fag falad. ³³ Ay Isus nu naayiyan wa ka fag mafurat fag falad siginan ka fag taw, rodi ka fag taw mafae longan tuwa. Ay at ngay taw nadulawan dawdaw te, Dua ami batang e nalag takatvngvd anya at fagbulun sas fagdaul talun Tagagbuan. ³⁴ Ay roro at ngay Taw-Tagfalayun igsulitanan te, Isus long At fagmadaragangun at fagmafaayiyanun at ngay mafurat fag falad siginan way long at ngay mafurat fag falad at fun. ³⁵ Ay Isus nalo wa sasa ngay fulan daul ay sasa ngay fulan sirut, laman nanfoyung sanya sas Taw-Naseg at ngay bale fakafulan. Ay At foyungan sanya at Masine-Fag-Barita sas Funbalugu-Nu-Gmagurang-Taw baliwa. Ay Isus nafafiya nus nge wayin at taw dailan ay nus nge wain at taw at fangasaitun. ³⁶ Ay Isus nu nalag sik ngay taw, kafanyu anya. Anway e fagafanawaun. Ay du e gtarabang anya. Kata way sik ngay tupa yud e gtanud. ³⁷ Ay Isus nafoyung sik fafaskudanan sa At ngay tagadal te, Mabaybay at buadan, roro gsadsadian way at nanbul. ³⁸ Darangini sa at Fun sanya fag gamasun, laman Kanya sumugu ban sik ngay tagbul at buadan sa At gamasun.

¹ Ay Isus nu nafaful wa At tagadal fag 12, nafon sa anya at fagmadaragangun. Laman mafaayiyan at ngay mafurat fag falad. Ay laman mafafiya fagayu at ke dailan ay nus nge wain at fangasaitun. ² Ay kata tuy Isus At-Suguan fag 12 at ngayan te, Simun, ay at tiba at ngayan te, Takata-Sik-Batu. Ay at arian, Butuan. Ay Santiagu, ay at arian, Uan, Funbalugu-Nafon at baguama fag duwa. Ay ³ Takesug-Kabayu, ay Sik-Takali-Sirut, ay Duwak-Nasfuan, ay Funbalugu-At-Nafon, sik tagbul famanyun sat fun. Ay Santiagu, Alfeu at baguama, ay At-Masusuan, ay ⁴ Nadungug, kanya siginans talun Maloban. Ay Segi, kanya siginans Ufat-Fulan-Sirut. Ay kanya at namoyung ban Isus sas mauri fag taw. ⁵ Ay Isus nasugu At Labi-Duwa te, Ay fagloan, lag nandalan sa at Yud-Naseg-Fag-Taw at talun. Ay lag nandalan anggan sas Taw-Fagbantayan fag fulan fagayu. ⁶ Ay fagloan sai yakmans Taw-Tagagbuan. Anway ka fag ngay taw kata way sik ngay tupa at nasaruwayan. ⁷ Ay kaduge am glo, foyungi te, Makbang wan Funbalugu-Nu-Gmagurang-Taw. ⁸ Ay nut sanya am, fafiyai at ngay ke dailan. Ay falelegi at kinkate. Ay fafiyai at ngay tagabangbang. Ay anggan ayiyani at ngay mafurat fag falad siginan ka fag ngay taw. Ay manga am dewa am nafagbulun, lag mandi gfe sali. Madyay dewa Aw nafon ayu Ku fagmadaragangun, du am e fansali. ⁹ Ay lag e ubanan salafi, nus di sirut sa ay fagsuadan. ¹⁰ Ay lag guba bugyas gina am glo. Ay lag faduwa ay lanbung. Ay lag e fanguskus darafa. Ay anggan lag e suan sa ay ngaba dalan. Anway sik taw tagfagbulun, e nafon wa fiya sa anya at nalufuyan. ¹¹ Ay nus nga nday fag fulan nu umdasug am, fangintoi yap sanya te, Sinu ste at masine fag taw. Ay nu e nafoyung tuwa ayu, sanyai way fag bale nu gtiug am, ginanya mandi fag glo. ¹² Ay nu nasakbo am sa sik bale, longi sanya fag taw te, Kaumsig ami nu e fagmasineun ban am. ¹³ Ay sanya fag bale at taw nu kaumsig tuwa nafasakbo ayu, darangini laman Funbalugu nafanabayan anya. Ay roro mangaro sanya, nu dway kaumsig nafasakbo ayu, yaya. Funbalugu At fagmanabayanun wa long si ayu. ¹⁴ Ay nus nga sinu sanya fag bale at taw at yud gfasakbo ayu ay anggan at yud kaumsig nandungugan ay foyungan, gina am bagu lumo sanya ginan fag bale ay sanya ginan fag fulan, farikfiki yap at dafug siginan ay darafa. ¹⁵ Ay matuyan iglong Aw sa ayu te, Gina ban sas fagfasurean asalanan fag ngay menit, Funbalugu nu kafanyu sas fulan Sik-Afugan ay sas fulan Inlubgub, glabi yay ban sirut nu kafanyu sa aro fag fulan. ¹⁶ Katsi nansugu Akwa ayu. Ay loi wan kata sik ngay tupa saswa idu talun. Ay am, tagaki tuwa kata sik ubianun nu matagakan. Ay malukmei tuwa yangay katvngvd sik linatad nu malukme. ¹⁷ Ay matagakani tuwa siginan at tibak Taw-Naseg. Anway kanya yumugfu ban ayu ay mon ban ayu sa ay talun at ngay magurang. Ay malang ban ayu sa at ngay bale fakafulan. ¹⁸ Ay tumaban daw ayu sat fun sirut ay sat fun daul at akbang, anway kafandiug am sa Angku. Ay ginanya at fasakan wa te, laman moyung ban am Ku longan sanya fag ngay fun ay anggan sa at ngay Yud-Naseg-Fag-Taw. ¹⁹ Ay dewa e nataban ban ayu, lag am gafanawa te, Tain ro siring ku longan. Anway ginanya ro e moyung yay ro ayu sa ay amatanganan sik longan at matuyan. Laman ro e foyungan tuwam anya. ²⁰ Anway bunwa am at taglong. Ay Tama yay ro At-Masine-Fag-Falad tagfae longan ayu. ²¹ Ay kaduge ban anya, at fadugsay tumaban ban at fadugsay sa tiba, laman e fate anya. Ay sik ama tumaban way sigad at unga sa tiba, laman e fate anya. Ay sik ngay sisian kadotama ban sa at mangaguyang ay igfafate anya. ²² Ay ginanya ban fag ngay menit, fagayu taw ban umdotama wa ayu, anway kafandiug am sa Angku. Ay roro ngap kayu at nasungatan anggan sas fakatabuan fag ngay menit, umbalabag tuwa. ²³ Ay sa sik fulan at taw nu gfauri way ban ayu, lagyui yap sat fadogan fag fulan. Anway matuyan iglong Aw sa ayu te, dia ban am fafus talun Naseg at ngay fulan, yap ngay Aw, Taw-At-Baguama, umdasug. ²⁴ Sik tagadal dua ban glabi sa at takamoyung. Ay sik fanuguan dua ban glabi sa at fun. ²⁵ Balikam sik tagadal nu katvngvd tuwa at takamoyung. Ay balikam sik fanuguan nu katvngvd yangay at fun. Ay tibak taw nu nafangayan sik fun te, Lango-At-Fun, ay roro nu gfangayan sa at ngay fanuguan, at ngayan glabi yay nu mauri. ²⁶ Ay lag kalimu dewa mauri ban kanya fag ngay taw at fagbulun. Anway nus nge wain dewa nasuksuk katsi, e fasure yay ban fagayu. Ay dewa masuksukan katsi, e sumaful yay ban fagayu. ²⁷ Ay nu gfoyung Aw ayu dewa gyud mafalaganan katsi, am yay ban at moyung sas fagayu taw. Ay ay nadungug dewa sirut naibug sa ay talinga katsi, longi yap ban ay uroi, laman ban fagayu taw dumungug. ²⁸ Ay lag kalimu at ngay tagfate taw anway du e mafafate ay falad. Ay fakalimuun ani tuwa Tagsaful fag duwa, Tagfate ay bilug ay Tagfate ay falad sas Lino-Afuy. ²⁹ Ay at fansali duwak maya, sik salafi daga way sirut, go kin. Ay Funbalugu nasaful way te, ntong wan at sadik maya. ³⁰ Ay labi yay kanya. Funbalugu nasaful nus nga seyu ay buk fagayu. ³¹ Ay nu katvngvd tuwa long anya, lag kalimu. Anway ay kamesugan glabi yay am fiya fiya sik ngay maya. ³² Sik taw nu nafoyung tuwa tiba te, Aw, kafandiug aw sas Isus. Anggan Aw e foyungan Akyangay sa Ku Mama sas Banwa te, Kanya Ku taw. ³³ Roro ngap, kanya fag taw nu kamayud way Angku katsi sa tiba, anggan ban Aw kamayud Akyangay ban anya sa Ku Mama sas Banwa. ³⁴ Lag gamatangan te, Ku fagnastiyeun nanfanabayan Aw at ngay taw ste swa daga. Ku fagnastiyeun da Kwa nanfanabayan. Roro ngap an Akwa nangubanan sik fiso. ³⁵ Ku fagnastiyeun anyay te, nanfasadsamanan Akway at ngay taw. Sik baguama gfaringangan sat tama. Ay sik baguina gfaringangan sat tina. Ay sik nugang fag mangena gfaringangan sat nugangina. ³⁶ Ay ka fag talafuan wa mandi tagfafanggalutan at kalongan. ³⁷ Ay sik taw nu kesug Angku nu dway glabi nu kesug at tama ay at tina, di e fagmasineun sak Aw gfangayan anya te, Ku taw. Ay katanya yangay sik taw nu kesug Angku nu dway glabi nu kesug sat baguama ay sat baguina, di e fagmasineun sak Aw gfangayan anya te, Ku taw. ³⁸ Ay sik taw nu dway gfasan at salibagan kayu ay nangalo Angku, di e fagmasineun sak Aw gfangayan anya te, Ku taw. ³⁹ Ay sik taw nu kesug way at leleg katsi, maliam wa ban at leleg. Ay sik taw at naanyun at leleg katsi, laman Aw at ke fanambagun, kanya long ban e leleg tuwa faggugat. ⁴⁰ Sik taw nu nafasakbo tuwa ayu sat bale, kata wa nu nafasakbo yangay Angku. Ay sik taw nu nafasakbo tuwa Angku, kanya nafasakbo yangay anggan sa At nasugu Angku. ⁴¹ Ay sik taw nu nafasakbo tuwa Funbalugu At taglong, anway at bagu kadasug Funbalugu wa At taglong, at tagfasakbo mul ban sik fanambagun, kata yangay Funbalugu At taglong nu nabul at fanambagun. Ay sik taw nu nafasakbo tuwa sik masine fag taw, anway at bagu kadasug sik masine wa fag taw, at tagfasakbo mul ban sik fanambagun, kata ka fag masine fag taw nu nabul at fanambagun. ⁴² Ay nus nga sinu fag taw at nafon dewa sirut sik taya way mamam fagtvngvd sa Ku tagadal at yud katvngvd tiba, anway kanya Ku tagadal wan, matuyan iglong aw sa ayu te, At tagfon di ban maliam at fanambagun.

¹ Ay nu ntabu wa Isus nu gfoyung sa At 12k tagadal, Isus nalo wan sanya ginan laman nanfoyung sat ngaba dayu fag ngay fulan. ² Ay dewa Uan Tagfasurung sas fakasungsungan, nadungug yay Fagtayukan At fagbulun. Ay nansugu yay at tagadal at tiba sas Isus. ³ Ay kanya nu ndasug, nanginto sas Isus te, Go O wan ebi at nafoyung Tagadasugun. Go kin. Ay go ate bunya O. Ay gfanya yap ami. ⁴ Ay Isus igbalus sas Uan Tagfasurung at tagadal te, Ulii wan ay foyungi sas Uan ay nadungug, ay ay nalag ste ginan. ⁵ At yud glag ebi, katsi glag tuwa. Ay at yud malo ebi, katsi malo tuwa. Ay at tagabangbang ebi, katsi infiya tuwa. Ay at yud gdungug ebi, katsi gdungug tuwa. Ay at kinkate ebi, katsi gleleg yangay. Ay at yud e kwa, katsi e nafadungug tuwa anya at Masine-Fag-Barita. ⁶ Ay sik taw guseganan tuwa nu gdi gfainfolian at amatanganan sa Angku. ⁷ Ay kaduge Uan Tagfasurung at ngay tagadal noli, Isus ginto sasa ngay taw sas Uan baliwa te, Taw ro ay fagnaloun sas talun at yud e taw. Taw sangay ay fagialagun sanya. Go ay fagialagun takata sik sigbo taginkuyusan sas tagmara. ⁸ Ay nu bunyay kanya, nataw tuwa ay fagialagun. Go ay fagialagun antuwa sik taw at ke lanbung at masine dawdaw. Anway at ke lanbung at masine dawdaw, kanya nu gbanwan sa way long tiba tungud fag fun at bale. ⁹ Ay nu bunyay kanya, inday tuwa ro ay fagialagun. Go ay fagialagun antuwa sik Funbalugu At taglong. Ay kin, nu katanya. Iglong Aw sa ayu te, Uan Tagfasurung glabi yay tibak Funbalugu At taglong. ¹⁰ Kanya wanay ebi ebi At-Rirukan at foyungan te, Sumugu Aw Ku suguan laman gumuna Emu. Ay kanya ban tagfasine Am dalan. ¹¹ Matuyan iglong Aw sa ayu te, Fagayu mangena dua gfalangfe sik taw sak glabi Uan Tagfasurung. Ay roro nu antuwa Funbalugu-At-Fagmagurangan-Taw, dewa tiba daga fag taw, kanya glabi yay Uan Tagfasurung. ¹² Ay siginan ngay ebi Uan bagu nanfoyung anggan katsi, Funbalugu-At-Fagmagurangan-Taw inke natakan anway sik ngay madaragang fag taw kaumsig nangaful sanya. ¹³ Anway fagayu Funbalugu At taglong ay anggan Ku-Unga At-Longan nadiuganan nu naguna nafoyung gina Uan Tagfasurung yud indasug. ¹⁴ Ay at naguna at foyungan te, Sik taw at ngayan Funbalugu-Tam-Taw-Yabi-At-Masine umdasug ban. Ay am, nu gafanud tuwam katanya, at masuad te, Umdasug ban Uan Tagfasurung. ¹⁵ Nu e talinga tuwam, dungugani. ¹⁶ Setain ro nu kumata Kyangay katsi fag ngay taw. Kanya mangaro kata way sik ngay sisian tagfangawian. Madyay nu malunggung si way sigad sa ngaba faglanuan ay gfanguruan sa tiba te, ¹⁷ Dewa ami gfantulalian laman guseganan am, am du am nangawian. Ay dewa ami guyway, am du am gauywayun. ¹⁸ Kata tuy Ku fafaskudanan aro at masuad. Uan Tagfasurung nu ndasug e fagyudun kon tiba tibak menit. Ay e fagyudun yangay ginum uwat buadan safa. Ay at ngay taw kalimata way daw te, Uan e mafurat way fag falad. ¹⁹ Ay Aw, Taw-At-Baguama, dewa Aw bagu kadasug, gfangon Aktuwa ay ginum Aktuwa. Ay at ngay taw e nalimataan yay fiya Angku te, Sek. Kanya fag Taw sik tagfangatebo way ay sik taginum way sik fangasigung. Ay madyay Kanya tagfaguesan way sat ngay tagbul famanyun sat fun ay sat ngay tagasalanan sigon. Ay Isus nafoyung yangay te, Sumaful way tam sik taw at mamatanganan at fagbulun gina tam lumag at nafasure siginan at fagbulun. ²⁰ Ay rodi Isus nabaya sanya fag ngay fulan. Anway dewa Isus nafalag ebi At madaragang fag fagbulun, sanya fag ngay taw dua naubun at asalanan. Ay Isus nalong sanya fag duwak fulan te, ²¹ E nanfauri ban sa ayu, fulan Kurasin at ngay taw. Ay e nanfauri yangay ban sa ayu, fulan Fagfanguyangan at ngay taw. Anway nalag wam Ku madaragang fag fagbulun ginanya. Ay nu falag Akdi ro takatanya fag fagbulun sas fulan Batu-Luguy ay sas fulan Faggamatan-Uyang, glugo waro gugat ebi nu naubun at asalanan. Ay nasulun tagfantaras fag lanbung. Ay anggan malunggung way garungan sasad dafug. ²² Ay iglong Akyangay sa ayu fulan Kurasin ay fulan Fagfanguyangan te, Gina ban sas fagfasurean asalanan fag ngay menit, Funbalugu nu kafanyu sas fulan Batu-Luguy ay sas fulan Faggamatan-Uyang, glabi yay ban sirut nu kafanyu sa ayu. ²³ Ay go am wan, Takafanyu-At-Fulan at ngay taw. Go nu gfasad am ayu, madaragang wam sak wam umdasug sas Banwa. Roro ngap nu umdasug ban am, sa way ban at kinbul at talun. Anway nalag wam Ku madaragang fag fagbulun sa ayu. Ay nu falag Akdi ro takatanya fag fagbulun sas fulan Sik-Afugan, satu ro sanya yay ka fag fulan anggan katsi. ²⁴ Ay katsi iglong Aw sa ayu te, Gina ban sas fagfasurean asalanan fag ngay menit, Funbalugu nu kafanyu sas fulan Sik-Afugan, glabi yay ban sirut nu kafanyu sa ayu, am Takafanyu-At-Fulan at taw. ²⁵ Ay rodi Isus igdarangin sa At Tama te, Ku Mama, O wan Banwa at Fun ay anggan daga at Fun. Guseganan Aw sa Emu. Anway nafafalyu Tuwo Ku foyungan at masuad sat mamatanganan fag ngay taw ay sa anggan sat ke fagsafulun fag ngay taw. Ay nafasure Tuwo Ku foyungan at masuad sa takata sik ngay sisian fag ngay taw. ²⁶ Kin, Ku Mama, anway katanya tuwa Am fakaumsigun. ²⁷ Ay Isus igfoyung yangay sat ngay taw te, Ku Mama yay At nafoyung Angku fagayu. Ay du e taw nasaful Ku ugali, Ku Mama way tagsaful. Ay du e taw nasaful Ku Mama At ugali. Aw way, At Baguama, tagsaful. Ay kayu Ku fakaumsigun gfasaful, anggan kanya, sumaful yangay Ku Mama At ugali. ²⁸ Akbangi wa sa Angku, nus nga sinu am takalufuy ay at ke fangubaun mabiat. Ay Aw wan Tagfafiya ay lufuy. ²⁹ Buli Ku fantungud liug ay fatsai yangay ay liug. Ay asafuli fagayu Ku foyungan ayu. Anway mafanyaan Aktuwa ay malukme Aktuwa, ay igfafiya Aktuwa ban ay lufuy. ³⁰ Anway magan way Ku nafon ayu fag fantungud liug ay anggan Ku nafon ayu fag fangubaun.

¹ Ay bandi sik Fakamatoun-Menit Isus ay At ngay tagadal nalo wa sa sik ngabak tanuman. Ay ginanya At ngay tagadal kalunus, ay nadalan sirut nabul tiba at buadan ay naon wan. ² Ay at ngay Taw-Tagfalayun nalag ay nalong sas Isus te, Linggati Am ngay tagadal at fagbulun igbul way buadan. Nu katanya way kamabo way sa Ku-Unga At-Longan sas Fakamatoun-Menit baliwa. ³ Ay Isus nainto sasa ngay Taw-Tagfalayun te, Go sangay di am natap fun Fakafanyuun at fagbulun ebi, gina kalunus ay anggan at ngay ufud sigon gina kalunus. ⁴ Ay fun Fakfanyuun nasakbo sas Funbalugu Bale ay anggan at ngay ufud nangon yangay at Tagsis-Funbalugu-Salubangan-Fag-Fafa. Dewa Ku-Unga At-Longan ebi igsalag te, Dua masine tibak taw nu kon ka fag fafa. Kayu yakman at ngay taganyun takon. ⁵ Ay e sadi ya fiya. Go e tapan yangay am At-Longan te, At ngay taganyun sis Tagbvt-Fag-Bale-Funbalugu dua gfaning Fakamatoun-Menit at ugali, madyay anggan kanya gfagbulunan way ginanya. Ay dewa katanya du e asalanan. Go kin. ⁶ Katsi iglong Akyangay sa ayu te, Katsi at bagu ndasug fag ugali amatvngvdi yap sas Tagbvt-Fag-Bale-Funbalugu at ugali. ⁷ Amatangani Funbalugu At longan te, Ku fakaumsigun nu kafanyu tuwam ay iba. Anway fakafanyuun amasine yap nu gfon am ay famanyun sa Angku. Ay nu nasaful tuwam kanya fag longan at masuad, di am glong te, Ka fag taw e asalanan, roro ka fag taw nu gdi e asalanan. ⁸ Anway Aw wan, Taw-At-Baguama, tagmagurang anggan sis Fakamatoun-Menit. ⁹ Ay rodi Isus nalo wa sanya ginan ay nasakbo sas Taw-Naseg at bale fakafulan. ¹⁰ Ay sanya sik ama at kingong at daluap. Ay sanya fag ngay taw ginto sas Isus te, Sik taw nu gfafiya at ke dailan sis Fakamatoun-Menit, go igfaning yangay sa Ku-Unga At-Longan. Fakatanyaun ka fag ngay taw at fagintoun, anway kaumsig way nu e foyungan sa tibak taw te, Isus long e asalanan. ¹¹ Ay Isus sigon ginto sanya fag ngay taw te, Go ay balan at sadi nu ntong sasad lusung sis Fakamatoun-Menit, go nanbul wam ay balan sanya ginan sad lusung. Go kin. ¹² Ay sik taw at kamesugan glabi yay sik balan, go kin. Nu katanya tuwa, masine sik taw dewa e fagbulun nu masine tuwa dewa sis Fakamatoun-Menit. ¹³ Ay rodi Isus nalong sa ka fag ama at kingong at daluap te, Falugdei am take. Ay kanya nafalugde at take. Ay at daluap infiya wan kata tuwa at sadi. ¹⁴ Ay rodi at ngay Taw-Tagfalayun nalo wan, laman nansulitanan yay te, tain tam fagbulun ban laman nanfate ban tam ka fag Isus. ¹⁵ Ay anway Isus nasaful at ngay Taw-Tagfalayun at fasadan, ay nalo yay sanya ginan. Ay sik ngay taw nangalo Anya. Ay Isus nafafiya ka fag ngay taw ke dailan. ¹⁶ Ay Isus nasalag sanya fag ngay taw te, Lag gfoyung sa ay iba te, Aw at nafafiya ayu. ¹⁷ Fakatanyaun ay, ingurungan ebi ebi At taglong, Funbalugu-Nabalabag, at nafoyung te, ¹⁸ Amatangani tuwa tuy fag longan. Tuy wan Ku Suguan, Ku filian, Ku fakesugun. Ay guseganan Aw dawdaw Anya. Nanfatsi Aw anya Ku Masine-Fag-Falad, Laman ban Kanya moyung Sa at Yud-Naseg-Fag-Taw te, Katsi ban Funbalugu igbalabag wa ayu. ¹⁹ Kanya di ban gfabadbabuan. Kanya di ban gbiya nu ge longan. Ay di ban gbarisanan sasa ngay fulan. ²⁰ Ay dewa e sik sigbo, Kanya di ban iglufut. Ay dewa sik salung gakalayungun, Kanya di ban gfalayung. Ay bandi ban At fagbulun Laman fagayu taw kaumsig at matuyan. ²¹ Ay at Yud-Naseg-Fag-Taw nafanya ban Kanya At fagmadaragangun. ²² Ay e nataban sas Isus sik taw ke mafurat fag falad ay dua glag ay dua mafae longan. Ay Isus nafafiya anya. Ay mafae longan tuwa, ay iglag tuwa. ²³ Ay sanya fag ngay taw nadulawan ay nalodlongan te, Nu ndain tuy wa manga fag taw, fun Fakafanyuun-At-Kadagdagan. ²⁴ Ay at ngay Taw-Tagfalayun nu nadungug ka fag ngay taw at longan, nabalus te, Kanya fag taw nu gayiyan way mafurat fag falad, at fagmadaragangun siginan ways Lango-At-Fun. Anway kanya fag fun, mafurat way fag falad at fun. ²⁵ Ay anway Isus nasaful at ngay Taw-Tagfalayun at amatanganan, ay nafafaskudanan sa anya te, Sik fun ay at ngay taw nu garingangan way faggugat, bandi ban ka fag fun du e fanuguan. Ay dewa sik fulan ay dewa sik talafuan, nu garingangan way faggugat, bandi ban du et sanya. ²⁶ Ay Tagfansalag nu gayiyan yangay Tagfansalag at ngay mafurat fag falad, at fagmagurangan umkafud wan. Ay du e fagmatvngvdun at fagmagurangan. Go kin. ²⁷ Ay Ku fagmadaragangun Ku fagmafaayiyanun mafurat fag falad, nut siginan way ros Lango-At-Fun, daginan ay ngay fanuguan at fagmadaragangun at fagmafaayiyanun mafurat fag falad. Ay ay ngay fanuguan wan tagfoyung sa ayu te, Yaya. Dua matuyan ay amatanganan. ²⁸ Ku fagmadaragangun Ku fagmafaayiyanun mafurat fag falad nut siginan tuwas Funbalugu At-Masine-Fag-Falad, amatangani, Funbalugu-Tuwa-Tagmagurang-Ayu. ²⁹ Go sik takamul maasakbo sa sik madaragang fag taw at bale ay kamul at nanuranan, dewa yud nasalod taguna at madaragang fag taw. Go yaya. Ay kin, nu nasalod tuwa, kanya mafafamul at ngay nanuranan sanya. ³⁰ Ay nus nga sinu nu dway gtarabang Angku, kanya igsalag yangay Angku. Ay nus nga sinu nu dway mafafaful at ngay taw sa Angku, kanya at fagayiyanun way fag ngay taw. ³¹ Ay nu katanya, iglong Aw sa ayu te, Fagayu taw at asalanan, ay fagayu taw at mauri fag longan sas Funbalugu baliwa, mafafaliam tuwa. Ay roro nus nga sinu at ke mauri fag longan sa At-Masine-Fag-Falad baliwa, dua mafafaliam faggugat. ³² Ay nus nga sinu at ke mauri fag longan sa Angku, Taw-At-Baguama baliwa, mafafaliam yay. Ay roro nus nga sinu at ke mauri fag longan sa At-Masine-Fag-Falad baliwa, dua mafafaliam, dewa snga ginain. ³³ At masine fag kayu, at buadan masine tuwa. Ay at yud masine fag kayu, at buadan dua masine. At buadan way tagfasaful sas taw te, go tain ka fag kayu. ³⁴ Kata way am sik ngay dot. Ay fagyudun mafafoyung at masine, anway mauri way am. Sik taw at longan igfaning yangay sa ka fag taw at amatanganan. ³⁵ At masine fag taw, masine yangay at nafasure siginan at amatanganan, siginan ebia taw at namatang. Ay at mauri fag taw, mauri way at nafasure siginan at amatanganan, siginan ebia taw at namatang. ³⁶ Ay igfoyung Aw sa ayu te, nus nga sinu fag taw at nalong at mauri, e minto yay ban anya, gina ban sas fagfasurean asalanan fag ngay menit. ³⁷ Anway am ngay longan wan tagfasaful sas taw te, Go masine tuwam fag taw. Ay go mauri am fag taw. ³⁸ Ay rodi Taw-Naseg at tibak tagfasaful ay tibak Taw-Tagfalayun naet sas Isus te, Em Takamoyung, kaumsig ami nu gfalag O emi sik ke masuad fag fagbulun. ³⁹ Ay Isus nabalus anya te, Fagayu at mauri fag taw kaumsig nalag at ke masuad fag fagbulun. Ay roro dua ban e nafalag anya katsi. Ebi way nu gfalag anya sik ke masuad fag fagbulun, sas Funbalugu At taglong, Sik-Udkuruan. ⁴⁰ Anway kata yangay ebi Sik-Udkuruan nu tuluk menit ay tuluk yabi sasad basad uyang daul, Ku matanya Kyangay ban, Taw-At-Baguama, tuluk menit ay tuluk yabi nut sasad luib. ⁴¹ Ay ebi fag ngay Taw-Ninibe gdog yangay ban gleleg gfasfuan katsi fag ngay taw, gina ban sas fagfasurean asalanan fag ngay menit. Ay ginanya, at ngay Taw-Ninibe nanfasure yay ban katsi fag ngay taw at asalanan. Anway at ngay Taw-Ninibe naubun tuwa at asalanan gina nadungug Sik-Udkuruan at foyungan. Ay amatangani. Aw, At tagste katsi, glabi Kyay Sik-Udkuruan. ⁴² Ay ebi sik mangena, at fun daul sas talun Fakasugbaan, gdog yangay ban gleleg gfasfuan katsi fag ngay taw. Gina ban sas fagfasurean asalanan fag ngay menit. Ay ginanya, ka fag mangena nanfasure yay ban katsi fag ngay taw at asalanan. Anway ka fag mangena ndasug sas fun Mabayan siginans fungfung daga. Laman kaumsig nadungug fun Mabayan at mamatanganan fag longan. Ay amatangani. Aw, At tagste katsi, glabi Kyay fun Mabayan. ⁴³ Sik mafurat fag falad naubun sa aro at fagbanwanan fag taw. Ay nalo wa sa sik buknga at yud e safa. Laman nansarap tibak fagbanwanan. Ay du e nalag. ⁴⁴ Ay ka fag mafurat fag falad gamatangan te, Guli kyay siring sa ebia taw ku fagbanwanan. Ay nu ndasug sanya, manlag di malanu ay masine ay du e iba sanya. ⁴⁵ Ay ka fag mafurat fag falad nansarap yay fitu yak mafurat fag falad laman at ufud. Ay kanya fag fitu glabi yay anya nu mauri. Ay fagayu nu gbanwan, maful wadi. Ay ka fag taw inkugat yay siginan ebia taw nu mauri. Katanya yangay ban anggan sa katsi fag ngay taw at mauri. ⁴⁶ Ay kaduge Isus igfoyung sanya fag ngay taw, roro mangaro indasug Isus At tina talnayan. Ay nafanya sis day bale ay kaumsig nanfamatuan Anya. ⁴⁷ Ay sik taw nafoyung sas Isus te, Snay Am mina talnayan sday bale, gafamatuanun Emu. ⁴⁸ Ay Isus ginto sa tagfoyung Anya te, Sinu Ku mina. Ay sinu Ku ngay fadugsay. ⁴⁹ Ay Isus nafalugde At take sa At ngay tagadal baliwa ay nalong te, Nin sigon Ku mina wan, ay Ku ngay fadugsay wan. ⁵⁰ Anway nus nga sinu tagfaning sa Ku Mama sas Banwa At fakaumsigun, kanya Ku fadugsay wa fag mangena, ay Ku fadugsay wa fag mangama, ay Ku mina wan.

¹ Ginanya fag menit, Isus nalo wan sanya ginan fag bale ay malunggung yay sas tigyangan lino Balulangan. ² Ay sik ngay taw ayuwayu maful Anya. Ay nu katanya, Isus nasakbo yay sasad balutu ay malunggung sanya. Ay at ngay taw malindug way sis tigyangan lino. ³ Ay Isus nu gfoyung sanya fag ngay taw, ngayu At foyungan at fafaskudanan. Ay kata tuy at foyungan te, Ebi e sik taw nu gtanum at fungsuan gfangukasan way. ⁴ Ay nu nafangukasan wan, ay at tiba at fungsuan intong sasad dalan. Ay at ngay manuk mela inful sanya ay nasinduk ay nafamin wan at kintong sanya. ⁵ Ay at tiba at fungsuan intong saswa batu. Ay sanya dua matukba at daga. Ay mafali nu gtugbung teway mayangfis wayay at daga sanya. ⁶ Ay nu nsure wa at menit, at bagu gtugbung kasugba yay. Anway dia ngaba at lalid ay nyango yay. ⁷ Ay at tiba at fungsuan intong saswa madugi. Ay at madugi indaul ay nafaut wan. ⁸ Ay at tiba at fungsuan intong sat masine fag daga. Ay inke buadan long. Ay siginan sik bugas sadi, at nabul at buadan 100k bugas. Ay at tiba 60k bugas. Ay at tiba 30k bugas. ⁹ Nu e talinga tuwam, dungugani. ¹⁰ Ay Isus At ngay tagadal inkakbang sas Isus ay nainto Anya te, Taw ro faggugat am fagfafaskudanun nu gfoyung O sat ngay taw. ¹¹ Ay Isus nabalus anya te, Sa ayu nafon tuwa ayu ay fagmaasafulun te, laman sumaful am at masuksukan sa baliwas Funbalugu-Nu-Gmaurgang-Taw. Ay yaya wa katanya sa tibak taw. ¹² Anway sik taw nu e fagsafulun tuwa, ginanya e gfamut yay ban laman umkayu at fagsafulun. Ay sik taw nu alay way sirut sirut at fagsafulun, e mul wa ban ay gfamin wa ban siginan anya. ¹³ Fakatanyaun, ku fagfafaskudanun nu gfoyung Aw sanya fag ngay taw. Laman kanya dewa glinggat, dua glag. Ay dewa gdungug, dua natogdungug, ay dua sumaful. ¹⁴ Katanya tuway ingurungan wa fiya Funbalugu-Nabalabag, ebi At taglong, at naguna nafoyung te, Dewa ban am nadungug fiya fiya, Faggugat dua ban am gasafulun. Ay dewa ban am nafalingamanun, Faggugat dua ban am natoglag. ¹⁵ Anway kanya fag ngay taw Kata way at yud e amatanganan. Ay at talinga kata way yud gdungug. Ay at mata kata way sik taw at mafutsik. Satu ro nu dia man katanya, At mata iglag tuwa ban. Ay at talinga gdungug tuwa ban. Ay at amatanganan sumaful tuwa ban. Ay nu mbiling di ban sa Angku, Nanfafiya Akyay ban anya. ¹⁶ Ay roro am long, guseganan tuwam, anway am glag tuwam, ay manga gdungug tuwam. ¹⁷ Ay matuyan iglong Aw sa ayu te, Ebi fag ngay taglong ay ebi fag ngay masine fag taw galagun yama ay nalag katsi, ay dia nalag. Ay kanya kaumsig yama gdungug ay nadungug katsi, ay yaya dia nadungug. ¹⁸ Dungugani sa aro Ku fafaskudanan sa baliwa sik tagtanum tagfangukasan at masuad baliwa. ¹⁹ Sik taw dewa nadungug at foyungan sas Funbalugu-Nu-Gmagurang-Taw baliwa, ay nu dway nasaful at masuad. Tagmauri nu ndasug wan, mul wa ka fag foyungan siginans taw at amatanganan. Kata aro fag fungsuan at kintong sasad dalan. ²⁰ Ay at tiba at fungsuan at kintong saswa batu, katanya yangay Funbalugu At-Longan sa sik taw at nadungug. Ay kanya mafali tuwa nu gafanud ay nu guseganan. ²¹ Katanya wayay, dia ntvngvd. Anway dia ngaba at amatanganan, kata sik lalid. Ay dua glugo nu gafanud. Ay nu ndasug ban sik mataka ay sik faurianan anway gafanud sa At-Longan, ay rodi ka fag taw at nadungug naliam wan. ²² Ay at tiba at fungsuan at kintong saswa madugi, katanya yangay Funbalugu At-Longan sa sik taw at nadungug. Ay roro matvngvd wayay ka fag taw at fagafanawaun ste swa daga. Ay at fagusegananun sa way at fagmabalanun. Nu kantanya, kata wa nu nafautan at nadungug At-Longan sat amatanganan. Ay dua nabuadan. ²³ Ay at tiba at fungsuan at kintong sat masine fag daga, katanya yangay Funbalugu At-Longan sa sik taw at nadungug. Ay kanya nasaful tuwa at masuad. Ay kata tuwa nu e buadan. At tiba at buadan 100. Ay at tiba 60. Ay at tiba 30. ²⁴ Ay Isus nafoyung yangay sik fafaskudanan te, Funbalugu-Nu-Gmagurang-Taw kata yangay sik taw nu nafangukasan at masine fag fungsuan sa at ngaba gamasun. ²⁵ Ay kaduge at ngay taw gtiug, sik taw takadotama anya indasug ay nafangukasan yangay sik ngay barit sa ka fag taw ngaba tanuman. Ay rodi tv ka fag taw mauri nalo wan. ²⁶ Ay bandi at natanum natugbung ay nabuadan. Ay anggan at ngay barit indaul yangay. ²⁷ Ay at tagbilug gamasun at ngay fanuguan kakbang ay nanginto sa at fun te, Em magurang, go masine tuwa tam natanum am fungsuan si am gamasun. Go kin. Taw ro ka fag ngay barit fagnafasagbatanun natugbung. ²⁸ Ay ka fag tagbilug gamasun nabalus te, Kanya at takadotama angku at fagbulun. Ay at ngay fanuguan ginto yangay te, Go kaumsig yay o nu gyawa ami katsi dewa e buadan. ²⁹ Ay tagbilug gamasun nabalus te, Lagi. Magulad am tam tanum gina am gulad at barit. ³⁰ Dewa fabayani wan fagduwa nu kadaul. Ay nu famulan wan, moyung kyay ban sa ku ngay tagbul te, Taguna fafuli yap at barit, ay futusi ay ukasi wa sasad afuy. Ay tam tanum long fafuli sa ku bale fagrabasan. ³¹ Ay Isus nafoyung yangay sik fafaskudanan te, Funbalugu-Nu-Gmagurang-Taw kata yangay sa sik rigrig lunga, sik taw at nafangukasan sat gamasun. ³² Ay kanya fag rigrig lunga, dewa tiba daga at alay fag fungsuan. Roro nu natugbung wan ay nu ndaul wan, nalabi yay fiya fiya tibak mababa fag ngay tanum. Sik kayu tuwa sirut. Ay at manuk mela kasubuk tuwa ay sak tuwa gfugad sat langbud. ³³ Ay Isus nafoyung yay fiya sadi yak fafaskudanan te, Funbalugu-Nu-Gmagurang-Taw kata sa sik famabaga tinafay. Sik mangena nabul at famabaga ay nalugu nafagamutan naawat tinafay, kadaul sik sabi. Ay rodi fagayu at naawat mabaga wan. ³⁴ Isus kayu ginan igfoyung sa at ngay taw, igfafaskudanan way. Ay dua gfoyung nu dway e fafaskudanan. ³⁵ Fakatanyaun laman ingurungan ebi Funbalugu At taglong at naguna nafoyung te, Nanfoyung ban Aw sik ngay fafaskudanan. Ay nanfoyung Kyangay ban anggan ebi at masuksukan siginan ngay ebis fagsigadan tam fagdaul daga. ³⁶ Ay rodi Isus nalo wan siginan aro at fagmafulan fag ngay taw. Ay nasakbo sa sik bale. Ay At ngay tagadal nangakbang sas Isus ay ginto Anya te, Foyungi emi Am fafasukdanan sa aro fag barit sas gamasun at masuad. ³⁷ Ay Isus igbalus te, At nafangukasan at masine fag fungsuan, Aw wan, Taw-At-Baguama. ³⁸ Ay ka fag gamasun tam fagdaul daga wan. Ay at masine fag fungsuan, kayu tagfaning sas Funbalugu-Nu-Gmagurang-Taw fag ugali. Ay at barit, kayu tagfaning sas Tagmauri. ³⁹ Ay at takadotama tagfangukasan way ka fag ngay barit, katanya Takamuag-Tiba-At-Fagbulun. Ay at fagbulan, gina ban sa at fakatabuan tam fagdaul daga. Ay at tagbul at buadan, Funbalugu wa At ngay tagbukngan. ⁴⁰ Ay katanya yangay ban at barit gina e faful ay mukas sasad afuy, katanya yangay ban sas fakatabuan fag ngay menit. ⁴¹ Ay Aw, Taw-At-Baguama, sumugu Akban Ku ngay tagbukngan laman nanfasaman kayu tagfe asalanan tiba ay kayu at mauri at fagbulun, siginan Ku-Fagmagurangan-Taw. ⁴² Ay e mukas ban fagayu sasad afuy sas fagbatasan. Sas faguywayan ban dawdaw ay anggan sas fagfaringgitan at bagang. ⁴³ Ay ginanya ban fag menit at ngay masine fag taw nu masulo ban katvngvd tam menit sa at maful sa tam Tama At-Fagmagurangan-Taw. Ay nu e talinga tuwam, dungugani. ⁴⁴ Funbalugu-Nu-Gmagurang-Taw kata yangay sik mesug dawdaw fag nanuranan at malubguban sa sik taw gamasun. Ay bandi tibak taw nalag yay kanya at mesug, ay nafafalyu yay, ay dua gfoyung sa tiba. Ay roro ka fag taw at nalag guseganan dawdaw te, Anya wa long ban kanya fag nanuranan. Ay kanya fag taw nananfesali wan fagayu at fagagbilugun. Laman nansali yangay ka fag gamasun laman anya wa ban anggan at mesug dawdaw fag nanuranan sanya. ⁴⁵ Ay sadi ya fiya at nafafaskudanan. Funbalugu-Nu-Gmagurang-Taw kata yangay sa sik tagfesali nu nansarap sik ke fanambagun fag ale batu. ⁴⁶ Ay kanya nalag sik taw ba batu at sadi glabi tiba nu mafanud. Ay anway ngayu tuway nu kasali, kanya nalo wan ay nananfesali yay fagayu at nanuranan nus nge wain te, laman sumali yangay tiba ba batu at mafanud. ⁴⁷ Ay sadi ya fiya at nafafaskudanan. Funbalugu-Nu-Gmagurang-Taw kata yangay sa sik fanggamat uyang. Ay at ngay taw naukas sasad lino at fanggamat uyang, laman faggamat nus nge wain fag uyang. ⁴⁸ Ay nu nkapnu wa uyang sat fanggamat, ka fag ngay taw naguyud at ba uyang sas tigyangan lino. Ay malunggung yay sanya laman nasuad at masine fag ngay uyang sa at fagsuadan. Ay naukas wan kayu at yud masine fagayu. ⁴⁹ Katanya yangay ban sas fakatabuan fag ngay menit. Funbalugu At ngay tagbukngan gina mdasug ay nanfasadsamanan wa at ngay mauri fag taw siginan at ngay masine fag taw. ⁵⁰ Ay mukas ban at mauri fag ngay taw sasad afuy sas fagbatasan. Sas faguywayan ban dawdaw ay anggan sas fagfaringgitan at bagang. ⁵¹ Ay Isus ginto yangay te, Go nasaful tuwam fagayu Ku longan at masuad. Ay At ngay tagadal nabalus te, Kin wan. Nasaful wami katsi. ⁵² Ay Isus nalong yangay fiya te, Nu katanya, fagayu Taw-Naseg at tagfasaful nu nafaning Funbalugu-Nu-Gmagurang-Taw At ugali, kanya kata sik magurang sanya fag bale. Anway ka fag magurang nafasure siginan at sandigan at bagu fag fagmabalanun ay anggan yangay at taglugo fag fagmabalanun. ⁵³ Ay Isus nu ntabu wa nu gfoyung ka fag ngay fafaskudanan, nalo wan sanya ginan. ⁵⁴ Ay nu ndasug wa sa At fulan turungan, nafoyung sanya fag ngay Taw-Naseg sa at bale fakafulan. Ay at ngay tagdungugan namatangan dawdaw. Ay gidgintoan sa tiba te, Daginan ro Kanya fag taw At fagnasafulun nu gfoyung takatanya. Ay daginan ro anggan At fagmadaragangun at ke masuad. ⁵⁵ Ud nu ndain ro Kanya wa manga ka fag takawat bale at baguama. Go kin. Ay nu ndain ro At tina at ngayan Taglu. Ay nu ndain ro At arian at ngayan Santiagu, ay At-Fakafamutan, ay Nadungug, ay anggan Segi. Go kin. ⁵⁶ Ay go At fadugsay fag ngay mangena ste yangay. Go kin. Daginan ro siring Kanya fag taw At foyungan takatanya. ⁵⁷ Ay ka fag ngay taw kalimata way sas Isus. Ay Isus nalong sanya fag ngay taw te, Funbalugu At taglong e gseg tuwa anya. Ay roro mangaro sis taglong ngap fag talun at ngay taw, ay anggan sigon sis taglong fag bale at ngay taw, du e gseg anya. ⁵⁸ Ay dua ngayu Isus nu gfasure At matvngvd fag fagbulun sanya. Anway sanya fag ngay taw dua ngap kafandiug.

¹ Kaduge niya, Sik-Madaragang-at-Baguama-Sirut, sik fun sirut ginanya sanya fag talun, nadungug Isus At fagmadaragangun. ² Ay ka fag fun nalong sa at ngay fanuguan te, Nu gfasad aw, Kanya Uan way Tagfasurung nadog yay gleleg. Anway madaragang At fagbulun. ³ Katanya way fun Sik-Madaragang-At-Baguama-Sirut at fagnalongun. Anway ebia taw nafated, ay nafasalod, ay nafasungsung wa Uan Tagfasurung. Fakatanyaun ka fag fun at fagbulun anway ka fag fun gfasegsegan Erudias, ka fag fun fadugsay, Takesug-Kabayu mangena. ⁴ Anway ebia taw Uan Tagfasurung nasalag ka fag fun te, Lag katanya. Kamabo way o sa Ku-Unga At-Longan nu gmangenan way o Erudias. ⁵ Ay saturo ka fag fun kaumsig yama igfate Uan. Ay yaya dua mafafate. Anway kalimu way sat ngay taw. Anway at ngay taw gamatangan way te, Uan at sadi wa Funbalugu At taglong. ⁶ Ay bandi fun Sik-Madaragang-At-Baguama-Sirut e fagmafulun gina indasug at fagamatanganun fag menit nu kalangfe. Ay Erudias at baguina igfaumsiganan sa ka fag ngay mangama at maful sanya. Ay fun Sik-Madaragang-At-Baguama-Sirut kaumsig dawdaw. ⁷ Ay kanya nalong nafatuyanan sa ka fag baguina te, Mon kwa ban emu nus nge wain ban am fagetun. ⁸ Ay kanya fag baguina at tina naatul wayay. Ay ka fag baguina inke fagetun siginan at fun te, Foni angku katsi Uan Tagfasurung at alfuyu stiye sa sik laman. ⁹ Ay at fun, dewa kaumsig gfate Uan ebi, katsi kabalu yay. Ay dewa katanya, at fun nasugu wa at fanuguan laman nanfaning ka fag baguina at fagetun. Katanya wa fiya at fagbulun, anway aro taw nafatuyanan wan. Ay manga ka fag ngay mangama at maful sanya nadungug wa nu gfatuyanan. ¹⁰ Ay rodi ka fag fun nasugu wa fiya ay e nalifung Uan at liug ay nabul wan at alfuyu sasad sungsungan. ¹¹ Ay naubanan at alfuyu sa sik laman ay nafon sa ka fag baguina. Ay ka fag baguina nauba yangay sa at tina. ¹² Ay Uan at ngay tagadal nananlag sas sungsungan. Ay nabul Uan at bilug ay nasandig. Ay rodi ka fag ngay tagadal nalo wan, ay nanfoyung sas Isus. ¹³ Ay Isus nu nadungug te, e nafate wa Uan, nasakay wa sa sik balutu ay nalo wan sanya ginan fag talun ay indasug sa sik talun at yud e taw. Ay at ngay taw nu nasaful te Isus nalo wan, nanguyan yay Anya, anway te nu glo sa way sad talun siginan at ngay fulan. ¹⁴ Ay Isus nu ndasug sat dife, nalag wa fiya ka fag ngay taw ayuwayu. Ay Isus kafanyu sanya fag ngay taw. Ay gfafiya at ngay ke dailan. ¹⁵ Ay nut siwas fasudan mata at menit, Isus At ngay tagadal nangakbang sas Isus ay nalong te, Ste fag talun si way at yud e taw. Ay laman kayabi wan katsi, faloi wa ka fag ngay taw sasa ngay fulan sirut. Laman nanbul yay at fafa. ¹⁶ Ay Isus nasugu sa At ngay tagadal te, Dewa yud e nafalo anya. Am waro tagfayafun anya. ¹⁷ Ay At ngay tagadal nalong sas Isus te, Yaya. Iste si emi lima wayk fafa ay duwa way sirutk uyang. ¹⁸ Ay Isus nalong te, Foni Angku. ¹⁹ Ay Isus nalong sanya fag ngay taw te, Malunggungi sanya swa makmak. Ay Isus nagalumutan ka fag limak fafa ay ka fag duwak uyang. Ay natangda sas banwa ay nauseganan sas Funbalugu. Ay rodi nafanramyukan yay ka fag fafa ay nafon sa At ngay tagadal. Ay At ngay tagadal nafon yangay sat ngay taw. ²⁰ Ay fagayu taw sanya at naon, napsug wan. Ay At ngay tagadal nafaful yay at nagsawadan, ay 12 yak sabi at kinkapnu at nafanramyukan fag ngay fafa. ²¹ Ay manga 5000k mangama at naon. Ay saman yay at ngay mangena ay at ngay sisian. ²² Ay rodi Isus nafasakay wa At ngay tagadal sas balutu. Laman at ngay tagadal nangguna wa Anya nangadasug sas dife lino. Ay Isus nafalo wan anggan at ngay taw. ²³ Ay nu nafalo wa ka fag ngay taw, Isus sigon naulul wa sa sik ngabak tubi nasesadian. Laman nandarangin sanya. Ay gina gakaarumun, Isus gsesadian yay sanya. ²⁴ Ay aro at ngay tagadal at balutu ngayayu wan siginans tigyangan. Anway at lumbak kafalang wayay sa at balutu. Ay at tagmara igsalag way at balutu nu galafang. ²⁵ Ay balabag di sdaga ka menit, Isus nalo sasa ngaba tungud lino. Ay nangakbang sa At ngay tagadal. ²⁶ Ay At ngay tagadal naulit Isus nu glo sasa ngaba lino. Ay kalimu dawdaw ay nalong te, Ik. Ik. Sik labang way long nin. Ay kanya at katvngvdan nu kalimu sak nafanguruan. ²⁷ Ay rodi Isus nalong anya te, Fatvngvdi ay amatanganan. Aw wan. Lag kalimu. ²⁸ Ay Takata-Sik-Batu get sas Isus te, Em Fun, laman nu O yay fiya, faloi yangay Angku sasa ngaba tungud lino. ²⁹ Ay Isus nabalus te, Stiyei wan. Ay Takata-Sik-Batu indaga siginan at balutu ay nalo sasa ngaba tungud lino nangakbang sas Isus. ³⁰ Ay Takata-Sik-Batu nu nalag te, gbiya wan nu gtagmara, kanya kalimu. Ay kanya gfasigad wa kabasad, ay nauro te, Ku Fun, Ku Fun, buli angku. ³¹ Ay rodi Isus nafalugde At take ay nated Takata-Sik-Batu ay nalong anya te, O wan sik taw at yud matvngvd am fakafandiugun. Taw ro ngani am fagfainfolianun am amatanganan. ³² Ay gina duwama nasakbo sas balutu, rodi insiwang wan at bagyu. ³³ Ay at ngay tagsisad balutu naseg Isus ay nalong te, Matuyan, O wan Funbalugu-At-Baguama. ³⁴ Ay Isus ay At ngay tagadal nu ndife wan, at fakadasugan sas talun Genesaret. ³⁵ Ay sanya fag talun at ngay taw nu natoglag te, Kanya anwa mangaro Isus, nananfoyung yay sa at tagsafungan fag ngay talun. Ay e nataban sas Isus fagayu at ke dailan. ³⁶ Ay kanya get sas Isus anway e gatayukun sas Isus fungfung lanbung. Ay fagayu at natayuk infiya wan.

¹ Ay ginanya, Taw-Naseg at tibak tagfasaful ay at tibak Taw-Tagfalayun indasug siginans Erusalem ay nangakbang sas Isus te, ² Taw manga Am ngay tagadal at fakamaboun sa tam aguyangan at ugali. Madyay dua gfaning sa nu gfegus baliwa at daluap gina gananfangonun. ³ Ay Isus nabalus sa ka fag ngay taw te, Ay nataw madyay anggan am. Tiba ginan ay fakamaboun sas Funbalugu At-Longan, ay ay fagfaningun anyay sa ay aguyangan at ugali. ⁴ Anway ebi Funbalugu nalong wa te, Esugi tuwa am mama ay am mina. Ay, sik taw nu mauri way at longan sa at tama ay ate sa at tina, e fate wa anya. ⁵ Ay roro ay foyungan nu anway te, At masine sik taw nu nafoyung sa at tama ay sa at tina te, Ku fasad fantarabang ayu, nafon akwa sas Funbalugu. Nu katanya way ay longan, at masuad glong way am te, Lag kesug am mama ay am mina. ⁶ Ay nu katanya way ay longan, nanyud fefanambagun way am Funbalugu At longan. ⁷ Am sik ngay tagfanluk way am. Matuyan ka fag taglong at ngayan, Funbalugu-Nabalabag, ebi ebi at naguna nafoyung sa ayu baliwa te, ⁸ Katsi fag ngay taw nu gseg sa Angku, si at bibig way fagtvngud. Roro ngap sat amatanganan ngayayu way Angku. ⁹ Nu katanya way, du e masuad nu gseg Angku. Anway ka fag ngay taw at foyungan siginan way sik taw at longan. Ay gfanluk way te, Tuy Funbalugu wa longan. ¹⁰ Ay Isus igfaful yay fiya at ngay taw sa Anya. Ay nalong anya te, Dungugani ro Ku foyungan. Ay asafuli ro. ¹¹ Bunwa sik taw at nafat sat basad bibig baliwa tagfafurat anya, tenday fakonun. At tagfafurat sa sik taw at nafalfas way siginan at bibig. ¹² Ay Isus At ngay tagadal inkakbang ay nainto Isus te, Go gsaful Wo te, At ngay Taw-Tagfalayun kalimata nu nadungug Am nalongan aro. ¹³ Ay Isus nafafaskudanan te, Fagayu tagtugbung nu bunway Ku Mama at natanum, e gumulad yay ban. ¹⁴ Fabayani wa anya. Anway ka fag ngay taw takata way sik ngay taw at yud glag, nu nafoyung dalan sa at tiba yangay at yud glag fag ngay taw. Ay fagayu ro kanya umtong sasad tabiyu. ¹⁵ Ay Takata-Sik-Batu ginto sas Isus te, Foyungi emi aro Am fafaskudanan at masuad. ¹⁶ Ay Isus nabalus anya te, Dua manga ro am gfangasaful. ¹⁷ Ay go sangay di am nasaful te, Nus nge wain at nafat sat basad bibig, umdasug yangay sat ungdan, ay bandi sawas afun. ¹⁸ Ay roro at nafalfas siginan at basad bibig baliwa, kanya tagsiginans taw at amatanganan. Ay kanya way tagfafurat taw. ¹⁹ Anway siginan ways taw at amatanganan tagfasure at mauri fag fasadan. Tenday, nu gfate way tiba. Ay nu kamayun way sat tibama mangena. Ay nu kamayun way sa at yud batang e mangama. Ay nu kamul way. Ay nu kamuag way. Ay nu mauri way at longan sa tibak taw baliwa. ²⁰ Kayu niya tagfafurat sik taw. Ay roro sik taw dewa gyud nafegus at daluap gina gananfangonun, kanya dua mafafurat anya. ²¹ Ay bandi Isus nalo wan sanya ginan, ay indasug way sigad sasa ngaba day fulan Batu-Luguy ay fulan Faggamatan-Uyang. ²² Ay rodi sik mangena, sik Taw-Maloban, nalo sanya ay matvngvd nu glong te, Afanyui angku ku Fun, fun Fakafanyuun-At-Kadagdagan. Anway ku baguina e dailan dawdaw siginan sik mafurat fag falad. ²³ Ay Isus dua gbalus anya, nus di sadik tunglus. Ay Isus At ngay tagadal nangakbang sas Isus ay matvngvd nu glong sas Isus te, Sek. Ayiyani wan ka fag mangena. Inlimata wami nu guro gugat gugat siginan em guyan. ²⁴ Ay Isus gbalus te, Ku fagindasugun at masuad saway at naliam fag ngay tupa tagsas Taw-Tagagbuan fagtvngvd. ²⁵ Ay rodi tv ka fag mangena inkakbang sas Isus ay inlub ay igseg Anya te, Ku Fun, ku Fun. Tarabangi angku. ²⁶ Ay Isus igfafaskudanan yay sa ka fag mangena te, Dua masine nu e nabul sisian at fafa ay nu naukas sasa ngay idu riangan. ²⁷ Ay ka fag mangena nabalus sas Isus te, Em Magurang, matuyan Am longan. Dewa katanya, at idu riangan naon yay at ngay nagdakdakan, at kintong siginan at tagbilug fagfangonan. ²⁸ Ay Isus nalong anya te, Fagina, matvngvd am fakafandiugun. Insure wan am fagetun. Ay ginanya ka fag mangena at baguina infiya wan. ²⁹ Ay Isus nalo wan sanya ginan fag talun, ay at dalan sasa ngaba tigyangan Lino-Balulangan. Ay anggan naulul sa sik muyud ay malunggung yay sanya. ³⁰ Ay sik ngay taw ayuwayu inkakbang sa Anya. Ay nataban sanya at yud malo, ay at yud glag, ay at yud mafae longan, ay e tiba yay. Ay at tiba nafatagilid at ngay ke dailan sas Isus akbang. Ay Isus nafafiya fagayu. ³¹ Ay at ngay taw nadulawan nu nalag te, at yud gdungug, gdungug wan. Ay at yud malo, malo wan. Ay at yud mafae longan, mafae longan wan. Ay ka fag ngay taw naseg sas Taw-Tagagbuan at Funbalugu. ³² Ay Isus nafaful sa Anya At ngay tagadal ay nalong anya te, Kafanyu Aw nin fag ngay taw. Anway katsi tulu wak menit nu maful ste si Angku. Ay katsi du e fakonun. Ay Aw Kia kaumsig gfalo anya nu kalunus way ro. Laman ro di mkarum at mata sasa ngaba dalan. ³³ Ay At ngay tagadal nainto Anya te, Daginan ro nu mul ami takayu niya fag fafa, laman sak ro ka fag ngay taw mapsug. Ay nu ste way ngap daw swa bilug talun at yud e taw. ³⁴ Ay Isus nainto sa At ngay tagadal te, Seyu ay ba fafa iste. Ay kanya nabalus te, Fitu. Ay dua ngayu em ba uyang, ay nus tuwa, munsirut ya. ³⁵ Ay Isus nafalunggung wa at ngay taw sanya sa ngaba daga. ³⁶ Ay Isus nagalumutan wa ka fag fituk fafa ay anggan at uyang. Ay nauseganan sas Funbalugu. Ay nafanramyukan wan, ay nafon wa sa At ngay tagadal. Ay At ngay tagadal nafon yangay sasa ngay taw. ³⁷ Ay fagayu taw naon wan ay napsug wan. Ay At ngay tagadal nafaful yay at nagsawadan at nakaramyukan, fitu yak sabi inkapnu. ³⁸ Ay at naon 4000k mangama. Ay saman yay at ngay mangena ay at ngay sisian. ³⁹ Ay Isus nafalo wa ka fag ngay taw. Ay rodi Isus nasakay wa sa sik balutu ay nalo wan sas talun Magadan.

¹ Bandi At ngay Taw-Tagfalayun ay at ngay Taw-Saduseu nangakbang sas Isus. Laman nanfaskud Anya te, go ro Kanya fafalag emi sik ke masuad fag fagbulun siginans Banwa. ² Ay Isus nabalus kanya fag ngay Taw-Naseg te, Gina kayabi nalong am te, Masiwang tuwa ban balabag, madyay katsi maraska tam banwa. ³ Ay nus balabag yay, ay longan ani yap te, Gamoyanun way siring katsi, madyay maraska ay marum tam banwa. Go nasaful wam at fagsafulan sa tam banwa. Ay di am gsaful at fagsafulan sa ban tibak menit te, go setain. ⁴ Katsi fag ngay taw sik mauri way fag ngay taw ay sik ngay takamayun way. Ay at fagialagun sik ke masuad way fag fagbulun fagtvngvd. Ay roro ngap dua ban e gfalag anya. At nafalag anya ebi way fagsadik fagsafulan sa Sik-Udkuruan baliwa. Ay Isus naubun wa ka fag ngay Taw-Naseg ay nalo wan. ⁵ Ay Isus At ngay tagadal nu ndife wan, naliam nu guba at ba yafun. ⁶ Ay Isus nalong anya te, Tagaki at famabaga tinafay siginan at ngay Taw-Tagfalayun ay at ngay Taw-Saduseu. ⁷ Ay At ngay tagadal gsulitanan way sit dayu te, Isus aro At fagnalongun katanya, anway naliam tam guba sik fafa. ⁸ Ay roro Isus nasaful wan At ngay tagadal at sulitanan ay nalong anya te, Sik ngay taw way am at yud matvngvd ay fakafandiugun. Taw ro ay fagsulitananun te, du am e ba yafun. ⁹ Go sangay du am nasaful. Ay go du am namatang ebi fag limak fafa Ku famayafun sas 5000k mangama. Ay go seyu ya, nu kink sabi at kinkapnu at sawad ay nafaful. ¹⁰ Ay anggan yangay fituk fafa Ku famayafun sas 4000k mangama. Ay seyu ya nu kink sabi at kinkapnu at sawad ay nafaful. ¹¹ Taw ro ay fagyudun nasaful aro Ku longan at masuad. Ku longan at masuad bundi sas fafa fiya. Dewa Aw nalong ayu te, Tagaki tuwa at famabaga tinafay siginans Taw-Tagfalayun ay Taw-Saduseu. ¹² Ay rodi tv At ngay tagadal nasaful te, Isus At longan at masuad bundi mangaro te, Tagaki at famabaga tinafay fagtvngvd. Roro at masuad At longan antuwa te, Tagaki sas Taw-Tagfalayun ay Taw-Saduseu at ngay foyungan. ¹³ Ay bandi Isus nalo wan. Ay at fakadasugan sas Takesug-Kabayu-Fun-Sesar fag fulan sa tagsafungan fag ngay talun. Ay nu ndasug sanya, ginto sa At ngay tagadal te, Sinu Aw, unu, Taw-At-Baguama, at ngay taw at longan. ¹⁴ Ay At ngay tagadal nabalus te, Tiba nalong te, Uan Tagfasurung O. Ay tiba nalong te, Funbalugu At ebi fag taglong at ngayan, Funbalugu-Tam-Taw-Yabi-At-Masine O. Ay tiba nalong yangay te, Ebi fag taglong at ngayan, Funbalugu-At-Nafatvngvd O. Ay nu ndain e tiba yay, Funbalugu At taglong ebi. ¹⁵ Ay Isus nainto yangay fiya sa At ngay tagadal te, Ay am magngay. Sinu Aw nu gfasad am. ¹⁶ Ay Simun Takata-Sik-Batu nabalus wa long daw te, O wan Fagtayukan, At Tagleleg-Faggugat-Fag-Funbalugu At Baguama. ¹⁷ Ay Isus nalong yangay anya te, Guseganan tuwo Simun, Sik-Udkuruan at baguama. Du e taw nafoyung emu takatanya. Ku Mama tuwa sas Banwa At nafoyung emu. ¹⁸ Ay glong Kyangay sa emu te, O wan Takata-Sik-Batu. Ay nanfaful ban aw Ku ngay taw stiye fag Batu. Ay fagayu at mauri at fagmadaragangun ay anggan fakateun di ban e mabo Ku nafaful Ku ngay taw. ¹⁹ Ay mon Kua ban emu Funbalugu-Nu-Gmagurang-Taw at fanluang. Ay nus nga setaw am nasalagan ste swa daga, anggan Funbalugu sas Banwa igsalag yangay. Ay nus nga setaw am yud nasalagan ste swa daga, anggan Funbalugu sas Banwa di yangay kasalag. ²⁰ Ay rodi Isus matvngvd nu gsalag sa At ngay tagadal te, laman dua gfoyung sa tibak taw te, Aw Fagtayukan. ²¹ Siginan ginanya, Isus gfasigad nafaguna nafoyung sa At ngay tagadal te, Bandi ban lumo Akwa sas fulan Erusalem. Ay sanya ban nu maris Aw ngayuk mataka siginans Taw-Naseg at ngay magurang, ay at ngay taganyun daul, ay anggan at ngay tagfasaful. Ay e fate wa ban Angku. Ay sa bans fatuluk menit, gdog Kyangay gleleg. ²² Ay Takata-Sik-Batu nataban Isus sat dayu ay igsalag Anya te, Yaya. Wo mkatanya, ku Fun. Funbalugu tuwa nangus At dumingding Emu, laman dua mdasug sa Emu takatanya. ²³ Ay Isus inbiling ay nalong sas Takata-Sik-Batu te, Lag ste o, kata way o Tagfansalag. O kata way o gsalag Angku. Anway am amatanganan kata way sik taw at amatanganan. Ay wa kata Funbalugu At amatanganan. ²⁴ Ay rodi Isus nafoyung sa At ngay tagadal te, Sik taw nu kaumsig nangalo Angku, ubuni tuwa at fakaumsigun mandi. Ani way fasani at salibagan kayu, ay aloi way Angku. ²⁵ Anway nus nga sinu fag taw nu kesug way at leleg katsi, maliam wa ban at leleg. Ay nus nga sinu at naanyun at leleg katsi, laman Aw At ke fanambagun Aw, kanya long ban e leleg tuwa faggugat. ²⁶ Tain, nu kin ban, sik taw at fanambagun, dewa nafabul at fagdaul daga at nanuranan, ay nu naliam way ngap ban at leleg. Ay dewas nga seyu seyu sik taw at nafon, dua ban mafafaleleg anya nu nkate wan. ²⁷ Anway Aw, Taw-At-Baguama, umdasug ban Aw stiye e fagmadaragangun aw siginan Ku Mama, fasfuan At ngay tagbukngan. Ay, Ginanya ban gfafoli Akyay ban sas fagayu taw nus nga se taw at nafagbulun. ²⁸ Ay matuyan iglong Ku ayu te, Am tiba at malindug ste katsi di am umkate dyap ngay nalag Angku, Taw-At-Baguama, nu kadasug Aw laman Nanmagurang-Ku-Ngay-Taw.

¹ Ay sas faunumk menit Isus nataban Takata-Sik-Batu ay Santiagu ay anggan Uan, Santiagu at arian. Ay kayu way niya at naulul sa sik muyud ngabat yud e taw. ² Ay inbali wan Isus At bilug gina sit tibama buknga. Ay Isus At mata nu masulo katvngvd tam menit. Ay anggan At lanbung inlagsi katvngvd yangay sik famusuyan. ³ Ay rodi tv insure yay ebi fag duwak taw at ngayan te, Ku-Unga ay Funbalugu-Tam-Taw-Yabi-At-Masine. Ay kanya igfamatuan sas Isus. ⁴ Ay Takata-Sik-Batu nalong yay sas Isus te, Em Fun. Masine iste yangay ami. Ay nu masine sa Emu, nangawat akyay tuluk fagfanlanbungan. At sadi sa Emu. Ay at sadi sa Ku-Unga. Ay at sadi sas Funbalugu-Tam-Taw-Yabi-At-Masine. ⁵ Ay gina Takata-Sik-Batu ge longan, rodi sik linyabu malagsi nalanbung sanya fag ngay taw. Ay e nae longan sanya ginan sad linyabu te, Kanya wan Ku fakesugun Ku Baguama. Ay guseganan Aw dawdaw Anya. Dungugani tuwa ro Anya. ⁶ Ay ka fag tuluk tagadal, nu nadungug ka fag longan, inkagfu anway matvngvd dawdaw nu kalimu. ⁷ Ay Isus inkakbang sa At tuluk tagadal, ay nafatayuk at daluap sa anya ay nalong anya te, Malindugi wan. Ay lag kalimu. ⁸ Ay ka fag tuluk tagadal gina nalinggat, du e nalag ya at duwa. Isus way fagsadi. ⁹ Ay kaduge Isus ay At tuluk tagadal iglo kadaga siginans muyud, Isus nalong anya te, Agi yap gfoyung sa tibak taw aro ay nalag. Yap ngay ban Aw, Taw-At-Baguama, gdog yay gleleg. ¹⁰ Ay At tagadal fag tulu nainto sas Isus te, Nataw at masuad Taw-Naseg at ngay tagfasaful fagnalongun te, Ka fag taglong at ngayan Funbalugu-Tam-Taw-Yabi-At-Masine umdasug ban taguna. ¹¹ Ay Isus igbalus anya te, Matuyan ebi at longan te, Umdasug yay ban Funbalugu-Tam-Taw-Yabi-At-Masine, laman taguna nanfamasadan yay fagayu. ¹² Ay iglong Ku ayu te, Funbalugu-Tam-Taw-Yabi-At-Masine indasug wan. Ay kanya fag ngay taw dua natoglag te, Kanya wa mangaro. Ay ka fag ngay taw at fagbulun sa anya igfaning way mandi anya at fakaumsigun. Ay katanya yangay ban sa Angku, Taw-At-Baguama, umke faurianan Kyangay ban sanya ginan fag ngay taw. ¹³ Ay rodi tv At ngay tagadal nasaful wan Isus At longan at masuad sas Uan Tagfasurung baliwa. ¹⁴ Ay Isus ay At tuluk tagadal gdog yangay inful sa at ngay taw. Ay at sadi sik taw @anya ginan inkakbang sas Isus. Ay natudan ay get Anya te, ¹⁵ Ku Fun, ku Fun. Afanyui ku baguama. Anway kanya igfadfarangan way ay gadailan dawdaw. Ay ngayu ginan nu kasugba sasad afuy ay anggan nu katong sasad safa. ¹⁶ Ay nataban kyama anya sa Am ngay tagadal. Ay kanya mangaro dia mafafiya. ¹⁷ Ay Isus nabalus te, E, go katanya. Anway te, am katsi fag ngay taw at yud way am kafandiug ay manga at yud way am mamatanganan. Seduge ya ban nu gufud Aw ayu. Ay seduge ya ban nu gfanya Aw ayu nu an am kafandiug. Tabani wa ka fag baguama sa Angku. ¹⁸ Ay matvngvd Isus nu gsalag ka fag mafurat fag falad. Ay rodi ka fag mafurat fag falad naubun wa anya. Ay ka fag baguama infiya tuwa rodi. ¹⁹ Ay At ngay tagadal nangakbang sas Isus sat dayu, ay nanginto Anya te, Taw way manga aro em fagyudun mafaayiyan ka fag mafurat fag falad. ²⁰ Ay Isus nabalus anya te, Teway mafanalo way ay fakafandiugun. Ay matuyan iglong Aw sa ayu te, Ay fakafandiugun dewa kadaul sik rigrig lunga, nu lumong wam sa sik muyud te, Alini wan sanya ginan. Ay kanya maning wa fiya ay longan. Ay mafafabul am nus nge wain. ²² Ay kaduge At ngay tagadal maful sis talun Balulangan, Isus nalong anya te, Aw, Taw-At-Baguama, e tumaban ban Angku sa sik ngay taw laman tumed wa fiya Angku. ²³ Ay anggan igfate ban Angku. Ay nu mkate Akwan, sis fatuluk menit gdog Kyay gleleg. Ay At ngay tagadal nu nadungug katanya, kabalu dawdaw. ²⁴ Ay Isus ay At ngay tagadal indasug sas Takafanyu-At-Fulan. Ay sanya sik ngay tagbul siginans taw sik famanyun sas Tagbvt-Fag-Bale-Funbalugu. Ay ka fag ngay tagbul nangakbang sas Takata-Sik-Batu ay nanginto te, Go ay Takamoyung At ugali mon tuwa ro at famanyun sas Tagbvt-Fag-Bale-Funbalugu. ²⁵ Ay Takata-Sik-Batu nabalus te, Kin tuwa long. Katanya tuwa At ugali. Ay Takata-Sik-Batu nu ndasug wa sas bale, Isus nainto anya mafali te, Simun, go daginan nu gfasad o, at ngay fun ste swa daga at fagbulan fag ngay anyun. Go siginan ka fag fun at ngay taw. Ay go siginan tibak talun at taw, ka fag fun nababoan ebia taw. ²⁶ Ay Takata-Sik-Batu nabalus te, Kin, siginan wa fiya at nababoan ebi fag ngay taw. Ay Isus nalong te, Nu katanya, ka fag fun at taw lag gfon at famanyun. Go kin. ²⁷ Ay dewa katanya, laman at ngay taw di kalimata antam, loi wan sas tigyangan lino ay fatagbungi am fangbis. Ay at taguna fag uyang am nafabul, suangi at bibig ay sanya ginan lumag ro o sik salafi. Ay buli ay foni sas tagbul famanyun. Ay kanya wan Ku famanyun ay anggan am famanyun.

¹ Ay ginanya At ngay tagadal nangakbang sas Isus ay ginto Anya te, Sinu ban tiba tungud sas Funbalugu-At-Fagmagurangan-Taw. ² Ay Isus nagewan sa Anya sik sisian sirut ay nafalindug si At ngay tagadal buknga. ³ Ay Isus nabalus te, Matuyan iglong Aw sa ayu te, Nu dway am umbiling ay gfasaman ay ugali laman kumata am sik ngay sisian sirut, dua ban am umful sas Funbalugu-At-Fagmagurangan-Taw. ⁴ Nus nga sinu at fababaun anya laman kumata tuwa tuy fag sisian sirut, kanya long ban tiba tungud sas Funbalugu-At-Fagmagurangan-Taw. ⁵ Ay sik taw nu nafasakbo tuwa sik sisian sirut, anway kanya igseg Angku, ay kata wa nu nafasakbo Angku. ⁶ Ay nus nga sinu fag taw tagfe asalanan sa sik sisian sirut takafandiug sa Angku, at masine nu e siuk sa sik faglisgisan batu daul sa ka fag tagfe asalanan at liug. Ay e mukas anya sasad lino ngabasad. Laman umkate wan. ⁷ E nanfauri ban ste swa daga fag ngay taw anway e ngay tagfe asalanan wayay. Kin wa fiya, umdasug wa ban fiya tagfe asalanan. Ay e nanfauri yangay ban dawdaw sanya fag tagfe asalanan. ⁸ Ay am daluap at sadi ay ate am darafa at sadi, nu gfe asalanan way emu, lifungi wan ay ukasi wan. Anway amasine yap nu mdasug tuwa ban o sas leleg at yud katabu, dewa yud o e daluap at sadi ay ate yud o e darafa at sadi. Ay at yud masine nu e mukas way emu sas afuy at yud kalayung, nu fagduwa yay am daluap ay am darafa. ⁹ Ay am mata at sadi nu gfe asalanan way emu, guladi wan ay ukasi wan. Anway amasine yap nu mdasug tuwa ban o sas leleg at yud katabu, dewa yud o e mata at sadi. Ay at yud masine nu e mukas way emu sas Lino-Afuy, nu fagduwa way am mata. ¹⁰ Amatangani. Laman dangay kalimata dewa sik sisian sirut. Anway nalong Aw sa ayu te, Ste fag ngay sisian e ngay tagbukngan tuwa sas Banwa. Ay ka fag tagbukngan glag tuwa Ku Mama At mata sas Banwa. ¹² Ay go tain nu gfasad am. Sik taw e 100 balan. Ay nu naliam wa at sadi. Go naubun yay manga at 99k balan sanya sas muyud. Ay nalo yay laman nansarap yay at sadi at naliam. Go kin. ¹³ Ay nu nalag wan, at matuyan iglong Kwa ayu te, Kanya nu guseganan nu nalag at naliam, glabi yap nu guseganan sa tiba at yud naliam. ¹⁴ Anway katanya tuwa ay Tama sas Banwa At fakaumsigun. Katanya yangay fiya fiya te, dangai e maliam tuy fag ngay sisian sirut nus di sadi. ¹⁵ Ay fadugsay nu e asalanan sa emu, nanfamatuani way ngap fiya fiya anya sesadi. Ay kanya nu kaumsig tuwa am longan, nanfaguesan yangay ban am sa ay sadi kata ebia taw. ¹⁶ Ay roro mangaro ka fag fadugsay nu dway gdungugan am longan, tabani yap fiya sadi yak taw, ay ate duwak taw, at nangakbang sa ka fag fadugsay. Laman nanfatuyan am ay longan siginans duwak taw, ate tuluk taw. ¹⁷ Ay sanya sigon nu dyay gdungugan sa am ngay fadugsay sigon at longan, nanfoyungi wa long sa at maful Funbalugu At ngay taw. Ay sanya sigon nu dyay gafaningun sa at ngay taw, tapi wa long ka fag fadugsay te, kanya kata way at Yud-Naseg-Fag-Taw ay anggan kata way at tagbul sik famanyun sat fun. ¹⁸ Ay matuyan iglong Kua ayu te, Nus nga setaw ay nasalagan ste swa daga, anggan Funbalugu sas Banwa igsalag yangay. Ay nus nga setaw ay yud nasalagan ste swa daga, anggan Funbalugu sas Banwa di yangay kasalag. ¹⁹ Ay iglong Akyangay ayu te, Duwak taw ste swa daga nu gdiuganan tuwa get sa Ku Mama, Ku Mama sas Banwa nafon ban anya at fagetun. ²⁰ Anway nus nga nday at maful fag duwak taw, ate tuluk taw, sanya nu antuwa gseg Angku, sanya Kyangay sit buknga. ²¹ Ay Takata-Sik-Batu inkakbang sas Isus ay nainto Anya te, Em Fun, go seyu ginan ku iba nu e asalanan sa angku. Go fitu ginan, laman fagayu ginan nafaliam aktuwa. ²² Ay Isus nabalus anya te, Ku famalus emu bundi fitu ginan. Ku famalus an tuwa 77 ginan o gfaliam am iba at asalanan sa emu. ²³ Ay anway katanya, Funbalugu-Nu-Gmagurang-Taw kata yangay sik fun nu kaumsig at ngay fanuguan nu gfasali sa anya at ngay bedan. ²⁴ Ay ka fag fun gina nafasigad natap sik ngay taw bedan, e nataban sa anya at ke bedan fag fanuguan 1000 fisu. ²⁵ Ay ka fag fanuguan dua mafasali takayu niya fag salafi sa at fun. Katanya way ay, at fun nasugu tiba te, Tedi wa daw ka fag taw, ay anggan at mangena ay anggan at ngay sisian ay anggan at nanuranan fagayu. Ay tabani wa sa sik taw takaumsig gagbilug anya. Laman at tagagbilug ban anya gfesali ban sa angku, laman umtabu ka fag fanuguan at bedan. ²⁶ Ay kanya fag fanuguan namalub ay igseg, ay nalong sa at fun te, Fanyai yap te, go ban da kua fafasali fagayu ku bedan sa emu. ²⁷ Ay at fun kafanyu yay at fanuguan ay nafalfas yay ka fag talanan ay nafaliam wan at bedan fagayu. ²⁸ Ay aro taw fag fanuguan nalo wan ay nalag at sadi at ufud fag fanuguan at ke bedan ebia taw sa anya, 100 fisu. Ay at taguna fag fanuguan nated at ufud fag fanuguan si at liug ay nalong anya te, Katsii wan fasalii wa sa angku am bedan fagayu. ²⁹ Ay at ke bedan fag fanuguan nananget te, Fanyai yap. Labon fafasali akyay manga fagayu sa emu bandi. ³⁰ Ay at taguna fag fanuguan dua kafanya. Ay taguna nafasungsung wa ngap at tusama, ay dia ban gfalfas yap ngay ban fafasali at bedan fagayu sa anya. ³¹ Ay at ufud fag ngay fanuguan nu nalag at taguna fag fanuguan at fagbulun, gamatangan dawdaw te, Taw fakatanyaun at fagbulun. Ay kanya nalo wan ay nanfoyung yay fagayu at nalag sa at fun. ³² Ay ka fag fun nafakbang wa fiya sa anya ka fag fanuguan ay nabaya anya te, Mauri way o fag fanuguan. Madyay aw nafaliam aktuwa am bedan sa angku anway ebi naugat wo nu glong o angku. ³³ Ay at masine nu kafanyu tuwo am ufud kata nu kafanyu aw emu. Go kin. ³⁴ Ay ka fag fun indotama dawdaw sa anya. Ay e nataban ka fag fanuguan sat tagfauri. Yap ngay ban fafasali at bedan fagayu sa anya. ³⁵ Ay katanya yangay Ku Mama sas Banwa At fagbulun sa ayu nu dway am naliam fiya fiya ay fadugsay at asalanan sa ayu.

¹ Ay Isus nu ntabu wa nu gfoyung, nalo wan siginans talun Balulangan ay indasug sa sik afud talun Naseg sas dife safa Mababaun. ² Ay sik ngay taw ayuwayu naguyan Anya. Ay Isus nafafiya at ke dailan sanya. ³ Ay tibak Taw-Tagfalayun nangakbang sas Isus ay nanfaskud Anya te, Go sik mangama nu naubun at mangena dewas nga setaw at fanlonganan, go katanya gfaning manga sa Ku-Unga At-Longan. ⁴ Ay Isus nabalus anya te, Go sangay yam e tapan te, Ebi Funbalugu At fagnaawatun taw siginan ngays fagsigadan, naawat wa ama ay ina. ⁵ Ay Kanya ebi nalong wa te, Anway Ku fagnaawatun ama ay ina, sik mangama mubun ban at tama ay at tina ay umkalo nanfaudgufudan tuwa sat mangena. Ay kanya fag duwa insadi wan. ⁶ Ay nu katanya, bunwa duwa, sadi wadi. Ay nus nga sinu Funbalugu At nafasadi fag taw, lag ban e nanfasadsamanan anya. ⁷ Ay ka fag ngay Taw-Tagfalayun nabalus sas Isus te, Nu katanya, taw ro ngani ebi Ku-Unga fagnalongun te, Nu gaubunun wo am mangena, e foni ngay anya sik famasaful te, Katsi naubun kwan. Ay rodi nafalo wa anya. ⁸ Ay Isus nalong anya te, Anway at katvngvdan wa nu gfatalfiun am si ay fasadan, Ku-Unga fagnafabayanun ayu te, nus nga se taw wam. Anway dua katanya ebi taguna. ⁹ Ay nalong Akyangay sa ayu te, Nus nga sinu at naubun at mangena, ay laman at mangena di kamayun, at mangama way takamayun nu ndaduwa way sa tibak mangena. ¹⁰ Ay Isus At ngay tagadal nalong sa Anya te, Ay nu katvngvd wa ngap anya, masine sik taw sesadiani way anggan bandi. ¹¹ Ay Isus nalong sa At ngay tagadal te, Tibak taw dua gadunguganun ka fag longan. Kayu way Funbalugu At nafaamatanganan anya, kayu way niya at tagadunguganun. ¹² Ngayu at fanlonganan sik taw at fagyudun kadaduwa. Tibak mangama dua gatsaun sik mangena, anway katanya wan siginan ngay alay. Ay nu tiba mak mangama at fagyudun kadaduwa, anway e naluasan anya. Ay nu tiba mak mangama fagyudun kadaduwa, laman ban Funbalugu-At-Fagmagurangan-Taw e fanambagun. Nus nga sinu tagadunguganun, dungugani tuwa. ¹³ Ay rodi e nataban sik ngay sisian sirut sas Isus, laman Isus nanfatayuk At daluap sa anya gina gdarangin. Ay Isus At ngay tagadal nasalag at tagtaban ka fag ngay sisian. ¹⁴ Ay Isus igbaya sat ngay tagadal te, Fabayani wan ka fag ngay sisian. Ay lag gsalag anya nu kakbang sa Angku. Anway Funbalugu-At-Fagmagurangan-Taw kata yangay ka fag ngay sisian. ¹⁵ Ay Isus nu nafatayuk wa At daluap sanya fag ngay sisian, rodi Isus nalo wan sanya ginan. ¹⁶ Ay bandi sik baguama nangakbang sas Isus ay ginto Anya te, Ku masine fag Takamoyung, tain manga ban ku fagbulun at masine laman e leleg aktuwa ban at yud katabu. ¹⁷ Ay Isus nabalus anya te, Taw ro at masuad am fagnangintoun Angku sa baliwa at masine. Sadi way At masine. Nu kaumsig o gleleg faggugat, faningi At-Longan. ¹⁸ Ay ka fag baguama nainto yangay te, Nataw ngani ka fag longan ku fagnanfaningun ban. Ay Isus nabalus anya te, Lag o gfate taw. Ay lag o kamayun. Ay lag o kamul. Ay lag o kamuagan nu gfoyung o sa am iba tibak taw at fagbulun. ¹⁹ Ay o esugi tuwa am mama ay am mina. Ay o esugi tuwa am iba katvngvd nu kesug o emu. ²⁰ Ay ka fag baguama nabalus sas Isus te, Nafaning kua gugat kayu niya am longan fagayu. Ay nataw yangay sangay at tiba. ²¹ Ay Isus nabalus yangay anya te, Nu kaumsig o te laman Funbalugu kaumsig am ugali fagayu, loi wan, ay fesalii am nanuranan fagayu. Ay foni am nafabul sasa ngay taw at yud e kwa. Ay e fagmabalanun yangay o sas Banwa. Ay katsi gewan. Aloi wa Angku. ²² Ay ka fag baguama nu nadungug Isus At longan, nalo wan mabaluanan way aba. Anway mabalan dawdaw ay kesug way. ²³ Ay Isus nalong sa At ngay tagadal te, Matuyan iglong Aw sa ayu te, Mataka ban dawdaw sik mabalan fag taw nu kaful sas Funbalugu-At-Fagmagurangan-Taw. ²⁴ Ay iglong Akyangay sa ayu te, Mataka sik idu mabugsul guyuy nu gsulun sa sik fansulbung at sulung. Ay amataka yap kanya sik mabalan fag taw nu kaful sas Funbalugu-At-Fagmagurangan-Taw. ²⁵ Ay At ngay tagadal namatanganan dawdaw nu nadungug Isus At longan. Ay nalong sas Isus te, Ay nu katvngvd wa anya Am longan, sinu ban at kumbalabag. ²⁶ Ay Isus nalinggat sa At ngay tagadal fagayu ay nalong anya te, Nu sik taw way, dua mafafabul. Ay roro Funbalugu mafafabul yay fagayu. ²⁷ Ay rodi Takata-Sik-Batu nalong sas Isus te, Ami, naubun wami fagayu ay nangalo wami Emu. Ay tain ban emi em fanambagun. ²⁸ Ay Isus nalong sa At ngay tagadal te, Matuyan iglong Aw sa ayu te, Am wan at nangalo Angku. Ay gina ban nafabagu fagayu, ay gina ban Aw, Taw-At-Baguama, malunggung sa Ku masine fag faglunggungan daul, anggan ban am sigon umlunggung yangay ban am sa 12k faglunggungan daul. Ay sumarap yangay ban am Taw-Tagagbuan at 12k fulan taw at fagbulun te, Go masine ay go mauri. ²⁹ Ay nus nga sinu fag taw at naubun at bale. Ay at ngay fadugsay. Ay at tama. Ay at tina. Ay at ngay sisian. Ay at gamasun. Laman e fanambagun Aw. Takatanya fag taw katsi fag ngay menit fafabul ban sik 100 ginan, nus nga seyu wa at naubun. Ay bandi e leleg tuwa ban at yud katabu. ³⁰ Ay at tiba tungud fag taw, kanya ban tiba daga. Ay at tiba daga fag taw, kanya ban tiba tungud.

¹ Funbalugu-Nu-Gmagurang-Taw kata yangay sa sik tagbilug tanuman uwat. At tagbilug masurip nu nalo, laman nansarap sik ngay tagfalu anya. ² Ay tagbilug ay at ngay tagfalu nadiuganan te, kayu niya at malayun nu gfe sali sik menit. Ay kanya nasugu at ngay tagfalu sa at tanuman uwat. ³ Ay at kadugayan nu gfangiklugan wa manuk, at tagbilug nalaklo yangay ay nalag tibak taw at maayayagan yud e fagbulun, sanya sas fulan at faglanuan. ⁴ Ay at tagbilug nalong anya te, Ay am sigon, loi wan nanfagbuluni wa sa ku tanuman uwat. Ay ginanya ban nanfon kwa ban sa ayu ku fansali at matuyan. Ay ka fag ngay tagfalu nalo wa fiya sa at tanuman uwat. ⁵ Ay at kadugayan nu maturuk wa at menit, ay anggan nut siwas fanmatawanan at kadugayan at kabatan, at tagbilug nalaklo yangay laman nansarap yay fiya tagfalu anya at tiba kata aro taw fag tagfalu anya. ⁶ Ay at kadugayan nut siwas fasudan mata at menit, at tagbilug nalaklo yangay fiya ay nalag sik ngay taw nu malindug sisad faglanuan. Ay ka fag tagbilug nalong anya te, Taw ro ay fagayayagun kabak menit fangulan sai way ay fagbulun ebi ginan. ⁷ Ay ka fag ngay taw nabalus anya te, Anway du ami e fagfaluun. Ay tagbilug nalong te, Ay kin nu katanya. Ate, loi yap ay nanfagbuluni yap sa ku tanuman uwat. ⁸ Ay nu kasarure wa at menit, ka fag tagbilug nalong sa at tagtanud te, Fastei at tagfalu angku ebi ginan fagayu, ay salii wa sa at nalufuyan. Taguna nu gsali o, sa taguyani fag fulan taw at nananfagbulun sa ku tanuman uwat. Ay anggan sa taguna fag fulan taw at nananfagbulun sa ku tanuman uwat. ⁹ Ay at ngay kindasug fag fulan taw gina sis fasudan mata at menit inkakbang. Ay ka fag tagtanud at fon anya kayu at malayun at fansali sik menit. ¹⁰ Ay at taguna at kindasug fag fulan taw nu gfasad, ayu yap ro nangus at nafon emi. Ay roro at nafon anya kayu way at malayun at fansali sik menit. ¹¹ Ay ka fag fulan taw dua masine at ngay longan sa tagbilug gina nabul at nalufuyan. ¹² Anway at longan sa tagbilug te, At kindasug taguyan fag fulan taw sik gadugayun way sirut nu gfagbulun. Ay ami nu gfagbulun ami, fagngaba tuwa dawk menit dewa dawdaw masugba. Ay nafasudan way o sa emi anggan anya at nalufuyan. ¹³ Ay at tagbilug nabalus anya te, Sama, nu gfasad aw, kua gfanlamangan sa emu. Kayu way niya tam fatuyanan. Go kin. ¹⁴ Kanya ku fansali buli wan. Kayu wa fiya anya. Ay loi wan. Anway gfasudan akway nu gsali aw sa taguyan fag fulan taw ay anggan sa ayu. ¹⁵ Anway ku e asalanan dewa aw mandi gfaning ku fasadan. Anway aw wan at tagbilug. Go kin. Go kadotama o sa am amatanganan anway nafasudan kwayay nu gfon aw sa ayu ay sa ay iba. ¹⁶ Ay Isus nafamut yay At longan te, Nu katanya, at tiba daga katsi, kanya ban tiba tungud. Ay at tiba tungud katsi, kanya ban tiba daga. ¹⁷ Ay Isus nu galoun wa sas Erusalem, nataban wa At 12k tagadal sat dayu. Ay kaduge glo, Isus iglong anya te, ¹⁸ Katsi sa watams Erusalem. Ay sanya ban e moyung ban Angku, Taw-At-Baguama, sas Taw-Naseg at ngay taganyun daul ay at ngay tagfasaful. Ay ka fag ngay taw wa ban at fataban ban Angku te, laman nanfate wa anya. ¹⁹ Ay e tumaban yangay ban Angku sa at ngay Yud-Naseg-Fag-Taw. Ay kanya wa ban fag ngay taw at malingun Angku. Ay at malang Angku. Ay anggan at tumuktuk ban Angku sas salibagan kayu. Ay dewa katanya, sas fatuluk menit gdog Kyay gleleg. ²⁰ Ay duwak baguama at tina nangakbang sas Isus ay gtaban at unga. Ay ka fag duwak baguama at tama at ngayan Funbalugu-Nafon. Ay at tina naarungan sas Isus anway e fagetun sa Anya. ²¹ Ay Isus ginto anya te, Nataw am fagetun. Ay ka fag mangena nabalus sas Isus te, Oi tuwa at ke longan laman sa Am-Fagmagurangan-Ban-Taw ay falunggungi ban tuy ku baguama fag duwa, fasumbaliani Emu. ²² Ay Isus nalong yangay sa ka fag dugsay te, Yaya. Wam gsaful ay fagetun at masuad. Go sangay mafainum ban am siginan Ku faginuman fag taya. Ay ka fag dugsay nabalus Anya te, Kin. Mafainum wami fiya. ²³ Ay Isus nalong yangay fiya anya te, E kin. Minum ban am siginan Ku faginuman fag taya. Ay roro nus nga sinu ban at kumlunggung sumbalian Angku, bundi Aw At nalong. Ku Mama tuwa At ke fasadan at kumlunggung sanya. ²⁴ Ay At 10k tagadal nu nadungug katanya, indotama sa ka fag dugsay. ²⁵ Ay Isus nafaful yay At ngay tagadal sa Anya ay nalong anya te, Nasaful wam sat Yud-Naseg-Fag-Taw at fun, matvngvd dawdaw nu gsugu. Ay anggan tiba daga fag fun nu gsugu matvngvd yangay. ²⁶ Ay roro di katanya sa ayu. Anway baliwa te, nus nga sinu am takaumsig nanmagurang ban, kanya katsi katai ay tagtarabang. ²⁷ Ay nus nga sinu am takaumsig at tiba tungud ban, kanya katsi katai way ay fanuguan. ²⁸ Katanya Kyangay Aw, Taw-At-Baguama. Ku fagindasugun bundi te, Ku iba nantarabang Angku. Ku fagindasugun an tuwa te, laman nantarabang Aw at ngay taw. Ay nanfon Aw Ku leleg, laman Ku naatean nabalabag at ngay taw siginans faurianan. ²⁹ Ay gina Isus ay At ngay tagadal nalo siginans fulan Bangluan, sik ngay taw ayuwayu nangalo Anya. ³⁰ Ay sanya duwak taw yud glag malunggung sas day dalan. Ay ka fag duwama nu nadungug te, Isus galangfeun, kanya nauro te, Em Fun, em Fun. Afanyui yap emi, O fun Fakafanyuun-At-Kadagdagan. ³¹ Ay sanya fag ngay taw matvngvd nu gsalag ka fag duwama laman maragangan way. Ay fangkabat glabi yay aro taw nu guro te, Em Fun, em Fun. Afanyui yap emi, O fun Fakafanyuun-At-Kadagdagan. ³² Ay rodi Isus intuas nu glo, ay nainto sa ka fag duwama te, Tain ay fakaumsigun Ku fagbulun ro sa ayu. ³³ Ay ka fag duwama nabalus sas Isus te, Em Fun, kaumsig ami nangus nu gfafiya O em mata laman glag tuwa ami. ³⁴ Ay anway Isus kafanyu ka fag duwama ay nafatayuk at sumyu sa at mata. Ay rodi ka fag duwama glag wa fiya ay nangalo wa Isus.

¹ Ay Isus ay At ngay tagadal indasug sas fulan Kayu-Buadan-Ya-Ntaba ay sas Muyud-Tagakayuun-Ulibu, makbang way sas Erusalem. Ay Isus nasugu At tagadal at duwa. ² Ay nalong sat duwama te, Nanlagi sanya am dayu fag fulan. Ay nu mdasug am sanya, rodi lumag ro am sik asnu masiukan ay e riangan ay masiukan yangay. Ay luasi wan at rabingan. Ay tabani stiye sa Angku. ³ Ay gina am gluas, sik taw nu gsalag wa ayu, longi anya te, Tam Fun kaumsig yay katsi. Ay kin, rodi ka fag tagsalag nafataban wa fiya sa Angku ka fag duwak balan. ⁴ Ay katanya wa fiya at kinsure, laman ingurungan Funbalugu At taglong ebi at naguna nafoyung te, ⁵ Longi wa sas fulan Malanggangan at ngay taw te, Amatangani tuwa tuy fag longan. Gadasugun wa sa ayu ay Fun. Kanya malukme tuwa, Ay igsakay sa sik asnu riangan. ⁶ Ay At tagadal at duwa nalo wan igfaning Isus At longan. ⁷ Ay kanya nataban sanya at asnu ay anggan at riangan. Ay kanya nasagmak at ngay lanbung sa tungud balan guyuy. Ay Isus malunggung sanya. ⁸ Ay tibak taw fanagmak sasa ngaba dalan at ngay lanbung wan. Ay tiba at fanagmak nauba falungfung kayu. ⁹ Ay at ngay taw, dewa at naguna Isus ay dewa tagaguyanan, gfanguruan te, Gseg watam fun Fakafanyuun-At-Kadagdagan takadasug. Masine tuwa Kanya At fagindasugun At fagmadaragangun siginan was Funbalugu. Gseg watam Kanya tagsiginans Banwa. ¹⁰ Ay Isus gina bagu kadasug sas fulan Erusalem, fagayu at taw sanya glinggat dawdaw ay gidgintoan te, Sinu siring ro Kanya fag Taw. ¹¹ Ay at tibak taw nabalus te, Kanya Isus, ka fag taglong siginans fulan Nasaret sas talun Balulangan. ¹² Ay Isus nasakbo sas Tagbvt-Fag-Bale-Funbalugu ay naayiyan fagayu at tagfesali ay fagayu at nansali sas Funbalugu bale. Ay Isus nafalub at ngay tagfabangsi salafi at fagsandigan. Ay at ngay tagfesali linatad at faglunggungan. ¹³ Ay Isus nalong sat ngay taw te, At-Rirukan nalong wa te, E nafangayan wa Ku Bale sik Bale-Daranginan. Ay yaya, roro mangaro Ku bale nafasik luib way am, fakamulan. ¹⁴ Ay at ngay yud glag ay at ngay yud malo nangakbang sas Isus sas Tagbvt-Fag-Bale-Funbalugu. Ay Isus nafafiya anya. ¹⁵ Ay Taw-Naseg at ngay taganyun daul ay at ngay tagfasaful nalag Isus At madaragang fag fagbulun. Ay kanya nadungug sik ngay sisian sas Tagbvt-Fag-Bale-Funbalugu nu guro te, Gseg watam fun Fakafanyuun-At-Kadagdagan. Ay kanya fag ngay Taw-Naseg kalimata way dawdaw. ¹⁶ Ay nainto sas Isus te, Go du Wo nadungug ka fag ngay sisian at longan. Ay Isus nabalus te, Muag. Nadungug Kwan. Ay am, go du am natap te, Sik ngay sisian Ay sik ngay tagsusu Tagseg fiya fiya Emu. Fakatanyaun ay, nafamasadan Wo tagseg Emu. ¹⁷ Ay Isus nalo wan sanya ginan fag ngay taw akbang ay anggan siginans fulan Erusalem. Ay ndasug sas fulan At-Yud-E-Kwa ay gtiug yay sanya. ¹⁸ Ay balabag di, gina Isus noli sas fulan Erusalem, kalunus wan. ¹⁹ Ay Kanya nalag sik kayu takamuadan sit day dalan, ay nangakbang yama. Roro manlag di du e buadan, at don wadi. Ay Isus nalong sa ka fag kayu te, Lag ban gbuadan faggugat. Ay rodi ka fag kayu nyango wan. ²⁰ Ay At ngay tagadal nu nalag, nadulawan te, Taw ro at faginyangoun daw. ²¹ Ay Isus nabalus anya te, Matuyan iglong Aw sa ayu te, Nu kafandiug tuwam, ay nu gdi am gadayuan sa ay amatanganan, anggan ban ayu ay fagbulun mafakata yangay am aro Ku fagbulun sa ka fag kayu. Ay e glabi yay kanya. Nu lumong ban am snay fag bugsul te, E falin emu ay e mukas emu sasad dagat, maning wa fiya ay longan. ²² Ay nus nge wain ay fagetun gina am gdarangin, nu e fakafandiugun tuwa am, fafabul yangay ban am. ²³ Ay Isus nu ndasug sas Tagbvt-Fag-Bale-Funbalugu, Taw-Naseg at ngay taganyun daul ay at ngay magurang nangakbang sa Anya gina Isus igfoyung. Ay kanya ginto sas Isus te, Sinu at nasugu Emu te, nanfagbulun O katanya. Ay anggan daginan sangay am fagmadaragangun. ²⁴ Ay Isus nabalus anya te, Anggan Aw, e fagintoun Akyangay sa ayu. Ay nu nabalus tuwa ro am Ku fagintoun, anggan Aw, igbalus Akyangay ayu te, Kanya At nasugu Angku Ku fagmafafagbulunun katanya. ²⁵ Ay kata tuy Ku fagintoun ayu. Go daginan Uan Tagfasurung at fagmadaragangun at fagsurungun taw. Go siginans Banwa. Ay go siginans Taw. Ay kanya fag ngay taginto gsulitanan yay gadayuan sit dayu te, Nu lumong maro tam te, Siginans Banwa, Kanya malus ro antam te, Ay taw madyay ay fagyudun gafanud sas Uan at longan. ²⁶ Ay nu lumong maro tam te, Siginans Taw, kalimu way tam at ngay taw te, manlimata ban antam. Anway at ngay taw gafanud te, Uan sik taglong siginans Funbalugu. ²⁷ Anway katanya at ngay taginto nabukngan ay nabalus Isus te, Yaya, du ami nasaful te, go daginan. Ay Isus nalong yangay te, Ay kin. Anggan Aw. Da Kua gfoyung ayu te, Kanya At nasugu Angku Ku fagmafafagbulunun katanya. ²⁸ Ay go tain nu gfasad am. E sik taw at unga duwak ama. Ay kanya nalong sa at kaka te, Loi wan sa tam tanuman uwat ay fagbuluni way sanya. ²⁹ Ay at kaka nabalus te, Kin, ku mama. Ay dewa nalong te, Kin. Yaya roro dua nat sanya. ³⁰ Ay at tama nangakbang yay fiya sa at arian, ay gsud yay at longan. Ay at arian nabalus te, Sek aw. Da kua sanya. Ay dewa nalong te, Da kua sanya, roro namatangan yay te, Dewa siring aw glo kyay, anway dua masine ku longan aro. ³¹ Inday kanya fag dugsay tagfaning at tama at longan. Ay at ngay taw nabalus te, At arian. Ay Isus nalong yangay anya te, Matuyan iglong Aw ayu te, At ngay tagbul sik famanyun sat fun ay at ngay fakamayunan fag mangena gumuna yay ayu nu mful sas Funbalugu-At-Fagmagurangan-Taw. ³² Madyay ebi Uan Tagfasurung indasug wa sa ayu, laman nafoyung wa ayu te, Katanyai tuwa ay fagbulun at masine. Ay roro du am gafanud sa anya. Ay roro at ngay tagbul sik famanyun sat fun ay at ngay fakamayunan fag mangena ngap gafanud tuwa anya. Ay dewa am nalag ka fag ngay taw tagafanud sas Uan, am du am gfasaman ay amatanganan ay du am gafanud sa anya. ³³ Isus nalong yangay te, Sadi ya ku fafaskudanan. At tagbilug daga natanum sik ngay uwat sa at gamasun. Ay anggan naalad at natanum. Ay kanya naali sasad daga at fagturisan buadan. Ay anggan naawat sik bale ngabat, at fagbantayan. Ay kanya nafatanud at tanuman uwat sa sik ngay tagtanud. Ay at tagbilug nalo wan sa sik talun ngayayu. ³⁴ Ay nu makbang wan nu gabulun at buadan, at tagbilug nasugu tiba at fanuguan sa at ngay tagtanud at tanuman uwat laman nanbul si tagbilug fag afud uwat buadan. ³⁵ Ay at ngay tagtanud nayukfu ka fag ngay fanuguan. Ay at sadi nafalang. Ay at sadi nafate wan. Ay at sadi nafalang anya batu. ³⁶ Ay at tagbilug gdog yay nasugu tiba yak fanuguan, ayu yap aro taguna. Ay gsud yay at ngay tagtanud at fagbulun anggan sat fadogan fag ngay fanuguan. ³⁷ Ay at fakatabuan, at tagbilug nasugu wa at baguama te, nu ndain ku ngay tagtanud sumeg yay ku baguama. ³⁸ Ay roro at ngay tagtanud nu nalag wa at baguama, igsulitanan yay sat dayu te, Labon ban at baguama nangagbilug yay at tama at daga. Gewan. Nanfate watam anya. Laman antami wa ban at daga. ³⁹ Ay katanya wayay. Kanya nated ka fag baguama ay naurug ay naukas siginan at tuwa tanuman uwat. Ay nafate wa daw anya. ⁴⁰ Ay nu katanya, at tagbilug nu ndasug, tain at fagbulun sanya fag ngay tagtanud. ⁴¹ Ay at ngay Taw-Naseg at nadungug Isus At fafaskudanan, nabalus sas Isus te, At tagbilug igfate ban kanya fag ngay tagtanud at mauri. Ay nanfatanud yangay ban at tanuman sa tibak tagtanud. Laman nu e buadan yangay, mon ban sa anya sik afud. ⁴² Ay Isus nalong anya te, Go di am natap At-Rirukan te, Dewa at ngay takawat bale kalimata Ka fag Batu at fangawat bale, Kanya tuwa fag Batu At tiba tungud at famatvngvd fagdaul at bale. Katanya wan tam Fun At fagbulun. Ay nu nalag tam, nasaful tam te, Madaragang wa fiya At fagbulun. ⁴³ Katanya way ngani Ku fagnalongun ayu te, Am ban dua ban am umful sas Funbalugu-At-Fagmagurangan-Taw. Tibak taw way ban tagfaning Funbalugu At fakaumsigun at kumful ban. ⁴⁴ Ay nus nga sinu at kumfalang sanya fag Batu at fangawat bale, kanya mangaramyukan wan. Ay nus nga sinu nu Ka fag Batu at fangawat way bale at malang anya, kanya fayamas wan. ⁴⁵ Ay Taw-Naseg at ngay taganyun daul ay at ngay Taw-Tagfalayun nu nadungug Isus At fafaskudanan, natuluyan te, sa wa siring emi baliwa At longan. ⁴⁶ Ay dewa kaumsig ganantedun Isus, kanya kalimu way sat ngay taw. Anway at ngay taw gayup te, Isus At sadi wa Funbalugu At taglong.

¹ Ay Isus gdog yay nafoyung sanya fag ngay taw sik fafaskudanun te, ² Funbalugu-Nu-Gmagurang-Taw kata yangay sik fun nu gfamasadan sik yafun daul anway gafadaduwaun wa at baguama. ³ Ay ka fag fun nasugu at ngay fanuguan, laman nanfat sanya ebia taw at nagewan fag ngay taw. Ay ka fag ngay taw dua mangaro kaumsig sa anya. ⁴ Ay ka fag fun nasugu yangay tibak fanuguan te, Foyungi sa ebi ku nagewan fag ngay taw te, Katsi wan. Nafamasadan akwan ebi ku longan fag yafun. Nafilas akwan ku baka ay ku balan at mataba. Ay fagayu nafamasadan akwan. Adasugi wa sa ku fagfadaduwaan fag yafun. ⁵ Ay kanya fag ngay taw dua gadunguganun at fun at fanuguan at longan. Ay Ka fag ngay taw igfaning way mandi at fasadan ay nalo wan. Ay at sadi sa wa at gamasun. Ay at sadi sat bale fagfesalian. ⁶ Ay tiba nated ka fag fun at ngay fanuguan ay nafauri ayuwayu ay anggan wa nafate anya. ⁷ Ay ka fag fun kadotama dawdaw, ay nasugu at tagbarangian laman nanfate kanya fag ngay tagfate tiba. Ay anggan way nalabe at fulan. ⁸ Ay rodi ka fag fun nalong sa at ngay fanuguan te, Nafamasadan kwan ku longan fag yafun daul. Ay ebi ku nafatagak fag ngay taw roro mangaro dua masine katsi laman saturo an akyama nanfasakbo anya. ⁹ Ay katsi loi wan sasa ngay dalan daul. Ay fagayu ay nalag fag taw sanya foyungi te, laman stumiye sa ku fagfadaduwaan fag yafun. ¹⁰ Ay at ngay fanuguan nalo wa fiya sasa ngay dalan daul, ay gfaful fagayu at nalag fag taw, dewa mauri ay dewa masine fag taw. Ay katsi long inkapnu wan at taw at fagfadaduwaan fag bale. ¹¹ Ay kanya fag fun nasakbo sat fagfadaduwaan fag bale, laman nanlag at maful fag ngay taw. Ay manlag di sadik taw ye lanbung sas famadaduwa baliwa. ¹² Ay at fun nainto anya te, Sama, nataw way am fagyudun e lanbung sas famadaduwa baliwa dewa o nasakbo. Ay kanya fag ama dua mafabalus. ¹³ Ay at fun nalong sa at ngay fanuguan te, Salodi wan ka fag ama at take ay at bitis. Ay ukasi wa sasad marum, sas faguywayan ban dawdaw ay anggan sas fagfaringgitan at bagang. ¹⁴ Ay Isus nalong yangay te, Dewa ngayu at nagewan, sadsadian way at nafili. ¹⁵ Ay Taw-Naseg at ngay Taw-Tagfalayun maful ay igsulitanan yay sit dayu te, Tain nu gfe asalanan tam ka fag Isus siginan At e longan. ¹⁶ Ay ka fag ngay Taw-Tagfalayun nasugu at ngay tagadal gfasfuan at ngay tagseg sas fun Sik-Taw-Madaragang-At-Baguama-Sirut. Ay kanya nalong sas Isus te, Takamoyung, nasaful wami te, matuyan Am longan. Madyay nafoyung O Funbalugu At ugali, ay di O e nasalan. Ay du O e filian taw anway du O naseg sas taw at fagmadaragangun. ¹⁷ Tain Emu Am amatanganan. Foyungi emi. Go manga sik taw nu nafon sik famanyun sas fun Sesar. Go katanya manga igfaning wa Ku-Unga At-Longan. Ay go yaya. ¹⁸ Ay Isus nasaful wa te sik ngay tagfanluk wa fiya. Ay nalong sanya fag ngay Taw-Naseg te, Taw ro ay fagnanfaskudun Angku, am sik ngay tagfanluk way am fag taw. ¹⁹ Foni Angku sik salafi laman ay famanyun. Ay kanya nafon wa fiya Anya sik salafi. ²⁰ Ay Isus igfalag te, Sinu at ke aninu ay at ke rirukan iste sis salafi. ²¹ Ay ka fag ngay taw nabalus Anya te, fun Sesar. Ay Isus nalong anya te, Kin. Foni fun Sesar at nanuranan sas fun Sesar mandi. Ay foni Funbalugu At nanuranan sas Funbalugu mandi. ²² Ay ka fag ngay Taw-Naseg nu nadungug Isus At famalus, nadulawan. Ay kanya naubun wa Isus ay nalo wan. ²³ Ay rodi ro at ngay Taw-Saduseu nangakbang sas Isus laman nanginto Anya. Ay Taw-Saduseu dan wa igfoyung te, Taw at kinkate dua ban gdog gleleg. ²⁴ Ay ka fag ngay Taw-Saduseu nanginto sas Isus te, Takamoyung, Ebi ebi Ku-Unga nafoyung te, Sik mangama nu nkate wan. Ay at sawad at mangena way, dia nke unga. At masine at kinkate at fadugsay fag mangama adaduwai yap sa ebia taw at fadugsay at mangena. Laman umke unga yay, bilang sa ebia taw at fadugsay at unga. ²⁵ Ay ebi fituk sisian sa em fulan, ay fagayu sik ngay ama. Ay at turungana indaduwa sa sik mangena, ay bandi inkate wan. Ay dua nke unga. Ay at arian indaduwa yay fiya sa at kaka mangena. ²⁶ Ay katanya yangay fiya anggan at fadogan at fadugsay. Ay inkate yangay ay dua nke unga. Ay anggan sas faufat fadugsay, ay anggan wa indasug sas fafituk fadugsay. Katanya wan fagayu. ²⁷ Ay at fakatabuan inkate wan anggan ka fag mangena. ²⁸ Ay go gina ban fagayu taw gdog yay gleleg, sinu ban at ke mangena. Anway ebia taw fagayu sisian nasugfunanan namangenan anya. ²⁹ Ay Isus nabalus anya te, Ay fagnasalanun at masuad te, Di am nasaful Funbalugu At-Rirukan. Ay manga di am nasaful Funbalugu At fagmadaragangun. ³⁰ Anway at ngay taw gina nadog gleleg, dua ban igdaduwa. Ay dua ban igfantaw sa at unga. Ginanya ban fagayu taw kata yangay Funbalugu At ngay tagbukngan sas Banwa. ³¹ Ay sa baliwa taw nu gdog yay gleleg, go di am natap Funbalugu At longan sa ayu te, ³² Aw wan Abrayam at Funbalugu. Ay Aw wan Kanya-At-Naasean at Funbalugu. Ay Aw wan Takamilug at Funbalugu. Ay dewa ka fag tuluk taw nkate wan ebi, kanya gdog yay gleleg. Anway Funbalugu bundi at matean fag taw at Funbalugu. Kanya at tagleleg tuwa fag taw at Funbalugu. ³³ Ay sik ngay taw ayuwayu nu nadungug Isus At longan, nadulawan, anway sas Isus nafoyungan. ³⁴ Ay Taw-Naseg at ngay Taw-Tagfalayun nu nadungug te, Isus nababo Taw-Saduseu si At e longan, Taw-Tagfalayun namaful ay nangakbang sas Isus. ³⁵ Ay at sadik Taw-Tagfalayun, at nasaful fiya fiya Ku-Unga At-Longan, igfaskud sas Isus te, ³⁶ Takamoyung, Inday Ku-Unga At-Longan at tiba tungud at matvngvd. ³⁷ Ay Isus gbalus anya te, Esugi am Fun am Funbalugu sas fagdaul am fakaumsigun. Ay sas fagdaul am amatanganan. Ay sas fagdaul am fagsafulun. ³⁸ Kanya tuwa at tiba tungud at matvngvd At-Longan sas fagdaul Ku-Unga At-Longan. ³⁹ Ay sit daga tv fag Longan kata tuy te, Esugi am iba katvngvdi nu kesug o emu. ⁴⁰ Sanya ginan way fag duwak longan, fagdaul Ku-Unga At-Longan ay anggan sigon ebi Funbalugu At ngay taglong at foyungan. ⁴¹ Ay gina at ngay Taw-Tagfalayun maful, Isus nanginto anya te, ⁴² Tain nu gfasad am sas Fagtayukan baliwa. Sinu Kanya ke kadagdagan. Ay kanya nabalus Anya te, fun Fakafanyuun-At-Kadagdagan. ⁴³ Ay Isus ginto yangay sas Taw-Tagfalayun te, Nu katanya, Tain fun Fakafanyuun nu gfangayan Fagtayukan te, Ku Fun, gina At-Masine-Fag-Falad nafaamatanganan anya. Ay fun Fakafanyuun nalong te, ⁴⁴ Tam Fun nalong sa ku Fun te, Malunggungi sa Ku siun baliwa fag day tigyangan, Ay fatsa Akyay Am daga fagmadaragangun tagfabarangian Emu. ⁴⁵ Taw ro fun Fakafanyuun fagnafangayanun Fagtayukan te, Ku Fun, ay nu fun Fakafanyuun way ngap at kadagdagan. ⁴⁶ Ay at ngay taw sanya dua mafabalus Isus, nus di sadik tunglus. Ay siginan ginanya, du e taw ganangintoun sas Isus nus di sadik fagintoun.

¹ Ay Isus nafoyung sat ngay taw ay anggan sa At ngay tagadal te, ² Taw-Naseg at ngay tagfasaful ay at ngay Taw-Tagfalayun nu gfoyung igfaning way fagtvngvd Ku-Unga At-Longan anggan at fagmadaragangun. ³ Ay nu katanya, faningi fagayu at longan ayu. Ay roro lag gfaning at fagbulun, anway kanya nafoyung way ay dua gfaning at foyungan fiya fiya. ⁴ Ka fag ngay tagfoyung nafamut way sik ngay longan laman at ngay taw maning at longan. Ay at famamut kata way sik mabiat fag fangubaun. Madyay kanya oma tagfoyung dua kaumsig gtarabang nus di oma glangbud sumyu. ⁵ Ay roro ka fag ngay tagfoyung at tiba at fagbulun, anway te, laman at taw luminggat anya. Laman kata tuy te, kanya nafadaul at fagsuadan Funbalugu At-Rirukan si at alfuyu. Ay manga nafaaba at buragawan si at fungfung lanbung. ⁶ Ay manga gina e yafun daul at fakaumsigun si tuwas fagunan fag faglunggungan. Ay manga at fakaumsigun si tuwa tiba tungud fag faglunggungan nus nga nday nu ndasug fag bale fakafulan. ⁷ Ay manga kanya nalo saswa bilug fulan te, laman at ngay taw at nanfablang anya, igseg anya. Ay manga at fakaumsigun ngayani tuwa anya te, Em takamoyung. ⁸ Ay lag kaumsig ay iba nu ngayan ayu te, Em takamoyung. Sadi yakman ay Takamoyung. Ay am fagayu tiba, dugsay way am. ⁹ Ay lag gfangayan sik taw ste swa daga te, ku mama, nu bunway gurungan ay tama. Anway sadi yakman ay Tama tagsa tuwas Banwa. ¹⁰ Tam iba lag ngayan ayu te, Em Magurang. Anway sadi yakman ay Magurang, Awi tuwa, ay Fagtayukan. ¹¹ Ay roro ngap nus nga sinu at tiba tungud sa ayu, kanya ay fanuguan way. ¹² Ay sik taw nu gfandaragang way at longan ay anggan at fagbulun, bandi ban e nafababa wa anya. Ay roro sik taw nu nafababaun tuwa at longan ay anggan at fagbulun, bandi ban e nafaabat kanya fag taw. ¹³ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Madyay gsalag way am at ngay taw laman dua kaful ban sas Funbalugu-At-Fagmagurangan-Taw. Ay manga am sigon, du am umful, madyay nus tuwa igsalag yay am takaumsig nangaful. ¹⁴ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Anway sik ngay tagfanluk way am. Madyay gfamin way am burangday at fagagbilugun. Ay manga dewa gfalugo nu gdarangin am, sik famalagan way. Umdasug way ban sa ayu at taglabi fag faurianan. ¹⁵ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Nafabulun am nalo sas fagdaul daga ay anggan sas dagat te, dewa ro sadik taw nu kafandiug ya sa emi. Ay ka fag sadik taw nu kafandiug wa sa ayu ay nu moyung wa ban am anya, kanya glabi yay ban si ayu at mauri gina sas Lino-Afuy. ¹⁶ Ay e nanfauri ban ayu, am takata at yud glag fag ngay taw nu nafoyung am dalan sa ay iba. Ay longan te, nus nga sinu at nafatvngvd at longan nut siginan way Tagbvt-Fag-Bale-Funbalugu, kanya fag longan du e masuad. Ay roro nus nga sinu at nafatvngvd at longan nut siginan wa at nanuranan fag balani sas Tagbvt-Fag-Bale-Funbalugu, kanya fag longan e masuad tuwa. ¹⁷ Am wan takata at yud glag ay at yud mamatanganan fag ngay taw. Go nu gfasad am, inday kanya fag duwa at ke masuad, Tagbvt-Fag-Bale-Funbalugu ay Tagbvt-Fag-Bale-Funbalugu at nanuranan. Tagbvt-Fag-Bale-Funbalugu tuwa at ke masuad, go kin. Anway kayu at nafat sas Tagbvt-Fag-Bale-Funbalugu at nanuranan mafasinean wan sas Funbalugu. ¹⁸ Ay nalong yangay am te, nus nga sinu at nafatvngvd at longan nu siginan way baliwa at fagyagoan fag anyun, kanya fag longan du e masuad. Ay roro nus nga sinu at nafatvngvd at longan nut siginan tuwa baliwa at fagyagoun, kanya fag longan e masuad. ¹⁹ Kata way am sik ngay taw at yud glag. Go inday n@ gfasad am, kanya fag duwa at ke masuad, at fagyagoan ay at fagayagoun. At fagyagoan, go kin. Anway fagayu at nafat sas tungud at fagyagoan nafasine wa sas Funbalugu. ²⁰ Anway katanya, sik taw nu gfatvngvd at longan nut siginan way baliwas fagyagoan, at masuad anway te, kanya nanfatvngvd way at longan sas fagyagoan ay anggan fagayu tagsanya. ²¹ Ay sik taw nu gfatvngvd at longan nut siginan way baliwas Tagbvt-Fag-Bale-Funbalugu, at masuad anway te, kanya nanfatvngvd way at longan sas Tagbvt-Fag-Bale-Funbalugu ay anggan sa Tagbanwan sanya. ²² Ay sik taw nu gfatvngvd at longan nut siginan way baliwas Banwa, at masuad anway te, kanya nanfatvngvd way at longan sas Funbalugu At faglunggungan baliwa ay anggan sa At malunggung sanya. ²³ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Dewa am nafon at fasafuluan kafud sas Funbalugu siginan ay nabul ay famabebanglu ay fakonun, kata alibas. Ay roro ngap naliam wam at matvngvd fag fagbulun. Tenday, nu gfaning am At-Longan. Ay nu kafanyu am ay iba. Ay at matuyan ay fagbulun. Ay at mafanud ngap ay longan. Nu gdi am naliam at matvngvd fag fagbulun, dangai kaliam anggan at alay fag fagbulun. ²⁴ Am takata way am at yud glag fag taw nu gfoyung at dalan sa ay iba. Ay nabul am ay fantaga inaut laman di e bangyus sa ay faginuman. Ay roro ay natulun ngap antuwa sik balan tagbiya. ²⁵ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Dewa am nafegus ay faginuman fag taya at guyuy ay anggan ay fagfangonan fag taya at guyuy. Ay roro sa ay basad mapnu way fakadotamaun ay fakamilugun. ²⁶ Ay am at yud glag fag ngay Taw-Tagfalayun. Falanui tuwa taguna sa ay basad faginuman fag taya ay anggan sa ay basad fagfangonan fag taya, laman anggan sat basad ay anggan sit guyuy malanu tuwa. ²⁷ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Am takata way am sik ngay fagsandigan luib at nafasine dawdaw at guyuy. Ay masine nu kalag at guyuy. Ay roro sa at basad at kinkate way at butul ay mafurat. ²⁸ Katanya yangay ay bilug. Sik taw nu nalag ay bilug, masine dawdaw. Ay roro mangaro sa ay amatanganan tanan wa fagfanlukun ay fagmauriun. ²⁹ Ay e nanfauri ban ayu, am fag ngay Taw-Naseg at tagfasaful ay at Taw-Tagfalayun. Sik ngay tagfanluk way am. Naawat way am at ngay fagsandigan luib laman sas Funbalugu At ebi fag ngay taglong. Ay anggan nafasine yangay am at ngay fagsandigan fag luib sat ngay masine fag taw. ³⁰ Ay nalong am te, Dewa ro ami gleleg gina em ngay aguyangan gleleg, waro ami gtarabang anya igfate, igfataguk Funbalugu At ngay taglong. ³¹ Nu katanya yay ay longan, igfoyung wam te, Ami tagfate yangay ami at kadagdagan. ³² Nu katanya, anggan katsi ay fagbulun igfatunglus yay am ay aguyangan at asalanan. ³³ Am wan takata sik ngay dot, ay takata sik ngay dot riangan. Dua ban am e fangalfasan, anway e fadasug wa ban fiya ayu sas Lino-Afuy. ³⁴ Dewa katanya, sumugu Akyay ban sa ayu Ku ngay taglong, ay Ku ngay mamatanganan fag taw, ay Ku ngay tagfoyung. Ay gfate ban am at tiba. Ay tumuktuk ban am at tiba sas salibagan kayu. Ay malang ban am sak fefakarukan at tiba sa ay ngay bale fakafulan. Ay at tiba gsarap yay am sasa ngay fulan laman nanfauri yay ban am anya. ³⁵ Nasugu ban Aw ka fag ngay taw sa ayu, laman fagayu Ku nafamasadan fag faurianan sas fagayu at nafate sik taw fadasug Akyangay ban fiya sa ayu. Siginan ebi ebi at faurianan sa at nafate Sik-Nauyup. Ay anggan at faurianan sa at nafate Funbalugu-Namatang, Funbalugu-Nafon-Masine at baguama. Kanya ebi ay nafate gina sisad buknga Tagbvt-Fag-Bale-Funbalugu ay at Fagyagoan-Anyun. ³⁶ Ay matuyan iglong Aw ayu te, Umsure wa ban fiya fagayu Ku longan anggan sa katsi fag ngay taw. ³⁷ Taw-Erusalem, Taw-Erusalem. Am wan ebi at nafate Funbalugu at ngay taglong. Ay anggan nafalang am batu ebi At nasugu sa ayu. Ay katsi ngayu ginan Kyama gananfafulun fagayu ay taw, kata sik fanginan nu gfaful at ngay riangan sat daga fakfak. Ay roro dua am kaumsig nangaful sa Angku. ³⁸ Ay katanya wayay, ay bale ban di e gbanwan. ³⁹ Anway nalong Aw ayu te, Katsi ya ban am lumag Angku yap ngay ban am lumong te, Masine O, anway Am fagindasugun Am fagmadaragangun Siginans Funbalugu.

¹ Ay Isus nalaklo siginans Tagbvt-Fag-Bale-Funbalugu. Ay At ngay tagadal inkakbang Anya, laman nananfalinggat Isus sas Tagbvt-Fag-Bale-Funbalugu at ngay afud. ² Ay Isus nalong sa At ngay tagadal te, Nalag wam ngaro isna fag ngay afud. Matuyan iglong Aw ayu te, Roro dua ban e batu magamut, nus di duwa. Fagayu e fatong wa sas daga. ³ Ay gina Isus malunggung sas Muyud-Tagakayuun-Ulibu, At ngay tagadal inkakbang sa Anya. Ay At ngay tagadal nanginto sas Isus sat dayu te, Foyungi emi te, seduge ban nu msure aro Am ngay nafoyung emi. Ay tain ban em faglagan nu sumaful ami te, gadasugun Wo ay anggan gadasugun wan at fakatabuan fag ngay menit. ⁴ Ay Isus nabalus anya te, Tagaki siginan at ngay tagfanluk. Laman di ban am malukan. ⁵ Anway ngayu yay bank taw at kumdasug yangay kata Angku te, Aw wan Fagtayukan. Ay roro kanya at ngay tagfanluk way sat ngay taw. ⁶ Ay dewa ban am e dungganan te, E gbarangian wa sasa ngay talun. Ay dewa ban am e dungganan te, Nu ndain e gbarangian yangay sat dayu. Lag kalimu. Dewa ban katanya, bunya ginanya at fakatabuan fag ngay menit. ⁷ Anway tibak talun ban at ngay taw at fagfabarangianun tibak talun yangay daw at ngay taw. Ay sik fun at ngay taw gfabarangian yangay ban sa sik fun at ngay taw. Ay sa ban tibak talun at taw kalunus ban dawdaw. Ay sa tibak talun guwigan ban dawdaw tam daga. ⁸ Kayu niya at fagsigadan yay at ngay faurianan. Kata sik mangena nu gafalangfeun at ngenge ay galuwat yay ayu daw. ⁹ Kaduge niya ban at ngay taw tumaban ban ayu, laman e nanfauri ayu, ay laman e nanfate ayu. Ay fagayu talun at ngay taw at fakadotamaan sa wa ayu, anway kafandiug am sa Angku. ¹⁰ Ay ginanya ban, ngayuk taw maliam wan at fakafandiugun siginan Angku. Ay kanya moyung ban at tusama sa at mauri fag taw. Ay kanya mangadotamaan wa ban sa at tusama. ¹¹ Ay umsure ban ayuwayu at yud matuyan fag taglong, ay kanya nanfaliam ngayuk taw at fakafandiugun. ¹² Ay anway umkayu wa ban sa at mauri fag taw, ay ngayu ban taw maliam wan nu kesug Angku. ¹³ Ay roro nus nga sinu fag taw nu gsungatan tuwa gbaris angga@ sat fakatabuan, umbalabag ban. ¹⁴ Ay e moyung ban sas fagdaul daga at ngay taw at Masine-Fag Barita sas Funbalugu-Nu-Gmagurang-Taw baliwa. Laman gfadungug fagayu talun at ngay taw. Ay nu katanya wan, makbang wan at fakatabuan. ¹⁵ Ay lumag wa ban am at Mafurat-Tagfarasras nu namalindug sas Tagbvt-Fag-Bale-Funbalugu, kata yangay ebi ebi Funbalugu-At-Nafili at longan. (At natap, asafuli tuwa at masuad). ¹⁶ Ginanya ban, fagayu taw tagsis talun Naseg, lagui yap sas muyud. ¹⁷ Ay sik taw nut si was tungud ugun bale, lag nansakbo sa at basad bale laman nanbul at ngay nanuranan sanya. ¹⁸ Ay sik taw nut si wa at gamasun, lag nanguli sa at bale laman nanbul at nasandig fag lanbung sanya. ¹⁹ Ay mafanyu ban dawdaw tagbuba ay tagfasusu ginanya fag ngay menit. ²⁰ Ay darangini tuwa te, laman nu glagyu am fag buknga bundi gina sis abagat, ay anggan bundi sis Fakamatoun-Menit. ²¹ Anway ginanya ban at mason wa ban dawdaw fag ngay faurianan. Glabi yay ban fiya fiya ebi ginan fag ngay faurianan, siginan oma ebi bagu kafasigad tam fagdaul daga, ay anggan katsi. Ay bandi ban dua ban gdog takatvngvd anya. ²² Ay tam Fun nu dua fafungkuk at faurianan fag ngay menit, fagayu tagleleg taw du e sawad nus di sadi. Ay roro muag. Tam Fun mafafafungkuk way daw ka fag ngay menit. Laman At ngay filian fag taw e fanambagun tuwa. ²³ Ay ginanya, dewa e nafoyung ayu te, Iste wan tam Fagtayukan. Ay dewa e nalong ayu te, Sanya wan. Lag gafanud. ²⁴ Anway umsure wa ban ayuwayu ginanya at yud matuyan fag fagtayukan, ay at yud matuyan fag ngay taglong. Ay kanya ban gfasure at ke masuad fag fagbulun ay at madaragang fag fagbulun. Laman nanfaliaman Funbalugu At ngay filian fag taw. Ay igdi, di gfaliam. ²⁵ Ay katsi igguna Akwa nafoyung sa ayu at kumdasug ban. ²⁶ Dewa katanya, dewa tibak taw lumong ayu te, Sanya wan tam Fagtayukan sa sik talun at yud e taw, lag nanlag sanya. Ay dewa e lumong ayu te, Tam Fagtayukan sanya daw sad bale, lag gafanud. ²⁷ Anway nu kadasug kata way ban sik fangkilat nu kasure sas fakamenitan baliwa ay nalag yangay anggan sas fakayabian baliwa. Ay Aw, katanya Kyangay ban, Taw-At-Baguama, nu kadasug Aw. ²⁸ Nus nga nday nu e matean, sanya yangay at uwak nu kaful. ²⁹ Ay bandi tv nu mlangfe wa ban ka fag faurianan daul, tam menit umlayung ban ay tam magdanun sigon dua gdamlag. Ay manga at galeme e mtong wa siginans banwa. Ay fagayu at ke fagmadaragangun sis banwa muwigan wa ban dawdaw. ³⁰ Ay at taguna, umsure yay ban sik faglagan sas kiwang siginan Angku, Taw-At-Baguama. Ay fagayu fulan at ngay taw ste swa daga umbalu ban. Ay rodi kanya lumag ban Angku, Taw-At-Baguama, nu kadasug Aw e linyabu sas kiwang. Ay e fagmadaragangun Aw. Ay anggan e fagmasineun Aw dawdaw. ³¹ Ay gina ban e gbudyung dawdaw, sumugu Akwa Ku ngay tagbukngan. Laman kanya nanfaful wa Ku filian fag ngay taw siginans fagdaul daga, nus nga ndaginan baliwa fag fungfung daga. ³² Amatangani at fafaskudanan sa sik alibas. At don nu karabas wan, ay at sanga nu malumak yay, nasaful wam te, Gakamanguneun wan. ³³ Katanya yangay ban nu lumag am Ku longan nu kagurungan. Nasaful yangay am te, gadasugun wa fiya, at nafamasadan fagayu. ³⁴ Ay matuyan iglong Aw sa ayu te, Katsi fag ngay taw dia mkate taguna yap ngay umgurungan fagayu Ku longan. ³⁵ Tam banwa ay tam daga maliam yay ban. Ay roro Ku longan fagayu dua maliam faggugat. ³⁶ Du e taw gsaful te, go ginain ban fag menit ay seduge ban fiya fiya fag lungud menit nu msure. Ay anggan At ngay tagbukngan sigon sas Banwa dia nasaful. Ay anggan Aw oma, At-Baguama, Kia nasaful. Ay roro mangaro Ku Mama way sesadi at nasaful. ³⁷ Anway nu mdasug Aw, Taw-At-Baguama, at ngay taw ban katsi kata yangay ban ebi fag ngay taw gina sas Tagfataluan fag buknga. ³⁸ Anway gina gadasugun ka fag lino daul, at ngay taw mabayan yay nu kon ay nu ginum. Ay nu gfadaduwa. Ay anggan nu gfantaw sa at unga. Anggan yap ngay te, Tagfataluan nasakbo wa sat basad balutu. ³⁹ Ay ka fag ngay taw dua nasaful te, e mdasug ban. Anggan wa te, indasug wa ka fag lino daul ay taba wa nafafuy ka fag ngay taw. Ay katanya yangay ban fiya fiya nu kadasug Aw, Taw-At-Baguama. ⁴⁰ Ginanya ban fag menit e duwak mangama sas gamasun. Ay e nataban wa at sadi, ay naubun yangay sanya at sadi. ⁴¹ Ay e duwak mangena sas fagligisan anway igligis. Ay e nataban wan at sadi, ay naubun yangay sanya at sadi. ⁴² Katanya way mangaro ay, matagakani tuwa. Anway du am nasaful te, seduge ay Fun nu kadasug. ⁴³ Ay roro nasaful watam te, sik tagbilug bale nu nasaful diro te, go ginain fag buknga yabi at takamul nu kadasug. Kin nu katanya, kanya fag tagbilug matagakan wa fiya. Ay lumag wa ro fiya nu gsakbo. ⁴⁴ Katanyai anggan am. Mafamasadani tuwa. Anway nu mdasug Aw, Taw-At-Baguama, gina way ban am yud matagakan fag buknga. ⁴⁵ Katai at matuyan ay at mamatanganan fag fanuguan. Anway at fun nu nasugu wa anya te, Tanudi ku bale ay anggan fagayu tagsanya. Ay fayafuni tuwa ku ngay taw sanya nus nga seduge ebi ginan. ⁴⁶ Ay bandi guseganan tuwa ka fag fanuguan gina at fun indasug, ay at fun nalag te, Ku fanuguan igfaning tuwa mangaro ku longan fagayu. ⁴⁷ Ay matuyan iglong Aw ayu te, Ka fag fun nafatanud wa fiya sa ka fag fanuguan dewa at mesug ayu daw fag ngay nanuranan. ⁴⁸ Ay roro ka fag fanuguan nu gamatangan way te, Yaya, glugo yay ku fun nu kadasug. ⁴⁹ Ay kanya gfalang way at tusama. Ay manga kon ay ginum anway fasfuan at takasigung fag ngay taw. ⁵⁰ Ay roro sik menit at fun ban umdasug gina at fanuguan yud gtagak. Ay kin roro mangaro nu kadasug gina way mangaro yud matagakan fag buknga ay. ⁵¹ Ay at fun nafauri ban dawdaw ka fag fanuguan ay nanfaful wa ban sat ngay tagfanluk, sas faguywayan ban dawdaw ay anggan sas fagfaringgitan at bagang.

¹ Ay Funbalugu-Nu-Gmagurang-Taw kata yangay sa sik safuluk diaga nu e salung mandi gina nalo laman nanfablang wa at bagu indaduwa at mangama gina kadasug. ² Ay at lima at yud way mamatanganan. Ay at lima mamatanganan tuwa. ³ Ay at yud mamatanganan fag lima, dewa e salung mandi, du e ubanan tibak safa gigang. ⁴ Ay roro at mamatanganan fag lima, e salung tuwa mandi, ay e ubanan tuwa tibak safa gigang. ⁵ Ay at bagu indaduwa at mangama glugo yay nu kadasug. Ay kanya fag safuluk diaga nanbang way ay igfanya, igtiug wan. ⁶ Ay roro gina swa bilug yabi, e nauro te, Katsi kadasug wan at bagu indaduwa at mangama. Lakloi wan laman fablangi anya. ⁷ Ay kanya fag safuluk diaga infulo ay mafali nasingsing at salung. ⁸ Ay at yud mamatanganan fag lima naet sat mamatanganan fag lima te, Foni emi tiba ay safa gigang, anway em ngay salung gakalayungun wan. ⁹ Ay at mamatanganan fag lima nabalus te, Yaya, dua nsak em safa gigang nu fagayu watam. Loi yap sas tagfesali ay buli yap mandi si ayu. ¹⁰ Ay kaduge at yud mamamatanganan fag lima iglo, indasug wa fiya at bagu indaduwa at mangama. Ay at mamatanganan fag lima, at mafamasadan, nasakbo wa igfaygaluan anya sat bale. Laman nangon sat fagfadaduwan fag yafun daul. Ay nadingding wa dawdaw nafatvngvd at sakbawan. ¹¹ Ay rodi tv kadasug yangay at limak diaga ay nauro te, Em fun, em fun, luangi ay fasakboi emi. ¹² Ay ka fag mangama igbalus anya te, Yaya. Matuyan iglong aw sa ayu te, Kua nasaful ayu te, sinu am. ¹³ Ay Isus nalong yangay te, Matagakani tuwa. Anway du am nasaful te, go ginain fag menit ay ate ginain fag buknga nu kadasug Aw. ¹⁴ Funbalugu-Nu-Gmagurang-Taw kata yangay sik magurang sanya fag bale nu kamasadan nalo ngayayu. Ay kanya nafakbang anya at ngay fanuguan ay nafatanud at ngay nanuranan sa anya. ¹⁵ Kanya nafon at sadi 5000k fisu. Ay sat sadi at nafon 2000k fisu. Ay sat sadi, at nafon 1000 fisu. Anway nu gfon, nus nga setvngvd wa ka fag fanuguan at fagmafabulun. Ay nu ntabu wan, ka fag fun nalo wan sa tibak talun ngayayu. ¹⁶ Ay aro at taguna at nabul 5000k fisu, nalo wan. Ay nanfon sa tibak taw laman nanfaayu yay ka fag salafi. Ay bandi ban at famamut 5000k fisu yangay. ¹⁷ Ay katanya yangay at nabul 2000k fisu. Bandi ban at famamut 2000k fisu yangay. ¹⁸ Ay roro at nabul 1000k fisu nalo wan ay naali way sasad daga laman nansandig way at fun at salafi. ¹⁹ Ay nu glugo wan, ka fag ngay fanuguan at fun guli wan. Ay ka fag fun nanginto ro sa at ngay fanuguan te, Go setain ay fagbulun kaduge aw yud ste. ²⁰ Ay ebi at nabul 5000k fisu inkakbang sat fun ay gubanan at fun nafamato sa anya fag ngay salafi, ay anggan at kinfamamut kayu yangay anya. Ay nalong te, Ku fun. Na, am nafamato sa angku ebi fag 5000k fisu. Kayu way tuy at kinfamut, 5000k fisu yangay. ²¹ Ay at fun nalong anya te, Masine am fagbulun. O wan at masine ay at matuyan fag fanuguan, madyay wa ngayu ebi ku nafon emu. Ay katsi ban nanfamato kyay fiya sa emu at kayu wan glabi yay ban ebi. Ay katsi anggan o, useganani fasfuani angku, am fun. ²² Ay ka fag fanuguan at nabul 2000k fisu, inkakbang yangay sa at fun ay nalong te, Ku fun. Na, am nafamato sa angku ebi fag 2000k fisu. Kayu way tuy at kinfamut, 2000k fisu yangay. ²³ Ay at fun nalong anya te, Masine am fagbulun. O wan at masine ay at matuyan fag fanuguan, madyay wa ngayu ebi ku nafon emu. Ay katsi ban nanfamato kyay fiya sa emu at kayu wan glabi yay ban ebi. Ay katsi anggan o, useganani fasfuani angku, am fun. ²⁴ Ay ka fag fanuguan at nabul 1000k fisu inkakbang yangay sat fun ay nalong te, Ku fun, nasaful aw te, O tyud wo gfangaliam fag taw. Ay nabul yay o dewa o at yud natanum. Ay gfaful way o dewa o at yud nafangukasan. ²⁵ Ay inlimu aw te, Manaliam am salafi. Ay nalubgub akway ngap sasad daga. Ay katsi, na, am salafi ebi. ²⁶ Ay at fun nalong anya te, Sek. O at mauri way o ay momuy way o fag fanuguan. Nasaful wo te, Nanbul akyay, dewa aw at yud at natanum. Ay gfaful akyay, dewa aw at yud nafangukasan. ²⁷ Ay nu katanya, satu ro ebi nu nafon di o ku salafi sa sik taw. Laman nu kadasug kwan, nanbul aw ku salafi ay anggan at kinfamut. ²⁸ Ay at fun nalong sa tibak fanuguan te, Buli wan ka fag 1000k fisu siginan aro fag fanuguan at mauri, ay famuti wa sat ke 5000k fisu. ²⁹ Ay Isus nalong yangay te, Nus nga sinu at ke kwa, e famut yay ban sa anya, laman ban umkayu yay si anya. Ay roro nus nga sinu nu dway e kwa, at sawad si anya nu alay way, e famin wa ban siginan anya. ³⁰ Ay ukasi wan aro fag fanuguan at yud masine sasad marum. Sas faguywayan ban dawdaw ay anggan sas fagfaringgitan at bagang. ³¹ Aw, Taw-At-Baguama, gina ban Aw kadasug ste swa daga gasfuan At ngay tagbukngan, e fagmadaragangun ban Aw dawdaw. Kaduge niya malunggung Akban sa Ku masine fag faglunggungan daul. ³² Ay fagayu talun at ngay taw umful ban laman nangakbang sa Angku. Ay ginanya ban fainkafudan Aw at ngay taw, kata sik tagtanud balan nu gfainkafudan at ngay tupa ay at ngay kambing. ³³ Ay at ngay tupa fatsa Aktuwa Ku siun baliwa. Ay at ngay kambing fatsa Akway Ku wala baliwa. ³⁴ Ay rodi Aw, ay Fun, nanlong Aw sa tagsa Ku siun baliwa te, Am wan Ku Mama At nafasine. Stei ay buli At nafon ayu fag ngay fanambagun anway Funbalugu wan At tagmagurang taw. Ay katanya wan Funbalugu At fasadan siginan ngay ebis fagsigadan tam fagdaul daga. ³⁵ Anway gina Aw kalunus, nafon tuwam Angku ay fakonun. Ay gina Aw kadanum, nafon tuwam Angku ay fanginum. Ay gina Aw kata sik betaw, nafasakbo tuwam Angku. ³⁶ Ay gina Aw gyud e lanbung, nafon tuwam Angku ay lanbung. Ay gina Aw e dailan, nananlag tuwam Angku sa Ku bale. Ay gina Aw insungsung, nananlag tuwam Angku sas bale fakasungsungan. ³⁷ Ay at masine fag ngay taw malus ban Angku te, Em Fun. Yaya. Ginain sangay nu glag ami nu kalunus O, laman nanfayafun ami Emu. Ay ginain sangay nu glag ami nu kadanum O, laman nanfon ami Emu am fanginum. ³⁸ Ay ginain sangay nu glag ami Emu kata sik betaw, laman nanfasakbo ami Emu. Ay ginain sangay nu gyud O e lanbung, laman nafon ami Emu em lanbung. ³⁹ Ay ginain sangay nu glag ami Emu nu e dailan O, ay anggan nu kasungsung O, laman nanlag ami Emu. ⁴⁰ Ay Aw, at Fun, malus Akban anya te, Matuyan iglong Aw ayu te, Ay nafagbulun dewa sat sadi Ku fadugsay, ay dewa sa Ku fadugsay at yud katvngvd tiba, roro nu gfagbulun am sa wa Angku. ⁴¹ Ay rodi Aw, at Fun, nanlong Akyangay tagsa Ku wala baliwa fag fulan te, Loi wan ste ginan. Lag stiye sa Angku. Sai ways afuy at yud kalayung faggugat. Ay kanya fag afuy at nafamasadan laman at fakukasan ban Takamuag-Tiba-At-Fagbulun ay anggan at ngay fanuguan. ⁴² Anway gina Aw kalunus, dua am nafon Angku ay fakonun. Ay gina Aw kadanum, dua am nafon Angku ay fanginum. ⁴³ Ay gina Aw kata sik betaw, dua am nafasakbo Angku. Ay gina Aw gyud e lanbung, dua am nafon Angku ay lanbung. Ay gina Aw e dailan, ay anggan gina Aw insungsung, dua am nananlag Angku. ⁴⁴ Ay kanya fag fulan taw malus yangay ban Angku te, Em Fun. Ginain sangay nu glag ami Emu nu kalunus O, ay nu kadanum O, ay nu kata O sik betaw, ay nu gyud O e lanbung, ay nu e dailan O, ay anggan nu insungsung O, ay nu gyud ami igtarabang Emu. ⁴⁵ Ay Aw, at Fun, malus ban Aw anya te, Matuyan iglong Aw ayu te, Nu dway am gtarabang sa sik taw ste at yud katvngvd tiba, yaya dua am gtarabang anggan sa Angku. ⁴⁶ Ay ka fag ngay taginto umdasug wa ban sas faurianan at yud e fakatabuan faggugat. Ay at masine fag ngay taw umdasug tuwa ban sas leleg faggugat.

¹ Ay Isus, nu ntabu wa nu gfoyung sanya fag ngay taw aro At longan fagayu, nalong sa At ngay tagadal te, ² Nasaful wam te, nu mlangfe ya duwak menit, umdasug ban at fagamatanganun fag ngay menit at ngayan te, Famalangfe. Ay ginanya Aw, Taw-At-Baguama, e tumaban ban Angku, ay laman tumuktuk Angku sas salibagan kayu. ³ Ay rodi Taw-Naseg at ngay taganyun daul ay at ngay magurang inful sa Taguna-Fag-Taganyun-Daul at basad faglanuan. Ka fag taganyun daul at ngayan te, Takabalu. ⁴ Ay ka fag ngay taw igsulitanan te, Tain ban nu msuksuk laman fayugfu tam ka fag Isus ay fatei. ⁵ Ay roro at sulitanan te, Agi yap gina e Famalangfe fag ngay menit. Laman at maful sanya fag ngay taw di ban maringangan ginanya. ⁶ Ay Isus sas fulan At-Yud-E-Kwa, sa sik tagabangbang at bale, at ngayan Nadungug. ⁷ Ay sanya sik mangena e ba fagsuadan fangawat batu. Ka fag batu at ngayan te, alabastru. At masuad sanya sik lumad bebanglu. Ay ngayu dawdaw kanya nu kasali. Ay ka fag mangena nabusbus ka fag lumad fagdaul sas Isus alfuyu kaduge Isus malunggung sis fagfangonan. ⁸ Ay Isus At ngay tagadal kadotama nu nalag ka fag mangena at fagbulun. Ay igsulitanan yay sit dayu te, Taw ro ka fag mangena fagfangulananun. ⁹ Nu nafesali di ngap ro tam ka fag lumad, ngayu yay ro tam nafabul. Ay manga mafafon yay tam sa at yud e kwa. ¹⁰ Ay Isus nasaful At ngay tagadal at fasadan ay nalong anya te, Taw ro ay fakalimataun tuy fag mangena. Anway masine tuwa dawdaw tuy fag mangena at fagbulun sa Angku. ¹¹ Anway faggugat e taw way at yud e kwa si ayu. Ay roro Aw nu ste Aw si ayu da Kwa faggugat. ¹² Ay tuy fag mangena at fagnabusbusun sa Ku bilug ka fag lumad, at masuad te, laman gfasine Ku bilug gina ban e sumandig. ¹³ Matuyan iglong Aw ayu te, Nus nga nday ban nu e moyung tuy fag Masine-Fag-Barita sas fagdaul daga, igfoyung yangay ban tuy fag mangena at fagbulun. Laman sik fagamatanganun sa tuy fag mangena. ¹⁴ Kaduge niya At sadi Isus At Labi-Duwa, at ngayan te, Segi, sik taw siginans Ufat-Fulan-Sirut, nanangakbang sas Taw-Naseg at ngay taganyun daul. ¹⁵ Ay Segi nainto anya te, Taw ban ay fon angku nu moyung akdi ayu te, Tuy Isus. Ay at ngay taganyun daul nafon anya 30k afud ebi at ngay salafi. ¹⁶ Ay siginan long ginanya, Segi igsarap wa long sik masine fag menit laman namoyung ban Isus sa anya. ¹⁷ Sas fasadik menit sas tagbiya fag yafun at ngayan te, Tinafay-At-Yud-E-Famabaga, Isus At ngay tagadal inkakbang sa Anya ay ginto sa Anya te, Dada Am fakaumsigun nu kamasadan ro ami. Laman am fagnangonan ro at Famalangfe fag yafun. ¹⁸ Ay Isus nabalus anya te, Loi wan sanya am dayu fag fulan daul. Ay lumag ro am sanya Ku nafamatuan fag taw ebi. Ay longi anya te, tam Takamoyung nalong unu emu te, gadasugun wa unu At menit. Ay At fakaumsigun unu nanfaning at Famalangfe fag yafun sa am bale, ay anggan unu ro ami At ngay tagadal. ¹⁹ Ay At ngay tagadal igfaning wa fiya Isus At longan. Ay sanya wa fiya nu gfamasadan at Famalangfe fag yafun. ²⁰ Ay nu nyabi wan, Isus malunggung wa sanya igfangon gfasfuan At 12k tagadal. ²¹ Ay gina fagayu gfangon, Isus iglong wa te, Matuyan iglong Aw sa ayu te, Am waro at sadi at moyung ro Angku sas mauri fag taw. ²² Ay At ngay tagadal nu nadungug, kabalu wa dawdaw. Ay gfasigad wa nansadsadian nanginto sas Isus te, Ku Fun. Go aw wan. ²³ Ay Isus nabalus anya te, Katsi wa tagfasfuan Angku tagfasurung at fafa sa sadik taya. Kanya waro at moyung Angku sas mauri fag taw. ²⁴ Ay Aw, Taw-At-Baguama, Ku faglumoun ro sanya laman umgurungan At-Rirukan. Ay roro e nanfauri yangay ban ay, sa at namoyung Angku sas mauri fag taw. Ay saturo amasine yap ka fag taw nu gdi nangus inlangfe. ²⁵ Ay Segi, at namoyung ro Anya, ginto sas Isus te, Go aw wan, em Magurang. Ay go yaya. Ay Isus igbalus anya te, Kin, kata wa fiya aro am longan. ²⁶ Ay gina Isus ay At ngay tagadal gfangon, Isus nabul yangay fiya sik fafa, ay nauseganan sas Funbalugu. Ay Isus nafaramyukan ay nafon sa At ngay tagadal. Ay nalong anya te, Na, buli ay oni. Tuy Ku bilug wan. ²⁷ Ay Isus nabul yangay sik taya e uwat buadan safa. Ay nauseganan yangay sas Funbalugu. Ay Kanya nafon sa At ngay tagadal ay nalong anya te, Fagayu am, inumi wan. ²⁸ Tuy Ku taguk. At famatuyan sas Funbalugu At fatuyanan sa At ngay taw. Anway e musbus ro Ku taguk laman at famaliam ngayuk taw at asalanan. ²⁹ Ay nalong Aw ayu te, Katsi Kua ban gdog ginum uwat buadan safa. Nu gdog Kyay ginum gfasfuan ayu sa wa Ku-Mama-At-Fagmagurangan-Taw. ³⁰ Ay Isus Ay At ngay tagadal nu nadanyu wa sik danyu, nalo wa sas Muyud-Tagakayuun-Ulibu. ³¹ Ay Isus iglong sa At ngay tagadal te, Fagayu am mubun waro am Angku, anway e mdasug ro sa Angku katsi fag yabi. Anway At-Rirukan nalong wa te, Fate Akban at Tagtanud, Ay at ngay tupa sumaruwayan ban. ³² Ay gina ban Aw gdog gleleg, gumuna Akyay ban ayu sas talun Balulangan. ³³ Ay Takata-Sik-Batu nalong sas Isus te, Dewa ro ku iba fagayu umyayu Emu, aw da kua ro umyayu Emu faggugat. ³⁴ Ay Isus nalong te, Matuyan iglong Aw emu te, Katsi ro fag yabi, bagu e tumarakit, mamayud yangay ro o Angku at fatulu ginan. ³⁵ Ay Takata-Sik-Batu iglong yangay sas Isus te, Yaya. Dewa aw umkate gasfuan Emu, da kua ro mamayud Emu. Ay kata yay at sadi, fagayu At tagadal at longan. ³⁶ Ay Isus nalo wan gasfuan At ngay tagadal sa sik nagabian at ngayan Faglafian-Buadan. Ay Kanya nalong sa At ngay tagadal te, Am, malunggungi yap iste. Aw nandarangin Akyay snay am dayu. ³⁷ Ay Isus nataban wa Takata-Sik-Batu ay Funbalugu-Nafon at baguama fag duwa. Ay Isus gfasigad wa matvngvd dawdaw nu kabalu ay gatakan. ³⁸ Ay Isus nalong sa At ufud fag tulu te, Matvngvd wa dawdaw nu kabalu Aw katsi. Kata wa nu nkate aw sas kabalu. Ay am stei way. Ay mafuluani way kata Angku. ³⁹ Ay Isus inyayu yay sirut. Ay garungan sas daga. Ay igdarangin te, Ku Mama. Nu masine sa Emu, saturo, falangfei yap siginan Angku ka fag taya at ke mauri ro sa Angku. Ay roro lag gfaning Ku fakaumsigun. Fadasugi way Emu Am fakaumsigun. ⁴⁰ Ay Isus gdog yangay kakbang sa At tuluk tagadal. Ay manlag di gtiug way. Ay Isus iglong sas Takata-Sik-Batu te, Go du o mafuluan kata Angku kaduge oma sik kadugayun. ⁴¹ Tagaki ay darangini way. Laman di am kaumsig gananfaskudun sas asalanan. Ay nu tengap, kaumsig tuwo sat masine. Ay nus nga am bilug mafanalo way. ⁴² Ay Isus gdog yay fiya nalo sat dayu, ay igdarangin yay fiya at faduwa ginan te, Ku Mama. Nu dway o e tibak baliyavtan te, laman Kua minum sanya ginan fag taya, fadasugi wa sa Angku si Emu Am fakaumsigun. ⁴³ Ay Isus gdog yangay inkakbang sa ka fag tuluk tagadal. Ay manlag di gtiug way. Teway gaimataun way gugat. ⁴⁴ Ay Isus gdog yay fiya inyayu siginan ka fag tuluk tagadal. Ay igdarangin yay fiya at fatulu ginan. Ay At longan kata yangay fiya aro taw. ⁴⁵ Ay Isus gdog yay fiya inkakbang sa ka fag tuluk tagadal, ay nalong anya te, Go anggan katsi gtiug way am. Ay go ate gfafiyan yay am ay lufuy. Katsi wan, gadasugun wa dawdaw at namoyung ro Angku, Taw-At-Baguama, sat ngay tagasalanan. ⁴⁶ Afuloi wan. Alindugi wan. Bastam wan. Linggati. At namoyung Angku gadasugun wan. ⁴⁷ Ay gina Isus ge longan, rodi indasug wa daw Segi, at sadi At Labi-Duwa. Ay at ufud sik ngay taw ayuwayu, e fiso ay e famalang. Ay kanya fag ngay taw, Taw-Naseg at ngay taganyun daul ay anggan at ngay magurang at suguan. ⁴⁸ Ay at namoyung Isus nafatuyanan aro taw sas Taw-Naseg at ngay magurang te, nus nga sinu ro ku naayuk fag Taw At fingi, Kanya wan. Tedi Anya. ⁴⁹ Ay Segi nu ndasug, rodi tv nangakbang sas Isus ay nalong te, E fandago. Ku Takamoyung. Go ste Wo. Ay naayuk Isus At fingi. ⁵⁰ Ay Isus nalong yangay anya te, Sama, faningi wa am fasadan. Ay rodi at ngay taw inkakbang wa sas Isus, ay nated wa long daw Isus ay nafaptus wan. ⁵¹ Ay rodi Isus At ufud at sadi naguyud at fiso. Ay nabasing at Taguna-Fag-Taganyun-Daul at fanuguan, ay naayas at talinga at sadi. ⁵² Ay Isus nasalag anya te, Lagi. Folii wan am fiso, anway nus nga sinu at nabul at fiso laman nabasing sik taw, kanya at fangate sa yangay ban sik fiso. ⁵³ Go gamatangan way am te, Kua ro siring mafaet siginan Ku Mama, laman rodi Kanya sumugu sa Angku labi duwak fulan At tagbukngan. ⁵⁴ Ay roro, nu kumatanya way ro, dua mgurungan sa At-Rirukan ebi at naguna nafoyung te, Katanya ban at kumdasug. ⁵⁵ Ay ginanya Isus nainto sanya fag ngay taw te, Go gubanan am ay ngay fiso ay ay ngay famalang anway ay fasadan laman nansungsung am Angku kata sik takamul. Ay madyay kayu menit kayu menit malunggung Akwa sas Tagbvt-Fag-Bale-Funbalugu anway igfoyung Aw ayu. Ay madyay du am nated Angku ginanya. ⁵⁶ Ay roro katanya tuway ingurungan wa fiya Funbalugu At-Rirukan siginan At ngay taglong ebi ebi. Ay rodi fagayu Isus At ngay tagadal naubun Isus ay nalagyu wan. ⁵⁷ Ay at ngay taw aro at nated Isus, nataban wa Anya sas Takabalu, sas Taguna-Fag-Taganyun-Daul. Ay fagayu Taw-Naseg at tagfasaful ay anggan at ngay magurang inful sanya. ⁵⁸ Ay Takata-Sik-Batu ngayayu yay nu gaguyanan Isus. Ay nu indasug sas Taguna-Fag-Taganyun-Daul at faglanuan, Takata-Sik-Batu nasakbo sat alad. Ay malunggung yangay sanya maful at ngay tagbarangian, laman nangulit te, go tain ro at taguyan at fagbulun. ⁵⁹ Ay Taw-Naseg at ngay taganyun daul ay anggan at ngay magurang inful laman faggugat igsarap te, Go ro e foyungan sas Isus At fagbulun kamuagan sak tam nanfate Anya. ⁶⁰ Ay ka fag ngay magurang dewa igsarap, du e nalag. Madyay dewa ngayu tagfoyung kamuagan way sas Isus At fagbulun. Ay dua gdiuganan. Ay roro duwak taw sas fakatabuan insure yay tagfoyung. ⁶¹ Ay ka fag duwak taw nalong te, Tuy wa fiya fag Taw ebi at nafoyung te, Aw wa ban At mafarasras at Tagbvt-Fag-Bale-Funbalugu. Ay gdog Kyangay ban kawat ay gfatabu Kwan sas fatuluk menit. ⁶² Ay Taguna-Fag-Taganyun-Daul inlindug ay ginto sas Isus te, Go taw Am fagyudun gbalus. Madyay tuy fag ngay taw e foyungan way siginan Emu baliwa. ⁶³ Ay Isus maragangan way. Ay Taguna-Fag-Taganyun-Daul nalong yangay sas Isus te, Balusi wa emi sa At-Tagleleg-Faggugat-Fag-Funbalugu At akbang te, Go O wan Fagtayukan, Funbalugu-At-Baguama. ⁶⁴ Ay Isus nabalus te, Kin, kata wa ngaro fiya am longan. Ay nafamut Kyay te, lumag ban am Angku, Taw-At-Baguama, nu malunggung Aw sat Madaragang At siun baliwa fag day tigyangan. Ay bandi umdasug Aw sas linyabu sas kiwang. ⁶⁵ Ay Taguna-Fag-Taganyun-Daul nagirat at lanbung mandi ay nalong sa at ngay ufud te, Mauri tuy fag Taw At longan sas Funbalugu baliwa. Katsi dewa yud e gfoyung yangay Isus At asalanan. Anway nadungug watam te, mauri wa fiya At longan sas Funbalugu baliwa. ⁶⁶ Setain ay fasadan sa Anya. Ay Taw-Naseg at ngay magurang nalong te, Katsi insak wan, sak wa e gfate Anya. ⁶⁷ Ay at ngay magurang nafantufean sas Isus mata. Ay tiba nafalang. Ay tiba natalaptap Anya. ⁶⁸ Ay kanya nainto sas Isus te, Foyungi emi, O wanay Fagtayukan. Foyungi emi te, Go sinu aro at nafalang Emu. ⁶⁹ Ay ginanya Takata-Sik-Batu malunggung sas day bale, sisad faglanuan. Ay sanya sik baguina fag fanuguan, nangakbang sas Takata-Sik-Batu ay glong te, O wan fiya ebi ginan at sadi at tagufud Isus, sik Taw-Balulangan, Go kin. ⁷⁰ Ay Takata-Sik-Batu kamayud sas fagayu taw tagsanya te, Yaya long. Kua gsaful kanya am longan at masuad. ⁷¹ Ay rodi kaduge Takata-Sik-Batu nalo sirut sas day sakbawan alad. Roro sanya e sadi ya fiyak baguina fag fanuguan at nalag anya. Ay igfoyung sa at ngay iba te, Kanya wa fiya fag taw at sadi tagufud Isus siginans fulan Nasaret. ⁷² Ay Takata-Sik-Batu gdog yay matvngvd nu kamayud te, Matuyan wa fiya ku longan te, Aw da kua gsaful Kanya fag Taw. ⁷³ Ay rodi at ngay malindug sanya nangakbang sas Takata-Sik-Batu, ay iglong yangay anya te, At matuyan ebi ginan o wa fiya at sadi Ka fag Taw At ufud. Madyay nu ge longan o, kata yangay Taw-Balulangan. ⁷⁴ Ay Takata-Sik-Batu amatvngvd yap aro taw nu glong te, Dewa ro ndasug sa angku at mauri nu dway matuyan ku longan te, Aw da kua gsaful Kanya fag Taw. Ay rodi sik tabag natarakit. ⁷⁵ Ay Takata-Sik-Batu namatang yay aro taw Isus At longan te, Tulu ginan nu kamayud o Angku gina bagu sik tabag tumarakit. Ay Takata-Sik-Batu nalo wan ay guyway dawdaw.

¹ Ay ginas balabag sirut inful yay fagayu Taw-Naseg at taganyun daul, ay anggan at ngay magurang ay igsulitanan te, Tain ban nu fafate tam Ka fag Isus. ² Ay at ngay magurang nasalod Isus At take, ay nantaban sa at fun At-Ke-Bangko at akbang. ³ Ay Segi, at namoyung Isus sa at ngay mauri fag taw, gina nadungug te, E nanfate waro Isus, kanya kabalu dawdaw ebi at nafagbulun sas Isus. Ay kanya igfafoli yay ebi at nabul fag 30k afud salafi sas Taw-Naseg at ngay taganyun daul ay sa at ngay magurang. ⁴ Ay Segi nalong anya te, E asalanan aw. Anway sa ku nafoyungan ayu sik Taw at yud e asalanan. Ay Taw-Naseg at ngay magurang nabalus anya te, Dewa. Am longan du e masuad sa emi. Nus nga se taw wa am fasadan. ⁵ Ay Segi naukas ka fag 30k afud salafi sasad basad Tagbvt-Fag-Bale-Funbalugu. Ay kanya nalo wan ay nasakbit wa anya. ⁶ Ay Taw-Naseg at ngay taganyun daul nafuyut ka fag ngay salafi ay gsulitanan yay te, Yaya. Dua tam gfaning At-Longan nu gfaful way tam tuy fag duwak fulan salafi, ka fag 30k afud salafi ay anggan Funbalugu At salafi. Anway ka fag 30k afud salafi sik fansali way sik taw at taguk. ⁷ Ay at ngay taganyun daul igsulitanan yay. Ay nu ntabu wan, nabul sik daga siginan sik taw takawat bisu, laman ban sanya at fagsandigan at betaw at kinkate. Ay at fansali siginan ka fag 30k afud salafi. ⁸ Ay nu katanya, e nafangayan ka fag daga te, Kanya-At-Ke-Taguk-Fag-Daga. Ay katanya wan at ngayan anggan bandi. ⁹ Fakatanyaun ingurungan Funbalugu-At-Nafatvngvd, ebi ebi at sadi Funbalugu At taglong, at foyungan te, Ay ka fag ngay taw nabul ka fag 30k afud salafi, Taw-Tagagbuan at longan, at fansali sik taw. ¹⁰ Ay kanya nafon ka fag ngay salafi at fansali sik daga siginan sik taw takawat bisu. Kata Funbalugu At longan sa angku. ¹¹ Ay Isus malindug sas fun At-Ke-Bangko at akbang. Ay ka fag fun ginto Anya te, Go O wan Taw-Naseg at Fun. Ay Isus nabalus anya te, Kin. Kata wa ngaro fiya am longan. ¹² Ay roro gina Taw-Naseg at ngay taganyun daul ay anggan at ngay magurang nafoyung nafamuagan Isus At asalanan, Isus dua gbalus. ¹³ Ay fun At-Ke-Bangko ginto yangay sas Isus te, Go Yo gdungug at ngay longan ayuwayu nu gfoyung sa Emu baliwa. ¹⁴ Ay Isus dua gbalus, nus di sadi at longan. Ay nu katanya, ka fag fun namatangan daw te, taw katanya. ¹⁵ Kaduge e Famalangfe fag yafun daul fag buknga, fun At-Ke-Bangko at ugali faggugat, igfalfas yay at sadi at kinsungsung. Nus nga sinu at sadi at ngay taw at fasadan. ¹⁶ Ay ginanya e sik masungsungan at ngayan, Sik-Takamoyung-Baguama. Ay fagayu taw nasaful wa anya. ¹⁷ Ay at ngay taw gina maful, fun At-Ke-Bangko ginto anya te, Inday kanya fag duwa ay fakaumsigun ku fagfalfasun, Sik-Takamoyung-Baguama ay ate Isus, tiba At ngayan Fagtayukan. ¹⁸ Anway At-Ke-Bangko nasaful wa te, Taw-Naseg at ngay magurang at fagnatabanun Isus sa anya, anway te, galabian Isus. ¹⁹ Ay gina At-Ke-Bangko malunggung sat Fagnansarapan-Asalanan-Fag-Faglunggungan, at mangena nasugu sik fanuguan sa at mangama te, Lag e fagbulun sa Ka fag Taw At masine, anway sad yabi e taginfanan aw. Ay kabalu aw dawdaw Anya. ²⁰ Ay Taw-Naseg at ngay taganyun daul ay anggan at ngay magurang matvngvd nu gatul at ngay taw. Laman at ngay taw met sa At-Ke-Bangko te, Falfasi wan Sik-Takamoyung-Baguama ay fatei wa long Isus. ²¹ Ay rodi At-Ke-Bangko gdog yay nainto sat ngay taw te, Go inday ro kanya fag duwa ay fakaumsigun ku fagfalfasun sa ayu. Ay at ngay taw nabalus te, Sik-Takamoyung-Baguama em fakaumsigun. ²² Ay At-Ke-Bangku ginto yangay anya te, Ay setain ro ku fagbulun sas Isus, tiba at ngayan te, Fagtayukan. Ay at ngay taw nabalus yangay te, Kanya, tuktuki wa sas salibagan kayu. ²³ Ay At-Ke-Bangko dewa ginto te, Taw ro at masuad ku fagnantuktukun Isus. Nataw sangay At asalanan. Dewa katanya at longan, at ngay taw glabi yay aro taw nu guro te, Tuktuki wa Anya sas salibagan kayu. ²⁴ Ay At-Ke-Bangko nasaful wa te, Dewa ngap aw nalong, du e masuad. Ay at ngay taw nu garingangan way dawdaw, At-Ke-Bangko nabul sik safa ay igfegus at daluap sa at ngay taw faglagan. Ay kanya nalong te, Ka fag Taw du e taguk si ku daluap. Am wan tagfoyung ro sa taginto ayu. ²⁵ Ay ka fag ngay taw nabalus sa at fun te, Ay kin. Ate Ka fag Taw At taguk sa way ban em daluap ay anggan sa way ban sigon em kadagdagan at daluap. ²⁶ Ay At-Ke-Bangko nafalfas wa fiya Sik-Takamoyung-Baguama sa at ngay taw buknga. Ay nu nafafusfus wa dawdaw Isus, rodi nanfataban wa Anya. Laman nanfatuktuk wa Anya sas salibagan kayu. ²⁷ Ay fun At-Ke-Bangko at ngay tagbarangian nataban Isus sa at fun bale daul. Ay e nafasakbo yangay tibak tagbarangian sanya. ²⁸ Ay ka fag ngay tagbarangian naranggut Isus At lanbung. Ay natubus yay sik lanbung maloban. ²⁹ Ay kanya nabugyas sik sangbo madugi, ay nafasangboan sas Isus At alfuyu. Ay kanya nafagalumutan sas Isus At siun fag daluap sik anyamu. Ay kanya natudan sas Isus At akbang ay ginanya igfanlamangan Anya te, Masine O, Taw-Naseg at Fun. ³⁰ Ay kanya natufe sas Isus. Ay naago yay fiya siginans Isus ka fag anyamu ay nafusfus sas Isus At alfuyu. ³¹ Ay ka fag ngay tagbarangian nu ntabu wa nu gfanlamangan sas Isus, nabul yay fiya at nafon fag lanbung. Ay nafasulun yangay fiya sa Anya aro taw At lanbung. Ay rodi nataban wa long Anya, laman nantuktuk sas salibagan kayu. ³² Ay gina nalo siginan at fun bale daul, ka fag ngay tagbarangian nalag sik taw at ngayan te, Nadungug, siginans fulan Sirene. Ay ka fag ngay tagbarangian nafaubanan way sigad Isus At salibagan kayu sanya fag taw. ³³ Ay fagayu at taw tagalo indasug sa sik talun at ngayan te, Gulguta. (At masuad te, Talun-Butul-Alfuyu.) ³⁴ Ay e nafon sas Isus sik uwat buadan safa nafagamutan at mayat. Ay dewa e gfasupsup Isus, dua kaumsig nainum. ³⁵ Ay at ngay tagbarangian natuktuk Isus sas salibagan kayu. Ay rodi naafudan wa Isus At ngay lanbung, gina ntabu nu gfagsafulan te, dada ro sik afud. ³⁶ Ay ka fag ngay tagbarangian malunggung yay sanya, igtanud. ³⁷ Ay e nadafut yay sik fagsafulan Isus At asalanan si At tungud alfuyu te, TUY ISUS, TAW-NASEG AT FUN. ³⁸ Ay ginanya e natuktuk ya duwak takamul gsumbalian Isus. ³⁹ Ay kayu at nadalan sanya nu glinggat sas Isus, igfabalitang way at mata, igfalingun sas Isus te, ⁴⁰ Sangay O ban mafarasras O at Tagbvt-Fag-Bale-Funbalugu. Ay gdog yay O mafatabu nu kawat O dewa tuluk menit. Katsi balabagi Am balyu. Nu O wan Funbalugu-At-Baguama, alfasi nu kin siginans salibagan kayu. ⁴¹ Ay anggan Taw-Naseg at ngay taganyun daul ay at ngay tagfasaful ay anggan at ngay magurang gfalingun yangay Anya te, ⁴² Kanya mafabalabag tuwa nu tiba tuwak taw. Ay roro ngap dua mafabalabag At balyu. Ay Kanya laman nu Taw-Naseg tuwa at Fun, alfasi nu kin siginans salibagan kayu. Ay nu malfas di ro, kin, bagu yay ami gafanud. ⁴³ Kanya kafandiug tuwa sas Funbalugu. Funbalugu falfasi yap nangus Anya katsi, Funbalugu nu kaumsig. Madyay Kanya nalong wa te, Aw wan Funbalugu-At-Baguama. ⁴⁴ Ay anggan at natuktuk fag duwak takamul tagsumbalian Anya, gfalingun yay sas Isus. ⁴⁵ Ay gina maturuk at menit, inkarum wa daw sas fagdaul sanya fag talun, anggan at menit inbalitang. ⁴⁶ Ay nu inbalitang wan, Isus nauro yay dawdaw te, Eli. Eli. Lama sabaktani. At masuad te, Ku Funbalugu. Ku Funbalugu. Taw ro Am fagnaubunun Angku. ⁴⁷ Ay at ngay taw tagsanya nu nadungug At longan, nalong te, Ka fag Taw guro yay ebi ebi fag taglong at ngayan te, Funbalugu-Tam-Taw-Yabi-At-Masine. ⁴⁸ Ay rodi sadik taw nalo mafali ay nabul sik fanrarus. Ay nafasurung sa sik uwat buadan safa mayat. Ay natugdan sa sik anyamu laman nanfasupsup sas Isus. ⁴⁹ Ay tibak taw nasalag te, Toi yap. Gfanya yay tam te, go ro Funbalugu-Tam-Taw-Yabi-At-Masine umdasug yay ro ay, nanfalfas yay manga Anya. ⁵⁰ Ay Isus gdog yay daw nauro ay At gipso wa taguyan. ⁵¹ Ay rodi at Famalabag-Fag-Sinyag sas Tagbvt-Fag-Bale-Funbalugu ingirat wan siginan at tungud ay anggan wa sat daga. Ay nauwigan tam fagdaul daga. Ay anggan at ngay batu nafangabaltakan wan. ⁵² Ay tiba at fagsandigan fag luib nafangaluangan wan. Ay tiba Funbalugu At taw at kinkate inleleg yay. ⁵³ Ay kanya nafangalfasan siginan at fagmasandiganan fag ngay luib. Ay bandi gina yangay ban Isus gdog yay gleleg, anggan kanya ebi at kinleleg kadasug yay sas Funbalugu-At-Fulan. Ay insure sat ngayuk taw sanya. ⁵⁴ Ay at fun tagbarangian ay anggan at ngay ufud at tagtanud Isus, namatang tam daga nu guwigan ay anggan nalag yangay tiba at nafasure ginanya. Ay kanya kalimu dawdaw ay nalong te, Matuyan, Tuy wa fiya Funbalugu-At-Baguama. ⁵⁵ Ay sanya yangay sik ngay mangena ngayayu yay nu gbantay. Kanya wa fag ngay mangena ebi tagalo Isus siginans talun Balulangan. Ay manga tagfalu Anya ginanya. ⁵⁶ Ay at duwak mangena sanya ginan at ngayan te, Taglu. At sadik Taglu sik mangena siginans fulan At-Ke-Bale-Ngabat. Ay sadi ya fiyak Taglu, Santiagu ay At-Fakafamutan at tina. Ay e sik mangena yay fiya sanya ginan. Kanya Funbalugu-Nafon at ngay baguama at tina. ⁵⁷ Ay nu kayabi wan, sik taw mabalan indasug siginans fulan Maabat, at ngayan At-Fakafamutan. Kanya anyangay Isus At tagadal at sadi. ⁵⁸ Ay kanya nangakbang sas fun At-Ke-Bangko ay get anya Isus At bilug. Ay rodi At-Ke-Bangko nasugu laman e nafon. ⁵⁹ Ay At-Fakafamutan nabul Isus At bilug ay nasifig sa sik tagbiya fag sinyag malagsi. ⁶⁰ Ay kanya nasandig Isus At bilug sa at fagagbilugun fag fagsandigan fag luib at bagu. Sa ebi at nafaali sasad batu. Ay At-Fakafamutan nafafulid sasad sakbawan sik batu daul at fandingding at sakbawan luib. Ay nalo wan. ⁶¹ Ay Taglu tagsiginans fulan At-Ke-Bale-Ngabat, ay sadi yak Taglu, nanmalunggung yay sas day fagsandigan. ⁶² Ay at fadogan fag menit, nu nlangfe wa Nu-Kamasadan-Fag-Menit, Taw-Naseg at ngay taganyun daul ay at ngay Taw-Tagagbuan nanangakbang yay sas fun At-Ke-Bangko. ⁶³ Ay ka fag ngay Taw-Naseg nalong te, Namatang ami Ka fag tagfanlamangan At longan gina gleleg te, nu nlangfe tuluk menit, gdog Kyay gleleg. ⁶⁴ Ay kin, nu katanya, longi te, Fatvngvdi tuwa nu gdingding am ka fag fagsandigan. Yap ngay nlangfe sis fatuluk menit. Fatugani te laman At ngay tagadal dewa mdasug, dua mafabul Isus At bilug. Ay manga te laman dua gfoyung at ngay taw te, Kanya gdog yay gleleg. Ay anggan sigon te nu manlamangan ban, malabi ebi taguna. ⁶⁵ Ay fun At-Ke-Bangko nalong sas Taw-Naseg at ngay magurang te, Am way at ke tagbarangian ngayu. Fatvngvdi tuwa nu gdingding am at fagsandigan, katvngvd ay fasadan. ⁶⁶ Ay kanya fag ngay taw nalo wan ay nafatvngvd wa fiya at fagsandigan. Ay nasugu sanya sik ngay tagbarangian. Ay anggan nadafut at fandafut fag taru laman at taw kalimu tuwa gluang.

¹ Inlangfe wan at Fakamatoun-Menit, ay gakasureun wan at menit sas taguna fag menit sis fafitu. Ay ginanya Taglu tagsiginans fulan At-Ke-Bale-Ngabat, ay anggan sadi yak Taglu, indasug laman nanlinggat sa at fagsandigan fag luib. ² Ay rodi nauwigan at fagdaul daga. Anway indaga at sadi Funbalugu At tagbukngan siginans Banwa. Ay naligang at fandingding sakbawan fag batu daul, ay malunggung wa sanyas tungud batu. ³ Ay kanya at kamasuloan katvngvd sik fangkilat. Ay at lanbung malagsi dawdaw. ⁴ Ay at tagtanud fag ngay tagbarangian kudkulugan dawdaw kalimu anya, ay inkata wa nu matian. ⁵ Ay ka fag tagbukngan nalong sa ka fag duwena te, Lag am kalimu. Anway nasaful kua te, gasarapan wam Isus, ebi At natuktuk sas salibagan kayu. ⁶ Ay roro Kanya dua ste, anway Kanya gdog yay gleleg. Igfaning yay ebia taw sa At longan mandi. Stei. Bali wan linggati wan ebi at fagfatungkudan Anya. ⁷ Ay loi wan mafalii. Laman foyungi sas Isus At ngay tagadal te, Kanya gdog yay gleleg siginan at fagmatianan. Ay nu katanya, Kanya gumuna wa ayu sas talun Balulangan. Sanya wan nu glag am Anya. Ay kaba way niya ku longan sa ayu. ⁸ Ay kanya fag duwena dewa kalimu, guseganan yay dawdaw. Ay matarung nu nalo siginans fagsandigan laman nanfoyung ro sa At ngay tagadal aro taw at nalag. ⁹ Ay kaduge ka fag duwena sasa ngaba dalan, Isus nafablang anya, ay nae longan te, E fandago. Go ste am. Ay ka fag duwena inkakbang Anya, ay natudan nated Isus At darafa, ay naseg Anya. ¹⁰ Ay rodi Isus nalong sanya fag duwena te, Lag kalimu. Loi wan ay foyungi sa Ku ngay fadugsay, laman kanya sigon suma yangays talun Balulangan. Anway sanya yay ban nu lumag am Angku. ¹¹ Ay gina ka fag duwena nalo, tibak tagbarangian, aro at natanud sas fagsandigan, noli wa sas fulan. Ay nanfoyung sas Taw-Naseg at ngay taganyun daul fagayu aro taw at nalag sanya ginan. ¹² Ay at ngay taganyun daul nu nafaful Taw-Naseg at ngay magurang ay nu nasulitanan wan, kanya nafon sik ngay salafi sanya fag ngay tagbarangian. ¹³ Ay at ngay taganyun daul nalong sanya fag ngay tagbarangian te, Foyungi sa tibak taw te, Isus At ngay tagadal indasug sat fagsandigan gina sad yabi ay nabul Isus At bilug kaduge ami gtiug. ¹⁴ Ay tam fun nu nadungug katanya ay longan, falukmianan ami anya ay manga igdingding ami ayu te, laman di gfauri ayu. ¹⁵ Ay at ngay tagbarangian nabul ka fag ngay salafi. Ay nanfaning ro at ngay taganyun daul at longan. Ay at ngay Taw-Naseg nafoyung ka fag ngay tagbarangian at longan anggan bandi. ¹⁶ Ay Isus At tagadal At Labi-Sadi nalo wan sas talun Balulangan, sa ebia taw Isus At longan fag muyud. ¹⁷ Ay nu nalag Isus, igseg Anya. Ay roro tiba gfainfolian yay at amatanganan. ¹⁸ Ay Isus inkakbang sa At ngay tagadal ay nalong anya te, Anway fagayu fagmadaragangun sas Banwa ay sas daga nafon wa sa Angku. ¹⁹ Ay loi wan ay foyungi ban sas fagayu talun at ngay taw. Ay fasurungi anya sa tam Tama At fagmadaragangun, ay anggan sa Angku, Funbalugu-At-Baguama, Ku fagmadaragangun, ay anggan sa At-Masine-Fag-Falad At fagmadaragangun. ²⁰ Ay foyungi anya, laman kanya maning ban fagayu Ku longan sa ayu. Ay am, lag kaliam. Anway Aw si Kua ayu faggugat, siginan katsi ay anggan ban sas fakatabuan fag ngay menit.