1 Peter

¹ Siginan angku, Takata-Sik-Batu, Isus Fagtayukan At-Suguan at sadi. Nanriruk aw sa ayu, sas Funbalugu At nafili fag ngay taw, at naayiyan ay nasaruwayan sasa ngay talun at ngayan te, Lino-Daul ay Galasia ay Kapadusia ay Asia ay anggan Bitinia. ² Funbalugu tam Tama dan tuwa nafili ayu. Ay At-Masine-Fag-Falad At nafasadi ayu sas Funbalugu. Laman ay fagfaningun sa tuwas Isus Fagtayukan. Ay At nafaliam ay asalanan anwa Isus At taguk. Funbalugu At mamanyun nangus sa ayu ay At nanfanabayan ayu kayu menit kayu menit. ³ Gseg watam tam Funbalugu, tam Fun Isus Fagtayukan At Tama. Anway Kanya kafanyu wa fiya antam, ay Kanya At nafon antam at bagu fag leleg. Madyay Kanya nafaleleg Isus Fagtayukan siginan at fagmatianan. Ay nu katanya e fagsegun watam te, umsure wa ban fiya. ⁴ Laman mul ban tam tam Funbalugu At fagafonun sa At ngay taw. Ay kanya At fagafonun di ban karuas. Ay di ban karasras. Ay anggan di ban maliam. Anway masandigan wa sas Banwa laman nanfon ban sa ayu. ⁵ Katsi Funbalugu wan tagdingding ayu anway Kanya madaragang tuwa, ay manga te, kafandiug tuwam sa Anya. Ay Kanya nafamasadan laman malabag wa ban fiya ayu sas fakatabuan fag ngay menit. ⁶ Ay nu katanya, useganani tuwa sas Funbalugu At fagbulun. Dewa nus nge wain katsi at faurianan sa ayu di ban glugo. ⁷ Amatangani sa sik sanbung fanumyu. Dewa ban sik sanbung fanumyu maliam, ay dewa ban sik taw nasugba at sanbung fanumyu sasad afuy, laman nanfalayun at masine. Ay fakafandiugun at kamafanudan glabi yay sik sanbung fanumyu. Ay ay faurianan kata sik afuy, laman nanfaskud ay fakafandiugun te, go kafandiug wam fiya. Ay nu gurungan tuwam kafandiug, kaduge ban tam Isus Fagtayukan umdasug, guseganan tuwayu. Ay kaumsig tuwayu. Ay masine tuwa At longan sa ayu. ⁸ Ebi dewa gyud am batang glag tam Isus, kesug tuwam Anya. Ay dewa gyud am nalag Anya katsi, kafandiug tuwam sa Anya. Ay matvngvd tuwa ay fagusegananun, du e manga long. ⁹ Ay anway kafandiug wam, inbalabag tuwa ban ayu. ¹⁰ Funbalugu At ngay taglong ebi naguna nafoyung te, Funbalugu mamanyun ban sa ayu. Ay ka fag ngay taglong dewa nafoyung katanya, dia nasaful at masuad. Ay dewa katanya, matvngvd nu gamatangan ay nu gsarap laman nangasaful ka fag foyungan fag fagbalabagun at masuad. ¹¹ Ay Fagtayukan At-Masine-Fag-Falad sa wa ebi fag ngay taglong. Ay At-Masine-Fag-Falad naguna wa nafoyung sa anya Fagtayukan At faurianan, ay anggan Fagtayukan At tiba tungud fag fagmasineun ban. Ay kanya fag ngay taglong gamatangan ay igsarap te, tain. Ay seduge ban. ¹² Ku ngay fadugsay, Funbalugu nafoyung sanya fag ngay taglong ebi te, laman at taglong at fagfoyungan bunwa sa anya fagtvngvd. At fagfoyungan sa tuwa ayu, sasa ngay takafandiug. Ay katsi e nafoyung wa ka fag foyungan sa ayu, at masuad kanya at Masine-Fag-Barita. Ay e nasugu At-Masine-Fag-Falad siginans Banwa laman gtarabang ay ngay takamoyung. Ay anggan Funbalugu At ngay tagbukngan kaumsig yay nasaful ka fag foyungan at masuad. ¹³ Anway katanya, mamatanganani tuwa laman mafamasadan tuwam fagayu ay fagbulun. Ay barisi tuwa. Ay matvngvdi tuwa nu gfanya am Funbalugu At fagafonun sa ayu kaduge ban umsure Isus Fagtayukan. ¹⁴ Faningi Funbalugu anway am wan At unga. Ay lag gfaning sa ebi fag fagalabianun ay nafaning gina am gyud gsaful Anya. ¹⁵ Ay Funbalugu wan At nafili ayu. Ay kanya At malayun sat masine. Ay katanyai yangay fagayu ay ugali, malayuni tuwa sat masine. ¹⁶ Anway At-Rirukan nalong wa te, Ani tuwa malayuni sat masine, madyay Aw malayun Aktuwa sat masine. ¹⁷ Kaduge am gdarangin, iglong am te, Funbalugu tam Tama. Ay Funbalugu matuyan tuwa nu gtap fagayu taw at fagbulun te, go masine, ay ate go mauri. Ay nu katanya, faningi tuwa Funbalugu ay malimuani tuwa sas fagayu ay ugali. Anway katsi kata yay am nu gbaklay am ste swa daga. ¹⁸ Anway nasaful wam Funbalugu At fagnasaliun ay at fagnafalfasan ayu siginan ebi ay ugali at yud e fanambagun. Ka fag ugali siginan way ebi ay aguyangan at nafoyung ayu. Ay Funbalugu At fansali bunwa salafi ay sanbung fanumyu at maliam ban. ¹⁹ At fansali Fagtayukan tuwa At taguk. Kata sik tupa riangan at yud e fangtat ay at yud e fanlonganan nus nge wain. ²⁰ Siginan ngay yud e daga, Funbalugu dan wa nafili Isus Fagtayukan. Ay Kanya indasug wa stiye swa daga katsi sas fakatabuan fag ngay menit, laman e fanambagun am. ²¹ Anway Fagtayukan At fagbulun, ay faginfandiugun sas Funbalugu. Ay Funbalugu nafaleleg Anya siginan At fagmatianan ay nafatiba tungud Anya. Ay nu katanya ay fakafandiugun sa tuwas Funbalugu ay anggan e fagsegun tuwam siginan Anya. ²² Anway katsi ay fagfaningun sa tuwa at matuyan fag longan, ay malayun tuwam sat masine. Ay kafanyu tuwam tam ngay fadugsay. Ay nu katanya, fatvngvdi nu kadkafanyuan am sa ay iba. ²³ Ay katsi e bagu leleg wam. Ay bundi siginan ay mangaguyang at kinkate ebi. Siginan tuwa tam Funbalugu At yud kate faggugat. Anway Funbalugu At longan at matuyan at yud e fakatabuan at nafon leleg sa ayu. ²⁴ Anway At-Rirukan nalong wa te, Fagayu taw kata way sik makmak. Ay at kamasinean kata yangay sik sariksik. Ay at makmak inkitut wan. Ay at sariksik intong wan. Dewa katanya, ²⁵ Funbalugu At longan du e fakatabuan faggugat. Ay ka fag Longan at Masine-Fag-Barita, ebi at nafoyungan sa ayu.

¹ Ay nu katanya, fasinei ay ugali. Ay lag gfauri ay iba. Ay lag gfanluk. Ay lag gfanlamangan. Ay lag galabian ay iba dewa e kwa. Ay lag kamuagan sa ay iba baliwa. ² Kata sik ngenge nu kaumsig susu bilug at yud e fagsagbatan, anggan am, aumsigi Funbalugu At longan, kata yangay at yud e sagbat fag fakonun. Laman umgurang ban am anway inbalabag wam. ³ Anway At-Rirukan nalong wa te, Dan wam nasaful tam Fun At fakafanyuun. ⁴ Akbangi sas Isus Fagtayukan. Kanya kata sik batu at yud e fakatabuan, at fangawat bale. Dewa at ngay takamale kalimata Ka fag Batu at fangawat bale, mafanud tuwa sas Funbalugu At nafili fag Batu. ⁵ Ay anggan am kata wam sik afud ka fag ngay batu at yud e fakatabuan, at ngay fangawat bale. Fabayani wa Funbalugu nu kawat tagbvt fag bale Funbalugu sa At-Masine-Fag-Falad baliwa. Ay am wan at fangawat. Ay am kata yangay am sik ngay taganyun sas Funbalugu. Ay gfon yangay am At fakaumsigun fag anyun sas Funbalugu. Anway Isus Fagtayukan At fagbulun si wa ayu. ⁶ Madyay At-Rirukan nalong wa te, Dungugani. Igturuk Aw sik Batu. Kanya tuwa fag Batu At tiba tungud at famatvngvd fagdaul at bale sas bugsul at ngayan te, Malanggangan. Kanya fag Batu, At nafili fag Batu e masuad wa fiya. Ay at takafandiug sa Anya di ban kapla faggugat. ⁷ Nu katanya, am takafandiug kesug tuwam dawdaw Anya. Ay at yud kafandiug dua katanya. Madyay At-Rirukan nalong wa te, Dewa at ngay takamale kalimata Ka fag Batu At fangawatbale, Funbalugu fagnafiliun Ka fag Batu laman At tiba tungud at famatvngvd fagdaul at bale. ⁸ Ay At-Rirukan nalong yangay te, Ka fag Batu At famataid Ay anggan At famatong at ngay taw. At masuad te, at ngay taw dewa nadungug Funbalugu At longan, dua gfaning. Ay kata nu ntaid. Katanya wan Funbalugu At fasadan sanya fag ngay taw siginan ngay ebi ebi. ⁹ Ay am long Funbalugu tuwam At nafili fag ngay taw. Ay am wan tam Fun at ngay taganyun. Ay am wan sik ngay taw tagfaning Funbalugu. Ay anggan am wan Funbalugu At ngay taw fiya fiya. Laman nanfoyung ban am sa tibak taw At Tagfili ayu At madaragang fag fagbulun te, Funbalugu At fagnafiliun ayu laman nanfalfas ayu siginans marum. Ay nataban ayu sa At masine fag fagmayamagun. ¹⁰ Ebi bunya am sik masadi fag taw. Ay katsi Funbalugu tuwam At taw. Ebi di e kafanyu ayu. Ay katsi Funbalugu kafanyu tuwa ayu. ¹¹ Ku fakesugun ku ngay taw, matvngvd nu glong aw ayu te, kata yay am sik ngay betaw ay sik ngay famaklay ste swa daga. Ay anway katanya, lag gfaning ste swa daga at ngay taw at bilug at fagalabianun. Anway takatanya igsalag way nu gamatangan am sas Funbalugu. ¹² Faggugat masinei tuwa ay ugali sa at yud kafandiug fag taw. Laman ban kanya dewa kamuagan sa ayu baliwa, roro nu nalag ay ugali nu masine tuwa. Ay nu katanya, kanya sumeg ban sas Funbalugu gina ban Funbalugu igtap at ngay taw at asalanan fag menit. ¹³ Faningi tuwa fagayu ay fun at longan si ay talun. Laman tam Fun Isus e fanambagun. Faningi tuwa, dewa tiba tungud ay fun. ¹⁴ Ay dewa sit daga tv fag ngay fun. Anway tiba tungud wa ay fun at nasugu anya at fagmafafauriun at ngay tagfaning mauri. Ay at fagmafafalongun at masine sat ngay tagfaning at masine. ¹⁵ Anway Funbalugu At fakaumsigun te, masinei ay ugali. Laman at yud mamatanganan fag ngay taw umtuas nu kamuagan sa ayu baliwa. ¹⁶ Ay katsi bundi am sik fanuguan. Ay dewa gyud am e fun, lag gfaning at mauri dewa ay iba gyud glag ayu. Ay masinei tuwa ay ugali anway Funbalugu tuwam At fanuguan. ¹⁷ Segi tuwa fagayu taw. Ay adkafanyuani yangay fagayu takafandiug. Ay segi tuwa sas Funbalugu ay malimuani. Ay segi yangay ay fun at tiba tungud si ay talun. ¹⁸ Am at ngay fanuguan, faningi tuwa ay fun ste swa daga. Segi tuwa malimuani anya. Ay bundi sa takafanyu fag fun ay sa at malukme fag fun fagtvngvd. Anggani tuwa sat yud malukme fag fun. ¹⁹ Ay Funbalugu kaumsig sik taw nu igbaris tuwa ay nu gamatangan tuwa sas Funbalugu, dewa dawdaw e gfauri anya, dewa yud e asalanan. ²⁰ Anway du e fanambagun sa ayu dewa am igbaris gina e gfalang ayu nu e asalanan wam fiya. Roro ngap dewa e gfauri ayu nu masine tuwa ay fagbulun, gina am gbaris, Funbalugu guseganan tuwayu. ²¹ Katanya tam Funbalugu At fagnafiliun ayu, laman maabaris tuwam dewa e gfauri ayu. Anway anggan Fagtayukan nabaris yangay dewa e gfauri anya, laman e fanambagun tuwa ban am. Kanya ay fagulitan, laman ay fagfaningan ban. ²² Ay Fagtayukan di e asalanan. Ay di batang kamuagan faggugat. ²³ Dewa e gfalingun Fagtayukan, Kanya di mauri at longan sa tagfalingun Anya. Ay dewa e gfauri Anya, Kanya At longan di gfalimuanan sa tagfauri Anya. Ay roro ngap Kanya nafanusetaw wa sas Funbalugu nus nge wain, sa At matuyan fag tagtap taw at asalanan. ²⁴ Ay Fagtayukan naubanan wa tam asalanan si at bilug sas salibagan kayu. Laman ban di tam gfaning asalanan. Tam fagfaningun sa tuwa at masine fag ugali. Ay Isus At faginke fakarukanun laman At famafiya ayu. ²⁵ Anway ebi kata way am sik ngay tupa at maliaman. Ay katsi nfoli tuwam sa ay Tagtanud ay sa Tagdingding ayu.

¹ Mangenam, faningi tuwa ay mangama. Laman ay mangama at yud gfaning sas Funbalugu At longan katsi, laman ban maning tuwa sa At longan, dewa gyud e nafoyung anya. Anway sat kamasinean ay ugali. ² Anway at mangama nalag at mangena te, igfaning tuwa anya ay malayun tuwa sat masine at ugali. ³ Lag faggugat nu gamatangan am nu nanfasineun am ay bilug. Anggan nu nanfasineun am dawdaw ay buk. Ay anggan nu gfaayu am ay dalag. Ay anggan nu gsulun am at tiba tungud at masine fag lanbung. ⁴ Ay fagfasineun bundi fagtvngvd ay bilug. Roro ngap ay ugali tuwa at masine tagfasine ayu. At masuad ka fag longan te, malukmei tuwa ay mabayani tuwa ay ugali. Katanya tuwa at yud ban maliam faggugat. Ay Funbalugu kaumsig tuwa dawdaw takatanya fag ugali. ⁵ Katanya tuwa ebi ebi fag ngay mangena at tagfaning ay at ke fagsegun siginans Funbalugu. At fagfasineun takatanya tuwa fag ugali at masine. Ay anggan tuwa igfaning sat mangama. ⁶ Katanya tuwa ebi Fun-At-Baguina. Igfaning tuwa sa at mangama, Abrayam, ay nu gngayan antuwa te, ku fun. Ay fagayu am mangena, kata wam Fun-At-Baguina at unga nu gfaning tuwam at masine. Ay nu gdi am kalimu nus nge wain at kumdasug. ⁷ Ay Mangamam. Tarabangi tuwa ay mangena ay esugi anya, anway ay mangena at bilug dua kamagong si ayu ay bilug. Ay anway fagduwa am mul ban am tam Funbalugu At fagafonun fag leleg. Ay laman di e gsalag nu gdarangin am. ⁸ Ay ku longan at fakatabuan sa ayu fagayu te, fasadii tuwa ay amatanganan. Ay anggan fasfuani ay iba gina e fagamatanganun. Ay afanyui ay ngay fadugsay. Ay malukmei tuwa, ay fababauni tuwa sa ay amatanganan. ⁹ Lag gfasudan sa tagfauri ayu ay anggan sa tagfalingun ayu. Roro darangini anya laman Funbalugu mon anya sik fagmasineun. Teway katanya tuwa Funbalugu At fagnafiliun ayu, laman e fagmasineun ban am. ¹⁰ Madyay At-Rirukan nalong wa te, Nus nga sinu takaumsig guseganan gina gleleg ste swa daga, Ay takaumsig nu manabayan sas fagayu menit, Dangai glong mauri sa tiba baliwa. Ay dangai gfanluk sa tiba. ¹¹ Ay ubuni tuwa at mauri. Ay faningi sat masine. Ay maamatangani tuwa laman manabayan tuwa. Ay katanyai tuwa ban at ugali faggugat. ¹² Anway tam Fun wan takamato sa tagfaning at masine, Ay tagdungug at darangin. Roro ngap Kanya tuwa tagsalag sik taw nu gfaning way at mauri. ¹³ Go e gfauri yay ayu, gina am maseganama sat masine fag fagbulun. Go igdi. ¹⁴ Ay dewa e gfauri ayu anway masine tuwa ay fagbulun, e fanambagun ban am. Ay dewa katanya, lag kalimu tagfauri ayu, ay lag gafanawa. ¹⁵ Ay sa ay amatanganan segi tuwa tam Fagtayukan anway Kanya tuwa tam Fun fiya fiya. Ay mafamasadani tuwa laman nus nga ginain ay nus nga sinu at taginto ayu, mafafoyung tuwam sa anya ay fagfanyaun at masuad. Ay gina am igfoyung, malukmei tuwa ay lag fandaragang. ¹⁶ Ay fatunglusi ay ugali at masine dewa tiba glong mauri sa ayu baliwa. Laman at tagfalingun ayu mapla at nalongan. Anway kanya nalag ay ugali at masine anway gfaning tuwam sas Fagtayukan. ¹⁷ Nu Funbalugu wa fasadan te, dewa e gfauri ayu, masine tuwa anway at masuad te, at fagfauriun ayu anway masine ay fagbulun. Ay lagi at masuad nu anway te, at fagfauriun ayu anway mauri ay fagbulun. ¹⁸ Anway saiginan way Fagtayukan nu nkate, laman nanfamin fagayu taw at asalanan. Sik Masine fag Taw inkate laman at yud masine fag ngay taw e fanambagun. Ay Kanya tagfakbang antam sas Funbalugu. Dewa ebi e nafate Isus, bandi At-Masine-Fag-Falad nafaleleg Anya. ¹⁹ Ay ginanya Fagtayukan nalo wan laman nanfoyung sa sik ngay taw at kinkate at kinsungsung. ²⁰ Kanya ebi fag ngay taw at kinkate at yud gfaning Funbalugu. Dewa Funbalugu nafanya anya, gina Tagfataluan kawat at balutu daul. Sadsadian wayk taw at nasakbo sanya fag balutu. Walu wayk taw at kinlangfe siginans safa daul. ²¹ Ka fag safa daul ebi sik fafaskudanan yangay sa katsi te, ay faginsurungun inlangfe wam. Ay ay faginlangfeun anway Isus Fagtayukan gdog yay gleleg. Ay ay faginsurungun at masuad bunwa te, nafegus at malayung si ay bilug. Roro ngap at masuad antuwa te, ay famatuyanan sas Funbalugu te, igfaning tuwam At longan faggugat. ²² Ay Isus Fagtayukan nasakbo wa sas Banwa ay sa was Funbalugu At siun baliwa fag day tigyangan. Ay fagayu At tagbukngan ay anggan fagayu taw yabi at fun ay at magurang igfaning Anya.

¹ Fage nafauriun Fagtayukan At bilug, laman e fanambagun ban am. Ay nu katanya, anggan ayu ay amatanganan faningi tuwa Fagtayukan At amatanganan. Laman sik taw dewa e nafauri at bilug, di kaumsig gfaning at asalanan. ² Ay nu gdi am gfaning asalanan kaduge am gleleg ste swa daga, di am gfaning anggan sat mauri fag fagalabianun. Ay fagfaningun sa tuwas Funbalugu At fakaumsigun. ³ Sak wan nu gfaning am sa ebi at yud kafandiug at ugali. Tenday, nu kamalabiun. Ay nu galabian. Ay nu ginum fangasigung laman sak kasigung. Ay faglugoun nu maful laman nanfadaul nu kon, ay nu ginum at fangasigung, ay anggan nu galabian. Ay anggan nu gseg tawtawan dewa e gsalag sa katanya. ⁴ Ay ka fag ngay taw madulawan nu gdi am kaful sanya fag ngay tagalabian at asalanan nus nge wain. Ay nu katanya, mauri way at longan sa ayu baliwa. ⁵ Ay ka fag ngay taw ban malus ban Funbalugu gina ban ginto anya. Anway Funbalugu mafamasadan wan nu nantap fagayu taw at asalanan, dewa sa tagleleg ay dewa sat kinkate. ⁶ Kata tuy at masuad at fagnanfoyungun at Masine-Fag-Barita dewa sa ebi at kinkate. Laman dewa at bilug inkate kata tibak taw ste swa daga, kanya gleleg yangay ban, igfaning Funbalugu At fakaumsigun. ⁷ Makbang wan katsi fagayu nu katabu. Ay nu katanya, maamatangani tuwa ay barisi tuwa. Laman mafafatunglus tuwam nu gdarangin am. ⁸ Ay at tiba tungud fag ugali at matvngvd antuwa te, afanyui tuwa ay iba faggugat. Anway nu kafanyu tuwam ay iba, katanya at mafatabun ngayuk asalanan. ⁹ Ay rodi fasakboi ay iba at bagu kadasug ay dangai kalimata anya. ¹⁰ Funbalugu At nafon sa sadi sadik takafandiug ay saman wan at fagmafabulun. Fagayu takafandiug, fagbuluni wan, laman tibak takafandiug e fanambagun siginan ay fagmafabulun. Anway am wan sik matuyan fag tagtanud sas Funbalugu At nafamanyun ayu nus nge wain. ¹¹ Nu sik tagfoyung o, foyungi wa Funbalugu At longan. Ay nu sik tagtarabang o, tarabangi wa nus nga setvngvd Funbalugu At nafon emu at fagmadaragangun. Laman nus nga ginain ban, e sumeg tuwa sas Funbalugu anway Isus Fagtayukan wam At taw. Ay gseg watam Anya anway Kanya At tiba tungud At ke fagmasineun ay anggan sik magurang faggugat faggugat. Kin, katanyai tuwa. ¹² Ku fakesugun ku ngay taw. Lag gadulawan dewa mason nu e gfauri ayu, at famaskud way ayu. Dewa am gyud gtagak nu mdasug. ¹³ Ay dewa katanya, useganani tuwa. Anway e gfauri wa fiya ayu kata nu e gfauri sas Fagtayukan ebi. Dewa katanya, guseganan tuwa ban am dawdaw gina mdasug Fagtayukan At fagmasineun. ¹⁴ Dewa e gfalingun ayu anway kafandiug tuwam sas Fagtayukan, ay e fanambagun ban am. Anway Funbalugu At-Madaragang-Fag-Falad si wa ayu. ¹⁵ Ay anway te, at fage gfauriun ayu nu sik tagfate yay am, ay nu sik takamul yay am, ay nu sik tagasalanan yay am, ay nu sik tagfangafayudun yay am, dua ban am e fanambagun. Dangai katanya. ¹⁶ Roro ngap dewa e gfauri ayu anway am wan Fagtayukan At taw, lag kapla dewa katanya at fagbulun sa ayu. Segi tuwa Funbalugu anway tiba nangayan wayu te, am wan Fagtayukan At taw. ¹⁷ Katsi makbang wan Funbalugu nu nantap fagayu taw at asalanan. Ay at taguna At fagnantapun At filian yay fag ngay taw at asalanan. Funbalugu nu e fagtapun way tam asalanan, setvngvd ngap ban at faurianan sa at yud kafandiug sas Funbalugu At Masine-Fag-Barita. ¹⁸ Anway At-Rirukan nalong wa te, Nu mataka yay sik matuyan fag taw nu mbalabag, setvngvd ban sa sik tagasalanan at yud naseg Funbalugu. ¹⁹ Nu katanya, dewa e gfauri ayu nu katanya wa Funbalugu At fakaumsigun, faningi at masine ay nus nge wain fanusetawi wa sa At Matuyan fag Takawat ayu.

¹ Nu katanya, matvngvd nu glong aw sa ay ngay Funbalugu bale at magurang te, anggan aw sik magurang akyangay kata ayu. Ay aw nalag akwan nu e gfauri tam Fagtayukan. Ay si yangay ban angku sik afud tam Fagtayukan At fagmasineun gina ban umsure. ² Ay nu katanya, iglong akyangay sa ayu te, fagayu ay ngay magurang, tanudi tuwa Funbalugu At ngay taw sa ay bale fakafulan mandi. Kata sik tagtanud tupa nu gtanud at ngay tupa. Tanudi yangay katanya, bundi te kalimu way am fagtvngvd at nasugu ayu. At masuad antuwa te, kaumsig tuwam, igfaning Funbalugu At fasadan sa ayu. Ay bunwa te, nanfaayu way am ay salafi. Roro antuwa te, madaragang tuwam ay guseganan tuwam nu gtanud am. ³ Ay gina am gtanud, dangai matvngvd nu gsugu am sa ay fagtanudun fag ngay taw. Anway am wan ay iba fagulitan sat masine. ⁴ Ay nu katanya tam Tiba-Tungud-Fag-Tagtanud gina msure, mul wa ban am fiya sik fanambagun fag sangbo at masine dawdaw ay at yud manga rasras faggugat. ⁵ Ay am at tiba at yud sik magurang, dungugani tuwa sa ay ngay magurang sas Funbalugu bale. Ay tanani tuwa tadtarabanganani, ay anggan fababauni tuwayu. Anway At-Rirukan nalong wa te, Funbalugu igsalag way tagfalabi at fagbulun. Ay Kanya kafanyu tuwa sa tagfababaun fag taw. ⁶ Nu katanya mangaro, fagayu am, fababauni tuwa sa ay amatanganan. Ay segi sas Funbalugu At fagmadaragangun. Ay Funbalugu yay ban tagfatiba tungud ayu nus nga seduge At fakaumsigun. ⁷ Foyungi wa sas Funbalugu fagayu ay fagafanawaun, ay dangai gafanawa. Anway Funbalugu wan takafanyu ayu. ⁸ Ay barisi. Ay tagaki. Anway ay fagfabarangianun, anwa Takamuag-Tiba-At-Fagbulun, ay glo way kata sik idu daul tagfangagat, igsarap taw laman at fakonun. ⁹ Fatvngvdi ay fakafandiugun sas Funbalugu ay matvngvdi tuwa nu gsalag am Takamuag-Tiba-At-Fagbulun. Anway nasaful wam te, e gfauri yangay ay ngay fadugsay sas fagdaul daga kata nu e gfauri ayu. ¹⁰ Ay Funbalugu kafanyu tuwa dawdaw ayu, ay At fagnafiliun ayu laman si yangay ban ayu sik afud At fagmasineun at yud e fakatabuan. Anway am wan Fagtayukan At taw. Ay katsi glugo wa sirut nu e gfauri ayu. Ay Funbalugu wa ban tagfatvngvd ay amatanganan laman ay fakafandiugun matvngvd tuwa. Ay laman maasungatan tuwam. ¹¹ Gseg watam tam Funbalugu, anway nu gmagurang du e fakatabuan faggugat. Kin, katanyai tuwa. ¹² Natap aw Silas te, tam fadugsay at matuyan. Kanya tagtarabang angku nu griruk aw tuy fag rirukan sirut sa ayu. Laman nanfatvngvd aw ay amatanganan, ku fagnafoyungun ayu te, matvngvd Funbalugu nu kamanyun sas fagayu takafandiug. Ay nu katanya, fatvngvdi nu kafandiug am sa Anya. ¹³ Ay ngay fadugsay sas fulan Fagaringanganan, Funbalugu At ngay nafili kata ayu, at nafadasug at fagusegananun sa ayu te, gamatangan tuwa ayu. Ay anggan ku unga at ngayan Takata-Sik-Fanuktuk-Daul. ¹⁴ Ay nu nafablang am ay iba, famatuani tuwa ay adkafanyuani tuwa. Funbalugu At nanfanabayan nangus ayu fagayu, Fagtayukan At ngay taw.