Jude

Jude

¹ Siginan angku, Segi, Santiagu at arian, ay Isus Fagtayukan At fanuguan at sadi. Nanriruk aw sa ayu, sas Funbalugu At nafili fag ngay taw. Am wan Funbalugu tam Tama At fakesugun fag ngay taw. Ay anggan am wan Isus Fagtayukan At fagdingdingun fag ngay taw. ² Funbalugu At mamanyun nangus sa ayu, ay takafanyu ayu, ay anggan At nanfanabayan ayu kayu menit kayu menit. ³ Ku fakesugun ku ngay taw, kaduge aw garirukun sa ayu sa tam fagbalabagun baliwa, kata tuy ku amatanganan fiya fiya. At masine siring taguna at matvngvd ku rirukan sa ayu antuwa te, matagakani tuwa. Laman di ban e gfasagbatan sa tam fakafandiugun. Anway ebi Funbalugu nafoyung wan ka fag fakafandiugun at yud nafasaman sa At ngay taglong. Ay bandi katanya yangay at foyungan sas Funbalugu At ngay taw. ⁴ Anway tibak taw at yud gfaning Funbalugu, dewa maful si ayu kata ay fadugsay, at amatanganan masuksukan yay. Madyay nu gfoyung nafasaman way siginan Funbalugu At longan sas Funbalugu At fakafanyuun baliwa. Madyay dua kalimu Funbalugu ay manga gfaning yayay sat bilug at fagalabianun at mauri. Ay anggan sigon gafayudun way te, tam Fun Isus Fagtayukan bunwa At tiba tungud fag Fun. Ay ebi At-Rirukan naguna wa nafoyung te, sa ban takatanya fag ngay taw e faurianan wa fiya sa anya. ⁵ Katsi gdog kyangay fiya nanfaamatang ayu, dewa ebi e nafasaful ayu tuy fag foyungan. Ebi ebi dewa tam Fun At nafalfas At ngay taw siginans talun Eiptu, bandi Kanya yay At nafate fagayu at yud kafandiug at nafalfas sanya ginan fag talun. ⁶ Ay amatangani te, tam Funblugu At ngay tagbukngan ebi at yud gfaning sa At suguan, ay at naubun at fagbanwanan. Ay bandi tam Funbalugu nasalod wa anya ay nasungsung wa anya sat ngabasad ay sat marum fag lusung. Kaduge ban yud umdasug sat fagfasurean asalanan fag ngay menit. ⁷ Ay katanya yangay sas fulan Sik-Afugan ay sas fulan Inlubgub, ay anggan sat tagsafungan fag ngay fulan. Anway sanya fag ngay taw igfaning way sat bilug at fagalabianun at mauri. Ay anggan at fagbulun way at mapla fag fagbulun sa at bilug. Ay bandi fagayu tagsanya inlabe wa sa sik afuy daul at yud e fakatabuan. Ay ka fag ngay taw ay anggan at faurianan sik famatagak sas fagayu taw. ⁸ Katanya yangay ka fag ngay takamoyung at masuksukan at amatanganan dewa maful si ayu. Kanya igfaning way at ngay taginfanan, ay igfaning way sat bilug at fagalabianun at mauri. Ay kanya kamabo sas Funbalugu, ay anggan gfalingun yangay Funbalugu At madaragang fag ngay tagbukngan sam tungud. ⁹ Roro ngap, di katanya Funbalugu At tagbukngan daul, at ngayan te, Du-E-Gfasud-Funbalugu. Kanya dewa gfaringangan sas Takamuag-Tiba-At-Fagbulun sa Ku-Unga at bilug baliwa, kanya di batang gfalingun Takamuag-Tiba-At-Fagbulun. Ay di batang gfoyung te, kanya e asalanan. At tagbukngan daul at longan anway te, tam Fun tuwa tagbaya emu. ¹⁰ E gsaman way ka fag ngay takamoyung at yud matuyan at ugali dewa maful si ayu. Kanya nu dway nasaful sik foyungan at masuad. Kanya gafayudun way daw. Ay kanya kata yangay sik ngay mela at yud e amatanganan sa tiba, ay igfaning yangay mandi at fakaumsigun. Ay katanya wayay e faurianan way ban sa anya ay dua ban umbalabag. ¹¹ E nanfauri wa ban fiya anya. Anway kanya igfaning wayay Takawat-Sanbung at ugali. Ay anggan igfaning wayay dawdaw Tam-Taw-Inkayu-Wan at nasalan, anway gananfaayuun wayay at salafi. Ay kanya at fakatabuan kata yangay ban Alfuyu-Lanu, anway kanya igfaning wayay Alfuyu-Lanu nu kamabo. ¹² Ay manga at ugali at mapla way dawdaw gina maful si ayu sas tagbvt fag fakonun. Madyay gfapsug way dawdaw anya fagtvngvd, ay at fagsarapun si way anya fagtvngvd. Ay kanya kata at yud marum fag linyabu, ay du e moyan dewa tagmara nafalayug at linyabu. Ay kanya kata yangay sik kayu at yud e buadan dewa ndasug sas famuadanan fag ngay menit. Ka fag kayu duwa ginan ginbalian nu kayango. At fasadi, nu du e buadan. Ay at faduwa, nu e nafuan ay nyango wan. ¹³ Ay kanya kata yangay sik lino daul nu glumbak gina e bagyu. Ay at mapla fag ngay ugali kata sik lafas. Ay kanya kata yangay sik salung bulao nu kabusuy. Ay Funbalugu nafamasadan sik ngabasad ay sik marum fag lusung sa anya. At fagfatsanyan ban ka fag ngay takamoyung at yud matuyan. ¹⁴ Sik taw at ngayan, Fagagbilugun, at fafituan gsugfun siginans Karaska. Ebi kanya at naguna nafoyung te, Amatangani. Tam Fun umdasug ban gfasfuan ban sik ngay masine fag tagbukngan ayuwayu. ¹⁵ Ay At fakadasugan sa way At fagnantap fagayu taw at asalanan. Ay anggan nanfauri fagayu taw at yud gfaning sas Funbalugu. Anway ka fag ngay tagasalanan ngayu at mauri fag fagbulun gina dawdaw kamabo Funbalugu. Ay anggan ngayu at mauri fag longan sas Funbalugu baliwa. ¹⁶ Ay ka fag ngay taw faggugat gfangalimata way at tiba. Ay anggan gfangalimata yangay nus nge wain at kindasug. Ay kanya faggugat gfaning way at bilug at fagalabianun. Ay anggan igfalabi way at longan sa tusama. Ay anggan gfaumsiganan at tiba dewa gfanlamangan at longan, laman gamatangan te, kanya tuwa at ke fanambagun. ¹⁷ Ay am, ku fakesugun ku ngay taw, amatangani tuwa tam Fun Isus Fagtayukan At-Ngay-Suguan at naguna nafoyung. ¹⁸ At longan sa ayu te, Sa bans fakatabuan fag ngay menit, umdasug ban sik ngay tagfalingun. Ay kanya igfaning way at fakaumsigun at yud gfadiuganan sas Funbalugu. ¹⁹ Anway takatanya fag ngay taw at nanfasadsamanan way at ngay takafandiug sas bale fakafulan. Anway igfaning wayay iste swa daga at fakaumsigun. Ay At-Masine-Fag-Falad duat si anya. ²⁰ Ay am, ku fakesugun ku ngay taw, fadfatvngvdani kata nu sadik bale. Ay ay fakafandiugun siginans Funbalugu kata sik ngay turuk. Ay gina am gdarangin, faningi At-Masine-Fag-Falad At nafaamatanganan ayu. ²¹ Ay faggugat faningi tuwa sas Funbalugu laman At fakafanyuun faggugat si tuwa ayu. Ay fanyai yap tam Fun Isus Fagtayukan nu gfon ban ayu leleg at yud katabu, anway Kanya kafanyu tuwa ayu. ²² Ay tarabangi tuwa tibak takafandiug at yud matvngvd at amatanganan. ²³ Ay balabagi ay iba kata nu gbul tagakalabeun. Ay tarabangi ay iba gina am gtagak. Ay alimatai ka fag taw at mafurat fag lanbung, laman di gfafurat ayu. Anway at fagmafuratun igfaning yay at bilug at fagalabianun. ²⁴ Gseg watam sa Tagsesadi fag Funbalugu, tam Tagbalabag. Kanya way At mafadingding antam laman di tam gfaning sas asalanan. Ay Kanya yangay At mafafakbang antam sa At tiba tungud at masine At akbang te, laman malayun tuwa tam sat masine, ay guseganan tuwa tam dawdaw sa Anya. Nu katanya tuwa anway tam Isus Fagtayukan tam Fun At fagmadaragangun. ²⁵ Kin. Gseg watam sa tam Funbalugu. Anway Kanya At tiba tungud At ke fagmasineun. Ay Kanya At tiba tungud At ke fagmadaragangun. Ay Kanya tagmagurang fagayu nus nge wain. Ay Kanya du e nayudanan nus nge wayin. Ay katanya wan siginan ngay yud e daga, ay anggan katsi, ay anggan faggugat ban. Kin, katanyai tuwa.