1 Timothy

¹ Siginan angku, Fandak, Fagtayukan Isus At-Suguan at sadi. Tam Funbalugu tam Tagbalabag ay Fagtayukan Isus tam Fagsegun At nasugu angku. ² Nanriruk aw sa emu, Tagseg-Funbalugu, at matuyan ku unga sas fakafandiugun baliwa. Funbalugu tam Tama ay Fagtayukan Isus tam Fun At mamanyun nangus sa emu ay takafanyu ay anggan At nanfanabayan emu. ³ Katsi iglong akyangay sa emu katvngvd ebi nu glong aw emu gina aw galoun sas talun Masedunia te, sanyai yap sas fulan Efesu. Laman salagi tibak taw sanya te, lag gfoyung nu dway gfadiuganan sa em foyungan fag ugali. ⁴ Ay lag gfoyung at yud matuyan fag ngay fakamansulitun, ay anggan at ngay katungudun at ngayan ay at ugali at yud manga tabu. Anway nu katanya way at foyungan, at ngay taw garingang way. Ay dua mafafoyung Funbalugu At fakaumsigun te, laman at taw kafandiug sa Anya. ⁵ Tam foyungan at masuad ani tuwa te, laman fagayu taw kadkafanyuani tuwa sa tiba, siginan at amatanganan malayun sat masine, ay siginan mafanud at fagbulun, ay siginan matuyan at fakafandiugun sas Fagtayukan Isus. ⁶ Anway tibak taw dua kaumsig igfaning kanya fag longan. Ay katanya wayay at sulitanan du e masuad. ⁷ Kanya dewa kaumsig nafoyung Ku-Unga At-Longan, roro dua nasaful At-Longan at masuad ay anggan anya at foyungan mandi at masuad. Dewa kanya nu gfasad matuyan anya at foyungan mandi. ⁸ Ay nasaful watam te, masine Ku-Unga At-Longan, sik taw nu nafafaning tuwa At-Longan at masuad. ⁹ Anway At-Longan at masuad bunwa te, nansalag sik taw at masine at ugali. At-Longan at masuad sa way at yud masine at ugali. Ay sat yud gfaning. Ay sa takamabo. Ay sat yud gseg sas Funbalugu. Ay sa tagasalanan. Ay sat yud kaumsig Funbalugu. Ay sa tagfanlamangan sas Funbalugu. Ay sa tagfate at tama. Ay sa tagfate at tina. Ay sa tagfate at tiba taw. ¹⁰ Ay sa takamayun. Ay sa sik mangama at nat sa tibak ama. Ay sa takamul taw. Ay sa takamuag. Ay sa tagfanlamangan at longan. Ay anggan sa nus nga sinu at yud gfaning sat matuyan fag foyungan. ¹¹ Ay at matuyan fag foyungan nu nafadiuganan sa tuwa at ke gseg Funbalugu At Masine-Fag-Barita at taglabi tiba. Ay aw nanfoyung kyangay at Masine-Fag-Barita anway Funbalugu nafili angku. ¹² Ay guseganan aw sas Fagtayukan Isus tam Fun, anway Kanya tagfatvngvd angku laman nanfoyung aw. Anway Kanya natap angku te, sik matuyan aw fag taw, At fagnafiliun angku. ¹³ Ebi dewa aw sik tagfanlamangan sas Fagtayukan, ay dewa mauri ku fagbulun sas Fagtayukan At ngay taw, ay anggan dewa aw gfangadotama sa anya, Funbalugu kafanyu tuwa angku. Fakatanyaun anway te, da kia gsaful sas Funbalugu ay kia kafandiug sa Anya. ¹⁴ Ay matvngvd tam Fun nu kamanyun sa angku te, laman kafandiug aw ay kafanyu aktuwa ku iba. Anway insadi aw sas Fagtayukan Isus. ¹⁵ Matuyan wa fiya tuy fag longan. Ay fagayu taw afanudi te, Fagtayukan Isus At fagindasugun ste swa daga laman nanbalabag at ngay tagasalanan. Ay aw wan at sadi at tiba tungud ke asalanan. ¹⁶ Anway katanya, Isus Fagtayukan faginfanyuun angku, laman nanfalag sa tibak taw te, dewa aw, Fandak, sik matvngvd tagasalan, Isus Fagtayukan igfanya tuwa angku. Ay kanya sik fagulitan sa ban at kumfandiug sa Anya ay gleleg tuwa ban faggugat. ¹⁷ Ay katsi segi tuwa sa tam Fun At yud katabu faggugat faggugat, ay At yud kate faggugat, ay sa tam fagyudun glag. Kanya At Tagsesadi fag Funbalugu. Fagayu taw, segi tuwa Anya faggugat faggugat. Ay foyungi sa tibak taw tam Fun At tiba tungud fag fagmasineun. Kin, katanyai tuwa. ¹⁸ Ku unga, Tagseg-Funbalugu, matvngvd nu glong aw sa emu katsi te, laman faningi tuwa ebi at naguna nafoyung emu am fagbulun. Ay anggan kata yangay o sik tagbarangian at matvngvd nu gfabarangian. ¹⁹ Fatvngvdi nu kafandiug o. Ay tagaki laman di o kapla te, e asalanan o. Anway tibak taw dewa e naaplan te, mauri way at fagbulun, dua gfasaman at ugali at mauri. Ay katanya wayay naliam wan at fakafandiugun. At fakafandiugun kata way sik balutu nu nrasras dawdaw sas lino. ²⁰ Katanya way sik duwama at fagbulun. Ay at ngayan Sik-Daduwa-At-Bara ay Tagdingding-Taw. Nafon aw ka fag duwama sas Tagfansalag, laman kanya fag duwama umlimu te, lag mangaro gfanlamangan sas Funbalugu baliwa.

¹ Matvngvd nu glong aw sat ngay takafandiug te, Darangini, ay eti, ay intoi, ay useganani sa tam Funbalugu laman ban fagayu taw e fanambagun tuwa. ² Darangini sa tam Funbalugu laman tam Funbalugu tumarabang at ngay fun ay anggan at ngay magurang. Laman di e garingangan. Ay manabayan tuwa fagdaul tam talun, kaduge tam gfaning tam Funbalugu. Ay laman masine tam ugali sa tam iba. ³ Nu katanya tuwa tam darangin, tam Funbalugu tam Tagbalabag kaumsig tuwa. ⁴ Anway Funbalugu At fakaumsigun laman fagayu taw umbalabag tuwa ay sumaful at matuyan fag longan. ⁵ Anway sadi way tam Funbalugu ay sadi way At Tagbuknga sis buknga taw ay Funbalugu. Kanya wa fag taw At ngayan, Fagtayukan Isus. ⁶ Anway Kanya At fasadan At faginkateun, laman fagayu taw umbalabag ban. Gina si at filian fag menit, e nafoyung ka fag fagbulun. ⁷ Katanya at masuad at fagnafiliun angku, laman At-Suguan aw ay sik takamoyung aw. Ay nanfoyung aw Funbalugu At longan sa at Yud-Naseg-Fag-Taw. Laman ban kanya umfandiug ay sumaful at matuyan fag longan. Katanya ku longan, kua kamuagan. ⁸ Ay nu katanya, kaumsig aw laman sas fagayu mangama nus nga nday fag talun darangini tuwa. Ay gina gdarangin, faabati at take gina gyud e asalanan, ay gina yud kadotama ay gina yud garingangan. ⁹ Ay anggan sas fagayu mangena, nu gsulun at lanbung, gkasakan yakman. Fatugani way nu yud kapla at tiba, ay at tiba nu yud kapla anya. Ay anggan kasakan yakman nu gfasineun at buk. Ay anggan lag faayu at famasinean si at bilug, tenday fanumyu ay dalag. Ay lag bul at mabiat dawdaw at fansali at lanbung. ¹⁰ Ay sik mangena at fagnanfasineun at bilug, antuwa at masine fag ugali sa tiba, kata at lanbung. Katanyai tuwa sa sik mangena tagfaning Funbalugu. ¹¹ Ay at masine sik mangena dungugani way fagtvngvd. Ay lag gfaringangan ay malukmei tuwa. ¹² Ay kua kaumsig sik mangena nu gfoyung ay nu nanlabi at ngay mangama. At masine nu maragangan way. ¹³ Anway Funbalugu At naawat taguna sik mangama at ngayan Karaska. Ay bandi tv naawat yangay sik mangena at ngayan Tagfe-Leleg. ¹⁴ Ay bunwa at mangama at nalukan. At mangena way at nalukan, ay rodi e asalanan way. ¹⁵ Dewa katanya, Funbalugu kafanyu tuwa sik mangena anway gfalangfe tuwa sik ngenge. Ka fag mangena nu gfatunglus tuwa nu kafandiug. Ay nu kafanyu tuwa at iba. Ay nu gfaning tuwa Funbalugu. Ay anggan nu malukme tuwa at amatanganan.

¹ Matuyan tuy fag longan te, sik taw nu kaumsig nanmagurang Funbalugu bale at ngay taw, masine nu katanya at fasadan. ² Kata tuyi sik taw nu kaumsig nanmagurang. Laman di gfagbulun sat mauri nus nge wain. Ay laman sadi yakman at mangena. Ay laman maamatanganan tuwa fagayu nu gfagbulun. Ay laman maabaris tuwa. Ay laman masine fagdaul at ugali. Ay laman igfasakbo tuwa at bagu kadasug fag taw. Ay laman mafafoyung tuwa sa tibak taw. ³ Ay laman di ginum fangasigung. Ay laman di gfangadotama ay malukme tuwa faggugat. Ay laman di kamaringangan sa tiba. Ay laman di kaumsig dawdaw gfaayu at salafi. ⁴ Ay laman gsaful tuwa gmagurang at ngay taw si at bale mandi. Ay laman at sisian igfaning tuwa anya ay kesug tuwa anya. ⁵ Anway sik taw nu dway gsaful gmagurang at ngay taw si at bale mandi, tain ro nu mafamagurang nut sa wa ngap ro daws Funbalugu bale at ngay taw. ⁶ Ay agi yap gfili sik magurang nu bagu yay kafandiug. Labon mafalabi at longan ay at fagbulun. Ay nu katanya way e asalanan way kata Takamuag-Tiba-At-Fagbulun nu e asalanan. ⁷ Ay ka fag magurang masinei tuwa at fagbulun, laman at yud kafandiug fag taw sumeg anya. Ay nu katanya, ka fag magurang di ban sumulun sas Takamuag-Tiba-At-Fagbulun at lulang. ⁸ Kata tuyi Funbalugu bale at tagtanud at ugali. Kanya sik matuyan tuwa fag taw ay di gfanlamangan. Ay di ginum fangasigung. Ay di giafaayuun at salafi. ⁹ Ay anggan matvngvd tuwa nu kafandiug sa at nafasure fag foyungan sa tam fakafandiugun baliwa. ¹⁰ Taguna faskudi sik tagtanud ban te, go matuyan tuwa at fagbulun. Ay nu gdi e fagbulun at mauri nus nge wain, filii wa long anya laman ban ay tagtanud. ¹¹ Kata tuyi yangay tam tagtanud fag ngay mangena at ugali. Kanya sik matuyan tuwa fag taw. Ay at yud tuwa glong mauri sa tiba baliwa. Ay maamatanganan tuwa fagayu at fagbulun. Ay faggugat mafanud tuwa fagayu at ugali. ¹² Kata tuyi yangay tam tagtanud fag mangama at ugali. Laman sadi way at mangena. Ay laman gsaful tuwa gmagurang at sisian ay anggan at ngay taw si at bale mandi. ¹³ Anway sik tagtanud nu masine tuwa at fagbulun, tibak taw ban sumeg anya. Ay anggan nafaintvngvdan ban nu gfoyung at fakafandiugun sa tam Fagtayukan Isus baliwa. ¹⁴ Ku fakaumsigun te, laman di glugo nu umdasug aw sa emu. Dewa katanya, igriruk akyay sa emu katsi, labon lumugo akyay manga iste. ¹⁵ Laman sumaful tuwo te, katanya at masine fag ugali sas fagayu Funbalugu At unga. At masuad te, sas fagayu takafandiug sa tam Tagleleg-Faggugat-Fag-Funbalugu. Anway fagayu takafandiug tagfatvngvdun ay tagfoyung Funbalugu At matuyan fag longan. ¹⁶ Intuyan watam te, matvngvd dawdaw at nafasure fag foyungan sa tam fakafandiugun baliwa. Ay at foyungan at masuad te, Ebi gina Fagtayukan insure ste swa daga, e bilug tuwa. Ay At-Masine-Fag-Falad at nanfatuyan sas taw te, Fagtayukan At ngay ugali masine Ay At ngay tagbukngan nantarabang Anya. Ay e nafoyung Fagtayukan At fagbulun sas fagayu talun at ngay taw. Ay ngayu at takafandiug sa Anya ste swa daga. Ay e nafasakbo Anya sas Banwa.

¹ At-Masine-Fag-Falad mayamag nu nafoyung te, sa bans fakatabuan fag ngay menit, tibak taw mubun ban at matuyan fag fakafandiugun. Anway kanya at fagdunguganan ban sa ways tagfanluk fag ngay taw yabi ay anggan sasa ngay mafurat fag falad at foyungan. ² Ay ka fag foyungan siginan way tibak taw takamuagan ay igfanluk at ngay taw. Anway ka fag ngay takamuag du e naaplan te, mauri way mangaro at fagbulun. ³ Ay kanya fag ngay takamuag igsalag way ban tiba te, lag kadaduwa, ay lag kon tibak fakonun. Ay roro at matuyan, Funbalugu At fagnaawatun fakonun. Laman fagayu takafandiug ay tagsaful at matuyan oni tuwa ay useganani sas Funbalugu. ⁴ Anway fagayu Funbalugu At naawat masine wan. Ay du e awatan te, laman taw kalimata way. Ay roro oni wan fagayu, useganani ngay sas Funbalugu. ⁵ Anway Funbalugu At longan ay tam darangin mafafasine wan nus nge wain tam fagnangonun. ⁶ Nu nafoyung tuwo ku longan sa tam ngay fadugsay sanya, o wan Fagtayukan Isus At fanuguan at matuyan. Ay madyay ebi e nafagut tuwemu sa em fakafandiugun at longan baliwa. Ay anggan yangay siginan tibak taw at nafoyung at matuyan fag longan. Kata yangay am fagfaningun katsi. ⁷ Ayayui wan siginan takamansulit fag taw at yud gfadiuganan sas Funbalugu At longan, anway du e masuad at foyungan. Ay am fagfaningun ani tuwa Funbalugu At longan ay At ugali. ⁸ Masine nu gfabitsugan tam tam bilug, anway e fanambagun yangay sirut. Dewa katanya, tam fagfaningun fiya fiya ani tuwa tam Funbalugu At ugali. Kanya tuwa at matvngvd at ke fanambagun nus nge wain. Anway e fanambagun tuwa dewa ste swa daga, ay anggan e fanambagun yangay ban sas Banwa. ⁹ Matuyan wa fiya aro at foyungan, ay fagayu taw afanudi wa fiya. ¹⁰ Ay nu katanya, maasungatan tuwa tam katvngvd tam fagmabitsugun. Anway tam fagsegun siginan tam Tagleleg-Faggugat-Fag-Funbalugu. Anway Kanya Tagbalabag sas fagayu taw, ay glabi yap nut sa wa sa ngay takafandiug. ¹¹ Ay anggan o, longi ay foyungi aro fag longan. ¹² E ugalii at masine laman tibak taw di gfalingun emu te, sik baguama yay o. Masinei am ugali laman sik fagulitan sasa ngay takafandiug. Dewa sa am longan. Ay dewa sa am fagbulun. Ay dewa sa am fakafanyuun. Ay dewa sa am fakafandiugun. Ay anggan dewa sa am amatanganan at masine. ¹³ Fagbulunani tuwa anggan aw umdasug. Gina am maful, tapi Funbalugu At longan. Ay foyungi ay fayamagi at masuad sas fagayu taw. ¹⁴ Dangai mafanalo nu gfagbulun o sas Funbalugu At nafon emu fag fagmadaragangun. Anway ebi e naguna wa nafoyung kanya fag fagmadaragangun kaduge Funbalugu bale at ngay magurang nafatayuk at daluap sa am alfuyu. ¹⁵ Maseganamai ay faningi tuwa fagayu fagayu kanya fag fagbulun. Laman fagayu taw lumag ban te, fainkugatan tuwo. ¹⁶ Faamatanganuni am ugali ay anggan am foyungan. Ay fatunglusi tuwa katanya am fagbulun. Laman di o gsalan, ay anggan am ngay tagdungugan umbalabag tuwa.

¹ Lag gbaya sik magurang fag ama te, lag katanya. Ay foyungi way kata nu am mama. Ay at yud sik magurang fag ama, am ugali katai way nu am fadugsay. ² Ay sik magurang fag mangena, am ugali katai way nu am mina. Ay at yud sik magurang fag mangena, am ugali katai way nu am fadugsay. Laman am ugali fagdaul malayun tuwa sat masine faggugat dewa sa sik baguina. ³ Afanyui tuwa sik burangday at yud e ufud. ⁴ Ay sik burangday nu e sisian yay ay nu e fufu yay, kanya yay tagtarabang anya. Ay nu katanya, at masuad te, kanya fag sisian sik takafandiug. Ay anggan kanya fag sisian nanfafoli at fagmasineun sa at magurang. Ay nu katanya tuwa, igfauseganan tuwa sa tam Funbalugu. ⁵ Ay sik burangday dewa sesadi, ay dewa gyud e gtarabang anya, kanya kafandiug tuwa sas Funbalugu. Ay faggugat igdarangin tuwa ay get tuwa sa Anya dewa swa menit ay dewa sad yabi te, laman Funbalugu tumarabang anya. ⁶ Ay roro sik burangday at fagamatanganun nut sa way dawdaw at fakaumsigun mandi, kanya dewa gleleg, kata way sik matian. ⁷ Foyungi wa fiya aro ku longan, laman at ngay burangday ay anggan at ngay sisian di e asalanan. ⁸ Anway sik taw nu dway gtarabang at kalongan ay dway ro gtarabang anggan tagsi oma at bale, roro at fagbulun at masuad te, dua kafandiug. Ay ka fag taw glabi yay ngap sat yud kafandiug nu mauri. ⁹ Sik burangday nu kaumsig igfamut at ngayan sa at fagrirukan burangday at ngayan, at banwa glabii tuwa unumk safulu. Ay sadi tuwa at mangama ebi. ¹⁰ Ay anggan e nafoyung tuwa te, masine tuwa at fagbulun. Ay anggan nafoyung at sisian siginan ngay alay laman masine faggugat at fagbulun. Ay anggan nafatvngvdun at bagu kadasug fag taw. Ay anggan nafegus at ngay Funbalugu At taw at darafa. Ay anggan igtarabang tuwa at ke natakan. Ay anggan mafafaning tuwa nus nge wain fag fagbulun at masine. ¹¹ Ay lag famut sa at rirukan at yud magurang fag ngay burangday at ngayan. Anway nu kaumsig yay ban kadaduwa, mafasaman at amatanganan at fatuyanan sas Fagtayukan. ¹² Ay nu katanya way, nu gina wa fasaman ebia taw at fatuyanan sas Fagtayukan, manke asalanan ban. ¹³ Ay manga te, kanya mafanalo way ban nu nanlag sasa ngay bale. Ay bunwa mafanalo fagtvngvd. Anggan sik tagfasagbatan way at longan. Ay anggan sik tagfangafayudun way ban sat iba. Ay nu katanya, dua masine anggan at ngay longan. ¹⁴ Ay fagalay ban katanya, gamatangan aw te, at masine at yud kafufuina fag burangday, adaduwai yap laman e unga yay. Ay laman igfatvgvdun yay fagayu tagsi at bale. Laman at yud kafandiug fag taw di e fagfalingunun antam nus nge wain. ¹⁵ Ay at matuyan, e tibak burangday naubun wan at fakafandiugun ay katsi at fagfaningun sa way Tagfansalag. ¹⁶ Sik takafandiug fag mangena nu e kalongan yay sik burangday, at masine kanyai wa fag mangena tagtarabang ka fag burangday. Laman Funbalugu bale at tagtanud di gatakan, ay mafatarabang tuwa sa tibak burangday at yud e ufud. ¹⁷ Funbalugu bale at magurang nu maseganama tuwa nu gmagurang, matvngvdi yangay anggan at ngay takafandiug nu gseg anya ay nu gfon anya. Ay glabii yap sa sik magurang at maseganama nu gfoyung ay nu gfayamag Funbalugu At longan. ¹⁸ Anway Funbalugu At-Rirukan at foyungan te, Lag bugsung sik baka dungus kaduge ka fag baka igrabas sik buadan. Ay, Sik taw tagfagbulun, e nafon wa fiya sa anya at nalufuyan. ¹⁹ Lag dungugan nu sadi wayk taw tagfoyung Funbalugu bale at magurang at asalanan, nu bunway duwak taw ay tuluk taw at nadiuganan at nalag at fagbulun. ²⁰ Ay ka fag magurang nu gfaning wa fiya sas asalanan faggugat, bayayi anya sasa ngay takafandiug at buknga. Laman fagayu takafandiug kalimu tuwa nu gfaning way katanya. ²¹ Funbalugu, ay Fagtayukan Isus, ay anggan Funbalugu At nafili fag ngay tagbukngan tagfatuyan nu glong aw sa emu. Ay nafatvngvd aw nu glong aw sa emu te, faningi tuwa iste ku longan fagayu. Ay lag e filian taw. ²² Ay agi yap daw mafali nu gfatayuk o am daluap sa sik taw at alfuyu te, Funbalugu bale ban at magurang. Ay lag e afud siginan sik taw at asalanan. Tagaki tuwa laman am ugali malayun tuwa sat masine. ²³ Nu ginum o, dangai sik safa fagtvngvd. Fagamutani tuwa sik buadan safa sirut ay inumi. Laman di o kasait am ungdan ay anggan laman di ginfolian am dailan tiba. ²⁴ Tibak taw at asalanan mafali tuwa nu e nasaful. Ay at nalag nasaful te, e faurianan wa ban fiya sa anya. Ay at tibak taw at asalanan glugo yay bagu e sumaful. ²⁵ Ay katanya yangay tibak taw at masine fag fagbulun, mafali tuwa nu e nasaful. Ay at tibak taw at masine fag fagbulun glugo yay bagu e sumaful. Dewa katanya, dua kasuksuk faggugat.

¹ Fagayu takafandiug fag fanuguan, segi tuwa ay faningi tuwa ay fun at longan. Laman tibak taw di kalimata ay di glong mauri sa tam Funbalugu baliwa ay anggan sa tam foyungan. ² Dewa at fun sik takafandiug, at fanuguan dangai fasirut nu gseg anya ay nu gfaning sa anya, dewa gamatangan te, kanya ku fadugsay way. Ay matvngvdi tuwa nu gseg ay nu gfaning anya. Anway am fun at fanambagun siginan way ay fagbulun, ay kanya sik takafandiug ay sik fakesugun fag taw. Ay o, Tagseg-Funbalugu, matvngvdi nu gfoyung o takatanya fag ugali. ³ Sik taw at foyungan nu saman way, ay nu dway gfadiuganan sa tam Fun Isus Fagtayukan At matuyan fag longan, ay nu dway gfadiuganan sa tam foyungan te, faningi tam Funbalugu, ⁴ kanya fag taw gfalabi way at longan. Ay du e fagsafulun. Ay faggugat kanya mauri way at fasadan, madyay gfaringangan way dawdaw ay anggan igsalag tibak taw nu ge longan. Ay nu katanya way at longan, ka fag ngay taw at maful si anya kalimata way at tiba. Ay matvngvd nu gfaringangan. Ay mauri way at longan sa tiba. Ay anggan gfansulup te, nu ndain ban mauri ku iba at fagbulun sa angku. ⁵ Ay kanya fag ngay taw gfabadbabuan way tiba nu ge longan. Anway mauri wayay at amatanganan, ay anway dua nasaful at matuyan. Ay kanya fag ngay taw gamatangan te, sik taw tagfaning mangaro Funbalugu, nanfaayu way at salafi. ⁶ Ay sik taw tagfaning fiya fiya Funbalugu, ay nu gamatangan te, insak wan Funbalugu At nafon angku, ka fag taw e fanambagun ban dawdaw sas fagmasineun baliwa. ⁷ Anway gina tam bagu ke taw ste swa daga, dua tam e ubanan stiye. Ay gina ban tam glo ste ginan swa daga, dua ban tam e ubanan nus nge wain. ⁸ Ay nu katanya, nu e fakonun tuwa tam ay nu e lanbung tuwa tam, amatangani te, balikam. Insak wan. ⁹ Roro kanya fag taw at fakaumsigun nut sa way fagmabalanun, igfaning way at amatanganan dewa sas asalanan. Ay ka fag taw kata sik taw at nasulun sa sik lulang ay inkiktan. Anway kanya igfaning ngayuk fagalabianun at yud e masuad ay igfauri anya. Takatvngvd anya fag asalanan mauri ban dawdaw sa anya ay dua ban umbalabag. ¹⁰ Anway sik taw at nafadaul at amatanganan sas salafi baliwa, kanya at ngay mauri at lalid. Ay tibak taw anway kaumsig yangay dawdaw salafi, naubun at fakafandiugun. Ay sa at amatanganan kata nu e natubuk anya anway mason at fakabaluun. ¹¹ Anway o wan Funbalugu At taw, lag gfaning takatanya fag ngay mauri. Ay maseganamai tuwa laman masine tuwa nu gfagbulun o. Ay laman faningi tuwa Funbalugu. Ay laman matvngvdi tuwa am fakafandiugun sas Funbalugu. Ay laman afanyui tuwa am iba. Ay laman sungatani tuwa. Ay laman malukmei tuwa. ¹² Fabarangiani tuwa sat mauri, anway o wan takafandiug sas Funbalugu. Laman fabul ban o leleg at yud katabu. Katanya Funbalugu At fagnafiliun emu, gina o igfoyung sasa ngay taw buknga te, aw wan sik takafandiug sas Funbalugu. ¹³ Funbalugu At nafaleleg fagayu nus nge wain tagleleg, ay anggan Fagtayukan Isus At nafoyung ebi at matuyan fag longan sas Punsiu At-Ke-Bangko, Kanya tagfatuyan nu glong aw emu te, ¹⁴ Faningi fagayu ku longan aro. Dangai e nasalan ay dangai e fagbulun at mauri, anggan gdog yay umdasug tam Fun Isus Fagtayukan. ¹⁵ Funbalugu wa ban tagfasure Fagtayukan sa At filian fag menit. Tam Funbalugu tuwa At ke gseg Anya. Ay Kanya At tiba tungud nu madaragang. Ay Kanya At Fun sas fagayu fun sirut. Ay At Fun Daul sas fagayu fun daul. ¹⁶ Funbalugu way fagsadi At yud kate faggugat. Ay Kanya nu gbanwan sasad mayamag tuwa at katvngvdan at taw dua mafalinggat sanya. Ay du e taw batang glag Anya, siginan ebi anggan katsi. Segi Funbalugu, anway Kanya e fagmadaragangun faggugat. Kin, katanyai tuwa. ¹⁷ Foyungi sa at takafandiug at mabalan ste swa daga te, laman kanya dua gfalabi at tiba. Ay laman kanya di gseg sa at fagmabalanun at maliam ban. Laman ban at fagsegun sa tuwas Funbalugu, At mafafon antam fagayu nus nge wain, laman guseganan tuwa tam. ¹⁸ Ay foyungi yangay anya te, laman masine yangay at fagbulun fagayu. Ay laman kanya kamon tuwa sa tiba. Anway at masine fag fagbulun kata yangay nu e fagmabalanun si anya. ¹⁹ Anway nu katanya tuwa at fagbulun, e nasandig yangay at fagmabalanun sas Banwa. Ay e fagsegun wa long ban at leleg faggugat. ²⁰ O wan, Tagseg-Funbalugu, fatvngvduni fagayu ebi Funbalugu At nafon emu fag ngay fagbulun. Ay lag kaful sa sik taw tage longan at yud gfadiuganan sas Funbalugu. Ay anggan sa sik taw at longan nu gsalag way at masine, ay anggan nu gfanluk way te, ami tuwa tagsaful. ²¹ Anway ka fag yud kafandiug dewa nafoyung te, aw tuwa tagsaful, roro katanya gsalan yay at amatanganan sas fakafandiugun baliwa. Funbalugu At mamanyun nangus sa emu.