Fìlibây

Fìlibây

¹ À nyak mu Bôl ghàh à Timotì ŋwàklù yìna mô ghɨt a fetana ha Jisòs Klistù. Ghàh ni nyàkà ha ghàn ghe a ghàn fo ngɨŋ sanisu ha Yènfù a Fìlibây nâ à jɨ̀m hì mô ha Klistù Jisòs. Ghàh ni nyàkà kəbi ha ghàn ghɨt a tihena nì ghɨt a fetana. ² Yènfù Bè ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn. ³ Mu fo àyòŋnà ha Yèn famfu nâbi wùni yu te mu kwàktè ghàn, ⁴ jə̂mà na Yènfù gàmti ghàn nâ à jɨ̀m nâbi wùni yu, mu hì jə̂mà nì saŋlînì. ⁵ Mu fo àyòŋnà ni beka ghàn ti gâmtì mu hi fòktè tum yì jùŋ yina kə ha yìmì wu tuk afa nâ ghàn tì ywo tum mi yìna atɨ̂n hi kwok à tàn lân. ⁶ Mu fê fo àyòŋnà ni beka mu khə hamok na fêt yi jûŋ yin a Yènfù yìme a ghàn a fùtɨ̂n ni na yi hi yê kə ashyə̂ hi tàn wu tuk afa a Klistù Jisòs bè kaha bênà. ⁷ Mu nè hì kwâktè kə ni kum ghàn à jɨ̀m beka mu kòŋà ghàn hanɨ̂ŋ. Yènfù ti bimî, ma ghàhnà nê hi fêtà kə amok, makə mu mò a ndâ chyâk, makə fòktè tum yì jùŋ, yike ghɨta na ghɨ hi khə na yì mò hamok. ⁸ Yènfù khəlò na mu kòŋàlò ghàn à jɨ̀m nâ a jûŋ nì kôŋ ye a Klistù Jisòs tì chwùtè nâ nì ngɨŋ à wûn. ⁹ Mu jə̂mà na Yènfù ni ghàn fê tokâ khɨli gha ye a yi mô hamok ma ghàn hi kôŋà ngɨŋ sanisu nâ a jûŋ. ¹⁰ Mu jə̂mà ni shyəma ghàn hi khə gha ye a yi jwôfà kpene a yi bè hì mô nì yulînì, kəta wi njahi, wùt ngane wi ghàn yi gha wu tuk afa a Klistù bè kaha bênà. ¹¹ Ghàn shìki mô ni ma Jisòs Klistù ni ma ghàn hi chyə chyəna chilichili, shyəma ghɨta hi yena ghàn fo kokhînì ha Yènfù, fê bəmhe wûn. ¹² Wana ne, mu khɨŋa na ghàn hi khə na gha ghɨ̂n a ghɨ gânà ha mu ni bɨlà gâmtè kə hi nì na tum yì jùŋ yì Fùyèn hi yênà kə ashyə̂. ¹³ Nâ sojà se a su chînà tok sù jɨ̀m, nì ghɨta afân nâ à jɨ̀m hì khəlò na mu mò a ndâ chyâk beka mu fètà ha Klistù. ¹⁴ Ndâ chyâk yin a mu mò atɨ̂n ti nî na ghɨt a bimena fê tokâ fo təm a ghɨna ha Bâba kum gha ye a ghɨna yena te wù ne ha mu. Ghɨna ghɨ hì fôktè tum à Fùyèn chîn nì təm a ta, fê fânà wi wùt lè. ¹⁵ Ghɨt ale fòktè tum yì jùŋ yì Klistù kum ghə̀k te ghɨna yena te fêt yi mi fate yênà, biyani ghɨ le fôktè tum yîn kə nâ nì təm a jûŋà. ¹⁶ Ghɨt mɨ ghɨ̂n a ghɨ fôktè nì təm a jûŋà ni fòktè beka ghɨna kòŋà mu, khə na ghɨ fa mu a ndâ chyâk beka mu fòktè tum yì jûŋ yì Fùyèn. ¹⁷ Ghɨt ghe a ghɨ fôktè gha Klistù, kəta kwâktì yi be kwàktè kə ngɨŋsu ghɨna su. Ghɨna khɨŋa hi kpenhe ngə̂k à mì a ndâ chyâk afân. ¹⁸ Biyani ngə̂k wi! Ma wùt fòktè tum à Klistù kama nê nâbi yi nî, makə wù nè hamok, mu saŋlelò beka tum yì jùŋ yì Klistù ləma yênà kə ashyə̂. ¹⁹ Mu saŋlelò beka mu khə na jə̂m yani gàmtèlò mu, Yohnà a Jisòs Klistù boŋa gâmtè na mu bon ma mu fwu a ndâ a chyàk afân. ²⁰ Nâ gha yi chik ye a mu kwâktè mò kə na kə mu bè nê gha yi wumeni. Mu khɨŋa hi tè nè fêt yi Klistù nì təm a ta kə te mu chehì nê, khɨŋa na chyəna ma hi bênà kə nì kokhînì ha wûn, kə mu kpulô, makə mu faŋ hi tè chyə̂. ²¹ A mô ha mu, mu chyə kə kum Klistù, ma mu ki kpû, ma à hi bɨlà mô mbì. ²² Yi ki kpên na mu faŋ à hi chyə̂ a chyak a wùna afân, ma mu kwoti lumu hi tòkà nè fêt yi jûŋì. Ma mu tê fè khɨlî na à jwôfà yìni ha mu agha, hi kpû ma hi tè chyə̂ agha. ²³ Mu yɨŋna kə yi yɨŋnâ atɨ̂n à agha afân, kôŋà hi dè chyə ghɨ̂n hi yèn hi tè mò ghàh à Klistù, a mô gha ye a yi jwôfà kpene, ²⁴ biyani yena na a mò nâ gha yi ta na mu faŋ à hi chyə̂ kum kə te mu khɨŋa hi gàmtè ghàn. ²⁵ A ni gha ye a yi ne mu na mu faŋ ghàhnà ghɨ̂n shyəma mu gamti na ghàn ləma ma ghàn hi saŋlê a ghàn yi bimî. ²⁶ Mu nê ni shyəma mu nê shihi kaha bèn ha ghàn, ma ghàn hi fê tòkà jala kum gha ye a Klistù Jisòs ne ha mu tohne ha ghàn. ²⁷ Gha yi ta mò kə na, ghàn hi chyə te tum yì jùŋ yì Klistù khɨŋa shyəma mu ki bên hi yena ghàn, makə mu faŋ nâbi hi bèn, ma mu hi khə na ghàn tà kwuna jə hi tè kəta kwâktì yì mòk, chyə kə ha shyə̀ à mòk, fêtà nâ nì jyaka hi tè ləma a yi bimî ye a tum yì jùŋ yike. ²⁸ Kə ghàn hi fânà bànà sanisu. Ghàn hi kəta təm a ta. Ghàn shìki nî ni, ma ghàn chwùti ha ghɨna na Yènfù nè bobhelò ghɨna ma wù bonhi ghàn. A mô yi fet yi Fùyènì. ²⁹ Mu jìsà ni beka Yènfù ti chwûtì təm a jûŋà ha ghàn ni na ghàn bimi Klistù ma ghàn fê yen ngə̂k kum wûn. ³⁰ Ghàn hi nô kə yi nô. Ghàn khə na nô yina mò ye a ghàn tì ywo na mu nòlò, chin wu hì mô mu baha nô kə yi nô.

¹ Ba ghàn khə na wun wanu foma ni beka ghàn mò ghɨt a Klistù, təm ghana yùtè beka wù kòŋà ghàn agha? Ba yi mô hamok na Yohnà Fùyènà mò ha ghàn, nê na ghàn hi mô a kak à mòk? Ba yi mô hamok na ghàn kwohe yi sen ha ngɨŋ sanisu fê tôknà agha? ² Ghàn nê kpenhi lê gha ale ghɨ̂n shyəma mu hi kəta saŋlînì, yi kpenê. Ghàn hi kəta kə kwâktì yì mòk, fate kôŋà ngɨŋ sanisu fê fêtà kə ha shyə̀ à mòk. ³ Kə ghàn hi kwâktè kə ngɨŋ sanisu. Kə wùt hi nê gha hi chwùtè wu wun. Ghàn lyi ngɨŋ sanisu a chyə̂, ghàn lem na ghɨt ale kokne chyâlò ghàn. ⁴ Kə ghàn hi nê kə gha ghe a ghɨ jwôfà ha ghàn. Ghàn hi bɨlà nê gha ghe a ghɨ gâmtè ghɨta ale. ⁵ Ghàn hi kəta kə chyənà ye a Klistù Jisòs ndùku kəta: ⁶ Wù ndùku mô kəbi Fùyèn, biyani wù hì kôŋà wi hi lyè ngɨŋ à wûn a lum afû. ⁷ Wù bɨlì de nâbi ghə te wù ndùku kəta, ghɨ bwɨ wun te a wût, wù kahi hì mô wut wù fètana. ⁸ Wù fî lyi mihì ngɨŋ à wûn a chyə̂ ywo ha Yènfù bimi na ghɨ banti wûn a kàkfùtàfù, wù kpû te wut we a wù befa gokhe. ⁹ Yènfù ki lôhè wûn a yi kpû kokhi wu lùk afa a wu ngaŋte chyâ nyə fo a jyak ha wûn, ghɨ ngaŋte chyâ nâbi ghɨ̀ni jyaka, ¹⁰ shyəma nâbi ghə ghe a ghɨ mô, makə ghɨ mô a nyə̂ makə ghɨ mô a chyə̂ makə ghɨ mô nâbi yi dèt yi chyə hi ngumle Jisòs, ¹¹ ma nâbi nde jis a ndan na Jisòs Klistù mô Bâba, wù shihi jìs ni, wu hi kokhe yê nì Yèn fe a fu mô Bì. ¹² Wana noma ghɨ jûŋà, ghàn ndùku ywolò mu te ghàhnà ndùku baha mô amok, mu wu hì jîsà na ghàn fê tokâ yu mu chin te mu fè bu a ghàn a ngwùŋ. Ghàn ne mihe fêt yani yê ma ghàn faŋ à hi ngumlê nì fânì te ghɨt ghe a Yènfù bònhe, ¹³ beka à mò kə nâ wûn we wù fêtà a ghàn a fùtɨ̂n, fo a jyak na ghàn hi kôŋà hi tè nè gha ye a wù khɨŋa na ghàn hi nê. ¹⁴ Ghàn kwo nâbi ghə hi nì, ghàn hi nê kə chilichili, dûmlè njaŋa wi ha Yènfù, njaŋa wi ha wùt. ¹⁵ Ghàn shìki nî ni, ma wùt bê tè ngane jə̀ ghàn a yi gha, ma ghàn hi yulê, mô wana Fùyènà te ghɨ chyə atɨ̂n à ghɨ̂t ghɨ khə kə be. Ghɨt mɨ ghɨ̂n ni mò ma ghɨ ti faŋ hi tè nè kə sù be a mbyî. Ghàn kəta hi tè mò a ghɨna fùtɨ̂n te mu jên te mù bana a bɨn a finana. ¹⁶ Ghàn hi chyə̂ kə te tum yì jùŋ yina yike na ghɨta hi chyə̂. Ghàn shìki nî ni, ma mu bê hi jala wu tuk afa a Klistù bè kaha bênà atɨ̂n kum ghàn, na mu tà tì fet jə hi khɨmte wun wu mu halô. ¹⁷ Ghàn ti fo bimî yani ha yi fô ha Yènfù. Ghɨ ki ywe nâbi yi ywî mu chîn, ma luŋ mâmù yen kə hi kpenhe yi fo yani mi yê. Yi shìki mô ni, ma mu hi kôŋà na ghàhnà hi chîntè saŋle kə yi saŋlî. ¹⁸ Ghàn hi boŋa saŋle kəbi te mu. ¹⁹ Mu khə kə nâ yi khə na Yènfù ki bimî, ma mu chinhi Timotì ha ghàn kə a mu tuk afân, shyəma wù kahà bê fokti gha ha mu kum ghàn hi nì na mu hi saŋlê. ²⁰ A mô kə wûn a wù kəta kwâktì ye a mu kəta, kôŋà hi gâmtè ghàn. ²¹ Nâbi nde nè yi gha, ke kə ngɨŋ à wûn, mômhè wi hi tè nè gha ye a Jisòs Klistù khɨŋa. ²² Nâ ghàn khəlò fêt yi Timotì. Wù ti fêt ghàh à wûn hi nì na ghɨta bimi tum yì jùŋ kə nâ te wan nè wu hi fêtà ha bì. ²³ Mu kwâktè hi tum a wûn ha ghàn nâbi yini te mu khɨle gha ye a yi mô hi gàn ha mu. ²⁴ Mu khə na lumu baha fê dâfà wi shyəma Bâba gamti, ma nâ mu bê yen ghàn. ²⁵ Mu ti yen na yi jwôfà kəbi na mu kahè chinhi wâ nè ghàhnà Èbàfàlòditùs ha ghàn. Ghàh à wûn fètà amok fê tuma yi woŋ yin amok. A mô wut wânù wù tum te ghàn tì chinhe na wù bê gamti mu nì fêt yîn. ²⁶ Wù kòŋàlò nâ haŋaŋ hi bèn hi yen a ghàn, saŋle wi nâ hakoh beka ghàn hì mô ma ghàn ti yû na wù ndùku yafalò. ²⁷ Wù ndùku yafalò kə nâ hamok, lanti kə ni hi kpû, biyani Yènfù kwohi seni ha wûn kwohi kəbi ha mu, bu ya ma mu ti kwoti kpenhi jɨ̀ŋà a fùtɨ̂n ale. ²⁸ A ni gha ye a yi ne, mu wu hì fê luŋa nâ hi kahe chinhe wûn ha ghàn beka mu khə na ghàn nè hì kôŋàlò hi yen a wûn. Ghàn yen wûn shihi saŋlî, ma kwâktì mi nê hi fê boŋa fo wi ngə̂k ha mu. ²⁹ Ghàn fyi wûn nì saŋlînì kə nâ te wâ nì wânù we a ghàn à ghɨna kəta kə Bâba wù mòk. Ghàn hi ngumle ghɨta te wûn, ³⁰ beka wù ti mâkà ngɨŋ à wûn lanti hi kpû, mômhè hi tè nè fêt yi Klistù. Wù chehì gâmtè mu hi nè gha ye nâ ghàn wi hi nì.

¹ Hi mihì a wan a noma, ghàn hi saŋlê na ghàn à Bâba mò amok. Mu tà bot hi nyàk à kunte gha ma mu hì mô ma mu ti nyâk. Gha mɨ ghɨ̂n mô kə hi gàmtè ghàn. ² Ghàn hi tôknè kum ghɨt a be ghɨ̂n a ghɨ mô te sù bû. Ghɨna lèmà kə na ghɨ kəta hi se luk wu wùnu wûtù shyəma Yènfù hi mô hi bònhè wûn. ³ A mô ghàhnà ghɨt ghe a Yènfù tì se nam a ghàhnà kə nâ wu lum afa a ghɨ kəta hi se atɨ̂n, a bu ghɨna. A mô ghàhnà a Yohnà Fùyènà gàmte na ghàhnà hi kokhe wûn, a fê mô kə ghàhnà ghɨt ghe a ghɨ jala te ghàhnà nì Klistù Jisòs mò amok, lêmà wi təm a ghàhnà a gha njyàsu wùnsu. ⁴ Nâ mu làhi lèmà kəbi təm a ma a gha njyàsu wùnsu afân. À shìki kwâktì nâbi nde na yi kəta hi tè tòkà chyənà mi yîn, ma mu jis na mu làhi tòk hi chyà nâ wûn. ⁵ Ghɨ tì bwɨ mu, à hì mô a mu tuk fama, ghɨ se nam a ma. Mu mô wut à Isalì ma mu fwo yi sah yi nda Benjamìn. Mu mô wut à Hibùlùs kə nâ yi bwɨ̂. Mu ndùku mô a nòn à ghɨt a Falàsî, lêmà kə nâ sak te a Musìs tì fo hanɨ̂ŋ. ⁶ Mu hì lumà nì wunu nâ haŋaŋ, chɨma wulu ghɨt a bimena. Wò shìki kwâktè kə nâ te wùt kəta hi tè mô chilichili, lêmà sak ye a ghɨ fo ha wûn, ma mu jis na mu ndùku kəta wi njahi. ⁷ Mu ndùku lyê nâ gha mɨ ghɨ̂n à jɨ̀m na à mô mbì, biyani hì lyê kə chin na à mô a lə̀hà kum fêt yi Klistù. ⁸ Mu yena chin na gha mɨ ghɨ̂n kəta wi fêtì nâ hakoh beka gha yi ta ha mu hì mô kə hi tè khə Bâba Klistù Jisòs. Nâbi ghə hì mô kə ha mu chin te wu ghât. Mu ti de nâbi ghə beka mu kòŋà na ghàh à Klistù hi mô amok. ⁹ Mu khɨŋa na ghàh à wûn hi chîntè mô kə ha shyə̀ à mòk, mu mô chilichili a Yènfù ashyə̂, a bu kum jyak a ma a ngɨŋa. Mu fè lêmà wi Saki hi tê mô chilichili, mu hì mô wut à chilichili chin kum yi bimî mi ha Klistù. A ni lum we a Yènfù lyè ghàhnà atɨ̂n ha ghɨt a chilichili. ¹⁰ Mu khɨŋa hi tè khə Klistù, hi yen a jyak ghe a Yènfù tì fo ha Jisòs ghɨ nî wù lôtì a yi kpû shyəma mu boŋa yen ngə̂k kum fêt yi wuni ma mu kpu kəbi te wûn, ¹¹ ma Yènfù ni, ma mu boŋà kahà lòti a yi kpû. ¹² Mu jìsà wi na gha mi yin hì mô ma yi ti kpên ha mu, jîsà wi na mu ti time mihì. Mu mòmhè kə hi tè khə Klistù Jisòs fê mô te wûn beka à mò gha ye a wù tì chwoka mu atɨ̂n na mu hi mô wut à wûn. ¹³ Wan a noma, mu lèmà wi na mu hì mô ma mu ti khɨli shyə ghe a mu khɨŋa. Gha ni mò kə yì mòk na, mu fè lêmà wi to a yi gha ma yi ti chyâ, mu fètà yênà kə ashyə̂. ¹⁴ Mu nyiŋa yê kə ashyə̂ hi kwote maktu we a Yènfù nè toŋa mu hi fô. Maktu wuna mô na, Yènfù tì toŋa mu tohne a Klistù Jisòs fo chyənà ye a yì bè mê wi ha mu. ¹⁵ Mu wu hì jîsà na, mu khə na ghàhnà à jɨ̀m ghe a ghɨ ti ghəknâ a ghàhnà yi bimî kəta kəbi kwâktì mi yîn. Biyani, ghàn ghɨ le shìki kəta kwâktì yilô, ma Yènfù ni, ma ghàn ywo khɨli gha mɨ ghɨ̂n wu lum afa ghɨ kəta hi tè mô atɨ̂n. ¹⁶ Ghàhnà ni kəta kə hi tè nè kə gha ye a Yènfù tì chwùte na ghàhnà hi nê. ¹⁷ Wana noma, ghàn hi sine kə chyənà mì. Ghàn hi gbê kə te ghɨt ghe a ghɨ jûmtè lumtu jûŋ te a ghàh tì chwùtè na ghàn hi gbê atɨ̂n. ¹⁸ Ghɨt a dona chyə̂ wu lum wule yi chwùtè na ghɨna bànàlò gha ye a Klistù tì kpo a kàkfùtàfù kum yini. Mu hì mô ma mu ti jis gha ha ghàn kum ghɨt a be mɨ ghɨ̂n kə ghan hidù, mu wu hì fê jîsà yîn chin nâ nì semù a mu sê. ¹⁹ Yènfù nè bobhelò ghɨna beka ghɨna ngumle kə mwə̀ me a mù foma a ghɨna wu wùn. Ghɨna ni bɨlà saŋle kə gha afa a ghɨna kəta hi tè wume atɨ̂n. Ghɨna lêmà kə kwâktì tu ghɨna tu à mwə̀ mù chyə̂. ²⁰ Biyani, a mô ha ghàhnà, ghàhnà khə na lak yi ghàhnà mò a nyə̂, ghàhnà yute Bònhè à ghàhnà Bâba Jisòs Klistù na wù kahè ben ma wù lyi ghàhnà. ²¹ Wu bênà ma wù kwuna wun wu ghàhnà wunâ a wu mô hi kpu ni, ma wu kahè hi mô kəbi te wun wu wunu wu njentenu. Wu bênà hi nè gha mɨ ghɨ̂n nì jyak ghe a wù kəta ghɨ mô hi nì na mwə̀ mù jɨ̀m hi mô kə a wun a sah yì sâk.

¹ Mu wu hì jîsà ha ghàn a wana noma ghɨ jûŋà na, mu kòŋàlò ghàn nâ a jûŋ fê kôŋà hi yen a ghàn. Ghàn nè mu saŋle kə ni. Ghàn mô ha mu ni te maktu wu fèt tù. Mu jala ha ghɨta kum ghàn, mu jîsà a wana noma na, ghàn faŋ à hi ta kə yi tâ a ghàn fùtɨ̂n à yì bimî, chyə chyənà ye a Bâba khɨŋa. ² Yùwodìyà, mu chyate na ghàn à Sìntekì maka gùfna yanì yê beka ghàn mò wana nê fùtɨ̂n à yi bimî afa a ghàn kəta ha Bâba. ³ Mu jìsà ha wò we a ghàh à wò fètà, wo fate fêtà kə nâ hamok na, wò gamti ywên ghɨna a bə. Ghɨna mò ni ma ghàh à ghɨna chehì fôktè tum yì jùŋ amok bakhe nì Kɨ̀limèn nì ghɨt ale, yet a ghɨt atɨ̂na mô a ŋwàklù yì bòn. ⁴ Ghàn hi saŋlê na ghàn à Bâba mò amok. Mu jîsà fê kumte kə yi kûmtì na ghàn hi saŋlê. ⁵ Ghàn ni ma nâbi nde yen na ghàn bonelò. Yu wu hì bakhe bênà shyəma Bâba kahè ben. ⁶ Kə ghàn fî kwakti gha yile. Ghàn hi bɨlà jə̂mà kə yi jə̂m, lona nâbi ghə ha Yènfù te ghàn khɨŋa. Ghàn shihi lôn, ghàn hi fo àyòŋnà. ⁷ Ghàn shìki nî ni, ma Yènfù ywi təm ghana nì kwâktì yani wu lum wule wùt bu hi khɨlî beka ghàn à Klistù Jisòs mò amok. ⁸ Gha yi gokheni a wana noma mò na, ghàn hi lêmà kwâktì yani nâbi a ghə ghe a ghɨ mô hamok fê lêmà nâbi a ghə ghe a ghɨ kokne nì ghe ghɨ mô chilichili nì ghe a ghɨ yule. Ghàn hi kwâktè gha ye be yìlè bu atɨ̂n. Gha mɨ ghɨ̂n ni mò ghe ghɨ jwôfà kpene fê mô shyəma ghɨta hi bəmhê. ⁹ Ghàn hi nê gha ghe a ghàn yike ha mu fê nê ghê a ghàn chehì ywo te mu jìsà nì ghe a ghàn chehì yena te mu nè. Ghàn shìki nî ni, ma Yèn fe a fu nê na ghàhnà hi chyə nì yutìnì hi mô ghàn à ghɨna. ¹⁰ Mu saŋlê kə ni fê fo àyòŋnà ha Bâba kum te ghàn ti fî chwûtì ha mu chîn na ghàn kəta kə nâ kwâktì yi jûŋì ha mu nâbi te lumu dàfà ni. Mu khə na ghàn chehì chyə, kəta kə nâ kwâktìnì ha mu biyani, lumu bu hi chwùtì. ¹¹ Mu jìsà wi gha mi yîn chin ni te mu gha a shyə ale. Mu ti yiki hi tè chyə, ke wi shyə ale ha wùt. ¹² Mu ti yikî hì khə hi tè chyə nâbi wu yu afa mu kəta wi shyə ale, fî yiki hi khə hi chyə nâbi wu yu afa mu kəta mwə̀lû mu fê dô ghaknê. Mu yiki a gha mɨ ghɨ̂n shyəma à hi mô nâbi afa, nâbi wùni yu, mu mô kə a jûŋ, makə mu kətalò shyə ale hi yə̂, makə mu kəta wi, makə mu kəta, mu dô, makə mu kəta mu tobtê. ¹³ Nâ gha yile wi hi bè ta ghak a mu beka jyak ghe a Klistù fo ha mu. ¹⁴ Biyani, yi chehì jwôfàlò te ghàn chehì gâmtè mu a mu atɨ̂n à ngə̂k. ¹⁵ Nâ ghàn ghɨt a Fìlibây hi khə na, mu tì fôktì tum yì jùŋ ha ghàn ha shyə̂ lo a Màsìdoniyà hì fôktè yênà a tu lùk tu letu, a hì mô kə ghàn ghɨt a shyə hi fo yi gâmtì ha mu. Ndâ Fùyèn yìlè tà tì fî gâmtì jə mu. À mò kə ghàn ghe a ghàhnà tì tumne mwə̀lû. ¹⁶ À hì mô kəbi te mu mò a Tèsàlonikà, ghàn hì chinhe yi gâmtì ha mu kə mu yu, a mu yu. ¹⁷ Mu jìsà wi ni na mu fè khɨŋa na ghàn fo shyə ale ha mu. Mu bɨlà khɨŋa kə na ghɨ kpenhi maktu wanu. ¹⁸ Mu jìsà ha ghàn chin na, mu hì kəta nâbi ghə te mu khɨŋa, kəta chyâ. Èbàfàlòditùs tì bên nâbi nì ghə ghe a ghàn tì fo na wù bê fo ha mu, mu fè gha wi shyə ale. Mwə̀ munâ mò yi fô ha Yènfù, lɨ̂mtè foma kə ni. Fu ti fyî hì saŋle kə ni. ¹⁹ Yèn famfu kəta kə mwə̀ mù jɨ̀m. Fu nè folò nâbi ghə ghe a ghàn boŋa khɨŋa tohne yi gha afa a Klistù Jisòs tì ne ha ghàhnà. ²⁰ Ghàhnà hi fo kokhînì ha Yènfù, Bì ha ghàhnà a yû mù jɨ̀m. Àmèn. ²¹ Ghàn toŋti ha ghɨt ghe a ghɨ bime ha Klistù Jisòs afa nâ à jɨ̀m. Wana ne ghàhnà ghe a ghàh à ghɨna mò afân amok jis na, mu toŋti ha ghàn. ²² Ghɨt a bimena ale ghe a ghɨ mô afân jis na mu boŋà toŋti ha ghàn nâ à jûŋ, ghê a ghɨ fêtà a fə̀n wù chìk a tôk jis na mu toŋti ha ghàn nâ hanɨ̂ŋ. ²³ Bâba Jisòs Klistù chwuti təm a wuna ghɨ jûŋà ha ghàn.