Gha Gokhena

Gha Gokhena

¹ Ghɨ̀na mò a gha ghe a Jisòs Klistù tì chwùte a ndan ha Jon. Yènfù fî fo gha mɨ ghɨ̂n na wù chwuti ha ghɨt a wuna ghɨ fetana shyəma ghɨna hi khə gha ghe a ghɨ hì khɨŋa hi gàn. À ndùku mô te wù khɨŋa na ghɨ hi khə gha mɨ ghɨ̂n, wù tum anjèl à wûn ha Jon, a mô kəbi wut wù fètana à wûn wùlè. ² Jon te wut we wù tì yena, fôktì kwok nì tum à Fùyèn kəbi nì gha ghe a Jisòs Klistù tì chwùte ha wûn a ndan, a mô nâ gha ghe à jɨ̀m a wù tì yena. ³ Jùŋ mò ha wùt we a wù taŋa gha mɨ ghɨ̂n a Yènfù fòkte ni, ghɨta yutê. Jùŋ mô kəbi ha ghɨt ghe a ghɨ ywo, fê nê gha ghe a ghɨ nyaka a ŋwàklù afân, beka yu we a ghɨ lema na gha mɨ ghɨ̂n bê gan atɨ̂n hì bakhe bênàlò. ⁴ À chinhi mu Jon ŋwàklù yina ha ghàn nôn wu ghɨt a bimena we sàmba a ghàn chyə yi lak yi Esiyà. Yènfù chwuti təm a jûŋà ha ghàn hi nì na ghàn hi chyə nì yutìnì. A mô funfu a fu mô, ma fu ndùku lâwû, mô hi bê bèn. Yènfù ghê yohnù we sàmba a wu mô ashyə̂ kpòk tù fə̀nù, chwuti təm a jûŋà ha ghàn nê na ghàn hi chyə nì yutìnì. ⁵ Jisòs Klistù tî nê kəbi ni. A mô wûn wut wù jùŋ we wù fòktè kum Fùyèn. A mô wut wù shyə̂ we a wù tì lòte a yi kpû, a saka wûn fə̂ntù te a tu mô a mbyî. Wù kôŋà ghàhnà fê mô ma wù ti fo ngɨŋ à wûn kpulò suh luŋ mù wûn hi bònhè ghàhnà a ghàhnà sùbe, ⁶ wù ni na ghàhnà hi mô wana toka ha Yènfù, fêtà te ngàŋsu ha Bè wûn Yènfù. Kokhînì nì jyaka mò ha Jisòs Klistù a yû mù jɨ̀m. Àmèn. ⁷ Ghàn yen, wù we wù hì bênà atɨ̂n à sù bàk, nâbi nde mô hi yen a wûn, bakhe nì ghɨt à jɨ̀m a ghɨ ndùku sôlè wûn nì woŋa. Nâ ghɨt à jɨ̀m a mbyî bê hi jyê kum wûn. Yi mô kə nâ hamok. Àmèn. ⁸ Bâba Yènfù, Bè jyak à jɨ̀m jis na, “Mu mò Yìmi, fê mô yi Gokhi.” A mô funfu a fu mô, ma fu ndùku lâwû, mô hi bè bèn. ⁹ À mò mu wùt wù bimena ha Jisòs. A mô mu Jon, a wâ nì wânù. Ghàhnà chîntè yena ngə̂k kə à jɨ̀m, biyani kwuta kə a təm, yute hi bè tè mò wu lùk wu fə̀n wù Fùyènù. Ghɨ che kwo lem mu a Batmòs, a mô yi lak ma jwò ti jɨŋ kat yini beka mu fòktè tum à Fùyèn, fê fôktè gha hamok ghe a Jisòs tì chwùte. ¹⁰ À ndùku mô wu tuk afa a ghɨ kokhe Bâba atɨ̂n, Yohnà Fùyènà khɨti kwâktì mi, mu yu te jyə̀ yì tâ fwo a mu yi bàm dûmà ni te yi soŋ te ghɨ toŋa, ¹¹ yì jis na, “Nyàk gha ghɨ̂n a wò yena ni, ma wò chinhi ŋwàklù àtɨ̂n ha nôn wu ghɨt a bimena we sàmba a Efisùs nì Sɨminà nì Begamùm nì Tìyàtilà nì Sadìs nì Fìlàdefìyà nì Làdisìyà.” ¹² Mu kahi wu wun hi yen nâ a jìsà nde ha mu agha, kə wu yu mu yen kə mwə̀ mù tɨ̂n sàmba te ghɨ fate nì gûl hi tè tomte lâmsù atɨ̂n. ¹³ Wùt mô a mwə̀ mù tɨ̂n a ngwùŋ, a mô Wâ Wùt ma wù ti mak njusu, su dâfà kə ni, kwut wu kwô a wun a ngàŋtù, ma ghɨ fati nì gûl. ¹⁴ Nyuŋsu wunsu tusu fufa kə ni bwu, se a wuna ŋwântè kə ni te chwûlù wùsu. ¹⁵ Wulu wunu njêntè kə ni te kah a jûŋà ale te ghɨ nyoka wu wùs, jyə̀ wûn kwô te fenani yè kwô, dùmà kə ni. ¹⁶ Wu mô ma wù ti khɨti njènû sàmba a wun a kpen wu wo ta, fâ gbɨ̀liŋi fwu ben a wûn a yi jwô, kə̂k yi wuni bana kə te yuchwî a wu yu afa chwì bana ta. ¹⁷ Mu yen ben nì wûn ni, fen a wûn ashyə̂ hì mô kə ni te mu kpulô, biyani wù lem a wo wuna ghɨ kpen wu wo ta a mu a tû, jis ha mu na, kə mu fan, na yi mò yìmi, fê mô gòkhi a gha à jɨ̀m, ¹⁸ fê mô kəbi wûn we a wù chyə. Wù jis na yi tî kpû kahi hì chyə̂, mô hi tè mò kə yi mô a mu yu mù jɨ̀m. Wù fî jis na yi kəta a chwok a yi a wô, kəta jyak a kpo, fê kəta jyaka hi chwoka yi lak yi ghɨt a kpona. ¹⁹ Wù jis ha mu na, mu nyak gha ghe a mu yena a wu yu mefû nì ghe a ghɨ baha mô hi gàn. ²⁰ À mò gha a letena a kanana ghe a ghɨ mô kum jèn mê sàmba a mu yena a wûn a kpen wu wo ta kəbi nì mwə̀ me sàmba a ghɨ ye tomte lâm sê atɨ̂n ma ghɨ fate nì gûl yâ. Jèn munâ sàmba, mò anjèlsù Fùyènsu sàmba, su lyi luk wu ndasu ghɨt a bimesu se sàmba. Mwə̀ munâ a ghɨ tomte lâmsù atɨ̂n sàmba ni mô ndasu ghɨt a bimena se sàmba.

¹ Wù jîs kəbi ha mu na, “Nyàk ha anjèl à Fùyèn ye a yì mò a chìntê yì ghɨt a bimena a Efisùs na: Tum yìna lo ha mu we a mu kəta jèn me sàmba a mu kpen wu wo ta, gbê fùtɨ̂n à mwə̀ afa a ghɨ fate nì gûl na ghɨ hi tomte lâmsù atɨ̂n. ² Mu khəlò fêt yani. Mu khə te ghàn fètà kwoka kə nâ nì jyaka nì təm a yutena, fê wunhê. Mu khə na ghàn de wi ghɨt a təm a be moŋ. Ghàn mômhè hi chwùtè banhî ghɨt ghe a ghɨna jìsà na ghɨna mò ghɨt a tuma ha Jisòs biyani bu. Yi chwûtè kəbi na ghɨna mò kə ghɨt a fəma. ³ Mu khə na ghàn kwuta lò təma, yena sù ngə̂k, su dô kə ni kum mu, bota wi. ⁴ Biyani, mu ngane ghàn kum gha yì mòk, yi mô na, ghàn fè kəta wi kôŋì ha mu te ghàn ndùku kəta ashyə̂. ⁵ Ghàn kwakti lum we a ghàn chehì mô atɨ̂n ashyə̂, ma ghàn kahi təm ghana a ghàn a sùbe ma ghàn hi fêtà kə te ghàn ndùku fêtà. Ghàn ki faŋ hi nì ni, ma mu bê fihi shyə ghe a lâm sanisu mò a tô atɨ̂n. ⁶ Gha jûŋì ye a ghàn nè mò na, ghàn bànàlò gha yile, mu boŋa bânà. Gha tɨni mô na ghàn bànàlò gha ghe a ghɨt ghe a ghɨ gbê a Nikolàs yi bàm nè. ⁷ “À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨt a bimena. À ki nô yə nâbi nde be, ma mu ni ma wù hi kuta tamu fùkàk fe fu fo chyə, ləma a Yènfù à fùk.” ⁸ Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Sɨminà na: Tum yina lo ha mu we a mu mò Yìmi fê mô kəbi Gòkhi, a mô mu we a mu tì kpo, kaha hì chyə̂. ⁹ Mu khəlò ngək se a ghàn yena. Mu khə na ghàn fufalò biyani mô ghɨt a chika. Mu khə gha a be ghe a ghɨt ghɨ̂n a ghɨ kama chwùtè na ghɨna mò ghɨt a Jûs ni, jìsà kum ghàn. Ghɨna mò à ghɨ̂t a Satàn a nòn. ¹⁰ Ghàn yen! Kə ghàn hi fânà ngək ye a ghàn lye yênà atɨ̂n. Deblì nè nêlò na ghɨ khɨti ghàn ghɨ le ma lem a ndâ a chyâk, a mô kə yi mômhì te yi bênà ha ghàn. Ma ghàn nê yen ngə̂k afû a mu tuk ìwûm. Ghɨ hì mô nâbi hi ywe ghàn, ghàn hi samhe kə ha mu, shyəma mu nê fo chyə ye a yì bè mê wi ha ghàn, a mô shyə ghe a ghàn nò hi yə̂. ¹¹ “À hì tofa nâbi nde, wu hi tòkà yute gha ye a Yohnà Yulena jìsà ha nôn à ghɨt a bimena. À no yə nâbi nde be, ma wù bê tè fè kpo jə̀ kpu kumteni.” ¹² Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Begamòs na: Tum yina lo ha mu we a mu kəta fâ gbɨ̀liŋi ye a yi tofa. ¹³ Mu khəlò luk we a ghàn chyə. Ghàn chyə wu lùk Satàn saka fə̂n wù wunu afû. Ghàn tì fati khɨti bimî yani, faŋ hi mana mu nâbi wu tuk afa ghɨ tì ywe Antibàs te wù ndùku jîsà kum mu yâ, ghɨ ywe wut à mù wù bimena wuna atɨ̂n, wu lùk afa a Satàn ndùku saka fə̂n wù wunu. ¹⁴ Biyani, mu ngane ghàn a gha ale. Ghɨt ale mò afa jûmtè yiki Balàm. Wu tì yiki Balàk na wù hi nê ghɨt a Isalì na ghɨ hi yə mwə̀lû ma ghɨ fo ha mosòmù, fê chyə nì ywena makə lɨmànà, a kəta wi ghɨna. ¹⁵ Ghàn kəta kəbi ghɨt ale ghɨ jûmtè yikî yi Nikolàs. ¹⁶ Ghàn kahi təm ghana a ghàn a sùbe, bu ni, ghafa fè dâfà wi shyəma mu ben wu lùk afa a ghàn mò ma mu no ghɨt mu ghê nì fâ gbɨ̀liŋi ye a yi fwo a mu yi jwô. ¹⁷ “À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨ̂t a bimena. À no yə nâbi nde be, ma mu bê fo shyə a yəna a letena ale ha wûn, ghɨ toŋte na manà, ma mu fo ti yi fufani yile ha wûn ma ghɨ ti nyak yet yi fe yile atɨ̂n, wùt khə wi, a bu kə wùt we a mu fo ti tɨni ha wûn.” ¹⁸ Wù jis kəbi ha mu na, “Nyàk ha anjèl à Fùyèn ye a yì mò a chìntê a ghɨt a bimena a Tìyàtilà na: Ghɨ̀na mò a gha ma à jis Wâ Fùyèn we se wuna mwântè te chwûtù wùstu yâ, wulu wunu njêntè kə ni te kaha jûŋà te ghɨ bâŋhè wu wùs. ¹⁹ Mu khəlò fêt yani. Mu khə kôŋ ye a ghàn kəta nì bimînì, khə te ghàn fètà ha ghɨt ale, fê kwuta a təm. Ghàn fètà kə nâ chin chyâ te ghàn chehì fêtà ashyə̂. ²⁰ “Biyani mu ngane ghàn kum kə gha yin ni. Ghàn ti de Jesebèl a wùt wù ywên wuna a wù jìsà na yi mò fòktì wù chìk ni, wù lehe ghɨt a ma ghɨ fetana, yike ghɨna na ghɨna hi chyə̂ nì ywena, chyə̂ kəbi nì lɨmànà, a kəta wi ghɨna, fê yike na ghɨna hi yə mwə̀ mù yə̂mù ma ghɨ fo ha mosòmù. ²¹ Mu fo yu na wù kahi təm yi wuni ma wù de besu wunsu biyani wù tunhî na yi wi hi dè. ²² Ghàn hi khə na mu nè nêlò, ma wù yaf à nìŋe à faŋ a wu khɨ̀. Mu nè folò ngə̂k yì chìk ha ghɨt ghe a ghɨ chehì chyə nì wûn wu yu afa ghɨna faŋa hi kahe təm a ghɨna a sùbe afa ghɨna chehì nê ghê wûn. ²³ Mu nè ywitelò wana wuna, ma chìntisu ghɨt a bimenasu nâ sù jɨ̀m hi khə na à mò mu we a mu khə kwâktì tù ghɨ̂t tù, khə gha ghe ghɨ mô a ghɨna təm. Mu nè lâkà ghàn kə yi ghəl te nâbi nde chehì fêtà. ²⁴ “Biyani, ghàn ghɨ le mò a Tìyàtilà ma ghàn ti tunhî na ghàn jùmtè wi yikî wun mu yê, fî tunhi na ghàn nè chîntè wi a gha afa Satàn ghê jùmtìsu wunsu jìsà na à mò nâ a gha a letena a ta. Mu jìsà ha ghàn na, mu nè fê bufa kpenhe wi shyə ale ha ghàn. ²⁵ Mu jìsà kə na, ghàn fatè khɨti bimî yani hi bê tàn shyəma mu bê kahè ben. ²⁶ “À no yə nâbi nde be, hì nê kə a gha ghe a mu khɨŋa hi tàn a gòkhi, ma mu bê fo jyaka ha wûn ma wù hi saka lak tu. ²⁷ Wu nè hì saka ghɨta a tu lak afân kə nâ nì jyaka, gwôhè ghɨna kə nâ te ghɨ yè kûnà khɨŋa chyaka. À nè fo kə nâ mu jyak mɨ ghɨ̂n kəbi yi ghəl te Bom fo ha mu. ²⁸ Mu bè folò njênfù mbisìmbisi ha wùt mu we a wù no yə be. ²⁹ “À hì tofa nâbi nde, wu hi tôkà yute gha ye Yohnà Yulena jìsà ha nôn à ghɨt a bimena.”

¹ Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Sadìs na: Wùt we a wù kəta yohnù Fùyènù we sàmba, kəta njèn me sàmba jis na, Mu khəlò fêt yani. Ghɨta yena na ghàn chyə lò biyani ma ghàn ti kputî. ² Ghàn yèma ma ghàn hi tôknè nì bimî yi teta ye a ghàn kəta, bu ya ma yi mê mihi beka mu yena na fêt yani kwoka kpene wi a Yèn famfu ashyə̂. ³ Ghàn kahè kwàkti gha ghe a ghɨ tì yike ha ghàn nì ghe a ghàn tì ywo. Ghàn kahi təm ghana a ghàn a sùbe ma ghàn hi nê gha atɨna. Ghàn ki faŋ hi yèmà, ma mu bûŋhè ben ha ghàn kə te wùt wù chwoŋana, wu yu afa ghàn khə wi. ⁴ “Biyani ghɨt ale baha làwû a Sadìs teka ghɨna nuk njusu ghɨna su nì be. Ghɨna bè mâkàlò njusu fufasu ma ghàh à ghɨna bê hi gbê ghanê beka ghɨna yule kpenelò. ⁵ Ghɨt ghe a ghɨ no yə, bè lafalò kəbi nì njusu fufasu. Ma mu bê tê chikhe jə̀ yet a ghɨna a ŋwàklù yì bòn. Ma mu bê timè jis kə nâ a ndan na mu khəlò ghɨna a Bom ashyə̂ ghê anjèlsu wunsu. ⁶ “À hì tofa nâbi nde, wu hi tôkà yute gha ye Yohnà Yulena jìsà ha nôn à ghɨt a bimena.” ⁷ Wù jis ha mu na, “Nyàk ha anjèl à Fùyèn ye a yì mò a chìntê ghɨt a bimena a Fìlàdefìyà na: À gha ghɨ̂n jis wùt we a wù yule, mô kə hamok, kəta à chwok a Defìt a ndâ, chwoka jwo nda, wùt bu hi fà, wu fa, wùt bu hi jìmì. ⁸ Mu khəlò fêt yani. Ghàn yen, mu ti jîmì de jwo nda ha ghàn, nâ wùt bu hi sèn. Mu khəlò na ghàn tòkà kəta wi jyaka, ma ghàn ti bimi ha mu, tê mana jə̀ mu. ⁹ Ghàn hi khə na mu nè nêlò ghɨt a Satàn à nòn ghe a ghɨ wama jîsà na ghɨna mò ghɨt a Jûs bê ngumti a ghàn ashyə̂ ma ghɨ yen na mu kòŋàlò ghàn. ¹⁰ Mu nè bônhèlò ghàn a wu yu afa ngək bèna a mbyî yì jɨ̀m hi mòmà ghɨt ghe a ghɨ chyə a mbyî, beka ghàn ywo gha ye a mu jîsà na, ghàn hi wunhê. ¹¹ À faŋ kə fu yulâ ni shyəma mu ben. Ghàn hi samhe kə ha mu, kə wùt nè fye maktu wanu we a ghàn no yə. ¹² À no yə nâbi nde be, ma mu ni ma wù hi mô tôk à nda Yèn famfu, ma wù bê tè fè fwo atɨ̂n. Ma mu bê nyak yet yi Yèn famfu a wun wu wùn, ma mu fê nyak yet yi tèk yi chiki yi Fùyènì, a mô Jèlusalèm yì fê. Yi bè lô ha Yèn famfu a nyə̂ ma yi chwô ben. Ma mu bê nyak kəbi yet yi mi yi fe a wun wu wùn. ¹³ “À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨt a bimena.” ¹⁴ Wù jis kəbi ha mu na, “Nyàk ha anjèl à Fùyèn ye a yì mò a chìntê a ghɨt a bimena a Làdisìyà na: Yìna ni mò tum ma yì lo ha we a ghɨ toŋte na, Àmèn. A mô wûn wùt wù jùŋ we a wù mò, jîsà hamok kum Yènfù. Yènfù tì fati nâbi ghə a mbyî tohna a wùn. ¹⁵ Mu khəlò fêt yani. Ghàn lùmà wi a ghàn a yi bimî, sana wi. Yi jwôfà na ghàn hi sanâ, bu ya ghàn hì lûmà! ¹⁶ Te ghàn hì chînà mò kə ni, sana wi, lûmà wi, mu te manalò ghàn. ¹⁷ Ghàn jìsà na ghàn kətalò ka, ma ghàn ti ghaklî fè gha wi shyə ale. Ghàn jîsà ni khə wi na ghàn mò bûkù ghɨ̂tù, yena ngə̂k. Ghàn fufalò, ma ghàn ti fêf, fê gbê nì sah a yima. ¹⁸ Mu tobhe ghàn na ghàn yun kàntè gûl ha mu ma ghɨ twi wu wùs, ma ghàn hi mô ghɨt a mu ka. Ghàn yun njusu fufasu ma ghàn mak à baŋ wun wanu atɨ̂n, kə ghàn hi gbê wumê. Ghàn kina fo ma ghàn lem a ghàn a sê shyəma ghàn hi yena luktu. ¹⁹ “Mu njaŋa ha ghɨt ghe a mu kòŋà, fo ngə̂k, tihe ghɨna. Ghàn hi lûmà. Ghàn kahi təm ghana a be. ²⁰ Ghàn yen. Mu mò a yi jwô ndâ kûmtè, ma à yu nâbi nde jyə̀ mì jîmìlò, ma mu lyê ben, ma ghàh à wûn hi mô amok fê yə̂ amok. ²¹ À no yə nâ nâbi nde be, ma mu ni ma wù ben ma ghàh à wûn ndokò a mu lùk wu fə̀nù. Kəbi yi ghəl te mu hì mô ma mu ti no yə̂ hì mô ghàh à Bôm a wun wu lùk wu fə̀nù. ²² “À hì tofa nâbi nde, wu hi tôkà yute gha ye Yohnà Yulena jìsà ha nôn wu ghɨt a bimena.”

¹ À ndùku mô te gha mɨ ghɨ̂n chyàla, gha fî fwo a mu yi kə̀k, jwo ndâ jîmì a nyə̂. Jyə̀ ye a mu tì ywo yi jîsà ha mu yâ, dûmà te yi soŋ jis ha mu na, “Kwok bi afân ma mu chwuti gha ye a yi kəta hi gàn ha wò.” ² Kə ni, Yohnà Fùyènà khɨti kwâktì mi, mu yen kpok wu tù fə̀nù a nyə̂, wùt mô atɨ̂n, ³ njêntè jwôfà kə ni te ti jasbà nì ti kàniliyà, ma fìlinjoŋi ti jɨŋ kat kpok wu tɨnu boŋa njêntè jwôfà kə ni te ti èmelà. ⁴ Kpòk mù tù fə̀n mùlè hì mô mbà njwòsù kìk ma mù ti jɨŋ kat kpok wu tù fə̀n mu wê, chəhsu mô atɨ̂n ma su ti mak njumù fufamù, so fotu tu fə̀nù ma ghɨ fati nì gûl. ⁵ À ndùku mô ni, wuli mwânà, fê bwatê wu lùk afû, jyesu fwo bê afû. Tôs su lesu hì bana afû sàmba, a mô Yohnà Fùyènà. ⁶ À hì mô kəbi ashyə̂ kpòk afû, shyə ale mô afû kə̂kà ni te wu lwî ma ghɨ fate nì mìjô, wu bana tohne ni te mte. Mwə̀ mù yòhna mùlè mù kìk hì mô a kwôkà ma mù ti jɨŋ kat kpok wu tɨnu, kəta a se kə wun wù jɨ̀m, kəta ashyə̂, kəta kəbi a yi bàm. ⁷ Yohnà ashyə hì kə̂kà te bìkəm, kùmti kə̂kà te mbòŋ, ale kəta yi kə̂k, yi mô te kə̂k yi wûtì, a gokhena mô ni te mbùk te yì fela. ⁸ Mwə̀ munâ ndùku mô, nâbi ghɨ̀ni shyə kəta tu ghâ tufa, kəta a sê kə wu wun wù jɨ̀m. Mù hì yema njàŋsù kə yû mù jɨ̀m, yema nchwì yema ntuksu jîsà na, “Yulînì, Yulînì, Yulînì, Bâba Yènfù a Bì jyak à jɨ̀m yulelò. Wò ndùku lâwû, mô chîn, fê mô hi bê bèn!” ⁹ Mwə̀ muna kolo hì yema njàŋsù, fo àyòŋnà fê fo kokhînì nì ngumlînì ha wùt we a wù mò a wu kpòk wu tu fə̀nù afû, a wûn we a wù mò a yû mù jɨ̀m. ¹⁰ Wù ndùku yema nâbi wùni yu, chəh se mbà njwòsù kìk, fen a wùt we ashyə̂ wù mò wu kpòk wu tu fə̀nù yâ, ghɨ hi ngumle wûn we wù mò yu mù jɨ̀m. Ghɨna hì chwokte kəbi fotu wu ghɨna tu fə̀nù we ghɨ lema ashyə kpòk wu tu fə̀nù mu wê, ghɨ hi yema toŋa jîsà na, ¹¹ “Bâba wâhù nì Yèn fahifu, wò kpenelò hi fye yi kokhî, nì ngumlînì yi kpenê, beka à tì koŋ kə wò na mwə̀ mù jɨ̀m hi mô, ki fatî.”

¹ Mu fî yen we a wù ndùku mô wu kpòk wu tu fə̀nù yâ, ma wù ti khɨti buk yi ŋwàklù a wun a kpen wu wo ta, ma ghɨ ti nyak atɨ̂n kə bâh wù jɨ̀m. À ndùku mô ni ma ghɨ ti le jwo tɨni nì le, luktu sàmba. ² Mu yen anjèl à Fùyèn yì chìk yìlè yi kəta a jyak, yì bwat jis na, “À mò nâ nde a wù kokne kpene hi bə̀h a le ghɨ̂n hi yèntì a ŋwàklù yìna agha?” ³ Biyani wùt hì bu a nyə̂, bu a chyə̂, bu yi lak yi ghɨt a kputena a wù ndùku mô hi bə̀h à ŋwàklù àtɨ̂n hi ke yen gha ye a yi mô a fùtɨ̂n àtɨ̂n. ⁴ Mu jî nâ haŋaŋ beka wùt ndùku kpene wi hi bə̀h a ŋwàklù atɨ̂n makə hi yena gha ye a yi mô a fùtɨ̂n àtɨ̂n. ⁵ Chəh yìlè ki jîs ha mu na kə mu fi jî beka bìkəm yì sah yi nda Judà, a mô wan a yi sah yi nda Defìt ti no yə̂, hì mô hi bə̀htì a le mu ghê a tu lùk afû sàmba hi yèntì ŋwàklù àtɨ̂n. ⁶ Mu yen Wâ Njyə̀ wu mò wu lùk afa a kpok wu tu fə̀nù mu we ndùku mô atɨ̂n, ma mwə̀ mù yòhna me mù kìk nì chəh se mbà jwòsù kìk a su jɨŋa kata Wâ Njyə̀. À mô ni Wâ Njyə̀ àtɨ̂n kə̂kà te ghɨ ti sê. Yi kəta sesu sàmba nì se sàmba, a mô yohnù Fùyènà sàmba te ghɨ tuma kə mbyî yì jɨ̀m. ⁷ Wâ Njyə̀ atɨ̂n yen fyi ŋwàklù àtɨ̂n a wùt we a wô a wù ndòko a wu kpòk wu tu fə̀nù yâ. ⁸ Kə wu yu te wù fye bena ni, mwə̀ mù yòhna mê mù kìk nì chəh se mbà njwòsù kìk fen a wun ashyə̂. Nâbi nde hì kəta yi luŋ nì kaŋa ma ghɨ fate nì gûl, nì leŋi atɨ̂n ma yi ti lûn. Leŋi tɨni ndùku mô jə̂m tu ghɨt a Fùyènà. ⁹ Ghɨna fî yem njàŋ yì fê, yi jîsà na: “Wò kpenalò hi fye ŋwàklù yìna, hi bə̀htì a le ghe a ghɨ mô atɨ̂n, beka ghɨ tì ywi wò, wò yun wu tu ghɨ̂t tù ma ghɨ fwu ben kə a sah a ndâ à jɨ̀m, jîsà tu jîs kə tù jɨ̀m, a mô à ghɨ̂t a tu lak tù jɨ̀m a mbyî, kə̂kà kə tù kə̂k tù jɨ̀m. Wò yun wu tu ghɨna nì luŋ mâ, wò kahi fo ghɨna ha Yènfù. ¹⁰ Wò ti nî na ghɨna hì mô yi sah yi nda ngàŋsù ndâ Fùyènsu, fê mô wana toka ha Yènfù ghàhnà fù. Ghɨna bê hi saka mbyî yìna.” ¹¹ Mu shihi kî, yen anjèlsù Fùyènsu, su dô chyâ kamsu, ghɨ bu hi taŋa khɨlî, te su time jɨŋa kata kpok wu tu fə̀nù wê, bakhe nì mwə̀ mù yòhna mù me mù kìk nì chəh sê. ¹² Ghɨna yema njàŋ nâ a jyə̂ yì tâ, jîsà na: “Wâ Njyə̀ we a ghɨ tì ywe kəta a jyak nì ghaki nì tofu nì ngumlînì nì ngaŋtînì, yi kpenê. Ghɨ kəta hi tè ngumle wûn, fo kokhînì ha wûn, fê bəmhe wûn!” ¹³ Mu ywo nâbi ghə ghe a ghɨ mô a nyə̂ nì a chyə̂ nì yi lak yi ghɨt a kputena nì a jwò yì chìk nâ nì mbyî yì jɨ̀m, yema njàŋ jîsà na: “Ha wûn we a wù mò wu kpòk wu tu fə̀nù mô kəbi Wâ Njyə̀, ghɨ kəta hi tè bəmhe wûn fê ngumle wûn, fo kokhînì ha wûn nì jyaka a yu mù jɨ̀m!” ¹⁴ Mwə̀ mù yòhna mù me mù kìk fîsì na, Àmèn! Chəh se fen a chyə̂ hì ngumle Yènfù ghê Wâ Njyə̀.

¹ À ndùku mô kə wu yu mefû, mu yen te Wâ Njyə̀ we bə̀ha le ghɨ ashyə a fùtɨ̂n à wule afa sàmba. Mu yu te shyə a yohna ale atɨ̂n à mwə̀ mù yòhna mù afa mù kìk bwata ni te wuli, jis na, “Fwu bî!” ² Mu shihi kî, yen nyàm à kwaŋ yì fufana yìlè, wùt mô a tô atɨ̂n kəta fù chyâk. Ghɨ fo a fot a tu fə̀nù ha wûn, wu nyɨŋ fwu te wut a wù yusa tuma woŋi, yə kə yi yə̂, mô hi fè hi tum hi yə̂. ³ Wâ Njyə̀ we fî bəh a le ale nâbi wùni yu, mu fî yu te kùmti a shyə̀ a yohna ale atɨ̂n a mwə̀ afa mù kìk jìsa na, “Fwu bî!” ⁴ Nyàm à kwaŋ yìlè fî fwû, bâŋà kə ni. Ghɨ fo jyaka ha wùt we wù ndùku mô a tô àtɨ̂n, fî fo yi fâ yi gbɨ̀liŋi, yi dâfà kə ni, na wù lohi woŋi a mbyî, ma ghɨta hi ywite wana ne. ⁵ À ndùku mô te wù fe bəha a le na wu hi mô wù tât, mu fî yu te shyə a yohna ale fè jîsà kə na, “Fwu bî!” Mu yen nyàm à kwaŋ yì finana, ma wùt we a wù nyiŋa a tô àtɨ̂n ti khɨti mwə̀ me a ghɨ fêkà jit yi mwə̀li atɨ̂n, mù bà a wun a wô. ⁶ Mu yu jyə̀, yi kwô ni te jyə̀ wùt atɨ̂n à mwə̀ afa mù kìk, yi jìsà na, “Ka fèt wu tuk wu fublù kpene kə hi yun kilù wît yì mòk makə hi yun kilù a belì sù tât. Biyani kə wò kum gutû nì lùkû!” ⁷ Wâ Njyə̀ àtɨ̂n bəh a le ale na wu hi mô wù kìk. Mu yu te shyə a yohna a gokhena jìsa na, “Fwu bî!” ⁸ Mu kî, yen nyàm à kwaŋ yìlè yi ndyaŋte mô kə ni. Yet yi wùt we a wu ndùku nyiŋa a tô àtɨ̂n mô yi Kpû. À mô yâ Lak yi ghɨt a kpona jûmtè wûn. Ghɨ fo jyaka na mwə̀ mu munâ jyati chyə bâh wù kìk, ma lyi bâh à mòk ma ywiti ghɨt ghe a ghɨ mô atɨ̂n. Ghɨ ywiti ghɨt atɨ̂na nì fâ yi gbɨ̀liŋi. Ghɨta kputî kum jɨŋ yì be nì yaftu kana tu. Nyamsu be se a su mô a chyə̂ ywiti ghɨt ale. ⁹ Wâ Njyə̀ we bəh a le ale na wu hi mô wù tân, kə wu yu, mu yen yohnù ghɨt ghe a ghɨ tì ywite njwo ghɨna ndùku fôktè gha yi Fùyèn fê mô te sù bɨ̀n à sak kum gha Fùyènì. Wu ndùku mô yi sah à baŋ a yi fo. ¹⁰ Yohnà tɨnu bwat nâ nì jyə̀ yì tâ na, “Bâba, wò kəta kə jyak à jɨ̀m, yulê, fê jîsà kə hamok! Wò nè mô tânà yàni shyəma wò sak ghɨt ghɨ̂n a chyə̂, hi fo ngə̂k ha ghɨna te ghɨna tì boŋa ywiti ghàh agha?” ¹¹ Ghɨ fo njusu fufasu na yohnù tɨnu mak jis na, wu motè kə fùjiti hi tàn shyəma ghɨt atɨ̂na nê ywiti mihi wana ne ghɨna ghe a ghɨna ndùku mô hi ywitî, ma kwok à kpên. ¹² Wâ Njyə̀ we hì bəhà bê nì le ale ni na wu nê hi mô tufa nâbi yini, mu yen kùn yì bəmana te yì sena, fî yen te yuchwî kaha hì fina kə te fùchî, njoŋ kahi hì bâŋà ni te mu luŋ, ¹³ njènû hì chemle a chyə̂ kə ni te tamu fikù a wu yata mbɨ̀ŋ teka wu baŋ, a wu yu afa fufa ta shìkà. ¹⁴ Nyə̂ ngabli kə ni te ŋwàklù a wu yu afa ghɨ lɨma, samilò, kunsu chiksu sù jɨ̀m nì luk te a tu mô atɨ̂n à jwò samî a tu lùk afa su ndùku mô atɨ̂n. ¹⁵ Fə̂ntu mbyî tu nì ghɨt a tihena nì tu sù sojà nì ghɨt a chika nì ghɨt ghe a ghɨ kəta jyaka, nâ nì ghɨt ale ghɨ̂n à jɨ̀m, makə wu kwôs, makə ghɨt ghe a ghɨ kəta ngɨŋsu ghɨnasu, tet lyi let a tu tə̀n, nì kəbi sah à a tu wo afa a tu ndùku mô a sù kùn, ¹⁶ hì bwata jîsà ha kunsu nì wotu na, “Ghàn fen a ghàh a tû ma let ghàh kə wùt we a wù mò wu kpòk wu tù fə̀nù yen ghàh, Wâ Njyə̀ fê fo ngə̂k ha ghàh beka wu lâ wu baŋanu. ¹⁷ Yi mô kə nâ hamok na tuk wu chiku we a ghɨna chwùtè lâ wu baŋanu atɨ̂n ti kpên, nâ wùt wù mòk bu hi têt.”

¹ A yi bàm atɨ̂n, mu yen anjèlsu Fùyènsu sù kìk, su mô a tu bûlà tu mbyi tù kìk. Anjèlsu tɨnsu ndùku mô ma su ti khɨti fufa na kə ghɨ hi chyâlà a mbyî makə a jwô makə hi nèkhè fukâk. ² Mu fî yen anjèl à Fùyèn yìlè yi kəta a le Fùyèn fe a fu chyə a wun a wô. Yi fwo bênà lumu a bàh afa yuchwî sata. Yì bwat nâ a jyə̂ yì tâ ha anjèlsu Fùyèn se sù kìk a Yènfù tì fo jyaka ha sinsu na su hi bobhe mbyî kəbi nì jwò yì chìk yâ ³ jis na, “Kə ghàn bobhi mbyî makə jwò makə mu kâk bu na ghàh lem chwe a ghɨta yulu shyə ghe a ghɨ fêtà ha Yènfù ghàhnà fu.” ⁴ Mu yu te ghɨ fokti ghɨt ghe ghɨ lema chwèna. Ghɨna ndùku mô ghɨt kamsu wu wə nì ghɨt kamsu mkìk njwòsù kìk, ma ghɨ fwo a sah a nda ghɨt a Isalì njwòsù bà. ⁵ Ghɨ fwu kamsu njwòsù bà a yi sah yi nda Judà, fwu kamsu njwòsù bà a yi sah yi nda Lubèn, fwu kamsu njwòsù bà a yi sah yi nda Gâd. ⁶ Ghɨ fwu kəbi kamsu njwòsù bà a yi sah yi nda Ashà, fwu kamsu njwòsù bà a yi sah yi nda Naftalì, fwu kamsu njwòsù bà a yi sah yi nda Mànasì, ⁷ ghɨ fwu kamsu njwòsù bà a yi sah yi nda Simùn, fwu kamsu njwòsù bà a yi sah yi nda Lefì, fwu kamsu njwòsù bà a yi sah yi nda Ìshakà, ⁸ fwu kamsu njwòsù bà a yi sah yi nda Sebulòn, fwu kamsu njwòsù bà a yi sah yi nda Josèf, fî fwu kamsu njwòsù bà a yi sah yi nda Benjamìn. ⁹ Yi bàm atɨ̂n, mu yen a nôn a ghɨt ale, ghɨ bu hi taŋa mìhì, ghɨt atɨ̂na kəta kə tu kə̂k tù jɨ̀m ma ghɨ fwu ben kə a sah a nda à jɨ̀m, ghɨ fî fwu kə tu lak tù jɨ̀m, jîsà kə tu jîs tù jɨ̀m. Ghɨna mô ma ghɨ time ashyə wù kpòk wu tù fə̂n wù Wâ Njyə̀ ashyə̂. Ghɨna ndùku mô ma ghɨ ti mak njumù fufamù, ma ghɨna ti khɨti châlànù a ghɨna wu wô, ¹⁰ ghɨna hì bwata nâ nì jyə̀ yì tâ jîsà na, “A bònhi Yènfù ghàhnà fù fe fu mô wu kpòk wu tù fə̀nù ghê Wâ Njyə̀ ghàhnà!” ¹¹ Anjèlsu Fùyèn sù jɨ̀m timi jɨŋ kat kpok wu tù fə̀nù we, ghɨ fi jɨŋ kat chəh sê kəbi nì mwə̀ mù yòhna me mù kìk, mù fen kuhi kə̂k tu ghɨna tu hì kokhe Fùyèn, ¹² jîsà na, “Àmèn, bəmhînì yen ha Yènfù ghàhnà fu nì kokhînì nì yòŋnà nì ngumlînì. Fu kəta jyaka nì tofu a yû mù jɨ̀m! Àmèn.” ¹³ Chəh yìlè buf ha mu nâ, mu khəlò ghɨt mɨ ghɨ̂n a ghɨ maka njumù fufamù ni agha, nì luk we a ghɨna fwo atɨ̂n agha? ¹⁴ Mu fîsì ha wun na, “Mu khə wi a Bèbɨn, fòkti ha mu.” Wu ki jîs ha mu na, “Ghɨna mò a ghɨt ghe a ghɨ tohne atɨ̂n à ngə̂k yì bəmana afâ. Ghɨna ti sû njumù ghɨna nì luŋ mù Wâ Njyə̀, mù hì fufa kə ni. ¹⁵ A ni gha ye a ghɨna time ashyə̂ kpòk wu fə̀n wù Fùyènù, fêtà ha funfu nchwì nì ntuksu a wun a ndâ. Wùt we a wù mò wu kpòk wu tù fə̀nù mô ghê ghɨna, khɨ̂ŋtè ghɨna, ¹⁶ ma jìŋ bê tê fè yafa jə̀ ghɨna, ma kuŋ à mòlû bê tê fè yima ghɨna. Ma ghɨna bê tê fè ywo Chwì makə luktu luma tu, ¹⁷ beka Wâ Njyə̀ we a wù mò atɨ̂n à wu lùk wu tù fə̀nù hì kinelò ghɨna. Wù nè lyê yênà nì ghɨna wu lùk afa jwosu yutesu mò fo chyə ye a yì bè mê wi, ma Yènfù yâhà mihi semù ghɨna.”

¹ À ndùku mô te Wâ Njyə̀ bə̀ha le ale, na wu nê hi mô sàmba, luktu china kə nyə̂ ni moŋ hi tàn a bəh a mbɨŋlu. ² Mu yen anjèlsu Fùyènsu se sàmba a su time a Yènfù ashyə̂ ma ghɨ ti fo soŋtu ha ghɨna sàmba. ³ Anjèl à Fùyèn yìlè ben timi ashyə̂ a baŋ a yi fo, kəta kaŋ ghe a ghɨ nyôkà leŋi atɨ̂n ma ghɨ fate nì gûl. Ghɨ fo leŋi ha wûn yi dô kə ni na wù nyok à bakhe a jə̂m tu ghɨt a Fùyènà, ma wù fo te yi fô a tô baŋ a yi fo afa a ghɨ mô ashyə kpòk wu tù fə̀nù, baŋ atɨ̂na mô ma ghɨ fate nì gûl. ⁴ Anjèl àtɨ̂n nyok leŋi tɨni atɨ̂n à kaŋ afû, lɨkfu tɨnfu chîntì nì jə̂m tu ghɨt a Fùyènà hì fwo kwoka a Yènfù ashyə̂. ⁵ Anjèl à Fùyèn ye lyi kaŋ a yi leŋ ghe chuf wusu a bâŋ a yi fo afâ lem wu lun atɨ̂n, wù suh chwohi a chyə̂, kə wu yu, wuli hì wamâ, bwatê, ghɨ ywo jyesu, luktu senâ. ⁶ Anjèlsu Fùyèn se sàmba a su ndùku kəta soŋ te sàmba hì fate wu wun hi toŋ a soŋtu tɨntu. ⁷ Anjèl à Fùyèn yì shyə̂ toŋ yi soŋ yi wuni, temù nì wusu yîmì hi chwo a chyə̂ ma ghɨ ti fwəh nì luŋû. Mwə̀ mù tɨ̂n chwo ni, nyok bâh à chyə ale atɨ̂n à bàh wù tât, wù fî ni kəbi yâ nì kàkû fî nyok bâh à mòk a wù bàh tât, nì wəlânù nâ wù jɨ̀m. ⁸ Kùmtê à anjèl à Fùyèn toŋ yi soŋ yi wuni, ghɨ mak shyə a jwô yì chìk, ghɨ mô ni te kun yì chìk a yì bame, ⁹ bâh à jwô ale atɨ̂n à wù bàh afa wù tât wu kahi ha mu luŋ, mwə̀ mù jɨ̀m me a mù mò fùtɨ̂n àtɨ̂n kputî, ngwùksù boŋ bef afû, a nôn à mòk atɨ̂n à nòn afa wù tât a jwô yì chìk. ¹⁰ Kùmtê a anjèl à Fùyèn yìlè toŋ yi soŋ yi wuni, njên fu chik fu lefu lo a nyə̂ chem chwo a chyə̂, bana kə ni te tôs. Fu chem fî baŋ bâh a jwô à mòk atɨ̂n à bàh wù tât, baŋ bûk wù mòlû bâh à mòk atɨ̂n à bàh wù tât. ¹¹ Yet yi fu njèn mi fe mô “Yi lwî.” Bâh wu jwô mu we kahi hì lwê kə ni. Ghɨt a dona ghe a ghɨ nyo mòlû mù tɨ̂n kputî beka mù ndùku lwê. ¹² Anjèl à Fùyèn yìlè toŋ yi soŋ yi wuni na à hi mô anjèl sù kìk. Shyə le kun bâh à yuchwî ale nì bâh à njoŋ ale, kəbi nì njèn mùlè, yê nâbi afa, finhe bâh à ban à mòk atɨ̂n à bâh wù tât. Chwì hì fê bana wi a mbɨŋlu sù kìk. Njoŋ ghê njènû hì fê bana wi a bɨŋlu sù kìk. ¹³ Mu lohi a tû shihi ke a nyə̂ yen mbùk à wum yi fela chyâ nâ a nyə̂, jyê nâ a jyə̂ yì tâ na, “Wonê, wonê! Anjèlsu le sê sù tat toŋ soŋtu, ngə̂k yì chìk yìlè ben ha ghɨt ghe a ghɨ chyə a mbyî, bəma kə ni.”

¹ Anjèl à Fùyèn yìlè toŋ yi soŋ yi wuni, na à hi mô anjèlsù tân. Mu yen njênfù te fu lo a nyə̂ chem a chyə̂, ghɨ fo a chwok yi jwô yi be yile yi lye chwo yênà kə yi yên ha wûn. ² Njên fu tɨnfu chwok jwo yi be mi yê, lɨkfu lefu hì fwo kwoka atɨ̂n, kə̂kà kə te fu fwo yi jwô wù wùs yi ghaka kə ni. Lɨkfu tɨnfu fwo kwok finhi yuchwî luktu hì finâ. ³ Bensu fwo fùtɨ̂n à fulɨk afû chwo a chyə̂. Ghɨ fo kəbi a jyak ha bensu tɨnsu na su hi tale kəbi te nyak mù chyə̂ ⁴ ghɨ jis ha sinsu na kə su kum shyə a chyə̂ makə nâbi shyə a nyə̂ makə a fukâk. Ghɨ bɨlà jis na su hi tale ghɨt ghe a ghɨ kəta wi chwena Fùyènà a ghɨna yulu shyə. ⁵ Bensu tɨnsu ndùku wi hi ywe ghɨt mɨ ghɨ̂n. Mô kə hi fo ngə̂k ha ghɨna a njoŋsù tân. Ngə̂k ye a ghɨna ndùku mô hi yên ni mô kəbi te yê a wùt ndùku ne wu yen wu yu afa nyakfu chyəfu luma wûn. ⁶ À bè hì mô a mu tuk mefû ma ghɨta hi khɨŋa kə nâ kpu yena wi, ma ghɨ hi kôŋà kə nâ hi kpû, ma kpu tunhi na yi lyê wi ghɨna. ⁷ Bensu tɨnsu ndùku mô ni te nyamsu kwaŋsu wu yu afa su gbûtè hi shik a yi woŋ, tû tɨnu mô ni te ghɨ so fotu wu tù fə̀nù atɨ̂n ma ghɨ fati nì gûl, kə̂k tu tɨntu mô ni te kə̂k tu ghɨ̂tù, ⁸ nyuŋsu tɨnsu mô te nyuŋsu tusu wut ywên su, soŋa mô te soŋa bìkəm. ⁹ Bensu tɨnsu mô ma ghɨ ti khɨŋtì nì mwə̀lû ma ghɨ fati nì kaha, ghâtu tɨntu kûmà te wulu nyamsu kwaŋsu wu yu afa su gûfà chyaksu su dô kə ni, nyɨŋa shika yi woŋ. ¹⁰ Su ndùku kəta tù kpèn tu tale kə te nyak mù chyə̂, fê kəta kəbi sù chyâk. Jyaka hì mô a tu kpèn mefû kpenê hi chə̀bhè wut na wù yu lûmì a njoŋ sù tân. ¹¹ Bensu tɨnsu hì kəta fə̀n we a wù saka ghɨna, a mô anjèl ye a yì kəta be ye a yi lye chwo yênà kə yi yên yâ, yet yi wuni mô yi jìs yi Hibùlùs na Àbadòn, mô yi jìs yi Gɨlìs na, Àbolìyòn, yi fôktè na, “Wùt wù Bobhena.” ¹² Yi ni chwùtè na ngə̂k yì shyə ti chyâ, su ti faŋ sù bà hi bèn. ¹³ Anjèl à Fùyèn yìlè fî toŋ yi soŋ yi wuni, na à hi mô sù anjèl tufa. Mu yu te jyə̀ fwo a tu bûlà tù kìk te tu mô a baŋ yi fo afa a ghɨ fate nì gûl yâ. Baŋ atɨ̂na mô a Yènfù ashyə̂. ¹⁴ Jyə̀ àtɨ̂n jis ha anjèl à Fùyèn yìlè ye a yì ndùku kəta soŋi, bênà a sule se yi bàm sù tân yâ na, “Ghàn yenti anjèlsu Fùyèn se sù kìk a ghɨ kwuta ghaŋta a jwô yì chìk afa a ghɨ toŋte na, Yufelèt yâ.” ¹⁵ Ghɨ yêntì anjèlsu Fùyèn mu sê sù kìk beka yu ndùku mô ma wu ti kpên, tuk mù kpên, njoŋ nì lɨ̂mà boŋ kpên shyəma ghɨ ywi wùt wù mòk wù mòk fùtɨ̂n à ghɨt à tât a mbyî. ¹⁶ Ghɨ fôktì ha mu na nôn à sù sojà ghe a ghɨ nyiŋa a tû sù nyàm mò malàmsù yi ghə yì bà. ¹⁷ À hì mô gha mi ye a yi fwo a mu yi kə̀k ni te yi fwo a jem, mu yen nyamsu kwaŋsu, ghɨta nyɨŋa a tô àtɨ̂n, kəta khə̀ksù wòŋ su, su bâŋà kə te wu wus, nyimà yê ni te mkân, fê mô yê te yì ngòm yi baŋani. Tû sù nyam mu we kə̂kà te tu sù bìkəm, wusu nì lɨkfu nì kànû fwo a sinsu yi jwô. ¹⁸ Ngəksu be mu sîn sù tât, a su tì fwo nyàm sina yi jwô tî ywî wùt wù mòk atɨ̂n à ghɨ̀t afân à tât. À ndùku mô ni wusu nì lɨkfu nì kànû fwo kəbi nyàm se yi jwô. ¹⁹ Jyak a nyam se hì mô yi jwô fê mô kəbi a tù kpèn. Kpèn tu tɨntu mô te sù ywô, kəta wu tû, ghɨna lemhe ghɨta nì kpèn tu ghɨna tu. ²⁰ Ghɨt ale ghe a ngəksu bəma se tì faŋa hi ywite ghɨna yâ, tê kahe jə̀ təm a ghɨna a ghɨna sùbe. Ghɨna faŋ hì ngumle kə deblìsu nì mosò me a ghɨ fate nì gûl yâ nì silfà nì kaha ale, ghɨ bâŋà yi baŋ, ghɨ fate wule nì te, nì kàkû a mô mu mwə yena wi luktu, ywo wi gha, gbê wi. ²¹ Ghɨna tê bɨ̀nhì nâbi təm a ghɨna a ghɨna sùbe beka ghɨna ndùku ywite ghɨta, nê a gha a fintena, chyə nì ywena makə ghe lɨmànà, a kəta wi ghɨna fê chwoŋâ.

¹ A yi bàm atɨ̂n, mu yen anjèl à Fùyèn yì ngaŋtena yìlè, yì lo hì chwo bênà a nyə̂. Yi mô ma mbàksù ti lim yinì, fìlinjoŋi mô a wûn a tô, kə̂k yi wuni bana kə te yuchwî. Fwəni anjèl àtɨ̂n mô te a fûŋ a wùsa te ghɨ bame. ² Yi kəta fubuklâ fu ŋwàklù fù ma ghɨ ti lîm a wun a wô ma ghɨ ti bəh. Yi mô ma yì ti tom wula wuna ghɨ kpen wu wo ta a jwô yì chìk, tom ghɨ kpen wu wo kôwì a chyə̂. ³ Anjèl à Fùyèn àtɨ̂n toŋa jis nâ a jyə̂ yì tâ yi dûmà te jyə̀ bìkəm wu yu afa yì jyè. Yi toŋa nâbi wùni yu, wuli dum a ghan sàmba. ⁴ À hì mô te wuli tɨ̀ni dùma, mu hì khɨŋa hi nyàk gha ye yi jisa, biyani mu yu jyə̀ te yì bè a nyə̂ jîsà na, “Lèti gha ghe a wuli duma yin jìsa a ghan sàmba, kə wò nyak.” ⁵ Yi bàm atɨ̂n, mu fî yen te anjèl à Fùyèn ye a mu ye yena yi mô a jwô fê mô a chyə̂, te yì lòhe kpen wu wunu wu wo ta a nyə̂, ⁶ wù kan yi yet yi Fùyèn fe a fu mô a yû mù jɨ̀m, a mô funfu a fu fate nyə nì chyə nì jwò yì chìk nâ nì mwə̀ mù jɨ̀m me a mù mò a tu lùk afân. Yì kântì na ghɨ nè fê chyâhè wi yu. ⁷ Yi jîsà na, à ndùku mô a mu tuk afû te anjèl à Fùyèn yì gòkhena atɨ̂n à anjèl se sàmba toŋa soŋi wuni, Yènfù ni gha wuni yi leteni ye fu tì lèma, kə yi ghəl te fu tì fòkte ha ghɨt a wuna ghɨ fetana a mô fòktìsu chiksu. ⁸ Yi bàm atɨ̂n, mu yu jyə̀ ye a mu ye ywo a nyə̂ yâ, yi fê jîsà ha mu na, “Ndù fyi ŋwàklù ye a yì mò a anjèl à Fùyèn yê, à yì mò a jwô fê mô a chyə̂ ma ghɨ ti bəh yâ.” ⁹ Mu yen yen anjèl à Fùyèn mi ye jis ha wun na yì fo ŋwàklù fe ha mu. Yì jis ha mu na, “Kò kût. Wò nè shihi kut, ma yì hi tofa kə te wu lû biyani ma yì nê shihi chwo tàn a wò wu là, ma yì nê hi lwê yi lwî.” ¹⁰ Mu fyi fù ŋwàklù fu tɨnfu a anjèl à Fùyèn àtɨ̂n a wô, shihi châm, yì hì tofa kə te wu lû a mu yi jwô, yì kahi hì lwê yi lwî a mu wu là. ¹¹ Anjèl àtɨ̂n fî jis ha mu na mu kəta hi tè fòktè tum à Fùyèn ha ghɨta ma ghɨ fwo a tu lak, tu dô kə ni, kəta tu kə̂k, tu dô kə ni, jîsà tu jîs, tu dô kə ni, nì fə̂ntù, tu dô kə ni.

¹ Yi bàm atɨ̂n, ghɨ fo mbàŋ ye a ghɨ fêkà mwə̀lû atɨ̂n ha mu jis na, “lòti ndù fèk ndâ Fùyèn ma wò fek kəbi baŋ a yi fo, ma wò taŋ kəbi ghɨt ghe ghɨ ngumle Yènfù afû. ² Wò yen, kə wò fek bâh à bɨna beka ghɨ hì mô ma ghɨ ti fo ha tumu, ghɨna mô hi nè jèlè bobhi Tèk yi yulani ha sù njoŋ mkìk njwòsù bà. ³ Mu nè tumalò fòktì samsu sùbà ma ghɨna ti mak chifu, ma ghɨ gbê fokti tum à Fùyèn a mu tuk kam nì ghə yi bà nì tuk mù mtufa.” ⁴ Fòktì mu sîn mô mu kâk mù sù olìfs mù bà nì mwə̀ me a ghɨ tomte lâmsù atɨ̂n wù bwà, wu mô a Bâba ashyə̂ we wù saka mbyî. ⁵ Wùt ki mòmhi hi ləmhi ghɨna, ma wusu fwu a ghɨna yi jwô ma wu bobhi bànàsu ghɨna mu sê. À mò ni te ghɨ ywe nâbi nde we a wù mòmhe hi ləmhe ghɨna. ⁶ Ghɨna kəta jyaka hi baŋa wuli na kə yi na a wu yu afa a ghɨna nè gbê fôktè tum à Fùyèn mi ye atɨ̂n, kəta a jyak hi nì na jwosu kahi a mu luŋ, fê kəta kəbi jyaka hi tê nì nâbi yìni nki ngə̂k na yì gan a mbyî nâbi wùni yu a ghɨna khɨŋa. ⁷ À hì mô te ghɨna fòkte mihe tum atɨ̂n, ma nyàm yì bəmana ye yì fwo yi be afa yì lye chwo yênà kə yi yên yâ fê shik nô ha ghɨna ma yì nô yə ghɨna ma yì fê ywiti ghɨna. ⁸ Gun tu ghɨna tu faŋ kə wu lum wu tâ a yi tèk yi chiki afa a ghɨ tì bante Bâba ghɨna a kàkfùtàfù. Ghɨt ale toŋte tèk mi ye wu lum wule na Sodòm, ghɨ le toŋte na Ijìb. ⁹ Ghɨta bè fwo kə tu lak tù jɨ̀m ma fê fwu kə a sah a nda à jɨ̀m, jîsà kə tu jîs tù jɨ̀m, fê kə̂kà kə tu kə̂k tù jɨ̀m ma ben hi ke gun tu ghɨna tu a mu tuk mù tât nì bəha, tunhe na kə wùt guma ghɨna. ¹⁰ Ghɨt ghe a ghɨ chyə a mbyî bê hi saŋle fê yə kum kpu ghɨt mɨ ghɨ̂n. Ghɨna bê hi fo mwə̀lû ha wana ne beka fòktìsu chik mi sîn sùbà tì kputî ma su ti fo ngə̂k yì kanana ha ghɨta a mbyî. ¹¹ Biyani, à hì mô yi bàm mu tuk mefu mù tât nì bəha, ma Yènfù fo yohnà ghe a ghɨ nê ghɨta chyə̂ ha ghɨna, ma ghɨ ni ghɨna loti, ghɨt ghe ghɨ tì yena ghɨna hì fânà nâ haŋaŋ. ¹² Fòktì su chiksu mi sîn sùbà a su kaha lote a yi kpû, yû jyə̀ yì tâ yìlè te yì fwo a nyə̂ jîsà na, “Ghàn kwok à ben afân!” Ghɨna kwok ləhà atɨ̂n à sù mbàk, a mô ya bànàsu ghɨna su mô kê. ¹³ Chyə shɨŋ nek nâ haŋaŋ kə wu yu mefû, ghɨ senhi bâh à yi tèk ale atɨ̂n à bàh wù ìwûm ywiti ghɨta kamsu sàmba. Fânì kwo ghɨt ghe a ghɨ faŋa afû nâ haŋaŋ, ghɨna hì fo kokhînì ha Yèn fe a fu mô a nyə̂. ¹⁴ Yen na, ngə̂k yì kùmtena ti chyâ, yìlè fê mô kəbi hi bèn, kə chîn. ¹⁵ Anjèl à Fùyèn yìlè toŋ yi soŋ yi wuni, na à hi mô anjèlsu sàmba. Mu yu jyesu tasu a nyə̂ su jîsà na, “Bâba ghàhnà nì We a wù Chwoka lema kəta jyaka hi tè saka mbyî chîn, mô hi tè saka kə yi sâk gokhini bu.” ¹⁶ Chəh se mbà njwòsù kìk a su ndùku mô a mu kpòk mù tù fə̀n afa a Yènfù ashyə̂ fen yen kuhi kə̂ktu ghɨna tu hì ngumli funfu, ¹⁷ jîsà na: “Bâba Yènfù, Bè jyak à jɨ̀m we a wò mô chîn, ma wò ndùku hì mô! Ghàh fo àyòŋnà ha wò te wò chwùtè jyaka chika ghe a wò kəta, yîmì hì saka à ghɨ̂t. ¹⁸ Là mù ghɨt ghe a ghɨ ndùku khə wi wò tî yâf, lâ wa ti boŋ yaf chîn, yu ti kpên shyəma wò sak ghɨt a kpona ma wò makti ghɨt gha ghɨ fetana nì fòktì sasu chiksu nì ghɨt gha à jɨ̀m a ghɨ kokhe yet ya, a mò ghɨt a tâ nì ghɨ botana. Yu ti kpên shyəma ghɨ mihi ghɨt ghe a ghɨ chehì mihè ghɨta a mbyî.” ¹⁹ Yi bàm atɨ̂n, jwo ndâ Fùyènì a nyə̂ jîmì, mu yen tantana a mu kàn à Fùyènà a funfu a ndâ. Wulì mwântè fê bwatê wu lùk afû, jyesu fwo bênà afû, chyə nêkà, temù chwo nâ hidù.

¹ Chwena yì kana yìlè fwo a nyə̂, mu yen wùt wù ywên ma wù ti mak a yuchwî ha sùnju, njoŋ mô a wun a sah à wù, fota tù fə̀nà mô a wun a tû, kəta mu jên njwòsù bà. ² Wu mô wu lâ, ma wan hì luma wûn, wu jyê beka wù ndùku ywo lûmì. ³ Chwena yì kana yìlè fî fwo a nyə̂, nyàm yì chìk yì bəmana yìlè fwu kə̂kì bâŋà yi bâŋ, kəta tu sàmba nì sesu ìwûm. Nâbi ghɨ̀ni to kəta fota tù fə̀nà. ⁴ Kpènu wunu yâhà bâh à mù jènà à mòk atɨ̂n à bàh wù tât a nyə̂, wù mak chwohi a chyə̂. Nyàm àtɨ̂n time a wùt wù ywên we ashyə̂ a wù tì khɨŋa hi bwɨ yâ hì gbûtè hi kut a wan àtɨ̂n, a wu yu afa wù bwə. ⁵ Wùt ywên àtɨ̂n bwɨ wan wù lɨmà, wu mô hi bè saka tu lak tù jɨ̀m nì jyaka a bəmana. Biyani ghɨ tesi wan àtɨ̂n kwok nì wûn ha Yènfù a nyə̂ a funfu kpòk wu tù fə̀nù. ⁶ Wùt ywên àtɨ̂n tet yen a yi lak yi sùsi, a mô luk we Yènfù tì fate lema ha wûn na ghɨ tôknà kwok nì wûn afû a mu tuk kam nì ghə yì bà nì tuk mù mtufa. ⁷ Yi bàm atɨ̂n, woŋi lôtì a nyə̂, Maykèl ghê anjèlsu wunsu nô nyàm àtɨ̂n, nyàm àtɨ̂n nì anjèlsu wunsu boŋa nô ghɨna, ⁸ biyani Maykèl ghê anjèlsù wunsu no yə nyàm àtɨ̂n, ghɨna hì fè kəta wi luku a nyə̂. ⁹ Ghɨ mak chwohi nyàm àtɨ̂n a chyə̂. A mô ni, a mô ywô ye a ghɨ toŋte na deblì yâ, a fê mô kəbi Satàn. A mô yì yîn ye yì ndùku lehe ghɨta a mbyî yì jɨ̀m. Ghɨ mak chwohi wûn a chyə̂ ghê anjèlsu wunsu kə sù jɨ̀m. ¹⁰ Yi bàm atɨ̂n, mu yu jyə̀ yi fwo bênà a nyə̂ jîsà na, “Yènfù ghàhnà fu bònhè lò ghɨt a wuna chîn chwûtè jyaka a wuna te fə̀n. Chîn mô, Klistù ma a ni wut we a Yènfù chwoka tuma mô hi chwùtè a ghɨ wuna jyaka beka ghɨ ti mak chwohi we a wù chehì mô a Yènfù ghàhnà fù ashyə̂, ngane wana ne nchwì, ngane ntuksu yâ. ¹¹ Wana ne mɨ ghɨ̂n ti nò yə wûn kum luŋ mù Wâ Njyə̀ nì hamok ye a ghɨna chehì fôktè fê kôŋà nâ hi fo ngɨŋsu ghɨna su hi kpû kum wûn. ¹² Nâ ghàn à jɨ̀m ghe a ghàn chyə a nyə̂, ghàn hi saŋlê! Yi nè hì bəmalò ha ghê ghɨ chyə a mbyî nì ghàn ghe a ghàn chyə a jwô yì chìk beka deblì ti chwo ben ha ghàn, lâ wanu wu yafa nâ haŋaŋ beka ghàn hì khə na yu ti tumhî shyəma fêt yi wuni mi.” ¹³ À hì mô te ywò àtɨ̂n yena na ghɨ ti mak chwohi wùn a chyə̂, yì hì nyɨŋa a wùt ywên we yi bàm we a wù bwə wan wù lɨmà wê. ¹⁴ Biyani ghɨ fo tu ghâ tu mbùk à wum tu ha wûn shyəma wù tet ywò mi yê ma wù yê tan a yi lak yi sùsi wù lùk afa a mô hi tòknà kwok nì wûn afû a wù lɨ̀m wù tât nì bəha. ¹⁵ Ywò àtɨ̂n chwu mòlû a wùt ywên we yi bàm, mu mô kə te jwô shyəma mù lyê chya nì wûn. ¹⁶ Biyani chyə gâmtì wùt ywên àtɨ̂n, mɨ jwò mi ye a ywò àtɨ̂n tì chwo yâ. ¹⁷ Ywò àtɨ̂n bâŋhì wu lâ ha wùt ywên àtɨ̂n, lo yen lôhì yi woŋ ha ghɨta wùt ywên we yi sah yi nda, a mô nâ ghɨta à jɨ̀m ghe a ghɨ ndùku lêmà saktu Fùyèn tu fê fate khɨte hamok ye a Jisòs tì chwùte a ndan. ¹⁸ Ywò àtɨ̂n timi kə a bi jwô yì chìk.

¹ Yi bàm atɨ̂n, mu yen nyàm yi fwo kwoka bê a fùtɨ̂n à jwò, kəta wu tu sàmba nì sesu ìwûm, nâbi yìni se kəta a fot a tù fə̀nà, nâbi ghɨ̀ni to kəta yi yet, yi sûlè Yènfù. ² Nyàm mi ye a mu tì yena ndùku funa nyàm à bâ, wulu tɨnu ghakle kə te wulu chwolu. Jwo tɨni hì funa yi jwo bìkəm. Ywò ye fo a jyak a wuna nì kpok wu wunu wu tù fə̀nù ha nyàm yì bəmana yê na yì hi sakâ. ³ To nyâm mi ghe ale ndùku bəma kə ni, kə̂kà kə te a lemtu, biyani ma ghɨ hì mô ma ghɨ ti yîm. Ghɨt ghɨ̂n à jɨ̀m a chyə̂ hì mô nì kani, ghɨna hì jûmtè yê kə ni nyàm àtɨ̂n. ⁴ Ghɨt à jɨ̀m hì ngumle ywò mi ye beka yì ndùku mô ma yì ti fo jyaka ha nyàm atɨ̂n na yì hi sakâ. Ghɨna hì boŋa ngumle nyàm àtɨ̂n jîsà na, “A mò nâ nde te nyàm yinâ agha? A fê mô nâ nde a wù mò hi nò yinì agha?” ⁵ Ghɨ fo sù njoŋ mkìk njwòsù bà shyəma nyàm àtɨ̂n hi sakâ, jîsà gha a be a bəmana kum Fùyèn. ⁶ Yì yîmì hi tè sùlè a Fùyèn, chikhe tukum te a ghɨ fo ha Yènfù, fê sûlè luk we a fu chyə atɨ̂n nì ghɨt à jɨ̀m ghe a ghɨ chyə a nyə̂. ⁷ Ghɨ fo jyaka na yì no ma yì yə ghɨt a Fùyènà, fî fo kəbi jyaka na yì hi saka ghɨta ma ghɨ fwu kə tu lak tù jɨ̀m nì sah a sù ndâ ghe à jɨ̀m, a mô à ghɨ̂t jîsà tu jîs tù jɨ̀m, kə̂kà kə tu kə̂k tù jɨ̀m. ⁸ Nâ ghɨt à jɨ̀m ghe a ghɨ chyə a chyə̂ bê hì ngumle nyàm mi yê, a mô ghɨt ghe a ghɨ tà tì nyak jə yet a ghɨna shyəma mbyî yimi a ŋwàklù yì bòn yì Wâ Njyə̀ we a ghɨ tì ywe. ⁹ À hì tofa nâbi nde, wù tokâ yuti. ¹⁰ Ghɨ shìki mô hi khɨte fà nâbi nde, ma ghɨ bê khɨte fa kə yi fâ. Ghɨ shìki mô hi bè ywe nâbi nde nì fâ gbɨ̀liŋi, ma ghɨ bê ywê kə yi ywî. Gha mi yina ni chwùtè na ghɨt a Fùyènà kəta hi tè wunhî fê fate khɨte yi bimî yi ghɨna. ¹¹ Mu fî yen nyàm yìlè yi fwo kwoka bê a chyə̂, kəta sesu sùbà, su mô kə te sesu wâ njyə̀ sù. Yi hì jîsà kəbi ni te ywò. ¹² Yì fyi a jyak ghe a nyàm yì shyə ye ndùku kəta hì saka luk wu nyàm yì shyə mi yê, mô kə nâ ghê wûn. Yì nî na ghɨt à jɨ̀m a chyə̂ hi ngumle nyàm yì shyə ye a yì ndùku kəta ləmtu ghe a ghɨ ndùku mô ma ghɨ ti yîm yâ. ¹³ Nyàm mi yìna ti nî gha a kanana, wusu lo a nyə̂ hì chwo bênà a chyə̂, ghɨt à jɨ̀m yenâ. ¹⁴ Kum a gha a kanana mɨ ghɨ̂n, ghɨ de na nyàm mi yinâ ni, wu lùk wu nyàm yì shyə yê, yì ndùku lehe ghɨt à jɨ̀m ghe a ghɨ chyə a mbyî, ghɨ fî jis na ghɨt mɨ ghɨ̂n fati a fə̀khè nyâm ghe yì ndùku kəta ləmtu ghe a ghɨ tì kaka nì fâ yì gbɨ̀liŋi, biyani yì hì baha chyə kə yi chyə̂ yâ. ¹⁵ Ghɨ fo a jyak na nyàm yì kùmtena yê yohna a tô fə̀khè mi ghê shyəma ghɨ jis ma ywi nâbi nde we a wù tunhe hi ngumle ghɨna. ¹⁶ Nyàm mi ye a yì fwo a chyə ni ghɨ fî kân na ghɨ lem chwena a kpen wu wo ta makə ghɨt à jɨ̀m wu yulu shyə. Ghɨ ndùku kəta hi lèm nâbi ha nde wu yulu shyə makə à mò a wut wù ləmâ makə à mò walà, makə à mò wut wù chìk, makə a mò wut wù fufana, makə à mò a kwôs makə à mò wut a wun a ngɨŋ, makə à mò wut wù ywên. ¹⁷ Wùt ndùku kəta wi hi bəklî makə hi yun a shyə, a bu kə na wù kətalò chwena a nyàm yìna yì yet makə nyàk ye yi chwùtè yet yi wuni. ¹⁸ Yìna mò, wo tofâ, ma wò kwaktê khɨli. À kəta nâbi nde tofu, wu fet a nyàm yinâ a nyàk beka yì mò ni mô a wùt yì yet. Nyàk yinâ mò. Kon atɨ̂na mô 666.

¹ Yi bàm atɨ̂n, mu yen Wâ Njyə̀ wu mô a kun à Sayòn ghê ghɨt a wuna kam wu wə nì ghɨta kam mkìk, njwòsù kìk. Ghɨna mô ma ghɨ ti nyak yet yi wuni nì yet yi Bè wuni a ghɨna yulu shyə. ² Mu yu jyə̀ te yì fwo bênà a nyə̂, kwô te yi fena, yi ghaka kə ni fê bwatê te wuli. Jyə̀ mi ye ndùku kwô kəbi te tu luŋ te ghɨta ndùku buka. ³ Ghɨt mu ghe kamsu wu wə nì ghɨta kamsu mkìk, njwòsù kìk hì yema njàŋ yì fê yìlè wùt bu hi yikî hi yêm, a bu kə ghɨna ghe ghɨ ndùku mô ma ghɨ ti yun tu ghɨna a mbyî. Ghɨna hì yema njàŋ a kpòk mù tù fə̀n ashyə̂, mwə̀ mù yòhna me mù kìk nì chəhsu mô kəbi afû. ⁴ Ghɨt mɨ ghɨ̂n ndùku mô ghe a ghɨ tì lèma ngɨŋsu ghɨna su nì yulînì, teka ghɨna yê timè chyə nì wùt ywên. A mô ghɨna ghe a ghɨ jûmtè Wâ Njyə̀ nâbi afa te wù yènà, a fê mô ghɨna ghe a ghɨ tì bònhe shyəma ghɨna hi mô ni te tamu shyə ha Yènfù ghê Wâ Njyə̀. ⁵ Ghɨna tà timi wam jə fəmi, ghɨna ndùku kəta wi njahi. ⁶ Yi bàm yi tɨ̂n, mu fî yen anjèl à Fùyèn yìlè te yì fela chyâ nâ a nyə̂, kəta tum yì jùŋ ye a yì tì faŋa hamok, hi fòktì ha ghɨt ghe a ghɨ mô a mbyî. Yì ndùku mô hi fòktì ha ghɨta a tu lak tù jɨ̀m nì ghɨta a sah a nda à jɨ̀m, ghɨ jîsà kə tu jîs tù jɨ̀m, kəta kə tu kə̂k tù jɨ̀m. ⁷ Anjèl àtɨ̂n bwat jis nâ a jyə̂ yì tâ na, “Ghàn hi fânà Yènfù fê kokhe funfu beka yu ti kpên shyəma fu sak ghɨta. Ghàn hi ngumle funfu fe a fu fate nyə̂ nì chyə nì jwò yì chìk nì toktu.” ⁸ Kùmtê anjèl à Fùyèn yìlè fî fwu a nyə̂ bwat jis na, “Babilòn, tèk yi chik ye ti fên, yi ti fên. A mô yìna ye a yi ne na lak tu jûmtè nyu lùk mù tâ, a me a mù nè na ghɨta hi kôŋà hi tè chyə chyəna tu fiŋa.” ⁹ Anjèl à Fùyèn yìlè fî bên, na à hi mô sù tât bwat jis nâ nì jyə̀ yì tâ na, “Nâbi nde we a wù ngumle nyàm mi yê nì fə̀khè ghe a ghɨ fate, ghɨ fune nyàm àtɨ̂n, ma ghɨ ti lem chwena a wun a yulu shyə makə wu kpên, ¹⁰ nè yenalò lâ baŋanu wu Fùyènù. Wu mô ni te lùkû mù tâ teka ghɨ fwəh nì shyə ale. Nâbi nde we a wù ne gha mi yìna kəta ngə̂k wu wùs ma ghɨ ti lem nkànû atɨ̂n, wu hì bame anjèlsu Fùyènsu yulesu ashyə̂, anjèlsu tɨnsu mô ghê Wâ Njyə̀. ¹¹ Lɨkfu wùs fe a ghɨna bè hì yena ngə̂k a fùtɨ̂n àtɨ̂n bè hì kwoka kə yi kwôk a nyə̂ gokhini bu. Ghɨt ghɨ̂n a ghɨ ngumle nyàm àtɨ̂n makə a fə̀khè tɨna, kəta chwena ye a ghɨ lema kum yìna yâ, bè hì kəta wijə yutìnì nâbi nchwì makə ntuksu.” ¹² Gha mi yìna ni chwùtè na ghɨt a Fùyènà kəta hi tè wunhî. A mô ghɨna ghe a ghɨ lêmà saktu Fùyèn tù fî bimi ha Jisòs. ¹³ Mu fî yu jyə̀ te yì bènà a nyə̂ jîsà na, “Nyàk gha yìna ni na, Hi yìmì chîn nì hi yèn ashyə̂, saŋlînì hì mô nâbi ha nde we a wù shihi kpû, jûmtè Bâba!” Yohnà Yulena fî fîsì kə na, “Hamok, saŋlînì mò ha ghɨna. Ghɨna nè yutèlò a ghɨna sù ngə̂k beka Yènfù nè mâktèlò ghɨna yi fèt yi jûŋì.” ¹⁴ Yi bàm atɨ̂n, mu yen bàk yi fufâ, wùt mô fùtɨ̂n àtɨ̂n, kə̂kà te Wâ Wùt ma wù ti so fota tù fə̀nà a wun a tû, ma ghɨ fate nì gûl. Wu kəta fùnywi a wun a wô, fu tofa kə ni. ¹⁵ Anjèl à Fùyèn yìlè fwu ben a ndâ Fùyèn toŋa jis nâ nì jyə̀ yì tâ ha wùt we a wù mò a tô bàk afâ na, “Lyì nywi fa fê ma wò hi kpê mwə̀ mù mbyî atɨ̂n beka yu ti kpên, mwə̀lû a mbyî ti kpên hi kpì.” ¹⁶ Ni, wùt we a wù ndùku mô fùtɨ̂n à bàk afâ kpi nâbi ghə te ghɨ mô a mbyî nì nywi mi fê. ¹⁷ Mu fî yen te anjèl à Fùyèn yìlè fwo bênà a ndâ Fùyèn a nyə̂ kəta kəbi nywi fu fùk fù, fu tofa kə ni. ¹⁸ Yi bàm atɨ̂n, mu fî yen anjèl à Fùyèn ye a yì kəta jyaka kum wusu ma yì lo a baŋ a yi fo. Yi toŋa jìsà nâ nì jyə̀ yì tâ ha anjèl à Fùyèn ye a yì kəta nywi fu tofa fê na, “Lyì nywi fa fê ma wò kpi tam mù gilèb me a mù mò a mu fùk yâ a mbyî ni beka mù ti bâŋ.” ¹⁹ Ni, anjèl à Fùyèn àtɨ̂n jɨŋ chwohi nì nywi fu tɨn fu a mbyî, kpi tamu atɨ̂n a mù fùk, lem chwohe yi be shyəma ghɨ jeli kə a lum afa a Yènfù bè chwùtè lâ wunu wu baŋanu atɨ̂n ha ghɨta. ²⁰ Ghɨ tì fwu yi tèk shyəma ghɨ jêlì nyati tam mù atɨ̂n. Te ghɨ jele ni, luŋû fwo tamu tɨnu hì mô a chyə̂ kwoka chema khɨŋ à bà, ghaka tânà mihè mâl yi ghə yì bà.

¹ Mu fî yen chwena yì kana yìlè a nyə̂ yi bəmâ. Mu yen anjèlsù Fùyènsu sàmba, su kəta ngəksu sàmba, a mô ngək se a su chwûtè gokhe lâ baŋanu wu Fùyènù. ² Mu fî yen shyə ale ghe kə̂kà te jwô yì chìk, bana tohne te mìjô, ma ghɨ ti fəh nì wusu. Mu yen kəbi ghɨt ghe a ghɨ ye no yə nyàm ye a yì ye fwo kwoka a jwô yâ fî no fə̀khè atɨ̂n ghê bakhe nì kon a wuna yi yet ghê, ghɨt atɨna mô yi bi lwi afa, kəta tu luŋ tu Fùyèn tù a ghɨna wu wô. ³ Ghɨna hì yema njàŋ à Musìs, a wut à Fùyèn wù fètana kəbi nì njàŋ à Wâ Njyə̀. Ghɨna hì yema jîsà na: “Bâba Yènfù, Bè jyak à jɨ̀m. Wò nèlò gha kana a bəmana! Wò mò fə̀n ha luk tù jɨ̀m. Lum tatu mô chilichili fê mô hamok! ⁴ Bâ, à mò hi faŋa nâ nde hi tè fànà wò agha? À mò hi faŋa nâ nde hi tè kokhe wò? À mò kə wò nɨ̂ŋ a wò yule. Ghɨt a tu lak tù jɨ̀m bè bêlò ma ghɨ hì ngumli wò beka ghɨt à jɨ̀m ti yen a ndan na fêt ya mò chilichili.” ⁵ Yi bàm atɨ̂n, mu yen ma ghɨ ti chwok luk we a wu yule kpene a ndâ Fùyèn a nyə̂, ⁶ fî yen anjèlsu Fùyènsu sàmba te su fwo bena a ndâ Fùyèn afû, kəta tu nki tu ngək tu sàmba. Anjèlsu tɨnsu ndùku mô ma su ti mak njusu, su njêntè jwôfà, kwut tu kwô a ghɨna ngàŋtù ma ghɨ fati nì gûl. ⁷ Shyə à mòk atɨ̂n à mwə̀ mù yòhna afa mù kìk fo wu kaŋ sàmba ha anjèlsu Fùyèn se sàmba, ma ghɨ fati nì gûl, kaŋu tɨnu mô ma wu ti lun nì mwə̀ me a mù chwùtè lâ wu baŋanu Fùyènù, Yèn fe fu mô a yû mù jɨ̀m. ⁸ Ndâ Fùyèn atɨ̂n hì mô ma lɨkfu ti kûntì atɨ̂n, ma fu fwo yi bân afa a Yènfù ndùku kəta fî fwu kəbi a funfu a jyak, wùt bu hi lye a ndâ afû, a bu na ngək se anjèlsu Fùyèn se sàmba bè nì sinsu ti mî.

¹ Yi bàm atɨ̂n, mu yu te ghɨ jîsà nâ nì jyə̀ yì tâ atɨ̂n à wu lùk wu yulenu afâ a ndâ Fùyèn ha anjèlsu Fùyèn se sàmba na, “Ghàn yê suh à chwohi ngək se a chyə̂, à se su mô wu kaŋ afa sàmba, chwûtè wu lâ Fùyèn wu baŋanu.” ² Anjèl à Fùyèn yì shyə̂ yen suh chwohi nì shyə ghe a ghɨ ndùku mô a wun a kaŋ a chyə̂. Jì wu bəmana wule kwo ghɨt ghe a ghɨ ndùku kəta chwena nyàm yê, fê ngumle mosò fu tɨn fê. ³ Kùmtê à anjèl à Fùyèn yìlè suh chwohi nì shyə ghe a ghɨ ndùku mô a wun a kaŋ atɨ̂n à jwò yì chìk, mòlû mù tɨ̂n kahi hì mô kə te mu luŋ mù wùt wù kpona, nâbi ghə ghe ghɨ mô a jwô afû kpû. ⁴ Kùmtê à anjèl à Fùyèn suh chwohi nì shyə ghe a ghɨ ndùku mô a wun a kaŋ, atɨ̂n à jwosu tasu nì tok tu. Mòlû mù tɨ̂n kahi ha mu luŋ. ⁵ Mu yu te anjèl ye à yì ndùku kəta jyaka kum jwosu jîsà na, “Wò ti kat sak kə chilichili. A mò wò we a wò ndùku mô, ma wò hì mô. A mô kə wò we a wò mò nì yulînì. ⁶ Ghɨta ti ywiti ghɨt gha, ywiti fòktì su chiksu, wò ti fo luŋû chîn na ghɨna nyu. Wò lak kə nâ ghɨna nì shyə ghe a ghɨ kpene ha ghɨna!” ⁷ Mu fî yu te jyə̀ fwo bênà lumu a bàh a baŋ yi fo jîsà na, “Bâba Yènfù, Bè jyak à jɨ̀m. Wò saka kə hamok, fê saka kə nâ chilichili!” ⁸ Yi bàm atɨ̂n, mu yen anjèl à Fùyèn yìlè na à hi mô anjèlsu Fùyèn sù kìk, yì suh chwohi shyə ghe a ghɨ ndùku mô a wun a tû a kaŋ, yuchwî khɨti a jyak nyôklì à ghɨ̂t kə te wu wus. ⁹ Lûm yi tɨni nyôklì ghɨna nâ haŋaŋ, ghɨna hì sûlè Fùyèn fe fu kəta jyaka hi fo ngə̂k mu sîn, biyani ghɨna tê kahi jə təm a ghɨna a sùbe hi tè kokhe Fùyèn. ¹⁰ Anjèl à Fùyèn yìlè fî fwu na à hi mô anjèlsu Fùyèn sù tân, suh chwohi shyə ghe a ghɨ ndùku mô a wun a kaŋ, a tô kpòk wu tu fə̀nù nyàm yê, Luk we a wù ndùku saka atɨ̂n fin kə wù jɨ̀m, ghɨt ghe a ghɨ ndùku mô afû hì lumle chwûtù ghɨna tu kum lùmchuŋ ye a ghɨna ndùku ywo. ¹¹ Ghɨna hì sûlè Fùyèn fe a fu mô a nyə̂ beka lùmchuŋ yê, nì jì we a wu mô a ghɨna wu wùn biyani ghɨna faŋ hi kahe təm a ghɨna a ghɨna sùbe. ¹² Anjèl à Fùyèn yìlè fwu na à hi mô anjèlsu Fùyènsu tufa suh chwohi shyə ghe a ghɨ mô a wun a kaŋ a jwô yì tâ yìlè, ghɨ toŋte na Yufelèt. Jwò àtɨ̂n yim nâ yì jɨ̀m hi fo wu lum ha fə̂n tê a tu fwo bênà a bàh afa yuchwî sata atɨ̂n na tu daŋ. ¹³ Mu fî yen yohnù wu be wule wù tât, wu mô te wù chàmàkhɨ̀s. Ale hì fwo bê a ywò yi jwô, ale fê fwo bê a nyàm ye yi jwô, ale fwo kəbi a fòktì yì fəm ye yi jwô. ¹⁴ Yohnù wûn mô deblìsu te su gbê chwûtè chwesu kanasu. Yohnù tɨnu gbî yen nâ ha fə̂n tù jɨ̀m a mbyî, ghɨ yûŋtì ghɨna wu lùk wù mòk na ghɨna hi bakte hi bè nò Yènfù a tuk wu chiku, Bè jyak wù jɨ̀m. ¹⁵ Mu yu te wùt jìsà na, “Ghàn yuti! Mu bê ni te wut wù chwoŋana. Saŋlînì mò ha wùt we a wù ndòko hì gbùtè, nì njusu a wun wu wùn, kə wù nè fwo nì sah yi yimi nì wumînì a ghɨta ashyə̂.” ¹⁶ Yohnù wu be we yûŋtì fə̂n mu tɨ̂n wu lùk wule, ghɨ toŋte jìs yi Hibùlùs na Àmagedòn. ¹⁷ Anjèl à Fùyèn yìlè fwu na à hi mô sù anjèl sàmba waŋ a shyə ghe a ghɨ ndùku mô a wun a kaŋ a nyə̂. Jyə̀ yì tâ yìlè fwu ben a kpòk wu tu fə̀nù a ndâ Fùyèn jis na, “Nâbi ghə ti mî!” ¹⁸ Wuli hì mwâmtè, fê bwatê wu lùk afû, jyesu fwu ben afû. Luktu hì senâ a lum wule teka wu timè hi senâ nâ te Yènfù tì fate wùt. Seni yi tu lùk yìna hì bəma nâ haŋaŋ. ¹⁹ Ghɨ jyâtì Babilòn bâh wù tât, bobhi tèk tu chik tu nâ tù jɨ̀m kə tu lak tù jɨ̀m. A ni lum we a Yènfù tì kwàkte ghɨt a Babilòn atɨ̂n, ni ghɨna nyu shyə ghe a ghɨ ndùku chwûtè lâ baŋanu wunu a bòm afâ. ²⁰ Lak tê a jwosu ndùku mô ma su ti jɨŋ kat samî, kunsu boŋ samî kə sù jɨ̀m. ²¹ Temù hì chemle chwo a ghɨta a tû, se yì mòk jîtà bəma kə ni. Ghɨta hì sûlè Fùyèn kum ngək mi yìna beka à ndùku mô nâ ngək yì bəmana.

¹ Anjèl à Fùyèn yìlè atɨ̂n à se sàmba a su ndùku kəta kaŋ we sàmba ben jis ha mu na, “Bi ma mu chwuti ha wò te ghɨ kəta hi fo ngə̂k ha ta kpàlà ghe ghɨ mô a ngwùŋ à sù jwo su dosu afâ. ² Fə̂ntù ti chyə nì wûn kə tù jɨ̀m a mbyî. Ghɨt ghe a ghɨ mô a chyə ti nyû lùkû mù chyəna liŋa wuna, mù ti kwo ghɨna.” ³ Yohnà Fùyènà khɨti kwâktì mi, anjèl à Fùyèn atɨ̂n lyi yen nì mu a lak yi sùsi, mu yen wùt ywên wùlè afû wu mô a tô nyàm yì bàŋana yìlè ma ghɨ ti nyak yet yi wuni atɨ̂n, yet yi tɨni mô à sù ndi sûlè Fùyèn. Nyàm atɨ̂n hì kəta tu sàmba nì sesu ìwûm. ⁴ Wùt ywên atɨ̂n ndùku mô ma wù ti mak njusu su bâŋà kə ni. Wun wu wunu nì njusu wunsu ndùku mô ma ghɨ ti bâŋ nì mwə̀lû ma ghɨ fati nì gûl nì te njentena nì fwatu tatu. Wu kəta bom a wun a wô, ma ghɨ fati nì gûl, ma a lun kə gha a be a bəmana atɨ̂n nì liŋi. Mwə̀ munâ ndùku mô sù ndi, chwûtè kə chyəna wuna finana ghê lɨmànà. ⁵ À ndùku mô ni, ma ghɨ ti nyak yet yi kanani yile a wun a yulu shyə na, “Babilòn, yi tèk yi chiki. Wò mò nì, ha kpàlànù wù jɨ̀m, fê mô nè a gha a be a bəmana a mbyî.” ⁶ Mu yen ma wùt ywên atɨ̂n ti nyû luŋû jyaklò, a mô ni a mô luŋ mù ghɨt a Fùyènà ghe a ghɨ ndùku ywite njwo ghɨna ndùku fôktè kum Jisòs. Mu yen wûn hì mô nì kani nâ haŋaŋ. ⁷ Biyani anjèl à Fùyèn ye buf ha mu na, “Wò mò nì kani njwô ghə? Mu ti fôktèlò gha kanani ha wò kum wùt ywên wùna nì nyàm ye a wù mò a tô atɨ̂n ni, yi kəta tu sàmba nì sesu ìwûm. ⁸ Nyàm yìna a wò yena ni, chehì làwû, yì fè wi. Yì fwu kwok ben a yi be afa a yi lye chwo kə yi chwô yâ, hi yen na ghɨ bobhi yinì. Ghɨt ghe a ghɨ ndùku mô teka ghɨ nyak yet a ghɨna a ŋwàklù yì bòn shyəma ghɨ fati mbyî, yen nyàm yìna hì mô nì kani beka yì chehì làwû yì nè hi fê wijə biyani fê mô hi bê kahe bèn. ⁹ “Yìna ni mò na wò tof, ma wò kwakti ma wò khɨli. Tu wûn sàmba mò sù kun sàmba, a mô sù sin wùt ywên wùna mò a tô atɨ̂n. ¹⁰ Tu tɨnu mô ni, a mô kəbi tu fə̂n sàmba. Fə̂ntu tɨntu ti kputî tù tân, wu mòk baha sakâ, wùlè baha mô teka wù ben. Wù nè bênà nâbi wùni yu ghɨ kəta hi sak kə ha fu yulâ ni. ¹¹ Nyàm ye a yì ndùku mô yâ, hì fê bu mô kəbi fə̀n, chwùtè na a hì mô fə̂ntù fama, mô hi yen na ghɨ bobhi wûn kəbi yi ghəl te fə̂n tê sàmba. ¹² “Se se ìwûm a wò ye yena yâ ni mò fə̂n tê ìwûm biyani tu baha mô teka tu kwoti jyaka hi tè sâk. Ghɨ nè fo a jyak ma tu sak a bɨŋlu yì mòk, ma ghɨna shihi sak ma nyàm ye hi boŋa sakâ. ¹³ Ghɨna ni ìwûm nè hì chîntè kəta kə kwâktì yì mòk, mô hi fo jyak a ghɨna ha nyàm ye na yì hi sakâ. ¹⁴ Ghɨna chîntì shik yi nô ha Wâ Njyə̀, ma Wâ Njyə̀ nô yə ghɨna beka wù mò Bâba ha Bâba sù jɨ̀m, fê mô fə̀n ha fə̂ntù kə tù jɨ̀m, kəta ghɨt a wuna te wù tì toŋa nì ghe a wù chwokte na ghɨna hi ywo ha wûn.” ¹⁵ Anjèl à Fùyèn yê fî jis ha mu na, jwo se a mu nè yena kpàlà ghe mô a ngwùŋ àtɨ̂n yâ ni chwùtè ghɨta a tu lak, kə tù jɨ̀m, ghɨ kə̂kà kə tu kə̂k tù jɨ̀m ma ghɨ fwu kə sah a sù nda à jɨ̀m, jîsà kə tù jîs tù jɨ̀m. ¹⁶ Anjèl àtɨ̂n ti jis kəbi na sesu se ìwûm a mu tì yena yâ chìntè nì nyàm ye yì ndùku bânà kpàlà ghê. Ghɨna nè fye nâbi ghə ghe a wù kəta ma de kə wûn nì sah yi yimi. Ghɨna nè kutalò jyà wûn yì wùn ma nyok bəha tɨna wu wùs. ¹⁷ Yi mô ni beka Yènfù ndùku mô ma fu ti lem a ghɨna təm na ghɨna chîntè nê kə gha ye a fu khɨŋa. Ghɨna fo a jyak ha nyàm ye na yì hi saka hi tàn te gha ghe a Yènfù jìsa kwok à kpen. ¹⁸ Yì tî jis kəbi na, wùt ywên we a mu nè yena ni mò yì tèk yi chiki ye a yi saka fə̂ntu mbyî tu.

¹ À ndùku mô te gha mɨ ghɨ̂n chyàla, mu yen anjèl à Fùyèn yìlè yi chwo bênà a nyə̂. Yi kəta nâ jyak a chika hi tê sâk, bân yi wuni mô ma yi ti baŋ kə mbyî yì jɨ̀m. ² Yi bwata jîsà nâ nì jyə̀ yì tâ na, “Yì ti fên! Babilòn, a yi tèk yi chik ye ti fên! À hì mô luk we a deblìsu chyə atɨ̂n nì yohnà wu be nì nyɨ̀mû fina mù be, nâ mù jɨ̀m. ³ Yi mô ni beka nâ ghɨt a mbyî ghɨ̂n à jɨ̀m ti nyu lùk mù wûn mù ta me a mù nè ghɨta chyə chyəna liŋa ghê ywena. Fə̂ntu a mbyî ti chyə nì wûn, ghɨta bəklena a mbyî ti ghakli kum kə nì chyəna wuna ghɨ kpàlànà.” ⁴ Mu fî yu jyə̀ yìlè, yi fwo bênà a nyə̂ jîsà na, “Ghɨt a ma, ghàn fwu afû, bu ya ma ghàn hi chîntè a wun a sùbe, ma ngəksu wunsu boŋà kwoti ghàn. ⁵ Besu wunsu ti dû ni kwok tan a nyə̂, Yènfù mô hi fo ngə̂k ha wûn kum gha mɨ ghɨ̂n. ⁶ Ghàn hi nê kə gha ha wûn a ye wù tì ne ha ghàn. Ghàn shihi làk a wûn, ghàn lak yomta a gha afa wù tì ne ha ghàn. Ghàn shihi fo mu lûk ha wûn, ghàn fo mu tâ chyâ me a wù ndùku fo ha ghàn. ⁷ Ghàn fo ngə̂k ha wûn nâ ni, ma wù yu lûmì. Wù ndùku kokhe ngɨŋ à wûn, chyə̂ atɨ̂n à yi ghak. Wù ndùku nê ni jîsà kə ha ngɨŋ à wûn na, ‘Mu mò nè fə̀n, mu wijə ywê nkwû. Mu bè jyê wi kpu.’ ⁸ Yi ni chwùtè na ngə̂k mi sîn bè kwote wûn kə wu tuk wù mòk. Yaftu nì ngə̂k su lesu nì jìŋ, bè chîntè bê ha wûn kə wu tuk wù mòk. Ghɨ bè nyôkà lò wûn nì wusu beka Bâba Yènfù fe fu saka wûn, kətalò jyaka, ghɨ kpenê.” ⁹ Fə̂ntu mbyî tê a tu ndùku boŋa chyə a wun atɨ̂n à yi ghak, fê chyə̂ chyəna wuna yi liŋa ghê, bè hì jyêlò wu yu afa ghɨna yena te wù bame, lɨkfu kwokâ. ¹⁰ Ghɨna bè time kə hadà beka ghɨna fànà na kə ngə̂k à wûn mi ye boŋà kwoti ghɨna, ma ghɨ hi jîsà na, “Yi bəmalo! Yi bəmalò ha Babilòn yi tèk yi chik yìna! Wù chehì kətalò jyak a kanana biyani ghɨ lyi kə afu yula ni fo ngək yì chìk ha wûn.” ¹¹ Ghɨta bəklena a mbyî bè hì luŋle jyê beka nâ wùt lè bê fê wijə hi yun a shyə ha ghɨna. ¹² Wùt bê fê yuna wijə shyə ha ghɨna. Wùt bê fê yuna wijə gûl ha ghɨna nì silbà nì fwatu tatu nì njusu ta se a ghɨna ndùku bəkle kə a tu nkì a tu nkì, nì kàk mù jùŋ nâ mù jɨ̀m, nì mwə̀ me a ghɨ fate nì soŋa nyàm à jyə̀ nì me a ghɨ fate nì kaha baŋana, nì sô nì me a ghɨ fate nì kàkû, nì me a ghɨ fate nì te njentena. ¹³ Wùt bè fê yuna wijə Làmindâ ha ghɨna. Ghɨ bè fè yuna wijə leŋi nì yûhì su lɨmtesu jûŋ sù ha ghɨna. Wùt lè bè fê yuna wijə lùkû ha ghɨna nì gutû nì kùŋ mù jùŋ nì wît nì nyamsu mbòloŋsu nì bwusu njyə̀sù nì nyamsu kwaŋsu nì chyak se a ghɨ gûfà nyamsu kwaŋsu. Wùt lè bè fè yuna wijə wùt ha ghɨna hi lèm a kwòs. ¹⁴ Ghɨt a bəklena mɨ ghɨ̂n bè jîsà lò ha Babilòn na, “Nâ mwə̀ mù jɨ̀m me a wò chehì nyɨŋa yi bàm atɨ̂n ti samî, bakhe nì ghak ya nâ yì jɨ̀m. Mwə̀ mu munâ ti yên, wo bu hi bè fè yen!” ¹⁵ Ghɨt a bəklena ghe a ghɨ chehì bəkle ghê wûn bè time kə hadà beka ghɨna fànà na kə ngə̂k à wûn mi yìna boŋà kwoti ghɨna. Ghɨna bè hì jyê fê khɨmte wu wun, ¹⁶ jîsà na, “Yi bəmalo! Yi bəmalò ha tek yi chik yina! Yi chehì lafa nì njusu ka su baŋasu fê lafa ngɨŋ à wûn nì chyakmù ma ghɨ fate nì gûl nì te njentena nì fwatu tatu! ¹⁷ Mwə̀ munâ ti chîntì mî kə afu yulâ ni.” Be sù ngwùkà nì ghɨt ghe a ghɨ gbê a sù ngwùksu tɨnsu nì ghɨt ghe a ghɨ fêtà atɨ̂n nì ghê a ghɨ yə kə beka jwò bè time kə hadà ¹⁸ bwata jyê te ghɨna yena te Babilòn fyime, lɨkfu kwokâ. “Nâ tek yi chik yile tà timi hì fê mô te tek mi yina!” ¹⁹ Ghɨna bè fukalò bûtù a ghɨna tû jyê nâ haŋaŋ, khɨmte wu wun jîsà na, “Yi bəmalo! Yi bəmalò ha tek yi chik yina ha ghɨt ghe a ghɨ fêtà a jwô tì ghakle kə kum yini ni. Ghàn ti chîntì ləha nâbi ghə kə a fu yulâ ni! ²⁰ “Ghàn ghe a ghàn chyə a nyə̂, ghàn hi saŋlê. Ghàn hi saŋlê ghɨt a Fùyènà nì ghɨt a tuma, nì fòktì su chiksu beka Yènfù ti fîsì gha ye a wù tì ne ha ghàn!” ²¹ Anjèl à Fùyèn yì chìk yìlè ki lyê yi ti, yi ghaka kə ni te yi ti yi bani tum chwohi a jwô, jis na, “A ni mò kə te ghɨ bè lyê Babilòn yi tèk yi chik yina ma tum à chwohi nâ nì jyaka, ma ghɨ bê tè fè yên. ²² Wùt bè fê ywo wijə te ghɨ buka luŋtu makə yema njàŋsù makə toŋa ndoŋ su makə tu soŋ a wo tu lum tu tèk tu; nâ wùt mòk we wù fètà mwə̀lû nì wo bè hì fê wi a ghàn à wûn, ma ghɨ bê tè fè yû te wùt gwò a yi ti. ²³ Wùt bè fê yena wijə te lâm bana, ma wù bê tê fè yu jyə̀ ghɨt a malana a wo fùtɨ̂n. Wò khə na ghɨt gha ghe ghɨ ndùku bêkà mwə̀lû ha wò ndùku mô kə nâ ghɨt a ta a mbyî, wo fê gbê lehe ghɨta lak tu tù jɨ̀m nì fiŋi fu nyaki. ²⁴ “Luŋ mù fòktì su chiksu nì luŋ mù ghɨt a Fùyènà nì mù ghɨt ghe a ghɨ ywite a chyə afân beka yi bimî ghɨna hì mô kə wun a wô.”

¹ Yi bàm atɨ̂n, mu yu jyesu tâ su lesu a nyə̂, su kwô ni te jyesu dosu jîsà na, “Àlèluyà! Yènfù ghàhnà fu nì bònhè à ghɨ̂t, kokhînì yen ha funfu. Fu kəta a jyak. ² Fu saka kə nâ hamok fê saka kə nâ chilichili. Yènfù ti sak a kpàlà ghe a ghɨ chehì lehe ghɨta a chyə̂ yâ, ghɨ chyə nì wûn. Fu ti kahi lak wûn te wù chehì ywite ghɨt a wuna ghɨ fetana.” ³ Ghɨna fî bwat jis na, “Àlèluyà! Lik fe a fu fwo kwoka a wun a tû nè faŋa ma fu hi kwoka kə yi kwôk nâ gokhini bu.” ⁴ Chəh se mbà njwòsù kìk nì mwə̀ mù yòhna mù me mkìk fen a chyə̂ hì ngumli Yènfù ma fu ti ndokò wu kpòk wu tu fə̀nù mu we jîsà na, “Àmèn! Àlèluyà!” ⁵ Yi bàm atɨ̂n, mu yu te jyè fwo bênà wu lùk wu kpòk wu tu fə̀nù afâ jîsà na, “Nâ ghɨt à jɨ̀m ghe a ghɨ fêtà ha funfu, fânà funfu makə wò mò wut wu tâ makə wut wù bot, ghàn hi bəmhe Yènfù ghàhnà fu.” ⁶ Mu fî yu te shyə ale kwò ni te jyesu dosu, fê kwô te yi fena, fê kwô kəbi te wuli wu yu afa yi bwate jîsà na, “Àlèluyà! Ghàn hi bəmhe Yènfù beka Bâba Yènfù ghàhnà fu, a Bè jyak à jɨ̀m mò fə̀n! ⁷ Ghàhnà hi saŋle nâ haŋaŋ fê fo kokhînì ha funfu beka yu ti kpên shyəma Wâ Njyə̀ malâ. Ywê wûn hì mô ma wù ti bakti ngɨŋ à wûn. ⁸ Ghɨ ti fo jyaka na wù mak njusu, su jwôfà yulè, fê njêntè.” Nju sîn ni mò a gha a chilichili ghe a ghɨt a Fùyènà nè. ⁹ Anjèl à Fùyèn ki jîs ha mu na, “Nyàk gha yìna ni na, ‘Jùŋ mò ha ghɨt ghe a ghɨ laka na ghɨna bê yə malâ Wâ Njyə̀.’” Yì tì fî jis ha mu na, “Jis mi yìna mò ma yi lo ha Yènfù, mô hamok.” ¹⁰ Mu fen a wun ashyə̂ hi ngumli wûn biyani wù jis ha mu na, “Kə wò mom! Mu fètà ha Yènfù kəbi te wò nì wana ne gha ghe a ghɨ fate khɨte hamok ye Jisòs tì chwùte. Wo ngumle Yènfù.” Hamok mi ye a Jisòs ti chwùte a ndan mò gha ye a yi gâmtè na ghɨta hi fôktè gha ghe ghɨ lo ha Yènfù. ¹¹ Mu yen te nyə jìme, nyàm à kwaŋ yì fufana yìlè time a mu ashyə̂. Yet yi wùt we a wù ndùku mô a tô atɨ̂n ndùku mô na, “Wùt wù Jùŋ we a wù mò Hamok.” Wù ndùku saka kə nâ chilichili fê nô bànà su wunsu. ¹² Se wuna ndùku mwântè te chwûlù wùsu, wu mô ma wù ti so fotu tu fə̀nù a wun a tô, wu dô kə ni. Wu kəta yi yet te ghɨ nyàka a wun wu wùn, nâ wùt khə wi gha ye a yi jîsà, a bu kə wûn. ¹³ Wù ndùku mô ma wù ti mak njusu ma ghɨ ti chwû a mu luŋ, yet yi wuni mô na, “Tum à Fùyèn.” ¹⁴ Sojà se a su ndùku mô a nyə̂ su kwok a tô nyamsu kwaŋsu fufa su hì jûmtè yê nì wûn. Ghɨna ndùku mô ma ghɨ ti mak njusu su fufâ, yulê, fê jwôfà. ¹⁵ Fâ yi gbɨ̀liŋi yile hì fwo bênà a wun a yi jwô tofa kə ni, wu mô hi nò hi yə tu lak tù jɨ̀m nì yini. Wù hì saka ghɨna nâ nì jyaka. Wu gbê a ghɨna a tû jêlè nyate ghɨna hi chwùtè lâ baŋanu wu Fùyènù, a Bè jyak à jɨ̀m ¹⁶ Nju se a wù tì màka su ndùku mô ma ghɨ ti nyak yet yile atɨ̂n fî chwo nyak a wûn a bì na, “Fə̀n ha fə̂ntù nì Bâba ha bâba su.” ¹⁷ Mu fî yen anjèl à Fùyèn, yi mô a yuchwî. Yì hì bwata jîsà nâ nì jyə̀ yì tâ ha nyɨ̀m mù jɨ̀m me a mù ndùku fela chyâ a nyə̂ na, “Ghàn bê yuŋti ma ghɨ yə tuk wu chik wu Fùyènù. ¹⁸ Ghàn bê kut njyàsu wùn su fə̂ntù nì njyàsu wùn su tû sù sojàsu nì yì ghɨt a tâ ale ni njyàsu wùnsu nyamsu kwaŋ su nì njyàsu wùnsu ghɨt ghe a ghɨ nyiŋa a tô atɨ̂n. Ghàn bê kut njyàsu wùnsu ghɨt à jɨ̀m, ghê a ghɨ mô a ghɨna ngɨŋ nì ghê a ghɨ mô wu kwôs. Ghàn ben ma ghɨ kut njyàsu wùnsu ghɨt a tâ nì ghɨt a bota.” ¹⁹ Mu yen nyàm yì bəmana ye nì fə̂ntu mbyî tu ma ghɨna ti yûŋtì sojàsu ghɨna su hi nò wùt we a wù ndùku mô a tû nyàm à kwaŋ afâ hì fè nò kəbi sojàsu wunsu. ²⁰ Ghɨ khɨti nyàm yì bəmana yê fî khɨti kəbi fòktì yì fəm ye a yì ndùku chwûtè chwesu fəmsu sê a wun ashyə̂. Yì tì chwùti ni lehi ghɨt ghe na ghɨna lem chwena nyàm ye a ghɨna wu wùn hì ngumle mosò mù nyàm àtɨ̂n. Ghɨ mak nyàm àtɨ̂n teka yì kpu yi be yi wùs yile, wusu bame, ma ghɨ ti mak kànû atɨ̂n, ghɨ fî mak kəbi fòktì yì fəm yì tɨ̂n teka yì kpu wu wùs mefû. ²¹ Wùt we a wù ndùku nyiŋa a tû nyàm tì ywiti mihì ghɨt ale nì fâ yi gbɨ̀liŋi ye a yi fwo a wûn a yi jwô yâ. Nyɨ̀m mù jɨ̀m kut njyàsu wùnsu ghɨnasu kpen kə te mù kòŋà.

¹ Yi bàm atɨ̂n, mu yen anjèl à Fùyèn yìlè, yi chwo bênà a nyə̂. Yi kəta à chwok hi chwok a yi be ye yi lye chwo yê kə yên, fê kəta chyak yì chìk a wun a wô. ² Wù khɨti nyàm yì bəmana ye yì ndùku mô ywò yâ, a fê mô Deblì, a fê mô kəbi Satàn, kwut a wu lɨ̀m kam. ³ Wù mak chwohi nyàm atɨ̂n a yi be afû, fati fa de na yì faŋ afû ma yì hi fê kəta wi lumu hi lehe ghɨta hi tàn te lɨ̂m wun kam nè mê. Yi bàm atɨ̂n, ghɨ hì kəta hi de yìni afu yulâ ni. ⁴ Mu ki yen kpòk mù tù fə̀n nì ghɨt ghe a ghɨ ndùku mô atɨ̂n. À ndùku mô ghɨta ma ghɨ ti fo jyaka na ghɨna hi saka ghɨt ale. Mu fî yen yohnù ghɨt ghe a ghɨ tì ywite ghɨna beka ghɨna ndùku fòktè gha Fùyènì fê chwûtè hamok ye Jisòs ndùku yike. Ghɨna ndùku mô ghɨt ma ghɨ ti tunhi na ghɨna nè ngumle wi nyàm ye makə mosò àtɨ̂n, ghɨna tunhi na kə ghɨ lem chwena nyàm atɨ̂n a ghɨna yulu shyə makə ghɨna wu kpên. Ghɨna kahi lôtì a yi kpû hì saka ghê Klistù a wu lɨ̀m kam. ⁵ Yìna ni mò yi lôtì yi shyə ye a ghɨta bè lôtè a yi kpû. Ghɨt ale bè lôtè wi a yi kpû hi tàn shyəma lɨ̂m wun mi. ⁶ Jùŋ mò ha ghɨt ghe a ghɨ bè lôtè a yi kpû, a yi lòtì kpu yi shyə. Ghɨna mò ghɨt a Fùyènà ghɨ yulena, fê bu hi kpu a yi kpu yi kumteni. Ghɨna bè hì mô ngàŋsù ndâ Fùyènsu, nì ha Klistù, Klistù ghê ghɨna bê hi saka a wu lɨ̀m kam. ⁷ À bè hì mô te lɨ̂m wun kam me, ma ghɨ fihi Satàn a wun a ndâ chyâk afâ, ⁸ ma wù fwo ben ma wù jɨ̀ŋhi ghɨta a tu lak tu mbyî tu kə tù jɨ̀m. Lak mi tɨ̂n mô Gôg nì Magòg. Satàn bê yûŋtì ghɨta a tu lak afân wu luk wù mòk shyəma ghɨna nò. Ghɨna bè hì dô mô kə te sùsi a bi yi jwôlì. ⁹ Mu ti fî yen te ghɨna fwo a mbyî kə bâh wù jɨ̀m kwok yen jɨŋ kat tèk yi chik ye a Yènfù ndùku kôŋà, a mô luk we a ghɨt a Fùyènà ndùku chyə atɨ̂n. Biyani wusu lo a nyə̂ chwo ben ywiti ghɨna. ¹⁰ Ghɨ ki lyê deblì ye a yì ndùku jɨ̂ŋhè ghɨna mak chwohi yi be yi wùsi, wu bamê ma ghɨ ti suh kânù atɨ̂n. Yì nè hì mô afû ghe nyàm yê, nì fòktì yì fəm yê. Ghɨna bè hì ywo yi lûm afû nchwì nì ntuksu a yû mù jɨ̀m. ¹¹ Mu ki yen kpok wu tù fə̀nù wu chiku, wu fufa yi fûf, wùt mô atɨ̂n. Nyə̂ nì chyə sami a wûn ashyə̂ milò. ¹² Mu fî yen ghɨta ma ghɨ ti kputî, ghɨ le mô ghɨt a ta, ghɨ le mô ghɨt a bota, ghɨna mô ashyə̂ wù kpòk afû. Ghɨ bəh ŋwàklù sù, fî bəh ŋwàklù yìlè, a mô ŋwàklù yì bòn ghɨ hì ke ŋwàklù àtɨ̂n, saka kə ghɨna a gha afa ghɨna ndùku nê. ¹³ Jwò yì chìk fihi ghɨt ghe a ghɨna tì kpute atɨ̂n. Kpu nì Lak yi ghɨt a kputena boŋ de ghɨt a ghɨna, ghɨ fwo kwôk, ghɨ chîntì sak nâbi nde kum kə gha ghe a wù ndùku nê. ¹⁴ Ghɨ tì mak chwohi Kpû nì Lak yi ghɨt a kputena atɨ̂n à yi be yi wùsi. Be yi wùsi mi yìna ni mò kpu yi kumteni. ¹⁵ Ghɨ tì mak chwohi nâbi nde we a yet yi wuni ndùku bu a ŋwàklù yì bòn fùtɨ̂n à yi be afû.

¹ Yi bàm a gha mɨ ghɨ̂n, mu yen nyə fe nì chyə a fe, ma a nyə ashyə nì chyə ashyə hi mô ma wu ti chyâ, bakhe nâ nì jwò yì chìk. ² Mu ki yen te Yènfù chinhe Tèk yi yulani ye, a mô Jèlusalèm yì fê, yi chwo bênà a nyə̂ ma ghɨ ti fati labhi yini te ghɨ labhi ywê lɨ̂m na wù yê yen lɨm à wûn. ³ Mu fî yu jyə̀ yì tâ yìlè te yì fwo bênà wù kpòk wu tù fə̀nù afû, yì jis ha mu na, “Yên, Yènfù hì chyə ghê ghɨta chîn. Fu hi mô ghê ghɨna, ghɨna mô ghɨt a Wuna. Yènfù nâ a Wun a ngɨŋ hì mô ghê ghɨna. ⁴ Fu bè yàhàlò semù nâ mù jɨ̀m a ghɨna sê, ma kpu hi fê bu. Wùt bè fê kwohe wijə seni, jyê wi shyə ale, fê yafa wi, beka gha a mwo ti chyâ. ⁵ Wùt we a wù ndùku mô a wu kpòk wu tù fə̀nù mu we, ki jîs na, “Ghàn yen! Mu nè a gha à jɨ̀m ma ghɨ kahè hi mô a fê.” Wù fî jîs ha mu na, “Nyàk gha mɨ ghɨ̂n. Ghɨ mô kə nâ hamok, kpenê shyəma nâbi nde bimi.” ⁶ Wù jis kəbi ha mu na, “Gha à jɨ̀m ti kpên! Mu mò Alfà fê mô Òmegà, a mô yìmi nì gokheni gha à jɨ̀m. Mu nè folò mòlû nâbi ha nde we a kuŋ à mòlû yima wûn, ma wù nyu, ma wù tê fo shyə. Mòlû muna nè fwo yi tok afa yi fo chyəna ha ghɨta. ⁷ A no yə nâbi nde be ma mu fo mòlû mu muna ha wûn ma mu hi mô Yènfù wun fu, ma wù hi mô wâ mù. ⁸ Ha ghɨt ghe a ghɨ fânà nì ghɨt ghe a ghɨ tà bimi jə̂ ha mu, nì ghɨt ghe a ghɨ nê gha ghe a ghɨ yule wi, nì ghê a ghɨ ywite ghɨta nì ghê a ghɨ chyə nì ywena makə lɨmànà a kəta wi ghɨna, nì ghɨta funyaka nì ghe a ghɨ ngumle mosòmù nì ghɨta fəma nâ à jɨ̀m, ghɨna kəta luk wu ghɨna a yi be afa a wusu bame atɨ̂n yâ ma ghɨ ti suh kànû atɨ̂n. Luk mu wûn ni mò kpû kumteni.” ⁹ Anjèl à Fùyèn yìlè atɨ̂n à anjèlsu Fùyèn se sàmba a su ndùku kəta kaŋ we sàmba ma ghɨ ti lunhi nì ngəksu gokhe se atɨ̂n sàmba ni, ben jis ha mu na “Bî, ma mu chwuti ywê Wâ Njyə̀ ha wò.” ¹⁰ Yohnà Yulena khɨti kwâktì yi mi, anjèl à Fùyèn atɨ̂n lyi kwok nì mu a tô kùn yìlè, yi dâfà kə ni, chwûtì Jèlusalèm ha mu, ma a ni Tèk yi yulani te yi lo a nyə̂ ha Yènfù hì chwo bênà. ¹¹ Tèk mi yina ndùku kəta ban yi chiki yi Fùyènì. Tèk yi tɨni ndùku bana njêntè jwôfà, nyɨ̂mà kəta ti yile ghɨ toŋte na jasbà, fê bana tohne kə te mìjô. ¹² Yi ndùku kəta kəbi mbàn yì dà yìlè te ghɨ bwəma jɨŋa kata, yi kəta jwo njwòsù bà, nâbi yìni jwo kəta anjèl à Fùyèn atɨ̂n. À ndùku mô nâbi yìni jwo ma ghɨ ti nyak yet yi sah yi nda ghɨt a Isalì yì mòk atɨ̂n. ¹³ Mbàn mi ye ndùku kəta jwo à tât a bàh afa yuchwî sata, kəta à tât a bàh afa a yuchwî lye, kəta à tât a bàh à kwôkà, kəta à tât a bàh a nchwô. ¹⁴ Yi ndùku mô ma ghɨ ti ba a tô chyə sù nda njwòsù bà, a mô kəbi ghɨ̀ni chyə nda ma ghɨ ti nyak yet yi wùt wù tûm atɨ̂n, a mô ghɨt ghe a ghɨ fêtà ha Wâ Njyə̀. ¹⁵ Anjèl à Fùyèn ye a yì ndùku jîsà ha mu, ndùku kəta fù mbàŋlà fe ghɨ fêkà mwə̀lû atɨ̂n ma ghɨ fati nì gûl. Wù ndùku kəta hi fèk yi tèk yi tɨni nì jwo tɨni nì mbàn yì tèk mi yê nì mbàŋlà fu tɨnfu. ¹⁶ Tèk mi ye ndùku mô bâh wù tɨnu wù jɨ̀m mô kə yi ghəl, ghak yi tɨni mô kəbi te dâf yi tɨni. Anjèl à Fùyèn mi yê fek tèk yi tɨni nì mbàŋ à wûn mi yê, yi hì dâfà tala mihè mâl su kam nì ghə yì tân, dâfà kwoka kəbi yâ. ¹⁷ Anjèl àtɨ̂n fek fifà mbàn mi ghê, ghɨ hì mô tàmsù mtufa njwò tufa. Yì fek mbàn àtɨ̂n kə nâ te wût. ¹⁸ Wunu mbàn wu tɨnu mô ma ghɨ bwəm nì jasbà, nâbi gha a yi tèk afû mô ma ghɨ fati nì gûl, yi bana tohne kə te mìjô. ¹⁹ Sah yi mbàn yi tɨni mô ma ghɨ ba nì nki tu ti tu jûŋ tù kə tù jɨ̀m. Ti yi shyə mô jasbà, kùmti mô sàfayà, yile mô agàt, yile mô èmelà. ²⁰ À ndùku kûmtè onìs, tufa mô kànelìyà, sàmba mô kɨ̀lisolìt, fama mô behî, bulamòk mô topàs, ìwûm mô kɨ̀lisofàs, njwò yì mòk mô jasìn, njwòsù bà mô ametìs. ²¹ Jwo mbàn atɨna njwòsù bà kəta wu bâk ma ghɨ ba nì fwatu, nâbi ghɨ̀ni bâkà mô ma ghɨ ni nì se fwa yì mòk. Lum wu ta we a wu ndùku mô a yi tèk afû mô ma ghɨ twi nì gûl, yi bana tohne kə ni te mìjô. ²² Mu tê yena jə̀ ndâ Fùyèn yi tèk afû beka ndâ Fùyèn afû ndùku mô kə nâ Bâba Yènfù, a Bè jyak à jɨ̀m nâ nì ngɨŋ à wûn ghê Wâ Njyə̀. ²³ Tèk mi yina khɨŋa wi na chwì makə njoŋ hi bana atɨ̂n beka bân yi Fùyènì mò atɨ̂n, Wâ Njyə̀ fê mô lâm atɨ̂n. ²⁴ Ghɨt a tu lak tù jɨ̀m bè hì gbê a ban yi tɨni, fə̂n tu mbyî tu lyi ghak yi ghɨna ma ben nì yini atɨ̂n. ²⁵ Ghɨ bè hì khɨ̂ŋà wi jwo mbàn atɨna beka tuku bè fê jə wi. ²⁶ Lak tù jɨ̀m bè lyê yi ghak yi ghɨna ma ben nì yini a yi tèk afân. ²⁷ Shyə ale bè lye wi fùtɨ̂n à yi tèk afân, yule wi. Wùt à gha tu fiŋa makə wùt yì fə̂m bè lye wi atɨ̂n. A bè hì lye kə ghɨt ghe a ghɨ tì nyàka yet a ghɨna a Wâ Njyə̀ ŋwàklù yì bòn.

¹ Yi bàm atɨ̂n, anjèl à Fùyèn mu ye fî chwûtì jwò ye ha mu a yì fo chyəna, yi njêntè kə ni te mìjô. Jwò àtɨ̂n ndùku fwo bênà wu kpòk wu tù fə̀nù Yènfù ghê Wâ Njyə̀, ² chwo kə atɨ̂n à wu lum yi tèk yi chìk mi yê. À ndùku mô a yi bi jwô afân, kàk me a mù nè ghɨta chyə̂ mô atɨ̂n mo wu tam. Kâk fù mòk mo wu tam a ghan njwòsù bà a lɨ̀m, mo kə wu yu wù mòk a njoŋ. Ghɨ hì lyê futu tɨntu chwuka ghɨta, lak tù jɨ̀m atɨ̂n. ³ Nâbi ghə ghe a Yènfù hì mô ma fu ti sûlì bè hì wi a yi tèk afû. Kpok wu Fùyènù wu tu fə̀nù ndùku mô ma wu hì mô a yi tèk afû, Wâ Njyə̀ boŋa mô. Ghɨt a Fùyènà ghɨ fetana bè hì ngumle wûn a yi tèk afû. ⁴ Ghɨna bè yenalò kə̂k yi Fùyènì, ma ghɨ nyak yet yi wuni a ghɨna yulu shyə. ⁵ Tuk wu jənu bè hì fè wi. Ghɨna bè hì fê khɨŋa wi lâmsù makə chwì beka Bâba Yènfù bè hì mô yi bân ha ghɨna, ma ghê ghɨna hi saka fə̂nù yu mù jɨ̀m. ⁶ Anjèl à Fùyèn atɨ̂n ki jîs ha mu na, “Gha ghɨ̂n a mu jìsà ni mò kə nâ hamok, kpenê shyəma nâbi nde bimi. Bâba Yènfù we a wù fo Yohnà a wuna ha fòktìsu chiksu tum anjèl à wûn na yì chwuti gha ghe a ghɨ hì khɨŋa hi gàn ha ghɨt a wuna ghɨ fetana shyəma ghɨna hi khə.” ⁷ Jisòs jis na, “Ghàn yuti, mu bè kə chîn. Jùŋ mò ha ghɨt ghe a ghɨ ywo lêmà gha ghe a ghɨ mô a ŋwàklù tum à Fùyèn afân.” ⁸ Gha mɨ ghɨ̂n à jɨ̀m ni mò ma à tì yen kə nâ mu Jon fî yu lò. À ndùku mô te mu ywo mihe fî yen lò, mu fen a anjèl à Fùyèn ye ashyə̂ a yì tì chwùte gha mɨ ghɨ̂n ha mu hi ngumle wûn. ⁹ Biyani yì jis ha mu na, “Kə wò mom! Mu fètà ha Yènfù kəbi te wò nì wana nì gha, a mô fòktìsu chiksu nì ghɨt ghɨ̂n à jɨ̀m ghe a ghɨ ywo lêmà gha ghe a ghɨ mô a ŋwàklù afân. Wo ngumle Yènfù!” ¹⁰ Anjèl à Fùyèn àtɨ̂n fî jis ha mu na, “Kə wò let gha ghe a ghɨ jîsà na ghɨ bè gânàlò a ŋwàklù afân ha ghɨta beka yu tɨnu hì bakhe bênàlò. ¹¹ Wùt we a wù chyə chyəna liŋa faŋ à hi chyə̂ kə chyəna liŋa, ma wùt we a wù chyə chyəna a be faŋ à hi chyə kə chyəna a be, ma wùt we a wù mò chilichili faŋ à hi nê kə gha ghe a ghɨ mô chilichili, ma wùt we a wù mò nì yulînì faŋ à hi mô kə nì yulînì.” ¹² Jisòs jis na, “Ghàn yuti, mu bè kə chîn nì maktu ha ghàn, mô hi fo nâbi ha nde kə yi ghəl te wù chehì fêtà. ¹³ Mu mô Alfà fê mô Òmegà, ma a ni yìmi nì gokhini gha à jɨ̀m.” ¹⁴ Jùŋ mò ha ghɨt ghe a ghɨ so njusu ghɨna su, su yulê, ghɨna nè hì kəta a jyak hi kut a tam a fùkàk afa a fu fo bônì, fê kəta a jyak hi tohna yi jwô mbàn hi lye a yi tèk. ¹⁵ Biyani ghɨt ghe a ghɨ faŋa yi bàm yi mbàn ni mò sù bû, nì ghɨt ghe a ghɨ nê gha fintena nì ghɨt a funyaka nì ghɨt ghe a ghɨ chyə nì ywena makə lɨmànà a kəta wi ghɨna, nì ghɨt ghe a ghɨ ywite ghɨta, nì ghe a ghɨ ngumle mosòmù, nì ghɨt ghe a ghɨ wama fəmi, fê nê gha a fəma. ¹⁶ “Nâ mu Jisòs ti tum anjèl à mì ha ghàn nì gha ghɨ̂n na ghàn fòkti ha nôn wu ghɨt a bimena. Mu mò ma mu fwo a Defìt yi sah yi nda, fê mô njên fu bisibisi fe a fu bana nâ haŋaŋ.” ¹⁷ Yohnà Yulena ghê Ywê lɨm a Wâ Njyə̀ jìsà na, “Bi, a Bâba Jisòs.” Nâbi nde we a wù ywo gha yìna kəta kəbi hi jìs na, “Bi! A Bâba Jisòs.” Kuŋ à mòlû yima nâbi nde, wu benlò. Wù hi kôŋà, wu fyi mòlû me a mù nè ghɨta chyə̂ teka wù lak. ¹⁸ Nâ mu Jon kɨna nâbi ha nde we a wù ywo gha ghe a Yènfù fòktè a ŋwàklù afân. À kpenhi nâbi nde gha atɨ̂n, ma Yènfù kpenhe ngə̂k se a ghɨ nyaka ŋwàklù afân ha wûn, ¹⁹ à fàbti nâbi nde gha atɨ̂n à gha afa ghɨ mô a ŋwàklù afân, ma Yènfù fyi ha wûn tam fe a fu chəma a fùkàk afa a fu fo bônì ma fê fye kəbi luk wu wunu a yi Tèk yi yulani afa a ghɨ nyàka a ŋwàklù afân. ²⁰ We a wù fòkte gha mɨ ghɨ̂n jis na, “Yi mô hamok. Mu bè kə chîn!” Àmèn. Bî, a Bâba Jisòs! ²¹ Bâba Jisòs chwuti təm a wuna a jûŋà ha ghɨt a Fùyènà à jɨ̀m. Àmèn.