Acts

Acts

¹ Sa ku fakesugun fag taw, at ngayan Funbalugu-At-Fakesugun. Sa ebi taguna ku rirukan nafoyung aw fagayu Isus At fagbulun gina ebi bagu gfasigad At fagbulun ay anggan sa At foyungun. ² Anggan wa e naurug Anya fag menit sas Banwa. Ay nu makbang wa nu e gaurugun Anya sas Banwa, Kanya nafoyung yay sa At-Ngay-Suguan sa ebia taw At nafili. At foyungan siginan At-Masine-Fag-Falad At fagmadaragangun. ³ Ay ebi nu nkate wan ay nu gdog yay gleleg, Isus insure yay sa At-Ngay-Suguan. Ay sis 40k menit, nafalag yay sa anya At ngay madulawan fag fagbulun, nanfasaful te, gdog Kyay gleleg. Ay manga nafoyung yay sas Funbalugu-Nu-Gmagurang-Taw at ugali baliwa. ⁴ Ay kaduge Isus maful gfangon sa At-Ngay-Suguan, nalong yay anya te, Agi yap glo siginans Erusalem. Ay fanyai yap Tam Tama At fatuyanan, kata yangay ebi ay nadungug siginan Angku. ⁵ Anway ebi Uan Tagfasurung nafasurung taw sasad safa. Ay dua glugo e fasurung yangay ban ayu sa At-Masine-Fag-Falad. ⁶ Ay gina At-Ngay-Suguan maful, nainto sas Isus te, Em Fun, go manga katsi wan nu gfafoli O laman Tagagbuan at sugfun gdog yay gmagurang sa at daga ebi. ⁷ Ay Isus nabalus anya te, Bunwa am at tagsaful at ngay menit ay at nafaikafudan banwa. Anway Tam Tama tuwa At nafili katanya siginan tuwa At fasadan mandi. ⁸ Ay At-Masine-Fag-Falad gina mdasug sa ayu, mon ban ayu At fagmadaragangun. Ay nanfatuyan ban am Ku longan sas fulan Erusalem, ay sas fagdaul talun Naseg, ay sas talun Fagbantayan, ay anggan sas fungfung talun sas fagdaul daga at ngay taw. ⁹ Ay nu ntabua Isus nu glong katanya, e naurug wa Anya sas banwa kaduge At-Ngay-Suguan glinggat. Ay anggan wa te du e nalag, sik linyabu nafarum wayay. ¹⁰ Ay At-Ngay-Suguan gtangda yay sas banwa kaduge Isus garimanan kaabat. Ay rodi duwak ama inlindug way sigad inful sa anya, ay at lanbung malagsi dawdaw. ¹¹ Ay ka fag duwama nalong anya te, Am Taw-Balulangan, taw ro ay fagmalindugun ay ay fagtangdaun sas banwa. Kanya tam Isus, At kinkabat sas Banwa siginan ayu, Kanya gdog yay ban stiye, kata yangay aro nu glag am Anya nu kaabat sas Banwa. ¹² Isus At-Ngay-Suguan noli wa sas Erusalem siginans Muyud-Tagakayuun-Ulibu. Ka fag muyud makbang way, at kayayuan arvs sik menit gwabilug. ¹³ Ay kanya nasakbo wa sas bale, ay naulul wa sa at tungud fag salug, sas fagtiugan. At nasakbo at ngayan, Takata-Sik-Batu, ay Uan, ay Santiagu, ay Butuan, ay Takesug-Kabayu, ay Duwak-Nasfuan, ay Sik-Takali-Sirut, ay Funbalugu-At-Nafon, ay Santiagu, Alfeu at baguama, ay Nadungug, Sik-Takamabo-Taw-Ruma, ay Segi, Santiagu at baguama. ¹⁴ Ay kanya fagayu sadi tuwa at fasadan nu gdarangin faggugat gfasfuan sik ngay mangena ay Taglu, Isus At tina, ay anggan Isus At ngay fadugsay. ¹⁵ Ay ginanya fag ngay menit Takata-Sik-Batu inlindug si sangay takafandiug at buknga, ay nu ndain 120k taw sanya, ay nalong te, ¹⁶ Ku ngay fadugsay, At-Rirukan, ebi At-Masine-Fag-Falad At naguna nafoyung sas fun Fakafanyuun, agurungani wa nangus fiya. Ay ka fag Rirukan sa baliwas Segi nu namoyung ban Isus sa at ngay taw at nanted Anya. ¹⁷ Ay Segi ebi at sadi tam ufud sa tam ngay fagbulun. ¹⁸ Ay bandi Segi nasali sik daga, ay at fansali siginan at fagbulun at mauri. Ay kanya ntong masuknunan sanya fag daga. Ay at ungdan inbugsang ay at bitua inbusbus. ¹⁹ Ay fagayu tagbanwan sas Erusalem nadungug. Ay nafangayan ka fag daga sat fanlongan te, Akeldama, at masuad te, At-Ke-Taguk-Fag-Daga. ²⁰ Fun Fakafanyuun At-Rirukan ebi sas Danyu nalong te, At masine nu nsure, Marawrawan at bale. Du e taw at tagbanwan, Sat bale nu katsi ban. Ay Bandi ban at masine, At tagtubus nu nsure. ²¹ Ay nu katanya, at masine nanfili yap tam fiya at sadi tam ufud, siginan ebi at sadi tagufud antam kaduge tam Fun Isus ste swa daga maful antam. ²² Siginan ebis Uan Tagfasurung gsurung taw, ay anggan e naurug Isus fag menit siginan tam buknga. Tam fagfiliun tagsanya ginani at sadik taw, tagfatuyan ban tagfasfuan antam te, Isus gdog yay gleleg. ²³ Ay at nafili duwak taw, At-Fakafamutan ay Funbalugu-Tagfon. At-Fakafamutan e duwa yak ngayan at ngayan te, Sis-Faunumk-Menit ay Sik-Taw-Matuyan. ²⁴ Ay at takafandiug gdarangin te, O wan, em Fun, At nasaful fagayu taw at amatanganan. Foyungi emi te, inday kanya fag duwama, at sadi Am nafili fag taw. ²⁵ Laman kanya yangay ban At-Suguan at sadi, at fantubus Segi sa tam fagbulun. Anway Segi nasaruy wayay ka fag fagbulun ay at fakadasugan sawa takasakan anya. ²⁶ Ay at ngay takafandiug at ke fagsafulan. Ay Funbalugu-Tagfon at nafili, at famamut Funbalugu-Tagfon sa At Labi-Sadik-Suguan.

¹ Nu ndasug sis Falimak-Safuluk-Menit fag yafun, fagayu takafandiug maful way sa sik bale. ² Ay rodi tv nadungug way sigad nu e gawang siginans Banwa. Kata sik bagyu ay nkapnu sat fagmafulan fag bale. ³ Ay e nsure kata sik ngay dila afuy nasaruwayan ay natayuk sasa ngay taw nasadsadian. ⁴ Ay At-Masine-Fag-Falad igmagurang sanya fag ngay taw. Ay fagayu gfasigad glong sa tibak fanlongan, nus nga setaw wa At-Masine-Fag-Falad At nafaamatanganan anya. ⁵ Ay ginanya, at ngay Taw-Naseg at nabanwan sas Erusalem siginan sa ngay talun sas fagdaul daga. Ay kanya sik ngay tagseg sas Funbalugu. ⁶ Ay nu nadungug nu e gawang, kanya inful sanya. Ay dua nasaful te, taw fakatanyaun. Anway at nadungug at ngay tagadal at foyungan sa at fanlongan wa mandi. ⁷ Ay ka fag ngay taw nadulawan dawdaw te, fagayu at tagfoyung anwa Taw-Balulangan. Go kin. ⁸ Taw ro at fagnasafulun mandi sa tam ngay fanlongan mandi. ⁹ Madyay itam siginan way tams talun Partia, ay siginans talun Media, ay siginans talun Masuksuanan, ay siginans talun Buknga-Safa, ay siginans talun Naseg, ay siginans talun Kapadusia, ay siginans talun Lino-Daul, ay siginans talun Asia. ¹⁰ Ay siginans talun Frigia, ay siginans talun Fanfilia, ay siginans talun Eiptu, ay siginan ka fag talun sas Libia tagsafungan fulan Sirene. Ay e ngay nansibo yangay siginans fulan Ruma, dewa Taw-Naseg ay dewa at bagu gfaning sas Taw-Naseg at ugali. ¹¹ Ay e ngay taw yangay siginans furu Kreta ay siginans Sik-Talun-At-Yud-E-Safa. Ay gina ka fag ngay takamoyung igfoyung Funbalugu At madaragang fag fagbulun, fagayu tam natogdungug tuwa tam at longan sa tam fanlongan mandi. ¹² Ay fagayu taw nadulawan ay gadayuan sat amatanganan, ay gidgintoan te, Nataw takatanya at masuad tam nadungug. ¹³ Ay tibak taw gfanlamangan te, Ka fag ngay takamoyung nafadaul nu ginum at fangasigung. ¹⁴ Takata-Sik-Batu namalindug gasfuan at Labi-Sadi ay ge longan dawdaw te, Taw-Naseg ay fagayu am at namanwan sas Erusalem, dungugani sa ku longan gina aw gfoyung ayu. ¹⁵ Anway ka fag ngay taglong dua kasigung kata ay fatugan. Madyay katsi sbalabag yay baliwa. ¹⁶ Kanya ay nalag fag fagbulun kagurungan way sas Funbalugu At taglong, Tam-Masine-Fag-Taw-Yabi, sa ebi at nafoyung te, ¹⁷ Funbalugu nalong te, Sa bans fakatabuan fag ngay menit nanfat si Aws taw Ku Masine-Fag-Falad laman igmagurang sas fagayu taw. Laman ay ngay baguama ay ay ngay baguina moyung ban. Ay laman ay ngay baguama lumag ban kata sik taginfanan at ke masuad. Ay laman ay ngay fufuama tumaginfanan ban at ke masuad. ¹⁸ Kin wa fiya. Ay ginanya fag ngay menit nanfat si Akwa ban fiya Ku ngay fanuguan fag mangama ay Ku ngay fanuguan fag mangena Ku Masine-Fag-Falad. Laman nanfoyung ban. ¹⁹ Ay nanfasure Akyangay ban at madaragang fag fagbulun sas banwa. Ay anggan at ke masuad fag fagbulun sas daga, sik taguk, ay sik afuy ay sik tagbiya fag anus. ²⁰ Ay at menit umlayung ban. Ay at magdanun umraska ban katvngvd sik taguk. Katanya ban gina gakadasugun tam Fun-At-Menit, at matvngvd ay at malimu fag menit. ²¹ Ay ginanya, nus nga sinu takafandiug sa tam Fun umbalabag tuwa. ²² Am Taw-Tagagbuan, dungugani yap sa ku longan. Isus, sik Taw-Nasaret, Funbalugu At nafatuyan sa ayu. Madyay Funbalugu nafasure wa at madaragang fag fagbulun, ay at ke masuad fag fagbulun ay anggan at fagtoglagan fag fagbulun sa ay buknga siginan ways Isus. Ay nasaful wam katanya. ²³ Ay e nataban wa Isus sa ayu, anway Funbalugu At naguna nasaful ay katanya At fasadan wa mandi ebi. Ay am way at natuktuk Isus sas salibagan kayu. Madyay am wan at nasugu at mauri fag taw laman igfate Anya. ²⁴ Ay Funbalugu gdog yay nafaleleg Isus, ay nafalfas Anya siginans fakateun at faurianan. Anway fakateun di gbabo Anya. ²⁵ Ay fun Fakafanyuun naguna nafoyung Isus At fagbulun te, Faggugat gamatangan aw te, Tam Fun faggugat si wa angku. Anway Kanya si tuwa ku siun baliwa fag day tigyangan, laman di e gfabaluanan angku. ²⁶ Ay nu katanya, guseganan aktuwa sa ku amatanganan. Ay anggan ku bilug manabayan ay e fagsegun tuwa. ²⁷ Ay katanya tuwa, di ban O mubun angku sat Kinbul-At-Talun. Ay di ban O gfabayan Am Masine-Fag-Taw At bilug, laman di mruas. ²⁸ Nafoyung Tuwo sa angku at masine Am ugali laman gleleg aktuwa. Ay guseganan aktuwa ban dawdaw, anway O wan tagsi Angku. ²⁹ Am ku ngay kalongan, matuyan igfoyung aw sa ayu te, tam aguyangan, fun Fakafanyuun, nkate wan ay e nasandig wan. Ay anggan katsi gsaful yay tam te, sanya nu masandigan. ³⁰ Ay anway fun Fakafanyuun Funbalugu wa At taglong at sadi, ay kanya nasaful tuwa Funbalugu At fatuyanan sa anya te, at sadi ban am sugfun, sik fun yangay ban kata emu. ³¹ Ay fun Fakafanyuun naguna wa nasaful ay naguna wa nafoyung sa baliwas Fagtayukan nu gdog yay gleleg. Ay Funbalugu di ban mubun Anya sat Kinbul-At-Talun. Ay manga At bilug di ban umruas. ³² Tam Isus, Funbalugu gdog yay nafaleleg. Ay ami, nasaful wami, anway nalag wami. ³³ Ay Funbalugu naurug wa Isus laman sa wa At siun baliwa fag day tigyangan. Ay At Tama nafatuyan sas Isus te, nanfat si Aw Emu At-Masine-Fag-Falad. Ay Isus nafat sa yangay emi At-Masine-Fag-Falad, kata am nalag ay am nadungug katsi. ³⁴ Bunya fun Fakafanyuun at naulul sas Banwa, ay nalong te, Tam Fun nalong sa ku Fun te, Malunggungi sa Ku siun baliwa fag day tigyangan. ³⁵ Ay fatsa Akwa ban Am daga fagmadaragangun at tagfabarangian Emu. ³⁶ Ay nu katanya, fagayu tam Taw-Tagagbuan, asafuli tuwa te, tam Funbalugu wan At nafili Isus, am nafate, laman Kanya tam Fun wan ay manga tam Fagtayukan wa fiya. ³⁷ Ay at ngay taw nu nadungug katanya at longan, inlimu dawdaw, ay ginto sas Takata-Sik-Batu, ay anggan sa At-Ngay-Suguan te, Em magurang, setain ban manga em fagbulun. ³⁸ Ay Takata-Sik-Batu nabalus anya te, Ubuni ay asalanan. Ay fagayu am asurungi sas Isus Fagtayukan At fagmadaragangun, anway e nafaliam wan ay asalanan. Ay si wa ban ayu At-Masine-Fag-Falad. ³⁹ Anway Funbalugu wan At nafatuyanan sa ayu ay sa ay ngay sugfun, ay anggan sa at ngayayu fag ngay taw. At masuad sas fagayu taw Funbalugu At nafakbang anya. ⁴⁰ Ay ngayu tuwa Takata-Sik-Batu at foyungan ay nu gatul te, Lag gfaning sa at ngay mauri fag taw ay sat ugali. ⁴¹ Ay kayu tagafanud sas Takata-Sik-Batu at foyungan, e nafasurung anya. Ay nu ndain at kinfamut sa at ngay takafandiug ginanya fag menit 3000k taw. ⁴² Ay kanya faggugat maful, laman nadungug sas Isus At-Ngay-Suguan at foyungan. Ay kanya guseganan e fagmasadiun nu kon tam Fun-At-Yafun, ay nu gdarangin. ⁴³ Ay at ngay taw kalimu dawdaw nu nalag Isus At-Ngay-Suguan at madaragang fag fagbulun ay at ke masuad fag fagbulun. ⁴⁴ Ay fagayu takafandiug insadi tuwa at amatanganan. Ay at nanuranan sigon sa tuwas fagayu takafandiug. ⁴⁵ Ay nu nafesali wa at daga ay anggan at ngay nanuranan, e nafafafud tuwa at ngay nafabul sas fagayu takafandiug, nus nga seyu at nayudanun. ⁴⁶ Kayu menit kayu menit at ngay takafandiug e fagmasadiun nu maful sas Tagbvt-Fag-Bale-Funbalugu. Ay gina gyafun sat ngay bale, kanya guseganan ay masine tuwa at ngay amatanganan sa tiba gina gfangon. ⁴⁷ Ay kanya gseg sas Funbalugu. Ay at ngay taw sat ngaba dayu kaumsig at ngay takafandiug at ugali takatanya. Ay kayu menit kayu menit Funbalugu gfainfamutan tuwa at bagu kinbalabag.

¹ Sik menit Takata-Sik-Batu ay Uan gasakboun sas Tagbvt-Fag-Bale-Funbalugu gina inbalitang at menit. Anway kaduge niya Taw-Naseg at ugali nu gdarangin. ² Ay sanya sik taw yud malo siginan ngay bagu kalangfe. Ay kayu menit kayu menit e nauba anya sanya sas day sakbawan sas Tagbvt-Fag-Bale-Funbalugu. Laman kanya get anya kayu tagasakboun. Ka fag sakbawan at ngayan te, Masine-Fag-Sakbawan-Bale. ³ Ay at yud malo nu nalag Takata-Sik-Batu ay Uan nu gasakboun sas Tagbvt-Fag-Bale-Funbalugu, kanya e fagetun. ⁴ Ay Takata-Sik-Batu, ay anggan Uan, igfalinggatun dawdaw sa anya ay nalong te, Linggati sa emi. ⁵ Ay at yud malo gulit. Anway nu gfasad, e fagafonun ro sa anya. ⁶ Ay Takata-Sik-Batu nalong yangay sa anya te, Aw, ku e salafi. Dewa katanya, nanfon akro sa emu ku fage kwaun. Sas Isus Fagtayukan, sik Taw-Nasaret, At fagmadaragangun, alindugi ay loi wan. ⁷ Ay Takata-Sik-Batu nated at yud malo at siun fag daluap, ay nafalindug anya. Ay rodi at yud malo at darafa ay anggan at sulfuan darafa matud tuwa. ⁸ Ay at yud malo inlindug, ay natulbu, ay glo tuwa. Ay nasakbo sas Tagbvt-Fag-Bale-Funbalugu gfaigaluan tuwa sas Takata-Sik-Batu ay Uan. Ay kanya glo tuwa, ay gfantulbuan igseg sas Funbalugu. ⁹ Ay fagayu taw at nalag wa nu glo ay nu gseg sas Funbalugu. ¹⁰ Ay natoglag anya te, kanya wa long fiya ebi fag taw at malunggung sis day Masine-Fag-Sakbawan-Bale ay tagget. Ay at ngay taglag anya namatangan dawdaw ay nadulawan te, nataw sangay at kindasug sa anya. ¹¹ Gina at bagu malo nated sas Takata-Sik-Batu ay Uan, at ngay taw mafali nu kaful sa anya si at Fun-Mabayan-At-Maugunan-Fag-Dalan sas Tagbvt-Fag-Bale-Funbalugu. Ay ka fag ngay taw nadulawan dawdaw sat kinsure. ¹² Ay Takata-Sik-Batu nu nalag kanya fag ngay taw, ay nalong te, Am fag ngay Taw-Tagagbuan. Taw ro ay faglinggatun emi. Go gayup am te, em fagmadaragangun ay em fagmasineun at nafafiya tuy fag taw. ¹³ Yaya. Bundi ami. Antuwa fiya, Kanya Abrayam at Funbalugu, Ay Kanya-At-Naasean at Funbalugu, Ay Takamilug at Funbalugu, Ay anggan tam aguyangan fagayu at Funbalugu, Kanya tuwa At nafasure kanya fag fagbulun. Laman e gseg tuwa sa At-Fanuguan, Isus. Ay Kanya ay nataban ebi sa at fun At-Ke-Bangko. Ay ay nafamayud Anya sas fun At-Ke-Bangko at akbang, dewa fun At-Ke-Bangko at fasadan gananfalfasun Anya. ¹⁴ Ay kalimata way am sas Funbalugu At Masine-Fag-Taw. Ay ay naet, at nafalfas sa ayu sik tagfate way taw. ¹⁵ Ay nafafate way am At Tagfon-Leleg. Ay Funbalugu nafaleleg yay Anya siginans At fagmatianan. Ay nalag wami fiya fagayu takatanya. ¹⁶ Ay katsi Isus At fagmadaragangun at nafabitsug ka fag ama, ebi ay nasaful at yud malo. Ay at fakafandiugun sas Isus At fagmadaragangun at nafafiya fiya fiya anya sa ay akbang. ¹⁷ Am ku ngay kalongan, nasaful aw te, di am nasaful at masuad ebi ay fagbulun sas Isus. Ay anggan ay ngay fun dua mandi nasaful at masuad. ¹⁸ Funbalugu At ngay taglong ebi at naguna nafoyung te, E faurianan ban sas Fagtayukan. Ay katsi Funbalugu wan At nafagurungan ka fag longan. ¹⁹ Ay nu katanya, ubuni ay asalanan ay afolii tuwa sas Funbalugu. Laman Kanya gfaliam tuwa ay asalanan. Laman e fagmanabayanun tuwam siginans Funbalugu. ²⁰ Ay laman Funbalugu sumugu ban stiye sa ayu At fagnafiliun Fagtayukan Isus. ²¹ Anway Isus gbanwan yay sas Banwa yap ngay ndasug ka fag ngay menit Funbalugu nu gfafoli fagayu. Kata Funbalugu At fatuyanan, sat ngay masine fag taglong sat nafoyung ebi taguna. ²² Ay Ku-Unga at nalong te, Tam Fun tam Funbalugu gfasure ban sa ayu sik Taglong siginan ay kalongan kata yangay angku. Dungugani tuwa fagayu At longan sa ayu. ²³ Ay nus nga sinu fag taw at yud gdungugan sa Ka fag Taglong at longan, e mayiyan wa anya siginans Funbalugu At ngay taw ay e fate wa anya. ²⁴ Ay nadiuganan fagayu Funbalugu At taglong at foyungan ebi siginan At-Ke-Ngayan-Funbalugu, ay anggan sa at fadogan fag ngay taglong, nu nafoyung sa ka fag ngay menit baliwa. ²⁵ Am wan at nabul Funbalugu At ngay taglong at longan sa baliwas Funbalugu At fatuyanan sa ay ngay aguyangan. Anway Kanya nalong sas Abrayam te, Fagayu talanan sas fagdaul daga mul ban sik ngay fagmasineun siginan am ngay kadagdagan. ²⁶ Funbalugu nafasure At-Fanuguan, ay sa ayu taguna nu nasugu. Laman fabul ban am sik ngay fagmasineun, kaduge am naubun ay ngay fagbulun at mauri.

¹ Ay Takata-Sik-Batu ay Uan igfoyung sa at ngay taw. Ay ginanya, Taw-Naseg at ngay taganyun, ay at fun tagdingding sakbawan sas Tagbvt-Fag-Bale-Funbalugu, ay anggan at ngay Taw-Saduseu indasug ay inkakbang sa anya. ² Ay ka fag ngay magurang kalimata sa ka fag duwama at nafoyungan sat ngay taw. Anway nafoyung te, nasaful wami fiya te, e faleleg wa ban fiya at kinkate, madyay Isus gdog yay naleleg ebi. ³ Ay ka fag ngay magurang nayugfu ka fag duwama, ay nasungsung anggan sas balabag. Anway ginanya gakayabiun wan. ⁴ Ay dewa katanya, ngayuk taw aro at nadungug at foyungan kafandiug tuwa sas Isus. Ay at takafandiug nu fagayu wan, nu ndain 5000k mangama. ⁵ Ay nus balabag wan, Taw-Naseg at ngay magurang, ay at ngay fun, ay anggan at ngay tagfasaful inful sas Erusalem. ⁶ Ay anggan at Taguna-Fag-Taganyun-Daul at ngayan Mafanyan, ay Takabalu, ay Uan, ay Tagdingding-Taw, ay anggan fagayu at Taguna-Fag-Taganyun-Daul at talafuan infamut yay inful sanya. ⁷ Ay ka fag ngay magurang nu nafat sa wa at buknga Takata-Sik-Batu ay Uan, nainto anya te, Daginan ay fagmadaragangun. Ay sinu at nasugu ayu te, fasurei ay fagbulun takatanya. ⁸ Ay At-Masine-Fag-Falad tagmagurang sas Takata-Sik-Batu ay kanya nalong te, Am at ngay fun ay at ngay magurang. ⁹ Ay fagnafasteun emi katsi at masuad, nut sa way baliwa em nafasurean em masine fag fagbulun sa at yud malo fag taw. Ay manga nu anway te, tain at faginfiyaun katsi. ¹⁰ Fagayu am, anggan fagayu Taw-Tagagbuan, asafuli tuwa te, Isus tuwa Fagtayukan, sik Taw-Nasaret, ay natuktuk ebi sas salibagan kayu, ay Funbalugu gdog yay nafaleleg Anya. Kanya tuwa At ke fagmadaragangun at nafafiya ka fag taw tagsi ay buknga katsi. ¹¹ At-Rirukan nalong sas Isus baliwa te, Kanya tuwa fag Batu At fangawat bale. Ay am at ngay takawat bale kalimata way am Ka fag Batu. Ay roro Kanya tuwa fag Batu At tiba tungud At famatvngvd fagdaul at bale. ¹² Ay Kanya tuwa At mafabalabag antam, du e tiba nus nga sinu. Anway du e madaragang ste swa daga at nafon sas taw, laman sak mafabalabag antam. ¹³ Ay ka fag ngay magurang nalinggat sas Takata-Sik-Batu ay Uan te, di kapla nu gfoyung, dewa kata at yud e nagadalan fag taw. Ay kanya nadulawan dawdaw te, e kanya yay mangaro Isus At ngay ufud ebi. ¹⁴ Ay ka fag ngay magurang nalag wayay at kinfiya nu malindug igfataladan sas Takata-Sik-Batu ay Uan, ay du e fagalongunun. ¹⁵ Ay ka fag ngay magurang nasugu Takata-Sik-Batu ay Uan, laman sa yay at day fagmafulan. Ay ka fag ngay magurang gsulitanan yay. ¹⁶ Ay iglong te, Tain ro tam fagbulun sanya fag duwama. Anway madaragang wa fiya at fagbulun. Ay dua tam mafafamayud. Anway fagayu taw sas Erusalem natoglag yayay anya te, kanya yay ebi. ¹⁷ Dewa katanya, laman dua gfarapyag at foyungan sas fagayu taw, at masine nu sumalag watam anya. Laman ban dua gfoyung nus di sadik taw sas Isus At fagmadaragangun baliwa. ¹⁸ Ay rodi ka fag ngay magurang gdog yay nafakbang anya ka fag duwama, ay matvngvd nu gsalag anya te, Lag ban glong ay lag ban gfoyung nus di sirut sas Isus At fagmadaragangun baliwa. ¹⁹ Ay Takata-Sik-Batu ay Uan nabalus anya te, Muag. Anway Funbalugu nalag wan tam fagbulun. Ay am wan tagfili te, go matuyan nu gfaning ami ayu, ay ate nu gfaning ami sas Funbalugu. ²⁰ Anway dua ban ami maatuas nu gfoyung ami em nalag ay em nadungug. ²¹ Ay nu ntabu wa ka fag ngay magurang nu gfalimuanan sanya fag duwama, rodi nafalfas wa anya. Anway kanya dua nasaful at fagbulun sak ro nanfauri anya. Anway at ngay taw gseg tuway sas Funbalugu, teway aro nalag tuway sat madaragang fag fagbulun. ²² Ay ka fag taw, at kinfiya, at kadugayan glabi yay ro 40k banwa. ²³ Ay Takata-Sik-Batu ay Uan nu nalfas wan, nanlag wa sa at ngay ufud. Ay nanfoyung wa anya ka fag ngay Taganyun-Daul ay ka fag ngay magurang at longan sa anya. ²⁴ Ay at ngay takafandiug nu nadungug, insadi at amatanganan ay igdarangin sas Funbalugu te, Em Funbalugu, O wan At Tiba-Tungud-At-Madaragang. O wan At naawat banwa, ay daga, ay lino daul, ay anggan fagayu tagsanya. ²⁵ Ay O wan at nalong, gina At-Masine-Fag-Falad nafaamatanganan sa em aguyangan fun Fakafanyuun, Am fanuguan, laman nafoyung Am longan te, Taw ro at Yud-Naseg-Fag-Taw at fakadotamaun. Ay taw ro at ngay taw at fasadan at fagyudun e masuad. ²⁶ Ay fagayu at ngay fun ste swa daga inful ay nafamasadan gananfabarangianun. Ay at ngay magurang maful yangay, laman igsalag sas Funbalugu ay anggan sas Fagtayukan. ²⁷ Ay katsi ste fag fulan daul, duwak fun inful, fun Sik-Madaragang-At-Baguama-Sirut ay fun Funsiu At-Ke-Bangko. Ay gasfuan sat ngay Yud-Naseg-Fag-Taw ay anggan sat ngay Taw-Naseg. Laman nansalag Am Fanuguan Isus At Masine, Am nafili. ²⁸ Fakatanyaun ka fag ngay taw at fagbulun, laman nanfaning sa Am fasadan siginan ebi ebi, anway Am fagmadaragangun. ²⁹ Ay katsi, O em Fun, amatangani sa ka fag ngay taw at nafalimuanan emi. Ay tarabangi emi, ami Am ngay fanuguan. Laman maseganama tuwami nu gfoyung ami Am longan sas taw. ³⁰ Ay gina ami gfoyung, fasurei Am fagmadaragangun ay fafiyai at ke dailan. Gasfuan at ke masuad fag fagbulun ay at madaragang fag fagbulun siginan Am Fanuguan Isus At masine At fagmadaragangun. ³¹ Ay at ngay takafandiug nu ntabu wa nu gdarangin, ay si at fagmafulan fag bale nauwigan dawdaw. Ay At-Masine-Fag-Falad tagmagurang sas fagayu takafandiug tagsanya. Ay maseganama tuwa at ngay takafandiug nu gfoyung Funbalugu At longan. ³² Ay at ngay takafandiug e fagmasadiun at amatanganan ay sat fasadan. Ay du e glong te, angku wadi ku nafabul fag nanuranan. Anway fagayu at nanuranan sa tuwas fagayu takafandiug. ³³ Ay At-Ngay-Suguan madaragang tuwa nu nafatuyan sa baliwa tam Fun Isus nu gdog yay gleleg. Ay Funbalugu nafon sik ngay fagmasineun sas fagayu takafandiug. ³⁴ Ay nus di sadi at taw sanya, di e taw yud e kwa. Ay madyay fagayu taw nu e daga, ay ate nu e bale, nafesali tuwa. Ay nauba at nafabul fag ngay salafi. ³⁵ Ay nafon sa At-Ngay-Suguan. Laman nanfon nus nga nday tagayudan. ³⁶ Ay katanya yangay At-Fakafamutan at fagbulun. Kanya At-Famaalo at sadi at kadagdagan. Ay at kinke taw sas furu Sipre. Ay At-Ngay-Suguan nafangayan anya te, Sik-Nanfatvngvd. At masuad te, Igfatvngvd at tiba at amatanganan. ³⁷ At-Fakafamutan nafesali at daga. Ay nauba at nafabul fag ngay salafi ay nafon sa At-Ngay-Suguan.

¹ E sik taw at ngayan Mafanyan-Funbalugu ay at mangena, Sik-Ina-Masine. Ay at mangama nafesali at daga at balyu. ² Ay at mangama nasuksuk sik afud at nafabul fag ngay salafi. Ay anggan at mangena nasaful yangay. Ay at mangama nauba at tiba ay nafon sa At-Ngay-Suguan. ³ Ay Takata-Sik-Batu ginto sa anya te, Mafanyan-Funbalugu, taw ngani Tagfansalag at fagmagurangun emu. Madyay kamuagan way o sa At-Masine-Fag-Falad, madyay nasuksuk yay o at tiba am nafabul fag ngay salafi siginan am daga. ⁴ Kaduge am gyud nafesali, emu yay at daga. Go kin. Ay nu nafesali wo, am nafabul fag ngay salafi emu wan. Go kin. Nataw at masuad fakatanyaun am fasadan. Du o kamuagan sas taw, am fakamuaganan sa was Funbalugu. ⁵ Ay nu nadungug at longan, Mafanyan-Funbalugu nagfu wan nkate wan. Ay fagayu at nadungug ka fag fagbulun kalimu dawdaw. ⁶ Ay at ngay baguama tagsanya inkakbang sat kinkate. Ay nasifig at bilug. Ay nauba wan laman nansandig. ⁷ Nu nlangfe wa nu ndain tulu ginan kafalin tam menit, Mafanyan-Funbalugu at mangena nasakbo. Ay kanya dia nasaful aro taw fag fagbulun sat mangama. ⁸ Ay Takata-Sik-Batu ginto anya te, Go kayu wa fiya tuy ay nafabul fag ngay salafi siginan ay daga. Ay Sik-Ina-Masine nabalus te, Kin, kayu wa fiya anya em nafabul. ⁹ Ay Takata-Sik-Batu nalong yangay anya te, Taw ngani am daduwa ay faginsadiun nanfaskud nanfamuagan sas Funbalugu At-Masine-Fag-Falad. Ay damai. At nanandig am mangama gasakboun wan katsi. Ay o yangay ro fiya at fadogan. ¹⁰ Ay rodi tv Sik-Ina-Masine nagfu wa sas Takata-Sik-Batu at akbang, nkate wan. Ay ka fag ngay baguama at nasakbo. Ay nu nalag te, inkate wan, kanya nauba at bilug ay nasandig nafakbangan sat mangama. ¹¹ Ay fagayu takafandiug at maful sanya kalimu dawdaw. Ay anggan fagayu at nadungug ka fag fagbulun. ¹² Ay At-Ngay-Suguan nafasure sik ngay ke masuad fag fagbulun ay sik ngay madaragang fag fagbulun sa at ngay taw buknga. Ay fagayu takafandiug maful sas Fun-Mabayan-At-Maugunan-Fag-Dalan sasa ngaba day Tagbvt-Fag-Bale-Funbalugu. ¹³ Ay at yud kafandiug dewa kalimu nangaful sa at ngay takafandiug, igseg tuwa anya. ¹⁴ Ay ngayu tuwa at bagu kafandiug, takafamut sa tam Fun At ngay taw, mangama ay anggan mangena. ¹⁵ Ay nu katanya, at ngay taw nauba at ke dailan sasad faglanuan. Ay nafatagilid anya sat fagtiugan ay sat tigyan. Laman Takata-Sik-Batu nu dumalan sanya, dewa naaninu fagtvngvd sat tiba. ¹⁶ Ay at ngay taw siginan at ngay fulan sirut sa tagsafungan fulan Erusalem inful sanya. Ay nauba at ke dailan ay at ke mafurat fag falad. Ay fagayu nfiya wan. ¹⁷ Ay nu katanya at Taguna-Fag-Taganyun-Daul ay at ngay ufud fag ngay Taw-Saduseu galabian dawdaw sa At-Ngay-Suguan at fagbulun. ¹⁸ Ay kanya nayugfu At-Ngay-Suguan ay nasungsung anya sas bale fagsungsungan. ¹⁹ Ay gina sad yabi Funbalugu At tagbukngan at sadi naluang at ngay sakbawan bale fagsungsungan ay nafalfas anya, ay nalong anya te, ²⁰ Loi wa sas Tagbvt-Fag-Bale-Funbalugu. Ay foyungi sasa ngay taw sanya tuy fag ugali at bagu. ²¹ Ay At-Ngay-Suguan nu nadungug at longan katanya, nasakbo sas Tagbvt-Fag-Bale-Funbalugu gina sad surip, ay igfoyung. Ay ginanya at Taguna-Fag-Taganyun-Daul ay at ngay ufud nafaful Taw-Naseg-At-Ngay-Magurang. Ay kanya nasugu sik taw sas sungsungan, laman nanfat sa at fagmafulan At-Ngay-Suguan. ²² Ay at nasugu nu ndasug sas sungsungan, du e nalag At-Ngay-Suguan sanya. Ay kanya infoli ay nanfoyung te, ²³ Nu glag ami madingdingan yay at sakbawan. Ay e tagtanud sis day sakbawan. Ay dewa ami naluang, roro du e taw sasad bale. ²⁴ Ay at Taguna-Fag-Taganyun-Daul ay at tagdingding sakbawan sas Tagbvt-Fag-Bale-Funbalugu at fun nu nadungug, gadayuan sat amatanganan, anway dua nasaful at kumdasug ban. ²⁵ Ay rodi sik taw ndasug ay nafoyung sat maful fag ngay magurang te, Kanya fag ngay taw, ay nasungsung egmenit, katsi sa was Tagbvt-Fag-Bale-Funbalugu, igfoyung wa sa at ngay taw. ²⁶ Ay at tagdingding sakbawan at fun ay at ngay ufud nalo sanya sa At-Ngay-Suguan. Ay malukme tuwa nu nataban anya sa ka fag ngay magurang at fagmafulan. Anway kanya kalimu sat ngay taw te, mafalang anya batu. ²⁷ Ay at ngay tagtaban nu ndasug wan, At-Ngay-Suguan e nafat sa wa at ngay magurang at fagmafulan. Laman at Taguna-Fag-Taganyun-Daul nansarap at fagbulun. ²⁸ Ay kanya nalong te, Go sangay ebi, ya matvngvd em longan ayu te, lag gfoyung sa baliwa Ka fag taw At ugali. Go kin. Ay madyay katsi nu gfoyung am, nafafagdaul wam ngap karo fulan Erusalem. Ay anggan am gayup ro am te, ami way at ke asalanan, madyay ebia taw Kanya fag taw At faginkateun. ²⁹ Ay Takata-Sik-Batu, ay anggan At-Ngay-Suguan at tiba, nabalus anya te, Em fagfaningun antuwa sas Funbalugu, ay bundi sa sik taw. ³⁰ Tam ngay aguyangan at Funbalugu At nafaleleg tam Isus, dewa am nafate Anya ebi sas salibagan kayu. ³¹ Ay Funbalugu nafat sa At siun baliwa fag day tigyangan tam Isus. Laman Kanya tam Fun ay tam Tagbalabag. Ay laman at ngay Taw-Tagagbuan mubun at asalanan ay Funbalugu nafaliam tuwa at asalanan. ³² Ay ami wan at nafatuyan sa ka fag fagbulun. Ay anggan At-Masine-Fag-Falad nafatuyan yangay. Anway Funbalugu nafat sa nus nga sinu tagfaning sa Anya At-Masine-Fag-Falad. ³³ Ay ka fag ngay magurang nu nadungug At-Ngay-Suguan at longan, matvngvd nu kadotama sa anya. Ay gafateun anya. ³⁴ Ay at sadi at magurang, sik Taw-Tagfalayun, at ngayan Funbalugu-Nafon-At-Fanambagun, sik takamoyung siginan Ku-Unga At-Longan. Ay fagayu taw gseg anya. Ay kanya malindug sisad buknga ay nalong te, Tabani yap sirut At-Ngay-Suguan sat dayu. ³⁵ Ay nu nataban wan, Funbalugu-Nafon-At-Fanambagun nalong sat ngay magurang te, Am ku kalongan Taw-Tagagbuan. Faamatanganuni ay faganan fagbulunun sanya fag ngay taw. ³⁶ Anway ebia taw sik taw, Teudas, indasug ay nafoyung te, Aw e fagmadaragangun aktuwa. Ay sik ngay taw, nu ndain 400k mangama, tagalo anya. Dewa katanya, bandi e nafate wayay anya. Ay at ngay tagalo anya nasaruwayan wan. Ay ka fag taw at fagbulun du e masuad. ³⁷ Ay bandi e sadi ya fiyak taw, Segi, sik Taw-Balulangan. Kanya indasug gina e gtap at ngay taw fag buknga. Ay sik ngay taw galo anya. Ay bandi e nafate wa anya. Ay at ngay tagalo nasaruwayan yay fiya. ³⁸ Ay nafoyung aw ayu te, katsi ro lag gyugfu isnay am dayu fag ngay takamoyung. Ay fabayani wa anya. Anway at fasadan ay at fagbulun nut siginan way ros taw, dua ban e masuad. ³⁹ Ay roro mangaro siginan wanays Funbalugu, du am mafafasalag anya. Ay ay fagsalagun anwa tam Funbalugu. ⁴⁰ Ay at ngay magurang nadiuganan sirut at longan. Ay gdog yay fiya nafasakbo At-Ngay-Suguan. Ay e nafalang dawdaw anya. Ay matvngvd nu gsalag anya te, Lag ban gfoyung sa ka fag Isus At ugali. Ay nu ntabu wan, nafalfas yangay anya. ⁴¹ Ay At-Ngay-Suguan nalo wan siginan ka fag ngay magurang at fagmafulan. Ay guseganan tuwa, anway Funbalugu At fagnafiliun anya nus nga e gfauri anya, laman Isus e fanambagun. ⁴² Ay kayu menit kayu menit kanya nafatunglus nu gfoyung at Masine-Fag-Barita sa tam Isus tam Fagtayukan baliwa. Dewa sas Tagbvt-Fag-Bale-Funbalugu ay dewa sasa ngay bale.

¹ Ay ginanya fag ngay menit at tagadal inkayu wan. Ay at ngay Taw-Naseg takafandiug, at kinfaning sas Taw-Gresia at ugali, gibugan sa baliwa nu kalimata sas Taw-Atsi-Baliwa. Anway fagayu menit gina e nafon at fakonun sasa ngay burangday, naliam way nu gfon sa anya at ngay burangday. ² Ay at Labi-Duwa nafaful at ngay tagadal sa anya ay nalong te, Dua masine nu katuas ami igfoyung Funbalugu At longan, laman mafatarabang yangay ami nu gfon ami at fakonun. ³ Nu katanya, em ngay fadugsay, filii yap fituk mangama at masine at ugali. Ay At-Masine-Fag-Falad tagmagurang anya. Ay at mamatanganan tuwa. Laman sumugu ami anya sik takafud at fakonun baliwa. ⁴ Ay faggugat em fagbulun igdarangin ami ay gfoyung ami Funbalugu At longan. ⁵ Ay at ngay takafandiug kaumsig nadungug sa at Labi-Duwa at foyungan. Ay at nafili Tagsangbuan. Ay kanya matvngvd nu kafandiug ay At-Masine-Fag-Falad tagmagurang anya. Ay tiba at nafili Takesug-Kabayu, ay Tagfoyung-Nu-Gsayawan, ay At-Nababo, ay Tiba-Fagsegan, ay Tagbaris, ay Tagbabo-At-Ngay-Taw. Tagbabo-At-Ngay-Taw sik Yud-Naseg-Fag-Taw siginans Antiukia. Ebi at nafaning sas Taw-Naseg at ugali. ⁶ Ay e nafakbang ka fag fituk nafili sa At-Ngay-Suguan at akbang. Ay At-Ngay-Suguan nadarangin ay nafatayuk at daluap sa anya. ⁷ Ay inrapyag at tagfoyung Funbalugu At longan. Ay anggan at ngay tagadal sas Erusalem inkayu yangay dawdaw. Ay anggan sik ngay Taw-Naseg at taganyun kafandiug tuwa. ⁸ Ay Tagsangbuan e fagmasineun tuwa siginans Funbalugu ay manga e fagmadaragangun tuwa. Ay anggan nafasure sik ngay madulawan fag fagbulun ay at ke masuad fag fagbulun sa at ngay taw buknga. ⁹ Sik ngay taw siginans Taw-Naseg at bale fakafulan at ngayan te, At-Nalfas-Fag-Ngay-Taw, ay at tibak taw siginans fulan Sirene, ay siginans Tagdingding-Taw-At-Fulan, ay siginans talun Silisia, ay anggan siginans talun Asia, inful ay gfaringangan sas Tagsangbuan. ¹⁰ Ay ka fag ngay taw dua mafasalag Tagsangbuan at longan. Anway at longan mamatanganan tuwa ay siginan wa At-Masine-Fag-Falad. ¹¹ Ay ka fag ngay tagsalag kamuagan sa tibak taw te, Nadungug wami Tagsangbuan nu glong mauri sa Ku-Unga ay sas Funbalugu baliwa. ¹² Ay ka fag ngay tagsalag gfadotamaan sat ngay taw ay anggan sas Taw-Naseg at ngay magurang ay at ngay tagfasaful. Ay kanya fag ngay taw inkakbang sas Tagsangbuan ay nayugfu anya. Ay nataban anya sa Taw-Naseg-At-Ngay-Magurang fagmafulan at buknga. ¹³ Ay ka fag ngay tagsalag gfat sanya at nanfamuagan sa anya te, Ka fag taw at foyungan faggugat mauri sas Tagbvt-Fag-Bale-Funbalugu ay sas Funbalugu At-Longan baliwa. ¹⁴ Anway nadungug wami nu glong te, Sik taw at ngayan Isus siginans fulan Nasaret, nanfarasras ban tuy Tagbvt-Fag-Bale-Funbalugu. Ay manga gfasaman way tam ugali siginans Ku-Unga at foyungan ebi. ¹⁵ Ay fagayu at maful fag ngay magurang nu nalinggat sas Tagsangbuan at mata, kata Funbalugu At tagbukngan at mata.

¹ Ay at Taguna-Fag-Taganyun-Daul nainto sas Tagsangbuan te, Go matuyan ka fag ngay taw at foyungan sa emu baliwa. ² Ay Tagsangbuan nabalus anya te, Ku ngay iba ay ku ngay magurang, dungugani yap sa ku longan. Tam Funbalugu At ke fagmasineun dawdaw, insure sa tam aguyangan Abrayam kaduge sas talun Buknga-Safa, gina gyud naalin sas fulan Dalan-Daul. ³ Ay Funbalugu nalong anya te, Loi wan. Ay ubuni wan am daga ay am ngay kalongan sanya. At loi wa sa ban Ku foyungan emu fag talun. ⁴ Ay Abrayam nalo wa fiya siginans Taw-Kalde at talun. Ay namanwan wa sas fulan Dalan-Daul. Ay nu nkate wa Abrayam tama, Funbalugu nafaalin yay fiya Abrayam sanya ginan. Ay ndasug stiye fag talun sa ay fagbanwanan katsi. ⁵ Ay dewa nalong katanya, Funbalugu di e nafon sas Abrayam ka fag daga nus di kadaul sik fagsiadan. Dewa katanya, Funbalugu nafatuyanan wan tuy fag talun fagdaul sas Abrayam. Laman ban kanya fag daga anggan sa at ngay sugfun at daga. Ginanya nu gfatuyanan gina yay Abrayam yud e unga. ⁶ Ay Funbalugu naguna nafoyung sas Abrayam te, Am ngay sugfun ban namanwan ban sa tibak taw at talun. Ay umfanuguanan ban sa anya. Ay nu gfauri ban am ngay sugfun sanya, 400k banwa. ⁷ Ay Aw wa ban At tagfauri kanya fag ngay taw at tagfanuguanan anya. Ay nu ntabuan, am ngay sugfun ban lumo wa ban sanya ginan ay nanseg ban Angku stiye fag talun. ⁸ Ay ebia taw Funbalugu nafoyung wa sas Abrayam Taw-Naseg at fagtoglagan sat bilug. Ay nu katanya, Abrayam nu inke unga wa Kanya-At-Naasean, nabul at lusku butu sis fawaluk menit. Ay Kanya-At-Naasean inke unga Takamilug. Ay sis daga Takamilug inke unga tam aguyangan 12. ⁹ Ay tam ngay aguyangan galabian wayay sat fadugsay at sadi, At-Fakafamutan. Ay nafesali wa anya sa sik ngay taglo sas talun Eiptu. Ay dewa katanya, Funbalugu wan tagsi At-Fakafamutan. ¹⁰ Ay Funbalugu nafatvngvdun At-Fakafamutan gina e gfauri sa anya sas talun Eiptu. Ay manga nafamanyun tuwa sa anya sik fagmamatangananun. Laman fun Bale-Daul, sis talun Eiptu at fun, sumeg anya. Anway fun Bale-Daul nafili anya te, laman sik fun sas fagdaul talun Eiptu ay sas fun Bale-Daul at bale. ¹¹ Ay ginanya indasug sik fanlunus daul sas fagdaul talun Eiptu ay anggan sas talun Maloban. Ay mason dawdaw ka fag fanlunus. Ay tam ngay aguyangan sas talun Maloban du e fagbulan at fakonun. ¹² Ay Takamilug nu nadungug te, e fakonun yay sas Eiptu, nasugu at ngay baguama, tam aguyangan, laman nalo at fasadi ginan sas talun Eiptu. ¹³ Ay bandi sas faduwak glo, At-Fakafamutan nafasaful at ngayan sat ngay fadugsay. Ay anggan fun Bale-Daul nasaful te, At-Fakafamutan e ngay fadugsay yay mangaro. ¹⁴ Ay At-Fakafamutan nagewan at tama, Takamilug talafuan. Ay at ngay taw nu fagayu wan sanya ginan 75. ¹⁵ Ay Takamilug nalo wa fiya sas talun Eiptu ay namanwan yay sanya. Ay taba wa nkate sanya, ay anggan tam ngay aguyangan fagayu nkate wa sanya. ¹⁶ Ay at ngay sugfun nafauli yay at ngay kinkate at bilug sas fulan Lafian. Sanya ebi ebi Abrayam at nafesali sik ngay salafi sa Sik-Asnu at sugfun at fagsandigan fag luib. Ay sanya nu gsandig at ngay kinkate. ¹⁷ Ay nu nlangfe wa ngayuk banwa, makbang wan nu kagurungan Funbalugu At nafatuyanan ebi sas Abrayam. Ay Takamilug at sugfun inkayu wa dawdaw sas talun Eiptu. ¹⁸ Ay ginanya, at fun Bale-Daul saman wa ebi fag fun Bale-Daul sas talun Eiptu. Ay dua nasaful sa At-Fakafamutan baliwa. ¹⁹ Ay ka fag fun Bale-Daul gfanluk sa tam ngay aguyangan ay nafabulun te, Ukasi wan fagayu ay ngenge, laman du e gleleg. ²⁰ Ay ginanya fag buknga Ku-Unga nu kalangfe. Ay kanya sik mataglu fag sisian. Ay tuluk magdanun at mangaguyang nu gfatvngvdun anya sat bale. ²¹ Ay bandi at mangaguyang nu nafasure wa at ngenge, fun Bale-Daul at baguina nabul anya bilang at ngenge. Ay nafadaul anya bilang at unga turungana. ²² Ay e nafoyung yay sa Ku-Unga fagayu Taw-Eiptu at fagsafulun. Ay kanya mamatanganan tuwa sa at longan ay manga sa at fagbulun. ²³ Ay Ku-Unga at kadugayan nu 40 wak banwa, e fasadan ganansiboun sa at ngay kalongan, Tagagbuan at ngay sugfun. ²⁴ Ay nu nalag te, sik Taw-Eiptu nafauri sik Taw-Tagagbuan, Ku-Unga nabalabag anya. Ay nafalang nafabali yangay sa ka fag Taw-Eiptu. ²⁵ Ay Ku-Unga gamatangan te, nu ndain ku ngay kalongan nasaful te, Funbalugu tumarabang ban anya, ay aw wa ban at nanfalfas anya. Ay roro yaya, dua katanya. ²⁶ Ay balabag di, Ku-Unga insure sa tiba ay nalag duwak Taw-Tagagbuan nu garingangan. Ay kanya gfalukmianan anya te, Taw ro ay fagaringanganun. Anway kata wam sik dugsay. ²⁷ Ay at tagfauri at tusama natulud Ku-Unga ay nalong te, Sinu at nafili emu laman o wan em fun ay em tagbuknga. ²⁸ Go am fasadan nanfate wo angku kata egmenit nu nafate o ka fag Taw-Eiptu. ²⁹ Ay Ku-Unga nu nadungug at longan, nalagyu wan. Ay kata wa sik famaklay sas talun Fagsarapan-Asalanan. Ay sanya Ku-Unga nu ke mangena ay nu ke unga, duwak baguama. ³⁰ Nu nlangfe wa 40k banwa, Funbalugu At Tagbukngan at sadi insure sa Ku-Unga si sik takalabe fag fun kayu sirut sas talun at yud e taw, makbang wa sas Bulan-At-Muyud. ³¹ Ay Ku-Unga nu nalag, nadulawan dawdaw. Ay inkakbang, laman nanfatuyanun. Ay nadungug Funbalugu nu ge longan te, ³² Aw wan am ngay aguyangan at Funbalugu. Ay Abrayam at Funbalugu, Ay Kanya-At-Naasean at Funbalugu, Ay Takamilug at Funbalugu. Ay Ku-Unga kudkulugan ay kalimu glinggat sanya. ³³ Ay Funbalugu nalong anya te, Buli yap am fanguskus darafa, anway am fagsiadan fag daga Ku daga wa at mafangibuk. ³⁴ Ay nalag Akwa nu e gfauri Ku ngay taw sas talun Eiptu. Ay nadungug Akwa nu gfanguni. Ay Ku fagindasugun katsi laman nanfalfas Aw anya sanya ginan. Ay katsi nansugu Akban emu sas talun Eiptu. ³⁵ Ay kanya yay Ku-Unga, ebi at tiba nafayud te, sinu at nafili emu, laman o wan em fun ay em tagbuknga. Katsi Funbalugu wan At nasugu anya. Laman at fun ay at nanfalfas anya gina Funbalugu At tagbukngan, at kinsure aro si sik takalabe fag fun kayu sirut, tagubuk anya. ³⁶ Ay Ku-Unga wan at nafalfas at ngay taw gina nafasure at madaragang fag fagbulun ay at ke masuad fag fagbulun sas talun Eiptu, ay sas Lino-Maraska, ay sas talun at yud e taw gina 40k banwa. ³⁷ Ay Ku-Unga yangay at nalong sas Taw-Tagagbuan te, Funbalugu gfasure ban sa ayu sik Taglong siginan ay kalongan kata yangay angku. ³⁸ Ay Ku-Unga wan at tagufud tam ngay aguyangan sas talun at yud e taw ay anggan Funbalugu At tagbukngan at nalong ebi sa anya sas Bulan-At-Muyud. Ay sanya e nafon sa Ku-Unga sik ngay tagfaleleg fag Longan, laman nanfoyung yangay sa antam. ³⁹ Ay roro tam ngay aguyangan kauri way nanfaning sa Ku-Unga. Ay igfayud way anya. Ay kaumsig yay gakafoliun sas talun Eiptu. ⁴⁰ Ay kanya nanlong way sas Arun te, Awati tam tawtawan, laman e guna emi. Anway du ami nasaful te, dada wan am arian guguat, at nataban antam siginans Eiptu. ⁴¹ Ay ginanya, ka fag ngay taw naawat wa fiya kata sik baka riangan. Ay nafon sik anyun ay guseganan sa ka fag awatan. ⁴² Ay Funbalugu nataliuyan wan ay naubun wa anya. Laman kanya nanseg wa sa at nalag sas Banwa. Kata yangay Funbalugu At taglong At-Rirukan ebi te, E, Taw-Tagagbuan, Go sa tuwa Angku nu gfon am ay nafate fag balan ay ay anyun gina 40k banwa sas talun at yud e taw. Ay go yaya. ⁴³ Yaya. Ay nauba sik taw yabi way at bale sinyag laman nanseg Ay-Fun-Fag-Taw-Yabi. Ay igseg yangay am ka fag galeme Renfan. Ay anggan ay naawat fag ngay tawtawan. Ay nu katanya, nanfat sa ban Aw ayu sas day talun Datag-Sinar. ⁴⁴ Ebi tam ngay aguyangan e Funbalugu-Bale-Sinyag sas talun at yud e taw. Kata Funbalugu At longan sa Ku-Unga gina nafasure sa anya sik fagulitan te, awati kata tuy. ⁴⁵ Ay tam ngay aguyangan wan at nauba ka fag bale sinyag nu ndasug stiye fag talun gina Funbalugu-Tam-Tagbalabag nataban anya. Ay kanya nabul at daga siginan ka fag ngay tagbanwan ste, anway Funbalugu naayiyan anya taguna. Ay kanya fag bale sinyag sanya yay anggan wa indasug fun Fakafanyuun at ngay menit. ⁴⁶ Ay Funbalugu kaumsig fun Fakafanyuun at ugali. Ay fun Fakafanyuun get sas Funbalugu te, Nu kaumsig O nanbale aw ban Am bale, Takamilug at Funbalugu At bale. ⁴⁷ Dewa katanya, fun Mabayan way ban at takawat Funbalugu At bale. ⁴⁸ Ay roro tam Tiba-Tungud-At-Madaragang dua namanwan sa sik taw at naawat bale. Kata Funbalugu At taglong at nafoyung te, ⁴⁹ Tam banwa Ku faglunggungan, Ay Tam daga Ku fagsiadan. Tain daw am naawat fag bale sa Angku. Ay dada ban Ku fagfafiyan Ku lufuy. ⁵⁰ Madyay Aw wadi takawat fagayu, Funbalugu nalong te. ⁵¹ Ay Tagsangbuan nalong yangay sasa ngay magurang te, Matvngvd wan nu gfatalfiun am si ay fasadan mandi. Ay sa ay amatanganan ay sa nu gdungug am kata way am sa at Yud-Naseg-Fag-Ngay-Taw at ugali. Faggugat igsalag way am At-Masine-Fag-Falad. Ay fagbulun kata yay ay ngay aguyangan at fagbulun ebi. ⁵² Ay ngay aguyangan nafauri way fagayu Funbalugu At taglong. Ay nafate way sa at ngay naguna nafoyung te, umdasug ban At Masine-Fag-Taw. Ay am wan at nafoyung At Masine-Fag-Taw sat mauri fag taw ay nafate wam. ⁵³ Madyay e nafon wa ayu Ku-Unga At-Longan siginan Funbalugu At ngay tagbukngan, ay du am nafaning. ⁵⁴ At nadungug fag ngay magurang indotama dawdaw ay magvm. ⁵⁵ Ay roro anwa At-Masine-Fag-Falad tagmagurang sas Tagsangbuan. Ay kanya natangda sas Banwa ay nalag Funbalugu At fagmasineun, ay anggan Isus nu malindug sas Funbalugu At siun baliwa fag day tigyangan. ⁵⁶ Ay Tagsangbuan nalong te, Linggati. Nalag aw Banwa nu maluangan. Ay Taw-At-Baguama nu malindug sas Funbalugu At siun baliwa fag day tigyangan. ⁵⁷ Ay at ngay tagdungug guro dawdaw ay natabun at talinga. Ay mafali nu nangakbang gananyugfuun Tagsangbuan. ⁵⁸ Ay anggan naguyudan anya siginan at fulan ay nafalang anya sik ngay batu gananfateun anya. Ay at ngay tagfatuyan sanya nafamato at lanbung sa sik baguama at ngayan, Sik-Naet-Siginans-Funbalugu. ⁵⁹ Ay gina ka fag ngay taw nafalang anya batu, Tagsangbuan nadarangin te, Ku Fun Isus, fatsai Emu ku falad. ⁶⁰ Ay Tagsangbuan natudan ay biya nu guro te, Ku Fun, lag gamatangan tuy fag ngay taw iste at fagbulun at mauri. Ay nu nalong wa katanya, Tagsangbuan nkate wan.

¹ Ay sanya yangay Sik-Naet-Siginans-Funbalugu gfadiuganan yangay nu gfate Tagsangbuan. Siginan gina gfate Tagsangbuan fag menit, mason at faurianan sasa ngay takafandiug sas Erusalem. Ay at ngay takafandiug nafansaruwayanan wa sas fagdaul talun Naseg ay sas talun Fagbantayan. At sawad, At-Ngay-Suguan way sas Erusalem. ² Ay at ngay tagseg dawdaw sas Funbalugu at nasandig Tagsangbuan. Ay matvngvd nu kabalu. ³ Ay ginanya, Sik-Naet-Siginans-Funbalugu igfauri dawdaw sat ngay takafandiug. Ay nasakbo sasa ngay bale laman nanguyudan at ngay mangama ay anggan at ngay mangena laman nansungsung anya. ⁴ Ay at nafansaruwayanan fag ngay taw nanfoyung tuwa Funbalugu At longan nus nga nday at fagloan. ⁵ Ay Takesug-Kabayu nalo wan sa sik fulan sas talun Fagbantayan, ay nafoyung sanya sa baliwa tam Fagtayukan. ⁶ Ay insadi tuwa at ngay taw at amatanganan nu gdungugan sas Takesug-Kabayu at foyungan ay nu nalag at ke masuad fag fagbulun. ⁷ Ay at ngay mafurat fag falad gina nalfas sanya ginan fag ngay taw nauro dawdaw. Ay ngayuk taw at malukme ay at yud malo at kinfiya. ⁸ Ay nu katanya sanya fag fulan at ngay taw guseganan dawdaw. ⁹ Ay sanya sik taw at ngayan Nadungug. Ay kanya igfasure at ngay madulawan fag fagbulun sa at ngay Taw-Fagbantayan at faglagan. Ay nafoyung yangay te, Aw e fagmadaragangun akwa fiya. ¹⁰ Ay at ngay mafanalo fag taw ay anggan at ngay madaragang fag taw igdungugan dawdaw sa anya, ay nalong te, Nu ndain manga kanya fag taw Funbalugu wa At taw at ke fagmadaragangun. ¹¹ Ay ngayuk taw tagfaning sa anya, anway glugo wan nu gfasure at madulawan fag fagbulun. ¹² Ay roro at ngay taw at fakafandiugan sa tuwas Takesug-Kabayu at foyungan sat Masine-Fag-Barita sas Funbalugu-Nu-Gmagurang-Taw baliwa ay sas Isus Fagtayukan At fagmadaragangun. Ay e nafasurung mangama ay anggan mangena. ¹³ Ay anggan ka fag madaragang fag taw at ngayan Nadungug kafandiug yangay. Ay nu e nafasurung wa anya, kanya nangalo wa sas Takesug-Kabayu. Ay Nadungug nu nalag wa at ke masuad fag fagbulun ay at madaragang fag fagbulun, nadulawan dawdaw. ¹⁴ Ay At-Ngay-Suguan sas Erusalem, nu nadungug te, at ngay Taw-Fagbantayan kafandiug sas Funbalugu At longan, kanya nanfat sanya Takata-Sik-Batu ay Uan. ¹⁵ Ay duwama nu ndasug sanya, igdarangin yay sanya fag ngay bagu kafandiug laman At-Masine-Fag-Falad tuwa tagsi anya. ¹⁶ At masuad at fagnadaranginun, anway At-Masine-Fag-Falad di at sanya fag ngay taw. Anway sanya fag ngay taw insurung yay fagtvngvd sa tam Isus At fagmadaragangun. ¹⁷ Ay Takata-Sik-Batu ay Uan nafatayuk at daluap sanya fag ngay kinsurung ay At-Masine-Fag-Falad tagsi anya. ¹⁸ Ay Nadungug nu nalag te, At-Masine-Fag-Falad si wa at ngay kinsurung gina At-Suguan nafatayuk at daluap sa anya, kanya gafonun sik ngay salafi sa At-Suguan. ¹⁹ Ay nalong te, Fatsii yangay angku ka fag fagmadaragangun. Laman ban nus nga sinu fag taw ku nafatayuk ku daluap, At-Masine-Fag-Falad si yangay ban anya. ²⁰ Ay Takata-Sik-Batu nalong sas Nadungug te, O anggan am salafi maliam yay ban. Anway am fasadan anwayay te, laman fabul yangay o Funbalugu At nafon emu siginan am nafon fag salafi. ²¹ Yaya. Du at sa emu tuy fag fagbulun, anway am fasadan dua masadi sas Funbalugu. ²² Ubuni yap am asalanan. Ay darangini tuwa sa tam Funbalugu. Labon gfaliam yay aro am fasadan at mauri. ²³ Anway nalag aw te, matvngvd yay nu galabian o. Ay asalanan yay tagmagurang si emu. ²⁴ Ay Nadungug nalong te, Darangini angku sas Funbalugu. Laman am nalong aro di mgurungan sa angku. ²⁵ Ay Takata-Sik-Batu ay Uan nu nafatuyan wan ay nu nafoyung wa Funbalugu At longan sanya, kafoli yangay sas Erusalem. Ay nafoyung yay nadalan sasa ngay fulan sirut sas talun Fagbantayan. ²⁶ Ay Funbalugu At tagbukngan at sadi nalong sas Takesug-Kabayu te, Mafamasadani ay loi wa sas balitangan sa sik dalan sas talun at yud e taw, siginans fulan Gasa ay anggan sas fulan Erusalem. ²⁷ Ay Takesug-Kabayu nalo wan. Ay rodi nalag sik Taw-Etiupia sasa ngaba dalan tagsakay sat karitun. Kanya fag taw sik maluasanan ay anggan sik fun sirut sas daga fun daul fag mangena at ngayan Fun-At-Tina. Kanya tagtanud sat fun daul at fagmabalanun fagayu. Ay ebia taw nalo wa sas Erusalem, laman naseg sas Funbalugu sanya. ²⁸ Ay katsi guli wan ay malunggung si at karitun, ay igtap Funbalugu At taglong at ngayan te, Funbalugu-Nabalabag, At-Rirukan. ²⁹ Ay At-Masine-Fag-Falad nalong sas Takesug-Kabayu te, Akbangi sa at karitun ay ufudi anya. ³⁰ Ay Takesug-Kabayu matarung nu nangakbang. Ay igdungugan ka fag tagtanud nu gtap Funbalugu-Nabalabag At-Rirukan. Ay Takesug-Kabayu ginto sa anya te, Go nasaful tuwo am tapan at masuad. ³¹ Ay ka fag tagtanud nabalus te, Yaya. Tain ro, anway du e taw gfayamag sa angku at masuad. Ay kanya nagewan yay Takesug-Kabayu ay malunggung yay gfataladan anya. ³² Ay sanya at tapan At-Rirukan te, Kata sik tupa at nataban sas fagfatean, Ay kata sik tupa riangan at yud guni dewa sas tagbul at sigyu at akbang, Katanya yangay Kanya fag taw di nafasuang at bibig. ³³ Ay dewa dawdaw e nafauri Anya, du e gtarabang Anya. Ay du e mafafoyung te, kanya at sugfun. Anway inkafus wayay At leleg ste swa daga. ³⁴ Ay ka fag tagtanud ginto sas Takesug-Kabayu te, Go dada ka fag taglong at faglongan. Go sa anya wa mandi. Ay go ate sa tibak taw. ³⁵ Ay Takesug-Kabayu igfayamag yay ka fag taglong at foyungan at masuad. Ay anggan nafatunglus nafoyung at Masine-Fag-Barita sas Isus baliwa. ³⁶ Ay duwama gina glo sasa ngaba dalan, indasug sa sik safa. Ay ka fag tagtanud nalong te, E nin, sik safa. Go e gsalag yay nu kasurung aw. ³⁸ Ay ka fag tagtanud nalong sat tagfalo at karitun te, Fatuasi yap at karitun. Ay duwama, Takesug-Kabayu ay ka fag tagtanud, indaga sasad safa ay Takesug-Kabayu nafasurung at tusama. ³⁹ Ay duwama nu nlakwi wa siginan sad safa, Funbalugu At-Masine-Fag-Falad mafali nu nataban Takesug-Kabayu sanya ginan. Ay ka fag tagtanud dewa yud e nalag anya, guseganan wa nalo. ⁴⁰ Ay tiba nalag Takesug-Kabayu sas Fulan-Matvngvd. Ay gina glo igfoyung wa at Masine-Fag-Barita sas fagayu fulan ay anggan ndasug sas Sesar-At-Fulan.

¹ Ay ginanya Sik-Naet-Siginans-Funbalugu matvngvd nu gfalimuanan sa tam Fun Isus At ngay tagadal ay manga gafateun wan. Ay nu katanya nangakbang yay sat Taguna-Fag-Taganyun-Daul. ² Laman nanget yay sik ngay rirukan at uba sas Taw-Naseg at ngay bale fakafulan sas fulan Damasku. At fagebarirukanun laman ro nus nga nday nu lumag sik tagfaning sa ka fag Ugali at bagu, dewa mangama ay dewa mangena, kanya yumugfu anya ay tumaban sas Erusalem gina masalodan. ³ Ay Sik-Naet-Siginans-Funbalugu gina gadasugun sas fulan Damasku, rodi tv insure wa daw sa anya sik mafali fag damlag siginans banwa. ⁴ Ay kanya nagfu sas daga ay ginanya e dungganan nu e glong te, Sik-Naet. Sik-Naet. Taw ro ngani am fagnanfauriun Angku. ⁵ Ay Sik-Naet ginto te, Sinu O, ku Fun. Ay Kanya igbalus te, Aw wan Isus, am fagfauriun. ⁶ Alindugi wan ay loi wan sas fulan. Ay sanya e gfoyung yay ban emu am fagbulun. ⁷ Ay Sik-Naet at ngay ufud intuas yay nu glo, ay maragangan way daw. Ay dewa nadungug nu e ge longan, du e nalag at bilug. ⁸ Ay Sik-Naet inlindug siginan at fagmafulidanan. Ay dewa malinggatan, dua glag. Ay at ngay ufud igted way anya anggan indasug sas fulan Damasku. ⁹ Ay mabugtung tuluk menit nu gyud glag. Ay manga dua gfangon ay dua ginum kaduge niya. ¹⁰ Ay sanya sas Damasku sik tagadal at ngayan Mafanyan-Funbalugu. Ay tam Fun insure sa anya kata sik taginfanan ay nalong anya te, Mafanyan-Funbalugu. Ay kanya nabalus anya te, Taw ro, ku Fun. Ste akway. ¹¹ Ay tam Fun nalong anya te, Famasadani ay loi wa sanya fag dalan at ngayan, Maslung, sas Segi at bale. Ay nut sanya wan intoi te, Dada stiye Sik-Naet-Siginans-Funbalugu, sik Taw-Tarsu. Anway katsi kanya igdarangin tuwa. ¹² Anway Sik-Naet e nalag kata sik taginfanan ay sik taw at ngayan Mafanyan-Funbalugu indasug ay nafatayuk at daluap sa anya. Laman kanya gdog yay glag. ¹³ Ay Mafanyan-Funbalugu nalong te, Yaya, Ku Fun. Madyay ngayu wak taw at nafoyung ka fag taw at ngay mauri fag fagbulun sa Am ngay taw sas Erusalem. ¹⁴ Ay manga katsi kanya nu ste wan ay e fagmadaragangun wayay siginans Taguna-Fag-Taganyun-Daul ay igsalod wayay fagayu at takafandiug sa Emu. ¹⁵ Ay tam Fun nalong sas Mafanyan-Funbalugu te, Dewa. Loi wan. Anway kanya katsi Ku nafili wa fag taw laman at nanfoyung ban sa at ngay Yud-Naseg-Fag-Taw, ay sa sik ngay fun, ay sas Taw-Tagagbuan at ngay sugfun, laman ban kafandiug tuwa sa Angku. ¹⁶ Anway Aw wa ban at namoyung sa Sik-Naet nus nga ban mason at faurianan, laman e fanamabagun ban Aw. ¹⁷ Ay nu katanya Mafanyan-Funbalugu nalo wan ay nasakbo wa fiya sa at foyungan fag bale. Ay nu nafatayuk wa at daluap sa Sik-Naet, nalong te, Ku fadugsay, Sik-Naet. Tam Fun Isus wan At kinsure sa emu gina o glo sasa ngaba dalan ay at fagnasuguun angku ste. Laman gdog yay ro o glag. Ay laman ro At-Masine-Fag-Falad tuwa tagmagurang emu. ¹⁸ Ay rodi tv e ntong siginan Sik-Naet at mata kata sik uyang at sariksik. Ay kanya gdog yay glag. Ay kanya inlindug ay e nafasurung anya sasad safa. ¹⁹ Ay kanya nu nafangon wan, gdog yay mabitsug at bilug. Ay Sik-Naet sanya yay sirut sat ngay tagadal sas Damasku. ²⁰ Ay rodi igfoyung wa sas Taw-Naseg at ngay bale fakafulan sas Isus baliwa te, Isus tam Funbalugu-At-Baguama. ²¹ Ay fagayu at nadungug nadulawan dawdaw te, Go sangay kanya fag taw bunwa ebi at nanfauri sas takafandiug sas Isus sas Erusalem. Go kin. Ay madyay at fagindasugun ste ebi tv, laman nansalod way at ngay takafandiug, ay nantaban way sas Taguna-Fag-Taganyun-Daul. Go kin. ²² Ay dewa e glong katanya, Sik-Naet nafainkugatan tuwa nu gfoyung Funbalugu At longan. Ay iglibuan at ngay Taw-Naseg at amatanganan at namanwan sas Damasku. Anway matvngvd tuwa Sik-Naet nu gfatuyan at foyungan te, Isus wa fiya tam Fagtayukan. ²³ Ay nu nlangfe wa ngayuk menit, at ngay Taw-Naseg kamasadan way gananfateun Sik-Naet. ²⁴ Ay e nafoyung sa Sik-Naet ka fag fasadan. Ay ginanya, kayu menit ay kayu yabi at ngay Taw-Naseg nabalabag sisad sakbawan at fulan alad laman gananfateun anya. ²⁵ Ay roro sad yabi at ngay tagadal nataban Sik-Naet. Ay nasuad anya sa sik sabi, ay nafatagbung sa sik fagbantayan sas day alad. ²⁶ Ay Sik-Naet nu ndasug sas Erusalem, ganangafulun sas Isus At ngay tagadal. Ay At ngay tagadal kalimu yay anya anway dua gafanud sa tiba at longan te, Sik-Naet sik tagadal tuwa katsi. ²⁷ Ay roro Sik-Nanfatvngvd nataban yay anya sa At-Ngay-Suguan. Ay nafoyung sa baliwa at kinsure sa Sik-Naet gina sasa ngaba dalan nangadasug sas Damasku. Ay nu nalag tam Fun ay nu ge longan sa anya. Ay anggan di kapla nu nafoyung sas Isus baliwa sas Taw-Damasku. ²⁸ Ay nu katanya Sik-naet nangufud wa sa At-Ngay-Suguan gina glodluan sas fagdaul Erusalem. ²⁹ Ay maseganama tuwa nu gfoyung sa tam Fun baliwa. Ay igfasulitanan ay igfodfoyungan way sasa ngay Taw-Naseg tagfaning Taw-Gresia at ugali. Ay roro sanya fag ngay taw gafateun way anya. ³⁰ Ay at ngay takafandiug nu nasaful at fasadan, nataban Sik-Naet sas Sesar-At-Fulan ay nafalo wa anya sas fulan Tarsu. ³¹ Ay ginanya at ngay takafandiug e fagmanabayanun sas fagdaul talun Naseg, ay sas talun Balulangan, ay anggan sas talun Fagbantayan. Ay anggan intvngvd at fakafandiugun. Ay manga nu maugalian igfaning tuwa sa tam Fun. Ay At-Masine-Fag-Falad wan tagfatvngvd at ngay amatanganan. Ay inkayu wan at ngay takafandiug. ³² Gina Takata-Sik-Batu glodluan sasa ngay talun laman nansibo sa at ngay takafandiug, kanya nalag Funbalugu At ngay taw sas fulan Lida. ³³ Ay sanya nalag sik taw at ngayan, Eneas, at kinlukme at bilug. Waluk banwa wan nu matagilid sasad igian. ³⁴ Ay Takata-Sik-Batu nalong anya te, Eneas, tam Isus tagfafiya emu. Malindugi. Ay fabilugi wan am igian. Ay rodi mafali kanya nu kalindug. ³⁵ Ay fagayu tagbanwan sis fulan Lida ay sis talun Datag nu nalag anya, kafandiug sas tam Fun. ³⁶ Kaduge niya, sas fulan Masine-Nu-Kalag, sik tagadal fag mangena at ngayan, Sik-Malagsi-Sirut. Sadi yay Sik-Arasyo-Sirut. Ay fagayu at fagbulun masine tuwa, ay anggan gfantarabang tuwa sa tiba. ³⁷ Ay ginanya fag ngay menit, ka fag ina gadailan ay inkate wan. Ay tiba nafegus at bilug ay nafatungkud sas tungud fag salug. ³⁸ Ay anway fulan Lida ay fulan Masine-Nu-Kalag gakbangan way, at ngay tagadal nadungug te, sanya Takata-Sik-Batu. At nasugu sik duwama sas fulan Lida laman gfat sanya Takata-Sik-Batu te, Go masine nu gufud o emi gina ami ro guli. ³⁹ Ay Sik-Batu nafamasadan ay nangufud wa anya. Ay kanya fag tulu nu ndasug wa sat bale, at duwama nataban Takata-Sik-Batu sat tungud fag salug. Ay fagayu at burangday namalindug sis day Takata-Sik-Batu ay guyway, gina igfalag anya sik ngay lanbung ay sik ngay umut ebi Sik-Arasyo-Sirut at naawat gina gleleg. ⁴⁰ Ay Takata-Sik-Batu nafalaklo yay sat dayu at ngay taw tagsanya. Ay natudan ay igdarangin. Ay rodi kanya inbiling sa at kinkate baliwa ay nalong te, Sik-Malagsi-Sirut, alunggungi. Ay ka fag ina inlinggat ay nalag Takata-Sik-Batu. Ay rodi inlunggung tuwa daw. ⁴¹ Ay Takata-Sik-Batu nated at daluap ay gfalindug anya. Ay nu nafat sanya wa Funbalugu At ngay taw, ay anggan at ngay burangday, nafalag sas fagayu tagsanya te, gleleg yangay. ⁴² Ay nu e nafoyung wa sas fagdaul fulan Masine-Nu-Kalag, ngayuk taw takafandiug sa tam Fun. ⁴³ Ay Takata-Sik-Batu namanwan yay sanya fag fulan ngayuk yabi sas Nadungug, sik tagfagong balat balan, at bale.

¹ Sas Sesar-At-Fulan e sik taw at ngayan, Kurneliu, sik fun tagbarangian. E nafangayan kanya fag fulan tagbarangian te, Tagsiginans-Italia. ² Kurneliu sik matvngvd tuwa tagseg sas Funbalugu, anway kalimu tuwa kamabo sa Anya. Ay anggan fagayu at taw sa at bale. Ay ngayu tuwa nu mafafon sat yud e kwa. Ay faggugat igdarangin tuwa sas Funbalugu. ³ Ay sik menit nut si was fanmatawanan, Kurneliu e nalag kata sik taginfanan. Ay roro Funbalugu At tagbukngan at sadi insure sa anya, ay igngayan anya te, Kurneliu. ⁴ Ay Kurneliu gina glinggat kalimu dawdaw, ay nalong anya te, Taw ro, ku fun. Ay At tagbukngan nabalus anya te, Funbalugu nadungug am ngay darangin. Ay nalag am ngay famanyun sat yud e kwa. Ay kaumsig am fagbulun. ⁵ Ay katsi sugui am taw tiba sas fulan Masine-Nu-Kalag. Laman ro tumaban stiye Simun, tiba at ngayan, Takata-Sik-Batu. ⁶ Kanya nu gbanwan sa sik taw at ngayan, Nadungug, at bale, sik tagfagong balat balan. Ay at bale sas tigyangan lino daul. ⁷ Ay At tagbukngan nu nalo wan, Kurneliu nafakbang sa anya at fanuguan at duwa ay anggan sik tagbarangian tagseg Funbalugu siginan tagfalu anya. ⁸ Ay nu nafoyung wa fagayu at nalag, Kurneliu nasugu anya sas fulan Masine-Nu-Kalag. ⁹ Ay balabag di, gina Kurneliu at ngay suguan sasa ngaba dalan ay gina gadasugun sas fulan Masine-Nu-Kalag, Takata-Sik-Batu naulul sas tungud ugun fag salug laman igdarangin gina maturuk at menit. ¹⁰ Ay Takata-Sik-Batu kalunus ay kaumsig sik fafa. Ay kaduge at tiba kamasadan sik fafa sa anya, Takata-Sik-Batu e nalag kata sik taginfanan. ¹¹ Ay at nalag banwa nu maluangan. Ay e nafadaga kata sik tagbiya fag sinyag, masiukan sas ufat suluk. ¹² Ay sanya at basad sinyag at suadan e sik ngay idu, ay e sik ngay bebaluk, ay e sik ngay ubianun, ay anggan e sik ngay manuk mela. ¹³ Ay e nalongan te, Takata-Sik-Batu, Alindugi. Ay fatei ay oni. ¹⁴ Ay Takata-Sik-Batu nabalus te, Sek, ku Fun. Anway kua batang kon nus di saiginan oma, am yud nafili ay nu mafurat way. ¹⁵ Ay e nalong yangay te, Nus nge wain Funbalugu nu nafasine tuwa, lag glong te, kanya at yud way nafili. ¹⁶ Tulu ginan nu gfakatanya at fagbulun. Ay rodi e nafaabat yangay at sinyag sas banwa. ¹⁷ Ay Takata-Sik-Batu gadayuan sat amatanganan te, taw manga katanya at masuad. Ay ginanya sik ngay taw siginans Kurneliu indasug sat bale sat sakbawan alad. Anway aro ginto te, dada Nadungug at bale. ¹⁸ Ay kanya nauro te, Go sanya yay Simun, tiba at ngayan, Takata-Sik-Batu. ¹⁹ Ay ginanya Takata-Sik-Batu gamatangan yay sat nalag. Ay At-Masine-Fag-Falad nalong anya te, Katsi tuluk taw gsarap emu. ²⁰ Alindugi wan. Ay adagai wan ste ginan. Ay ufudi anya ay dangai o gafanawa. Anway Aw wan At nasugu anya. ²¹ Ay Takata-Sik-Batu indaga wa fiya sa tiba ay nalong te, Aw wan ay fagsarapun. Taw ro ay fagstiyeun. ²² Ay kanya nabalus te, Kurneliu, at fun tagbarangian, sik taw masine, ay sik tagseg sas Funbalugu. Ay anggan fagayu Taw-Naseg igseg anya. Ay ebia taw Funbalugu At tagbukngan at sadi at nafoyung Kurneliu te, laman nanfat sa emu sat bale. Laman dumungug am longan. ²³ Ay Takata-Sik-Batu nafasakbo at ngay bagu kadasug ginanya fag yabi. Ay nus balabag wan, Takata-Sik-Batu infulo ay nangufud kanya fag ngay taw. Ay anggan tibak takafandiug sanya ginan fag fulan Masine-Nu-Kalag gufud yangay anya. ²⁴ Ay sas faduwak menit kanya ndasug sas Sesar-At-Fulan. Ay sanya Kurneliu nu gfanya anya, ay nu gfaful at ngay kalongan ay anggan at fakesugun fag ngay fagues sit bale. ²⁵ Ay Takata-Sik-Batu gina gsakbo, Kurneliu nafablang anya, ay natudan ay gseg anya. ²⁶ Ay Takata-Sik-Batu nasalag te, Lagi. Alindugi wan. Anway anggan aw sik taw kua di. ²⁷ Ay gina Takata-Sik-Batu gfamatuan anya, nasakbo wa sasad bale ay nalag at ngay taw nu maful sanya. ²⁸ Ay Takata-Sik-Batu nalong sat ngay taw te, Nasaful wam te, Ku-Unga At-Longan igsalag way sik Taw-Naseg kata angku nu maful sa at Yud-Naseg-Fag-Taw kata ayu. Ay roro Funbalugu nafoyung wa angku te, lag ngayan nus nga sinu fag taw te, kanya sik yud way nafili ay sik mafurat fag taw. ²⁹ Ay nu katanya, gina e nagewan angku stiye, sanya kua fiya ay da kdi kalimata. Ay katsi e fagintoun akyay sa ayu te, taw ro ay fagfastiyeun angku sa ayu. ³⁰ Ay Kurneliu nabalus te, Tusa dayu fag menit, kaduge katsi fag buknga sis fanmatawanan, igdarangin akyama sa ku bale. Ay rodi sik taw, at lanbung masulo dawdaw, malindug si ku akbang. ³¹ Ay kanya nalong angku te, Kurneliu, Funbalugu nadungug am darangin ay nalag am nafamanyun sat yud e kwa. ³² Ay nu katanya, sugui am taw tiba sas fulan Masine-Nu-Kalag. Ay intoi sanya te, dada wan Simun, tiba at ngayan Takata-Sik-Batu. Kanya namanwan sas Nadungug at bale, sik tagfagong balat balan. Ay at bale sas tigyangan lino daul. ³³ Ay rodi nasugu aw ku tuluk ama sa emu. Ay masine tuwa anway ndasug o. Ay nu katanya, ste wami fagayu mi sas Funbalugu At akbang laman nandungugan ami fagayu Funbalugu At longan sa emu. ³⁴ Ay Takata-Sik-Batu igfasigad igfoyung te, Katsi nasaful kua te, Funbalugu du e filian taw. ³⁵ Madyay nus nga nday fag talun, ay nus nga sinu at malimuanan sas Funbalugu ay nu gfaning tuwa sat masine, Funbalugu nadungug anya. ³⁶ Ay nu katanya katsi nanfoyung aw sa ayu. Ay nasaful wam Funbalugu At foyungan ebi sas Taw-Naseg, at Masine-Fag-Barita sas fagmanabayanun baliwa siginans Isus Fagtayukan. Ay Isus tagmagurang fagayu. ³⁷ Nu e nafoyung ka fag Longan sas fagdaul talun Naseg. Nu gfasigad gfoyung sas talun Balulangan kaduge ban Uan Tagfasurung yud ban igsurung taw. ³⁸ Ay ka fag Longan sa baliwas Funbalugu nu nafat sas Isus, sik Taw-Nasaret, At-Masine-Fag-Falad ay anggan At fagmadaragangun. Ay kaduge Isus glodloan nafasure wa at masine fag fagbulun. Ay nafafiya fagayu taw, ebi Takamuag-Tiba-At-Fagbulun at nafauri. Anway Funbalugu wan tagufud Isus. ³⁹ Ay ami fagayu nalag wami Isus At fagbulun gina sas talun Naseg ay anggan sas fulan Erusalem. Ay sanya fag ngay taw natuktuk Anya sas salibagang kayu. ⁴⁰ Ay roro Funbalugu nafaleleg tuwa Anya sas fatuluk menit. Ay manga nafasure yay Anya sa tibak taw. ⁴¹ Ay bunwa sas fagayu taw, sa way emi, Funbalugu At nafili, laman nanfatuyan ami em nalag. Madyay naon wami ay nainum wami nafasfuan Anya gina nadog gleleg. ⁴² Ay ginanya Isus nasugu emi, laman nanfoyung ban ami sasa ngay taw. Ay manga nanfatuyan ami te, Funbalugu wan At nafili Isus laman sik tagsarap taw at asalanan, dewa sa tagleleg ay dewa sat kinkate. ⁴³ Ay fagayu Funbalugu At ngay taglong ebi nafatuyan wa te, fagayu takafandiug sas Isus e nafaliam at asalanan, anway Isus At fagmadaragangun. ⁴⁴ Ay gina Takata-Sik-Batu ge longan, At-Masine-Fag-Falad si was fagayu at tagdungug Funbalugu At longan. ⁴⁵ Ay at ngay takafandiug fag Taw-Naseg, tagufud Takata-Sik-Batu gina glo, namatangan dawdaw te, taw ro At-Masine-Fag-Falad fagnatsiun daw at Yud-Naseg-Fag-Taw. ⁴⁶ Ay anway ka fag Taw-Naseg nadungug sat Yud-Naseg-Fag-Taw nu ge longan sa tibak fanlongan ay nu naseg Funbalugu. Ay Takata-Sik-Batu nalong te, ⁴⁷ Go e mafasalag nu gsurung ami iste fag ngay taw, anway At-Masine-Wa-Fag-Falad tagsi anya, kata yangay nut si emi. ⁴⁸ Ay Takata-Sik-Batu nasugu at tibama, laman nanfasurung at bagu kafandiug sas Isus At fagmadarangun. Ay at ngay taw sanya get yay sas Takata-Sik-Batu te, laman sanyai yap ginanya fag ngay menit.

¹ Ay At-Ngay-Suguan ay anggan at ngay takafandiug sas talun Naseg nadungug te, anggan at ngay Yud-Naseg-Fag-Taw kafandiug tuwa sas Funbalugu At longan. ² Ay nu katanya Takata-Sik-Batu nalo wa sas Erusalem. Ay at ngay takafandiug tagfaning sas Taw-Naseg at ugali kalimata sa anya. ³ Ay nalong te, Taw manga am fagfakbanganun sa at Yud-Naseg-Fag-Taw. Ay manga am fagfangonun nanfasfuan anya. ⁴ Ay Takata-Sik-Batu igfayamag nafataban at fagbulun te, ⁵ Ebi gina aw sas fulan Masine-Nu-Kalag, nadarangin aw. Ay e nalag aw kata sik taginfanan. Ay kata sik tagbiya fag sinyag masiukan sas ufat suluk e nafadaga siginans banwa ay indasug sa angku. ⁶ Ay nu nananlinggat akwa sanya, ku nalag sik ngay idu, ay sik ngay mela, ay sik ngay bebaluk, ay sik ngay ubianun, ay anggan sik ngay manuk mela. ⁷ Ay nadungug aw nu e glong sa angku te, Takata-Sik-Batu Alindugi. Ay fatei ay oni. ⁸ Ay nabalus aw te, Sek, ku Fun. Anway aw kua batang kon am yud nafili ay nu mafurat way. ⁹ Ay e longan yangay siginans Banwa te, Nus nge wain Funbalugu At nafasine, lag glong te, kanya at yud way nafili. ¹⁰ Tulu ginan nu katanya at fagbulun. Ay rodi e nafaabat yangay at sinyag sas banwa. ¹¹ Ay rodi indasug tuluk ama sanya fag bale. Kanya at nasugu sa angku siginans Sesar-At-Fulan. ¹² Ay At-Masine-Fag-Falad nalong sa angku te, Ufudi ka fag tuluk ama, ay dangai o gafanawa. Ay gina aw glo, unum yangayk takafandiug tagufud angku. Ay nu ndasug wami, nasakbo wami sat nasugu at bale. ¹³ Ay at nasugu nanfoyung emi at nalag ebi. Funbalugu At tagbukngan at sadi at malindug sat bale, ay nalong anya te, Sugui sas fulan Masine-Nu-Kalag. Ay fastei Simun, tiba at ngayan, Takata-Sik-Batu. ¹⁴ Ay kanya yay ban at moyung emu, laman malabag ban emu, ay anggan fagayu taw tagsi am bale. ¹⁵ Ay gina aw gfasigad gfoyung anya, rodi At-Masine-Fag-Falad si wa anya, kata yangay ebi taguna nut si antam. ¹⁶ Ay namatang akyay tam Fun Isus At longan ebi sa antam te, Uan Tagfasurung nafasurung sasad safa. Ay e nafasurung yangay ban ayu sa At-Masine-Fag-Falad. ¹⁷ Ay tam Funbalugu At nafon anya kata yangay At nafon sa antam kaduge mi kafandiug sa tam Fun Isus Fagtayukan. Ay sinu akway nu mafasalag akway Funbalugu. ¹⁸ Ay at ngay tagdungug sas Takata-Sik-Batu at longan gina sas Erusalem dua mafabalus. Teway igseg tuway sas Funbalugu te, Funbalugu nafangun, laman anggan at Yud-Naseg-Fag-Taw naubun at asalanan laman gleleg tuwa. ¹⁹ At ngay takafandiug at nafansaruwayanan siginan ka fag faurianan sas Erusalem ebia taw gina e nafate Tagsangbuan. Ay at tiba indasug sas talun Maraska, ay sas furu Sipre ay anggan sas fulan Antiukia. Ay at fagfoyungan Funbalugu At longan sa ways Taw-Naseg fagtvngvd. ²⁰ Ay anggan tibak takafandiug siginans furu Sipre ay fulan Sirene indasug sas Antiukia ay nanfoyung anggan sas Taw-Gresia sa tam Fun Isus baliwa. ²¹ Ay tam Fun At fagmadaragangun natarabang anya gina nanfoyung. Ay ngayuk taw takafandiug ay gfaning sa tam Fun. ²² At ngay takafandiug sas Erusalem nu nadungug takatanya, nanfalo wa Sik-Nanfatvngvd sas Antiukia. ²³ Ay Sik-Nanfatvngvd nu ndasug, guseganan nu nalag Funbalugu At ngay famanyun sat ngay taw. Ay nafoyung yay anya, laman umkugat yay at fagmasadiun at amatanganan ay laman faggugat igfatunglus tuwa nu gfaning sa tam Fun. ²⁴ Anway Sik-Nanfatvngvd sik masine tuwa fag taw, ay igfaning tuwa At-Masine-Fag-Falad, ay matvngvd tuwa at fakafandiugun. Ay sanya inkayu tuwa at ngay takafandiug sa tam Fun. ²⁵ Ay nu katanya Sik-Nanfatvngvd nalo yay sas fulan Tarsu laman nansarap yay Sik-Naet-Siginans-Funbalugu. ²⁶ Ay nu nalag wa anya, nantaban yay sas Antiukia. Ay ginanya fag banwa ka fag duwama namanwan yay sanya. Ay maful yay sat ngay takafandiug laman igfoyung yay sat ngay taw sanya. Ay sanya ginan yays Antiukia nu bagu e nafangayan at ngay tagadal te, Fagtayukan-At-Taw. ²⁷ Ginanya fag ngay menit, Funbalugu At ngay taglong at tiba nalo yay sas fulan Antiukia siginans Erusalem. ²⁸ At taglong at sadi at ngayan, Fakailatun. Ay kanya inlindug ay naguna nafoyung At-Masine-Fag-Falad At longan sa anya te, Umdasug ban sik fanlunus daul sas fagdaul daga. Ay bandi ingurungan wa fiya at longan gina Klaudiu at fun. ²⁹ Ay matvngvd tuwa at ngay tagadal at fasadan nu gananfonun sat ngay takafandiug sas talun Naseg. Kanya fag taw nu gfon nafainfaluan nus nga seyu at nanuranan. ³⁰ Ay katanya wan at fagbulun. Ay nafauba at ngay famanyun sas Erusalem sa Sik-Nanfatvngvd ay sa Sik-Naet-Siginans-Funbalugu.

¹ Ay ginanya fun Erudes nafauri dawdaw sa tibak takafandiug. ² Ay at suguan at nafate Santiagu, ay at famate sik fiso. ³ Ay at fun nu nalag te, at ngay Taw-Naseg kaumsig at nafatean, kanya nayugfu yay fiya Takata-Sik-Batu. Ay nu gyugfu gina e sik yafun at ngayan te, Fafa-At-Yud-E-Famabaga. ⁴ Ay Erudes nu nayugfuan, nafasungsung wa anya sas bale fagsungsungan. Ay ufat fulan tagbarangian tagtanud fiya fiya anya. Ay Erudes at fasadan gananfasureun yay Takata-Sik-Batu sasa ngay taw, gina ntabu at Famalangfe fag yafun. ⁵ Ay dewa katanya, Takata-Sik-Batu sas bale fagsungsungan yay faggugat. Ay at ngay takafandiug matvngvd tuwa nu gdarangin sas Funbalugu sas Takata-Sik-Batu. ⁶ Ay balabag di fun Erudes gananfasureun yay Takata-Sik-Batu sat ngay taw. Ay ginanya fag yabi Takata-Sik-Batu igtiug yay sis buknga tagbarangian, ay e siuk duwak sanbung radrabingan. Ay at tibak tagbarangian nu gtanud sis day dingding sakbawan way. ⁷ Ay rodi, insure daw Funbalugu At tagbukngan at sadi. Ay gdamlag daw sanya fag salug. Ay At tagbukngan natalaptap Takata-Sik-Batu at tigyangan. Ay gfulo anya te, Alindugi mafali. Ay at fansalod fag sanbung intong wa siginan at take. ⁸ Ay At tagbukngan nalong yangay anya te, Famasadani am lanbung ay suluni wa am fanguskus darafa. Ay Takata-Sik-Batu nafaning wa fiya at longan. Ay At tagbukngan nalong yangay te, Suluni am lanbung ay aloi wa angku. ⁹ Ay Takata-Sik-Batu naguyan sa At tagbukngan. Dewa yud nasaful te, sik tagbukngan wa mangaro. Nu gfasad, igtaginfanan way. ¹⁰ Ay kanya fag duwa nu nlangfe wa sit fasadik tagtanud ay anggan sit faduwak tagtanud, kanya ndasug sa at sakbawan alad at fandingding sanbung, at dalan sat fulan. Ay ka fag dingding sakbawan inluang wa mandi, dewa yud e taw. Ay kanya fag duwa nalfas wan ay nalo wa sa sik dalan. Ay At tagbukngan naubun wa Takata-Sik-Batu. ¹¹ Ay rodi Takata-Sik-Batu bagu daw namatang te, katsi nasaful kua te, tam Funbalugu nasugu mangaro At tagbukngan. Laman gfalfas angku siginans fun Erudes at fagmadaragangun ay siginan sa ngay Taw-Naseg at fasadan. ¹² Ay Takata-Sik-Batu nu namatangan wa katanya, nalo sas Taglu, Uan at tina, at bale. Ay Uan at ngayan tiba Takata-Sik-Fanuktuk-Daul. Ay ginanya ngayuk taw at maful sanya fag bale ay igdarangin. ¹³ Ay Takata-Sik-Batu nu nafadunguganan wa sasad sakbawan alad, sik baguina, at ngayan Sik-Madugi-E-Sariksik, inkakbang sasad sakbawan alad laman nandungugan. ¹⁴ Ay dewa natogdungug te, Takata-Sik-Batu wan tage longan, ay dewa guseganan, dua naluang at dingding sakbawan. Ay kanya kafoli yay nasakbo sad basad bale ay nanfoyung te, Snai Takata-Sik-Batu at malindug sas day sakbawan. ¹⁵ Ay at ngay taw nalong anya te, Kata way o yud e amatanganan. Taw madyay. Ay kanya glong dawdaw te, Muag. Matuyan ku longan. Snai wa fiya. At tiba nabalus te, Sik tagbukngan way. ¹⁶ Ay roro Takata-Sik-Batu igfadunguganan yay faggugat. Ay at tiba naluang wa fiya, ay manlag di, kanya wa fiya. ¹⁷ Ay Takata-Sik-Batu nu nasakbo wan, nafalelegan at take te, laman tiba dua garingang. Ay kanya igfoyung sat ngay takafandiug tam Fun At fagbulun nu gfalfas anya siginan at fagsungsungan. Ay nalong yangay anya te, Am foyungi yangay sas Santiagu ay sa tiba tam ngay fadugsay ku nafoyung sa ayu. Ay rodi Takata-Sik-Batu nalo wa sa tibak talun. ¹⁸ Ay nus balabag wan, ka fag ngay tagbarangian sat fagsungsungan garingangan dawdaw te, Dada wan Takata-Sik-Batu. ¹⁹ Ay matvngvd fun Erudes nu gfasarap Takata-Sik-Bagu sat ngay tagbarangian. Ay nu dway e nalag, kanya ginto yay sat ngay tagtanud. Ay rodi at fun e suguan te, Fatei wan ka fag ngay tagtanud. Ay bandi Erudes nalo yay siginan talun Naseg ay namanwan yay sirut sas Sesar-At-Fulan. ²⁰ Ay ginanya fun Erudes kadotama sat ngay taw sas fulan Batu-Luguy ay fulan Faggamatan-Uyang. Ay kanya fag ngay taw e fagmasadiun nangakbang sas fun Erudes. Ay taguna ka fag ngay taw igfalukmeun yay sas fun Erudes at tagtanud bale, at ngayan Sik-Bugsuk. Anway at ngay taw at fasadan te, laman ro at fun Erudes di kadotama sa anya fag duwak fulan taw. Anway at fagbulan at fakonun siginan yays fun Erudes at talun. ²¹ Ay gina fun Erudes at filian fag menit, ka fag fun nasulun at tiba tungud at masine at lanbung, ay malunggung sa at masine fag faglunggungan daul. Ay e longan sa at ngay taw. ²² Ay ka fag ngay taw nauro te, Nu ge longan kata tuwa nu sik Funbalugu, ay bundi kata sik taw. ²³ Ay rodi Funbalugu At tagbukngan nafauri wa ka fag fun. Anway at fakaumsigun te, laman nu e gseg sa way anya, ay roro lagi sas Funbalugu. Ay sik ngay ayang naagat anya ay nkate wan. ²⁴ Ay Funbalugu At longan inrapyag ay ngayuk taw takafandiug. ²⁵ Ay Sik-Nanfatvngvd ay Sik-Naet-Siginans-Funbalugu noli wa sas Antiukia siginans Erusalem anway intabu wan nu nafon at ngay famanyun sanya. Ay nu guli wan nataban yay Uan, at tiba at ngayan Takata-Sik-Fanuktuk-Daul.

¹ Ay ginanya Funbalugu At ngay taglong ay anggan At ngay takamoyung sas takafandiug sas fulan Antiukia, at ngayan te, Sik-Nanfatvngvd, ay Nadungug, tiba Nadungug at ngayan, Sik Taw-Marawing, ay Lusiu sik taw siginans fulan Sirene, ay At-Famaliaman, kata nu gdugsayan sas fun Erudes gina alay, ay anggan Sik-Naet-Siginans-Funbalugu. ² Ay gina kanya fag ngay taw tagseg Funbalugu ay gina e fagyudun gfangon fag menit, At-Masine-Fag-Falad nafoyung sa ka fag ngay mangama te, Fasadsamanani wan Sik-Nanfatvngvd ay Sik-Naet-Siginans-Funbalugu, anway kanya Ku nafili sa Ku fasadan fag fagbulun. ³ Ay nu ntabu wa nu e fagyudun gfangon ay nu gdarangin, kanya fag ngay mangama nafatayuk at daluap sa Sik-Nanfatvngvd ay sa Sik-Naet ay nafalo wa anya. ⁴ Ay At-Masine-Fag-Falad nafalo wa Sik-Nanfatvngvd ay Sik-Naet sas fulan Seleusia. Ay sanya ginan ka fag duwama nasakay wa sa sik balutu ay nangadasug sas furu Sipre. ⁵ At nu ndasug wa sas fulan Salamina sas furu Sipre, rodi kanya nafoyung Funbalugu At longan sas Taw-Naseg at ngay bale fakafulan. Ay Uan tagtarabang anya. ⁶ Ay nu nafafus wa ka fag furu, indasug sas fulan Fafus. Ay sanya nalag sik taw mabara, sik Taw-Naseg at yud matuyan fag takamoyung, at ngayan Funbalugu-Tam-Tagbalabag-At-Baguama. ⁷ Ka fag mabara fag taw igfauseganan sanya fag talun at fun sirut at ngayan, Sergiu Faulu. Fun Sergiu Faulu sik mamatanganan fag taw. Ay kanya nafakbang sa anya Sik-Nanfatvngvd ay Sik-Naet laman nanfoyung anya Funbalugu At longan. ⁸ Ka fag mabara fag taw, at ngayan sas Taw-Gresia at fanlongan, Elimas, igsalag kanya fag duwama nu gfoyung. Laman at fun dua nangafandiug. ⁹ Ay Sik-Naet, at sadi at ngayan Fandak, anway At-Masine-Fag-Falad tagmagurang anya, nafatangun dawdaw sa ka fag mabara fag taw. ¹⁰ Ay nalong anya te, O sik Takamuag-Tiba-At-Fagbulun way o at baguama. Ay o sik tagfabarangian way o sat matuyan baliwa. Ay o sik tagfanluk way o dawdaw, ay anggan ke fagmauriun at mason. Atuasi wan sa nu kamuagan o baliwa sa tam Fun At longan. ¹¹ Ay katsi ro Funbalugu At fagmadaragangun nafaarum ro am mata, ay dua ro o glag at menit sik kadugayan sirut. Ay rodi inkarum wa fiya Elimas at mata. Ay kanya nansarap sik tagted anya sasa ngaba dalan. ¹² Ay rodi fun Sergiu Faulu kafandiug wa fiya gina nalag at kinsure sas Elimas. Anway kanya nadulawan daw nu nadungug at foyungan sa tam Fun baliwa. ¹³ Ay Fandak ay at ngay ufud nasakay sa sik balutu ay nalo wa siginans fulan Fafus ay ndasug sas fulan Ferga sas talun Fanfilia. Ay rodi Uan naubun at tibama ay noli wa sas Erusalem. ¹⁴ Ay at tiba natunglus yay siginans fulan Ferga ay indasug sas fulan Antiukia. Ay tuy fag fulan Antiukia tagsa ways talun Fisidia. Ay nut si was Fakamatoun-Menit, at ngay ibama nasakbo wa sas Taw-Naseg at bale fakafulan, ay sanya yadi. ¹⁵ Ay nu e natap wa Ku-Unga At-Longan sik afud, ay anggan tibak Funbalugu At taglong ebi at longan, at bale fakafulan at magurang nalong sa Fandak ay sat ufud te, Em ngay kalongan, nu e fagafoyungun yay am sat ngay taw ste, foyungi emi. ¹⁶ Ay Fandak inlindug ay nafalelegan at daluap ay nalong te, Am at ngay Taw-Tagagbuan, ay am at ngay Yud-Naseg-Fag-Taw at malimuanan sas Funbalugu, dungugani sa ku longan. ¹⁷ Tagagbuan at ngay sugfun at Funbalugu At nafili tam aguyangan. Ay At nafaayu at ngay sugfun kaduge igbanwan sas talun Eiptu. Ay Funbalugu wa At fagmadaragangun at nafalfas at ngay Taw-Tagagbuan siginans talun Eiptu. ¹⁸ Ay nut sas talun at yud e taw 40k banwa, Funbalugu nafatvngvdun anya. ¹⁹ Ay Funbalugu nafate wan ay tiba nayiyan wan fituk talun at ngay taw sas talun Maloban. Ay Funbalugu nafon wa sasa ngay Taw-Tagagbuan ka fag talun Maloban. Laman anggan wa ban sa at sugfun faggugat. Ay nu ndain nu katabu ka fag fagbulun, 450k banwa. ²⁰ Ay bandi Funbalugu nafasure at ngay tagbuknga nafasugfunanan sas Taw-Tagagbuan. Anggan wa insure Funbalugu At taglong, At-Ke-Ngayan-Funbalugu. ²¹ Ay ginanya ka fag ngay taw get sik fun daul sas Funbalugu. Ay Funbalugu nafasure sa anya Sik-Naet-Siginans-Funbalugu. At tama at ngayan, At-Nafon. Kanya Sik-Baguama-Sa-Ku-Siun at sugfun. Ay kanya sik fun daul igmagurang sanya 40k banwa. ²² Ay Funbalugu nu nafasaman wa at fun daul, nafili yangay Fakafanyuun laman at fantubus. Ay Funbalugu At longan te, Fun Fakafanyuun, Sik-Ama-Madaragang at baguama, kanya Ku fakesugun fag taw. Anway kanya tagfaning ban sa Ku ngay fasadan. ²³ Ay siginans fun Fakafanyuun at sugfun, Funbalugu nafasure wa Taw-Tagagbuan at Tagbalabag, Isus, kata ebi At nafatuyanan. ²⁴ Ay gina yud Isus insure sas taw, Uan Tagfasurung nafoyung sas fagayu Taw-Tagagbuan te, Asurungi sasad safa, at fagsafulan te, naubun tuwa at ngay asalanan. ²⁵ Ay nu ntabua Uan Tagfasurung at fagbulun, kanya nainto te, Sinu aw nu gfasad am. Aw bunya aw ay Tagbalabag. Ay Tagbalabag sa yay ban ku guyan. Ay gina ban umsure, aw ki e fagmasineun an aw oma gluas At fansalod At fanguskus darafa. ²⁶ Ay Fandak nafatunglus nu ge longan te, Ku ngay kalongan, am Abrayam at ngay sugfun, ay anggan am takalimu Funbalugu, Funbalugu nafoyung sa antam at barita sa nu kabalabag tam baliwa. ²⁷ Ay at ngay tagbanwan sas Erusalem ay anggan at ngay magurang dia nasaful te, sinu Kanya fag taw. Anway kanya dia nasaful Funbalugu At ngay taglong ebi At-Rirukan at masuad. Dewa natap At-Rirukan fagayu Fakamatoun-Menit. Ay dewa katanya ka fag ngay taw at fagbulun ingurungan wa fiya At-Rirukan gina nafauri at Tagbalabag. ²⁸ Dewa ka fag ngay taw yud e nalag at Tagbalabag at asalanan laman sak igfate, at ngay magurang get sas fun At-Ke-Bangko, laman igfate anya. ²⁹ Ay at ngay taw nu nafagurungan wa fagayu At-Rirukan sas Isus baliwa, kanya nabul At bilug siginans salibagan kayu. Ay nasandig sa sik fagsandigan fag luib. ³⁰ Ay roro Funbalugu nafaleleg yay tam Isus siginan At fagmatianan. ³¹ Ay bandi ngayu ginan Kanya nu kasure sa At ngay ufud, sa tagfaigaluan anya ebia taw, gina glo siginans talun Balulangan ay indasug sas Erusalem. Ay At ngay ufud wan tagfatuyan katsi sasa ngay Taw-Tagagbuan. ³² Ay ami, em fagindasugun stiye katsi, nanfoyung ami sa ayu at Masine-Fag-Barita, Funbalugu At nafatuyanan ebi sa tam ngay aguyangan. ³³ Funbalugu nafagurungan sa antam ebi At nafatuyanan sa tam aguyangan, madyay nafaleleg tam Isus. Kata At-Rirukan sas faduwak afud sas Danyu, Funbalugu nalong te, O wan nu nalong Akdi, Nu Ku Unga wa mandi. Gmama Aw Emu katsi. ³⁴ Ay Funbalugu nafaleleg Anya siginan At fagmatianan, laman di ban umruas. Anway kata tuy At-Rirukan te, Mon Akban Emu ebi Ku fagmasineun, ay anggan ebi Ku fatuyanan at yud badbalian, kata ku nafon sas fun Fakafanyuun. ³⁵ Ay Funbalugu nalong yangay sa tibak afud sas Danyu te, Kanya igbalabag tuwa ban At Masine-fag-Taw, laman di ban karuas. ³⁶ Dewa fun Fakafanyuun igfaning sas Funbalugu At ngay fasadan gina gleleg, nu nkate wan, e nasandig ay inruas yay. ³⁷ Ay roro Funbalugu At nafaleleg fag Taw, madyay Kanya di nruas. ³⁸ Ku ngay kalongan, asafuli nangus te, anway Isus wa At fagbulun, at nafoyung sa ayu te, e nanfaliam ban ay asalanan. ³⁹ Ay anway katanya At fagbulun, fagayu taw nu kafandiug tuwa sa Anya, e nafalfas anya siginans fagayu at asalanan. Dewa ebi Ku-Unga At-Longan yud mafafalfas. ⁴⁰ Ay nu katanya, tagaki. Laman di mdasug sa ayu kata ebi Funbalugu At taglong at foyungan te, ⁴¹ Faamatanganuni, am fag ngay tagfalingun. Dewa ban am madulawan dawdaw, e fakatabuan way ban am. Anway Aw e fagbulun Aktuwa kaduge am gleleg. Dewa katanya du am gafanud, dewa e nafoyung ayu. ⁴² Ay Fandak ay Sik-Nanfatvngvd nu galakloun wa siginan Taw-Naseg at bale fakafulan, at ngay taw nasugu anya te, laman kanya nanfoyung yangay sat fadogan fag Fakamatoun-Menit. ⁴³ Ay nu ntabu wa at fagmafulun, ngayuk Taw-Naseg ay at tibak tagfaning Taw-Naseg at ugali nanguyan yay Fandak ay Sik-Nanfatvngvd. Ay duwama matvngvd nu nafoyung anya te, Fatunglusi nu kafandiug am sas Funbalugu At fakafanyuun. ⁴⁴ Ay sat fadogan fag Fakamatoun-Menit, arvs fagayu taw sas fulan inful wan, laman nandungugan sas Funbalugu At longan. ⁴⁵ Ay at ngay Taw-Naseg nu nalag sik ngay taw ayuwayu, galabian dawdaw anya. Ay gafayudun sas Fandak at foyungan. Ay manga igfalingun anya. ⁴⁶ Ay dewa katanya, Fandak ay Sik-Nanfatvngvd maseganama tuwa nu glong te, At masine nu gfoyung wami ayu taguna Funbalugu At longan. Nus nga am gafayudun, ay anway te, dua ban am e fagmasineun sak am e leleg faggugat. Ay nu katanya, glo wami sa at Yud-Naseg-Fag-Taw. ⁴⁷ Anway katanya, tam Fun At fagnasuguun emi te, Ay Aw wan At nasugu ayu laman kata am sik salung sa at Yud-Naseg-Fag-Taw. Ay manga foyungi ban sas fagayu taw anggan sas fungfung daga laman umbalabag ban. ⁴⁸ Ay at ngay Yud-Naseg-Fag-Taw nu nadungug Fandak at foyungan, kaumsig dawdaw, ay nalong te, Masine wa fiya Funbalugu At longan. Ay at ngay taw kafandiug tuwa, Funbalugu At fagnafiliun laman e leleg faggugat. ⁴⁹ Ay Funbalugu At longan inrapyag sas fagdaul sanya fag talun. ⁵⁰ Ay roro at ngay Taw-Naseg igfaunatan way sa at fulan at ngay magurang ay anggan sa at mabalan fag ngay mangena tagseg sas Funbalugu, laman nanfauri sas Fandak ay sa Sik-Nanfatvngvd. Ay anggan naayiyan wa anya siginan at talun. ⁵¹ Ay Fandak ay Sik-Nanfatvngvd nafarikfik at kintayuk fag dafug sa at darafa, at famasaful sanya fag taw. Ay rodi nalo wa sas fulan Ikuniu. ⁵² Ay at ngay tagadal guseganan tuwa. Ay At-Masine-Fag-Falad wan tagmagurang anya.

¹ Ay gina sas fulan Ikuniu Fandak ay Sik-Nanfatvngvd nasakbo sas Taw-Naseg at bale fakafulan ay igfoyung. Ay at ngay taw sanya kafandiug, Taw-Naseg ay anggan Taw-Gresia. ² Ay at yud kafandiug fag ngay Taw-Naseg igfaunatan sa at Yud-Naseg-Fag-Taw laman mauri at amatanganan sasa ngay takafandiug baliwa. ³ Ay dewa katanya, Fandak ay Sik-Nanfatvngvd glugo yay nut sanya. Ay maseganama tuwa nu gfoyung sa tam Fun baliwa. Ay tam Fun wan tagfatuyan sa at foyungan, madyay nafon At fagmadaragangun sas Fandak ay sa Sik-Nanfatvngvd laman nafasure at ke masuad fag fagbulun ay anggan at matvngvd fag fagbulun. ⁴ Ay at ngay taw sanya fag fulan inkafud. Tiba nafaning sa at ngay Taw-Naseg, ay tiba nafaning sa At-Ngay-Suguan. ⁵ Ay at ngay Yud-Naseg-Fag-Taw, ay at ngay Taw-Naseg, ay anggan at ngay fun gananfauriun anya ay gananfalangun anya sik ngay batu. ⁶ Ay gina e nafoyung sa At-Ngay-Suguan, At-Ngay-Suguan nalagyu wa sas fulan Listra ay fulan Derbe sas talun Likaunia, ay anggan sa tagsafungan fag ngay talun. ⁷ Ay sanya igfoyung yangay at Masine-Fag-Barita. ⁸ Ay sanya sas fulan Listra sik taw yud malo siginan ngay bagu kalangfe. Ay dua batang kalindug nus di sirut. ⁹ Ay kanya nadungug Fandak nu ge longan. Ay Fandak nafatangun sa anya ay nasaful te, matvngvd tuwa at fakafandiugun ay e fafiya ban anya. ¹⁰ Ay Fandak gbiya nu ge longan te, Alindugi wa mandi. Ay rodi ka fag taw natulbu ay nasiklang. ¹¹ Ay sanya fag ngay taw nu nalag Fandak at fagbulun, guro dawdaw sa at fanlongan te, Indasug daw duwak taw yabi ay at bilug kata sik taw menit. ¹² Ay kanya nafangayan sa Sik-Nanfatvngvd te, Seus. Ay sas Fandak te, Ermes, anway Fandak tage longan. ¹³ Seus at bale fakafulan sanya fag fulan sis faglagan. Ay Seus at ngay taganyun nataban sik ngay baka tama ay nauba sik ngay sariksik sas fulan sasad sakbawan alad. At fagnatabanun, laman kanya ay anggan at ngay taw nafon at anyun sas Fandak ay sa Sik-Nanfatvngvd. ¹⁴ Ay Isus At-Suguan fag duwa, Fandak ay Sik-Nanfatvngvd, nu nadungug at ngay taw at fagbulun, kanya nagirat at lanbung. Ay mafali nu nangakbang sasa ngay taw te, ¹⁵ Ik ik. Taw ngani fakatanyaun ay fagbulun. Anggan ami sik taw menit way ami kata ayu. Ami antuwa ami at nanfoyung at Masine-Fag-Barita laman mubun am kanya ay fagbulun at yud masine. Ay laman ay fagfaningun sa tuwas Tagleleg-Faggugat-Fag-Funbalugu, At naawat banwa, ay daga, ay lino daul, ay anggan fagayu tagsanya. ¹⁶ Ebi ebi Funbalugu nafabayan yay anya, laman fagayu talun at ngay taw nanfaning yay sa at fasadan mandi. ¹⁷ Ay dewa katanya, Funbalugu nafasaful yay sa at ngay taw At ugali at masine. Madyay kanya At nafe moyan siginans banwa. Ay At nafe buadan at ngay kayu. Ay At nafon at ngay fakonun ay manga sik faggusegananun sasa ngay taw. ¹⁸ Ay Fandak ay Sik-Nanfatvngvd dewa aro nalong nasalag, at ngay taw dia mafali nu gfasaman at fasadan nu gafonun sa anya. ¹⁹ Ay sik ngay Taw-Naseg indasug sas fulan Listra siginans fulan Antiukia ay fulan Ikuniu. Ay igfamatuan sas Taw-Listra, ay inke fagmasadiun nanfalang sik ngay batu sas Fandak. Ay nu nafalang wan, kanya naguyudan anya sas day fulan. Ay nu gfasad nkate wan. ²⁰ Ay roro gina at ngay tagadal inkakbang sa Fandak, kanya inlindug tuwa, ay gdog yay guli sas fulan. Ay balabag di kanya ay Sik-Nanfatvngvd glo wa sas fulan Derbe. ²¹ Fandak ay Sik-Nanfatvngvd nu nafoyung wa at Masine-Fag-Barita sas fulan Derbe, ngayuk taw takafandiug. Ay bandi ka fag duwama infoli yangay sas fulan Listra ay sas fulan Ikuniu ay anggan sas fulan Antiukia. ²² Laman nanfatvngvd yay at ngay tagadal sanya at fakafandiugun. Ay nafoyung yangay te, Fatvngvdi tuwa ay fakafandiugun. Anway bagu tam umdasug sas Funbalugu-At-Fagmagurangan-Taw, e ngay faurianan yay taguna. ²³ Ay Fandak nafili yay at ngay magurang sas fagayu Funbalugu bale gina igdarangin gina e fagyudun gfangon fag menit. Ay anggan nafanusetaw wa sas Funbalugu at ngay takafandiug, anway kanya kafandiug tuwa sa Anya. ²⁴ Ay Fandak ay Sik-Nanfatvngvd nu nalo wan, nadalan wa talun Fisidia ay ndasug sas talun Fanfilia. ²⁵ Ay nu nafoyung wa Funbalugu At longan sas fulan Ferga, kanya nalo yangay sas Atalus-At-Fulan. ²⁶ Ay sanya duwama nasakay wa sa sik balutu ay guli wa sas fulan Antiukia. Sanya ebi at takafandiug at ngay magurang nu gdarangin anya. Laman Funbalugu tumarabang anya sa at ngay fagbulun gina nalo. Ay katsi intabu wan ka fag fagbulun. ²⁷ Ay duwama nu ndasug wa sas Antiukia, nafaful at ngay takafandiug. Ay nafoyung anya fagayu Funbalugu At natarabang anya sat fagbulun. Ay madyay anggan sat Yud-Naseg-Fag-Taw kafandiug yangay. ²⁸ Ay duwama glugo yay sirut nut sanya fag ngay tagadal.

¹ Ay tibak taw indasug sas Antiukia siginans talun Naseg, ay nafoyung sat ngay takafandiug te, Nu dway am igfaning sa Ku-Unga At-Longan sas Taw-Naseg at fagtoglagan baliwa, du am umbalabag. ² Ay Fandak ay Sik-Nanfatvngvd igsalag tagaringangan dawdaw. Ay nu katanya, at takafandiug nafili Fandak ay Sik-Nanfatvngvd, ay anggan tibak takafandiug, laman lumo ro sas Erusalem. Ay nanginto sa At-Ngay-Suguan ay at ngay magurang sanya te, Tain ay fasadan sas Taw-Naseg at fagtoglagan baliwa. ³ Ay at ngay takafandiug nafalo wa at filian fag ngay taw, ay kanya nadalan sas talun Maraska ay talun Fagbantayan. Ay gina glo, nadalan sanya fag ngay takafandiug ay nafoyung anya te, Sik ngay Yud-Naseg-Fag-Taw kafandiug yangay. Ay ka fag ngay takafandiug nu nadungug, guseganan dawdaw. ⁴ Ay ka fag ngay taglo nu ndasug wa sas Erusalem, at ngay takafandiug ay At-Ngay-Suguan ay anggan at ngay magurang sanya nafasakbo anya. Ay Fandak ay Sik-Nanfatvngvd nafoyung anya Funbalugu At natarabang anya sat fagbulun gina sat lakluan ebi. ⁵ Ay Taw-Tagfalayun at takafandiug at tiba inlindug ay nalong te, Kanya fag ngay taw at bagu kafandiug, nu dway e fagtoglagan ay manga nu dway gfaning Ku-Unga At-Longan, du ban umbalabag. ⁶ Ay At-Ngay-Suguan ay at takafandiug at ngay magurang inful, laman gatulan sa ka fag fagbulun baliwa. ⁷ Ay nu gfalugo wa nu gatulan, Takata-Sik-Batu inlindug ay nalong sat ngay taw te, Ku ngay fadugsay. Nasaful wam te, gina ami bagu nanfoyung, Funbalugu nafili wa angku. Laman nanfoyung aw at Masine-Fag-Barita sat Yud-Naseg-Fag-Taw, ay e kafandiug wa fiya. ⁸ Ay Funbalugu, At tagsaful taw at amatanganan, Kanya tagfatuyan te, at Yud-Naseg-Fag-Taw kafandiug wa fiya. Anway Kanya nafat sa wa anya At-Masine-Fag-Falad, kata yangay At nafat si antam. ⁹ Funbalugu du e filian, anway sud yay At fagbulun sa anya ay sa antam. Madyay Funbalugu nafasine ka fag ngay taw at amatanganan, madyay kafandiug tuwa. ¹⁰ Ay nu katanya, taw ro ay fagnafaskudun Funbalugu At fagbulun te, go matuyan. Ay am wan at nafauba takata sik mabiat fag fangubaun sat Yud-Naseg-Fag-Taw takafandiug. Ebi tam ngay aguyangan nu dway mafamad, anggan itam dua tam mafamad. ¹¹ Anway gafanud tuwa tam te, e malabag wa fiya antam anway tam Fun Isus At fakafanyuun sa wa antam. Ay katanya yangay sa at ngay bagu kafandiug. ¹² Ay fagayu at maful sanya maragangan way gina nadungug sa Sik-Nanfatvngvd ay Fandak nu gfoyung te, Funbalugu natarabang anya at fagmafasureun at ngay ke masuad fag fagbulun ay anggan at ngay madaragang fag fagbulun gina gfoyung sat Yud-Naseg-Fag-Taw. ¹³ Ay nu ntabu wa Sik-Nanfatvngvd ay Fandak nu ge longan, Santiagu nalong te, Ku ngay fadugsay, dungugani ku longan. ¹⁴ Simun nafoyung antam ebi taguna Funbalugu nu nafasure At fakafanyuun sa at Yud-Naseg-Fag-Taw. Laman ban at Yud-Naseg-Fag-Taw at tiba, Funbalugu yangay At taw. ¹⁵ Ay Funbalugu At ngay taglong ebi igfadiuganan sas Simun at longan, madyay At-Rirukan nafafaskudanan te, ¹⁶ Ay bandi gdog Akyangay kadasug. Ay gdog Akyangay nangawat fun Fakafanyuun at bale, dewa at bale malafian katsi. Aw yangay takawat at bale at kinrasras, ay nanturuk Akyay ka fag bale. ¹⁷ Laman fagayu at tibak taw sumarap yangay Angku, ay anggan fagayu at Yud-Naseg-Fag-Taw, laman ban Ku ngay taw yangay. ¹⁸ Katanya Funbalugu At longan. Ay Kanya nu nafoyung tuy fag longan siginan wa ebi ebi. ¹⁹ Ay Santiagu nafoyung yay te, Ay nu katanya, ku fakaumsigun te, laman di tam kalimata ka fag ngay Yud-Naseg-Fag-Taw takafandiug sas Funbalugu. ²⁰ Ay at masine nu nanriruk tam sa anya te, Lag kon faknul at nafon sas tawtawan. Ay lag kamayun. Ay lag kon nu at narugut way fag balan. Ay lag kon taguk. ²¹ Anway katanya wan Ku-Unga At-Longan. Ay e nafoyung wan sas fagayu fulan siginan ebi ebi. Madyay e tapan wan Ku-Unga At-Rirukan sas Taw-Naseg at ngay bale fakafulan sas fagayu Fakamatoun-Menit. ²² Ay nu katanya, At-Ngay-Suguan, ay at ngay magurang, ay anggan fagayu at takafandiug gananfiliun at tibak mangama, laman at fagfaloun at nangufud Fandak ay Sik-Nanfatvngvd sas fulan Antiukia. Ay at nafili Segi, at ngayan at sadi, Fafituk-Menit, ay anggan Silas, at magurang at duwa. ²³ Ay at nauba fag rirukan kata tuy te, Siginan wa emi, At-Ngay-Suguan ay anggan at ngay magurang, ay ngay fadugsay sas Erusalem. Ay em fagrirukan sa ayu at Yud-Naseg-Fag-Taw em ngay fadugsay sas fulan Antiukia, ay sas talun Datag-Buid, ay sas talun Silisia. Ay nafadasug ami em fagusegananun sa ayu te, gamatangan tuwami ayu. ²⁴ Nadungug ami te, at tibak taw ste ginan gfalimatan way ayu. Madyay at longan gfainfolian way ay amatanganan. Bunwa ngani ay, em nasugu anya. ²⁵ Masadi tuwa em fasadan em fagnafafulun laman nanfili ami tibak ama ste ginan fag fulan em fagfaloun sa ayu sas Antiukia. Laman at nangufud sa tam fakesugun Fandak ay Sik-Nanfatvngvd. ²⁶ Em fagfiliun nangus fag mangama ebi ituwa at ke fagbulun sa tam Fun Isus Fagtayukan, dewa e gafateun anya. ²⁷ Ay nu katanya, nasugu ami Segi ay Silas. Ay kanya yangay ban at nanfoyung ayu em rirukan. ²⁸ Anway At-Masine-Fag-Falad ay ami, em fasadan antuwa te, laman di ami gfaayu em fagsalagun ay ugali. Ay kayui nangus tuy ay fagyudun fagbulun, ²⁹ Lag kon faknul at nafon sas tawtawan. Ay lag kon taguk. Ay lag kon nu at narugut way fag ngay balan. Ay lag kamayun. Nu nafaning tuwam katanya, masine wan ay fagbulun. Kayu yamay anya em longan. ³⁰ Ay At-Ngay-Suguan nafaalo yay ka fag duwama gfaygaluan Fandak ay Sik-Nanfatvngvd. Ay ka fag ufatk taw nu ndasug sas fulan Antiukia, at nafaful at ngay takafandiug sanya. Ay nafon anya at ba rirukan. ³¹ Ay sanya fag ngay takafandiug nu natap wa ka fag rirukan, guseganan anway nafatvngvd tuwa at amatanganan. ³² Ay Segi ay Silas, kanya fag duwa Funbalugu At taglong, ay matvngvd nu gatul ay nafatvngvd at ngay fadugsay at fakafandiugun. ³³ Ay ka fag duwama nu glugo wa sirut sanya, at ngay fadugsay nafalo yangay anya manabayan. Laman masine tuwa nu kafoli yangay sa at nasugu anya. ³⁵ Ay roro Fandak ay Sik-Nanfatvngvd sanya yay sas Antiukia. Ay ka fag duwama gasfuan tibak takafandiug igfoyung yangay sat ngay takafandiug ay anggan sa tibak taw. ³⁶ Ay Fandak nu glugo wa sirut sanya, nalong sa Sik-Nanfatvngvd te, Basta wan. Ay gdog yay ta nansibo ta ngay fadugsay sas fagayu fulan ta nafoyung anya ebi tam Fun At longan. Laman sumaful yay ta te, tain katsi sanya. ³⁷ Ay Sik-Nanfatvngvd kaumsig nantaban Uan, at sadi at ngayan, Takata-Sik-Fanuktuk-Daul. ³⁸ Ay roro Fandak at fakaumsigun, at masine lag gtaban at tusama ebi tagubun anya sas fulan Fanfilia, madyay dua natunglus sat fagbulun. ³⁹ Ay Sik-Nanfatvngvd ay Fandak garingangan way sirut ay nasaruwayan wan. Ay Sik-Nanfatvngvd nataban wa Takata-Sik-Fanuktuk-Daul, ay nasakay wa sa sik balutu sas furu Sipre. ⁴⁰ Ay Fandak nafili yangay Silas ay galoun yangay. Ay at ngay fadugsay igdarangin anya te, laman tam Funbalugu At fakafanyuun si tuwa anya. ⁴¹ Ay Fandak nu glo, nadalan talun Datag-Buid ay talun Silisia, laman nanfatvngvd at ngay takafandiug sanya.

¹ Ay Fandak ndasug sas fulan Derbe ay anggan sas fulan Listra. Ay sik tagadal at sadi sanya at ngayan Tagseg-Funbalugu. At tina sik Taw-Naseg ay sik takafandiug. Ay at tama sik Taw-Gresia. ² Ay at ngay fadugsay sas fulan Listra ay fulan Ikunyu masine at ngay longan sas Tagseg-Funbalugu baliwa. ³ Ay Fandak kaumsig Tagseg-Funbalugu nu nangufud anya. Ay nu katanya, Fandak nafaning nafe fatoglagan sa Tagseg-Funbalugu at bilug, laman at ngay Taw-Naseg di kalimata anya. Anway sanya fag ngay fulan at ngay Taw-Naseg nasaful te, Tagseg-Funbalugu at tama sik Taw-Gresia way. ⁴ Ay gina Fandak ay at ufud nalo sasa ngay fulan, kanya nafoyung sanya at ngay takafandiug, At-Ngay-Suguan ay at ngay magurang sas fulan Erusalem at longan. Laman at ngay takafandiug e fagfaningun tuwa. ⁵ Ay nu katanya, fagayu at ngay takafandiug sat ngay Funbalugu bale intvngvd at fakafandiugun. Ay fagayu menit e kafamut tuwa takafandiug sanya. ⁶ Ay Fandak ay at ufud gina glo, nadalan talun Frigia ay talun Galasia. Anway At-Masine-Fag-Falad igsalag wayay nu nanfoyung Funbalugu At Longan sas talun Asia. ⁷ Ay nu ndasug sas tigyangan talun Misia, kanya gatunglusun yama sas talun Bitinia. Ay roro Isus At-Masine-Fag-Falad igsalag way anya. ⁸ Ay nu katanya kanya nalangfe wa talun Misia ay sumawas fulan Truas. ⁹ Ay ginanya fag yabi Fandak igtaginfanan. Ay at nalag sik Taw-Masedunia nu malindug, ay nu gewan anya te, Stei sas talun Masedunia ay tarabangi emi. ¹⁰ Ay Fandak nu nfulo wan siginan at taginfanan, ay rodi galoun wami sas Masedunia. Anway gayup ami te, Funbalugu wan At nafili emi, laman nanfoyung ami at Masine-Fag-Barita sanya. ¹¹ Ay nasakay ami sa sik balutu sas fulan Truas ay natunglus wami nangadasug sas furu Trasia-At-Abat. Ay sat dayu natunglus yangay ami sa sik fulan at ngayan, Fulan-Daul-At-Bagu. ¹² Ay nalo yangay ami sas fulan Takesug-Kabayu, at tagbvt fag fulan sas talun Masedunia. Ay Taw-Ruma tagmagurang sanya fag fulan. Ay glugo yay ami sirut nut si amis fulan Takesug-Kabayu. ¹³ Ay sis Fakamatoun-Menit, nalfas wami sas day fulan at sakbawan alad ay ndasug ami sas tigyangan safa. Anway gayup ami te, sanya at ngay taw nu gdarangin. Ay gina ami malunggung, igfoyung ami at maful fag ngay mangena sanya. ¹⁴ Ay at sadi tagdungugan fag mangena at ngayan, Lidia. Kanya ebi siginans fulan Tiatira. Ay kanya dan wa sik tagfesali at maloban fag fangawat lanbung. Ay kanya sik tagseg way sigad sas Funbalugu. Ay Funbalugu nafaamatanganan anya te, laman kafandiug sas Fandak at foyungan. ¹⁵ Ay rodi kanya insurung wan, ay anggan fagayu at taw sat bale. Ay matvngvd Lidia nu gewan emi te, Ay ayupan nu sik takafandiug wami, sakboi wa sa ku bale, ay lugoi yap nu ste am. Ay ami igfaning yay ami Lidia at fakaumsigun. ¹⁶ Ay sik menit gina ami glo sa at fagnandaranginan, nafabalang ami sik fanuguan fag baguina at ke mafurat fag falad. Ka fag baguina at naguna nafoyung te, e mdasug ban. Ay at magurang nabul sik ngay salafi siginan at tiba tagiasafulun at kumdasug ban. ¹⁷ Ay ka fag baguina nangalo wa Fandak ay anggan emi. Ay guro te, Tuy fag ngay mangama at Tiba-Tungud-Way-Fag-Taw-Yabi at fanuguan. Kanya nanfoyung ayu te, tain nu mbalabag am. ¹⁸ Ay fagayu menit katanya wan ka fag baguina at fagbulun. Ay Fandak kalimata ay inbiling ay nalong sat mafurat fag falad te, Nasugu aw emu sas Isus Fagtayukan At fagmadaragangun te, Alfasi wan sanya ginan fag baguina. Ay rodi at mafaurat fag falad nafalfas wa fiya. ¹⁹ Ay ka fag baguina at ngay magurang namatangan te, dua ban mafabul salafi teway at fagbulan siginan wayay ka fag mafurat fag falad at naguna nafoyung. Ay nu katanya, at ngay magurang nayugfu ay naguyud Fandak ay Silas sat fulan at ngay magurang at akbang sasad fulan at faglanuan. ²⁰ Ay nut si wa at fulan at ngay magurang at akbang, at ngay tuguyudan nalong te, Tuy fag duwama sik Taw-Naseg. Ay kanya wan tagfabudburasan antam iste si tam fulan. ²¹ Dua matuyan nu gfaning tam at foyungan fag ugali, anway Taw-Ruma way tam. ²² Ay sik ngay taw inful sanya ay gfauri yangay sas Fandak ay sas Silas. Ay sanya fag fulan at ngay magurang nabul wan ay nagirat wan Fandak ay Silas at lanbung. Ay nasugu sat ngay fanuguan te, Falangi dawdaw anya sik kayu. ²³ Ay nu ngayu ginan wa nu gfalang, at ngay magurang nafataban anya ay naukas anya sasad bale fagsungsungan. Ay matvngvd nu nafatanud anya sa at ngay tagtanud at fun. ²⁴ Ay anway matvngvd at suguan sa tagtanud anya fag fun, ay kanya nafasakbo wa Fandak ay Silas sasad wa bilug fag salug. Ay nagit wa at bitis sa sik buknga kayu. ²⁵ Dewa katanya, gina swa bilug yabi Fandak ay Silas igdarangin ay igdanyu tuwa sas Funbalugu. Ay at tibak masungsungan sanya nafadunguganun. ²⁶ Ay rodi tv guwigan dawdaw tam daga. Ay anggan at bale sungsungan at fagmatungkudan guwigan dawdaw. Ay fagayu at dingding sakbawan nafangaluangan wan. Ay fagayu at masungsungan at fansalod inluas wan. ²⁷ Ay at fun tagtanud bale sungsungan nafulawan. Ay nalag at ngay sakbawan nu maluangan. Ay kanya nabul at fiso, at fasadan gananfateun wa anya mandi. Anway nayup te, at ngay fagtanudun nalfas wayay. ²⁸ Ay rodi tv Fandak nauro dawdaw te, Lag tubuk am balyu. Anway ste yay ami fagayu mi. ²⁹ At at fun tagtanud get sik salung. Ay mafali nu nasakbo. Ay kudkulugan nu kalub sas Fandak ay Silas at akbang. ³⁰ At at fun tagtanud nataban ka fag duwama siginan sad wa bilug fag salug. Ay ginto anya te, Duwama, tain ban ku fagbulun laman umbalabag aw. ³¹ Ay duwama nabalus anya te, Afandiugi ngay sas Fun Isus, umbalabag wo. O anggan fagayu am taw sa am bale. ³² Ay duwama nafoyung sa anya tam Funbalugu At longan, ay anggan fagayu taw tagsat bale. ³³ Ay rodi gina swa bilug yabi, at fun tagtanud nataban ka fag duwama sat dayu. Ay nafegus at fakarukan. Ay rodi e nafasurung wa anya sasad safa, ay anggan fagayu taw sat bale. ³⁴ Ay ka fag fun tagtanud nafasakbo Fandak ay Silas sat bale. Ay nafafangon anya. Ay ka fag fun tagtanud guseganan gfasfuan at tiba tagsit bale. Anway kafandiug tuway sas Funbalugu. ³⁵ Ay balabag di, sanya fag fulun at ngay magurang nasugu at ngay fanuguan sat fun tagtanud te, Falfasi wan kanya fag duwama. ³⁶ Ay ka fag fun tagtanud nafoyung sas Fandak te, At ngay magurang nalong angku te, falfasi wa unu ayu. Ay nu katanya, alfasi wan ay loi wan, manabayan tuwam. ³⁷ Ay Fandak nalong anya te, Kanya fag ngay magurang yay at nafafalang emi sat ngay taw at akbang. Dewa yud ami e asalanan. Ay manga dewa ami sik Taw-Ruma. Ay manga nafasungsung yay emi. Ay katsi, go sangay masuksukan yakman nu e gfalfas emi. Yaya. Kanyai yap fag ngay magurang takadasug ste ay tagfalfas emi. ³⁸ Ay ka fag ngay magurang at ngay fanuguan nafoyung Fandak at longan sat ngay magurang. Ay at ngay magurang kalimu sas Taw-Ruma at fun daul nu nasaful te, sik Taw way mangaro Ruma. ³⁹ Ay nu katanya, ka fag ngay magurang rodi indasug ay gfalukmianan tuwa sa ka fag duwama. Ay nataban anya siginans bale fagsungsungan. Ay nalong anya te, Masine tuwa nu glo am ste ginan fag fulan. ⁴⁰ Ay nu katanya Fandak ay Silas nalfas wa ngani siginan at bale fagsungsungan, ay guli wa sas Lidia bale. Ay nu nalag wa at ngay fadugsay, ay nu nafoyung wa anya, Fandak ay Silas nalo wan sanya ginan.

¹ Ay Fandak ay Silas nadalan wa sas Fulan-E-Gsafungan ay sas fulan Tagbilug-Famusuyan, ay anggan indasug sas fulan Tesalunika. Ay sanya at sadi Taw-Naseg at bale fakafulan. ² Ay Fandak nasakbo sanya anway katanya wan at ugali. Ay tulu tuwak Fakamatoun-Menit nut sanya gfodfoyungan siginans Funbalugu At-Rirukan. ³ Ay nafasaful ay nafatuyan sanya fag ngay taw nu e nafauri tam Fagtayukan ay anggan nu gdog yay gleleg. Ay Fandak nalong te, Kanya tam Isus, ku nafoyung ayu, ay Kanya tam Fagtayukan. ⁴ Ay tibak Taw-Naseg kafandiug tuwa ay inful sas Fandak ay Silas. Ay anggan sik ngay Taw-Gresia dan wa sik tagseg Funbalugu. Ay anggan sik ngay madaragang fag mangena. ⁵ Ay sanya sis fulan Tesalunika at tibak Taw-Naseg galabian way mangaro ay, sas Fandak ay Silas. Ay ka fag Taw-Naseg nafili sik ngay mauri fag taw siginan at ngay taw. Ay nafaful anya laman garingangan dawdaw sanya swa bilug fulan. Ay ka fag ngay mauri fag taw natulud dawdaw at dingding sakbawan sa sik takafandiug at ngayan, Famafiya, at bale. Anway at fakaumsigun gananyugfuun Fandak ay Silas, ay nanguyud anya sa at ngay taw buknga. ⁶ Ay kanya nu dway e nalag Fandak ay Silas sanya, kanya nayugfu wa Famafiya, ay anggan tibak takafandiug. Ay naguyud wa sa at fulan at ngay magurang at akbang te, Ka fag duwama at bagu indasug stiye sik tagfaringangan way sas fagdaul daga at taw. ⁷ Ay tuy fag Famafiya at nafasakbo ka fag duwama. Ay kanya fagayu kamabo way sa tam fun daul, Sesar, at ngay longan. Anway kanya igfoyung way te, e tiba wayk fun daul, At ngayan Isus. ⁸ Ay at ngay taw ay anggan sanya fag fulan at ngay magurang ginbalian at amatanganan nu nadungug at longan. ⁹ Ay nu nabul wa at fansali fag ngay salafi siginans Famafiya ay at ngay ufud, at ngay magurang nafalfas wa anya. ¹⁰ Ay rodi at ngay fadugsay sas fulan Tesalunika nafalo wa Fandak ay Silas gina sad yabi sas fulan Berea. Ay duwama nu ndasug wa sanya, nasakbo wa sas Taw-Naseg at bale fakafulan. ¹¹ Ay at ngay Taw-Naseg sas fulan Berea nu mamatanganan, glabi yay sat ngay Taw-Naseg sas fulan Tesalunika. Anway kanya kaumsig tuwa igdungugan ay igtap Funbalugu At-Rirukan kayu menit kayu menit. Laman nansarap te, go matuyan at foyungan. ¹² Ay nu katanya, ngayu tuwak Taw-Naseg sas fulan Berea takafandiug. Ay anggan ngayu yangay at madaragang fag Taw-Gresia fag ngay mangena takafandiug. Ay anggan tibak Taw-Gresia fag mangama. ¹³ Ay at ngay Taw-Naseg sas fulan Tesalunika nu nadungug te, Fandak nanfoyung yangay Funbalugu At-Longan sas fulan Berea, kanya nalo yangay sanya. Laman nanfadotamaan ay nanfaringangan sat ngay taw sanya. ¹⁴ Ay rodi at ngay takafandiug sa fulan Berea nafalo wa Fandak sa sik dalan tagsas lino daul. Ay roro Silas ay Tagseg-Funbalugu infamato yay sanya sas Berea. ¹⁵ Ay ngay tagufud Fandak nataban anya anggan indasug sas fulan Atenas. Ay Fandak nasugu yay at tiba te, laman Silas ay Tagseg-Funbalugu laman mafalii nu kadasug sa anya, nu ntabu wa at fagbulun sas fulan Berea. Ay Fandak at ngay ufud guli yangay. ¹⁶ Kaduge Fandak nafanya at ngay ufud sas fulan Atenas, kanya kalimata nu nalag te, ngayu dawdaw at tawtawan si at fulan. ¹⁷ Ay nu katanya, Fandak, ay at ngay Taw-Naseg, ay anggan at ngay Taw-Gresia at tagseg sas Funbalugu igfodfoyungan sas Taw-Naseg at bale fakafulan. Ay kayu menit kayu menit Fandak ay anggan at ngay taw sanya sat fulan at faglanuan igfodfoyungan. ¹⁸ Sanya e sik fulan taw tagfaning Epikureu at foyungan, ay anggan sik fulan taw at ngayan te, Tagbaris. Ka fag ngay taw nu nalag Fandak, gidgintoan te, Nataw tuy fag taw tage longan tagaemngawan. Ay tiba nabalus te, Nu nda kanya sik takamoyung at nanfoyung antam kata sik ngay famaklay fag taw yabi. At fagnalongun katanya anway Fandak nafoyung sas Isus baliwa, ay anggan nu gdog yay gleleg. ¹⁹ Ay kanya fag ngay taw nataban Fandak sa at maful fag ngay magurang at akbang sas Tagbarangian-At-Taw-Yabi-At-Bugsul. Ay sanya nalong sas Fandak te, Kaumsig ami nasaful emu am foyungan at bagu. ²⁰ Anway ami bagu yay ami gdungug emu am foyungan. Ay kaumsig yay ami giasafulun at masuad. ²¹ Fakatanyaun at longan anway fagayu Taw-Atenas ay anggan at betaw tagbanwan sanya anway at ugali wan nu gfodfoyungan ay nu giadungugun at yud batang nadungug fag longan. ²² Ay nu katanya, Fandak inlindug sas buknga taw ay nalong te, Fulan Atenas at ngay taw, nasaful aw te, maseganama am dawdaw nu gseg am nus nge wain fag fagsegan. ²³ Madyay nu nadalan aw ay fulan, nalag aw sik ngay fagsegan. Ay nalag akyangay sik fagyagoan anyun ay at rirukan sanya te, Sas Sik Taw Yabi, Di Ami Nasaful At Ngayan. Ay yud nasaful fag fagsegan, Kanya ro ku fagnanfoyungun sa ayu katsi. ²⁴ Anway Funbalugu tuwa At naawat at fagdaul daga ay anggan fagayu tagsanya. Ay Kanya tuwa Banwa ay fagdaul daga At fun. Ay dua nanbanwan sa sik taw at naawat bale. ²⁵ Bunwa sik taw tagtarabang Anya, anway Kanya di e fagayudanun. Anway Kanya wan At nafon fagayu sas taw, anggan at leleg ay at engasan. ²⁶ Ay madyay ebi dewa sadi tam aguyangan, Funbalugu nafaayu tuwa, ay ngayu tuwa at tagbanwan sasa ngay talun sas fagdaul daga. Ay Funbalugu yangay At nafili te, seduge sik taw ay dada nu gbanwan. ²⁷ Katanya Funbalugu At fagbulun laman fagayu taw igsarap tuwa Anya. Ay nu ndain kata sik taw at yud glag, tagkamkamangan ay anggan nabul. Anway Funbalugu di ngayayu antam. ²⁸ Anway e longan wa te, Tam faginsiktawun ay tam fage lelegun siginan tuwas Funbalugu At fagmadaragun. Ay katanya yangay sik tagdanyu sa ayu at longan te, Fagayu tam Funbalugu watam fiya At unga. ²⁹ Nu Funbalugu watam At unga, lag tam gamatangan te, tam Funbalugu kata way sik awatan sanbung fanumyu, ay ate kata sik sanbung salafi, ay anggan way kata sik batu. Kata way sik taw at madaragang at awatan. ³⁰ Ebi kaduge at ngay taw yud e fagsafulun, Funbalugu nafabayan yay anya. Ay roro katsi matvngvd tuwa Funbalugu nu glong te, fagayu taw, ubuni at asalanan. ³¹ Ay anggan Funbalugu wan At nafili sik menit laman ban nansarap fagdaul daga at ngay taw at asalanan. Ay At filian sik Taw At nansarap ban fiya fiya. Ay Funbalugu At fagnafatuyanun Anya anway Funbalugu At nafadog nafaleleg Anya siginan At fagmatianan. ³² Ay at ngay taw nu nadungug Fandak nu gfoyung sas fadogan fag leleg baliwa, ay tibak taw fanlamangan way. Ay tiba nalong te, Foyungi yap ban emi sa tibak menit. ³³ Ay nu katanya way, Fandak nalo wan sanya ginan. ³⁴ Ay tibak taw inful yay sas Fandak ay kafandiug. Ay at sadi at takafandiug at ngayan Diunisiu. Kanya sik magurang sas Tagbarangian-At-Taw-Yabi-At Bugsul. Ay tibak takafandiug sik mangena at ngayan Sik-Baka-Tina. Ay e tiba yak taw takafandiug.

¹ Ay bandi Fandak nalo wan siginans fulan Atenas ay indasug sas fulan Kurintu. ² Ay kanya nafablang sik Taw-Naseg at ngayan Kata-Sik-Biyo-Mabaludan. Kanya fag taw nu kalangfe sa sik talun at ngayan Lino-Daul. Ay ebia taw kanya, ay anggan at mangena Sik-Fufuina-Sirut, indasug wa sas fulan Kurintu siginans talun Italia. At fagnatsanyaun anway at fun daul, Klaudiu, naayiyan fagayu Taw-Naseg siginans fulan Ruma. Ay Fandak nasakbo yay sas Kata-Sik-Biyo-Mabaludan daduwa at bale. ³ Ay ka fag daduwa at fagbulun faggugat kata yangay Fandak at fagbulun, takawat bale sinyag. Ay nu katanya Fandak maful yay sanya fag daduwa. Ay gtarabang yay sat fagbulun. ⁴ Ay sas fagayu Fakamatoun-Menit Fandak ay at ngay taw gfodfoyungan sis Taw-Naseg at bale fakafulan. Laman at ngay Taw-Naseg ay anggan at ngay Taw-Gresia kafandiug. ⁵ Ay gina Silas ay Tagseg-Funbalugu indasug siginans talun Masedunia, Fandak at fagbulun faggugat laman igfoyung ay igfatuyan sasa ngay Taw-Naseg te, tam Isus tam Fagtayukan. ⁶ Ay at ngay Taw-Naseg nu gsalag ay nu gfanlamangan way sas Fandak, Fandak nafandagdag siginan at lanbung. Ay nalong sa anya te, Am wa mandi tagfadasug sa ayu sik faurianan. Ay bunwa siginan angku. Ay nu katanya, katsi ban nanfoyung akway sat Yud-Naseg-Fag-Taw. ⁷ Ay rodi Fandak nalo wan siginans Taw-Naseg at bale fakafulan. Ay indasug wa sa sik taw at ngayan, Tikiu At-Matuyan, at bale, sas day bale fakafulan. Ay kanya sik tagseg Funbalugu. ⁸ Ay sanya sis Taw-Naseg at bale fakafulan at magurang at sadi, Buk-Malut, kafandiug. Ay fagayu tagsis Buk-Malut at bale kafandiug yangay. Ay ngayu at Taw-Kurintu at nadungug Fandak at longan ay kafandiug. Ay nafasurung anya sasad safa. ⁹ Ay sik yabi Fandak e nalag kata sik taginfanan ay Funbalugu nae longan sa anya te, Lag kalimu. Foyungi ay lag katuas. ¹⁰ Anway gufud Akwa emu. Ay du e taw ste gfauri emu, ay du e sak fe fakarukan. Anway ngayu tuwa Ku taw ste fag talun. ¹¹ Ay Fandak nu gbanwan sanya, sik banwa nu siaba, ay sit dayu unumk magdanun. Ay kanya nafoyung Funbalugu At longan sanya fag ngay taw. ¹² Ay gina Galiun at fun sas talun Akaya, at ngay Taw-Naseg insadi nu gyugfu Fandak, ay nataban sa at ngay magurang at fagmafulan sanya fag talun. ¹³ Ay ka fag ngay Taw-Naseg nafoyung sat ngay magurang te, Tuy fag taw nafoyung te laman at ngay taw tagseg Funbalugu. Dewa gyud gfadiuganan sa em talun at ngay suguan. ¹⁴ Ay Fandak dewa gaelonganun, Galiun nalong sa ka fag ngay Taw-Naseg te, Am Taw-Naseg, tuy fag taw nu e asalanan wa fiya. Tenday nu nabasing sik taw, kin wa fiya, dumungug akwa fiya ay longan. ¹⁵ Ay roro ay longan nu anway sa tibak longan, ay sa tibak ngayan, ay nut sas Taw-Naseg at ugali wadi, am wan tagfili at matuyan. Aw bun akwa sik tagfili sanya fag fagbulun. ¹⁶ Ay Galiun naayiyan ka fag ngay Taw-Naseg siginan at fagmafulan fag ngay magurang. ¹⁷ Ay at ngay taw sanya nayugfu at taguna at magurang sas Taw-Naseg at bale fakafulan at ngayan te, Sik-Taw-Madaragang-Fiya. Ay nafalang dawdaw anya sat day magurang sanya fag talun at fagmafulan fag bale. Ay Galiun dua gsalag dewa katanya at fagbulun. ¹⁸ Ay nu ntabu wa katanya, Fandak glugo yay sirut nu maful sat ngay fadugsay sas fulan Kurintu. Ay bandi kanya nalo wan sanya ginan ay nasakay wa sa sik balutu. Laman nangadasug sas talun Datag-Buid. At at ufud sik daduwa, Sik-Fufuina-Sirut ay Kata-Sik-Biyo-Mabaludan. Ay nu ndasug sas fulan Dawa, Fandak nalanu at buk, anway ebia taw e fatuyanan sas Funbalugu. ¹⁹ Ay nu ndasug sas fulan Efesu, sanya yay at daduwa. Ay Fandak way at nasakbo sas Taw-Naseg at bale fakafulan. Ay kanya ay at ngay taw gfodfoyungan yay sanya. ²⁰ Ay sanya fag ngay Taw-Naseg gfatawad yay te, ste yap Fandak. Ay roro Fandak kanbang wan. ²¹ Ay gina galoun, Fandak nalong sanya fag ngay taw te, Kafoli kyay ban stiye, Funbalugu nu kaumsig. Ay Fandak nasakay wa sa sik balutu ay nalo wa siginans fulan Efesu. ²² Ay Fandak nu ndasug wa sas Sesar-At-Fulan, rodi nalo wa sas fulan Erusalem. Ay gfamatuan yay at ngay takafandiug sanya. Ay nalo yangay sanya ginan ay nangadasug yay sas fulan Antiukia. ²³ Ay nu glugo wa sirut sanya, Fandak nalo yangay sanya ginan. Ay nangadasug yangay sasa ngay fulan sas talun Galasia ay sas talun Frigia. Laman nanfatvngvd sanya at ngay takafandiug at fakafandiugun. ²⁴ Ay sik Taw-Naseg at kinlangfe sas Tagdingding-Taw-At-Fulan, at ngayan Tagfon-Danyu-At-Taw, indasug wa sas fulan Efesu. Ay kanya nu gfoyung, masine nu kadungug ay manga nu maelonganan. Ay kanya at fagsafulun fiya fiya sa yay ebi taglugo Funbalugu At-Rirukan. ²⁵ Ay e nafoyung yangay sa anya sa tam Fun At ugali baliwa. Ay kanya maseganama yangay nu gfoyung sas Isus baliwa sa tibak taw at matuyan ay di gsalan. Ay kanya nasaful wan Uan Tagfasurung at foyungan gina gsurung taw fagtvngvd. ²⁶ Ay Tagfon-Danyu-At-Taw maseganama tuwa nu gfoyung sas Taw-Naseg at bale fakafulan. Ay Sik-Fufuina-Sirut ay Sik-Biyo-Mabaludan nu nadungug at foyungan, nataban yay anya sat dayu. Laman nanfoyung yangay anya Funbalugu At ngay ugali at tiba. ²⁷ Ay bandi Tagfon-Danyu kaumsig yay nalo sas talun Akaya. Ay at ngay takafandiug sis Efesu nafatvngvd sas Tagfon-Danyu at amatanganan. Ay nafon yay anya sik rirukan, at fanfoyung sa at ngay tagadal sas Akaya te, laman gfasakbo tuwa Tagfon-Danyu. Ay Tagfon-Danyu nu ndasug wa sanya natarabang dawdaw sa at ngay taw at bagu kafandiug anway Funbalugu kafanyu anya. ²⁸ Ay Tagfon-Danyu maseganama tuwa nu gfoyung sasa ngay taw fagdungugan. Ay nu katanya, kanya di gababawan dewa Taw-Naseg igfaringangan anya. Anway at foyungan siginan was Funbalugu At-Rirukan te, tam Isus tam Fagtayukan.

¹ Ay kaduge Tagfon-Danyu-At-Taw sas fulan Kurintu, Fandak nadalan sas talun buid ay ndasug sas fulan Efesu. Ay nalag sanya at tibak tagadal. ² Ay ginto sa anya te, Go At-Masine-Fag-Falad si wa ayu gina am bagu kafandiug. Ay kanya nabalus te, Idia. Di ami batang gdungug nu e glong te, e Masine-Fag-Falad. ³ Ay Fandak ginto yangay anya te, Ay madyay, taw at masuad ay faginsurungun. Ay kanya nabalus te, Nafaning way ami Uan Tagfasurung at ugali nu gfasurung fagtvngvd. ⁴ Ay Fandak nalong te, Uan at fagsurungun at masuad te, laman sik taw naubun at asalanan. Ay Uan nafoyung yangay te, Afandiugi tagadasugun siginan ku guyan. Ay Kanya long anwa tam Isus. ⁵ Ay kanya fag ngay tagadal nu nadungug Fandak at longan, e nasurung yangay sas Isus At fagmadaragangun. ⁶ Ay Fandak nu nafatayuk wa at daluap sa anya, At-Masine-Fag-Falad sanya yangay fag taw. Ay kanya fag ngay taw nae longan sa tibak fanlongan ay anggan nafoyung Funbalugu At longan. ⁷ Sanya fag ngay tagadal nu ndain 12. ⁸ Ay Fandak nasakbo sanya fag Taw-Naseg at bale fakafulan. Ay maseganama tuwa nu gfoyung tuluk magdanun nu siaba. Fandak ay anggan at ngay taw sanya igfodfoyungan. Anway Fandak at fasadan laman at ngay taw sumaful sas Funbalugu-Nu-Gmagurang-Taw at masuad baliwa. ⁹ Ay tibak taw dua gadunguganun. Ay dua kafandiug. Ay anggan iglong way mauri sa ka fag Ugali at bagu baliwa gina at ngay taw gdungug. Ay nu katanya way, Fandak nalo wan sanya ginan. Ay nataban wa sanya ginan fag ngay tagadal sat dayu. Ay kayu menit kayu menit Fandak ay anggan at ngay taw gfodfoyungan sas tagbiya fag bale at ngayan, Tiba-Tungud-Fag-Fun-At-Fagadalan. ¹⁰ Katanya wan Fandak at fagbulun duwak banwa nu siaba. Ay fagayu tagbanwan sas talun Asia nadungug tam Fun At-Longan, dewa Taw-Naseg ay dewa Taw-Gresia. ¹¹ Ay ginanya Funbalugu nafasure At ngay madaragang fag fagbulun siginans Fandak. ¹² Laman nu e nafatayuk dewa sik falefe sirut ay dewa sik lanbung sas Fandak. Ay nu e nafatayuk yangay sa at ke dailan, at ke dailan nfiya wan. Ay anggan at ke mafurat fag falad nalfas wa sanya ginan fag taw. ¹³ Ay tibak Taw-Naseg at mabara at taglodluan faggugat, igfaskud nanfalfas at mafurat fag falad sas Isus At fagmadaragangun. Ay igsugu te, Faningi ku longan anway ka fag Isus, Fandak wa at foyungan, At ke fagmadaragangun. ¹⁴ Ay katanya wan Eskeba at fituk baguama at fagbulun. Eskeba at sadi at Taw-Naseg at taganyun daul. ¹⁵ Ay at mafurat fag falad iglong sa ka fag fituk baguama te, Nasaful akwan Isus, ay anggan Fandak. Ay am sinu am. ¹⁶ Ay kanya fag taw at ke mafurat fag falad, mafali nu gtulbu ay nu kagafus sa ka fag fituk baguama. Ay fagayu nafangatongan wa sas daga. Ay nu glagyu sanya ginan fag bale, du e amak ay e fakarukan wan. ¹⁷ Ay fagayu taw sas fulan Efesu nadungug takatanya, dewa Taw-Naseg ay dewa Taw-Gresia. Ay fagayu taw kalimu dawdaw ay naseg Isus At fagmadaragangun. ¹⁸ Ay at ngay bagu kafandiug inkakbang ay nafoyung at ngay asalanan ebia taw at nafasure at ngay fagmadaragangun at mauri. ¹⁹ Ay ginanya tibak taw at nafasure at ngay fagmadaragangun ebi at mauri, ay nafaful at ngay fagtapan sat fagmadaragangun at mauri baliwa. Ay nabatas wan fagayu, gina ngayuk taw glag. Ay kanya igtap ka fag ngay fagtapan at fansali ebi gina bagu gbul. Ay at kayu wan 500,000k fisu. ²⁰ Ay anway katanya, Funbalugu At longan inrapyag ay madaragang tuwa. ²¹ Ay bandi Fandak nanfaning yangay At-Masine-Fag-Falad, ay at fasadan ganandalanun yay sas talun Masedunia ay sas talun Akaya. Ay bandi nangadasug sas fulan Erusalem te, ay nu ndasug kua ban sas Erusalem, lumo kyangay ban sas fulan Ruma. ²² Ay Fandak nasugu yay duwak tagtarabang, at ngayan Tagseg-Funbalugu ay Sik-Nesugan, sas Masedunia. Ay Fandak sanya yay sirut sas talun Asia. ²³ Ay ginanya sanya, e garingangan dawdaw sa ka fag Ugali at bagu baliwa. ²⁴ Ay sik taw, Tagfadaragang-Tanum-At-Fanuguan, sik takawat sik ngay tawtawan sanbung salafi. Ay kanya naawat sik @@ay fagsegan fag bale ayu sirut, laman at fagsegan sas Andag@-Mangena-Nafon. Ay ngayu tagtarabang anya, at fagbulan wanay at ngay salafi. ²⁵ Ay ka fag takawat tawtawan nafaful at ngay tagtarabang, ay anggan tibak takawat. Ay nalong anya te, Ku ngay iba, nasaful wam te, tam ngay fagmabalanun siginan way tam fagbulun. ²⁶ Ay nadungug wam sa ka fag Fandak at fagbulun baliwa. Ay bunwa sas fulan Efesu fagtvngvd, arvs anggan wa sas fagdaul talun Asia. Madyay kanya nafoyung wa sasa ngay taw te, Ay fagsegan tawtawan bunwa sik Funbalugu fiya. Ay ngayuk taw at kinlimata sa at ngay naawat fag fagesgan. ²⁷ Ay nu ndain at ngay taw at fakalimataun bunwa sa tam naawat fagtvngvd, ay anggan wa sigon tam madaragang fag taw yabi Andago-Mangena-Nafon at bale du e fanambagun. Ay manga maliam wa ban tam taw yabi Andago-Mangena-Nafon at fagmasineun. Katsi dewa sas fagdaul talun Asia ay anggan sas fagdaul daga at taw igseg anya. ²⁸ Ay at ngay takawat nu nadungug Tagfadaragang-Tanum-At-Fanuguan at longan, kadotama dawdaw sat amatanganan. Ay kanya guro dawdaw te, Madaragang tuwa Taw-Efesu at taw yabi, Andago-Mangena-Nafon. ²⁹ Ay sas fagdaul fulan Efesu garingangan wa dawdaw. Ay at ngay taw nayugfu sik duwama siginans talun Masedunia, at ngayan Gayu ay Tiba-Tungud-Nu-Gmagurang. Ay kanya Fandak wa ufud ebi gina glo. Ay e naguyudan ka fag duwama sa sik fagmafulan fag faglanuan. ³⁰ Ay Fandak gatsanyaun yama sad faglanuan sa at ngay taw. Roro sik ngay tagadal igsalag way anya. ³¹ Ay anggan tibak fun sirut sas talun Asia at takesug sas Fandak, nasugu at fanuguan sa anya te, At masine, lag sanya. ³² Tagsisad faglanuan fag ngay taw nu nauro dawdaw. Tiba masadi yay at longan, ay tiba saman wan at longan. Anway fagayu garingangan wayay dawdaw. Ay arvs at ngay taw dua nasaful at fagmafulun sanya at masuad. ³³ Ay at ngay Taw-Naseg natulud sik taw at ngayan Tagdingding-Taw, anggan indasug sat ngay taw at akbang laman nanfoyung sat kinsure baliwa. Ay Tagdingding-Taw nafalelegan at daluap laman fagayu taw umtuwas wan nu garingangan. ³⁴ Ay at ngay taw nu nasaful te, kanya sik Taw-Naseg way, inkugat yay nu guro nu masadi te, Madaragang tuwa Taw-Efesu at taw yabi Andago-Mangena-Nafon. Ay at kadugayan nu guro nu masadi kaduge duwa ginan kafalin tam menit. ³⁵ Ay fulan Efesu at magurang at taglong nu nafatuas wa at ngay taw nu guro, nalong anya te, Am at ngay Taw-Efesu. Fagayu taw nasaful te, itam wan at natanud Andago-Mangena-Nafon at bale, ay anggan ka fag fagsegan fag batu, at kintong siginans Banwa. ³⁶ Anway du e taw gafayudun kanya fag longan at matuyan, ay atuasi wan nu garingangan am. Ay lag gfasigad sik fagbulun nu gfadfalian way am. ³⁷ Madyay am wan at nataban ka fag duwama stiye. Ay madyay di e fagbulun mauri sa tam taw yabi, ay di e longan mauri sa anya. ³⁸ Ay Tagfadaragang-Tanum-At-Fanuguan ay at ufud takawat nu e fagnanfoyungun way tibak taw at asalanan, at masine taguna sai yap at nansarap asalanan. Anway at tagsarap asalanan ay at ngay magurang faggugat maful, laman igsarap te, sinu at ke asalanan. ³⁹ Ay nu e fakaumsigun am tiba, at masine nu maful am kadugei yap sa tam ugali nu maful tam. ⁴⁰ Anway kalimu aw te, nu ndain tam fun nadungug wa tam fagbulun aro ay mafauri antam. Anway tam fagmafulun aro dua bangan e masuad sak ro tam maringangan katvngvd nu e masuad tam fagbulun. ⁴¹ Ay nu ntabua at longan, at tage longan nafalo wa at ngay taw.

¹ Nu ntabua ka fag ngay tagaringangan, Fandak nafakbang sa anya at ngay tagadal. Ay nu nafangatulun wa sa anya, Fandak nalong te, Nalo kwan katsi. Ay kanya nalo wa sas talun Masedunia. ² Ay nu nadalan wa sanya, kanya nafoyung yay nafatvngvd sa at ngay takafandiug. Ay sanya ginan nalo wa sas talun Gresia. ³ Ay Fandak nut sanya, tuluk magdanun nu siaba. Ay kanya galoun wa ganansakayun sa sik balutu laman nangadasug sas talun Datag-Buid. Ay nu nadungug te, Taw-Naseg gananfateun way mangaro anya gina gsakay, kanya nafasaman yay at fasadan. Ay ganandalanun yay sas talun Masedunia ay nangadasug ban sas talun Datag-Buid. ⁴ Ay Fandak at ngay ufud gina guli, at ngayan Masine-At-Magurang, sik Taw-Berea ay Sik-Taw-Maraska at baguama. Ay anggan sik duwama siginans Tesalunika, Tiba-Tungud-Nu-Gmagurang ay At-Faduwa. Ay anggan Gayu, sik Taw-Derbe, ay Takseg-Funbalugu. Ay anggan sik duwama siginans Asia, At-Masine-Insure-Wa-Daw ay Takata-Sik-Famataba. ⁵ Kayu niya at naguna emi, ay at nafanya emi sas fulan Truas. ⁶ Ay ami, nalo wami sas fulan Takesug-Kabayu. Ay nu ntabua at yafun daul, Tinafay-At-Yud-E-Famabaga, nasakay wami sa sik balutu sanya. Ay nu nlangfe limak menit indasug wami sas fulan Truas. Ay sanya yay ami fituk menit. ⁷ Ay gina sas fasadik menit sas fafitu, maful yangay ami sat ngay takafandiug laman kon Isus-At-Yafun. Ay Fandak igfoyung sa at ngay taw sanya. Ay anway glo wa ban ay balabag, Fandak gfaaba nu ge longan, anggan saswa bilug yabi. ⁸ Ay sa em fagmafulan sis fatuluk langkub fag salug, sanya ngayu at salung. ⁹ Ay sanya sik baguama, at ngayan Nsure-Masine, nu namalunggung sa sik fagbantayan. Ay kanya igtiug wa matukba kaduge Fandak igfoyung igfaaba. Ay kaduge igtiug, kanya ntong siginan at fatuluk langkub fag salug. Ay at nabul at bilug nalag te, nkate wan. ¹⁰ Ay Fandak indaga, ay naarungan ay naugwan anya. Ay nalong sanya fag ngay taw te, Lag kalimu, kanya gleleg yay ro. ¹¹ Ay Fandak gdog yay nasakbo ay nafanramyukan sik fafa. Ay fagayu taw naon wan. Ay Fandak ay at ngay taw sanya igsulitanan way anggan wa sas balabag. Ay rodi Fandak nalo wan. ¹² Ay matvngvd at ngay taw nu guseganan nu gtaban Nsure-Masine, anway kanya gleleg yay. ¹³ Ay ami nalo wami. Naguna wami Fandak, nasakay wami sa sik balutu. Ay nangadasug wami sas fulan Asun. Ay gina ami ndasug sanya nanfasakay yay ro ami Fandak. Anway Fandak iglo yay sasad talun nu nangadasug sas fulan Asun. ¹⁴ Ay nu naladlagan wami Fandak sas fulan Asun, nafasakay wami anya. Ay bandi ndasug wami sas fulan Mitilene. ¹⁵ Ay nu nalo wami sanya ginan, indasug wami sas day furu Kuru. Ay sit dayu fag menit indasug wami sas furu Sik-Abat. Ay sis fatuluk menit indasug yangay ami sas fulan Miletu. ¹⁶ Fandak at fakaumsigun fagnalangfeun fulan Efesu. Laman dua glugo sas talun Asia. At fagmafaliun laman nu kadasug sas Erusalem gumuna yay ka fag yafun at ngayan, Falimak-Safuluk-Menit. ¹⁷ Nu ndasug wami sas fulan Miletu, Fandak nasugu sik taw, laman gfat sanya at ngay magurang siginans Funbalugu bale sas fulan Efesu. ¹⁸ Ay nu ndasug wan, Fandak nalong anya te, Nasaful wam ku ugali ebi gina aw sanya si ayu, siginan ngay aw bagu kadasug sas talun Asia ay anggan katsi. ¹⁹ Anway igfaning aktuway tam Fun At fasadan. Sik mababa akway. Ay guyway akway. Ay ngayu ginan nu e gfauri angku siginans Taw-Naseg at ngay fasadan. ²⁰ Ay da kdi kapla nu gfoyung aw sa ayu, nus nge wain ku fagfoyungun laman e fanambagun tuwa sa ayu. Dewa sas fagmafulan, ay dewa sasa ngay bale. ²¹ Ay nanfatuyan akyangay dewa sas Taw-Naseg ay dewa sas Taw-Gresia. Laman kanya mubun at ngay asalanan ay igfaning Funbalugu. Ay laman kafandiug tuwa sa tam Fun Isus Fagtayukan. ²² Ay katsi glo kua sas fulan Erusalem, anway At-Masine-Fag-Falad wan tagtaban angku. Ay da kua saful te, taw ro fagfatsanyaun angku. ²³ Ku nasaful anway te, At-Masine-Wa-Fag-Falad nafatuyan sa angku sas fagayu ku nadasugan fag ngay fulan te, e sumungsung ban angku, ay e gfauri ban angku. ²⁴ Nus nga katanya, kua kesug ku leleg. Anway ku leleg di e masuad. Ku fakaumsigun fiya fiya laman fatabu aktuwa Funbalugu At nafat si angku fag fagbulun. Ay anggan tam Fun Isus At nafatsi angku fag fagbulun. Laman nanfatuyan aw at Masine-Fag-Barita nus nga nday siginans Funbalugu At fakafanyuun. ²⁵ Ay katsi amatangani te, ebi nu batang akwa siginan ay fulan, ay nu nafoyung akwa ayu Funbalugu-Nu-Gmagurang-Taw baliwa, katsi ban dua ban am lumag angku. ²⁶ Ay nu katanya, katsi nafatuyan akwa sa ayu te, dewa yud umbalabag sik taw sa ayu, bunwa aw at ke asalanan. ²⁷ Madyay ebi maseganama akwan nu gfoyung aw sa ayu Funbalugu At longan fagayu. ²⁸ Am wa mandi tagamatangan ayu ay anggan fagayu Funbalugu At ngay taw, tagamatangan anya mandi. Anway At Masine-Wa-Fag-Falad At nafili ayu, laman am wan tagfatvngvdun At ngay taw. Anway at ngay taw Funbalugu At taw, anway sa At Baguama At naatean. ²⁹ Anway nasaful kua te, nu lumo kua ban ste ginan, umdasug yangay at ngay mauri fag taw. Kata sik ngay idu talun nu kadasug sa sik fulan tupa ay nafate. ³⁰ Ay at sadi yangay te, siginan ay ngay taw umsure yangay ban tibak taw at nanfamuagan. Anway at fakaumsigun at ngay tagadal maning anya. ³¹ Ay nu katanya, tagaki. Amatangani ku fagbulun kaduge aw ste sa ayu fagtuluk banwa nu siaba. Ay ginanya da kdi gfangafoliun nu nanfoyung aw ayu, dewa sad yabi ay dewa swa menit, nus nga aw guyway. ³² Katsi nanfatanud aw ayu sas Funbalugu ay sa At longan at takafanyu. Anway Funbalugu At longan mafafatvngvd sa ay fakafandiugun ay manga nanfon ban ayu At fagafonun sa at ngay kinsadi sa Anya. ³³ Ay da kua galabian nus nge wain siginan ayu. Dewa ay salafi, ay dewa ay nanuranan, ay dewa ay lanbung. ³⁴ Anway nasaful wam angku ku fagbulun ebi ginan. Laman e fanbul aktuwa ku ngay fagayudanun, ay anggan sa ku ufud at fagayudanun. ³⁵ Ay nu katanya, ku fag fagbulunun sik famasaful sa ayu te, sik taw maseganamai tuwa nu e fagbulun, laman mafatarabang yangay sa at yud mafabul fag taw. Ay amatangani tuwa tam Fun Isus at longan te, Sik tagfon nu guseganan glabi yay sa tagbul nu guseganan. ³⁶ Ay nu ntabu wa Fandak nu glong katanya, natudan ay igdarangin sa ka fag ngay magurang akbang. ³⁷ Ay fagayu at taw guyway. Ay naugwan sas Fandak. Ay naayuk sat fingi. ³⁸ Fakatanyaun matvngvd nu kabalu anway sat nalongan te, dua ban am lumag angku. Ay kanya nataban wa Fandak sas balutu.

¹ Ay nu nasadsamanan wami siginans ka fag ngay Taw-Efesu, nalo wami nasakay sa sik balutu. Em dalan maturun sas furu Kus. Ay sat dayu sas furu Rudas. Ay siginans furu Rudas indasug wami sas fulan Patara. ² Ay nu nalag ami sik balutu sanya ganandifeun lino ay nangadasug sas talun Maraska, nasakay wami ay nalo. ³ Ay gina ami glo, nabantay ami furu Sipre. Ay nu glangfe mi, ka fag furu sa em wala baliwa. Ay ndasug wami sas talun Datag-Buid, ay nu kalfas ami sas fulan Batu-Luguy. Anway sanya yangay nu gfadaga ka fag balutu at ngay fangubaun. ⁴ Ay igsarap ami at ngay tagadal sanya. Ay nu nalag wami, sanya yay ami fituk menit nu siaba. Ay ka fag ngay tagadal nafoyung sas Fandak siginan At-Masine-Fag-Falad te, Agi yap tunglus sas Erusalem ginanya. ⁵ Ay dewa katanya, nu nlangfe wa kayu niyak menit nut sanya mi, nalo wami. Ay fagayu takafandiug sanya, ay at ngay mangena, ay anggan at ngay sisian nataban yay emi anggan sas day fulan sa sik tigyangan lino. Ay sanya igtudan yay ami igdarangin. Ay rodi nasadsamanan wami. ⁶ Ay nasakay wami sa sik balutu. Ay em ngay iba noli wa sat bale. ⁷ Ay nalo wami siginans fulan Batu-Luguy ay ndasug wami sas fulan Tulemai. Ay sanya nafamatuan yay ami tam ngay fadugsay. Ay sanya yay ami sik menit nu siaba. ⁸ Ay balabag di gdog yangay ami nalo ay ndasug wami sas Sesar-At-Fulan. Ay sanya sik takamoyung nafasakbo emi, at ngayan Takesug-Kabayu. Kanya yay at sadi ebi at nafili fag fituk tagtanud. Ay sanya yay ami sik gadugayan. ⁹ Takesug-Kabayu at baguina ufat. Ay di e mangama. Ay kanya gfoyung yangay Funbalugu At longan. ¹⁰ Ay kaduge ami sanya fag ngay menit, indasug sik takamoyung at ngayan, Fakailatun, siginans talun Naseg. ¹¹ Ay kanya inkakbang sa emi, ay nabul Fandak at famaptus sat faguan. Ay nasiuk wa mandi sat duwa bitis ay sat duwa take. Ay kanya nalong sa emi te, At-Masine-Fag-Falad nalong te, Kata tuy ban at ngay Taw-Naseg sas Erusalem at fagbulun ban sat ke famaptus sat faguan. Ay manga tumaban anya sa at Yud-Naseg-Fag-Taw. ¹² Ay gina ami nadungug at longan, ay anggan at ngay taw sanya, matvngvd nu nalong sas Fandak te, Lag sas Erusalem. ¹³ Ay Fandak nalong sa emi te, Taw ro ay faguywayun ay ay fagfabaluanun angku. Anway mafamasadan akwan, dewa e sumungsung angku, ay dewa e fate angku sas Erusalem, laman tam Fun Isus e fanambagun. ¹⁴ Ay Fandak nu dway gfaning dewa ami gsalag anya, iglong way ami fagtvngvd te, Snga setaw wa Funbalugu At fakaumsigun sa anya. ¹⁵ Ay nu nlangfe wa ginanya fag ngay menit, kamasadan wami galoun sas Erusalem. ¹⁶ Ay tibak tagadal siginans Sesar-At-Fulan nangufud emi. Ay nataban emi sas Mnasun, sa sik Taw-Sipre, at bale. Kanya at sadi ebi taguna at kinfandiug. Ay sanya yay ami sik gadugayun sirut. ¹⁷ Nu ndasug wami sas Erusalem, em ngay fadugsay sanya guseganan gfasakbo emi. ¹⁸ Ay nus balabag wan Fandak ay anggan ami, nanlag wami sas Santiagu ay sa at ngay magurang sanya. ¹⁹ Ay Fandak nu nafamatuan wa anya, kanya nafoyung wa nafadadayuan fagayu Funbalugu At ngay fagbulun sa at Yud-Naseg-Fag-Taw, gina Fandak igfoyung anya sasa ngay talun. ²⁰ Ay ka fag ngay magurang nu nadungug Fandak at longan, naseg dawdaw sas Funbalugu. Ay nalong sas Fandak te, Em fadugsay, nasaful wam te, ngayu wak libuk Taw-Naseg takafandiug ay kanya maseganama nu gfaning sa Ku-Unga At-Longan. ²¹ Ay e nafoyung anya sa am ngay fagbulun baliwa te, Fandak nafoyung sa at ngay Taw-Naseg at maful sasa ngay Yud-Naseg-Fag-Taw te, Lag gfaning Ku-Unga At-Longan. Ay lag gfaning Taw-Naseg at fagtoglagan sa at bilug. Ay lag gfaning anggan sa ebi tam ugali. ²² Ay taini katsi tam fagbulun, anway kanya fag ngay Taw-Naseg gina ro nadungug te, ndasug wan Fandak. ²³ Ay nu katanya, faningi tuwa em longan. Iste sa emi ufatk taw at nafatuyanan sas Funbalugu. ²⁴ Oi tuwa tagtaban anya. Ay o fasfuani anya, fasineuni emu. Ay oi wan tagsali ka fag ufatk taw at bedan, laman kanya nalanu at buk. Ay nu katanya am fagbulun, fagayu Taw-Naseg sumaful te, at nadungug ebi ginan sa emu baliwa di e masuad. Anway gfaning wam ay, sa Ku-Unga At-Longan. ²⁵ Ay sa baliwa at ngay Yud-Naseg-Fag-Taw takafandiug, nafauba ami sik rirukan sa anya. Laman igfasaful ami anya em fasadan te, laman dua kon at nafon sas tawtawan, ay taguk, ay at narugut. Ay anggan di kamayun. ²⁶ Balabag ban Fandak nataban ka fag ufatk taw. Ay nafasineun anya gfasfuan anya. Ay fagayu nasakbo wa sas Tagbvt-Fag-Bale-Funbalugu laman nanfoyung sa at taganyun sanya te, kaduge niya nu ntabu nu gfasineun anya, ay nu nanfon at anyun sadi sadik taw. ²⁷ Makbang wan nu galangfeun at fafituk menit, Fandak ay at ufud nu gafonun at anyun. Ay at ngay Taw-Naseg siginans talun Asia nalag Fandak gina sas Tagbvt-Fag-Bale-Funbalugu. Ay kanya igfadotamaan at ngay taw sanya ay nayugfu Fandak. ²⁸ Ay at nayugfu nauro te, Tarabangi emi, fagayu am Taw-Tagagbuan. Tuy fag taw at foyungan gfalimataan way sa emi Taw-Tagagbuan. Ay manga kalimata way sa Ku-Unga At-Longan. Ay anggan gfalimataan way stiye sas Tagvbvt-Fag-Bale-Funbalugu. Ay manga igfasakbo ya sik ngay Taw-Gresia stiye sas Tagbvt-Fag-Bale-Funbalugu, ay igfafurat way tuy fag bale at masine. ²⁹ At fagnalongun katanya anway aro nalag sik Taw-Efesu, Takata-Sik-Famataba, nu gufud Fandak sas fulan. Ay gayup te, Fandak way gtabanan anya sas Tagbvt-Fag-Bale-Funbalugu. ³⁰ Kanya fag ngay Taw-Tagagbuan igfadotamaan wayay sas fagayu taw sas fulan. Ay mafali ka fag ngay taw nu kaful ay nayugfu Fandak. Ay naguyudan anya sas day Tagbvt-Fag-Bale-Funbalugu. Ay rodi nadingding wan Funbalugu-Bale at sakbawan. ³¹ Ay gina ka fag ngay taw gafateun Fandak, e nafoyung sa tiba tungud fag fun tagbarangian te, Fagdaul Erusalem at ngay taw garingangan way dawdaw. ³² Ay rodi ka fag fun nataban at ngay tagbarangian, ay anggan at ngay tagbarangian at fun sirut. Ay mafali nu kadasug sasa ngay taw. Ay ka fag ngay taw nu nalag at tiba tungud fag fun tagbarangian, ay anggan at ngay tagbarangian, intuas wan nu gfalang sas Fandak. ³³ Ay rodi at tiba tungud fag fun tagbarangian inkakbang sas Fandak ay nated anya. Ay nasugu at tagbarangian te, laman sumiuk Fandak duwak sanbung tagradrabingan. Ay ginto yay sa at ngay taw laman sumaful te, sinu tuy fag taw. Ay nataw at asalanan. ³⁴ Ay fagayu taw at nauro, saman wan at longan. Ay at fun tagbarangian dua nasaful te, inday ro at matuyan. Anway mason nu garingangan. Ay nu katanya, at fun tagbarangian nasugu wa te, laman e nataban wa Fandak sa at ngay tagbarangian at bale. ³⁵ Ay gina ndasug sa at agdan, at ngay tagbarangian naurug ay nafaabat Fandak. Anway ka fag ngay taw mason nu kadotama anya. ³⁶ At ngay taw taguyan anya nauro te, Fatei wan. Fatei wan. ³⁷ Gina ka fag ngay tagbarangian nataban Fandak sas tagbarangian at bale, Fandak nainto sa at tiba tungud fag fun tagbarangian te, Go masine nu ge longan aw sa emu. Ay ka fag fun gfalipsikanan te, Go gsaful wo sa em fanlongan, sas Taw-Gresia at fanlongan. ³⁸ Sad aw, o wan ka fag Taw-Eiptu tagfabarangian sa tam fun ebi tv. Ay manga at nataban 4000k mauri fag taw sas talun at yud e taw. ³⁹ Ay Fandak nabalus te, Aw sik Taw-Naseg kway. Ay nu kalangfe aw sa ways fulan Tarsu sas talun Silisia, si sik fulan daul. Ay get aw sa emu te, fabayani wa angku nu ge longan aw katsi stiye fag ngay taw. ⁴⁰ At ka fag fun tagbarangian nafanusetaw wa Fandak. Ay Fandak inlindug sas tungud agdan ay nafalelegan at daluap. Ay nu ntuas wa at ngay taw nu garingangan, Fandak nae longan sa anya sas Taw-Atsi-Baliwa at fanlongan te,

¹ Ku ngay fagsud ay ku ngay magurang, dungugani nu gfoyung aw ayu ku ugali. ² Ay at ngay taw nu nadungug Fandak nu gfoyungan sas Taw-Atsi-Baliwa at fanlongan, glabi yay aro at taw nu maragangan. Ay Fandak nalong yangay fiya te, ³ Aw sik Taw-Naseg kway. Nu kalangfe aw sas fulan Tarsu sas talun Silisia. Dewa katanya, nu kadaul aw ste akway sis fulan Erusalem, kaduge aw gadal sa tam takamoyung at ngayan, Funbalugu-Nafon-At-Fanambagun. At foyungan sa angku igfadiuganan yangay sa tam aguyangan at longan at matuyan. Ay faggugat maseganama aktuwa sas Funbalugu At fagbulun fagayu. Kata yangay am nu maseganama am katsi. ⁴ Ay gfauri akwan ay manga igfate akwan sa tagfaning sa ka fag Ugali at bagu. Ay nasalod aw anya ay nataban aw anya sas fagsungsungan, dewa mangama ay dewa mangena. ⁵ Ay at Taguna-Fag-Taganyun-Daul ay anggan fagayu tam ngay magurang tagfatuyan ku longan. Madyay kanya nafon angku sik rirukan laman ku ubanan sa tam ngay kalongan sas Taw-Naseg. Ay nalo akwa sas fulan Damasku, laman nanyugfu aw ay nantaban aw masalodan kayu tagfaning sa ka fag Ugali baliwa at bagu. Laman e gfauri ban anya ste sas Erusalem. ⁶ Kaduge aw glo, gina aw gadasugun sas Damasku gina swa bilug menit, rodi tv insure wa daw sa angku sik mafali fag damlag siginans banwa. ⁷ Ay nagfu aw sas daga ay ginanya e dungganan aw nu e glong sa angku te, Sik-Naet, Sik-Naet. Taw ro ngani am fagnanfauriun Angku. ⁸ Ay dewa katanya, ginto akyay sa Anya te, Sinu O, ku Fun. Ay Kanya nabalus angku te, Aw wan Isus, sik taw siginans Nasaret, am fagfauriun. ⁹ Ay manga ku ngay ufud dewa nalag ka fag damlag, dua nasaful At e longan sa angku. ¹⁰ Ay nainto aw sa at nae longan sa angku te, Ku Fun, tain ban ku fagbulun. Ay tam Fun nabalus sa angku te, Alindugi wan. Ay loi wan sas fulan Damasku. Ay sanya e gfoyung yay ban emu at nafili fag fagbulun sa emu. ¹¹ Ay anway ku fagyudun glag, insulo aw aro at nadamlag dawdaw angku. Ay ku iba nated way angku nu gtaban angku nu kadasug aw sas Damasku. ¹² Ay sanya sik taw at ngayan Mafanyan-Funbalugu. Kanya sik maseganama nu gfaning Funbalugu At-Longan. Ay at ngay Taw-Naseg igseg anya. ¹³ Ay kanya ndasug sa angku, ay gina inkakbang sa angku, kanya nalong sa angku te, Ku fadugsay Sik-Naet. Alinggati. Ay rodi inlinggat akwa fiya, ay nalag aw anya. ¹⁴ Ay kanya nalong yangay sa angku te, Tam aguyangan at Funbalugu At nafili emu, laman sumaful ban o At fakaumsigun. Ay nalag wo Funbalugu At Masine-Fag-Taw, ay anggan nadungug o nu ge longan sa emu. ¹⁵ Anway o wa ban at nanfoyung At fagbulun sas fagayu taw. Anway o wa ban at nanfatuyan am nalag ay am ngay nadungug sa tibak taw. ¹⁶ Ay katsi lag faluguan. Alindugi wan. Ay e gfasurung emu sasad safa. Laman sik fagsafulan te, nafegus wan am asalanan, anway kafandiug tuwo sa Anya. ¹⁷ Ay nu noli kua sas Erusalem, ay gina aw gdarangin sas Tagbvt-Fag-Bale-Funbalugu, e nalag aw kata sik taginfanan. ¹⁸ Ay nalag aw Isus ay nalong sa angku te, Mafalii nu glo o ste ginans Erusalem. Anway at ngay taw iste kalimata way nu gfoyung o sa Angku baliwa. ¹⁹ Ay nabalus aw Anya te, Ku Fun, kanya wa fag ngay taw at nasaful ku ngay fagbulun ebi sa at ngay bale fakafulan. Anway nasungsung aw ay nafalang aw at ngay takafandiug sa Emu. ²⁰ Ay manga gina e nafate Am taglong, Tagsangbuan, anggan aw sanya kyangay. Ay gfadiuganan aw sanya fag fagbulun baliwa. Madyay aw wan at tagtanud at lanbung at tagfate. ²¹ Ay Isus nalong yangay sa angku te, Loi wan. Anway nansugu Akwa emu sa at Yud-Naseg-Fag-Taw at ngayayu. ²² Ay ka fag ngay Taw-Naseg gdungugan yama Fandak at longan. Ay Fandak nu nalong wa te, glo akwa sa at Yud-Naseg-Fag-Taw, rodi tv ka fag ngay Taw-Naseg nauro te, Fatei wa anya. At masine kanya lag nangus gleleg. ²³ Ay ka fag ngay taw gfatunglus yay nu guro. Ay gfalelegan at lanbung sat tungud. Ay anggan nafalayug at ngay dafug siginans daga. ²⁴ Ay at tiba tungud fag fun tagbarangian nasugu at ngay tagbarangian te, Fasakboi wa Fandak stiye sad bale. Ay falangi anya, laman ro kanya moyung antam at asalanan mandi. Madyay at ngay taw nauro way te, fatei wa Fandak. ²⁵ Ay e nasalod wa Fandak. Ay gananfusfusun wa sik lubid. Ay Fandak ginto yay sat tagbarangian at fun sirut te, Go sangay katanya wan fun Ruma at longan, dewam gfusfus sik Taw-Ruma ay dewa gyud am e nalag at asalanan. ²⁶ Ay at tagbarangian at fun sirut nu nadungug Fandak at longan, nalo sat tiba tungud fag fun tagbarangian ay naatul te, Amatangani tuwa am fagbulun. Tuy fag taw sik Taw-Ruma way. ²⁷ Ay at tiba tungud fag fun tagbarangian nangakbang sas Fandak ay nanginto te, Foyungi angku. Go o sik Taw-Ruma o. Ay Fandak nabalus te, Kin. Sik Taw-Ruma akwa fiya. ²⁸ Ay at tiba tungud fag fun tagbarangian nalong sas Fandak te, Ebi nasali aw dawdaw laman umsik Taw-Ruma aw. Ay Fandak nalong anya te, Aw sik Taw-Ruma akwa fiya, madyay ku mangaguyang sik Taw-Ruma wan. ²⁹ Ay rodi tagananfusfusun sas Fandak, inyayu wa anya. Ay anggan at tiba tungud fag fun tagbarangian malimuanan yangay. Anway nasaful te, Fandak sik Taw-Ruma way mangaro. Ay manga kanya wan aro at nasugu te, salodi Fandak. ³⁰ Nus balabag wan, at tiba tungud fag fun tagbarangian kaumsig yay fiya nangasaful te, taw madyay Taw-Naseg at fagnafantabuganun sas Fandak. Ay dewa katanya, naluas wan at fansalod Fandak. Ay nasugu yay sa at ngay taganyun daul ay anggan sas Taw-Naseg at ngay magurang, laman maful yay. Ay nataban yay Fandak sa at fagmafulan at akbang.

¹ Ay Fandak nafaulitun sa at fagmafulan fag ngay taw ay nalong te, Ku ngay kalongan. Faggugat katanya wan ku ugali anggan katsi, laman da kdi e asalanan sas Funbalugu baliwa. ² Ay at Taguna-Fag-Taganyun-Daul at ngayan Mafanyan-Funbalugu, naatul sik fanuguan at makbang sas Fandak, laman tumalaptap sas Fandak at bibig. ³ Ay Fandak nalong sa anya te, Sik tagfanluk way o. Funbalugu ban malang yay emu. Go am fagmalunggungun ste, laman nanfaning tuwo sa Ku-Unga At-Longan sa nu gsarap o ku asalanan. Ay roro kamabo way o sa Ku-Unga At-Longan, madyay nasugu way o at nantalaptap angku. ⁴ Ay tibak taw at makbang sas Fandak nalong anya te, Go sangay gfalingun yay o sas Funbalugu At Taguna-Fag-Taganyun-Daul. ⁵ Ay Fandak igbalus te, Yaya satu ro, ku ngay kalongan. Anway kua nasaful te, kanya wa mangaro Taguna-Fag-Taganyun-Daul. Anway At-Rirukan nalong te, Lag glong mauri nut sa wa ay fun baliwa. ⁶ Ay Fandak nu namatangan te, sik fulan at ngay magurang ste Taw-Saduseu, ay sik fulan Taw-Tagfalayun, gbiya nu ge longan te, Ku ngay kalongan. Anggan aw sik Taw-Tagfalayun akyangay. Ay anggan ku mama sik Taw-Tagfalayun. Ay fagnasarapun katsi ku asalanan, anway e fagsegun aw te, at kinkate gdog yay gleleg. ⁷ Ay Fandak nu nalong wa katanya, at ngay Taw-Tagfalayun ay at ngay Taw-Saduseu garingangan dawdaw. Ay at maful fag ngay taw du e fagmasadiun at amatanganan. ⁸ Anway at ngay Taw-Saduseu at foyungan anway te, at kinkate dua ban gdog gleleg. Ay manga Funbalugu du e tagbukngan. Ay anggan du e ngay taw yabi. Ay roro sat ngay Taw-Tagfalayun at foyungan antuwa te, at kinkate gdog yay ban gleleg. Ay Funbalugu e ngay tagbukngan tuwa. Ay anggan e ngay taw yabi tuwa. ⁹ Ay fagayu taw gfangasfuanan nu ge longan ayuwayu. Ay Taw-Tagfalayun at tibak tagfasaful inlindug ay matvngvd nu nafoyung te, Du ami e nalag tuy fag taw at asalanan. Du e mauri dewa sik tagbukngan ay dewa sik taw yabi at nafoyung anya. ¹⁰ Ay inkugat yay nu garingangan ay anggan nu kadotama sigon. Ay at tiba tungud fag fun tagbarangian gafanawa te, at ngay taw mafanbisbisan Fandak. Ay kanya nasugu at ngay tagbarangian te, Sanyai wan. Ay agoi Fandak siginan at ngay taw. Ay tabani wa anya sa ay bale. ¹¹ Ay ginanya fag yabi, tam Fun Isus inkakbang sas Fandak ay nalong anya te, Malimuanani. Anway nus nga setaw am foyungan sa Angku baliwa sas Erusalem, katanyai yangay ban am foyungan sas fulan Ruma. ¹² Ay nus balabag wan, tibak Taw-Naseg inke fagmasadiun ay igfatuyanan te, Dia ban tam gfangon, ay dia ban tam ginum, yap ngay ban tam nafate Fandak. ¹³ Ay at kinke fagmasadiun glabi yay 40k taw. ¹⁴ Ay kayu niya at nananlag sasa ngay taganyun daul ay sasa ngay magurang. Ay nalong anya te, Matvngvd wan aro em fatuyanan te, dia ban ami gfangon, ay dia ban ami ginum yap ngay ban ami nafate Fandak. ¹⁵ Ay nu katanya, fagayu am ay anggan tibak magurang foyungi sa tiba tungud fag fun tagbarangian te, laman kanya tumaban Fandak stiye. Kata nu gsarap am at matuyan sas Fandak baliwa. Ay roro ami kamasadan wami gananfateun Fandak bagu umdasug stiye. ¹⁶ Ay e nafoyung sas Fandak fadugsay fag mangena at baguama ka fag ngay taw at fasadan, dewa masuksukan nu gananfateun sat ayi. Ay at mangway nasakbo sas tagbarangian at bale ay nafoyung sa at ayi. ¹⁷ Ay Fandak nafat sanya at sadi at tagbarangian at fun sirut ay nasugu anya te, Tabani tuy fag baguama sa am tiba tungud fag fun tagbarangian. Anway kanya e foyungan ro sa anya. ¹⁸ Ay e nataban wa fiya anya sa at tiba tungud fag fun tagbarangian. Ay nafoyung sa at fun te, Fandak at kinsungsung at nasugu angku te, tabani tuy fag baguama sa emu, anway kanya e foyungan wa ro fiya sa emu. ¹⁹ Ay tiba tungud fag fun tagbarangian nated ka fag baguama. Ay nataban anya sat dayu laman tiba dua gdungug at longan. Ay ginto wa anya te, Nataw am fagalongunun sa angku. ²⁰ Ay ka fag baguama nabalus te, Anway at ngay Taw-Naseg nadiuganan nalong sa emu te, Balabag ban tabani wa unu Fandak sasa ngay magurang. Laman kanya nansarap unu at matuyan sas Fandak baliwa. ²¹ Ay lagi, lag o gfaning ka fag ngay Taw-Naseg at fasadan. Dewa daw glabi yay 40k taw at nadiuganan te, dia ban ami fangon, ay dia ban ami ginum, yap ngay ami nafate Fandak. Ay katsi kamasadan wa gananfateun Fandak. Ay igfanya way te, go igfaning tuwa am sa at fasadan. ²² Ay tiba tungud fag fun tagbarangian nafalo wa ka fag baguama te, Lag gfoyung nus di sadik taw am nafoyung sa angku. ²³ Ay rodi ka fag tiba tungud fag fun tagbarangian nafakbang sa anya duwak fun sirut tagbarangian. Ay nalong anya te, Katsi fafuli wa 200k tagbarangian, ay 70k tagsakay sis kabayu, ay 200 at ke bangko. Ay katsi ro fag yabi gina intigas fafun glo wam sas Sesar-At-Fulan. ²⁴ Anway ro te, buli tibak kabayu laman Fandak ro at sakayan. Ay nu gtaban am anya, matagakani laman di e mauri umdasug sa anya kaduge glo sas fun Sik-Taw-Guseganan. ²⁵ Ay ka fag tiba tungud fag fun tagbarangian nariruk te, ²⁶ Tagriruk aw, Klaudiu Lisias. Ku fagrirukan sa emu, o at ke gseg emu, fun Sik-Taw-Guseganan. Nafadasug aw sa emu ku fagusegananun. ²⁷ Tuy fag taw ku nafataban sa emu katsi, at Taw-Wa-Naseg at nayugfu ay at fagafateun. Ay ginanya indasug aw sanya faudgufudan ku ngay tagbarangian, ay nafalfas aw anya. Anway e nafoyung wayay sa angku te, kanya sik Taw-Ruma way. ²⁸ Ay ginanya kaumsig aw giasafulun te, taw ro Taw-Naseg at fagnalongun sa anya. Ay nu katanya, nafataban aw anya sas Taw-Naseg at ngay magurang at fagmafulun. ²⁹ Ay roro nasaful akwan Taw-Naseg at fagnalongun sas Fandak baliwa, anway kanya dua gfaning sas Taw-Naseg At-Longan baliwa. Ay nu katvngvd way anya, lag gsak nanfate ay nansungsung anya. ³⁰ Ay e nabarita wa sa angku te, sik ngay taw e fagmasadiun wa gananfateun Fandak. Ay nu katanya, rodi nanfataban akwa anya sa emu. Ay nansugu akwa sa emu at ngay nafantabugan. Laman ro kanya moyung sa emu at nafantabugan sas Fandak baliwa. Kayu way niya ku longan. ³¹ Ay at ngay tagbarangian nafaning at tiba tungud fag fun at longan. Ay nataban Fandak gina sad yabi ay ndasug sas fulan Tagtubus-At-Tama. ³² Ay balabag di ka fag ngay tagbarangian noli wa sat tagbarangian bale sas Erusalem. Ay kayu way tagsakay sis kabayu tagufud Fandak gina yangay glo. ³³ Ay kanya nu ndasug wa sas Sesar-at-Fulan, kanya nafon tiba tungud fag fun tagbarangian at rirukan sas fun Sik-Taw-Guseganan. Ay manga nataban Fandak sa ka fag fun at akbang. ³⁴ Ay ka fag fun nu natap wa at ba rirukan, ginto sas Fandak te, Dada am talun turungan. Ay nu nasaful te, Fandak tagsiginans talun Silisia, ³⁵ Kanya nalong yangay te, Giadungugun aw am longan kaduge ban at ngay tagfantabugan sa emu umdasug. Ay ka fag fun nasugu at tagbarangian, laman e gtanud Fandak sa Sik-Madaragang-At-Baguama-Daul ebi gina gleleg at bale daul.

¹ Nu nlangfe wa limak menit, at Taguna-Fag-Taganyun-Daul at ngayan Mafanyan-Funbalugu, ay at ufud at ngay Taw-Naseg at magurang tiba, ay anggan at taglong at ngayan Fatulu-Sirut indasug yangay sanya sas Sesar-At-Fulan. Ay kanya nafoyung sas fun Sik-Taw-Guseganan at nafantabugan sas Fandak baliwa. ² Ay ka fag fun nu nafakbang wa Fandak sa anya, Fatulu-Sirut igfasigad wa igfoyung sa ka fag fun te, O em fun Sik-Taw-Guseganan, e gseg tuwa emu. Mabayan tuwa tam talun anway am fagbulun at masine. Ay o wan at nafasine em talun. ³ Ay nu katanya, nus nga setaw am fagbulun ay nus nga nday am fagbulun, masine tuwa em nabul, ay e gseg tuwa emu. ⁴ Ay kua kaumsig gfaaba ku longan laman du am kanbang. Ku fakaumsigun antuwa te, laman dumungug tuwo em longan dewa yud ngayu. ⁵ Anway te, ebi nu glag ami tuy fag taw, sik tagfangalimata way. Anway kanya gfadotamaan way sat ngay Taw-Naseg sas fagdaul daga. Ay laman kanya at fun wa sa at ngay taw em nangayan te, Sik-Ngay-Taw-Nasaret. ⁶ Ay kanya sik tagafafuratun way sas Tagbvt-Fag-Bale-Funbalugu baliwa. Ay em fagnayugfuun wa ngani anya. ⁸ Ay gina ro o minto sa anya, sumaful yangay o te, matuyan fagayu em longan sa anya. ⁹ Ay at ngay Taw-Naseg sanya nafadiuganan sas Fatulu-Sirut at longan te, Matuyan wa fiya fagayu at longan. ¹⁰ Ay fun Sik-Taw-Guseganan nafalelegan at daluap sas Fandak. Ay Fandak nalong anya te, Nasaful kua te, ngayu wak banwa nu gsarap o at matuyan sa tam talun. Ay nu katanya, kaumsig aw nanfoyung sa emu ku fagbulun fiya fiya at masuad. ¹¹ Ay gina ro o minto sa tiba taw, sumaful o te, dia glabi 12k menit ebi nu madasugan aw sas Erusalem, laman nanseg aw tam Funbalugu sanya. ¹² Ay at ngay Taw-Naseg nu nalag angku, aw da kdi gfaringangan, ay manga da kdi gfadotamaan sat ngay taw. Dewa sas Tagbvt-Fag-Bale-Funbalugu, ay dewa sas Taw-Naseg at bale fakafulan, ay anggan dewa sas fulan. ¹³ Ay kanya dua mafafatuyan at longan sa angku baliwa katsi. ¹⁴ Ay roro matuyan tuwa ka fag ngay taw at longan at nalong te, nafaning aw ka fag Ugali at bagu. Dewa kanya gamatangan te, ka fag Ugali at bagu dua long matuyan. Igseg aktuwa sa tam aguyangan at Funbalugu. Anway kafandiug aktuwa sa At-Longan fagayu. Dewa sa Ku-Unga At-Longan, ay dewa siginans Funbalugu At ngay taglong At-Rirukan. ¹⁵ Anway e fagsegun aktuwa siginan tam Funbalugu, kata yangay ka fag ngay taw at fagsegun. Anway at kinkate gdog yay ban gleleg, dewa at masine fag taw ay dewa at mauri fag taw. ¹⁶ Ay nu katanya, faggugat matagakan aktuwa nu gfagbulun aw, laman da kdi e asalanan sas Funbalugu ay anggan sas taw. ¹⁷ Glugo wan nu gyud aw stiye fag talun. Ay katsi ku fagindasugun stiye laman nanguba aw sik ngay famanyun sa ku ngay kalongan at yud e kwa, ay anggan ku nafon fag anyun sas Funbalugu. ¹⁸ Ay ginanya, tibak taw nalag angku gina aw sas Tagbvt-Fag-Bale-Funbalugu gina aw igfasineun angku. Ay di e garingangan ayuwayu makbang sa angku. Ay manga di ngayu at taw sanya. Ay tibak Taw-Naseg tagsanya siginans talun Asia. ¹⁹ At masine kanya fag ngay Taw-Asia stiyei yap. Laman e gfoyung tuwa emu nu e nalimatan way sa ku fagbulun. ²⁰ Ay kanya nu dway ste, at masine at bagui wa kadasug fag ngay taw at tagfoyung, nu e nalag way ku fagbulun at mauri, kaduge aw sasa ngay magurang fagmafulan. ²¹ Ay kin e nalag wa ku fagbulun gina aw guro te, Ay fagnasarapun katsi ku asalanan anway e fagsegun aw te, at kinkate gdog yay gleleg. ²² Ay fun Sik-Taw-Guseganan nasaful wa fiya ka fag Ugali at bagu. Ay kanya igfafanya yay at ngay taw te, kaduge yay ban at tiba tungud fag fun tagbarangian, Lisias, umdasug, nu gfili aw te, inday at matuyan fag longan. ²³ Ay kanya nalong sat fun sirut fag tagbarangian te, Tanudi yap Fandak ay fabayani yap anya. Ay lag gsalag at ngay fagues nu kaumsig gfatvngvdun anya. ²⁴ Ay gina nlangfe ngayuk menit, fun Sik-Taw-Guseganan gdog yay ndasug sanya ay nataban at mangena, Drusila, sik Taw-Naseg. Ay ka fag fun nanfakbang Fandak sa anya. Ay gdungugan yay Fandak nu ge longan. Ay at foyungan sa baliwa nu kafandiug sas Isus Fagtayukan. ²⁵ Ay gina ka fag fun igdungugan sas Fandak at longan sa baliwa at matuyan, ay anggan sas fagbarisun, ay manga sas Funbalugu nu gfauri ban tagasalanan baliwa. Ay rodi Fun Sik-Taw-Guseganan kalimu dawdaw ay nalong sas Fandak te, Balikam yap am longan. Loi wan katsi. Ay nu masine yay ban sa tibak menit, gdog akyay igewan emu stiye. ²⁶ Ay fun Sik-Taw-Guseganan kaumsig Fandak nu nafon anya sik ngay salafi laman igfalfas wa Fandak. Ay nu katanya, ngayu ginan ka fag fun nu gfakbang Fandak sa anya, ay gfasulitanan anya. ²⁷ Ay nu nalangfe wa duwak banwa, e natubus wa fun Sik-Taw-Guseganan. Ay at fantubus Pursius Taguseganan. Ay ginanya, fun Sik-Taw-Guseganan at fagnaubunun Fandak sas bale fagsungsungan laman gfalukmianan sat ngay Taw-Naseg.

¹ Fun Pursius Taguseganan indasug sa at famagurangan fag talun. Ay nu nlangfe wa tuluk menit, kanya nalo yay sas fulan Erusalem siginans Sesar-At-Fulan. ² Ay at ngay taganyun daul ay anggan Taw-Naseg at ngay magurang sanya igfoyung wa sa at fun at ngay fakalimataun sas Fandak baliwa. Ay matvngvd nu glong sat fun te, ³ Guseganan ami emu nu nafastiye tuwo sas Erusalem Fandak siginans Sesar-At-Fulan. Ay roro ngap ka fag ngay Taw-Naseg at fasadan fiya fiya, nansuksuan way sas day dalan, laman nanfate Fandak gina ro dumalan sanya. ⁴ Ay fun Taguseganan nafoyung sasa ngay Taw-Naseg te, Katsi Fandak masungsungan way sas Sesar-At-Fulan. Ay aw gananlagun akyay sanya. ⁵ Ay kaumsig aw siginan ayu at madaragang fag taw nu nagufud angku. Ay laman Fandak nu e asalanan way, laman kanya tagfoyung sa at ngay magurang at maful sanya. ⁶ Ay fun Taguseganan sanya yay sas Erusalem walu ay ate safuluk menit. Ay bandi nalo wa sas Sasar-At-Fulan. Ay balabag di kanya inful sa at ngay magurang. Ay nafat sanya Fandak. ⁷ Ay Fandak nu ndasug sat fagmafulan, at ngay Taw-Naseg siginans Erusalem insafung sa anya. Ay ngayu at foyungan at fakalimataun sas Fandak baliwa. Ay dewa katanya, du e mafafatuyan. ⁸ Ay Fandak nabalus anya te, Aw, ku e asalanan, dewa sas Taw-Naseg at ugali baliwa. Ay dewa sas Tagbvt-Fag-Bale-Funbalugu sas Erusalem baliwa. Ay anggan dewa sas Sesar at longan. Da kdi e asalanan nus di sirut. ⁹ Dewa Fandak nalong katanya, fun Taguseganan kaumsig nanfauseganan sasa ngay Taw-Naseg. Ay nainto sas Fandak te, Go kaumsig ban o iglo sas Erusalem, laman sanya yangay nu gsarap aw gina tibak taw igfoyung am asalanan. ¹⁰ Ay Fandak nabalus te, Katsi iste kua sas fun Sesar at fun sirut at akbang. Anway ste tuwa at matuyan. Anway ku e asalanan sasa ngay Taw-Naseg. Ay nasaful wo katanya. ¹¹ Ay nu sik tagasalanan akwa fiya. Ay ku fagbulun nu sak wa mafafate angku, kin, da kua gsalag nu gfate o angku. Ay roro ngap, at ngay taw at longan nu dway e masuad, dua masine nu e nataban angku sas Taw-Naseg. Ay katsi nanget akyangay sas fun daul Sesar at nanfatuyan sa angku baliwa. ¹² Ay fun Taguseganan nu nafasulitanan wa sa at ngay magurang, nalong sas Fandak te, Ay kin am fakaumsigun nu antuwa sas fun daul Sesar, nanfalo akwa emu sanya. ¹³ Nu nalangfe tibak menit, indasug fun Agripa ay anggan at fadugsay Sik-Mangena-Tagbabo, sas Sesar-At-Fulan. Laman At fagindasugun laman nanfasegsegan sas fun Taguseganan anway kanya bagu yay sik fun sanya fag talun. ¹⁴ Ay nut sanya ngayu tuwak menit, fun Taguseganan nafoyung sas fun Agripa sas Fandak baliwa te, Fun Sik-Taw-Guseganan naubun sik taw ste sas bale fagsungsungan. ¹⁵ Ay gina aw sas Erusalem, at ngay taganyun daul ay Taw-Naseg at ngay magurang sanya nafoyung angku sa ka fag taw baliwa. Ay ka fag ngay taw kaumsig nu gfauri aw anya. ¹⁶ Ay nafoyung aw anya te, bunwa Taw-Ruma at ke ugali nu nataban sik taw sat tagfauri anya, yap ngay taguna nafoyung at asalanan, ay laman at fagfoyungan e famalus. ¹⁷ Ay ka fag ngay Taw-Naseg gina indasug siginans Erusalem, inful stiye. Ay sat fadogan fag menit inful akyangay sa anya ay nafat sanya aw sat fagmafulan ka fag masungsungan. ¹⁸ Ay at ngay tagfoyung sa ka fag taw at asalanan, du e foyungan kata si angku ku amatanganan. Madyay dua nafoyung anya at fagbulun fiya fiya at mauri. ¹⁹ At foyungan anway sik famaringangan sa at fakafandiugun baliwa, ay sa sik taw Isus At kinkate. Anway Fandak yay at nafatuyan te, katsi gdog yay gleleg. ²⁰ Ay yaya aw kua nasaful te, tain ku fagbulun nu katanya at longan. Nu katanya, ginto aw sas Fandak te, Go kaumsig o nu nanfataban aw emu sas Erusalem, laman sanya yay nu nansarap te, go matuyan. ²¹ Ay Fandak unu at fakaumsigun nu stei yap sas sungsungan, yap ngay fun daul Sesar at nafili at matuyan sa anya baliwa. Ay anway katanya ku fagnansungsungun yangay anya, kaduge aw yud nafalo anya sas fun Sesar. ²² Ay fun Agripa nalong sas fun Taguseganan te, Aw sigon, kaumsig akyangay nadungug ka fag taw. Ay fun Taguseganan at famalus te, Balabag ban dumungug wo. ²³ Ay balabag di, fun Agripa ay at fadugsay, Sik-Mangena-Tagbabo at fagbulun gina kadasug, mafadaragangun. Laman fagayu taw igseg dawdaw anya. Ay at ufud sik ngay fun tagbarangian, ay manga sik ngay taw madaragang sanya ginan fag fulan. Ay kanya nasakbo sa at fakafulan fag salug. Ay fun Taguseganan nananfat sanya Fandak. ²⁴ Ay fun Taguseganan nalong te, Fun Agripa, ay anggan fagayu taw tagste si emi. Nalag wam katsi kanya fag taw at ngay Taw-Naseg dewa tagste, ay dewa sas Erusalem, get sa angku te, dua nangus masine kanya nu gleleg. ²⁵ Ay roro aw ku e nalag at fagbulun at mauri laman sak tam nanfate anya. Ay si anya at fasadan, fun daul Sesar ituwa tagfatuyan sa anya baliwa. Ay anway katanya, nansugu akwa anya sas fun Sesar. ²⁶ Ay yaya, ku e foyungan, ay da ku e fagnanrirukun sas fun Sesar tuy fag taw at fagbulun at mauri. Aro taw ku fagnafasureun anya sa ayu, laman nanfili aw te, nu ndain o ya, fun Agripa, at ke nalag at asalanan. Ay satu ro ku fagnanrirukun sas fun Sesar. ²⁷ Anway gamatangan aw te, dua masine nu nafalo aw sik kinsungsung sas fun Sesar, ay nu da kway e nafauba sik rirukan ka fag taw at asalanan.

¹ Fun Taguseganan nalong sas Fandak te, Nanfanusetaw akwa emu katsi, laman gfoyung o am fagbulun. ² Ay Fandak nafalelegan at daluap ay nalong te, Guseganan aw igfoyung emu sa am akbang, fun Agripa, sa ku ngay fagbulun at matuyan fagayu. Anway at ngay Taw-Naseg nafantabugan sa angku. ³ Anway o wan at nasaful fiya fiya Taw-Naseg at ugali ay manga at fagaringanganun. Ay nu katanya, get aw sa emu te, dungugani yap sa ku longan. ⁴ Ay aw indaul akwa sa ku ngay kalongan fag ngay Taw-Naseg sas fulan Erusalem. Ay at ngay Taw-Naseg sanya nasaful wan ku ugali siginan ngay aw alay. ⁵ Ay kanya dan wa nasaful ku ugali, ay nu nafoyung di ro, mafafoyung wa ro te, aw sik tagfaning aktuwa sa em ugali at ngay matvngvd fagayu, anway sik Taw-Tagfalayun akwan. ⁶ Ay katsi dewa aw iste sis fagsarapan asalanan, anway e fagsegun akwa siginan tam Funbalugu At fatuyanan sa em aguyangan. ⁷ Ay katsi ami fag 12k afud Taw-Naseg e fagsegun wami te, umsure wa fiya ka fag fatuyanan. Ay nu katanya, fagayu menit ay fagayu yabi matvngvd tuwa nu gseg ami em Funbalugu. Ay ku fun Agripa, asafuli te, at ngay Taw-Naseg at fagnafantabuganun sa angku antuwa sa ka fag fagsegun baliwa. ⁸ Ay taw way sangay fagayu am ay fagyudun gafanud te, Funbalugu mafafaleg yay at kinkate. ⁹ Ebi anggan aw gamatangan akyangay katanya te, sumalag siring aw Isus, sik Taw-Nasaret, At fagmadaragangun. ¹⁰ Ay katanya wa fiya ku fagbulun ebi sas Erusalem. Nasungsung aw Isus At ngay taw, anway e fagmadaragangun aw siginan at ngay taganyun daul. Ay nu e gfate wa Isus At ngay taw, anggan aw igfadiuganan akyangay sa ka fag fagbulun baliwa. ¹¹ Ay ngayu ginan nu gfauri aw anya sas fagayu Taw-Naseg at bale fakafulan. Ay gfaunatan aw anya laman kanya lumong at mauri sas Funbalugu baliwa, ay roro kanya di gaguyudan. Ay inkugat yay nu kadotama aw sa anya. Ay gfauri aw anya dewa sa ku ngay baklayan fag ngay talun. ¹² Ay at sadi ku fagloan sas fulan Damasku. Ay sanya baliwa ku fasadan. Ay ku fagmadaragangun siginan at ngay taganyun daul anway kanya at nasugu angku. ¹³ Ay o ku fun Agripa, dungugani sa ku longan. Gina swa bilug menit, gina aw glo sasa ngaba dalan, nalag aw sik damlag mafali siginans banwa, glabi yay tam menit nu masulo. Ay nadamlag sa angku ay anggan sa ku ngay ufud gina ami glo. ¹⁴ Ay fagayu mi, nagfu wami sas daga. Ay nadungug aw sik longan sa angku sas Taw-Atsi-Baliwa at fanlongan te, Sik-Naet. Sik-Naet. Taw ro ngani am fagnanfauriun Angku. O wa mandi tagfauri sa emu, kata sik baka nu naturang tagbilug gina gfusfus anya. ¹⁵ Ay nainto aw te, Sinu O, ku Fun. Ay tam Fun nabalus angku te, Aw wan Isus, am fagfauriun. ¹⁶ Alindugi wan. Ku faginsureun sa emu aro anway nafili Akwa emu. Laman nanfaning ban o Angku. Ay laman nanfatuyan ban o sasa ngay taw am nalag katsi, ay anggan am nalag ban gina Akyangay umsure sa emu. ¹⁷ Ay igdingding Aktuwa ban emu siginan am ngay kalongan at fagmadaragangun. Ay anggan siginan at Yud-Naseg-Fag-Taw at fagmadaragangun. Anway sumugu ban Aw emu sa anya. ¹⁸ Laman at faglinggatun ban sa tuwa at masine baliwa. Ay mubun tuwa at marum ay suma tuwa sad mayamag. Ay mubun yangay siginans Tagfangabaya at fagmadaragangun, ay maning tuwa sas Funbalugu. Ay Funbalugu nafaliam ban at ngay asalanan. Ay laman kanya Funbalugu tuwa ban At ngay taw, anway kafandiug tuwa sa Angku. ¹⁹ Ay nu katanya, fun Agripa, aw da kdi kamabo ku nadungug siginans Banwa. ²⁰ Ay ku fagfoyungan taguna sasa ngay taw sas fulan Damasku. Ay at fadogan sasa ngay taw sas Erusalem. Ay anggan sas fagdaul talun Naseg at ngay taw. Ay anggan sa at ngay Yud-Naseg-Fag-Taw. Laman kanya mubun at ngay asalanan ay igfaning tuwa sas Funbalugu. Ay laman ban masine tuwa at fagbulun nu naubun tuwa at asalanan. ²¹ Ay nu katanya, at ngay Taw-Naseg nayugfu angku sas Tagbvt-Fag-Bale-Funbalugu ay gananfateun way angku. ²² Ay dewa katanya, Funbalugu nadingding tuwa angku anggan katsi. Ay katanya ku fagsteun katsi laman nanfoyung aw fagduwa, sa at yud madaragang ay sa at madaragang fag ngay taw. Ay ku longan siginan tuwas Funbalugu ebi At ngay taglong at naguna nafoyung, ay manga siginan tuwa Ku-Unga at naguna nafoyung. ²³ Kanya at naguna nafoyung te, E faurianan ban dawdaw sas Fagtayukan. Ay Kanya yay At naguna at nadog gleleg siginan At fagmatianan. Ay nu katanya, Kanya yay At nafoyung sik fagmayamagun sa tam ngay taw ay anggan sa at Yud-Naseg-Fag-Taw. ²⁴ Ay gina Fandak nafoyung, fun Taguseganan gbiya nu ge longan te, Fandak, du o e amatanganan. Anway ngayu wan am fagsafulun, ay kaliam wo am amatanganan at tiba. ²⁵ Ay Fandak nabalus anya te, Igdi, ku fakesugun fun Taguseganan. Di naliam ku amatanganan. Ku foyungan matuyan tuwa. ²⁶ Ay da kdi kapla nu gfoyung aw emu, anway nasaful wo sa ku foyungan baliwa. Ay nasaful kwa te, ka fag fagbulun dua mafalyu sa emu. Anway bunwa kata sik masuksukan sasad suluk. ²⁷ Fun Agripa, go gafanud tuwo sas Funbalugu At ngay taglong at foyungan. Ay kin, nasaful kua te, gafanud tuwo. ²⁸ Ay fun Agripa nainto sas Fandak te, Nu sik gadugayun ya sirut, go gayup o te, kafandiug akwa sa am longan laman Fagtayukan akwa At taw. ²⁹ Ay Fandak nabalus anya te, Dewa glugo ay dewa yud glugo, ku fagetun sas Funbalugu te, bundi o fagsadi, anggan tuwa fagayu at nadungug angku katsi, nu kumata nangus angku nu kafandiug. Ay lagi nangus at fansalod. ³⁰ Ay rodi fun Agripa inlindug, ay at fun sirut Taguseganan, ay Bernise, ay anggan at ngay ufud aro sa at faglunggungan sanya. ³¹ Ay nalo yay sirut sat dayu, ay nalodlongan te, Tuy fag taw du e asalanan laman sak tam nanfate, ay ate sumungsung anya. ³² Ay fun Agripa nalong sas fun Taguseganan te, Satu ro e mafafalfas way anya, nu dia man ro nanget sas fun daul Sesar at nanfatuyan sa anya.

¹ Ay bandi e kamasadan wa nafalo emi sas talun Italia. Ay e nafatanud yay sas Fandak ay anggan sas tibak masungsungan sa sik fun tagbarangian at ngayan Uliyu. Uliyu ay anggan at ngay tagbarangian, Taw-Ruma at fun daul at ngay tagbarangian. ² Ay nasakay wami sa sik balutu siginans fulan Adramitiyu. Anway ka fag balutu nandalan tuwa sasa ngay fulan sas tigyangan lino daul sas talun Asia. Ay sanya ginan nalo yangay ami fiya. Ay em ufud at sadi at ngayan Tiba-Tungud-Nu-Gmagurang, sik Taw-Masedunia siginans fulan Tesalunika. ³ Ay balabag di, nadalan ami sas fulan Faggamatan-Uyang. Ay sanya Uliyu kafanyu tuwa sas Fandak. Ay kanya di gsalag anya gina nansibo sa at ngay fagues sat fulan, laman e nafon anya at ngay fagayudanun. ⁴ Ay nu nalo wami sanya ginan, em balutu naalafang wa sas day furu Sipre. Ay ka fag furu tagdingding emi siginan tagmara baliwa, tagasanganun tam balutu. ⁵ Ay nu gdife wami sas lino daul, nadalan ami sas day talun Silisia ay talun Fanfilia. Ay ndasug wami sas fulan Mira sas talun Lisia. ⁶ Ay sanya at fun tagbarangian nasarap sik balutu taglo ro sas talun Italia. Ay at nalag sadik balutu ebi tagsiginans Tagdingding-Taw-At-Fulan. Ay sanya nu nafasakay emi. ⁷ Ay maran way ka fag balutu nu galafang ngayu wak menit. Ay glugo wan nu nangadasug ami sas fulan Gnidu. Teway at tagmara igsangan wayay em balutu. Ay nasaruyan wami sas day furu Kreta tagdingding emi. Ay nalangfe wami at butudan muyud Salmun. ⁸ Ay glugo em balutu nu galafang sanya makbang sas tigyangan lino daul. Ay bandi indasug wami sa sik suluk lino at ngayan te, Masine-Fag-Madingdingan. Sanya makbang sas fulan Lasea. ⁹ Ay anway inlangfe wan at masine fag ngay menit, ay nu glo ban ami, gina way at mafurat fag ngay menit. Anway inlangfe wan ka fag fagamatanganun fag menit nu gyud gfangon, ay at fadogan ban fag ngay menit mafurat yangay. Ay nu katanya, Fandak nafatagak sasa ngay taw. ¹⁰ Ay nalong anya te, Mangamam, nu gfasad aw, nu tumunglus way tam, ngayu ban at kumrasras ay at kumfangulan. Ay bunwa tam fangubaun ay tam balutu fagtvngvd, manga wa itam tagbilug. ¹¹ Ay roro at fun tagbarangian at fagdunguganun sa way at fun tagfaalafang at balutu ay manga sa way at tagbilug at balutu. Ay yaya sas Fandak. ¹² Ay roro sanya dua masine fakatungkudan balutu anway ginanya fag lungud banwa mafurat way at ngay menit. Ay nu katanya way, at ngay taw kaumsig wa iglo. Anway at fasadan te, umdasug wa nangus sas fulan Ke-Tagayun sis furu Kreta. Ay sanya yay, ginanya fag lungud banwa kaduge mafurat. Anway sanya sik masine yangay fakatungkudan balutu dewa e bagyu. Anway iglangfe tuway sat dayu. ¹³ Sik malukme fag tagmara nauyup ay at ngay taw sis balutu gamatangan te, masine tuwa ro nu glo tam. Ay rodi naguyud at famatawad at balutu. Ay nu gfaalafang makbang way sasa ngaba tigyangan lino sas furu Kreta. ¹⁴ Ay rodi tv indasug sik magong fag bagyu siginan sa ngaba daga. Ay at ngayan Bagyu-Tagsiginans-Balitangan. ¹⁵ Ay ka fag bagyu natulud em balutu sasad wa bilug lino daul. Ay at ngay tagfaleleg balutu nanfabulun yama sat fasadan. Yaya, dua mafafat sanya. Ay em balutu kaalo way nus nga nday at lumbak. ¹⁶ Ay bandi indasug wami sa sik day furu sirut Kauda ay sanya igdingding yay sirut emi. Ay rodi matvngvd nu gurug ami em balutu sirut siginan sad lino. ¹⁷ Ay nanfasakbo ami sa em basad balutu daul. Ay at ngay tagfaleleg balutu nafutus sik lubid daul sa em balutu daul, laman di mrasras. Ay kanya gafanawa te, mandasug sa sik takalubuk fag lagnas at ngayan te, Takalubgub. Ay nu katanya, at ngay tagfaleleg balutu nabul wa at sinyag daul siginans turuk. Ay at bagyu nafalo yay em balutu. ¹⁸ Ay balabag di, at bagyu mason yangay nu gfaintubian em balutu. Ay nu katanya at ngay tagfaleleg balutu gfasigad wa kukas at ngay fangubaun sasad lino. ¹⁹ Ay sit dayu fag menit, naukas yangay fiya at balutu at balyu, tenday at sinyag ay at lubid. ²⁰ Ay siginan ngay ebia taw glugo wan nu gyud ami glag at menit ay anggan at galeme, anway gbagyu wayay gugat. Ay at ngay taw du e fagsegun nu mlangfe. ²¹ Ay glugo wan fagayu taw nu gyud gfangon. Ay Fandak inlindug ay nalong anya te, Mangamam, satu ro ngani ebi nu nafaning di am ku longan te, agi yap tam glo siginans furu Kreta. Satu ro dim rasras ay di am e naulanan. ²² Ay katsi glong aw ayu te, fatvngvdi way ngap ay amatanganan. Anway di ban am umkate. Tam balutu yamay ban fagtvngvd at kumrasras. ²³ Anway aro sad yabi Funbalugu At tagbukngan at sadi inlindug wa si ku akbang. Funbalugu ku fagsegan ay ku fagfaningan. ²⁴ Ay At tagbukngan nalong sa angku te, Lag kalimu, Fandak. Anway at matuyan umlindug wa ban o fiya sas Sesar at akbang. Ay Funbalugu waro At mamanyun sa emu te, laman fagayu am ngay ufud ste sas balutu gleleg tuwa. ²⁵ Ay Fandak nafatunglus yay nu glong sat ngay ufud te, Nu katanya, fatvngvdi ay amatanganan. Anway gafanud akwa sas Funbalugu te, umgurungan wa fiya fagayu At longan sa angku. ²⁶ Ay umdasug ban tam sa sik furu. ²⁷ Ay nu nlangfe wa 14k yabi, em balutu gurayo way fagtvngvd yud e sinyag sasa ngaba lino Adriatiku. Ay gina swa bilug yabi, at ngay tagfaleleg balutu nu gfasad, gakakbangun wa sas tigyangan lino. ²⁸ Ay kanya nafaskud te, go siabasad at lino. Ay roro at kabasadan 20 yak dufa. Ay nafanya yay sik gadugayun, ay rodi at kabasadan 15 wayk dufa. ²⁹ Fakatanyaun gafanawa te, mandasug sa sik batu daul. Ay kanya nafatong wa ufat famatawad balutu si at iyug. Ay kanya igdarangin te, mafalii wa nangus nu kamenit. ³⁰ Ay ginanya at ngay tagfaleleg balutu kaumsig wa nangalfas siginan at balutu. Ay kanya gfadaga wa at balutu sirut sasad lino. Ay nafanluk sa tiba te, E famatawad wami sas balutu daul at dungus. ³¹ Ay Fandak nalong sat fun tagbarangian ay anggan sat ngay tagbarangian te, Kanya fag ngay taw nu dway ro ste fag balutu, du waro tam e mlangfe. ³² Ay rodi at ngay tagbarangian nalifung wa at balutu sirut at lubid, laman murayo wa umyayu yud e taw. ³³ Ay nu gakamenitun wan, matvngvd Fandak nu glong sas fagayu taw te, Oni yap. Anway katsi 14 wak menit nu mafanawan am yud gfangon. ³⁴ Katanya katsi fagmatvngvdun nu glong aw sa ayu te, Fangoni yap. Laman mabitsug tuwa ay bilug laman di am umkate. Madyay di e ngulad nus di sadi ay buk. ³⁵ Ay Fandak nu nalong wa katanya, nabul yay sik fafa ay nauseganan sas Funbalugu si at ngay taw akbang. Ay kanya nafanramyukan ay gfasigad wa kon. ³⁶ Ay nu katanya, intvngvd yangay at ngay taw at amatanganan. Ay anggan kanya kon yangay. ³⁷ Ay em kayu wan sis balutu, 276k taw. ³⁸ Ay at ngay taw nu napsug wan, naukas wa at ngay ba fangawat tinafay sasad lino laman at balutu umkagan. ³⁹ Ay gina inmenit, at ngay tagfaleleg balutu dua natoglag sanya at fagakakbangun fag buknga. Dewa katanya, kanya nabantay sik tigyangan masine at lagnas sanya fag suluk lino. Ay kaumsig gananfatungkudun sanya at balutu. ⁴⁰ Ay kanya naluas wa at ngay famatawad balutu at lubid ay nafamato wa sasad lino. Ay naluas at lubid siginan at famaturunanan at balutu. Ay narafad at sinyag sat balutu at dungus laman at tagmara igfaalafang wan. Laman umdasug ro sas tigyangan. ⁴¹ Ay roro at balutu nadalan wayay sa sik buknga lumbak. Ay at dungus intungkud sa sik lagnas sasad lino ngabasad. Ay at lumbak igfalelegan way at iyug ay karasras wan. ⁴² Ay sanya sad balutu at ngay tagbarangian gananfateun at kinsungsung, laman dua nanfiyo sas tigyangan lino ay malfas. ⁴³ Ay at fun tagbarangian di kaumsig nu e gfate Fandak. Ay nu katanya, igsalag yay at ngay tagbarangian at fasadan. Ay kanya nasugu sa tagsaful gfiyo laman nangguna tiba nu nangadaga sasad lino laman nangadasug sas tigyangan. ⁴⁴ Ay at sawad tagsis balutu nabul yay at balutu nakarasrasan laman rodi di mlubgub gina ro sas tigyangan. Ay dewa katanya, fagayu taw nalfas wa siginans balutu ay indasug wa sas tigyangan.

¹ Nu nalfas wami siginans balutu, sanya e nafoyung emi te, tuy fag furu at ngayan Malta. ² Ay at ngay taw tagbanwan sanya kafanyu dawdaw emi. Ay nafaigang sik afuy ay nalong emi te, Stei wan fagayu am. Anway ginanya bagu gfasigad gmoyan ay marios. ³ Ay Fandak nafaful sik ngay sarab kayu at famadaul at afuy. Ay rodi insure sik tagfate taw fag ubianun siginan sad famaigang anway insugba. Ay kanya naagat sas Fandak at daluap. ⁴ Ay sanya fag talun at ngay taw nu nalag sik ubianun nu kabaringbing sis Fandak daluap, nalodlongan te, Nu ndain tuy fag taw sik tagfate way taw. Ay dewa ngap nalfas siginans lino daul, at matuyan dewa long nkate. ⁵ Ay Fandak nafarikfik wa ka fag ubianun sasad afuy, ay kata tuwa aro taw. ⁶ Ay at ngay taw sanya igfanya te, go ro ka fag taw at daluap umbaga wan, ay umkate waro. Ay dewa glugo, igdi, di e bali. Ay nu katanya, at ngay taw nafasaman at amatanganan, ay nalong te, Kanya sik taw yabi way mangaro. ⁷ Ay sanya fag talun makbang sa sik taw at ngayan Fubliu at daga. Ay Fubliu at tiba tungud fag fun sanya fag furu. Ay kanya nafasakbo emi ay nafatvngvdun emi kanya fag tuluk menit. ⁸ Ay ginanya Fubliu at tama gadailan, masugba ay karatas. Ay Fandak nanlag anya, ay igdarangin sa anya. Ay gina nated at daluap, nfiya wan. ⁹ Ay nu katanya, fagayu taw at ke dailan sanya fag furu inful sanya ay infiya wan. ¹⁰ Ay at ngay taw sanya ngayu tuwa at nafon emi. Ay bandi ban gina yangay ami nansakay sa sik balutu, kanya nanfasakay wa at ngay famanyun sa emi em ngay fagayudanun. ¹¹ Nu nlangfe wa tuluk magdanun, nasakay yangay ami sa sik balutu, ebia taw at nasuksuk sanya fag furu gina e mafurat fag lungud. Kanya fag balutu siginans Tagdingding-Taw-At-Fulan. Ay ka fag balutu at ngayan ay anggan at tawtawan sas faglagan te, Duwak-Nasfuan-Fag-Taw-Yabi-Nu-Kalangfe. ¹² Ay indasug wami sas fulan Sirakusa ay sanya yay ami tuluk menit. ¹³ Ay sanya ginan nabarikwayun yay em dalan. Ay indasug ami sas fulan Regiu. Ay balabag di, sik tagmara siginans fakamangunean baliwa nauyup. Ay sat dayu indasug wami sas fulan Sik-Ngay-Alian-Sirut. ¹⁴ Ay nalag ami sanya sik ngay takafandiug ay nafasakbo emi. Ay sanya yay ami fituk menit. Ay bandi gfatunglus yay ami glo sas fulan Ruma. ¹⁵ Ay at ngay takafandiug sas fulan Ruma nu nadungug te, umdasug ro ami, kanya nalo laman nanfablang emi. Ay at tiba nu gfablang emi sas fulan Apiu-Fagfesalian. Ay at tiba sas fulan Tuluk-Bale-Faginuman. Ay Fandak nu nalag anya guseganan sas Funbalugu ay intvngvd at amatanganan. ¹⁶ Ay nu ndasug wami sas fulan Ruma, at fun sanya nafanabayan tuwa Fandak, laman dewa gsesadian nu gbanwan, ay at ufud sik tagtanud wa tagbarangian. ¹⁷ Ay nu nlangfe wa tuluk menit, Fandak nafakbang sa anya Taw-Naseg at ngay magurang sis fulan Ruma. Ay nu ndasug, Fandak nalong anya te, Ku ngay kalongan. Dewa gyud aw e asalanan sa tam ngay kalongan ay sa tam ngay aguyangan baliwa at ugali, e nataban angku kata sik masungsungan siginans Erusalem anggan sas Taw-Ruma at fun sirut. ¹⁸ Ay ka fag fun sirut nasarap te, go e asalanan aw. Ay rodi kaumsig wa nafalfas angku, anway da ku e fagbulun sak nanfate angku. ¹⁹ Ay at ngay Taw-Naseg kalimata nu e gfalfas way angku. Ay katanya wayay, nanget akyay sas fun daul Sesar tagfatuyan sa angku baliwa. Dewa yud aw e longan malimata sa ku ngay kalongan baliwa. ²⁰ Anway katanya, kaumsig akyay gialagun ayu ay nanfamatuan akyay nangus ayu. Anway at fage nasalodun angku tuy fag sanbung tagradrabingan, anway ku fagsegun, Taw-Naseg yangay at fagsegun. ²¹ Ay Taw-Naseg at ngay magurang nalong sas Fandak te, Du ami batang gbul sik rirukan sa am fagbulun baliwa siginans sik taw siginans talun Naseg. Ay dewa tibak Taw-Naseg indasug stiye, dua nanfoyung te, mauri am fagbulun. ²² Ay em fakaumsigun fiya fiya, foyungi way emi am amatanganan mandi. Anway gayup wami te, sas fagayu talun e nafoyung wa mauri sa baliwa ka fag Ugali at bagu. ²³ Ay ka fag ngay magurang nafili yay sik menit, laman Fandak nanfoyung yangay anya. Ay ginanya, at ngay taw indasug sas Fandak at bale. Ay Fandak nu gfoyung sanya fag ngay taw, siginan was balabag ay anggan inyabi. Ay at foyungan sa baliwas Funbalugu-Nu-Gmagurang-Taw, ay anggan sa baliwas Isus. Ay at foyungan siginan Ku-Unga At-Longan ay anggan siginans Funbalugu At ngay taglong At-Rirukan. Laman tagdungugan kafandiug sas Isus. ²⁴ Ay tiba at tagdungugan sanya kafandiug tuwa. Ay tiba yaya. ²⁵ Ay nu katanya, at ngay taw nainkafudan. Ay bagu lumo Fandak nafoyung yay anya te, Matuyan At-Masine-Fag-Falad at foyungan siginans Funbalugu At taglong at ngayan Funbalugu-Nabalabag, nu nalong sa ay ngay aguyangan te, ²⁶ Nanlagi sanya fag ngay taw ay foyungi anya te, Dewa am nadungug, du am namatang. Ay dewa am nalag, du am nasaful. ²⁷ Anway tuy fag ngay taw at amatanganan marananan way. Ay at talinga kata way yud togdungug. Ay at mata mafutsik way. Laman dua glag ay dua nasaful. Ay dua togdungug ay dua namatang. Ay at amatanganan dua nasaful at masine. Ay dua nbiling sa Angku, laman nanfafiya Aw anya. ²⁸ Ay Fandak nafatunglus yay nu gfoyung te, Nu katanya, asafuli tuwa te, tuy fag foyungan sa baliwas Funbalugu nu mafabalabag sik taw, ay nafoyung wan sa at Yud-Naseg-Fag-Taw. Ay kafandiug wa ban. ³⁰ Ay Fandak nu gbanwan sanya duwak banwa nu siaba. Ay kanya tuwa mandi at nafesali at bale. Ay gfasakbo tuwa fagayu at nansibo anya. ³¹ Ay maseganama tuwa nu gfoyung sas Funbalugu-Nu-Gmagurang-Taw baliwa, ay anggan sa tam Fun Isus Fagtayukan baliwa. Ay di e gsalag anya.