Taytùs

¹ À nyàkà mu Bôl ŋwàklù yina. Mu mô wut wù fètana ha Yènfù, fê mô wut wù tum ha Jisòs Klistù. Ghɨ tì chwok tum mu na mu gamti hi nì na bimî ghɨt ghe Yènfù chwokte na yi hi tâ, hi fè nì na ghɨna hi khə lum we a wu mô hamok kum Yènfù. ² Lum wu hamok wûn nè na ghɨna hi chyə khə hamok na Yènfù bè nêlò, ma ghɨna khɨti chyə ye a yi bè mê wi. Chyə mi yîn ni mò ma à tì chwùna a Fùyèn shyəma mbyî yimi, ghàhnà khə na Yènfù lehe wi. ³ Yènfù, Bònhì ghàhnà ti nî na ghɨta khɨli tum yì jùŋ à wûn mi yina kə wu yu afa a wù ndùku khɨŋa, wù jis na mu hi fôktè ha ghɨta. ⁴ Mu nyàkà ha wò a Taytùs. Wò mô kə nâ wan ha mu hamok beka ghàh wò kəta kə yi bimî yì mòk. Yènfù, ghê Bònhì ghàhnà Klistù Jisòs nè chwûtè lò təm a jûŋà ha wò ma wù ni ma wò hi chyə nì yutìnì. ⁵ Mu tì de wò a yi lak yi Kɨ̀lît na wò nê mihi fêt ye a yi tì faŋa afû, ma wò fê chwokti chəhsu a ndâ Fùyènsu nâbi a yìni tèki, kə wu lum afa a mu tì jìsa ha wò. ⁶ Chəh à ndâ Fùyèn kəta hi tè mò wùt, ghɨ ngane wi wûn, kəta kə wùt wù ywên wù mòk. A kəta hi tè mò wut, wana wuna mô ghɨt a bimena, ta wi nì tu, mômà wi gha a ta. ⁷ Wùt wù tihena a ndâ Fùyèn mò wut wù fètana ha Yènfù, a kəta hi tè mò wut, ghɨta ngane wi wûn, wu nê wi gha hi tè yikte à ghɨ̂t, nyâŋhè bâŋhè wijə lâ, nyo chyâhè wijə lùkû, shɨŋa nê wi yi nî gha, se a wuna fwo wi a wu kâ. ⁸ Wu kəta hi tè mò wut tôknè nì ghɨt a benana, fê kôŋà hi tè nè gha a jûŋà. Wu kəta hi tè mò wut khə hi khɨte ngɨŋ à wûn, nê gha ghe a ghɨ mô chilichili, kəta chyəna yulena, kukte ngɨŋ à wûn. ⁹ Wu kəta hi tè mò wut ma wù ti fati khɨti tum yì jùŋ ye a yì mò hamok, a mô à yê a ghɨ yike ha wûn shyəma wù nê hi khə hi yike à ghɨ̂t nì gha ghe a Yènfù khɨŋa, fê tihe ghɨt ghe a ghɨ tunhe yikî mi yîn. ¹⁰ Mu jìsà ni beka ghɨt a dona mò a ghàn a fùtɨ̂n ta nì tu, ywo wi gha, chînà jîsà kə yi jîs, fê lehe à ghɨ̂t. Gha mɨ ghɨ̂n ni tòkà nê ghɨt a Jûs ghe a ghɨ kahe hì jûmtè Klistù. ¹¹ Wò kəta hi nì na kə ghɨna hi fê chînà jîsà ni beka ghɨna yènà a wùt a bɨn, ghɨ bobhi kə à jɨ̀m nì yikî yi be mi yîn. Ghɨna yè nê ni kə hi lehe à ghɨ̂t hi khɨte wu kâ. ¹² Nâ wùt à ghɨt a Kɨ̀lît wù tofana wùlè ti jis na, “Ghɨt a Kɨ̀lît wama nâ a be, chyə̂ kə nâ te nyamsu ghə̀nsù, yolê, yə chyâhè.” ¹³ Wùt mu wunâ ndùku jîsà kə nâ hamok. Yi ni chwùtè na wò kəta hi kàntì ha ghɨna nâ nì jyaka hi tihe ghɨna shyəma ghɨna bimi kə gha ye a yi mô hamok, ¹⁴ fê yute wi màgân mù yîm mù ghɨt a Jûs, fê yute wi jîs yi ghɨ̂tì ma ghɨna ti tunhî hi bime gha ye a yi mô hamok. ¹⁵ A mô a ghɨt ghe a təm a ghɨna yule, shyə a yəna ale wijə a ghɨna mò hi bâm, biyani a mô ha ghɨt ghe a təm a ghɨna yule wi, teka ghɨ bimi ha Klistù, ghɨna kwàktè na nâbi ghə ni mò kə hi tè bâm. Yi mô ni beka təm a ghɨna nì kwâktì tu ghɨna tu mò ma tu ti bêf. ¹⁶ Ghɨna kama chwûtè na ghɨna khəlò Yènfù, biyani chyəna ghɨna chwûtè na ghɨna khə wi. Chyəna ghɨna befâ. Ghɨna ta nì tu ha Yènfù, fê kpene wi hi nè yi gha yi jûŋì yile.

¹ A mô ha wò, Taytùs, wò kəta hi tè yike kə gha ghe a ghɨ mô yi ghəl, a mô yi yikî yi jûŋì ye a yi nê na ghɨta hi chyə a jûŋ. ² Yiki lɨmànà ghɨ ləmanà na, ghɨna hi mô kə a ghɨna yi tof, kpenê shyəma ghɨ hi ngumle ghɨna, khə hi khɨte ngɨŋsu ghɨna su. Ghɨna kəta hi khɨte yi bimî yi ghɨna na yi hi ta, hi tè fate kôŋà ghɨta, fê wunhê. ³ Yiki kəbi ywena ləmanà na ghɨna hi chyə te ghɨt ghe ghɨ ti fo ngɨŋsu ghɨnasu ha Yènfù, jîsà wi gha a be kum ghɨt ale, nyo chyâhè wi lùkû. Ghɨna bɨlà kəta hi tè yike ghɨta nì gha ghe a ghɨ mô chilichili, ⁴ shyəma ywen ghe a ghɨ Kwukte mala ma ghɨna yiki ha ghɨna hi tè kòŋà lɨm a ghɨna fê kôŋà mwəlà. ⁵ Ywena ləmanà mɨ ghɨ̂n ni kəta hi yike à ywên ghe a ghɨ Kwukte mala na ghɨna hi khɨte ngɨŋsu fê yulê a ghɨna sù chyənà, fêtà a ghɨna sù ndâ, tôknè, fê ywo ha lɨm a ghɨna shyəma wùt hi kəta wi gha yi be yile hi jìs kum gha yi Fùyènì kum ghɨna. ⁶ Jìs kəbi ha mwəlà mù tu kpuŋ nâ nì jyaka na ghɨna hi fate khɨte ngɨŋsu ghɨnasu. ⁷ Nâ wò, a wò ngɨŋ, chwuti chwena a jûŋà nâbi a ghə ghe a wò nè. Khɨti yikî ya kə ha yi gha hamok, kə wò lyi hi dûm. ⁸ Wo yike kə yi gha ye a yi nê na ghɨta hi chyə̂ shyəma wùt hi fê kəta wi gha hi jìs kum yini. Wò shìki nî ni, ma bànà sasu wumi beka ghɨna nê fê kəta wi gha hi jìs kum ghàhnà. ⁹ Jìs ha kwôsù na, ghɨna hi ywo ha be ghɨna ghɨ fètà, gûfnà wi gha ghê ghɨna, mômhè nê kə a gha à jɨ̀m na ghɨna hi saŋlê. ¹⁰ Jìs ha kwôs wûn na kə ghɨna hi nyama chwoŋa mwə̀lû ha be ghɨna ghɨ fètà. Ghɨna kəta hi tè bɨlà chwùtì ha be ghɨna ghɨ fètà na ghɨna mò ghɨt a fetana ghɨ jûŋà. Ghɨna shìki tè nì ni, ma ghɨta hi yena na yikî yì Fùyènì, Bònhè ghàhnà, jwòfàlò a gha à jɨ̀m afa ghɨna nè. ¹¹ Yi mô ni beka Yènfù ti chwûtì təm a wuna ghɨ jûŋà ben hi bònhè ghɨt à jɨ̀m. ¹² A mô təm a Fùyènà ghɨ jûŋà mɨ ghɨ̂n a ghɨ yike na ghàhnà hi khɨte ngɨŋsu ghàhnàsu fê chyə̂ chyənà su chilichili wu lum afa Yènfù khɨŋa chîn a mbyî. Yi nê na ghàhnà hi nyɨŋa wi yi bàm yi mwə̀ mù mbyî, nê na kə ghàhnà hi chyə̂ chyənà ye a Yènfù kòŋà wi. ¹³ A mò wu lum afân a ghàhnà kəta hi tè chyə atɨ̂n te ghàhnà yute tuk wu kananu we a Yènfù, Bè jyak à jɨ̀m, a mô Bònhè ghàhnà Jisòs Klistù bè kaha bênà nì jyaka. ¹⁴ Wù ti fo ngɨŋ à wûn te yi fô hi bònhè ghàhnà ha be yì jɨ̀m, hi fè nì na ghàhnà yulè kpena hi tè mò ghɨt a wuna, gbûtè nâ haŋaŋ hi tè nè gha a jûŋà. ¹⁵ Wo yike a gha mɨ ghɨ̂n ha ghɨta, tobhe ghɨna, fê kântè ghɨna nâ nì jyak ghe a wò kəta a ghɨna a tû. Kə wò de na wùt ha ghɨna kehi wò.

¹ Wo yɨ̂ŋtè ha ghɨt gha na kə ghɨna hi ta nì tu ha ghɨt a tihena, nì ghe a ghɨ saka ghɨna; na ghɨna hi ywo, gbùtè hi tè nè a gha a jûŋà yû mù jɨ̀m. ² Jîsà na kə ghɨna hi jîsà a gha a be kum wùt, na ghɨna hi chyə nì yutìnì ghê ghɨt à jɨ̀m, bonê nâbi ha nde, fê fate ngumle hamok. ³ Yi mô ni beka nâbi ghàhnà ndùku boŋa jɨ̂ŋtèlò, ta nì tu, ghɨta lehe ghàhnà, ghàhnà mô wu kwôs a nki a gha a mbye à jɨ̀m nì fom ye a yi mô atɨ̂n. Ghàhnà chyə atɨ̂n à be, ghə̂kà à ghɨ̂t, ghɨta ke ghàhnà, ghɨ befa a ghɨna yi kə̀k, ghàhnà bânà à ghɨ̂t. ⁴ Biyani Yènfù, Bònhì ghàhnà, chwûtì banhi tôknànì nì kôŋì wuni ha ghàhnà, ⁵ bônhì ghàhnà, a bu kum gha yi jûŋì yile te ghàhnà ne. Fu bonhi ghàhnà kum kwohi seni wuni tohne a Yohnà Yulena. Fu ti su təm a ghàhnà, fo chyənà yì fê ha ghàhnà. ⁶ Yènfù ti fô Yohnà Yulena ha ghàhnà tohne a Jisòs Klistù Bònhì ghàhnà. Fu tà tì shihi fô hì ghə̂kà. ⁷ Yènfù tì ni ni shyəma ghàhnà hi mô chilichili, kum təm a wuna ghɨ jûŋà. Ni, ma ghàhnà hi khə hamok na ghàhnà bè kwotelò chyənà yê yì bè mê wi beka ghàhnà mò wana wuna. ⁸ Gha mi yîn a mu jìsà ni mò kə nâ hamok. Mu khɨŋa na wò fate yiki ghɨta kum a gha ghɨ̂n a mu jìsà ni, shyəma ghɨt a bimena hi lêmà təm a ghɨna hi tè fèt kə fêt tù jûŋ tù. A mô fêt mi tɨn a tu gâmtè ghɨt à jɨ̀m. ⁹ Kə wò lye a gùfna, yi kəta wi tofu, hi taŋa kwok nì yet a be ghàhnà ghɨ shyə. Kə wò lyi yi njâŋ nì nô kum yi sâk. Gha mɨ ghɨ̂n mò a gha ngwòna gâmtè wi wùt yi gha yile. ¹⁰ Wùt ki bên nì jyàhì mɨ ghɨ̂n, wò kɨ̂n ha wûn hi tàn a ghan à bà, wù faŋ hi kwunâ, wo delò hi fê kəta wi gha yile hi nì nì wûn. ¹¹ Wò khə na nki yi wût mu wûn hì mô, kwâktì yi wuni bu chilichili, gha wuna ghɨ be chwûtè kə nâ na wù mò wut wù be. ¹² Mu ki faŋ hi tum a Atemàs ha wò, ma mu tum Tìkikùs. Wù ben nâbi wùni yu, wo mômhì hi bèn hi yen a mu a Nìkobolìs beka mu ti lem na mu nè faŋa kə afû mbɨ̀ŋ, hi tàn shyəma lɨ̀m ban. ¹³ Senàs a mô wut yì sâk nê shihi lò ghê Àbolòs, wo gâmtì hi fo nâbi ghə a ghɨna khɨŋa hi lò nì ghɨna. ¹⁴ Ghɨt a bimena kəta hi yikî hi tè nè gha a jûŋà, kəta mwə̀lû, gàmtè ghɨta atɨ̂n. Kə ghɨna hi fêtà fêt tu yimtu. ¹⁵ Ghɨt ghe a ghàh à ghɨna mò amok nâ à jɨ̀m jis na mu toŋti ha wò. Toŋti sun sahisu afâ, a mô ghɨt a bimena. Yènfù chwuti təm ghɨ jûŋà kə ha ghàn à jɨ̀m.