Lumàns

¹ À nyak mu Bôl ŋwàklù yina. Mu mô wut wù fètana ha Jisòs Klistù ma à chwok Fùyèn mu ha wut wù tum, lem na mu hi fôktè tum yì jùŋ à wûn. ² Tum yì jùŋ mi yina ni mò ma Yènfù tì chwûnà hi tum nâ wu yu dâ, jis fòktì su chik su wunsu nyak chwùna tɨnu a ŋwàklù Fùyèn. ³ Tum yì jùŋ mi yìna jìsà kum Wâ Fùyèn, Bâba ghàhnà Jisòs Klistù. Wù tì shihi bèn a mbyî ha wût, ghɨ bwɨ wun a Defìt yi sah yi nda. ⁴ Yènfù tî lôhì Bâba ghàhnà Jisòs Klistù mu wuna a yi kpû wu lum wu kananu nì jyak a Yòhnà Yulena chwûtì na wù mò kə nâ Wâ Fùyèn. ⁵ Yènfù khɨti təm a jûŋà ha mu lem mu ha wut à tum na mu hi gbê fôktè tum yì jùŋ kokhe Klistù shyəma ghɨta yu ma ghɨ bimi kə tu lak tù jɨ̀m, fu ni ni tohne a Jisòs Klistù. ⁶ Ghɨ ti boŋ toŋa kəbi ghàn ghe ghàn mò a Lûm na ghàn fwo ben ma ghɨ hi mô à ghɨ̂t ha Jisòs Klistù. ⁷ Mu nyak ŋwàklù yìna ha ghàn ghɨt a kòŋà a Fùyèn ghe a ghɨ chyə a yi tèk yi Lûm nâ à jɨ̀m. Yènfù ti toŋa fihe ghàn na ghàn hi mô ghɨt a wuna. Yènfù, Bì ha ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn. ⁸ Mu lyè luk wu shyə, fo àyòŋnà ha Yènfù a mu kokhe tohne a Jisòs Klistù te ghɨta jìsà kum yi bimî yani kə mbyî yì jɨ̀m. ⁹ Mu jə̂mà ha ghàn kə yû mù jɨ̀m, nâ Yèn fe a mu fètà ha funfu kə nì təm a ma à jɨ̀m, fôktè tum yì jùŋ kum Wâ wûn khəlò. ¹⁰ Mu jə̂mà na lumu nê gan, a mô kôŋì Fùyènì na mu ni nâbi yàni, ma mu bê jikti ghàn. ¹¹ Mu jə̂mà ni beka mu kòŋà nâ haŋaŋ hi bèn hi yen a ghàn, hi jìs kum yutì ye a Yènfù fo ha ghɨta nì Yohnà a wuna. Mu bênà hi jìs ni shyəma ghàn hi tòkà tâ a yòhnà. ¹² Gha ye a mu jìsà mò na mu bènàlò, ma ghàhnà à jɨ̀m chinti. Mu bênà, ma mu shihi lùmhè ghàn a ghàn a yi bimî, ma ghàn boŋà lumhi mu atɨ̂n à yami. ¹³ Mu khɨŋa na ghàn hi khə a wana noma na mu ti baktî hi bèn ha ghàn nâ ghan hidù, biyani bakte kəbi yini, gha yile ben yi tâhìlò. Mu khɨŋa hi bèn hi yike ghɨta na ghɨ hi jûmtè Jisòs kəbi yi ghəl te mu tì yike tum wule. ¹⁴ Mu mò wùt wù fètana ha Yènfù, kəta wi gha mi yi ngɨŋi. Mu kəta hi tè fòktì tum yì jùŋ ha ghɨt ghe a ghɨ fate chyə nì ghê a ghɨ chînà chyə. Mu fètà ha ghɨt ghe a ghɨ yena na à mò ghɨt a tofana, fêtà kəbi ha ngwònu. ¹⁵ A ni gha ye a mu kòŋà nâ haŋaŋ hi boŋa fòktè tum yì jùŋ ha ghàn ghe a ghàn chyə a Lûm. ¹⁶ Mu jala kum tum yì jùŋ mi yìna te yì chwùtè jyak ghe a Yènfù bònhè ghɨt a bimena atɨ̂n nâ à jɨ̀m. Fu bônhè ghɨt a bimena, yîmè nì ghɨt a Jûs, a kûmtè a wu tûm. ¹⁷ Tum yì jùŋ ni chwùtè banhe lum we a Yènfù lyè ghɨta ha ghɨt a chilichili atɨ̂n, fu nê ni tohne kə yi bimî yi ghàhnà, gha yile fê bakhe wi atɨ̂n, kə yi ghəl te ghɨ nyàka a ŋwàklù Fùyèn na, “Ghɨt ghe a ghɨ mô chilichili kum yi bimî yi ghɨna bè khɨtelò chyənà ye a yì bè mê wi.” ¹⁸ Yènfù ti chwûtì lâ wunu baŋanu ha ghɨt ghe ghɨ chyə a chyə̂, khə wi wûn, nê yê kə nì be, be mi yìna tâmtè na kə ghɨta hi khə gha ye a yi mô hamok kum Fùyèn. ¹⁹ Yènfù bâŋhè wu lâ ha ghɨna beka fu ti chwûtì nâ gha à jɨ̀m ghe a ghɨna kəta hi tè khə kum funfu kə a ndan. ²⁰ Ghɨta hì mô ma ghɨ ti yen na Yènfù mò kə nâ Fùyèn hi yìmì wu tuk afa wù tì fate mbyî. Ghɨna ti yen na jyak a Fùyènà bè mê wi. Ghɨ̂n mò a gha ghɨ yena wi nì se, biyani khə kum mwə̀ me a fu tì fate. À ni mò gha ye a wùt bè jìsà wi hi yə sak na wù ndùku khə wi gha kum Fùyèn. ²¹ Ghɨna khəlò Yènfù, biyani kokhe wi wun te ghɨ kəta hi tè kokhî, fo nâbi wi yòŋnà ha wun. Kwâktì tu ghɨna tu mô kə kwâktì tu ngwo tu, ghɨna fê kwâktè wi gha chilichili, yɨŋa kə yi yɨŋâ. ²² Ghɨna kwàktè kə na ghɨna tofalò biyani ma ghɨna ti kahi a wu ngwò. ²³ Ghɨna ti lyi kokhî ye a ghɨ kəta hi tè kokhe Fùyèn a fu faŋa hamok hì bɨlà fo ha mosòmù ma ghɨ fate nì wo, mu fune à ghɨ̂t, bu hi bè faŋ; fune nyɨ̀mû nì nyamsu nì mwə̀ mù ŋàŋlemù. ²⁴ A ni mò gha ye a yi ne na Yènfù khɨna ghɨna a ghɨna tɨ̂n à tù kwàktì tu betu, ghɨna hì nê a gha a wumena a ghɨna sù ngɨŋ, bobhe wu wun wu ghɨna. ²⁵ Ghɨna ti bimi fəmi bɨlì tunhi gha ye a yi mô hamok kum Yènfù, hì kokhe yèn mù yì fə̂m. Ghɨna ti de Yèn fe a fu mô hamok hì bɨlà kokhe fê ngumle mwə̀lû ma à fati Fùyèn biyani kokhe wi Yèn fe a fu fate mwə̀ mù tɨ̂n, a mô fùfɨ̂n fe a ghɨ kəta hi tè kokhî hi bè tàn nâbi yini! Àmèn. ²⁶ A ni gha ye a yi ne na Yènfù khɨnà de ghɨna atɨ̂n à gha a wumena mɨ ghɨ̂n a ghɨna kòŋà hi tè nì ni. Ywena ghɨna ti kahi hi chyə̂ nì ghɨ le, yi kəta wi hi tè mò ni. ²⁷ Lɨmànà ghɨna ti boŋ de hi tè chyə nì ywena ghɨna, yi foma yê kə na ghɨna kahà hi bɨlà chyə nì lɨmànà ale, a mô yi ghâ, wume nâ a be. Ghɨna ti ni kə gha a wumena ni kwoti maktu ghɨna wu be. ²⁸ Ghɨna ti tunhî hi bime Yènfù, fu ti de ghɨna a ghɨna tɨ̂n à tù kwàktì tu ngwo tu, ghɨna ghɨ hì chînà chyə kə yi chyə̂, nê a gha ghɨ kpene wi hi tè nì. ²⁹ Ghɨna nê nki tu gha tu betu kə tù jɨ̀m. Ghɨna chyə kə a be, kəta a se a fwona nì təm a be, ghə̂kà ghɨta nâ haŋaŋ. Ghɨna ywelò, nô, lehe ghɨta, kəta kwâktì yi be, lêmà kowòŋ, ³⁰ jîsà a gha a be kum ghɨta, bânà Fùyèn, yikte ghɨta, ghaŋhe wu wun, jîsà yi jîs yi ghaŋheni wùni, khɨŋa kə wu lum hi tè nè be, ywo wi ha be ghɨna. ³¹ Ghɨna jìŋtèlò, fo chwùna tu fəm tu, kôŋà wi ghɨta, kwohe wi seni ha wùt. ³² Ghɨna ni nè gha mɨ ghɨ̂n, fê tôkà ghɨt ale ghe a ghɨ nê gha atɨna nâbi te ghɨna khə sak yi Fùyènì ye a yi jîsà na ghɨt ghe a ghɨ chyə wu lum afân ni kəta hi kpû.

¹ Wò wi hi tè saka wut wùlè makə a mò wò nde, beka wò nè kəbi gha ghe a ghɨt mɨ ghɨ̂n nè. Wò saka ghɨta, jîsà nâbi na ghə, yi kaha kwo kə wò, wo bu hi fwo atɨ̂n. ² Ghàhnà khə na Yènfù saka lò ghɨt ghe a ghɨ nê gha mɨ ghɨ̂n, jîsà nâbi na ghə, yi mô kə hamok. ³ Ghàn boŋa kwàktè na ghə? Na wò te wut shìki tè sak ghɨta a gha, nê kəbi ghɨna, ma wò bê tet na kə Yènfù boŋà sak wò agha? ⁴ Yi ni mò na wò lyè wi tôknà yi kanani yi Fùyènì nì wunhî yi wuni, nì jùŋ ye a fu nê ha wò ha yi gha ma? Ba wò khəlò na Yènfù tòknà ni, khɨŋa na wò kahi təm ya a be? ⁵ Wo bɨlà nê na lâ Fùyènù hi bâŋà yê kə ashyə̂ beka wò chile, ma wò ti ta nì to kôŋà wi hi kwunâ. Yènfù bè chwùtè lò na fu ti bâŋhì lâ ha wò a wun wu tuk wu saku ma wù sak wò kə nâ chilichili. ⁶ Fu bè folò nâbi maktu nde kə a wun a yì fèt. ⁷ Yènfù bè folò chyənà ye a yì be mê wi ha ghɨt ghe a ghɨ wunhe atɨ̂n à yì fèt yi jûŋì, khɨŋa kə na fu fo ghaki ha ghɨna nì yet yi jûŋì. Ghɨt atɨna ke yê kə hi bè khɨte chyənà mi yìna. ⁸ Fu bè saka lò ghɨt ghe a ghɨ khə kə gha yi ghɨna yi ngɨŋi, ywo wi gha ye a yi mô hamok biyani kôŋà kə yi fə̂m. Fu bè saka ghɨna hi chwùtì lâ wunu baŋanu ha ghɨna. ⁹ Nâbi nde te wù nè be bè yenalò ngə̂k yi bəma kə ni ma wù fê yu lùmchuŋ. Ngə̂k àtɨ̂n bè yîmè kə ha ghɨt a Jûs ashyə̂ a kûmtè wu tûm. ¹⁰ Yènfù bè nê ha ghɨna ni biyani ma wù fo ghaki nì kokhînì nì yutìnì nâbi ha nde we a wù chyə chyənà yì jùŋ, yîmè nì ghɨt a Jûs, a kûmtè wu tûm. ¹¹ Yi mô ni beka Yènfù saka ghɨt à jɨ̀m kə yi ghəl, ke wi luk we ghɨna fwo atɨ̂n. ¹² Ghɨ bè saka bobhilò tum we a wu nê be nâ wù jɨ̀m kə nâ kum besu ghɨna su nâbi te ghɨna khə wi Sak yi Musìs, ma wù yen ha ghɨt a Jûs ma wù sak à bobhi ghɨna nâ à jɨ̀m beka ghɨna nè be, khə sak mi yîn. ¹³ Yi mô ni beka à wijə ghɨt ghe ghɨ ywo Saki a ghɨ mô chilichili a Yènfù ashyə̂. Wò kəta hi tè khə yi Sak, nê te yi jîsà, shyəma wò hi mô chilichili a Yènfù ashyə̂. ¹⁴ Tumu jifa nê yi gha ye a Saki khɨŋa, yi hi chwûtè na ghɨna hì khəlò gha ye ghɨ kəta hi tè nì, nâbi te ghɨna khə wi Saki. ¹⁵ Ghɨna nè ni, yi hi chwûtè na Yènfù ti nyak gha ye a Saki khɨŋa a ghɨna təm. Kwâktì tu ghɨna tu mô kəbi yâ, à ben a yu mùlè tu hi tòkà ghɨna, a ben a yu mùlè tu hi ngane ghɨna. ¹⁶ Tuku bènàlò shyəma Yènfù jis ma Klistù Jisòs sak nâ a gha a letena à jɨ̀m ghe a ghɨ mô a ghɨta a tu kwàktì, kə yi ghəl te ghɨ tì nyàka a tum yì jùŋ afa a mu fòktè. ¹⁷ Ghàn ghɨt a Jûs ni jala jîsà na ghàn yikte kə yi Sak, ghàn à Yènfù mô a jûŋ. ¹⁸ Ghàn jîsà na ghàn khəlò gha ye a Yènfù khɨŋa, khə yê a yi mô chilichili nì ye a yi bu chilichili beka ghàn yike a Yènfù yi sak hì khə yì yîn. ¹⁹ Ba ghàn khəlò na ghàn chwùtè lumu ha fèfù fê chwûtè yi bân ha ghɨt ghe ghɨ chyə a bɨn a finana, ²⁰ na ghàn tihe ngwònu, mô sù chichà ha mwəlà beka ghàn khə nâbi ghə ghe Saki jìsà fê khə nâbi ghə ghe a ghɨ mô hamok? ²¹ Ghàn ni mò na ghàn yike ghɨta, boŋa yike wi ngɨŋ sanisu ma? Ghàn yike ghɨta na kə ghɨ hi chwoŋâ, boŋa chwoŋâ ma? ²² Ghàn yike na kə wut chyə nì ywê wùt makə ghê lɨm à wùt, nâ ghàn chyə ma? Ghàn jîsà na kə ghɨta hi kokhe mosòmù biyani chwoŋa mwə̀lû a ndâ su tɨnsu. ²³ Ghàn ghaŋhe chyâ nì wunu na ghàn khəlò sak yi Fùyènì biyani wumhe Fùyèn beka ghàn khɨmalò sak yi tɨni. ²⁴ A ni mò gha ye ghɨ nyaka a ŋwàklù Fùyèn na, “Tumu jìsà a gha a be kum Fùyèn, a nê ghàn ghɨt a Jûs, beka ghàn chyə wi te Sak yani khɨŋa.” ²⁵ Ghàn khəlò na hi se nam a wûtà ni chwùtè gha kə wu yu afa wùt àtɨ̂n lèmà Saki biyani ma wùt ki khɨm yi Sâk, ma yi hi kə̂kà kəbi te ghɨ tà se jə nam a wuna. ²⁶ Yi chwûtè na wùt shìki ywo yi sâk teka ghɨ se nâbi nam a wuna, ma yi hi chwûtè kə na ghɨ ti sê. ²⁷ Wùt à tûm shìki mô teka ghɨ se nam a wuna kə nâ nì wo biyani wu ywo yi sâk, ma wù bê sak à bobhi ghàn ghe a ghɨ ti sê, wùlè fî nyak fo yi Sak ha ghàn, biyani ghàn hi ywo wi. ²⁸ Yi ni chwùtè na kàntè wùt à Jûs a Yènfù ashyə̂ wijə kə kum yi bwɨ̂, yi se nami wijə kə a jyà wùn. ²⁹ Kàntè wùt à Jûs a Yènfù ashyə̂ ni chwùtè a wun a chyənà. Hi se nam hamok yi chwùtè lumu a wùt à təm, a mô yi fêt yi Yòhnà, a bu yi sak ye a ghɨ nyaka. Kàntè wùt à Jûs wùna mô, a bəmhe Fùyèn wûn, a bəmhe wi ghɨta.

¹ A ni jis na mbì yìlè làhi tè mò hi tè mò wùt à Jûs agha? Ghɨ se nam a wûtà, ma mbì atɨ̂n hi mô nâ ghə chyâ hi tè mô wut à tum agha? ² Mbì mô kə nâ hi tè mò wùt à Jûs kə tu lum hidù. Gha yi shyə mô na Yènfù tî fo gha yi wuni ha ghɨt a Jûs. ³ Biyani yi ni mò yàni ha ghɨt a Jûs ale ghe a ghɨ faŋa hi bime agha? Yi mô na Yènfù lèmà wi chwùna wunu ha ghɨna ma? ⁴ Yi wi hi tè mò ni! Yènfù yè jîsà kə hamok nâbi wu yu afa ghɨta chìnte kə mbyî yì jɨ̀m hi wama yi fə̂m, kə yi ghəl te ghɨ nyàka a ŋwàklù Fùyèn na: “Gha yi Fùyènì yè mô kə hamok, Yènfù yê saka yə kə yi yə̂ sak à wûn ghê ghɨta.” ⁵ Ghɨt ale làhi jìs na chyənà ghàhnà yì be ni bɨlà gâmtè kə hi nì na ghɨta hi tôkà yena lumtu chilichili tu Fùyèn tù. Yi shìki tè mò ni, ma yi hi chwùtè na Yènfù nè wi a jûŋ te fu bâŋhè lâ ha ghàhnà ma? Wùt à mùsòŋ làhi tè kwàktè yê kə a wu lûm afân. ⁶ Biyani, yi wi hi tè mò ni nâ hakoh! Yènfù shìki bu chilichili, ma fu bê sak yàni ghɨta a mbyî? ⁷ Wùt lè làhi buf na, “Chyənà mì yì fə̂m shìki tè chwûtè banhi lumtu chilichili tu Yènfù, nê na ghɨ hi kokhe funfu, fu hi fê khɨte yàni mu ha gha a be?” ⁸ Ghɨt mɨ ghɨ̂n ki jîs ni, ma yi hi chwûtè na ghɨna jìsà na yi jwôfàlò na ghàhnà hi nê kə gha a be shyəma jùŋ hi fwo atɨ̂n. Ghɨt ale bobhi yet ghaha jîsà na a mò gha ghe a ghàh gbè yike. Ghɨna hi khə na Yènfù kəta kə hi bè sak hi bobhi ghɨna. ⁹ Ghɨ ni mò hi jìs à gòkhì na ghə, na ghàhnà ghɨt a Jûs chyàlò ghɨt ale ma? Yi wijə ni nâ hakoh. Yi mô kə te mu hì mô ma mu ti chwûtì banhi na ghɨt a Jûs nì tumu chìntè mô ghɨt a gha a be à jɨ̀m. ¹⁰ Yi ni mò kəbi yi ghəl te ghɨ nyaka a ŋwàklù Fùyèn na: “Nâ wùt wù mòk wijə chilichili. ¹¹ Nâ wùt wù mòk wijə a wù chwùtè na yi ti yu khɨle gha Fùyènì, nâ wùt wù mòk khɨŋa wi hi tè khə wûn. ¹² Ghɨta ti mana Yènfù kə à jɨ̀m. Ghɨna ti jah nâ à jɨ̀m; wùt wijə a wù mòk à wù nè gha yi jûŋì nâbi wù mòk. ¹³ Jwo a ghɨna lìmà kə te yi sî a wu yu afa ghɨ faŋa hi chîn. Jwo a ghɨna mô ma ghɨ ti lun nì gha fəma. Jîs yi ghɨna kəta lef, yi ywê kə te yi soŋ yi ywô ¹⁴ A lun kə sù ndi, nì jîs yi be a ghɨna yi jwô. ¹⁵ Ghɨna lûmà hi ywe a wût. ¹⁶ Ghɨna chyâ nâbi afa, ghɨ bobhi yi ghâ, nê na ghɨta hi yena ngə̂k. ¹⁷ Ghɨna tà timi hì mômhè hi nì na ghɨta hi chyə nì yutìnì. ¹⁸ Ghɨna fànà wi Yènfù nâ hakoh.” ¹⁹ Ghàhnà khə na nâbi ghə ghe a ghɨ nyaka a Yènfù yi Sak mò ha ghɨt a ghe a ghɨ chyə yi dèt yi sak. Ghàn hi mô a wu lum afân shyəma nâ wùt wù mòk hi fê kəta wi gha yile hi jìs. Yènfù ti baŋ kə jwo a ghɨt à jɨ̀m. Fu bè saka kə ghɨt à jɨ̀m a mbyî. ²⁰ Yi ni chwùtè na Yènfù bè jîsà wi na wùt mò chilichili beka wù lèmà Saki. Saki gàmtè kə hi nì na ghàhnà hi khə gha ye a be mò yini. ²¹ Yènfù hì mô ma fu ti chwûtì lum we a fu lyê ghɨta ha ghɨt a chilichili atɨ̂n, wu kəta wi gha hi nì nì saki. Ŋwàklù su Sak se Musìs tì nyàka nì su fòkti su chiksu tì chîntì chwûtì kə lum mu wûn. ²² Yènfù ni lyè nâbi nde ha wùt à chilichili tohne kə a wun a yi bimî ha Jisòs Klistù, hanɨ̂ŋ fê bu ha wùt wùlè, ²³ Beka ghɨt à jɨ̀m hì mô ma ghɨ ti ni be, ban yi Fùyènì fê bu ha ghɨna. ²⁴ Biyani Yènfù kəta təm a jûŋà lyê ghɨt ha ghɨt a chilichili tohne yi fèt yi Klistù Jisòs te wù ne hi bònhè ghɨna. ²⁵ Yènfù tì fo wun na wù bê kpu shyəma luŋ mù wûn ni ma fu lèhèfo besu ghɨ̂t sù tohne a ghɨna yi bimî. Yìna ni mò hi chwûtè lum wu Fùyènù chilichili. Fu tà tì fo jə ngə̂k ha ghɨta ha ashyə̂ kum besu ghɨna su. Fu tî wunhî wu tuk afû, ²⁶ biyani hì chwûtè chîn na fu mô chilichili, lyê nâbi nde we a wù bime ha Jisòs ha a wùt à chilichili. ²⁷ Yi ni chwùtè na wùt mò hi fè ghaŋhe wu wun chin kum ghə? Ghaŋhi wùni fè kəta wi luku. Yi ni fè kəta wi luku yàni agha? Yi fè kəta wi luku beka wùt tà bon jə kum yi fêt yi wuni. Wù bon kə kum yi bimî. ²⁸ Ghàhnà khə hamok na wùt mò chilichili a Yènfù ashyə̂ kə kum yi bimî yi wuni ha Klistù, a bu kum te wù lèmà Saki. ²⁹ Yènfù mò Fùyèn ha ghɨt a Jûs, mô kəbi Fùyèn ha tumu. ³⁰ Fu mô kə fù mòk, a lyê kə wun wùt ha wùt à chilichili makə a mô wùt à Jûs, makə a mò wu tûm. Fu nê ni tohne kə yi bimî afa a ghɨta kəta ha Klistù. ³¹ Yi chwùtè wi na ghàhnà maka Saki chin kum yi bimî yi ghàhnà. Ghàhnà ni bɨlà kəta hi fate khɨte Saki chin te ghàhnà bime.

¹ Ghàhnà mò hi jìs na ghə chîn kum Ablàhâm bè à ghàhnà agha? ² À ndùku mô na Yènfù lyi Ablàhâm ha wùt à chilichili kum yi fêt te wù ne, ma wù hi kəta lumu hi kùn à ngàŋtù atɨ̂n. Biyani wù wi hi tè kùn à ngàŋtù a yi gha yile a Yènfù ashyə̂. ³ Ghɨ nyak a ŋwàklù Fùyèn na, “Ablàhâm ti bimi ha Yènfù, fu lyi wun ha wùt à chilichili.” ⁴ Wùt nè yi fêt, ghɨ lak wun nì shyə, yi chwûtè wi na ghɨ fo yi fô shyə atɨna ha wûn. A mô a shyə te wù fèta, ghɨ hi kəta hi làk à wûn. ⁵ À nè Fùyèn na ghɨt a be hi mô chilichili. Yènfù yênà ha wùt we a wù faŋa hi nè yi fêt biyani ma wù ti bimî gha ye a fu ne ha wûn, fu lyi wûn ha a wùt à chilichili kum yi bimî yi wuni. ⁶ Defìt tì jis kəbi gha mi yîn te wù tì jìsa kum bônhì ye a Yènfù fo ha wùt wu yu afa fu lye wûn ha a wùt à chilichili teka wù fet shyə ale. Wù tî jis na: ⁷ “Jùŋ mò ha wùt we Yènfù lèhefo besu wunsu su chyâkhì njahtu wun tu. ⁸ Jùŋ mô ha wùt we a Bâba taŋa wi besu wunsu.” ⁹ Jùŋ mi yìna, Defìt ndùku jîsà wi kə ha ghɨt a Jûs, yì mò kəbi ha tumu. Yi mô kə yi ghəl te ghɨ nyaka a ŋwàklù Fùyèn na, “Ablàhâm ti bimi Yènfù, fu lyi wun ha wùt à chilichili.” ¹⁰ Ghɨ tì lyi wûn ha a wùt à chilichili a wùni tuku? Ghɨ tì shihi lyè wûn yâ ma ghɨ ti se nam a wuna ma, ma ghɨ ndùku baha mô teka ghɨ se agha? Yènfù tì lyi wûn ha wùt à chilichili, teka ghɨ se nam a wuna. ¹¹ Ghɨ tì se nam a wuna kə ha chwena hi chwùtì na Yènfù ti lyi wûn ha wùt à chilichili. Fu lyi wun ha wùt à chilichili kum yi bimî ye a wu ndùku kəta. Yi gan ni shyəma wù hi mô bì ha ghɨt ghe a ghɨ bime, ma Yènfù boŋà lyi ghɨna ha ghɨt a chilichili kum yi bimî yi ghɨna teka ghɨ se nam a ghɨna. ¹² Wu mô kəbi bì ha ghɨt ghe a ghɨ tì se nam a ghɨna, a bu kə kum te ghɨ se nam a ghɨna biyani beka ghɨna bime gha ye a Yènfù tì chwùne, kə yi ghəl te bè ghàhnà Ablàhâm tì bime shyəma ghɨ se ghɨ wuna. ¹³ Yènfù tî chwûnà ha Ablàhâm ghê sah yi wuni yi nda na yi bè folò mbyî ha ghɨna, a bu beka ghɨna ndùku ywo Saki. À ndùku mô beka wù bime ha Yènfù, fu lyi wûn ha wùt à chilichili. ¹⁴ Yènfù hì mô hi fo shyə ghe a fu chwune ha ghɨt ghe a ghɨ ywo Saki, ma yi hi chwûtè na bimînì kəta wi gha hi nì, chwunu wu Fùyènù boŋa kəta wi luku. ¹⁵ Yi mô ni beka Saki nè kə na Yènfù hi bâŋhè lâ ha ghɨta beka ghɨna khɨma sak yi tɨni, ma saki hì bu, ma wùt tè khɨ̂m. ¹⁶ Yi ni chwùtè na chwuna mu wûn mò kum yi bimî. Yènfù fo chwuna mu wûn kə ha ghɨt a Ablàhâm yi sah yi nda à jɨ̀m beka təm a jûŋà ghe a fu kəta. Fu tà fo jə kə ha ghɨt ghe a ghɨ lêmà Saki. Fu fo kəbi ha tum we a ghɨ kəta bimînì kəbi te Ablàhâm beka Ablàhâm ndùku mô bì kə ha ghàhnà à jɨ̀m. ¹⁷ Yi mô kə yi ghəl te ghɨ nyaka a ŋwàklù Fùyèn wu lùk afa a fu tì jìsa ya ha Ablàhâm na, “Mu ti lem wò ha bì a tu lak, tu dô kə ni.” Yèn fe a Ablàhâm tì bime tì lem wûn ha bì ha ghàhnà. Fu ti ni na ghɨt a kputena kahè hi chyə̂. Fu tî jîs kə nì jwo na mwə̀lû hi mô, mù hì mô ma mù ndùku wi. ¹⁸ Ablàhâm ti bimi ha Yènfù hì chyə kə a wun a to yi bimî nâbi te yi ndùku kə̂kà ha ghɨta na gha ye a wu ndùku ke yênà yini bè kpene wi. Wù ndùku mò kə wun a tô yi bimî bê hi mô bì ha ghɨta a tu lak nâ hidù kə yi ghəl te ghɨ tì chwùne ha wûn jis na, “Ghɨta a wo yi sah yi nda bè hì dô kə ni.” ¹⁹ Wù tà tì bot jə̂ a wun a yi bimî nâbi te wu ndùku hì mô ma wù ti jûn hì kwoka yênà lɨ̂m wu wə, kəta wi jyaka, ywê wûn Sèla bwə wi. ²⁰ Wù tà tì neklì jə̂ a wun a tô yi bimî, be faŋ hì kwâktè gha kum chwuna wu Fùyènù. Wù hì bɨlà ləma yênà kə ashyə̂ a wun a yi bimî, kokhe Fùyèn. ²¹ Wu hì fate khə kə nâ hamok na Yènfù kətalò jyaka hi nè gha ye a fu tì chwùne. ²² A ni gha ye a yi tì ne, Yènfù lyi wun ha wùt à chilichili. ²³ Gha mi yina a ghɨ nyaka kum Ablàhâm na, “Fu tì lyi wûn ha a wùt à chilichili,” ghɨ tà nyak jə kə ha wûn. ²⁴ Ghɨ tì boŋ nyak kəbi ha ghàhnà ghe a ghɨ bime Yènfù a fu tì lohi Bâba ghàhnà Jisòs a yi kpû. ²⁵ Yènfù tî fo wûn na ghɨ ywi kum besu ghàhnà sù, kahi lôhì wûn a yi kpû hi nì na ghàhnà hi mô chilichili a wun ashyə̂.

¹ Te Yènfù ti lyi ghàhnà ha ghɨt a chilichili kum yi bimî yi ghàhnà, ghàhnà nì wûn hì chyə kə nâ nì yutìnì chîn atɨ̂n à jyak afa a Bâba ghàhnà Jisòs Klistù fo. ² À ni wûn na ghàhnà khɨti təm a jûŋà nì Yènfù kum yi bimî yi ghàhnà. Ghàhnà mò kə a tô təm a jûŋà mɨ ghɨ̂n fê jala khə hamok na Yènfù bè boŋa folò ghàhnà nì ban ye a fu kəta. ³ Ghàhnà saŋle atɨ̂n à ngə̂k afa a ghàhnà yena beka ghàhnà khə na wùt shìki yen a ngə̂k, wu khɨli hi tè wunhî. ⁴ Wunhînì nê na ghàhnà ghəkna, ma ghəknâ tɨni gamti ghàhnà ma ghɨ hi ke yênà kə ashyə̂, khə hamok na ghɨ bè kwotelò shyə ghe a ghɨ khɨŋa. ⁵ Ghàhnà wi hi bè gha a shyə ghe a ghɨ ke yênà nì ghɨna ni beka Yènfù ti fo Yohnà Yulena, ghe ghɨ chwûtè kôŋ yi wuni ha ghàhnà. ⁶ Ghàn khə na à ndùku mô te ghàhnà baha nê gha a be, lumu gha yile fê bana wi ha ghàhnà, Klistù ben kpu hi bònhè ghàhnà. Wù tì ben kə wu yu afa a Yènfù tì lèma. ⁷ Yi ta nâ haŋaŋ shyəma wùt bimi hi kpu nâbi wu lùk wu wùt à chilichili nâbi te à mò kə wu lùk wu wùt wù jùŋ te wùt làhi kòŋ hi kpû. ⁸ Biyani Yènfù chwûtì banhi kôŋ yi wuni ha ghàhnà a wu lum na à ndùku mô te ghàhnà baha mô kə nâ ghɨt a gha a be, Klistù ben kpu hi bònhè ghàhnà. ⁹ Chin te luŋ mù wûn ti nî ghàhnà na ghɨ hi mô chilichili a Yènfù ashyə̂, yi ni chwùtè na wù bè bònhè lò ghàhnà a ngək afa a Yènfù ndùku mô hi bè fo ha ghàhnà. ¹⁰ Yi mô ni beka a ndùku mô te ghàhnà baha mô bànàsu Fùyènsu, Wâ Fùyèn ben kpu hi nì na ghàhnà nì wûn kahà bakti chyəna. Yi ni chwùtè na chin te ghàhnà hì mô ma ghɨ ti kaha bakti chyəna ghàhnà nì Yènfù, Klistù bè nêlò ma ghàhnà fate bon à mihi hamok beka wù chyə. ¹¹ Hi kpenhî, ghàhnà hi boŋa saŋle kum wùt we Yènfù ndùku mô wûn, ma à ni Bâba ghàhnà Jisòs Klistù na ghàhnà kahà hi mô sunsu ha Yènfù. ¹² Yi ni mô yê wu lum afân ni, wùt wù mòk ti ni be, yì ben nì kpu a mbyî. Yi ni chwùtè na kpu ti yen kə ha ghɨt à jɨ̀m beka ghɨt à jɨ̀m ti ni be. ¹³ Be ndùku lâwû a mbyî shyəma Yènfù bè fo Saki biyani fu wi hi tè jìs na wùt ti ni be teka ghɨ fo saki ha wûn. ¹⁴ Yi ni mò kəbi ni, kpu hì mô a mbyî, kə hi yìmì a Adàm mu tuk hi kwok a tàn a Musìs a mu tuk, nâbi te ghɨt ale ndùku mô teka ghɨ ni nki yi be yì Adàm hi tunhe Fùyèn. Adàm ndùku mô kəbi te wut we a wù ndùku mô hi bè bèn yi bàm, a mô a Klistù. ¹⁵ Biyani hanɨ̂ŋ mô. Yi fo yi Fùyènì ti chya gha ye a wùt tì ne jaha nâ haŋaŋ a wu lum na ghɨta tî kputî, dô kə ni kum be wùt wù mòk, a mô be à Adàm, biyani wùt wù mòk, a mô Jisòs Klistù nî Yènfù chwûtì təm a jûŋà ha ghɨta, ghɨ dô nâ haŋaŋ. ¹⁶ Fo yi Fùyènì wijə te be ye a Adàm tì ne. Be àtɨ̂n ni nè kə na Yènfù sak à bobhi ghɨta, biyani fo yi Fùyènì nê na ghàhnà hi mô chilichili a Yènfù ashyə̂ nâbi te ghàhnà ndùku nê gha a be nâ haŋaŋ. ¹⁷ Yi mô hamok na kpu ti nyɨŋ tohna a mbyî yì jɨ̀m njwo be wùt wù mòk, biyani ghɨt ghe a Yènfù chwùtè təm a jûŋà ha ghɨna lyi ha ghɨt a chilichili na ghɨ hi saka te tu fə̂n, khɨti chyəna ghe a ghɨ bè mê wi tohne a wùt wù mòk, a mô Jisòs Klistù. ¹⁸ Wùt wù mòk tì nî be, ghɨt à jɨ̀m bêf, yi ni mò kəbi yi ghəl te wùt wù mòk tì ne gha yi jûŋì, Yènfù lyi ghɨt à jɨ̀m ha ghɨt a chilichili tè sak a jə̀ ghɨna ni ghɨna hì chyə̂. ¹⁹ Wùt wù mòk tì ta nì to ha Yènfù, yi nî, ghɨt à jɨ̀m ghɨ hì mô ghɨt a be, wùt wù mòk yu Yènfù, ni Yènfù hì mô hi bè lyè ghɨt a dona ha ghɨt a chilichili. ²⁰ Yènfù tì fo Saki shyəma ghɨ yen à mihi jyak a be, biyani be shihi dù, təm a jûŋà Yènfù boŋ dû yen kə ashyə̂. ²¹ Be ndùku chwûtè jyak ghe a yì kəta tohne a yi kpû biyani Yènfù chwûtè na təm a jûŋà wuna kətalò jyaka, lyi ghàhnà ha ghɨt a chilichili hi fo chyənà ye a yì bè mê wi ha ghàhnà tohne a Bâba ghàhnà Jisòs Klistù.

¹ Ghàhnà mò hi jìs na ghə, na ghɨ faŋ ma ghɨ hi nê kə be shyəma Yènfù faŋ à hi chwûtè kə təm a jûŋà ha ghàhnà ma? ² Yi wi hi tè mò ni nâ hakoh! Be fè kəta wi gha kum ghàhnà nâ hakoh. Ghàhnà hì mô ma ghɨ tî kpû ha be ma ghɨ wi hi tè fè chyə atɨ̂n à be. ³ Ba ghàn khəlò na ghàhnà ghe a ghɨ tì fye mòlû chîntì ghàhnà Klistù Jisòs hì mô ni te ghɨ ti boŋ kpu kəbi te wûn? ⁴ Yi ni chwùtè na ghàhnà tì shihi fye mòlû à hì mô ni te ghɨ kpu yi kpû, ghɨ gûmà ghàhnà bakhi nì wûn. Yi ndùku mô ni shyəma Bì ni ma ghàhnà hi chyə chyənà yì fê kəbi yi ghəl te wù tì ne Klistù kahi lôtì a yi kpû. Wù tì ni, nì jyak a kanana. ⁵ Yi mô ni wu lum na te ghàhnà hì mô ma ghɨ ti lyi bâhà a Klistù atɨ̂n à kpû, ghàhnà bè boŋa lyê lò bâhà a wun atɨ̂n a yi lòtì kpu. ⁶ Ghàhnà khə na ghɨ tì shihi bante Klistù a kàkfùtàfù ghɨ banti bakhi nì chyəna ghàhnà ghɨ mwo shyəma jyak a be ghe a ghɨ ndùku mô wu wùn wu mwu afân mi, ma ghàhnà hi fê bu wu kwôs ha be. ⁷ Wùt kpolò, be hi fê kəta wijə jyaka ha wûn. ⁸ Te ghàhnà hì mô ma ghɨ ti kpu ghàhnà Klistù, ghàhnà khəlò hamok na ghàhnà nì wûn bè chyəlò. ⁹ Ghàhnà khə na kpu fè kəta wi jyaka a Klistù a tû. Wù ti kpû, Yènfù lôhè wûn a yi kpû, wù fê bu hi bè kpû. ¹⁰ Wu hì mô ma wù ti kpû, yi kpu yi wuni bobhi jyak a be kə hamok, wù ti hì chyə chîn, chyə yi wuni nê na ghɨ hi kokhe Yènfù. ¹¹ Yi ni mò na ghàn kəta hi lyì na ghàn ti boŋ kpû ha be, be fê kəta wi gha yile hi nì kum ghàn, ghàn à Klistù Jisòs te hì chyə̂ chîn kə hi tè fo kokhînì ha Yènfù. ¹² Kə ghàn fê de be na yì hi saka wun wanu yi mô hi bè kpu ni, nê na ghàn hi nê gha ghe a yi khɨŋa. ¹³ Kə ghàn hi de bâh à wùna ghana nâ à mòk na ghɨ hi nê be. Kə ghàn de bâh ale na ghɨ hi mô a shyə a fètà ha gha a be. Ghàn bɨlà fo mihi ngɨŋ sanisu ha Yènfù te ghɨt ghe a ghɨ tì lòhe a yi kpû, ghɨ hì chyə̂. Ghàn fo mihi kə yi mihì wun wanu ha funfu, ghàn hi mô mwə̀ mù yì fèt mù chilichili. ¹⁴ Ghàn nè ni shyəma be hi fê kəta wi jyaka a ghàn a tû beka Yènfù hì mô ma fu ti chwûtì təm a jûŋà ha ghàn, ghàn tê hì fê chyə wi a sah à yi sak. ¹⁵ Ghàhnà mò hi jìs na ghə chin agha? A jis na ghàhnà faŋ ma ghɨ hi nê yênà kə nì be beka ghàhnà fè chyə̂ wi a yi sah à yi sak, chyə̂ kə kum təm a jûŋà a Fùyènà agha? Yi wi hi tè mò ni nâ hakoh! ¹⁶ Ba ghàn khə na ghàn ki fo ngɨŋ sanisu ha wu kwòs ha wùt, ma ghàn hi kəta hi tè yû wùt àtɨ̂n? Ghàn ki fo ngɨŋ sanisu ha wu kwòs ha be, ma ghàn hi ywo ha be, gokhini tɨni mô a yi kpû. Ma ghàn ki fo ngɨŋ sanisu hi tè yu ha Yènfù ma ghɨ hi mô wu kwôs ha wûn, ma gokhini tɨna hi mô na fu lyi ghàn ha ghɨt a chilichili. ¹⁷ Ghàhnà kəta hi tè fo àyòŋnà ha Yènfù beka à ndùku mô wu tuk wule, ghàn mô wu kwôs ha be biyani ghàn yu yi yikî ye a ghɨ yike ha ghàn, ghàn bimî nì təm a ghana à jɨ̀m. ¹⁸ Yènfù ti bônhì ghàn, ghàn tê hì fê bu wu kwôs ha be. Ghàn hi bɨlà mô wu kwôs ha Yènfù shyəma ghàn hi gbê a lum tu chilichili tu. ¹⁹ Mu jìsà fəknà nì gha ghɨ mô kə nâ a ghàn a fùtɨ̂n, njwo tof yani baha lantelò a gha yòhnà. À ndùku mô wu tuk wule, ma ghàn ti fo ngɨŋ sanisu a wu kwòs ha be, hì nê yênà kə nì gha liŋa fê tòkà nê yênà kə nì gha a be ale. Mu wu hì jîsà chin na ghàn fo ngɨŋ sanisu ha wu kwòs hi tè tòkà nê yênà nì gha a chilichili shyəma chyənà sanisu hi yule a Yènfù ashyə̂. ²⁰ À ndùku mô te ghàn baha mô wu kwôs ha be, khə wi gha kum lum tu chilichili tu. ²¹ Yi mô hamok na ghàn tà tì khɨti mbì yi gha yile atɨ̂n à gha afa a ghàn ndùku nê. Ghàn hì wume kum a gha tɨna chin. Gokhi gha mɨ ghɨ̂n mô kə yi kpû. ²² À mò chin ma ghɨ ti bônhì ghàn a be, ghàn hi bɨlà mô wu kwôs ha Yènfù, mbì àtɨ̂n mò na ghàn hì chyə chyənà su yulesu, mô hi bè khɨte chyənà ye a yì bè mê wi. ²³ Ghàn khə na maktu be mò kə yi kpû biyani Yènfù fo chyənà ye yì bè mê wi tohne a Klistù Jisòs Bâba ghàhnà kə halô.

¹ Ghàn ywo khɨli gha ye a mu khɨŋa hi jìs chin a wana noma beka nâbi nde a ghàn a fùtɨ̂n khəlò te saki yi malâ mò. Ghàn khə na saki kəta kə jyaka a wùt a tû a wu yu afa wù baha chyə. ² Gha tɨni mò wu lum afân ni. Wùt ywên kəta hi faŋ ghê lɨm à wûn kə hi tàn te lɨm àtɨ̂n baha chyə, lɨm à wûn ki kpû nâbi yini, sak yi malani hi fê khɨte wi wûn. ³ Yi ni chwùtè na lɨm à wûn shìki baha chyə̂, wù yen chyə ghê wùt lɨmà wùlè, ma yi hi chwûtè na wù ti khɨm sak yi malani, lɨm à wûn ki kpû nâbi yini, saki tê fè khɨte wûn; wù ki fê malâ, ma yi hi fê chwûtè wi na wù ti khɨm sak yi malani. ⁴ Yi ni boŋa mô kə wu lum afân ha ghàn chin a wana noma. Ghàn hi boŋa mô kəbi ni te ghàn ti kputî, Saki fê kəta wi gha hi nì ha ghàn beka ghàn tì kpû ghàn à Klistù ghàn hì mô bâh à wuna ghɨ wùna. Yi ni chwùtè na, a kəta wun ghàn chîn, a mô wun we a Yènfù tì lòhe a yi kpû hi nì na ghàhnà hi mô tam wu jûŋù ha wûn. ⁵ À ndùku mô te ghàhnà baha chyə wu lum afa a njyàsu wùnsu ghàhnàsu ndùku khɨŋa, Saki china ghàhnà na ghɨ hi nê be, yi bênà kə nì kpû. ⁶ Chin hì mô Saki fê kəta wi gha yile hi nì nì ghàhnà beka ghàhnà hì mô ni te ghɨ ti kputî ha yi sak afa ghàhnà ndùku fêtà chyak atɨ̂n. Ghàhnà fê nê wi fêt yi Fùyènì wu lum wu mwu afa a ghɨ chehì nê atɨ̂n, fêtà a tô gha, ma ghɨ nyak a yi sak. Ghàhnà hi bɨlà fêtà wu lum wu fe afa Yohnà Yulena chwùtè ha ghàhnà. ⁷ Gha yina ni chwùtè na ghə? Yi ni mò na Saki mò a shyə a be ma? Yi wijə ni nâ hakoh beka a ndùku bu ha Saki ma mu khə wi gha ghe a be mò ghɨna. Saki ndùku faŋa hi jìs na, “Kə se ghana hi fwo a ghɨta a mwə̀,” ma mu khə wi gha mi yîn. ⁸ Biyani sak mi ye bɨlà nê na be ni, se a ma hi fwo kə mwə̀ mù jɨ̀m. Saki hì bu ma be hi kəta wi jyaka. ⁹ Mu ndùku chyə teka mu hi khə Saki biyani saki ben nâbi yini mu hì kôŋà nâ haŋaŋ hi tè nè be, ki kpû. ¹⁰ Sak mi yina ni mò hi nì na mu hi chyə̂ biyani yi bɨlà nê na mu kpu. ¹¹ Be tì lehi mu tohne kə a gha afa saki tì tunhe ki ywe mu. ¹² Yi ni chwùtè na Sak yulelò, nâbi ghə te yi jîsà boŋa yulê, mô chilichili fê jwôfà. ¹³ A ni mò na shyə hi jwôfà ni bɨlà nê na mu kpu ma? Yi wijə ni nâ hakoh! À tì ben be nì kpu ha mu. Be tì tohna a shyə̀ a jûŋà hi ben nì kpu ha mu. Yi tì gan ni shyəma sah yi be bân. Saki ni mò shyə ghe a ghɨ gâmtè hi chwùtì banhî na be bəma nâ a be. ¹⁴ Ghàhnà khə na Saki mò ma à fo Fùyèn, biyani mu mô kə wut te ghɨ bəkli ha kwòs ha be. ¹⁵ Mu fate khə wi gha ghe a mu nè beka mu faŋa wi hi nè yi gha a bɨlà mô kə ye a mu bànà. ¹⁶ Chin ni te mu nè gha, a mô kə ghe mu kòŋà wi, a ni mò na mu bimelò na Saki mò a jûŋ. ¹⁷ Yi ni chwùtè na, à laha nê wi mu gha mɨ ghɨ̂n. À bɨlà nê be ye a yì mò a mu wu wùn. ¹⁸ Mu khəlò na gha jûŋì wijə a mu wu wùn. Mu jìsà a mu njyàsu wùnsu afân a su kôŋà be ni. Mu jìsà ni beka mu kòŋàlò kə nâ hi tè nè gha a jûŋà biyani yi bona wi. ¹⁹ Mu nè wi gha a jûŋà ghe a mu kòŋà hi tè nì. Mu bɨlà nê kə a gha a be ghe a mu kòŋà wi hi tè nì. ²⁰ Mu shìki nê gha ye a mu kòŋà wi hi nì, ma yi hi chwùtè na à fè nê wijə mu gha tɨni, à nè be ye a yì mò a mu wu wùn. ²¹ Yi mô ha mu ni te a nè yi sak na mu hi nê, shihi khɨŋ hi nè yi gha yi jûŋì, mu bɨlì ni kə gha yi be. ²² A mu atɨ̂n à təm mu kôŋà hi tè lèmà sak yi Fùyènì, ²³ biyani yena na à bɨlà fêtà kə yi sak yilô a mu wu wùn, fêtà ni, nô yi sak ye a yi mô a mu yi təm. Yi nê mu, mu mô ni te mu mò à ndâ chyâk ha be. A mô yi sak yi be mi yina a yi fêtà a mu wu wùn. ²⁴ Mu mò kə nâ a ngə̂k! A nè gâmtè fihe nde mu a wu wùn afân a wu bênà nì kpu ha mu ni agha? ²⁵ Mu fo àyòŋnà ha Yènfù te fu fihe mu atɨ̂n tohne a Bâba ghàhnà Jisòs Klistù! Mu ti yen na mu kòŋàlò kə nâ a mu a təm hi tè lèm a sak yi Fùyènì biyani a mô a mu wùn wu wûtù, mu fêtà kə a kwôs ha be.

¹ Yi ni chin chwùtè na ghɨt ghe a ghɨ ti bimî ha Klistù Jisòs hì mô ghɨt a wuna bu hi bè fè fen a sak a Yènfù ashyə̂. ² Yi mô ni beka Yohnà ghe a ghɨ nê na ghɨta hi chyə̂ tohne a Klistù Jisòs ti boŋ ni kəbi na be nì kpu hi fè kəta wi gha kum mu. ³ Yènfù hì mô ma fu ti ni gha ye a Saki ndùku bu hi nì ha njyàsu wùnsu te su ndùku bota. Fu ni ni a wu lum na fu tì tum Wâ wûn, wù ben a mbyî kə nâ wu wùn wu wûtù afân a wu kôŋà hi tè nè be ni. Wù ben fo ngɨŋ à wûn kpu lò hi làk a besu ghɨ̂tsù. A mô a wu lum afân a Yènfù tì bobhe jyaka a be a njyàsu wùnsu. ⁴ Yènfù tì ni ni shyəma ghàhnà fate chyə mihi chyənà chilichili ye a Saki khɨŋa. Ghàhnà mò ghɨt ghe a ghɨ fè chyə wi te wunu ghàhnà khɨŋa, biyani bɨlà chyə kə te Yohnà Yulena chwùtè, a mô chyənà chilichili ye a Saki khɨŋa. ⁵ Ghɨt ghe a ghɨ chyə te njyàsu wùnsu khɨŋa kòŋà kə gha a njyàsu wùnsu biyani ghe a ghɨ chyə te Yohnà Yulena khɨŋa ghɨ kôŋà kə gha Yohnà. ⁶ Wùt kòŋà gha a njyàsu wùnsu, yi ben nì kpu, biyani ma wù koŋ gha Yohnà, ma yi ni na wù khɨti chyənà ye a yì bè mê wi ma wù fê khɨti yutìnì. ⁷ Wùt kòŋà gha a njyàsu wùnsu, yi ni na wù hi mô nì bànà ghê Yènfù, ywo wi sak yi wuni, ma wù wi hi khɨli nâbi hi yû. ⁸ Ghɨt mɨ ghɨ̂n a ghɨ kôŋà gha a njyàsu wùnsu wi hi nì na Yènfù hi saŋlê. ⁹ Biyani ha ghàn, ghàn kòŋà wi gha a njyàsu wùnsu. À tihe Yohnà Yulena ghàn wu yu afa ghàn kəta kə nâ Yohnà Fùyènà mɨ ghɨ̂n hamok. Nâbi nde te wù kəta wi Yohnà a Klistù wijə wùt wù Klistù. ¹⁰ Biyani, ma Klistù shìki mô a ghàn a fùtɨ̂n, ma wun wanu nê shihi kpu te ghàn kəta hi kpû kum be, ma yohnù wanu faŋ ma wu hi chyə̂ kə yi chyə̂ beka Yènfù hì mô ma fu ti lyi ghàn ha ghɨt a chilichili. ¹¹ Yohnà a Fùyènà ghe a ghɨ tì lòhe Jisòs Klistù a yi kpû, shìki chyə̂ a ghàn a fùtɨ̂n, ma Yèn fûn a fu tì lòhe Jisòs a yi kpû ni, nê fo kəbi chyənà wu wùn afân a wu kəta hi kpu ni, tohne a wun a Yohnà afa a ghɨ chyə a ghàn a fùtɨ̂n. ¹² Yi ni chwùtè a wana noma na, ghàhnà kəta gha hi nì, gha tɨni bu na ghàhnà hi chyə te njyàsu wùnsu ghàhnàsu khɨŋa. ¹³ Ghàn shìki chyə̂ kə te njyàsu wùn sanisu khɨŋa, ma ghàn tê khɨte jə̀ chyənà ye a yì bè mê wi, biyani ma ghàn ki bɨlà mâkà gha a be a ghana tohne jyak afa a Yohnà fo ha ghàn, ma ghàn hi chyə̂. ¹⁴ Yi mô ni beka nâbi nde we a Yohnà Fùyèn tihe wûn mò we à mò wâ Fùyèn. ¹⁵ Yi mô ni beka Yènfù tà tì fo jə̀ Yohnà fanana ha ghàn. À ndùku wijə Yohnà hi kahe ghàn a wu kwòs. Yènfù tì fo Yohnà mɨ ghɨ̂n nî, ghàn hì bɨlà mô wana wuna, a mô à ghɨ̂n ghe a ghɨ fo jyaka na ghàhnà hi jyê ha Yènfù, toŋte wûn na, “Bàba! Bàba wâhù!” ¹⁶ A mô Yohnà a Fùyèn mɨ ghɨ̂n a ghɨ jîsà a ghàhnà yòhnà, chwùtè ha ghàhnà na ghàhnà mò wana Fùyènà. ¹⁷ Ghàhnà shìki tê mô wana Fùyènà, ma yi hi chwûtè na ghàhnà bè khɨtelò ghak yi Fùyènì, mô hi bè khɨte ghak mi ye, ghàhnà Klistù amok. Ghàhnà bè khɨte ghak mi yina ghàhnà Klistù kə wu yu afa ghàhnà boŋa yena ngə̂k ye a Klistù tì yena shyəma ghàhnà boŋà khɨti ban ye a wù kəta. ¹⁸ Mu lyè wi na ngək yina a ghàhnà yena chin mò gha yile hi fə̀knà nì ghak ye a Yènfù bè fo ha ghàhnà. ¹⁹ Nâ mwə̀ mù jɨ̀m te Yènfù fate gbùtè nâ haŋaŋ na Yènfù chwuti kàntè a wana wuna. ²⁰ Yi mô ni beka nâ mwə̀ mù jɨ̀m te Yènfù fate ni luŋle kə halô, a bu te mwə̀ mù tɨ̂n kòŋà, a mô kə te Yènfù tì lèma, khə hamok na, ²¹ Tuk wule bè bênàlò, ma mwə̀ muna a fu fate ma mù bon ma mù hì fwə̂ wi, ma mù kahà hi kəta ngɨŋsu nì ghak yi wana Fùyènà, fê bu wu kwôs ha shyə̀ ale. ²² Ghàhnà khə na hi tàn chîn, nâ mwə̀ mù jɨ̀m te Yènfù tì fate, jyê ywo yi yâf te wù t wù ywên wu yu afa wan lɨma wûn. ²³ À wijə kə mwə̀ muna a mù jyè. Nâbi ghàhnà ghe a ghɨ kəta Yohnà Yulena, a mô yi fo yi shyə ye a Yènfù fo ha ghàhnà boŋa jyê lò kə ghàhnà àtɨ̂n à təm, gbûtè na Yènfù lyi ghàhnà ni te à wan, ma wù yun à mihi tû wu ghàhnà. ²⁴ Yènfù ti bônhì ghàhnà, ghàhnà ghɨ hì ke yênà kə nì tuk we a ghàhnà bè fwo mihè a ngə̂k. Wùt hì kəta shyə a wô, ma wù hi fê ke yênà wijə nì ghɨna. À mò nde a ghàhnà fùtɨ̂n a wù mò hi jìs na yi ke yênà nì shyə ma ghɨ hì mô a wô agha? ²⁵ Biyani ma ghàhnà shìki ke yênà nì shyə, yena wi, biyani khə hamok na ghɨ bè khɨtelò, ma ghɨ hi kəta kə hi tè wunhî. ²⁶ Yohnà Yulena gàmtèlò kəbi ghàhnà beka ghàhnà bota, khə wijə nâbi lum we a ghɨ kəta hi tè jə̀m atɨ̂n biyani ghɨ jə̂mà a ghàhnà wù lùk wu lum ghɨ bu hi fòktì nì jwo. ²⁷ Yènfù khə lò təm a ghɨ̂tà, khə gha ye a Yohnà kwàktè beka Yohnà Yulena jə̀mà lò a ghɨt a Fùyènà wù lùk kə yi ghəl te Yènfù khɨŋa. ²⁸ Ghàhnà khə na à gan nâbi ghə, Yènfù fate kə a jùŋ ha ghɨt a ghe a ghɨ kôŋà wûn, a mô ghɨt ghe a wù toŋa na ghɨna hi nê te wù bakte lema. ²⁹ Yènfù tî lem na ghɨt mu ghe a fu ndùku mô ma fu ti chwoktî na ghɨ hi fune Wâ wûn. Fu lema shyəma Wâ wûn hi mô wan wù shyə̂ atɨ̂n à wana ne, ghɨ dô kə ni. ³⁰ Fu ti toŋa ghɨt ghe a fu ndùku hì mô ma fu ti chwoktî ha ghɨt a wuna fî lem ghɨt mɨ ghɨ̂n a fu toŋa ha ghɨt a chilichili. Fu lem ni boŋ jyâtì fo bân yi wuni yi chiki ha ghɨna. ³¹ Ghàhnà ni mò hi fè jìs nâ na ghə kum gha mɨ ghɨ̂n agha? Yènfù shìki mô nì ghàhnà amok, ma à bê fè no à yə nde ghàhnà agha? ³² Yènfù tà tì ghək jə hi fo Wâ wûn na ghɨ banti a kàkfùtàfù kum ghàhnà à jɨ̀m. Yi ni chwùtè na fu nè folò nâ mwə̀ mù jɨ̀m ha ghàhnà hi kpenhe Wâ wûn a tû. ³³ À mò hi ngane nâ nde ghɨt ghe a Yènfù chwokte agha? À lyè kə nâ Fùyèn, ghɨta ha ghɨt a chilichili. ³⁴ À mò hi fè jìs a nde na ghɨna ti ni bobhi gha? À mò hi jìs Klistù Jisòs we a wù tì kpu ma? Wù wi hi jìs beka wù tì kpû kaha lôtì a yi kpû mô chin a Yènfù kpen wu wo ta, jə̂mà ha ghàhnà. ³⁵ À mò hi jyàhè nâ ghə ghàhnà a Klistù yì kòŋ agha? À ni mò hi jyàhè mù lɨ̀mchuŋ ma, ma a gha te ghɨ ta ma, ma wulu ghàhnà te ghɨ chwoka ma, ma a jiŋ te yì yafa ghàhnà ma, ma à fuf ma, ma yi kpû te yi ywite ghàhnà ma, ma à yi kpu ye yi mô hi bè bèn ha ghàhnà agha? ³⁶ Ghɨ ti nyak a ŋwàklù Fùyèn na: “Ghàh mò kə yi jwô yi kpû mu tuk mù jɨ̀m kum wò. Ghɨ nyâblè nì ghàh kə te ghɨ nyâblè nì bwusu njyə̀sù a wu yu afa ghɨ yênà hi sê.” ³⁷ Shyə ale wijə a ghɨ mô hi jyàhè ghàhnà a Klistù yì kòŋ beka ghàhnà ti tum yə kə lum tù jɨ̀m nì jyak a wuna, a mô beka wù kòŋà ghàhnà. ³⁸ Mu khə hamok na shyə ale wi hi bè jyàhè ghàhnà a yi kòŋ yì Fùyènì. Kə a mò kəbi yi kpû makə a mò yi chyə̂, makə à mò anjèlsu Fùyènsu makə à mò jyak ghe a ghɨ saka ghɨta, makə à mò gha ghe a ghɨ mô chîn makə à mò ghe a ghɨ mô hi bê gàn, makə à mò jyak wu be, ³⁹ makə à mò mbyî ye a yì mò a nyə̂ makə à mò yê a yì mò a dèt yi chyə, nâ shyə ale wi hi bè jyàhè ghàhnà a yi kòŋ afa a Yènfù chwùte tohne gha afa a Bâba ghàhnà Klistù Jisòs tì ne ha ghàhnà.

¹ Mu jìsà yi gha yi mô kə nâ hamok, fwo kə nâ a mu yi təm, ma à chwùti Yohnà Yulena. Mu jìsà kə hamok beka mu mò ghàh à Klistù. ² Təm a ma jìtà kə ni, gha fo ngə̂k ha mu nâ haŋaŋ. ³ Mu làhi tè kòŋ na Yènfù sùli mu, mu nè hì fè kəta wi gha yile hi nì ghàh à Klistù kum wana noma. Mu jìsà wana noma, a mô ghɨt ghaha ghɨ laka. Mu laha kôŋàlò hi ləhà nâbi ghə a wu yu afa yi mô hi gàmtì na ghɨna bon. ⁴ Ghɨna mò ghɨt a Isalì ghe a Yènfù tì lye ha wana wuna chwûtì ban yi wuni ha ghɨna, yə kànû ghê ghɨna fî fo Sak yi wuni ha ghɨna. A mô ghɨna ghe a Yènfù tì chwùte lum wu jûŋù we na ghɨna kəta hi tè kokhe wûn atɨ̂n fî chwûnà a gha ha ghɨna. ⁵ Be be ghɨna ndùku mô ghɨt a Fùyènà. Klistù nâ nì ngɨŋ à wûn tì ben a mbyî te wut à ghɨna wù lak. Yènfù mô kə a tû a mwə̀ mù jɨ̀m, ghɨta kəta hi tè kokhe wûn a yu mù jɨ̀m. Àmèn. ⁶ Mu jìsà wi na Yènfù nê fê nê wi gha ye a fu tì chwùne. Yi mô na, à wijə ghɨt a Isalì à jɨ̀m a Yènfù chwoka ha ghɨt a wuna. ⁷ À wijə wana Ablàhâm à jɨ̀m a ghɨ mô wana Fùyènà. Ghɨ ti nyak a ŋwàklù Fùyèn na, “Ngwìk yâ yì sah yi nda bè fwo a Isìk.” ⁸ Yi ni chwùtè na wana Fùyènà ghe a ghɨ jìsà kum ghɨna wijə ghɨna à jɨ̀m ghe ghɨ bwə a Ablàhâm yi sah yi nda. À bɨlà mô ghe a Yènfù tì chwùne na ghɨ bè bwɨ a Ablàhâm a wana wuna yi sah yi nda. ⁹ Yènfù tì shihi fo chwùna wûn ha Ablàhâm jis na, “Yu bè kpenalo, ma mu kahà bê jikti wò nâbi yini, ma Sèla bwɨ wan wù lɨmà.” ¹⁰ Hi kpenhi, Lèbikà ndùku kəta wu maŋhà, a mô wan a lɨmànà, ma à bwɨ kə wùt wù mòk, a mô Isìk, bè bè ghàhnà. ¹¹ - ¹² Ghàn yen lê te à ndùku mô shyəma ghɨ bwɨ maŋhà wûn, teka wu timè ni gha yile, makə yi jûŋì makə yi be, Yènfù jis ha Lèbikà na, “Wan wù ləma bè hì fêtà ha wâ nè wûn wù tetana.” Fu tì ni ni hi chwùtì na fu kətalò jyak à jɨ̀m hi chwoka wùt we wù kòŋà, a bu kum yi fêt yile te wùt ne. ¹³ Ghɨ nyak a ŋwàklù Fùyèn na, “Mu ti koŋ Jakòb, tunhi Esò.” ¹⁴ Ghàhnà nè jîsà na ghə chin agha? Ghɨ ni jìsà na Yènfù nè wi yi ghəl ma? Yi wijə yâ nâ hakoh! ¹⁵ Yènfù tì jis ha Musìs na, “Mu nè kwohe lò seni ha ghɨt ghe a mu kòŋà hi kwohe seni ha ghɨna, tôknè nì ghɨt ghe a mu kòŋà hi tòknà nì ghɨna.” ¹⁶ Yi ni chwùtè na a mò kə kwohi seni Fùyènì, a bu kum yi kôŋ yi wûtì makə kum gha yile te wùt ne. ¹⁷ Ghɨ ti nyak kəbi na Yènfù tî jis ha fə̀n à Ijìb na, “Mu tì lem wò ha fə̀n kə nâ beka mu ndùku khɨŋa hi chwùtè jyak a ma tohne ha wò, na ghɨta khɨli mu kə mbyî yì jɨ̀m.” ¹⁸ Yi ni chwùtè na Yènfù kwohe lò seni nâbi ha nde te fu kôŋà hi kwohi seni ha wûn. Fu kôŋà hi nì na wùt hi chilê, fu ni kə yi nî nâbi ha nde. ¹⁹ Mu khə na wùt ha ghàn làhi buf ha mu na, yi shìki mô wu lum afân ni, ma Yènfù hi fê ngane ghɨta kum ghə agha. À mò hi tunhe nde gha ye fu khɨŋa agha? ²⁰ Biyani wò jìsà ni, mô nâ nde, a wò kàntè wùt hi tè fìsì yi gha a Yènfù yi jwo agha? A ni jìsà na khɨŋi làhi kaha buf ha wùt we a wù bwəma khɨŋa na wù tì bwəm yi ni njwô ghə agha? ²¹ Ba wùt we a wù bwəma khɨŋa koŋ ma wù lyi tuk a chyaka à mòk ma wù jyahi ma wù bwəm khɨŋa à bà atɨ̂n ma wù hi yə atɨ̂n à yile biyani nê gha chika nì yile? ²² Yi ni mô kəbi yi ghəl te Yènfù tì ne. Fu tì kôŋ hi chwùtì na fu bàŋhè lò lâ, fî kôŋ hi chwùtè jyak ghe a fu kəta ha ghɨta. A ni gha ye a fu ndùku hì wunhe kə yi wunhî tê fo ngə̂k ha ghɨt ghe fu ndùku bâŋhè lâ ha ghɨna, ghɨna kpene kə na fu bobhi yi bobhî ghɨna. ²³ Yènfù hì khɨŋa kəbi hi chwùtè jyak a wuna a kanana ha ghɨt ghe a fu kwohe seni ha ghɨna, a mô ghàhnà ghe a fu ndùku mô ma fu ti fati lem hi fo jyak mɨ ghɨ̂n ha ghàhnà. ²⁴ Ghàhnà ni mò ni, a mô ghàhnà ghe a fu tì toŋa fihe atɨ̂n à ghɨt a Jûs fî toŋa fihi kəbi a tumu a fùtɨ̂n. ²⁵ Yènfù tî jis Hòseyà nyak na: “Mu bè shihi jìs kum ghɨt ghe a ghɨ chehì bu ghɨt a ma, ma mu toŋti ghɨna na, ghɨt a ma, shihi jìs kum yi lak ye a mu chehì kôŋà wi ma mu toŋti na, yi lak ye a mu kòŋà. ²⁶ Ghɨ bè yênà ha ghɨt ghe a ghɨ chehì jîsà na ghɨna wijə wana ma ma ghɨ toŋti ghɨna na wana ma, mu Yèn fe a fu chyə.” ²⁷ Ìsayà tî boŋ jis kum ghɨt a Isalì na, “Nâbi te ghɨt a Isalì dò ni te sùsi a bi jwôlì, à bè bônà kə a se a ghɨ̂tà. ²⁸ Beka Yènfù bè bûŋtè saka kə mbyî ni, ma wù shihi sâk ma wù sak à mihi kə yi mihì.” ²⁹ Ìsayà ndùku mô ma wù ti jis kəbi na, “À ndùku mô na Bâba Yènfù faŋ hi dè mwəlà mù ghàhnà mùlè ma ghàhnà ti kaha hì mô kəbi te tèk tu Sodòm nì Gòmoliyà.” ³⁰ Ghàhnà mò hi jìs na ghə? Ghàhnà làhi jìs na nâbi te tumu chehì chyə, khɨŋa wi lumu hi tè mò chilichili a Yènfù ashyə̂, ghɨna hì mô chîn kum yi bimî yi ghɨna, ³¹ biyani ha ghɨt a Isalì te ghɨ ndùku khɨŋa hi tè mò chilichili a Yènfù ashyə̂ tohne a yi sâk, ghɨna tà khɨti jə sak yi tɨni. ³² Ghɨna tà khɨti jə beka ghɨna chehì kəta wi bimînì ha Yènfù, bɨlà kwâktè na ghɨna làhi tè mò chilichili a Yènfù ashyə̂ kum yi fêt. A ni gha ye a ghɨna tì damta a yi ti afa a ghɨta ndùku damta atɨ̂n; ³³ kə yi ghəl te ghɨ tì nyak na: “Ghàn yen! Mu ti lem ti a yi tèk yi Sayòn, ghɨta mô hi tê damta atɨ̂n. A mô yi wo, mô hi nì na ghɨta hi fentê, biyani ma à bime nâbi nde ha wûn, ma wù bê tê wumî.”

¹ Mu kòŋà nâ haŋaŋ fê jə̂mà kə nâ yi jə̂m ha wana noma na Yènfù bonhi ghɨt a Jûs. ² Mu khəlò na ghɨna laha kôŋà kə nâ yi kôŋ hi tè kokhe Fùyèn biyani kokhe wi a wu lum wu tofanu. ³ Ghɨna khə wi lum we a Yènfù lyè ghɨta ha ghɨt a chilichili atɨ̂n. A ni gha ye a ghɨna tunhe lum mu wûn bɨlà fate wu ghɨna. ⁴ Yi mô ni beka Klistù hì mô ma wù ti bên ni na Saki hi fê kəta wi jyaka. Wù ni ni shyəma nâbi nde we a wù bime ha wûn hi mô chilichili a Yènfù ashyə̂. ⁵ Musìs tî nyak na wùt hì khɨŋa hi tè mò chilichili kum yi sâk, ma wù hi kəta hi tè fate lèm kə yi sak yì jɨ̀m hi tè chyə̂. ⁶ Biyani, lum we a ghɨta mò chilichili atɨ̂n kum yi bimî wijə te yi sâk. Ghɨ nyak a ŋwàklù Fùyèn na, “Kə wò buf nâ, à nè kwoka nde a nyə̂?” Ma wò nè bufa nâ, à nè kwoka nde hi lyè chwo nì Klistù agha? ⁷ “Kə wò buf nâ, a nè chwo nde a yi lak yi ghɨt a chyə agha?” Ma wò nè bufa na, à nè chwo nde hi lòhè Klistù a yi kpû agha? ⁸ Ghɨ ti nyak na, “Gha Fùyènì bakhe kə ni ha ghàn. Yi mô a ghàn a jwô fê mô a ghàn a təm.” A mô yì yîn ye a ghàh fòktè na ghàn yu ma ghɨ bimi. ⁹ Ghàh ni jìsà na nâbi nde ki jîs nì jwo yi wuni na Jisòs mò Bâba bime a wun a yi təm na Yènfù tî lôhì wûn a yi kpû, ma wù bê bon. ¹⁰ Yi mô ni beka wùt bime a wun a yi təm, Yènfù lyi wûn ha wùt wù chilichili, wù jis nì jwo yi wuni na Klistù mò Bâba, wu bonlò. ¹¹ Yi mô kə yi ghəl te ghɨ nyàka a ŋwàklù Fùyèn na, “À bimi nâbi nde ha wûn, ma wù bê tè wumî.” ¹² Bâba mò Bâba kə ha ghɨt à jɨ̀m. Hanɨ̂ŋ bu ha wùt à Jûs nì ha tumu. Wù fo yi yutì nâbi ha nde we a wù lona a gâmtìnì ha wûn. ¹³ Yi mô kə te ghɨ nyaka a ŋwàklù Fùyèn na, “Bâba bè bônhèlò nâbi nde we a wù toŋte yet yi wuni hi lon a yi gâmtì.” ¹⁴ Biyani ghɨta shìki mô teka ghɨ bimi ha wùt, ghɨ ne lon yàni gâmtìnì ha wun agha? Ghɨ ni mò hi bimi yàni ha wûn teka ghɨ yu tum kum wun agha? Ghɨ ni mò hi yu yàni tum kum wûn teka wùt fokti agha? ¹⁵ Wùt ni mò hi fòktè tum mi yina yàni ha ghɨta teka ghɨ tum wun agha? Ghɨ ti nyak a ŋwàklù Fùyèn na, “Ghàn yen te ghɨta bènà nì tum yì jùŋ hi fòktì, bên yi ghɨna jwôfà yi jwôf yi kanani!” ¹⁶ Biyani, à wijə ghɨt à jɨ̀m te ghɨ ywo tum yì jùŋ mi yìna ghɨ lem a to atɨ̂n. Yi mô kə yi ghəl te fòkti Ìsayà tì jìsa buf na, “Ghɨt ghe a ghɨ ywo tum ye a ghàh fòktè bimelò mò nâ nde ghɨ̂n a Bâba?” ¹⁷ Yi ni chwùtè hamok na wùt ni bime kə wu yu afa wù ywo tum à Fùyèn, wùt ywo kə wu yu afa ghɨ fôktè tum kum Klistù ha wûn. ¹⁸ Mu wu hì bufa nâ, yi ni mò na ghɨt a Jûs tà yu jə gha yi Fùyènì ma? Ghɨna ti yû, kə yi ghəl te ghɨ tì nyàka a ŋwàklù Fùyèn na: “Ghɨ ti yu jyesu fòktìsù kə tu lùk tù jɨ̀m a mbyî. Ghɨna ti fôktì gha, ghɨ ti yû kə taŋ tù a mbyî tù jɨ̀m.” ¹⁹ Mu bufa kəbi nâ, yi ni mò na ghɨt a Isalì tà che yu khɨli jə gha ye a ghɨ fôktè ma? Musìs nâ nì ngɨŋ à wûn tî jis kum gha mi yina jis na Yènfù jis na: “Mu nè nêlò ghàn, ma ghàn hi kəta ghə̀k kum ghɨt ghe a ghɨ kpene wi hi tè kəta yi lak yi ghɨna yi ngɨŋi. Mu nè nêlò, ma ghàn hi bâŋhè lâ kum à ghɨ̂t yi lak yile, ghɨna kəta wi tofu.” ²⁰ Ìsayà tî jîs kə nâ a ndan tê fàn na, Yènfù jis na: “Ghɨta ti yen mu, ma ghɨ chehì khɨŋa wijə mu. Mu ti chwûtì ngɨŋ à mì ha ghɨta, ma ghɨna chehì bufa wijə mu.” ²¹ Biyani ha ghɨt a Isalì, Yènfù jis na, “Mu ti nâhì wo mu ha wu tuk wu fublùnù toŋa à ghɨ̂t na ghɨna ben, ghɨna ti tunhi hi ywo mu. Ghɨna ti ta nì to kahi a mu yi bàm.”

¹ Mu bufa kəbi nâ, yi ni mò ni chwûtè na Yènfù ti mâkà ghɨt a wuna ma? Fu tà mâkà jə ghɨna nâ hakoh! Nâ mu a mu ngɨŋ boŋa mò kəbi wut à Isalì ma mu fwo a Benjamìn yi sah yi nda, mô wut a Ablàhâm yi tê biyani teka fu maka mu. ² Yènfù tà mâkà jə ghɨt a wuna ghe fu tì lèma na fu bè bônhèlò ghɨna shyəma fu fati mbyî. Ba ghàn khəlò gha ye a ŋwàklù Fùyèn jìsà kum Ìlajà te wu ndùku chyate Yènfù na fu chwuti gha ye ghɨt a Isalì ne bobhe. Wù ndùku chyate jîsà na, ³ “Ghɨt ghɨ̂n ti ywiti fòktì sasu a Bâba. Ghɨna ti bobhi baŋ wa wu yi fo. À faŋ kə mu, ghɨna wu hì khɨŋa kəbi hi ywe mu.” ⁴ Wù jis ni, Yènfù jis ha wun na, “À tà faŋ jə kə wò. Mu baha kətalò kəbi ghɨt ale kamsu sàmba, ghɨ ywo ha mu, ma ghɨna ti tunhi na ghɨna kokhe wi Bâl.” ⁵ Yi ni mò kəbi yi ghəl ha ghàhnà chîn. Yènfù ti chwûtì təm a wuna ghɨ jûŋà chwok fihi ghɨt ale nâbi te ghɨna tobte. ⁶ Yènfù shìki mô ma fu ti chwok ghɨt mɨ ghɨ̂n wu lum afân, ma yi nê hi bu na fu chwok kum yi fêt yile te ghɨna ne bu ya ma ghɨ hi fê jîsà wi na à ni təm a jûŋà ghɨ Fùyènà. ⁷ Yi ni chwùtè na ghɨt a Isalì ghɨ dona ti gha shyə ghe a ghɨna à jɨ̀m ndùku khɨŋa nâ haŋaŋ hi khɨtî, à khɨti kə se ghɨ̂tà ni te Yènfù chwokte. Ghɨt a dona ti tahi təma hi yu ha Yènfù. ⁸ Yi gan kə te ghɨ nyak a ŋwàklù Fùyèn na, “Yènfù ti ni ghɨna ywo khɨle wi gha, yena khɨle wi gha, nâbi hi tàn lân.” ⁹ Defìt tì jis na yi jə̂mà na, “Mwə̀ mù yə̂mù ghɨna kahi ha lef ma mù ni ma ghɨna fen, Yènfù fê fo ngə̂k ha ghɨna.” ¹⁰ Wù tì jis kpenhi na yi khɨŋa na, “Yènfù tum fèfà a ghɨna sê, ma ghɨna hi fê yena wi luktu, ma fu lem ghɨna a ngə̂k, ma ghɨna jɨŋ à ləha kə atɨ̂n à sù ngə̂k.” ¹¹ Mu bufa kəbi nâ, ghɨt a Jûs tì damta fen mihì kə yi mihì ma? Yi wijə ni nâ hakoh! À ndùku mô te ghɨna ne be, Yènfù kwâktì tumu fo yi bôn ha ghɨna. Fu tì ni ni shyəma ghɨt a Jûs hi səmte tumu. ¹² À ndùku mô te ghɨt a Jûs ne be, Yènfù fo ghaki ha ghɨt a mbye ale. Yi ni chwùtè na Yènfù tì fo ghaki ha tumu njwo ghɨt a Jûs fena. Fu shìki mô hi fo ghak mi yina ha tumu kum yi fe yi ghɨt a Jûs, fu bê fo nâ yàni ghak yi tɨni ha ghɨta wu yu afa ghɨt a Jûs kaha bena ha wûn agha? ¹³ Mu hì jîsà ha ghàn tumu chîn. Ghàn khəlò na mu mò wut wù tum te Yènfù chwoka na mu hi fôktè gha yi wuni ha ghàn, mu mô hi tè jala kə yi jâl kum yi fèt mi yîn. ¹⁴ Mu khɨŋa na ghɨt ghaha, a mô ghɨt a Jûs, yen fêt mi yina ma shihi səmte ghàn, ma Yènfù bonhi ghɨna ale. ¹⁵ À ndùku mô te Yènfù màka ghɨna, fu bakti chyəna ghê ghɨt a mbye ale. Fu ki kaha lyè ghɨna chîn, ma yi hi mô nâ yàni agha, ma yi hi kə̂kà na fu ti lôhì ghɨta a yi kpû. ¹⁶ Ghɨ ki bek a bân ki yità fo ha Yènfù, ma yi hi chwùtè na nâ tuk a ban mi ye yì jɨ̀m à kəta kə Yènfù, ma ghaŋtu fùkàk tu shìki mô a chyə̂, a kəta Fùyèn, ma yi hi chwûtè na a kəta kəbi wûn kpoŋtu tɨntu. ¹⁷ Ghàn tumu ni mò ni te kpoŋtu fùkàk tù a fu chehì kwoka kə yi kwôk, ghɨ fâtì ben yuŋlò, tu hì ləma a fùkàk te ghɨ yome. Ghàn hì mô chin, yə kəbi mwə̀ mù yə̂mù me a kâk fu yome fîn yə, boŋa kəta kə ghaŋtu te fu kəta. ¹⁸ Yi ni chwùtè na ghàn kəta wi hi tè ghaŋhe wu wun ha ghɨt ghe a ghɨna mò ni te tu kpoŋ te a ghɨ tì khɨmte maka shyəma ghàn khɨti luku. Ghàn hi khə na ghàn mò kə tu kpôŋ, a bɨlà lo tu ghaŋ khɨte ghàn. ¹⁹ Wùt wùlè a ghàn a fùtɨ̂n làhi jìs na Yènfù tì khɨmti mâkà kpoŋ mu tɨ̂n hi fo luku ha ghàn. ²⁰ Yi mô kə nâ hamok na ghɨ tì khɨmti mâkà ghɨna, a mô kum te ghɨna faŋa hi bimî, de ghàn, a mô beka ghàn bime biyani, ghàn kəta wi hi tè ghaŋhe wu wun. Ghàn hi tôknè, ²¹ beka fu shìki mô ma fu ti mâkà ghɨt a Jûs, ghɨna mô ni te kàntè tu kpoŋtu fùkàk mu fûn, ma fu nê tè boŋa dè jə̀ ghàn. ²² Ghàn hi khə na Yènfù tòknè nì ghɨta biyani, sak yi wuni ta kəbi yâ. Sak yi wuni ta ha ghɨt ghe a ghɨ de lum wu chilichili, biyani wu tôknè nì ghàn kə wu yu afa ghàn ywo kə ha wûn, bu ni, ma wù maka ghàn. ²³ À mò ha ghɨt a Jûs ma ghɨna ki kwunâ bimi ha Jisòs ma Yènfù kahà lyi ghɨna wu lùk afa a ghɨna ndùku mô atɨ̂n. Fu kəta a jyak hi nì ni. ²⁴ Nâbi ha nkàn, Yènfù shìki mô ma fu ti lye ghàn, tumu, ghàn mô ni te kpoŋtu fùkàk tù chìnà kwoka kə yi kwôk, fu nê ma yàni hi kaha lyè kpoŋtu ma tu fwo a fùkàk ma ghɨ yomi yi yomî agha? ²⁵ Gha yi leteni yile làwû a mu khɨŋa na ghàn hi khə a wana noma shyəma ghàn nê hi fè ghaŋhe wi wunu. Gha tɨni mô na ghɨt a Isalì ale mò chin, ta nì tû biyani mò hi bê kwunâ hi bimî wu yu afa tum we a Yènfù chwokte ti bimi mihì. ²⁶ Yi ni chwùtè na Yènfù bê bônhè ghɨt a Isalì kə à jɨ̀m kə yi ghəl te ghɨ nyaka a ŋwàklù Fùyèn na: “Bònhì bè fwolò a yi tèk yi Sayòn. Wù bê so chyakhi besu ghɨta a yi sah yi nda Jakòb.” ²⁷ Yènfù tì jis na, “Mu ti chwûnà na mu bè nêlò gha yina ha ghɨna wu tuk afa a mu lehifo besu ghɨna su atɨ̂n.” ²⁸ Ghɨt a Jûs ti tunhi hi ywo tum yì jùŋ, yìna ni ghɨna, ghɨna hi mô bànàsu Fùyènsu. Gha mi yina ti ni Yènfù bônhì ghàn tumu, biyani lem na fu nè baha kôŋà kə yi kôŋ ghɨt a Jûs kum be be ghɨna. ²⁹ Yi mô ni beka Yènfù chìnà chwoka wùt bônhì wûn, fu tà fî kwuna jə kwâktì yi wuni. ³⁰ Ha ghàn tumu, ghàn ndùku ywo wi ha Yènfù, biyani chin hì mô ma fu ti kwohi seni ha ghàn njwo ghɨt a Jûs ti tunhi hi yu ha wûn. ³¹ Yi mô kəbi ni ha ghɨt a Jûs. Yènfù kwohi seni ha ghàn a ghɨna wu lùk shyəma ghɨna yen ma ghɨ kahi təm a ghɨna, ma ghɨ fê boŋà kwohi seni ha ghɨna. ³² Yènfù ti kwut ghɨta nâ à jɨ̀m nî na ghɨ hi tâ nì tû shyəma fu chwûtè seni kwolani ye a fu kəta ha ghɨna. ³³ Yi mô kə nâ hamok na Yènfù kətalò ghak yi kanani hi fo ha ghɨta, kəta kə tof wù jɨ̀m, khə a gha à jɨ̀m! Wùt bu hi fòktè gha ghe a fu kwâktè. Wùt bu hi khɨle lum we a fu nê gha atɨ̂n. ³⁴ Yi mô kə yi ghəl te ghɨ nyaka a ŋwàklù Fùyèn na: “Wùt khə wi gha ye a Bâba kwàktè, wùt kpene wi hi tobhi wûn. ³⁵ Wùt tà timi fo jə shyə ale ha Yènfù hi tè ki na fu kahà lak.” ³⁶ A fate Fùyèn mwə̀ mù jɨ̀m, mwə̀ mù tɨn mô kə kum te fu kôŋà na mù hi mô, bê nì kokhînì ha wûn. Kokhînì yen ha Yènfù a yu mù jɨ̀m. Àmèn.

¹ Wana noma, mu chyate ghàn, kum kwohi seni ye a Yènfù chwùte ha ghàn na ghàn fo ngɨŋ sanisu ha Yènfù ma ghɨ hi mô yi fo ye yi chyə, yulê, nê na fu hi saŋlê. A ni kàntè yi kokhi ye a ghàn kəta hi tè kokhe Fùyèn. ² Kə ghàn hi chyə te ghɨt a mbye afân. Ghàn bɨlà de ma Yènfù fo kwâktì yi fe ha ghàn ma fu kwuna təm ghana shyəma ghàn yen à khɨli gha ye Yènfù khɨŋa, a mô kə yi gha jwôfà mô chilichili Yènfù kôŋà. ³ Yènfù ti khɨti təm a jûŋà ha mu fo fêt yi wuni na mu hi nê, mu wu hì jîsà ha ghàn nâ à jɨ̀m na, kə ghàn hi lyê ngɨŋ sanisu a shyə̀, kpene wi. Ghàn chwohi kwâktì tanitu ma ghàn lyi ngɨŋ sanisu kə nâ te ghàn mò. Ghàn hi ke ngɨŋ sanisu tohne yi bimî afa a fu fo ha ghàn. ⁴ Ghàn khə na wun wu wûtù kəta wu bâh wu dô kə ni, nâbi ghɨ̀ni bâhà nê kə yi fêt hanɨ̂ŋ. ⁵ Yi ni mò kəbi yi ghəl ha ghàhnà. Ghàhnà dò lò, biyani mô kə wu wun wù mòk beka yi bimî ye a ghàhnà chìntè kəta ha Klistù, nâbi ghɨ̀ni bâhà yikte kə ale. ⁶ Ghàhnà kəta tufô te fu fo kə hanɨ̂ŋ, hanɨ̂ŋ, kə yi ghəl te fu kôŋà hi fô nâbi ha nde. Yi ni chwùtè na nâbi nde kəta hi lyè yi fo yi wuni hi tè nè kə yi fêt atɨ̂n. Yènfù shìki mô ma fu ti fo tofu na wùt hi fôktè tum à wûn, wu hi jîsà kpene kə te bimî yi wuni chwùtè. ⁷ Yènfù shìki mô ma fu ti fo jyaka na wùt hi gâmtè ghɨta, wu hi gâmtè, wùt hì yike yi yikî, wu hi yike kə yi yikî. ⁸ Wùt hì khə hi tobhi ghɨta, wu hi tobhe kə yi tobhî; wùt hi khə hi fo a mwə̀lû hi gàmtè à ghɨ̂t, wu hi fo ghə̂kà wi. We a wù tihe ghɨta kəta hi tè fèt kə nì təm a wuna à jɨ̀m, we a wù tòknè nì ghɨta wu fêtà kə nì saŋlînì. ⁹ Ghàn hi kôŋà à ghɨ̂t, ghàn hi kôŋà kə nâ yi kôŋ, lehe wi yi lehî. Ghàn hi bânà be, fate khɨte gha a jûŋà. ¹⁰ Ghàn hi kôŋà ngɨŋ sanisu kə nâ te wana ne, fê mô yû mù jɨ̀m, ngumle ngɨŋ sanisu. ¹¹ Kə ghàn hi yolê. Ghàn hi ghâblè, fêtà ha Bâba kə nâ nì təm ghana à jɨ̀m. ¹² Ghàn hi saŋle kum a gha ghe a ghàn khə na ghɨ mô hi bè gàn. Ngəksu ben ha ghàn, ghàn hi wunhe kə yi wunhî fê jə̂mà kə yû mù jɨ̀m. ¹³ Ghàn hi jyâtè mwə̀ mânù, fo ghɨt a bimena ghe a ghɨ kəta wi. Ghàn yiki hi tè fye ghɨt a benana a ghàn a sù ndâ. ¹⁴ Ghàn hi bɨlà jə̂mà na Yènfù bonhi ghɨt ghe a ghɨ chwoka wulu wanu. Kə ghàn hi jə̂mà na fu fo ngə̂k ha ghɨna. ¹⁵ Ghɨta hì saŋlê, ghàn hi boŋa saŋlê ghàn à ghɨna, ghɨna hì jyê, ghàn hi kwohe seni ha ghɨna. ¹⁶ Ghàn hi chyə kə ha shyə̀ à mòk. Kə ghàn hi ghaŋhe wunu. Ghàn hi bɨlà chîntè ghàn à ghɨt a bota. Kə ghàn hi lyê na ghàn khəlò gha à jɨ̀m. ¹⁷ Kə ghàn lak be nì be. Ghàn hi bɨlà mômhè kə hi tè nè gha ghe a jwôfà ha ghɨt à jɨ̀m. ¹⁸ Ghàn momhi nâ nì jyaka hi tè chyə nì yutìnì kə ghàn à ghɨt à jɨ̀m. ¹⁹ Kə ghàn bè fisè be a sun samsu. Ghàn bɨlà de kə ha Yènfù, fu chwùtè lâ baŋanu wunu kə yi ghəl te ghɨ tì nyak na Bâba jis na, “À mò luk wu mu hi fìsè gha ghe a ghɨta nè. Mu bè kaha lâkàlò gha a be a ghɨ̂tà.” ²⁰ Ghɨ nyak a ŋwàklù Fùyèn na, “Jìŋ hì yafa bànà yâ, wò fo shyə, wù yəlò, kuŋ à mòlû hì yima wûn, wo fo mòlû, wu nyulò. Wò shìki nî ni, ma wù nê wumi nâ haŋaŋ.” ²¹ Kə ghàn de na jyak a be, ta chya ghàn. Ghàn bɨlà tâ chya be nì gha a jûŋà ghe a ghàn nè.

¹ Nâ ghàn à jɨ̀m kəta hi tè yu ha ghɨt ghe a ghɨ saka mô a ghàn a tô beka wùt wù sakana wùlè wijə we wù faŋa hi fye jyaka ha Yènfù hi tè sâk. Nâ ghɨt a sakana à jɨ̀m mò ma à lem Fùyèn. ² Yi ni mò na a tunhi nâbi nde ghɨt a sakana, ma à hi mô na wù tunhi gha ye a Yènfù lèma, ma Yènfù bê sak wûn. ³ Ghɨt ghe a ghɨ chyə chyənà yì jùŋ kəta wi hi tè fànà ghɨt a sakana. À kəta hi tè fànà ghe a ghɨ chyə chyənà yi be. Wùt shìki kôŋà wi na wùt wù sakana hi bəma ha wûn, wu hi nê kə gha a jûŋà, a ghe wù nè bɨlà bəmhe wûn. ⁴ Yi mô ni beka wùt wù sakana mò wut wù fètana ha Yènfù, gâmtè ghàn na ghàn hi nè gha a jûŋà. Wùt hì nê be, wu hi fânà ghɨt a sakana beka ghɨna kəta lò jyaka hi fo ngə̂k ha ghɨt ghe a ghɨ nê gha a be. Ghɨna mô ghɨt a fetana ha Yènfù, fo ngə̂k ha ghɨt ghe a ghɨ nê gha a be, a mô lum we a Yènfù tì chwùtè atɨ̂n na fu bâŋhè lò lâ ha ghɨt a be. ⁵ Yi ni chwùtè na nâbi nde kəta hi tè yû ha ghɨt a sakana, a bu kə kum njwo wù fànà na Yènfù làhi bàŋhè lâ ha yi, biyani njwo wù khəlò a wun a yi təm na yi jwôfàlò hi tè nì ni. ⁶ A ni gha ye a ghàn kəta kəbi hi tè màkà ŋwàklànà beka ghɨt a sakana mò ma ghɨna ti fo ngɨŋsu ghɨna su hi tè nè fêt yina fêtà kə nâ ha Yènfù. ⁷ Wùt hì kəta hi làk a shyə nâbi ha nde atɨ̂n à ghɨt mɨ ghɨ̂n, wu laklò. À hì mô ŋwàklù yì bəklena hi làk, wu laklò, a hì mô nâbi yì ngɨŋ à wûn, wu laklò, à hì mô nâbi yi ngumlî, wu hi fate ngumle ghɨna, à hì mô yi kokhî hi fo ha ghɨna, wu hi fô. ⁸ Kə wùt bè hì kəta fôlì wûtù, a bu kə yi kôŋ shyəma wù hi kôŋà wûn, faŋa wi tuk wule. À kòŋà nâbi nde wâ nè wûn, ma yi hi chwûtè na wù ywolò Saki. ⁹ Sak tɨ̂n ni na, “Kə wò bè chyə nì ywê wùt makə nì lɨm à wùt, kə wò bè ywe, kə wò bè chwoŋa, kə se gha hi fwo a ghɨta a mù mwə̀,” nì sak tu letu nâ tù jɨ̀m ni chìntè yê fwo kə atɨ̂n à yìna na, “Kòŋ wâ nâ kə yi ghəl te wò kòŋà ngɨŋ yâ.” ¹⁰ À kòŋà nâbi nde wâ nè wûn, ma wù hi fê nê wi gha yi be ha wûn. Yi ni chwùtè na wùt kəta a yi kôŋ, à hi mô na wù lèmà lò Sak yì jɨ̀m. ¹¹ Hi kpenhî, ghàn kəta hi tè nè gha mɨ ghɨ̂n nâ à jɨ̀m beka ghàn khəlò yu we a ghàhnà mò atɨ̂n chîn. Yu ti kpên na ghàn yema a sù bwuni beka à ndùku mô te ghàhnà bime, ghàhnà ndùku bakhe yênà a ghàhnà yi bòn, biyani chin hì mô ma wu ti fî bakhi chya yâ. ¹² Tuku ti yû, bɨna ghɨ hì yula mihè bênà. Ghàhnà maka lê gha a bɨn a finana ma bɨlà lyi mwə̀ mù wòŋ me a ghɨ nô atɨ̂n nchwì. ¹³ Ghàhnà hi fate khɨte ngɨŋsu ghàhnàsu te ghɨt ghe a ghɨ chyə atɨ̂n à yi bân. Kə ghàhnà hi kwoti nâbi ghə, nâbi afa, yə̂, kə ghàhnà hi dê lùkû kwola ghàhnà. Kə ghàhnà hi nê gha a tu fiŋa nì ngɨŋsu ghàhnàsu. Kə ghàhnà hi njaŋâ, kə ghàhnà hi ghə̂kà ghɨta. ¹⁴ Ghàn bɨlà khɨtè kə chyənà yì fê ye a Bâba Jisòs Klistù tì fo ha ghàn ha mwə̀ mù yì wòŋ. Kə ghàhnà nè fo lumu na njyàsu wùnsu ghàhnàsu hi tihe ghàhnà, kwoti nâbi ghə te su kôŋà, yə̂.

¹ Wùt hì lye bênà a ghàn a fùtɨ̂n, bimî yi wuni baha botâ, ghàn fyi wûn. Ghàn fyi ni, kə ghàn hi gufnà gha ghàn à wûn kum kwâktì ye a wù kəta kum gha ale. ² Ghàn khə na wùt kəta yi bimî, ma wù hi yə nâbi ghə, biyani ma wùlè we a bimî wuni baha bota làhi tè la kə bàh, kuta wi nyàm. ³ Kə wùt we a wù yə nâbi ghə hi kehe we a wù bama mwə̀ mùlè, kə we a wù bama shyə ale hi saka we a wù yə kə mwə̀ mù jɨ̀m beka Yènfù ti fyî wûn. ⁴ Wò mò nâ nde hi tè saka wùt wù fètana wù wùt wùlò? À kəta kə Bì yi fèt à wûn hi kî na wù nè a jûŋ ma a be, biyani wu bu hi fên beka Bâba kətalò jyaka hi tòk à wûn. ⁵ Ghɨt ale yena kə na tuk mùlè kokne lò a Yènfù ashyə̂ chyâ mùlè, ghɨ le yena na tuk mù jɨ̀m mò kə yi ghəl. Yi jwôfà na nâbi nde hi fate khə gha ye a wù mò a tô àtɨ̂n. ⁶ Wùt we a wù yena na tuk wule kokne chyâlò wùlè ni nè hi kokhe Fùyèn atɨ̂n. We a wù yə kə mwə̀ mù jɨ̀m, wù yə kə hi fo yi kokhî ha Yènfù beka wù shihi yə̂, wu fo àyòŋnà ha Yènfù. We a wù bama mwə̀ mùlè ni nè ni kəbi hi fo yi kokhî ha Yènfù beka wù shihi nì ni, wu fo kəbi àyòŋnà ha Yènfù. ⁷ Wùt wijə a ghàhnà fùtɨ̂n a wù chyə kə kum ngɨŋ à wûn, wùt wijə a wù kpo, ma kpû yi wuni hi mô kə ha ngɨŋ à wûn. ⁸ Makə ghàhnà chyəlò, ghɨ chyə kə hi tè kokhe Bâba, ghɨ kpu kəbi yi kpû, ghɨ kpu kə hi fo yi kokhî ha wûn. Yi ni chwùtè na ghàhnà mò kə ghɨt a Bâba, makə ghɨ chyə yi chyə̂, makə ghɨ kpu yi kpû. ⁹ Yi mô ni beka Klistù tì kpû kaha lôtì a yi kpû hi tè mò Bâba ha ghɨt ghe a ghɨ chyə nì ghe a ghɨ tì kpute. ¹⁰ Yi mô ni, ghàn ghɨ le hi saka wana ne ghana kum ghə? Ghàn kehe wana ne ghana ghɨ le njwô ghə? Ba ghàn khəlò na ghàhnà à jɨ̀m bè time lò a Yènfù lùk wu saku. ¹¹ Yi mô kə yi ghəl te ghɨ nyaka na Bâba jis na, “Mu mò Yèn fe a fu chyə, jîsà na nâbi nde bè tumalò lwe a mu ashyə̂, ma nâbi nde jis nì jwo wuni na mu mò Fùyèn.” ¹² Yi ni chwùtè na nâbi nde a ghàhnà fùtɨ̂n bè taŋlelò jwo wuni ha Yènfù kum chyənà à wûn. ¹³ Kə ghàhnà bè saka wana ne ghàhnà ale. Yi jwôfà na ghàhnà bɨlà lem na ghàhnà bè fè nè wi gha hi nì na wana ne ale ni be. ¹⁴ Mu khə hamok na shyə a yəna ale wijə a ghɨ yule kpene wi. Mu khə ni beka mu bime ha Bâba Jisòs. Biyani, wùt shìki yen na shyə wijə nì yulînì, ma ghɨ hi befa ha wûn. ¹⁵ Wò shìki yə nki shyə̀ ale, gha tɨni fo ngə̂k a wâ nâ yi kwâktì ma yi hi fê chwûtè na wò kòŋàlò wûn agha. Kə wò ni na wâ nì wâ fen kum a shyə ghe a wò yə, beka wò khəlò na Klistù tì kpû ha wûn. ¹⁶ Kə wò lyi gha ye a yi jwôfà ha wò ma wò ni ghɨt ale hi yena ha gha yi be. ¹⁷ Fə̂n wù Fùyènù mò ni, a bu a shyə a yəna, a bu yi gha yi nyoni, a mò yi gha hi tè chyə chyəna chilichili, kəta yi yutì nì saŋlînì, a mô gha ghe a Yohnà Yulena bènà nì ghɨna. ¹⁸ Wùt we a wù fètà ha Klistù, chyə a lum afan, nè na Yènfù hi saŋlê, ghɨta fê kôŋà wûn. ¹⁹ Ghàhnà momhi hi tè nè kə gha ghe a ghɨ bênà nì yutìnì, nê na ghɨta hi ləma yi ləmà a ghɨna yi bimî. ²⁰ Kə ghàn bobhi fêt ye a Yènfù hi mô ma fu ti nî kum mwə̀ mù yə̂mù. Mwə̀ mù yə̂mù mù jɨ̀m yule kpene lò hi yə̂ biyani yi jwôfà wi na wùt yə shyə, ghɨ nê na wùt wùlè ni be. ²¹ Yi jwôfà na kə wùt kut nyàm makə hi nyo mu lûk makə nê nâbi ghə a wu yu afa yi mô hi nì na wâ nè wun fen. ²² Ghàn hì kəta nâbi yi bimî yì ghə kum gha mɨ ghɨ̂n, ghàn de, ma à hi khə kə ghàn à Yènfù. Jùŋ mò ha wùt we a wù nè gha, kante wi yi kantî. ²³ Biyani, wùt shihi yə a shyə, kante na ghɨ jwôfàlò, ma Yènfù lyi na wù ti bobhi gha beka wù yə shyə, kanti yi kantî na ghɨ jwôfàlò. Wùt shìki tè nè nâbi ghə, kante yi kantî na yi jwôfàlò hi nì, ma yi hi chwûtè na wù nè be.

¹ Ghàhnà ghe a ghɨ ta a yi bimî kəta hi tè gàmtè ghɨt ghe a ghɨ bota a ghɨna sù ngə̂k. Kə ghàhnà hi nê kə gha ghe a ghɨ jwôfà ha ghàhnà. ² Nâbi nde hi nê kə gha ha wâ nè wûn na wù hi saŋlê shyəma yi hi gâmtè hi ləmhi wûn. ³ Nâ Klistù tà tì ni jə gha hi tè saŋle kə ha wun a ngɨŋ. Ghɨ nyak a ŋwàklù Fùyèn na, “Ndi se a ghɨ sûlè wò atɨ̂n ti fen a mu a tû.” ⁴ Nâbi ghə te ghɨ tì nyàka a ŋwàklù Fùyèn mò kə hi yike ghàhnà shyəma ghàhnà hi khə hamok na gha ye a ghàhnà ke yênà nì yini bè gânàlò kum wunhînì nì təm a ta ghe gha Fùyènì fo ha ghàhnà. ⁵ Yènfù fo təm a ta nì wunhînì ha ghàn ma ghɨ ni na ghàn hi chyə kə te Klistù Jisòs, mô kə ha shyə̀ à mòk a ghàn a yi kwàktì, ⁶ shyəma ghàn chîntè hi kokhe Yènfù, Bè Bâba ghàhnà Jisòs Klistù, kə ha yi jwô yì mòk. ⁷ Ghàn hi fye wana ne kəbi yi ghəl te Klistù tì fye ghàn, shyəma kokhînì hi mô ha Yènfù. ⁸ Ghàn khə na Klistù tì ben ha wùt wù fètana ha ghɨt a Jûs hi chwùtì ha ghɨna na chwunu wu Fùyènù yè fena wijə. Wù tì ni ni hi lunhe chwuna we a Yènfù tì chwùna ha be be ghɨna. ⁹ Wu ben kəbi hi nì na tumu hi kokhe Yènfù kum kwohi seni yi wuni kə yi ghəl te ghɨ nyak a ŋwàklù Fùyèn na: “Kum yìna, mu wu hì kokhe wò a tumu fùtɨ̂n. Mu nè yemalò njàŋ, kokhe yi yet ya.” ¹⁰ Ghɨ ti nyak kəbi na: “Ghàn hi saŋle ghàn à ghɨt a Fùyènà a tumu.” ¹¹ Ghɨ ti fî nyak kəbi na: “Ghàn tumu nâ à jɨ̀m, ghàn hi kokhe Yènfù. Nâ ghɨt à jɨ̀m hi kokhe funfu.” ¹² Fòktì Ìsayà tî jîs kəbi na: “Wùt bè fwolò a Jesì yi tê ma wù hi saka tumu, ma ghɨna bè lem kə kwâktì yi ghɨna ha wûn bime na wù mò hi bònhè ghɨna.” ¹³ Yèn fe a fu nê ghɨta khə hamok na ghɨ bè khɨtelò shyə ghe a ghɨ ke yênà nì ghɨna, nè nêlò ma ghàn hi saŋlê nâ haŋaŋ ma wù fê fo yutìnì ha ghàn beka ghàn bime ha wûn. Fu nê ni shyəma ghàn hi khə hamok, baha kante wi yi kantî gha a ghàn a yi bimî ha wûn tohne a jyak afa a Yohnà Yulena fo ha ghàn. ¹⁴ Mu saŋlê kə nâ a mu ngɨŋ kum ghàn a wana noma beka ghàn fate chyə kə nâ chyənà yì jùŋ, khə mihè gha ye a yi mô hamok fê kpene hi tè yike ngɨŋ sanisu. ¹⁵ Mu ti nyak gha ale ha ghàn a ŋwàklù afân kə nâ a jyak hi yɨ̀ŋtì gha atɨna ha ghàn. Mu nyàkà ni beka jyak ghe a Yènfù fo ha mu na mu hi nê fêt mi yina. ¹⁶ Fu ni na mu hi mô wut wù fètana ha Klistù Jisòs, fêtà ha tumu. Mu fètà te ngàŋ à ndâ Fùyèn, fôktè tum yì jùŋ yì Yènfù shyəma tumu hi mô ni te yi fô ha Yènfù, Yohnà Yulena sô yuhe ghɨna, nê na Yènfù fyi fo tɨni nì saŋlînì. ¹⁷ Ghàh à Klistù Jisòs mò kə amok, a ni gha ye a yi ne na mu hi jala kum yi fêt ye a mu nè ha Yènfù. ¹⁸ Mu wi hi mòm hi jìs yi ghâ a bu kə ye a Klistù ne tohne ha mu. Wù ti nî mu ti lyi yen nì tumu a Yènfù ashyə̂, ghɨna ghɨ hì ywo wûn, a mô kum gha ghe a mu jìsà nì ghe a mu nè. ¹⁹ Wù ti nî, mu wu hì nê gha a kanana kə a tu nkì a tu nkì a Yohnà Yulena a jyak. Mu ti fôktì tum yì jùŋ kum Klistù kə tu lùk tù jɨ̀m, kə hi yìmì a Jèlusalèm hi yèn hi tàn a Ìlilikùm. ²⁰ Mu tòkà kôŋà kə hi tè fòktè tum yì jùŋ a tu lùk, ghɨta baha mô teka ghɨ yu gha kum Klistù afû. Mu kòŋà wi hi tè fòktì wu lùk ma ghɨta hì khəlò gha afû kum Klistù, kə yi hi kə̂kà te mu ba a wùt lò tô chyə nda. ²¹ Mu khɨŋa na yi hi mô kə te ghɨ nyak a ŋwàklù Fùyèn na: “Ghɨt ghe a ghɨ tà timi fôktì gha ha ghɨna kum wûn, bè yenalò wûn, ma ghê a ghɨ tà timi yû jə gha kum wûn, ywo khɨle gha wuni.” ²² A ni gha ye a yi ne mu hi kəta wi yu hi bèn hi yen a ghàn. ²³ Biyani, chin te mu ti mihì fêt yi mi afân, mu ti chyə̂ ha wu lɨ̀m kôŋà nâ haŋaŋ hi bèn hi yen a ghàn, ²⁴ mu khə na mu nè shihi yèn a Sibèn ma mu chyâ yen ghàn shyəma ghàhnà yena a fu yulâ ni, ma ghàn fê gamti mu, ma mu khɨli hi gbì. ²⁵ À mò nâ chîn mu yênà a Jèlusalèm hi gàmtè ghɨt a Fùyènà afû, ²⁶ kum ghɨt a bimena a Màsìdoniyà nì ghe a Àkayà chehì saŋlelò hi fo wu kâ na ghɨ gamti ghɨt a Fùyènà ghe a ghɨ fufa a Jèlusalèm. ²⁷ Ghɨna tì kwàkti hi nì ni kə a ghɨna ngɨŋ, biyani a mô kə nâ luk wu ghɨna hi nì ni beka ghɨt a Jûs tì gâmtì tumu a ghɨna chyəna yòhnà, yi hi jwôfà na tumu boŋà gamti ghɨt a Jûs nì mwə̀ me a ghɨna kəta. ²⁸ Mu nè yena ghɨna ma mu fo ka wuna nâbi yini ma mu shihi yèn a Sibèn ma mu chyâ jikti ghàn shyəma mu yen. ²⁹ Mu khə na mu bènà hi jikte ghàn ma Klistù chîntè bonhi ghàhnà nâ haŋaŋ. ³⁰ Mu chyate ghàn a wana noma na ghàn hi jə̂mà ha mu nâ nì jyaka. Ghàn hi jə̂mà kə nâ njwo ghàhnà kəta kə yi bimî yì mòk ha Bâba ghàhnà Jisòs Klistù, Yohnà Yulena fê nê na ghàhnà hi kòŋà ngɨŋsu. ³¹ Ghàn hi jə̂mà na kə ghɨt a Jùdiyà ghe a ghɨ khə wi Yènfù nê ni ngə̂k ha mu. Ghàn jəm kəbi na Yènfù ni, ghɨt a bimena ghe a Jèlusalèm hi saŋle hi fye gâmtìnì ye a mu nè yênà nì yini ha ghɨna. ³² Ghàn jəm shyəma na mu nê shihi bèn ha ghàn saŋlê, a wu yu afa Yènfù bime, ma mu fê yutì ghàhnà. ³³ Mu jə̂mà na Yènfù, Bì yì yùtì hi mô ghàn à ghɨna. Àmèn.

¹ Mu khɨŋa na ghàn hi khə Febì, a jàmtù ghàhnà a ndâ Fùyèn a Kànkɨliyà. Wù mò wut wù fètana afû. ² Wù ben, ghàn fate fyi wûn a Bâba yi yet kə nâ wu lum afa a ghɨt a Fùyènà kəta hi tè fye wana ne atɨ̂n. Ghàn fyi wûn, ghàn fo nâbi yìni gâmtìnì te wù khɨŋa beka wù ti gâmtì ghɨta, ghɨ dô kə ni, fî gâmtì nâ mu. ³ Ghàn toŋti kəbi Bìsilà ghê Àkwɨlà ha mu. Ghàh à ghɨna fètà ha Klistù Jisòs amok. ⁴ Ghɨna ti fihi mu a yi jwô yi kpû ghɨna lanti hi kpû nâ a ghɨna sù ngɨŋ. A fo wi kə mu àyòŋnà ha ghɨna, ndasu Fùyènsu tum su boŋa folò ⁵ Ghàn toŋti kəbi nôn ghɨt a bimena ghe a ghɨ chîntè a ghɨna ndâ. Ghàn toŋti Èbènetùs, a sô mù wù jùŋ we. Wù ndùku mô wut ashyə hi bime ha Klistù a yi lak yi Esiyà. ⁶ Ghàn toŋti Mèli. Wù ti fêt nâ nì jyaka ha ghàn. ⁷ Ghàn toŋti Àndɨ̀lonikùs nì Junìyàs. Ghɨna mò kəbi ghɨt a Jûs te mu, ma ghàh à ghɨna ndùku mô a ndâ chyâk amok. Ghɨna tì bimi ha Klistù ha mu ashyə̂, ghɨt a tuma Jisòs hì fate khə ghɨna nâ a jûŋ. ⁸ Ghàn toŋti Àmbìlatùs ha mu. Wù mò sô mù wù jùŋ, yikte kə Bâba wu wùn. ⁹ Ghàn toŋti Òbanùs te ghàh à wûn ndùku chîntè fêtà ha Klistù kəbi nì sô mù Sɨ̀takìs. ¹⁰ Ghàn toŋti Àbelès. Wù ti chwûtì na wù mò kə wun a tô yi bimî ha Klistù. Ghàn toŋti kəbi ghɨta a Àlìstobulùs yi sah yi nda ha mu. ¹¹ Ghàn toŋti Hèlodìyòn, wut wâhù yi lak we, nì ghɨt a sah yi nda Nàsisùs ghe a ghɨna tì bime ha Bâba. ¹² Ghàn toŋti Tìfinà ghê Tìfosà, ghɨt a Bâba ghɨ fetana, toŋti kəbi Besìs, a jàmtù ghàhnà yì jùŋ yê. Wù ndùku fêtà ha Bâba nâ haŋaŋ. ¹³ Ghàn toŋti Lufùs. Wù ti chwûtì ha mu na yi mò kə nâ wùt wù Bâba wù fètana. Ghàn toŋti kəbi ha nè wûn. Wù lyè kə mu te wâ wûn. ¹⁴ Ghàn toŋti ha Àsinkìlitùs, nì Fìlegòn nì Hemìs nì Bàtɨ̀lobàs nì Hemàs kəbi nì wana ne ghe ghê ghɨna mò amok. ¹⁵ Ghàn toŋti ha Fìlologùs nì Jùliyà nì Nelùs ghê jàmtù wûn kəbi nì Òlimbàs nì ghɨt a bimena à jɨ̀m ghe ghê ghɨna mò amok. ¹⁶ Ghàn toŋti ngɨŋ sanisu kə nâ hi chwùtè kôŋ yi ghɨt a bimena. Nôn à ghɨt a Klistù afân nâ à jɨ̀m toŋte ha ghàn. ¹⁷ Mu chyate nâ haŋaŋ a wana noma na ghàn hi tôknè kum ghɨt a ghe a ghɨ bè nì jyàhì wùni a ghàn a fùtɨ̂n, nêkhè yi bimî yani. Ghɨna chikhe yi yikî ye a ghɨ tì yike ghàn. Mu wu hì jîsà na kə ghàn hi chîntè ghàn à ghɨna! ¹⁸ Nki ghɨt mɨ ghɨ̂n fètà wi ha Bâba ghàhnà Klistù, ghɨna khɨŋa kə hi tè nè gha ghe a ghɨ foma ha ghɨna. Ghɨna jîsà gha a fomana kə hi lehe ghɨt ghe a ghɨ fate khə wi gha. ¹⁹ Nâbi nde ti yu lum we a ghàn ywo tum yì jùŋ atɨ̂n, nâ mu saŋle nâ a jûŋ kum ghàn. Mu khɨŋa na ghàn hi tofâ khə gha ghe a ghɨ jwôfà, khə wi be. ²⁰ Ghàn ni ni shyəma Yènfù fo yutìnì nì jyaka, ma ghàn chikhi Satàn kə nâ nì wulu. Bâba ghàhnà Jisòs Klistù chwuti təm a wuna jûŋà ha ghàn. ²¹ Timotì, we ghàh à wûn fètà amok ti chinhi toŋtînì ha ghàn. Lùsiyùs nì Jesɨ̀yn nì Sòsìbatà wùt wâhù wù lak ti chinhi kəbi toŋtînì ha ghàn. ²² Nâ mu Teltùs we a mu gàmtè Bôl hi nyàk à ŋwàklù yìna toŋte ghàn a Bâba yi yet. ²³ Gayùs toŋte kəbi ghàn. Mu chyə a wun a ndâ, ghɨt a bimena à jɨ̀m bênà chîntè atɨ̂n. Èlastùs we a wù kine gha wu ka a yi tèk afân ghê wâ nè ghàhnà Katùs chinhe kəbi yi toŋtî. ²⁴ (Bâba ghàhnà Jisòs Klistù chwuti təm a jûŋà ha ghàn nâ à jɨ̀m. Àmèn.) ²⁵ Kokhînì yênà ha Yènfù. Fu kəta a jyak hi nì na ghàn hi tâ a ghàn yi bimî kə yi ghəl te tum yì jùŋ ye a mu fòktè kum Jisòs Klistù jìsà. Fu ti ni ghàhnà ti khɨli tum yì jùŋ mi yìna, ma fu tî lə̂tì ha ghɨt ale nâ wu yu dâ, ²⁶ chin hì mô ma fu ti chwûtì gha mi yîn a ndan tohne gha afa a fòktì su chiksu tì nyàka kum Klistù. Fu tì jis na ghɨ ni, ghɨt à jɨ̀m bime ma ghɨ hì ywo, a mô fun fe a fu faŋa hamok. ²⁷ Kokhînì yen ha Yènfù, tohne a Jisòs Klistù a yû mù jɨ̀m! A mô kə funfu fù mòk a fu kəta kə tof wù jɨ̀m. Àmèn.