1 Thessalonians

¹ Siginan emi fag tulu, Fandak ay Silas ay Tagseg-Funbalugu. Nanriruk ami sa ayu, sas fulan Tesalunika at maful fag ngay takafandiug sas Funbalugu tam Tama ay sa tam Fun Isus Fagtayukan. Tam Funbalugu At mamanyun nangus sa ayu ay At nanfanabayan ayu. ² Faggugat guseganan ami sa tam Funbalugu, anway kafandiug tuwam. Ay faggugat gamatangan tuwami ayu gina ami gdarangin. ³ Ay nu gdarangin wami sas Funbalugu tam Tama, faggugat gamatangan ami te, matvngvd ay fakafandiugun madyay masine ay fagbulun. Ay matvngvd nu kesug am siginan ay nafatvngvd ay fagbulun. Ay anggan matvngvd tuwa nu gfanya am tam Fun Isus Fagtayukan nu kadasug. ⁴ Ay nasaful yangay ami te, Funbalugu At nafili ayu, em ngay fadugsay, Funbalugu At fakesugun. ⁵ Anway em foyungan ayu fag Masine-Fag-Barita bundi taw at ge longan. Em foyungan at ke fagmadaragangun tuwa, anway At-Masine-Fag-Falad gtarabang emi. Ay matvngvd nu gafanud ami te, matuyan wa fiya em foyungan. Anway nasaful wam em ugali kaduge ami maful ayu laman e fanambagun tuwam. ⁶ Ay nafaning tuwam em ugali ay anggan sa tam Fun At ugali. Ay dewa gina e gfauri ayu, kafandiug tuwam sat foyungan. Ay At-Masine-Fag-Falad tagfauseganan sa ayu. ⁷ Ay nu katanya, katsi am wan sik masine fag ulitan sas fagayu takafandiug sas talun Masedunia ay sas talun Akaya. ⁸ Ay katsi indungug wan at foyungan siginans Funbalugu anway kafandiug tuwam. Ay bundi sas talun Masedunia ay talun Akaya fagtvngvd. Ay anggan tuwa sas fagayu talun at taw nadungug wan ay fakafandiugun sas Funbalugu. Ay dia ban e masuad dewa ami nananfoyung te, kafandiug am. Anway at ngay taw nadungug yay fagtvngvd. ⁹ Ay at nadungug em fagbulun nanfoyung sa tiba te, katanya nu nafasakbo am emi. Ay katanya nu gubun am ebi ay ngay fagsegan fag tawtawan laman igseg Funbalugu. Ay nu katanya igfaning wam tam Tagleleg-Faggugat ay At-Matuyan-Fag-@Funbalugu. ¹⁰ Ay nu katanya tuwa, igfanya wam Funbalugu At Baguama nu kadasug ban siginans Banwa, tam Funbalugu At nafaleleg ebi siginan At fagmatianan. At ngayan Isus, tam Tagbalabag siginans Funbalugu At fandotamaan ban.

¹ Em ngay fadugsay, nasaful wam te, e masuad tuwa em fagindasugun ebi sa ayu. ² Madyay dewa e gfaurianan sa emi ay dewa e gfadotamaan emi ebi sas fulan Takesug-Kabayu, nasaful wam te, gina ami si ayus fulan Tesalunika, Funbalugu igtarabang tuwa emi. Madyay nananmalimuanan tuwami nanfoyung ayu Funbalugu At Masine-Fag-Barita, dewa e gsalag dawdaw emi ginanya. ³ Gina matvngvd nu gfoyung ami ayu, di ami gsalan, ay di ami galabian, ay di ami gfanluk. ⁴ Em foyungun ayu igfaning wa Funbalugu At fasadan. Anway Funbalugu nafoyung emi at Masine-Fag-Barita laman nanfoyung yangay ami at Masine-Fag-Barita sa tibak taw. Laman Funbalugu guseganan tuwa em fagbulun ay bundi fagtvngvd taw taguseganan. Anway Funbalugu wan tagsaful tam amatanganan. ⁵ Teway nasaful wam te, em fagindasugun bundi sik fagmalukmeun at mafamuagan fag longan. Ay du ami gsuksuk sik fagalabianun. Anway Funbalugu wan at nafatuyan te, matuyan em ugali. ⁶ Ay em fagsarapun bundi te, laman e sumeg emi, dewa am ay dewa tibak taw. Dewa ami e fagmadaragangun sak e sumeg emi anway ami anyay Fagtayukan At suguan. ⁷ Ay malukme tuwami nu maful ami ayu. Kata sik mangena nu gfatvngvdun at ngay unga. ⁸ Anway kafanyu ami dawdaw ayu. Ay kaumsig ami gfoyung ayu Funbalugu At Masine-Fag-Barita. Ay dewa ami umkate, laman e fanambagun tuwam, anway kesug ami dawdaw ayu. ⁹ Em ngay fadugsay, nasaful wam em fagatakanun ay em fakalufuyun anway siginan em fagbulun. Anway kayu menit ay kayu yabi e fagbulun yangay ami mandi. Laman di am e natakan siginan emi, kaduge ami gfoyung ayu Funbalugu At Masine-Fag-Barita. ¹⁰ Am, ay anggan Funbalugu, at nafatuyan te, em ugali malayun tuwa sat masine, ay matuyan. Ay di ami e nasalan gina ami sanya si ayu. ¹¹ Ay nasaful yangay am em fagbulun sa ayu. Kata sik mangama nu gfoyung sa at sisian, katanya yangay ami. Nafatvngvd ami ay amatanganan sadi sadik taw. Ay nafaliaman ami ayu. Ay anggan nafatvngvd ami em longan sa ayu. ¹² Laman ay ngay ugali masine tuwa sas Funbalugu. Anway Kanya wan At nafili ayu te, laman umful tuwam sa At-@Fagmagurangan-Taw ay anggan sa At fagmasineun. ¹³ Igseg wami tam Funbalugu faggugat. Anway nadungug wam em foyungan Funbalugu At longan, ay nasaful wam te, bunwa sik taw at ke longan. At matuyan, Funbalugu wa fiya At ke longan. Ay At longan wan tagfatvngvd ayu fagayu am takafandiug. ¹⁴ Anway kata yangay am at ngay takafandiug sas Fagtayukan Isus sasa ngay Funbalugu bale sas talun Naseg. Ay e gfauri yangay ayu siginan ay talun at taw. Kata yangay at ngay takafandiug sas talun Naseg e gfauri yangay anya siginan at talun at taw, Taw-Naseg. ¹⁵ Kanya wa fag ngay Taw-Naseg at nafate tam Fun Isus ay anggan Funbalugu ebi at ngay taglong. Ay kanya yangay fiya at naayiyan emi. Ay at fagbulun igfadotamaan Funbalugu ay anggan igsalag fagayu taw. ¹⁶ Anway kanya igsalag yangay emi gina ami gfoyung sat Yud-Naseg-Fag-Taw, te laman at Yud-Naseg-Fag-Taw dua mbalabag. Ay at ngay tagsalag at asalanan inkayu wa dawdaw. Ay nu katanya, Funbalugu kadotama dawdaw anya. ¹⁷ Ebi em bilug insaman yay ami sirut ayu, ay bundi em amatanganan at kinsaman ayu. Ay nu katanya gananlagun yangay ami ayu, ay nanfaskud wa ban ami nanlag ayu. ¹⁸ Anway ebi kaumsig yamami ganangadasugun sa ayu. Ay aw wan Fandak, ngayu ginan akwa nanfaskud galoun sa ayu. Ay Tagfansalag igsalag way emi. ¹⁹ Sinu tagfatvngvd em amatanganan kaduge ami gfanya. Ay sinu tagfauseganan emi. Ay sinu tagfefanambagun emi gina ban umdasug tam Fun Isus. Go am wa manga. ²⁰ Kin. Am way tagfauseganan emi ay am way tagfefanambagun emi.

¹ Ebi gina ami sas fulan Atenas, gananlagun ami dawdaw ayu. Ay nu katanya, em fasadan sumadsamanan wami. Ay ami duwa, aw ay Silas, ste yay ami sas fulan Atenas. ² Ay nansugu ami tam fadugsay, Tagseg-Funbalugu, sa ayu. Kanya Funbalugu At fanuguan gina gfoyung Fagtayukan At Masine-Fag-Barita. Ay em fagnasuguun anya, laman kanya nanfatvngvd ay fakafandiugun ay ay amatanganan. ³ Laman nus di sadik taw si ayu laman di ban gfainbalian at amatanganan, dewa katsi e gfauri ayu. Anway nasaful wam te, umdasug wa fiya katanya, Funbalugu nu nafili wa antam. ⁴ Ay ebi kaduge ami maful si ayu, faggugat igfatagak wami ayu te, e nanfauri wa ban fiya antam. Ay katsi nalag wam te, insure wa ngaro fiya kata em longan. ⁵ Ay gina aw dawdaw gananlagun ayu, nasugu aw Tagseg-Funbalugu sa ayu laman nanfoyung ban angku te, go setvngvd ay fakafandiugun. Anway gayup akyay te, at Tagfe-Asalanan mafe asalanan ayu. Ay em foyungan ayu ebi magyud ban e masuad. ⁶ Ay katsi Tagseg-Funbalugu, em fadugsay, gdog yay infoli sa emi siginan ayu. Ay masine at foyungan emi sanya ginan. Ay matvngvd tuwa unu ay fakafandiugun ay anggan ay fakedkesuganun. Ay nafoyung yangay te, ay amatanganan unu kafanyu tuwam emi. Ay anggan gananlagun tuwam emi kata nu gananlagun ami ayu. ⁷ Nu katanya, em ngay fadugsay, dewa ami e fagatakanun ay e faurianan, di ami e amatanganan dawdaw sa ayu katsi anway kafandiug tuwam. ⁸ Ay katsi guseganan ami kaduge ami gleleg, anway matvngvd tuwa nu gfaning am sa tam Fun. ⁹ Matvngvd nu glong ami sas Funbalugu te, fadi fadi, anway kafandiug am. Anway guseganan ami dawdaw ayu nu kaakbang ami sas Funbalugu. ¹⁰ Anway gdarangin ami ayu kayu balabag ay kayu yabi, anway kaumsig ami lumag ayu. Ay manga te, laman nanfamut yay ami ay fagayudanun sa ay fakafandiugun baliwa. ¹¹ Katsi em darangin te, laman tam Funbalugu tam Tama ay tam Fun Isus tumarabang emi laman umdasug ban ami sa ayu. ¹² Ay laman tam Fun nafatvngvd ban nu kadkafanyuan am ay iba, ay anggan nu kafanyu am sas fagayu taw. Laman kafanyu yangay am, kata nu kafanyu ami ayu. ¹³ Laman tam Fun nafatvngvd yangay ban ay amatanganan. Ay laman ban malayun tuwam sat masine ay di am e nasalan gina ban am umlindug sas Funbalugu tam Tama At akbang, gina ban kadasug tam Fun Isus ay At ngay taw.

¹ Em ngay fadugsay, tuy em longan matvngvd ro dawdaw sa ayu siginan tam Fun Isus At longan, laman nanfatvngvd ami ay amatanganan. Madyay ebi batang wami gfoyung ayu te, kata tuyi ay ugali laman gfauseganan am tam Funbalugu. Ay kata nu gfaning am katsi, ay fatunglusi ban. Ay anggan labii yap ban. ² Anway nasaful wam ebi em foyungan ayu siginan tam Fun Isus At longan. ³ Kata tuy tam Funbalugu At fakaumsigun sa ayu fagayu. Laman fagayu am gfadiuganan tuwam sas Funbalugu. Ay at masuad te, lag kamayun. ⁴ Ay laman fagayu am, sadi sadik taw, safuli tuwa gbaris ay bilug at fakaumsigun at mauri, laman gfadiuganan tuwam sas Funbalugu. Ay laman e gseg tuwa ban ayu. ⁵ At masuad te, lag galabian kata at Yud-Naseg-Fag-Taw, at yud nasaful Funbalugu. ⁶ Ay manga dangai e nasalan sa ay fadugsay takatanya fag fagbulun at mauri. Anway tam Fun gfefaurianan wa ban fiya sat ke nasalan. Anway ebi matvngvd wan nu nafatagak ami ayu takatanya. ⁷ Anway Funbalugu At fagnafiliun antam bundi te, nangalabian tam. At fagnafiliun antam antuwa te, laman nanfadiuganan tuwa tam sas Funbalugu. ⁸ Ay nu katanya, sik taw nu kauri way em foyungan, ka fag taw at fakaurian duat sas taw. At fakaurian sa was Funbalugu, At nafon ayu At-Masine-Fag-Falad. ⁹ Du e masuad sa ayu dewa ban ami rumiruk sa ayu sas fakedkesuganun baliwa. Anway Funbalugu wan At nafasaful sa ayu te, edkesugani. ¹⁰ Ay kin, kesug wam ay ngay fadugsay sas fagdaul talun Masedunia. Ay em fagnaatulun ayu, em ngay fadugsay, laman fainkugatani yap takatanya. ¹¹ Ay nu maugalian am, malukmei tuwa. Ay buli way nus nga setvngvd ay fagmafabulun fag fagbulun. Ay am ituwa tagfanyafun ay yafun mandi. Kata ebi em nafoyung ayu. ¹² Ay fagbuluni tuwa, laman at yud kafandiug fag taw sumeg tuwa ayu anway katanya ay ugali. Ay laman manga di am e fagayudanun. ¹³ Em ngay fadugsay, kata tuy em fakaumsigun. Asafuli tuwa sa at kinkate baliwa, laman di ban am kabalu, kata at ngay taw at yud e fagsegun ay kabalu way. ¹⁴ Anway gafanud tuwa tam te, tam Isus dewa nkate ebi, katsi gdog yay gleleg. Ay manga gafanud yangay tam te, tam Funbalugu tagtaban ban at ngay takafandiug at kinkate ebi ste ginan swa daga gasfuan ban gina Isus stumiye. ¹⁵ Anway em longan ayu siginan tam Fun te, itam, kayu katsi tagleleg ste swa daga gina ban tam Fun kadasug, dia tam iguna tam iba at kinkate. ¹⁶ Anway tam Fun umdaga ban stiye swa daga siginans Banwa. Ay ginanya ban gbiya nu ge longan. Ay At tagbukngan daul gbiya nu guro. Ay anggan gbiya nu gbudyung sas Funbalugu At fagbudyungan. Ay nafaleleg at ngay takafandiug, fagayu at kinkate at bilug, kanya taguna at lumo ste ginan swa daga. ¹⁷ Ay rodi tv, nus nga sinu tam tagleleg, lumo yangay tam nangaful sa at naguna antam at kinkate sas linyabu. Laman nanfablang tam tam Fun sas kiwang. Ay faggugat long maful wa ban tam sa tam Fun. ¹⁸ Ay nu katanya, fagayu am fadfaliamani ay iba at fakabaluun ste ginan fag longan.

¹ Em ngay fadugsay, du e masuad sa ayu dewa ami rumiruk sa ayu te, go seduge aro fagayu em foyungan nu mdasug. ² Anway nasaful wam te, tam Fun-At-Menit umdasug wa ban fiya kata sik takamul sad yabi. ³ Ay ginanya ban at ngay taw glong yay te, Manabayan tuwami ay e fagmatvngvdun tuwami katsi. Ay roro mangaro indasug wa daw at fakatabuan. Kata sik mangena nu gbuba. Ay ginanya dewa yud e namatangan, rodi tv galuat wa daw. Ay katanya yangay ban, ka fag ngay taw dua ban umbalabag. ⁴ Ay am, em ngay fadugsay, di am kata sasad marum te, laman gina mdasug ka fag menit umlipsik am kata sik takamul sad yabi. ⁵ Anway fagayu am tagsiginan wam sad mayamag fag taw. Ay igfagbulun tuwam gina mamenit. Ay di tam tagsiginan sad marum fag taw. Ay di tam kaumsig igfagbulun gina mayabi. ⁶ Nu katanya, dangai am kata sik taw tagtiug. Matagakani tuwa ay barisi sigon. ⁷ Anway sik taw nu kaumsig igtiug, sad yabi way nu gtiug. Ay sik taw nu kaumsig nangasigung, sad yabi way nu kasigung. ⁸ Ay anway itam tagsiginan tuwa tam sad mayamag fag taw, ay masine nu gbaris tuwa tam. Tam fakafandiugun ay tam fakafanyuun kata sik famalabag si tam dubdub. Ay tam fagfanyaun nu antam umbalabag kata sik famalabag si tam alfuyu. ⁹ Anway Funbalugu At fagnafiliun antam bundi te, nangadotama sa antam. At fagnafiliun antam antuwa te, laman umbalabag tuwa tam anway tam Fun Isus Fagtayukan At fagbulun. ¹⁰ Ay Isus At faginkateun laman dewa ban tam gleleg, ay dewa ban tam inkate, umful tuwa ban tam sa Anya gina ban Kanya umdasug. ¹¹ Anway katanya, fadfaamatanganani ay fadfatvngvdani ay iba at amatanganan, kata ay ugali katsi. ¹² Matvngvd nu glong ami sa ayu, em ngay fadugsay te, segi tuwa ay magurang. Anway kanya matvngvd tuwa nu gatul ayu ay nu gfoyung ayu sa tam Fun At ugali baliwa. ¹³ Segi ay afanyui dawdaw anya, anway at fagbulun. Ay madmalukmiani tuwa ayuwayu. ¹⁴ Gatul wami ayu katsi, em ngay fadugsay. Ay bayayi tuwa nu gfafanaloun way. Ay fatvngvdi sik taw tagfangalimu sat amatanganan. Ay tarabangi at mafanalo at bilug. Ay e namafanyani tuwa ay iba nus nga ginain. ¹⁵ Ay fagayu am dangai gfafoli at mauri sat tagfauri ayu. Ay sarapi tuwa ay ugali at masine sa ay fadugsay ay anggan sas fagayu taw. ¹⁶ Ay nus nga ginain useganani. ¹⁷ Ay faladlayunani tuwa nu gdarangin am. ¹⁸ Ay nus nga ginain, fauseganani tam Funbalugu. Anway katanya tuwa Funbalugu At fakaumsigun sa ayu, anway am wan Fagtayukan Isus At taw. ¹⁹ Ay lag salag Funbalugu At-Masine-Fag-Falad. ²⁰ Ay lag kalimata dewa e naguna nafoyung at kumdasug. ²¹ Amatangani wan fagayu, ay fatawadi way kayu at masine. ²² Ay lag gfaning nus nge wain at mauri. ²³ Funbalugu tam Tagfanabayan tagfadiuganan nangus am sa Anya. Laman matvngvd ay amatanganan ay ay bilug. Laman di am e nasalan anggan umdasug tam Fun Isus Fagtayukan. ²⁴ Anway matuyan tuwa Tagfili ayu. Ay katanya yangay ban At fagbulun. ²⁵ Em ngay fadugsay, darangini emi. ²⁶ Ay nu nafablang am ay ngay fadugsay, famatuani tuwa ay adkafanyuani tuwa. ²⁷ Matvngvd nu glong aw ayu siginan tam Fun te, Tapi tuy fag rirukan laman fagayu tam ngay fadugsay sanya dumungug ku longan. ²⁸ Tam Fun Isus Fagtayukan At mamanyun nangus sa ayu fagayu.