Colossians

Colossians

¹ Siginan angku, Fandak, Fagtayukan Isus At-Suguan at sadi, anway Funbalugu nafili angku. Ay anggan tam fadugsay, Tagseg-Funbalugu. ² Nanriruk ami sa ayu, sas Funbalugu At ngay taw sas fulan Kulusas, sa em ngay fadugsay at matuyan takafandiug sas Fagtayukan. Funbalugu tam Tama At mamanyun nangus sa ayu ay At nanfanabayan ayu. ³ Faggugat guseganan tuwami sa tam Funbalugu, tam Fun Isus Fagtayukan At Tama, kayu ginan ami gdarangin ayu. ⁴ Anway nadungug ami te, kafandiug tuwam sa tam Fagtayukan Isus. Ay anggan kafanyu tuwam sas Funbalugu At taw fagayu. ⁵ Ay e fagsegun tuwa ban am sas banwa. Kata ebi ay nadungug at matuyan fag longan, kanya anwa at Masine-Fag-Barita. ⁶ Anway e nafoyung wayu at Masine-Fag-Barita. Ay anggan e nafoyung yangay sas fagdaul daga, ay inkayu at takafandiug. Kata sik kayu nu ndaul ay ngayu at buadan. Ay katanya yangay si ayu, siginan bagu am nadungug ay anggan am nasaful Funbalugu At nafamanyun sa ayu. ⁷ Anway tam fakesugun em ufud, at ngayan Sik-Masine-Fag-Ama, at nafoyung ayu katanya. Ay kanya Fagtayukan At mafanud fag fanuguan, ay tagtarabang emi sa em fagbulun. ⁸ Ay kanya nafoyung sa emi ay fakafanyuun anway At-Masine-Fag-Falad At nafaamatanganan ayu. ⁹ Ay nu Katanya, di ami kaliam nu gdarangin ami ayu siginan ngay ami bagu nadungug ayu ay anggan katsi. Laman sumaful ban am fiya fiya tam Funbalugu At fakaumsigun, anway At-Masine-Fag-Falad At nafaamatanganan ay At nafasaful ayu. ¹⁰ Laman ay ugali masine tuwa ay gkasakan sa tam Fun. Ay laman gfauseganan tuwam Anya. Ay laman ay fagbulun at masine kata sik kayu at buadan at masine. Ay laman minfamutan tuwa ay fagsafulun sa tam Funbalugu baliwa. ¹¹ Ay laman Funbalugu tagfatvngvd dawdaw ay amatanganan siginan At masine at tiba tungud fag fagmadaragangun. Laman maasungatan tuwam ay mafanyan tuwam gina am guseganan nus nga ginain. ¹² Ay laman guseganan tuwam sa tam Tama, anway Kanya tagfasine antam. Laman sak tam mafafabul At fagafonun. Kanya At fagnanfonan ban sas Funbalugu At ngay taw sat mayamag. ¹³ Anway Funbalugu nafalfas wa antam siginans marum at fagmadaragangun. Ay nafaalin wa antam sa At fakesugun fag Baguama-At-Fagmagurangan-Taw. ¹⁴ Anway tam Tagbalabag, At Baguama wan. Anway Kanya tagfaliam tam asalanan. ¹⁵ Ay tam nalag At Baguama kata yangay fiya fiya tam fagyudun glag fag Funbalugu. Ay Kanya Funbalugu At Baguama At Turungana. Ay Kanya At tiba tungud Funbalugu At ngay naawat. ¹⁶ Ay At Baguama takawat fagayu. Dewa sas banwa ay dewa ste swa daga. Ay dewa tam fagnalagun ay dewa tam fagyudun glag. Ay dewa at fagmadaragangun sas kiwang. Ay dewa sik fun, ay dewa sik magurang, ay dewa sik tagsugu. Ay At Baguama At naawat fagayu laman Kanya e fanambagun. ¹⁷ Ay At Baguama tuwa taguna siginan ngay ebi ebi. Ay Kanya nafatvngvdun fagayu nus nge wain tagsanya laman ban masine tuwa. ¹⁸ Ay At Baguama kata wa At ngay takafandiug at alfuyu. Ay at ngay takafandiug kata At bilug. At Baguama yangay At nafasigad at ngay takafandiug at faginsadiun. Ay Kanya yay taguna tagdog gleleg. Madyay Kanya nalabi yay fagayu nus nge wain. ¹⁹ Anway Funbalugu kaumsig te, laman At ugali fagayu si yangay At Baguama. ²⁰ Ay At Baguama At fagbulun nafasadi fagayu nus nge wain sas Funbalugu. Ay Funbalugu nafanabayan fagayu, dewa ste swa daga ay dewa sas Banwa. Anway At Baguama At taguk inbusbus sas salibagan kayu. ²¹ Ay ebi ngayayu yay am Funbalugu. Madyay gfasaruwayan yay am sas Funbalugu. Ay kadotama yay am. Ay mauri yay ay fagbulun. ²² Ay katsi At Baguama nafasadi tuwayu sas Funbalugu anway At naatean. Laman nanfaakbang ayu sas Funbalugu anway masine tuwa ay ugali, ay di e gfansulup ay fagbulun, ay anggan di am e nasalan. ²³ Katanya wan At fagbulun nu gfatunglus tuwam ay fakafandiugun, ay anggan matvngvd ay di am fainfolian sa ay amatanganan. Ay nu matvngvd tuwa nu gfanya am at kumdasug kata ay nadungug ebi siginan at Masine-Fag-Barita. Ebi e nafoyung wan at Masine-Fag-Barita sas fagayu taw ste swa daga. Ay aw yangay, Fandak, at sadi sik takamoyung at Masine-Fag-Barita. ²⁴ Katsi guseganan aktuwa dewa e gfauri angku, laman e fanambagun tuwam. Nu e gfauri sa ku bilug, kanya sik afud yay Fagtayukan At faurianan anway dia ntabu. Anway At ngay takafandiug kata wa Fagtayukan At bilug nu e fanambagun anway siginan ku faurianan. ²⁵ Ay aw wan at sadi at ngay takafandiug at takamoyung. Anway Funbalugu nafili wa angku laman e fanambagun tuwam. Ay laman nanfoyung aw fagdaul Funbalugu At longan. ²⁶ Ay siginan ngay ebi fag ngay taw kanya fag Longan masuksukan yay. Ay katsi insure tuwa sas Funbalugu At ngay taw. ²⁷ Ay Funbalugu kaumsig nanfasaful sa At ngay taw te, matvngvd dawdaw tuy fag masuksukan at fagmasineun sa at Yud-Naseg-Fag-Taw. Anway ka fag masuksukan at masuad te, Fagtayukan nut si wa ayu, igfanya wa long am te, umdasug wam fiya sas Funbalugu At fagmasineun. ²⁸ Em fagnafoyungun sas taw tam Fagtayukan. Ay em fagnafatagakun sas fagayu taw. Ay anggan em fagmamatangananun nu gfoyung ami. Laman fagayu em nafakbang fag taw sas Funbalugu sik mabul tungud ban fag taw sas Fagtayukan. ²⁹ Ay nu katanya, nu gfabulun aw, nasungatan aktuwa katvngvd ku fagmabitsugun, anway Fagtayukan At fagmadaragangun si wa angku.

¹ Kaumsig aw nu sumaful am te, go setvngvd ku nasungatanan laman e fanambagun ban am. Ay anggan at taw sas fulan At-Ngay-Taw-Nafili, ay anggan sigon sas fagayu taw at yud batang glag ku mata. ² Laman ban umtvngvd tuwa at ngay takafandiug at amatanganan, gina umsadi sas fakedkesuganun. Ay laman umtvngvd yangay sat fagsafulun nu nangasaful Funbalugu At nasuksuk, at masuad te, Kanya tam Fagtayukan. ³ Anway si was Fagtayukan fagayu Funbalugu At matvngvd fag fagsafulun ay At fagmamatanganun. ⁴ Ku fagnafoyungun ayu katanya, laman di am malukan sa sik taw dewa malukme nu ge longan. ⁵ Anway ku bilug dewa yud si ayu, ku amatanganan si wa ayu. Ay guseganan aw ayu nu nadungug aw te, masine ay fagbulun. Ay manga te, matvngvd tuwa ay fakafandiugan sas Fagtayukan. ⁶ Kata ebi nu matvngvd nu bagu am kafandiug sas Fagtayukan Isus ay Fun, katsi fatunglusi katanya sas fagayu ay ugali. ⁷ Kata sik kayu at ngabasad at lalid, fatvngvdi ay fagmasadiun sas Fagtayukan. Ay fatvngvdi yangay ay fakafandiugun sa Anya, kata ebi at nafoyung ayu. Ay faggugat useganani sas Funbalugu. ⁸ Tagaki. Laman du e taw nafanuguanan ayu, anway at foyungan ayu siginan ways taw at fagsafulun at fagfanlukun. Anway kanya fag ngay foyungan gfadiuganan way sa ebi fag ngay magurang at ugali. Ay anggan gfadiuganan yangay sasa ngay taw yabi tagmagurang sas fagdaul talun at ugali. Ay dua gfadiuganan sas Fagtayukan. ⁹ Anway si yangays Fagtayukan fagayu Funbalugu At ugali. ¹⁰ Ay anway kafandiug tuwam sa Anya, e leleg tuwam faggugat anway insadi wam sa Anya. Ay Kanya fagayu fun Tagfun ay fagayu magurang Tagmagurang. ¹¹ E fagtoglagan yangay am siginans Fagtayukan. Saman yay sas Taw-Naseg at fagtoglagan fag ugali si at bilug. Anway kanya fag fagtoglagan at masuad antuwa te, Fagtayukan nabul tam dan fag ugali. ¹² Ay gina am insurung, kata wam insandig ay insadi sas Fagtayukan. Ay gina am inlakwi, kata yangay nu e nafaleleg ayu ay insadi sas Fagtayukan. Anway gafanud wam sas Funbalugu At fagmadaragangun at nafaleleg Isus siginan At fagmatianan. ¹³ Ay ebi kaduge am kata matian, anway sa ay asalanan, ay anway di am naubun ay dan fag ugali, Funbalugu nafaleleg tuwa way ayu, kata wam insadi sas Fagtayukan. Anway Kanya tagfaliam fagayu tam asalanan. ¹⁴ Ay Kanya nararus fagayu at nariruk tam asalanan at bedan, ay anggan tiba yak suguan tam yud nafaning. Ay Kanya nafaliam wan fagayu. Kata wa nu natuktuk sas Fagtayukan At salibagan kayu. ¹⁵ Ay anway Fagtayukan At naatean sas salibagan kayu, Kanya nababo fagayu fun ay fagayu magurang sas kiwang. Laman fagayu taw lumag te, katsi fagayu fun du e fagmadaragangun. Anway Funbalugu tuwa At tiba tungud At madaragang. ¹⁶ Ay nu katanya, lag gdungugan siginan tibak taw taglong te, kata tuy tuwa at masine ay ugali. Tenday sas fakonun, ay sa nu ginum, ay sas fagamatanganun fag menit, ay sas bagu fag magdanun, ay anggan sas fakamatoun fag menit. ¹⁷ Anway takatanya fag ugali sik fafaskudanan yay sa at kumdasug ban. Ay tam Fagtayukan At gurungan fiya fiya faggugat. ¹⁸ Laman dua maliam si ayu ay fanambagun, lag gdungugan sa tibak taw taglong te, Nu gfagbulun o, katai nu sik tagfababaun o. Ay anggan yangay te, Segi Funbalugu At ngay tagbukngan am Funbalugu. Dewa ka fag taglong gamatangan te, aw wan tiba tungud anway nataginfanan akwan. Roro ka fag taglong gfalabi way at longan, anway igfaning way fagdaul daga at ugali. ¹⁹ Ay ka fag taglong dua gfadiuganan sas Fagtayukan, sa ngap fagayu takafandiug at alfuyu. Ay fagayu tam kata tam At bilug. Ay At bilug at fagmatvngvd siginan way at alfuyu. Laman at sulfuan ay at ugat umsadi sat bilug. Ay At bilug at fagindaulanun, anway katanya Funbalugu At fakaumsigun. ²⁰ Nu bilang tuwam inkate gasfuan Fagtayukan, di am gfaning at ngay taw yabi tagmagurang sas fagdaul talun at ugali. Ay taw madyay ay ugali fakataun nu nful am sas fagdaul daga at taw. Ay taw madyay ay fagfaningun sigon sas fagdaul daga at longan te, ²¹ Lag gted. Lag kon. Lag gtayuk. ²² Ay takatanya fag ngay longan dua ban e masuad, anway dua ban glugo nu mamin. Anway kanya ste ginan way swa daga fag ugali. ²³ At ngay taw nu gfasad, ka fag longan siginan wa sik mamatanganan. Madyay nafoyung wa te, matvngvdi nu gseg am. Ay nu gfabulun o, katai nu sik tagfababaun o. Ay anggan masine dewa am nafauri ay bilug. Roro mangaro ka fag longan du e masuad laman sak mafasalag sik taw at bilug at fagalabianun.

¹ Anway am wan takata at nafaleleg ay insadi sas Fagtayukan, faggugat amatangani tagsiginans Banwa fag ugali. Anway sanya Fagtayukan nu malunggung sa was Funbalugu At siun baliwa fag day tigyangan. ² Fatvngvdi nu gamatangan am siginans Banwa at ugali. Ay lag gamatangan ste swa daga fag ngay taw at ugali. ³ Anway am wan takata at kinkate. Ay laman katsi dia nsure ay leleg ban, anway masuksukan yay sas Fagtayukan sas Funbalugu At fagbanwanan. ⁴ Kaduge ban tam Fagtayukan umsure, e leleg wa long ban am siginan Anya. Ay umsure yangay ban am gasfuan Anya sa At fagmasineun. ⁵ Ubuni fiya fiya fagayu ay bilug at mauri fag fakaumsigun tagste swa daga fag ngay ugali. Tenday, nu kamayun. Ay nu galabian. Ay at mason nu kaumsig sat mauri. Ay nu gamatangan sat mauri. Ay anggan nu gfangesug. Ay sik taw nu gfangesug yay, kata yangay nu gseg sa sik tawtawan. ⁶ Ay anway katanya, Funbalugu kadotama ay nafauri ban anya. ⁷ Ay katanya yay ebi ay fagbulun kaduge am igfaning ste swa daga at mauri fag ugali. ⁸ Ay katsi ubuni yangay fiya kayu tuy. Nu kadotama am. Ay nu gfangadotama am sa ay iba. Ay nu gfauri am ay iba. Ay nu kamuagan am sa ay iba. Ay anggan nu glong am nus nge wain at mauri fag longan. ⁹ Ay lag kadkamuagan, anway naubun wam ay dan fag taw, anggan at ugali. ¹⁰ Ay katsi sik bagu wam fag taw. Ay Funbalugu nafabagu wan ay fagsafulun siginan Anya, laman ban kata yangay am ay Takawat. ¹¹ Ay nu katanya, katsi ban du e natap te, gsadsamanan nus nga sinu nu kafandiug tuwa. Dewa Taw-Naseg ay dewa at Yud-Naseg-Fag-Taw. Dewa tagfaning Taw-Naseg at fagtoglagan ay dewa at yud gfaning. Dewa sik betaw ay dewa sik yud gsaful tam ugali fag taw. Dewa sik fanuguan ay dewa sik yud fanuguan. Anway Fagtayukan tuwa At tiba tungud. Ay Fagtayukan yangay tagsi ayu fagayu. ¹² Nu katanya, faningi at masine anway am wan Funbalugu At taw, At fakesugun ay At nafili. Laman kadkafanyuan yangay am. Ay gtadtarabangan tuwam. Ay gfababaun tuwam. Ay malukme tuwam. Ay mafanyaan tuwam. ¹³ Ay tanani fanbarisani ay iba. Ay aliami tuwa nus nga sinu at ke asalanan sa ayu. Kata tam Fun nu nafaliam ay asalanan, am aliami yangay ay iba at asalanan sa ayu. ¹⁴ Ay at tiba tungud ay fagbulun, tanani tuwa edkesugani ay iba. Anway katanya tuwa fagayu takafandiug nu kasadi. ¹⁵ Ay fabayani wa Fagtayukan nu nanfanabayan ayu laman fagayu ay ugali igfaning tuwa Anya. Anway Funbalugu fagnafiliun ayu laman fagayu am kata tuwam nu sadik bilug. Ay useganani tuwa sa tam Funbalugu. ¹⁶ Maseganamai nu gamatangan am sas Fagtayukan At longan. Ay fodfoyungani ay fatagaki ay iba siginan ay nasaful At longan. Ay danyui Funbalugu At ngay danyu, dewa siginans Funbalugu At-Rirukan, ay dewa siginan ay danyuan, ay dewa siginan ay amatanganan. Ay useganani sas Funbalugu sa ay amatanganan. ¹⁷ Ay nus nga setaw ay e longan ay ay fagbulun, fagbuluni masine, anway am wan tam Fun Isus At taw. Ay ginanya, useganani sas Funbalugu tam Tama, anway tam Fun Isus At fagbulun. ¹⁸ Mangenam, faningi ay mangama, anway am wan Fagtayukan tam Fun At taw. ¹⁹ Mangamam, esugi ay mangena ay lag fauri anya. ²⁰ Sisianam, faningi tuwa ay mangaguyang at longan fagayu. Anway nu katanya tuwa gfauseganan tuwam tam Fun. ²¹ Ay am at ngay tama, dangai gfaunatan ay sisian, laman kanya di mabaluanan. ²² Am at ngay fanuguan, faningi tuwa ay fun ste swa daga at longan fagayu. Ay dangai si at faglagun fagtvngvd te, laman sik taw gseg ayu. Faningi tuwa anya gurungan anway masine fagdaul ay amatanganan, ay anway igseg wam tam Fun Fagtayukan. ²³ Nus nge wain ay fagbulun, fatvngvduni, kata ay fagbulun nut sa tam Fun Fagtayukan, ay dangai sas taw fagtvngvd. ²⁴ Anway nasaful wam te, tam Fun Fagtayukan e fon wa ban fiya ayu at fagafonun sasa ngay takafandiug. Anway fagayu ay fagbulun sa wa fiya tam Fun Fagtayukan. ²⁵ Ay fagayu taw at mauri at fagbulun, mauri yangay ban at kumfoli sa anya. Anway Funbalugu du e filian taw.

¹ Ay am at ngay fun, masinei ay matuyani ay fagbulun sa ay fanuguan. Anway nasaful wam te, anggan am, e Fun yangay am sas Banwa. ² Fatunglusi nu gdarangin am. Ay ginanya, amatangani way ay fagdaranginun. Ay useganani sa tam Funbalugu. ³ Ay gina am gdarangin, darangini yangay emi. Laman tam Funbalugu tumarabang emi te, laman e gdungugan tuwa nu gfoyung ami Funbalugu At masuksukan fag foyungan sas Fagtayukan baliwa. Anway ku faginsungsungun, katanya at masuad. ⁴ Darangini. Laman mayamag tuwa nu gfoyungan aw sas taw, anway katanya tuwa at masine. ⁵ Ay mamatanganani tuwa ay ngay ugali sa at yud kafandiug. Ay madaragangi tuwa nus nga ginain fag buknga sat masine fag fagbulun. ⁶ Malukmei tuwa nu ge longan am, laman ay longan kata sik fakonun at maasingan. Ay amatangani laman matuyan ay famalus nus nga sinu taginto ayu. ⁷ At-Masine-Insure-Wa-Daw yay ban at moyung ayu te, go tain aw iste. Kanya tam fakesugun tam fadugsay. Ay at mafafatunglus nu gtarabang emi. Ay anggan em ufud sa tam Fun At fagbulun. ⁸ Ku fagnasuguun anya sa ayu laman sumaful am te, go tain ami iste. Ay kanya at tagfatvngvd ay amatanganan. ⁹ Ay tagufud At-Masine-Insure-Wa-Daw at ngayan te, At-ke-Masuad. Kanya at mafanud ay tam fakesugun fag fadugsay, tagsiginan fiya fiya ayu ebi. Ka fag duwama yay at moyung ban ayu fagayu at kinsure istiye. ¹⁰ Ay ka fag taw, Tiba-Tungud-Nu-Gmagurang, ku ufud sasad sungsungan, gfadasug at fagusegananun sa ayu te, gamatangan tuwa ayu. Ay Takata-Sik-Fanuktuk-Daul, Sik-Nanfatvngvd at lagbe, gfadasug yangay at fagusegananun sa ayu te, gamatangan tuwa ayu. Ay ebi nadungug wam nu glong te, Takata-Sik-Fanuktuk-Daul nu ndasug ban sa ay fulan, fasakboi tuwa anya. ¹¹ Ay anggan sik taw at ngayan, E-Nabalabag, tiba at ngayan te, Sik-Taw-Matuyan, gfadasug at fagusegananun sa ayu te, gamatangan tuwa ayu. Kayu way niya Taw-Naseg takafandiug at natarabang angku nu nafoyung aw sas Funbalugu-Nu-Gmagurang-Taw baliwa. Ay anggan at nafatvngvd ku amatanganan. ¹² Ay Sik-Masine-Fag-Ama, tagsiginan fiya fiya ayu ebi, kanya at sadi Fagtayukan Isus At fanuguan. Ay kanya gfadasug at fagusegananun sa ayu te, gamatangan tuwa ayu. Kanya faggugat igdarangin tuwayu te, laman sik mabul tungud tuwa ban am fag taw, ay anggan matvngvd tuwa ay fakafandiugun kaduge am igfaning Funbalugu At fakaumsigun. ¹³ Ay nafatuyan aw sa ayu te, kanya maseganama tuwa nu nantarabang ayu, ay anggan sasa ngay takafandiug sas fulan At-Ngay-Taw-Nafili ay anggan sigon sas takafandiug sas Taw-Yabi-At-Fulan. ¹⁴ Lukas, tam fakesugun fag taganu, ay anggan Tagfadaragang-Tanum-At-Fanuguan, gfadasug yangay at fagusegananun sa ayu te, gamatangan tuwa ayu. ¹⁵ Ay aw, Fandak, gfadasug ku fagusegananun sas fagayu takafandiug sas fulan At-Ngay-Taw-Nafili, ay sa sik ina at ngayan te, Duwak-Ina-Fuyusan-Baguina, ay anggan sat ngay takafandiug at maful sat bale te, gamatangan aktuwa ayu. ¹⁶ Ay am nu ntabuan nu gtap am tuy fag rirukan sas fagayu takafandiug sanya, foni yangay sasa ngay takafandiug sas fulan At-Ngay-Taw-Nafili. Laman anggan kanya tumap yangay. Ay am, tapi yangay ban tibak rirukan at kumdasug sa ayu siginan at ngay takafandiug sas fulan At-Ngay-Taw-Nafili. ¹⁷ Ay foyungi ban sa ka fag taw at ngayan Tagfun-Sas-Kabayu te, Maseganamai tuwa nu gfagbulun o sa tam Fun At nafon emu fag fagbulun. ¹⁸ Ku daluap yay at nariruk tuy fag rirukan te, aw wan Fandak, ay gfadasug aw ku fagusegananun sa ayu te, gamatangan aktuwa ayu. Ay lag kaliam angku nu ste aw sis sungsungan. Tam Funbalugu At mamanyun nangus sa ayu.