2 Corinthians
11 Siginan angku, Fandak, Fagtayukan Isus At-Suguan at sadi. Anway Funbalugu nafili wa angku. Ay anggan tam fadugsay, Takesug-Funbalugu. Nariruk ami sa ayu, sas Funbalugu At ngay taw sas fulan Kurintu. Ay anggan sas Funbalugu At ngay taw sas fagdaul talun Akaya. 2 Funbalugu tam Tama ay tam Fun Isus Fagtayukan At mamanyun nangus sa ayu ay At nanfanabayan ayu. 3 Gseg watam sa tam Funbalugu, tam Fun Isus Fagtayukan At Tama. Kanya tam Tama takafanyu ay manga tam Funbalugu At mafafaliaman. 4 Kanya tagfaliaman antam nus nge wain tam natakan. Laman anggan itam mafafaliaman tuwa tam tam iba gina e natakan. Tam famaliaman sa tam iba kata yangay tam Funbalugu At famaliaman si antam. 5 Ay gina dawdaw e gfauri antam kata nu e gfauri sa tam Fagtayukan, e gfaliaman tuwa dawdaw antam, kata nu e gfaliaman sa tam Fagtayukan. Anway insadi watam sas Fagtayukan. 6 Ay nus nga e gfauri emi, sanya ay faglagan wa te, e gfaliaman yangay ayu, ay e malabag tuwa ayu. Ay nu e gfaliaman emi, sanya ay faglagan wa te, e gfaliaman yangay ban ayu. Ay manga laman igfatvngvd ayu gina am gsungatan gina e gfauri ayu katvngvd yangay nu e gfauri sa emi. 7 Ay matvngvd em fagafanudun sa ayu te, nu e gfauri yangay ban ayu katvngvd nu e gfauri sa emi. Katanya yangay e gfaliaman ban ayu katvngvd nu e gfaliaman sa emi. 8 Kaumsig ami nu sumaful am te, e fagatakanun ami sas talun Asia. Anway mason wa fiya dawdaw nu gatakan ami. Katvngvd wa te, dua ami maasungatan anway gafateun wa emi. 9 Matvngvd wan nu gayup ami te, e gafateun wa emi. Fakatanyaun at masuad te, laman du ami gseg sa em fagmadaragangun. Laman em fagsegun sa tuwa tam Funbalugu At tagfaleleg sat kinkate. 10 Ay Kanya nafalfas tuwa emi siginan ka fag tagfauri tagafateun emi. Ay Kanya taba wa nafalfas emi. Em fagsegun ngani te, Funbalugu ban tagfalfas emi. 11 Ay am wa ban tagtarabang emi anway gdarangin tuwam emi. Ay nu katanya, ngayuk taw guseganan ban sas Funbalugu anway At fagbulun sa emi. Anway Funbalugu mamanyun emi anway nadungug at ngay taw at darangin. 12 Kata tuy em fagusegananun. Em amatanganan wan tagfoyung emi te, em ugali ste swa daga, ay anggan sigon em ugali sa ayu baliwa, matuyan ay malayun sat masine kata Funbalugu At nafamanyun sa emi. Ay du ami gfaning ste swa daga at ngay fagsafulun. Em fagfaningun sa tuwas Funbalugu At fakafanyuun. 13 Matignaun fagayu em nariruk sa ayu. Laman mafatap tuwam ay gsaful tuwam at masuad. Ay ku fakaumsigun te, laman nu nasaful tuwam sirut ku ugali katsi, bandi sumaful yay am at fagdaul. 14 Laman guseganan tuwam nu gfoyung am sa ay iba em ugali. Kata yangay nu guseganan ban ami gfoyung ay ugali gina mdasug tam Fun Isus At menit. 15 Teway e fagafanudun akwa fiya te, nasaful wam ku ugali, ay ganansiboun aw sa ayu taguna. Laman ban duwa ginan tuwa nu anam e fanambagun. 16 At masuad te, ganandalanun aw nangus sa ayu gina aw glo sas talun Masedunia. Ay gdog kyangay nandalan ayu gina aw guli siginans talun Masedunia. Ay nu nansibo akwa ayu at faduwa ginan, am wa ban tagtarabang angku gina aw tumunglus sas talun Naseg. 17 Ay dewa yud aw nafatunglus katanya ku fasadan, da kua gabukngan nu ganansiboun aw ayu. Nu e fasadan aw nus nge wain, da kdi kata ste swa daga fag ngay taw at ugali, takamafali sik uyup. Kanya nu glong te, kin wan ay rodi tv, yaya. 18 Tam Funbalugu At longan faggugat matuyan. Ay katanya yangay em longan sa ayu matuyan tuwa. Du ami nalong te, kin, nu dway katanya. 19 Ami tulu, aw ay Silas ay anggan Tagseg-Funbalugu, nafoyung ami sa ayu Funbalugu-At-Baguama, Isus Fagtayukan. Ay Isus dua gfainfolian At longan, gurungan wa fiya fagalay nalong. At longan faggugat kin, anway umsure wa fiya fagayu At longan. 20 Ay fagayu Funbalugu At fatuyanan umgurungan wa fiya. Anway nu Isus wa At nalong te, Kin. Anggan itam longi yangay te, Kin, katanyai tuwa, gina tam gseg sa tam Funbalugu. Anway insadi watam sas Isus. 21 Anway Funbalugu wan tagfatvngvd antam, ami ay anggan am, nu insadi tuwa tam sas Fagtayukan. Ay Kanya wan At nafili antam. 22 Ay Kanya yangay At nafat si antam sik fagsafulan te, Funbalugu At ngay taw watam. Ay Kanya At nafat si yangay antam At-Masine-Fag-Falad. Sik fagsafulan te, umsure wa ban fiya fagayu Funbalugu At nafatuyanan sa antam. 23 Funbalugu wan at nasaful te, matuyan ro ku longan sa ayu. Ebi ku fagyudun natunglus infoli sa ayu sas fulan Kurintu, at masuad te, laman di am kabalu siginan ku nalongan. 24 Du ami dawdaw e suguan matvngvd sa ayu sa ay fakafandiugun baliwa. Anway matvngvd wan ay fakafandiugun. Em fakaumsigun antuwa te, laman nantarabang ami ayu laman guseganan tuwam.
21 Nu katanya, intvngvd wan sa ku amatanganan te, kua gdog nansibo ayu. Laman di am e fakabaluun siginan angku. 2 Anway nu gfabaluanan kway ban ayu, sinu ban tagfauseganan angku. Anway am way tagfauseganan ban angku. Ay aw ngap nu gfabaluanan kway ayu. 3 Ku fagnarirukun sa ayu ebi laman nu gdog kyangay ban nansibo ayu, di am gfabaluanan angku. Anway at matuyan, siginan way ayu ku fagusegananun. Ay intuyan kua te, nu guseganan aktuwa, anggan am, guseganan yangay am. 4 Anway ebi gina aw griruk sa ayu, kabalu aw dawdaw. Ay guyway aw dawdaw. At masuad ebi ku fagnarirukun sa ayu bundi te, laman nanfabaluanan aw ayu. At masuad antuwa te, laman sumaful am te, kesug aktuwa dawdaw ayu. 5 Kua kaumsig nanfalimatan sa ayu siginan ku longan. Ay roro at ke asalanan nu gfabaluanan way sa tiba, bunwa aw fagtvngvd takabalu. Anggan am kabalu way am sirut. 6 Nu katvngvd anya at asalanan, balikam ay faurianan sa anya. 7 Ay am aliamani tuwa at fagbulun at mauri. Ay faliamani tuwa anya. Laman kanya di ban gayungan dawdaw. 8 Matvngvd nu glong aw ayu te, am longi anya te, kesug tuwami emu. 9 At masuad ebi ku fagnarirukun sa ayu, laman nangasaful aw ayu te, go gfaning tuwam ku longan fagayu. 10 Nus nga sinu at ke asalanan nu kaliam tuwam at asalanan, anggan aw kaliam aktuwa. Ay tam Fagtayukan nasaful wan ku fagnaliamun sat ke asalanan, nu e asalanan wa fiya, laman e fanambagun tuwa ban am. 11 Laman Tagfansalag dua nababo antam. Anway nasaful watam at ngay fasadan. 12 Gina aw ndasug sas fulan Truas, laman nanfoyung aw Fagtayukan At Masine-Fag-Barita sanya, tam Fun natarabang angku ay ngayu tuwa tagdungug sanya. 13 Dewa katanya, gamatanganan aw dawdaw, anway da ku e nalag tam fadugsay Titu sanya. Ay nu katanya, nalo akwan sanya ginan ay natunglus akwa sas talun Masedunia. 14 Guseganan watam sa tam Funbalugu. Anway e sik fanbabo watam siginans Funbalugu sa at mauri, anway insadi watam sas Fagtayukan. Ay siginan tam foyungan, Funbalugu nafasaful sas fagayu talun at ngay taw Fagtayukan At ugali. Ay ka fag fagsafulun katvngvd sik bebanglu nu kaayuk sas fagdaul talun. 15 Ay fagayu tam kata watam sik mabebanglu sas Funbalugu anway insadi watam sas Fagtayukan. Ay ka fag mabebanglu indasug sas kinbalabag fag ngay taw ay manga sat kumkamin fag ngay taw. 16 Sat kumkamin fag ngay taw, tam foyungan sa anya kata way sa sik kinkate fag taw at mabayuk. Ay roro sat kinbalabag fag ngay taw, tam foyungan kata tuwa sik bebanglu at tagfaleleg taw. Sinu ro at mafafoyung katvngvd anya. 17 Anway dua tam gfesali Funbalugu At longan kata tibak taw at fagbulun. Roro ngap Funbalugu nasaful wa te, tam foyungan di mafanlamangan. Anway Funbalugu wan At nasugu antam ay insadi watam sas Fagtayukan.
31 Go em fagnadogun nu glong ami ayu, iglong ami te, masine em fagbulun. Ay go em fakaumsigun nangkata ami tibak taw takaumsig sik rirukan siginan tibak taw, laman gfasaful ayu te, masine em fagbulun. Ay go em fakaumsigun sik rirukan siginan ayu, laman tibak taw sumaful te, masine em fagbulun. Ay go yaya. 2 Yaya. Anway sa em amatanganan, am fagayu kata wam sik rirukan tagfoyung te, masine em fagbulun. Laman fagayu taw nu natap, nasaful ka fag rirukan at masuad. 3 Anway ay fagbulun wan tagfoyung nus nga nday fag taw te, am wan takata sik rirukan siginans Fagtayukan. Ay ami taguba ka fag rirukan. Ay ka fag rirukan at fanriruk bunwa ste swa daga. Anway tam Tagleleg-Faggugat-Fag-Funbalugu At-Masine-Fag-Falad At nariruk. Ay at fagrirukan bunwa sa sik dalifi, kata Ku-Unga ebi At-Longan. At fagrirukan sawa sa ngay taw at amatanganan. 4 Em fagnalongun katanya, anway gafanud ami sa tam Funbalugu At fatuyanan sa antam sas Fagtayukan. 5 Bundi ami at ke fagmadaragangun at faginsakun em fagsafulun, laman nabul em fasadan mandi. Roro ngap em fagmadaragangun siginan tuwas Funbalugu. 6 Funbalugu tuwa tagfe fagmadaragangun sa emi. Laman mafafoyung ami sik bagu fag fatuyanan siginans Funbalugu. Kanya fag fatuyanan bundi siginan Ku-Unga ebi at rirukan. Siginan tuwa At-Masine-Fag-Falad. Anway Ku-Unga At-Longan igfate way taw. Ay roro ngap antuwa At-Masine-Fag-Falad tagfon leleg. 7 Ebi fag fatuyanan at fagrirukan sis dalifi yay at nafastiye fakateun. Ay gina bagu kadasug, e fagmasineun yay dawdaw. Ay at ngay Taw-Tagagbuan dua mafalinggat sa Ku-Unga at mata anway masulo wayay dawdaw. Ay bandi garimanan wa kalayung at mata. 8 Dewa ka fag fatuyanan e fagmasineun, At-Masine-Fag-Falad At nafon fag bagu fag fatuyanan glabi yay dawdaw nu e fagmasineun. 9 Dewa te, ka fag fatuyanan wa ebi at tagfate taw e fagmasineun tuwa, ay glabi yay dawdaw katsi at bagu fag fatuyanan at fagmasineun anway nafasadi at taw sas Funbalugu. 10 Ay kin. Ka fag fatuyanan dewa e fagmasineun ebi, katsi du e fagmasineun. Anway at bagu fag fatuyanan at fagmasineun glabi yay kanya. 11 Ebi fag fatuyanan dewa gyud glugo, gina bagu kadasug e fagmasineun yay dawdaw. Ay at bagu fag fatuyanan at yud e fakatabuan, glabi yay dawdaw kanya nu e fagmasineun. 12 Ay nu katanya tuwa em fagsegun, di ami kapla nu gfoyung ami. 13 Em foyungan di kata sa Ku-Unga at fagbulun. Anway Ku-Unga natabun way at mata. Laman at ngay Taw-Tagagbuan di glag nu garimanan kafayas at fagmasuloun si at mata. 14 Ay at Taw-Tagagbuan at amatanganan infiyaran wan. Ay anggan katsi nu gtap sanya fag fatuyanan baliwa, at amatanganan kata yay nu e fantabun at yud nabul. Anway kaduge yay ban kafandiug sas Fagtayukan fagtvngvd, nu e nabul ban at fantabun. 15 Ay kin anggan katsi. Nu e natap yay sa Ku-Unga At-Rirukan, sanya fag ngay taw at amatanganan kata yay nu e fantabun. 16 Ay roro sik taw tagfaning sa tam Fun, rodi e nabul wan at fantabun sat amatanganan. 17 Tam Fun ay At-Masine-Fag-Falad sadi way. Ay nus nga sinu fag taw tam Fun At-Masine-Fag-Falad nut si tuwa anya, kanya kata wa nu malfasan. 18 Ay fagayu tam dua tam e fantabun sa tam mata. Laman gina e luminggat sa tam mata, lumag tam Fun At fagmasineun. Ay tam Fun At-Masine-Fag-Falad tagfasaman tam ugali. Laman tam ugali kata yangay tam Fun At ugali. Ay umkugat tam fagmasineun.
41 Anway Funbalugu At fakafanyuun At nasugu emi laman nanfoyung ami, ay di ami gfalukmeun sa em amatanganan. 2 Ay kalimata tuami sa at mapla ay sa at masuksukan fag ugali. Ay di ami gfanluk ay di ami gfasaman Funbalugu At longan. Ay nafayamagun tuwami nu gfoyung ami at matuyan. Laman fagayu taw lumag te, masine tuwa em fagbulun. Ay manga Funbalugu nasaful tuwa em fagbulun. 3 Ay nu dway mayamag em foyungan at Masine-Fag-Barita, sa tagakaminun fag ngay taw dia inyamag. 4 Fakatanyaun anway ste swa daga fag taw yabi at fun nafasuksuk dawdaw at yud kafandiug fag ngay taw at amatanganan. Laman kanya dua lumag at Masine-Fag-Barita at fagmayamagun sas Fagtayukan At fagmasineun baliwa. Ay Kanya kata yangay fiya fiya tam Funbalugu. 5 Ay du ami nafoyung sa em fagmadaragangun baliwa. Em foyungan antuwa te, tam Isus Fagtayukan, Kanya anwa tam Fun. Ay ami At fanuguan way ami. Laman Isus e fanambagun. 6 Ay Funbalugu wan ebi At nalong te, Asurei fagmayamagun siginan sad marum. Ay Kanya yangay anggan katsi At nafayamag sa tam amatanganan. Laman sumaful tuwa tam Funbalugu At fagmasineun. Gina tam lumag Tam Fagtayukan At mata. 7 Em bilug kata way sik bisu daga at yud matvngvd. Ay em foyungan Funbalugu At longan kata sik mesug fag nanuranan at masuad sanya. Ay laman tibak taw sumaful te, em foyungan siginans Funbalugu At fagmadaragangun. Ay bundi siginan em amatanganan. 8 Dewa ngayu at faurianan sa emi nus nga ndaginan baliwa, di ami nababa wan. Ay dewa yud ami gsaful em fagbulun te, tain ban, di ami mabaluanan. 9 Ay dewa nus nga sinu tagfafanggalutan emi, e gtarabang tuwa emi. Ay dewa e nafafulid emi sas daga, di nafate emi. 10 Ay faggugat em bilug gakateun wan, kata nu e gfate tam Isus. Laman em bilug tagfasure Isus At kinleleg At ugali. 11 Anway kaduge ami gleleg, faggugat gakateun way ami. Laman tam Isus e fanambagun. Laman em bilug tagakateun tagfasure Isus At kinleleg At ugali. 12 Ay nu katanya, em fagakateun faggugat, laman am, gleleg tuwam faggugat. 13 At-Rirukan nalong wa te, Anway kafandiug aktuwa ay, nanfoyung aktuwa. Katanya yangay em fakafandiugun. Anway kafandiug tuwami ay, nanfoyung yangay ami. 14 Anway nasaful wami te, Kanya At nafaleleg tam Fun Isus, ay Kanya yangay ban tagfaleleg emi kata tam Isus. Ay Kanya yangay ban tagtaban emi gfasfuan ayu sas Isus At akbang. 15 Ay fagayu em fagatakanun, laman e fanambagun ban am. Laman Funbalugu At fakafanyuun umdasug tuwa sasa ngay taw. Laman ngayu tuwa ban taguseganan dawdaw sas Funbalugu. Laman ngayu tuwa tagseg Funbalugu. 16 Ay nu katanya, di tam gfalukmeun sa tam amatanganan. Dewa tam bilug garimanan kafanalo, e gfatvngvd tuwa sa tam amatanganan kayu menit kayu menit. 17 Tam ngay fagatakanun katsi kata yay nu alay ay dia glugo. Ay ka fag fagatakanun yay tagfamasadan sik fagmasineun ban dawdaw sa antam at yud katabu. Ay at yud e gfasud. 18 Ay nu katanya, lag tam dawdaw gamatangan tam nalag ste swa daga. Tam fagamatanganun antuwa sa tam fagyudun glag katsi. Anway tam ngay nalag katsi dua ban glugo nu maliam. Ay tam fagyudun glag katsi at fagmasineun di ban e fakatabuan.
51 Nasaful watam te, tam bilug ste swa daga kata yay sik fayag ay umrasras yay. Ay dewa katanya e sik bale yay tam sas Banwa at yud e fakatabuan. Ay at yud sik taw at naawat. Tam Funbalugu tuwa At naawat. 2 Ay katsi nafanguni watam anway kaumsig watam nansulun tagsas Banwa fag bilug takata sik lanbung. 3 Anway nu nasulun watam, di tam kata sik taw at yud e lanbung. 4 Kaduge tam gleleg si tam fayag ste swa daga, gamatang yay tam sas kabalu. Dua tam kaumsig at yud e bilug. Tam fakaumsigun antuwa at tibak bilug. Ay at yud katabu fag leleg natubus sat ke fakatabuan fag leleg. 5 Funbalugu At fagnaawatun antam at fasadan katanyai tuwa tam bilug. Ay katsi nafat si wa antam At-Masine-Fag-Falad, At fanfatuyanan sa antam. 6 Ay nu katanya, malimuanan tuwa tam sa tam amatanganan. Ay nasaful watam te, kaduge tam gleleg ste fag bilug, dia tam maful sa tam Fun sas Banwa. 7 Ay katanya tam ugali anway kafandiug tuwa tam sa Anya, dewa tam yud batang glag Anya. 8 Ay malimuanan tuwa tam sa tam amatanganan. Ay tam fakaumsigun te, laman gubun watam tuy fag bilug. Ay nangaful watam sa tam Fun sas Banwa. 9 Ay dewa tuy fag bilug ay dewa tam naubun tuy tam bilug. Tam fasadan te, laman gfauseganan tam tam Fun. 10 Anway fagayu ban tam umful yay tam sas Fagtayukan At Fagnansarapan-Asalanan-Fag-Faglunggungan. Laman nanbul ban tam sik ngay masine ay ate sik ngay mauri, nus nga se taw tam fagbulun katsi kaduge ste fag bilug. 11 Ay nu katanya, nasaful wami te, kanya em fakalimuun sa tam Fun. Ay katanya wayay, fagmatvngvdun wa ngani nu gfoyung ami sasa ngay taw. Tam Funbalugu nasaful wan em ugali. Ay ku ayupan, anggan am, nasaful tuwam em ugali. 12 Dewa ami nafoyung ayu em fagbulun at masine, at masuad bunwa te, segi emi. Em fagnafoyungun at masuad antuwa te, laman guseganan tuwa ban am sa emi. Laman e foyungan tuwa ban am sa sik taw tagsarap tibak taw te, go tain at fagbulun. Ay roro ngap dua gsarap te, go tain at ugali. 13 E nalong sa emi baliwa te, kanya fag taw naliam at amatanganan. Dewa katanya em fagbulun, at masuad te, laman Funbalugu e fanambagun. Ay roro nu gdi naliam em amatanganan, at masuad te, laman e fanambagun ban am. 14 Anway tam Fagtayukan wa At fakafanyuun tagmagurang emi. Ay nasaful ami te, sadi wadi At kinkate, laman fagayu taw e fanambagun. Ay nu katanya, fagayu taw kata yangay nu nkate. 15 Ay Fagtayukan At faginkateun laman fagayu taw gleleg tuwa. Ay kanya fag ngay taw nu e leleg tuwa, at faglelegun bundi sa anya mandi. At faglelegun sa tuwa At kinkate ay tagdog yay gleleg laman at ngay taw e fanambagun. 16 Ay nu katanya, katsi ami du ami gamatangan sik taw at ugali kata sik taw ste swa daga nu gamatangan. Ebi dewa ami gamatangan sas Fagtayukan te, katanya. Katsi du ami gamatangan Anya takatanya. 17 Anway nus nga sinu at kinsadi sas Fagtayukan, kanya sik bagu wa fag taw. Naubun wan at dan fag ugali. Ay nafaning wa sat bagu fag ugali. 18 Kanya fag fagbulun siginan was Funbalugu, At nafasadi antam sa Anya siginans Fagtayukan At fagbulun. Ay Kanya At nasugu emi em fagnanfoyungun. Laman at ngay taw umsadi yangay sa Anya. 19 At masuad te, Funbalugu nanfasadi at fagdaul daga at ngay taw sa Anya siginans Fagtayukan At fagbulun. Ay di gtap ka fag ngay taw at asalanan. Ay Funbalugu nasugu emi em fagnanfoyungun sasa ngay taw laman umsadi yangay sa Anya. 20 Fakatanyaun, ami wan Fagtayukan At suguan. Ay Funbalugu wan tage longan sa ayu anway nafoyung ami sa ayu. Ay nu katanya, matvngvd nu glong ami sa ayu sas Fagtayukan At fagmadaragangun te, e fagmasadiuni sas Funbalugu. 21 Anway Funbalugu natap yay Fagtayukan kata at ke asalanan, dewa gyud e asalanan, laman e fanambagun watam. Laman nu msadi watam sa Anya e fagmasineun watam siginans Funbalugu.
61 Anway ami wan ay Funbalugu tagudgufudan sa At fagbulun, ay matvngvd nu glong ami sa ayu te, fasinei nu maugalian am. Laman Funbalugu At fakafanyuun sa ayu e masuad tuwa. 2 Anway Funbalugu At-Rirukan nalong te, Gina ndasug ka fag menit kafanyu Aw emu, ay nadungug Aw am darangin. Ay ginanya fag ngay menit nu e malabag, ay Aw wan tagtarabang emu. Amatangani. Katsi wa fag ngay menit Funbalugu nu kafanyu ayu. Ay katsi wa fag ngay menit, Funbalugu nu gbalabag ayu. 3 Du ami kaumsig gfasalag nus nga sinu fag taw. Laman di e kafoyung te, at tiba em foyungan gsalan way. 4 Ay anway ami wan Funbalugu At fanuguan, fagayu em fagbulun gfasaful tuwa sa tibak taw te, masine em ugali. Dewa ami e fagbarisun. Ay dewa e gfaurianan sa emi. Ay dewa ami e fagatakanun. Ay dewa ami e fakabaluun. 5 Ay dewa e nafalang emi. Ay dewa e nasungsung emi. Ay dewa e gfaringangan dawdaw sa emi. Ay dewa ami dawdaw kalufuy igfagbulun. Ay dewa gyud ami maatiug. Ay dewa ami kalunus. 6 Ay em ugali malayun tuwa sat masine. Ay gsaful tuwami sat matuyan fag longan. Ay nafanya tuwami. Ay malukme tuwami. Ay gfaning tuwami sa At-Masine-Fag-Falad. Ay matuyan wa fiya em fakafanyuun. 7 Ay matuyan tuwa em longan. Ay Funbalugu At fagmadaragangun si tuwa emi. Ay masine tuwa em ugali, kanya kata sik famabarangian sa em siun fag take ay kata sik famalabag sa em wala fag take. 8 Ay dewa e gseg emi, ay dewa e kalimata emi. Ay dewa e nalong te, masine em fagbulun. Ay dewa e nalong te, mauri em fagbulun. Ay dewa e nalong te, em fagbulun dua matuyan. Dewa e nalong katanya, matuyan tuwa em fagbulun. 9 Ay dewa e gayup sa emi te, sinu siring ka fag ngay taw. Ay dewa e gayup katanya, at ngayuk taw nasaful tuwa em ugali. Ay dewa ami gakateun, gleleg yay ami. Ay dewa dawdaw e nafegan emi, di nafate emi. 10 Ay dewa ami dawdaw kabalu, faggugat guseganan tuwami. Ay dewa ami sik yud mabalan, nafe balan tuwami sat ngay taw. Ay dewa ami yud e kwa, kata tuwami at ke fage kwaun fag taw. 11 Du ami e suksukan. Nafayamagun wami sa ayu, Taw-Kurintu. Ay nafoyung wami ayu anggan em fakafanyuun dawdaw sa ayu. 12 Di ami gfasirutun em fakafanyuun sa ayu. Am way tagfasirutu@ nu kafanyu am sa emi. 13 Ay katsi iglong aw sa ayu kata nu ku unga am te, Afanyui tuwa emi katvngvd nu kafanyu ami sa ayu. 14 Lag faudgufudan sa at yud kafandiug. Go sangay sik fagmasineun ay sik fagmauriun igdiuganan. Ay go yaya. Ay go sangay sik fagmayamagun ay sik marum gasfuan. Ay go yaya. 15 Go Fagtayukan gfadiuganan sa At-Yud-E-Masuad. Ay go igdi. Ay go sik takafandiug kata yangay sik yud kafandiug. Ay go igdi. 16 Go Funbalugu At bale gfadiuganan sas tawtawan. Ay go igdi. Ay itam antuwa tam Tagleleg-Faggugat-Fag-Funbalugu At bale. Kata Funbalugu At-Rirukan at longan te, Namanwan ban Aw sa Ku ngay taw, ay gufud Aw anya. Ay Aw wa ban Ku ngay taw at Funbalugu. Ay kanya ban Ku ngay taw wan. 17 Ay nu katanya, Funbalugu nalong sa At ngay taw te, Ayayui wan sanya ginan fag ngay taw at yud kafandiug. Ay masamani tuwa siginan anya. Ay lag kaakbang nus nge wain sat mafurat. Ay igfaful Akban ayu sa Angku. 18 Ay Aw wa ban ay Tama. Ay am wa ban Ku baguama ay Ku baguina, Tiba-Tungud-At-Madaragang-Fag-Funbalugu At longan te.
71 Ku fakesugun ku ngay taw. Anway Funbalugu wan At nafatuyanan katanya sa antam, nu katanya, fasinei tuwa tam ugali. Laman di e gfasagbatan at mauri sa tam bilug ay sa tam amatanganan. Laman malayun tuwa tam sat masine, anway gseg watam sa tam Funbalugu. 2 Afanyui tuwa emi. Madyay di ami e asalanan sa ayu, nus di sadik taw. Ay di ami nafe asalanan ayu, nus di sadik taw. Ay manga di ami gfanluk ayu, nus di sadik taw. 3 Ku fagnalongun katanya bundi te, nanfoyung aw te, mauri ay fagbulun. Madyay aro nafoyung ku ayu te, katvngvd anya ku fakesugun sa ayu, nu gaufudun aw ayu dewa tam gleleg ay dewa tam kate. 4 Matvngvd ku fagafanudun sa ayu. Ay matvngvd ku faguseganun sa ayu. Ay matvngvd tuwa nu gfaliaman am angku. Ay dewa ngayu tagfauri sa emi, guseganan aktuwa dawdaw dewa katanya. 5 Dewa ami indasug sas talun Masedunia, du ami e nafafiyan em lufuy. Anway e gfauri wayay emi nus nga ndaginan baliwa. Ay e gfabarangian way emi siginan em duwa dayu. Ay anggan kalimu ami sa em amatanganan. 6 Dewa katanya, Funbalugu sik tagfaliaman sas taw takabalu, ay gfaliaman yangay emi madyay indasug tam Titu. 7 Ay At nafaliaman emi bundi Titu at naadasugan fagtvngvd, anggan tuwa siginan ay nafaliaman Titu. Ay kanya nafoyung sa emi te, kesug tuwam angku. Ay kabalu way am anway matvngvd ku fakabaluun. Ay matvngvd nu kafanyu wam sa angku. Ay anway katanya, ku fagusegananun inkugat yay siginan ebia taw. 8 Dewa ebi nafabaluanan aw ayu siginan ku rirukan, katsi da kdi kabalu, ebi dewa aw kabalu. Katsi nasaful kua te, ku rirukan dewa nafabaluanan ayu, di glugo nu kabalu am. 9 Ay katsi ku fagusegananun bunwa siginan ebi ay nabaluan. Ku fagusegananun antuwa te, natubus tuwam ay ugali siginan ay nabaluan. Anway ay fakabaluun siginan tuwas Funbalugu. Ay nu katanya tuwa di am e mauri siginan em nalongan. 10 Anway sik taw at fakabaluun nut siginan tuwas Funbalugu, ka fag taw natubus tuwa at ugali ay umbalabag tuwa. Ay di ban e fakabaluun. Ay roro ngap ste swa daga fag ngay taw at fakabaluun igfasure way fakateun. 11 Ay amatangani. Ay fakabaluun nut siginan tuwas Funbalugu e masuad tuwa sa ayu. Anway katsi nafoyung wa long am te, du ami gfaning sas asalanan. Ay kalimata tuwam sa ka fag asalanan. Ay kalimu tuwam sa ban at faurianan. Ay matvngvd tuwa nu kafanyu am. Ay matvngvd yangay nu kaumsig am gfaning sat masine, dewa e gfauri sa tagasalanan. Nus nge wain ay fagbulun nafasaful am angku te, di am e asalanan sa ebi fag fagbulun. 12 Ay dewa aw nariruk sa ayu ebi, bunwa sa ka fag tagasalanan baliwa. Ay bunwa sa ka fag tagasalanan at fagfauriun baliwa. Ku fagnarirukun antuwa te, laman nanfayamag akway sa ayu te, Funbalugu nasaful te, matvngvd ay fakesugun sa emi. 13 Kanya sik famaliaman tuwa emi. Ay tuy yangay tagfaugat em fagusegananun siginans Titu at fagusegananun. Anway am wan at nafanabayan sas Titu at amatanganan. 14 Ebi nafoyung aw sas Titu te, guseganan aktuwa sa ayu. Ay anggan katsi di am gfaplaan angku. Ebi matuyan wan fagayu em foyungan sa ayu. Ay katsi ingurungan wa fiya fagayu em foyungan ay fagbulun sas Titu. 15 Ay inkugat Titu at fakafanyuun sa ayu. Anway kanya inkumsig te, mafali tuwa nu gfaning am sa at longan. Ay anggan mafali tuwa nu nafasakbo am anya, dewa am kalimu ay kudkulugan. 16 Ay guseganan aw anway e fagafanudun akwa fiya sa ayu.
81 Em ngay fadugsay. Kaumsig ami nafoyung sa ayu Funbalugu At nafamanyun sasa ngay Funbalugu bale at ngay taw sas talun Masedunia. 2 Anway dewa mason at faurianan sanya fag ngay takafandiug, guseganan tuwa dawdaw. Ay dewa bangan yud e kwa, nafaayu tuwa nu gfon at fagayudanun sa tibak takafandiug. 3 Anway aw wan tagfatuyan te, fagayu at labi anya nafon wan, ay nafamut yay ban. Anway katanya tuwa ka fag ngay takafandiug at fasadan mandi. 4 Anway matvngvd nu nalong sa emi te, Anggan ami tumarabang ami nu gfon sas Funbalugu At ngay taw at ke fagayudanun. 5 Ay kanya at nafon, bundi kata em fagsafulun. Anway kanya taguna at ke fasadan laman igfaning tuwa sas Funbalugu, ay anggan sa emi. Anway katanya Funbalugu At fakaumsigun. 6 Ay nu katanya, matvngvd nu nalong ami sas Titu te, laman kanya tumarabang ayu. Laman anggan am nanfagurungan tuwam sa ebia taw ay nafasigad nu gafonun am anway sa ay fakafanyuun. 7 Ay am glabi tuwam ay iba sat kasinean ay fagbulun. Tenday sa ay fakafandiugun. Ay sa ay longan. Ay sa ay fagsafulun. Ay sa ay fagmaseganamaun. Ay anggan sa nu kesug am emi. Ay nu katanya, katsi falabii yap nu gfon am sa tibak takafandiug at yud e kwa anway kafanyu tuwam anya. 8 Dewa katanya, ku longan bunwa sik suguan. Ku fagnalongun anakway nanfaskud ayu te, go gurunggan ay fakafanyuun. Ay go ay fakafanyuun katvngvd yangay sa tibak takafandiug sa tibak fulan. 9 Anway nasaful wam te, tam fun Isus Fagtayukan kafanyu tuwa. Anway Kanya naubun yay at ngay fagmabalanun sas Banwa. Ay nangakata yangay at yud e kwa ste swa daga, laman mabalan tuwam siginan At yud e kwa. 10 Kata tuy tuwa ku fasadan katsi sa ay fagbulun. E gbanwa am wan taguna takaumsig gfon, ay anggan at nafasigad at nafon. Ay katsi fatunglusi tuwa takatanya ay fasadan. 11 Ebi gafonun tuwam dawdaw. Ay katsi fagurungani tuwa katanya. Fainfaluani way ngani nus nga seyu ginan ya. 12 Anway nus nga sinu takaumsig gfon, foni tuwa. Anway Funbalugu kaumsig tuwa sik taw at nafon nu gfainfaluan tuwa sat nanuranan. 13 Ay dewa katanya, aw kua kaumsig nu e fagayudanun am laman tiba du e fagayudanun. 14 Ay katsi am wan at ke nanuranan ngayu. Ay nu katanya tarabangi sa at yud e kwa. Ay laman bandi am nu e fagayudanun yangay ban am, kanya fag taw tumarabang yangay ayu. Ay nu katanya, fagayu taw kayu way at sadi. 15 Ay At-Rirukan nalong te, Kanya ngap at nafaful at ngayu, du e sawad. Ay kanya ngap dewa alay at nafaful, di e fagayudanun. 16 Guseganan ami sas Funbalugu, anway Kanya nafaamatanganan sas Titu te, laman kafanyu yangay ayu katvngvd yangay nu kafanyu ami ayu. 17 Anway Titu gfadiuganan yangay sa em fasadan. Ay anway kaumsig tuway katanya, at fagnaloun sanya sa ayu at fasadan tuwa mandi. 18 Ay nafalo yangay ami fiya at sadi tam fadugsay sa ayu. Ay fagayu taw sasa ngay Funbalugu bale kaumsig dawdaw kanya tam fadugsay nu gfoyung at Masine-Fag-Barita. 19 Ay glabi yay kanya, fagayu taw sasa ngay Funbalugu bale at nafili kanya tam fadugsay. Laman nangufud emi nu nanguba ban ami ay famanyun fag fagafonun. Katanya em fagbulun laman e gseg tuwa ban sa tam Fun Isus. Ay gfasaful sa tibak taw te, kaumsig ami gtarabang. 20 Ay mamatanganan tuwami dawdaw. Laman di e taw glong te, mauri em fagbulun, gina ami gtanud ay guba ka fag famanyun fag ngay salafi. 21 Anway em fasadan te, laman masine tuwa fagayu em fagbulun. Ay bundi tam Fun fagtvngvd at nasaful, anggan tuwa at ngay taw at nasaful em fagbulun. 22 Ay nafalo yangay ami fiya sadi ya fiyak fadugsay sa ayu. Laman nangufud ka fag duama. Ngayu ginan wan nu gfaskud ami kanya em nalong tam fadugsay. Ay kanya kaumsig dawdaw nantarabang emi nus nge wain tam fagbulun. Ay katsi inkugat yay nu kaumsig nantarabang. Anway kanya e fagafanudun wa fiya siginan ayu. 23 Ay Titu, kanya ku ufud ebi ginan sa ku fagbulun laman nantarabang ayu. Ay kanya tam fadugsay fag duwa at nangufud Titu gina ban nanlag sa ayu, kanya at ngay Funbalugu bale at ngay taw at nasugu. Laman e gseg dawdaw sa tam Fagtayukan. 24 Ay nu katanya, afanyui tuwa ka fag tuluk ama at kumdasug ban sa ayu. Laman fagayu taw sasa ngay Funbalugu bale sumaful te, e fakafanyuun wam fiya. Ay katanya ku fagusegananun sa ayu.
91 Du e masuad nu nariruk aw sa ayu sas fagafonun baliwa sas Funbalugu At ngay taw sas talun Naseg. 2 Anway nasaful aw te, maseganama wan nu gtarabang am. Ay guseganan aw dawdaw igfoyung katanya sasa ngay taw sas Masedunia te, siginan ebi fag banwa am Taw-Kurintu sas talun Akaya gafonun tuwam. Ay Taw-Masedunia nu nadungug katanya te, maseganama tuwam, anggan kanya gafonun yangay. 3 Ku fagnasuguun ngani tam tuluk fadugsay sa ayu sas fulan Kurintu laman nanfatagak ayu te, famasadani ay fagafonun kata ku longan ebi sas Taw-Masedunia. Laman sa ebi ku nafoyungan ayu sa ay fagbulun baliwa sas Taw-Masedunia umsure wa fiya. 4 Anway tibak Taw-Masedunia labon manga nangufud ban angku gina aw sa ayu. Ay nu nalag way te, dia mangaro am mafamasadan, mapla ban ami. Ay anggan am mapla yangay ban am. Anway gafanud akwa te, gafonun wam fiya. Ay roro yam mafamasadan. 5 Ay nu katanya, ku fasadan te, taguna ganansuguun akyay tam fadugsay fag tulu sa ayu. Laman kanya nanfamasadan wa fagayu ay fagafonun ay nafatuyanan ebi. Laman gina aw umdasug sa ayu, ay fagafonun mafafulan wan. Kayu niya nu ay fasadan tuwa gfon, ay bundi sik fabulunan. 6 Amatangani te, nus nga sinu fag taw nu alay way at natanum, alay way at nabul. Ay nus nga sinu nu ngayu tuwa at natanum, ngayu yangay at nabul. 7 Nu sik taw wan, foni kayu at fasad fagafonun. Ay lag gfalangfianan. Ay bundi sik fabulunan. Anway tam Funbalugu kesug tuwa nus nga sinu taguseganan nu gfon. 8 Ay tam Funbalugu mafafon tuwa nus nge wain ay fagayudanun. Ay gfakasakan tuwa sa ayu. Laman anggan am mafatarabang tuwam sa tibak taw tagfagbulun at masine. 9 Anway At-Rirukan nalong te, Sik masine fag taw mafafon tuwa nus nga nday at yud e kwa. Ay at fakafanyuun faggugat tuwa. 10 Tam Funbalugu At mafafon fantanum sa tagtanum, ay anggan nafadaul, laman ban e fakonun. Ay Kanya yangay ban At mafafon sa ayu kata ka fag fantanum. Ay Kanya nafadaul ay nafaayu ay nabul at buadan. At masuad te, am nabul ban kayu yangay am nafon ebi sa am iba. 11 Anway nu ngayu tuwa ay nafon sa ay iba, ngayu yangay ban Funbalugu At nafon sa ayu. Ay nu katanya, ngayu tuwa bank taw taguseganan sas Funbalugu nu nauba ami ay famanyun. 12 Anway sa ay natarabangan katanya, Funbalugu At ngay taw nabul wan at fagayudanun. Ay anggan ngayuk taw matvngvd tuwa nu guseganan sas Funbalugu. 13 Ay nu katanya e gseg tuwa ban dawdaw sas Funbalugu. Anway ay fagbulun nafasaful sa tibak taw te, am wan tagfaning sas Fagtayukan at Masine-Fag-Barita. Anway maseganama tuwa nu gfon am sa anya ay anggan sas fagayu taw. 14 Ay kanya kesug tuwa dawdaw ayu. Ay igdarangin yangay ayu sas Funbalugu. Anway matvngvd Funbalugu nu kamanyun sa ayu. 15 Guseganan watam sa tam Funbalugu anway At nafon sa antam at tiba tungud wa fag masine. Ay du e taw e mafafoyung nu katvngvd wa niya.
101 Aw wan Fandak, ay katsi iglong akyangay sa ayu kata tam Fagtayukan nu malukme ay nu mabayan. Ay e nalong te, Fandak gina maful sa antam, malukme tuwa. Ay roro nu dway ste si antam, kanya gfabitsug way nu glong sa antam. 2 Katsi matvngvd nu glong aw sa ayu te, maamatangani ay fagbulun. Laman nu ndasug ban aw, da kdi ngani gfabitsug nu glong aw sa ayu. Dewa aw gayup te, gfabitsug akro ku longan gina aw umdasug, nu glong aw sa at nalong te, Fandak ay at ngay ufud at ugali gfaning way ste swa daga fag ngay taw at ugali. 3 Anway dewa tam gbanwan ste swa daga, di tam gfabarangian kata ste swa daga fag ngay taw. 4 Tam famabarangian di kata ste swa daga fag ngay taw at famabarangian. Roro ngap tam famabarangian at fagmadaragangun siginan was Funbalugu. Laman antuwa tam baliwa mafafaliam sa tagfabarangian sa antam at fagmadaragangun nus nga ndaginan. 5 Ay mafafaliam tuwa tam sat yud matuyan fag ngay longan. Ay mabo tuwa tam sa at ngay tagfalabi at longan nu gsalag way sa tiba te, laman dua sumaful sas Funbalugu baliwa. Ay mafafabali tuwa tam te, laman fagayu taw at amatanganan igfaning tuwa sa tam Fagtayukan. 6 Ay nu nadungug aw te, igfaning tuwam, kamasadan akyay ku fanfauri ban sas fagayu takamabo. 7 Dewa gina maamatangani tuwa nu nalag am. Sik taw nu gafanud wa te, kanya Fagtayukan wa At taw, amatangani yangay te, anggan aw, Fagtayukan akyangay At taw. 8 Dewa aw gfalabi sirut ku longan sa tam Fun At nafon angku fag fagmadaragangun baliwa, da kdi kapla ayu. Anway ka fag fagmadaragangun at masuad sik fanfatvngvd tuwa ayu. Ay bundi sik famaliam ay fakafandiugun. 9 Kua kaumsig nu e gamatangan am te, Fandak at fagnarirukun sik famalimu way emi. 10 Anway e nalong te, Fandak at fagnarirukun at longan gfabitsug way. Roro mangaro nu ndasug wan, at taw nu glag anya, mamomuy way ay at longan du e masuad. 11 Sik taglong katanya wa fiya ay asafuli ngay te, katanya ku ugali, dewa sa ku rirukan gina aw gyud sanya, ay dewa sa ku fagbulun dewa aw sanya. 12 At matuyan, aw da kua kaumsig nanfaladlabian ku fagbulun sa sik tagfandaragang fag taw at fagbulun. Anway at ngay tagfandaragang fag taw dua mamatanganan. Anway kanya nanfaladlabian way sa tibama tagfandaragang at fagbulun, laman nanlabi at sadi. 13 Guseganan aw nanfoyung ku fagbulun at masine nus nga nday fag taw. Ay dewa katanya, da kdi nanfalabi sa At nafon angku fag fagbulun baliwa. Ay nus nga setaw ku nafoyung sa ayu, katanya wan Funbalugu At nafon sa angku fag fagbulun. 14 Ay nu katanya, da kdi gfalangfianan Funbalugu nu nasugu wa angku sa ayu. Nalo akwa fiya dewa ngayayu. Madyay aw yay at taguna at nafoyung sa ayu Fagtayukan At Masine-Fag-Barita. 15 Ay dewa aw guseganan nanfoyung nus nga nday fag taw ku fagbulun at masine, da kdi gfalabi ku fagbulun, dewa ro tibak taw tagfoyung sanya. Ku fasadan te, gina ay fakafandiugun umkugat, umkayu yangay ku fagananfagbulunun sa ayu. 16 Laman ban nanfoyung akyangay sanya fag ngay talun sa ay ngaba dayu. Anway da kdi kaumsig gfalabi sa tibak taw ku fagbulun, dewa ro ku iba tagfoyung sanya. 17 Anway At-Rirukan nalong te, Am fagfoyungun sa am iba bundi am fagbulun mandi. Am fagfoyungun sa am iba antuwa tam Fun At matvngvd fag fagbulun sa emu. 18 Funbalugu At fagusegananun bundi sa sik taw at nalong te, Masine ku fagbulun. Funbalugu At fagusegananun antuwa sa sik taw nu Funbalugu tuwa At nalong te, Masine ka fag taw at fagbulun.
111 Fabayani wa angku, dewa ku longan kata sik yud mamatanganan fag taw, gina aw gfoyung te, masine tuwa ku fagbulun. Ay kin, roro ngap di am kalimata angku. 2 Kesug aktuwa ayu, kata Funbalugu nu kesug ayu. Am kata am sik fasad mangena. Ay nafatuyan aw sas Fagtayukan te, am wan At fasad mangena kata sik diaga at amatanganan fagdaul sa wa at fasad mangama. 3 Ay katsi gafanawa aw te, kata ebi ka fag ubianun nu nafanluk Sik-Tina, ay labon e nafadayuanan yangay sa ay amatanganan siginan nu gseg am sa tam Fagtayukan. Dewa te, katsi ay amatanganan malayun wa sat masine anway igseg wam Anya. 4 Anway sik taw gina mdasug sa ayu ay nu nafoyung sa ayu tibak Isus, tagsaman ku nafoyung ayu fag Isus. Ay ate nu nafat si ayu tibak falad, tagsaman ebi at nafat si ayu fag Masine-Fag-@Falad. Ay ate nu e nafoyung ayu tibak masine fag barita, tagsaman ku nafoyung ayu at Masine-Fag-Barita. Ay mafali nu gfaning am. 5 Takatanya fag ngay takamoyung dua katvngvd angku. Dewa kanya gfalabi at fagbulun te, ami wan at tiba tungud At-Suguan. 6 Dewa gyud aw fangkaturunan nu ge longan aw, e fagsafulun aktuwa. Ay nasful tuwam dewa katanya. Anway ngayu ginan wami gfoyung ayu, ay ngayu wan em nafoyung ayu. 7 Go nasalan way nu gfababaun akway angku, laman am yangay at kumkabat. Anway nafoyung aw ayu Funbalugu At Masine-Fag-Barita, at yud e fansali siginan ayu. 8 Anway kata way nu kamul aw, nu gbul akway ku yafun siginan tibak Funbalugu bale at ngay taw, kaduge aw gfoyung ayu. 9 Ay kaduge aw maful sa ayu dewa aw e fagayudanun, da kua gfaayu wan ay fagbulun. Anway tam ngay fadugsay siginans talun Masedunia nafon tuwa angku ku fagayudanun. Ay nu katanya, nus nge wain, da kdi gfaayu wan ay fagbulun ebi ginan. Ay katanya wa ban ku fagbulun. 10 Anway Fagtayukan At fagmatuyanun si wa angku, du e taw sas talun Akaya mafafafoli ku longan nu guseganan aw te, nafoyung aw ayu at Masine-Fag-Barita, at yud e fansali siginan ayu. 11 Go tain ku ugali nu katanya. Go katanya da kua kesug ayu. Go muag. Muag. Funbalugu nasaful wa te, kesug aktuwa ayu. 12 Ay nanfatunglus aktuwa ban katanya ku ugali. Laman mabo aktuwa sa tagfalabi at fagbulun te, em ugali nu gfoyung ami kata yangay Fandak at ugali nu gfoyung. 13 Anway ka fag ngay takamoyung at yud way matuyan fag Ngay-Suguan. Ay igfanluk way sa at fagbulun. Ay at famalagan way sas taw te, ami wan Isus At-Suguan. 14 Ay dua tam gadulawan nu nadungug tam at fagbulun. Anway anggan Tagfansalag igfanluk yangay at famalagan te, aw wan Funbalugu At tagbukngan at mayamag at sadi. 15 Ay nu katanya dua tam gadulawan dewa Tagfansalag at ngay fanuguan igfanluk at famalagan way te, ami yangay At-@Fagmasineun yangay ami at fanuguan. Takatanya ban fag ngay taw at fakatabuan umfauri yangay kata sa at fagbulun. 16 Gdog kyay glong sa ayu te, lag gayup te, Fandak dua mamatanganan. Ay dewa katanya ay ayupan, fabayani wa angku, kata nu gfabayan am sa sik yud mamatanganan fag taw. Anway kaumsig aw gfalabi sirut ku ngay fagbulun at masine. 17 Katsi ku foyungan bunwa siginan tam Fun. Iglong akway kata sik taw at yud mamatanganan tagfalabi at fagbulun. 18 Ngayuk taw tagfalabi at fagbulun ste swa daga. Ay nu katanya, anggan aw, nanfalabi akyangay sa ku fagbulun at masine. 19 Ay am nafabayan wam sat yud mamatanganan fag ngay taw, anway am mamatanganan wam. 20 Kata tenday, nu gfabayan am sa sik taw tagfanuguanan ayu. Ay anggan sa sik taw at nafamin ay fagagbilugun. Ay anggan sa sik taw tagfanluk ayu. Ay anggan sa sik taw takalimata ayu. Ay anggan sik taw at natalaptap ay fingi. 21 Kapla aw gfoyung sa ayu te, aw kua kamadaragang katvngvd ka fag ngay taw. Ay roro ngap, sik taw nu gananad way gfalabi nus nge wain at fagbulun, anggan aw, mafafalabi akway nus nge wain ku fagbulun. Katanya ku longan kata sat yud mamatanganan fag taw. 22 Go kanya fag ngay taw sik Taw-Atsi-Baliwa. Anggan aw. Go kanya fag ngay taw Tagagbuan at sugfun. Anggan aw. Go kanya Abrayam at kadagdagan. Anggan aw. 23 Go kanya fag ngay taw Fagtayukan At fanuguan. Aw glabi kyay Fagtayukan At fanuguan at masine, anway ku fagbulun amadaragang yap sa at fagbulun. (Katsi ku longan kata yay sat yud mamatanganan fag taw at longan.) E nasungsung angku ayu ginan yap nu e nasungsung anya. Ay ngayu ginan nu e nafalang angku, ay nu gakateun aw. 24 Ay lima ginan Taw-Naseg nu gyugfu angku ay nafusfus dawdaw angku sik ginawang balat balan. Ay kayu ginan nayugfu angku, nu sadi yaro gfusfus, 40 wan. 25 Ay tulu ginan at famalang angku sik kayu. Ay saiginan at famalang angku sik batu laman gananfateun angku. Ay tulu ginan ku sakayan fag balutu nu karasras gina sasad lino daul. Ay sik yabi ay sik menit nu siaba gurayo akway sasa ngaba lino daul. 26 Ay malayun tuwa nu glo aw sasa ngay fulan. Ay matagakan aktuwa nu e safa daul. Ay matagakan aktuwa sa at ngay takamul. Ay matagakan aktuwa sa ku kalongan fag ngay taw. Ay matagakan aktuwa sasa ngay Yud-Naseg-Fag-Taw. Ay matagakan aktuwa gina aw sisad fulan. Ay matagakan aktuwa gina aw sas talun at yud e taw. Ay matagakan aktuwa gina aw sasa ngaba lino daul. Ay matagakan aktuwa sa sik ngay tagfanluk fag takafandiug. 27 Ay matvngvd tuwa ku fagbulun. Ay gatakan akwadi. Ay ngayuk yabi nu gyud aw maatiug. Ay kalunus akway ay manga kadanum akya. Ay ngayu ginan nu gyud aw e fakonun. Ay tiba ginan katis aw dawdaw ay dua kasakan ku lanbung. 28 Ay bundi sanya fagtvngvd ku fagatakanun. Anway fagayu menit fagayu menit, igsarap aktuwa te, tain at masine sa at ngay Funbalugu bale at ngay taw baliwa. 29 Sanya fag taw nu dyay matvngvd nu kafandiug, anggan aw kabalu akyay anya. Ay nu e nafe asalanan way sanya fag taw, anggan aw kadotama aw sa at tagfe asalanan anya. 30 Nu gafoyungun akway sa ku iba ku fagbulun, at masine ku fagfoyungun anyakman ku fagbulun at mafanalo. 31 Tam Funbalugu, tam Fun Isus At Tama, e gseg tuwa Anya faggugat. Ay Kanya nasaful tuwa te, kua kamuagan ku longan. 32 Gina aw sis fulan Damasku, sanya at fun daul at ngayan Tagmasine. Ay sit daga tv at fun nasugu at ngay fanuguan, laman lumag tagsakbo sat fulan at sakbawan alad. Ay kanya nu lumag wayro angku nu galakloan aw, yumugfu ro angku. 33 Ay roro e nafadaga tuwa angku sat fagbantayan sas tungud alad sa sik sabi. Ay nalfas aktuwa siginan ka fag fun at fagmadaragangun.
121 Kaumsig akyangay dawdaw nanfoyung sa ayu ku fagbulun at masine, dewa ku foyungan katanya yud e fanambagun. Ay katsi nanfoyung akyangay sa ayu ku ngay taginfanan ay at nafasure sa ku amatanganan siginan tam Fun Isus. 2 Nasaful aw sik takafandiug sas Fagtayukan. Ay ebi e naurug wa anya sa at fatuluk langkub sas Banwa. Siginan ginanya ay anggan katsi 14k banwa. Kua nasaful te, go e naurug wa at bilug, ay go naubun way ste swa daga at bilug. Funbalugu way tagsaful. 3 Ay nasaful aw te, e naurug wa ka fag takafandiug sas Funbalugu-At-Fagfanafiyan. Kua nasaful te, go e naurug wa at bilug, ay go ate naubun way ste swa daga. Funbalugu way tagsaful. 4 Ay kanya nadungug sik ngay longan ay ste swa daga fag ngay taw du e mafafoyung katvngvd anya. Ay manga igsalag yangay anya te, laman du e mafalong katvngvd anya. 5 Dewa aw mafafoyung te, ka fag taw at fagbulun katanya, da kdi kaumsig gfalabi ku fagbulun mandi. Ku fagfoyungun sa ayu ku fagbulun way at mafanalo. 6 Dewa aw mafafoyung sa ayu ku taginfanan, bun akdi sik yud mamatanganan fag taw. Anway matuyan tuwa ku longan. Ay dewa katanya, aw kua gfoyung ayu, laman bundi tibak taw tagfaabat angku. Laman ro at amatanganan sa way at nalag fagtvngvd ku fagbulun ay at nadungug ku longan. 7 Ay laman kua kaumsig gfalabi ku fagbulun, at ngay kinsure siginans Funbalugu, e nafatayuk yay sik mataka sa ku bilug. Kata sik fanuguan siginan Tagfansalag at nanfauri sa angku, laman da kdi gfalabi. 8 Tulu ginan aw get sa tam Fun te, Buli ka fag mataka si ku bilug. 9 Ay Kanya nabalus angku te, Insak wan ku famanyun sa emu. Anway ku fagmadaragangun umsure wa fiya sa at mafanalo fag taw. Ay nu katanya, guseganan aw gfoyung ku fagmafanaloun, laman Fagtayukan At fagmadaragangun igdingding tuwa sa angku. 10 Ay dewa katanya, guseganan aktuwa dewa aw mafanalo laman tam Fagtayukan e fanambagun. Ay dewa e gfalingun sa angku. Ay dewa aw e fagatakanun. Ay dewa e gfauri angku. Ay dewa aw e fakabaluun. Anway gina aw mafanalo, ginanya e fagmadaragangun akyangay. 11 Kata akway sik yud mamatanganan fag taw ay gfalabi aw sirut nu gfoyung aw ku fagbulun at masine. Fakatanyaun ku fagbulun anway nasalan yay am. Anway du am nafoyung sa ay iba ku fagbulun at masine. Dewa aw tiba daga fag taw, bun akdi sas daga ka fag yud matuyan fag takamoyung at nalong te, ami tuwa taglabi fag Suguan. 12 Faggugat mafafasure aktuwa sa ayu Isus At-Suguan at ke masuad fag fagbulun. Tenday at matvngvd fag faglagan, ay at ke masuad fag fagbulun, ay anggan at madaragang fag fagbulun. 13 Nataw way ay fagafayudun, ay madyay tibak Funbalugu bale at ngay taw di e fagafayudun. Ay madyay da kdi nabul ku yafun siginan ayu gina aw gfoyung ayu. Ay nu katanya, faliami tuwa nu nasalan akway. 14 Katsi at fatulu ginan ban nu mdasug aw sa ayu. Ay anggan ban ginanya, da kdi kamayuan ayu. Anway kua gabulun si ayu ay fagagbilugun. Ku fakaumsigun laman kesug tuwam angku. Anway at masine at mangaguyang tagsandig, laman at sisian e kwa ban. Ay bundi at sisian tagsandig laman at mangaguyang e kwa ban. 15 Guseganan aw dawdaw nus nga te, nanfon akua sa ayu ku salafi ay anggan ku fagmabitsugun, laman e fanambagun tuwam. Go nu nafadaul akwa ku fakafanyuun sa ayu, go ayu insirut wan ay fakafanyuun sa angku. Ay go igdi. 16 Ay dewa aw gyud get siginan ayu, e nalong way te, Fandak sik tagfanluk, ay nanbul yay ban ay salafi siginan at nafanlukan. 17 Ay go nus nga aw nasugu tibak takafandiug sa ayu, go kanya igfanluk ayu. Ay go igdi. 18 Ebi matvngvd nu glong aw sas Titu laman nanlag ayu, ay nasugu akyangay tam fadugsay at sadi laman nangufud anya. Ay go Titu igfanluk way ayu nu ndasug. Ay go igdi. Ay go em fagbulun sadi tuwa, aw ay Titu. Ay anggan em ugali. Go kin. 19 Ay go ginanya gamatangan am te, at masuad ku fagnalongun anway te, laman nanfoyung aw te, masine ku fagbulun. Ay go yaya. Yaya. Funbalugu nasaful wa te, ku fagfoyungun insadi akwa sas Fagtayukan. Ay laman gfatvngvd ay fakafandiugun, am ku fakesugun fag ngay taw wam. 20 Ay gafanawa akyay te, nu ndain nu ndasug aw sanya, kua ban lumag ay fagbulun kata ku fasadan. Ay anggan am, dua ban am lumag ku fagbulun kata ay fasadan. Ay nu ndain e garingangan yay manga. Ay manga e fagalabianun. Ay manga e fakadotamaun. Ay manga e gfangesug. Ay manga e kamuagan sa tiba baliwa. Ay manga e gfaibugan sa tiba baliwa. Ay manga e gfalabi at fagbulun. Ay manga e gfabadbabuan sa tiba. 21 Ay gafanawa akyay te, nu mdasug akyangay ban sa ayu, nu ndain tam Funbalugu gfaplaan ban angku gina sa ay akbang. Ay kabalu akban te, at ngay tagasalanan ebi dia naubun at asalanan. Tenday, at mafurat fag fagbulun, ay at fakamayunun, ay tagfaning sat bilug at fagalabianun.
131 Katsi ban at fatulu ginan wa nu mdasug aw sa ayu. Ay nu gfoyung ban am tibak taw at asalanan, duwak tawi ay ate tuluk tawi tagfatuyan. 2 Ebi at faduwa ginan nu kadasug aw sa ayu, nafatagak akwa sa at ngay tagasalanan ebi ay anggan sas fagayu ay iba te, nu gdog akyangay umdasug, nanfauri akwa fiya sat ke asalanan. Ay katsi dewa gyud aw sanya, gdog akyay fiya nanfatagak anya. 3 Kaumsig am sik fagsafulan te, Fagtayukan tagfae longan sas Fandak: Ay kata tuy ay fasafulan. Tam Fagtayukan di mafanalo sa ayu baliwa. Madaragang tuwa At fagbulun sa ay buknga. 4 Anway tam Fagtayukan dewa mafanalo gina e natuktuk sas salibagan kayu, katsi Kanya gleleg tuwa anway e fagmadaragangun tuwa siginans Funbalugu. Ay anggan ami, dewa ami mafanalo anway insadi wami sas Fagtayukan. Ay roro sa em fagbulun sa ayu baliwa, e fagmadaragangun tuwami siginans Funbalugu, anway insadi wami sas Fagtayukan. 5 At masine nu gsarap tuwam, ay nu gfaskud tuwam ay ugali te, go kafandiug wam fiya nu gfaning am sas Isus Fagtayukan. Go du am nasaful te, Isus Fagtayukan si wa ayu. Ay idia, nu dyay am kafandiug. 6 Ay kaumsig akyangay nu sumaful am te, anggan ami, igfaskud yangay ami sa emi mandi em ugali. Ay anggan ami kafandiug tuwami. 7 Igdarangin ami ayu, laman di am e asalanan. At masuad bundi te, laman tibak taw gamatangan te, masine em fagbulun ay manga matvngvd em fakafandiugun. Yaya. At masuad antuwa te, laman nanfaning tuwam sat masine. Dewa tibak taw gayup te, em fagbulun du e masuad. 8 Anway dua ami mafasalag sat matuyan fag longan. Em fagbulun igfoyung tuwami at matuyan fag longan. 9 Guseganan ami dewa ami mafanalo, nu e fagmadaragangun tuwam. Ay gdarangin ami ayu te, laman umtvngvd tuwam sa ay fakafandiugun. 10 Ku fagnarirukun katanya kaduge aw gyud sanya si ayu. Laman nu ndasug ban aw, da kdi gfabitsug nu glong aw sa ayu, siginan tam Fun At nafon angku fag fagmadaragangun. Ka fag fagmadaragangun at masuad antuwa te, laman nafatvngvd aw ay fakafandiugun, ay bundi te, nanfasirut akway. 11 Ku ngay fadugsay, at fakatabuan ku longan sa ayu te, Fasinei tuwa ay ugali. Ay dungugani sa ku longan. Fasadii fagayu am ay amatanganan. Ay manabayani tuwa. Ay tam Funbalugu, sik Tagfangafanyu ay sik Tagfanabayan sas fagayu taw, ay Kanya At nangufud nangus ayu. 12 Ay nu nafablang am ay iba, famatuani tuwa ay adkafanyuani tuwa. 13 Ay fagayu Funbalugu At ngay taw ste nafadasug sa ayu at faguseganan te, gamatangan tuwa ayu. 14 Ay tam Fun Isus Fagtayukan At mamanyun nangus sa ayu. Ay tam Funbalugu At takafanyu sa ayu. Ay anggan At-Masine-Fag-Falad si wa ayu fagayu.