1 Corinthians

¹ Siginan angku, Fandak, Fagtayukan Isus At-Suguan at sadi. Anway Funbalugu nafili wa angku. Ay anggan tam fadugsay Sik-Taw-Madaragang-Fiya. ² Nariruk ami sa ayu, sas Funbalugu At ngay taw sas fulan Kurintu. Sas Funbalugu At nafili fag ngay taw. Sa tagfadiuganan sas Funbalugu anway insadi wam sas Fagtayukan Isus. Ay anggan sas fagayu taw nus nga nday tagseg sas Fun Isus Fagtayukan, kanya fag taw at Fun ay anggan tam Fun. ³ Tam Funbalugu tam Tama ay anggan tam Fun Isus Fagtayukan At mamanyun nangus sa ayu, ay At nanfanabayan ayu. ⁴ Faggugat guseganan aw sa tam Funbalugu. Anway Kanya At nafamanyun sa ayu, madyay kafandiug tuwam sas Fagtayukan Isus. ⁵ Ay Kanya nafaayu ay fagsafulun ay sa ay foyungan nus nge wain. Anway insadi wam sas Fagtayukan. ⁶ Ay anggan ay fagbulun nu gfadiuganan tuwa sa em foyungan sa ayu sas Fagtayukan baliwa. ⁷ Ay katanya tuway, di am e fagayudanun siginan At-Masine-Fag-Falad At nafamanyun, kaduge am igfanya tam Fun Isus Fagtayukan gina ban umsure. ⁸ Kanya tuwa tagfatvngvdun ayu siginan katsi anggan sas fakatabuan fag ngay menit. Laman gina ban umsure tam Fun Isus Fagtayukan At menit, di am e asalanan. ⁹ Matuyan tuwa tam Funbalugu. Ay Kanya At nafili ayu, ay faginsadiun sa At Baguama, tam Fun Isus Fagtayukan. ¹⁰ Ku ngay fadugsay, matvngvd nu nalong aw sa ayu sa tam Fun Isus Fagtayukan At fagmadaragangun te, laman e fagmasadiun tuwam. Laman di gsadsamanan ay amatanganan. Ay laman masadi tuwa ay amatanganan ay ay fasadan. ¹¹ Ku ngay fadugsay. Siginans Bagu-Insuraan at bale e nafoyung angku te, garingangan way unu am. ¹² Kata tuy at masuad ku fagnalongun sa ayu te, anway am tiba glong way am te, Ku fagfaningun sa tuwas Fandak. Ay am tiba glong way am te, Ku fagfaningun sa tuwas Tagfon-Danyu-At-Taw. Ay ate, sa tuwas Takata-Sik-Batu. Ay ate, sa tuwas Fagtayukan. ¹³ Go sangay Fagtayukan nainkafudan. Go yaya. Go sangay aw, Fandak, intuktuk akyangay sas salibagan kayu ebi laman e fanambagun am. Go yaya. Ay go sangay sa ku fagmadaragangun nu kasurung am. Go yaya. ¹⁴ Guseganan aw anway da kdi nasurung ayu ebi am at tiba dasday Buk-Malut ay Gayu. ¹⁵ Laman du am lumong te, Aw nu kasurung aw sa ways Fandak, ay sas Fandak way ku fagfaningun. ¹⁶ E kin, nasurung kua mangaro At-Ke-Sangbo fag bale at ngay taw. Ay da kia namatang nu gsurung aw at tibak taw. ¹⁷ Anway Fagtayukan dua nasugu angku te, laman nansurung aw taw. At suguan angku antuwa te, laman nanfoyung aw at Masine-Fag-Barita. Ay ku fagfoyungun bundi siginan at ngay taw at fangkaturunan. Laman dua maliam Fagtayukan At fagmadaragangun At naatean sas salibagan kayu. ¹⁸ At maliam ban fag ngay taw nu nadungug at foyungan sas Fagtayukan baliwa nu kate sas salibagan kayu, kanya gamatangan te, fanlamangan way. Ay roro itam at kinbalabag gamatangan tam te, kanya fag foyungan anwa Funbalugu At fagmadaragangun. ¹⁹ Anway At-Rirukan nalong wa te, Nafaliam Akwa ban at mamatanganan fag taw at fagmamatangananun fag longan. Ay gfasaman Akwa ban at ke fagsafulun at fagsafulun, laman ban du e masuad. ²⁰ Setvngvd at mamatanganan fag taw at longan. Ay setvngvd at maadalan fag taw at longan. Ay setvngvd tagfangkaturunan fag taw at longan. Anway Funbalugu nafasaman wan ste swa daga at fagmamatangananun, laman umfanlamangan wan. ²¹ Anway Funbalugu At fagmamatangananun nasaful tuwa te, at ngay taw dua mangaro kafandiug sa Anya siginan ways taw at fagmamatangananun. Ay Funbalugu At fasadan te, at ngay taw at fagumbalabagun siginan tuwa em foyungan. Dewa tibak taw nu gfasad em nafoyung mafanlamangan way. ²² Anway at ngay Taw-Naseg kaumsig nalag at ke masuad fag fagbulun. Ay at ngay Taw-Gresia kaumsig nadungug at mamatanganan fag longan. ²³ Ay nu katanya, em nafoyung tam Fagtayukan At fagintuktukun sas salibagan kayu, kata way sik famataid sasa ngay Taw-Naseg. Ay kata way sik fanlamangan sasa ngay Taw-Gresia. ²⁴ Ay roro nu Funbalugu tuwa At nafili fag ngay taw, dewa Taw-Naseg ay dewa Taw-Gresia, kanya kafandiug wa fiya te, Fagtayukan wan At tagfasure sasa ngay taw Funbalugu At fagmadaragangun ay At fagmamatangananun. ²⁵ Anway Funbalugu anoma At kamafanaloan glabi yay ste swa daga fag taw at mamatanganan. Ay anoma Funbalugu At kamamoyan at fagmadaragangun glabi yay ste swa daga at madaragang fag taw. ²⁶ Ku ngay fadugsay. Amatangani te, tain am gina ebi Funbalugu nu bagu nafili ayu. Anway am tiba di am mamatanganan fiya fiya kata yay am ste swa daga at fagmamatangananun. Ay am tiba di am e fagmadaragangun. Ay di ban am kata sik fun ban. ²⁷ Ay roro Funbalugu At fagfiliun sik yud way mamatanganan fag taw, tibak taw nu glag wa anya. Laman ban gfaplan tuwa ste swa daga at maamatanganan fag taw. Ay Funbalugu At fagfiliun sik yud way madaragang fag taw, tibak taw nu glag wa anya. Laman ban gfaplan tuwa ste swa daga at madaragang fag taw. ²⁸ Ay Funbalugu At fagfiliun kata way sa sik naglimatan, ay at yud way katvngvd tiba, ay anggan kata way sa sik yud e masuad. Laman at ke masuad ste swa daga, laman ban bandi du e masuad. ²⁹ Ay laman ban du e taw gananad gfalabi at longan sas Funbalugu At akbang. ³⁰ Funbalugu tuwa At nafasadi antam sas Fagtayukan Isus. Ay Fagtayukan At nafasure sa antam Funbalugu At fagmamatangananun. At masuad te, tam Fagtayukan At fagbulun, laman fagayu tam malayun tuwa tam sat masine. Ay insik Funbalugu tuwa tam At taw. Ay anggan inbalabag tuwa tam. ³¹ Ay katanya tuway, faningi tuwa sa At-Rirukan at nalong te, Am fagfoyungun sa am iba bundi am fagbulun mandi. Am fagfoyungun sa am iba antuwa tam Fun At matvngvd fag fagbulun sa emu.

¹ Ku ngay fadugsay, ebi gina aw kadasug sa ayu, ku foyungan sa ayu bunwa siginans fangkaturunan fag longan. Ay bunwa siginans at mamatanganan fag longan. ² Anway ku fasadan fiya fiya anaktuwa gananfoyungun ayu sas Isus Fagtayukan fagtvngvd, ay anggan sa At naatean sas salibagan kayu. ³ Ay nu moyung kmaro ayu, mafanalo way ku bilug. Ay kalimu kway ay anggan sak aw kudkulugan. ⁴ Ay ku longan ay ku foyungan bundi siginans fangkaturunan fag longan. Ay bundi siginans at mamatanganan fag longan. Ku foyungan antuwa at ke fagmadaragangun siginan At-Masine-Fag-Falad. ⁵ Laman at tagfatvngvd ay fakafandiugun bunwa siginans taw at fagmamatangananun. Ay antuwa siginans Funbalugu At fagmadaragangun. ⁶ Ay dewa katanya, nu nafoyung ami sa at mamagurangan fag ngay takafandiug, em foyungan antuwa at mamatanganan fag longan. Ay bundi si katsi fag ngay menit at fagmamatangananun. Ay bundi siginan sa ngay fun ste swa daga at fagmamatangananun. Anway ka fag ngay taw gakaminun way. ⁷ Ay em foyungan siginan tuwas Funbalugu At masuksukan ay At mafalyu fag fagmamatangananun. Ebi Funbalugu nu nafili ka fag fagmamatangananun siginan wa gyud e daga. Laman ban e fagmasineun tuwa tam. ⁸ Ay katsi nus di sadi ste swa daga fag ngay fun dua nasaful Funbalugu At fagmamatangananun. Anway nu nasaful way, dua natuktuk tam Fun At ke fagmasineun sas salibagan kayu. ⁹ Ay At-Rirukan nalong te, Du e batang glag, Ay du e batang gdungug, Ay du e namatangan, Funbalugu At nafamasadan Sa at ngay taw at takesug Anya. ¹⁰ Funbalugu nafasaful antam At nafamasadan sa antam siginan At-Masine-Fag-Falad. Anway At-Masine-Fag-Falad nasaful wan fagayu anggan Funbalugu At mafalyu fag fagsafulun. ¹¹ Sik taw dua nasaful at tiba at amatanganan. At fagsafulun at amatanganan way mandi. Ay katanya yangay, du e taw nasaful Funbalugu At amatanganan. Funbalugu At-Masine-Way-Fag-Falad fagtvngvd At nasaful. ¹² Funbalugu di nafat si antam ste swa daga fag taw at amatanganan. Ay At nafat si antam antuwa At-Masine-Fag-Falad. Ay Kanya tuwa At nafasaful antam fagayu Funbalugu At nafon antam at masuad. ¹³ Ay em foyungan bundi siginans taw at mamatanganan fag longan. Em foyungan antuwa siginan At-Masine-Fag-Falad At nafaamatanganan emi fag longan. Laman em foyungan antuwa Funbalugu At longan sa at ngay tagfaning sa At-Masine-Fag-Falad. ¹⁴ Sik taw at yud gfaning At-Masine-Fag-Falad dua mafabul Funbalugu At-Masine-Fag-Falad at ngay fagafonun. Anway gamatangan te, du e masuad. Ay kanya dua nasaful at masuad, anway ka fag fagsafulun siginan wa At-Masine-Fag-Falad. ¹⁵ At tagfaning sa At-Masine-Fag-Falad nasaful tuwa igfili fagayu te, go e masuad, ay go yaya. Ay tibak taw dua nasaful sa sik takafandiug at amatanganan te, go e masuad, ay go yaya. ¹⁶ Anway du e taw gasafulun tam Fun At amatanganan. Laman mafafoyung sa tam Fun te, katanyai. Dewa katanya, tam amatanganan kata yangay Fagtayukan At amatanganan.

¹ Ku ngay fadugsay, ebi kaumsig aw nanfoyung ayu kata nu gfoyung aw sa at ngay tagfaning sa At-Masine-Fag-Falad. Ay roro mangaro igfaning yay am ay bilug at fagalabianun, kata yay am sik bagu kafandiug. ² Ay ku foyungan ayu kata sik fakonun. Ay anway am kata yay am sik bagu kalangfe, ku nafoyung ayu kata yay sik susubilug. Bunya kata sik matigas fag fakonun. Anway ginanya di am mafabul at matigas. Ay anggan katsi di am mafabul. ³ Teway igfaning yay am ay bilug at fagalabianun. Anway nu galabian yay am, ay nu gfaringangan yay am, gfaning yay am ay bilug at fagalabianun. Go kin. Ay ay ugali kata yay ste swa daga fag ngay taw at ugali. ⁴ Ay madyay am at sadi glong yay am te, Aw igfaning akwa Fandak. Ay am at sadi iglong yay am te, Aw igfaning akwa Tagfon-Danyu-At-Taw. Kaduge niya ay fagbulun kata yay ste swa daga fag ngay taw. Go kin. ⁵ Sinu way Tagfon-Danyu-At-Taw. Ay sinu akway. Ami Funbalugu ami At fanuguan. Laman kafandiug tuwam sas Funbalugu siginan em foyungan. Anway tam Fun tuwa At nafili em fagbulun. ⁶ Aw wan tagtanum ay Tagfon-Danyu-At-Taw tagfarugme. Ay Funbalugu wan at tagfarabung. ⁷ Ay nu katanya, at natanum ay anggan at nafarugme di e masuad. Funbalugu tuwa at tagfarabung tagfe masuad. ⁸ At natanum ay at nafarugme katvngvd way at sadi. Ay nu sik taw wan at nabul at nalufuyan katvngvd way at nafagbulunan. ⁹ Anway ami ay Funbalugu tagudgufudan sas Funbalugu At fagbulun baliwa. Ay am wan Funbalugu At gamasun. Ay am wan anggan Funbalugu At bale. ¹⁰ Funbalugu At nafamanyun sa angku tuy fag fagbulun. Ay aw kata aw sik takawat bale at masine. Naturuk aw taguna at fangawat. Ay tiba wa bank taw at tagfatabu ka fag bale katsi. Fagayu takawat ka fag bale amatangani yap te, tain nu kaawat. ¹¹ Du e taw mafaturuk tibak fangawat. Anway at fangawat nafaturuk wan. Ay Ka fag fangawat anwa tam Isus Fagtayukan. ¹² Tibak taw nafatunglus nu kawat ay at famamut sanbung fanumyu, ay sanbung salafi, ay anggan mesug fag batu masine. Ay tibak taw at famamut at yud way matvngvd fag kayu, ay falungfung kayu way, ay anggan makmak way. ¹³ Gina umdasug Ka-Fag-Menit, umsure yay ban nus nga se taw sik taw at nafagbulunan. Anway sik afuy tagfasure ay tagfaskud ban te, tain ka fag taw at nafagbulunan. ¹⁴ Sik taw at nafagbulun sanya fag fangawat, nu gdi mbatas sas afuy, ka fag taw e nabul ban at fanambagun. ¹⁵ Ay sik taw at nafagbulun sanya fag fangawat, nu mbatas way ban, ka fag taw umfangulan ban sa at nafagbulunan. Dewa katanya, ka fag taw umbalabag tuwa ban kata sik taw nu kalfas siginan takalabe fag bale. ¹⁶ Go manga di am nasaful te, ay bilug wan Funbalugu At bale. Ay At-Masine-Fag-Falad igbanwan si ayu. ¹⁷ Nus nga sinu tagfafurat sa sik Funbalugu At bale, Funbalugu ban gfauri wa fiya anya. Anway Funbalugu At bale sas Funbalugu way fagtvngvd. Ay am wan ka fag bale. ¹⁸ Fagayu am dangai gfanluk ay balyu. Nus nga sinu fag taw sa ayu nu gamatangan way te, mamatanganan akwa long kata katsi fag ngay taw. At masine ka fag taw katai way at yud e fagsafulun. Laman mamatanganan tuwa ban. ¹⁹ Anway Funbalugu nasaful te, ste swa daga fag ngay taw at fagsafulun kata way yud e masuad. Anway At-Rirukan nalong wa te, Funbalugu At fasadan sa sik mamatanganan fag taw, Laman ka fag taw at fagsafulun kata way sik fangiktan anya. ²⁰ Ay At-Rirukan nalong yangay te, Tam Fun nasaful way te, At mamatanganan fag taw at fasadan dua ban e masuad. ²¹ Ay nu katanya, lag gfalabi ay longan sa ay iba te, Aw gfaning aktuwa sanya fag takamoyung fag sadi. Anway fagayu takamoyung ay anggan fagayu tagste swa daga at masuad antuwa te, laman e fanambagun am. ²² Dewa siginan angku. Ay dewa siginans Tagfon-Danyu-At-Taw. Ay dewa siginans Takata-Sik-Batu. Ay dewa siginan tagste swa daga fag ngay taw. Ay dewa siginans tam faglelegun. Ay dewa siginans fakateun. Ay dewa siginan katsi fag ngay menit. Ay dewa siginan at kumdasug ban. Anway fagayu takatanya at masuad te, laman e fanambagun am. ²³ Katanyai tuwa, anway am wan Fagtayukan At taw. Ay Fagtayukan, Funbalugu At Baguama.

¹ Kata tuyi way ay amatanganan sa emi te, ami Fagtayukan At fanuguan. Ay manga sik tagfoyung ami ebia taw Funbalugu At mafalyu fag foyungan. ² At masine sa sik tagfoyung matuyani tuwa at fagbulun. ³ Ay dewa am gsarap te, go ku ngay fagbulun masine ay go mauri. Aw da kdi gafanawa. Ay anggan dewa ste swa daga fag ngay magurang igsarap ku ngay fagbulun. Anway anggan aw da kdi e namatangan ku fagbulun mandi at mauri. ⁴ Ay dewa aw yud e namatangan ku asalanan, di e mafafatuyan te, matuyan ku fagbulun. Anway at tagfili ku asalanan tam Fun Isus wan. ⁵ Nu katanya, lagi yap gsarap sik taw at asalanan kaduge gyud indasug Ka-Fag-Menit ay kaduge gyud indasug tam Fun. Anway tam Fun yay ban tagfasure sasad mayamag katsi at masuksukan sasad marum. Ay manga gfasure yay ban sik taw at fasadan at masuksukan. Kaduge yay ban anya, Funbalugu nu gfoyung At fagusegananun sas fagayu taw. ⁶ Ku ngay fadugsay, ku fagnalongun sa ayu e masuad tuwa sa emi, sa angku ay anggan sas Tagfon-Danyu-At-Taw. Laman e fanambagun ban am. Anway e fagsafulun wam siginan em fagbulun. Laman ay fagbulun igfaning tuwa sa At-Rirukan. Ku fakaumsigun nus di am at sadi, lag e gfandaragang. Ay lag gseg sa sik taw ay kalimata way am tibak taw. ⁷ Go e gamatangan sa emu te, o tuwa taglabi. Go lagi. Anway di o e fagmasineun yap ngay Funbalugu nafon emu. Ay nu e nafon wemu, taw ro sangay am fagfalabiun kata ebi am fagbulun. ⁸ Am wan kata at napsug ay at napyan. Ay manga kata wam at mabalan. Ay dewa ami gyud natarabang ayu, kata wam sik ngay fun. Kin, ku fakaumsigun nu sik ngay fun tuwam. Laman anggan ami gmagurang wami gasfuan ayu. ⁹ Gamatangan aw te, tam Funbalugu nu gfasure emi At-Ngay-Suguan stiye swa daga fag ngay taw, At nafasure kata way ami tiba daga fag taw. Ay kata way sik fagafateun fag taw. Ay dewa katanya, ami wan takata sik faglinggatan sas fagayu tagste swa daga, ay sas Funbalugu At ngay tagbukngan ay sasa ngay taw. ¹⁰ Ami kata way ami sik taw at yud e fagsafulun, anway Fagtayukan At taw wami. Ay am sik mamatanganan fag taw wam, anway Fagtayukan At taw wam. Ami mamomuy way ami. Ay am madaragang tuwam. E naseg tuwa ayu. Ay ami e kalimata way emi. ¹¹ Ay anggan katsi, kalunus way ngani ami. Ay kadanum way ngani ami. Ay du ami e lanbung. Ay e kamalang way emi. Ay anggan du ami e bale. ¹² Ay gfagbulunan tuwami em famul em fakonun. Ay dewa e gfalingun sa emi, igdarangin tuwami laman Funbalugu kafanyu yangay ban anya. Ay dewa e gfauri emi, igsungatan tuwami. ¹³ Ay dewa e mauri fag longan sa emi baliwa, igfalukmeanan tuwami anya. Ay anggan katsi kata way ami ste swa daga at nakukasan ay at naginautan. ¹⁴ Ku fagnarirukun bunwa te, laman nanfaaplan aw ayu. Ku fagnarirukun antuwa te, laman ku famatagak ayu. Anway am wan ku fakesugun ku ngay sisian. ¹⁵ Anway dewa ngayu takamoyung ayu siginans Fagtayukan, dua ngayu ay tama. Sa tam Fagtayukan Isus baliwa, aw wan ay tama. Anway nafoyung aw ayu at Masine-Fag-Barita. ¹⁶ Anway katanya, matvngvd nu glong aw sa ayu te, Faningi angku. ¹⁷ Fakatanyaun, nasugu aw Tagseg-Funbalugu sa ayu. Kanya ku fakesugun ku unga sa tam Fun Isus baliwa ay at ugali matuyan tuwa. Ay kanya tagfaamatang ban ayu ku ugali at kinsadi sas Fagtayukan. Katanya yangay ku foyungan sas fagayu talun, sas fagayu Funbalugu bale at ngay taw. ¹⁸ Ay katsi am tiba gfalabi way am. Anway gamatangan am te, Fandak dua ban siring umdasug sa antam. ¹⁹ Ay roro umdasug kyay ban fiya, tam Fun Isus nu kaumsig. Ay nu ndasug aw, nanlag aw te, go at tagfalabi tiba, go e fagmadaragangun wa fiya kata at longan. Ay go igdi. ²⁰ Anway Funbalugu-Nu-Gmagurang-Taw bundi si at longan fagtvngvd. E fagmadaragangun wa fiya. ²¹ Go tain ay fasadan gina aw umdasug sa ayu. Go nanfalang aw ayu. Ay go ate nanfalukmeun aktuwa ay nangafanyu aktuwa ayu.

¹ Anway e dungganan aw te, am at sadi e asalanan way am. Nalabi yay ngap sat yud kafandiug at asalanan. Anway sik baguama naago way at tama at mangena. ² Ay dewa katanya, gfalabi way am sa ay amatanganan. Ay roro at masine abalui tuwa. Ay nu katanya way, ayiyani wan ka fag tagasalanan siginan ay fagmafulan. ³ Dewa ku bilug yud sanya, ku amatanganan kata tuwa nut sanya aw. Ay kata ktuway nut sanya aw, nafatuyan akwa fiya te, kanya sik tagasalanan. ⁴ Ay siginan wa tam Fun Isus At fagmadaragangun, ku fanfatuyan sanya fag taw takatanya at fagbulun te, gina am maful sa tam Fun Isus At fagmadaragangun, ay nu gamatangan tuwam ku longan, ⁵ Ayiyani wan ka fag taw laman Tagfansalag wan tagmagurang anya. Ay laman igfate wan at bilug. Ay at falad long umbalabag tuwa nangus nu mdasug ban tam Fun Isus At-Menit. ⁶ Nu gfalabi way am ay longan katanya dua masine. Nasaful wam tuy fag fafaskudanan, kata sik famabaga sas tinafay. Dewa alay way sirut, nafabaga wan fagdaul at tinafay. Go kin. ⁷ Ubuni tuwa ay dan fag ugali kata nu kukas tam sik fafa dan. Laman bagu tuwam. Anway kafandiug wam, ay e bagu fag ugali wam fiya. At masuad fagbaguun, anway tam Fagtayukan inkate wan kata ebi nu gfate at Famalangfe-Fag-Tupa. ⁸ Ay at masine tam ugali katai sik bagu fag fafa kata sa tam yafun daul. Anway tam fafa dan kata way tam ugali at ke asalanan ay at ke mauri. Ay at bagu fag fafa kata tuwa tam ugali at yud mafamangkasiyanan ay matuyan wa fiya. ⁹ Nu setaw ebi nariruk akwa sa ayu te, lag gfakbangan sa takamayun fag ngay taw. ¹⁰ Ku longan at masuad bunwa te, lag gfakbangan ste swa daga fag ngay takamayun, ay ate tagfangatebo, ay at takamul, ay anggan at tagseg tawtawan. Anway nu gdi am gfakbangan sa takatanya fag ngay taw, kata wam naubun ste swa daga. ¹¹ Ku fagalongunun antuwa te, lag gfakbangan sa sik taw taglong te, kafandiug aw. Ay roro kamayun way, ay ate gfangatebo, ay igseg tawtawan, ay gfalingun sa tiba, ay ginum fansigung, ay anggan kamul. Lag gfakbangan takatanya. Ay manga nu gfangon am, lag gfasfuan anya. ¹² Bunwa aw at ke fagbulun at nansarap sat yud kafandiug fag ngay taw at asalanan. Anway Funbalugu yay ban tagsarap ka fag taw at asalanan. Ay am wa mandi tagsarap sa ay Funbalugu bale at ngay taw at ke asalanan. ¹³ Anway At-Rirukan nalong te, Ayiyani wan ka fag mauri fag taw siginan ay buknga.

¹ Ay am at sadi dewa am kalimata sa am fadugsay sas Isus, lag nanfoyung am fadugsay sa at yud kafandiug fag tagbuknga. Ay roro at masine, sai tuwa takafandiug fag tagbuknga. ² Go du am nasaful te, Funbalugu wa At ngay taw at sumarap ban ste swa daga fag ngay taw at fagbulun te, go masine ay go mauri. Ay nu mafasarap tuwam katanya, taw way ay fagyudun mafasarap katsi ay iba at fagbulun dewa alay. ³ Ay go du am nasaful te, itam yangay at sumarap ban anggan sas Funbalugu At ngay tagbukngan at fagbulun. Ay nu mafasarap tuwa tam katanya, mafasarap way ro tam dewa katsi ste swa daga fag fagbulun. ⁴ Nu e garingangan wa katanya sa ayu, taw ro ay fagnanfoyungun sat yud maful sas Funbalugu bale fag tagbuknga. ⁵ Ku fagnalongun katanya laman kapla tuwam takatanya ay fagbulun. Go sangay di e mamatanganan fag taw sa ay Funbalugu bale, laman sik tagbuknga sa sik dugsay tagaringangan. Go muag. ⁶ Ay katsi nafoyung way am ay fadugsay at fagbulun sa sik tagbuknga. Ay ay fagfoyungan mangaro sa way sik yud kafandiug fag tagbuknga. ⁷ Nu gfoyung way am ay iba at fagbulun nus nga nday fag tagbuknga, nasalan way am. Amasinei yap nu gdi am gsalag ay iba nu gfauri ayu. Ay nu gdi am gsalag ay iba nu gbul am nanuranan siginans at nafanluk. ⁸ Ay yaya roro mangaro ay fagbulun dua katanya. Anway baliwa te, gfauri way am ay iba. Ay manga gbul way am ay iba at nanuranan siginan ay nafanlukan. Ay laman kanya ay fadugsay wa sas Isus. ⁹ Go du am nasaful te, at ngay tagmauri dua ban umful sas Funbalugu-At-Fagmagurangan-Ban-Taw. Lag gamatangan sat yud matuyan. Anway takatatuy ban fag taw at yud ban umful. At takamayun. Ay at tagseg tawtawan. Ay at tagtiug sa tibama mangena. Ay at mangama takamayun sa yangay tibak mangama. ¹⁰ Ay at takamul. Ay at tagfangatebo. Ay at taginum fangasigung. Ay at tagfalingun sat tiba. Ay anggan at tagafateun at iba anway gafamulun. Takatanya fagayu, nus di sadi, dua ban umful sas Funbalugu-At-Fagmagurangan-Ban-Taw. ¹¹ Ebi katanya am, am tiba ay fagbulun. Ay roro katsi tam Fun Isus Fagtayukan At fagmadaragangun ay tam Funbalugu At-Masine-Fag-Falad At nafalanu ay asalanan siginan ayu. Ay At nafasadi ayu sas Funbalugu. Ay anggan wa sigon natap ayu kata at yud e asalanan. ¹² Ay e glong te, Manabayan tuwa long katsi, ay mafafaning aw nus nga setaw ku fakaumsigun. Ay dewa e nalong katanya, tibak fagbulun dua masine sa angku. Ay dewa aw mafafabul fagayu fagbulun, da kua kaumsig ku fagbulun nu lumabi angku. ¹³ Ay e glong yangay te, Sik fakonun at fanambagun laman faapsug ungdan. Ay ungdan at fanambagun sik fagsuadan fakonun. Ay dewa e nalong katanya, Funbalugu farasras wa ban fagduwa, fakonun ay anggan ungdan. Tam bilug at masuad bundi te, nangalabian tam. Tam bilug at masuad antuwa te, laman nanseg tam sa tam Fun Isus. Ay tam Fun Isus At fagbulun laman gfasine tam bilug. ¹⁴ Funbalugu nafaleleg wa tam Fun Isus. Ay At fagmadaragangun mafafaleleg yangay ban tam bilug. ¹⁵ Go du am nasaful te, ay bilug kata wa Fagtayukan At bilug sik afud. Go masine nu nafaful aw ku bilug, sik afud Fagtayukan At bilug, sa sik fakamayunan fag mangena. Go lagi. Lagi. Lag katanya. ¹⁶ Go du am nasaful te, sik mangama nu nat sawa sik fakamayunan fag mangena, at bilug kata wa insadi. Matignaun Funbalugu At-Rirukan nu nalong te, takatanya fag duwa insadi wan at bilug. ¹⁷ Ay sik taw nu nsadi tuwa sa tam Fun Isus, insadi yangay anggan sat amatanganan. ¹⁸ Ayayui wan siginans fakamayunun. Anway fagayu tibak asalanan si yays day bilug. Ay roro sik taw nu nafamayun wan, ka fag asalanan si wat bilug. ¹⁹ Go du am nasaful te, ay bilug wan At-Masine-Fag-Falad At bale. Funbalugu nafat si wa ayu At-Masine-Fag-Falad. Ay Kanya namanwan sa ayu. Ay bunwa am tagagbilug ay bilug. ²⁰ Ay Funbalugu nasali dawdaw ayu, laman am wa ban At taw. Ay nu katanya, ay bilug falagani te, masine tam Funbalugu.

¹ Katsi nanbalus aw ay fagintoun ay nariruk sa angku. Ay kin, masine sik taw dewa gsesadian. ² Ay roro mangaro, ngayu way tagfe asalanan ayu at nanfafamayun. Anway katanya, masine nu e mangamai ay nu e mangenai. ³ At mangama fasegsegani tuwa sat mangena. Ay at mangena fasegsegani tuwa sat mangama. ⁴ Anway at mangena dua mafaagbilug at balyu. At mangama tuwa at mafaagbilug sat mangena. Ay at mangama dua mafaagbilug at balyu. At mangena tuwa at mafaagbilug sat mangama. ⁵ Kata tuy at longan sa sik daduwa. Dangai gafayudun nut sa am ay sadi. Ay snga seduge ay nadiuganan, agi yap sa ay sadi laman darangini yap sesadiani nus nga ginaini fag buknga. Ay nu nlangfe wa long, dogi yangay sa ay sadi. Laman Tagfansalag di gfe asalanan ayu. Nu kaduge yay niya, dia glugo ay nabaris. ⁶ Dewa aw nalong sa ayu te, masine nu gdaduwa am. Kanya bunwa sik suguan faggugat. Dewa katanya, masine tuwa nu gdaduwa am. ⁷ Ku fakaumsigun fiya fiya, fagayu taw katai angku. Dewa katanya, saman wan Funbalugu At nafon sa sadi sadik taw. Ay nu sik taw wan saman wan at nabul. ⁸ Ay kata tuy ku longan sat yud batang e ufud ay sas burangday te, at masine sesadiani kata angku. ⁹ Ay roro dewa aw nalong katanya, nu dway am maabaris, at masine adaduwai yap. Anway amasine yap nu ndaduwa am. Ay mauri way nu galabian way am. ¹⁰ Ay kata tuy ku longan sa sik daduwa. Ay bundi aw at ke longan, tam Fun sigon At ke longan te, Mangena, lag gubun am mangama. ¹¹ Ay nu naubun way o, lag gdog nangadaduwa. Sesadiani way ban faggugat, nu du o nfoli sa am mangama. Ay mangama sigon, lag gubun am mangena. ¹² Ay sat tibak taw aw way at ke longan, anway tam Fun ya nalong. Sik fadugsay sas Isus nu e mangena sik yud kafandiug, ay at mangena nu kaumsig tuwa anya, lag gubun. ¹³ Ay sat tibak daduwa, sik takafandiug fag mangena nu e mangama sik yud kafandiug, ay at mangama nu kaumsig tuwa anya, lag gubun. ¹⁴ Labon manga, at yud kafandiug fag mangama gakakbangun sas Funbalugu anway at mangena kafandiug tuwa. Ay sat tibak daduwa, at yud kafandiug fag mangena gakakbangun sas Funbalugu anway at mangama kafandiug tuwa. Nu dway katanya ay ngay unga kata at yud kafandiug at unga. Ay igdi roro ay unga gakakbangun yangay sas Funbalugu. ¹⁵ Dewa katanya, at yud kafandiug nu kaumsig naubun at sadi, lag gsalag anya. Dewa katanya, du e suguan sas takafandiug te, salagi anya. Anway Funbalugu At fagnafiliun antam laman manabayan tuwa tam. ¹⁶ Mangena, famatanganuni tuwa te, labon o wan at nanfoyung am mangama laman umbalabag tuwa ban. Ay sa tibak daduwa, mangama, famatanganuni yangay te, labon o wan at nanfoyung am mangena laman umbalabag tuwa ban. ¹⁷ Kata tuy ku longan sasa ngay Funbalugu bale at ngay taw. Nu sik taw wan faningi tuwa nus nga setaw tam Fun Isus At nasugu emu fag fagbulun. Ay anggan nus nga setaw am fagbulun ebia taw tam Funbalugu gina bagu nafili emu. ¹⁸ Dewa o sik Taw-Naseg Funbalugu nu bagu gfili emu, lag kaumsig gfasaman am fagtoglagan si am bilug. Ay dewa o sik Yud-Naseg-Fag-Taw Funbalugu nu bagu gfili emu, lag kaumsig Taw-Naseg at fagtoglagan si am bilug. ¹⁹ Anway dewa e fagtoglagan ay dewa gyud e fagtoglagan du e masuad. At ke masuad, faningi tuwa Funbalugu At longan. ²⁰ Am ugali katai yap ebi tam Fun gina bagu gfili emu. ²¹ Dewa o sik fanuguan gina tam Fun bagu gfili emu, lag kabalu. Ay nu e nafalfas tuwa emu laman di ban o nangafanuguanan, masine yangay am fagbulun nu katanya. ²² Anway sik taw dewa sik fanuguan ste swa daga gina tam Fun bagu gfili anya, kanya kata tuwa sik magurang sa tam Fun Isus At fasadan. Ay katanya yangay, sik taw dewa sik magurang ste swa daga gina tam Fun bagu gfili anya, kanya katsi Fagtayukan wa At fanuguan. ²³ Ay Funbalugu nasali dawdaw ayu laman am wa ban At taw. Ay nu katanya, lag nangasik fanuguan yangay sas taw. ²⁴ Ku ngay fadugsay, nu katanya, nu sik taw wan, masine nu gfatunglus am ay fagbulun kata ebi gina tam Fun bagu gfili emu. Ay Funbalugu wan am ufud. ²⁵ Tam Fun du e longan sa angku sa at yud e ufud. Ay dewa katanya, nanfoyung akyay ayu ku fasadan. Ay mafanud tuwa ku longan, anway tam Fun wan At nafamanyun sa angku. ²⁶ Anway e faurianan wayay katsi, ku fasadan te, masine fagayu taw nu gfatunglus ban nus nga setaw at fagbulun ginanya. ²⁷ Nu e mangena wo, lag kaumsig sesadian. Ay nu dyay o e mangena, lag gsarap. ²⁸ Dewa katanya ku longan, dewa o indaduwa, katanya bundi asalanan. Ay anggan sik baguina dewa indaduwa, katanya bundi asalanan. Anway te, at kindaduwa ban e nafanawan way ste swa daga, ay ku fakaumsigun dangai am e nafanawan. ²⁹ Ku fagnalongun at masuad te, dua ban ngayu tam menit. Ay anway katanya, katsi ban, sik taw ke mangena fagbuluni yap katai yap nu yud e mangena. ³⁰ Ay sik taw nu kabalu way, katai tuwa at yud kabalu. Ay sik taw taguseganan, katai yangay at yud guseganan. Ay sik taw at nafabul nus nge wain, katai way at yud e kwa. ³¹ Ay sik taw tagsali ay tagfesali ste swa daga fag ngay nanuranan, katai way at yud gfamatuan sas taw ste swa daga. Anway ste swa daga fag ngay taw at ugali dua ban glugo nu mamin. ³² Ku fakaumsigun dangai am e nafanawan. Sik taw at yud e mangena, at amatanganan sa tuwa tam Fun Isus At fagbulun, laman faumsiganan tuwa sa tam Fun. ³³ Ay sik taw at ke mangena, at amatanganan sa way at fagbulun ste swa daga laman faumsiganan way sat mangena. ³⁴ Ay at amatanganan induwa. Ay at yud e mangama, sik diaga tenday, at amatanganan sa tam Fun tuwa At fagbulun. Anway kanya kaumsig at bilug ay at amatanganan igfaning tuwa sas Funbalugu. Ay roro at ke mangama, at amatanganan sa way at fagbulun ste swa daga laman faumsiganan way sat mangama. ³⁵ Ku fagnafoyungun ayu katanya laman e fanambagun am. Da kdi kaumsig gsalag ay fagbulun. Ku fakaumsigun antuwa te, laman masine ay fagbulun. Ay manga masadi tuwa ay amatanganan nu gfaning am sa tam Fun. ³⁶ Sik baguama nu e fasad mangena, kaumsig yama kadaduwa. Ay bandi ka fag duwak taw gamatangan yay te, dua ta siring umdaduwa laman igseg tuwa ta sas Funbalugu faggugat. Ay bandi ka fag baguama gamatangan yay fiya te, dua masine katanya ku ugali sa ku fasad mangena. Ay manga mataka wa dawdaw nu gbaris aw. Nu katanya way, ka fag baguama faningi wa at fakaumsigun ay adaduwai wan. Katanya bunwa asalanan. ³⁷ Ay nus nga sinu nu gdi gfaayu at amatanganan. Ay at fasadan mandi nu gdi gbabo anya ay nu maabaris tuwa. Ay nu matvngvd tuwa at amatanganan laman dewa ban yud e mangena. At masine dewa gyud indaduwa sa at fasad mangena. ³⁸ Katanya ngani, sik mangama nu indaduwa wa sat fasad mangena, katanya at masine. Ay sik mangama dewa gyud indaduwa sat fasad mangena, kanya tuwa at masine. ³⁹ Sik mangena e fagmasadiun tuwa sat mangama kaduge at mangama gleleg. Ay at mangama nu nkate wan, du e gsalag anya dewa gdog kadaduwa, nus nga sinu at fakaumsigun, nut sa tuwa sik takafandiug. ⁴⁰ Dewa katanya, ku fasadan te, sik burangday glabi yap nu guseganan dewa te sesadi way. Ay gamatangan aw te, Funbalugu wa At-Masine-Fag-Falad tagfaamatangan angku.

¹ Katsi nanbalus aw ay fagintoun sa sik fakonun at nafon sa sik tawtawan baliwa. Dewa tam gayup te, fagayu tam e fagsafulun watam, sik taw at ke fagsafulun gamatangan te, aw wan at tiba tungud. Ay roro sik taw at ke fakafanyuun igfatvngvd tuwa at tiba at fakafandiugun. ² Sik taw dewa gayup te, nasaful akwa long fagayu. Roro dia nasaful tibak fagsafulun at fagnangasafulun nangus. ³ Ay sik taw nu kesug tuwa Funbalugu, Funbalugu nasaful tuwa ka fag taw. ⁴ Kata tuy ku longan sa takon ay sa at yud kon at nafon fag fakonun sas tawtawan baliwa. Nasaful watam te, sik tawtawan du e masuad. Anway Funbalugu tuwa fag sadi At ke masuad. ⁵ Ay at ngay taw namatangan te, ngayu wan taw yabi at fun sas banwa ay anggan ste swa daga. Ay matuyan wa fiya at longan. Anway ngayu wa ngaro fiya at fun ay anggan at ngay magurang. ⁶ Ay roro sa antam, sadi yakman tam Funbalugu, tam Tama. Ay Kanya tuwa At naawat fagayu. Ay tam faginketawun laman Funbalugu e fanambagun. Ay sadi yakman tam Fun, Isus Fagtayukan. Ay fagayu siginan tuwa Anya. Ay anggan tam faginketawun siginan tuwa Anya. ⁷ Bunya fagayu takafandiug at nasaful ka fag fagsafulun at matuyan. Anway ebia taw tibak taw at fagsegan faggugat sa yays tawtawan. Ay katsi kanya fag taw nu naon wa at nafon sas tawtawan, gamatangan yay te, dia mangaro masine ku fagbulun, anway tuy fag fakonun aro at nafon way sas tawtawan. Ay nu katanya, igfafurat yay at amatanganan. Anway kanya fag taw dia matvngvd at fakafandiugun. ⁸ At matuyan, sik fakonun dua mafafakbang antam sas Funbalugu. Dewa tam gyud naon, du e bali. Ay dewa tam naon, du e fanambagun. ⁹ Dewa katanya, amatangani tuwa. Laman ay fagbulun di gfe asalanan sa sik takafandiug at yud matvngvd at fakafandiugun. ¹⁰ Anway sik takafandiug dewa yud matvngvd at fakafandiugun, nu nalag wa emu te, o wan sik taw at ke fagsafulun ay kon yay o sas tawtawan at bale. Nu katanya, am fagbulun igfoyung yay o anya te, laman anggan kanya namaskud yangay nangon sa at nafon sas tawtawan. ¹¹ Ay nu katanya yay am fagbulun, igfaliaman yay o am fadugsay at fakafandiugun. Ay anggan sa ebia taw tam Fagtayukan At naatean sa anya. ¹² Nu katanya yay, e asalanan wo sas Fagtayukan. Madyay e asalanan way o sa am fadugsay nu gfafurat yay o am fadugsay at amatanganan. ¹³ Ay nu katanya, sik fakonun nu gfe asalanan way sa ku fadugsay, lag ban aw kon faknul faggugat. Laman da kdi gfe asalanan anya.

¹ Aw, go mabayan aktuwa. Ay go aw Isus At-Suguan at sadi. Ay go aw nalag akwa fiya tam Fun Isus. Ay go kafandiug tuwam sa tam Fun anway aw wan at nafoyung ayu. Go kin. ² Dewa tibak taw gamatangan sa angku baliwa te, kanya bunwa Isus At-Suguan. Am wan at nasaful sa angku te, aw wa fiya Isus At-Suguan at sadi. Anway ay fakafandiugun at nafatuyan sa tibak taw te, Fandak wa fiya Isus At-Suguan. ³ Ay katanya ban ku famalus sa sik taw at nansarap ban te, go aw Isus At-Suguan at sadi. ⁴ Go masine ami duwa, aw ay Sik-Nanfatvngvd, nu gbul ami em fakonun ay em fanginum siginan ayu, anway nafoyung ami ayu. ⁵ Ay nu e mangena di ami, go masine nu nataban ami em mangena, sik takafandiug, gina ami glo. Laman em mangena nangufud tuwemi kata tiba Isus At-Suguan at mangena nu nangufud anya. Ay kata tam Fun at ngay fadugsay at mangena, ay anggan Takata-Sik-Batu at mangena nu nangufud anya. ⁶ Anway nu dway masine nu nabul ami em fakonun siginan em nafoyungan. At masuad te, nanfagbulunan yap ami laman e famul tuwami em fagayudanun. ⁷ Amatangani sa sik tagbarangian. Du e fansali nu nabul nus nge wain at fagayudanun. Anway at fun igfalu tuwa anya. Ay sik tagtanum kon wa fiya at tiba at buadan siginan at gamasun. Ay sik tagtanud balan igbul at sadi at balan siginans at nalufuyan. ⁸ Ay bunwa sik taw fag sadi at ke longan katanya. Anggan tam Funbalugu e longan yangay. ⁹ Anway Ku-Unga At-Rirukan nafoyung te, Lag bugsung at balan at bibig gina ka fag balan igrabas sik buadan. Tam Funbalugu At fagnalongun katanya bundi sa sik balan fagtvngvd at ke fanambagun. ¹⁰ At faglongan sa way antam at taw laman antam e fanambagun. Anway at masine sik tagsaksak e fagsegun wa fiya sat nasaksak. Ay anggan sik tagbul at buadan e fagsegun wa fiya anya fag afud at buadan. ¹¹ Ay ka fag fafaskudanan at masuad te, nafoyung ami ayu Funbalugu At longan. Ay go gadulawan way ban am nu nabul ban ami em fagayudanun siginan ayu. ¹² Anway tibak takamoyung nabul wa fiya at fagayudanun siginan ayu, ay ami amasine yap ban nu nabul ami em fagayudanun siginan ayu. Dewa dawdaw masine nu gbul ami siginan ayu, yaya du ami katanya. Igbaris way ami laman du ami gfasalag ayu nu kaumsig am gdungug sas Fagtayukan At Masine-Fag-Barita. ¹³ Go du am nasaful te, sik taw tagfagbulunan sas Tagbvt-Fag-Bale-Funbalugu nu nabul at fakonun siginan yangays Tagbvt-Fag-Bale-Funbalugu. Ay sik taw tagfagbulunan sas fagfonan famanyun nabul yangay sik afud siginan at anyun. ¹⁴ Katanya yangay tam Fun At longan te, laman tagfoyung at Masine-Fag-Barita at fagbulan at fagayudanun siginan yangay at fagfoyungan fag taw at Masine-Fag-Barita. ¹⁵ Dewa katanya, da kwa gfanget siginan ku fagfoyungan fag taw. Ay ku fagnarirukun katsi bundi te, nanfanget akban. Dewa aw nkate sas kalunus, ku fakaumsigun laman di e taw gsalag ku fagusegananun te, aw da kdi gbul ku fagayudanan nus nga nday ku fagfoyungan. ¹⁶ Ay dewa aw nafoyung at Masine-Fag-Barita, da kdi gfalabi ku iba. Anway e nasugu tuwa angku. Ay at mabalu nu da kway ban nafafoyung at Masine-Fag-Barita. ¹⁷ Dewa aw mandi at nafili ku fagbulun, e fanambagun aktuwa. Ay roro bundi katanya. E nasugu tuwa angku, ay ku fakaumsigun nanfaning kway fagtvngvd ka fag suguan. ¹⁸ Nu katanya, tain ku fanambagun. Ay ka fag fanambagun ku fagusegananun gina aw nafoyung at Masine-Fag-Barita at yud e fansali sat tagdungug. Anway da kdi nabul ku fagayudanun siginan ku ngay fagfoyungan at Masine-Fag-Barita. ¹⁹ Dewa aw yud sik fanuguan fiya, aw insik fanuguan akyay sas fagayu taw. Laman ban ngayuk taw umfandiug yay siginan ku nafagbulun. ²⁰ Kaduge aw maful sasa ngay Taw-Naseg, igfaning aktuwa sa at Taw-Naseg at ugali. Laman at ngay Taw-Naseg umfandiug ban. Ay gina aw maful sasa ngay tagfaning sa Ku-Unga At-Longan fagtvngvd, igfaning akyangay sa Ku-Unga At-Longan. Dewa te, bunwa Ku-Unga At-Longan tagmagurang angku. Laman tagfaning yangay sa Ku-Unga At-Longan fagtvngvd laman umfandiug ban. ²¹ Ay kaduge aw maful sa at ngay Yud-Naseg-Fag-Taw, ku ugali kata yangay sa at yud gfaning Ku-Unga At-Longan. Laman at Yud-Naseg-Fag-Taw umfandiug ban. At masuad ku longan bunwa te, nanfamabo aw sas Funbalugu, anway nafaning aktuwa sas Fagtayukan At longan. ²² Ay kaduge aw maful sa at ngay taw at yud matvngvd at fakafandiugun, anggan aw igfaning akyay at ugali. Laman fafatvngvd aw at fakafandiugun. Nafaning aw nus nga sinu fag taw at ugali. Laman nus nga setaw ku fagbulun, laman tibak taw umfandiug ban. ²³ Ku fagnafagbulunun katanya laman At Masine-Fag-Barita e fanambagun. Ay anggan aw nabul akyangay sik afud ka fag masine. ²⁴ Go du am nasaful te, at tagudgunan fag taw, sadi wadi kumdasug taguna sat fakadasugan, ay at fabul at fanambagun. Ka fag fafaskudanan at masuad te, ay ugali faningi at masine, laman fafabul ban am sik fanambagun. ²⁵ Fagayu tagudgunan taglo nasungatan. Laman fafabul sik fanambagun, at yud glugo fag sangbo. Ay roro itam takafandiug nasungatan yangay tam laman fafabul yangay tam at yud e fakatabuan fag sangbo. ²⁶ Kata tuy yangay at fafaskudanan te, nu glo aw da kdi gbarikwayun. Ay nu gagbuan aw, da kdi gfamomuyun. ²⁷ Fagongun aw dawdaw ku bilug ay fatvngvd aw, laman ku bilug igfaning tuwa ku amatanganan. Anway kua kaumsig nu e nayiyan ban angku, anway ebi nafoyung aktuwa ngap ay sa tibak taw.

¹ Ku ngay fadugsay. Kaumsig aw nanfasaful sa ayu te, ebi tam ngay aguyangan fag ngay taw at nalo sas daga ka fag linyabu. Ay kanya fagayu nalo wa sas buknga lino. ² At linyabu ay at lino sik fafaskudanan at masuad te, ka fag ngay taw kata nu nsurung, laman ban Ku-Unga wa at taw. ³ Ay ka fag ngay taw naon wan ka fag fakonun siginans Banwa. ⁴ Ay ka fag ngay taw nainum wan ka fag safa siginans Banwa. Anway ka fag safa at kinsure sanya ginan fag Batu siginan was Banwa. Ay Ka fag Batu gufud tam aguyangan, anway ka fag Batu tam Fagtayukan wan. ⁵ Dewa katanya, Funbalugu dua kaumsig ka fag ngay taw at fagbulun at ngayu baliwa. Ay at ngayuk taw nkate wa sasa ngaba talun at yud e taw. ⁶ Katanya fag fagbulun sik famatagak sa antam te, laman di tam galabian sat mauri kata kanya fag ngay taw. ⁷ Ay lag gseg sas tawtawan kata ebi fag ngay taw. Anway At-Rirukan nalong wa te, Ay at ngay taw malunggung way. Ay kon way. Ay ginum way. Ay kanya malindug laman kamalabiun way. ⁸ Ay lag tam kamalabiun kata kanya fag ngay taw. Ay ginanya way fag sadik menit at kinkate 23,000k taw. ⁹ Ay lag tam gfaskud tam Fun kata kanya fag ngay taw at tiba. Ay sik ngay ubianun naagat ka fag ngay taw ay inkate wan at tiba. ¹⁰ Ay dangai tam gfangalimataun sas Funbalugu kata kanya fag ngay taw at tiba. Ay Funbalugu At tagbukngan sik tagfate at nafate ka fag ngay taw at tiba. ¹¹ Fagayu at kindasug takatanya anwa sik famatagak. Ay at fagnarirukun fagayu laman sik famatagak sa antam. Anway katsi makbang wan at fakatabuan fag ngay menit. ¹² Anway katanya, dewa sik taw gamatangan te, magong akyay, roro matvngvdi tuwa nu gtagak. Laman di gfaning sas asalanan. ¹³ Fagayu asalanan at famaskud sa ayu, taguna indasug wa sasa ngay taw. Ay matuyan Funbalugu At longan. Ay Kanya gsalag asalanan at famaskud taglabi ay katvngvdan. Ay manga nafasure yay sa ayu sik fangalfasan gina e famaskud. Laman nababo tuwam. ¹⁴ Ku fakesugun ku ngay taw. Anway katanya, lag kakbang sa at fagsegan fag tawtawan. ¹⁵ Nafoyung aw sa ayu kata sat mamatanganan fag taw. Amatangani tuwa fagayu ku longan sa ayu te, go matuyan. ¹⁶ Sa tam Fun-At-Yafun, ka fag safa tam nainum at masuad nu gseg watam sas Funbalugu, ay kanya kata wa Fagtayukan At taguk. Ay at ba fafa tam nafanramyukan ay tam naon, at masuad anwa tam Fagtayukan At bilug. ¹⁷ Ay at ba fafa at nafasadi antam. Madyay sadi way at ba fafa ay fagayu tuwa tam takon. ¹⁸ Amatangani sat ngay Taw-Tagagbuan at ugali ebi. At ngay taganyun naon way at balyu at nafon fag anyun. Ay nu katanya, kanya kata wa nu insadi sa at fagsegan. Go kin. ¹⁹ Go ku longan at masuad te, sik tawtawan e fagmadaragangun ay at nafon fag fakonun e fagmadaragangun. Ay go yaya. ²⁰ Yaya. Ku longan at masuad antuwa te, at yud kafandiug fag ngay taw nu gfon at anyun, sa way sa ngay mafurat fag falad ay duat sas Funbalugu. Ay kua kaumsig nu insadi am sa at fagsegan sasa ngay mafurat fag falad. ²¹ Lag fafagduwa nu ginum am sa tam Fun At faginuman ay sasa ngay mafurat fag falad at faginuman. Ay lag fafagduwa nu kon am sa tam Fun At fagfangonan ay sasa ngay mafurat fag falad at fagfangonan. ²² Go masine nu gfatuluyanan wa tam tam Funbalugu. Go e fagmadaragangun yay tam glabi yay sa tam Funbalugu. Ay go yaya. ²³ Ay e glong te, Manabayan tuwa long katsi, ay igfaning aktuwa long nus nga setaw ku fakaumsigun. Ay dewa e glong katanya, tibak fagbulun dua masine sa antam takafandiug. Ay dewa tam mafafabul fagayu fagbulun, tiba tam fagbulun dua gfatvngvd tam fakafandiugun. ²⁴ Dangai sa emu sesadi am fagsarapun sik fanambagun. Am fagsarapun antuwa te, laman am iba e fanambagun yangay. ²⁵ Ay oni wan am nabul fag fakonun siginans tagfesali. Ay lag o gamatanganan te, daginan tuy fag fakonun. Laman am amatanganan di kata nu glibuan. ²⁶ Anway tam Fun wan tagagbilug tam fagdaul daga ay anggan fagayu tagsanya. ²⁷ Ay sik yud kafandiug fag taw nu nagewan emu sat bale laman gfafangon emu. Ay nu kaumsig o gsakbo. Oni wan nus nge wain at nafon emu fag fakonun. Ay lag o gamatangan te, go daginan manga tuy fag fakonun. Laman am amatanganan di kata nu glibuan. ²⁸ Ay roro dewa katanya, sik taw nu nafaguna wa nalong sa emu te, Tuy fag fakonun e nafon wa sa sik tawtawan. Nu katanya, lag kon. Anway afanyui tuwa kanya at nafoyung emu fag taw, laman ro at amatanganan di kata nu glibuan. ²⁹ Ku fagnalongun sa emu te, lag kon, laman am iba at amatanganan di kata nu glibuan. Ku faglongan bunwa sa emu. Labon sik taw lumong angku te, Taw ro ka fag taw at amatanganan at fagsalagun ku fasadan. ³⁰ Anway nu guseganan aktuwa sas Funbalugu sa ka fag fakonun baliwa gina aw kon, taw ro siring ka fag taw fakalimataun sa ku naonan ay nu nauseganan aktuwa ngap sas Funbalugu. ³¹ Ay nu katanya, dewa am kon ay dewa am ginum, ay nus nge wain ay fagbulun, faningi at masine. Laman at ngay taw nu nalag ay fagbulun sumeg ban sa tam Funbalugu. ³² Dangai gfe asalanan sa at ngay Taw-Naseg, ay sa at ngay Taw-Gresia, ay anggan sas Funbalugu bale at ngay taw. ³³ Ay anggan aw katanyai nangus ku fagbulun. Anway ku fakaumsigun laman at ngay taw e fanambagun nus nga setaw ku fagbulun, aw dewa gyud aw e fanambagun. Laman ngayuk taw umbalabag tuwa.

¹ Ay am, faningi angku, kata nu gfaning aw sas Fagtayukan. ² Guseganan aw sa ayu anway faggugat gamatangan tuwam sa angku nus nge wain. Ay gfaning tuwam ku nafoyung ayu fag ugali. ³ Ay kaumsig aw nu sumaful am te, fagayu at ngay mangama at fun, tam Fagtayukan wan. Ay fagayu at ngay mangena at fun, at mangama wan. Ay anggan Fagtayukan At fun, tam Funbalugu wan. ⁴ Sik mangama gina gdarangin ay ate gina gfoyung Funbalugu At longan, nu e fantabun way sat alfuyu, gfaplan way sat Fun. ⁵ Ay sik mangena gina gdarangin ay ate gina gfoyung Funbalugu At longan nu dway e fantabun sat alfuyu, gfaplan way sat alfuyu. Kata way nu malanu at alfuyu. ⁶ Ay sik mangena nu dway ngap igtabun at alfuyu, falanui wa ngap at alfuyu. Ay nu kapla way nu nabul at buk, tabuni tuwa at alfuyu. ⁷ Ay roro sa sik mangama, lag e fantabun sat alfuyu. Anway kanya at fanfalagan sa at tiba, Funbalugu At ugali ay anggan At fagmasineun. Ay at ngay mangena at fanfalagan sa at tiba at mangama wa at fagmasineun. ⁸ Anway ebi taguna fag mangama duwat siginan sik mangena. Ebi taguna fag mangena siginan way sik mangama. ⁹ Ay Funbalugu dua naawat sik mangama te, laman at mangena e fanambagun. At fagnaawatun sik mangena laman at mangama e fanambagun. ¹⁰ Ay nu katanya, sik mangena tabuni tuwa at alfuyu. At masuad te, at mangama tuwa tagmagurang anya. Ay manga sas Funbalugu At ngay tagbukngan. ¹¹ Ay dewa katanya, anway insadi watam sas Funbalugu, sik mangena di gmandianan. Ay sik mangama di gmandianan. ¹² Anway ebi taguna fag mangena siginan way sik mangama. Ay katsi fag ngay mangama siginan yangay sik mangena. Ay fagayu siginan yays Funbalugu. ¹³ Am wan tagfili te, go tain at masine. Go masine sik mangena dewa gyud e fantabun sat alfuyu gina gdarangin sas Funbalugu kaduge maful sa at tiba. Ay go lagi. ¹⁴ Anggan at ngay taw ste swa daga gamatangan yangay te, mapla way sik mangama nu ngaba way at buk. ¹⁵ Ay roro sik mangena nu ngaba tuwa at buk, katanya sik mangena at fakaumsigun. Anway Funbalugu wan At nafon anya at buk laman at fantabun. ¹⁶ Katanya wan tam ugali ay anggan at ngay Funbalugu bale at ngay taw at ugali. Dewa e kalimata ay dewa igfaringangan sa tiba, katanya wan tam ugali. ¹⁷ Katsi gananlongun aw sa ayu te, kua guseganan sa ay fagbulun. Anway gina am maful, ay fagbulun gfafurat way ayu, ay dua gfatvngvd ayu. ¹⁸ At taguna ku dungganan te, gina am maful, fudfulanun way am. Ay gafanud akwa fiya sirut sa ku dungganan. ¹⁹ Kin, masine wa fiya tiba ginan. Laman umtuyan am te, seyu am at tagfaning fiya fiya sa tam Funbalugu. ²⁰ Ay kaduge am maful gina am ganangonun tam Fun-At-Yafun, ay naon bunwa tam Fun-At-Yafun. ²¹ Ay fagayu taw kon way mandi at ba fafa. Ay ginanya tibak taw kalunus ay tibak taw kasigung. ²² Sek, nu katanya way ay fagbulun. Go wam e bale laman sanyai way nu kon am ay nu ginum am. Go kin. Go gfalimatan way am tam Funbalugu bale at ngay taw. Ay go gfaaplan way am sat yud e kwa fag taw. Tain ro ku longan sa ayu. Go lumong aw te, masine ay fagbulun. Ay go yaya. Yaya. Kua guseganan sa ayu. ²³ Anway ebi nafoyung kwa ayu ku nadungug siginan tam Fun te, ebi tam Fun Isus nabul sik fafa ginanya fag yabi, gina ro e namoyung Anya sat mauri fag taw. ²⁴ Ay tam Fun Isus nu nauseganan wa sas Funbalugu, Kanya nafanramyukan wa at ba fafa, ay nalong te, Tuy fag fafa Ku bilug wan. Nafon Aw Ku bilug laman e fanambagun am. Ay oni wan, sik fagamatanganun sa Angku. ²⁵ Ay katanya yangay nu ntabu wa nu kon at yafun. Isus nabul sik taya e uwat buadan safa, ay nalong te, Tuy fag safa at masuad sik famatuyanan sas Funbalugu At bagu fag fatuyanan sa At ngay taw. Anway e musbus ro Ku taguk. Buli ay inumi wan. Ay snga ginain ban nu ginum am, sik fagamatanganun ban sa Angku. ²⁶ Anway nus nga ginain ban nu kon am kata tuy fag fafa ay nu ginum am kata tuy fag safa, nafalag am sa ay iba tam Fun At fakateun. Faningi anggan ban Isus umdasug. ²⁷ Ay gina am maful laman nangon tam Fun-At-Yafun, nus nga sinu takon at fafa ay taginum at safa ginanya, nu dway masine at ugali ginanya, kanya e asalanan way. Ay gfafurat way tam Fun At bilug ay sa At taguk. ²⁸ Fagayu taw, amatangani yap mandi at ugali. Ay nu ntabu wan, oni ka fag fafa ay inumi ka fag safa. ²⁹ Anway nus nga sinu nu naon wan ay nu nainum wan, ay nu dway nasaful tam Fun At bilug at masuad, e gfegan way ban anya anway at fagbulun. ³⁰ Fakatanyaun, am tiba mamomuy way ay bilug. Ay tiba e dailan. Ay tiba nkate wan. ³¹ Nu gsarap tuwa tam mandi tam asalanan, Funbalugu At famaegan di mdasug sa antam. ³² Ay roro nu Funbalugu wa tagsarap tam asalanan, Kanya e famaegan wa fiya sa antam. Laman di ban dawdaw e faurianan sa antam gasfuan ste swa daga fag ngay taw. ³³ Ku ngay fadugsay, nu katanya, gina am maful laman nangon tam Fun-At-Yafun, fanyai yap ay iba. ³⁴ Ay sik taw nu kalunus, sat balei yap nu kon. Laman gina am maful, Funbalugu di gfegan ayu. Ay sa baliwa tiba ay fagbulun, gfoyung kyay ban ayu gina aw umdasug sanya.

¹ Ku ngay fadugsay, katsi gananfoyungun aw sa ayu Funbalugu At-Masine-Fag-Falad At ngay famanyun sa antam. Anway kaumsig aw nu sumaful am. ² Nasaful wam te, ebi gina am yud kafandiug, e nafanuguanan dawdaw ayu nus nge wain wan. Laman gseg am dawdaw sas tawtawan at yud ge longan. ³ Katanya wayay, kaumsig aw nu sumaful am te, nu Funbalugu tuwa At-Masine-Fag-Falad At nafaamatanganan sa sik taw, laman ka fag taw di batang glong te, E gfaurii nangus sas Isus. Ay du e taw glong te, Tam Isus tam Fun, yap ngay At-Masine-Fag-Falad nafaamatanganan anya. ⁴ Ngayu tuwa At-Masine-Fag-Falad At famanyun ay saman wan nu saman wak taw. Ay dewa katanya, sadi way At-Masine-Fag-Falad. ⁵ Ay ngayu tuwak fagbulun tagfaning tam Fun At fasadan. Ay saman wan nu saman wak taw. Ay dewa katanya, sadi way tam Fun. ⁶ Ay e fagmadaragangun tuwa siginans Funbalugu laman mafafabul ka fag ngay fagbulun. Ay saman wan nu saman wak taw at fagmafabulun ka fag ngay fagbulun. Ay dewa katanya, sadi way tam Funbalugu. ⁷ Ay At-Masine-Fag-Falad nafamanyun sa sadi sadik taw, laman fagayu Funbalugu At taw e fanambagun. ⁸ Ay sa sadik taw At-Masine-Fag-Falad At famanyun sa anya laman mamatanganan at longan. Ay sa tibak taw At-Masine-Fag-Falad At famanyun sa anya laman igsaful nu gfoyuung. ⁹ Ay sa tibak taw At-Masine-Fag-Falad At famanyun sa anya laman matvngvd tuwa dawdaw nu kafandiug. Ay sa tibak taw At-Masine-Fag-Falad At famanyun sa anya laman mafafiya at ke dailan. ¹⁰ Ay sa tibak taw At famanyun sa anya laman mafafasure at ke masuad fag fagbulun. Ay sa tibak taw At famanyun sa anya laman mafafoyung Funbalugu At longan. Ay sa tibak taw At famanyun sa anya laman nasaful te, go daginan ka fag fagmadaragangun, go siginans Funbalugu ay go siginans mafurat fag falad. Ay sa tibak taw At famanyun sa anya laman mafafalong sa at fagyudun gsaful fag fanlongan. Ay sa tibak taw At famanyun sa anya laman mafafoyung at fagyudun gsaful fag fanlongan at masuad. ¹¹ Dewa kayu niya, sadi tuwa At-Masine-Fag-Falad tagfaamatanganan te, laman at ngay taw mafafabul kayu niya fag fagbulun. Ay nu sik taw wan, saman wan At-Masine-Fag-Falad At famanyun, ay gfaning wa At fakaumsigun mandi. ¹² Sik taw at bilug dewa sadi, ngayu tuwa at afud. Ay dewa ngayu at afud, sadi way at bilug. Katanya yangay at fafaskudanan sa tam Fagtayukan At bilug. ¹³ Ay fagayu tam sik afud watam Fagtayukan At bilug. Dewa tam sik Taw-Naseg ay dewa tam sik Taw-Gresia. Ay dewa tam sik fanuguan ay dewa tam gyud sik fanuguan. Anway At-Masine-Fag-Falad nafasadi wa antam sa sadik bilug. Kata nu e nasurung antam sa At-Masine-Fag-Falad. Ay manga nafat si wa antam At-Masine-Fag-Falad. ¹⁴ Sik taw at bilug ngayu at afud, bundi fagtvngvd sadi. ¹⁵ Ay at darafa dewa nalong te, Bun akwa sik daluap, ay bun akwa ro at bilug at balyu. Dewa nalong katanya, kanya sik afud wa fiya at bilug. ¹⁶ Ay at talinga dewa nalong te, Bun akwa sik mata, ay bun akwa ro at bilug at balyu. Dewa nalong katanya, kanya sik afud wa fiya at bilug. ¹⁷ Fagdaul at bilug nu sik mata way ro, du waro e fandungug. Ay fagdaul at bilug nu sik talinga way ro, du waro e fangayuk. ¹⁸ At matuyan, Funbalugu nafat si sik taw at bilug at afud, nus nga nday At fakaumsigun mandi. ¹⁹ Anway nu sadi way rok afud, du waro e bilug. ²⁰ Ay roro ngayu tuwa at afud. Ay sadi way at bilug. ²¹ Ay dua masine at mata nu nalong sat daluap te, Aw ku e fanambagun siginan emu. Ay dua masine at alfuyu nu nalong sat darafa te, Aw ku e fanambagun siginan emu. ²² Ay roro kanya fag ngay afud tagsi tam bilug at yud magong, e masuad tuwa. ²³ Ay kanya fag ngay afud dewa tam gayup te, dua bangan masine, roro ngap kesug tuwa tam anya. Ay si tam naplan fag ngay afud, gfafalyu tuwa tam te, laman masine. ²⁴ Ay sa tibak afud at masine, dua tam gfafalyu. Tam Funbalugu naawat tuway tam bilug, esugi tuwa fagayu at afud. Dewa tam gayup te, sanya fag afud dua bangan masine. ²⁵ Laman tam bilug di gsadsamanan. Ay laman fagayu at afud kedkesugan tuwa sa tiba tibak afud. ²⁶ Ay nu e masait way sa sik afud at bilug, anggan fagayu afud kasait wan. Ay nu e gseg tuwa sa sik afud at bilug, anggan fagayu afud guseganan tuwa. ²⁷ Ka fag fafaskudanan at masuad te, am wan Fagtayukan At bilug. Ay nu sik taw wan, sik afud wa Fagtayukan At bilug. ²⁸ Ay Funbalugu nafili wan at ngay tagtarabang sa At bale fakafulan at ngay taw. At taguna At nafili At-Ngay-Suguan. Ay at faduwa, at tagfoyung Funbalugu At longan. Ay at fatulu, at magurang. Ay anggan tagfasure at ke masuad fag fagbulun. Ay tagfafiya at ke dailan. Ay tagtarabang. Ay tagsugu. Ay anggan taglong sat fagyudun gsaful fag ngay fanlongan. ²⁹ Amatangini yap. Go fagayu taw At-Suguan. Ay go fagayu taw sik takamoyung Funbalugu At longan. Ay go fagayu taw sik magurang way. Ay go fagayu taw sik tagfasure wa at ke masuad fag fagbulun. ³⁰ Ay go fagayu taw sik tagfafiya at ke dailan. Ay go fagayu taw mafafalong sa at fagyudun gsaful fag fanlongan. Ay go fagayu taw mafafoyung at fagyudun gsaful fag fanlongan at masuad. Ay go yaya fagayu. ³¹ Ay aumsigi dawdaw At-Masine-Fag-Falad At tiba tungud at masine fag famanyun. Ay katsi nanfoyung aw ayu sik ugali taglabi tiba nu masine.

¹ Dewa aw mafafalong sas fagayu taw at fanlongan, ay anggan sas Funbalugu At ngay tagbukngan at fanlongan. Ay nu da kway gfangafanyu, aw kata kway sik marorong fag aling. Ay kata kway sik mataraktak. Anway ku longan kata way at yud e masuad sasa ngay taw. ² Ay dawa aw maseganama nu kamoyung. Ay dewa aw nasaful fagayu at fagsafulun ay anggan at mafalyu fag longan. Ay dewa matvngvd ku fakandingun laman sak aw mafafalin sik muyud. Ay nu da kway gfangafanyu, kata kway ngap yud e fanamabagun. ³ Ay dewa aw nafon fagayu ku nanuranan sa at yud e kwa. Ay manga gfabayan kway dewa e gbatas angku. Ay nu da kway gfangafanyu, du e fanambagun sa angku. ⁴ Anway sik taw tagfangafanyu, e namafanyan tuwa. Ay malukme tuwa. Ay di galabian. Ay di gfalabi at longan. ⁵ Ay di gfandaragang at fagbulun. Ay gfababaun tuwa. Ay di gfaguna si anya at fasadan. Ay di gfangalimata. Ay di gamatatang kadotama sa tiba dewa e fagbulun mauri sa anya. ⁶ Ay di guseganan nu nalag at mauri. At fagusegananun antuwa nu nalag sat masine. ⁷ Sik taw tagfangafanyu igsungatan tuwa dewa snga setaw. Ay gafanud tuwa dewa snga setaw. Ay e fagsegun tuwa dewa snga setaw. Ay igbaris tuwa dewa snga setaw. ⁸ Fakafanyuun tuwa at yud e fakatabuan. Ay at ngay foyungan, kanya ban du e masuad. Ay at nga fanlongan, e fakatabuan way ban. Ay at ngay fagsafulun, kanya ban du e masuad. ⁹ Anway tam ngay nasaful katsi, sik afud yay. Ay manga tam foyungan katsi, sik afud yay. ¹⁰ Ay nu nsure wa ban at fagdual, at ngay afud di e masuad. ¹¹ Ebi gina aw sik sisian, nu ge longan aw kata yay sisian. Ay ku fakaumsigun kata yay sisian. Ay anggan ku amatanganan kata yay sisian. Ay nu ndual akwan, naubun akwan kata sisian at ugali. ¹² Anway katsi nu glag tam, mafayasan yay. Kata nu nalinggat tam sa sik balanban. Ay bandi lumag wa ban tam fiya Anya fasalubangan. Ay katsi ku nasaful sik afud yay. Ay bandi fagdaul sumaful akyay. Kata tam Fun nu nasaful angku fagdual. ¹³ Ay katsi e tulu at yud maliam. At sadi, fakfandiugun. Ay at faduwa, fagsegun. Ay at fatulu, fakafanyuun. Ay at taglabi at duwa, fakafanyuun.

¹ Maseganamai laman gfangafanyu tuwam. Ay fangaumsigi tuwa sa At-Masine-Fag-Falad at ngay famanyun sa antam. Ay at tiba tungud fangaumsigi tuwa laman mafafoyung tuwam Funbalugu At longan. ² Ay sik taw nu nalong way sat fagyudun gsaful fag fanlongan, at faglongan bunwa sasa ngay taw. Ay roro sa ways Funbalugu. Anway du e taw nasaful ka fag longan at masuad. Ka fag taw at faglongan kanya fag masuksukan fag fagsafulun sa anya way mandi. ³ Ay roro ngap sik taw at fagnafoyungun Funbalugu At longan, laman at ngay taw nasaful at masuad. Ay igfatvngvd tuwa at fakafandiugun. Ay manga igfatvngvd tuwa at amatanganan. Ay anggan igfaliaman tuwa at ngay taw at fakabaluun. ⁴ Ay sik taw nu nanlong nut sa way at fagyudun gsaful fag fanlongan, at fagfatvngvdun sa way anya mandi. Ay roro sik taw at fagnanfoyungun Funbalugu At longan, nanfatvngvd tuwa Funbalugu bale at ngay taw. ⁵ Kaumsig akwan fagayu am nu nae longan am sat fagyudun gsaful fag fanlongan. Ay dewa katanya, ku fakaumsigun fiya fiya foyungi tuwa Funbalugu At longan. Anway sik tagfoyung Funbalugu At longan amasine yap sa sik taglong sat fagyudun gsaful fag fanlongan. Yap ngay e nafoyung at masuad, laman gfatvngvd tuwa Funbalugu bale at ngay taw. ⁶ Ku ngay fadugsay. Nu ndasug aw sa ayu, ay nu nae longan aw sa ayu sat fagyudun gsaful fag fanlongan, du am e fanambagun. At ke fanambagun antuwa nu nafoyung aw sa ayu Funbalugu At nafasaful sa angku. Tenday, sik nafasure fag foyungan. Ay ate sik fagsafulun. Ay ate sik Funbalugu At taglong at longan. Ay ate sik foyungan. ⁷ Ay anggan at yud gleleg mandi fag famaawangan. Nu dway masnug nu gawang, du e taw nasaful at masuad. Kata way sik tulali ay sik kudyapi nu guni. ⁸ Ay anggan at tagbudyung nu dway masnug nu kabudyung. At ngay tagbarangian dia nafamasadan dewa gadasugun at ngay tagfabarangian sa anya. ⁹ Ay katanya yangay anggan am. Yap ngay am nalong at matignaun fag fanlongan, at tibak taw dua nasaful at masuad. Ay longan inlayug wadi sas tagmara. ¹⁰ Nu ndain, ngayu at fanlongan sas fagdaul daga. Ay fagayu at fanlongan e masuad tuwa. ¹¹ Ay aw nu da kway nasaful sa sik fanlongan at masuad, aw kata kway sik famaklay sa at nalong angku. Ay at nalong angku kata yangay sik famaklay sa angku. ¹² Am katanya yangay am. Kaumsig tuwam dawdaw nabul At-Masine-Fag-Falad at ngay famanyun. Ay nu katanya, maseganamai tuwa sa ay fagbulun nus nga setaw, laman fatvngvdi Funbalugu bale at ngay taw. ¹³ Ay nu katanya, sik taw at nanlong sat fagyudun gsaful fag fanlongan, darangini yap. Laman e fagmadaragangun tuwa mafafoyung at masuad. ¹⁴ Ay nu nadarangin akwan sat fagyudun gsaful fag fanlongan, dewa aw guseganan igdarangin, da kia nasaful at masuad. ¹⁵ Nu katanya, tain ku baliyavtan. Dumarangin akyay dewa aw yud nasaful at masuad. Ay dumarangin akyay fiya sat fagsafulun fag fanlongan, laman sumaful aw at masuad. Ay nandanyu akyay dewa aw yud nasaful ka fag danyu at masuad. Ay nandanyu akyay fiya sat fagsafulun fag fanlongan, laman sumaful aw at masuad. ¹⁶ Ay nu gdarangin wo sat fagyudun gsaful fag fanlongan laman nanfoyung am fagusegananun sas Funbalugu. Tibak taw dua mafagubuk te, kin, katanyai tuwa. Anway kanya dua nasaful am fagalongunun at masuad gina o gseg sas Funbalugu. ¹⁷ Ay dewo gusegananun dawdaw sas Funbalugu, dia mafafatvngvd am iba. ¹⁸ Guseganan aw sa tam Funbalugu anway nafafalong aw sat fagyudun gsaful fag fanlongan nalabi akyay si ayu ay nafalong. ¹⁹ Dewa katanya, kaumsig aw dawdaw gfoyung sas Funbalugu bale at ngay taw limak longan wadi siginan ku fagsafulun laman nafasaful at ngay taw. Ay ka fag limak longan amasine yap sas 10,000k longan sat fagyudun gsaful fag fanlongan. ²⁰ Ku ngay fadugsay. Dangai am kata sik sisian nu gamatangan am. Ay kini, katai sik sisian at yud nasaful sas asalanan. Ay roro nu gamatangan am, katai tuwam sik magurang. ²¹ At-Rirukan nalong wa te, Funbalugu nalong te, Nanfoyung ban aw tuy fag ngay taw. Ay at ngay takamoyung saman wak fanlongan at nafoyung, ay sik ngay famaklay. Ay dewa katanya, At ngay taw dua gdungugan sa Angku. ²² Fakatanyaun, at foyungan sat fagyudun way gsaful fag fanlongan, sik fagsafulan way sat yud kafandiug fag ngay taw, ay bunwa sat ngay takafandiug. Ay at fagfoyungun Funbalugu At longan sik fagsafulan tuwa sa at ngay takafandiug ay bunwa sat yud kafandiug. ²³ Ay nu katanya, gina am maful fagayu am sas Funbalugu bale, ay fagayu am tage longan sa way ay fagyudun gsaful fag fanlongan. Ay sik taw at yud nasaful ay ugali nu nasakbo, tenday at yud kafandiug nu nasakbo. Go at tagsakbo luminggat te, fagayu taw iste du e amatanganan. Go kin. ²⁴ Ay roro ngap gina am maful fagayu am, ay fagayu am tagfoyung Funbalugu At longan sa ay fanlong tuwa mandi. Ay sik taw at yud nasaful ay ugali nu nasakbo, tenday at yud kafandiug nu nasakbo. At tagsakbo nasaful tuwa fagayu ay foyungan sanya. Ay rodi kanya fag taw gamatangan te, go e asalanan aw. Anway ka fag foyungan gfasaful anya te, mauri way nu e asalanan. ²⁵ Ay ka fag bagu kadasug at amatanganan at masuksukan insure wa fiya. Ay rodi kanya namalub naseg sas Funbalugu te, kin wa ngaro fiya, Funbalugu ste wa si ayu. ²⁶ Ku ngay fadugsay. Nu katanya, taini ay fagbulun at masine. Gina am maful, sik taw sa ayu nu kaumsig nandanyu. Ay tiba kaumsig nu nanfoyung. Ay tiba kaumsig nu nanfasaful sa tiba at bagu nsure fag foyungan. Ay tiba kaumsig nu nanlong sat fagyudun gsaful fag fanlongan. Ay tiba kaumsig nu nanfoyung sat fagyudun gsaful fag fanlongan at masuad. At masine fagayu ay fagbulun laman gfatvngvd tuwa sanya fag ngay takafandiug. ²⁷ Ay at ngay taw nu kaumsig nanlong sat fagyudun gsaful fag fanlongan, at masine duwak taw yakman, ay ate tuluk taw taglong. Lag gfalabi sas tuluk taw. Ay ungbusani tuwa nu ge longan am. Dangai gasfuan. Ay sik taw at sadi tagfoyung at masuad. ²⁸ Ay nu dway e taw mafafoyung at masuad, lag nanlong sat fagyudun gsaful fag fanlongan sas Funbalugu bale. Nu glong am sa yakman ay amatanganan, ay sas Funbalugu. ²⁹ Ay at ngay takamoyung nu kaumsig gfoyung Funbalugu At longan, at masine duwak taw yakman ay ate tuluk taw taglong tagungbusan. Ay at tiba tagdungugan, amatangani tuwa te, go matuyan at longan. ³⁰ Ay ginanya, Funbalugu nu nafaamatanganan yay sa tibak taw tagafoyungun At foyungan, at taguna fag takamoyung atuwasi yap nu ge longan. ³¹ Masine tuwa dewa am fagayu tagfoyung Funbalugu At longan nu gungbusan tuwam. Laman at ngay tagdungugan sumaful tuwa at foyungan ay gfatvngvd tuwa sat amatanganan. ³² Anway masine sik takamoyung Funbalugu At longan igsaful tuwa te, go balikam, ay go gfatunglus akyap. ³³ Anway tam Funbalugu At ugali bundi kata at yud mafasineunan. At ugali antuwa sik fagmanabayanun. Ay kata tuyi tuwa sas fagayu Funbalugu bale at ngay taw. ³⁴ At ngay mangena agi yap ge longan sis Funbalugu bale. Anway e gsalag way sik mangena nu ge longan way sanya. Ay at ngay mangena faningi tuwa. Ay katanya yangay At-Rirukan at foyungan. ³⁵ Ay sik mangena nu kaumsig nangasaful nus nge wain, intoi yap sat mangama sat bale. Anway mapla way nu sik mangena way tage longan sas Funbalugu bale. ³⁶ Amatangani. Go Funbalugu At longan siginan wa ayu taguna. Ay go Funbalugu At longan nu kadasug sa ayu way fagtvngvd. Ay go igdi. ³⁷ Sik taw nu gamatangan tuwa te, aw wan sik takamoyung. Ay ate aw wan at ke famanyun siginan At-Masine-Fag-Falad. Ka fag taw asafuli nangus sa angku te, ku nariruk sa ayu, Funbalugu wa At longan. ³⁸ Sa sik taw tagamatangan te, kanya bunwa Funbalugu At longan, lag gfaning sa ka fag taw. ³⁹ Ku ngay fadugsay. Nu katanya, aumsigi tuwa nanfamoyungi sasa ngay taw Funbalugu At longan. Ay lag gsalag dewa sik taw ge longan sat fagyudun gsaful fag fanlongan. ⁴⁰ Sas fagayu ay fagbulun fasineuni tuwa ay fanabayanuni tuwa.

¹ Ku ngay fadugsay. Katsi nanfaamatang akyay sa ayu at Masine-Fag-Barita at masuad, ku nafoyung sa ayu ebi. Ay siginan ngay ebi kafandiug wam. Ay anggan katsi kafandiug tuwam. ² Ay inbalabag wam siginan at Masine-Fag-Barita, nu gdi am kaliam at foyungan. Ay nu e masuad tuwa ay fakafandiugun. ³ Anway ebi nafoyung akwa ayu at tiba tungud fag foyungan. Kata yangay ku nadungug te, Fagtayukan At faginkateun, teway e asalanan watam, igfaning At-Rirukan. ⁴ Ay Kanya insandig wan. Ay sis fatuluk menit gdog yay gleleg, igfaning At-Rirukan. ⁵ Ay bandi insure sas Takata-Sik-Batu. Ay anggan sa At-Suguan fag Labi-Duwa. ⁶ Ay bandi insure yay fiya sa tam ngay fadugsay at maful, glabi yay 500k taw. Ay at ngayu gleleg yay. Ay at tiba nkate wan. ⁷ Ay Kanya insure yangay sas Santiagu, ay bandi sas fagayu At-Suguan. ⁸ Ay at fakatabuan, insure yay sa angku. Dewa aw kata at yud infasadan nu kalangfe aw sas fakafandiugun. ⁹ Anway aw at tiba daga akway At-Suguan. Ay aw, ku e fagmasineun sak nanfangayan angku At-Suguan. Anway ebi nafauri aw dawdaw sas Funbalugu bale at ngay taw. ¹⁰ Ay dewa katanya, Funbalugu nafamanyun yay sa angku katsi at bagu fag ugali. Ay Funbalugu At fagnafamanyunun angku e masuad tuwa. Ay nu katanya, e fagmaseganamaun aktuwa glabi yay sa ku iba fagayu. Ay bundi aw mandi at nafaseganama angku. Antuwa Funbalugu At nafamanyun at nafaseganama angku. ¹¹ Anway katanya, dewa aw ay dewa ku iba at nafoyung ayu, nafoyung ami ayu ay kafandiug tuwam. ¹² E nafoyung te, gdog yay e nafaleleg tam Fagtayukan siginan At fagmatianan. Ay taw ro tibak taw sa ayu at fagnalongun te, dua ban e nafaleleg at kinkate. ¹³ Anway nu dway ro gdog nafaleleg at kinkate, laman ro anggan tam Fagtayukan du e nafaleleg. ¹⁴ Ay nu dway ro gdog e nafaleleg tam Fagtayukan, em foyungan sigon du e masuad. Ay anggan ay fakafandiugun du e masuad. ¹⁵ Ay glabi yay kanya. Nu dway ro e nafaleleg at kinkate, ami sik ngay takamuag way ro mi sas Funbalugu baliwa. Ay roro nafatuyan tuwami te, Funbalugu gdog yay nafaleleg tam Fagtayukan. Ay nu dway nangus ro e nafaleleg Anya, at ngay kinkate dua ban gdog gleleg. ¹⁶ Anway nu dway ro e nafaleleg at kinkate, laman ro anggan tam Fagtayukan du e nafaleleg Anya. ¹⁷ Ay nu dway ro gdog e nafaleleg tam Fagtayukan, ay fakafandiugun du e masuad. Ay e asalanan yay am. ¹⁸ Ay anggan at ngay takafandiug at kinkate, dewa kafandiug sas Fagtayukan, kanya sigon maliam yay ban. ¹⁹ Tam fagsegun siginans Fagtayukan nu ste way swa daga fagtvngvd, e fakabaluun yay ban tam, lumabi yay ste swa daga fag ngay taw at fakabaluun. ²⁰ At matuyan, tam Fagtayukan e nafaleleg wa fiya Anya siginan At fagmatianan. Kanya nananguna tuwa nadog gleleg sa at ngay takafandiug at kinkate. ²¹ Ay fakateun indasug ste swa daga siginan sadik taw. Ay katanya yangay at faglelegun siginan at fagmatianan indasug yay fiya ste swa daga siginan yay fiya sadik Taw. ²² Ay fagayu taw inkate, anway fagayu taw siginan ways Karaska. Ay katanya yangay kayu at kinsadi sas Fagtayukan e leleg yangay ban faggugat. ²³ Ay nu e nafaleleg at ngay taw siginan at fagmatianan, nafataban tuwa. Fagtayukan At taguna. Ay at fadogan, Fagtayukan At ngay taw kaduge ban Fagtayukan umdasug. ²⁴ Ay sa bans fakatabuan fag ngay menit umdasug ban. Ay Fagtayukan nanfaliam ban fagayu magurang ay fagayu tagsugu ay fagayu at ke fagmadaragangun, ay dua ban e sawad. Ay bandi Fagtayukan nafon wa sa At Tama, sas Funbalugu, At fagnanmagurangun. ²⁵ Anway Fagtayukan igmagurang yay ban, ay nafat sa yay ban At daga fagmadaragangun at ngay tagfabarangian Anya. ²⁶ Ay at fakatabuan, Fagtayukan At fagfaliamun fakateun at fagmadaragangun, kata nu gfaliam sa sik tagfabarangian Anya. ²⁷ Anway At-Rirukan nalong wa te, Funbalugu nafat sawas Fagtayukan At daga fagmadaragangun fagayu nus nge wain. At masuad at longan te, fagayu nus nge wain, bunwa Funbalugu sigon. Anway Kanya wan At nafat sas Fagtayukan At daga fagmadaragangun fagayu. ²⁸ Ay fagayu nu nafaning wa sa At Baguama, anggan At Baguama igfaning wa sa At nafat sa Anya At daga fagmadaragangun fagayu. Laman Funbalugu yay tagmagurang fagayu. ²⁹ Ay nu dway e nafaleleg at kinkate, tain nu kin ro sik taw at kinsurung sasad safa laman at kinkate unu e fanambagun ban. Anway at kinkate nu dway ban e nafaleleg, dua ban e fanambagun. ³⁰ Ay amatangani sa emi baliwa. Tain ban ami, anway e gafateun wa emi kayu lungud menit, ay at kinkate nu dway ngap ban e nafaleleg. ³¹ Ku ngay fadugsay. At matuyan e gafateun wa fiya angku kayu menit kayu menit. Ku fagnafoyungun sa ayu katanya, anway guseganan aktuwa dawdaw sa ayu. Anway insadi watam sa tam Fun Isus Fagtayukan. ³² Tain ban ku fanambagun ste swa daga dewa aw nafabarangian sik ngay mela sas fulan Efesu, ay at kinkate nu dway ngap e nafaleleg. Nu katanya way, faningi way ngap sat ngay taw ste swa daga at fasadan te, Oni way. Ay inumi way. Anway balabag umkate watam. ³³ Dangai am galukan. Anway katsi maful yay am ay, sat mauri fag ngay taw, anggan ban am, mauri yangay ban am. ³⁴ Fasineuni ay amatanganan sat matuyan. Ay lag gdog asalanan. Anway ay taw at tiba dua nasaful tam Funbalugu At ugali. Ku fagnalongun ayu katanya, laman kapla tuwam. ³⁵ Nu ndain tibak taw minto ban te, Tain ngani nu e nafaleleg tuwa at kinkate. Ay tain ban at bilug. ³⁶ Ay o, at yud way o e fagsafulun fag taw. Nu e natanum sik fungsuan sas daga, dua ban tumugbung nu dway maliam at lukba. ³⁷ Anway am natanum bunya at familugan fiya fiya. Am natanum at butul yay. Dewa sik fare ay dewa nus nge wain. ³⁸ Ay Funbalugu yay ban tagfe bilug at natanum, nus nga setaw wa At fakaumsigun. Sas fagayu at fungsuan umke bilug ban. Kata yangay ebia taw fag fungsuan at natanum at familugan. ³⁹ Ay anggan fagayu tagleleg ste swa daga, dua kata at sadi at faknul. At sadi sik taw at ke faknul. Ay at sadi sik balan at ke faknul. Ay at sadi sik manuk at ke faknul. Ay anggan at sadi sik uyang at ke faknul. ⁴⁰ Ay tagsas banwa fag bilug saman yay ste swa daga fag bilug. Ay tagsas Banwa fag bilug at fagmasineun saman yay ste swa daga fag bilug at fagmasineun. ⁴¹ Ay anggan tam menit at fagmasineun saman tuwa si tam magdanun at fagmasineun. Ay saman yay sasa ngay galeme at fagmasineun. Ay at ngay galeme saman tuwa sa tibak galeme at fagmasineun. ⁴² Ay katanya yangay ban sa at kinkate at bilug nu e nafaleleg. Nu nasandig sik bilug takaruas, at nafaleleg sik bilug tuwa at yud karuas. ⁴³ Nu e nasandig sik mafurat, at nafaleleg sik fagmasineun tuwa. Nu e nasandig at mafanalo, at nafaleleg sik madaragang tuwa. ⁴⁴ Nu e nasandig ste swa daga fag bilug, e nafaleleg yangay sik bilug kata tagsas Banwa. At matuyan, e ste swa daga fag bilug ay et sas Banwa fag bilug. ⁴⁵ Kata At-Rirukan at longan te, At taguna fag taw, Karaska, tagleleg ste swa daga. Ay at fakatabuan fag Karaska sik Tagfon-Leleg tagsas Banwa. ⁴⁶ Roro bunwa tagsas Banwa fag bilug at taguna. Tagste yay swa daga fag bilug at taguna. Ay at fadogan tagsa yangays Banwa fag bilug. ⁴⁷ At taguna fag taw tagste yay swa daga. Ay anggan at bilug anyangay sik daga. Ay At faduwak Taw tagsas Banwa. ⁴⁸ Ay at ngay taw tagste swa daga at ugali, kata yangay at taguna fag taw tagste swa daga at ugali. Ay at ngay taw at ke ugali tagsiginans Banwa, kanya kata yangay Ka fag Taw tagsas Banwa. ⁴⁹ Ebi fagayu tam kata yay tam ka fag taw tagste swa daga. Ay bandi ban kata yangay tam Ka fag Taw tagsas Banwa. ⁵⁰ Ku ngay fadugsay. Katsi nafoyung kua ayu te, at taw ste swa daga at bilug dua maaful sas Funbalugu-Nu-Gmagurang-Taw. Ay at kinruas ban dua maaful sa at yud karuas. ⁵¹ Dungugani. Nanfoyung aw ayu ebi at masuksukan fag fagsafulun. Bundi tam fagayu at kumkate ban. Dewa katanya, fagayu tam e tumubus yay tam bilug. ⁵² Sik kadugayun way sirut, kaduge way sik liplip, ay gina e nabudyung at fakatabuan ginan, e nafabagu wan. Ay gina e nabudyung, e nafaleleg at ngay kinkate at yud ban karuas. Ay anggan ginanya, fagayu tam e fabagu yay ban tam bilug. ⁵³ Anway tam bilug at takaruas umtubus yay at yud karuas. Ay tam bilug at takate umtubus yay at yud kate. ⁵⁴ Anway tam bilug at takaruas nu ntubus wa at yud karuas. Ay tam bilug at takate nu ntubus wa at yud kate. Kaduge niya nu kagurungan At-Rirukan at nalong te, E nababo wan, ay nafamin at fakateun. ⁵⁵ O wan fakateun, dada wan katsi am fanbabo. O wan fakateun, dada wan katsi am fagmadaragangun fangkate. ⁵⁶ Anway fakateun at fagmadaragangun fangkate, kanya wat asalanan. Ay asalanan at fagmadaragangun siginan Ku-Unga At-Longan. ⁵⁷ Guseganan watam sa tam Funbalugu. Anway Kanya nafat si antam at fanbabo anway tam Fun Isus Fagtayukan At fagbulun. ⁵⁸ Ku fakesugun ku ngay fadugsay. Katsi fatvngvdi ay amatanganan. Ay lag fainbalian. Faggugat maseganamai sa tam Fun At fagbulun. Anway nasaful wam ay fagbulun sa tam Fun e fanambagun wa ban fiya.

¹ Katsi nanfoyung aw ayu nu nanfon am salafi sas Funbalugu At ngay taw. Faningi tuwa kata ebi ku longan sasa ngay Funbalugu bale at ngay taw sas talun Galasia. ² Kayu ginan sas fasadik menit sas fafitu am sadi sadik taw, sandigi yap ay fagafonun. Laman gina aw kadasug, bunwa ginanya nu gfaful am, laman mafafulan wan. ³ Ay nu ndasug kwan, falo akwa sas Erusalem nus nga sinu fag taw ay fakaumsigun. Laman nanguba wa ay fagafonun sat ngay takafandiug sanya. Ay anggan taguba ku rirukan sa taguba baliwa, te sinu. ⁴ Ay nu masine yangay ban nu glo aw sanya ginan, ka fag ngay taguba gufud ban angku sas Erusalem. ⁵ Nansibo akyay ban ayu nu nadalan akdi ban sas talun Masedunia. ⁶ Ay nu ndain glugok tuwa ban sirut nut si aw ayu. Ay nu ndain fagngaba tuwak fananum. Laman gina aw ban glo siginan ayu, kaumsig yay ay fanarabangun sa angku, nus nga nday ban nu glo aw. ⁷ Anway kua kaumsig nu nandalan kway sirut ayu. Ku fakaumsigun sik gadugayun tuwa nut sanya aw si ayu, tam Fun nu kaumsig tuwa ban. ⁸ Ay katsi iste akyay sas fulan Efesu yap ngay ndasug tagbiya fag yafun at ngayan Falimak-Safuluk-Menit. ⁹ Anway iste e matvngvd yangay ku fagbulun. Anway ngayu yayk taw takaumsig gdungug sa ku foyungan. Dewa ngayu tagsalag. ¹⁰ Tam Tagseg-Funbalugu nu ndasug ban sa ayu, fatvngvduni anya, laman di kapla gina maful sa ayu. Anway kanya at fagbulun sa tam Fun kata yangay nu gfagbulun aw. ¹¹ Ay nu katanya, dangai am kalimata sa anya. Ay kanya nu glo wan, faloi tuwa anya manabayan anway guli wa sa angku. Ay aw igfanya akway anya nu kadasug gfasfuan tiba tam ngay fadugsay. ¹² Ay matvngvd yangay nu nalong aw sa tam fadugsay Tagfon-Danyu-At-Taw. Laman kanya nanlag yangay ban ayu gfasfuan tiba tam ngay fadugsay. Ay bunya ginanya at fakaumsigun nu glo. Gina yay ban masine fag menit, kanya nu nalo sanya. ¹³ Tagaki. Ay fatvngvdi ay fakafandiugun. Malimuani. Ay maseganamai. ¹⁴ Nus nga setaw ay fagbulun, afanyui tuwa ay iba. ¹⁵ Ku ngay fadugsay, nasaful wam At-Ke-Sangbo fag bale at ngay taw at taguna at kinfandiug sas talun Akaya. Ay ka fag ngay taw maseganama tuwa nu nantarabang sas Funbalugu At ngay taw. ¹⁶ Ay matvngvd nu glong aw sa ayu te, faningi takatanya fag ngay taw, ay anggan sat maseganama fag ngay taw at tagtarabang anya. ¹⁷ Ay guseganan aw anway indasug wa sa angku ka fag tuluk ama, At-Ke-Sangbo, ay Tagbul-Masine-Faggugat, ay anggan Tagsiginans-Akaya. Anway kanya tagungbus ayu nu dway am ste. ¹⁸ Kanya tagfatvngvd ku amatanganan, kata yangay ebi nu gfatvngvd ay amatanganan. Ay nu katanya, famansuliti yangay sa tibak taw ka fag ngay taw at masine fag fagbulun. ¹⁹ At ngay Funbalugu bale at ngay taw sas talun Asia nafadasug sa ayu at fagusegananun te, gamatangan tuwayu. Ay Kata-Sik-Biyo-Mabaludan ay Sik-Fufuina-Sirut, ay anggan at ngay takafandiug at maful si at bale nafadasug yangay at fagusegananun sa ayu anway insadi tuwam sa tam Fun. ²⁰ Ay anggan fagayu tam fadugsay iste nafadasug yangay at fagusegananun te, gamatangan tuwayu. Ay gina am nafablang ay iba, famatuani tuwa anya ay edkesugani tuwa anya. ²¹ Aw wa long Fandak at nariruk tuy ku longan ro te, nafadasug aw ku fagusegananun sa ayu. Ku daluap wa long at nariruk. ²² Nus nga sinu fag taw nu dway kesug tam Fun, umke faurianan ban dawdaw nangus sa anya. Tam Fun, adasugi wan. ²³ Tam Fun Isus At mamanyun nangus sa ayu. ²⁴ Ay kesug aktuwa ayu fagayu, anway insadi tuwam sa tam Fagtayukan Isus. Kin, katanyai tuwa.