Hebrews

Hebrews

¹ Ebi ebi glugo wan Funbalugu ngayu ginan wan nu gfainbalian nu gfoyung sa tam katungudan siginan At ngay taglong. ² Roro ngap katsi sas fakatabuan fag ngay menit, Funbalugu nu gfoyung antam siginan tuwa fiya fiya At Baguama. Ay ebi ebi Funbalugu nasugu At Baguama laman Kanya At naawat fagayu ste swa daga ay anggan sas banwa. Ay Funbalugu At filian At Baguama wan, laman nanmagurang ban fagayu. ³ At Baguama kata yangay fiya fiya Funbalugu. Ay Kanya tagfasure Funbalugu At tiba tungud fag fagmasineun, ay anggan At ugali fagayu. Ay anway At Baguama At longan madaragang tuwa, fagayu At ngay naawat igfatunglus tuwa kata ebi nu masine. Ay At Baguama nu nafatabu wa At fagbulun laman gfaliam at taw at asalanan, Kanya malunggung wa sa At-Tiba-Tungud-At-Madaragang At siun baliwa fag day tigyangan sas Banwa. ⁴ Anway Funbalugu At Baguama nu madaragang, glabi yay sas Funbalugu At ngay tagbukngan. Ay nu gngayan antuwa te, Ku Baguama, At ngayan glabi yay sa At ngay tagbukngan at ngayan. ⁵ Anway faggugat Funbalugu dua batang glong sa At tagbukngan te, O wan Ku Baguama, ay Aw Am Mama. Ay anggan dua batang glong sa At tagbukngan baliwa te, Aw long ban At Tama, ay Kanya long ban Ku Baguama. ⁶ Ay kata tuy yangay Funbalugu At longan gina nafasure At Turungana ste swa daga te, Fagayu Ku ngay tagbukngan, segi Ku Baguama. ⁷ Ay ebi nalong wa sa At ngay tagbukngan baliwa te, Funbalugu nafakata sik tagmara At ngay tagbukngan. Ay Kanya nafakata sik ngay igang At ngay fanuguan. ⁸ Roro ngap Funbalugu nu glong sa At Baguama antuwa te, O wan Funbalugu. Ay nu gmagurang O, di e fakatabuan faggugat faggugat. Ay nu gmagurang O Am ngay taw, matuyan tuwa. ⁹ Anway kaumsig Tuwo sat masine fag fagbulun. Ay kalimata Tuwo sat mauri fag fagbulun. Ay nu katanya, Aw wan, Am Funbalugu, At nafili Emu. Ay nanfon Aw Emu sik fagusegananun, glabi yap sa Am ngay ufud nu guseganan. ¹⁰ Funbalugu nalong yangay sa At Baguama te, O wan, Funbalugu, At naawat tam fagdaul daga siginan ngays fagsigadan. Ay O yangay At naawat tam banwa. ¹¹ Dewa tam banwa ay tam daga e fakatabuan, O, di O e fakatabuan faggugat faggugat. Dewa ban tam banwa ay tam daga indan kata sik lanbung, ¹² Ay Dewo nalut kata sik umut, Ay igtubus yay O at tiba kata sik lanbung, O kata Tuwo ebi faggugat. Ay anggan ban Am ngay menit di e fakatabuan faggugat faggugat. ¹³ Go Funbalugu iglong yangay sa sik tagbukngan kata nu glong sa At Baguama te, Malunggungi sa Ku siun baliwa fag day tigyangan, Ay fatsa Akyay Am daga fagmadaragangun tagfabarangian Emu. ¹⁴ Yaya. Anway Funbalugu At ngay tagbukngan sik ngay fanuguan way fagtvngvd fag ngay taw yabi. Ay At fagnantarabangun sat kumbalabag way ban.

¹ Ay nu katanya, fagayu tam amatangani tuwa tam ngay nadungug, laman di tam garimanan kayayu siginan tam ngay nadungug At longan. ² Anway matuyan tuwa Funbalugu At ngay tagbukngan at longan. Ay fagayu at nasalan ay fagayu at nafamabo e faurianan wa fiya sa anya. ³ Ay nu katanya, dua ban tam malfas nu dway tam kaumsig gdungug sa nu kabalabag tam baliwa. Madyay ebi taguna tam Fun nafoyung wan ka fag fagbalabagun. Ay manga bandi at ngay nadungug nananfatuyan yay fiya sa antam. ⁴ Ay anggan Funbalugu sigon nafatuyan yangay ka fag fagbalabagun. Madyay Kanya nafasure wa At ke masuad fag fagbulun, ay At madaragang fag fagbulun, ay anggan At matvngvd fag fagbulun. Ay manga nafatsa wa At ngay taw At-Masine-Fag-Falad At ngay nafon. Saman wan At nafon sa sadi sadik taw, nus nga setaw wa Funbalugu At fasadan. ⁵ Anway Funbalugu dua nafasik fun At ngay tagbukngan te, laman nanmagurang tam talun ban. Kanya fag talun ku nalong katsi. ⁶ Ay ebi At-Rirukan nafatuyan wa te, Ku Funbalugu, taini nangus sik ngay taw, laman gamatangan Tuwo anya. Kanya dewa te sik taw way, O kafanyu Tuwo anya. ⁷ Ay O wan At ke fasadan te, kanya mababai yap sik gadugayun, siginan Am ngay tagbukngan. Ay bandi, nafasine yay O anya, laman kanya e fagmasineun tuwa, ay e gseg tuwa anya. ⁸ Ay O wan anggan At nafasik fun anya laman kanya tagmagurang fagayu. Nu nalong te, Funbalugu nafasik fun at ngay taw laman igmagurang fagayu, at masuad te, fagayu nus nge wain sa ways taw daga fagmadaragangun. Ay roro katsi dia tam nalag te, igfaning wa anya. ⁹ Ay nasaful yangay tam fiya te, e nafababa yangay sirut tam Isus siginan At ngay tagbukngan, teway e nafauri wayay Anya ay inkate. Katanya tuway, katsi Isus inke fagmasineun dawdaw ay e gseg dawdaw Anya. Anway Funbalugu kafanyu, Isus At faginkateun laman fagayu taw e fanambagun. ¹⁰ Matuyan Funbalugu nafabayan yay sirut tam Tagbalabag te dewa e nafauri Anya. Ay inke faurianan tuway, di e fagayudanun. Anway Funbalugu At fagnaawatun fagayu nanfatvngvdun tuwa. Ay At fasadan te, laman tam Tagbalabag At tagtaban tam Funbalugu At ngay unga sa At fagmasineun. ¹¹ At Tagfasadi At ngay taw sas Funbalugu ay anggan At ngay nafasadi fag ngay taw, sadi tuwa at Tama. Ay katanya tuway, Isus di kapla nu gfangayan anya te, Ku ngay fadugsay. ¹² Kata Isus At longan sas Funbalugu te, Nanfoyung ban Aw Am ngay ugali sa Ku ngay fadugsay. Ay nandanyu Akban nanseg Emu, gina at ngay taw maful. ¹³ Ay anggan sigon te, Kafandiug Aw sa Anya. Ay manga te, Stea Kwan. Aw ay anggan Funbalugu At nafon Angku fag ngay sisian. ¹⁴ Anway ka fag ngay sisian sik taw menit tuwa. Ay anggan Isus insik taw menit yangay kata anya, ay nanangate. Ay Isus At naatean mafafababa tuwa at ke fagmadaragangun tagfate taw. Tagfate taw at ngayan tiba te, Takamuag-Tiba-At-Fagbulun. ¹⁵ Ay Isus nafasaman tuwa ka fag ngay sisian at amatanganan sa nu kalimu nu kate baliwa. Laman bundi ka fag fakalimuun tagfanuguanan anya kata ebia taw nu kalimu gugat gugat. ¹⁶ Isus At fagtarabangun bundi sa At ngay tagbukngan. At fagnantarabangun antuwa sas Abrayam at kadagdagan. ¹⁷ Nu katanya, Isus inkata yangay At ngay fadugsay sas fagayu At ugali. Laman Kanya insik mafanyu ay insik mafanud fag Taguna-Fag-Taganyun-Daul sas Funbalugu At akbang. Madyay At fagbulun mafafaliam tuwa fagayu taw at asalanan. ¹⁸ Ay e nafauri wa Isus ay e nafaskud te, laman maning sas asalanan. Ay katanya tuway, Kanya mafafatarabang yangay ban nus nga sinu ban at nafaskudan te, laman maning sas asalanan.

¹ Ku ngay fadugsay, am wan Funbalugu At taw ay At nafili, kata yangay angku. Matuyan tuwa ku foyungan ayu aro. Ay nu katanya, amatangani tuwa sa tam Isus baliwa. Anway Kanya antuwa Funbalugu At-Suguan ay At Taguna-Fag-Taganyun-Daul sa tam fakafandiugun baliwa. ² Tam Isus matuyan tuwa nu gfaning sa At nasugu Anya. Kata yangay ebi ebi Ku-Unga nu matuyan sas fagayu at fagbulun sas Funbalugu bale. ³ Ay Isus e fagmasineun yangay. Madyay nu e gseg Anya, glabi yay nu e gseg Ku-Unga. Kata yangay sik takawat bale nu e gseg anya, glabi yay nu e gseg sa at awatan fag bale. ⁴ Ay fagayu bale e sik takawat, ay Funbalugu tuwa takawat fagayu nus nge wain. ⁵ Ay Ku-Unga nu matuyan, katvngvd way sik fanuguan sas fagayu at fagbulun sas Funbalugu bale. Madyay kanya at nanfatuyan way fagtvngvd Funbalugu At longan ban. ⁶ Ay Fagtayukan nu matuyan, katvngvd tuwa sa sik bale at baguama, gina gmagurang Funbalugu bale. Ay itam wan Funbalugu bale, nu matvngvd tuwa nu gfanya tam sa tam fagsegun ban. ⁷ Ay nu katanya, faningi At-Masine-Fag-Falad At longan te, Katsi nu gdungug tuwam Funbalugu nu ge longan, ⁸ Lag gfaluguan kata ebi ay ngay aguyangan nu kamabo ay nu gfaskud Funbalugu sas talun at yud e taw. ⁹ Ay Funbalugu nalong te, Sanya ay ngay aguyangan nu gfaskud Angku. Dewa kanya nalag Ku ngay fagbulun kaduge ufatk safuluk banwa. ¹⁰ Anway katanya, kadotama Aw sas fagayu at ngay magurang tagsanya. Ay nalong Aw te, Kanya faggugat ngayayu way Angku sat amatanganan. Ay anggan faggugat dua gfaning Ku ngay ugali. ¹¹ Ay kadotama Akyayay anya, nafatvngvd Aw Ku longan te, Ka fag ngay taw dua ban umdasug faggugat sa Ku fakamatoan fag talun. ¹² Ku ngay fadugsay, fadfatagakani ay iba. Laman di mauri ay amatanganan ay di am e gyud kafandiug. Laman di am ngayayu siginan tam Tagleleg-Faggugat-Fag-Funbalugu. ¹³ Ay fadfatvngvdani ay iba at amatanganan kayu menit kayu menit. Ay siginani wa katsi, kaduge yap ngay am e menit. Laman asalanan dewa gfanluk, di gfatvngvd ay amatanganan. ¹⁴ Fagayu tam insadi watam sas Fagtayukan, nu matvngvd tuwa tam, katvngvd ebi taguna nu gfanya tam sa tam fagsegun ban anggan sas fakatabuan fag ngay menit. ¹⁵ Ay At-Rirukan nalong wa te, Katsi nu gdungug tuwam Funbalugu nu ge longan, Lag gfaluguan kata ebi ay ngay aguyangan nu kamabo ay nu gfaskud Funbalugu. ¹⁶ Sinu kanya ebi fag ngay taw at nadungug, ay kamabo way. Go manga kanya Ku-Unga wa at nataban fag ngay taw siginans talun Eiptu. Go kin. ¹⁷ Ay go dada Funbalugu At fakadotaman kaduge ufatk safuluk banwa. Go manga sanya wa fag ngay taw at ke asalanan, ay laman bandi inkate wa sas talun at yud e taw. Go kin. ¹⁸ Ay go dada Funbalugu At faglongan gina gfatvngvd iglong te, kanya dua ban umdasug faggugat sa Ku fakamatoan fag talun. Go kanya wa manga fag ngay takamabo. Go kin. ¹⁹ Nasaful watam te, katanya wayay ka fag ngay taw dua ban umdasug, anway dua kafandiug ay.

¹ Ay nu katanya, masine nu gtagak watam. Gina ngani e fatuyanan te, madasug tuwa tam sas Funbalugu At fakamatoan fag talun, tagaki. Laman ban di e taw sa ayu yud umdasug. ² Anway e nafoyung tuwa antam At Masine-Fag-Barita, kata ebi nu e nafoyung sanya fag ngay taw. Ay ka fag ngay taw at nadungug ebi, du e fanambagun sa anya, anway ka fag ngay taw dua kafandiug. ³ Ay itam way, takafandiug fagtvngvd, at kumdasug sas Funbalugu At fakamatoan fag talun. Kata tuy Funbalugu At longan te, Anway kadotama Akwayay anya, nafatvngvd Aw Ku longan sa anya te, Kanya fag ngay taw dua ban umdasug faggugat sa ku fakamatoan fag talun. Katanya way Funbalugu At faginlimataun, teway nu nafamasadan ka fag talun siginan wa ebi nu bagu kawat tam daga. ⁴ Madyay e Rirukan wan sas fafituk menit baliwa te, Funbalugu kamato way sis fafituk menit anway ntabu wan at fagaawatun fagayu. ⁵ Ay kata yangay aro At-Rirukan te, Kanya fag ngay taw dua ban umdasug faggugat sa Ku fakamatoan fag talun. ⁶ Kanya fag ngay taw ebi at nadungug at Masine-Fag-Barita dua ban umdasug anway kamabo wayay. Ay dewa katanya, nafatunglus yay At fatuyanan laman ban tibak taw umdasug yay sas Funbalugu At fakamatoan fag talun. ⁷ Ay nu katanya, Funbalugu gdog yay nafili sik ngay menit te, katsii wan. Ay bandi nu glugo wan Funbalugu nafasugfunanan nafoyung sas fun Fakafanyuun kata aro At longan te, Katsi nu gdungug tuwam Funbalugu nu ge longan, lag gfaluguan. ⁸ Sik taw ebi at ngayan te, Funbalugu-Tam-Tagbalabag. Kanya satu ro nu nafadasug di ka fag ngay taw sas Funbalugu At fakamatoan fiya fiya fag talun, Funbalugu dua ban nanfoyung te, e menit yay. ⁹ Ay nu katanya, Funbalugu At ngay taw e sik fakamatoan yangay ban fag talun, kata Funbalugu nu kamato sas fafituk menit. ¹⁰ Anway nus nga sinu ban at kumdasug sas Funbalugu At fakamatoan fag talun, kanya ntabu wan at fagbulun, kata ebi Funbalugu nu nafatabu At fagbulun. ¹¹ Nu katanya, katsi fagayu tam maseganamai tuwa laman umdasug tuwa ban tam sa ka fag fakamatoan fag talun. Ay laman di tam e yud tumungul nus di sadi kata ka fag ngay taw ebi takamabo. ¹² Ay Funbalugu At longan mafafasure tuwa ay madaragang tuwa. Ay anggan glabi yay sik fiso dewa fagduwak tigyangan at uyup at mataga. Ay Funbalugu At longan kata sik fiso nu natubuk sa sik sulfuan ay sasad butul sat utuk. Katanya yangay Funbalugu At longan natubuk sa sik taw at amatanganan. Ay nanfasure sik taw at fasadan ay at amatanganan. Ay nanfasure sik taw at fasadan ay at fakaumsigun te, go masine ay go mauri. ¹³ Anway Funbalugu At naawat dua maasuksuan sa Anya. Funbalugu nalag wa fiya fagayu, kata way nu malunggaban, dewa e fantabun. Ay fagayu tam nanfoyung ban tam mandi sa Anya tam fagbulun fagayu. ¹⁴ Fagayu tam fatvngvdi tuwa tam fakafandiugun. Anway e Taguna-Fag-Taganyun-Daul tuwa tam At madaragang. Ay Kanya indasug wa fiya sas Funbalugu sas Banwa. Ay Kanya Isus, Funbalugu At Baguama. ¹⁵ Tam Taguna-Fag-Taganyun-Daul kafanyu tuwa antam dewa tam mafanalo. Anway dewa e nafaskud antam nus nge wain, anggan sa Anya ebi e nafaskud yangay nus nge wain. Ay roro dewa katanya, Kanya di e asalanan. ¹⁶ Nu katanya, anway nu gafanud tuwa tam, akbangi wa sa Takafanyu At fagmalunggungan daul. Laman Kanya mamanyun sa antam ay kafanyu ay tumarabang antam gina tam e fagayudanun.

¹ At nafili Taguna-Fag-Taganyun-Daul siginan at ngay taw ste swa daga, laman kanya sik tagbuknga sas taw ay Funbalugu. Ay kanya at nafon siginan at tanuman fag anyun ay anggan at nafilas fag balan fag anyun, at fantabun sat ngay taw at asalanan. ² Ay kanya malukme tuwa sasa ngay taw at yud e fagsafulun ay sa at ke nasalan. Ay laman manga kanya mafanalo way tiba ginan. ³ Ay katanya wayay, kanya igfon yangay sik anyun laman at fantabun sat asalanan mandi, ay anggan sa tibak taw at asalanan. ⁴ Ay sik taw dua mafafili mandi anya te, laman awi at Taguna-Fag-Taganyun-Daul. Anway Funbalugu tuwa tagfili sik taw, kata ebi nu nafili Arun. ⁵ Ay anggan Fagtayukan dua mafafili mandi Anya te, laman Awi At Taguna-Fag-Taganyun-Daul. Funbalugu tuwa At nafili Fagtayukan, ay At nalong Anya te, O wan Ku Baguama, ay Aw Am Mama. ⁶ Ay Funbalugu nalong yangay te, O wan sik Taganyun faggugat, kata yangay ka fag taganyun at ngayan te, At-Matuyan-Tam-Fun. ⁷ Ay kaduge ebi Isus ste swa daga, Kanya igdarangin ay get sas Funbalugu gina gbiya nu ge longan ay nu guyway. Anway Funbalugu mafafabalabag wa fiya Anya siginans fakateun. Ay Funbalugu nadungug Anya anway Kanya igfaning Funbalugu At fasadan. ⁸ Ay dewa te Kanya Funbalugu At Baguama, nus nga e nafauri Anya. Ay ka fag faurianan wan tagfasaful sas tibak taw te, Kanya gfaning tuwa Funbalugu. ⁹ Ay tam Isus At fagbulun at nafasaful yangay sa tiba te, Kanya malayun tuwa sat masine. Katanya tuway, Kanya faggugat sik Tagbalabag wa fiya sa sik taw tagfaning Anya. ¹⁰ Ay Funbalugu nafangayan Anya te, At-Taguna-Fag-Taganyun-Daul, kata yangay ebi ka fag taganyun at ngayan te, At-Matuyan-Tam-Fun. ¹¹ Ngayu yay ku fagananfoyungun sa ayu sa At-Matuyan-Tam-Fun ay sa tam Fagtayukan Isus baliwa. Ay mataka way nu gfayamag aw sa ayu anway infanalo wayay ay amatanganan. ¹² Anway katsi at masine nu sik takamoyung wam nangus. Ay roro katsi e fagayudanun yay am mangaro, laman e gfoyung yap nangus ayu at yud mafalyu siginans Funbalugu At longan. Ay roro mangaro kata yay am sik sisian tagasusu, ay dia mafaon at matigas fag fakonun. ¹³ Fagayu tagasusu, sik ngenge yay ay di e nasafulan. Fakatanyaun dia nasaful fiya Funbalugu At foyungan sa at masine baliwa. ¹⁴ Roro ngap, at matigas fag fakonun sa sik magurang way. Anway kanya faggugat gamatangan tuwa ay gsaful tuwa gfili te, kanya at masine ay kanya at mauri.

¹ Nu katanya, faggugat tam fagadalun dangai fagtvngvd sa ebi taguna tam nadungug sas Fagtayukan baliwa. Tam fagadalun ani tuwa sa tiba tam Funbalugu At longan at mafalyu. Ay lag tam gdog e fagubunun kata ebi nu gubun tam tam ugali at yud e masuad, kata ebi gina tam bagu kafandiug sas Funbalugu. ² Ay anggan faggugat tam fagadalun dangai sa nu kasurung fagtvngvd. Ay dangai sa nu gfadait tiba gina gted at alfuyu fagtvngvd. Ay dangai sa nu gdog yay gleleg fagtvngvd. Ay dangai anggan sa at yud katabu fag faurianan ban fagtvngvd. ³ Ay fagayu tam fatunglusi tuwa anggan sa at mafalyu fag foyungan, nus nga setaw Funbalugu At fasadan. ⁴ Du e mafafabul kata tuy te, laman gdog yay gfasine sik taw at ugali nu kata way tuy at fagbulun. Anway ebi taguna ka fag taw nasaful wa ngap at matuyan. Ay guseganan wa At nafon anya siginans Banwa. Ay nabul wa At-Masine-Fag-Falad At nafon. ⁵ Ay guseganan wa at nadungug siginans Funbalugu At longan at masine. Ay anggan nalag wa Funbalugu At fagmadaragangun sa katsi swa fakatabuan fag ngay menit. ⁶ Ay ka fag taw inkuri wayay, dua ban fafabul te, laman gdog yangay tumubus at amatanganan. Anway nu gdog yangay tumubus at ugali, kata yangay nu gdog yangay ganantuktukun Funbalugu At Baguama sas salibagan kayu. Ay anggan kata yangay nu nanfalingun Anya te, laman ka fag taw wadi at ke fanambagun. ⁷ Funbalugu nafadasug at masine sa sik daga at marugme anway e moyan, ay nu nafatugbung tuwa at taw tanum, laman e fanambagun ban sa at tagbilug. ⁸ Roro sik daga nu nafasure way sik ngay madugi ay sik ngay makmak mabuyu, du e masuad sa tagbilug. Ay e gananfauriun ban ka fag daga. Ay at fakatabuan matas wan. ⁹ Ku fakesugun ku ngay taw. Dewa katanya ku longan, intuyan aw te, ay ugali glabi yay aro ku longan fag daga nu masine. Anway katanya yangay kinbalabag at ugali. ¹⁰ Anway Funbalugu faggugat matuyan wa fiya. Ay Kanya di nataliyuyan ay fagbulun, ay ay fakafanyuun nu gfatunglus tuwam gtarabang At ngay taw anggan katsi. Nu katanya ay fagbulun, igfauseganan tuwam sas Funbalugu. ¹¹ Ay em fasadan sa ayu te, laman fagayu am sadi sadik taw maseganamai tuwa nu gfatunglus sat masine, anggan umdasug sas fakatabuan fag ngay menit. Laman umtuyan tuwam te, e fagsegun ban am. ¹² Ay laman dangai mafanalo sa ay amatanganan. Ay faningi tuwa kata ebi fag ngay taw nu kafandiug ay nu gfanya ay nu gbul Funbalugu At fatuyanan at fagafonun. ¹³ Ebi Funbalugu nafatuyan wa sas Abrayam, ay nafatvngvd wan kanya fag fatuyanan. Anway du e glabi Funbalugu nu madaragang, ay Funbalugu nafatvngvd At fatuyanan siginan At fagmadaragangun mandi. ¹⁴ Ay Kanya nalong sas Abrayam te, At matuyan, nanfadasug ban aw sa emu sik fagmasineun, ay anggan gfaayu Aw am sugfun. ¹⁵ Ay bandi, Abrayam mafanyaan yay dewa glugo, ay nabul wa fiya Funbalugu At nafatuyanan at fagafonun sa anya. ¹⁶ Sik taw nu matvngvd nu glong, at fanfatvngvd at longan nafoyung sa sik taw at madaragang taglabi anya. Ay dewa tiba gfaringangan anya, sat nafatvngvd fag longan nafaliam yay nu garingangan. ¹⁷ Ay anggan Funbalugu nafatvngvd yangay At fatuyanan sa at ngay tagbul ban. Laman at ngay tagbul sumaful te, di gfasaman At fasadan faggugat. ¹⁸ Duwak fagbulun at yud nafasaman, ay Funbalugu dua kamuagan kanya fag duwa. At fasadi, Funbalugu nafatuyanan. Ay at faduwa, Funbalugu At nafatvngvd fag longan. Ay nu katanya, itam at kinkakbang sas Funbalugu anway inbalabag, sanya ginan fag duwak fagbulun at nafatvngvd tam amatanganan. Laman matvngvd tuwa ban nu gfanya tam, ay e fagsegun ban tam. ¹⁹ Ka fag fagsegun matuyan ay matvngvd ay nafatvngvd sa tam amatanganan. Ay tam fagsegun ndasug sa Taglabi-Nu-Mafangibuk fag salug sas day Famalabag-Fag-Sinyag sas Banwa. ²⁰ Sanya Isus naguna antam nasakbo, laman e fanambagun ban tam. Ay Kanya insik Taguna-Fag-Taganyun-Daul faggugat, kata yangay ka fag taganyun at ngayan te, At-Matuyan-Tam-Fun.

¹ Ka fag taw, At-Matuyan-Tam-Fun, ebi at fun sas fulan Fagmanabayanun. Ay anggan sigon Funbalugu, At-Tiba-Tungud-At-Madaragang, At taganyun. Kanya ebi at nafablang Abrayam gina Abrayam guli siginan at nababoan sik ngay fun. Ay At-Matuyan-Tam-Fun nalong sas Abrayam te, Funbalugu At mamanyun nangus sa emu. ² Ay Abrayam nafon tuwa sa anya at fasafuluk afud fagayu at nabul sanya ginan fag ngay fun. At-Matuyan-Tam-Fun at ngayan at masuad te, kanya matuyan nu gmagurang taw. Ay at faduwa at ngayan te, Fun-At-Nanfanabayan-At-Taw. Anway kanya wanay at fun sas fulan Fagmanabayanun. ³ Du e rirukan te, sinu At-Matuyan-Tam-Fun at tama ay at tina ay anggan sa at aguyangan baliwa. Ay anggan du e rirukan te, tain nu kalangfe ay anggan go nkate yay. Kanya kata yangay Funbalugu At Baguama anway kanya sik taganyun yangay faggugat. ⁴ Amatangani, At-Matuyan-Tam-Fun madaragang tuwa. Ay Abrayam, at taguna tam aguyangan, nafon tuwa anya at fasafuluk afud fagdaul at nabul siginan at nababoan sik ngay fun. ⁵ E nafili at ngay taganyun siginan At-Famaalo at sugfun. Ay Ku-Unga At-Longan nalong sa at ngay taganyun te, Buli at fasafuluk afud siginan Ku ngay taw at nafabul. At masuad te, siginan at ngay kalongan, dewa te, Abrayam yay at kadagdagan. ⁶ At-Matuyan-Tam-Fun bunwa At-Famaalo at ke sugfun, nabul at fasafuluk afud siginans Abrayam. Ay At-Matuyan-Tam-Fun at longan at nafadasug at masine sas Abrayam, Funbalugu At fagfatuyananan. ⁷ Ay fagayu taw nasaful te, at nafadasug at masine glabi yay at sadi nu madaragang. ⁸ Ay fagayu taganyun, at nabul at fasafuluk afud, inkate wan bandi. Ay roro At-Matuyan-Tam-Fun, at nabul at fasafuluk afud, igleleg yay anggan bandi, At-Rirukan nalong te. ⁹ At-Famaalo, at taganyun ebi, mul yay at fasafuluk afud siginan at tiba. Nu ndain e lumong yay te, ebi ebi gina At-Famaalo yud e taw, anggan kanya kata wa nu nafon at fasafuluk afud gfasfuan at aguyangan, Abrayam. ¹⁰ Anway kaduge At-Matuyan-Tam-Fun nafablang Abrayam, At-Famaalo di e taw, siginan yay ban at aguyangan Abrayam. ¹¹ Funbalugu nafon sa At ngay taw Ku-Unga At-Longan. Ay At-Famaalo fag ngay taganyun tagfagurungan At-Longan. Ay nu nsak di ka fag ngay taganyun at fagbulun, dua ro gayudan tibak taganyun katvngvd At-Matuyan-Tam-Fun. Ay bundi katvngvd sik taganyun siginans Arun at kadagdagan. ¹² Ay nu e natubus wa tibak ngay taganyun, tubusi yangay anggan At-Longan. ¹³ Aro at longan sa tam Fun Isus baliwa. Ay Kanya saman wak kadagdagan. Ay dua batang e taganyun sanya ginan fag kadagdagan. ¹⁴ Ngayuk taw at nasaful te, tam Fun Isus siginan sik Taw-Tagagbuan at kadagdagan at ngayan Naseg. Ay Ku-Unga du e foyungan te, Naseg at kadagdagan e taganyun. ¹⁵ Ku foyungan aro mayamag yangay, anway Kanya saman wak taganyun at kinsure kata At-Matuyan-Tam-Fun. ¹⁶ Kanya insik taganyun yangay ay dua gfaning sa ka fag talagtagan baliwa sa Ku-Unga at nafoyung fag Longan. Kanya faginsik taganyunun antuwa te, Kanya e fagmadaragangun anway gleleg faggugat. ¹⁷ Ay At-Rirukan wan at nafatuyan sa Anya baliwa te, O wan sik taganyun faggugat. Kata yangay ka fag taganyun at ngayan te, At-Matuyan-Tam-Fun. ¹⁸ Ebi fag Longan kata yay nu nafasat dayu, anway du e fagmadaragangun ay du e masuad. ¹⁹ Madyay Ku-Unga At-Longan dua mafafasine nus nge wain laman umlayun sat masine. Ay katsi e fagsegun watam glabi yay ebi fag fagfanyaun. At nanfakbang antam sas Funbalugu. ²⁰ - ²¹ Katsi e fagsegun yay tam taglabi yay ebi. Ay anggan Funbalugu At nafatvngvd At longan sas Isus baliwa. Ebi fag ngay taganyun dewa sik taganyun, bunwa te, Funbalugu tagfatvngvd At longan. Ay roro tam Isus taginsik taganyunun yangay anway Funbalugu nafatvngvd At longan nu nalong sas Isus te, Tam Fun nafatvngvd At fatuyanan. Ay di ban nafasaman At longan sa Anya te, O wa ban sik taganyun faggugat faggugat. ²² Ay katanya tuway tam Isus wan At nafatuyanan sa antam te, katsi fag fatuyanan amasine yap fiya fiya sa ebi taguna fag fatuyanan. ²³ Ngayu wan ebi at taganyun at natudtubusan. Ay du e nafatunglus, anway nkate wan. ²⁴ Roro tam Isus sik taganyun yangay faggugat, anway Kanya gleleg tuwa faggugat. ²⁵ Katanya tuway, Kanya mafabalabag tuwa faggugat fagayu At nafaakbang sas Funbalugu. Teway Kanya gleleg tuway faggugat ay igdarangin yangay sa anya. ²⁶ Nu katanya, tam Isus gkasakan wa sik taganyun sa antam. Anway Kanya malayun tuway sat masine. Ay di e mauri. Ay di e nasalan. Ay di gfadiuganan sas tagasalanan, anway Kanya sa tuwa tiba tungud fagayu sas banwa. ²⁷ Ay Isus di kata ebi fag ngay taganyun. Anway Isus du e fagayudanun te, laman nanfon sik anyun kayu menit kayu menit sa anya at asalanan mandi, ay nanfon yangay sa at tiba at asalanan. Tam Isus nu nafon sik anyun, saiginan wadi gina nafon At bilug laman inkate. ²⁸ Ku-Unga At-Longan nafili at Taguna-Fag-Taganyun-Daul siginan at ngay taw, dewa te, mafanalo way. Roro ngap Funbalugu nafatvngvd yay At longan, ay nanguyan yay Ku-Unga At-Longan, ay At nafili antuwa At Baguama. Ay At Baguama faggugat malayun tuwa sat masine.

¹ Ku longan at masuad te, e Taguna-Fag-Taganyun-Daul tuwa tam, tam Isus. Ay Kanya malunggung sa At-Tiba-Tungud-At-Madaragang At faglunggungan daul sa at siun baliwa sas Banwa. ² Ay At fagbulun sa at Taglabi-Nu-Mafangibuk fag salug sas Funbalugu At bale sinyag urungan sas Banwa. Ay Funbalugu wan at naawat, bunwa sik taw. ³ Fage nafiliun at ngay Taguna-Fag-Taganyun-Daul ste swa daga laman kanya at nanfon siginan at tanuman fag anyun ay anggan at nafilas fag balan fag anyun. Anway katanya, manga tam Taguna-Fag-Taganyun-Daul, tam Isus, kaumsig yangay fiya nafon sik anyun. ⁴ Ay tam Taguna-Fag-Taganyun-Daul, tam Isus, nu ste swa daga way ro, dua nsik taganyun ste swa daga. Anway ngayu wan at taganyun ste swa daga at nanfon at anyun, igfaning Ku-Unga At-Longan. ⁵ Ay ka fag ngay taganyun at fagbulun sas bale sinyag ste swa daga. Kanya sik fafaskudanan yay, kata yay sik aninu tagsa at urungan fag bale sinyag sas Banwa. Anway kaduge Ku-Unga gaawatun ebi fag bale sinyag ste swa daga, Funbalugu nalong anya te, Amatangani dawdaw. Laman ban nu kawat o, faningi tuwa Ku nafoyung emu ebi ku fafaskudanan sanya fag bugsul. ⁶ Ay katsi Fagtayukan At nafasure fag fagbulun amadaragang yap sa ebi at ngay taganyun at fagbulun. Katanya yangay Fagtayukan At nafasure sa antam fag fatuyanan amadaragang yap sa ebi fag fatuyanan. Anway At bagu fag fatuyanan nu e fanambagun glabi yay sat dan fag fatuyanan nu e fanambagun. ⁷ Anway at taguna fag fatuyanan nu dia man e fagayudanun, satu ro dua gasarapan at tiba. ⁸ Katanya wayay Funbalugu gamatangan yay sa ebi fag ngay taw at asalanan baliwa. Ay kata tuy At longan te, Funbalugu nalong te, Umdasug ban sik ngay menit, Ay Aw nanfatuyan Akban sik bagu fag fatuyanan sas Taw-Tagagbuan ay sas Taw-Naseg. ⁹ Ku fatuyanan ban saman yay sa ebi Ku fatuyanan sa ebi at ngay katungudun, Gina Aw gted at daluap laman nantaban ay nanfalfas anya siginans talun Eiptu. Anway kanya dua nafatunglus nu gfaning sa Ku fatuyanan ebi. Ay Aw nafabayan Akyay anya, Funbalugu nalong te. ¹⁰ Ay nu nlangfe wa ban ka fag ngay menit kata tuy ban Ku fatuyanan sas Taw-Tagagbuan, Funbalugu nalong te. Nanfaamatanganan Akyay ban Ku longan sa at amatanganan. Ay sumandig Aw Ku Longan sa at ngay talinga. Ay Aw wa ban at Funbalugu, ay kanya ban Ku taw. ¹¹ Ay kanya dua ban nanfoyung sa at ngay iba ay anggan sa at ngay fadugsay te, Asafuli Funbalugu. Anway fagayu taw ban tanan wa gsaful Angku, siginan at tiba daga fag taw ay anggan at madaragang fag taw. ¹² Ay kafanyu Akyay ban anya, dewa mauri at fagbulun. Ay da Kdi ban gamatangan at ngay asalanan. ¹³ Funbalugu At fagnafoyungun ka fag fatuyanan at bagu, anway ka fag fatuyanan at dan du e masuad. Ay nus nge wain dua ban e masuad anway dan wan, ay maliam wan.

¹ Ebi taguna fag fatuyanan ngayu wan at foyungan sa nu gseg Funbalugu baliwa. Ay anggan sa nu kawat sik bale at fagnansegan sas Funbalugu ste swa daga. ² Ay at naawat fag bale sinyag, duwa at salug. At taguna fag salug at ngayan te, At-Mafangibuk-Fag-Salug. Sanya wan at fagfasayugan salung, ay anggan at fagfatungkudan fafa ay sanya e fafa, at Tagsis-Funbalugu-Salubangan-Fag-Fafa. ³ Ay sis day Famalabag-Fag-Sinyag at faduwak salug at ngayan te, Taglabi-Nu-Mafangibuk. ⁴ Sanya at Fagyagoan-Bebanglu. Ay sanya at dayu tagladlafiun at Fagsuadan-Fatuyanan. Kanya fag duwak fagsuadan nadafut tuwa sanbung fanumyu sa at ngaba guyuy. Ay sisad basad e sik taya sanbung fanumyu. Ay at suadan sanya sad taya at ngayan te, Taw-Tuy. Ay anggan Arun at suan at nasalingsingan. Ay anggan e duwa yak dalifi at ke rirukan At fatuyanan. ⁵ At Fagsuadan-Fatuyanan at suklob at ngayan te, Fagfaliaman-Asalanan. Ay at matungkud sanya at tungud duwak kerubin, at masuad te, kata Funbalugu nut sanya. Ay manga at famalanbung at Fagfaliaman-Asalanan. Katsi di ami mafafoyung fagayu at afud at masuad. ⁶ Kayu niya at nafamasadan. Ay at ngay taganyun kayu menit nasakbo sanya sis taguna fag salug laman igfaning at nasugu ay nanfagbulun sanya. ⁷ Ay sanya faduwak salug, at Taguna-Way-Fag-Taganyun-Daul tagsakbo, ay kanya oma saiginan wadi sik banwa. Ay kanya oma dua gsakbo nu dua guba sik taguk, at fanganyun laman at fantabun at asalanan mandi ay anggan at ngay taw at yud natumlungud fag ngay asalanan. ⁸ Ay nu katanya, At-Masine-Yay-Fag-Falad At nafasaful antam te, at ngay taw dua masakbo sa at Taglabi-Nu-Mafangibuk fag salug, gina ebi ste swa daga at bale sinyag e masuad. ⁹ Kanya fag bale sinyag sik fafaskudanan yay sa katsi fag ngay menit. Madyay ebi dewa nafon siginan at tanuman fag anyun ay anggan at nafilas fag balan fag anyun, at ngay anyun dua mafafasine at tagseg at amatanganan laman umlayun sat masine. ¹⁰ Anway ka fag ngay anyun sa way at fakonun, ay at fanginum, ay anggan sat ugali nu gfegus. At masuad te, sa way at bilug fagtvngvd, yap ngay Funbalugu nafasaman fagayu. ¹¹ Ay tam Fagtayukan At faginsureun laman Kanya tam Taguna-Fag-Taganyun-Daul. Katanya tuway nafadasug tuwa sa antam at ngay fagmasineun. Ay Kanya nasakbo sa taglabi nu e masuad ay at masine fag bale sinyag. Ay bundi sik taw at naawat anway dua ste swa daga. ¹² Saiginan way tam Fagtayukan nu nasakbo sanya Taglabi-Nu-Mafangibuk fag salug. Ay kanya dua nauba taguk kambing ay riangan baka at taguk. At nauba At taguk tuwa mandi fiya fiya. Ay kanya long nabalabag wa fiya antam faggugat. ¹³ Ebi at ngay taganyun nafatayuk taguk kambing ay at baka ama at taguk. Ay anggan naburas sik dafug siginan at nagyagoan riangan baka sa sik taw at ke mafurat. Laman nafaliam ka fag taw at fagmafuratun ay laman gfasine at bilug sas Funbalugu. ¹⁴ Ay tam Fagtayukan At taguk glabi yap katvngvd sik balan at taguk. Ay At-Masine-Fag-Falad, At tagleleg faggugat, tagtarabang Fagtayukan, laman Kanya nafon At bilug, at yud e mauri fag anyun nus di sirut, sas Funbalugu. Ay At taguk At nafasine tam amatanganan laman malayun tuwa sat masine. Laman mubun tam tam ugali at yud e masuad. Ay tam fagfaningun antuwa sas Funbalugu. ¹⁵ Anway katanya, tam Fagtayukan At tagbuknga at bagu fag fatuyanan sa At nafili fag ngay taw ay sas Funbalugu. Laman At nafili fag ngay taw mafabul tuwa Funbalugu At nafatuyanan fag fagafonun at yud e fakatabuan. Anway tam Fagtayukan At faginkateun laman nafaliam ka fag ngay taw at asalanan siginan ebi taguna fag fatuyanan at yud nafafaning fiya fiya. ¹⁶ Sik taw nu e fatuyanan laman nafon ban at nanuranan gina inkate, at tiba dia nabul yap ngay tiba nasaful fiya fiya te, ka fag taw inkate wan. ¹⁷ Anway sik tagfanulitun nu e masuad at longan, gina yay ka fag taw inkate. Ay di e masuad at longan gina ka fag taw gleleg. ¹⁸ Katanya yangay anggan sa ebi taguna fag fatuyanan. Du e nafatvngvd nu du e taguk. ¹⁹ Ay ebi ebi Ku-Unga nu ntabu wa nu gfoyung fagayu Funbalugu At longan sasa ngay taw, kanya nauba at ngay baka riangan at taguk ay kambing at taguk, ay sik safa at famasagbatan. Ay kanya nabul sik baranuy ay sik maraska fag sigyu balan at fagfatayukan at ba taguk sas Funbalugu At-Rirukan ay anggan sasa ngay taw. ²⁰ Ay ginanya Ku-Unga nalong te, Iste fag taguk at fanfatvngvd At fatuyanan, Funbalugu At fanlong ayu te laman gfaning tuwam. ²¹ Ay katanya yangay Ku-Unga at fagfatayukun at ba taguk sat bale sinyag ay anggan sas fagayu tagsanya at fanseg fag nanuranan. ²² Ay Ku-Unga At-Longan nafoyung te, at nafasine nus nge wain, arvs sa way sik taguk at fanfasine. Ay nu dway e ba taguk, Funbalugu dua nafaliam at asalanan. ²³ At bale sinyag ay anggan fagayu tagsanya, at fafaskudanan yay ban tagsas Banwa, ay nafasine wa fiya. Ay at fanfasine kata aro at nafoyung fag anyun. Ay roro at urungan fiya fiya fag bale sinyag sa yays banwa at nafasine. Ay at nafasine sanya fag anyun glabi yap fiya fiya tagste swa daga. ²⁴ Anway Fagtayukan At fagsakboan, bundi sas Taglabi-Nu-Mafangibuk fag salug, sa sik taw at naawat. Anway ka fag salug sik fafaskudanan yay at urungan tagsis Banwa. Anway Kanya nasakbo wa sas Banwa. Ay insure wa sas Funbalugu At akbang laman tam Tagbuknga. ²⁵ Ste swa daga fag Taguna-Fag-Taganyun-Daul nu nasakbo sa Taglabi-Nu-Mafangibuk fag salug kayu banwa saiginan way nu nauba at ba taguk. Ay roro tam Fagtayukan dua ngayu ginan nu gfon At bilug te laman sik anyun. ²⁶ Nu katanya way ro, ngayu ginan way nu e gfauri Anya siginan waro ebis fagsigadan tam fagdaul daga. Roro mangaro at matuyan, saiginan way Kanya nu nsure ste swa daga katsi wa swa fakatabuan fag ngay menit. Laman nanfaliam fagayu taw at asalanan gina nafon At bilug laman sik anyun. ²⁷ Anway Funbalugu wan At ke fasadan te laman saiginan way fagayu taw nu nkate, ay bandi e nantap yay at asalanan. ²⁸ Ay katanya yangay anggan Fagtayukan At bilug nu sik anyun, ay saiginan way, laman nafaliam at ngay taw asalanan. Ay Fagtayukan At faduwa ginan ban nu kasure, duat sas asalanan baliwa. At fakasureun ban anway te, laman nanbalabag ban at ngay tagfanya fiya fiya Anya.

¹ Ku-Unga At-Longan bunya fiya fiya ka fag ngay masine at kumdasug ban. At-Longan sik ngay fafaskudanan yadi sanya fag ngay masine. Ay At-Longan dua batang mafafasine sa at ngay takakbang sas Funbalugu laman umlayun sat masine. Dewa e nafon kayu banwa kayu banwa ganyun yay kata ebia taw. ² Anway ka fag ngay anyun nu nafaliam di ro at ngay tagseg Funbalugu at asalanan, at tagseg di ban gamatangan at asalanan. Ay manga di ban gfon at anyun. ³ Ay roro ngap karo, ka fag ngay anyun gfaamatang way ngap karo sa ka fag ngay taw sas asalanan baliwa kayu banwa kayu banwa. ⁴ Anway sik baka tama at taguk ay anggan sik kambing at taguk dua batang e nafaliam sik taw at asalanan. ⁵ Fakatanyaun, ebi gina Fagtayukan gadasugun ste swa daga, Kanya nalong yay sas Funbalugu te, O, du O kaumsig sik ngay nafilas fag balan fag anyun, ay anggan sik ngay nafon fag anyun. Ay O, nafe bilug Tuwo Angku. ⁶ Ay du O guseganan dewa at nabatas fag anyun, ay dewa sik anyun at fantabun sa at asalanan. ⁷ Aw nalong Aktuwa sa Emu te, Ku Funbalugu, iste Aw, laman nanfaning Aktuwa Am fasadan. Fakatanyaun, nanfaning Aw At-Rirukan at foyungan ebi sa Angku baliwa. ⁸ Fagtayukan aro At longan te, Du O kaumsig ay du O guseganan, dewa at ngay nafilas fag balan fag anyun. Ay dewa at ngay nafon fag anyun. Ay dewa at nabatas fag anyun. Ay dewa sik anyun at fantabun sa at asalanan. Katanya Fagtayukan At nalong aro, dewa ganyun katanya igfaning Ku-Unga At-Longan. ⁹ Ay rodi Kanya nafamut yay fiya te, Ku Funbalugu, ste Aw, laman nanfaning Aw Am fasadan. Funbalugu nafaliam wan ebi taguna fag ngay longan sa at ngay anyun baliwa. Ay at fagfatvngvdun antuwa sa at faduwak longan sas Fagtayukan baliwa. ¹⁰ Ay Kanya nafaning tuway Funbalugu At fasadan te, laman fagayu tam, inlayun tuwa tam sat masine. Anway Isus Fagtayukan nu ganyun At bilug saiginan wadi gina nkate. ¹¹ Dewa faggugat fagayu taganyun e fagbulun kayu menit laman gfadogdogan gfon at anyun kata ebia taw. Dewa yud at anyun yud mafafaliam sik taw at asalanan. ¹² Roro ngap Fagtayukan At nafon At bilug wan ay saiginan wadi laman nanganyun, At mafafaliam taw at asalanan faggugat. Ay bandi Kanya malunggung wa sas Funbalugu At siun baliwa fag day tigyangan. ¹³ Ay Fagtayukan gfanya yay, yap ngay ban Funbalugu nafat sas daga Fagtayukan At fagmadaragangun at ngay tagfabarangian Anya. ¹⁴ Nu katanya, sadi wayk anyun at mafafasine faggugat nus nga sinu at kinsadi sas Funbalugu, laman umlayun sat masine faggugat. ¹⁵ Ay anggan At-Masine-Fag-Falad At nafatuyan sa antam katanya. Anway Kanya taguna nalong te, ¹⁶ Kata tuy Ku fatuyanan ban sa ka fag ngay taw, sat kumdasug ban fag ngay menit, Funbalugu nalong te. Sumandig Aw Ku longan sa at ngay talinga. Ay gfaamatanganan Akban anya Ku-Longan sa at ngay amatanganan. ¹⁷ Ay At-Masine-Fag-Falad nafamut yay fiya te, Kua ban gamatangan faggugat at ngay asalanan, ay anggan at ngay nafamabo. ¹⁸ Ay e nafaliam tuway at ngay asalanan, dua ban kaumsig sik anyun laman at fantabun at asalanan. ¹⁹ Ay katanya tuway, ku ngay fadugsay am, gafanud watam te, masakbo watam sas Taglabi-Nu-Mafangibuk fag salug sas Banwa, anway e nabusbus tuway Isus At taguk. ²⁰ Ay katanya At faginkateun, Kanya At nafe dalan bagu sa antam. Ay ka fag dalan nafadasug antam sa at day Famalabag-Fag-Sinyag ay anggan sa Taglabi-Nu-Mafangibuk fag salug. ²¹ Katsi e Taganyun watam At madaragang, At mafamagurang sas Funbalugu At bale. ²² Ay katanya tuway, katsi maakbang tuwa tam sas Funbalugu, anway matuyan tuwa tam amatanganan ay matvngvd tuwa tam fakafandiugun. Ay tam amatanganan kata sa ebi at fagfatayukan taguk, laman malayun sat masine ay di e mauri. Ay tam bilug kata nu e nafegus sik safa maliyo. ²³ Fatunglusi tuwa nu gfanya tam sa ebi tam fagsegun fag fagfanyaun. Ay dangai tam fainbalian. Anway matuyan tuwa At nafatuyanan sa antam. ²⁴ Ay tam amatanganan ani tuwa te, go tain nu gfantarabanganan tam sa tam iba, laman fagayu tam kadkafanyuan tuwa tam sa tam iba ay manga tam fagbulun masine tuwa. ²⁵ Ay lag gaguyudan tibak taw at yud maful. Ay am fadfatvngvdani tuwa ay iba at amatanganan. Ay anggan faugati yap takatanya, anway nasaful wam te, kakbang wan tam Fun-At-Menit. ²⁶ Dewa tam nadungug sa at matuyan fag longan, ay roro ngap nu gfaning yay tam faggugat sas asalanan, dua ban e tibak anyun at nanfamin ban tam asalanan. ²⁷ Ay nu katanya yay tam, e fakalimuun yay tam anway umdasug yay tam sas fagfasurean asalanan fag ngay menit. Ay anggan sas tagbiya fag afuy at nanfaliam ban at ngay tagsalag sas Funbalugu. ²⁸ Ebi ebi sik taw at nafamabo sa Ku-Unga At-Longan, tenday duwak taw ay ate tuluk taw at nafatuyan ka fag taw te, e asalanan. E nafate wa anya, ay du e kafanyu anya. ²⁹ Tain ay amatanganan. Setvngvd yangay katsi at faurianan sa sik taw at kinfurat dawdaw sas Funbalugu At Baguama. Ay manga kafurat yangay sas Funbalugu At nafatuyanan fag taguk, ebia taw At nafasine anya ay At nafaliam at asalanan. Ay igfanlamangan yangay sa At-Masine-Fag-Falad sa takafanyu ngap anya. ³⁰ Anway nasaful watam ka fag taglong at nalong te, Aw wan tagfauri. Ay Aw wan tagfafoli at mauri sa at ke mauri. Ay e longan yangay te, Funbalugu yay ban At nantap At ngay taw at asalanan. ³¹ Malimu wa ban fiya tam Tagleleg-Faggugat-Fag-Funbalugu At daluap nu nanyugfu ban antam. ³² Amatangani tuwa ebi ay fagbulun gina ebi Funbalugu igfasigad gfayamag sa ay amatanganan. Ay nasungatan tuwam dewa am e natakan ay dewa e nafauri ayu. ³³ Ay anggan e nataban ayu sasa ngay taw buknga, ay gfalingun ayu, ay gfauri ayu. Ay tiba ginan nangufud tuwam dewa e gfauri ay fadugsay. ³⁴ Ay kafanyu yangay am ay iba at kinsungsung. Ay guseganan tuwam dewa e nafamul ay fagagbilugun. Anway nasaful wam te, Funbalugu At nafon ayu glabi yay ebi ay fagagbilugun ste swa daga. Ay kanya at yud e fakatabuan faggugat. ³⁵ Katanya tuway, lag gubun ay fagafanudun at matvngvd. Anway gbiya ban fag fanambagun siginan ay fagafanudun at matvngvd. ³⁶ Ay sungatani sa ay amatanganan. Laman ay fagfaningun antuwa sas Funbalugu At fasadan. Ay laman mul ban am Funbalugu At nafatuyanan fag fagafonun sa ayu. ³⁷ At-Rirukan nalong yangay te, Kanya wan At ke fasadan, ay dua ban glugo sirut, ay umdasug wan. Ay dua ban glugo. ³⁸ Ku ngay taw at masadi fiya fiya sa Angku e leleg tuwa ban, anway kafandiug tuway sa Angku. Ay roro kanya nu nfoli way sa ebi, da Kua guseganan anya. ³⁹ Ay itam bundi tam at kinfoli fag ngay taw at mamin ban. Itam sik takafandiug tuwa tam fag ngay taw ay at kumbalabag ban.

¹ Anway kafandiug watam sas Funbalugu, intuyan watam te, umdasug wa ban fiya tam fagfanyaun. Ay matvngvd tuwa nu gafanud tam, dewa tam yud batang glag anya. ² Manga ebi ebi fag ngay taw kafandiug tuwa, ay Funbalugu nafoyung te, guseganan Aktuwa anya. ³ Ay antuwa tam kafandiug ay, intuyan watam te, Funbalugu At fangawat tam daga ay tam Banwa At longan wadi. Ay dewa e glag at awatan, du e glag at fangawat. ⁴ Anway Sik-Nauyup kafandiug tuway, kanya nafon tuwa sas Funbalugu sik anyun amasine yap si at kaka, Takawat-Sanbung, at anyun. Ay anway Sik-Nauyup kafandiug tuway, Funbalugu nafoyung te, guseganan Aktuwa sa at nafonan Angku fag anyun, teway gfadiuganan tuway sa Angku. Ay dewa Sik-Nauyup inkate, kanya kata yay nu ge longan katsi, anway kafandiug tuway ebi. ⁵ Anway Fagagbilugun kafandiug tuway, e naurug wa anya sas Banwa ay kanya di nkate. Ay tibak taw du e nalag anya, anway Funbalugu nabul wa anya. Kaduge gyud e naurug anya, e nafoyung te, Funbalugu guseganan anya. ⁶ Ay sik taw nu dway kafandiug, Funbalugu dua guseganan anya. Ay sik taw nu kaumsig tuwa kakbang sas Funbalugu, afanudi tuwa te, e Funbalugu wa fiya. Ay Kanya tagfe fanambagun sas fagayu tagsarap Anya. ⁷ Anway Tagfataluan kafandiug tuway, kanya nadungug Funbalugu nu glong nu gfatagak anya te, e mdasug ban dewa yud o e nalag katsi. Ay kanya naawat sik balutu, ay sanya talmanugangan at fakalangfean siginans safa daul. Tagfataluan at fagbulun at nafoyung te, mauri way ste swa daga at taw at fagbulun. Ay Funbalugu natap anya kata sik taw at malayun sat masine, anway kafandiug tuway sa Anya. ⁸ Anway Abrayam kafandiug tuway, kanya nafaning Funbalugu At longan te, loi wa ban sa Ku nafon emu fag daga. Ay kanya nalo wa fiya, dewa yud nasaful at fakadasugan ban. ⁹ Ay anway Abrayam kafandiug tuway sas Funbalugu, kanya indasug wa fiya sa ebia taw at nafatuyanan sa anya fag daga, ay nanbanwan sanya kata nu sik betaw. Ay nu gbanwan sas bale sinyag, maful gakbangan Kanya-At-Naasean ay Takamilug. Anway Funbalugu nafatuyanan yangay anggan sa Kanya-At-Naasean ay anggan sa Takamilug kata nu gfatuyanan sas Abrayam. ¹⁰ Ay Abrayam gafanud te, em fakadasugan ban sanya, at matvngvd ban fag fulan, Funbalugu wan At ke fasadan ay anggan At naawat. ¹¹ Anway Fun-At-Baguina kafandiug tuway, ay insure wa fiya sa anya sik fagmadaragangun. Ay gbuba yay dewa dawdaw mafufuina. Anway kanya gafanud tuwa te, matuyan Funbalugu At nafatuyanan. ¹² Katanya tuway, siginans Abrayam fag sadik taw, dewa dawdaw mafufuama, e ngay sugfun ban. Kayus galeme sas banwa. Ay kayus lagnas sas tigyangan lino daul, at yud e mafatap. ¹³ Ay aro fag ngay taw nafatunglus tuwa nu kafandiug anggan inkate, dewa yud insure sa anya Funbalugu At nafatuyan fag fagafonun. Ay kanya nu gamatang, kata wa nu glag kanya fag fagafonun dewa ngayayu, ay guseganan tuwa. Ay kanya igsulitanan te, kata yay tam sik betaw ay anggan kata sik famaklay ste swa daga. ¹⁴ Ay ka fag ngay takafandiug at fagnalongun katanya, anway te, kanya igsarap fiya fiya anya at talun mandi. ¹⁵ Ay ka fag ngay takafandiug nu gamatangan way ro gakafoliun sa ebi at talun, maafoli way ro. ¹⁶ Ay roro ngap yaya. At fakaumsigun sa tuwa tibak talun taglabi sa ebia taw at talun nu masine. At masuad te, kanya sa was Banwa. Katanya tuway, Funbalugu di kapla ka fag ngay taw nu glong Anya te, em Funbalugu. Ay Funbalugu nafamasadan sa anya sik bagu fag fulan. ¹⁷ Anway Abrayam kafandiug tuway, dewa Funbalugu igfaskud anya. Kanya gananfonun tuwa at baguama, Kanya-At-Naasean, kata sik anyun. Dewa Funbalugu nafatuyanan ebi sas Abrayam, Abrayam mafamasadan wa gananfonun at baguama fag bugtung. ¹⁸ Dewa ebia taw nalong te, siginan ban Kanya-At-Naasean am ngay sugfun. ¹⁹ Abrayam gafanud te, Funbalugu mafafaleleg yay at kinkate. Ay Abrayam at baguama nu nfoli sa anya, kata siginan at fagmatianan. ²⁰ Anway Kanya-At-Naasean kafandiug tuway, kanya nafadait sas Takamilug ay sas Tagraska te, Funbalugu nafadasug ban sa ayu sik ngay masine. ²¹ Anway Takamilug kafandiug tuway, kanya gina gakateun, nafadait yay sadi sadi sa At-Fakafamutan at baguama fag duwa te, Funbalugu nafadasug ban sa ayu sik ngay masine. Ay Takamilug igseg Funbalugu ay ginanya at fantukud anya at suan dalan wan. ²² Anway At-Fakafamutan kafandiug tuway, kanya gina makbang nu gakateun, nafoyung yay sa baliwas Taw-Tagagbuan nu kalfas ban sanya ginans talun Eiptu. Ay kanya nafoyung yay sa nu gsandig at butul baliwa. ²³ Anway Ku-Unga at mangaguyang kafandiug tuway, kanya nafasuksuk dawdaw at ngenge tuluk magdanun gina bagu nlangfe. Anway at mangaguyang nalag te, masine dawdaw fag sisian. Ay kanya dua kalimu sa ka fag talun at fun dewa kamabo sat longan. ²⁴ Anway Ku-Unga kafandiug tuway, kanya nu ndaul wan, kalimata way gdungug tiba nu gngayan anya te, O, fun Bale-Daul way o baguina at baguama. ²⁵ Ay Ku-Unga inkumsig wa inful sas Funbalugu At ngay taw, dewa ban e nafauri gfasfuan Funbalugu At ngay taw sanya. Ay dua kaumsig guseganan sas asalanan at yud glugo fag fagusegananun. ²⁶ Ku-Unga gamatangan te, dewa e gfalingun angku kata ban tam Fagtayukan, anway amasine yap dewa ngap aw fabul fagayu fagmabalanun sas talun Eiptu. Anway Ku-Unga e fagsegun wa fiya at fanamabagun ban. ²⁷ Anway Ku-Unga kafandiug tuway, kanya nalfas tuwa siginans talun Eiptu, ay dua kalimu sa at fun dewa kadotama sa anya. Ay Ku-Unga nasungatan wa nalo anway kata wa nu glag tam fagyudun glag fag Funbalugu tagufud anya. ²⁸ Anway Ku-Unga kafandiug tuway, kanya nafoyung sasa ngay Taw-Tagagbuan at taguna fag Famalangfe fag menit te, fatayuki sik taguk sa at sakbawan bale. Laman tagfate at ngay turungana di sumakbo sat bale. ²⁹ Anway at ngay Taw-Tagagbuan kafandiug tuway, kanya nu gdife wa Lino-Maraska kata way nu nalo sa at matat fag daga. Ay at ngay Taw-Eiptu nanfaning yama nandife, inkafuy wan fagayu. ³⁰ Anway at ngay Taw-Tagagbuan kafandiug tuway, fulan Bangluan at alad fag ngay batu nafangarufan wan, nu ntabua fituk menit Taw-Tagagbuan nu gsafungan ka fag fulan. ³¹ Anway Tagbiya, ebia taw sik fakamayunan fag mangena, kafandiug tuway, kanya di nkate gasfuan sanya fag ngay takamabo. Anway kanya nafasakbo tuway at masuksuanan fag duwak betaw. ³² Go gfatunglus akyap gfoyung ayu tibak takafandiug ebi at fagbulun. Ay nu ndain dua msak at lungud menit nu moyung aw ayu tuy fag ngay taw at fagbulun. At ngayan te, Takamatang. Ay Kilat. Ay Sik-Menit-Sirut. Ay Kanya-At Nafaluang. Ay Fakafanyuun. Ay anggan At-Ke-Ngayan-Funbalugu. Ay anggan yangay Funbalugu At ngay taglong ebi at fagbulun. ³³ Anway kanya fag ngay taw kafandiug tuway sas Funbalugu, kata tuy at fagbulun. Nababo sik ngay fun. Ay nafili at masine. Ay nabul Funbalugu At fatuyanan at fagafonun sa anya. Ay nafagvm sik ngay idu tagfangagat at bibig. ³⁴ Ay nafalayung tagbiya fag afuy. Ay nalagyu wan siginan tagabasingun e nanfate yama. Ay dewa mafanalo at bilug, indaragang yay. Ay madaragang nu gfabarangian tagmauri. Ay anggan naayiyan at ngay tagfabarangian anya fag betaw. ³⁵ Ay anggan tibak mangena kafandiug tuway. Kanya nafasakbo tuwa ebi at kinkate at kalongan tagdog gleleg. Ay tibak takafandiug dua kaumsig glagyu, dewa e nafauri dawdaw anya anggan nafate. Anway gafanud te, nu gdog yay gleleg, amasine yap ban katsi nu gbanwan. ³⁶ Ay tibak takafandiug matvngvd at natakan. Anway e nafalingun anya. Ay e nafalang dawdaw. Ay e nasalod tagradrabingan. Ay anggan e nasungsung. ³⁷ Ay e nafalang anya batu. Ay e nafilas anya familas tagbagangan laman nalifung. Ay tiba at famate sik fiso. Ay tiba at lanbung balat tupa ay balat kambing wadi. Ay at tiba du e kwa. Ay tiba e gfauri way. Ay anggan e gfalingun ya tiba. ³⁸ Ka fag ngay takafandiug amasine yap dawdaw sa ka fag ngay taw ste swa daga. Ay kanya nainkaliaman wa nalo sasa ngaba talun at yud e taw, ay sasa ngaba muyud. Ay at fagtiugan sasad luib way. Ay tiba sa way sad sungkib daga. ³⁹ Dewa e nafoyung te, kanya fag ngay taw kafandiug tuwa. Kanya dia nafabul Funbalugu At fatuyanan at fagafonun sa anya. ⁴⁰ Anway Funbalugu At fasadan sa antam amasine sa yap At fasadan ebi. Madyay anggan ebi fag ngay takafandiug ay anggan itam katsi, Funbalugu nafasadi tuwa nu gfasine laman umlayun sat masine.

¹ Ka fag ngay takafandiug at nananfatuyan ebi sa at fakafandiugun, katsi kata yangay nu e gulit antam. Anway katanya wayay, fagayu tam ubuni yap nus nge wain at tagsalag antam. Ay anggan sigon ubuni yangay tam asalanan, ay anggan at yud kaubun fag asalanan. Ay fagayu tam sungatani tuwa nu kafandiug tam. Kata sik tagladlabian nu gsungatan nantarung sa at filian fag dalan. ² Ay amatangani tuwa faggugat sa tam Isus. Anway Kanya At nafasigad tam fakafandiugun ay anggan ban At fatabu. Ay anway Kanya nasaful te, e fagusegananun yay, ay nasungatan tuwa anggan intuktuk sas salibagan kayu. Ay Kanya dua gamatangan dawdaw dewa te, sik mapla wa fag fakateun. Ay bandi Kanya malunggung wa sas Funbalugu At fagmalunggungan daul sa at siun fag day tigyangan. ³ Amatangani yangay sas Isus. Anway Kanya nasungatan tuwa nu gbaris, dewa at ngay tagasalanan igfauri dawdaw Anya anway kalimata dawdaw Anya. Ay fagamatanganun Anya, laman di ban am mafanalo ay laman manga di ban am kabalu sa ay amatanganan. ⁴ Anway anggan dewa am gfabarangian sas asalanan, di am e fakarukan ay di e nafate ayu. ⁵ Go du am gamatangan sa At-Rirukan at tagfatvngvd ay amatanganan. Anway at fagnangayan ayu te, am, Ku ngay unga wan. At longan te, Ku unga, amatangani te, Funbalugu At famaegan sa emu e masuad wa fiya. Ay lag kabalu sa am amatanganan dewa Kanya nafegan emu. ⁶ Anway Aw Funbalugu igfegan Kwa fiya fagayu Ku fakesugun fag taw. Ay Aw igfegan fagayu Ku nafangayan te, Ku unga. ⁷ Sungatani tuwa dewa e famaegan sa ayu. Anway katanya wan Funbalugu At fagbulun sa At ngay unga, anway am wan At unga. Go e unga ste swa daga at tama yud batang gfegan anya. Go yaya. ⁸ Ay ay tama nu dua batang gfegan ayu kata nu gfegan at tibak sisian, roro fiya fiya bunwa am at unga. Sik nafamayun way am. ⁹ Ay kata tuy yangay. Tam tama ste swa daga dewa igfegan antam, igseg tuwa tam anya. Ay glabii yap nu gseg tam tam Tama sas Banwa, anway sanya ginan wan tam faglelegun faggugat. ¹⁰ Anway tam tama ste swa daga nu gfegan antam, dua glugo, kaduge way at fakaumsigun. Ay roro Funbalugu At fagfeganun antam, at masuad te, laman e fanambagun tuwa tam. Laman insadi tuwa tam sas Funbalugu nu malayun sat masine. ¹¹ Gina sik taw e famegan, masait way ay dua guseganan. Bandi ban ka fag famegan igfabagu sik taw at ugali. Ay sanya ginan ka fag taw umke fanambagun ban. Ay at ugali manabayan tuwa, ay malayun sat masine. ¹² Ay nu katanya, dewa am kalufuy ay take, e fagbuluni. Ay fagonguni tuwa ay tud at yud magong. ¹³ Ay nu glo am sai tuwa at maturun fag dalan. Laman sik taw tagalbian di maslu at darafa. Ay laman umfiya tuwa. ¹⁴ Maseganamai tuwa ay manga ay ugali manabayani tuwa sas fagayu taw. Ay laman malayun tuwam sat masine. Anway sik taw at yud katanya, dua ban lumag tam Fun. ¹⁵ Tagaki tuwa, laman ban sa ayu, di e taw at yud mul Funbalugu At famanyun. Ay laman ban, di e taw sa ayu at amatanganan at kinkata sik mayat fag fakonun. Anway takatanya, nu indaul wan, igfagsigadan way igfatakan ay igfafurat way sa tibak taw. ¹⁶ Ay tagaki yangay laman ban, di e taw sa ayu takamayun ay anggan yud gfaning sas Funbalugu kata Tagraska. Kanya nafon wan at fakaturunganaun, ay at nabul sik yafun way sirut. ¹⁷ Ay am nasaful te, bandi ban kanya dewa kaumsig nabul at tama natugunan, at tama kalimata way anya. Anway kanya dua nalag tibak fagbulun laman mafafasaman ebi at amatanganan, dewa sak nauyway. ¹⁸ Ay ay fakakbangan fag muyud di kata Taw-Tagagbuan ebi ebi at fakakbangan fag muyud, at ngayan te, Bulan-At-Muyud. Kanya at nated fiya. Ay at ke tagbiya fag afuy. Ay at ke mason fag marum. Ay at ke fakabaluun. Ay at ke bagyu. ¹⁹ Ay at ke gbudyung dawdaw. Ay anggan at ke ge longan at mauruan daw. Ay at ngay taw matvngvd nu glong te, Atuasi wan. Lag gfoyung emi takatanya. ²⁰ Anway at ngay taw mason dawdaw nu kalimu nu gdungug way ka fag longan te, Nus nge wain, dewa sik mela way nu nastiye way fag muyud, falangi wa anya batu anggan fatei. ²¹ Ay kin wa fiya. At ngay taw nu nabantay, kalimu dawdaw. Ay Ku-Unga nalong te, Kudkulugan aw dawdaw kalimu. ²² Ay roro ngap ay fakakbangan fag muyud at ngayan antuwa te, muyud Malanggangan. Ay sanya wan tam Tagleleg-Faggugat-Fag-Funbalugu At fulan, at ngayan te, Erusalem tagsas Banwa. Ay sanya wan Funbalugu At ngay tagbukngan taguseganan ayuwayu. ²³ Ay sanya yangay Funbalugu At ngay turungana at fagmafulan, fagayu at ke nariruk at ngayan sas Banwa. Ay sanya yangay anggan Tagtap taw at asalanan, at masuad te, Funbalugu Tagmagurang fagayu. Ay sanya yangay at matuyan ay kinlayun sat masine fag ngay taw, at kinkate ebi. ²⁴ Ay inkakbang yangay am sa tam Isus, at Tagbuknga sa at bagu fag fatuyanan. Ay sanya yangay anggan At fagfatayukan taguk. Ay at masuad te, nu kafanyu taw, glabi yay Sik-Nauyup at taguk nu e masuad. ²⁵ Tagaki tuwa ayu. Laman di ban am kamayud sa At Taglong ayu. Ebi ebi ka fag ngay taw igfayud wayay iste swa daga at taglong at nafatagak anya. Ay kanya dua nalfas siginan at ngay faurianan. Ay katanya wayay, anggan itam. Dua ban tam malfas, nu kamayud way tam tagsiginan Banwa fag Taglong At nafatagak antam. ²⁶ Ebi ebi Funbalugu At longan siginans muyud at nauwig tam daga. Ay katsi Kanya nafatuyanan yay fiya te, saiginan ya ban fiya nu gfauwigan Aw, ay bundi at daga fagtvngvd, anggan wa sigon at kiwang. ²⁷ At fagnalongun te, saiginan ya ban, at masuad te, nanfaliam wan fagayu at nauwig. Ay at masuad yangay te, fagayu at naawat. Laman at sawad at yud way nauwig. ²⁸ Ay katanya tuway, fagayu tam useganani tuwa sa tam Funbalugu. Anway Kanya nafon antam At fagmagurangun at yud guwigan. Fagayu tam segi tuwa Anya. Ay fauseganani tuwa Anya, gina tam kesug ay kalimu Anya. ²⁹ Anway tam Funbalugu kata sik afuy daul at tagbatas fagayu.

¹ Fatunglusi tuwa nu kadkafanyuan am anway dugsay wam. ² Ay dangai kaliam nu gfasakbo am at betaw. Tiba ginan sik taw nu nafasakbo tuwa, roro at fagfasakboun anwa Funbalugu At tagbukngan, dewa yud natoglag anya. ³ Afanuyi yangay at ngay kinsungsung, kata nut sanya am. Ay afanyui yangay at ke nafauri. Anway anggan am, iste yay am swa daga. ⁴ Fagayu tam faningi ay fasinei tuwa tam ugali sa nu kadaduwa tam baliwa. Ay sik daduwa nu gfasegsegan sai tuwa at sadi, ay lag galabian sa tiba. Anway Funbalugu igfauri ban sik takamayun ay anggan sik tagfaning at mauri fag fagalabianun. ⁵ Ay tagaki tuwa, laman ay ugali bundi sik tagalabian sa salafi. Useganani wan nus nga seyu ginanya ay fagagbilugun. Anway Funbalugu wan At nalong te, Faggugat da Kwa kayayu ayu. Ay da Kwa gubun ayu faggugat. ⁶ Laman matuyan tuwa nu nalong tam te, Tam Funbalugu ku Tagtarabang. Aw, kwa kalimu, dewa sik taw mauri at fagbulun sa angku. ⁷ Amatangani tuwa ay ngay magurang ebi at nafoyung ayu Funbalugu At longan. Ay anggan amatangani yangay at ngay ugali kaduge gleleg ay anggan inkate. Ay faningi yangay kata ebi at matvngvd takafandiug. ⁸ Tam Isus Fagtayukan kata yay ebi At ugali, anggan katsi ay anggan faggugat ban. ⁹ Lag gdungugan sa tibak foyungan nu saman way sa ay fakafandiugun. Ay at masine tagfatvngvd tam amatanganan siginan tuwas Funbalugu At famanyun, ay bundi siginans fagfaningun taw at ugali sas fakonun baliwa. Anway at fagfaningun taw at ugali at yud e fanambagun. ¹⁰ Katsi e anyun watam. Saman yay sa ebi at nafon fag anyun sas Funbalugu At bale sinyag ste swa daga. Ay ebi fag ngay tagfon at anyun dia kasakan te laman e fanambagun siginan ka fag anyun at nafon antam. ¹¹ Anway ebi at Taguna-Fag-Taganyun-Daul nauba at ba taguk siginan at ngay nafilas fag balan sa Taglabi-Nu-Mafangibuk fag salug. Laman at fantabun at asalanan. Ay rodi ka fag ngay balan at bilug nabatas wa sas day fulan. ¹² Ay katanya yangay anggan Isus. E nafauri yangay dawdaw sas day fulan. Laman At taguk fiya fiya at nafalayun at ngay taw sat masine. ¹³ Ay nu katanya, glo watam. Nangakbang watam sa Anya sas day fulan. Laman anggan itam, maasungatan tuwa tam gina e gfalingun antam. Kata Isus nu gsungatan gina e gfalingun. ¹⁴ Anway iste swa daga tam fulan e fakatabuan yay. Ay igsarap yay tam at yud e fakatabuan ban fag fulan. ¹⁵ Ay anway Isus nafagbulun tuway sa antam, faggugat fagayu tam segi tuwa sa tam Funbalugu, kata nu gfon tam sik anyun sa Anya. At masuad te, fagayu tam foyungi sa tibak taw tam Isus At fagmasineun. ¹⁶ Ay manga dangai kaliam nu gfagbulun am sat masine. Ay tadtarabanganani tuwa. Anway Funbalugu kaumsig tuwa takatanya fag anyun. ¹⁷ Faningi tuwa ay ngay magurang ay segi tuwa anya. Anway kanya faggugat tagmagurang ayu. Ay kanya ban moyung sumesadian at fagbulun mandi sas Funbalugu. Faningi tuwa anya, laman kanya guseganan tuwa ayu, ay di kabalu. Anway nu kabalu way, du e fanambagun sa ayu. ¹⁸ Ay darangini tuwemi. Anway nasaful wami te, di ami e asalanan. Ay em fasadan laman fagayu em ugali matuyan tuwa. ¹⁹ Ay matvngvd nu glong aw ayu te, Darangini, laman mafali tuwa Funbalugu nu gfafoli angku sa ayu. ²⁰ Igdarangin aw sas Funbalugu tagfanabayan sas taw ay tagfaleleg tam Fun Isus, At tiba tungud At tagtanud sas takafandiug. Anway Isus At taguk at nafatvngvd Funbalugu At fatuyanan at yud e fakatabuan. ²¹ Igdarangin aw ayu te, laman Funbalugu mamanyun nangus sa ayu fagayu At fagmasineun. Laman nanfaning tuwa ban am At fasadan. Ay laman Kanya At nanfon antam At fagmadaragangun. Laman fagayu tam fagbulun gfauseganan tuwa tam Anya. Katanya tuwa Isus Fagtayukan At fagbulun. Ay e gseg tuwa ban dawdaw Anya faggugat faggugat. Kin, katanyai tuwa. ²² Ku ngay fadugsay, matvngvd nu glong aw ayu te, laman gamatangan tuwam ku foyungan ku famatvngvd ay amatanganan. Anway dua ngaba ku rirukan sa ayu. ²³ Kaumsig aw nu nasaful am te, tam fadugsay, Tagseg-Funbalugu e nafalfas wan siginans fakasungsungan. Ay kanya nu mafali tuwa ban nu kadasug stiye, nantaban ban aw anya gina aw nanlag ayu. ²⁴ Igfadasug ami em fagusegananun sa ay ngay magurang, ay anggan sas Funbalugu At ngay taw sanya te, gamatangan tuwami ayu. Ay anggan at ngay taw tagste si angku siginans talun Italia nafadasug yangay at fagusegananun sa ayu. ²⁵ Funbalugu At mamanyun nangus sa ayu fagayu. Kin, katanyai tuwa.