1 John

¹ Nariruk ami sa ayu em nadungug te, e Sik Longan tagfon leleg. Ka fag Longan siginan wat fagsigadan. Nadungug ami Anya ay em mata nalag Anya. Kin tuwa, nalag wami Anya, ay em daluap nated wa fiya Anya. ² At Tagfon-Leleg nu nsure wan, nalag ami Anya. Ay nanfasaful yangay ami ayu te, ebi Tagfon-Leleg gufud wa At Tama sas Banwa ay bandi nsure sa emi. ³ Nanfoyung ami ayu em nadungug ay em nalag, laman gfaguesanan tuwa tam. Ay anggan tam fagfaguesanan sa yangay tam Tama ay anggan sa At Baguama, Isus Fagtayukan. ⁴ Em fagnarirukun tuy fag longan, laman umdaul ban tam fagusegananun. ⁵ Nafoyung ami ayu kanya em nadungug siginan tam Isus te, Funbalugu sik fagmayamagun ay sa Anya di e marum, nus di sirut. ⁶ Dewa tam nalong te, igfaguesan watam tam Funbalugu, ay nu gfaning way tam sas asalanan at marum, kamuagan way tam. Ay dia tam gfaning sat matuyan fag longan. ⁷ Nut si tuwa tam sad mayamag kata Funbalugu nut sisad mayamag, nafaguesanan watam. Ay At Baguama Isus At taguk at nafegus fagayu tam asalanan. ⁸ Dewa tam nalong te, di tam e asalanan, roro nu gfanluk yay tam antam, at matuyan fag longan dyat si tam amatanganan. ⁹ Nu nafoyung tuwa tam tam asalanan sas Funbalugu, Kanya nafaliam wan fagayu tam asalanan. Ay anggan nafegus wan fagayu tam mauri. Anway Funbalugu faggugat mafanud ay matuyan. ¹⁰ Dewa tam nalong te, ebi di tam e asalanan, nafangayan watam Funbalugu te, sik takamuag. Roro fakatanyaun ay Funbalugu At longan dyat si tam amatanganan.

¹ Ku ngay unga sirut, nanriruk aw sa ayu kata aro ku longan laman di ban am gasalanan. Ay sik taw nu e asalanan yay ban, e nanbuknga yay ban antam siginan antam ay sa tam Tama. Tam Tagbuknga tam Isus Fagtayukan At yud e asalanan. ² Anway Isus At naatean, at mafafaliam tam asalanan. Ay at fagfaliamun bundi antam tam asalanan fagtvngvd. Anggan fagdaul daga at taw at asalanan. ³ Nu gfaning tuwa tam tam Funbalugu At longan, intuyan watam fiya fiya, ay nasaful watam Funbalugu At ugali. ⁴ Sik taw dewa nalong te, nasaful akwan Funbalugu At ugali, ay nu dway gfaning Funbalugu At longan, kanya sik takamuag way. Ay at matuyan fag longan dyat sa at amatanganan. ⁵ Ay roro nus nga sinu nu gfaning tuwa Funbalugu At longan, kanya kesug tuwa Funbalugu. Kata tuy nu gsaful tam te, Funbalugu At taw watam. ⁶ Nus nga sinu at nalong te, aw wan tagfaning Isus, at ugali faningi yangay Isus Fagtayukan At ngay ugali. ⁷ Ku fakesugun ku ngay taw, ku rirukan sa ayu bunwa sik suguan bagu. Ku rirukan sik taglugo wa fag suguan ay dan wam nasaful. Tuy taglugo fag suguan at foyungan ayu ay nadungug wa ebi. ⁸ Ay roro dewa glugo ka fag suguan, kata yay nu bagu. Ay tibak taw at fagnasafulun ka fag suguan at matuyan, anway nalag Isus Fagtayukan At fagbulun, ay anggan ay fagbulun. Anway at marum insirut wan, ay at matuyan fag Fagmayamagun insure wan. ⁹ Sik taw dewa nalong te, aw wan tagsisad mayamag. Ay roro nu kabalo yay sat fadugsay sat amatanganan, kanya sisad marum yay. ¹⁰ Ay nus nga sinu nu kafanyu tuwa at fadugsay, kanya sisad mayamag wan. Ay at fagbulun di gfataid at fadugsay. ¹¹ Ay nus nga sinu nu kabalo yay at fadugsay sat amatanganan, kanya sisad marum yay, ay nu glo, sasad marum yay. Ay kanya dua nasaful te, dada ro nu glo. Anway at marum gfarum wayay at mata. ¹² Ku fagnarirukun sa ayu at ngay sisian sirut anway nafaliam wan ay ngay asalanan, anway Isus At fagmadaragangun. ¹³ Ku fagnarirukun sa ayu at ngay tama, anway nasaful wam Anya. Ay Kanya siginan ngays fagsigadan. Ku fagnarirukun sa ayu at ngay baguama, anway nababo wam tagmauri. Ku fagnarirukun sa ayu at ngay sisian sirut, anway nasaful wam tam Tama. ¹⁴ Ku fagnarirukun sa ayu at ngay tama, anway nasaful wam Anya. Ay Kanya siginan ngays fagsigadan. Ku fagnarirukun sa ayu at ngay baguama, anway mabitsug tuwam. Ay Funbalugu At longan sa wa ay amatanganan ay nababo wam at mauri. ¹⁵ Lag kesug nus nge wain ste swa daga anggan at taw at ugali. Sik taw nu kesug way nus nge wain ste swa daga, dua kesug tam Tama. ¹⁶ Anway fagayu ste swa daga, anggan at taw at ugali, tenday at bilug at fagalabianun, ay at mata at fagalabianun, ay anggan at amatanganan at fagalabianun, duat siginan tam Tama. Ste ginan way swa daga at ugali. ¹⁷ Ay fagayu ste swa daga gakaminun wan, ay anggan at fagalabianun. Ay roro sik taw nu gfaning tuwa Funbalugu At fakaumsigun e leleg tuwa ban faggugat. ¹⁸ Ku ngay sisian sirut, katsi makbang wan at fakatabuan fag ngay menit. Ay ebi nadungug wam te, umdasug ban at Nanfaligbatan-Fagtayukan. Ay katsi insure wan at ngay nanfaligbatan Fagtayukan. Nu katanya wan, nasaful watam te, katsi makbang wan at fakatabuan fag ngay menit. ¹⁹ Ebi at ngay nanfaligbatan Fagtayukan maful yay antam. Ay katsi nalo wan. Dewa maful si antam, dua gfadiuganan sa tam amatanganan. Laman nu gfadiuganan tuwa ro sa tam amatanganan, maful tuwa ro antam anggan katsi. Ay roro kanya nalo wan. Ay at naloan tagfasaful sas fagayu taw te, kanya bunwa mangaro tam ufud fiya, nus di sadi. ²⁰ Ay Fagtayukan nafat si wa ayu At-Masine-Fag-Falad, ay fagayu am nasaful wam at matuyan fag longan. ²¹ Ku fagnarirukun sa ayu bunwa te, di am nasaful at matuyan fag longan. Ku fagnarirukun sa ayu antuwa te, dan wam gsaful at matuyan fag longan. Ay manga nasaful wam te, siginan at matuyan fag longan dua kamuagan. ²² Sinu ka fag takamuag. Kanya tagafayudun te, Isus bunwa Fagtayukan. Kanya at Nanfaligbatan-Way-Fagtayukan. Ay manga kanya sik tagafayudun way sas Funbalugu tam Tama ay anggan sa At Baguama. ²³ Nus nga sinu fag taw nu gafayudun way sa At Baguama, kanya gafayudun yangay anggan sa At Tama. Ay kanya nu nafoyung tuwa te, tam Isus tam Funbalugu At Baguama, kanya igseg tuwa anggan sa At Tama. ²⁴ Ay am, dangai kaliam ebi taguna ay nadungug. Nu gamatangan tuwam sa ebi taguna ay nadungug, insadi wam sa At Baguama ay anggan sa At Tama. ²⁵ Ay At fatuyanan sa antam te, gleleg tuwa ban tam faggugat. ²⁶ Katanya ku fagnarirukun sa ayu anway e gfanluk ban ayu. ²⁷ Ay tam Fagtayukan fagnafatsiun ayu At-Masine-Fag-Falad laman si tuwa ayu faggugat. Ay katanya tuway di am kaumsig sa tibak takamoyung. Anway At-Masine-Wa-Fag-Falad At tagfoyung ayu fagayu nus nge wain. Ay fagayu At ugali matuyan, ay di kamuagan. Faningi sa At foyungan ayu te, masadii tuwa sas Isus. ²⁸ Katsi ku ngay sisian sirut, masadii tuwa sas Isus, laman nu msure ban Isus, di tam malimuanan. Ay di tam kapla ay gsuksuan Anya gina kadasug. ²⁹ Anway nasaful tuwa tam te, tam Isus matuyan tuwa. Ay nasaful yangay tam te, fagayu at matuyan at fagbulun, kanya Funbalugu wa At unga.

¹ Amatangani te, matvngvd tuwa Funbalugu nu kesug antam, anway At fagnafangayanun antam, itam wan At ngay unga. Ay kin wa fiya. Ay at ngay taw ste swa daga dua natoglag antam, anway dua nasaful sas Funbalugu. ² Ku fakesugun ku ngay taw, katsi itam wan Funbalugu At unga. Ay katsi dia tam nasaful te, go tain ban tam fiya fiya. Tam fagsafulun anyay fagtvngvd te, tam Isus ban gina msure, fagayu tam kata yangay ban tam Anya. Anway lumag wa ban tam fiya Anya. ³ Ay fagayu taw kaduge kamanyan tam Isus, falayuni at ugali sat masine kata Funbalugu At ugali nu malayun sat masine. ⁴ Fagayu taw nu gasalanan way, kamabo way Funbalugu At longan. Anway asalanan ay fakamaboun At longan sadi yay. ⁵ Nasaful wam te, Isus At faginsureun, laman nafaliam tam asalanan. Ay Kanya di e asalanan. ⁶ Nus nga sinu fag taw nu insadi tuwa sas Isus, di nanfaning sas asalanan. Nus nga sinu fag taw nu gfatunglus yay gfaning sas asalanan, dua nasaful Isus, ay kata way yud nalag. ⁷ Ku ngay sisian sirut, lag dungugan sas tagfanluk, nus nga sinu. Sik taw at nafaning sat masine, kanya masine wan, kata tam Isus nu masine. ⁸ Nus nga sinu fag taw nu gfaning yay sas asalanan, at ugali siginan yay Takamuag-Tiba-At-Fagbulun. Anway Takamuag-Tiba-At-Fagbulun e asalanan wan faggugat siginan ngay at fagsigadan. Funbalugu At Baguama At faginsureun, laman nanfaliam wan Takamuag-Tiba-At-Fagbulun at ngay fagbulun fagayu. ⁹ Nus nga sinu fag taw nu Funbalugu tuwa At unga, di nanfatunglus nanfaning sas asalanan, anway Funbalugu At ugali si wa anya. Ay kanya di nanfaning sas asalanan anway kanya Funbalugu wa At unga. ¹⁰ Kata tuy at nasaman Funbalugu At unga ay Takamuag-Tiba-At-Fagbulun at unga. Nus nga sinu at yud e fagbulun masine, ay at yud kafanyu at fadugsay, kanya bunwa Funbalugu At unga. ¹¹ Kata tuy ay dungganan, ebi at foyungan te, tanan tam madkafanyuan. ¹² Ay dangai gfaning takata Takawat-Sanbung at fagbulun. Anway Takawat-Sanbung at sadi way Takamuag-Tiba-At-Fagbulun at unga. Madyay igfate way at arian. Ay at masuad at fagnafateun at arian anway te, anya at fagbulun mauri way. Ay at arian at fagbulun masine tuwa. ¹³ Ku ngay fadugsay, lag gadulawan dewa at ngay taw ste swa daga kabalo ayu sat amatanganan. ¹⁴ Itam nasaful watam te, di tam umdasug sas fakateun. Tam fakadasugan sa tuwas leleg faggugat. Anway kafanyu tuwa tam tam fadugsay. Sik taw nu dyay kafanyu at tiba, kanya at fakadasugan sas fakateun yay ban. ¹⁵ Kanya nu kabalo yay at fadugsay sat amatanganan, kanya kata yay sik tagfate taw. Ay nasaful watam te, sik tagfate taw dua ban fabul leleg faggugat. ¹⁶ Kata tuy tam fagnasafulun fakafanyuun at masuad. Anway Isus Fagtayukan At fasadan at faginkateun, laman e fanambagun tuwa tam. Ay anggan itam, masine wan dewa tam inkate, laman tam fadugsay sigon e fanambagun yangay. ¹⁷ Sik taw at ke kwa dewa nalag at fadugsay te, du e kwa, ay nu dway gtarabang at fadugsay, go tam Funbalugu At fakafanyuun si wa fiya anya. Go yaya. ¹⁸ Ku fakesugun ku ngay sisian sirut. Nu kafanyu tam tam fadugsay, dangai sa tam longan fagtvngvd. Matuyani tuwa tam fakafanyuun, laman gurungani tuwa tarabangi tam iba. ¹⁹ Nu katanya tuwa tam fagbulun, nasaful watam te, insadi watam sa At longan at matuyan. Ay manabayan tuwa tam sas Funbalugu At akbang. ²⁰ Dewa tam e faganudanun, nasaful watam te, tam Funbalugu At fagmadaragangun glabi yay tam amatanganan. Ay Kanya nasaful tuwa nus nge wain. ²¹ Ku fakesugun ku ngay taw, nu gdi tam e faganudanun, di ban tam kapla sas Funbalugu At akbang. ²² Ay mafabul watam tam fagetun siginans Funbalugu, anway igfaning watam At longan, ay tam fagbulun igfauseganan tuwa sa Anya. ²³ Ay kata tuy Funbalugu At longan te, afanudi sa At Baguama Isus Fagtayukan At fagmadaragangun. Ay tanani adkafanyuani anway katanya tam Isus At longan sa antam. ²⁴ Nus nga sinu fag taw nu gfaning tuwa sas Funbalugu At longan, kanya insadi wa sas Funbalugu, ay anggan Funbalugu si yangay anya. Ay tam fagnasafulan te, Funbalugu si wa antam, madyay Kanya nafat si wa antam At-Masine-Fag-Falad.

¹ Ku fakesugun ku ngay taw, taguna agi yap gafanud sas fagayu at taw yabi at longan. Faskudi yap te, go kanya siginan was Funbalugu. Anway ngayu at takamoyung at yud matuyan at nalo sas fagdaul daga. ² Kata tuy nu sumaful tam te, kanya fag taw yabi tagsiginan tuwas Funbalugu. Fagayu taw yabi nu nafoyung tuwa te, tam Isus Fagtayukan e bilug wa fiya ebi gina kadasug stiye swa daga, ka fag taw yabi siginan wa fiyas Funbalugu. ³ Ay fagayu taw yabi nu dway nafoyung te, Isus Fagtayukan e bilug wa fiya ebi gina kadasug stiye swa daga, ka fag taw yabi duat siginans Funbalugu. Kanya anway at Nanfaligbatan-Fagtayukan. Ay dan wam gdungug te, kanya umdasug ban. Ay kin, katsi indasug wa fiya stiye swa daga. ⁴ Ku ngay sisian sirut, am wan Funbalugu At taw. Ay nababo wam at ngay takamoyung at yud matuyan. Anway At-Masine-Fag-Falad tagsi ayu nu madaragang, glabi yay tagsanya fag takamoyung at yud matuyan ste swa daga. ⁵ Kanya fag takamoyung at yud matuyan tagste ginan way swa daga fag ngay taw. Ay at foyungan ste ginan yangay swa daga. Ay ste ginan yangay swa daga fag ngay taw at nafaning anya. ⁶ Itam wan Funbalugu At taw. Ay nus nga sinu at nasaful Funbalugu, kanya igfaning tuwa tam foyungan. Ay kanya nu bunway Funbalugu At taw, kanya dua gfaning tam foyungan. Katanya tam fagnasafulun te, saman wan at matuyan siginan At-Masine-Fag-Falad, ay at yud matuyan siginan way sik takamuagan fag taw yabi. ⁷ Ku fakesugun ku ngay taw, tanan tuwa tam madkafanyuan. Anway fakafanyuun fagayu siginan tuwas Funbalugu. Ay sik taw nu kafanyu tuwa at tiba, kanya Funbalugu wa fiya At unga, ay nasaful Funbalugu. ⁸ Ay sik taw nu dway kafanyu at tiba, dua nasaful Funbalugu, anway Funbalugu faggugat nu maugalian, gfangafanyu tuwa. ⁹ Kata tuy Funbalugu At fakafanyuun nu kasure sa antam. Funbalugu nasugu At buktung Baguama stiye swa daga, laman e leleg tuwa ban tam siginan Anya. ¹⁰ Kata tuy at fakafanyuun fiya. Bunwa itam taguna takafanyu sas Funbalugu. Funbalugu tuwa takafanyu antam. Ay Kanya nasugu ngani At Baguama, laman inkate ay gfaliam tam asalanan. ¹¹ Ku fakesugun ku ngay taw, nu katvngvd wa dawdaw anya Funbalugu At fakafanyuun sa antam, anggan itam adkafanyuani yangay. ¹² Ay dewa yud batang e glag tam Funbalugu, nu kadkafanyuan tuwa tam, Funbalugu si wa antam. Ay tam fakafanyuun sa tam iba siginans Funbalugu indaul tuwa. ¹³ Kata tuy tam fagnasfulun te, insadi watam sas Funbalugu, ay Funbalugu si yangay antam. Madyay Funbalugu nafat si wa antam At-Masine-Fag-Falad. ¹⁴ Ay nalag wami, ay nafoyung ami ayu te, Funbalugu nasugu At Baguama, laman Kanya At Tagbalabag sas fagayu taw ste swa daga. ¹⁵ Ay nus nga sinu fag taw nu nafoyung tuwa te, tam Isus tam Funbalugu At Baguama, Funbalugu si tuwa anya. Ay kanya insadi yangay sas Funbalugu. ¹⁶ Nu katanya, nasaful watam ay gafanud watam te, Funbalugu kafanyu tuwa antam. Funbalugu faggugat nu maugalian, gfangafanyu tuwa. Ay sik taw faggugat nu kafanyu tuwa at tiba, kanya insadi wa sas Funbalugu. Ay Funbalugu si yangay anya. ¹⁷ Tam fakafanyuun siginans Funbalugu sa tam iba indaul tuwa. Laman di tam malimuanan dewa ndasug Funbalugu nu gtap taw at asalanan fag ngay menit. Anway dewa tam ste swa daga, tam ugali kata yangay tam Funbalugu At ugali. ¹⁸ Nu e fakafanyuun tuwa tam, di tam kalimu. Anway kanya fag fakafanyuun nu indaul tuwa, igfayayu tuwa tam fakalimuun. Ay kanya fag taw nu kalimu yay, Funbalugu At fakafanyuun dia ndaul sat amatanganan. Anway kanya nu kalimu yay, at amatanganan sa yays faurianan baliwa. ¹⁹ Ay kafanyu tuwa tam tam iba, anway Funbalugu infanyu antam ebi taguna. ²⁰ Sik taw dewa nalong te, kesug akwa Funbalugu, ay roro nu kabalo yay at tusama sat amatanganan, kanya sik takamuag way. Anway sik taw nu dway kafanyu at faglagun fag fadugsay, tain ro nu mafaesug Funbalugu ay dyay ngap batang glag. ²¹ Kata tuy Funbalugu At longan sa antam te, kanya nu kesug tuwa Funbalugu, afanyui yangay anggan at fadugsay.

¹ Sik taw nu kafandiug tuwa te, tam Isus tam Funbalugu At Fagtayukan, kanya fag taw Funbalugu wa fiya At unga. Ay sik taw nu kesug tuwa at tibama, kanya kafanyu tuwa anggan tibama unga. ² Kata tuy tam fagsafulan te, kafanyu tuwa tam tam Funbalugu At ngay unga. Nu kesug tuwa tam sas Funbalugu, ay igfaning tuwa tam anggan At longan. ³ Kata tuy laman nu kesug tuwa tam tam Funbalugu, igfaning tuwa tam At longan. Ay At longan di mataka. ⁴ Nus nga sinu nu Funbalugu tuwa At unga, kanya at tagbabo iste swa daga fag ngay mauri. Ay tam fanbabo iste swa daga fag ngay mauri, tam fakafandiugun wan. ⁵ Sinu tagbabo iste swa daga fag ngay mauri. Ay sik taw nu kafandiug tuwa te, tam Isus tam Funbalugu At Baguama. ⁶ Ebi Isus Fagtayukan At fagindasugun stiye swa daga laman umsurung sasad safa ay nanbusbus At taguk. Bundi insurung sasad safa fagtvngvd, anggan tuwa nabusbus At taguk sigon. ⁷ Ay At-Masine-Fag-Falad tagfatuyanan Anya, anway At-Masine-Fag-Falad matuyan. ⁸ Ay e tuluk tagfatuyan. At-Masine-Fag-Falad, ay at safa, ay At taguk. Ay kanya fag tulu gdiuganan. ⁹ Nu gafanud tuwa tam sa sik taw at fatuyanan, Funbalugu At fatuyanan glabi yay fiya fiya sa sik taw at fatuyanan nu mafanud. Ay Funbalugu tagfatuyanan sa antam sa At Baguama baliwa. ¹⁰ Kanya nu kafandiug sas Funbalugu At Baguama, kanya fag fatuyanan sa wa at amatanganan. Ay at yud kafandiug sas Funbalugu, kanya igfangayan way Funbalugu te, sik takamuag. Anway kanya fag taw dua gafanud sas Funbalugu At fatuyanan sa At Baguama baliwa. ¹¹ Ay kata tuy Funbalugu At fatuyanan. Funbalugu nafon antam sik leleg at yud katabu. Ay ka fag leleg siginan At Baguama. ¹² Ay sik taw nu insadi tuwa sa At Baguama, e leleg tuwa at yud katabu. Ay sik taw nu dway insadi sa At Baguama, du e leleg. ¹³ Nariruk aw tuy fag rirukan sa ayu, sasa ngay takafandiug sa tam Funbalugu At Baguama At fagmadaragangun. Laman umtuyan wam fiya te, e leleg wam fiya at yud katabu. ¹⁴ Kata tuy nu intuyan tam sas Funbalugu. Nu get watam nus nge wain, nu gfaning At fakaumsigun, Kanya nadungug antam. ¹⁵ Kata tuy yangay nu nasaful tam te, Kanya nadungug antam nus nge wain tam fagetun, nasaful yangay tam te, nafabul watam tam fagetun siginan Anya. ¹⁶ Sik taw nu nalag at fadugsay gina e asalanan, ay laman ka fag asalanan di gfadasug ban anya sas fakateun, darangini yap anya. Laman Funbalugu gfon yay anya at leleg at yud katabu. Ay e tibak asalanan long tagfadasug ban sik taw sas fakateun. Nu katvngvd wa long anya ka fag fadugsay at asalanan, da kwa nalong te, darangini anya. ¹⁷ Fagayu at mauri fag fagbulun asalanan way. Ay tibak asalanan di gfadasug sik taw sas fakateun. ¹⁸ Nasaful watam te, Funbalugu At ngay unga di gfaning sas asalanan. Anway Funbalugu At Baguama tagdingding anya, laman Tagmauri di nanfauri anya. ¹⁹ Nasaful watam te, itam wan Funbalugu At unga. Ay Tagmauri madaragang nu gmagurang ste swa daga fag ngay taw. ²⁰ Ay nasaful yangay tam te, Funbalugu At Baguama fagindasugun ebi laman nanfayamag sa antam, laman nasaful watam At-Matuyan. Ay insadi watam sa At-Matuyan, ay sa At Baguama Isus Fagtayukan. Ay Kanya At Matuyan fag Funbalugu, ay At nafon leleg at yud katabu. ²¹ Ku fakesugun ku ngay sisian sirut, lag gseg sa tibak fagsegan.