2 Timothy

¹ Siginan angku, Fandak, Fagtayukan Isus At-Suguan at sadi. Anway Funbalugu nafili wa angku, laman nanfoyung aw Funbalugu At nafatuyanan fag leleg at yud katabu sa at kinsadi sas Fagtayukan Isus. ² Nanriruk aw sa emu, Tagseg-Funbalugu, ku fakesugun ku unga. Funbalugu tam Tama ay Fagtayukan Isus tam Fun At mamanyun nangus sa emu, ay takafanyu ay anggan At nanfanabayan emu. ³ Guseganan aw sa tam Funbalugu kayu ginan aw gdarangin faggugat sa emu, dewa sad yabi ay dewa swa menit. Matuyan akwa fiya igfaning Funbalugu, kata ebi ku aguyangan nu gfaning Anya. ⁴ Katsi nangamatangan aw ebi am nauywayan. Ay gananlagun aw emu, laman ban guseganan aw dawdaw. ⁵ Gamatanganan kyangay am fakafandiugun at matuyan. Kata am fufuina, Taglabi-Nu-Masine, nu kafandiug ebi taguna. Ay anggan yangay am mina, at ngayan, Tagbabo, nu kafandiug. Ay nasaful aw te, kafandiug yangay o, kata am mina talanak nu kafandiug ebi. ⁶ Ay nu katanya, nanfaamatang aw emu, laman kata nu gfadaul o sik afuy, maseganamai yangay nu gfadaul o Funbalugu At nafon emu fag fagmadaragangun. At nafon emu ebi gina aw gfatayuk ku daluap sa am alfuyu. ⁷ Anway bunwa Funbalugu tagfaamatanganan antam sas fakalimuun. At fagfaamatanganun antam antuwa sas fagmadaragangun ay sas fakafanyuun ay anggan sas fagfabarisun. ⁸ Dangai kalimu nu gfoyung o sas taw tam Fun Isus Fagtayukan At ugali. Ay anggan lag kapla angku sa am amatanganan, dewa aw sik masungsungan, anway igfaning aktuwa tam Fun Isus. Faningi angku dewa e gfauri emu gina o gfoyung at Masine-Fag-Barita. Anway Funbalugu wan tagfon emu At fagmadaragangun. ⁹ Funbalugu At fagbalabagun antam ay At fagnafiliun antam laman masine ban tam ugali sa Anya. Ay Funbalugu At fasadan fagnafiliun antam bunwa te, masine tam fagbulun ebi. At fagnafiliun antam at fasadan wa mandi, ay manga te, kafanyu tuwa antam. Ay anggan nu kafanyu antam siginan wa ebi ebis fagsigadan, ay bandi nasugu Fagtayukan Isus. ¹⁰ Ay katsi nasaful watam At fakafanyuun anway insure wan tam Tagbalabag Fagtayukan Isus. Madyay Kanya At nababo fakateun at fagmadaragangun. Ay anggan At nafon leleg faggugat sas takafandiug anway at Masine-Fag-Barita. ¹¹ Ay Funbalugu nafili angku laman Isus aw At-Suguan. Ay laman nanfoyung aw ay nanfayamag aw sas taw at Masine-Fag-Barita. ¹² Ay anway katanya ku fagbulun, fage nafauriun angku katsi. Dewa katanya, da kdi mabaluanan. Anway matvngvd ku fakafandiugun sas Funbalugu te, Kanya madaragang tuwa ay nadingding tuwa angku ebi ginan nu gfagbulunan aw sa Anya, ay anggan umdasug Ka-Fag-Menit. Anway nafon aktuwa Anya fagayu nus nge wain siginan angku. ¹³ Faningi tuwa ku nafoyung emu at matuyan fag longan, ku nafaulit sa emu. Anway kafandiug wo ay kafanyu tuwo anway insadi wo sas Isus Fagtayukan. ¹⁴ Fatvngvduni at matuyan fag longan at nafoyung emu, anway At-Masine-Fag-Falad tagsi antam tagtarabang emu. ¹⁵ Nasaful wo te, fagayu taw sas talun Asia kalimata way angku. Ay anggan kanya fag duwama at ngayan te, At-Nalagyu ay Taw-Yabi-Takamoyung-At-Baguama kalimata yangay angku. ¹⁶ Tam Fun Isus Fagtayukan At takafanyu nangus Tagfaste-Fanambagun ay anggan fagayu tagsi at bale. Anway ngayu ginan kanya nu gfatvngvdun angku. Anway kanya di kapla dewa e nasungsung angku. ¹⁷ Ay kanya nu ndasug sas fulan Ruma, nasarap dawdaw angku, ay nalag wa angku. ¹⁸ Tam Fun Isus Fagtayukan mamanyun nangus sa anya, laman Funbalugu kafanyu anya gina umdasug Ka-Fag-Menit. Anway nasaful wo te, ngayu ginan ka fag taw nu gtarabang angku sas fulan Efesu.

¹ Ay o wan, ku unga, fatvngvdi am amatanganan. Anway Isus Fagtayukan nafamanyun wa sa emu. ² Foyungi sat matuyan fag ngay takafandiug ku nafoyung emu gina ta maful gasfuan at ngay tagdungugan. Laman kanya ban at matuyan fag taw nanfoyung yangay sa tiba. ³ O wan takata sik tagbarangian tagsungatan dewa gatakan. Anway o yangay Isus Fagtayukan At tagbarangian. ⁴ Ay sik taw fagalay nanfabarangian, di gfaning tibak taw at ugali. At fagfaningun antuwa at nafili anya, laman fauseganan anya. ⁵ Ay kata yangay sik tagladlabian nu gtarung. Dewa at sadi naguna tiba, dua mafabul at fanambagun fag sangbo nu dway nafaning at fun tagsanya at longan. ⁶ Ay kata yangay sik tagtanum. Madaragang tuwa nu gfagbulun, ay bandi ban e non tuwa at buadan. ⁷ Amatangani tuwa tuy ku longan. Anway tam Fun wan tagfasaful emu ku longan fagayu at masuad. ⁸ Amatangani tuwa faggugat sa tam Isus Fagtayukan. Kanya Fun Fakafanyuun at kadagdagan at sadi. Ay Kanya e nafaleleg siginan At fagmatianan. Kanya wa ku nafoyung at Masine-Fag-Barita. ⁹ Siginan ku nafoyungan katsi e faurianan sa angku kata nu an aw sik mauri fag taw, ay yaya roro. Ay dewa aw masungsungan katsi, du e mafasungsung Funbalugu At longan. ¹⁰ Ay dewa katanya, nabaris aktuwa nus nga se taw. Laman Funbalugu At nafili fag ngay taw e fanambagun yangay ban. Anway Fagtayukan Isus tagbalabag anya ay e fagmasineun ban faggugat. ¹¹ Matuyan tuwa iste at longan te, Dewa tam kata at kinkate gasfuan Fagtayukan Isus, lumeleg yangay ban tam gasfuan Anya. ¹² Nu nasungatan tuwa tam katsi, nanmagurang ban tam gasfuan Anya. Nu gafayudun way tam Anya katsi, Kanya mamayud yangay ban antam bandi. ¹³ Itam, dewa tam yud sik mafanud, Kanya faggugat mafanud tuwa. Anway Kanya dua mafafamayud At balyu mandi. ¹⁴ Faamatangi yangay sat ngay takafandiug. Ay fatvngvdi nu glong o sa anya te, Funbalugu wan At tagfatuyan ku longan te, laman di am garingangan. Anway takatanya fag ngay longan du e fanambagun. Ay manga te gfauri way at ngay tagdungugan. ¹⁵ Maseganamai tuwa laman Funbalugu kaumsig tuwa am fagbulun. Ay laman di o mapla emu te, am fagbulun dua matuyan. Ay matuyani tuwa am foyungan siginan At matuyan fag longan. ¹⁶ Lag kaful sa sik taw tagsulitanan sat yud gfadiuganan sas Funbalugu At longan. Anway takatanya fag longan igfayayu way at tagdungugan siginans Funbalugu. ¹⁷ Ay nu katanya way fag longan kata way sik taglugo fag famaga takadaul. Katanya way ka fag duwama at longan, at ngayan te, Gina-Bagu-Daduwa-Fag-Bara ay At-Matuyan-Nu-Sik-Nesugan. ¹⁸ Anway ka fag duwama nasaruy sat matuyan. Madyay kanya iglong way te, ebi way takatanya tagdog yay gleleg, ay katsi ban yaya, dua katanya. Taglong takatanya igfasirut way sa tibak taw at fakafandiugun. ¹⁹ Dewa katanya, Funbalugu wan At tagfatvngvd at ngay takafandiug, kata sik taw at matvngvd at turuk bale. Ay At rirukan sanya te, Funbalugu nasaful te, kanya Ku ngay taw. Ay, Nus nga sinu at lumong te, aw wan Funbalugu At taw, ubuni tuwa at ugali at mauri. ²⁰ Sa sik bale daul at ngay fagsuadan bundi fagtvngvd at fangawat sanbung fanumyu ay sanbung salafi. Anggan tuwa e fangawat kayu ay daga. Ay tiba at suadan sanya masine tuwa. Ay tiba at suadan mafurat way. ²¹ Katanya yangay at ngay taw. Sik taw nu gdi maful sat yud masine, kanya kata at nafamasadan fag fagsuadan at masine. Ay tam Fun nafili ka fag taw laman nanfaning At fakaumsigun at masine. ²² Ay nu katanya, lag gfaning baguama at fagalabianun. Ay maseganamai laman masine tuwa am fagbulun. Ay laman fatvngvdi tuwa am fakafandiugun sas Funbalugu. Ay laman afanyui tuwa am iba. Ay laman manabayani tuwa. Ay am fagmafulan sa ituwa tagdarangin sa tam Fun ay at ke amatanganan at masine. ²³ Ay lag maful sa sik taw at fagintoun nu dway e masuad, ay anggan nu dway mamatanganan. Nu katanya way, igfasigadan way nu garingangan. ²⁴ Anway tam Fun At fanuguan di gfaringangan. Ay kanya malukme tuwa sa tiba fagayu. Ay anggan mafafoyung tuwa sa tiba. Ay anggan maabaris tuwa nus nge wain. ²⁵ Ay malukme tuwa nu glong sa at tagsalag anya te, lag katanya. Nu ndain Funbalugu fasaman yay at tagsalag at amatanganan. Nu ndain tumubus yay at amatanganan ay sumaful yangay at matuyan fag longan. ²⁶ Ay nu katanya tuwa, ka fag tagsalag malfas yay siginan Takamuag-Tiba-At-Fagbulun at lulang. Anway Takamuag-Tiba-At-Fagbulun nafaumsiganan anya ebi te, laman kanya maning anya.

¹ Asafuli wa fiya te, sa bans fakatabuan fag ngay menit, mason ban at faurianan. ² Anway ginanya ban at ngay taw gfangesug way. Ay gfadaul sas fagalabianun. Ay gfalabi at longan sat tusama. Ay gfandaragang at fagbulun. Ay iglong mauri sa tiba baliwa. Ay kamabo at mangaguyang. Ay dua guseganan tiba dewa natarabang anya. Ay dua gfaning Funbalugu. ³ Ay dua kesug at tiba. Ay dua kaliam at tiba at asalanan sa anya. Ay kamuagan sa at tiba at fagbulun. Ay dua mabaris. Ay gfangadotama dawdaw sa tiba. Ay dua kaumsig sat masine. ⁴ Ay igfoyung tiba sa at mauri fag taw. Ay mafali nus nga nday at fakaumsigun. Ay at fagamatanganun anway te, aw wan at masine. Ay at fakesugun sa way at fagalabianun. Ay dua kesug sas Funbalugu. ⁵ Ay kanya fag ngay taw at fagbulun dewa kata sik takafandiug, roro mangaro, yaya. Dua kafandiug sas Funbalugu At fagmadaragangun. Ayayui wan siginan takatanya fag ngay taw. ⁶ Anway tiba takatanya fag ngay taw igfanluk way nu kadasug sasa ngay bale. Ay nanfanluk sanya fag ngay mangena. Sanya fag ngay mangena tagfainfolian at amatanganan ay maaplan way anway e asalanan. Anway igfaning way at fagalabianun. ⁷ Ay dewa kaumsig gdungug nu e gfoyung, faggugat dua nasaful at matuyan fag longan. ⁸ Kata yangay ebi ka fag duwama at ngayan Anes ay Takamabo, nu gsalag Ku-Unga. Katanya yangay anggan at ngay tagfanluk katsi. Kanya nansalag yangay at matuyan fag longan. Teway mauri way at amatanganan ay dua matuyan at fakafandiugun. ⁹ Ay dua ban glugo ka fag tagfanluk at fagbulun takatanya. Anway kata ebi fag duwama, ay at ngay taw sumaful yangay te, ka fag ngay tagfanluk dua mamatanganan nu e fagbulun. ¹⁰ Katsi nasaful wo ku foyungan, ay ku ugali, ay ku faganan fagbulunun, ay ku fakafandiugun, ay ku fagfanyaun, ay ku fakafanyuun, ay at fagmatvngvdun ku amatanganan. ¹¹ Ay ku faurianan, ay anggan ku fakasaitun. Ay nasaful yangay o at kindasug sa angku gina aw sas fulan Antiukia ay sas fulan Ikuniu ay sas fulan Listra. Anway dewa e nafauri angku, nasungatan aktuwa fagayu. Ay ginanya, tam Fun natarabang angku laman malfas aw siginan at faurianan. ¹² Ay matuyan at longan te, fagayu taw dewa at matvngvd tagfaning Funbalugu ay kafandiug tuwa sas Fagtayukan Isus, e faurianan way ban sa anya. ¹³ Ay at mauri fag taw ay at tagfanluk fag taw fainkugatan wan faggugat at mauri. Ay anggan igfadfanlukan wa tiba. ¹⁴ Ay o, fatunglusi nu gfaning o siginan am nasaful at matuyan fag foyungan anway kafandiug tuwo sa at foyungan. Anway nasaful wo te, kanya at nafoyung emu ebi. ¹⁵ Anway siginan ngay o sik sisian nasaful tuwo At-Masine-Fag-Rirukan. Ay At-Rirukan madaragang nu gfoyung emu te, laman umbalabag tuwo anway kafandiug tuwo sas Fagtayukan Isus. ¹⁶ Fagdaul At-Rirukan, Funbalugu wan At nafaamatanganan sa at ngay tagriruk. Ay e masuad tuwa at foyungan, ay nu gsalag at mauri, ay nu gtubus taw at ugali, ay anggan nu gfoyung te, katanya sik taw at masine fag fagbulun. ¹⁷ Laman sik taw tagfaning Funbalugu sik mabul tungud tuwa ban fag taw. Laman mafafabul ban fagayu at masine fag fagbulun.

¹ Matvngvd nu glong aw sa emu. Ay Funbalugu wan ay Fagtayukan Isus tagfatuyan ku longan sa emu. Ay Fagtayukan Isus nantap ban taw at asalanan, dewa tagleleg ay dewa at kinkate. Ay Kanya umsure ban ay nanmagurang At ngay taw. ² Ay nu katanya, katsi foyungi wan Funbalugu At longan. Maseganamai nu gfoyung o nus nga ginain, dewa sa takaumsig gdungug ay dewa sa at yud kaumsig gdungug. Ay foyungani sa tibak taw te, tubusi ay ugali. Ay salagi tibak taw te, mauri way ay fagbulun. Ay fatvngvdi tiba at amatanganan. Ay nu nafoyung wo katanya, mafanyani yap sik gadugayun. ³ Anway umdasug ban sik ngay menit, at ngay taw dua ban kaumsig gdungugan sat matuyan fag foyungan. Ay ka fag ngay taw at fagfaningun ban sa way at fakaumsigun mandi. Ay kanya gfaful ban sik ngay takamoyung sa anya laman at foyungan nus nga se taw ka fag ngay taw at fakaumsigun. ⁴ Ay kanya fag ngay taw inlimata siginan at matuyan fag foyungan. Ay at fagdunguganun sa way sik ngay fakamansulitun at yud matuyan. ⁵ Ay o, fatvngvdi am amatanganan. Ay sungatani dewa e faurianan sa emu. Ay fatunglusi nu gfoyung o at Masine-Fag-Barita. Ay maseganamai nu gfagbulun o sas Funbalugu At nafon emu fag ngay fagbulun. ⁶ Anway aw katsi kata aw sik anyun. Anway makbang wan nu galoun aw ste ginan swa daga. ⁷ Aw kata aw sik tagbarangian ay ku famabarangian masine tuwa sas Funbalugu. Ay aw kata kyangay sik tagladlabian nu gtarung. Ay nafatabu akwan nu gtarung aw. Ay fagayu ku ugali gfadiuganan tuwa sa ku fakafandiugun sas Funbalugu. ⁸ Ay katsi e nafamasadan sa angku at ke fanambagun fag sangbo sas Banwa. Ka fag sangbo at ngayan te, Matuyan-At-Fagbulun. Ay tam Fun, At matuyan tagfili, mon ban angku ka fag sangbo sa at filian fag menit. Ay bundi sa angku fagsadi. Anggan sigon sas fagayu takaumsig tam Fun Isus Fagtayukan nu gdog yay stiye. ⁹ Mafalii tuwa nu nanlag o angku. ¹⁰ Anway Tagfadaragang-Tanum-At-Fanuguan naubun wa angku, anway kanya kaumsig way sas fagdaul daga at ugali. Ay nalo wa sas fulan Tesalunika. Ay anggan ka fag taw at ngayan Kindaul, nalo wa sas fulan Galasia. Ay Titu sigon nalo wa sas talun Dalmasia. ¹¹ Katsi Lukas way fagsadi ku ufud iste. Ay nu stiye wo, tabani Takata-Sik-Fanuktuk-Daul, anway kanya tagfantarabang dawdaw angku faggugat sa ku fagbulun. ¹² Ay nasugu akwan At-Masine-Insure-Wa-Daw sas fulan Efesu. ¹³ Nu stiye wo ubai tuwa ku umut ku nafamato ebi sas fulan Truas sa sik taw at ngayan At-Ke-Bauyung. Ay ubai yangay anggan ku ngay fagtapan sanya ginan. Ay anggan sigon ku fagtapan at fangawat balat balan. ¹⁴ Ka fag taw at ngayan, Tagdingding-Taw, sik takawat at fangawat sanbung maraska. Ka fag taw ngayu at mauri fag fagbulun sa angku. Ay tam Fun wa ban tagfafoli at mauri sa anya. ¹⁵ Tagaki kanya fag taw. Anway kanya igsalag way dawdaw nu gfoyung tam. ¹⁶ Ebi gina e nataban angku at fasadi ginan stiye fag talun sas tagsarap at asalanan, du e taw gfadiuganan angku nu gbalus aw. Anway fagayu ku iba naubun wa angku. Ay ku fasadan te, laman Funbalugu di tumap nangus anya te, sik tagasalanan. ¹⁷ Ay dewa katanya, tam Fun Isus Fagtayukan gufud tuwa angku. Ay Kanya tagfabitsug angku laman nanfoyung akwa fiya at Masine-Fag-Barita sas taw. Laman fagayu at Yud-Naseg-Fag-Taw sanya dumungug ku foyungan. Ay ginanya e nafalfas tuwa angku siginans faurianan. Kata nu gfalfas siginan sik idu daul tagfangagat akbang bibig. ¹⁸ Ay tam Fun Isus Fagtayukan nafalfas yangay ban angku siginans fagayu tagfauri angku. Laman umdasug ban aw sa At-Fagmagurangan-Taw sas Banwa. Segi tuwa sa tam Fun faggugat faggugat. Kin, katanyai tuwa. ¹⁹ Nanfadasug aw ku fagusegananun sa Sik-Fufuina-Sirut ay sa Takata-Sik-Biyo-Mabaludan ay anggan sa Tagfaste-Fanambagun ay anggan fagayu tagsi at bale te, gamatangan aktuwa ayu. ²⁰ Ay katsi Sik-Nesugan sanya yay sis fulan Kurintu. Ay Takata-Sik-Famataba gadailan way sas fulan Miletu gina aw glo sanya ginan. ²¹ Mafalii tuwa nu kadasug o stiye. Lag fasa gfadasug at matis fag magdanun. Ay ste fag ngay taw at ngayan te, At-Mamatanganan, ay At-Maplan, ay Linu, ay Klaudia, ay anggan fagayu takafandiug tagste nafadasug at fagusegananun sa emu te, gamatangan tuwami emu. ²² Tam Fun tagufud nangus emu. Ay anggan takafanyu emu.