2 Peter

¹ Siginan angku, Simun Takata-Sik-Batu, Isus Fagtayukan At fanuguan at sadi, ay anggan At-Suguan at sadi. Nanriruk aw sa ayu, sas fagayu takafandiug sas Funbalugu takata em fakafandiugun at matuyan, anway Funbalugu nafamanyun antam. Ay At nafamanyun antam, antuwa tam Funbalugu ay tam Tagbalabag Isus Fagtayukan At fagmasineun fiya fiya. ² Funbalugu At mamanyun nangus sa ayu ay At nanfanabayan ayu kayu menit kayu menit. Anway nasaful wam Funbalugu ay Isus tam Fun. ³ Fagtayukan At tiba tungud At madaragang At nafon antam fagayu tam fagayudanun sa tam fakafandiugun baliwa. Laman fagayu tam ugali kata tuwa tam Funbalugu At ugali. Ay anway sa At nafonan antam, nasaful watam Fagtayukan At ugali At nafili antam. Ay At fagnafiliun antam laman si antam tuwa sik afud At fagmasineun ay At fagmatuyanun. ⁴ Anway katanya, Kanya At fagnafamanyunun sa antam at mesug ay at masine dawdaw fag fagafonun ay At fatuyanan ebi. Laman nafalfas ayu ste ginan swa daga at mafurat swa fagalabianun. Ay laman ay ugali igfaning tuwa Funbalugu At ugali. ⁵ Ay laman ay ugali kata tuwa Funbalugu At ugali. Ay anway kafandiug wam, fasinei ay fagbulun. Ay nu masine wa ay fagbulun, asafuli yangay Funbalugu At ugali. ⁶ Ay nu nasaful wam Funbalugu At ugali, fabarisuni. Ay nu mabaris wam, sungatani. Ay nu nasungatan tuwam, faningi Funbalugu At ugali. ⁷ Ay nu nafaning wam Funbalugu At ugali, afanyui ay ngay fadugsay. Ay nu kafanyu wam ay ngay fadugsay, rodi afanyui tuwa fagayu taw. ⁸ Nu katanya tuwa ay ugali, ay nu matuyan tuwa kayu niya, ay fagbulun e masuad tuwa ay e fanambagun tuwa ban. Anway nasaful wam tam Fun Isus Fagtayukan At ugali. ⁹ Ay sik taw nu dway e ugali kayu niya, kanya kata way sik taw yud ngayayu nu glag. Ay anggan kata sik taw at yud glag daw. Ay kanya naliam yay dewa ebi e nafegus at asalanan fagayu. ¹⁰ Anway katanya, ku ngay fadugsay, maseganamai tuwa sat masine laman fagayu taw sumaful te, Funbalugu tuwa At nafili ayu. Nu katanya tuwa ay ugali, di am gfaning mauri. ¹¹ Ay nu katanya tuwa ay ugali, e fasakbo wa ban fiya ayu sa tam Fun tam Tagbalabag Isus Fagtayukan At-Fagmagurangan-@Taw at yud e fakatabuan faggugat. ¹² Anway katanya, ku fasadan te, faggugat nanfaamatang akyay ayu aro ku longan. Dewa am batang gdungug ay dewa am batang intuyan tuy fag foyungan at matuyan. ¹³ Gamatangan aw te, masine siring kaduge aw gleleg, nu nanfaamatang akyay ayu, laman maseganama tuwa ban am. ¹⁴ Anway nasaful kwa te, da kwa ban glugo nu gleleg aw. Anway tam Fun Isus Fagtayukan nafasaful wa angku. ¹⁵ Ay maseganama aktuwa, laman nu nalo kwan, namatang tuwam fagayu ku foyungan ayu nus nga ginain. ¹⁶ Ebi gina ami gfoyung ayu tam Fun Isus Fagtayukan nu kadasug ban ay e fagmadaragangun, di ami gfaning sat yud matuyan fag takamansulit tagfanluk tiba. Anway ami ebi nalag wami fiya Fagtayukan At fagmadaragangun. ¹⁷ Sanya wami ebi kaduge Funbalugu tam Tama nafon sik fagmasineun dawdaw sa At Baguama. Anway At Baguama nadungug At Tama, At-Tiba-Tungud-At-Masine, nu glong te, Kanya wan Ku fakesugun Ku Baguama, ay guseganan Aw dawdaw Anya. ¹⁸ Ay anggan ami nadungug wami ebi nu ge longan siginans Banwa. Anway ginanya gufud wami Anya sanya fag muyud at tiba tungud at masine. ¹⁹ Ay katsi intuyan watam fiya sas Funbalugu At ngay taglong at foyungan ebi at naguna nafoyung. Ay masine nu gfaning tuwam ka fag foyungan. Anway ka fag foyungan kata sik salung nu gdamlag sasad marum, nu di yap ngay insure at mayamag. Ay anggan kata tam Tagurabas nu nadamlag sa ay amatanganan. ²⁰ Tuy at gurungan fiya fiya asafuli tuwa te, nut siginan sik taw way mandi, dua nasaful Funbalugu At ngay taglong at naguna nafoyung at masuad. ²¹ Anway Funbalugu oma At ngay taglong nu naguna nafoyung, bunwa siginan anya at fasadan mandi. Anway anggan At ngay taglong nu nafoyung Funbalugu At longan, At-Masine-Fag-Falad tuwa At nafaamatanganan anya.

¹ Dewa katanya, ebi e ngay takamoyung yangay at yud matuyan at naguna nafoyung sa yangay ebi Funbalugu At ngay taw. Ay katanya yangay ban anggan katsi. E ngay takamoyung yangay ban at yud matuyan si ayu. Ay kanya gfanluk yangay ban at foyungan ay laman ban tiba at fakafandiugun umsirut. Ay anggan sigon gafayudun way ban tam Fun, nu nasali laman nafalfas anya. Ay anway katanya wayay at fagbulun, mafali nu e faurianan ban sa anya ay dua ban umbalabag. ² Ay ngayuk taw ban maning sat yud matuyan fag takamoyung at mauri fag fagalabianun. Ay at nalag ka fag fagbulun igfalingun ban sa at matuyan fag longan. ³ Ay at yud matuyan fag takamoyung gfangesug way at salafi. Ay at fagnanfanlukun ban ayu sat foyungan at yud matuyan, laman mul ban ay salafi. Ay ebi Funbalugu mafamasadan nu tumap at asalanan. Ay At fasadan gfauri wa ban fiya anya ay dua umbalabag. ⁴ Ay ebi Funbalugu dua nafaliam sa At ngay tagbukngan at ke asalanan. Ay rodi naukas anya sas tagbiya fag faurianan. Ay nasungsung anya sat marum fag lusung, yap ngay ban umdasug sat fagfasurean asalanan fag ngay menit. ⁵ Ay Funbalugu e matvngvd fag fasadan yangay sa ebi fag ngay taw at mauri, gina Tagfataluan igfoyung te, fasinei ay ugali. Funbalugu At nabalabag Tagfataluan ay anggan at fituk ufud gina nafe lino daul sasa ngaba daga. Laman At famafuy ka fag ngay mauri fag taw. ⁶ Ay ebi Funbalugu e matvngvd fag fasadan sas fulan Sik-@Afugan ay anggan sas fulan Inlubgub. Ay narasras wa fiya ay at sawad sik dafug way sigad. At fagnarasrasun laman sik famalag sat yud gfaning sas Funbalugu. Katanya yangay ban at kumdasug sa anya. ⁷ Ay Funbalugu nafalfas tuwa Lut, sik taw masine. Ay Lut kabalu dawdaw anway at mauri fag ngay taw mafurat dawdaw at fagbulun. ⁸ Ay ka fag masine fag taw e nabaluan sat amatanganan kayu menit kayu menit. Anway kanya nalag ay nadungug ka fag ngay taw at mauri at fagbulun, teway nu gbanwan sanya wayay swa mauri fag ngay taw. ⁹ Funbalugu At fagbulun nu katanya nafoyung antam te, Kanya nasaful wa fiya nu gfalfas at ngay tagfaning Anya gina e gfauri. Ay Kanya nasaful yangay at fagnasungsungun sat yud gfaning Anya gina ban e gfauri anya, gina ngay ban umdasug sas fagfasurean asalanan fag ngay menit. ¹⁰ Ay anggan nanfauri wa ban fiya at ngay tagfaning sat bilug at mafurat fag fagalabianun ay anggan takamabo. Kanya fag ngay takamoyung at yud matuyan du e nalimuanan nus nge wain, ay gfaning way at fasadan mandi. Ay dua kalimu gfalingun dewa sas Funbalugu At ngay madaragang fag tagbukngan. ¹¹ Ay At ngay tagbukngan glabi yay fiya fiya ka fag takamoyung at yud matuyan nu mabitsug ay nu madaragang. Ay dewa katanya, ka fag ngay tagbukngan di nafoyung sas Funbalugu ka fag takamoyung at yud matuyan at asalanan. Ay anggan di nafalingun anya. ¹² Ay ka fag ngay takamoyung at yud matuyan nu dway nasaful ka fag foyungan at masuad, kanya gafayudun way daw. Ay kanya kata yangay sik ngay mela at yud e amatanganan sa tiba, ay igfaning yangay mandi at fakaumsigun. Ay roro at masuad e miktan wa ban anya ay e fate wa anya. Ay at fakatabuan ka fag ngay takamoyung kata yangay sik ngay mela. ¹³ Ay anway kanya igfauri wayay tiba, ay e gfauri yangay ban anya. Ay katsi kanya mason dawdaw nu gfaning nus nge wain fag fagalabianun dewa gina swa menit. Ay guseganan dawdaw katanya at fagbulun. Ay kanya gina maful si ayu sas tagbvt fag fakonun, ginanya guseganan igfanluk ayu. Anway at ugali ginanya sik ngay mapla dawdaw. ¹⁴ Ay kanya galabian fagayu at nalag fag mangena. Ay galabian wan nus nge wain faggugat. Ay kanya nataban at yud matvngvd nu kafandiug fag taw laman nanfe asalanan anya. Ay kanya kamalabo way faggugat. Ay e faurianan wa ban fiya sa anya ay dua ban umbalabag. ¹⁵ Ay kanya dua kaumsig gfaning sat matuyan fag longan. Kata wa nu naliam sat masine fag dalan. Ay at ugali nafaning way sa ebi ebi sik takamoyung at ugali at ngayan Tam-Taw-Inkayu-Wan. At tama at ngayan, Nabatas. Anway ka fag takamoyung ebi ebi giafaayuun way at salafi dewa siginan at mauri fag fagbulun mandi. ¹⁶ Ay ka fag takamoyung ebi at balan igbaya sat tagbilug anway e asalanan. Ka fag balan dewa yud sik tage longan, nae longan tuwa daw kata sik taw nu ge longan. Ay at balan igsalag at tagbilug at yud mamatanganan at fagbulun. ¹⁷ Fagayu at yud matuyan fag takamoyung kata way sik mata bulbug at yud e safa. Ay kata yangay sik bagyu nu gfalayug at linyabu. Ay Funbalugu nafamasadan sik ngabasad ay sik marum fag lusung, at fagfatsanyan ban ka fag ngay takamoyung at yud matuyan. ¹⁸ Ay ka fag takamoyung at yud matuyan gfalabi at longan at yud mamatanganan. Laman at bagu kafandiug gdog yay gfaning sat bilug at fagalabianun at mauri. Dewa satu ro ka fag bagu kafandiug igfasigad kalfas siginan ka fag mauri fag ugali. ¹⁹ Ay ka fag ngay takamoyung igfanluk sat bagu kafandiug te, masine tuwa dewa gyud am gfaning nus nga setaw. Ay dewa katanya at longan, ka fag tagfanluk asalanan yay at fanuguan. Anway sik taw infanuguan wa sa taglabi anya nus nge wain. ²⁰ Sik taw di gfaning ste swa daga at asalanan, anway kanya nasaful wan tam Fun tam Tagbalabag Isus Fagtayukan. Ay kanya nu gdog yay nafaning at asalanan, ay at asalanan nu nababo yay fiya anya, kanya fag taw sas fakatabuan glabi yay ebia taw at ugali nu mauri. ²¹ Sik taw nu dyay ngap batang gsaful sat matuyan fag longan ay at ugali, kanya fag taw amasine yap sa sik taw at batang gfaning ay bandi kanya dua gfaning sat Masine-Fag-Barita ebia taw at nafoyung anya. ²² Anway takatanya fag taw nu nfoli yay sat asalanan, igfaning yay tuy fag fafaskudanan at matuyan te, Sik idu naon yay at balugnan. Ay sik butan, dewa e nafegus, gdog yay nangigus sasad lifak.

¹ Ku fakesugun ku ngay taw, ku fagnafaduwa ginanun nu griruk aw sa ayu, laman ku famaamatang ayu ebi ku foyungan. Laman maseganama tuwam nu gamatangan am sat masine. ² Ay laman gamatangan yangay am ebi ebi Funbalugu At ngay taglong at naguna nafoyung. Ay anggan tam Fun tam Tagbalabag At longan, At-Suguan at foyungan. ³ Taguna asafuli te, sa ban at fakatabuan fag ngay menit, umdasug ban sik ngay tagfalingun. Ay kanya igfaning ban at mauri at fagalabianun mandi. ⁴ Ay kanya gafayudun ban te, taw ro ka fag fatuyanan at fagnalongun te, Fagtayukan gdog yay umdasug ste swa daga. Ay madyay anggan wa tam mangaguyang inkate, fagayu ste swa daga kata yay gugat ebi ebi gina Funbalugu bagu kaawat tam daga. ⁵ Ka fag ngay tagfalingun matvngvd dawdaw nu gafayudun te, Funbalugu At longan naawat tam kiwang ebi ebi. Ay anggan nafasure tam daga sas day safa ay anggan e safa yangay sat tungud. ⁶ Ay ka fag safa, ebi ebi yay fag safa at kinlino sas fagdaul daga, at nafamin fagayu tagleleg. ⁷ Ay Funbalugu At longan nafatvngvdun yay tam kiwang ay tam fagdaul daga anggan katsi. Ay bandi long ban umbatas wa sasad afuy. Ay ka fag afuy umsure ban gina ban Funbalugu gtap fagayu taw at asalanan fag ngay menit, ay gfauri fagayu takamabo Anya ay dua umbalabag. ⁸ Ku fakesugun ku ngay taw, amatangani te, tam Fun nu gamatangan sik menit kaduge way nu sik libuk banwa. Ay nu gamatangan sik libuk banwa kaduge way sirut sik menit. ⁹ Tam Fun dua gfalugoun dawdaw nu gfasure At fatuyanan, kata sik taw tagamatangan te, glugo yay ban. Funbalugu nafanya tuwa ayu te, laman nus di sadik taw di mdasug sas faurianan. Anway At fakaumsigun te, laman fagayu taw mubun tuwa at asalanan. ¹⁰ Roro ngap, tam Funbalugu At menit nu mdasug ban kata way daw sik takamul sad yabi. Kaduge ban anya tam kiwang nu mamin gina ban igfus dawdaw. Ay fagayu tagsanya umtinas ban sasad afuy. Ay anggan tam daga ay fagayu tagsanya umbatas wan, ay dua ban e sawad. ¹¹ Anway fagayu tagste swa daga umtinas wa ban. Ay nu katanya, taini ay ugali katsi. Masadii tuwa ay ugali sas Funbalugu ay faningi tuwa Anya. ¹² Ay kaduge am gfanya ay gfafali tam Funbalugu At menit nu kadasug. Ay gina ndasug at menit, tam kiwang mamin wa ban sas afuy. Ay anggan fagayu tagsanya umtinas wa sas masugba daw. ¹³ Roro ngap, anway Funbalugu e fatuyanan tuwa, ay gfanya watam at bagu fag kiwang ay at bagu fag daga. Ay sanya ban faggugat masine tuwa nus nge wain. ¹⁴ Ku fakesugun ku ngay taw, kaduge am gfanya Funbalugu At menit nu kadasug, maseganamai ay ngay ugali sat masine. Laman tam Fun gina mdasug, nu glag ayu, di am e mauri. Malayun tuwam sat masine. ¹⁵ Ay amatangani tam Fun At fagfalugoun kata sik famanyan laman tibak taw umbalabag yay. Katanya yangay tam fakesugun tam fadugsay Fandak at fagnarirukun sa ayu, anway Funbalugu nafaamatanganan anya. ¹⁶ Katanya tuwa Fandak at foyungan sas fagayu at rirukan. Ay Fandak at rirukan tiba, tibak taw dua mafali nu gsaful. Ay at yud nasaful fag ngay taw ay anggan at tagfainfolian fag ngay taw at amatanganan nafasaman at famayamag Fandak at rirukan at masuad. Ay anggan katanya yay nu gfayamag sa tibak afud Funbalugu At-Rirukan. Ay anway katanya, e faurianan ban sa ka fag ngay taw ay dua ban umbalabag. ¹⁷ Ku fakesugun ku ngay taw, anway naguna akwa nafasaful ayu katanya, tagaki tuwa. Laman di am gfaning ka fag ngay mauri fag taw at foyungan at yud matuyan. Ay laman di ban gfasirut ay fakafandiugun. ¹⁸ Ay maseganamai tuwa sa ay fakafandiugun baliwa. Laman sik mabul tungud tuwa ban am fag taw. Ay laman sumaful yangay am tam Fun tam Tagbalabag Isus Fagtayukan ay anggan At fakafanyuun. Gseg watam Anya. Dewa katsi, ay dewa katsi ban anggan sas fakatabuan fag ngay menit. Kin, katanyai tuwa.