Galatians

Galatians

¹ Siginan angku, Fandak, Isus At-Suguan at sadi. Bundi sik taw at nafili angku. Ay bundi sik taw at nasugu angku, antuwa tam Isus Fagtayukan ay tam Funbalugu tam Tama. Ay Kanya tuwa At nafaleleg tam Isus siginan At fagmatianan. ² Nanriruk aw sa ayu, sasa ngay Funbalugu bale at taw sas talun Galasia. Ay aw ay anggan fagayu tam ngay fadugsay tagste si angku nanfadasug sa ayu em fagusegananun te, gamatangan tuwami ayu. ³ Funbalugu tam Tama ay tam Fun Isus Fagtayukan At mamanyun nangus sa ayu ay At nanfanabayan ayu. ⁴ Tam Fun Isus wa Fagtayukan At ke fasadan At faginkateun anway e asalanan watam. Laman gfalfas antam siginan katsi fag ngay menit fag ngay mauri, nanfaning tam Funbalugu tam Tama At fakaumsigun. ⁵ Katanya tuway segi tuwa tam Funbalugu faggugat faggugat. Kin, katanyai tuwa. ⁶ Nadulawan aw dawdaw te, famafaliun nu gfangafoliun am siginan tam Funbalugu, dewa Funbalugu nafili ayu. Ay At fagnafiliun satu ro anwa Isus At famanyun sa ayu. Ay roro mangaro katsi igfaning way am sa tibak masine fag barita. ⁷ Ay ka fag masine fag barita bunwa sik Masine-Fag-Barita fiya fiya. Roro ka fag ngay taw way famalimuanan ayu, madyay nu gfoyung nafasaman way siginan at Masine-Fag-Barita siginans Fagtayukan. ⁸ Ay dewa ami ay dewa sik tagbukngan siginans Banwa at foyungan ayu nu saman way ebi em nafoyung ayu at Masine-Fag-Barita, e fadasug ban nangus anya sas faurianan at yud katabu. ⁹ Kata nu glong ami ayu ebi, katanya yangay anggan ku longan katsi te, nus nga sinu fag taw at moyung ayu tibak masine fag barita nu saman way ebi ay nadungug ku foyungan, e fadasug ban nangus anya sas faurianan at yud katabu. ¹⁰ Go setain ku fagbulun. Go sumarap aw te laman taw sumeg angku. Ay go lagi. Ay go ate siring sumarap aktuwa Funbalugu nu guseganan angku. Go kin. Ay go sumarap aw te laman taw museganan angku. Ay go lagi. Nu katanya way ku fagbulun, bun akwa Fagtayukan At fanuguan. ¹¹ Ku ngay fadugsay, asafuli tuwa ku foyungan ayu at Masine-Fag-Barita, bundi siginans taw at amatanganan. ¹² Ku e nadungug at Masine-Fag-Barita siginan sik taw. Ay du e taw nafoyung angku. Tam Isus tuwa Fagtayukan At nafasaful angku. ¹³ Ebi nadungug wam te, aw sik tagfaning aw dawdaw em ugali, ami Taw-Naseg. Madyay madaragang nu gfauri aw Funbalugu At ngay takafandiug. Anway ku fasadan fate aknangus kanya fag ngay taw fagayu. ¹⁴ Anway nalabi akyay ku ngay fagsud fag Taw-Naseg nu gfaning aw em ugali. Madyay maseganama aw nu gfaning aw ku ngay aguyangan at ugali. ¹⁵ Dewa katanya ebia taw ku fagbulun, roro Funbalugu nafili yay angku, dewa aw yud e taw. Ay bandi Kanya sumugu wa long ban angku nu gmagurang kwan, anway At famanyun sa angku. ¹⁶ Ay Kanya kaumsig igfoyung angku At Baguama At ugali. Laman aw yangay ban at moyung sa at Yud-Naseg-Fag-Taw At Baguama At ugali. Ginanya aw da ku e fagintoan sa sik taw. ¹⁷ Ay da kua nalo sas Erusalem laman nanfamatuan aw sa ebi taguna Isus At-Ngay-Suguan. Ay rodi aw nalo akwa sa Sik-Talun-At-Yud-E-Safa. Ay bandi kafoli kyangay sas fulan Damasku. ¹⁸ Ay nu nlangfe wa tuluk banwa, nalo aw sas fulan Erusalem, laman nanfamatuan aw sas Takata-Sik-Batu. Ay sanya kyay 14k yabi. ¹⁹ Kaduge aw sanya, ku e nalag Isus At-Suguan tiba, dasday Santiagu fag sadi, tam Fun At fadugsay at mafanud. ²⁰ Katsi nanfaurunganun akyay tuy ku rirukan sa ayu. Ay igfatuyanan aw sa tam Funbalugu te, aw kua kamuagan. ²¹ Ay bandi nandalan akyay nanlag sas talun Datag-Buid ay Silisia. ²² Faggugat Fagtayukan At taw sasa ngay bale fakafulan sas talun Naseg dia batang glag angku. ²³ At dungganan ebi anyay fagtvngvd te, ka fag taw at nafauri emi ebi, ay katsi kamoyung tuwa sa tam fakafandiugun baliwa, kanya ebi dewa kaumsig nanfamin takafandiug. ²⁴ Ay at ngay tagdungug ginanya, katsi igseg tuwa tam Funbalugu, anway kafandiug aktuwa.

¹ Ay nu nlangfe wa 14k banwa, gdog kyangay fiya sas Erusalem. Ay ku ufud gina aw glo sik taw at ngayan, Sik-Nanfatvngvd. Ay nataban akyangay Titu. ² Ku fagnaloun sanya anway Funbalugu wan At nasugu angku. Ay nanfamansulit aw sanya sas takafandiug at ngay magurang fagtvngvd sas Erusalem te, setain ebi nu kamoyung aw at Masine-Fag-Barita sa at Yud-Naseg-Fag-Taw. Ku fagnanfamansulitun laman ebi ku nafoyung, ay anggan ku foyungan katsi, laman ban di e gsalag. ³ Ay anggan ku ufud Titu, sik Taw-Gresia, at takafandiug at ngay magurang di nasugu anya te, faningi Taw-Naseg at fagtoglagan. ⁴ Dewa katanya, tibak taw dua gfadiuganan sa takafandiug at ngay magurang. Kanya maful sa emi kata em fadugsay, dewa yud kafandiug, anway gasarapan te, tain ro em fagbulun. Anway du ami gfaning fagayu Taw-Naseg at ugali. Anway ami Fagtayukan wami Isus At taw. Ay ka fag ngay taw at yud kafandiug at fakaumsigun te, anggan ami sik fanuguan yakman ami sas Taw-Naseg at ugali. ⁵ Roro ngap dimi gfaning anya, nus di sirut, laman ban ay nadungug sa tuwa at Masine-Fag-Barita fiya fiya. ⁶ Ay at takafandiug at ngay magurang sas Erusalem, dewa e gseg anya, kanya dua mafafamut ku foyungan. Ay dewa tiba tungud fag taw ay dewa tiba daga fag taw, du e masuad sa angku. Anway Funbalugu du e filian taw. ⁷ Ay kanya fag ngay magurang nasaful te, Funbalugu wan At nasugu angku laman gfoyung aw sa at ngay taw at yud nafe fagtoglagan siginans Taw-Naseg. Kata yangay Funbalugu nu gsugu Takata-Sik-Batu laman gfoyung sa at nafe fagtoglagan fag ngay taw. ⁸ Anway Funbalugu nu natarabang Takata-Sik-Batu laman nanfoyung sas taw ke fagtoglagan, katanya yangay Funbalugu natarabang yangay angku laman nanfoyung aw sa at Yud-Naseg-Fag-Taw. ⁹ Ay Santiagu ay Takata-Sik-Batu ay Uan, at bilang at tiba tungud at magurang, kayu niya at nasaful te, Funbalugu nasugu angku. Ay kanya nafatuyanan nafadiuganan emi, aw ay Sik-Nanfatvngvd. Laman ami duwa at nanfoyung sa at Yud-Naseg-Fag-Taw. Ay kanya fag tulu at nanfoyung sa at nafe fagtoglagan fag ngay taw. ¹⁰ Ay kanya fag tulu at nalong sa emi fag duwa te, Afanyui sat yud e kwa. Ay kin, kaumsig aw nantarabang sat yud e kwa. ¹¹ Dewa ebia taw nafatuyanan, gina Takata-Sik-Batu nansibo emi sas fulan Antiukia, igsalag aw anya sat ngay takafandiug fagdungugan. Anway dia masine at fagbulun. ¹² Madyay kanya gfangon way gfasfuan at Yud-Naseg-Fag-Taw kaduge yud indasug tibak Taw-Naseg siginans Santiagu. Ay nu ndasug wa long kanya fag ngay taw, Takata-Sik-Batu inyayu wan siginan at Yud-Naseg-Fag-Taw at akbang. Anway kanya kalimu sa ka fag ngay Taw-Naseg tagfaning fiya fiya sa at ugali sat fagtoglagan. ¹³ Ay at tibak Taw-Naseg sanya igfaning yangay Takata-Sik-Batu aro nu kayayu. Ay katanya yangay anggan Sik-Nanfatvngvd nafaning tiba at fagbulun. ¹⁴ Ay aw nu glag aw madyay at ngay fagbulun dua gfadiuganan sa at Masine-Fag-Barita baliwa at matuyan. Ay nu katanya, nalong aw sas Takata-Sik-Batu, sas fagayu taw at fagdungugan te, Ebi o wan tagfaning at Yud-Naseg-Fag-Taw at ugali ay bunwa Taw-Naseg at ugali. Taw ro katsi am fagfabulunun sa at Yud-Naseg-Fag-Taw te, faningi Taw-Naseg at ugali. ¹⁵ Itam wan Taw-Naseg siginan ngay tam bagu kalangfe, madyay tam mangaguyang sik Taw-Naseg. Ay bundi tam at Yud-Naseg-Fag-Taw at ke ngayan te, Tagasalanan. ¹⁶ Dewa katanya, nasaful watam te, Funbalugu dua gtap sik taw kata at yud e asalanan dewa tagfaning Ku-Unga At-Longan. Funbalugu natap sik taw kata at yud e asalanan nu kafandiug tuwa sas Isus Fagtayukan. Ay anggan itam Taw-Naseg, kafandiug tam sas Fagtayukan Isus, laman Funbalugu tumap antam kata at yud e asalanan. Anway kafandiug tam sas Fagtayukan, ay bundi fagtvngvd te, igfaning watam Ku-Unga At-Longan. Anway nus di sadik taw e tumap wa fiya kata at yud e asalanan dewa te, tagfaning wa Ku-Unga At-Longan. ¹⁷ Ay itam fag ngay Taw-Naseg, tam fagsarapun nu anway te, laman Funbalugu tumap antam kata at yud e asalanan anway kafandiug watam sas Fagtayukan. Ay roro tiba nu gfangayan yay antam te, sik tagasalanan, anway dia tam gfaning sa Ku-Unga At-Longan. Go Fagtayukan sik tagfe asalanan. Go igdi. Igdi, di katanya. ¹⁸ Anway ebi nalong akwa te, Faningi Fagtayukan. Ay katsi nu akwa te gdog akyay iglong te, Faningi Ku-Unga At-Longan, anggan aw sik tagasalanan akyay. Anway da kia gfaning sa Ku-Unga At-Longan. ¹⁹ Ku-Unga At-Longan kata nafate angku. Ay aw kata akwa at kinkate fag fanuguan, anway da kua gfaning Ku-Unga At-Longan katsi. Anway katsi nu maugalian aw sa tuwas Funbalugu fagsadi. ²⁰ Anway kata akwa inkate sas salibagan kayu gasfuan Fagtayukan. Laman bundi aw tagleleg katsi. Fagtayukan tuwa tagleleg sa ku basad. Ay katsi masine tuwa nu maugalian aw, anway kafandiug aktuwa sas Funbalugu-At-Baguama. Kanya takesug angku. Ay Kanya At fasadan At faginkateun laman e fanambagun aw. ²¹ Yaya da kdi gfayud Funbalugu At fakafanyuun dewa aw gfayud Ku-Unga At-Longan. Anway Funbalugu nu natap way sik taw kata at yud e asalanan anway at fagfaningun nu Ku-Unga way fagtvngvd At-Longan, tam Fagtayukan At naatean du e masuad.

¹ Am fag ngay Taw-Galasia, kata way am yud mamatanganan. Sinu sangay at nafanluk ayu. Madyay ebi nafoyung ku ayu, nafayamagun kwan kata wa nangus nu nalag am tam Fagtayukan nu nkate sas salibagan kayu. ² Sadi ya ro katsi ro ku fagintoun ayu. Go si wa ayu Funbalugu At-Masine-Fag-Falad anway nafaning wam Ku-Unga At-Longan. Ay go ate si wa ayu At-Masine-Fag-Falad anway nadungug am at Masine-Fag-Barita ay kafandiug tuwam. ³ Go sangay di am mamatanganan. Madyay ebi nafasigad wam e bagu ugali siginan At-Masine-Fag-Falad. Ay taw way madyay anggan katsi ay fagfaningun sa ay bilug at fakaumsigun. Ay go ate igdi. ⁴ Go ebi at kindasug fag ngay faurianan sa ayu, go e masuad. Kin, e masuad wa fiya. ⁵ Taw ro Funbalugu At fagnafatsaun ayu At-Masine-Fag-Falad. Ay At fagnafasureun sa ay buknga At madaragang fag fagbulun. Go anway te, igfaning am Ku-Unga At-Longan. Ay go ate, nadungug wam at Masine-Fag-Barita ay kafandiug wam. ⁶ Ay katanya yangay Abrayam. Kanya kafandiug tuwa sas Funbalugu. Ay anway kafandiug tuway, Funbalugu natap Abrayam kata at yud e asalanan. ⁷ Ay nu katanya, nasaful wam te, at ngay takafandiug kata wa Abrayam at sugfun at mafanud. ⁸ Ay At-Rirukan naguna nafoyung te, Funbalugu natap yangay anggan at Yud-Naseg-Fag-Taw kata at yud e asalanan nu kafandiug tuwa. Katanya at Masine-Fag-Barita at foyungan sas Abrayam te, Fagayu talun at ngay taw sas fagdaul daga mul ban sik fagmasineun siginan emu. ⁹ Anway Abrayam kafandiug tuway, Funbalugu e ngay nafamanyun sa anya. Ay nu katanya, nus nga sinu takafandiug, Funbalugu e nafamanyun yangay sa anya kata nu nafamanyun sas Abrayam. ¹⁰ Fagayu taw at fagfaningun nu anway fagtvngvd sis Ku-Unga At-Longan, e gfauri ban anya. Anway At-Rirukan nalong te, Fagayu taw dewa gfadiuganan fagayu sa Ku-Unga At-Longan ay nu dway fiya fiya gfaning fagayu, umke faurianan yay ban. ¹¹ Ay nasaful watam te, Funbalugu dua gtap sik taw kata at yud e asalanan dewa tagfaning Ku-Unga At-Longan. Anway at Rirukan nalong te, Sik tagfadiuganan fiya fiya sas Funbalugu gleleg tuwa anway kafandiug. ¹² Dua kata at sadi sik taw tagfaning sa Ku-Unga At-Longan ay sik taw takafandiug fiya. Madyay At-Rirukan nalong te, Sik taw gleleg tuwa nu nafafaning di fagayu Ku-Unga At-Longan. ¹³ Ay roro e nafauri wa Fagtayukan laman malabag antam siginan Ku-Unga At-Longan at faurianan. Anway At-Rirukan nalong te, Funbalugu At nanfauri nus nga sinu fag taw at nafate sas kayu. ¹⁴ Katanya Fagtayukan At fagbulun. Laman Funbalugu At nafatuyanan ebia taw fag masine sas Abrayam sumugfunanan anggan sa at Yud-Naseg-Fag-Taw, anway Fagtayukan Isus At fagbulun. Laman fagayu tam nu kanfandiug tuwa tam, Funbalugu fatsa antam At-Masine-Fag-Falad, nanfaning At fatuyanan ebia taw. ¹⁵ Ku ngay fadugsay, amatangani ku fafaskudanan te, sik taw nu nafatuyanan wa fiya sa tibak taw, at tiba di e yud nafe fanambagun ay manga dua mafafamut ka fag fatuyanan. ¹⁶ Katanya yangay ebi Funbalugu nu gfatuyanan sas Abrayam ay anggan sa at Sugfun. At longan bunwa te, sas Abrayam at ngay sugfun. At longan antuwa te, sa am Sugfun. At masuad te, sa sik Taw way sadi. Ay Ka fag Taw At ngayan, Fagtayukan. ¹⁷ Ay ku longan at masuad te, Funbalugu nafatvngvd At nafatuyanan sas Abrayam. Ay bandi e buknga yay 430k banwa bagu ban Funbalugu nafadasug At-Longan sa Ku-Unga. Ay Ku-Unga At-Longan dewa ndasug, di e yud nafe fanambagun ebi fag fatuyanan sas Abrayam. ¹⁸ Ay Funbalugu At fagafonun ban sas Abrayam nu anway te, Abrayam at fagfaningun nu Ku-Unga way At-Longan. Nu katanya way, Funbalugu At nafon bunwa siginans ebia taw Funbalugu At nafatuyanan. Ay roro ngap, Funbalugu At fagafonun ban sas Abrayam antuwa ebia taw At nafatuyanan. ¹⁹ Funbalugu At fagafonun ban sas Abrayam nu antuwa ebia taw At nafatuyanan, tain ro Ku-Unga At-Longan at masuad. Funbalugu nafadasug At-Longan sa Ku-Unga laman nanfoyung sasa ngay taw te, fagayu taw e asalanan. Ay Ku-Unga At-Longan e masuad yay, yap ngay ndasug Abrayam at Sugfun at sadi, sa ebia taw At fagfatuyananan. Ay Funbalugu At ngay tagbukngan nafoyung At-Longan sa Ku-Unga. Ay Ku-Unga yangay sik tagbukngan sas taw. ²⁰ At fage tagbuknganun at masuad te, tagfatuyanan duwak taw wa igdaddayuan. Ay saman wan nu gfatuyanan sas Abrayam. Funbalugu way fag sadi tagfatuyanan. ²¹ Go Ku-Unga At-Longan igsalag way Funbalugu At nafatuyanan. Go igdi. Igdi. Di gsalag. Anway nu e Sik-Longan way ro madaragang laman sak mafaleleg at ngay taw, nu katanya long ro, fagayu taw gfadiuganan yay ro sas Funbalugu sanya ginan Fag-Longan. ²² Ay yaya. Funbalugu At-Rirukan nafoyung wa antam te, fagayu taw sa ways asalanan at daga fagmadaragangun. Ay nu katanya, Funbalugu At nafatuyanan at fagafonun ebi sas takafandiug sas Isus Fagtayukan, ay katsi nafon wan sas fagayu takafandiug. ²³ Kaduge yud e kafandiug sas Fagtayukan, Ku-Unga At-Longan kata yay sik taw nu nasungsung antam. Ay kata watam sik masungsungan yap ngay e kafandiug. ²⁴ Ay nu katanya, Ku-Unga At-Longan kata yay igtanud antam, kaduge yud indasug Fagtayukan. Laman ban Funbalugu natap tuwa antam kata at yud e asalanan, anway kafandiug tuwa tam sas Fagtayukan. ²⁵ Ay katsi e kafandiug wanay sas Fagtayukan. Ay katsi long bunwa Ku-Unga At-Longan takata sik tagtanud antam. ²⁶ Ay Funbalugu watam At unga, anway kafandiug watam sas Fagtayukan Isus. ²⁷ Anway fagayu am nu nsurung tuwam, insadi sas Fagtayukan. Ay faningi yangay Fagtayukan At ugali. ²⁸ Ay katsi nus nga sinu nu kafandiug tuwa du e nasaman. Dewa Taw-Naseg ay dewa at Yud-Naseg-Fag-Taw. Dewa sik fanuguan ay dewa sik magurang. Dewa sik mangama ay dewa sik mangena. Anway fagayu am insadi wam sas Fagtayukan Isus. ²⁹ Ay nu Fagtayukan wam At taw, am wan Abrayam at ngay sugfun. Ay mul ban am Funbalugu At nafatuyanan fag fagafonun sas Abrayam at ngay sugfun.

¹ Ku longan at masuad te, sik sisian kaduge alay, dia mafabul at tama at fagafonun ban. Kanya kata yay sik fanuguan, dewa te, kanya wa ban at nangagbilug fagayu. ² Ay kanya e kamato yay. Ay e gtanud wan anggan at nanuranan ban, yap ngay indaul kaduge at tama filian fag menit. ³ Ay katanya yangay anggan itam. Kaduge tam yud kafandiug, kata yangay tam sik sisian sirut. Anway mafanuguanan yay tam sasa ngay taw yabi tagmagurang sas fagdaul talun. ⁴ Ay nu ndasug wa Funbalugu filian fag menit, Funbalugu nasugu At Baguama stiye swa daga. Ay At Baguama inlangfe siginan sik mangena. Ay siginan ngay bagu kalangfe, Kanya igfaning wa Ku-Unga At-Longan. ⁵ Laman ban Kanya malabag at ngay taw te, laman dua kafanuguanan sa Ku-Unga At-Longan. Ay laman ban Funbalugu mili tuwa antam kata At unga at matuyan. ⁶ Ay anway am wan Funbalugu At unga, Funbalugu fagnafatsiun antam At Baguama At-Masine-Fag-Falad. Laman bandi baliwa faggugat longi tuwa te, Ku Mama. ⁷ Ay nu katanya, katsi bundi o sik fanuguan. Antuwo Funbalugu At baguama. Ay anway At baguama wo, Funbalugu mon ban emu fagayu At fagafonun sa At ngay unga. ⁸ Ebi kaduge am yud nasaful Funbalugu kata am fun, sik ngay fanuguan yay am sasa ngay taw yabi, sat yud matuyan fag funbalugu. ⁹ Ay katsi igfaning tuwam sas Funbalugu. At matuyan fiya, Funbalugu tuwa At nafili ayu. Ay dewa katanya, taw way sangay ay fakafoliun sa ebi at mafanalo ay at mamomuy fag ngay taw yabi. Go sangay kaumsig yay am gdog nangafanuguanan sa ebi tagmagurang ayu fag ngay taw yabi. ¹⁰ Ate mangaro ay fagamatanganun sa yay ebi ay ugali nu e filian sik menit, ay nu e filian sik magdanun, ay nu e filian sik afud banwa, ay nu e filian sik banwa. ¹¹ E fakalimuun akyay te, nu ndain ku foyungan sa ayu Taw-Galasia, di e masuad. ¹² Ku ngay fadugsay, ku fakaumsigun dawdaw anggan am katai yangay angku. Madyay aw nafaning aktuwa ay ugali. Ay anggan di am e mauri fag fagbulun sa angku. ¹³ Nasaful tuwam te, ebi ku fagnafoyungun ayu at masuad, ku fagfanyaun sanya si ayu anway te, gfafiyan akyay ku dailan ginanya. ¹⁴ Nu ndain e natakan wam gina aw e dailan. Ay dewa katanya, di am infurat angku ay di am inlimata angku. Ay antuwam nafasakbo angku, kata nu nafasakbo am Funbalugu At tagbukngan. Ay anggan kata yangay nu nafaskbo am Fagtayukan Isus. ¹⁵ Dada wan ebi ay fagusegananun. Anway nasaful aw te, ebi gananguladun wam ay mata ay gananfonun am sa angku te, laman masine yangay ku mata. Ay yaya, katanya du e masuad. ¹⁶ Go aw sik tagfafanggalutan ayu katsi anway sa ku nafoyungan ayu at matuyan. Go yaya. ¹⁷ Ay kanya fag ngay takamoyung at yud matuyan, matvngvd nu kesug ayu. Roro dewa yud masine sa ayu. Ay at fakaumsigun anway te, laman ay fagfaningun bunwa sa emi, sa way anya. ¹⁸ At masine nu maseganama tuwam nu gfaning am sat matuyan. Ay katanya tuwa ku fakaumsigun dewa aw si ayu ay dewa aw yud si ayu. ¹⁹ Am wan takata ku ngay sisian. Ay sa ku amatanganan kata yangay sik mangena nu e aluat. Katanya akyangay aw yap ngay ban am maning fiya fiya sas Fagtayukan yangay At ugali. ²⁰ Ku fakaumsigun satu ro sanya akyay si ayu. Laman nanfalukmianan akyay ayu anway sa aro ku nalongan. Ay katsi gadayuan akyay sa ku amatanganan te, taw ro ay fakatanyaun. ²¹ Nanginto aw sa ayu, kayu am takaumsig gfaning sa Ku-Unga At-Longan. Go nasaful tuwam Ku-Unga At-Longan at masuad. ²² Anway At-Rirukan te, duwa way Abrayam at baguama. At sadi siginan way at fanuguan fag mangena. Ay at sadi siginan tuwa at yud fanuguan fag mangena. ²³ At baguama tagsiginan at fanuguan fag mangena at kinlangfe, kanya wan Abrayam nu gfasad. Ay At baguama tagsiginan at yud fanuguan fag mangena at kinlangfe, kanya tuwa Funbalugu At fatuyanan fiya fiya. ²⁴ Kata tuy at fafaskudanan. Ka fag duwak mangena kata duwak fatuyanan. Ka fag fanuguan fag mangena at ngayan, Taglagyu. Kanya kata ebi at fatuyanan siginan ka fag muyud at ngayan te, Bulan-At-Muyud. Ay at ngay unga sik ngay fanuguan yangay. ²⁵ Sat fafaskudanan sadi yay Taglagyu ay Bulan-At-Muyud sa Sik-Talun-At-Yud-E-Safa. Ay kanya fag duwa kata yangay tagste swa daga fag fulan Erusalem, anway kanya fag fulan ay anggan at ngay taw sik ngay fanuguan yangay. ²⁶ Saman tuwa tagsas Banwa fag fulan Erusalem anway kanya bundi sik fanuguan. Ay kanya fag fulan kata yangay tam tina. ²⁷ Anway At-Rirukan nalong wa te, Tagabawas, useganani dewa yud e unga. Ay o wan at yud e fagaluatun, fadauli tuwa nu ge longan o ay nu guseganan o. Anway sa at naubun fag mangena ngayu wan at unga, glabi yay ngap sa sik mangena at ke mangama. ²⁸ Ay anggan am, ku ngay fadugsay, kata yangay am Kanya-At-Naasean. Sik ngay sisian yangay am siginans Funbalugu At fatuyanan. ²⁹ Kin, kata yangay ebi anggan katsi. Ka fag taw at kinlangfe tagsiginan taw at fasadan, kanya nanfauri yangay at kinlangfe tagsiginan At-Masine-Fag-Falad At fasadan. ³⁰ Tain At-Rirukan at foyungan. Kata tuy at foyungan te, Ayiyani wan ka fag fanuguan fag mangena ay anggan at baguama. Anway ka fag fanuguan at baguama bunwa ngap ban kanya at magbilug Abrayam at ngay nanuranan. Anway antuwa at yud fanuguan fag mangena at baguama at magbilug ban fiya fiya. ³¹ Katanya yangay katsi, ku ngay fadugsay. Bundi tam ka fag fanuguan fag mangena at ngay unga. Antuwa tam at yud fanuguan fag mangena at ngay unga.

¹ Katsi bundi tam sik fanuguan anway Fagtayukan nafalfas wa antam. Ay nu katanya, e fagmagonguni tuwa mandi. Ay lag am gdog nangasik fanuguan. ² Ay aw wan Fandak, ay katsi iglong aw sa ayu te, ay fagfaningun nut sa yay Taw-Naseg at fagtoglagan laman Funbalugu tumap ban ayu kata at yud e asalanan. Nu katanya way, Fagtayukan At fagbulun di e masuad sa ayu. ³ Ay katsi nanfatagak akyangay ayu te, sik taw at fagfaningun nu anway fagtvngvd Taw-Naseg at fagtoglagan, ay nu di yay nafafaning fagayu Ku-Unga At-Longan, dia nsak. ⁴ Ay fagayu am nu gfaning way am sa Ku-Unga At-Longan laman Funbalugu tumap ayu kata sik taw ngap at yud e asalanan, ay roro ngap kayayu way ngap karo am siginans Fagtayukan. Ay inyayu yangay am anggan siginans Funbalugu At fakafanyuun. ⁵ Ay ami fagayu igfanya wami Funbalugu nu gtap emi kata at yud e asalanan. Em fagfanyaun nu antuwa Funbalugu At-Masine-Fag-Falad At fagmadaragangun anway ami anwami kafandiug. ⁶ Anway nu kafandiug tuwa tam sas Fagtayukan Isus, dewa tam nafaning Taw-Naseg at fagtoglagan ay dewa tam gyud nafaning, fagduwa du e masuad. At ke masuad antuwa fakafandiugun sas Fagtayukan Isus, ay anggan e fakafanyuun sa tam iba. ⁷ Madyay ebi nafatunglus wam nu kafandiug am sas Fagtayukan. Ay taw way ay fakatanyaun katsi. Sinu sangay at nasalag ayu te, laman du am gfaning at matuyan. ⁸ Bunwa Funbalugu At ke fagbulun katanya sa ayu. Madyay Kanya wan At tagfili ayu. ⁹ Ay amatangani kata sik famabaga sas tinafay. Dewa alay at famabaga, nafabaga fagdaul at tinafay. ¹⁰ Intuyan akwa te, igfadiuganan wam fiya sa angku, anway Funbalugu At nafasadi antam. Ay ka fag taw takamasalag ayu katsi, Funbalugu ban At nanfauri anya, nus nga sinu ban ngani. ¹¹ Amatangani yap te, nu aw way ro at nafoyung te, faningi Taw-Naseg at fagtoglagan, kanya fag ngay taw rodi ro gfauri way angku. Ay anggan ro ku foyungan sas Fagtayukan At salibagan kayu baliwa, e gsalag way ro. ¹² Sa ku amatanganan te, at masine sa takamasalag ayu katsi, nu bundi sat fagtoglagan fag sadi, luasani yap anya mandi. ¹³ Ku ngay fadugsay, Funbalugu wan At nafili ayu laman bundi am sik fanuguan sa Ku-Unga At-Longan. Ay tuy yangay at sadi, lag gfaning sa ay bilug at fagalabianun. Katsi fantarabanganani tuwa, anway kafanyu tuwam ay iba. ¹⁴ Anway fagayu Ku-Unga At-Longan at masuad te, Esugi tuwa am iba katvngvdi nu kesug o emu. ¹⁵ Ay dangai am kata sik ngay idu tagfangagatan tiba. Amatangani, nu katanya way ay fagbulun, fagayu am e famin wa ban ayu. ¹⁶ Ay iglong aw ayu te, faningi tuwa sas Funbalugu At-Masine-Fag-Falad. Ay lag gfaning sa ay bilug at fagalabianun. ¹⁷ Anway taw at bilug at fagalabianun igsalag way At-Masine-Fag-Falad At fakaumsigun. Ay At-Masine-Fag-Falad igsalag tuwa taw at bilug at fagalabianun. Ay kanya fag duwa gsadsalagan wa fiya at sadi. Ay katanya wayay, at masuad lag gfaning sa ay bilug at fagalabianun. ¹⁸ Ay fagfaningun nu antuwa sa At-Masine-Fag-Falad, bunwa Ku-Unga At-Longan tagmagurang ayu. ¹⁹ Fagayu taw igsaful wan at bilug at fagalabianun. Ay kayu tuy at tiba. Nu nangalo sa tibak taw ay galabian ay kamayun. ²⁰ Ay nu gseg sas tawtawan. Ay nu gseg sas taw yabi. Ay nu gseg sat mabara tuwa. Ay nu gfauri sa tusama. Ay nu igbarangian sa tusama. Ay nu gfangesug at tusama. Ay nu kadotama. Ay nu kongit. Ay nu garingangan. Ay nu inkafud laman faringangan sa tiba. ²¹ Ay nu galabian at tusama nanuranan. Ay nu ginum laman kasigung. Ay nu maful laman gfadaulun tuwa nu kon ay nu ginum at fangasigung. Ay ngayu yay tiba takatanya. Ay nanfatagak aw ayu, kata ku nafatagak ayu ebi te, lag katanya. Ay fagayu tagfaning takatanya, dua ban umful sas Funbalugu-At-Fagmagurangan-Taw. ²² Ay saman tuwa sik taw ugali nu At-Masine-Fag-Falad tuwa tagmagurang anya. Ay kata tuy at ugali. Kesug tuwa. Ay guseganan tuwa. Ay manabayan tuwa. Ay igfanya tuwa. Ay kafanyu tuwa. Ay masine tuwa. Ay mafanud tuwa. ²³ Ay malukme tuwa. Ay mabaris tuwa. Du e longan te, lag gfaning kayu niya. ²⁴ Ay Fagtayukan Isus At taw kata wa nu natuktuk ebia taw at ugali sa sik salibagan kayu gasfuan at bilug at fagalabiunun ay at fakaumsigun. ²⁵ Anway At-Masine-Fag-Falad tuway tagfaleleg antam, fagayu tam faningi yangay sa At foyungan antam. ²⁶ Lag gfalabi am longan nus nga se tawi way am fagbulun. Ay lag kaumsig faggugat iguna am iba. Ay lag galabian si am iba.

¹ Ku ngay fadugsay, nu nalag am ay iba nu e asalanan, ay am at tagfaning At-Masine-Fag-Falad, tarabangi anya, laman umfoli tuwa sas Funbalugu. Ay am madmalukmiani tuwa gina am gtarabang anya. Ay tagaki, laman di am maguyudan anya. ² Fantarabanganani kata nu e fangubaun mabiat. Ay nu katanya tuwa, igfaning watam Fagtayukan At-Longan. ³ Anway sik taw dewa yud tiba tungud, nu e amatanganan way gfalabi tiba, kata way igfanluk at balyu. ⁴ At masine fagayu taw, maamatanganani tuwa nu gfagbulun mandi. Ay nu masine tuwa at fagbulun, ka fag taw guseganan tuwa anya. Anway dua masine sik taw nu guseganan te, angku, ku fagbulun amasinei yap si ku sama at fagbulun. ⁵ Fagayu taw ubai tuwa at fangubaun mandi. ⁶ Sik taw nu nafoyung tuwa Funbalugu At Longan, at tagdungugan e foni yangay sat takamoyung sik afud siginan at nabul at masine. ⁷ Lag galukan. Anway du e mafafalingun Funbalugu. Anway nus nga se taw at fagbulun ginanya, bandi ban katanya yangay at kumsure sa anya. Kata yangay at natanum. Nus nga se taw sik taw natanum, bandi katanya yangay fiya fiya at nabul. ⁸ Anway sik taw nu nafaning way at bilug at fakaumsigun katsi, bandi ban at nabul sik takaruas way ban. Ay sik taw nu nafaning tuwa sa At-Masine-Fag-Falad, bandi ban e leleg tuwa faggugat. ⁹ Ay katsi dangai mabaluanan nu gfagbulun am sat masine. Anway nu gdi am intuas, bandi ban mul yangay ban am at masine. Kata sik tagtanum nu mul ban at buadan. ¹⁰ Nu katanya, kaduge yap tam e menit, e fagbuluni tuwa masine sas fagayu taw. Ay glabii yap nut sa wa ngap tam fadugsay sas Fagtayukan. ¹¹ Linggati nu kin tuy ku rirukan iste. Gbiya tuwa dawdaw nu marirukan, anway ku daluap yayay at nariruk. ¹² Ka fag ngay taw at fakaumsigun nanfalabi way at longan sat bilug, kanya nafabulun dawdaw te, anggan am Taw-Galasia, faningi yangay Taw-Naseg at fagtoglagan. Anway kanya gamatangan te, nu katanya tuwa long, di ban e faurianan sa emi siginan tibak taw, kata nu gfaurianan sas tagfoyung sas Fagtayukan At salibagan kayu baliwa. ¹³ Ay ka fag ngay taw at tagfaning at fagtoglagan, roro ngap dia nafafaning sas fagdaul Ku-Unga At-Longan. Ay kanya kaumsig te, laman anggan am faningi Taw-Naseg at fagtoglagan, laman ro nanfalabi way at longan sa ay bilug baliwa. ¹⁴ Ay da kua kaumsig gfalabi ku fagbulun. Ku fakaumsigun ku fagfoyungun antuwa tam Fun Isus Fagtayukan at naatean sas salibagan kayu. Ay anway katanya, fagayu ste swa daga at fakaumsigun kata nafate akwan. Ay anggan aw kata akwa at kinkate siginans fagdaul daga at fagalabianun. ¹⁵ Ay dewa sik taw tagfaning Taw-Naseg at fagtoglagan, ay dewa at yud gfaning, du e masuad. Tuy tuwa at ke masuad, sik taw nu kata tuwa sik bagu fag taw. ¹⁶ Igdarangin aw sas fagayu taw nu gfaning tuwa kata aro ku longan, laman Funbalugu At nanfanabayan anya ay At mamanyun sa anya. Ay anggan sas fagayu Funbalugu At taw, anway kanya kata yangay Tagagbuan at kadagdagan at mafanud. ¹⁷ Ay siginan katsi, fagayu taw lag famut ku faurianan. Anway ngayu wan ku fangtat, kata Isus At fangtat, sa ku ngaba bilug, anway gfaning aw sas Isus. ¹⁸ Ku ngay fadugsay, tam Fun Isus Fagtayukan At mamanyun sai tuwa nangus ayu fagayu. Kin, katanyai tuwa.