Luke

Luke

¹ Ngayu at taw at maseganama nu griruk ebi fag ngay fagbulun at kinsure sa em buknga. ² Ka fag ngay tagriruk nariruk ebi em ngay nadungug. Ay at ngay nalag ay nafoyung Funbalugu At longan ebis gfagsigadan, kanya at nafoyung sa emi ka fag fagbulun. ³ Ay katanya tuway, anggan aw gananfatabanun akyangay nanriruk ka fag ngay fagbulun. Laman e fanambagun yangay o, o at ke gseg fag taw, Funbalugu-At-Fakesugun. Anway glugo wan nu gadal aw sanya fag ngay fagbulun baliwa siginan was gfagsigadan. ⁴ Nanriruk aw laman sumaful tuwo fiya fiya te, matuyan wa ngaro fiya am ngay nadungug at nafoyung ebi. ⁵ Ebi gina Sik-Madaragang-At-Baguama-Daul at fun sas talun Naseg. At taganyun ginanya at ngayan, Funbalugu-Namatang. Kanya at sadi at ngay taganyun sas Tam-Tagtuyan-Sik-Tama at fulan taganyun. Ay Funbalugu-Namatang at mangena at ngayan Funbalugu-At-Mafanud. Ay ka fag daduwa Arun at kadagdagan. ⁶ Ay ka fag daduwa sik tagfaning dawdaw sas Funbalugu. Madyay di e nasalan nu gfaning fagayu Funbalugu At longan ay At ugali. ⁷ Ay ka fag daduwa du e unga. Anway Funbalugu-At-Mafanud gabawas way. Ay manga te, kafufuina wan ay kafufuama wan. ⁸ Ay ginanya Funbalugu-Namatang ay anggan fagayu sa at fulan taganyun nafaning taganyun at ugali laman igseg Funbalugu. ⁹ Ka fag ngay taganyun nafaning at ugali, ay gfe fagsafulan yay te, sinu ban tam at sumakbo sas Tagbvt-Fag-Bale-Funbalugu laman nanyago sik bebanglu sanya. Ay at nafili, Funbalugu-Namatang. ¹⁰ Ay gina Funbalugu-Namatang nanyago sik bebanglu, kaduge niya, at ngay taw igdarangin tuwa sasa ngaba day Tagbvt-Fag-Bale-Funbalugu. ¹¹ Ay Funbalugu At tagbukngan at sadi malindug sas day Fagyagoan-Bebanglu sas siun baliwa, ay nsure sas Funbalugu-Namatang. ¹² Ay Funbalugu-Namatang nu nalag nadulawan ay kalimu dawdaw. ¹³ Ay At tagbukngan nalong sa anya te, Funbalugu-Namatang, lag kalimu. Anway Funbalugu nadungug am darangin. Ay am mangena, Funbalugu-At-Mafanud, gfalangfe ban sik ngenge sik ama. Ay fangayani ban anya te, Uan. ¹⁴ Ay guseganan ban o, ay kaumsig ban o. Ay anggan ngayuk taw kaumsig ban ay ngenge at kumlangfe. ¹⁵ Anway am baguama ban at madaragang fag taw at sadi sas Funbalugu At akbang. Ay kanya di ban ginum uwat buadan safa ay anggan tibak fangasigung. Ay siginan ngay yud inlangfe, At-Masine-Fag-Falad igmagurang wa anya. ¹⁶ Ay am baguama ban at fafoli ngayuk Taw-Tagagbuan sa At Fun sas Funbalugu. ¹⁷ Ay am baguama ban gumuna yay ban tam Fun. Ay at ugali ay at fagmadaraganagun katvngvd yangay ebi fag taglong at ngayan te, Funbalugu-Tam-Taw-Yabi-At-Masine. Laman anggan ban tibak ama kesug tuwa at sisian. Ay laman ban anggan at ngay takamabo gamatangan tuwa kata sik taw matuyan. Katanya ban am baguama at fagbulun, laman nanfamasadan sik ngay taw laman Funbalugu At ngay taw ban. ¹⁸ Ay Funbalugu-Namatang nalong sa At tagbukngan te, Go sangay dewa aw mafufuama, ay dewa ku mangena mafufuina wan. Tain ban ku fagsafulan te, matuyan am longan. ¹⁹ Ay At tagbukngan nabalus sas Funbalugu-Namatang te, Aw wan, ku ngayan Madaragang-Tam-Funbalugu. Ay nu gbanwan aw sas Funbalugu At akbang. Ay Kanya At nasugu angku, laman nanfoyung aw emu ka fag masine fag barita. ²⁰ Dungugani ku longan sa emu. Madunguan way ro o. Ay wa ro o mafae longan siginan katsi yap ngay nsure ku longan. Anway du o ay gafanud sa ku longan katsi. Ay ku longan umgurungan ban fiya gina umdasug at menit. ²¹ Ay at ngay taw gfanya wa gugat Funbalugu-Namatang gina nanyago bebanglu. Ay at tiba fagayu gamatangan te, Taw ro at faglugoun sad basad Tagbvt-Fag-Bale-Funbalugu. ²² Ay Funbalugu-Namatang gina nalaklo, dua mafae longan sat ngay taw. Ay at ngay taw nasaful te, Nu nda Funbalugu-Namatang e nalag kata sik taginfanan gina sasad Tagbvt-Fag-Bale-Funbalugu. Ay Funbalugu-Namatang bilang ge longan nafafaskudanan way sat ngay taw. Ay faggugat dua mafae longan. ²³ Ay bandi Funbalugu-Namatang nu ntabu at fagbulun ginanya fag ngay menit sas Tagbvt-Fag-Bale-Funbalugu, noli yay sat bale. ²⁴ Ay bandi tv, at mangena, Funbalugu-At-Mafanud, gbuba wan. Ay gsuksuan way limak magdanun te, ²⁵ Katanya Funbalugu At fagbulun sa angku, anway kafanyu angku. Laman da kdi ban maplan dewa aw sa ku iba akbang. ²⁶ Kaduge Funbalugu-At-Mafanud igbuba unumk magdanun, Funbalugu nasugu At tagbukngan, Madaragang-Tam-Funbalugu, laman umsure sa sik fulan at ngayan Nasaret sas talun Balulangan. ²⁷ Ay sanya e sik baguina yud batang e natsa anya. At-Fakafamutan at fasad ban mangena. At-Fakafamutan, fun Fakafanyuun at kadagdagan at sadi. Ay ka fag baguina at ngayan Taglu. ²⁸ Ay ka fag tagbukngan nu nsure, nalong sas Taglu te, Manabayan tuwo. O wan Funbalugu At fagfamanyunan. Ay Funbalugu si wa emu. ²⁹ Ay Taglu gadayuan dawdaw sat amatanganan nu nadungug. Ay gamatanganan te, Taw ro manga katanya at famamatuan angku at masuad. ³⁰ Ay At tagbukngan nalong anya te, Lag kalimu, Taglu. Anway Funbalugu wan takamanyuun sa emu. ³¹ Ay dungugani. Kata tuy ku longan sa emu te, Gbuba ban o. Ay gfalangfe ban o sik ngenge sik ama. Ay nanfangayan ban o Anya Isus. ³² Kanya madaragang ban dawdaw. Ay e nafangayan ban Anya te, Tagtiba-Tungud-At-Baguama. Ay tam Fun tam Funbalugu nafon ban Anya At aguyangan, fun Fakafanyuun, at fagmagurangan. ³³ Ay Kanya nanmagurang ban sas Takamilug at ngay kadagdagan faggugat. Ay nu gmagurang ban, du e fakatabuan faggugat. ³⁴ Ay Taglu nalong sa ka fag tagbukngan te, Tain ro nu kin. Anway ki e mangama. ³⁵ Ay ka fag tagbukngan nabalus anya te, At-Masine-Fag-Falad umdasug ban sa emu. Ay anggan Tagtiba-Tungud At fagmadaragangun nadingding ban emu. Anway katanya, am fagfalangfeun ban fag ngenge malayun tuwa sat masine. Ay e nafangayan ban Anya te, Funbalugu-At-Baguama. ³⁶ Ay dungugani sa ku longan. Am kalongan, Funbalugu-At-Mafanud, dewa mafufuina, igbuba yay sik ama. Ay laman katsi at faunum gmagdanun. Ebi tiba dewa gfangayan anya te, Sik-Taggabawas. ³⁷ Anway nus nge wain, Funbalugu du e fagyudun mafabul fagayu. ³⁸ Ay Taglu nalong te, Dungugani ku longan. Aw wan Funbalugu At fanuguan. Ay nu katanya, umsure wa fiya am longan sa angku. Ay rodi ka fag tagbukngan nalo wan sanya ginan. ³⁹ Ginanya fag ngay menit, Taglu mafamasadan ay mafali nu nalo sas tagbudbugsulanun, sa sik fulan sas talun Naseg. ⁴⁰ Ay nu ndasug sanya, nasakbo sas Funbalugu-Namatang at bale. Ay igfamatuan Funbalugu-At-Mafanud. ⁴¹ Ay Funbalugu-At-Mafanud nu nadungug Taglu at famamatuan, at fagbubaun gleleg dawdaw sad basad ungdan. Ay At-Masine-Fag-Falad igmagurang sas Funbalugu-At-Mafanud. ⁴² Ay Funbalugu-At-Mafanud gbiya nu ge longan ay guseganan te, Funbalugu nafadait sa emu glabi yay sa tibak mangena. Ay Funbalugu nafadait yangay anggan sa am fagbubaun sigon. ⁴³ Sinu aw, laman o, ku Fun At tina, am fagindasugun ste sa angku. Madyay aw sik mafanalo akway fag taw. ⁴⁴ Madyay gina aw nadungug am famamatuan, ku fagbubaun sa ku ungdan gleleg dawdaw, anway guseganan. ⁴⁵ Ay ka fag mangena guseganan tuwa, tagafanud te, umsure wa ban fiya tam Funbalugu At longan sa anya. ⁴⁶ Ay Taglu igdanyu te, Aw gseg aw dawdaw tam Fun tam Funbalugu. ⁴⁷ Ay aw guseganan akyangay sas Funbalugu ku Tagbalabag. ⁴⁸ Anway Funbalugu kafanyu tuwa angku, At mafanalo fag fanuguan. Dungugani ku longan. Siginan katsi fagayu sugfun taw nafangayan ban angku te, Sik-Taguseganan. ⁴⁹ Anway Tagtiba-Tungud-At-Madaragang nafadasug sa angku fagayu at matvngvd fag fagbulun. Ay At tiba At ngayan te, Malayun-Sat-Masine. ⁵⁰ Ay Funbalugu kafanyu tuwa at ngay tagseg sa Anya, sas fagayu sugfun taw. ⁵¹ Ay Funbalugu At fagbulun nafoyung sas taw Funbalugu At kabitsugan. Ay Kanya nafasadsamanan at ngay tagfandaragang fag taw sat amatanganan. ⁵² Ay Kanya nafababa at ngay fun tagfalabi tiba siginan at fagmagurangan. Ay Kanya nafatiba tungud at ngay mababa fag taw. ⁵³ Ay Kanya nafon at masine sa takalunus, laman mapsug. Ay Kanya naayiyan at mabalan fag taw, laman du e kwa. ⁵⁴ Ay Kanya natarabang At fanuguan, at ngay Taw-Tagagbuan. Laman nafatunglus ebia taw At fakafanyuun sa tam aguyangan. ⁵⁵ Kata ebia taw At longan sa tam ngay aguyangan, sas Abrayam ay sa at kadagdagan faggugat. ⁵⁶ Ay Taglu nu namanwan sas Funbalugu-At-Mafanud at bale nu ndain tuluk magdanun. Ay bandi, guli wa sa ebia taw at fulan. ⁵⁷ Ndasug wan Funbalugu-At-Mafanud nu gfalangfe fag menit. Ay kanya nafalangfe sik ngenge sik ama. ⁵⁸ Ay at ngay fasabale ay anggan at ngay kalongan nadungug te, Funbalugu kafanyu Funbalugu-At-Mafanud. Ay ka fag ngay taw guseganan gfasfuan Funbalugu-At-Mafanud. ⁵⁹ Ay gina ndasug sas fawaluk menit igfaning Taw-Naseg at ugali nu e fagtoglagan. Ay ginanya ka fag ngay taw indasug ay gananfangayanun ka fag ngenge te, Funbalugu-Namatang. Igfaning at tama at ngayan. ⁶⁰ At roro at ngenge at tina nasalag anya te, Lagi. Lag katanya. At ngayan antuwa te, Uan. ⁶¹ Ay at tiba gfabadbabuan sa tina te, Yaya. Du am ay e kalongan at ngayan Uan. ⁶² Ay at tiba igfafaskudanan sa ka fag ngenge at tama te, Tain am fasadan at ngayan. ⁶³ Ay Funbalugu-Namatang nafafaskudanan, laman get sik fagrirukan. Ay rodi igriruk te, At ngayan Uan. Ay at tiba namatangan daw. ⁶⁴ Ay rodi Funbalugu-Namatang at bibig, ay anggan at famaleleg infiya wan. Ay kanya gdog yay fiya mafae longan. Ay naseg Funbalugu. ⁶⁵ Ay at ngay fasabale kalimu dawdaw. Ay fagayu taw sas talun Naseg igsulitanan at nadungug sanya ginan. ⁶⁶ Ay fagayu at nadungug gamatanganan daw ay ginto te, Tain ban tuy fag ngenge. Anway Funbalugu wa At fagmadaragangun tagufud anya. ⁶⁷ At-Masine-Fag-Falad igmagurang sas Funbalugu-Namatang, Uan Tagfasurung at tama. Ay kanya naguna nafoyung te, ⁶⁸ Segi Taw-Tagagbuan at Fun at Funbalugu. Anway Kanya namatang tuwa laman nanbalabag sa At ngay taw. ⁶⁹ Ay Kanya nafasure sik Tagbalabag At Madaragang sa antam. Siginan At fanuguan, fun Fakafanyuun, at kadagdagan. ⁷⁰ Katanya Funbalugu nu gfatunglus At longan siginan ebi At ngay masine fag taglong te, ⁷¹ Laman Funbalugu nabalabag ban antam siginan at ngay takalimata antam. Ay siginan at ngay takadotama antam at fagmadaragangun. ⁷² Ay Funbalugu igfagurungan tuwa At fatuyanan ebi sa tam ngay aguyangan te, Laman kafanyu tuwa antam. Ay Kanya dua kaliam ebi ebi At masine fag fatuyanan ⁷³ At nafatvngvd sa tam aguyangan, Abrayam te, ⁷⁴ Laman Kanya igbalabag yangay antam siginan takalimata antam. Katanya Funbalugu nu gtarabang antam. Laman di tam kalimu nu gseg tuwa tam sa Anya, ⁷⁵ sa tam leleg fag ngaba. Gina tam igfaning Anya. Ay gina matuyan tam fagbulun sa At akbang. ⁷⁶ Ay o wan, ku ngenge, e nafangayan ban emu te, Tagtiba-Tungud-At-Taglong. Anway nanguna ban o tam Fun, laman nanfamasadan ban o At ngay dalan. ⁷⁷ Ay laman nanfoyung ban o sas Funbalugu At ngay taw, Funbalugu At fagbalabagun at masuad te, Funbalugu nafaliam at ngay asalanan. ⁷⁸ Anway tam Funbalugu kafanyu tuwa antam. Ay Kanya nanfasure ban sa antam kata sik bagu fag menit siginans Banwa. ⁷⁹ Laman fagayu tagbanwan sasad marum ay sas fakateun e fagmayamagun tuwa. Ay At fagnanfoyungun ban antam, Laman nu glo tam sa tuwa at manabayan fag dalan. ⁸⁰ Ay Funbalugu-Namatangan at ngenge nu ndaul wan, matvngvd tuwa ban nu gamatangan sat masine. Ay nu kadaul ban sa ways talun at yud e taw. Anggan umsure sasa ngay Taw-Tagagbuan.

¹ Ginanya fag ngay menit, at fun daul, Sesar Tam-Fagsegan, e suguan daw. Laman e tumap ban fagayu taw sas fagdaul daga. ² Ginanya yay at taguna nu gtap, gina Kireniu at fun sirut sas talun Datag-Buid. ³ Ay fagayu taw noli yay sa at fulan mandi, laman nantap yay sanya at taw. ⁴ Ay anggan At-Fakafamutan nalo wan siginans talun Balulangan, sininans fulan Nasaret. Ay indasug sas talun Naseg, sas fun Fakafanyuun at fulan, at ngayan At-Ke-Fafa. Anway At-Fakafamutan, fun Fakafanyuun at kadagdagan at sadi. ⁵ Ay At-Fakafamutan nu glo nataban wan Taglu, at fasad ban mangena, laman e natap anya. Ay Taglu makbang wan nu gfalangfe. ⁶ Ay gina sanya, ndasug wan Taglu nu gfalangfe at ngenge fag menit. ⁷ Ay kanya igfalangfe at Turungana, sik ama. Ay naumut Anya sa sik sinyag. Ay nafatungkud Anya sasad fagfafangonan balan. Anway du e nafasak ka fag talanan sas bale fagtiugan. ⁸ Ay sis fagfafangonan fag talun e ngay tagtanud tupa. Sanya igtanud at ngay balan sad yabi. ⁹ Ay sadik tagbukngan siginans Funbalugu insure sa ka fag ngay tagtanud. Ay Funbalugu At fagmasineun nadamlag anya. Ay ka fag ngay tagtanud matvngvd dawdaw nu kalimu. ¹⁰ Ay ka fag tagbukngan nalong te, Lag kalimu. Anakway nanfoyung ayu sik masine fag barita te, sik fagusegananun ban dawdaw umdasug sas fagayu taw. ¹¹ Anway ay Tagbalabag katsi kalangfe sas fun Fakafanyuun at fulan. Ay Kanya Fagtayukan-Tam-Fun. ¹² Ay kata tuy ay fagsafulan. Lumag ban am at naumut fag Ngenge sasad fagfafangonan balan. ¹³ Ay rodi tv, nsure sik ngay Taw-Banwa ayuwayu, gfasfuan ka fag tagbukngan at sadi, ay igseg Funbalugu te, ¹⁴ Segi tam Funbalugu sas Banwa. Ay sas daga e fagmanabayanun ban sas Funbalugu At fakesugun fag ngay taw. ¹⁵ Ay ka fag ngay tagbukngan nu noli wa sas banwa, ka fag ngay tagtanud iglodlongan wa igsulitanan te, Bastam. Nanlag watam sas fulan At-Ke-Fafa. Laman nanlag watam at kindasug, Funbalugu At nafoyung antam. ¹⁶ Ay ka fag ngay tagtanud matarung nu nalo. Ay mafali nu kadasug. Ay kanya nalag At tina, Taglu, ay at mangama, At-Fakafamutan, ay anggan at Ngenge at matagilid sisad fagfafangonan balan. ¹⁷ Ay kanya nu nalag wan, nanfoyung yay sasa ngay taw at nadungug sa at Ngenge baliwa. ¹⁸ Ay fagayu at nadungug sa ka fag ngay tagtanud at longan, nadulawan dawdaw. ¹⁹ Ay Taglu di kaliam aro taw at kindasug fagayu ay at nadungug. Ay faggugat gamatangan tuwa anggan at masuad. ²⁰ Ay ka fag ngay tagtanud tupa noli wan. Ay igseg sas Funbalugu anway Masine dawdaw tam Funbalugu. Anway at nadungug ay manga at nalag gfadiuganan tuwa fagayu sa aro at nafoyung anya. ²¹ Nu nlangfe wa waluk menit, At mangaguyang nafaning wa Taw-Naseg at ugali nu e fagtoglagan. Ay ginanya igfangayan wa at Ngenge te, Isus. Igfaning At tagbukngan at fangayanan ebia taw gina gyud e taw. ²² Ay bandi indasug wa ka fag menit nu gfaning Ku-Unga At-Longan sa nu gfasine baliwa at tina ay anggan at ngenge. Ay ginanya At mangaguyang nauba Isus sas Erusalem, laman nanfalag Anya sas Funbalugu. ²³ Anway Funbalugu At-Rirukan nalong te, Fagayu at turungana fag mangama, sas Funbalugu way. ²⁴ Ay At mangaguyang nafon sik anyun, igfaning sas Funbalugu At-Longan te, Dewa duwak malabiung, ay dewa duwak linatad riangan. ²⁵ E sik mangama sas Erusalem at ngayan te, Dunug. Kanya sik matuyan fag taw ay sik tagseg sas Funbalugu. Ay Dunug nafanya Taw-Tagagbuan at Tagtarabang. Ay At-Masine-Fag-Falad igmagurang sas Dunug. ²⁶ Ay At-Masine-Fag-Falad nafoyung sas Dunug te, Ya ban o kate, yap ngay ban o nalag Funbalugu At Fagtayukan. ²⁷ Ay At-Masine-Fag-Falad nafaamatanganan sas Dunug laman indasug sas Tagbvt-Fag-Bale-Funbalugu. Ay ginanya At mangaguyang nauba at Ngenge sanya, laman igfaning Ku-Unga At-Longan. ²⁸ Ay Dunug nasalilian Isus ay naseg Funbalugu te, ²⁹ Ku Fun ku Funbalugu, Katsi insure wan Am nafatuyanan sa angku. Ay dewa ban aw umkate, e fagsegun akwan. ³⁰ Anway ku mata nalag wan Am nafon fag Tagbalabag. ³¹ Am wan At ke fasadan Am fagnafasteun em Tagbalabag laman fagayu taw sumaful Am fagbulun. ³² Kanya kata sik salung sasa ngay Yud-Naseg-Fag-Taw. Ay anggan sik fagmasineun sa Am ngay Taw-Tagagbuan. ³³ Ay At-Fakafamutan ay anggan Isus At tina gamatangan daw Dunug at longan sas Isus baliwa. ³⁴ Ay Dunug nafadait sas Isus At mangaguyang. Ay nafoyung yangay sas Taglu, Isus At tina, te, Dungugani sa ku longan. Ay siginan ban Tuy fag sisian at fagbulun, tibak Taw-Tagagbuan kata nu mtaid ban. Ay tiba kata nu mlindug ban. Tuy fag sisian sik fagsafulan. Ay ngayuk taw lumong ban mauri sa Anya baliwa. ³⁵ Ay kin. Laman ngayuk taw at amatanganan umsure yay ban. Ay anggan o, kabalu way ban o, kata sik fiso nu natubuk emu. ³⁶ At sadi Funbalugu At taglong sik mangena at ngayan te, Fangafanyu, Funbalugu-At-Mata at baguina. Kanya at sadi Taguseganan at kadagdagan. Fangafanyu mafufuina wan. Ay ebi sik baguina yay nu bagu e mangama. Ay nu fitu wak banwa at mangama inkate wan. ³⁷ Ay katsi sik burangday way. Ay at kadugayan 84k banwa. Ay dan wa sanya sas Tagbvt-Fag-Bale-Funbalugu. Ay kanya igseg Funbalugu gina e fagyudun kon fag menit. Ay nu gdarangin kayu yabi ay kayu menit. ³⁸ Ay Fangafanyu indasug gina at mangaguyang nauba Isus sanya. Ay kanya guseganan sas Funbalugu. Ay anggan nafoyung sas Isus baliwa sas fagayu tagfanya sas Funbalugu nu gbalabag fulan Erusalem. ³⁹ Ay Isus At mangaguyang nu ntabu wa nu gfaning fagayu Funbalugu At-Longan, noli wa sas talun Balulangan sat fulan mandi sas Nasaret. ⁴⁰ Ay at Ngenge nu kadaul, sik tagbitsuganan. Ay manga sik mamatanganan tuwa. Ay Funbalugu At fakafanyuun si wa Anya. ⁴¹ Kayu banwa Isus At mangaguyang satu was Erusalem gina at tagbiya fag fakonun at ngayan te, Famalangfe. ⁴² Ay Isus At mangune nu anwa 12, fagayu talanan nalo wa sas Erusalem, igfaning ebi at ugali. ⁴³ Ay nu ntabu wan at tagbiya fag fakonun, Isus At mangaguyang ay anggan at ngay iba noli wan. Ay roro Isus sa yays Erusalem. Ay At mangaguyang dua nasaful te, dada. ⁴⁴ Ay gamatangan te, Nu ndain Isus naalo wa sa em ngay iba taguli. Ay At mangaguyang sik menit mabuktung nu glo sasa ngaba dalan. Ay rodi igsarap wa Isus sa at ngay kalongan, ay ate sa at ngay iba. ⁴⁵ Ay At mangaguyang du e nalag Anya. Ay kanya guli wa sas Erusalem nansarap yay Isus sanya. ⁴⁶ Ay sis fatuluk menit At mangaguyang bagu nalag Isus sas Tagbvt-Fag-Bale-Funbalugu. Ay roro sanya way Isus malunggung sis buknga Taw-Naseg at ngay takamoyung. Ay Isus igdungugan yay ay manga ginto yay sanya. ⁴⁷ Ay fagayu at nadungug sas Isus At longan nadulawan dawdaw. Anway Isus gsaful tuwa ay mafafoyung tuwa. ⁴⁸ Ay At mangaguyang nu nalag wa Isus, inlipsik. Ay At tina ginto sas Isus te, Fagama, taw ro fakatanyaun Am fagbulun. Amatangani. Am mama ay anggan aw kabalu ami dawdaw em fagsarapun Emu. ⁴⁹ Ay Isus nabalus sa At tina te, Taw ngani ay fagsarapun Angku. Go sangay du am nasaful te, Masine nut sa Aw Ku Mama bale iste. ⁵⁰ Ay At mangaguyang dua nasaful Isus At longan at masuad. ⁵¹ Ay Isus nangufud wa At mangaguyang nu nalo siginans Erusalem ay noli wa sas Nasaret. Ay Kanya igfaning tuwa sa At mangaguyang at longan. Ay At tina namatangan faggugat aro taw at ngay fagbulun fagayu. ⁵² Ay inkayu wan Isus At fagsafulun. Ay manga At bilug indaul wan. Ay matvngvd tuwa Funbalugu ay anggan at ngay taw nu kesug Anya.

¹ Kaduge at fun daul Tiberiu-Sesar namagurang sas fagdaul talun 15k mangune. Ay At-Ke-Bangko at fun sirut sas talun Naseg. Ay Sik-Madaragang-At-Baguama-Sirut at fun sirut sas talun Balulangan. Ay at kaka, Takesug-Kabayu at fun sirut sas talun Taw-Itur ay sas talun Mabatu. Ay Tagfaliaman-Fakabaluun at fun sirut sas talun Sik-Safa. ² Ay Anas ay anggan Takabalu at Taguna-Fag-Taganyun-Daul. Ginanya, Funbalugu At longan indasug sas Uan, Funbalugu-Namatang at baguama, sas talun at yud e taw. ³ Ay Uan nalo sas fagayu talun sasa ngaba day safa Mababaun ay igfoyung. Laman at ngay taw umsurung sasad safa. Sik fagsafulan te, naubun wan at ngay mauri ay Funbalugu nafaliam at asalanan. ⁴ Uan at fagbulun ingurungan Funbalugu At taglong ebi, at ngayan te, Funbalugu-Nabalabag, at naguna nariruk sa At-Rirukan te, Anway tuy sik fanlongan Sas talun tuyd e gbanwan. At longan maurunganan Te, antam kamasadan Laman tam Fun e dalan. ⁵ Ay fagayu buknga muyud e fapnu ban. Ay fagayu muyud ay at bugsul e fadatag ban. Ay fagayu balikuan e faslung ban. Ay fagayu at tagubungan e fasudsudan ban. ⁶ Ay fagayu taw sumaful ban Funbalugu At fagbalabagun. ⁷ Ay ngayuk taw nalo ay inkakbang sas Uan, laman nangasurung ro, ay Uan iglong yay anya te, Kata way am sik ngay dot riangan. Sinu sangay at nasalag ayu te, laman umlagyu am siginan at kumdasug ban fag faurianan. ⁸ Fagbuluni masine kata sik buadan kayu at masine. Sik fagsafulan te, naubun wam ay asalanan. Ay agi yap am masegan te, masine wam anway Abrayam wanay ay katungudan. Anway igfoyung aw ayu te, Funbalugu e fagmadaragangun tuwa at fangawat Abrayam at ngay kadagdagan dewa ste ginan fag ngay batu. ⁹ Ay katsi wan e gawaseun wa kayu at lalid. Fagayu kayu at yud masine at buadan, e muan wa ban. Ay e mukas wa ban sasad afuy. ¹⁰ Ay at ngay taw nanginto sas Uan te, Tain manga ban em fagbulun. ¹¹ Ay Uan nabalus anya te, Nus nga sinu at ke lanbung duwa, foni at sadi sa at yud e lanbung. Ay nus nga sinu at ke fakonun, foni sa at yud e fakonun. ¹² Ay at ngay tagbul famanyun sat fun indasug, laman nangasurung ro. Ay nanginto sas Uan te, Takamoyung, tain manga ban em fagbulun. ¹³ Ay Uan nafoyung anya te, Nu gbul am at ngay famanyun siginan sa ngay taw, lag falabi. Kasakan yakman. ¹⁴ Ay sik ngay tagbarangian ginto yangay te, Ay anggan ami. Tain manga ban em fagbulun. Ay Uan igbalus yangay anya te, Lag gbul at ngay taw at salafi nut siginan way ay nafalimuanan anya ay nut siginan way ay nafamuagan. Balikam. Useganani wan kayu ay fun at nafon ayu ay nalufuyan. ¹⁵ At katvngvdan at ngay taw nu gfanya Fagtayukan, igfainbalian wa at amatanganan te, Go Uan wa manga tam Fagtayukan. Go kin. ¹⁶ Ay Uan igfoyung yay sat ngay taw te, Aw tagfasurung akyay ayu sasad safa. Ay At kumdasug ban fag Taw amadaragang yap angku. Ay aw ki e fagmasineun an aw oma gluas At fansalod At fanguskus darafa. Ay Kanya nanfasurung yangay ban ayu sa At-Masine-Fag-Falad ay sa sik afuy. ¹⁷ Ay Kanya iggalumutan wa At fanlanu laman malanu At fagrabasan. Ay Kanya igfaful at ke bilug fagayu sa At bale fagrabasan. Ay Kanya igbatas at mafis sas afuy at yud kalayung faggugat. ¹⁸ Ay ngayu yay Uan at fagananfoyungun at masine fag barita sasa ngay taw. ¹⁹ Ay Uan nasalag at fun sirut Sik-Madaragang-At-Baguama-Sirut. Anway ka fag fun sirut at nabul at kaka way mangena, at ngayan Erudias. Ay manga ngayu yay at mauri at fagbulun. ²⁰ Ay ka fag fun sirut nafamut yay at mauri at fagbulun. Anway kanya nafasungsung Uan sas bale fakasungsungan. ²¹ Ebi, kaduge Uan yud insungsung, kanya nasurung wan fagayu taw. Ay anggan Isus insurung yangay. Ay gina Isus igdarangin, at banwa inluang daw. ²² Ay At-Masine-Fag-Falad indaga. Ay at bilug kata sik linatad, ay intarubung sas Isus. Ay e nae longan wa sigon siginans Banwa te, O wan Ku fakesugun Ku Baguama. Guseganan Aw dawdaw Emu. ²³ Nu ndain Isus 30 wan At banwa nu gfasigad gfoyung sas taw. Tibak taw nu gfasad, Isus At tama At-Fakafamutan wan, ay roro yaya. Isus At fufuama sa At tina baliwa, at ngayan te, Tiba-Tungud. ²⁴ Tiba-Tungud at tama Sik-Nafon. Sik-Nafon at tama, At-Famaalo. At-Famaalo at tama, Tam-Fun. Tam-Fun at tama, Uana. Uana at tama, At-Fakafamutan. ²⁵ At-Fakafamutan at tama, Tam-Fun-Nafon. Tam-Fun-Nafon at tama, Taguba. Taguba at tama, Takafanyu. Takafanyu at tama, Funbalugu-Nafatsat-Dayu. Funbalugu-Nafatsat-Dayu at tama, Nage. ²⁶ Nage at tama, At-Madot. At-Madot at tama, Tam-Fun-Nafon. Tam-Fun-Nafon at tama, Semei. Semei at tama, Usek. Usek at tama, Uda. ²⁷ Uda at tama, Funbalugu-Kafanyu. Funbalugu-Kafanyu at tama, Resa. Resa at tama, Datag-Sinar-At-Taw. Datag-Sinar-At-Taw at tama, At-Nainto. At-Nainto at tama, Sik-Salung. ²⁸ Sik-Salung at tama, Tam-Fun. Tam-Fun at tama, Nasaful. Nasaful at tama, Kusam. Kusam at tama, Elmudam. Elmudam at tama, At-Nabantay. ²⁹ At-Nabantay at tama, Funbalugu-Tam-Tagbalabag. Funbalugu-Tam-Tagbalabag at tama, Funbalugu-Tam-Tagtarabang. Funbalugu-Tam-Tagtarabang at tama, Tam-Fun-Tiba-Tungud Tam-Fun-Tiba-Tungud at tama, Sik-Nafon. Sik-Nafon at tama, At-Famaalo. ³⁰ At-Famaalo at tama, Dunug. Dunug at tama, Naseg. Naseg at tama, At-Fakafamutan. At-Fakafamutan at tama, Malukme-Tam-Fun. Malukme-Tam-Fun at tama, Funbalugu-Mawat. ³¹ Funbalugu-Mawat at tama, Melea. Melea at tama, Mainan. Mainan at tama, Fagnafonun. Fagnafonun at tama, Kanya-At-Nafon. Kanya-At-Nafon at tama, Fun Fakafanyuun. ³² Fun Fakafanyuun at tama, Sik-Ama-Madaragang. Sik-Ama-Madaragang at tama, Tagseg. Tagseg at tama, At-Matvngvd. At-Matvngvd at tama, Salingsingan. Salingsingan at tama, Sik-Ubianun-Sirut. ³³ Sik-Ubianun-Sirut at tama, Ayi-Takamon. Ayi-Takamon at tama, Admin. Admin at tama, Arni. Arni at tama, Masungsungan. Masungsungan at tama, At-Nafaintubuanan At-Nafaintubuanan at tama, Naseg. ³⁴ Naseg at tama, Takamilug. Takamilug at tama, Kanya-At-Naasean. Kanya-At-Naasean at tama, Abrayam. Abrayam at tama, Takata-Sik-Kambing-Talun. Takata-Sik-Kambing-Talun at tama, Nakur. ³⁵ Nakur at tama, Serug. Serug at tama, Tagtanud Tagtanud at tama, At-Naafud. At-Naafud at tama, Tagsiginans-Atsi-Baliwa. Tagsiginans-Atsi-Baliwa at tama, Salingsingan. ³⁶ Salingsingan at tama, Kainan. Kainan at tama, Arfasad. Arfasad at tama, Tam-Nadungug Tam-Nadungug at tama, Tagfataluan. Tagfataluan at tama, Lamek. ³⁷ Lamek at tama, Tagbangkuan. Tagbangkuan at tama, Fagagbilugun. Fagagbilugun at tama, Fanuguan. Fanuguan at tama, Funbalugu-Masulo. Funbalugu-Masulo at tama, Kainan. ³⁸ Kainan at tama, At-Ngay-Taw. At-Ngay-Taw at tama, Fantubus. Fantubus at tama, Karaska. Karaska at Tama, Funbalugu.

¹ Ay Isus nu noli wa siginans safa Mababaun fag talun, At-Masine-Fag-Falad tagmagurang Anya. Ay manga nataban wa Anya sa sik talun at yud e taw. ² Ay Isus nut sanya 40k menit. Ay ginanya Takamuag-Tiba-At-Fagbulun igfaskud Anya. Ay Isus dua gfangon kaduge sanya. Ay nu kaduge wa niya, kalunus wa dawdaw. ³ Ay Takamuag-Tiba-At-Fagbulun nalong sas Isus te, Nu O wa fiya Funbalugu-At-Baguama, longi wa daw stiye fag ngay batu te, Asik fafai wan. ⁴ Ay Isus nabalus anya te, Yaya. At-Rirukan nalong wa te, Sik taw at leleg bundi siginans fafa fagtvngvd. ⁵ Ay Takamuag-Tiba-At-Fagbulun nataban Isus sa sik tungud abat. Ay mafali nu nafabantay Anya fagayu ke fun daul at talun sas fagdaul daga. ⁶ Ay Takamuag-Tiba-At-Fagbulun nanlong yangay fiya sas Isus te, Mon ban aw sa Emu fagayu kanya fag fagmadaragangun ay anggan at fagmasineun. Anway e nafon angku. Ay nanfon ban aw nus nga sinu ku fakaumsigun. ⁷ Nu gurungan tuwa nu sumeg O angku, fagayu Emu wa ban. ⁸ Ay Isus nabalus yangay anya te, Yaya. At-Rirukan nalong yangay te, Segi am Fun am Funbalugu. Ay sanyai tuwa am fagfaningun. ⁹ Ay Takamuag-Tiba-At-Fagbulun nataban Isus sas Erusalem. Ay nafat sanya Isus sas Tagbvt-Fag-Bale-Funbalugu sas tungud fungfung sub. Ay Takamuag-Tiba-At-Fagbulun iglong yangay fiya sas Isus te, Nu Funbalugu-At-Baguama Wo, arabangi wa daw. ¹⁰ Anway At-Rirukan nalong wa te, Funbalugu sumugu ro At ngay tagbukngan laman nantarabang Emu ay nandingding Emu. ¹¹ At ngay tagbukngan sumangfut Emu sat daluap, laman di O umtuktuk Am darafa sas batu. ¹² Ay Isus nalong yangay anya te, Yaya. At-Rirukan nalong yangay te, Lag gfaskud am Fun am Funbalugu. ¹³ Ay Takamuag-Tiba-At-Fagbulun nu nafaskud wa fagayu at fanfaskud, nalo yay, naubun yay sirut Isus. ¹⁴ Ay Isus noli wa sas talun Balulangan ay At fagmadaragangun siginan At-Masine-Fag-Falad. Ay e nafoyung sas fagdaul sanya fag talun sat ngaba dayu sas Isus At fagbulun baliwa. ¹⁵ Ay sanya Isus nafoyung sas Taw-Naseg at ngay bale fakafulan. Ay ngayuk taw tagseg Isus. ¹⁶ Ay Isus ndasug sas fulan Nasaret, sa ebia taw at talun gina baguama. Ay Kanya nasakbo sas Taw-Naseg at bale fakafulan sis Fakamatoun-Menit, igfaning kata ebia taw At ugali. Ay Isus namalindug, laman igtap Funbalugu At-Rirukan. ¹⁷ Ay e nafon sas Isus Funbalugu At taglong ebi, Funbalugu-Nabalabag, at rirukan. Ay Isus nalunggab at fagtapan ay nasarap tuy fag longan ay natap te, ¹⁸ Funbalugu At-Masine-Fag-Falad si wa Angku. Anway Funbalugu nafili wa Angku Laman nanfoyung Aw at Masine-Fag-Barita sas taw at yud e kwa. Ay Kanya nasugu Angku laman nanfoyung aw sa at kinsungsung te, E nanfalfas ban ayu. Ay anggan sa at ngay yud glag te, Iglag tuwa ban am. Ay anggan mafafalfas Aw at ngay ke fagatakanun. ¹⁹ Ay laman nanfoyung Akyangay te, Katsi at kadugayan indasug wan, Funbalugu nu kamanyun sas taw. ²⁰ Ay Isus nu ntabu wa nu gtap, nafafoli wan at fagtapan. Ay nafon yangay sat tagtanud. Ay inlunggung wan. Ay fagayu taw sas bale fakafulan nafalinggatun Anya. ²¹ Ay rodi Isus nanfoyung yay fiya te, Katsi kanya fag Rirukan at masuad ingurungan wan, kaduge am gdungugan. ²² Ay fagayu taw nalong at masine sas Isus baliwa. Ay kanya gamatangan Isus At longan at mafanyu wan. Ay at ngay taw nalong te, Go tuy fag taw At-Fakafamutan wa at baguama. Go kin. ²³ Ay Isus nalong anya te, Nu ndain ro ay longan sa Angku sik fafaskudanan te, Tagfafiya, fafiyai At balyu. Ay manga nalong yangay am te, Fagbuluni ste sa Am talun, kata yangay em dungganan Am fagbulun sas Takafanyu-At-Fulan. ²⁴ Ay Isus nalong yangay te, Matuyan iglong Aw ayu te, Funbalugu At taglong e gseg tuwa anya. Ay roro mangaro sanya fag talun at taglong at taw dua gseg anya. ²⁵ At matuyan iglong Kyangay sa ayu te, Kaduge ebi fag taglong, Funbalugu-Tam-Taw-Yabi-At-Masine, gleleg, ngayu at burangday sas talun Tagagbuan. Ay gina insungsung at fagmoyanan tuluk banwa ay unumk magdanun ay du e moyan. Ay e fanlunus daul sas fagdaul talun. ²⁶ Ay Funbalugu dua nasugu Funbalugu-Tam-Taw-Yabi-At-Masine sanya fag ngay burangday sas talun Tagagbuan. At fagsuguan anya sa way sik burangday sa sik fulan sirut at ngayan Nafaraska, sas Faggamatan-Uyang fag talun. ²⁷ Ay anggan ngayu yangay at tagabangbang sas talun Tagagbuan kaduge ebi fag taglong, Fungalugu-Gbalabag, gleleg. Ay fagayu sanya dua nafafiya. Sadik taw wadi at kinfiya, at ngayan te, Sik-Masine, siginans talun Datag-Buid. ²⁸ Ay fagayu Taw Naseg sanya fag bale fakafulan nu nadungug Isus At longan, matvngvd nu kadotama sa Anya. ²⁹ Ay ka fag ngay taw inlindug ay naayiyan Isus siginan at fulan. Ay nataban Anya sa sik tungud abat sas day fulan, laman nanfatong Anya. ³⁰ Ay dewa katanya, Isus nalo yay sa tiba buknga ay taba wa inyayu. ³¹ Ay Isus nalo wa sas Takafanyu-At-Fulan sas talun Balulangan. Ay nanfoyung sanya fag ngay taw sis Fakamatoun-Menit. ³² Ay at ngay tagdungugan nadulawan sas Isus At foyungan. Teway Isus nu gfoyung kata tuwa daw sik fun at ke fagmadaragangun. ³³ Ay sanya sas Taw-Naseg at bale fakafulan, e sik ama e mafurat fag falad. Ay kanya gbiya dawdaw nu ge longan te, ³⁴ Bakras. Taw ro Am fagstiyeun sa emi, Isus siginans fulan Nasaret. Go am fagstiyeun Am fasadan nanfatinas wa ro O emi. Nasaful akwa Emu te, O wan Funbalugu At Masine-Fag-Taw. ³⁵ Ay matvngvd Isus nu gsalag te, Lag ge longan. Alfasi wan sanya ginan fag taw. Ay ka fag mafurat fag falad nu nafatong wa ka fag ama sasa ngay taw buknga, nalfas wan sanya ginan fag ama. Ay ka fag ama di e fakatarasan, nus di sirut. ³⁶ Ay sanya fag ngay taw nu nalag, nadulawan dawdaw, ay gfangintuanan te, Taw fakatanyaun nu gfoyung. Madyay kanya e fagmadaragangun tuwa nu gsugu at mafurat fag falad, ay kanya mafafalfas tuwa. ³⁷ Ay rodi e nafoyung sas fagdaul tagsafungan sanya fag talun sas Isus baliwa. ³⁸ Ay Isus inlindug ay nalo wan siginan Taw-Naseg at bale fakafulan. Ay nasakbo sas Simun at bale. Ay sanya Simun at nugangina gadailan masugba daw at bilug. Ay at iba get Isus te, Fafiyai anya. ³⁹ Ay Isus inlindug sanya fag mangena day fagtiugan ay igsalag ka fag dailan. Ay rodi at dailan naubun wa fiya anya. Ay rodi kanya fag mangena inlindug ay kanya tuwa tagfalu sat ngay bagu kadasug. ⁴⁰ Ay gina bagu nfalyu at menit, fagayu taw sanya nataban at ke dailan sas Isus nus nge wain at taw at dailan. Ay Isus nafatayuk At daluap sanya fag ngay taw ay nafafiya fagayu. ⁴¹ Ay anggan at ngay mafurat fag falad nalfas wan siginan at ngay taw. Ay gbiya nu ge longan te, O wan Funbalugu-At-Baguama. Ay Isus igsalag anya nu ge longan. Anway ka fag ngay mafurat fag falad nasaful te, Isus, Kanya anwa Fagtayukan. ⁴² Gina bagu kamenit, Isus nalo wan ay ndasug sa sik talun at yud e taw. Ay at ngay taw nasarap Anya. Ay rodi tiba nu nalag Isus, nafatawad Anya, laman rodi Isus dua naubun. ⁴³ Ay Isus nalong sanya fag ngay taw te, At masine nu nanfoyung Aw sas tibak fulan yangay at Masine-Fag-Barita sa baliwas Funbalugu-Nu-Gmagurang-Taw. Anway katanya At fasadan At nasugu Angku. ⁴⁴ Ay Isus igfoyung sas talun Naseg at ngay bale fakafulan.

¹ Sik menit sik ngay taw magit Isus kaduge gdungugan Funbalugu At longan. Ay Isus namalindug sas tigyangan lino Genesaret. ² Ay Isus nalag duwak balutu sanya sis tigyangan lino. Ay aro fag ngay tagfanguyang nalo wan sanya ginan. Laman nanfegus at fanggamat uyang. ³ Ay Isus nasakay sa sik balutu, Simun at tagbilug ka fag balutu. Ay Isus get sas Simun te, Fatsai yap siruts tigyangan lino. Ay Isus malunggung ay igfoyung yay at ngay taw sanya gina nafat sas tigyangan at balutu. ⁴ Ay nu ntabu wa nu gfoyung, Isus nalong wa sas Simun te, Fatunglusi wa sasa ngaba lino. Ay falayugi ay ngay fanggamat uyang ay fagamat ro am. ⁵ Ay Simun nalong sas Isus te, Em Magurang, madyay nu gayon ami fagngaba wak yabi. Ay nus di sirut wami e nafabul. Dewa katanya, anway O wan At nalong, nanfalayug akyay ro em ngay fanggamat uyang. ⁶ Ay nu nafalayug wa at ngay fanggamat uyang, nafabul sik ngay uyang ayuwayu. Ay at ngay fanggamat uyang gakagiratun wan. ⁷ Ay Simun ay at ngay ufud tagfanguyang si at balutu igyafe sa at ngay ibama tagsa at sadi fag balutu. Laman umdasug ay tumarabang anya. Ay at tibama ndasug wa fiya. Ay at ba uyang nkapnu ka fag duwak balutu, ay gakalubgubun wan. ⁸ Ay Simun Takata-Sik-Batu nu nalag wa at fagbulun, naarungan sas Isus At akbang. Ay nalong te, Em Fun, ubuni wa angku, anway aw sik tagasalanan akyay. ⁹ Fakatanyaun Simun at longan anway nadulawan. Ay anggan fagayu tagufud anya si at balutu nadulawan yangay. Teway nalag at nafabul fag ngay uyang ayuwayu. ¹⁰ Ay anggan Santiagu ay Uan, Funbalugu-Nafon at baguama fag duwa, nadulawan yangay. Ka fag duwama, Simun at ufud sis tibak balutu. Ay Isus nalong sas Simun te, Lag kalimu. Siginan katsi nanfaful ban o at ngay taw, kata nu gamat o uyang katsi. ¹¹ Ay ka fag ngay tagfanguyang nu nafadasug wa at duwak balutu sas tigyangan lino, naubun wan fagayu ay nangalo wa sas Isus. ¹² Kaduge Isus sa sik fulan, indasug sanya sik ama at mason tagabangbang. Ay nu nalag wa Isus, namalub sas Isus akbang. Ay matvngvd nu gseg sas Isus te, Ku Fun, Ku Fun. Nasaful aw te, mafafiya O angku nu kaumsig O. ¹³ Ay Isus nafalugde At take ay natayuk sat ke dailan te, Kin. Kaumsig Aw. Afiyai wan. Ay rodi tv infiya wa fiya aro tagabangbang. ¹⁴ Ay rodi matvngvd Isus nu gsalag anya te, Lag kamansulit nus di sadik taw. Loi way fagtvngvd ay falagi way am bilug sas taganyun. Ay foni tuwa anya sik famanyun kata ebi Ku-Unga At-Longan at suguan. Laman am famasaful sasa ngay taw te, nfiya wo. ¹⁵ Ay dewa Isus igsalag anya, e nafadungug ngap karo Isus At fagbulun glabi yay aro taw. Ay ngayuk taw at kinful, laman nandungugan sas Isus. Ay laman igfiya at dailan. ¹⁶ Ay Isus naubun wa ka fag ngay taw. Ay nalo wa sas talun at yud e taw laman nandarangin. ¹⁷ Sik menit kaduge Isus igfoyung, e sik ngay Taw-Tagfalayun ay e ngay takamoyung Ku-Unga At-Longan at malunggung sanya. Ka fag ngay taw siginan sa ngay fulan sas talun Balulangan ay sas talun Naseg. Ay anggan siginans fulan Erusalem. Ay Isus At fagmadaragangun siginans Funbalugu at fagmafafiyaun at ngay taw at ke dailan. ¹⁸ Ay gina sanya e nauba sik ama at yud malelegan sisad tagbung. Ay at ngay taguba igsarap at fagfasakboan sasad bale. Laman fafadasug at ke dailan sas Isus akbang. ¹⁹ Ay at ngay taguba du e nalag at fagfasakboan. Anway ngayu wayay at taw sanya. Ay rodi kanya naulul sas tungud ugun ay nafatagbung sa sad sulat at yud malelegan si sik tagbung. Laman nafatungkud sas Isus akbang saswa taw. ²⁰ Ay Isus nalag ka fag ngay taw te, kafandiug tuwa. Ay nalong yangay sa at yud malelegan te, Sama, naliam wan am ngay asalanan. ²¹ Ay rodi Taw-Naseg at ngay tagfasaful ay anggan at ngay Taw-Tagfalayun igsulitanan sat dayu te, Sinu ka fag taw at nalong mauri sas Funbalugu baliwa. Sinu at mafafaliam taw at asalanan. Go Funbalugu wadi. Go kin. ²² Ay roro Isus nasaful yangay ka fag ngay Taw-Naseg at amatanganan. Ay Isus ginto sa anya te, Taw ro ay fagamatanganun katanya at masuad. ²³ Amatangani. Inday fag longan at madaragang at kumsure. Nu lumong Aw te, Naliam wan am ngay asalanan. Ay nu lumong Aw te, Malindugi wan ay loi wan. ²⁴ Ay laman ro sumaful am te, Aw, Taw-At-Baguama, e fagmadaragangun Akwa fiya ste swa daga nanfaliam taw at asalanan. Ay rodi Isus glong wa ngani sa at yud malelegan te, Glong Aw sa emu te, Alindugi. Ay fasani wa am tagbung. Ay ulii wa sa ay bale. ²⁵ Ay rodi tv kanya fag taw inlindug wa fiya siswa taw. Ay nafasan wa fiya at tagbung. Ay nauli wa sat bale. Ay igseg wa fiya sas Funbalugu. ²⁶ Ay at naulit fag ngay taw nadulawan dawdaw. Ay anggan ka fag ngay taw igseg sas Funbalugu. Ay manga kalimu te, dua tam batang glag takatanya. ²⁷ Ay rodi Isus nalo wan. Ay nalag sik tagbul famanyun sat fun, at ngayan At-Famaalo. Kanya malunggung sas bale fagfonan famanyun sat fun. Ay Isus nalong anya te, Gewan. Aloi angku. ²⁸ Ay At-Famaalo naubun wan fagayu. Ay inlindug ay nangalo wa sas Isus. ²⁹ Ay At-Famaalo igfasine sik yafun daul sat bale, laman guseganan sas Isus. Ay sik ngay tagbul famanyun sat fun, ay anggan tibak taw malunggung sanya gfasfuan ka fag duwama gfangon. ³⁰ Ay Taw-Naseg at ngay Taw-Tagfalayun ay anggan at ngay tagfasaful gfaibugan sas Isus At ngay tagadal baliwa. Ay nainto anya te, Taw aro ay gfagfasfuanun gfangon ay ginum sanya fag ngay tagbul famanyun sat fun, ay anggan sa at ngay yud gfaning Taw-Naseg at ugali. ³¹ Ay Isus nafafaskudanan te, Sik taw at yud e dailan dua long kaumsig sik tagfafiya. Kayu way at ke dailan takaumsig. ³² Ku fagnastiyeun Ku faggewanun sa Angku kayu way at ke asalanan laman naubun ban at ngay mauri. Ay yaya at masine fag taw. ³³ Ay ka fag Taw-Naseg at ngay Taw-Tagfalayun ay anggan at ngay tagfasaful nalong sas Isus te, Uan Tagfasurung at ngay tagadal ngayu ginan nu e fagyudun gfangon fag ngay menit ay igdarangin. Ay anggan Taw-Tagfalayun at ngay tagadal katanya yangay. Ay madyay Am ngay tagadal kon tuwa ay ginum tuwa. ³⁴ Ay Isus nafafaskudanan yangay te, Go at bagu indaduwa fag mangama at ngay fagues e fagyudun gfangon ginanya fag ngay menit dewa te, sanya wan ka fag mangama. Ay go yaya. ³⁵ Ay roro sa bans tibak menit gina ban e tumaban kanya fag mangama. Ay kaduge yay ban anya at ngay fagues nu e fagyudun gfangon fag ngay menit. ³⁶ Ay Isus nafafaskudanan yangay te, Du e taw nabul sik afud siginan sik bagu fag lanbung laman nafagamut sa at dan fag lanbung, laman at fanfaut at sulbung. Anway nu katanya way at fagbulun, kanya nafarasras way baliwa sat bagu fag lanbung. Ay at nabul fag afud siginan at bagu fag lanbung dua kata sat dan. ³⁷ Ay manga sik taw dua gtalin at bagu fag uwat buadan safa sa at dan fag fagsuadan balat balan. Anway nu natalin way sanya, gina at bagu fag buadan safa lumafas, fabaga wa ngap karo at fagsuadan ay umbaltak wan. Ay at talinan umbusbus wan. Ay at fagsuadan umrufa wan. ³⁸ Yaya, di katanya. Sik taw at fagtalinan antuwa sat bagu fag buadan safa sa at bagu fag fagsuadan balat balan. ³⁹ Ay du e taw ginum at dan fag buadan safa ay rodi kaumsig at bagu. Anway at longan te, At dan tuwa at masine.

¹ Si sik Fakamatoun-Menit Isus ay At ngay tagadal nalo wa sa sik ngabak tanuman. Ay ginanya At ngay tagadal nadalan sirut nabul narabas tiba at buadan. Ay naon wan. ² Ay Taw Naseg at tibak Taw-Tagfalayun nalong sa ka fag ngay tagadal te, Igbul way am at buadan. Taw ro ay fakamaboun sa Ku-Unga At-Longan sas Fakamatoun-Menit baliwa. ³ Ay Isus nainto sa ka fag ngay Taw-Tagfalayun te, Go sangay di am natap fun Fakafanyuun at fagbulun ebi gina kalunus. Ay anggan at ngay ufud sigon gina kalunus. ⁴ Ay Fun Fakafanyuun nasakbo sas Funbalugu bale ay nabul ay naon Tagsis-Funbalugu-Salubangan-Fag-Fafa. Dewa Ku-unga At-Longan igsalag te, Dua masine tibak taw nu kon ka fag fafa. Kayu yakman at ngay taganyun fagtvngvd. Ay fun Fakafanyuun naon wan ay nafon yangay anggan sa at ngay ufud. ⁵ Ay Isus nalong yay te, Aw wan, Taw-At-Baguama, tagmagurang anggan sis Fakamatoun-Menit. ⁶ Ay sa tibak Fakamatoun-Menit, Isus nasakbo sas Taw-Naseg at bale fakafulan ay nafoyung sanya. Ay sanya sik ama at kingong at siun fag daluap. ⁷ Ay Taw-Naseg at ngay tagfasaful ay anggan at ngay Taw-Tagfalayun sanya gulit sas Isus te, go Isus mafafiya ka fag ama gina sis Fakamatoun-Menit. Fakatanyaun ka fag ngay Taw-Naseg at fagulitun, anway kaumsig way nu e foyungan sa tibak taw te, Isus long e asalanan. ⁸ Ay Isus nasaful sa ka fag ngay Taw-Naseg at amatanganan. Ay nalong sa at kingong at daluap te, Stei. Malindugi ste swa taw. Ay ka fag ama namalindug wa fiya sanya. ⁹ Ay Isus nainto sasa ngay Taw-Naseg te, E fagintoun Aw sa ayu te, Inday fag fagbulun tagfaning sa Ku-Unga At-Longan sis Fakamatoun-Menit. Nu gfagbulun masine ay ate mauri. Tenday, nu gfalangfe, ay ate nu gfate sik taw. ¹⁰ Ay Isus iglingaman sat ngay taw, ay nalong sa at kingong at daluap te, Falugdei am take. Ay kanya igfaning. Ay at daluap nfiya wan kata ebi. ¹¹ Ay at ngay Taw-Naseg mason nu kadotama. Ay kanya igsulitanan sat dayu te, Tain ban tam fagbulun sa ka fag Isus. ¹² Ginanya fag menit, Isus naulul saswa bilug tubi laman nandarangin. Ay fagngaba wak yabi Isus nu gdarangin sas Funbalugu. ¹³ Ay nu nmenit wan, Isus nafaful sa Anya At ngay tagalo Anya. Ay nafili sanya ginan fag ngay taw 12k taw. Ay Isus nafangayan anya te, At-Suguan. ¹⁴ Ay kata tuy Isus At-Suguan fag 12 at ngayan te, Simun. Isus nafamut yay at ngayan te, Takata-Sik-Batu. Ay Butuan, Simun at arian. Ay Santiagu, ay Uan, ay Takesug-Kabayu, ay Sik-Takali-Sirut, ay ¹⁵ Funbalugu-At-Nafon, ay Duwak-Nasfuan, ay Santiagu, Alfeu at baguama, ay Nadungug. Tiba nafangayan anya te, Sik-Takamabo-Taw-Ruma. Ay ¹⁶ Segi, Santiagu at baguama. Ay anggan Segi, kanya siginans Ufat-Fulan-Sirut. Ay kanya at namoyung ban Isus sas mauri fag taw. ¹⁷ Ay Isus indaga siginans swa bilug tubi gasfuan At-Suguan fag 12. Ay inful sa sik datag. Ay sanya At ngay tagalo ayuwayu, ay anggan sik ngay taw ayuwayu siginans fagdaul talun Naseg. Ay siginans fulan Erusalem. Ay anggan tagsiginans tigyangan Lino-Daul fag talun, makbang sas fulan Batu-Luguy ay sas fulan Faggamatan-Uyang. Ay fagayu indasug laman nandungugan sas Isus. Ay manga Isus nanfafiya at ke dailan. ¹⁸ Ay at ngay ke mafurat fag falad e nafafiya wan. ¹⁹ Ay fagayu taw sanya kaumsig natayuk sas Isus. Anway At fagmadaragangun siginan Anya at nafafiya fagayu at ke dailan katanya. ²⁰ Ay Isus nalag wa fiya At ngay tagalo ayuwayu ay nalong te, Guseganan tuwam, am at yud e kwa fag taw. Anway anggan am inful tuwam sas Funbalugu-At-Fagmagurangan-Taw. ²¹ Guseganan tuwam, am takalunus katsi. Anway mapsug tuwa ban am. Guseganan tuwam, am taguyway katsi. Anway mase tuwa ban am. ²² Guseganan tuwam dewa e kalimata ayu. Ay dewa e gfasaruwayan ayu. Ay dewa e gfalingun ayu. Ay dewa e gyud gadunguganun sa ayu baliwa, anway gamatangan te, mauri way am. Fakatanyaun at fagbulun anway am wan tagfaning Angku, Taw-At-Baguama. ²³ Useganani ginanya fag menit. Ay famakfaki at katvngvdan nu guseganan am. Anway gbiya ban ay fanambagun sas Banwa. Anway at ngay tagfauri ayu at aguyangan, kanya sik ngay tagfauri yangay sa ebi ebi Funbalugu At ngay taglong. ²⁴ Ay e nanfauri ban ayu, am at mabalan fag taw katsi. Anway katsi wan am nu gbul am ay ngay fakaumsigun nus nge wain. ²⁵ Ay e nanfauri ban ayu, am fag ngay taw takapsug katsi. Anway bandi kalunus way ban am. Ay e nanfauri ban ayu, am fag ngay taw takase katsi. Anway bandi kabalu way ban am, ay guyway way ban am. ²⁶ Ay e nanfauri ban ayu, kaduge fagayu taw glong masine sa ayu baliwa anway kata yangay am anya. Madyay katanya yangay ka fag ngay taw at aguyangan ebi, nu glong masine yangay sa at yud matuyan fag ngay taglong baliwa. ²⁷ Iglong aw sa ayu tagdungugan te, Esugi tuwa sa takadotama ayu. Ay nus nge wain ay fagbulun, masinei tuwa sa takalimata ayu. ²⁸ Ay darangini laman Funbalugu kafanyu tuwa sa tagananfauriun ayu. Ay darangini yangay sa tagfalingun ayu. ²⁹ Ay sik taw nu nafalang am fingi at sadi, falagi yangay am fingi sik tigyangan. Ay sik taw nu nabul am lanbung tagsit tungud, lag salag nu gbul anggan am lanbung sit daga. ³⁰ Foni sas fagayu tagget emu. Ay sik taw nu nafamul am nanuranan, am, lag get am nanuranan siginan anya. ³¹ Ay nus nge wain ay fakaumsigun ay iba at fagbulun ban nu masine tuwa sa ayu, katanyai yangay ban anggan ayu ay fagbulun sa anya. ³² Go nu kesug wam at takesug ayu, go am way ban at ke fanambagun siginans Funbalugu. Ay go yaya. Anway anggan at ngay tagasalanan kesug at takesug anya. ³³ Ay go nu gtarabang wam at tagtarabang ayu, go am way ban at ke fanambagun siginans Funbalugu. Ay go yaya. Anway anggan at ngay tagasalanan katanya yangay at fagbulun. ³⁴ Ay go nu gfaulbus wam sa sik taw, ay nu gamatangan way am te, gbul akyangay siginan anya. Go am way ban at ke fanamabagun siginans Funbalugu. Ay go yaya. Anway anggan at ngay tagasalanan igfaulbus yangay sa tibak tagasalanan, laman nabul ban siginan anya. ³⁵ Ay roro esugi tagkadotama ayu. Ay fagbuluni at masine. Ay faulbusi tuwa sa tibak taw ay lag gamatangan te, kanya gfafoli yay ban. Nu katanya tuwa, gbiya ban ay fanambagun siginans Funbalugu. Ay am wa ban Tagtiba-Tungud At ngay unga. Anway Funbalugu kafanyu tuwa sas fagayu taw. Ay anggan sa at yud taguseganan sa tiba, ay anggan sat tagmauri dawdaw. ³⁶ Ay afanyui tuwa at taw fagayu. Kata yangay ay Tama nu kafanyu at ngay taw. ³⁷ Lag gfansulup ay iba te, Nu ndain ro, mauri at fagbulun. Laman di e kafoyung ban te, Mauri anggan ayu ay fagbulun. Ay lag gfoyung te, Em iba at fagbulun mauri. Laman di e gfoyung ban te, Ay fagbulun mauri. Ay aliami ay iba at asalanan. Laman e nanfaliam ban ay asalanan. ³⁸ Ay famoni, ay e nafon yangay ban sa ayu. Ay at nafon ban sa ayu ngayu yangay. Ay mafagitan tuwa. Ay nauwig tuwa. Ay nafabugsul tuwa. Anway nus nga seyu ay nafon sa ay iba, kayu yangay ban anya at nafon sa ayu. ³⁹ Ay Isus nafafaskudanan yangay te, Go at yud glag fag taw mafafoyung yangay at dalan sa tibak taw at yud glag. Ay go yaya. Go ka fag duwa umtong way ro sasad tabyu. Go kin. ⁴⁰ Ay sik tagadal dua glabi sa at takamoyung. Ay fagayu tagadal nu nasaful tuwa, katvngvd yangay at takamoyung. ⁴¹ Taw ro am fagnalongun sa am fadugsay te, Ganamata wo. Ay si emu ngap nu sik fun kayu tuwa sa am mata. ⁴² Ay taw ro am fagnalongun sa am fadugsay te, Sama, aw wan tagbul am namata. Ay roro nu sik kayu yay daw si am mata. O tagfanluk way o fag taw. Buli yap taguna ka fag fun kayu si am mata. Ay nu nabul tuwa o, maliyo tuwa am mata. Ay mafabul long o am fadugsay at namata. ⁴³ Sik masine fag kayu dua mafafabuadan mayango. Ay sik mayango fag kayu dua mafafabuadan melo. ⁴⁴ Anway at buadan way tagfasaful sas taw te, go tain ka fag kayu. Ay du am batang gbul sik matamis fag buadan siginan sik sabinit. Ay du am batang gbul sik uwat buadan siginan sik alkawayan. ⁴⁵ At masine fag taw, masine yangay at nafasure siginan at amatanganan, siginan ebia taw at namatang. Ay at mauri fag taw, mauri way at nafasure siginan at amatanganan, siginan ebia taw at namatang. Anway sik taw at longan igfaning yangay sa ka fag taw at amatanganan. ⁴⁶ Taw ro ay fagnafangayanun Angku te, Em Fun. Em Fun. Ay nu dway ngap am gfaning fagayu Ku longan. ⁴⁷ Nus nga sinu fag taw at kindasug sa Angku, ay at nadungug Ku longan ay at tagfaning, nafoyung ka fag taw at fasudsudan. ⁴⁸ Ka fag taw kata sik taw nu naawat sik bale. Ay naali ngabasad laman at turuk at kabasadan anggan wa indasug sas batu. Ay dewa ndaul at safa, ay dewa indasug sa ka fag bale, at bale di glelegan, anway matvngvd tuwa nu maawatan. ⁴⁹ Ay roro ka fag taw nu nadungug way fagtvngvd Ku longan, ay nu dway gfaning, ka fag taw kata sik taw nu kamale. At mafadfalianan way, ay matungkud way sigad siswa daga. Ay dua naali. Ay at safa nu ndasug wa sa ka fag bale, rodi inlafi wan. Ay taba wa nrasras.

¹ Nu ntabu wa fagayu Isus At fagafoyungun fag longan laman at ngay taw nadungug, Isus nangadasug sas Takafanyu-At-Fulan. ² Ay sik fun tagbarangian at fakesugun fag fanuguan gadailan ay gakateun. ³ Ka fag fun sirut nu nadungug sas Isus at fagbulun, nasugu Taw-Naseg at magurang tiba, laman nanget sas Isus. Laman Isus umdasug ro sa ka fag fun sirut at bale, ay gfafiya ro at fanuguan. ⁴ Ay ka fag ngay magurang nu ndasug wa sas Isus, matvngvd nu glong te, Insak tuwa em fun at fagmasineun laman tumarabang O anya. ⁵ Madyay kanya kesug tuwa tam ngay taw. Ay manga kanya yangay at nafaawat tam bale fakafulan. ⁶ Ay rodi Isus nangufud wa ka fag ngay magurang. Ay gina Isus gakakbangun sa ka fag fun sirut at bale, ka fag fun nasugu yay at ngay fagues sas Isus. Laman nanfoyung sas Isus ka fag fun at longan sas Isus te, Ku Fun, aw ku e fagmasineun nu sak waro O daw sumakbo sa ku bale. ⁷ Ay katanya way ku amatanganan ku fagyudun kakbang sa Emu. E longani way fagtvngvd ay, umfiya waro ku fanuguan. ⁸ Anway e fun akyay si ku tungud. Ay e tagbarangian akyay si ku daga tv. Ay nu lumong aw sat sadi te, Loi wa sanya. Kanya lumo wa fiya. Ay nu lumong aw sat sadi te, Stei. Kanya stumiye wa fiya. Ay nu lumong aw sa ku fanuguan te, Buli. Kanya ro nanbul wa fiya. ⁹ Ay Isus nu nadungug katanya, nailatan dawdaw sa ka fag fun tagbarangian at nalong baliwa. Ay Isus inbiling ay nalong sa at ngay tagalo Anya te, Iglong aw sa ayu te, Kua batang e nadungug at kinfandiug takatvngvd anya, dewa sas fagayu Taw-Tagagbuan. ¹⁰ Ay at nasugu fag ngay fagues nu noli wa sas bale, nalag te, ka fag fun tagbarangian at fanuguan nu infiya wan. ¹¹ Dua glugo Isus nu kadasug sa sik fulan at ngayan Nain. Ay At ufud sanya At ngay tagadal wan ay anggan sik ngay taw ayuwayu. ¹² Ay gina Isus gakadasugun sa ka fag fulan at sakbawan alad, e nauba at kinkate siginans fulan. Kanya at kinkate sik burangday baguama sik bugtung. Ay anggan sik ngay taw ayuwayu siginan ka fag fulan nangufud ka fag burangday. ¹³ Ay tam Fun Isus nu nalag ka fag burangday, kafanyu dawdaw anya. Ay nalong anya te, Fagina, lag guyway. ¹⁴ Ay Isus inkakbang ay natayuk sat kinkate at fagsuadan. Ay rodi taguba intuas yay daw nu glo. Ay Isus nalong te, Sama. Iglong Aw emu te, Malunggungi. ¹⁵ Ay aro taw at matian inlunggung ay ge longan sirut. Ay Isus nafoyung sat tina te, Nin yay am baguama. ¹⁶ Ay fagayu sanya fag taw kalimu dawdaw. Ay gseg Funbalugu te, Sik Funbalugu At madaragang fag taglong insure yay sa antam. Ay, Funbalugu di kaliam At ngay taw. ¹⁷ Ay ka fag foyungan sas Isus baliwa inrapyag sas fagdaul talun Naseg ay anggan sas tagsafungan fag ngay talun sat ngaba dayu. ¹⁸ Uan Tagfasurung at ngay tagadal nafoyung sas Uan fagayu aro taw Isus At fagbulun. ¹⁹ Ay Uan nafakbang sa anya at tagadal fag duwa. Ay nasugu anya sa tam Fun Isus laman nanginto te, Go O wan ebi at nafoyung Tagadasugun. Go kin. Ay go ate idya, ay gfanya yap ami. ²⁰ Ay Uan at tagadal fag duwa nu ndasug sas Isus, nalong anya te, Uan nasugu emi sa Emu. Laman nanginto ami sa Emu te, Go O wan ebi at nafoyung Tagadasugun. Go kin. Ay go ate bunya O. Ay gfanya yap ami. ²¹ Ay ginanya sirut, Isus nafafiya at ngay taw at ke dailan, ay anggan at mason at tagadailan. Ay anggan naayiyan at ngay mafurat fag falad siginans taw. Ay anggan nafafiya at ngay yud glag fag taw, laman glag tuwa. ²² Ay Isus nalong sas Uan at tagadal fag duwa te, Ulii wan. Ay foyungi sas Uan ay nalag, ay ay nadungug ste ginan te, at yud glag ebi, katsi glag tuwa. Ay at yud malo ebi, katsi malo tuwa. Ay at tagabangbang ebi, katsi infiya tuwa. Ay at yud gdungug ebi, katsi gdungug tuwa. Ay at kinkate ebi, katsi gleleg yangay. Ay e nafoyung at Masine-Fag-Barita sat yud e kwa. ²³ Ay sik taw guseganan tuwa nu gdi gfainfolian at amatanganan sa Angku. ²⁴ Ay Uan Tagfasurung at nasugu fag duwa noli wa sas Uan. Ay rodi Isus ginto sanya fag ngay taw sas Uan baliwa te, Taw ro ay fagnaloun sas talun at yud e taw. Taw sangay ay fagialagun sanya. Go ay fagialagun takata sik sigbo taginkuyusan sas tagmara. ²⁵ Ay nu bunyay kanya, nataw tuwa ay fagialagun. Go ay fagialagun antuwa sik taw at ke lanbung at masine dawdaw. Anway at ke lanbung at masine dawdaw, nu kanya way, tagfaning way sat mabalan fag taw at ugali. Ay nu gbanwan sa way long tiba tungud fag fun at bale. ²⁶ Ay nu bunyay kanya, inday tuwa ro ay fagialagun. Go ay fagialagun antuwa sik Funbalugu At taglong. Ay kin, nu katanya. Uan Tagfasurung glabi yay tibak Funbalugu At taglong. ²⁷ Kanya wanay ebi ebi At-Rirukan at foyungan te, Sumugu Aw Ku suguan laman gumuna Emu. Ay kanya ban tagfasine Am dalan. ²⁸ Igfoyung Aw sa ayu te, Fagayu mangena dua gfalangfe sik taw sak glabi Uan Tagfasurung. Ay roro nu antuwa Funbalugu-At-Fagmagurangan-Taw, dewa tiba daga fag taw, kanya glabi yay Uan. ²⁹ Ay fagayu taw, ay anggan at ngay tagbul famanyun sat fun, nadungug Isus nu glong. Ay naseg Funbalugu te, Masine Funbalugu At fagbulun. Anway ebi kanya fag ngay taw Uan wa nafasurung. ³⁰ Ay roro at ngay Taw-Tagfalayun ay at ngay tagsaful Ku-Unga At-Longan kauri way sas Funbalugu At fasadan sa anya. Ay dua kaumsig Uan nu nanfasurung anya. ³¹ Setain ro nu kumata Kyangay katsi fag ngay taw. ³² Kanya mangaro kata way sik ngay sisian tagfangawian. Madyay nu malunggung si way sigad sa ngaba faglanuan ay gfanguruan sa tiba te, Dewa ami gfantulalian laman guseganan am, am du am nangawian. Ay dewa ami guyway, am du am gauywayun. ³³ Kata tuy ku fafaskudanan aro at masuad. Uan Tagfasurung nu ndasug, e fagyudun kon tiba tibak menit. Ay e fagyudun yangay ginum uwat buadan safa. Ay am kalimata way am daw te, Uan e mafurat way fag falad. ³⁴ Ay Aw, Taw-At-Baguama, dewa Aw bagu kadasug gfangon Aktuwa ay ginum Aktuwa. Ay e nalimataan yangay am fiya Angku te, Sek. Kanya fag Taw sik tagfangatebo way ay sik taginum way sik fangasigung. Ay madyay Kanya tagfaguesan way sat ngay tagbul famanyun sat fun, ay sat ngay tagasalanan sigon. ³⁵ Sumaful way tam sik taw at mamatanganan at fagbulun gina tam lumag at nafasure siginan at fagbulun. ³⁶ Ay sik Taw-Tagfalayun at sadi igewan Isus, laman Isus nanfangon sa at bale. Ay Isus nalo wa fiya sas Taw-Tagfalayun at bale, ay nasakbo ay malunggung sas day fagfangonan. ³⁷ Ay sanya fag fulan at mangena at sadi, sik fakamayunan fag mangena. Ay kanya nadungug te, Isus malunggung sas day fagfangonan sa ka fag Taw-Tagfalayun at bale. Ay rodi ka fag mangena e ba fagsuadan fangawat batu. Ka fag batu at ngayan te, alabastru. At masuad sanya sik lumad bebanglu. ³⁸ Ay ka fag mangena namalindug sas Isus day darafa ay guyway. Ay at luon nafabasa Isus At darafa. Ay at buk wan at fanrarus At darafa. Ay kanya naayuk At darafa. Ay anggan nafatayuk at ba lumad sa At darafa. ³⁹ Ay ka fag Taw-Tagfalayun, at naggewan Isus aro, tagulit sanya. Ay namatangan te, Nu nda ka fag mangama bunwa sik Funbalugu At taglong. Laman ro nu sik Funbalugu tuwa at taglong, sumaful tuwa ka fag mangena tagted Anya at ugali. Madyay kanya sik fakamayunan way fag mangena. ⁴⁰ Ay Isus nalong sa ka fag Taw-Tagfalayun te, Simun, e longan Aw emu. Ay Simun nalong te, Em Takamoyung. Foyungi angku nataw am longan. ⁴¹ Ay Isus nafafaskudanan sa anya te, Duwak taw e bedan sa tagfon salafi. Ay at sadi at bedan 500k fisu. Ay at tusama at bedan 50k fisu wadi. ⁴² Ay kanya fag duwa du e salafi laman at fansali sa at bedan. Ay at tagfon salafi infanud tuwa te, Dewa yud ban am nasali ay bedan. Ay Isus nainto sas Simon te, Nu katanya, inday kanya fag duwama at taglabi takesug sa tagfon anya salafi. ⁴³ Ay Simun nabalus te, Nu gfasad aw, at ke bedan at ngayu. Ay Isus nalong te, Matuyan am nafili fag longan. ⁴⁴ Ay rodi Isus inbiling sa ka fag mangena baliwa ay nalong yangay sas Simun te, Go nalag o tuy fag mangena. Dewa Aw indasug sa am bale, du am nafon Angku sik safa, laman Ku famegus Ku darafa. Ay roro tuy fag mangena at luon wan at fanbasa Ku darafa. Ay anggan at buk wan at fanrarus sa Ku darafa. ⁴⁵ Ay du am naayuk Ku fingi. Ay roro ngap siginan ngay Aw bagu kadasug ste, tuy fag mangena faggugat tuwa nu naayuk Ku darafa. ⁴⁶ Ay du am nafatayuk langis sa Ku alfuyu. Ay roro tuy fag mangena nafatayuk tuwa lumad bebangku sa Ku darafa. ⁴⁷ Ay nu katanya, iglong Aw sa emu te, Tuy fag mangena at asalanan, dewa ngayu, e nafaliam wan. Ay katanya tuway matvngvd tuwa nu kesug Angku. Ay sik taw nu alay way at asalanan at naliam, duwa mandi matvngvd nu kesug Angku. ⁴⁸ Ay Isus nalong sanya fag mangena te, Nafaliam wan am ngay asalanan. ⁴⁹ Ay at ngay taw tagsis fagfangonan tagfasfuan Isus, igsulitanan sat dayu te, Sinu Tuy fag mangama At mafafaliam anggan at asalanan. ⁵⁰ Ay Isus nalong yangay sa ka fag mangena te, Am fakafandiugun nabalabag emu. Loi wan, mabayan tuwo.

¹ Ay bandi tv Isus nalo nadaddalanan sasa ngay fulan daul ay sasa ngay fulan sirut. Laman nanfoyung at Masine-Fag-Barita sas Funbalugu-Nu-Gmagurang-Taw baliwa. Ay At Labi-Duwa wan tagufud anya. ² Ay anggan sik ngay mangena nangufud yangay Anya. Ka fag ngay mangena ebi at ke mafurat fag falad ay anggan at ngay dailan. Ay infiya wan. Kata tuy tiba at ngayan te, Taglu, tiba nafangayan anya te, Tagsiginans fulan Bale-Ngabat. Ebi fituk mafurat fag falad nalfas siginan anya. ³ Ay anggan Funbalugu-Kafanyu. At mangama at ngayan Sik-Baringan. Kanya fun Sik-Madaragang-At-Baguama-Sirut at fanuguan at sadi. Ay anggan Sariksik. Ay anggan ngayu tuwak mangena at nafon at salafi mandi laman nanfalu Isus ay anggan At ngay ufud. ⁴ Ay sik ngay taw ayuwayu siginan sa ngay fulan maful sas Isus, ay Isus nafafaskudanan te, ⁵ Ebi e sik taw nu gtanum at fungsuan gfangukasan way. Ay at nafangukasan, at tiba at fungsuan intong sasad dalan. Ay at ngay taw nasiad wan. Ay anggan at ngay manuk mela nasinduk wan ay nafamin wan at kintong sanya. ⁶ Ay at tiba at fungsuan intong saswa batu. Ay dewa bagu tugbung, nyango yay. Anway matat way sanya. ⁷ Ay at tiba at fungsuan intong saswa madugi. Ay at madugi indaul ay nafaut wan. ⁸ Ay at tiba at fungsuan intong sat masine fag daga. Ay nu gbuadan, siginan sik bugas sadi, at nabul at buadan 100 bugas. Ay Isus gina ge longan katanya, nauro yangay te, Nu e talinga tuwam, dungugani. ⁹ Ay Isus At ngay tagadal nainto Anya te, Tain aro Am fafaskudanan at masuad. ¹⁰ Ay Isus nabalus anya te, Sa ayu nafon tuwa ayu ay fagmaasafulun te, laman sumaful tuwam at masuksukan sa baliwas Funbalugu-Nu-Gmagurang-Taw. Ay sa tibak taw nu gfoyung, sik fafaskudanan wadi. Laman kanya fag ngay taw Dewa glinggat, dua glag. Ay dewa gdungug, dua gsaful. ¹¹ Kata tuy Ku fafaskudanan at masuad. At fungsuan kata wa Funbalugu At-Longan. ¹² At at tiba at fungsuan at kintong sasad dalan kata wa Funbalaugu At-Longan sa sik taw at bagu gdungug. Ay rodi Takamuag-Tiba-At-Fagbulun indasug ay nabul At-Longan siginans ka fag taw at amatanganan. Laman kanya dua gafanud ay dua mbalabag. ¹³ Ay at tiba at fungsuan at kintong saswa batu, katanya yangay Funbalugu At-Longan sa sik taw at nadungug. Ay kanya mafali tuwa nu gafanud ay nu guseganan. Ay katanya wayay, dia ntvngvd anway dia ngaba at amatanganan kata sik lalid. Ay dua glugo nu gafanud. Ay nu e gfaskud wa anya, rodi ka fag taw at nadungug naliam wan. ¹⁴ Ay at tiba at fungsuan at kintong saswa madugi, katanya yangay Funbalugu At-Longan sa sik taw at nadungug. Ay kanya nalo wan. Ay roro matvngvd wayay ka fag taw at fagafanawaun ste swa daga. Ay at fakaumsigun sa way at fagmabalanun ay sa way at fagalabianun ste swa daga. Nu katanya, kata yangay nu nafautan at nadungug At-Longan sat amatanganan. Ay at buadan dua ndaul. ¹⁵ Ay at tiba at fungsuan at kintong sat masine fag daga, katanya yangay Funbalugu At-Longan sa sik taw at nadungug. Ay kanya kafandiug tuwa ay gfaning tuwa sa At-Longan anway masine ay matuyan at amatanganan. Ay kata tuwa nu e buadan, anway igfatunglus tuwa. ¹⁶ Sik taw nu nasulsul at salung, di nansuklub sasad sabi, ay ate sat daga fagtiyugan. Ay roro sik taw at fagnasulsulun at salung, nafatsa tuwas fagfasayugan. ¹⁷ Anway nus nge wain at nafafalyu, du e yud umsure. Ay nus nge wain at nasuksuk, du e yud sumaful, ay du e yud sumadsa sad mayamag. ¹⁸ Amatangani tuwa nu nadungug tuwam. Anway sik taw nu e kwa tuwa, igfamut yay ban sa anya. Ay sik taw nu dway e kwa bangan, e mul yay ban dewa nu gfasad e tsi wa anya. ¹⁹ Ay rodi Isus At tina talnayan gakadasugun sas Isus. Ay dua maakbang anway ngayu at taw sanya taggidgitan. ²⁰ Ay e nafoyung sas Isus te, Am mina talnayan snays day bale ay galagun Emu. ²¹ Ay Isus nalong sa tiba te, Nus nga sinu at nadungug Funbalugu At-Longan ay at nafaning, kanya Ku mina ay Ku ngay fadugsay wan. ²² Sik menit, Isus nansakay wa sa sik balutu nangufud At ngay tagadal, ay nalong anya te, Bastam. Gdife watam lino. Ay nalo wa fiya. ²³ Ay nu glo wan, Isus gtiug wan. Ay rodi gina sisa ngaba lino, indasug sik bagyu fulug. Ay arvs at safa gakapnuun sasad balutu ay galubgubun. ²⁴ Ay At ngay tagadal inkakbang sas Isus ay igfanguwig Anya te, Em Magurang. Em Magurang. Afuloi wan. Umkafuy wa ro tam. Ay rodi Isus infulo. Ay igsalag at tagmara ay anggan at tagbiya fag lumbak. Ay rodi tv intuas wan ay insiwang wa daw. ²⁵ Ay Isus nalong sa At ngay tagadal te, Taw ngani at fagyudun matvngvd ay fakafandiugun. Ay At ngay tagadal kalimu gfanlinggatanan. Ay igsulitanan sit dayu te, Sinu Tuy fag taw takatvngvd anya At fagbulun. Madyay dewa at tagmara ay at lumbak nafaning tuwa dewa sa At longan. ²⁶ Ay Isus ay At ngay tagadal indasug sas dife lino sas Taw-Gerasa fag talun. Sanya fag talun galungudan lino sas talun Balulangan. ²⁷ Ay Isus nalfas wa siginans balutu sas tigyangan lino. Ay rodi sanya sik ama ke ngay mafurat fag falad igfablang Anya. Ebia taw kanya fag ama namanwan tuwa sa sik bale sat fulan. Ay katsi at fagbanwanan sa way sangay fagsandigan fag luib. Ay glugo wan nu glanuwanan. ²⁸ Ka fag ama nu nalag Isus, nauro ay inlub sas Isus akbang. Ay gbiya nu ge longan te, Isus. O Tiba-Tungud-Fag-Funbalugu-At-Baguama. Matvngvd nu nalong aw Emu te, Taw ro Am fagstiyeun sa angku. Lag nanfauri angku. ²⁹ At fagnalongun katanya, anway aro taw Isus nalong wa sa ka fag mafurat fag falad, laman naubun ka fag ama. Ebi ngayu ginan wa ka fag mafurat fag falad nu gmagurang sanya fag ama. Ay at tibak taw natanud wa fiya anya. Ay anggan iggit at bitis, ay e salod sanbung. Ay ka fag ama nafanlifungan wan at salod. Ay inbul wan at fanggit anya. Ay ka fag mafurat fag falad nataban wa ka fag ama sas talun at yud e taw. ³⁰ Ay Isus ginto anya te, Nataw am ngayan. Ay kanya nabalus sas Isus te, Ku ngayan Tagngayu. At fagnalongun katanya anway ngayu at mafurat fag falad tagsi anya. ³¹ Ay matvngvd kanya nu get Isus, laman dua nasugu anya sa ka fag tabiu at yud e bangsi. ³² Ay roro sanya sik ngay bukbuk gfangudkudan sisa ngaba tubi. Ay matvngvd ka fag ngay mafurat fag falad nu glong sas Isus laman kanya gfatsa anya sas bukbuk. Ay Isus nafaning at fasadan. ³³ Ay ka fag ngay mafurat fag falad nalfas wa fiya siginan ka fag ama. Ay natsa wa fiyas bukbuk. Ay rodi tv ka fag ngay bukbuk fagayu mafali nu gfandugsunan. Ay taba wa ntong sasad abat. Ay fagayu inkafuy wa sasad lino daul. ³⁴ Ay at ngay tagtanud bukbuk nu nalag ka fag fagbulun, nalagyu. Ay nanfamansulit way sas fulan daul ay sasa ngay fulan sirut. ³⁵ Ay nu katanya ngayuk taw indasug laman nanlag te, taw katanya. Ay nu inkakbang wa sas Isus, nalag aro fag ama at ke ngay mafurat fag falad. Kanya katsi malunggung tuwa sas Isus akbang. Ay e lanbung tuwa. Ay e amatanganan tuwa. Ay ka fag ngay taw kalimu yay daw glag anya. ³⁶ Ay ka fag ngay taglag nanfamansulit sa tibak taw aro at nalag fag ama at ke ngay mafurat fag falad ay nfiya wan. ³⁷ Ay fagayu taw siginans fulan Gerasa ay siginans tagsafungan fag ngay talun sat ngaba dayu, matvngvd nu gayiyan Isus te, laman duat sanya si at talun. Anway fagayu kalimu dawdaw. Ay katanya wayay, Isus nasakay wa sa sik balutu laman guli wan. ³⁸ Ay rodi tv aro fag ama at ke ngay mafurat fag falad, matvngvd nu get sas Isus, laman nangufud Isus. Ay roro ngap, Isus nafafoli wa anya te, ³⁹ Ulii wa sa am bale. Ay nanfamansulit way o sa am iba, tam Fun At matvngvd fag fagbulun sa emu. Ay ka fag ama nalo wan. Ay nanfamansulit wa fiya sas fagdaul ka fag fulan daul aro Isus At matvngvd fag fagbulun sa anya. ⁴⁰ Ay Isus nu noli wan, at ngay taw nafablang Anya. Anway fagayu taw nafanya Anya. ⁴¹ Ay sik ama at ngayan At-Nafafulo nangakbang sas Isus. Ka fag ama sik magurang sas Taw-Naseg at bale fakafulan. Ay kanya namalub sas Isus akbang ay igseg. Ay matvngvd nu glong sas Isus, laman Isus umdasug ro sa at bale. ⁴² Anway At-Nafafulo at baguina, sik bugtung at kadugayan 12k banwa. Ay kanya gakateun. Ay gina Isus nangufud anya, sik ngay taw ayuwayu gtudtuludan, arvs Isus ingit wan. ⁴³ Ay sanya sik mangena, 12k banwa yud batang katuas nu gfangigusan. Ay du e taw mafafiya anya. ⁴⁴ Ay kanya gingitan wa nalo sa tiba buknga anggan inkaakbang sas Isus day guyuy. Ay kanya nalangbud sumyu sas Isus At lanbung. Ay rodi tv, intuwas wan nu gfangigusan. ⁴⁵ Ay rodi Isus nalong te, Sinu tagtayuk Angku. Ay fagayu taw nafamayud. Ay Takata-Sik-Batu nalong sas Isus te, Em magurang. Tuy wa fag ngay taw ayuwayu tagtudtuludan ay taggit Emu. ⁴⁶ Ay Isus nalong yangay te, Sik taw natayuk wa fiya Angku. Anway namatang Aw Ku fagmadaragangun at nafafiya, at nalfas siginan Angku. ⁴⁷ Ay ka fag mangena nu nasaful te, dua maasuksuan, kanya kutkulugan nu kaakbang sas Isus. Ay kanya inlub sas Isus akbang. Ay gina sisa ngay taw at akbang, nafoyung at fasadan at fagnatayukun sas Isus. Ay anggan at faginfiyaun mafali. ⁴⁸ Ay Isus nalong anya te, Sena. Am fakafandiugun tagfafiya emu. Loi wan. Mabayan tuwo. ⁴⁹ Ay kaduge Isus ge longan, sik ama indasug siginan aro at magurang at bale, ay nafoyung sat magurang te, Inkate wan am baguina. Taw ro am fagfasalagun tam Takamoyung. ⁵⁰ Ay Isus nu nadungug, nalong te, Lag kalimu. Afandiugi wadi. Ay umfiya yay. ⁵¹ Ay Isus nu ndasug sa at magurang bale, igsalag tibak taw nu gsakbo. At fagfasakboun, Takata-Sik-Batu ay Uan ay Santiagu ay anggan ka fag baguina at tama ay at tina. ⁵² Ay at ngay taw guyway ay garungan dawdaw anway nkate wan ka fag baguina. Ay nu katanya Isus nalong te, Lag guyway. Anway at baguina dia nkate. Gtiug wadi. ⁵³ Ay ka fag ngay taw kase gafayudun sas Isus. Anway nasaful te, Nkate wan. ⁵⁴ Ay Isus gina nated ka fag baguina at daluap, nalong anya te, Fagina, alunggungi. ⁵⁵ Ay ka fag baguina gdog yay gleleg, ay rodi inlunggung. Ay Isus nasugu tiba laman nafafangon ka fag baguina. ⁵⁶ Ka fag baguina at mangaguyang nadulawan. Ay Isus igsalag anya laman dua gfoyung sa tibak taw aro fag fagbulun.

¹ Ay Isus nafaful At Labi-Duwa sa Anya. Ay nafon tuwa sa anya at fagmadaragangun. Laman mafaayiyan at ngay mafurat fag falad. Ay laman mafafiya at ke dailan. ² Ay Isus nasugu at Labi-Duwa, laman nanfoyung Funbalugu-Nu Gmagurang-Taw baliwa. Ay laman nanfafiya at ke dailan. ³ Ay Isus nu nasugu wa anya nalong te, Lag e uba nus nge wain gina am glo. Nus di suan. Ay nus di buyug. Ay nus di fafa. Ay nus di salafi. Ay anggan lag faduwa ay lanbung. ⁴ Ay nus nga nday fag bale ay fagsakboan, sanyai wa fag bale nu gtiug am, ginanya mandi fag glo. ⁵ Ay sik fulan at ngay taw at yud gfasakbo ayu, gina am bagu lumo sanya ginan fag fulan, farikfiki yap at dafug siginan ay darafa. Sik famasaful sanya fag taw. ⁶ Ay At Labi-Duwa nalo wan ay nadalan wa fiya sasa ngay fulan. Ay nafoyung at Masine-Fag-Barita. Ay nafafiya at ke dailan nus nga nday at fakadasugan. ⁷ Ay fun Sik-Madaragang-At-Baguama-Sirut nadungug yayay fagayu ebi Isus At fagbulun. Ay kanya gfainbalian at amatanganan. Anway tibak taw iglong te, Kanya Uan way Tagfasurung nadog yay gleleg. ⁸ Ay tiba iglong te, Kanya Funbalugu yay At taglong ebi at ngayan te, Funbalugu-Tam-Taw-Yabi-At-Masine nadog yay nsure. Ay tiba iglong te, Kanya at sadi wa Funbalugu At taglong ebi at nadog yay gleleg. ⁹ Ay fun Sik-Madaragang-At-Baguama-Sirut nalong te, Go Tuy yay Uan Tagfasurung, ebi ku nalifung at liug. Ay ate Sinu way Tuy fag taw anway nadungug aw At fagbulun. Ay fun Sik-Madaragang-At-Baguama-Sirut gananlagun Isus. ¹⁰ Fagayu Isus At-Suguan noli wan. Ay nanfamansulit wa sas Isus fagayu at fagbulun. Ay Isus naubun at ngay taw ay nataban At-Suguan sa sik talun at yud e taw makbang wa sa sik fulan daul at ngayan te, Fagfanguyangan. ¹¹ Ay at ngay taw nu nasaful te, Isus nalo wan, nanguyan yay Anya. Ay Isus nafaful ka fag ngay taw, ay nafoyung sanya sas Funbalugu-Nu-Gmagurang-Taw baliwa. Ay anggan nafafiya at ngay ke dailan. ¹² Ay nu kayabi wan, At Labi-Duwa nangakbang sas Isus ay nalong te, Faloi wa ka fag ngay taw sasa ngaba day fulan sirut. Laman nanbul yay at fafa ay nantiug yay sanya. Anway ste fag talun si way at yud e taw. ¹³ Ay Isus nasugu sa At Labi-Duwa te, Am waro tagfayafun ka fag ngay taw. Ay At Labi-Duwa nalong te, Lima way em ba fafa. Ay duwa way em ba uyang. Nu dway ro ami nalo laman nanbul ay nanfesali yay ami sik ngay fafa, em famayafun ka fag ngay taw. ¹⁴ Teway nu ndain 5000k mangama sanya. Ay Isus nalong sa At Labi-Duwa te, Falunggungi fainkafudani ka fag ngay taw. Ay sik afud 50k taw. ¹⁵ Ay At Labi-Duwa igfaning At longan. Ay nafalunggung wa fiya at ngay taw fagayu. ¹⁶ Ay Isus nagalumutan ka fag limak fafa ay ka fag duwak uyang sigon. Ay natangda sas Banwa, ay nauseganan sas Funbalugu. Ay nafanramyukan ay nafon sa At ngay tagadal laman naafud sasa ngay taw. ¹⁷ Ay fagayu taw sanya at naon, napsug wan. Ay At ngay tagadal nafaful yay at nagsawadan. Ay 12 yak sabi at kinkapnu at nafanramyukan. ¹⁸ Ay kaduge Isus igdarangin sesadi, At ngay tagadal inkakbang sa Anya. Ay Isus nainto anya te, Sinu Aw, unu, at ngay taw at longan. ¹⁹ Ay At ngay tagadal nabalus te, Tiba nalong te, Uan Tagfasurung O, unu. Ay tiba nalong te, Ka fag ebi Funbalugu At taglong, at ngayan Funbalugu-Tam-Taw-Yabi-At-Masine O, unu. Ay tiba nalong yangay te, At sadi ebi Funbalugu At taglong at nadog yay gleleg O, unu. ²⁰ Ay Isus nainto yangay fiya sa At ngay tagadal te, Ay am magngay. Sinu Aw, nu gfasad am. Ay Takata-Sik-Batu nabalus wa long daw te, O wan Funbalugu At Fagtayukan. ²¹ Ay Isus matvngvd nu gsalag sa At ngay tagadal, laman dua gfoyung katanya sa tibak taw. ²² Ay rodi Isus naguna nafoyung te, Aw, Taw-At-Baguama, maris kban ngayuk mataka. Ay Taw-Naseg at ngay magurang, ay at ngay taganyun daul, ay anggan at ngay tagfasaful kalimata ban Angku. Ay e fate wa ban Angku. Ay sa bans fatuluk menit gdog Kyangay gleleg. ²³ Ay Isus nalong sas fagayu taw te, Sik taw nu kaumsig nangalo Angku, ubuni yap at fakaumsigun mandi. Ay ani way fasani at salibagan kayu, ay aloi Angku. ²⁴ Anway nus nga sinu fag taw nu kesug way at leleg katsi, maliam wa ban at leleg. Ay nus nga sinu nu naanyun tuwa at leleg katsi, laman Aw at ke fanambagun, ka fag taw ban e leleg tuwa faggugat. ²⁵ Tain, nu kin ban, sik taw at fanambagun, dewa nafabul at fagdaul daga at nanuranan, ay nu naliam way ngap ban at leleg. ²⁶ Anway nus nga sinu fag taw nu kapla way gfoyung Angku ay anggan Ku longan, anggan Aw, Taw-At-Baguama, kapla Akyangay ban anya, gina ban Aw kadasug stiye, ay e fagmadaragangun Aktuwa mandi. Ay e fagmadaragangun Akyangay siginan Ku Mama. Ay anggan e fagmadaragangun Aw siginan At ngay tagbukngan. ²⁷ Ay matuyan iglong Ku ayu te, Am tiba at malindug ste di am umkate dyap ngay nalag Funbalugu-Nu-Gmagurang-Taw. ²⁸ Ay nu nlangfe wa fituk menit, Isus nataban Takata-Sik-Batu ay Uan ay anggan Santiagu. Ay naulul sa sik muyud, laman nandarangin. ²⁹ Ay gina Isus igdarangin, inbali wan At mata. Ay anggan At lanbung masulo, ay inlagsi dawdaw. ³⁰ Ay rodi tv sik duwama insure ay igfasulitanan sas Isus. At ngayan te, Ku-Unga ay Funbalugu-Tam-Taw-Yabi-At-Masine. ³¹ Ka fag duwama e fagmasineun dawdaw. Ay at sulitanan at masuad, sas Isus At fakateun baliwa nu nkate wa ban sas Erusalem. ³² Ay Takata-Sik-Batu ay anggan at duwak ufud gaimataun dawdaw. Ay gina ka fag tuluk tagadal infulo, kanya nalag Isus At fagmasineun dawdaw ay anggan sik duwama nu malindug sanya sas Isus At akbang. ³³ Ay gina ka fag duwama galoun siginans Isus At akbang, Takata-Sik-Batu nalong sas Isus te, Em Magurang. Masine iste yangay ami. Ay nangawat yay ami tuluk fagfanlanbungan. At sadi sa Emu. Ay at sadi sa Ku-Unga. Ay at sadi sas Funbalugu-Tam-Taw-Yabi-At-Masine. Ay Takata-Sik-Batu dua nasaful dewa nae longan katanya. ³⁴ Ay gina Takata-Sik-Batu ge longan, sik linyabu nasuklub Isus ay anggan sa At tuluk tagadal. Ay At tagadal kalimu sanya sad linyabu. ³⁵ Ay e nae longan sanya ginan sad linyabu te, Kanya wan Ku Baguama, Ku nafili. Dungugani ay faningi tuwa Anya. ³⁶ Ay nu ntabu wan nu e nae longan, at nalag sanya Isus way sesadi. Ay ginanya fag ngay menit At ngay tagadal dia nafoyung nus di sadik taw at nalag nus nge wain. ³⁷ Ay balabag di Isus ay At tuluk tagadal indaga wa sanya ginan fag muyud. Ay sik ngay taw ayuwayu nafablang Anya. ³⁸ Ay sik ama siginan swa taw matvngvd nu nalong te, Em Takamoyung. Matvngvd nu get aw Emu te, linggati ku baguama fag bugtung. ³⁹ Ay dungugani sa ku longan. Kayu ginan at mafurat fag falad igmagurang sa ku baguama, kanya nauro dawdaw. Ay ka fag mafurat fag falad igfafanggong ku baguama ay glafas at bibig. Ay kanya nafauri dawdaw ku baguama. Ay dua kaumsig naubun anya. ⁴⁰ Ay aro dewa matvngvd nu get aw sa Am ngay tagadal laman mayiyan. Ay kanya dua mafaayiyan. ⁴¹ Isus nalong te, E, go katanya. Anway te, am katsi fag ngay taw at yud way am kafandiug ay manga at yud way am mamatanganan. Seduge ya ban nu gufud Aw ayu. Ay seduge ya ban nu gfanya Aw ayu nu an am kafandiug. Tabani wa am baguama sa Angku. ⁴² Ay gina ka fag baguama kadasug sas Isus, ka fag mafurat fag falad nafagfu anya sas daga ay igfafanggong anya. Ay rodi matvngvd Isus nu gsalag ka fag mafurat fag falad. Ay Isus nafafiya ka fag baguama. Ay Isus nafoyung sa ka fag ama tama te, Nin yadi am baguama. ⁴³ Ay fagayu taw tagsanya nadulawan dawdaw te, madaragang dawdaw Funbalugu. Ay fagayu at taw sanya gamatangan dawdaw Isus At fagbulun. Ay Isus nalong sa At ngay tagadal te, ⁴⁴ Dungugani tuwa ro Ku longan sa ayu. Aw, Taw-At-Baguama, e tumaban ban Angku sa sik ngay taw laman tumed wa fiya Angku. ⁴⁵ Ay At ngay tagadal dua nasaful At longan at masuad. Anway mafalyu way At longan ay dua nasaful. Ay manga kalimu wayay nanginto sas Isus At longan at masuad. ⁴⁶ Ay Isus At ngay tagadal igbadbabuan te, Sinu ban tam at tiba tungud. ⁴⁷ Ay Isus nasaful At ngay tagadal at amatanganan. Ay nabul sik sisian sirut ay gfalindug anya si At day tigyangan. ⁴⁸ Ay Isus nalong sa At ngay tagadal te, Nus nga sinu fag taw nu nafasakbo tuwa tuy fag sisian sirut anway kanya igseg Angku, ay kata wa nu nafasakbo Angku. Ay bundi Aw fag sadi, kata yangay nu nafasakbo At nasugu Angku. Anway nus nga sinu sa ayu at tiba daga fag taw, kanya wa fiya at tiba tungud. ⁴⁹ Ay Uan nalong sas Isus te, Em Magurang. Nalag ami sik mangama nu gayiyan sik ngay mafurat fag falad sa Am fagmadaragangun. Ay igsalag ami anya, anway kanya dua nangalo Emu gasfuan emi. ⁵⁰ Ay roro Isus nalong te, Lag gsalag anya. Anway kanya fag taw nu gdi gsalag ayu, kanya kata wa nu gtarabang ayu. ⁵¹ Makbang wan at menit, nu e naurug Isus sas Banwa. Ay Isus gfasadanan dawdaw galoun sas Erusalem. ⁵² Ay Isus nasugu tiba At tagadal. Laman nanguna Anya sa sik fulan sas talun Fagbantayan. Laman nanfamasadan te, Isus kadasug ro sanya. ⁵³ Ay roro at ngay taw sanya kalimata way gfasakbo Isus. Anway nasaful te, Isus At fasadan fiya fiya At fagaloun sa ways Erusalem. ⁵⁴ Ay At tagadal fag duwa, Santiagu ay Uan, nu nasaful ka fag ngay taw at fagbulun, nalong sas Isus te, Em Magurang. Go kaumsig Wo nu get ami sik afuy siginans Banwa. Laman igbatas anya. Go kin. ⁵⁵ Ay Isus inbiling ay igsalag anya te, Lagi. ⁵⁶ Ay rodi Isus ay At ngay tagadal nalo wa sa tibak fulan. ⁵⁷ Ay Isus ay At ngay ufud gina glo sasa ngaba dalan, sanya sik taw nalong sas Isus te, Nangalo akwa Emu nus nga nday nu glo O. ⁵⁸ Ay Isus nalong anya te, Amatangani. Sik idu talun e faglutan tuwa si sik buknga. Ay sik manuk tungud e fagsubukan tuwa mandi. Ay roro Aw, Taw-At-Baguama, da Kwa batang e faglugoan si sik buknga laman nantangilan. ⁵⁹ Ay Isus nalong yay fiya sa sadi ya fiyak taw te, Aloi Angku. Ay kanya fag taw nalong te, Em Magurang. Faningi ku fasadan. Igfanya akyay ay nansandig akyay ban ku mama. ⁶⁰ Ay Isus nalong anya te, At masine, tagakateun yangay fag taw at nansandig ro at kinkate. Ay o, loi wan ay foyungi sasa ngay taw Funbalugu-Nu-Gmagurang-Taw baliwa. ⁶¹ Ay e sadi ya fiyak taw nalong sas Isus te, Ku fun. Anggan aw. Nangalo akyay ban Emu. Ay faningi yap ku fasadan. Taguna nanfoyung akyay si ku bale at ngay taw ku fagbulun ban sanya. ⁶² Ay Isus nafafaskudanan sa anya te, Kata sik taw tagted at fangali, ay nu glinggat way sat guyan gina kali. Katanya yangay di nsak at fagmasineun laman umful sas Funbalugu-At-Fagmagurangan-Taw.

¹ Ay nu ntabu wa aro taw At fagbulun, tam Fun Isus nafili Fituk-Safuluk tagadal, ay saman yay At nafili fag Labi-Duwa. Ay Isus nafalo anya nafasaruwayan fagayu ay nafaudgufudan duwa. Laman At Fituk-Safulu naguna Anya sas fagayu fulan ay sas fagayu talun, sas Isus At fakadasugan ban. ² Ay Isus nafafaskudanan sa anya te, Mabaybay at buadan, roro gsadsadian way at nanbul. Darangini sa at Fun sanya fag gamasun, laman Kanya sumugu ban sik ngay tagbul at buadan sa At gamasun. ³ Katsi nansugu Akwa ayu, ay loi wan kata sik ngay tupa riangan saswa idu talun. ⁴ Ay gina am glo, lag guba sik fagsuadan salafi. Ay lag ge buyug. Ay lag ge fanguskus darafa. Ay lag gfamatuan nus nga sinu fag taw ay nalag sa ay ngaba dalan. ⁵ Ay nus nga nday fag bale nu gsakbo am, darangini laman Funbalugu nafanabayan at ngay taw sanya fag bale. ⁶ Ay sanya fag taw nu manabayan tuwa, ay longan ingurungan wa fiya sanya fag taw. Ay roro mangaro sanya, nu dway e manabayan fag taw, yaya. Funbalugu At fagmanabayanun wa long si ayu. ⁷ Ay nus nga nday fag bale ay fagsakboan, sanyai wa fag bale nu gtiug am. Ay oni ay inumi nus nge wain at nafon ayu. Anway sik taw tagfagbulun, e nafon wa fiya sa anya at nalufuyan. Ay lag gadgalinan sa tiba bale. ⁸ Ay nus nga ginain nu ndasug am sa sik fulan, ay at taw sanya fag bale nu gfasakbo ayu, oni nus nge wain at nafon ayu. ⁹ Ay fafiyai at ngay ke dailan sanya fag fulan. Ay foyungi sas fagayu taw sanya te, Makbang wan nu kaful am sas Funbalugu-At-Fagmagurangan-Taw. ¹⁰ Ay nus nga ginain nu ndasug am sa sik fulan, ay at taw sanya nu dway gfasakbo ayu, loi wan sanya ginan. Ay gina am sasa ngaba dalan, longi sanya fag fulan te, ¹¹ At kindafut fag daga sa em darafa siginan ay fulan, nafarikfik wami. Sik famasaful sa ayu fagayu. Ay dewa katanya, asafuli tuwa te, Satu ro inkakbang yama am nu kaful am sas Funbalugu-At-Fagmagurangan-Taw. ¹² Iglong Aw sa ayu te, Ginanya ban fag menit, Funbalugu nu kafanyu sas fulan Sik-Afugan, glabi yay ban sirut nu kafanyu sa aro fag fulan. ¹³ E nanfauri ban sa ayu, fulan Kurasin at ngay taw. Ay e nanfauri yangay ban sa ayu, fulan Fagfanguyangan at ngay taw. Anway nalag wam Ku madaragang fag fagbulun ginanya. Ay nu falag Ak di ro takatanya fag fagbulun sas fulan Batu-Luguy ay sas fulan Faggamatan-Uyang, glugo waro gugat ebi nu naubun at asalanan. Ay nu nasulun tagfantaras fag lanbung. Ay nu malunggung way garungan sasad dafug. ¹⁴ At gina ban sas fagfasurean asalanan fag ngay menit, Funbalugu nu kafanyu sas fulan Batu-Luguy ay sas fulan Faggamatangan-Uyang, glabi yay ban sirut nu kafanyu ayu. ¹⁵ Ay go am wan, Takafanyu-At-Fulan at ngay taw. Go nu gfasad am ayu, madaragang wam sak wam umdasug sas Banwa. Roro ngap ay fakadasugan sa way ban at Kinbul-At-Talun. ¹⁶ Ay Isus nalong sa At Fituk-Safulu te, Sik taw nu nadungug tuwa sa ayu, nadungug yangay sa Angku. Ay sik taw nu kalimata way sa ayu, kalimata yangay sa Angku. Ay kanya nu kalimata way sa Angku, kalimata yangay anggan sa At nasugu Angku. ¹⁷ Ay At Fituk-Safulu noli wa sas Isus ay guseganan te, Em Magurang. Anggan at ngay mafurat fag falad igfaning emi nu nalong ami sa Am fagmadaragangun. ¹⁸ Ay Isus nalong anya te, Gina Aw glinggat, nalag Aw Tagfansalag nu katong siginans Banwa kata nu gfangkilat. ¹⁹ Dungugani sa Ku longan. Nafon Aw ayu Ku fagmadaragangun. Laman dewa am nasiad sik ubianun ay sik agipan, di am e nasaitan. Ay manga nababo tuwam fagayu at tagfabarangian ayu at fagmadaragangun. Ay di e gfasait ayu, nus nge wain. ²⁰ Ay dewa katanya, lag guseganan te, at ngay mafurat fag falad igfaning wa fiya ayu. Ay roro ay faguseganun antuwa te, e nariruk wan ay ngayan sas Banwa. ²¹ Ay ginanya fag kadugayun sirut, Isus guseganan anway At-Masine-Fag-Falad nafaamatanganan Anya. Ay Isus igdarangin sas Funbalugu te, Ku Mama, O wan Banwa at Fun ay anggan daga at Fun. Guseganan Aw sa Emu, anway nafafalyu Tuwo Ku foyungan at masuad sat mamatanganan fag ngay taw ay anggan sat ke fagsafulun fag ngay taw. Ay nafasure Tuwo Ku foyungan at masuad sa takata sik ngay sisian fag ngay taw. Kin, Ku Mama, anway katanya tuwa Am fakaumsigun. ²² Ay Isus igfoyung yangay sat ngay taw te, Ku Mama yay At nafoyung Angku fagayu. Ay du e taw nasaful Ku ugali, Ku Mama way tagsaful. Ay du e taw nasaful Ku Mama At ugali. Aw way, At-Baguama, tagsaful. Ay kayu Ku fakaumsigun gfasaful, anggan kanya, sumaful yangay Ku Mama At ugali. ²³ Ay rodi tv Isus inbiling sa At ngay tagadal ay nalong anya sat dayu te, Guseganan ka fag taw nu nalag tuwa kata ayu ay nalag. ²⁴ Anway nafoyung Aw ayu te, Ngayu Funbalugu At taglong ebi ay anggan ngayu at fun daul ebi tagalagun kata ayu ay nalag. Ay roro dua nalag. Ay manga tagadungugun kata ayu ay nadungug. Ay roro dua nadungug. ²⁵ Ay sik tagsaful Ku-Unga At-Longan nangakbang laman naginto nanfaskud Isus te, Em Takamoyung. Tain manga ban ku fagbulun at masine, laman e leleg aktuwa ban at yud katabu. ²⁶ Ay Isus igbalus anya te, Nataw at nariruk sa Ku-Unga At-Longan. Foyungi angku. ²⁷ Ay ka fag taw igbalus te, Esugi am Fun am Funbalugu sas fagdaul am fakaumsigun. Ay sas fagdaul am amatanganan. Ay sas fagdaul am fagmadaragangun. Ay sas fagdaul am fagsafulun. Ay esugi yangay am iba katvngvdi nu kesug o emu. ²⁸ Ay Isus nalong anya te, Matuyan am famalus. Faningi takatanya, ay e leleg tuwa ban o. ²⁹ Ay ka fag taw kaumsig at iba nu gamatangan sa anya te, kanya sik taw matuyan. Anway katanya, kanya nalong sas Isus te, Sinu ku kaiban. ³⁰ Ay Isus At famalus nafafaskudanan te, Ebi sik taw nalo siginans Erusalem laman umdasug sas fulan Bangluan. Ay sasa ngaba dalan sik ngay takamul nafablang anya. Ay nabul at lanbung. Ay nafalang anya dawdaw. Ay nalo wan. Ay naubun wa sanya gakateun. ³¹ Ay ginanya sik Taw-Naseg at taganyun nalo yangay sanya fag dalan. Ay nu nalag ka fag taw tagakateun, nalangfe wa nasaruyan sas day dalan. ³² Ay katanya yangay sadi At-Famaalo-At-Taw. Ay nu ndasug sanya ay nu nalag ka fag taw tagakateun, nalangfe yangay nasaruyan sas day dalan. ³³ Ay rodi sik taw siginans talun Fagbantayan nalo yangay sanya fag dalan. Ay nu ndasug sanya ay nalag ka fag taw tagakateun, kanya kafanyu dawdaw anya. ³⁴ Ay inkakbang sa ka fag taw tagakateun. Ay nafatayuk sik langis ay sik uwat buadan safa at famafiya sat fakarukan. Ay anggan nasifig. Ay kanya nafasakay ka fag taw tagakateun sa at sakayan fag balan mandi. Ay nauba anya sas bale fagtiugan taw. Ay anggan nafatvngvdun anya. ³⁵ Ay nus balabag wan, at Taw-Fagbantayan nabul at salafi siginan at fagsuadan, at kayuan, duwak menit at nalufuyan. Ay nafon sas tagtanud bale fagtiugan. Ay nalong te, Na. Fatvngvduni anya. Ay gina aw noli ste, igfamut akyay nu glabi yay aro ku nafon emu. ³⁶ Ay Isus nainto yangay sa ka fag tagsaful Ku-Unga At-Longan te, Sinu, nu gfasad o, sa ka fag tuluk taw, at masine at fagbulun kata nu at kaiban. ³⁷ Ay ka fag tagsaful nabalus te, At kinfanyu. Ay Isus nalong anya te, Loi wan ay faningi kata aro kanya at kinfanyu. ³⁸ Ay kaduge Isus ay At ngay tagadal nalo, kanya indasug sa sik fulan. Ay sanya sik mangena, at ngayan Sik-Ina, igfasakbo anya sat bale. ³⁹ Ay Sik-Ina at fadugsay at ngayan, Taglu. Ay Taglu namalunggung sa tam Fun Isus At akbang ay igdungugan Isus nu gfoyung. ⁴⁰ Ay roro Sik-Ina kabalu way, anway ngayu at fagbulun nu gfalu. Ay kanya inkakbang sas Isus ay nalong te, Ku Magurang. Go du O kafanyu te, ku fadugsay naubun angku. Ay aw way sesadi gina aw gfalu. Nu kafanyu Tuwo angku, foyungi sa ku fadugsay laman tumarabang yay angku. ⁴¹ Ay tam Fun Isus nabalus anya te, Fagina, nataw fagngayuun am fagafanawaun ay am fakabaluun. ⁴² Madyay sadi wadi taw at fagayudanun. Ay Taglu at nafili antuwa at masine. Ay du e mafabul siginan anya.

¹ Ay Isus igdarangin sa sik buknga. Ay nu ntabu wan, at sadi At tagadal nalong Anya te, Em Magurang. Foyungi emi, laman gsaful yangay ami gdarangin. Kata ebi Uan Tagfasurung nu gfoyung sa at ngay tagadal. ² Ay Isus nalong sa At ngay tagadal te, Nu gdarangin am, kata tuyi tuwa te, Em Mama, masine at ngay taw nu gseg Emu. Ay at masine, Oi tuwa tagmagurang at ngay taw. ³ Ay foni emi em fakonun kayu menit kayu menit. ⁴ Ay faliami em asalanan, kata nu naliam ami em iba at asalanan sa emi. Ay lag taban emi laman nangae asalanan ami. ⁵ Ay Isus nafoyung sik fafaskudanan te, Nu e fagues o. Ay nu nanlag o sat bale swa bilug yabi. Ay nu get wo sa am fagues te, Sama, foni angku sik fafa. ⁶ Anway e sik bagu kadasug sa ku bale ay da kwa e fon sik fakonun. ⁷ Go am fagues nabalus siginan at basad bale te, Lag fafulawan angku. Madingdingan wan ku sakbawan bale. Ay anggan ku ngay sisian maful wa si angku iste. Da kua maalindug ay mafafon emu. Go katanya at longan. Go Yaya. ⁸ Ay Isus nalong yangay te, Nafoyung Aw ayu te, am fagues at faginlindugun ay at fagnafonun emu, bunwa te, gfaguesan o. At faginlindugun ay at fagnafonun emu, anway matvngvd nu gfanget o. ⁹ Ay iglong Akyangay sa ayu te, Eti. Ay e mon sa ayu. Sarapi. Ay lumag ban am. Fangkemkemi. Ay e lumuang sa ayu. ¹⁰ Anway fagayu at naet, e nabul wa ban fiya. Ay fagayu at nasarap, lumag wa ban fiya. Ay fagayu at nafangkemkem, e lumuang wa ban fiya sa anya. ¹¹ Ay amatangani ayu, am at ngay tama te, Go ay unga nu naet waro sa ayu sik uyang matama. Go ay nafon sa anya sik ubianun way mafungkuk tagleleg. Go yaya. ¹² Ay nu naet waro sa ayu sik iklug, go ay nafon ro sa anya sik agipan way. Go yaya. ¹³ Ay dewa am sik ngay mauri fag taw, gsaful tuwam gfon at masine sa ay sisian. Ay roro ay Tama sas Banwa glabi yay dawdaw sik taw tama ste swa daga nu gsaful gfon at masine. Anway At nafon sa taget Anya At-Masine-Wa-Fag-Falad. ¹⁴ Ay Isus naayiyan sik mafurat fag falad at yud mafae longan. Ay ka fag mafurat fag falad nu nkaayiyan wan, aro fag taw at yud mafae longan, mafae longan tuwa. Ay at ngay taw sanya nadulawan dawdaw. ¹⁵ Ay tiba nalong te, Kanya fag taw nu mafaayiyan way mafurat fag falad, at fagmadaragangun siginan ways Lango-At-Fun. Anway kanya fag fun, mafurat way fag falad at fun. ¹⁶ Ay tiba kaumsig gfaskud Isus. Ay get Isus laman nafalag anya sik ke masuad fag fagbulun siginans Banwa. ¹⁷ Ay anway Isus nasaful ka fag ngay taget at amatanganan, ay nafafaskudanan te, Sik fun ay at ngay taw nu garingangan way faggugat, bandi ban ka fag fun du e fanuguan. Ay anggan sik talafuan nu garingangan way faggugat, bandi ban du et sanya. ¹⁸ Ay anggan Tagfansalag ay at ngay mafurat fag falad nu garingangan way faggugat, go Tagfansalag e fagmagurangun ban. Go yaya. Anway nalong am te, Nu naayiyan Aw mafurat fag falad, Ku fagmadaragangun siginans Lango-At-Fun. ¹⁹ Ay Ku fagmadaragangun Ku fagmafaayiyanun mafurat fag falad, nut siginan way ros Lango-At-Fun, daginan ay ngay fanuguan at fagmadaragangun at fagmafaayiyanun mafurat fag falad. Ay ay ngay fanuguan wan tagfoyung sa ayu te, Yaya. Dua matuyan ay amatanganan. ²⁰ Ku fagmadaragangun Ku fagmafaayiyanun mafurat fag falad nut siginan tuwas Funbalugu, amatangani, Funbalugu-Tuwa-Tagmagurang-Ayu. ²¹ Sik madaragang fag taw nu e famabarangian wa fiya, ay nu gtanud wa fiya sat tagbiya fag bale, at ngay nanuranan du e maliam. ²² Ay tibak taw nu glabi yay anya nu madaragang, ay nu ndasug ay nu nasakbo. Kanya nababo sanya fag tagbilug bale. Ay nabul at famabarangian, at tagbilug bale at fagsegun. Ay naafud at nafamul fag ngay nanuranan sat ngay fanuguan. ²³ Ay nus nga sinu nu dway gtarabang Angku, kanya igsalag yangay Angku. Ay nus nga sinu nu dway mafafaful at ngay taw sa Angku, kanya at fagayiyanun way fag ngay taw. ²⁴ Sik mafurat fag falad naubun wan sa aro at fagbanwanan fag taw. Ay nalo wa sa sik buknga at yud e safa, laman nansarap tibak fagbanwanan. Ay nu du e nalag, gamatanganan te, Guli kyay siring sa ebia taw ku fagbanwanan. ²⁵ Ay nu ndasug sanya, manlag di, malanu ay masine. ²⁶ Ay ka fag mafurat fag falad nansarap yay fitu yak mafurat fag falad laman at ufud. Ay kanya fag fitu glabi yay anya nu mauri. Ay fagayu nu gbanwan, maful wadi. Ay ka fag taw inkugat yay siginan ebia taw nu mauri. ²⁷ Ay kaduge Isus ge longan katanya, sik mangena siginan swa taw gbiya nu ge longan te, Guseganan tuwa at nafalangfe Emu ay at nafasusu Emu fag mangena. ²⁸ Ay Isus nalong te, At taguseganan an tuwa baliwa te, ka fag taw nu nadungug Funbalugu At-Longan ay nafaning tuwa. ²⁹ Kaduge at ngay taw maful, Isus igfoyung anya te, Katsi fag ngay taw sik mauri way fag ngay taw. Ay at fagialagun sik ke masuad way fag fagbulun fagtvngvd. Ay roro ngap dua ban e gfalag anya. At nafalag anya ebi way fagsadik fagsafulan sa Sik-Udkuruan baliwa. ³⁰ Ebi Sik-Udkuruan at fagbulun sik ke masuad fag fagbulun sasa ngay Taw-Ninibe. Katanya yangay Aw, Taw-At-Baguama, Ku fagbulun sik ke masuad yangay fag fagbulun sa katsi fag ngay taw. ³¹ Ay ebi sik mangena, at fun daul sas talun Fakasugbaan, gdog yangay ban gleleg gfasfuan katsi fag ngay taw. Gina ban sas fagfasurean asalanan fag ngay menit. Ay ginanya, ka fag mangena nanfasure yay ban katsi fag ngay taw at asalanan. Anway ka fag mangena ndasug sas fun Mabayan siginans fungfung daga. Laman kaumsig nadungug fun Mabayan at mamatanganan fag longan. Ay amatangani. Aw, At tagste katsi, glabi Kyay fun Mabayan. ³² Ay ebi fag ngay Taw-Ninibe gdog yangay ban gleleg gfasfuan katsi fag ngay taw, gina ban sas fagfasurean asalanan fag ngay menit. Ay ginanya, at ngay Taw-Ninibe nanfasure yay ban katsi fag ngay taw at asalanan. Anway at ngay Taw-Ninibe naubun tuwa at asalanan gina nadungug Sik-Udkuruan at foyungan. Ay amatangani. Aw, At tagste katsi, glabi Kyay Sik-Udkuruan. ³³ Sik taw nu nasulsul tuwa sik salung, di nanfat sas daga bale. Ay di nansuklub sasad sabi. Ay roro igdi. Nanfat sa tuwas fagfasayugan salung, laman sik taw nu nasakbo sasad bale nalag at mayamag. ³⁴ Am bilug at salung am mata wan. Ay am mata nu malio tuwa nu glag, fagdaul am bilug mayamag tuwa. Ay roro am mata nu dway malio nu glag, anggan fagdaul ay bilug kata way nu marum. ³⁵ Nu katanya, tagaki. Laman am fakaumsigun mayamag tuwa, di marum. ³⁶ Ay fagdaul am bilug nu mayamag tuwa, ay nu gdi e afud marum, kanya mayamag tuwa. Kata sik salung at famusuyan nu nafayamag emu. ³⁷ Ay kaduge Isus ge longan, sik Taw-Tagfalayun nagewan Isus sat bale laman gfasfuan anya nanfangon. Ay Isus nasakbo ay namalunggung sat fagfangonan. ³⁸ Ay ka fag Taw-Tagfalayun gamatangan daw nu nalag te, Isus dua gfaning Taw-Naseg at ugali nu gfasurung at daluap gina bagu gfangon. ³⁹ Ay tam Fun Isus nalong sa ka fag Taw-Tagfalayun te, Am fag ngay Taw-Tagfalayun. Dewa am nafegus ay faginuman fag taya at guyuy ay anggan ay fagfangonan fag taya at guyuy. Ay roro sa ay basad mapnu way fagalabianun ay fagmauriun. ⁴⁰ Am kata way am at yud e amatanganan. Go sangay bunwa kanya at naawat at guyuy, go sangay bunwa kanya at naawat anggan at basad. Go muag. ⁴¹ At masine, afanyui tuwa ay iba. Ay foni anya ay suadan sa ay ngay taya. Ay nu katanya tuwa ay fagbulun, masine tuwam, kata ay taya nu mafegusan. ⁴² Ay e nanfauri ban ayu, am fag ngay Taw-Tagfalayun. Dewa am nafon at fasafuluan kafud sas Funbalugu siginan ay nabul ay famabebanglu ay fakonun, kata alibas. Ay roro ngap naliam wam at matvngvd fag fagbulun. Tenday, nu kafanyu am ay iba. Ay nu kesug Funbalugu. Nu gdi am naliam at matvngvd fag fagbulun, dangai kaliam anggan at alay fag fagbulun. ⁴³ Ay e nanfauri yangay ban ayu, am fag ngay Taw-Tagfalayun. Anway ay fakaumsigun si tuwa tiba tungud tag faglunggungan sa ay bale fakafulan. Ay manga nu nalo am sa tuwa swa bilug fulan ay fakaumsigun te, laman at ngay taw at nanfablang ayu, igseg ayu. ⁴⁴ Ay e nanfauri yangay ban ayu. Anway am wan takata sik fagsandigan at yud e alad. Ay at ngay taw nu nadalan sanya dua nasaful te, e taw nasandig iste. ⁴⁵ Ay sadik tagsaful Ku-Unga At-Longan nalong sas Isus te, Em Takamoyung, nu katanya wa nu glong o, igbaya wo anggan emi. ⁴⁶ Ay Isus nalong anya te, E nanfauri ban anggan ayu, am fag ngay tagsaful Ku-Unga At-Longan. Am nafamut way am sik ngay longan, laman at ngay taw maning ay longan. Ay ay famamut kata way sik mabiat fag fangubaun. Madyay am oma tagsaful dua am kaumsig gtarabang nus di oma am glangbud sumyu. ⁴⁷ Ay e nanfauri yangay ban ayu. Teway naawat way am ay, at ngay fagsandigan luib laman sas Funbalugu At ebi fag ngay taglong. Ay ay aguyangan ebi nafate wan kanya fag ngay taglong. ⁴⁸ Ay anggan am, igfadiuganan way am ay aguyangan at fagbulun. Anway kanya at nafate ka fag ngay taglong, ay am wan at naawat at fagsandigan. ⁴⁹ Ay fagbulun ingurungan wan Funbalugu At mamatanganan fag longan ebi ebi te, Sumugu Akyay ban Ku ngay taglong, ay Ku ngay suguan sasa ngay Taw-Naseg. Ay Taw-Naseg nanfate ban ay nanfauri ban at tiba Ku nasugu. ⁵⁰ Laman fagayu Ku nafamasadan fag faurianan sas fagayu at nafate sik taw fadasug Akyangay ban fiya sa katsi fag ngay taw. Anway nabusbus Funbalugu At ngay taglong at taguk siginan ngay fagsigadan tam fagdaul daga. ⁵¹ Siginan Sik-Nauyup at taguk anggan Funbalugu-Namatang at taguk. E nafate Funbalugu-Namatang gina sisad buknga Tagbvt-Fag-Bale-Funbalugu ay at Fagyagoan-Anyun. Kin wa fiya, iglong Aw ayu te, Katsi fag ngay taw e nanfauri wa ban fiya anway ebi igfate wayay at ngay taw. ⁵² Ay e nanfauri ban ayu, Taw-Naseg at tagsaful Ku-Unga At-Longan. Anway igsalag way am tibak taw te, laman dua sumaful Funbalugu At longan. Ay manga du am kaumsig gfaning Funbalugu At longan, ay igsalag way am at takaumsig gfaning. ⁵³ Ay gina Isus glo sanya ginan, Taw-Naseg at ngay tagfasaful ay anggan at ngay Taw-Tagfalayun igsalag dawdaw anya. Ay manga gfalingun Anya, anway at fakaumsigun Isus e longani tuwa nangus ayuwayu. ⁵⁴ Anway fakatanyaun igsarap Isus At longan at yud matuyan.

¹ Kaduge niya sik ngay taw ayuwayu maful sanya. Ay kanya gsidsiadan wa tiba. Ay Isus nafafaskudanan sa At ngay tagadal te, Tagaki at famabaga tinafay siginan at ngay Taw-Tagfalayun. At masuad te, Taw-Tagfalayun at nafanlukun. ² Anway nus nge wain dewa nasuksuk katsi, e fasure yay ban fagayu. Ay dewa masuksukan katsi, e sumaful yay ban fagayu. ³ Ay nus nge wain am nafoyung dewa gyud mafalaganan katsi, e dumungug yay ban. Ay nus nge wain ay naibug sas talinga gina sasad suluk, e muro yay ban saswa bilug fulan. ⁴ Ku ngay fagues, iglong Aw sa ayu te, Lag kalimu tagfate taw at bilug. Anway bandi ban du e fagmadaragangun nut sa was falad. ⁵ Ay gfatagak Aw ayu te, Tuyi tuwa ay fakalimuun. Segi Anya At ke fagmadaragangun At nafate at bilug, ay anggan naukas anya sas Lino-Afuy. Kin, iglong aw ayu te, Segi wa fiya Anya. ⁶ Ay at fansali limak maya, duwak salafi daga way sirut, go kin. Ay Funbalugu dua kaliam nus di sadik maya. ⁷ Ay glabi yay kanya. Madyay Funbalugu nasaful tuwa ay buk fagayu. Ay nu katvngvd tuwa long anya, lag kalimu. Anway ay kamesugan glabi yay am fiya fiya sik ngay maya. ⁸ Iglong Aw ayu te, Sik taw nu nafoyung tuwa tiba te, Aw, kafandiug aw sas Isus. Anggan Aw, Taw-At-Baguama, e foyungan Akyangay sas Funbalugu At ngay tagbukngan te, Kanya Ku taw. ⁹ Roro ngap, kanya fag taw nu kamayud way Angku katsi sa tiba, anggan ban Aw kamayud Akyangay ban anya sas Funbalugu At ngay tagbukngan. ¹⁰ Ay nus nga sinu at ke mauri fag longan sa Angku, Taw-At-Baguama, baliwa, mafafaliam tuwa. Ay roro nus nga sinu at ke mauri fag longan sa At-Masine-Fag-Falad baliwa, dua mafafaliam. ¹¹ Ay dewa e nataban ban ayu sas Taw-Naseg at ngay bale fakafulan, ay sat ngay fun ay anggan sat ngay magurang, lag am gafanawa te, Tain ro siring ku famalus. Ay tain manga ro ku longan. ¹² Anway ginanya ro At-Masine-Fag-Falad moyung yay ro ayu sa ay amatanganan sik longan at matuyan. ¹³ Sik taw siginan swa taw nalong sas Isus te, Em Takamoyung. Longi sa ku fadugsay te, laman foni yap angku ebi em tama at nanuranan tiba. ¹⁴ Ay Isus nalong anya te, Sek sama. Saturo bunwa Aw At tagfili at masine sa sik taw, at nanfafafudan ayu ay nanuranan. ¹⁵ Ay rodi Isus nalong sas fagayu taw te, Amatangani ay tagaki fagalabianun, nus nge wain. Anway sik taw at nanuranan dua gfaaba sik taw at leleg, dewa ngayu dawdaw at nanuranan. ¹⁶ Ay Isus nafafaskudanan sa ka fag ngay taw te, Ebi e sik taw mabalan. Ay siginan at tanuman, ngayu at buadan. ¹⁷ Ay kanya gamatangan te, Tain ku fagbulun. Anway da kwa e fagfasakboan ku ngay natanum at buadan. ¹⁸ Ay kanya namatangan te, Kata tuy mangaro ku fagbulun. Nangiklas ak yap mangaro ku ngay bale fagrabasan. Ay dumog kyay nangawat glabi yap katsi. Ay sanya ban ku fagsandigan ku ngay nafabul at buadan ay anggan ku ngay nanuranan. ¹⁹ Ay lumong ak ban sa ku amatanganan te, Ngayu ku nanuranan katsi. Sak wan, dewa ban ngayuk banwa. Kamato akway. Gfangon akway. Ginum akway. Ay anggan guseganan akway. ²⁰ Ay Funbalugu nalong anya te, Sek sangay. Du o e amatanganan tiba. Katsi ro sad yabi umkate wo. Ay nu katanya, dada ban fagayu am nasandig fag ngay nanuranan, am fasadan sa way emu mandi. ²¹ Katanya way sik taw nu nansandig way at ngay nanuranan sa anya mandi. Ay nu dway e fagmabalanun siginans Funbalugu. ²² Ay Isus nalong sa At ngay tagadal te, Ay katanya wayay, iglong Aw sa ayu te, Lag gafanawa te, daginan ban ay fakonun. Ay lag gafanawa sa ay bilug te, daginan ban ay lanbung. ²³ Anway ay leleg nu mesug, glabi yay sa sik fakonun. Ay ay bilug nu mesug, glabi yangay sa sik lanbung. ²⁴ Linggati nu kin, nin fag ngay uwak. Kanya du e tanum, ay du e nabul, ay du e fagrabasan. Ay madyay dewa uwak, Funbalugu e famaon tuwa anya. Ay ay kamesugan glabi yay am fiya fiya sik ngay manuk mela. ²⁵ Go sangay nu mafanawa tuwa ro am, mafafamut yay am ay leleg te, sadi yak menit. ²⁶ Ay nu dway am mafabul kadaul oma tuy fag fagbulun sirut, taw ro ay fagafanawaun sa ay fakaumsigun tiba. ²⁷ Linggati nu kin, nin fag ngay sariksik sa ngaba talun, madyay kadaul tuwa mandi. Kanya dua nanbalbe ay dua nangawat sik lanbung. Ay iglong kyangay ayu te, Nus nga fun Mabayan nasulun at tiba tungud at masine fag lanbung nu kalag, dua kamasine nin fag ngay sariksik. ²⁸ Funbalugu nafatugbung at makmak at ke sariksik sasa ngaba talun te, laman masine nu kalag. Dewa at ngay makmak melo katsi, balabag ban e mukas wa sasad afuy. Ay am, glabi yay am sik makmak, madyay Funbalugu nafon tuwa ayu ay lanbung. Go kin. Am mangaro sik ngay taw way am at yud matvngvd nu kafandiug. ²⁹ Nu katanya, lag gafanawa te, daginan ro ay fakonun. Ay daginan ro ay fanginum. Nus nge wain dangai gafanawa. ³⁰ Anway fagayu fun at ngay taw sas fagdaul daga at fagsarapun fiya fiya takatanya way fagayu. Ay roro ay Tama nasaful wa gugat ay fagayudanun nus nge wain. ³¹ Ay roro sarapi tuwa at masine fag fagbulun, laman ban ngayu tuwa sas Funbalugu-At-Fagmagurangan-Taw. Ay Funbalugu nafon ban sa ayu fagayu ay nayudanan ginanya. ³² Lag kalimu, dewa am yud ngayu at maful. Anway ay Tama at fakaumsigun nu sik fun ban am sas Funbalugu-At-Fagmagurangan-Taw. ³³ Fe salii ay nanuranan ay foni ay nabul sas taw at yud e kwa. Nu katanya tuwa, nabul ban am sik fagsuadan at yud ban karasras. Ay anggan e fagmabalanun ban am sas Banwa at yud ban maliam. Anway sanya di e kamul gsakbo. Ay anggan di ban e dafang at nanfamin ay fagmabalanun sanya. ³⁴ Anway nus nga nday ay fagmabalanun, sanya yangay baliwa anggan ay amatanganan. ³⁵ Famasadani ay famasinei ay lanbung. Ay lag falayung ay salung. ³⁶ Am katai tuwa sik ngay fanuguan tagfanya sat fun gina ban noli siginans sik fagfadaduwan fag yafun daul. Anway at ngay tagfanya mafali tuwa nu naluang, gina bagu kadasug at fun ay gina nafadunguganan. ³⁷ Guseganan tuwa ka fag ngay fanuguan nu antuwa mafuluan gina at fun kadasug. Matuyan iglong aw sa ayu te, At fun nanfamasine ro at lanbung ay nanfalunggung at ngay fanuguan sa at fagfangonan, ay nanfon anya at yafun. ³⁸ Ay at fun nu ndasug dewa swa bilug yabi, ay ate dewas balabag. Ay nu glag at ngay fanuguan nu mafuluan tuwa, guseganan wa fiya ka fag ngay fanuguan. ³⁹ Ay nasaful watam te, Sik tagbilug bale nu nasaful diro te, go ginain fag buknga yabi at takamul nu kadasug. Kin nu katanya, kanya fag tagbilug matagakan wa fiya. Ay lumag wa ro fiya nu e gsakbo. ⁴⁰ Katanyai anggan am. Mafamasadani tuwa. Anway nu mdasug Aw, Taw-At-Baguama, gina way ban am yud matagakan fag buknga. ⁴¹ Ay Takata-Sik-Batu ginto sas Isus te, Em Magurang. Nu gfoyung O ka fag fafaskudanan, go sa emi way fagtvngvd. Ay go sas fagayu taw wan. ⁴² Ay tam Fun Isus nabalus te, Katai at matuyan ay at mamatanganan fag fanuguan. Anway at fun nu nasugu wa anya te, Tanudi ku bale ay anggan fagayu tagsanya. Ay fayafuni tuwa ku ngay taw sanya nus nga seduge ebi ginan. ⁴³ Ay bandi guseganan tuwa ka fag fanuguan gina at fun indasug, ay at fun nalag te, ku fanuguan igfaning tuwa mangaro ku longan fagayu. ⁴⁴ Ay matuyan iglong Aw ayu te, ka fag fun nafatanud wa fiya sa ka fag fanuguan, dewa at mesug ayu daw fag ngay nanuranan. ⁴⁵ Ay roro ka fag fanuguan nu gamatangan way te, Yaya, glugo yay ku fun nu kadasug. Ay kanya gfalang way at tusama ay at tusena. Ay manga kon ay ginum way ay anggan kasigung way. ⁴⁶ Ay roro sik menit at fun umdasug ban gina at fanuguan yud gtagak. Ay kin roro mangaro nu kadasug gina way mangaro yud matagakan fag buknga ay. Ay at fun nafauri ban ka fag fanuguan. Ay nanfaful wa ban sa at mauri fag ngay taw. ⁴⁷ Ay sik fanuguan, dewa nasaful at fun at fakaumsigun. Ay nu dway mafamasadan ay nu dway gfaning at fun at fakaumsigun, malang ban dawdaw anya. ⁴⁸ Ay roro sik fanuguan, nu dyay nasaful at fun at fakaumsigun, ay dua gfaning. Malang yay ban anya, ay di ban matvngvd. Anway, sik taw nu e nafon ngayu sa anya, ngayu yangay at nabul siginan anya. Ay sik taw nu e fagmadaragangun daw siginan tibak taw, bandi ban ka fag ngay taw nanget ban dawdaw siginan anya. ⁴⁹ Ay Isus nafafaskudanan te, Ku fagnastiyeun nanfafana aw sik afuy ste swa daga. Ay Ku fakaumsigun nangus te, masulsulani wan. ⁵⁰ Ay umsurung Akyay ban sa sik mataka. Ay kabalu Aw dawdaw yap ngay ban umlangfe. ⁵¹ Go gamatangan am te, Ku fagnastiyeun nanfanabayan Aw at ngay taw ste swa daga. Bunwa katanya. Iglong Aw sa ayu te, Ku fagnastiyeun, anyay te, nanfasatsamanan Akway at ngay taw. ⁵² Anway sik bale at taw nu lima, at tulu gfaringangan ban sat duwa. Ay at duwa gfaringangan ban sat tulu. ⁵³ Kata tuy at fagnasatsamananun ban. Sik taw tama gfaringangan sat baguama. Ay sik baguama gfaringangan sat tama. Ay sik taw tina gfaringangan sat baguina. Ay sik baguina gfaringangan sat tina. Ay at nugangina gfaringangan sat nugang fag mangena. Ay at nugang fag mangena gfaringangan sat nugangina. ⁵⁴ Ay Isus nalong yangay sasa ngay taw te, Nu nalag am sik linyabu nu kasure siginans gfagmoyanan, rodi nasaful wam te, umoyan ro siring. Ay katanya wa fiya rodi. ⁵⁵ Ay nu nalag am sik linyabu malagsi, rodi nasaful wam te, gsudyang ro siring. Ay katanya wa fiya. ⁵⁶ Am, sik ngay tagfanluk way am. Nasaful wam at fagsafulan sa tam daga ay sa tam kiwang. Ay roro di am gsaful at fagsafulan sa katsi fag ngay menit. ⁵⁷ Taw ro ay fagyudun gfafidfilian te, inday at matuyan fag fagbulun. ⁵⁸ Kaduge o glo gfaigaluan takadotama emu sas tagsarap asalanan. Gina am sasa ngaba dalan, fasinei wan. Laman takadotama emu wa fasa fadasug emu sas tagsarap asalanan. Ay tagsarap asalanan wa fasa fadasug emu sat tagtanud laman ro dua sumungsung emu. ⁵⁹ Iglong Aw sa emu te, Dia ban o malfas siginans sungsungan, yap ngay ban o nafatabuun fagayu am bedan anggan at fakatabuan fag salafi daga.

¹ Kaduge niya, tibak taw sanya nafoyung sas Isus sasa ngay Taw-Balulangan baliwa. Anway fun At-Ke-Bangko nafate ebi kanya fag ngay taw kaduge ka fag ngay taw nafon at anyun sas Funbalugu. ² Ay Isus nanfoyung sat ngay taglong anya te, Go gamatangan am te, ka fag ngay Taw-Balulangan at asalanan glabi yay tibak Taw-Balulangan at asalanan. Madyay inke faurianan dawdaw sa anya. Go yaya. ³ Igfoyung Aw ayu te, Yaya. Ay fagayu am nu dway am naubun ay asalanan, anggan am, umkate yangay ban am. ⁴ Ay anggan ka fag 18k taw nu inkate sas fulan Sik-Fasagubanan kaduge ka fag bale ngabat nagfu sa anya. Go gamatangan am te, Kanya fag ngay taw at asalanan glabi yay fagayu tibak taw sas Erusalem at asalanan. Go yaya. ⁵ Igfoyung Aw ayu te, Yaya. Ay fagayu am nu dway am naubun ay asalanan, anggan am, umkate yangay ban am. ⁶ Ay Isus nafafaskudanan te, Ebi sik taw e tanum sik kayu takamuadan sat gamasun. Ay bandi kanya nanlag wa at tanum kayu ay nangakbang yama. Roro du e nalag at buadan. At don way. ⁷ Ay kanya nalong sa at tagtanud gamasun te, Dungugani sa ku longan. Tulu wak banwa nu gfanya aw ku tanum kayu nu gbuadan. Ay faggugat dua gbuadan. Fuani wan anway du e fanambagun. Igfapnu way ku daga. ⁸ Ay at tagtanud nalong te, Ku fun. Toi yap igfanya yay ta katsi fag banwa. Aw nansaksak akyay sa am tanum at fun. Ay nanfatsanya akyay sik balan afun ku famabuadan ban. ⁹ Ay nu e buadan tuwa ban sat fadogan fag banwa, masine wan. Ay roro nu dway ban e buadan, muan akwa ban. ¹⁰ Ay sik Fakamatoun-Menit Isus nafoyung sa sik Taw-Naseg at bale fakafulan. ¹¹ Ay sanya sik mangena e dailan anway e mafurat fag falad at kadugayan 18k banwa. Ay kanya mabarukung way, ay dua maaturun. ¹² Ay Isus nu nalag anya, nafaakbang sa Anya. Ay nalong anya te, Fagina, Umfiya wa ro o. ¹³ Ay Isus nafatayuk At daluap sa anya. Ay rodi tv kanya malindug tuwa ay igseg Funbalugu. ¹⁴ Ay sanya at magurang bale fakafulan kalimata dawdaw sas Isus. Anway Isus nafafiya sis Fakamatoun-Menit. Ay ka fag magurang nalong sasa ngay taw sanya te, E unum wak menit nu gfagbulun tam. Ay sii was faunumk menit nu kadasug ste at kinfiya. Ay lagi sis Fakamatoun-Menit. ¹⁵ Ay tam Fun Isus nalong anya te, O sik tagfanluk way o. Madyay fagayu am nanfalin way am ay baka ay ay asnu siginans fagfangonan. Ay nanfainum sasad safa. Dewa sis Fakamatoun-Menit. Go kin. ¹⁶ Ay ka fag mangena, at sadi Abrayam at kadagdagan, Tagfansalag nasalod anya 18k banwa. Ay masine kanya e naluas tuwa sis Fakamatoun-Menit. Go kin. ¹⁷ Ay Isus gina gfoyung katanya, at ngay tagsalag Anya napla dawdaw. Ay at ngay taw sanya guseganan dawdaw. Anway nalag Isus At ngay madaragang fag fagbulun. ¹⁸ Anway katanya, Isus nalong te, Tain ro nu gfasudan Aw Funbalugu-Nu-Gmagurang-Taw. Ay tain ku fafaskudanan, laman ro tuy mayamag. ¹⁹ Funbalugu-Nu-Gmagurang-Taw kata yangay sa sik rigrig lunga, sik taw at nafangukasan sat gamasun. Ay nu natugbung wan ay nu ndaul wan, insik kayu tuwa sirut. Ay sak tuwa at manuk mela gsubuk tuwa sat lanbud. ²⁰ Ay Isus gdog yay nalong te, Tain ku fafaskudanan sas Funbalugu-Nu-Gmagurang-Taw laman ro tuy mayamag. ²¹ Funbalugu-Nu-Gmagurang-Taw kata sa sik famabaga tinafay. Sik mangena nabul at famabaga ay nalugu nafagamutan naawat tinafay, kadaul sik sabi. Ay rodi fagayu at naawat, mabaga wan. ²² Ay Isus gina yangay glo sas Erusalem ay nadalan sasa ngay fulan daul ay sasa ngay fulan sirut, ay gfoyung sanya. ²³ Ay sanya sik taw ginto sas Isus te, Em Magurang, go gsadsadian way at kumbalabag. Ay Isus nalong sasa ngay taw te, ²⁴ Maseganamai laman ay fagsakboan sa tuwa at munsirut fag sakbawan alad. Nu katanya, igfoyung Aw sa ayu te, Ngayuk taw kaumsig yama ban gsakbo sanya. Ay yaya, dua masakbo. ²⁵ Kata sik tagbilug bale nu nlindug ay nu nadingding at sakbawan bale. Ay am at malindug sis day bale ay gfangkemkem sis day sakbawan. Ay ge longan te, Em magurang. Luangi ay fasakboi emi. Ay kanya igbalus te, Kua nasaful ayu daginan am. ²⁶ Ay glong yangay am te, Naon wami ay nainum wami ebi gfasuan emu. Ay o wan at nafoyung emi ebi sas fulan at faglanuan. ²⁷ Ay ka fag fun nalong yangay te, Iglong Aw sa ayu te, Kua nasaful ayu daginan am. Am, sik tagfaning way am at mauri. Ayayui wan ste ginan siginan angku. ²⁸ Ay bandi nanbantay ban am Abrayam, ay Kanya-At-Naasean, ay Takamilug, ay anggan fagayu Funbalugu At taglong sis Funbalugu-At-Fagmagurangan-Taw. Ay am, e naayiyan wayu sanya ginan. Nu katanya, muyway ban am dawdaw ay anggan gfaringgit way ban am ay bagang. ²⁹ Ay ginanya ngayu bank taw kumdasug siginans fakamenitan. Ay siginans fakayabian. Ay siginans wala. Ay anggan siginans siun. Ay malunggung maful gfangon sas Funbalugu-At-Fagmagurangan-Taw. ³⁰ Ay dungugani sa Ku longan. At tiba taw dewa tiba daga katsi, kanya ban tiba tungud tuwa. Ay at tibak taw dewa tiba tungud katsi, kanya ban tiba daga way. ³¹ Ay rodi tv tibak Taw-Tagfalayun indasug ay nalong sas Isus te, Loi anste ginan. Anway fun Sik-Madaragang-At-Baguama-Sirut gananfateun Emu. ³² Ay Isus nalong anya te, Ka fag fun takata sik mariruk. Ay foyungi anya te, Katsi naayiyan Aw at ngay mafurat fag falad. Ay gfafiya Aw at ngay ke dailan anggan balabag sigon. Ay sas fatuluk menit fatabu Akwan Ku fagbulun. ³³ Ay dewa katanya, glo Akwa sas dalan katsi ay balabag ay anggan sit dayu fag menit. Anway dua masine Funbalugu At taglong nu mkate nu dway sas Erusalem. ³⁴ Taw-Erusalem, Taw-Erusalem. Am wan ebi at nafate Funbalugu At ngay taglong. Ay anggan nafalang am anya batu ebi At nasugu sa ayu. Ay katsi ngayu ginan kyama gananfafulun fagayu am. Kata sik fanginan nu gfaful at ngay riangan sat daga fakfak. Ay roro dua am kaumsig nangaful sa Angku. ³⁵ Ay katanya wayay, ay bale ban di e gbanwan. Anway iglong Aw sa ayu te, Katsi ya ban am lumag Angku yap ngay ban am lumong te, Masine O, anway Am fagindasugun Am fagmadaragangun Siginans Funbalugu.

¹ Ay gina sik Fakamatoun-Menit, Isus nasakbo sa sik Taw-Tagfalayun at fun at bale. Laman gfangon sanya. Ay at ngay taw sanya gulit Isus. ² Ay sanya sik ama ngangakbang sas Isus takabaga fag duwa at bitis ay anggan fag duwa at take. ³ Ay Isus ginto sanya fag ngay tagsaful sa Ku-Unga At-Longan ay anggan sat ngay Taw-Tagfalayun te, Sik taw nu gfafiya at ke dailan sas Fakamatoun-Menit, go igfaning tuwa sa Ku-Unga At-Longan. Ay go idya. ⁴ Ay kanya dua gbalus. Ay rodi Isus nafakbang sa Anya at ke dailan. Ay nafafiya anya. Ay anggan nafalo anya. ⁵ Ay Isus ginto sa ka fag ngay taw te, Go nu e ntong tenday ay baguama ay ate ay baka sasad alian safa sis Fakamatoun-Menit. Go rodi nananbul yay am siginan sad alian. Go kin. ⁶ Ay du e mafabalus. ⁷ Ay Isus nalag at nagewan fag ngay taw nu kadasug sas yafun daul. Ay kanya nu malunggung sa tuwas fagunan fag faglunggungan. Ay katanya wayay, Isus nafoyung sanya fag ngay taw te, ⁸ Nu o wan at nagewan sa sik fagfadaduwan fag yafun daul, lag o malunggung sat fagunan fag faglunggungan. Labon at nagewan emu mafat sanya yangay sik taw taglabi emu. ⁹ Ay at tagfat sanya ayu fag duwa nangakbang sa ayu ay nalong emu te, Dayui o. Tuy tuwa fag taw taguna. Ay nu katanya, kapla way o glo sa tiba daga fag faglunggungan. ¹⁰ Ay roro nu e nagewan emu, adasugi wan ay nu malunggung o, sai way tiba daga fag faglunggungan. Laman at nagewan emu nu nangakbang sa emu ay nalong sa emu te, Sama. Stei tuwa sas fagunan fag faglunggungan. Ay nu katanya, fagayu am ufud at malunggung tagfasfuan emu sas fagfangonan, lumag te, e gseg emu. ¹¹ Anway sik taw nu gfandaragang way at longan ay anggan at fagbulun, bandi ban e nafababa wa anya. Ay roro sik taw nu nafababaun tuwa at longan ay anggan at fagbulun, bandi ban e nafaabat tuwa kanya fag taw. ¹² Ay Isus nalong yangay sa tagewan Anya te, Nu nafamasadan o dewa sik yafun sirut, ay dewa sik yafun daul, lag nangewan am ngay fagues. Ay am ngay fadugsay. Ay am ngay kalongan. Ay ate am ngay iba. Anway bandi kanya nangewan yangay emu, ay nanfafoli yangay ban sa emu ebia taw am nafagbulun. Ay nu katanya, kata nu nanfabali ban emu. ¹³ Ay roro am fakamasadanun fag yafun daul, sai way at ngay yud e kwa. Ay sa at ngay yud e take. Ay sa at ngay yud malo. Ay anggan sa at ngay yud glag. ¹⁴ Ay nu katanya guseganan tuwo. Anway kanya fag ngay taw dua ban mafafoli sa emu ebia taw am nafagbulun sa anya. Ay bandi ban e nafafoli yay sa emu, kaduge at matuyan fag ngay taw gdog yay gleleg. ¹⁵ Ay at sadi at malunggung sas fagfangonan nu nadungug Isus At longan, nalong sas Isus te, Guseganan tuwa ka fag taw nu nanfangon ban sas Funbalugu-At-Fagmagurangan-Taw. ¹⁶ Ay Isus nafafaskudanan sa anya te, Ebi e sik taw nafamasadan sik yafun daul ay nagewan ngayuk taw. ¹⁷ Ay nu ntama wan, kanya nasugu at fanuguan sa ebia taw at nagewan fag ngay taw, laman nafoyung anya te, Adasugi wan. Nafamasadan wan fagayu. ¹⁸ Ay ka fag ngay taw kata way at sadi at longan te, dua madasug sa ka fag yafun daul. Ay at taguna nalong sa at nalag fag fanuguan te, Bagu akway nasali sik daga. Ay at masine nu nalo akyadi laman nanlag aw. Get aw emu te, Foyungi sa am fun laman di kadotama sa angku. ¹⁹ Ay at sadi nalong te, Bagu akway nabul limak daduwa baka. Ay nalo aw katsi laman nanfaskud aw. Foyungi sa am fun laman di kadotama sa angku. ²⁰ Ay at sadi nalong te, Bagu way ami kadaduwa ay du ami madasug. ²¹ Ay ka fag fanuguan noli wan ay nafoyung fagayu sa at fun. Ay ka fag tagbilug bale indotama dawdaw nu nadungug at fanuguan at longan, ay nalong yangay sat fanuguan te, Loi yangay mafali sasa ngay dalan daul ay sasa ngay dalan sirut sa fagdaul fulan. Ay tabani at ngay taw at yud e kwa. Ay at ngay yud e take. Ay at ngay yud glag. Ay anggan at ngay yud malo. ²² Ay at fanuguan nalo wan, ay nu noli yangay, nafoyung sa at fun te, Ku fun. Nafaning akwan fagayu am longan. Ay dia nkapnu am bale. ²³ Ay ka fag fun nalong sat fanuguan te, Loi yangay sas buknga fulan fag dalan. Ay sas gamasun fag dalan. Ay tabani ste sanya ginan am nalag fag ngay taw. Laman umkapnu tuwa ku bale. ²⁴ Anway iglong aw sa emu te, Aro tv ku nagewan fag ngay taw, nus di sadi, du e nanangon an oma sik samsaman sirut ku yafun daul. ²⁵ Sik ngay taw ayuwayu nangalo sas Isus gina glo. Ay Isus inbiling ay nalong anya te, ²⁶ Ka fag taw, dewa indasug sa Angku, bunwa ban Ku tagadal nu dway dawdaw kesug Angku taglabi nu kesug way sat tama. Ay sat tina. Ay sat mangena. Ay sat ngay sisian. Ay sat ngay fadugsay. Ay anggan sat leleg mandi. ²⁷ Ay nus nga sinu nu dway mandi gfasan at salibagan kayu ay nangalo Angku, kanya bunwa ban Ku tagadal. ²⁸ Anway nus nga sinu am, nu kaumsig am nangawat sik bale ngabat dawdaw, nangamatangan yay am taguna te, Go ban insak tuwa ku fansali ay fatabu aktuwa ban. ²⁹ Anway nu nafasigad wo naturuk. Ay dway o nafatabu. Fagayu taglag gfalingun emu te, ³⁰ Kanya fag taw, dewa nafasigad, dua mangaro mafafatabu at bale. ³¹ Ay nu e sik fun daul e gadasugun sa anya tibak fun daul laman nanfabarangian sa anya. At taguna fag fun daul nafaful at ngay magurang laman gatulan te, Tain ban nu mabo tam ka fag fun daul at ngay tagbarangian. Anway tam tagbarangian 10,000k taw way. Ay ka fag fun daul at tagbarangian 20,000k taw wa daw. ³² Ay at taguna fag fun nu gamatangan yay te, Yaya, malabawan wa ban tam. Rodi kanya nasugu sik ngay fanuguan sa tibak fun daul, kaduge at tibak fun daul at ngay tagbarabangian ngayayu. Laman matvngvd nu nanget te, Tain ban em fagbulun laman manabayan tuwa ban ami. ³³ Amatangani tuwa ay fansali ban. Anway nus nga sinu sa ayu nu dway am naubun nus nge wain, kanya bunwa ban Ku tagadal. ³⁴ Masine sik asing. Ay roro sik asing nu dway e matamis, tain ro nu gdog yangay tam gfatamis. ³⁵ Yaya. Ka fag asing du e masuad. Dewa sas tanum ay dewa sas gamasun. E mukas wan. Nu e talinga tuwam, dungugani.

¹ Sik menit at ngay tagbul famanyun sat fun ay anggan at ngay tagasalanan nangakbang sas Isus, laman nandungugan. ² Ay Taw-Naseg at ngay Taw-Tagfalayun ay anggan at ngay tagfasaful gibugan te, Ka fag taw nafaful sa Anya at ngay tagasalanan ay gfasfuan anya igfangon. ³ Ay anway katanya, Isus nafafaskudanan te, ⁴ E sik taw sa ayu, nu e 100 balan. Ay nu naliam wa at sadi. Go naubun yay o at 99k balan sanya sas talun at yud e taw. Ay nalo yay o laman nansarap yay o at sadi at naliam, yap ngay o nalag. Go kin. ⁵ Ay nu nalag wo, nafasanan wo. Ay guseganan wo dawdaw. ⁶ Ay nu ndasug wo sa am bale, nanfaful yay o am ngay iba ay anggan am ngay fagues. Ay nalong o anya te, Useganani fasfuani angku. Anway nalag akwan ku balan aro at naliam. ⁷ Ay Isus nafamut te, Iglong Aw sa ayu te, Katanya yangay sas Banwa. Fagayu sas Banwa glabi yay nu guseganan sa at sadik tagasalanan nu naubun tuwa at asalanan. Ay sangap daw at 99k taw tagamatangan te, du ami e fagubunun em asalanan. ⁸ Sik mangena at ke 10k salafi. Ay naliam at sadi. Ay kanya nasulsul at salung. Ay nafalanu at bale. Ay igsarap dawdaw yap ngay nalag. ⁹ Ay nu nalag wan, kanya nafaful at ngay iba ay anggan at ngay fagues te, Useganani fasfuani angku. Anway nalag akwan ku salafi aro at naliam. ¹⁰ Ay Isus nafamut te, Iglong aw sa ayu te, Katanya yangay sas Banwa. Guseganan dawdaw Funbalugu At ngay tagbuknga dewa sadik tagasalanan nu naubun tuwa at asalanan. ¹¹ Ay Isus nafafaskudanan yangay te, Ebi e sik mangama at baguama duwa. ¹² Ay at fuyu nalong sat tama te, Ku mama, katsi foni wa sa angku angku fag afud am fagagbilugun am fagafonun sa angku. Ay ka fag mangama nafaafudan wa fagayu at fagafonun sat baguama fag duwa. ¹³ Ay bandi tv at fuyu nanfesali wa fagayu. Ay igsuad wa at ngay salafi. Ay nalo wa sas tibak talun ngayayu. Ay nu ndasug wa sanya, bandi kanya nafamin wan fagayu at salafi sat ngay fagalabianun. ¹⁴ Ay nu namin wa fagayu at salafi, bandi inke sik fanlunus daul sanya fag talun. Ay ka fag baguama e ngay fagayudanun dawdaw. ¹⁵ Katanya wayay, ka fag baguama inful sa sik taw sanya fag talun. Ay ka fag taw nasugu anya sa at ke bukbuk, laman nanfatongan at ngay bukbuk. ¹⁶ Ay ka fag baguama kaumsig wa kon fatongan sas bukbuk dewa batang yud sik taw kon. Anway du e taw igfon anya at fakonun, nus di sirut. ¹⁷ Ay bandi ka fag baguama gdog yay gamatangan te, Sa ku mama at ngay fanuguan ngayu tuwa at fakonun, ay e sawad yay. Ay aw gakateun akwa ste sas kalunus. ¹⁸ Gdog ak yap siring umfoli sa ku mama. Ay nanlong ban aw sa anya te, Ku mama, e asalanan aw sas Banwa baliwa, ay anggan sa emu. ¹⁹ Ay aw, ku e fagmasineun sak yangay o nafangayan te, ku baguama. Amatangani sa angku te, aw at sadi akway am fanuguan. ²⁰ Ay rodi ka fag baguama gdog yangay noli sat tama. Ay dewa ngayayu sas bale, at tama nabantay wa anya ay kafanyu dawdaw. Ay matarung nu kaakbang sa at baguama. Ay naugwan ay naayuk at fingi. ²¹ Ay at baguama nalong sa at tama te, Ku mama. E asalanan aw sas Banwa baliwa, ay anggan sa emu. Ay aw, ku e fagmasineun sak yangay o nafangayan angku te, am baguama. ²² Ay roro at tama nasugu at fanuguan te, Talayuni. Fastei ku lanbung at tiba tungud at masine. Ay felanbungi ku baguama. Ay fasuluni sik fanumyu sat sumyu. Ay sik fanguskus darafa sat darafa. ²³ Ay buli em baka riangan, em nafataba, ay filasi. Laman kon watam ay guseganan watam. ²⁴ Anway tuy ku baguama, ebi kata sik kinkate, ay katsi kata nu gdog yay gleleg. Ay ebi kanya naliam wan, ay katsi nalag kyay. Ay at ngay taw igfasigad guseganan. ²⁵ Ay ginanya, at baguama, at turungana, sa yays gamasun. Ay nu guli wan ay nu kaakbang wa sat bale, kanya nadungug nu gfauni at ngay famaawangan. Anway at ngay taw sanya guseganan dawdaw. ²⁶ Ay at turungana nafaakbang sa anya sik fanuguan ay nanginto te, Nataw at masuad at fagefamaawanganun. ²⁷ Ay ka fag fanuguan nafoyung te, Anway am arian bagu kadasug. Ay am mama nafate at baka riangan at nafataba. Anway am arian infoli yay, ay gleleg yay, ay di e dailan. ²⁸ Ay at turungana kadotama dawdaw ay kauri gsakbo sa sad bale. Ay at tama nalaklo laman nanfalukmianan at turungana ay nanfasakbo. ²⁹ Ay roro at turungana nalong sat tama te, Amatangani. Ngayu wak banwa nu gfaning aw emu. Ay da kdi batang kamabo emu. Ay dewa katanya, du o batang nafon angku nus di sadik riangan kambing, laman guseganan aw gfasfuan ku ngay fagsud. ³⁰ Ay kanya, am fuyu, ebi at nafamin am ngay fagagbilugun sat ngay fakamayunan fag mangena. Ay kanya nu ndasug wa iste, nafate tuwo tam baka riangan tam nafataba. ³¹ Ay at tama nalong anya te, Fagama. Faggugat o si tuwa angku. Ay fagayu ku fagagbilugun, anggan wa emu. ³² At masine museganan way tam, ay kaumsig watam. Anway kanya am arian ebi kata wa sik kinkate. Ay katsi gleleg yay. Ay ebi kanya kata wa sik maliaman. Ay katsi ste tuwa.

¹ Ay Isus nafafaskudanan sa At ngay tagadal te, Ebi e sik mabalan fag taw. Ay e tagtanud sa at fagmabalanun. Ay e nafoyung sa ka fag mabalan fag taw te, Am tagtanud nafangulanan am fagmabalanun. ² Ay ka fag mabalan fag taw nafaakbang sa anya at tagtanud. Ay ginto anya te, Go taw at masuad, ku nadungug sa emu baliwa. Fastei sa angku am rirukan ku fagmabalanun. Anway dua ban masine, nu o yangay ban ku tagtanud. ³ Ka fag tagtanud gamatangan te, Ku fun gaayiyanun wa angku. Laman bunwa ban aw at tagtanud. Tain ro ku fagbulun. Anway da kwa makatvngvd anya nu gamas aw. Ay kapla akway ngap nanget faggugat. ⁴ Ay kin. Namatangan aw te, kata tuyi ku fagbulun ro. Laman ku fun nu naayiyan wa angku, tibak taw gfasakbo tuwa angku sa at bale. ⁵ Ay ka fag tagtanud gfasadsadian nafaakbang sa anya at ke bedan fag ngay taw sa ka fag fun. Ay ginto sat taguna te, Seyu am bedan sa ku fun. ⁶ Ay at ke bedan nabalus te, 100 balde langis. Ay at tagtanud nafon anya at fagrirukan ay nalong anya te, Na. Tuy am fagrirukan am fanfatuyan. Rarusi mafali, ay fasiruti wan. Ay rirukan anyak man 50. ⁷ Ay at tagtanud ginto yangay sat sadi te, Seyu am bedan sa ku fun. Ay kanya nabalus te, 100 alungkung daul fayay. Ay at tagtanud nalong anya te, Na am fagrirukan am fanfatuyan. Rarusi wan. Ay am rirukan anyak man 80. ⁸ Ay at yud matuyan fag tagtanud at fun nalong te, Mamatanganan tuwa ku tagtanud at fagbulun. At masuad te, ste swa daga fag ngay taw at fagbulun sat tusama glabi yay ngap sa tagfaning sat mayamag fag taw nu mamatanganan at fagbulun, dewa sas fagfanlukun. ⁹ Ay Isus nalong yangay te, Iglong Aw sa ayu te, At masine ay fagmabalanun ay fanfaguesan yakman sa tibak taw. Ay dewa namin ay fagmabalanun, e nafasakbo tuwa ban ayu sa at fagbanwanan at yud e fakatabuan faggugat. ¹⁰ Sik taw nu mafanud tuwa sat fagbulun sirut, mafanud yangay anggan sat fagbulun daul. Ay sik taw nu dway mafanud sat fagbulun sirut, dua mandi mafanud anggan sat fagbulun daul. ¹¹ Ay nu dway am sik mafanud sas fagmabalanun ste swa daga, dua mandi e nafili ayu sa at urungan fag fagmabalanun. ¹² Ay nu dway am sik mafanud sas tibak taw at fagmabalanun, dua mandi e nafon ayu sik fagmabalanun te, ayu wan. ¹³ Go sik fanuguan mafafaning tuwa sas duwak fun. Go yaya. Madyay nu kesug wa sat sadi, sat sadi yaya. Ay nu gfaning wa sat sadi, sat sadi dua mafafaning. Ay katanya wa ngaro fiya. Du am mafafasfuan mafafaning fag duwa, sas Funbalugu ay sas fagmabalanun. ¹⁴ Ay at Taw-Tagfalayun gfalingun Isus nu nadungug At longan fagayu. Anway kanya at fakesugun sa ways salafi. ¹⁵ Ay Isus nalong anya te, Dewa am nafoyung sa tibak taw te, Matuyan em fagbulun, Funbalugu nasaful wan ay amatanganan. At ngay taw ste swa daga at tiba tungud fag fakesugun, kanya sik mafurat way fiya fiya sas Funbalugu. ¹⁶ Ku-Unga At-Longan ay anggan Funbalugu At ngay taglong ebi at longan e fagmadaragangun anggan sas Uan Tagfasurung indasug. Madyay e nafoyung tuwa at Masine-Fag-Barita sas Funbalugu-Nu-Gmagurang-Taw baliwa, anggan katsi. Ay fagayu taw gfaseganamaun tuwa nu gfagbulun, laman umful tuwa ban sas Funbalugu-At-Fagmagurangan-Taw. ¹⁷ Tam banwa ay tam daga dewa ban mamin. Tam Funbalugu At-Longan, nus di sadik siksik, dua maliam faggugat. ¹⁸ Nus nga sinu at naubun at mangena ay nangadaduwa yay sa tiba, kanya kamayun way. Ay nus nga sinu at kumdaduwa sa sik nagoyan kaduge at dan fag mangama gleleg, anggan kanya kamayun yangay. ¹⁹ Ebi e sik mabalan fag taw. At lanbung masine ay maloban. Ay anggan at amak masine ay malagsi. Ay kayu menit kayu menit ngayu tuwa at fakonun ay masine ya. ²⁰ Ay sat day sakbawan alad sik yud e kwa fag taw matagilid way. Ay gabangbang dawdaw fagdaul at bilug. Ay at ngayan te, Funbalugu-Ku-Tagtarabang. ²¹ Funbalugu-Ku-Tagtarabang kaumsig wa kon dewa at kintong fag dakdak siginan ka fag mabalan fag taw at fagfangonan. Ay at ngay idu sanya igdila wan Funbalugu-Ku-Tagtarabang at bangbang. ²² Ay bandi ka fag taw at yud e kwa nkate wan. Ay Funbalugu At ngay tagbukngan nataban wa anya sas Abrayam at akbang. Ay bandi anggan ka fag mabalan fag taw inkate yangay ay e nasandig. ²³ Ay ka fag mabalan fag taw indasug wa sa at kinbul at talun. Ay e faurianan dawdaw sanya. Ay kanya nabantay Abrayam nu ngayayu dawdaw. Ay anggan Funbalugu-Ku-Tagtarabang sas Abrayam at akbang. ²⁴ Ay ka fag mabalan fag taw nauro te, Ku magurang, Abrayam. Afanyui angku. Ay sugui Funbalugu-Ku-Tagtarabang. Laman kanya gfasurung at fungfung sumyu sa sik safa ay fabasai ay fatisi sa ku famaleleg. Anway e faurianan dawdaw sa angku ste sasad afuy. ²⁵ Ay Abrayam nalong sa ka fag mabalan fag taw te, Sama. Amatangani te, gina o gleleg, nabul wo at ngay masine. Ay roro Funbalugu-Ku-Tagtarabang nabul at ngay mataka. Ay katsi kanya sa tuwas fagmabayanun ste. Ay katsi o e faurianan way o sanya. ²⁶ Ay tuy yangay sa tam buknga, ami ay o, sik abat daw. Laman dewa sik taw kaumsig glo, dua madasug ste ginan sanya, ay laman anggan du e mdasug stiye sa emi sanya ginan. ²⁷ Ay ka fag mabalan fag taw nalong te, Ku magurang. Nu katanya, matvngvd nu get aw sa emu te, Sugui yap Funbalugu-Ku-Tagtarabang sa ku mama bale. ²⁸ Anway lima ya ku fadugsay fag mangama sanya. Ay laman Funbalugu-Ku-Tagtarabang gina suma anya, nanfatagak yay anya. Laman ku ngay fadugsay di mdasug stiye at ke faurianan fag talun. ²⁹ Ay Abrayam nalong yangay anya te, Am ngay fadugsay nasaful wan Ku-Unga At-Longan ay anggan Funbalugu At ngay taglong ebi at rirukan. Masine wan nu nafaning tuwa ban sanya. ³⁰ Ay ka fag mabalan fag taw nalong yangay sas Abrayam te, Yaya, dway kaumsig gfaning. Ay nu ndain sik taw ebi at kinkate nu mdasug di sanya, ku ngay fadugsay naubun yay at asalanan. ³¹ Ay Abrayam nalong anya te, Kanya nu dway gfaning sa Ku-Unga At-Longan, ay sas Funbalugu sigon At ngay taglong at rirukan, kanya dua ban gafanud dewa daw sik taw gdog yay gleleg.

¹ Ay Isus nalong sa At ngay tagadal te, Umdasug wa ban fiya at ngay tagfe asalanan. Ay e nanfauri yangay ban dawdaw sanya fag taw tagfe asalanan. ² At masine nu e siuk sa sik faglisgisan batu daul sa ka fag tagfe asalanan at liug. Ay e mukas anya sasad lino daul. Laman dua gfe asalanan sa takata tuy fag sisian sirut. ³ Ay katanya wayay, amatangani tuwa ay fagbulun. Ay am fadugsay nu e asalanan sa emu, salagi anya. Ay kanya nu naubun ka fag asalanan, faliamani anya. ⁴ Ay dewa fitu ginan sik menit kanya nu e asalanan sa emu. Ay nus nga fitu ginan nu gfoyung sa emu te, Naubun kwan ka fag asalanan. O faliamani tuwa anya. ⁵ Ay Isus At-Suguan nalong sa tam Fun Isus te, Fatvngvdi em fakafandiugun. ⁶ Ay tam Fun Isus nalong te, Ay fakafandiugun dewa kadaul sik rigrig lunga, nu lumong wam sa ka fag kayu te, Aguladi wan, ay atungkudi wa sasad lino daul. Ay kanya maning wa fiya ay longan. ⁷ Ay am at sadi nu e fanuguan am. Ay am fanuguan at fagbulun nu ntabu wan. Dewa naali daga ay ate dewa natanud am balan. Ay kanya nu ndasug sam bale siginans gamasun. Go nalong tuwo sa anya te, Katsi, malunggungi ay oni yap. Ay go yaya. ⁸ Am longan anway te, Seudi yap ku yafun. Ay fasinei am lanbung. Ay ubai am sineud sas fagfangonan. Laman nangon aw ay ginum aw. Ay aw nu ntabu kwan, o yangay fiya. ⁹ Go igfauseganan tuwo am fanuguan fagayu fagayu at fagbulun nu nafaning fagayu am longan. Ay go yaya. ¹⁰ Katanyai ay fagbulun. Nu nafaning wam fagayu At longan sa ayu, longi te, Ami at yud way ami katvngvd tibak fanuguan. Nu gfagbulun ami katvngvd way em Fun At fasadan. ¹¹ Ay gina Isus glo sas Erusalem, Kanya nadalan sas buknga talun Fagbantayan ay talun Balulangan. ¹² Ay gina indasug sa sik fulan sirut, sanya e 10k ama tagabangbang nafablang Anya. Ay ka fag ngay tagabangbang ngayayu tuwa sirut nu malindug. ¹³ Ay gbiya nu ge longan te, Isus, Em Magurang. Afanyui emi. ¹⁴ Ay Isus nu nalag anya nalong te, Loi wan ay falagi way ay bilug sas taganyun. Ay kaduge ka fag ngay ama iglo, infiya wan. ¹⁵ Ay at sadi nu nalag anya te, nfiya kwan, infoli yay sas Isus. Ay matvngvd nu gseg sas Funbalugu. ¹⁶ Ay anggan inlub sas Isus akbang ay igseg Anya. Ay kanya fag ama siginans talun Fagbantayan. ¹⁷ Ay Isus ginto sa anya te, Go 10 am at kinfiya. Go kin. Ay dada way at siyam. ¹⁸ Ay go tiba dua nfoli ay dua nanseg sas Funbalugu. Ay go o way sesadi tagseg sas Funbalugu, tagsiginan ngaps tibak talun. ¹⁹ Ay Isus nalong yangay sanya fag sadi te, Malindugi. Ay loi wan. Am fakafandiugun at nafafiya emu. ²⁰ Ay at ngay Taw-Tagfalayun ginto sas Isus te, Go seduge Funbalugu-Nu-Gmagurang-Taw nu kadasug. Ay Isus nabalus anya te, Yaya, du e faglagan te, gadasugun wan. ²¹ Ay ginanya dua ban e lumong te, Iste wan, ay ate, sanya wan. Yaya, anway Funbalugu-At-Fagmaurangan-Taw si wa ayu katsi. ²² Ay Isus nalong sa At ngay tagadal te, Sa ban tibak menit, kaumsig yangay ban am lumag Ku ngay menit, Taw-At-Baguama At ngay menit. Ay di am nalag. ²³ Ay bandi dewa e lumong ban sa ayu te, Sanya wan. Ay ate, Iste wan. Lag sanya. Lag gfaning ka fag ngay taglong. ²⁴ Anway Aw, Taw-At-Baguama, Ku ngay menit ban nu kadasug. Kata way ban sik fangkilat nu kasure sas kiwang, nayamag sa sik fungung. ²⁵ Ay bagu ban umsure ka fag ngay menit, e ngay faurianan yay ban sa Angku. Ay anggan katsi fag ngay taw kalimata way ban Angku. ²⁶ Anway nu kadasug ban Aw, Taw-At-Baguama, at ngay taw ban katsi kata yangay ban ebi fag ngay taw gina sas Tagfatuluan fag buknga. ²⁷ Ginanya ka fag ngay taw mabayan way. Ay kon way. Ay ginum way. Ay gfadaduwa way. Ay gfantaw sa at unga. Anggan yap ngay te, taba wa Tagfataluan nasakbo sat basad balutu. Ay indasug wa ka fag lino daul ay taba wa nafafuy ka fag ngay taw. ²⁸ Katanya yangay gina sis Lut fag buknga. Ginanya at ngay taw mabayan way. Ay kon way. Ay ginum way. Ay nanansali ay fesali way. Ay gtanum way. Ay gbale way. ²⁹ Anggan yap ngay te, taba wa Lut nalfas siginans fulan Sik-Afugan. Ay kata nu e moyan afuy ay kaysukri siginans banwa. Ay inbatas wan fagayu taw sas fulan Sik-Afugan. ³⁰ Katanya yangay ban fiya fiya ka fag menit nu kasure Aw, Taw-At-Baguama. ³¹ Nu ndasug ban ka fag menit, sik taw nut si was tungud bale, ay at nanuranan tagsas bale. Lag nansakbo sa at basad bale laman nanbul at ngay nanuranan sanya ginan. Ay katanya yangay sik taw nut si wa at gamason, lag guli. ³² Ay amatangani Lut at mangena. ³³ Nus nga sinu fag taw takesug at leleg katsi, maliam wa ban at leleg. Ay nus nga sinu at yud kesug at leleg katsi, kanya long ban e leleg tuwa faggugat. ³⁴ Igfoyung Aw sa ayu te, Ginanya ban fag yabi e duwak taw gtaladan gtiug. Ay e nataban wan at sadi. Ay naubun yangay sanya at sadi. ³⁵ Ay e duwak mangena sas fagligisan anway igligis. Ay e nataban wan at sadi. Ay naubun yangay sanya at sadi. ³⁷ Ay Isus At ngay tagadal ginto Anya te, Em Magurang. Dada ban takatanya. Ay Isus nafafaskudanan sa anya te, Nus nga nday at bilug nu mabulan, sanya yangay at ngay uwak nu kaful.

¹ Ay Isus nafafaskudanan yangay sa At ngay tagadal, laman kanya igdarangin faggugat. Ay di gatakan sat amatanganan. ² At fafaskudanan kata tuy te, Ebi sa sik fulan e sik tagsarap taw at asalanan. Ay kanya dua gseg sas Funbalugu ay dua kafanyu sas taw. ³ Ay sanya fag fulan e sik burangday yangay, ay kanya indasug faggugat sa ka fag tagsarap te, Tarabangi angku, anway e sik taw igsalag angku. ⁴ Ebia taw ka fag tagsarap kalimata way gtarabang sa ka fag burangday. Ay bandi ngap gamatangan te, Dewa aw yud gseg sas Funbalugu. Ay dewa aw yud kafanyu sas taw. ⁵ Katsi tumarabang akyay siring ka fag burangday. Anway kanya gfalimatan way angku faggugat. Ay laman ban di kamasalag angku. Anway glayun wan faggugat nu indasug ste sa angku. ⁶ Ay tam Fun Isus nalong yangay te, Amatangani sat yud matuyan fag tagsarap taw at asalanan at longan. ⁷ Ay go tam Funbalugu tumarabang tuwa At filian fag ngay taw, gina gdarangin dawdaw sa Anya fagngabak menit ay fagngabak yabi. Ay go kin. Ay go tam Funbalugu gfaluguan way nu gtarabang. Ay go igdi. ⁸ Igfoyung Aw sa ayu te, Funbalugu mafali nu gtarabang. Ay dewa katanya, Aw, Taw-At-Baguama, nu gdog Kyay stiye swa daga, go e nalag Akyangay ban at ngay taw takafandiug sa Angku. ⁹ Ay Isus nafafaskudanan sasa ngay taw. Anway tiba gamatangan te, Ami way at masine fag taw. Ay kanya kalimata way tibak taw. ¹⁰ Kata tuy At fafaskudanan te, Ebi sik duwak taw nasakbo sas Tagbvt-Fag-Bale-Funbalugu laman nandarangin. At sadi sik Taw-Tagfalayun. Ay at sadi sik tagbul famanyun sat fun. ¹¹ Ay ka fag Taw-Tagfalayun naguna inlindug, ay igdarangin sa anya mandi te, Em Funbalugu. Guseganan aw sa Emu, anway aw da kdi kata tibak taw. Tenday, kata sik takamul, ay kata sik tagfanluk, ay kata sik takamayun, ay anggan kata ka fag tagbul famanyun sat fun. ¹² Ay aw, kayu buknga fafituk menit duwa ginan nu e fagyudun aw gfangon fag menit. Ay aw, nafon ak tuwa at fasafuluan kafud fagayu ku nabul. ¹³ Ay roro at tagbul famanyun sat fun malindug ngayayu tuwa nu siginans fagngayuan taw. Ay dua natangda anway kapla way. Ay kanya garungan way dawdaw te, Funbalugu, afanyui angku. Anway aw sik tagasalanan aw. ¹⁴ Ay Isus nafamut yay At longan te, Igfoyung Aw sa ayu te, Ka fag tagbul famanyun sat fun noli wa sat bale. Ay Funbalugu natap anya kata sik taw at yud e asalanan. Ay dua natap ka fag Taw-Tagfalayun takatanya. Anway nus nga sinu fag taw nu gfandaragang way at longan ay anggan at fagbulun, bandi ban e nafababa anya. Ay roro sik taw nu nafababaun tuwa at longan ay anggan at fagbulun, bandi ban e nafaabat tuwa kanya fag taw. ¹⁵ Ay tibak taw nataban sik ngay sisian sirut sas Isus. Laman Isus nafatayuk At daluap sa anya. Ay Isus At ngay tagadal nu nalag at fagbulun, nasalag at tagtaban ka fag sisian. ¹⁶ Ay Isus nafaakbang ka fag ngay sisian sa Anya ay nalong te, Fabayani wan ka fag ngay sisian. Ay lag gsalag anya nu kakbang sa Angku. Anway Funbalugu-At-Fagmagurangan-Taw kata wa ka fag ngay sisian. ¹⁷ Matuyan iglong Kua ayu te, Nus nga sinu fag taw at yud kaumsig sas Funbalugu-Nu-Gmagurang-Taw kata sik sisian sirut nu kaumsig, ka fag taw dua ban umful sanya. ¹⁸ Ay sik fun ginto sas Isus te, Masine fag Takamoyung. Tain manga ban ku fagbulun at masine, laman e leleg aktuwa ban at yud katabu. ¹⁹ Ay Isus nabalus anya te, Taw aro am fagnalongun Angku te, Masine. Du e taw masine. Funbalugu way fagsadi At Masine. ²⁰ Nasaful wo Ku-Unga At-Longan te, Lag kamayun. Ay lag gfate taw. Ay lag kamul. Ay lag kamuagan nu gfoyung o sa am iba tibak taw at fagbulun. Ay esugi am mama ay am mina. ²¹ Ay ka fag fun nalong sas Isus te, Nafaning kua ngaro gugat kayu niya Am longan fagayu siginan ngay aw bagu kadaul. ²² Ay Isus nu nadungug katanya, nalong sanya fag fun te, E yud yay o nafaning sadi. Fesalii am nanuranan fagayu. Ay faafudani am nafabul sasa ngay taw at yud e kwa. Ay e fagmabalanun yay ban o sas Banwa. Ay katsi, gewan. Aloi Angku. ²³ Ay ka fag taw nu nadungug Isus At longan, inbalu dawdaw. Anway mabalan dawdaw ay kesug way. ²⁴ Ay Isus gina nalinggat anya nalong te, Mataka ban dawdaw sik mabalan fag taw nu kaful sas Funbalugu-At-Fagmagurangan-Taw. ²⁵ Mataka sik idu mabugsul guyuy nu gsulun sa sik fansulbung at sulung. Ay amataka yap sik mabalan fag taw nu kaful sas Funbalugu-At-Fagmagurangan-Taw. ²⁶ Ay sanya fag ngay tagdungug Isus At longan ginto te, Ay nu katvngvd wa anya Am longan, sinu ban at kumbalabag. ²⁷ Ay Isus nabalus te, Sik taw dewa yud mafabul, roro Funbalugu mafabul yadi. ²⁸ Ay Takata-Sik-Batu nalong sas Isus te, Ami naubun wami em ngay bale ay nangalo wami Emu. ²⁹ Ay Isus nalong sanya fag ngay taw te, Matuyan iglong Aw ayu te, Nus nga sinu fag taw at naubun at bale. Ay at mangena. Ay at ngay fadugsay. Ay at mangaguyang. Ay anggan at ngay sisian, laman Funbalugu-At-Fagmagurangan-Taw e fanambagun ban. ³⁰ Takatanya fag taw fafabul ban katsi ngayu ginan nus nga se taw at naubun ebi. Ay bandi e leleg tuwa ban at yud katabu. ³¹ Ay Isus nataban At Labi-Duwa sat dayu ay nalong anya te, Katsi sa watams Erusalem. Ay sanya ban nu mgurungan fagayu Funbalugu At ngay taglong At-Rirukan sa Angku, Taw-At-Baguama baliwa. ³² Ay sanya e tumaban ban Angku sa at ngay Yud-Naseg-Fag-Taw. Ay kanya wa ban fag ngay taw at malingun Angku. Ay at faplaan Angku. Ay at tumufe sa Angku. ³³ Ay at malang Angku. Ay at fate Angku. Ay dewa katanya, sis fatuluk menit gdog Kyay gleleg. ³⁴ Ay At ngay tagadal dua nasaful Isus At longan at masuad, nus di sirut. Anway dua nyamag sa anya at masuad. Ay fakatanyaun, dua gamatangan At longan. ³⁵ Ay Isus gadasugun sas fulan Bangluan. Ay sanya sik ama at yud glag malunggung sis day dalan, ay get. ³⁶ Ay at yud glag nadungug sik ngay taw nu gdalan sanya. Ay nanginto sa tiba te, Taw manga sanya. ³⁷ Ay tiba nafoyung anya te, Isus, sik Taw-Nasaret, galangfeun. ³⁸ Ay at yud glag nauro te, Isus, fun Fakafanyuun-At-Kadagdagan. Afanyui yap angku. ³⁹ Ay ka fag ngay taw at naguna sas Isus, ay matvngvd nu gsalag sat yud glag te, laman dua gfangaringang. Ay fangkabat glabi yay aro taw nu guro te, Fun Fakafanyuun-At-Kadagdagan. Afanyui yap angku. ⁴⁰ Ay rodi Isus intuas nu glo ay nalong sa tiba te, Fakbangi sa Angku at yud glag. Ay at yud glag nu nkaakbang wan, Isus nainto sa anya te, ⁴¹ Tain am fakaumsigun Ku fagbulun ro sa emu. Ay at yud glag nabalus te, Ku Fun, kaumsig aw nangus glag. ⁴² Ay Isus nalong anya te, Kin. Alinggati wan. Am fakafandiugun wan tagfafiya emu. ⁴³ Ay rodi kanya glag wa fiya. Ay nangalo wa fiya sas Isus. Ay anggan naseg daw sas Funbalugu. Ay fagayu at taw sanya nu nalag katanya, igseg dawdaw sas Funbalugu.

¹ Ay Isus ndasug sas fulan Bangluan ay gananlangfeun yama. ² Sanya fag fulan e sik taw at ngayan, E-Namatang. Kanya at sadi at tiba tungud at tagbul famanyun sat fun. Ay kanya mabalan dawdaw. ³ Ay E-Namatang gananlagun sas Isus, laman nangasaful Anya. Ay yaya, dua nalag. Teway sik ngay taw ayuwayu at nangakbang sas Isus, igfarum wayay Anya. Ay manga te, E-Namatang sik taw wayay mababa. ⁴ Ay rodi E-Namatang matarung nanangguna Isus. Ay naulul sa sik kayu dual, laman ro lumag Isus. Anway Isus dumalan ro sanya. ⁵ Ay Isus nu ndasug sanya, natangda ay nalong te, E-Namatang. Mafalii nu kadaga o. Anway katsi ro sumakbo Aw sa am bale. ⁶ Ay E-Namatang mafali nu kadaga. Ay kanya guseganan gfasakbo Isus. ⁷ Ay at tibak taw nu nalag, kalimata gibugan sat dayu te, Isus ganansakboun sa sik tagasalanan at bale. ⁸ Ay E-Namatang inlindug ay nalong sa tam Fun Isus te, Ku Fun. Dungugani sa ku longan. Nanfon ban aw at faduwan kafud ku nanuranan sasa ngay taw at yud e kwa. Ay ku nafamul siginans ku nafanlukan, nanfafoli akyay ban ay gfamut akyay ban tulu ya. ⁹ Ay Isus nalong anya te, Katsi, at fagbalabagun indasug wa iste fag bale. Anway kanya Abrayam yangay at kadagdagan. ¹⁰ Anway Aw, Taw-At-Baguama, Ku fagindasugun laman nansarap ay nanbalabag Aw at naliam fag ngay taw. ¹¹ Kaduge at ngay taw igdungugan aro Isus At longan, Isus nafafaskudanan yangay. Anway katsi Isus maakbang wa sas Erusalem. Ay anggan at ngay taw gamatangan te, Dua glugo Funbalugu-Nu-Gmagurang-Taw. ¹² Nu katanya, Isus nalong te, Ebi e sik fun sirut. Ay kanya galoun ro sa tibak talun ngayayu. Laman at fun daul sanya mon ban sa anya sik fagmagurangun. Ay nu nabul wa ban, guli yangay ban. ¹³ Ay nu galoun wan, ka fag fun sirut nafakbang anya at fanuguan sik 10. Ay kanya nafon sa sadi sadik fanuguan 5000k fisu. Ay nafoyung anya te, Salii ay fesalii. Laman faayui tuwa ku salafi, gina ban aw noli. ¹⁴ At sanya fag talun at ngay taw kalimata sa ka fag fun sirut. Ay e nasugu sik ngay taw at nanguyan sa ka fag fun sirut te, Du ami kaumsig kanya fag taw nu gmagurang ban emi. ¹⁵ Ay bandi ka fag fun sirut nabul at fagmagurangun ay noli wan. Ay nu ndasug wan, nafakbang sa anya at ngay fanuguan, ebi at fagfonan at salafi. Laman ka fag ngay fanuguan nanfoyung sa at fun te, seyu at kinfamut sa ebi at nafon fag ngay salafi. ¹⁶ Ay at taguna fag fanuguan inkakbang sat fun ay nalong te, Ku fun, am 5000k fisu infamut yay 50,000k fisu. ¹⁷ Ay at fun nalong anya te, Masine am fagbulun. O wan sik matuyan fag fanuguan. Madyay matuyan tuwa am fagbulun dewa sat alay. Katsi ban o wan tagmagurang sa 10k fulan. ¹⁸ Ay at faduwak fanuguan inkakbang yangay sat fun ay nalong te, Ku fun, am 5000k fisu infamut yay 25,000k fisu. ¹⁹ Ay at fun nalong anya te, Kin. Katsi ban o wan tagmagurang limak fulan. ²⁰ Ay sadi ya fiyak fanuguan inkakbang sat fun ay nalong te, Ku fun, Na, am nafamato sa angku ebi fag 5000k fisu. Ebi nasifig akway sa sad sinyag ay nasandig akway. ²¹ Anway kalimu aw emu te, o at yud wo gfangaliam fag taw. Nabul yay o, dewa o at yud nasandig. Ay nabul yay o at buadan, dewa o at yud natanum. ²² Ay at fun nalong sa ka fag fanuguan te, Siginan am nafoyungan sa angku, natap aw emu te, sik mauri way o fag taw. Sek, o mauri way o fag fanuguan. Madyay nasaful wo te, aw wan at yud akwa gfangaliam fag taw. Ay nanbul akyay dewa aw at yud nasandig. Ay nanbul akyay at buadan, dewa aw at yud natanum. ²³ Taw ro ngani am fagyudun nafon ku salafi sa sik taw at mafafaayu. Laman nu kadasug kwan, nanbul aw ku salafi ay anggan at kinfamut. ²⁴ Ay ka fag fun nalong sa at malindug sanya te, Buli wan ka fag 5000k fisu siginan ka fag fanuguan. Ay foni sat fanuguan at ke 5000k fisu. ²⁵ Ay at malindug sanya nalong te, Em fun, kanya e 5000k fisu wan. ²⁶ Ay at fun nalong te, Iglong ku ayu te, Nus nga sinu at ke kwa, e famut yay ban sa anya. Ay roro nus nga sinu nu dway e kwa, at sawad si anya nu alay way, e famin wa ngap siginan anya. ²⁷ Ay katsi fastei ka fag ngay taw at takalimata angku. Ay at yud kaumsig nu gmagurang aw anya. Ay fatei anya sa ku akbang. ²⁸ Ay Isus nu nalong wa katanya, natunglus wa nalo sas Erusalem. ²⁹ Ay nu ndasug wa sas Muyud-Tagakayuun-Ulibu, ay makbang wa sas fulan Kayu-Buadan-Ya-Ntaba ay sas fulan At-Yud-E-Kwa, Isus nasugu At tagadal at duwa. ³⁰ Ay nalong anya te, Nanlag wam sanya am dayu fag fulan. Ay nu mdasug am sanya, rodi lumag ro am sik asnu riangan masiukan. Di e taw batang nasakay sanya. Ay luasi at siuk. Ay tabani ka fag riangan stiye sa Angku. ³¹ Ay gina am gluas, sik taw nu gsalag wa ayu te, Taw ro ay fagluasun. Am, longi anya te, Tam Fun kaumsig yay sirut katsi. ³² Ay At nasugu fag duwa nalo wa fiya. Ay nalag wa fiya kata yangay Isus aro taw At longan sa anya. ³³ Ay gina naluas at siukan ka fag riangan, at tagbilug nalong anya te, Taw ro ay fagbulun ka fag asnu riangan. ³⁴ Ay At nasugu fag duwa nabalus yangay te, Tam Fun kaumsig yay sirut katsi. ³⁵ Ay rodi At nasugu fag duwa nataban wa fiya ka fag riangan sas Isus. Ay nasagmak at ngay lanbung sat tungud balan guyuy. Ay anggan nafasakay Isus sanya. ³⁶ Ay gina glo, ngayuk taw at fanagmak sasa ngaba dalan at lanbung wan. ³⁷ Ay Isus indaga wa siginans Muyud-Tagakayuun-Ulibu. Ay makbang wa nu gadasugun sas Erusalem. Ay at ngay tagalo gbiya nu ge longan, laman guseganan ay gseg sas Funbalugu. Anway ebia taw ngayu wan at nalag Isus At madaragang fag fagbulun. ³⁸ Ay kata tuy at ngay taw at longan te, Masine tuwa Kanya At fagindasugun At fagmadaragangun siginan was Funbalugu. E manabayan sas Banwa. Gseg watam Kanya tagsiginans Banwa. ³⁹ Ay tibak Taw-Tagfalayun siswa taw nalong sas Isus te, Takamoyung. Salagi Am ngay tagadal. ⁴⁰ Ay Isus nalong anya te, Igfoyung kua ayu te, Kanya fag ngay taw nu dway ge longan, ste waro fag ngay batu at manguruan. ⁴¹ Ay Isus nu kaakbang wa sas fulan, ay nu nabantay wa Erusalem, guyway anway kafanyu. ⁴² Ay Isus nalong te, At masine, nu gsaful tuwam nangus te, at foyungan sa tuwas fagmanabayanun baliwa. Ay roro at masuad masuksukan yay sa ayu du am nasaful. ⁴³ Anway umdasug ban sik ngay menit, at ngay tagfabarangian ayu umdasug sa ay fulan, ay malad. Laman du am e fakalfasan. Ay ka fag ngay tagfabarangian indasug wa fiya sa ay fulan ay masafung. Laman du am malfas. ⁴⁴ Ay ka fag ngay tagfabarangian falafi wa ban at ngay taw sas daga. Ay anggan ay ngay sisian. Ay manga narasras ban ay ngay bale. Ay dua ban e batu magamut nus di duwa. Anway du am nasaful te, Funbalugu indasug wa sa ayu. ⁴⁵ Ay Isus nasakbo sas Tagbvt-Fag-Bale-Funbalugu ay naayiyan fagayu at tagfesali sanya. ⁴⁶ Ay nalong anya te, At-Rirukan nalong wa te, Ku bale faggugat sik bale daranginan wadi. Ay yaya, roro mangaro Ku bale nafasik luib way am, fakamulan. ⁴⁷ Ay fagayu menit Isus igfoyung sas Tagbvt-Fag-Bale-Funbalugu. Ay at Taw-Naseg at ngay taganyun dual, ay at ngay tagfasaful ay anggan at ngay magurang igsarap te, tain nu gfate Anya. ⁴⁸ Ay dua nasaful te, tain ban at fagbulun. Anway at ngay taw kaumsig tuway dawdaw nadungug sas Isus At longan.

¹ Sik menit Isus igfoyung at Masine-Fag-Barita sasa ngay taw sas Tagbvt-Fag-Bale-Funbalugu. Ay kaduge niya, Taw-Naseg at ngay taganyun daul, ay at ngay tagfasaful, ay anggan at ngay magurang inkakbang sas Isus. ² Ay nainto sas Isus te, Foyungi emi te, Sinu At nasugu Emu te, nanfagbulun O katanya. Ay anggan daginan sangay Am fagmadaragangun. ³ Ay Isus nabalus anya te, Anggan Aw, e fagintoun Akyangay sa ayu. Balusi ro Angku. ⁴ Go daginan Uan Tagfasurung at fagmadaragangun at fagsurungun taw. Go siginans Banwa. Ay go siginans taw. ⁵ Ay ka fag ngay Taw-Naseg igsulitanan yay gadayuan sit dayu te, Nu lumong maro tam te, Siginans Banwa, Kanya malus ro antam te, Ay taw madyay ay fagyudun gafanud sas Uan at longan. ⁶ Ay nu lumong maro tam te, Siginans taw... Ik. At ngay taw mafalang antam batu. Anway at ngay taw gafanud te, Uan Tagfasurung sik taglong siginans Funbalugu. ⁷ Ay anway katanya, ka fag ngay Taw-Naseg nabukngan. Ay kanya nabalus sas Isus te, Yaya, du ami nasaful te, go daginan manga. ⁸ Ay Isus nalong yangay te, Anggan Aw. Da Kua gfoyung ayu te, Kanya At nasugu Angku Ku fagmafafagbulunun katanya. ⁹ Ay Isus igfafaskudanan sat ngay taw te, Ebi e sik ama natanum sik ngay uwat sa at gamasun. Ay kanya nafatanud at tanuman uwat sa sik ngay tagtanud. Ay at tagbilug nalo wan sa sik talun ngayayu ay glugo tuwa sanya. ¹⁰ Ay nu indasug wa sis famulan, ka fag tagbilug nasugu at fanuguan at sadi sa at ngay tagtanud at tanuman uwat. Laman nanbul siginan at ngay tagtanud at tiba at buadan siginan at tanuman uwat. Ay at ngay tagtanud nafalang ka fag fanuguan. Ay naayiyan wa anya. Ay du e uba. ¹¹ Ay at tagbilug gdog yay nasugu sadi yak fanuguan. Ay at ngay tagtanud nafalang yangay anya. Ay nafalingun anya. Ay naayiyan wa anya. Ay du e uba. ¹² Ay at tagbilug gdog yay fiya nasugu at fatuluan fag fanuguan. Ay at ngay tagtanud nafe fakarukan anya. Ay anggan naukas anya sat day gamasun. ¹³ Ay at tagbilug gamatanganan te, Tain ban ku fagbulun. E kata tuy siring. Sumugu ak yap ku fakesugun ku baguama. Nu ndain ku ngay tagtanud sumeg yay manga sa ku baguama. ¹⁴ Ay roro at ngay tagtanud nu nalag wa at baguama, igsulitanan way sat dayu te, Labon ban at baguama nangagbilug way at tama at daga. Gewan. Nanfate watam anya. Laman antami wa ban at daga. ¹⁵ Ay katanya wayay. Kanya naurug ka fag baguama ay naukas siginan at tuwa tanuman uwat. Ay nafate wa daw anya. Ay nu katanya, tain ban tagbilug tanuman at fagbulun sa ka fag ngay tagtanud. ¹⁶ Kanya umdasug ban ay nanfate ban ka fag ngay tagtanud. Ay nanfatanud yay ban at tanuman sa tibak tagtanud. Ay at ngay taw nu nadungug Isus At fafaskudanan, nalong te, Ay lagi. Bundi nangus katanya. ¹⁷ Ay Isus nalinggat sat ngay taw ay nalong te, Nu katanya, tain At-Rirukan at masuad at fagnalongun te, Dewa at ngay takawat bale kalimata Ka fag Batu at fangawat bale, Kanya tuwa fag Batu At tiba tungud at famatvngvd fagdaul at bale. ¹⁸ Ay nus nga sinu at kumfalang sanya fag Batu at fangawat bale, kanya mangaramyukan wan. Ay nus nga sinu nu Ka fag Batu at fangawat way bale at malang anya, kanya fayamas wan. ¹⁹ Ay ginanya fag buknga, Taw-Naseg at ngay tagfasaful ay at ngay taganyun daul ganantedun Isus. Anway kanya nasaful Isus At fafaskudanan at masuad te, igsalag way anya. Ay roro kanya dua nated Anya. Anway kanya kalimu at ngay taw te, manlimata ban anya. ²⁰ Ay Taw-Naseg at ngay tagfasaful ay at ngay taganyun dual nanfaulitun Isus At fagbulun. Ay nasugu at ngay fanuguan laman nangulit yay fiya. Ay at fanuguan igfanluk kata nu kaumsig nadungug sas Isus At longan. Anway at fasadan fiya laman dumungug Isus At nasalan siginan At longan. Ay at fagnafoyungun katanya sat fun laman at fun tumed ban Isus. ²¹ Ay ka fag ngay fanuguan nalong sas Isus te, Takamoyung. Nasaful wami te, Matuyan Am longan ay anggan Am foyungan. Ay du O e filian taw anway du O naseg sas taw at fagmadaragangun. Ay Am foyungan antuwa Funbalugu At ugali. ²² Go manga sik taw nu nafon sik famanyun sas fun Sesar. Go katanya manga igfaning wa Ku-Unga At-Longan. Ay go yaya. ²³ Ay Isus nasaful ka fag ngay fanuguan te, gfanluk way. Ay katanya wayay, Isus nabalus anya te, ²⁴ Foni Angku sik salafi. Sinu at ke aninu ay at ke rirukan iste sis salafi. Ay kanya nabalus te, fun Sesar. ²⁵ Ay Isus nalong te, Kin. Foni fun Sesar at nanuranan sas fun Sesar mandi. Ay foni Funbalugu At nanuranan sas Funbalugu mandi. ²⁶ Ay kanya fag ngay Taw-Naseg at magurang dua mafe asalanan Isus gina sisa ngay taw at akbang. Ay kanya nadulawan nu nadungug Isus At famalus. Ay anway katanya, kanya dua gananintoun sas Isus. ²⁷ Ay rodi ro at ngay Taw-Saduseu nangakbang sas Isus laman nanginto Anya. Ay Taw-Saduseu dan wa igfoyung te, Taw at kinkate dua ban gdog gleleg. ²⁸ Ay ka fag ngay Taw-Saduseu nanginto sas Isus te, Takamoyung. Ebi Ku-Unga nariruk sa antam te, Sik mangama nu nkate wan. Ay at sawad at mangena way, dia nke unga. At masine at kinkate at fadugsay fag mangama adaduwai yap sa ebia taw at fadugsay mangena. Laman umke unga yay bilang sa ebia taw at fadugsay unga. ²⁹ Ay ebi e sik sisian, fituk ama. Ay at turungana inke mangena wan. Ay ka fag ama nkate wan, dua nke unga. ³⁰ Ay sik daga tv fag fadugsay indaduwa yay fiya sanya fag mangena. Ay inkate yay fiya, dua nke unga. ³¹ Ay katanya yangay anggan sat fatuluk fadugsay. Ay ka fag fituk sisian nasugfunanan wa namangenan ka fag mangena. Ay fagayu sisian dua nafe unga, ay inkate wan. ³² Ay bandi, anggan ka fag mangena inkate wan. ³³ Ay go gina ban fagayu taw gdog yay gleleg, sinu ban at ke mangena. Anway fagfituk sisian namangenan wa anya. ³⁴ Ay Isus nalong sat ngay Taw-Saduseu te, Katsi fag ngay taw igdaduwa yay ay anggan igfantaw yay sa at unga. ³⁵ Ay roro saman yay at ke fagmasineun fag ngay taw nu sak waro daw nadog yay gleleg sa at kumdasug ban fag ngay menit. Ginanya ban ka fag ngay taw dua gdaduwa. Ay duwa ban igfantaw sa at unga. ³⁶ Anway kanya dua ban gdog nkate. Anway ginanaya ban ka fag ngay taw kata yangay Funbalugu At ngay tagbukngan. Ay kanya Funbalugu At ngay unga, anway kanya gdog yay gleleg. ³⁷ Ay sa baliwas taw nu gdog yay gleleg, Ku-Unga at fagnarirukun sa baliwa takalabe fag fun kayu sirut, kanya nafangayan Funbalugu te, Abrayam at Funbalugu, ay Kanya-At-Naasean at Funbalugu, ay Takamilug at Funbalugu. ³⁸ Ay dewa ka fag tuluk taw nkate wan ebi, kanya gdog yay gleleg. Anway Funbalugu bundi at matean fag taw at Funbalugu. Kanya At tagleleg tuwa fag taw at Funbalugu. Anway sas Funbalugu fagayu taw gleleg tuwa. ³⁹ Ay Taw-Naseg at tibak tagfasaful nalong te, Em Takamoyung. Matuyan Am longan. ⁴⁰ Ay at fagnalongun katanya, anway te, laman du e fagintoun sas Isus nus di sadik fagintoun. ⁴¹ Ay Isus ginto anya te, Taw ro fage fagnalongun te, sadi yay Fagtayukan ay fun Fakafanyuun at kadagdagan. ⁴² Fun Fakafanyuun wan at nalong sa At-Rirukan sas Danyu te, Tam Fun nalong sa ku Fun te, Malunggungi sa Ku siun baliwa fag day tigyangan. ⁴³ Ay fatsa Akyay Am daga fagmadaragangun at tagfabarangian Emu. ⁴⁴ Taw ro fun Fakafanyuun fagnafangayanun Fagtayukan te, ku Fun. Ay nu fun Fakafanyuun way ngap at kadagdagan. ⁴⁵ Gina fagayu taw gdungug, Isus nalong sa At ngay tagadal te, ⁴⁶ Tagaki siginans Taw-Naseg at ngay tagfasaful. Kanya gina nalo, kaumsig nu ngaba at lanbung. Ay nu glo sa tuwa swa bilug fulan te, laman at ngay taw at nafablang anya, igseg anya. Ay manga at fakaumsigun si tuwa tiba tungud fag faglunggungan nus nga nday nu ndasug fag bale fakafulan. Ay manga gina e yafun daul at fakaumsigun si tuwas gfagunan fag faglunggungan. ⁴⁷ Ay manga igfamin way burangday at fagagbilugun. Ay manga dewa gfalugo nu gdarangin, sik famalagan way. Umdasug way ban sa anya at matvngvd fag faurianan.

¹ Ay Isus gulit at ngay mabalan fag taw nu gfon at ngay fagfonun sat fagsuadan famanyun. ² Ay nalag yangay sik yud e kwa fag burangday nu nafon duwak salafi-daga way. ³ Ay Isus nalong sat ngay taw te, Matuyan iglong Kwa ayu te, Kanya at yud e kwa fag burangday at nafon, glabi yay sa tiba fagayu at nafon sas fagsuadan famanyun. ⁴ Anway si tiba at nafon fagngayuun at labi wan. Ay roro sanya fag burangday, dewa yud ngayu at nafon, kayu wa niya fagdaul. Anggan wa at fasad famul at fakonun. ⁵ Ay tibak taw nalong te, Linggati. Nin Tagbvt-Fag-Bale-Funbalugu. Masine dawdaw nu kalag. Ay agbvt at fangawat fag ngay batu. Ay anggan at famasine siginan at ngay taw at famanyun. ⁶ Ay Isus nalong te, Fagayu ay nalag katsi, bandi ban gina umdasug ka fag ngay menit, dua ban e batu magamut, nus di duwa. Fagayu e fatong wa sas daga. ⁷ Ay Isus At ngay tagadal ginto sas Isus te, Em Takamoyung. Seduge ban nu msure aro Am ngay nafoyung. Ay tain ban em faglagan, nu sumaful ami te, gasureun wan. ⁸ Ay Isus nabalus anya te, Tagaki siginan at ngay tagfanluk. Laman di ban am malukan. Anway ngayu yay bank taw at kumdasug yangay kata Angku te, Aw wan Fagtayukan. Ay anggan te, Gadasugun wan ka fag ngay menit. Lag gafanud sat longan. ⁹ Ay dewa ban am e dungganan te, E gbarangian wa sa tibak talun. Ay anggan e garingangan wa dawdaw sa tibak talun. Lag kalimu. Dewa ban katanya, bunya ginanya at fakatabuan fag ngay menit. ¹⁰ Ay Isus nalong yangay te, Tibak talun ban at ngay taw at fagfabarangianun tibak talun yangay daw at ngay taw. Ay sik fun at ngay taw gfabarangian yangay ban sa sik fun at ngay taw. ¹¹ Ay sa bans tibak talun guwigan ban dawdaw tam daga. Ay sa tibak talun at taw kalunus ban dawdaw. Ay e ngay dailan ban dawdaw. Ay e fakalimuun ban dawdaw. Ay anggan matvngvd at ngay fagsafulan sas Banwa. ¹² Ay gina gadasugun kayu niya, e yumugfu ban ayu ay gfauri ban ayu. Ay anggan mon ban ayu sas Taw-Naseg at ngay bale fakafulan ay anggan sas bale sungsungan. Ay anggan e tumaban ban ayu sa at ngay fun daul ay sa at ngay fun sirut, anway kafandiug wam sa Angku. ¹³ Ay ginanya wan at fasakan nu gfoyung am at matuyan fag longan sanya fag ngay taw. ¹⁴ Fatvngvdi ay amatanganan. Ay lag am gafanawa te, Tain ro siring ku famalus. ¹⁵ Anway igfoyung Akyay ban ayu at mamatanganan fag longan. Ay at nansalag ayu dua gbabo ay dua mafafamayud sa ay longan. ¹⁶ Ay ay mangaguyang, ay ay ngay fadugsay, ay ay ngay kalongan, ay anggan ay ngay fagues nataban ban ayu sas mauri fag taw. Ay e fate ban ayu tiba. ¹⁷ Ay fagayu taw umlimata wa ayu, anway kafandiug am sa Angku. ¹⁸ Dewa katanya, nus di sadi ay buk dua nbayad. ¹⁹ Ay anway gsungatan tuwam ay igbaris, umbalabag ban am. ²⁰ Ay nu nalag wam sik ngay tagbarangian nu gsafungan sas fulan Erusalem, nasaful wam te, Makbang wan nu e rumasras Erusalem. ²¹ Ginanya ban fagayu taw tagsis talun Naseg, lagyui wa sas muyud. Ay sik taw tagsis fulan daul, alfasi wan. Ay sik taw at malakluan sasa ngaba talun, lag guli sas fulan daul. ²² Anway ka fag ngay menit, sik fanfafoli sa at ke mauri. Laman umgurungan wa fiya At-Rirukan. ²³ Ay mafanyu ban dawdaw tagbuba ay tagfasusu ginanya fag ngay menit. Anway e faurianan ban dawdaw sas fagdaul daga. Ay anggan gfandotamaan iste fag ngay taw. ²⁴ Ay tiba iste fag ngay taw e masing wan laman igfate. Ay tiba e nataban ban sa nus nga nday fag talun. Ay at Yud-Naseg-Fag-Taw mabo wa ban fulan Erusalam. Ay manga manggalutan wa ban rumasras. Yap ngay ban at Yud-Naseg-Fag-Taw at ngay menit umlangfe. ²⁵ Ay e faglagan ban sa tam menit ay sa tam magdanun ay anggan sat ngay galeme. Ay ste swa daga fagayu talun at ngay taw kalimu ban dawdaw. Anway kanya dua nasaful at masuad tam lino daul at fagfawasun dawdaw ay at faglumbakun. ²⁶ Ay anggan at ngay taw at mata umkarum sas kalimu. Ay sas kagawan sa nu gamatangan at kumdasug ban ste swa daga. Ay fagayu at ke fagmadaragangun sis banwa muwigan wa ban dawdaw. ²⁷ Ay ginanya ban, at ngay taw lumag wa Angku, Taw-At-Baguama, nu kadasug Aw gasfuan sik linyabu. Ay e fagmadaragangun Aw. Ay anggan e fagmasineun Aw dawdaw. ²⁸ Ay gina bagu umgurungan aro Ku longan, malindugi ay tangdai. Anway makbang wan nu e gbalabag ayu. ²⁹ Ay Isus nafafaskudanan sa anya te, Linggati sik alibas, ay anggan fagayu tibak kayu. ³⁰ Nu nalag wam sik alibas at don nu karabas wan. Ay anggan at sanga nu malumak yay. Nasaful wam mandi te, Gakamanguneun wan. ³¹ Katanya yangay ban nu lumag am Ku longan nu kagurungan. Sumaful yangay am te, gadasugun wa fiya Funbalugu-Nu-Gmagurang-Taw. ³² At matuyan iglong Aw sa ayu te, Katsi fag ngay taw dia mkate taguna, yap ngay umgurungan fagayu Ku longan. ³³ Tam banwa ay tam daga maliam yay ban. Ay roro Ku ngay longan fagayu dua ban maliam faggugat. ³⁴ Tagaki. Laman ay amatanganan di kata mafautan ste ginan swa daga fag ngay fagalabianun, ay siginans fanginum fangasigung, ay anggan siginans fagafanawaun. Ay nu katanya tuwa, dewa ndasug ka fag ngay menit, di kata sik lulang at migtan ayu. ³⁵ Anway ka fag ngay menit umdasug wa ban fiya sas fagayu tagbanwan sas fagdaul daga. ³⁶ Ay tagaki faggugat. Ay darangini laman insak tuwa ay fagmabitsugun. Laman malagyu tuwam dewa ban umdasug at ngay nanfauri. Ay laman umkakbang tuwa ban am sa Angku, Taw-At-Baguama. ³⁷ Ay fagayu menit Isus nafoyung sas Tagbvt-Fag-Bale-Funbalugu. Ay nu kayabi wan, Kanya nalo wan siginans fulan. Ay nu gtiug sa ways Muyud-Tagakayuun-Ulibu. ³⁸ Ay gina bagu nyamag, fagayu taw nalo yangay sas Tagbvt-Fag-Bale-Funbalugu, laman nandungugan sas Isus sanya.

¹ Ay katsi makbang wan at tagbiya fag yafun at ngayan te, Tinafay-At-Yud-E-Famabaga. Ay tiba at ngayan te, Famalangfe fag yafun. ² Ay Taw-Naseg at ngay taganyun daul ay at ngay tagfasaful igasarap te, Setain ban siring nu fafate tam ka fag Isus. Anway ka fag ngay magurang kalimu wayay sat ngay taw. ³ Ay ginanya Tagfansalag bagu nanmagurang sas Segi, sik taw siginans Ufat-Fulan-Sirut. Dewa te, kanya wan at sadi At Labi-Duwa. ⁴ Ay Segi nananlag wa sas Taw-Naseg at ngay taganyun daul ay anggan sa tagdingding sakbawan sas Tagbvt-Fag-Bale-Funbalugu. Ay ginto sa anya te, Setain ro nu gfoyung aw ayu te, Kanya Isus. ⁵ Ay ka fag ngay Taw-Naseg at magurang kaumsig dawdaw Segi at longan. Ay igfasulitanan sas Segi. Ay e famasegan te, nanfon ban anya sik ngay salafi. ⁶ Ay Segi kaumsig nu nadungug at longan. Ay gsarap wa long sik masine fag menit. Laman namoyung ban Isus sanya fag ngay Taw-Naseg, kaduge at ngay taw gyud sanya. ⁷ Indasug wan at fasadik menit sas tagbiya fag yafun, Fakonun-At-Yud-E-Famabaga. Ay nu nafate wa at Famalangfe at tupa riangan. ⁸ Ay Isus nasugu Takata-Sik-Batu ay Uan te, Loi wan ay famasadani ro. Laman tam fakonun ro at Famalangfe fag yafun. ⁹ Ay kanya nainto sas Isus te, Dada ro Am fakaumsigun nu kamasadan ro ami. ¹⁰ Ay Isus nalong anya te, Dungugani yap Ku longan. Nu ndasug wam sas fulan daul, sanya gfablang ro am sik ama tagubanan sik baringan safa. Ay aloi yangay anya. Ay sakboi wa sa at fagsakboan fag bale. ¹¹ Ay intoi tuwa sanya sa tagbilug bale te, Tam Takamoyung ginto sa emu te, Dada unu manga ro fag salug nu gfangon Aw at Famalangfe fag yafun, ay anggan Ku ngay tagadal. ¹² Ay kanya moyung ro sa ayu sa tagbiya fag salug sat tungud sat ke nesugan. Ay sanyai nu kamasadan am tam yafun. ¹³ Ay ka fag duwak tagadal nalo wan. Ay at nalag kata wa fiya aro taw Isus At longan sa anya. Ay sanya wa fiya nu gfamasadan at Famalangfe fag yafun. ¹⁴ Nu ndasug wa ginanya fag buknga, Isus malunggung sas fagfangonan gfasfuan At-Suguan fag 12. ¹⁵ Ay Isus nalong anya te, Ku fakaumsigun dawdaw nu kon Aw taguna tuy fag Famalangfe fag yafun gfasfuan ayu gina e gananfauriun ro dawdaw sa Angku. ¹⁶ Anway iglong Aw sa ayu te, Katsi Kua ban gdog kon at Famalangfe fag yafun. Yap ngay ban umgurungan ka fag yafun at masuad gina Funbalugu-Nu-Gmagurangan-Taw. ¹⁷ Ay Isus nabul sik taya e uwat buadan safa. Ay nauseganan sas Funbalugu. Ay nalong sa At ngay tagadal te, Na. Buli. Fafafudi ayu. ¹⁸ Anway iglong Aw sa ayu te, Siginan katsi, Kua ban gdog ginum uwat buadan safa. Yap ngay ban umdasug Funbalugu-Nu-Gmagurang-Taw. ¹⁹ Ay Isus nabul yangay fiya sik fafa. Ay nauseganan sas Funbalugu. Ay nafanramyukan ay nafon sa At ngay tagadal. Ay nalong sa anya te, Tuy Ku bilug wan. Nafon Aw Ku bilug laman e fanamabagun am. Faningi ban Ku fagbulun sa ka fag taya ay sa ka fag fafa. Laman sik fagamatanganun ban sa Angku. ²⁰ Ay katanya yangay, nu ntabu wa nu kon at yafun, Isus nabul sik taya e uwat buadan safa. Ay nalong te, Tuy fag taya at masuad sik famatuyanan sas Funbalugu At bagu fag fatuyanan sa At ngay taw. Anway e musbus ro Ku taguk laman e fanambagun ban am. ²¹ Ay linggati. At namoyung ro Angku at daluap ste wa tagfasfuan Angku sas fagfangonan. ²² Ay Aw, Taw-At-Baguama, Ku faglumoun ro laman umgurungan wa fiya Funbalugu At fasadan. Ay mafanyu, e nanfauri way ban ay, sa at namoyung Angku sas mauri fag taw. ²³ Ay At ngay tagadal gfangintuanan sit dayu te, Sinu mangaro tam takata aro Isus At longan. ²⁴ Ay Isus At ngay tagadal igbadbabuan te, Sinu ban tam at tiba tungud. ²⁵ Ay Isus nalong anya te, At Yud-Naseg-Fag-Taw at ngay fun matvngvd dawdaw nu gsugu. Ay dewa katanya, ka fag ngay fun kaumsig dawdaw at ngay taw nu gseg anya te, Masine tuwa tam fun. ²⁶ Ay roro di katanya sa ayu. Antuwa baliwa te, am at tiba tungud, kanya katsi katai sik baguama. Ay ay fun, kanya katsi katai ay fanuguan. ²⁷ Go inday manga fag duwa at tiba tungud. Go kanya at malunggung sat fagfangonan. Ay go ate kanya tagubanan at fakonun. At malunggung, go kin. Aw wan tagufud ayu kata sik tagubanan. ²⁸ Am wan at tagufud Angku faggugat gina aw e natakan. ²⁹ Ay kata Ku Mama nu nafon sa Angku sik fagmagurangan. Katanya Kyangay nanfon Akyangay ban sa ayu sik fagmagurangan. ³⁰ Laman kon ay ginum yangay ban am sa Ku fagfangonan sa Ku fagmagurangan. Ay laman umlunggung yangay ban am sas faglunggungan daul. Ay sumarap yangay ban am Taw-Tagagbuan at 12k fulan taw at fagbulun te, go masine ay go mauri. ³¹ Simun, Simun, dungugani sa Ku longan. Matvngvd Tagfansalag nu get laman nanfaskud ayu fagayu. Kata sik taw nu gyabyab sik fayay, laman nafalayug at mafis. ³² Ay dewa katanya, nadarangin Akwa emu. Laman am fakafandiugun dua maliam. Ay nu gdog yay o kafoli sa Angku, fatvngvdi am ngay fadugsay at fakafandiugun. ³³ Ay Takata-Sik-Batu nalong sas Isus te, Ku fun. Mafamasadan akwa nangufud Emu dewa sas bale sungsungan ay dewa e fate anta. ³⁴ Ay Isus iglong anya te, Iglong Aw sa emu, Takata-Sik-Batu te, At tabag dia gtarakit katsi ro, yap ngay o mamayud Angku at fatulu ginan. ³⁵ Ay Isus nalong sa At ngay tagadal te, Ebi gina Aw gsugu ayu, ay gina am glo, du am e uba sik fagsuadan salafi. Ay buyug. Ay fanguskus darafa. Go e fagayudanun am. Ay go igdi. Ay kanya nabalus te, Igdi. Di ami e fagayudanun. ³⁶ Ay Isus nalong yangay te, Ay katsi, kanya nu e fagsuadan tuwa salafi, ubai. Ay anggan nu e buyug, ubai. Ay kanya nu dway e fiso, fesalii yap at lanbung at sadi. Ay buli sik fiso. ³⁷ Anway iglong Aw sa ayu te, Umgurungan wa ban fiya At-Rirukan sa Ku fagbulun baliwa madyay nalong wa te, E natap Anya kata sik tagasalanan. Anway fagayu At-Rirukan sa wa ku fagbulun baliwa ay gakagurunganun wan sa katsi fag ngay menit. ³⁸ Ay At ngay tagadal nalong sas Isus te, Damai, Em Fun. Nin. Duwak fiso. Ay Isus nalong te, E kin. Sakwan. ³⁹ Ay Isus igfaning At ugali mandi ay nalo wan sas Muyud-tagakayuun-Ulibu. Ay At ngay tagadal nangalo Anya. ⁴⁰ Ay nu ndasug, Isus nalong sa At ngay tagadal te, Darangini. Laman di am kaumsig gananfaskudun sas asalanan. ⁴¹ Ay Isus nu nalo, kayayu way nu naukas sik batu. Ay garungan sas daga ay igdarangin te, ⁴² Ku mama, nu kaumsig O, falangfei yap Angku ka fag taya at ke mauri ro sa Angku. Ay roro lag gfaning Ku fakaumsigun. Fadasugi way Emu Am fakaumsigun. ⁴³ Ay rodi insure sa Anya Funbalugu At tagbukngan at sadi siginans Banwa. Ay nafatvngvd Isus At amatanganan. ⁴⁴ Ay Isus kabalu dawdaw. Ay matvngvd dawdaw nu gdarangin. Madyay At fangenit kata wa sik tagbiya fag siksik taguk gina nasiksik sas daga. ⁴⁵ Ay Isus gdog yay inlindug, ay nanlag sa At ngay tagadal. Ay manlag di gtiug way. Anway mamoy at bilug siginans fakabaluun. ⁴⁶ Ay Isus nalong anya te, Go nataw way ay fagaimataun. Malunggungi wan. Darangini way. Laman di am kaumsig gananfaskudun sas asalanan. ⁴⁷ Ay gina Isus ge longan, rodi tv indasug wa daw sik ngay taw ayuwayu. Ay ka fag taw at ngayan Segi, sadi At Labi-Duwa, naguna wa tiba. Ay Segi nangakbang sas Isus ay ganangayukun. ⁴⁸ Ay Isus nalong anya te, Segi, go am faganangayukun Angku, Taw-At-Baguama, namoyung o Angku sas mauri. ⁴⁹ Ay at ngay tagufud sas Isus nasaful wan at ngay bagu kadasug at fagbulun ro. Ay kanya get sas Isus te, Em Fun, go masing wami. ⁵⁰ Ay rodi at sadi nabasing at Taguna-Fag-Taganyun-Daul at fanuguan. Ay naayas at talinga at siun. ⁵¹ Ay Isus nalong te, Lagi. Lag katanya. Ay Isus nated at talinga ay nafafiya. ⁵² Ay Taw-Naseg at ngay taganyun daul, ay at ngay Tagbvt-Fag-Bale-Funbalugu at tagdingding sakbawan, ay anggan at ngay magurang indasug laman nanted Isus. Ay Isus nalong anya te, Go gubanan am ay ngay fiso ay ay ngay famalang, anway ay fasadan laman nansungsung am Angku kata sik takamul. ⁵³ Ay madyay kayu menit kayu menit gufud Akway ayu sas Tagbvt-Fag-Bale-Funbalugu. Ay madyay du am nated Angku ginanya. Ay fakatanyaun, katsi wa fag buknga ay fasadan. Ay anggan yangay at marum at fagmadaragangun at fasadan. ⁵⁴ At e nated daw Isus. Ay e nataban Anya sa Tiba-Tungud-Fag-Taganyun-Daul at bale. Ay Takata-Sik-Batu ngayayu yay nu gaguyanan. ⁵⁵ Ay at ngay taw sanya nafaigang sik afuy saswa bilug faglanuan ay malunggung sanya. Ay anggan Takata-Sik-Batu malunggung yangay maful sanya. ⁵⁶ Ay rodi sik fanuguan fag baguina nalag Takata-Sik-Batu sisad damlag afuy. Ay nu nafatuyan wa anya, iglong te, Kanya wa fiya fag taw aro ginan at sadi at tagufud Isus. ⁵⁷ Ay Takata-Sik-Batu kamayud te, Yaya long. Fagina, da kua gsaful te, sinu am longan fag taw. ⁵⁸ Ay rodi sadi yak taw nalag anya ay nalong yay fiya te, O wa fiya at sadi At ufud. Ay rodi Takata-Sik-Batu nalong yangay te, Yaya, sama. Bunwa long aw. ⁵⁹ Ay rodi nu sik kadugayan wan, gdog yay fiya sadi yak taw matvngvd nu nalong te, At matuyan. Kanya wa fiya aro ginan at sadi At ufud. Madyay sik Taw-Balulangan way. ⁶⁰ Ay Takata-Sik-Batu nalong yangay te, Yaya long. Kwa gsaful am longan at masuad. Ay gina ge longan, at tabag natarakit. ⁶¹ Ay rodi tv tam Fun Isus inbiling ay nalinggat yama sas Takata-Sik-Batu. Ay Takata-Sik-Batu namatang yay aro taw tam Fun Isus At longan, gina glong anya te, Tulu ginan nu kamayud o Angku, gina bagu sik tabag tumarakit katsi. ⁶² Ay Takta-Sik-Batu nalo wan. Ay guyway dawdaw anway matvngvd nu kabalu. ⁶³ Ay ka fag ngay tagted Isus, igfalingun Anya ay igfalang Anya. ⁶⁴ Ay nu natabun wa Isus At mata, kanya nainto sa Anya te, Foyungi emi te, go sinu aro at nafalang Emu. ⁶⁵ Ay ngayu yay at longan at mauri sas Isus baliwa. Ay anggan igfalingun Anya. ⁶⁶ Ay ginas balabag sirut, inful yay Taw-Naseg at ngay magurang ay at ngay taganyun daul ay anggan at ngay tagfasaful. Ay e nataban Isus sa at fagmafulan. Ay ka fag ngay magurang nainto sas Isus te, ⁶⁷ Go O wan Fagtayukan. Ay go yaya. Foyungi emi. Ay Isus nalong te, Dewa ngap ro Aw nafoyung ayu, du waro am gafanud. ⁶⁸ Ay dewa ngap ro Aw ginto ayu, du waro am gbalus. ⁶⁹ Ay dewa katanya, katsi ban Aw wan, Taw-At-Baguama, malunggung ban Aw sas Funbalugu-At-Madaragang At siun baliwa fag day tigyangan. ⁷⁰ Ay ka fag ngay magurang ginto yangay sas Isus te, Nu katanya, go O wan Funbalugu-At-Baguama. Ay Isus nabalus yangay anya te, Kin. Kata wa ngaro fiya am longan. ⁷¹ Ay ka fag ngay magurang nalong sa tiba te, Katsi dewa yud e gfoyung yangay antam Isus At asalanan. Anway itam wa fiya fiya, at nadungug Isus At longan.

¹ Fagayu Taw-Naseg at ngay magurang inlindug. Ay nataban Isus sas fun At-Ke-Bangko at akbang. ² Ay ka fag ngay magurang matvngvd nu nafamuagan nu gfoyung Isus At ngay asalanan te, Nalag ami Ka fag taw nu gfe asalanan tam ngay taw. Ay Kanya nasalag emi nu gfon ami em famanyun sas Fun Sesar. Ay manga nalong te, Aw wan Fagtayukan, sik fun fiya. ³ Ay fun At-Ke-Bangko ginto sas Isus te, Go O Taw-Naseg at fun. Ay Isus nabalus anya te, Kin. Kata wa ngaro fiya am longan. ⁴ Ay fun At-Ke-Bangko nalong sat ngay taganyun daul ay sat ngay taw te, Da ku e nasafulan Ka fag taw at asalanan. ⁵ Ay ka fag ngay taw matvngvd nu nalong sas fun At-Ke-Bangko te, Tuy fag taw matvngvd nu nalong sa tam ngay taw. Laman tam ngay taw mamabo dawdaw sa tam fun. Sas fagdaul talun Naseg, siginans talun Balulangan anggan wa indasug iste. ⁶ Ay fun At-Ke-Bangko nu nadungug kanya fag longan, nainto sa tiba te, Go Ka fag taw sik Taw-Balulangan. ⁷ Ay nu nasaful te, Isus siginans fun Sik-Madaragang-At-Baguama-Sirut at fagmagurangan, fun At-Ke-Bangko nasugu, laman e nataban Isus sas fun Sik-Madaragang-At-Baguama-Sirut at akbang. Anway kanya fag fun indasug sas Erusalem ginanya fag ngay menit. ⁸ Ay fun Sik-Madaragang-At-Baguama-Sirut guseganan dawdaw nu nalag Isus. Anway glugo wan nu galagun. Anway ebia taw e nafoyung anya Isus At fagbulun. Ay glugo wan nu galagun Isus At ke masuad fag fagbulun at sadi. ⁹ Fakatanyaun, fun Sik-Madaragang-At-Baguama-Sirut nu nalag wa Isus, gaintoun wa ayuwayu sas Isus. Ay Isus dua batang gbalus. ¹⁰ Ay Taw-Naseg at ngay taganyun daul ay at ngay tagfasaful malindug sit dayu. Ay matvngvd nu nafamuagan nu gfoyung Isus At asalanan. ¹¹ Ay fun Sik-Madaragang-At-Baguama-Sirut ay anggan at ngay tagbarangian igfalingun ay igfanlamangan sas Isus. Ay nafasulun sas Isus sik lanbung maloban. Ay rodi nafafauli yangay Anya sas fun At-Ke-Bangko. ¹² Ay fun At-Ke-Bangko ay fun Sik-Madaragang-At-Baguama-Sirut bagu nafaguesanan siginan ginanya fag ngay menit. Ebi ataw kanya fag duwa garingangan way faggugat. ¹³ Ay rodi fun At-Ke-Bangko nafaful at ngay taganyun daul ay at ngay fun ay anggan at ngay taw. ¹⁴ Ay nalong anya te, Aro nataban wam Ka fag taw sa angku gina am gfoyung te, Kanya tagfe asalanan tam ngay taw. Ay nasarap akwa Ka fag taw At asalanan si ay akbang. Ay dungugani nu kin. Manlag akdi du e mauri kata aro ay longan. ¹⁵ Ay anggan yangay fun Sik-Madaragang-At-Baguama-Sirut dua mandi e nalag at mauri. Madyay kanya nafafoli way Anya stiye sa antam. Dungugani nu kin. Ka fag taw du e fagbulun sak e nanfate anya. ¹⁶ Nu katvngvd way niya, nanfalang akway dawdaw anya. Ay gfalfas akwan. ¹⁸ Ay at ngay taw gasfuan dawdaw guro te, Fatei Isus. Ay falfasi wan Sik-Takamoyung-Baguama sa antam. ¹⁹ Sik-Takamoyung-Baguama at faginsungsungun. Anway kanya nafaful at ngay taw sa anya siginan at fulan. Laman nanfamabo sa at fun. Ay laman anggan igfate tibak taw. ²⁰ Ay fun At-Ke-Bangko gdog yay nalong sa at ngay taw, anway kaumsig way gfalfas Isus. ²¹ Nu katanya way at longan, at ngay taw gfanguruan way te, Tuktuki wa Anya. Tuktuki wa Anya sas salibagan kayu. ²² Ay at fatulu ginan fun At-Ke-Bangko nu nanginto sa at ngay taw te, Taw ro at masuad ku fagnantuktukun. Nataw sangay At asalanan. Da kua e nasafulan Ka fag taw at asalanan. Du e fagbulun sak e nanfate Anya. Nu katvngvd way niya, nanfalang akway fagtvngvd, ay gfalfas akwan. ²³ Ay rodi at ngay taw inkugat yay dawdaw nu guro te, Tuktuki Isus sas salibagan kayu. Ay at ngay taguro at nababo. ²⁴ Ay fun At-Ke-Bangko nasugu at tagbarangian, laman nanfaning wa ka fag ngay taw at fasadan. ²⁵ Ay e nafalfas wa fiya ka fag masungsungan, ebi at nafamabo sa at fun, ay anggan tagfate taw. Kanya at ngay taw at fakaumsigun at fagfalfasun. Ay e nataban Isus laman igfaning yangay at ngay taw at fasadan sa Anya. ²⁶ Ay gina nataban Isus, at ngay tagbarangian nated sik taw siginans fulan Sirene, at ngayan Nadungug, gina guli siginans gamasun. Ay nafafasanan sanya fag taw Isus At ba salibagan kayu. Laman gubanan nanguyan Isus. ²⁷ Ay sik ngay taw naguyan Isus. Ay anggan tibak mangena garungan dawdaw ay guyway. Anway kafanyu Isus. ²⁸ Ay Isus inbiling ay nalong sanya fag ngay mangena te, Taw Erusalem at ngay baguina. Lag guyway dewa am kabalu Angku. Uywayi way sa ayu mandi. Ay anggan sa ay ngay sisian. ²⁹ Dungugani nu kin sa Ku longan. Umdasug ban sik ngay menit, tibak taw lumong ban te, Masine tuwa tagabawas, at yud batang gfalangfe sik ngenge. Ay anggan at yud batang e nafasusu. ³⁰ Ay ginanya yangay at ngay taw lumong sas muyud te, Atongi sa emi. Ay manga sas sik buksul te, Tabuni wa daw emi. ³¹ Ay nu katanya sik taw at fagbulun kaduge melo sik kayu, ay tain at fagbulun nu nyango wan ka fag kayu. ³² Ay e nataban yangay duwa yak taw, at tagasalanan dawdaw, laman nanfate nanfasfuan Isus. ³³ Ay nu ndasug sas talun at ngayan Butul-Alfuyu, e natuktuk wa Isus sas salibagan kayu. Ay anggan ka fag duwak tagasalanan, gsumbalian Isus. ³⁴ Ay Isus nalong yay te, Ku Mama. Faliami at ngay tagfate Angku at ngay asalanan. Anway kanya dua nasaful at fagbulun at masuad. Ay kaduge niya, at ngay tagbarangian naafudan wa Isus At ngay lanbung, gina ntabu nu gfagsafulan te, dada ro sik afud. ³⁵ Ay at ngay taw malindug yay sit dayu, ay igbantay yay. Ay at ngay fun igfalingun Isus te, Ebi Kanya mafabalabag tuwa tiba. Ay katsi fabayani wa nu gbalabag At balyu, Kanya nu Funbalugu tuwa At Fagtayukan, Funbalugu At nafili. ³⁶ Ay anggan ka fag ngay tagbarangian gfalingun Anya. Ay nangakbang ay nafon Anya sik uwat buadan safa mayat. ³⁷ At nalong Anya te, Nu O wan Taw-Naseg at fun, balabagi Am balyu. ³⁸ Ay e rirukan sis Isus tungud te, TUY TAW-NASEG AT FUN. ³⁹ Ay at sadi at natuktuk fag tagasalanan, igfayud Isus te, Go O wan Fagtayukan. Balabagi Am balyu ay anggan emi. ⁴⁰ Ay at sadi igsalag at tusama te, Go du o kalimu Funbalugu. Go yaya. Anway am faurianan kata yangay sa Anya. ⁴¹ Ay matuyan at faurianan sa anta. Anway nabul way ta ay at mauri, anway mauri wayay ta fagbulun. Ay roro Ka fag taw dewa e faurianan, di e fagbulun at mauri. ⁴² Ay rodi kanya nalong sas Isus te, Isus afanyui angku, kaduge O umdasug sa Am fagmagurangan. ⁴³ Ay Isus nalong anya te, Matuyan iglong Aw emu te, Katsi fag menit, gufud ro o Angku sas Funbalugu-At-Fagfanafiyan. ⁴⁴ Ay gina maturuk at menit, inkarum wa daw sas fagdaul sanya fag talun, anggan at menit inbalitang. ⁴⁵ Gina nkarum at menit, at Famalabag-Fag-Sinyag sas Tagbvt-Fag-Bale-Funbalugu ingirat duwak afud. ⁴⁶ Ay gbiya Isus nu nauro te, Ku Mama, nafamato Aw Ku falad sa Emu. Ay nu nalong wa katanya, Isus gengasan wa taguyan. ⁴⁷ Ay at fun tagbarangian nu nalag fagayu at kinsure sanya, naseg sas Funbalugu te, At matuyan, Tuy fag taw du e asalanan. ⁴⁸ Ay at ngay taw ayuwayu maful sanya laman igbantay. Ay nu nalag wa at kinsure sanya, guli wa sat ngay bale. Ay garunganan way anway kabalu. ⁴⁹ Ay fagayu Isus At fagues, ay anggan kanya fag ngay mangena ebi tagalo Isus siginans talun Balulangan, ngayayu tuwa sirut nu malindug ay igbantay at ngay kinsure sanya. ⁵⁰ E sik ama, at ngayan At-Fakafamutan, siginans fulan Maabat, at sadi Taw-Naseg at fulan. Kanya Taw-Naseg at Ngay-Magurang at sadi. Sik taw masine ay matuyan. ⁵¹ At-Fakafamutan di gfadiuganan aro at tibak magurang at fakaumsigun ay at fagbulun. Ay roro kanya igfanya tuwa Funbalugu-Nu-Gmagurang-Taw. ⁵² Ay kanya nanmalimuanan nangakbang sas fun At-Ke-Bangko. Ay get sa anya Isus At bilug. ⁵³ Ay rodi At-Fakafamutan nafadaga Isus At bilug. Ay nasifig sa sik tagbiya fag sinyag malagsi. Ay nasandig sa ebia taw at fasad fagsandigan fag luib, at naali sasad batu. Ay sanya ya batang e nasandig at kinkate. ⁵⁴ Ginanya fag menit, Nu-Kamasadan-Fag-Menit. Ay rodi tv at Fakamatoun-Wa-Fag-Menit. ⁵⁵ Ay ka fag ngay mangena, ebi at tagufud Isus siginans talun Balulangan, igguyan At-Fakafamutan. Ay nalag At fagsandigan fag luib. Ay nangulit nu nansandig At bilug. ⁵⁶ Ay rodi ka fag ngay mangena noli wan. Laman nanfamasadan yay sik ngay bebanglu ay anggan sik lumad. Ay kanya kamato yay sis Fakamatoun-Menit, igfaning Ku-Unga At-Longan.

¹ Ay ginas balabag sirut sis taguna fag menit sas fafitu, gina bagu kasure at menit, ka fag ngay mangena nalo sas fagsandigan. Ay nauba at ba bebanglu egmenit at nafamasadan. ² Ay nu ndasug wan, manlag di maligangan wan at fandingding sakbawan fag batu siginans sakbawan luib. ³ Ay dewa nasakbo, du e nalag Isus At bilug. ⁴ Ay gina gamatangan daw, manlag di sanya duwak ama nu malindug. Ay at lanbung masulo dawdaw. ⁵ Ay ka fag ngay mangena kalimu daw, sak inkarum at mata. Ay ka fag duwak ama nalong anya te, Taw ro ay fagnansarapun tagleleg sa at kinkate at fagsandigan. ⁶ Dua ste Isus. Kanya gdog yay gleleg. Go du am namatang at longan ayu gina sis talun Balulangan. ⁷ Ginanya nafoyung te, E nataban Taw-At-Baguama sasa ngay tagasalanan. Ay natuktuk Anya sas salibagan kayu. Ay sas fatuluk menit Kanya gdog yay gleleg. ⁸ Ay rodi ka fag ngay mangena namatang yay Isus At longan. ⁹ Ay ka fag ngay mangena noli wan siginans fagsandigan. Ay nafoyung fagayu at nalag sa At Labi-Sadi, ay anggan sa at ngay ufud. ¹⁰ At nafoyung at ngayan te, Taglu, tagsiginans fulan At-Ke-Bale-Ngabat. Ay Funbalugu-Kafanyu. Ay Taglu, Santiagu tina. Ay anggan tiba yak mangena. Kayu niya at nafoyung fagayu at nalag sas Isus At-Suguan. ¹¹ Ay At-Suguan gamatangan te, ka fag ngay mangena at longan kata way yud e masuad. Ay kanya dua gafanud. ¹² Ay dewa katanya Takata-Sik-Batu inlindug yay. Ay mafali nu nalo sas fagsandigan. Ay nu ndasug, naarungan ay nalinggat sasad basad. Ay at nalag at tagbvt fag sinyag malaksi fagtvngvd. Ay rodi kanya noli wan. Ay gamatangan dawdaw te, Taw fakatanyaun. ¹³ Ginanya fag menit, duwak tagadal nalo sa sik fulan at ngayan Emaus. At kadugayan nu glo siginans Erusalem, tulu ginan kafalin tam menit. ¹⁴ Ay ka fag duwama igsulitanan sa ebia taw at ngay kinsure. ¹⁵ Ay gina gsulitanan, Isus wa mangaro At kinsure ay tagufud anya. ¹⁶ Ay ka fag duwama dewa nalag Isus, dua natoglag te, Kanya wa mangaro Isus. ¹⁷ Ay Isus nalong anya te, Nataw ay sulitanan gina am glo. Ay kanya intuwas yay nu glo ay mabaluanan. ¹⁸ Ay at sadi, at ngayan Kleupas, nabalus sas Isus te, Katsi ngayu at nanlag sas Erusalem. Ay go O yamay sesadi At yud nasaful at ngay kinsure sanya ebi ginan fag ngay menit. Go kin. ¹⁹ Ay Isus ginto te, Go nataw at kinsure. Ay ka fag duwama nanfoyung Isus te, Sa baliwas Isus, sik Taw-Nasaret. Kanya sadi Funbalugu At taglong. Ay At fagbulun ay anggan At longan madaragang dawdaw sas Funbalugu At akbang. Ay anggan sas fagayu taw at akbang. ²⁰ Ay tam ngay taganyun daul ay tam ngay fun nated Isus ay nataban Anya sa tiba, laman nanfate ro Anya. Ay e natuktuk Anya sas salibagan kayu. ²¹ Ay roro em fagsegun te, Kanya malabag wa fiya emi, ami Taw-Tagagbuan. Ay kata tuy yangay, katsi at fatulu wak menit nu nfalangfe ka fag ngay kinsure. ²² Ay dewa katanya, aro tam ufud fag ngay mangena nafalipsikanan wemi. Anway kanya nananlag wa sas Isus At fagsandigan gina sbalabag sirut. ²³ Ay du e nalag At bilug. Ay noli wan. Ay nafoyung sa emi te, Em nalag kata way sik taginfanan. Funbalugu At ngay tagbukngan nalong wa emi te, Isus gleleg wan katsi. ²⁴ Ay anggan tiba em ufud nananlag yangay sa At fagsandigan. Ay at nalag kata yangay aro fag ngay mangena at longan. Ay kanya du e nalag Isus. ²⁵ Ay Isus nalong sa ka fag duwama te, E, am way at yud mamatanganan fag ngay taw. Ay am way at marananan nu gafanud fagayu sas Funbalugu At ngay taglong at longan. ²⁶ Katanya wa ngaro fiya, Fagtayukan e faurianan wa ngaro fiya katanya. Ay indasug sa At fagmasineun. Go kin. ²⁷ Ay rodi Isus gfasigad nu nafoyung anya Funbalugu At-Rirukan sa Anya mandi. Siginans Ku-Unga At-Rirukan. Ay anggan sas fagayu Funbalugu At ngay taglong At-Rirukan. ²⁸ Ay kanya gadasugun wa sat fakadasugan ro fag fulan. Ay Isus galangfeun yama sanya fag fulan. ²⁹ Ay ka fag duwama gfatawad yay te, Toi yap glo. Iste yay tam. Anway gakayabiun wan. Gafalyun wan at menit. Ay Isus nasakbo, laman gufud anya. ³⁰ Ay rodi gina Isus malunggung gfasfuan ka fag duwama sas fagfangonan, Isus nabul sik fafa. Ay naseg sas Funbalugu. Ay naramyuk ay nafon sa at duwama. ³¹ Ay rodi tv ka fag duwama nu nalag, natoglag wa te, Kanya Isus. Ay rodi tv Isus intinas wan, gina ka fag duama glinggat Anya. ³² Ay ka fag duwama igsulitanan te, Ta amatanganan kaumsig wan, kaduge Kanya igfasulitanan anta sasa ngaba dalan. Ay manga kaduge igfoyung sa anta Funbalugu At-Rirukan at masuad. Go kin. ³³ Ay rodi ka fag duwama inlindug ay noli wa sas Erusalem. Ay indasug sa At Labi-Sadi ay anggan sa at ngay ufud at maful. ³⁴ Ay at maful nalong sat duwama te, At matuyan tam Fun gdog yay gleleg. Ay manga insure wa sas Simun. ³⁵ Ay ka fag duwama nafoyung at kinsure sa anya gina sasa ngaba dalan. Ay manga kanya natoglag wan Isus kaduge Kanya naramyuk sik fafa. ³⁶ Ay gina ka fag duwama ge longan, rodi tv Isus insure wa daw ay inlindug wa daw sas buknga taw, ay nalong te, Manabayan tuwam. ³⁷ Ay at ngay taw sanya inlipsik ay kalimu. Anway nu gfasad, sik labang way. ³⁸ Ay Isus nalong anya te, Taw ro ay fakalimuun. Ay taw ro ay fagfaduwaun ay amatanganan. ³⁹ Linggati wa nu kin, Ku daluap ay Ku darafa. Aw yay fiya. Tedi nu kin Angku. Laman sumaful wam te, bun Akdi labang. Anway sik labang du e faknul ay du e butul kata Angku. ⁴⁰ Ay nu nalong wa katanya, Isus nafalag wa At daluap ay At darafa sa At tiba. ⁴¹ Ay Isus At ngay ufud gadayuwan yay. Ay manga guseganan wan. Ay gadulawan yay. Ay ginanya Isus ginto anya te, Go e fafa am. ⁴² Ay tiba nafon Anya sik ramyuk uyang maseudan. ⁴³ Ay Isus nabul ay kon si tiba akbang. ⁴⁴ Ay Isus nalong anya te, Gina Aw gufud ayu ebi, kata tuy Ku longan sa ayu te, Umgurungan wa fiya Fagayu Ku-Unga At-Longan, ay fagayu Funbalugu At ngay taglong At-Rirukan, ay fagayu Danyu At-Longan sa Angku baliwa. ⁴⁵ Ay Isus nafoyung anya laman kanya nasaful At-Rirukan at masuad. ⁴⁶ Ay At foyungan kata tuy te, At-Rirukan nalong ebi te, Aw, Fagtayukan, e faurianan ban sa Angku. Ay sis fatuluk menit gdog Akyay ban gleleg. ⁴⁷ Ay e nanfoyung yangay ban Ku fagmadaragangun, sas fagayu talun at ngay taw, sas Erusalem taguna. At foyungan te, Sik taw nu naubun at ngay mauri, Funbalugu nafaliam at asalanan. ⁴⁸ Ay am wan at nalag fagayu at ngay kinsure. ⁴⁹ Ay katsi dungugani sa Ku longan. Nansugu ban Aw Ku mama At fatuyanan ebi sa ayu. Fanyai wa sas fulan, yap ngay e nafon emu At fagmadaragangun siginans Banwa. ⁵⁰ Ay Isus nataban at ngay tagadal sas day fulan At-Yud-E-Kwa. Ay sanya nafalugde At take ay nafadait sa At ngay tagadal fagayu. ⁵¹ Ay gina Isus gfadait sa At ngay tagadal, rodi tv e naurug Anya sas Banwa. ⁵² Ay At ngay tagadal noli wa sas Erusalem ay guseganan. ⁵³ Ay kanya sa tuwas Tagbvt-Fag-Bale-Funbalugu faggugat. Ay sanya nu gseg sas Funbalugu.