2 John

¹ Aw sik magurang aw. Ay nanriruk aw sa ayu, sas Funbalugu At nafili fag mangena ay anggan sa at ngay sisian. Aw kesug aktuwa ayu. Ay bundi aw fagsadi takesug ayu. Anggan fagayu tagsaful at matuyan fag longan kesug yangay ayu. ² Anway at matuyan fag longan si wa antam ay si way ban antam faggugat. ³ Funbalugu tam Tama ay tam Isus Fagtayukan, tam Tama At Baguama, At mamanyun nangus sa antam, ay takafanyu antam ay anggan At nanfanabayan antam. Anway Kanya At matuyan ay takesug antam. ⁴ Guseganan aw anway nasaful aw te, am unga tiba igfaning tuwa sat matuyan fag longan, kata tam Tama sas Banwa At longan antam. ⁵ Ay fagina, katsi glong aw emu te, medkesugan tam. Kanya ku rirukan bunwa sik longan bagu. Gsud yay kata ebi sas fagsigadan tam nadungug fag longan. ⁶ Ay kata tuy ka fag fakesugun, nu gfaning tuwa tam At longan. Ay kata tuy At longan te, afanyui tuwa faggugat. Kata yangay ebi am nadungug fag longan siginan ebis fagsigadan. ⁷ Ay ngayu tagfanluk taglo sas fagdaul daga. Kanya fag taw at yud way gfoyung te, tam Isus Fagtayukan e bilug wa fiya ebi gina kadasug stiye swa daga. Ay kanya sik tagfanluk way ay sik nanfaligbatan way Fagtayukan. ⁸ Tagaki tuwa. Laman di maliam ay nafabul siginan ay nafagbulunan dawdaw. Anway mul wa ban am fiya tagbvt fag fanambagun. ⁹ Nus nga sinu fag taw at yud gfatunglus gfaning sas Fagtayukan At longan, kanya dia nsadi sas Funbalugu. Ay kanya fag taw nu gfaning tuwa sas Fagtayukan At longan, kanya insadi wa fiya sa tam Tama sas Banwa, ay anggan sa At Baguama. ¹⁰ Sik taw dewa ndasug sa ayu, ay nu dway gfoyung Fagtayukan At longan, lag gfasakbo anya sa ay bale. Ay lag ge longan igfanabayan anya. ¹¹ Anway sik taw nu nafanabayan way takatanya fag taw, kanya kata wa nu gtarabang ka fag taw sat mauri fag fagbulun. ¹² Ngayu yama ku fagalongunun sa ayu. Roro da kua kaumsig igriruk. Ku fakaumsigun nanlag aktuwa nangus ayu ay nansulitanan tuwa tam. Laman tam fagusegananun umdaul tuwa. ¹³ Ste am fadugsay fag mangena, Funbalugu At nafili fiya. Ay at ngay sisian ste nafadasug at fagusegananun sa emu te, gamatangan tuwa emu.