Ephesians

Ephesians

¹ Siginan angku Fandak, Fagtayukan Isus At-Suguan at sadi, anway Funbalugu nafili angku. Nanriruk aw sa ayu, sas Funbalugu At ngay taw sas fulan Efesu, at matuyan takafandiug sas Fagtayukan Isus. ² Tam Funbalugu tam Tama ay anggan tam Fun Isus Fagtayukan At mamanyun nangus sa ayu ay At nanfanabayan ayu. ³ Segi tuwa tam Funbalugu, tam Fun Isus Fagtayukan At Tama. Anway Kanya nafamanyun antam fagayu At ngay fagmasineun sa tam fakafandiugun baliwa, kata At fagmasineun sis Banwa. Anway insadi watam sas Fagtayukan. ⁴ Siginan ngay yud e daga, Funbalugu dan wa nafili antam, ay nangasadi watam sas Fagtayukan. Ay laman Funbalugu nu glag antam, masine tuwa tam ay di tam e mauri. ⁵ Ay anway Funbalugu At faginfanyuun antam, At fasadan ebi laman At ngay baguama ban tam, anway Isus Fagtayukan At fagbulun. Anway katanya tuwa Funbalugu At fakaumsigun. ⁶ Segi tuwa sa tam Funbalugu, anway Kanya masine dawdaw At nafamanyun sa antam. Ay At nafon antam at yud e fansali anway At fakesugun fag Baguama At fagbulun. ⁷ Ay At nabalabag antam antuwa Fagtayukan At taguk. Ay Funbalugu famaliam tam asalanan, At katvngvdan wa nu kamanyun. ⁸ Katvngvd anya Funbalugu nu kamanyun antam. ⁹ Ay Funbalugu nafoyung wa antam ebia taw At fagsuksukun fag fasadan, anway mamatanganan tuwa ay nasaful tuwa. Ay At fasadan sas Fagtayukan baliwa. ¹⁰ Anway gina At filian fag menit, Funbalugu gfaful fagayu sas Fagtayukan siginans Banwa fagayu ay siginan swa daga sigon fagayu. ¹¹ Funbalugu At fagnafiliun antam laman At taw watam, ay manga Fagtayukan At fagbulun si wa antam. Ay katanya wa fiya, anway Funbalugu wanay At ke fasadan siginan ngay ebi. Ay anway fagayu at kumsure, Funbalugu wan At ke fasadan ay At nafili katanya. ¹² Ay ami at taguna e fagsegun wami siginans Fagtayukan. Ay masine igseg wami Funbalugu anway sat kamasinean ay sat kamadaragangan. ¹³ Ay anggan am, nadungug yangay am at matuyan fag longan, anway at Masine-Fag-Barita laman umbalabag yangay am. Ay nu nadungug wam, kafandiug wam sas Fagtayukan. Ay Funbalugu nafat si wa ayu At-Masine-Fag-Falad, At fanfatuyanan te, am wan Ku taw. ¹⁴ Anway At-Masine-Fag-Falad si wa antam, Kanya At fanfatuyanan wa sa antam te, Funbalugu e fagafonun wa fiya sa antam, ebia taw At nafatuyanan sa At ngay taw. Ay katanya wan At fanfatuyanan, yap ngay Funbalugu nafasure fiya fiya At fagafonun sa At ngay taw. Ay katanya tuway, segi tuwa sa tam Funbalugu anway sa At kamasinean ay sa At kamadaragangan. ¹⁵ Fakatanyaun, nadungug aw te, kafandiug tuwam sa tam Fun Isus, ay anggan kesug yangay am Funbalugu At ngay taw fagayu. ¹⁶ Ay katanya tuway, aw da kdi kaliam nu guseganan aw sas Funbalugu anway kafandiug tuwam. Ay faggugat da kdi kaliam igdarangin ayu. ¹⁷ Laman Funbalugu, tam Fun Isus Fagtayukan At nasugu, ay tam Tama At masine, gfaamatanganan ayu. Laman sik mamatanganan tuwa ban am fag taw. Ay laman sumaful yangay ban am at masuksukan fag foyungan laman sumaful tuwam sas Isus Fagtayukan baliwa. ¹⁸ Ay laman Funbalugu tagfayamag ayu, laman sumaful tuwam te, tain ay fage fagsegun ban, Funbalugu fagnafiliun ayu. Ay laman sumaful yangay am te, setvngvd Funbalugu At fagafonun fag masine sa At ngay taw. ¹⁹ Ay laman sumaful yangay am te, setvngvd Funbalugu At fagmadaragangun nut si antam sis takafandiug. ²⁰ Funbalugu At fagmadaragangun si wa antam katvngvd yangay At fagmadaragangun nu gfaleleg Fagtayukan siginan At naatean. Ay nu nafalunggung Anya sa At siun baliwa fag day tigyangan sas Banwa. ²¹ Ay sanya Fagtayukan e fagmadaragangun glabi yay fagayu at fun. Ay glabi yay fagayu at magurang. Ay glabi yay fagayu at madaragang. Ay glabi yay fagayu at taw yabi. Ay glabi yay anggan fagayu suguan. Ay bundi kayu niya fagtvngvd, anggan yangay sa katsi ban. ²² Ay Funbalugu nasugu laman fagayu nafat sas daga Fagtayukan At fagmadaragangun. Ay nafili Fagtayukan laman gmagurang at ngay takafandiug. ²³ Ay at ngay takafandiug kata wa Fagtayukan At bilug. Ay Fagtayukan du e fagayudanun anway e bilug tuwa. Ay At bilug du e fagayudanun anway Fagtayukan wan At Fun. Ay Fagtayukan nafatabu wan fagayu fagayu.

¹ Ay ebi fagayu am kata yay am sik matian, anway kamabo yay am Funbalugu ay e asalanan. ² Anway ebi katanya ay ugali kaduge am gfaning sas fagdaul daga at ugali at mauri. Ay kaduge am gfaning sas mauri fag taw yabi at fun sas kiwang. Ka fag fun yay tagmagurang fagayu kayu takamabo Funbalugu. ³ Ay fagayu tam kata yay tam kanya fag takamabo sas Funbalugu. Madyay gfaning yay tam tam bilug at fagalabianun. Nu gfagbulunan tam, gfaning yay tam sa tam bilug at fakaumsigun ay anggan tam amatanganan at fakaumsigun. Ay fagayu tam kata yay tam tibak taw ay Funbalugu nanfauri yay ban anway kadotama. ⁴ Ay roro ngap, matvngvd tuwa Funbalugu nu kamanyun, ay matvngvd yangay nu kesug antam. ⁵ Ay anway katanya, kaduge tam kata at matian, anway e asalanan yay tam, Funbalugu, At nafaleleg ebi Fagtayukan, katanya yangay nu gfaleleg antam. Ay ay faginbalabagun anway Funbalugu At nafamanyun ayu. ⁶ Ay anway Fagtayukan Isus At taw watam, Funbalugu nafaleleg antam kata wa nu gfasfuan tam Fagtayukan. Ay nafalunggung yangay antam gfasfuan Fagtayukan sas Banwa. Laman anggan itam tagmagurang gfasfuan Fagtayukan Isus. ⁷ Katanya Funbalugu At fagbulun laman igfoyung sas fagayu taw sa ban bandi baliwa fag ngay menit te, katvngvd anya At katvngvdan nu kamanyun. Madyay Kanya kafanyu tuwa antam anway Fagtayukan Isus At fagbulun si wa antam. ⁸ Ay katanya tuway, ay faginbalabagun anway Funbalugu nafamanyun ayu, ay kafandiug wam. Ay bundi siginan ay fagbulun, anway Funbalugu tuwa At nafon ayu. ⁹ At masuad te, ay faginbalabagun duwat siginan ay fagbulun mandi. Laman du e taw igfalabi at longan sat fagbulun. ¹⁰ Fagayu tam takafandiug Funbalugu yay tam At awatan. Ay Funbalugu At fagnaawatun antam laman Fagtayukan tuwa watam Isus At taw, ay masinei faggugat tam fagbulun. Ay ka fag fagbulun, ebia taw Funbalugu At naguna nafamasadan sa antam. ¹¹ Am wan at Yud-Naseg-Fag-Taw siginan ngay am bagu kalangfe. Ay Taw-Naseg nangayan ayu te, At-Yud-E-Fagtoglagan. Ay nangayan yangay mandi anya te, Ami taw ami At-Ke-Fagtoglagan. At fagnangayanun katanya at masuad anway te, ebia taw e fagbulun sat bilug. Amatangani ebi ay ugali. ¹² Anway ebi ngayayu yay am sas Fagtayukan. Ay di am nasaful Anya. Ay manga di am e afud sas Taw-Tagagbuan, Funbalugu At nafili fag ngay taw. Anway am kata yay am siginan tibak talun. Ay Funbalugu at ngay fatuyanan sas Taw-Naseg diat si ayu. Ay di am e fagsegun anway di am nasaful Funbalugu, gina am gbanwan ste swa daga. ¹³ Ay katsi am wan Fagtayukan Isus At taw. Ay ebi dewa am ngayayu sas Funbalugu, katsi e nafakbang tuwa ayu, anway Fagtayukan At taguk. ¹⁴ Anway Fagtayukan wan At nafanabayan antam, laman nafasadi antam, dewa tam Taw-Naseg ay dewa tam at Yud-Naseg-Fag-Taw. Ay Fagtayukan At naatean at nabul kata sik dingding si tam buknga. At masuad te, nabul tam fakadotamaun. ¹⁵ Ay Kanya nafasaman wan, laman ban du e masuad Ku-Unga At-Longan ay at ugali. Laman ka fag duwak fulan taw, Taw-Naseg ay at Yud-Naseg-Fag-Taw, kata tuwa sadik fulan. Anway katsi Fagtayukan wa At taw, ay nafanabayan tuwa anway insadi wan. ¹⁶ Fagtayukan At naatean sas salibagan kayu at nafaliam ka fag duwak fulan taw at fakadotamaun. Ay nafasadi yangay ka fag duwak fulan, laman gdog yay nanfafoli sas Funbalugu. ¹⁷ Ay At fagindasugun ste swa daga, laman nanfoyung sas fagmanabayanun baliwa sas fagayu taw. Sa ayu at Yud-Naseg-Fag-Taw at ngayayu sas Funbalugu. Ay anggan sas Taw-Naseg at makbang sas Funbalugu. ¹⁸ Anway Fagtayukan At fagbulun, fagayu tam, Taw-Naseg ay at Yud-Naseg-Fag-Taw, maakbang tuwa tam sas Funbalugu anway At-Masine-Fag-Falad natarabang antam. ¹⁹ Ay nu katanya, katsi am at Yud-Naseg-Fag-Taw bundi am sik betaw ay bundi am sik famaklay. Katsi kata yangay am at dan fag taw anway inful wam sas Funbalugu At taw. Ay anggan am, Funbalugu yangay am At ngay unga katsi. ²⁰ Ay anggan am, kata am sik afud bale. Ay Funbalugu At-Ngay-Suguan ay At ngay taglong kata at ngay turuk. Ay Fagtayukan Isus kata at tiba tungud fag afud tagfatvngvd fagdaul at bale. ²¹ Ay Fagtayukan kata yangay sik taw nu nafatudtungudan at fangawat sadi sadi, ay nafasine ay nafatvngvd fagayu afud, anggan nafadaul at naawat. Laman ban kata sik tagbvt fag Bale Funbalugu at masine. ²² Katanya tuway Fagtayukan At fagbulun. Am yangay at kinful sas Funbalugu At taw kata sik ngay fangawat. Anway ka fag bale Funbalugu At-Masine-Fag-Falad At fagbanwanan.

¹ Ay nu katanya, igdarangin aw ayu. Dewa katsi, aw Fandak, sik masungsungan fag taw anway igfaning aw Fagtayukan Isus. Ay anway manga igfoyung aw sa ayu at Yud-Naseg-Fag-Taw. ² Ay nu ndain nadungug wam te, Funbalugu e nafamanyun sa angku, ay fagnasuguun angku laman e fanambagun yangay ban am. ³ Ebi Funbalugu nafasure wa sa angku ebia taw At masuksukan fag fasadan. Kata yangay aro ku nariruk sirut sa ayu. ⁴ Ay gina am natap aro ku rirukan, sumaful yangay am te, katanya aw nu nasaful aw At masuksukan fag fasadan sa baliwas Fagtayukan. ⁵ Ebi Funbalugu dia batang igfasure At masuksukan fag fasadan sa ebi fag ngay taw. Roro ginanya, katsi At-Masine-Fag-Falad nafasure wan ka fag fasadan sa ways Funbalugu At-Ngay-Suguan ay sa At ngay taglong way fagtvngvd. ⁶ Ka fag masuksukan fag fasadan at masuad te, at Yud-Naseg-Fag-Taw mul ban Funbalugu At fagafonun gasfuan Taw-Naseg. Ay at Yud-Naseg-Fag-Taw ay Taw-Naseg kata yangay sik afud at bilug. Ay at Yud-Naseg-Fag-Taw ay Taw-Naseg gasfuan yay ban nu mul Funbalugu At nafatuyanan ebi, anway Fagtayukan Isus At fagbulun. Katanya at Masine-Fag-Barita at masuad. ⁷ Ay Funbalugu wan At nafamanyun sa angku ay anggan At fagmadaragangun si yangay angku. Laman nanfoyung aktuwa at Masine-Fag-Barita kata nu sik fanuguan aw. ⁸ Dewa aw Funbalugu At taw at tiba daga, Funbalugu nafili tuwa angku ay nansugu angku, laman nanfoyung aw sa at Yud-Naseg-Fag-Taw at Masine-Fag-Barita. At masuad te, Fagtayukan At fagmasineun du e manga saful. ⁹ Ay nanfoyung kyangay laman fagayu taw nasaful tuwa sas Funbalugu At masuksukan fag fasadan. Funbalugu, At naawat fagayu, dia nafasure At masuksukan fag fasadan siginan ngay ebi taguna ay anggan katsi. ¹⁰ Ay katsi long insure wan. Funbalugu At fakaumsigun laman At ngay tagbukngan at ngay fun ay at magurang sas Banwa nasaful ban Funbalugu At matvngvd fag fagmamatangananun, anway nalag Funbalugu At fagbulun sa At ngay takafandiug. ¹¹ Fagayu kanya fag fagbulun igfaning Funbalugu At fasadan siginan ngay ebi taguna, anway tam Fun Fagtayukan Isus At fagbulun. ¹² Ay anway kafandiug tuwa tam sas Fagtayukan, di ban tam kapla nangakbang sas Funbalugu anway gafanud tuwa tam. ¹³ Anway katanya, katsi glong aw ayu te, lag kabalu dewa e gfauri angku anway nanfoyung aw ayu. Anway te, laman e fanambagun yangay ban am. ¹⁴ Ay anway katanya, natudan aktuwa gina aw nandarangin sa ayu sa tam Tama. ¹⁵ Ay Kanya At Tama sas fagayu At taw tagsis Banwa ay sas fagayu At taw tagste swa daga. ¹⁶ Anway matvngvd tam Tama At fagmasineun, ay igdarangin aw te, laman At-Masine-Fag-Falad mon ayu At fagmadaragangun. Laman umtvngvd yangay ay amatanganan. ¹⁷ Ay laman Fagtayukan tuwa tagsi ayu ay tagfaamatanganan ayu anway kafandiug tuwam. Ay laman ay fakafanyuun tagfatvngvd ayu sat masine fag fagbulun. Kata sik kayu at lalid nu nafatvngvd at familugan. ¹⁸ Ay laman am ay anggan fagayu Funbalugu At taw sumaful tuwam Fagtayukan At fakafanyuun te, go siaba. Ay go sedaul. Ay go siabat. Ay go siabasad. ¹⁹ Ay laman sumaful tuwam Fagtayukan At yud e manga saful fag fakafanyuun sa ayu. Laman fagdaul ay amatanganan igfaning tuwa Funbalugu At ugali. ²⁰ Gseg watam tam Funbalugu, anway At fagmafabulun glabi yay nus nge wain fagayu tam fagetun ay fagayu tam fasadan, anway At fagmadaragangun si wa antam. ²¹ Ay kin. Fagayu tam at maful fag ngay takafandiug ay Fagtayukan Isus At taw, gseg wa ban tam tam Funbalugu sas fagayu menit, ay faggugat faggugat. Kin. Katanyai tuwa.

¹ Anway katanya, aw, dewa aw sik masungsungan fag taw anway igfaning aktuwa sa tam Fun, aw get aw dawdaw sa ayu te, faningi tuwa sat masine fag ugali. Katai tuwa Funbalugu At fakaumsigun ay ugali nu nafili wa ayu. ² Laman di ban am gfandaragang ay longan. Ay malukme tuwam. Ay igfanya tuwam. Ay fagayu am gfadfanabayanan tuwam, ay kedkusugan tuwam. ³ Ay madaragangi tuwa ay fatunglusi tuwa anway At-Masine-Fag-Falad nafasadi wan ay amatanganan. Ay At famasadi anwa At fagmanabayanun. ⁴ Anway fagayu takafandiug masadi tuwa kata sik taw at bilug nu sadi. Ay sadi tuwa At-Masine-Fag-Falad. Ay ay fagsegun ban sadi tuwa, anway Funbalugu fagnafiliun ayu, laman sadi tuwa ay fagfanyaun. ⁵ Ay sadi tuwa tam Fun. Ay sadi tuwa tam fakafandiugun. Ay sadi tuwa tam fakasurungun. ⁶ Ay sadi tuwa tam Funbalugu, fagayu tam tam Tama. Ay Kanya tagmagurang fagayu. Ay Kanya sas fagayu fagayu talun. Ay Kanya sa tuwas fagayu takafandiug. ⁷ Ay nu sik taw wan, Funbalugu At famanyun sa antam At filian fag fagafonun. Saman wan sa sadi sadik taw, nus nga setaw wa Fagtayukan At nafili at fagafonun. ⁸ Anway katanya, At-Rirukan nalong wa te, Kaduge Kanya nalo sam tungud am tungud, Kanya nataban sik ngay masungsungan fag taw. Ay Kanya nafamanyun at ngay fagafonun sasa ngay taw. ⁹ Aro at longan te, Kanya nalo sam tungud. At masuad at sadi te, Kanya ebi inbaba sat kinkate at talun. ¹⁰ Sadi wayk Taw At kindaga ay At nalo sa at tiba tungud fag langkub banwa. Laman nus nga nday fag talun Fagtayukan At fagmadaragangun madasug. ¹¹ Ay Fagtayukan wan At nafamanyun At filian at fagafonun sat takafandiug. Laman tiba At-Suguan. Ay laman tiba At taglong. Ay laman tiba At takamoyung sat yud batang gdungug fag taw nus nga nday. Ay laman tiba At tagtanud sat ngay takafandiug. Ay laman tiba At takamoyung sat ngay takafandiug. ¹² At fagnafonun katanya, laman fagayu Funbalugu At taw nafamasadan tuwa laman nafatunglus sas Funbalugu At fagbulun. At masuad te, igtarabang Fagtayukan At ngay taw, kata Fagtayukan At bilug, laman umtvngvd ban. ¹³ Katanya at fagbulun laman fagayu tam gdiuganan tuwa tam nu kafandiug sas Funbalugu-At-Baguama. Ay laman sumaful watam te, At fagmadaragangun si wa antam. Ay laman ban fagayu tam sik mabul tungud tuwa tam fag taw sa tam fakafandiugun ay sa tam ugali. At masuad, fagayu tam ingurang watam laman mabul tungud tuwa tam fag taw, kata Fagtayukan yangay nu mabul tungud. ¹⁴ Ay nu katanya, dangai tam kata sik ngay sisian sirut. Ay tam amatanganan dangai gfainfolian kata tagmara nu gfainfolian at lino. Katanya yangay tam amatanganan nu gfaning way tam at masuksuanan fag taw. Anway kanya fag taw maseganama way nu gfanluk, laman tiba kafandiug sa anya sat nafamuagan at foyungan. ¹⁵ Roro antam, tam foyungan ani tuwa at matuyan. Ay gina tam gfoyung, afanyui tuwa tam iba. Ay nu umgurang wa ban tam, fagayu tam ugali igfaning tuwa sa tam Fagtayukan At ugali. Anway fagayu takafandiug kata sadik bilug, ay Fagtayukan kata at alfuyu. ¹⁶ Ay Fagtayukan nafasugfun fagayu afud sa sik bilug, laman kata sadik bilug. Ay nafat sanya At famatvngvd laman nafatvngvd fagdaul at bilug. Ay gina at ngay afud igfaning At nasugu anya, ka fag bilug indaul ay ingurang wan, anway fagayu at afud kadkafanyuan tuwa sa tibak afud. ¹⁷ Ay katsi gfadiuganan aw sa tam Fun, ay fagmatvngvdun nu gfatagak aw ayu. Laman ban di am gfatunglus ay ugali ebi nu gfaning am at Yud-Naseg-Fag-Taw at ugali. Anway at Yud-Naseg-Fag-Taw at amatanganan du e masuad. ¹⁸ Ay anggan sa at amatanganan kata way nu marum. Ay kanya dua ban mul Funbalugu At fagafonun fag leleg. Ay kanya dua nasaful Funbalugu At ugali anway dua kaumsig ganandunguganun faggugat. ¹⁹ Ay kanya nu gamatangan sat mauri baliwa du e naplan. Ay kanya faggugat at fagfaningun gfaning way at fagmauriun. Ay faggugat nu anwa e fagalabianun dua nabaris. ²⁰ Roro di am katanya. Ay fagnasafulun sa tuwa Fagtayukan baliwa. ²¹ Anway nadungug wam sas Fagtayukan At ugali. Ay e nafoyung ayu sas Isus baliwa anway matuyan, anway am wan At taw. ²² Ay nu katanya, ubuni ay ebi at dan ay ugali ay fagfaningun ebi ginan. Anway kanya fag ugali at fakaumsigun takaruas yay ay fagfanlukun yay. ²³ Ay katsi fasamani yap ay amatanganan. ²⁴ Ay faningi sat bagu fag ugali. Anway Funbalugu nafabagu ay ugali kata At ugali. Laman ban masine tuwa ay fagbulun, ay matuyan tuwa nu gfaning am Funbalugu. ²⁵ Ay nu katanya, lag gfaning sas fakamuaganun. Ay fagayu am, ay longan anyakman at matuyan sa ay iba. Anway fagayu tam kata watam sik afud Fagtayukan At bilug. ²⁶ Dewa am kadotama, dangai e asalanan. Ay lag gsak fafaliyu at menit nu kadotama am. ²⁷ Ay lag gdungugan sas Takamuag-Tiba-At-Fagbulun at ngay longan. ²⁸ Ebi dewa am kamul, katsi dangai fatunglus. Maseganamai tuwa sa ay fagbulun mandi. Laman e kwa tuwam ay manga mafafaon tuwam sat tagayudan. ²⁹ Ay dangai e longan mauri, nus di sirut. Ay longan antuwa at masine. Laman ay longan e masuad tuwa sa ay iba gina e fagayudanun. Ay laman nafatvngvd tuwa anya siginan ay nadungugan. ³⁰ Ay dangai am gfabaluanan Funbalugu At-Masine-Fag-Falad. Anway Funbalugu nafat sa wa ayu At-Masine-Fag-Falad At fanfatuyanan te, am wan Ku taw. Ay malabag wa ban fiya ayu, gina ban umdasug ka fag menit. ³¹ Ay dangai e nalimataan ay iba. Ay manga dangai kadotama ay iba. Ay manga dangai e naunatan ay iba. Ay manga dangai gfaringangan ay iba. Ay manga dangai kamuagan ay iba at fagbulun. Ay manga dangai mauri ay amatanganan sa ay iba. ³² Roro ngap adkafanyuani tuwa ay iba. Ay madmalukmeani tuwa. Ay adkaliamani tuwa ay iba at asalanan, kata Funbalugu nu nafaliam ay asalanan, anway Fagtayukan At fagbulun.

¹ Anway am wan Funbalugu At fakesugun At unga, faningi tuwa Funbalugu At ugali. ² Ay faggugat afanyui ay iba kata Fagtayukan nu kafanyu antam. Madyay Kanya wan At ke fasadan At faginkateun laman nabalabag antam. Ay At faginkateun kata sik anyun at mabebanglu sas Funbalugu. ³ Ay anway Funbalugu wam At taw, lag kamayun. Ay lag galabian am iba at ufud. Ay lag galabian am iba at nanuranan. Laman tibak taw di e longan te, katanya way mangaro dewa Funbalugu At taw. ⁴ Ay lag glong at malimata fag longan. Ay anggan at yud e masuad fag longan. Ay anggan at mauri fag longan. Anway takatanya at yud way masine fag ugali. Roro ngap, segi tuwa Funbalugu. ⁵ Anway nasaful wam te, sik taw nu kamayun yay, ay sik taw nu mauri yay, ay sik taw nu kamalabo yay, kanya fag taw dua ban umful sas Fagtayukan ay sas Funbalugu-At-Fagmagurangan-Taw. At fakamalaboun at masuad te, roro ka fag taw igseg yay sas nanuranan. ⁶ Ay lag gdungug sas tagfanluk at longan anway du e masuad. Funbalugu kadotama sas fagayu takamabo, at ugali nu kata way aro ku longan. ⁷ Ay nu katanya way, lag kaful anya. ⁸ Anway ebi, dewa am tagsi sad marum fag taw, katsi tagsi sad mayamag tuwa am fag taw, anway katsi igfaning tuwam tam Fun. Fatunglusi ban sat masine fag ugali kata tagsi sad mayamag fag taw. ⁹ Anway kata tuy nu maugalian tagsi sad mayamag fag taw. At ugali masine tuwa. Ay anggan at fagbulun masine yangay sa tiba. Ay matuyan tuwa anggan at ngay longan. ¹⁰ Ay matvngvdi tuwa nu gsadsarapan am laman sumaful tuwam Funbalugu At fakaumsigun. ¹¹ Ay lag kaful sa sik taw at mauri at fagbulun kata nu marum. Roro ngap foyungi sa tibak taw te, mauri way sanya fag taw at fagbulun. ¹² Anway sik taw kapla way gfoyung sa tiba at mauri fag taw at nasuksuk fag fagbulun sadi sadi. ¹³ Ay gina gfasure sik salung, fagayu dewa at alay umsure wan. Anway fagdaul dumamlag wan. ¹⁴ Katanya at masuad at fagnalongun te, Afuloi, tagtuig. Ay alindugi siginan at ngay fagmatianan. Anway Fagtayukan wan At dumamlag ayu. ¹⁵ Ay nu katanya, amatangani ay ugali te, go masine. Laman di am kata at yud mamatanganan fag taw. Ay laman kata tuwam at mamatanganan fag taw. ¹⁶ Ay madaragangi tuwa nus nga ginain sat masine fag fagbulun, anway mauri wan katsi tam ngay menit. ¹⁷ Ay anway katanya wanay, dangai kata at yud e fagsafulun. Asafuli fiya fiya te, setain Funbalugu At fakaumsigun sa ayu. ¹⁸ Ay lag ginum fansigung laman an am kasigung. Anway kanya gfafurat way ayu. Ay ay fagfaningun sai tuwa At-Masine-Fag-Falad. ¹⁹ Ay fodfoyungani sa ay iba Funbalugu At ngay danyu. Dewa siginans Funbalugu At-Rirukan. Ay dewa siginan ay danyuan. Ay dewa siginan ay amatanganan. Ay danyui sas Funbalugu kanya fag ngay danyu gina am gseg Funbalugu. ²⁰ Dewa am snga setaw, faggugat segi tuwa sa tam Funbalugu tam Tama, anway tam Fun Isus Fagtayukan At fagmadaragangun si wa antam. ²¹ Ay fadfaningani tuwa ay iba nu e longan, anway igseg watam tam Fagtayukan. ²² Mangenam, faningi tuwa ay mangama kata nu gfaning am tam Fun. ²³ Anway ay mangama tagmagurang ayu kata Fagtayukan nu gmagurang at ngay takafandiug. Anway Fagtayukan wan tagbalabag at takafandiug, ay at takafandiug kata wa At bilug. ²⁴ Ay katanya yangay at ngay takafandiug nu gfaning Fagtayukan, kata yangay sik mangena nu gfaningi at mangama at longan fagayu. ²⁵ Mangamam, esugi yangay ay mangena kata Fagtayukan nu kesug at ngay takafandiug. Anway Fagtayukan wan At ke fasadan At faginkateun, laman at ngay takafandiug e fanambagun. ²⁶ Tuy fag fanambagun, Fagtayukan At fanfadiuganan at ngay takafandiug sas Funbalugu. Anway Fagtayukan At nafalanu at ngay takafandiug at ngay asalanan. Ay at famegus Funbalugu At longan. ²⁷ Ay laman Fagtayukan gfaful sa Anya at ngay takafandiug at kamasinean. Kata sik lanbung at masine nu gdi e gladlayungun. Ay nu gdi gidgitutun. Ay nu gdi e mafurat nus nge wain. Laman at ngay takafandiug masine daw daw di e sagbat at mauri ay di e nasalan. ²⁸ Mangamam, esugi ay mangena kata nu kesug am ay balyu. Anway sik mangama nu kesug tuwa at mangena, kesug yangay ro anggan at balyu. ²⁹ At matuyan, du e taw kalimata at balyu. Fagayu taw igfaon tuwa anya ay nafatvngvdun at bilug. Katanya yangay Fagtayukan At fagbulun sasa ngay takafandiug. ³⁰ Anway fagayu tam kata watam Fagtayukan At bilug. ³¹ Anway At Rirukan nalong wa te, Sik mangama nu indaduwa wan, insaman wa at tama ay at tina, ay nangalo wa sat mangena. Ay kanya fag duwa insadi wan. ³² Kanya fag longan at masuad tiba, masuksukan yay. Ay nanfoyung aw ka fag fafaskudanan at masuad te, Fagtayukan ay anggan at ngay takafandiug sigon. ³³ Dewa masuksukan ka fag longan at masuad, e masuad yay anggan sas daduwa baliwa. Mangamam, esugi tuwa am mangena kata nu kesug o am balyu. Ay mangenam, segi am mangama.

¹ Sisian am, faningi tuwa ay mangaguyang. Anway katanya tuwa at masine ay fagbulun sa tam Fun. ² Esugi ay tama ay ay tina. Katanya ebi Funbalugu At-Longan at taguna at nafatuyanan. Ay kata tuy at fatuyanan te, ³ Laman masine at kumdasug ban sa ayu. Ay laman glugo tuwa ban nu gleleg am ste swa daga. ⁴ Am at tama, dangai faunatan ay sisian. Ay kaduge am daduwa gfadaulan ay sisian, fanulituni anya, ay foyungi anya tam Fun At fakaumsigun. ⁵ Am at fanuguan, faningi tuwa ay fun ste swa daga. Segi wa malimuani anya. Ay madaragangi tuwa ay fagbulun sa anya, kata nu e fagbulun am sas Fagtayukan baliwa. ⁶ Ay nu gfagbulun am, dangai fagtvngvd gina ay iba glag te, laman ay iba igseg emu. Dewa ay iba yud glag, fatunglusi tuwa nu gfagbulun am masine, anway Fagtayukan wam At fanuguan. Ay manga madaragangi nu gfaning am sas Funbalugu At fasadan. ⁷ Ay faugati ay fagusegananun gina am e fagbulun, kata nu gfagbulun am sa tam Fun sas banwa. Ay bundi sa ay fagnalagun fag fun tagste swa daga fagtvngvd. ⁸ Ay asafuli te, nus nge wain sik taw at fagbulun nu masine tuwa, tam Fun e nafafoli yangay sa anya. Dewa sik fanuguan ay dewa sadik taw. ⁹ Ay am sigon fag fun, katanya yangay ay fagbulun sa ay ngay fanuguan. Lag fatunglus nu gfalimuanan am ay ngay fanuguan sa ay longan. Anway nasaful wam te, sadi tuwa anggan ayu ay Fun sas Banwa. Anway ay Fun sas Banwa du e filian taw. ¹⁰ Ay tuy yay ku longan at fakatabuan sa ayu. Madaragangi ay amatanganan ay ay ugali sa tam Fun baliwa. Anway Funbalugu wan At nafon ayu At fagmadaragangun. ¹¹ Ay suluni kata sik lanbung fagayu Funbalugu At nafon ayu fag ngay famalabag. Laman e fansalag tuwam sas Takamuag-Tiba-At-Fagbulun nu kaumsig ban gfanluk ayu. ¹² Anway tam fagfabarangianun bunwa taw menit. Tam fagnanfabarangianun anway taw yabi at ngay fun ay at ngay magurang. Ay anggan at tagmagurang tam fagdaul daga fag taw yabi sa katsi at marum fag ngay menit. Ay anggan at ngay mauri fag taw yabi sas kiwang. ¹³ Ay nu katanya, suluni Funbalugu At nafon ayu fag famalabag. Laman dewa ban mauri at ngay menit, e fansalag tuwam at ngay mauri. Ay nu ntabu wa nu gsalag am fagayu, matvngvd yay am. ¹⁴ Sanyai yap famasadani. Anway at matuyan fag longan kata nu ay ginawang ay famalabag. Ay ay fagbulun at masine kata sik lanbung ay famalabag si ay dubdub. ¹⁵ Ay nu mafamasadan wam nanfoyung at Masine-Fag-Barita at fagmanabayanun, kanya kata wa nu nasulun am ay fanguskus darafa ay famalabag. ¹⁶ Ay tuy yangay, faggugat afandiugi sas Funbalugu, anway kanya kata ay famalabag ay gfandingding ayu. Laman falayungi ban siginan Tagmauri at fangayon fag ngay busuy at ke afuy sit fungfung. ¹⁷ Ay Funbalugu At famalangfe ayu siginan ay asalanan, kata sik famalabag si ay alfuyu. Ay Funbalugu At longan kata sik fiso siginan At-Masine-Fag-Falad. ¹⁸ Ay at sadi, faggugat darangini. Anway At-Masine-Fag-Falad tagtarabang ayu gina am get. Laman faggugat matagakan tuwam ay maasungatan tuwam. Ay anggan darangini yangay Funbalugu At ngay taw. ¹⁹ Ay anggan am darangini tuwa angku. Laman Funbalugu gfaamatanganan angku At longan nu gfoyung ban aw. Ay laman da kdi kalimu nu gfoyung aw sas taw at Masine-Fag-Barita at masuksukan. ²⁰ Ay aw wan Funbalugu At-Nasugu laman gfoyung aw at Masine-fag-Barita, dewa aw masungsungan katsi. Darangini, laman nanmalimuanan aktuwa nu gfoyung aw, igfaning Funbalugu At fakaumsigun sa angku. ²¹ Nasugu aw tam fakesugun tam fadugsay, At-Masine-Insure-Wa-Daw, sa ayu. Ay kanya sik takamoyung matuyan, tagfaning tam Fun. Ay kanya moyung ban ayu fagayu at kindasug sa angku. Laman sumaful am te, go setain nu ste aw. ²² Katanya ku fagnasuguun anya sa ayu, laman sumaful am te, go setain nu ste ami. Ay laman kanya nafatvngvd yay ay amatanganan. ²³ Tam Funbalugu tam Tama, ay anggan tam Fun Isus Fagtayukan nanfanabayan nangus ayu, fagayu takafandiug. Laman fagayu am kedkesugan tuwam anway kafandiug wam. ²⁴ Ay Funbalugu mamanyun sa ayu, fagayu am nu kesug tuwam tam Fun Isus Fagtayukan. Katanya tuwa ay fakesugun at yud e fakatabuan.