2 Thessalonians

¹ Siginan emi fag tulu, Fandak ay Silas ay Tagseg-Funbalugu. Nanriruk yangay ami sa ayu, sas fulan Tesalunika at maful fag ngay takafandiug sas Funbalugu tam Tama ay sa tam Fun Isus Fagtayukan. ² Funbalugu tam Tama ay tam Fun Isus Fagtayukan At mamanyun nangus sa ayu ay At nanfanabayan ayu. ³ At masine nu guseganan ami faggugat sa tam Funbalugu anway am wan, em ngay fadugsay. Anway ay fakafandiugun gintvngvdan tuwa. Ay anggan sigon nafaintvngvdan tuwam ay kadkafanyuan sa ay iba. ⁴ Ay nu katanya, guseganan ami nanfoyung ay ugali sasa ngay Funbalugu bale at taw. Anway nasungatan tuwam ay kafandiug tuwam, dewa gina e gfauri ayu ay anggan dewa am gina e natakan. ⁵ Anway sa ay naafandiugan ay sa ay nasungatan, tibak taw nasaful te, matuyan Funbalugu nu gfili. Anway sa At nafilian ayu kata sik taw at kinsak at fagmasineun, laman umful ban am sas Funbalugu-At-Fagmagurangan-Taw. Anway te, fage nafauriun ayu katsi, am wan Funbalugu At taw. ⁶ Ay matuyan ban Funbalugu At fagbulun nu gfafoli ban at ngay mauri sa tagfauri ayu. ⁷ Ay matuyan yangay ban Funbalugu nu nafanabayan ayu te, laman di ban e gfauri ayu, ay anggan sa emi sigon. Katanya ban At fagbulun kaduge tam Fun Isus umsure iste swa daga siginans Banwa, ay At nangufud At madaragang fag ngay tagbukngan gina ban e sik afuy masulo dawdaw igsafungan anya. ⁸ Ay ginanya ban Kanya igfauri sa at ngay takalimata Funbalugu ay sa at yud gfaning sa tam Fun Isus At Masine-Fag-Barita. ⁹ Ay Funbalugu igfaurianan ban kanya fag ngay taw te, laman faggugat dua ban umbalabag. Ay anggan sigon nafayayu wa dawdaw siginan tam Fun ay siginan At matuyan fag fagmadaragangun. ¹⁰ Katanya ban gina ban tam Fun umdasug fag menit. Ay kaduge ban anya Funbalugu At ngay taw, at masuad te, fagayu takafandiug, igseg ban Anya. Ay gamatangan dawdaw guseganan anway nalag Anya. Ay anggan am guseganan yangay ban am, anway gafanud tuwam em foyungan ayu. ¹¹ Ay nu nasaful ami te, katanya am, igdarangin tuwami ayu faggugat. Laman Funbalugu natap ayu kata sik taw at kinsak at fagmasineun laman Funbalugu nafili anya. Ay laman Funbalugu At fagmadaragangun gfasure sa ayu fagayu ay fakaumsigun fag ugali at masine. Ay anggan natarabang ayu te, laman gfatunglus tuwam ay fagbulun antuwam ay kafandiug. ¹² Ay laman e gseg tuwa ban tam Fun Isus nu nalag ay ugali at masine. Ay laman e gseg tuwa ban ayu anway am wan Funbalugu At taw. Anway tam Funbalugu ay tam Fun Isus Fagtayukan At mamanyun sa ayu.

¹ Katsi igfoyung ami sa ayu tam Fun Isus Fagtayukan nu kadasug ban stiye swa daga ay anggan nu nangaful ban tam sa Anya. Em fakaumsigun sa ayu, em ngay fadugsay, te, ² Lag gadulawan daw ay anggan lag kalimu sa ay amatanganan. Dewa am nadungug te, indasug wan tam Fun-At-Menit. Dewa kata sik taw yabi at naguna nafoyung. Ay dewa sik taw nafoyung. Ay dewa indasug sik rirukan e longan te, siginans Fandak. Roro sik tagfanluk way. ³ Lag gdungugan siginan tagfanluk at foyungan nus nge wain. Anway Ka-Fag-Menit ya kadasug yap ngay indasug taguna sik ngay takamabo. Ay yap ngay tiba tungud takamabo umsure. Ay at ngayan at sadi te, At-Ke-Fakatabuan-Ban. ⁴ At tiba tungud takamabo sumalag ban fagayu at masine. Ay kanya nafalabi te, aw wan tiba tungud fag fagsegan. Dewa sas fagayu taw yabi ay dewa nus nga se taw fag fagsegan. Ay kanya sumakbo ban sas Tagbvt-Fag-Bale-Funbalugu ay nanmalunggung sanya te, aw wan Funbalugu. ⁵ Go du am namatang ebi ku foyungan ayu gina aw sanya si ayu sa kanya tiba tungud takamabo baliwa. ⁶ Ay katsi nasaful wam at Nansalag-At-Mauri anway kanya nansalag yay ban sa tiba tungud takamabo. Laman ka fag tiba tungud takamabo nu msure sa yay ban at filian fag menit. ⁷ Ay katsi wan at ngay takamabo nu gfagbulunan, dewa te sa tibak taw masuksukan yay. Dewa katanya, at Nansalag-At-Mauri igsalag yay at ngay takamabo, yap ngay Funbalugu nafayayu at Nansalag-At-Mauri laman di at sanya. ⁸ Ay ginanya long ban, umsure wan ka fag tiba tungud takamabo. Ay tam Fun Isus gina ban umdasug, At uyup at nanfate ban anya. Ay Isus At fagmasineun at faliam anya. ⁹ Ay tiba tungud takamabo umdasug wa long ban igfaning Tagfansalag tagfadaragang anya. Laman nanfasure kata sik ngay madaragang fag fagbulun ay anggan kata sik ngay ke masuad fag fagbulun. Ay roro ngap sik tagfanluk way. ¹⁰ Ay nanfasure yangay ban at ngay mauri laman nanfanluk ban sa at yud umbalabag fag ngay taw. Anway ka fag ngay taw dua gfaning sa at matuyan fag longan. Ay nu katanya, dua ban umbalabag. ¹¹ Anway Funbalugu nafaamatangan wa anya te, laman at fagamatanganun ay at fagafanudun sa way at yud matuyan. ¹² Ay nu katanya, Funbalugu natap wa anya te, sik tagasalanan wa fiya. Anway dua gfaning sat matuyan ay nu guseganan sa yakman at mauri. ¹³ At masine nu guseganan ami dawdaw sa tam Funbalugu anway am wan, em ngay fadugsay, tam Fun At fakesugun. Anway Kanya nafili wayu siginan ngays fagsigadan laman umbalabag tuwam. Anway At-Masine-Fag-Falad nafasadi wayu sas Funbalugu, ay manga am wan tagfaning sa at matuyan fag longan. ¹⁴ Funbalugu nu gfili ayu gina ami nafoyung ayu at Masine-Fag-Barita te, laman e fagmasineun yangay ban am siginan tam Fun Isus Fagtayukan anway insadi wam sa Anya. ¹⁵ Ay nu katanya, em ngay fadugsay, fatvngvdi ay amatanganan. Ay faningi sa em foyungan ayu fag ugali. Dewa siginan em longan ay dewa siginan em rirukan. ¹⁶ Tam Fun Isus wan, ay anggan tam Funbalugu tam Tama, takesug antam ay tagfatvngvd tam amatanganan faggugat, ay takamanyun antam te, laman guseganan tuwa tam gina tam gfanya. ¹⁷ Katsi tam Funbalugu nangus At faliaman ay fakabaluun ay tagfatvngvd ay amatanganan. Laman nafatunglus tuwa ban am sa At masine fag ugali ay anggan sa At matuyan fag longan.

¹ Em ngay fadugsay, em longan at fakatabuan sa ayu te, laman igdarangin tuwam emi. Laman mafali tuwa Funbalugu At longan nu karapyag sasa ngay talun. Ay laman dumungug ban Funbalugu At longan, kata ebi am nu nadungug am. ² Ay laman Funbalugu dumingding tuwemi siginan at mauri ay siginan at yud matuyan fag ngay taw. Anway tibak taw dua kafandiug. ³ Dewa katanya, matuyan tuwa tam Fun. Ay Kanya tagfatvngvd ban ay amatanganan ay tagdingding ban ayu siginan at mauri. ⁴ Matvngvd em fagafanudun sa tam Fun te, igfaning tuwam em longan siginan katsi ay anggan katsi ban. ⁵ Tam Fun wan tagfaamatanganan nangus ayu. Laman ay ugali kata tuwa Funbalugu nu kafanyu ay anggan kata tuwa Fagtayukan nu gsungatan. ⁶ Katsi nanlong ami ayu sa tam Fun Isus Fagtayukan At fagmadaragangun te, lag kaful sa ay fadugsay tagfafanaloun nu gfagbulun. Anway kanya fag taw dua kaumsig igfaning sa em foyungan ayu fag ugali. ⁷ Anway nasaful wam te, katanya at masine gina am gulit em ugali, madyay di ami mafanalo nu e fagbulun ami gina ami si ayu. ⁸ Ay du ami gbul em fakonun siginan ayu nu dway ami e fansali. Anway maseganama tuwa nu gfagbulun ami dewa sad yabi ay dewa swa menit. Laman du ami gfatakan ayu. ⁹ Ay dewa masine nu gbul ami em fakonun siginan ayu, igfagbulun tuwami laman em fansali em fakonun. Kanya em famaulit sa ayu, laman maning am katanya. ¹⁰ Anway ebi gina ami si ayu, nafatvngvd wami nu glong ami ayu te, sik taw nu gfafanaloun way nu gfagbulun, lag fon anya at fakonun. ¹¹ Ay katsi nadungug ami te, am tiba igfafanaloun way am ay anggan igfangafayudun way am ay iba faggugat. Ay dua nanfagbulun. ¹² Sa tam Fun Isus Fagtayukan At fagmadaragangun, matvngvd nu glong ami ay nu nafatagak ami sanya fag ngay taw te, laman kanya nanfagbulun tuwa laman nanfanyafun tuwa mandi. Ay laman manabayan tuwa ban ay masine at ugali. ¹³ Ay am, em ngay fadugsay, lag gatakan sa ay amatanganan, dewa ngayu ay fagbulun nus nge wain sat masine. ¹⁴ Sik taw nu dway gfaning katanya sa em longan iste em rirukan, foyungi ay iba te, laman dua kaful sanya fag taw. Laman ban kanya fag taw anyay mapla. ¹⁵ Dewa katanya, lag am gamatangan anya te, sik tagfalimatan way ayu. Ay fatagaki tuwa anya kata nu ay fadugsay. ¹⁶ Tam Fun tam Tagfanabayan nanfanabayan nangus ayu fagayu menit ay nus nga ginain. Ay anggan tam Fun tuwa tagsi ayu fagayu. ¹⁷ Ku daluap yay at nariruk tuy fag rirukan te, aw wan Fandak, ay gfadasug aw ku fagusegananun sa ayu te, gamatangan aktuwa ayu. Katanya ku ugali sa ku rirukan fagayu. Ay katanya nu griruk aw gfabarikwayun. ¹⁸ Tam Fun Isus Fagtayukan At mamanyun nangus sa ayu fagayu.