James

James

¹ Siginan angku, Santiagu, Funbalugu ay anggan tam Fun Isus Fagtayukan At fanuguan at sadi. Nanriruk aw sa ayu te, go tain am. Am at ngay takafandiug siginan sik safulu ay labi duwak afud Taw-Tagagbuan, at naayiyan ay nasaruwayan sasa ngay talun. ² Ku ngay fadugsay, nus nga e famaskud ayu nus nge wain, tapi tuwa te, kanya sik fagusegananun. ³ Anway nasaful wam te, nus nga e famaskud ay fakafandiugun, kanya ngap karo tagfatvngvd ay amatanganan nu nasungatan tuwam. ⁴ Ay faggugat fatunglusi tuwa ay fagmatvngvdun nu gsungatan am. Laman sik mabul tungud ban am fag taw sas Funbalugu baliwa. Ay laman anggan di am e fagayudanun sa baliwa ay ugali at masine. ⁵ Ay nus nga sinu am nu dyay ngayu ay nasaful, eti yap siginans Funbalugu. Ay Kanya ngayu ban at nafon ayu. Anway Funbalugu ngayu tuwa nu gfon sas fagayu taget Anya, ay Kanya di kamaya. ⁶ Ay gina am get, afanudi tuwa. Ay dangai gfainfolian ay amatanganan. Anway sik taw nu gfainfolian way at amatanganan, kanya kata way sik lino at lumbak nu ginfolian anway fainfaluan at tagmara. ⁷ Nu katanya way, ka fag taw lag gfanya te, tam Fun nafon ban anya. ⁸ Anway ka fag taw at amatanganan gfafagduwa way faggugat ay du e fagmatuyanan. ⁹ Sik fadugsay dewa yud e kwa, useganani tuwa anway Funbalugu wan tagfatvngvd anya. ¹⁰ Ay tibak fadugsay at mabalan, useganani tuwa, anway Funbalugu wan tagfababa ban anya. Anway kanya fag taw kata yangay ban sik sariksik nu mtong. ¹¹ Anway gina at menit umsure, ay masugba dawdaw. Ay at makmak inkitut wan. Ay at sariksik umtong wa sas daga, ay at kamasinean naliam wan. Katanya yangay ban sik mabalan fag taw. Dewa aro taw madaragang nu gfagbulun, rodi tv inkate wan. ¹² Sik taw guseganan tuwa nu gsungatan tuwa gina e gfauri anya. Anway kanya fag taw nu gfatunglus tuwa, tam Fun mon ban anya sik fanambagun fag sangbo at ngayan te, E-Leleg-Faggugat. Katanya tam Funbalugu At fatuyanan sas fagayu takesug Anya. ¹³ Ay dewa e famaskud sa sik taw te, laman kanya maning asalanan, ka fag taw lag gamatangan te, Funbalugu tagfaskud angku laman maning aw asalanan. Yaya. Anway du e mafafaskud Funbalugu te, laman maning asalanan. Ay Funbalugu dua gfaskud sik taw te, laman maning asalanan. ¹⁴ Fage famaskudun sa sik taw te, laman kanya maning asalanan, anway te kanya wa mandi takaumsig gfaning sat bilug at fagalabianun. ¹⁵ Ay ka fag taw nu gfaning way ka fag fakaumsigun, roro e asalanan wan. Ay asalanan gfasure fakateun. ¹⁶ Ku fakesugun ku ngay fadugsay, dangai galukan. ¹⁷ Anway fagayu at nafon at masine, ay anggan at taglabi wa nu masine, nafon sa antam siginans Banwa, siginan tam Tama At ke fagmayamagun. Kanya di gfasaman At ugali ay di e marum si Anya faggugat. ¹⁸ Funbalugu tuwa At ke fasadan At fagnafonun antam leleg at yud katabu, siginan At longan at matuyan. Laman fagayu tam katvngvd yangay tam tam Funbalugu At naawat at tiba tungud at masine. ¹⁹ Ku fakesugun ku ngay fadugsay, asafuli tuwa te, fagayu am mafalii tuwa nu nandungugan am. Ay maadani tuwa nu glong am. Ay marani, dangai mafali nu kadotama am. ²⁰ Anway sik taw dewa ngap indotama, dua mafabul Funbalugu At fagmasineun. ²¹ Ay nu katanya, lag gfaning fagayu at yud masine fag ngay ugali ay anggan fagayu fagayu asalanan. Ay malukmei ay faningi Funbalugu At longan, At tagfaamatanganan ayu. Anway ka fag longan mafabalabag wa fiya ayu. ²² Dangai gfanluk ayu. Ay dangai sigon gdungugan fagtvngvd. Faningi tuwa At longan. ²³ Kata tuy way sik taw nu nadungugan way fagtvngvd At longan, ay nu dway gfaning. Kanya kata way sik taw nu nalinggat anya sasad arirawvn. ²⁴ Ay kanya nu nalinggat wa anya, kanya nalo wan. Ay rodi kanya dua namatang anya te, go tain aw. ²⁵ Saman wan sik taw tagamatangan fiya fiya, ay tagfaning sa At matuyan fag longan at mafafalfas taw. Anway kanya fag taw bundi sik tagfangaliam at nadungug. Kanya sik tagfaning tuwa at nadungug. Ay nu katanya tuwa, kanya guseganan tuwa ban sa at ngay fagbulun nus nge wain. ²⁶ Sik taw dewa gayup te, igfaning akwa Funbalugu. Ay roro nu dway mabaris nu galongun, kanya fag taw gfanluk way anya. Ay dewa gamatangan te, gfaning akwan, roro di e masuad at fakafandiugun. ²⁷ Kata tuy sik taw at tagfaning nu malayun tuwa sat masine ay di e fasagbatan. Ay igtarabang tuwa sat ngay burangday ay anggan sat ngay ulila gina e natakan. Ay anggan nu gdi gfaning sas fagdaul daga at mauri. Ay nu katanya tuwa, tam Funbalugu tam Tama kaumsig dawdaw.

¹ Ku ngay fadugsay am, lag e filian taw. Anway kafandiug wam sa tam Fun Isus Fagtayukan, sa tam Fun At tiba tungud At ke fagmasineun nus nge wain. ² Tenday, sik taw at ke ngay singsing sanbung fanumyu ay at tiba tungud at masine at lanbung nasakbo sa ay bale fakafulan. Ay anggan sik taw yud e kwa ay at mafurat at lanbung nasakbo yangay. ³ Ay ay fagfasulitananun sa way at ke lanbung at masine te, malunggungi iste sa at masine fag faglunggungan. Ay nu glong am sa at yud e kwa anway te, malindugi way isna. Ay ate, malunggungi way daw iste ku day darafa. ⁴ Nu katanya way ay fagbulun, gfasadsamanan way am at ngay taw sa ay bale fakafulan. Ay manga e filian way am taw, siginan ay amatanganan at mauri. ⁵ Am amatangani, ku ngay fakesugun ku ngay fadugsay. Go tam Funbalugu At fagnafiliun manga at yud e kwa fag ngay taw ste swa daga, laman umkayu at ngay fagmasineun sa at fakafandiugun baliwa. Ay anggan At fadasug ban anya sas Funbalugu-At-Fagmagurangan-Taw. Katanya yangay Funbalugu At fatuyanan sas fagayu takesug Anya. ⁶ Ay ay fagbulun gfaplaan way am sat yud e kwa fag taw. Amatangani sat ngay mabalan fag taw at fagbulun. Anway kanya nanfanluk ayu ay igsugu way dawdaw ayu. Ay anggan iguyud way ayu sas tagbuknga at daga salubangan. ⁷ Ay at mabalan fag ngay taw igfalingun yangay sas Isus Fagtayukan baliwa. Ay am kesug tuwam Isus Fagtayukan anway am wan At taw. ⁸ Masine tuwa ay ugali nu gfaning tuwam sa tam Fun At longan siginan At-Rirukan te, Esugi tuwa ay iba katvngvd nu kesug o emu. ⁹ Ay am, nu e filian way am taw, e asalanan yay am. Anway At-Longan wan at nafoyung ayu te, iglangfe wam at matuyan. ¹⁰ Anway nus nga sinu fag taw dewa tagfaning fagayu At-Longan, nu e nafamabo yay nus di sirut sik afud, e natap yay ka fag taw te, kanya kata yay nu kamabo sa fagayu At-Longan. ¹¹ Anway sadi way at Taglong te, lag kamayun ay lag fate. Ay dewa gyud o kamayun, nu gfate yay o, sik takamabo yay o sa At-Longan. ¹² Nu katanya, maamatangani ay longan ay ay fagbulun kata nu e sumarap si anya at fagbulun te, go nafaning ka fag Longan at mafafalfas antam. ¹³ Anway gina Funbalugu igsarap taw at asalanan, dua ban umfanyu sat yud kafanyu at tiba. Dewa katanya, Funbalugu At fakafanyuun tagbabo at faurianan. ¹⁴ Ku ngay fadugsay, go manga sik taw at longan e masuad dewa fagtvngvd nalong te, kafandiug akwan. Ay laman di e masine fag fagbulun sa tiba. Go yaya. Go manga at fakafandiugun mafabalabag anya dewa katvngvd anya. Go yaya. ¹⁵ Tenday, at sadi ay fadugsay, dewa sik ama ay dewa sik ina, du e lanbung ay du e yafun ginanya fag ngay menit. ¹⁶ Ay tenday, at sadi sa ayu nalong o anya te, Loi wan, manabayani tuwa. Fangenbungi ay apsugi tuwa. Ay dewa o nalong katanya, du o e nafon at fagayudanun sa anya. Go am longan e masuad. Go yaya. ¹⁷ Nu katvngvd way anya sik taw at fakafandiugun, du e masuad. Kata yay nu matian. ¹⁸ Ay sik taw nalong te, O wan at ke fakafandiugun. Ay aw wan at ke fagbulun at masine sa ku iba. Nu katanya, falagi angku am fakafandiugun dewa gyud o e fagbulun at masine sa am iba. Ay aw nanfalag akyangay emu ku fakafandiugun siginan ku fagbulun at masine sa ku iba. ¹⁹ Go nasaful tuwo te, tam Funbalugu sadi wadi. Masine nu nasaful tuwo. Anggan at ngay mafurat fag falad nasaful yangay katanya. Ay anggan kudkulugan kalimu Funbalugu. ²⁰ Katsi nanfasaful aw emu, o at yud mamatanganan fag taw, te, sik taw dewa kata nu kafandiug ay nu dyay e fagbulun at masine, du e masuad. ²¹ Ay amatangani tam aguyangan Abrayam. Kanya kata at yud e asalanan fag taw, anway at fagbulun igfaning Funbalugu. Ay gananfonun at baguama, Kanya-at-Naasean, sas fagyagoan anyun. Go kin. ²² Nasaful wo te, Abrayam at fakafandiugun e masuad tuwa. Anway e fagbulun tuwa sigon. Abrayam at fagbulun gfadiuganan yangay sat fakafandiugun. ²³ Katanya tuway, ingurungan At-Rirukan te, Abrayam kafandiug tuwa sas Funbalugu. Ay Funbalugu natap anya kata sik taw at yud e asalanan. Ay e nafangayan Abrayam te, Funbalugu-At-Fagues. ²⁴ Nasaful wam te, Funbalugu At fagtapun sik taw kata sik taw at yud e asalanan, bundi te, anway kafandiug fagtvngvd. Anggan tuwa sigon sat fagbulun at masine. ²⁵ Katanya yangay ka fag fakamayunan fag mangena ebi ebi at ngayan te, Tagbiya. Funbalugu natap anya kata sik taw at yud e asalanan, anway masine tiba at fagbulun. Anway kanya nafasakbo tuwa ka fag ngay masuksuanan fag taw siginans Taw-Tagagbuan, gina kadasug sanya fag talun. Ay anggan nafoyung yangay anya sa tibak dalan laman nalagyu. ²⁶ Kata aro ku longan. Sik bilug nu dway e falad, kata wa inkate. Ay katanya yangay anggan fakafandiugun. Nu dway e fagbulun at masine, kata wa inkate.

¹ Ku ngay fadugsay, lag am ngayu takaumsig nangasik takamoyung. Anway nasaful wam te, itam at ngay takamoyung, Funbalugu nu gtap tam asalanan glabi yay nu yud sik takamoyung. ² Anway fagayu tam, ngayu tam nasalan. Ay sik taw nu gdi e nasalan gina ge longan, kanya sik mabul tungud wa fiya fag taw. Ay kanya mabaris tuwa fagdaul at bilug. ³ Kata nu e fansiuk tuwa tam sa tam kabayu at bibig, igfaning tuwa tam fasadan nus nga nday tam fakaumsigun. ⁴ Ay amatangani yangay sa sik balutu daul. Dewa gbiya dawdaw at balutu, ay dewa magong at tagmara, mafarabing tuwa at balutu nus nga nday at fun at fasadan. Dewa sik kayu sirut malafi sis balutu iyug at narabing. ⁵ Katanya yangay tam famaleleg. Dewa sik afud sirut sa tam bilug, kanya gfalabi dawdaw at fagbulun. Amatangani. Siginan sik afuy sirut, biya fag talun at fagmafafalabeun. ⁶ Ay tam famaleleg kata yangay sik afuy sirut. Ay kata sik tagbvt fag mauri sa tam bilug. Anway igfafurat tam fagdaul tam bilug. Ay anggan kata sik afuy nu glabe tam fagdaul daga. Ay ka fag afuy siginans Lino-Afuy. ⁷ Sik taw mafafagup tuwa nus nge wain tibak mela. Tenday, manuk mela, ay nus nge wain tagalafang, ay anggan uyang sas lino mafafagup tuwa. ⁸ Dewa katanya, sik taw dua mafabaris sat famaleleg. At famaleleg madaragang sat mauri ay mafafate, anway mapnu at fangkate. ⁹ Tam famaleleg dewa sadi, ginbalian tuwa. Anway tam famaleleg tam fanseg tuwa sa tam Fun tam Tama, ay anggan tam fangabalo sa tibak taw. Kanya fag taw dewa Funbalugu naawat kata Anya. ¹⁰ Dewa sadi tam bibig, mafafasure tuwa at masine fag longan ay manga at mauri fag longan. Ku ngay fadugsay, dua masine nu katanya. ¹¹ Go sik mata bulbug mafafasure sik safa masine gasfuan at mayat fag safa. Go yaya. ¹² Ku ngay fadugsay, go sik tanum gisgis taya mafafabuadan sik buadan ulibu. Go yaya. Ay go sik uwat mafafabuadan sik buadan tanum gisgis taya. Go Yaya. Katanya yangay sik mata bulbug. Nu nafasure wa at mayat fag safa, dua mafafasure at masine fag safa. ¹³ Sinu sa ayu at mamatanganan ay at ke fagsafulun fag taw. Ka fag taw falagani tiba at fagmamatangananun, anway masine at ugali ay anggan at fagbulun, anway at fagsafulun tuwa. ¹⁴ Ay nu galabian yay am, ay nu kamilug yay am, lag gfalabi te, aw sik mamatanganan akwa fag taw. Anway nu katanya yay am, di am gfaning sat matuyan fag longan. ¹⁵ Anway kanya at yud way matuyan fag fagmamatangananun at yud way siginans Banwa. Roro siginan ways fagdaul daga at ugali. Ay siginan way tam dan fag ugali. Ay anggan siginan way at ngay mafurat fag falad. ¹⁶ Anway nus nga nday at ngay taw e fagalabianun wan ay e kamilug wan, ay sanya ngayu wan takamabo dawdaw, ay anggan snga setaw wa fag ngay mauri. ¹⁷ Kata tuy sik taw at ugali nu e fagmamatangananun tuwa siginans Banwa. Taguna at fagbulun, malayun tuwa at ugali sat masine. Ay manabayan. Ay malukme. Ay di gfaluguan. Ay kafanyu tuwa dawdaw at tiba. Ay ngayu tuwa at fagbulun at masine. Ay di gfainfolian. Ay faggugat mafanud tuwa fagayu at fagbulun. ¹⁸ Ay at ngay tagfalukmianan tiba kata sik tagtanum. Ay ka fag tagtanum at fungsuan nu manabayan tuwa sat amatanganan, kanya mul ban sik ngay masine.

¹ Nataw at fagsigadan ay fagfabarangianun ay iba. Ay taw ro ay fagfaringanganun ay iba. Go siginan ay bilug at fagalabianun tagsalag ay amatanganan at masine. Go kin. ² Ay dewa am kaumsig dawdaw, du am mafabul. Ay anway fakatanyaun, igfate yay am. Ay dewa am galabian dawdaw, du am mafabul. Ay anway fakatanyaun, igfaringangan yay am, ay manga gfabarangian yay am. Ay roro at masuad ay fagyudun mafabul, anway te, du am get siginans Funbalugu. ³ Ay dewa am e fagetun siginans Funbalugu, du am mafabul, anway ay fagetun mauri way ay gfasa way am sa ay fagalabianun. ⁴ Am sik ngay takamayun way am. Go du am nasaful te, sik taw nu gaguyudan way ste swa daga at ngay taw at ugali, kanya kalimata way sas Funbalugu. Nu katanya way, nus nga sinu nu kaumsig way gaguyudan ste swa daga, kanya sik tagfabarangian way ban sas Funbalugu. ⁵ Nasaful wam te, matuyan At-Rirukan nu nafoyung te, Funbalugu kesug tuwa dawdaw antam. Ay Kanya At fagnafonun antam tam amatanganan, laman tam amatanganan fagdaul sa tuwas Funbalugu fagtvngvd. ⁶ Ay katvngvd anya Funbalugu At fakafanyuun sa antam nu madaragang, nalabi yay sa tam fagalabianun. Ay nu katanya, At-Rirukan nafoyung te, Funbalugu igsalag way tagfalabi at fagbulun. Ay Kanya kafanyu tuwa sa tagfababaun fag taw. ⁷ Nu katanya, faningi Funbalugu. Ay asalagi Takamuag-Tiba-At-Fagbulun, laman kanya lumagyu ayu. ⁸ Akbangi ngay sa tam Funbalugu. Anggan tam Funbalugu kakbang yangay ro ayu. Am fag ngay tagasalanan, fegusi ay daluap. Ay am fag ngay taw tagfaduwa ay amatanganan, falayuni sat masine ay amatanganan. ⁹ Abalui ay aluonuni ay uywayi. Sa ay naasean aro, katsi tubusi sik fakabaluun. Ay sa ay nauseganan aro, katsi tubusi sik mabaluanan. ¹⁰ Ay ay amatanganan malukmei gina am kaakbang sas Funbalugu. Ay Kanya wa ban tagfatiba tungud ayu. ¹¹ Ku ngay fadugsay, dangai glong mauri sa ay iba baliwa. Sik taw nu nalong way at mauri sat fadugsay baliwa, ay nu natap way te, kanya e asalanan wa fiya. Ka fag taglong sigon glong way mauri sas Funbalugu At-Longan baliwa. Ay anggan natap yangay sa At-Longan baliwa te, dua masine. Nu katanya, at taglong bunwa sik tagfaning At-Longan. Roro kanya sik tagtap way At-Longan te, dua masine. ¹² Sadi wadi at Tagfon-At-Longan ay at Tagtap-Taw-At-Asalanan. Kanya yangay At mafabalabag ay At mafafamin. Ay tain o, nu gfasad o emu. Go nu gfasad o, o wan tagtap am iba at asalanan. ¹³ Amatangani. Nalong wam daw te, katsi, ay ate balabag, lumo wami sanya fag fulan. Ay nanbanwan ami sanya sik banwa. Ay nansali ay nanfe sali ami laman namul ami sik ngay fanambagun. ¹⁴ Ay dewa ay longan katanya, du am nasaful at kumdasug balabag te, tain ro ay leleg. Anway ay leleg at kadugayan kaduge way sik sungo daga ay rodi infayas wan. ¹⁵ Roro at masine, longi tuwa te, Funbalugu nu kaumsig ay nu gleleg yay ami, kata tuy em fasadan ban em fagbulun. ¹⁶ Ay dia katanya ay ugali. Teway gananad yay am gfalabi ay longan. Fagayu takatanya fag longan mauri way. ¹⁷ Ay nus nga sinu fag taw dewa nasaful te, katanya at masine fag fagbulun, ay nu dway gfaning, kanya e asalanan yay.

¹ Amatangani, kayu am at mabalan fag ngay taw. Uywayi ay abalui. Anway at mauri umdasug ban sa ayu te, ² Ay ngay fagmabalanun umruas wa ban. Ay ay ngay lanbung mauludun wa ban. ³ Ay anggan ay ngay sanbung fanumyu ay ay ngay sanbung salafi manenayun wa ban. Ay at faganenayun tagfoyung ban sa ayu te, du e masuad ay fagbulun. Ay ka fag nenay kata sik afuy at nanfamin ban ayu. Anway ay fasadan ay fagsandigun laman e nanuranan yay ban am sas fakatabuan fag ngay menit. ⁴ Amatangani yangay kayu am at mabalan fag taw. Igfanluk way am sa ay ngay tagbul ay tanuman siginan ay gamasun. Anway du am nafon anya sa at nalufuyan. Dungugani tuwa sa ay ngay tagbul ay tanuman at fanlonganan at fagnauroun dawdaw. Ay at nauroan ndasug sas Funbalugu-At-Tiba-Tungud-At-Madaragang At talinga. ⁵ Kaduge am gbanwan ste swa daga, mafabul wam fagayu ay fakaumsigun ay fagayu ay fagalabianun. Ay gfataba way am ayu, kata nu gfataba am ay balan ay bandi nanfilas wam. ⁶ Ay nafanluk way am sa sik masine fag taw baliwa te, kanya e asalanan way. Ay anggan nafate wam anya. Kanya dewa gyud gsalag ayu. ⁷ Ay nu katanya, ku ngay fadugsay, sungatani anggan tam Fun umfoli stiye swa daga. Ay amatangani. Sik tagtanum nasungatan tuwa kaduge gfanya at tanuman at buadan siginan at gamasun. Ay gina gfanya indasug at taguna ay anggan at fakatabuan fag moyan. ⁸ Ay katanyai yangay anggan am. Sungatani yangay. Ay fatvngvdi ay amatanganan. Anway makbang wan tam Fun nu kafoli. ⁹ Ku ngay fadugsay, dangai dawdaw gfangalimata ay iba. Laman ban di e tapan ay asalanan. Anway At Tagtap-Asalanan gadasugun wan. ¹⁰ Ku ngay fadugsay, amatangani ebi fag ngay taglong nu nafoyung Funbalugu At longan. Kanya sik masine fag fagulitan sa ayu anway igsungatan tuwa dewa e gfauri anya. ¹¹ Amatangani. Natap yangay tam sik taw tagsungatan te, kanya sik taguseganan fag taw. Ay nadungug wam te, ka fag taw ebi at ngayan At-Kinfoli-Sas-Funbalugu nasungatan wa fiya. Ay anggan nasaful wam tam Fun At fagafonun sa anya. Anway tam Fun At mamanyun ay takafanyu dawdaw. ¹² Ku ngay fadugsay, amatangani dawdaw tuy ku longan. Lag fatvngvd ay longan. Lag sak glong te, tam Banwa wan, ay tam fagdaul daga wan at nasaful ku longan. Roro nu glong am anyakman fagtvngvd te, kin, nu kin. Ay yaya, nu yaya. Laman ban di e faurianan sa ayu. ¹³ At tibak taw sa ayu nu e natakan, kanya darangini. Ay at tibak taw sa ayu nu guseganan, kanya danyui segi sas Funbalugu. ¹⁴ Ay tibak taw sa ayu nu e dailan, kanya fatsanyai at ngay magurang bale fakafulan. Laman at ngay magurang gdarangin sat ke dailan at akbang, ay gfatayuk sik safa mataba sirut sa anya sa tam Fun At fagmadaragangun. ¹⁵ Anway at ke fakafandiugun fag darangin mafafiya at ke dailan. Ay anggan tam Fun nafabitsug yangay anya. Ay at ke dailan nu e asalanan ebi, e nafaliam yangay at asalanan. ¹⁶ Anway katanya, fodfoyungani ay asalanan sa ay iba. Ay fandaranginani yangay ay iba, laman umfiya ban am. Anway sik masine fag taw at darangin madaragang ay mafanud wa fiya. ¹⁷ Ebi sik taw at ngayan te, Funbalugu-Tam-Taw-Yabi-At-Masine, at ugali kata yangay tam ugali. Ay kanya matvngvd dawdaw nu gdarangin, laman du e moyan. Ay rodi du e moyan sanya fag talun tuluk banwa ay sit dayu unumk gmagdanun. ¹⁸ Ay bandi kanya gdarangin yangay sas Funbalugu te, laman ro e moyan. Ay rodi at kiwang gfe moyan. Ay bandi at daga gdog yay e gtugbung nus nge wain ay anggan e buadan. ¹⁹ Ku ngay fadugsay, at sadik taw sa ayu nu infanalo nu kafandiug sat matuyan fag longan, masine tibak taw siginan ayu nu natarabang anya laman kanya fag taw umfoli yangay sat matuyan fag longan. ²⁰ Ay at tagtarabang tiba asafuli te, nus nga sinu at natarabang sik tagasalanan laman di tumunglus sat mauri fag ugali, kanya nabalabag ban tagasalanan siginans faduwak fakateun. Ay anggan natabun ngayuk asalanan.