Lûk

¹ Bèbɨn Tìyofilòs: Ghɨt a dona tî mômhì hi nyàk gha ghe ghɨ ndùku gàna a ghàhnà fùtɨ̂n. ² Ghɨna nyak gha ma ghàn à jɨ̀m tì ywô ha ghɨt ghe ghɨ tì yena gha tɨna kə yìmi faŋ hì fôktè. ³ Mu ti yen na yi jwôfàlò, bèbɨn na mù boŋà nyak à fokti gha atɨna ha wò a mbaŋi a mbaŋi te mu tòka kine kwoka nì ghɨna kə te ghɨ tì yìme hì gânà kwokâ. ⁴ Mu fòktè ni shyəma wù nê hi khə hamok atɨn à gha afân a ghe a ghɨ fokte ha wò. ⁵ Yi mô na, a ndùku mô te Fə̀n Helòd saka lak yi Jùdiyà. Wùt lè mô tuhe mwə̀lû a ndâ Fùyèn ghɨ toŋte na Sàkàliyà a mô wùt a Àbijà yi sah yi nda, ywê wûn mô Èlisabèn ma wù fwu kəbi a Alòn yi sah yi nda. ⁶ Ghɨna à jɨ̀m ndùku chyə chilichili a Yènfù ashyə̂, nê gha ghe Bâba jìsa nâ à jɨ̀m, lêmà saktu Fùyèn tù nâ tù jɨ̀m, kəta wi njahi nâ hakoh. ⁷ Ghɨna ndùku mô ma ghɨna ti ləma nâ jûŋ kəta wi mwəlà beka Èlisabèn ndùku bwɨ wi. ⁸ Tuku yû tuk wule a kəta ghɨt a Sàkàliyà a ndâ hi nè yi fêt a ndâ Fùyèn, Sàkàliyà yen hi yè nè fêt yi wuni te wùt we wù tuhe mwə̀lû a ndâ Fùyèn. ⁹ Ghɨ tum byè kə te ngàŋsù ndâ Fùyènsu ndùku tuma hi kine a yi ghâ, yi fwu na à kəta Sàkàliyà hi lye nyòk yi leŋ a ndâ Fùyèn. ¹⁰ Yu kpen wù lyi hi nyòk, ghɨt à jɨ̀m ndokò a bɨn hì jə̂mà. ¹¹ Kə ni, anjèl à Bâba bûŋhì fwu timi a ngwùŋ à baŋ afa a ghɨ ndùku nyôkà leŋi atɨ̂n, a bàh à kpen wu wo ta. ¹² Ni te wù yena anjèl ye ni, lɨmalɨma bâh wûn, fânì fî kwo wûn. ¹³ Biyani anjèl à Fùyèn yê jis ha wun na, “Kə wò fan a Sàkàliyà, beka Yènfù ti yu jə̂m yâ. Ywî wâ Èlisabèn nè bwəlò wan wù lɨ̂mà ma wò nê chwu yet yi wuni na Jon. ¹⁴ Wò nè hì saŋlê nâ jûŋ kum nì bên yì wan àtɨni ma ghɨt a dona nê hi boŋa saŋlê kum nì bên yì wuni. ¹⁵ Beka wù bè hì koknelò a Bâba ashyə̂, ma wù bê hi nyo wi lùkû nâ hakoh ma wù bê hi mô ma wù ti lun nì Yohnà Yulena a wun yi təm kə nè wun a wù là. ¹⁶ Wù bè nê ma wana Isalì kahà ben ha Bâba Yènfù ghɨna fu. ¹⁷ Wù bè hì bênà a Bâba ashyə̂ nì chyəna nì jyaka Fùyènà kəbi yi ghəl te Ìlajà, hi nì na be mwəlà bakti chyəna nì wana ghɨna, hi fè nì na ghɨt ghe a ghɨ ta nì tu kahà bona nì tofu te ghɨt ghe a ghɨ kpene, wù bê nê gha ghɨ̂n hi gàmtì na ghɨta bakti hi fye Bâba.” ¹⁸ Sàkàliyà ki buf ha anjèl à Fùyèn yê nâ, “Mu mò hi khɨlî yàni na gha yina mù hamok agha? Ma ghàh à ywê mù ti jûn nâ haŋaŋ.” ¹⁹ Anjèl àtɨ̂n jis na, “À mô mù, Gabliyà a mu we mu mò a Yènfù a ngwùŋ. À tum Yènfù mu na mu bê fokti tum yì jùŋ yìna ha wò. ²⁰ Wò hi khə na wò nè kwûkàlò hi bè tàn a wu tuk afa gha yîn bè gânà beka wò tà bimi jə gha ye mu jìsa. Biyani yi bè kpenalò kə wu yu afa ghɨ tì lèma.” ²¹ À ndùku mô ni, ghɨta yute Sàkàliyà a bɨn, kana nâ wù bìti lala ghə a ndâ Fùyèn ni agha? ²² Sàkàliyà fwu ben hì fè jîsà wi ha ghɨt ghê, hì jîsà kə nì wo ha ghɨta. Ghɨt atɨna khɨli chin na anjèl ti chwûtì gha a wun a yi kə̀k a ndâ. ²³ Te tuk mù fèt mù tɨ̂n tì me, wù kaha kolo a wun a bɨn. ²⁴ Te tuk mù tɨ̂n tì chyàla, ywê wûn Èlisabèn timi wu lâ let a ndâ a sù njoŋ sù tân jîsà na, ²⁵ “A ni kə̀kà nâ mu ni. Bâba ti ni gha kanani ha mu; wù ti ghaŋ gha fihi wumînì a mu a tû. Wùt lè bè fê chyəka wi mù.” ²⁶ À ndùku mô te Èlisabèn ndùku mô wu lâ njoŋ tufa, Yènfù fî tum anjèl à wûn Gabliyà na wù yen a yi tèk yi yile a yi lak yi Galìlî, ghɨ toŋte na Nasalì, ²⁷ na wù yê yen wan wù ngòn wùlè wu baha mô teka wù khɨli wùt lɨmà, ghɨ toŋte na Mèli, ma wùt ti fo tabaŋa a wun a tû yet yi wuni mô Josèf, a mô wùt a Defìt a yi sah yi nda. ²⁸ Wù yen yen wûn jis na, “Mu wu toŋte bênà a nàk tum, Bâba mò ghàn à wûn!” ²⁹ Gha tɨni fumhi Mèli nâ haŋaŋ, wù hì kana nâ a mò yìni nki toŋtî ni agha? ³⁰ Biyani anjèl mu yê jis ha wun na, “Kə wò fan a Mèli, Yènfù ti fo wò. ³¹ Wò hi khə na wò nè timelò wu lâ ma wò nê bwɨ wan wù lɨmà ma ghɨ nê chwu yet yi wuni na Jisòs. ³² Wù bè hì bəma kə ni, ma ghɨ bê hi toŋte wun na Wâ Fùyèn fu ngaŋte fu, ma ghɨ bê toŋti wûn ma fo kpok wu tu fə̀n wù bè wûn ha wûn a mô kpok wu Defìt. ³³ Yi chwûtè na, wù ti kwok fə̂n wu Jakòb wu nda hi faŋa kə yi fâŋ. Fə̂n wu wunu bè hì kəta wi gokhini.” ³⁴ Mèli ki buf ha anjèl à Fùyèn yê na, “Yìna mò hi gàn nâ yàni mu khə wi wùt lɨmà agha?” ³⁵ Anjèl à Fùyèn yê fîsì ha wun na, “Yohnà Yulena nè bê lò ha wò ma jyak a Yèn fe a fu ngaŋte kpene ma ghɨ nê ben ha wò, yi chwûtè na wan wunâ bè lô kə nâ ha Yènfù ma wù ben. Ghɨ bè hì toŋte wûn na Wâ Fùyèn. ³⁶ Yên lê nâbi wùt wâ wù ndâ Èlisabèn, ti boŋ wan yi jùn nâbi te ghɨ ndùku jîsà na wù mò a kân, chin hì mô njoŋ tufa. ³⁷ Yi chwûtè na gha yile wi hi bè ghak a Yènfù.” ³⁸ Mèli ki jîs na, “À hi mô na yi kəta hi tè mò te wò jìsa beka mu khə na mu mò kə a Bâba yi dèt yi làŋ.” Anjèl à Fùyèn yê lô. ³⁹ Mèli lô kə mu tuk afû nyâŋhì yen a yi tèk yile a Jùdiyà a yi lak yi sù kuni. ⁴⁰ Wù yen lye a Sàkàliyà a ndâ toŋti Èlisabèn. ⁴¹ Yu we Èlisabèn tì ywo toŋti wuni, wan shɨŋ a wun wù là. ⁴² Èlisabèn lun nì Yohnà Yulena ki jîs a jyə̂ yì tâ na, “Yènfù ti bonhi wò chyâ ywen à jɨ̀m, fî bonhi wan we wù mò a wo wu là! ⁴³ Mu mò nâ nde shyəma nè Bâba mù ben hi jikte mu? ⁴⁴ Yu we mu ye ywo toŋti ya, wan ti shɨŋ a mu wù là nì saŋlînì mu ti yû. ⁴⁵ À mò yi saŋlî ha wò te wò bime na gha ghe Bâba Yènfù jìsa na ghɨ kpen nâ à jɨ̀m.” ⁴⁶ Mèli yîmì hi tè tuma tukum ha Yènfù jyâna: “Təm a ma fo yi kokhî ha Bâba, ⁴⁷ fê saŋlê ha Yènfù, Bònhì à mì. ⁴⁸ Beka wù ti chwok mu a wùt a wûn wù fèt nâbi te mu kwok a kpene wi ha shyə̀ ale. À bè hì kwoka bênà nâbi yìni ngwàk, toŋte mu na yi saŋlî, ⁴⁹ beka Bè jyak à jɨ̀m ti nî gha kanana ha mu. Nâ wùt lè wijə te wûn. ⁵⁰ Seni kwo lò wûn nâbi ha nde we wù fânà wûn hi yê tàn nâbi yini. ⁵¹ Wù ti chwûtì jyak a wuna, banhi sah a ghɨt ghe a ghɨ kəta ghaŋhi wùni a ghɨna təm. ⁵² Wù ti chwohi fə̂ntù a ghɨna mu kpòk, tuk a ghɨt a yuma. ⁵³ Wù ti yəhi ghɨta jiŋa nì mwə̀ mù jùŋ, ghɨna yə̂ kwut, biyani jum kə yi jûm ghɨt ghe a gha wi shyə ale. ⁵⁴ Wù ti yɨ̂ŋtì chwunu wunu ha wùt à wûn wù fèt a mô ghɨt a Isalì, kwohi seni ha ghɨna ⁵⁵ kə yi ghəl te wù tì jìsa ha be ghàhnà ghɨ shyə Ablàhâm, nì ngwìk à wun yi sah yi nda, na yi nè chwûtèlò seni kwolani ha ghɨna yu mù jɨ̀m.” ⁵⁶ Mèli jis ni, chyə ghê Èlisabèn njoŋsù tât ki kaha kolô. ⁵⁷ Yu bwɨnu Èlisabèn tì kpên, wù bwɨ wan wù lɨmà. ⁵⁸ Ghɨt ghe ghɨ ndùku chyə kûmhè ha wûn nì sah yi nda wuni yu jùŋ a yi gha yi chik ye Bâba ne ha wûn hì boŋa saŋlê. ⁵⁹ Tuk mù chyâ sàmba, à hì mô a mu tuk fama ghɨna ben na ghɨ fati nam a wana hì khɨŋa hi chwù wan a bè wûn yi yet na Sàkàliyà. ⁶⁰ Biyani nè wûn tunhî jis na, “Yet yi wuni mò Jon.” ⁶¹ Ghɨna jis ha wun na, “Jon wijə yet yani yi sah yi nda.” ⁶² Ghɨ jis ni, ki buf a yet yi wani ha Sàkàliyà kə nì wo beka wù ndùku baha mô ma wu ti kwûkà. ⁶³ Wù buf a bâŋà nama nyak atɨ̂n na, “Yet yi wuni mò Jon.” Jwo yum ghɨna. ⁶⁴ Kə wu yu, chwûlù wunu yâhì, wù yîmì hi tè jìs kokhe Yènfù. ⁶⁵ Gha tɨni hì bəmâ ha ghɨta yi tèk afû nâ haŋaŋ, gha tɨni gbî yi lak yi sù kuni Jùdiyà yì jɨ̀m. ⁶⁶ À ndùku ywo nâbi nde gha yìna wu hi mô nì kani, bufa nâ, “Wan wunâ bè kwoka nâ ha ghə?” Ghɨna ndùku mô ma ghɨ ti yên hamok na Yènfù làwû a wan wunâ a tû. ⁶⁷ Yohnà Yulena lun a bè wûn yi təm Sàkàliyà, wù jis a jyə̂ Fùyèn jyan na: ⁶⁸ “Kokhînì mò ha Bâba Yènfù ghɨt a Isalì beka fu ti bên hi kina ghɨt a wuna, fî ben hi yun a ghɨna. ⁶⁹ Fu ti fî fo mbàŋ yì nòna ha ghàhnà ma yì fwo a Defìt yi sah yi nda a wùt à wûn wù fètana, ⁷⁰ kəta fu tì jìsa ashyə̂ tohne ha fòktìsu chiksu. ⁷¹ Fu tì jis na, fu bè bônhèlò ghàhnà a bànàsù ghàhnà su a wô sù jɨ̀m, ma ghɨna bê hi fê kəta wi lumu hi mìhè ghàhnà. ⁷² Fu nê gha ghɨ̂n hi chwùtè seni kwolani wuni ha be ghàhnà ghɨ shyə nì hi fè chwùtì na, fu baha kwâktè kə yi kwâktì chwunu wunu we wù tì chwùne ha ghɨna. ⁷³ A mô mu kân me wù tì yə ghê bè ghàhnà wù shyə̂, Ablàhâm, ⁷⁴ shyəma ghàhnà fwo mihi a bànàsù ghàhnà sù wô nâbi wùni yu nê fêt yì wuni fê fânà wi, ⁷⁵ yulê mô kə chilichili a wun ashyə̂ nâ shyəma tuk mù ghàhnà bê kwok à yê mi. ⁷⁶ Ha wò wâ mù, ghɨ bè hì toŋte wò na fòktì wù chìk a wù Fùyèn fe fu ngaŋte kpene beka wò bè hì yênà ashyə̂, fate lumu, Bâba bênà a wò yi bàm, ⁷⁷ fo wu tof ha ghɨt a wuna shyəma ghɨna bê bon, a wu yu afa ghɨ lèhìfo besu ghɨna su. ⁷⁸ À bè nê seni kwolani ghakani Yènfù ghàhnà fù na yuchwî yinâ sat a ghàhnà tû. ⁷⁹ Hi fo yi bân ha ghɨt ghe ghɨ mô a fùtɨ̂n à bɨn a finana, lîŋhè a yi kpo bakhe ha ghɨna, hì fè chwùtì lumu yutenu ha ghɨna.” ⁸⁰ Wâ Sàkàliyà wùna tî ləmâ hì ta a tu lum tù jɨ̀m. Wù hì chyə yi lak yi sùsi hi bè tàn a wu tuk afa wù tì chwùte ngɨŋ à wûn ha ghɨt a Isalì.

¹ À ndùku mô mu tuk afû fə̀n à Lûm Àgustùs fihi yi sak yile na ghɨ nyak nâbi yet yi nde. ² Yìna ndùku mô yu shyə hi nyàk a yet te Kwilinùs kwoka ha bì yì tèk a Siliyà. ³ Nâbi nde kahi yen a wun a yi lak hi nyàk yi yet yi wuni. ⁴ - ⁵ Josèf fwu a yi tèk yi Nasalì a Galìlî kwok a Betùlùhêm a Jùdiyà a mô yi tèk yi fə̀n Defìt beka wù ndùku mô a wut a Defìt yi sah yi nda. Wù tì yen hi nyàk yi yet yi wuni ghê Mèli we wù ndùku gbê ha ywi. À ndùku mô yani Mèli mô wu lâ. ⁶ À hì mô te ghɨna baha mô afû, yu kpên shyəma wù bwɨ ⁷ Wù bwɨ wâ wûn wù ngòn, a mô wan wù lɨmà, lim wûn nì kôm wù sùnju, nîŋhì a ngwùk afa nyamsu ndùku yə atɨ̂n, beka luku ndùku wi a nda afa ghɨt a benana ndùku bênà chyə atɨ̂n. ⁸ À hì mô kəbi wu tuk afû, ghɨt ale mô a bàh à yi lak afû chînà bwusu ghɨna su a ghə̀n ntuksu. ⁹ Kə ni, anjèl à Bâba yìlè fwu a ghɨna yi kə̀k, ban yi chiki Fùyènì jiŋ kat ghɨna, ghɨna hì mô nì fânì nâ haŋaŋ. ¹⁰ Anjèl à Bâba yê jis ha ghɨna na, “Kə ghàn fan, mu ti ben nì tum yì jùŋ ha ghàn, a ye yi nè fo saŋlînì ha ghɨt à jɨ̀m. ¹¹ Ghɨ ti bwɨ̂ Bònhì ha ghàn wu tuk wu lân a Defìt yi tèk, a mô Bâba we ghɨ chwoka lema. ¹² Chwena ghe ghàn nè yena mò ni. Wan àtɨ̂n mò ma ghɨ ti lîm wun nì kôm wù sùnju, nîŋhì a ngwùk ye nyamsu yə atɨ̂n.” ¹³ Kə wu yu nôn à anjèlsù Fùyènsu lesu fwu ben bakha hì kokhe Yènfù jîsà na: ¹⁴ “Kokhi Fùyènì tan nâ wu lùk wu ngaŋtenu a nyə̂, bonanì mô a chyə̂ ha ghɨt ghe wù saŋle nì ghɨna!” ¹⁵ Te anjèlsu Fùyènsu tì lo de ghɨna kaha kwok a nyə̂, ghɨna ndokò hì jîsà ha ngɨŋsu ghɨna su na, “Ghàhnà daŋ à yen a Betùlùhêm ma yê yen gha ye yi gana te Bâba ne na ghàhnà khɨli.” ¹⁶ Ghɨna jis ni, lo kə yi lô yen yen Mèli nì Josèf nì wan àtɨ̂n ma ghɨ ti nîŋhì a ngwùk. ¹⁷ Ghɨna yen ni, hì fòktè gha ye anjèl à Fùyèn ye tì fòkte ha ghɨna kum nì wan àtɨ̂n. ¹⁸ À hì ywo nâbi nde gha ye ghɨt ghe ghɨ ndùku chînà bwusu ndùku jîsà hì kante kə yi kantî. ¹⁹ Biyani Mèli fati lem gha ghɨ̂n a wun a tû ghɨ faŋ kə yi fâŋ. ²⁰ Chìnsù bwu sê kahi lô yen hì kokhe Yènfù tuma tukum ha wûn a yi gha afa ghɨna ywo fî yenlò kə te ghɨ tì jìsa ha ghɨna. ²¹ À ndùku mô te ghɨ fate wan yi bàm mu tuk fama, ghɨ chwu yet yi wani na Jisòs, kə yi ghəl te anjèl à Fùyèn tì be jisa ghɨ baha mô teka ghɨ boŋ wûn. ²² Tuku tì kpên shyəma ghɨna yê su ngɨŋsu ghɨna su kə te sak yi Musìs tì chwûtè, ghɨna lyi kwok nì wan a Jèlusalèm hi chwùtì ha Bâba, ²³ beka sak yi Bâba ndùku chwûtè na, “À fwu nâbi wùni wan wù lɨmà wù shyə̂, ghɨ lem na a mò wù Bâba.” ²⁴ Ghɨ kwok nì wûn kəbi hi ye lunhe yi sak yi Bâba ye yi ndùku jîsà na, ghɨ kəta hi fo mbwu mù bà makə làtùta mù bà. ²⁵ À ndùku mô ni, wùt lè mô a Jèlusalèm ghɨ toŋte na Simùn, wu mô ma wù ti lun nì Yohnà Yulena, chyə chilichili, a wun a chyənà, lyê wu yu hi nì fêt yì Fùyènì. Wù ndùku chyə yute kə tuk we Bâba bè yâhà mihè semù ghɨt a Isalì atɨ̂n. ²⁶ Wù ndùku mô ma Yohnà Yulena ti chwûtì ha wûn na wù bè kpo wi bu na wù yen wùt we Bâba chwoka tuma. ²⁷ À hì mô te bè Jisòs ghê nè wûn lye Jisòs ben nì wûn a ndâ Fùyèn na ghɨ ni ha wûn te saki ndùku jîsà, Yohnà Yulena chinhi Simùn, wù lô yen afû kəbi wu yu tɨnu. ²⁸ Wù fyi wan, khɨti wûn a wô hì kokhe Yènfù jyâna: ²⁹ “Nì chîn a Bâba wùt wâ wù fèt làhi lò nì bonanì kə te wò tì chwùne, ³⁰ beka se ma ti yen te wò bè bonhe ghɨt gha ³¹ Te wò fate lema ghɨt à jɨ̀m ti yên. ³² Bôn yinâ bè hì mô yi ban ye yi chwûtè lumu ha tumu, fo yi kokhî ha ghɨt a Isalì, a ghɨt gha.” ³³ Bè Jisòs ghê nè wûn hi mô nì kani a gha afa Simùn ndùku jîsà kum wâ ghɨna. ³⁴ Simùn bonhi ghɨna, ki jîs ha Mèli na, “Wò hi khə na, Yènfù ti lem wan wunâ na wù bê lohi ghɨt a Isalì nâ hidù, kəbi ni ma wù bê fenhi ghɨ dona. Wù bè faŋa te a chwena ghe ghɨta bè hì nyîkhè, ³⁵ ma gha ghe ghɨta lètè a ghɨna a təm, ma fwo mihi a ndan. Ma nywifu bê so təm ya kum nì wan wûn.” ³⁶ À ndùku mô ni, fòktì wù ywên wù chìk wùlè mô afû ghɨ toŋte na Anà, a mô wâ Fàmùwêl a wut a Ashà yi sah yi ndâ, ma wù ti ləma nâ a jûŋ, a mò ma wù tî malâ chyə kə ghê lɨm à wûn wu lɨ̂m sàmba, ³⁷ wù kpû, à hì mô chîn ma wù ti ləmâ hì mò lɨ̂m mfama njwòsù kìk, nâbi yani, mô kə a ndâ Fùyèn kokhe Yènfù, bama yi jwô, chyate nchwì nì ntuksu. ³⁸ À ndùku mô wu yu afa ghɨ tì be nì Jisòs a ndâ Fùyèn, wù lyi ben hi fo yòŋnà wana ha Yènfù, nì hi fê fòktì gha wan àtɨ̂n ha nâbi nde we wù ndùku yute na Yènfù bê fihi ghɨt a Jèlusalèm a ngə̂k. ³⁹ Josèf ghê Mèli mihì nâbi yìni gha te sak yi Bâba ndùku chwûtè, kaha kolo a ghɨna yi tèk, a Nasalì yi lak yi Galìlî. ⁴⁰ Jisòs hì ləmâ kə nâ jûŋ tofu wunu ləma yênà ashyə̂, Yènfù fê bonhi wûn. ⁴¹ Bè Jisòs ghê nè wûn hì kwoka a Jèlusalèm kə lɨ̂m wù jɨ̀m, hi yè yə tuk wu Daŋa Chyalanu. ⁴² Jisòs ləma tan lɨ̂m njwòsù bà, ghɨna kwok a Jèlusalèm kəbi te ghɨna yè kwoka. ⁴³ Te ghɨ tì yə mihe yə Daŋa Chyalani, ghɨna lô hì kolê, Jisòs faŋ yi bàm a Jèlusalèm, biyani bè wûn ghê nè wûn ndùku khə wi, ⁴⁴ kwâktè na wù mò a ghɨna fùtɨ̂n. Ghɨna gbî tuk wu fublùnù kaha hì bufa wûn ha ghɨt a ghɨna ghɨ sah yi nda, nì ha ghɨt ghe ghɨ ndùku khə wûn, ⁴⁵ tê yên, kaha kwok a Jèlusalèm hi khɨŋa wûn afû. ⁴⁶ Ghɨ khɨŋ wûn a mu tuk mù tât yen yen wûn a ndâ Fùyèn, wu mô ghê chichàsù, yute gha ghe ghɨna ndùku jîsà fê bufte ale. ⁴⁷ À ndùku ywo nâbi nde te wù jìsà, wu hi kana kə yi kân nâ, wù lyi afa tofu hi tè fìsì a gha ni agha? ⁴⁸ À hì mô te bè wûn ghê nè wûn yena wun ni, gha tɨni hì bəma ha ghɨna! Nè wûn buf ha wun na, “Wâ mù, njwô ghə te wò ne nki gha yin ha ghàh? Ghàh à ba wâ ti khɨŋ wò hì fânà.” ⁴⁹ Wù buf ha ghɨna na, “Ghàn yê hì khɨŋa yi khɨ̂ŋ mu njwô ghə? Ghàn yê malò na mu kəta hi tè mò a Bom a ndâ agha?” ⁵⁰ Biyani ghɨna tê ywo khɨlî gha ye wù jìsa. ⁵¹ Wù lô kə wu yu kaha chwo a Nasalì ghê ghɨna, hì ywo ha ghɨna. Nè wûn lem gha ghɨn a wun yi təm nâ à jɨ̀m ghɨ faŋ kə yi fâŋ. ⁵² Jisòs hì ləma kwoka kə nâ a jûŋ, tofu wunu tâ ləma yen kə ashyə̂, Yènfù hì kôŋà wûn, nâ ghɨta boŋa kôŋà wûn.

¹ - ² À ndùku mô te Tàbeliyùs saka te fə̀n wù chìk a Lûm, à hì kwoka yênà lɨ̂m njwòsù tân, tum à Fùyèn ben ha Jon wâ Sàkàliyà, a lak yi Sùsi. À ndùku mô ni, ma ghɨ ti lem Bontiyùs Balèt na wù hi saka bâh à lak ale ghɨ ndùku toŋte na Jùdiyà, Helòd hì saka Galìlî, wâ nè wûn Filîp hì saka bâh à lak ale ghɨ toŋte na Ìtulìyà nì Tìkanotìs, Làsinàs hì saka Àbilèn. À hì mô a mu tuk afû, ngàŋsù ndâ Fùyènsu su ngaŋte su ghɨt a Jûs mô Anàs ghê Kàyafàs. ³ “Jon fwu yen a bi jwô à Jodàn, hì gbê kata kə lak tu tɨntu tù jɨ̀m, fôktè tum à Fùyèn yinâ, jîsà na ghɨna kahi təm a ghɨna, ma ghɨ fyi mòlû ma Yènfù nê lehêfo besu ghɨna su. ⁴ Yi mô kə yi ghəl te fòktì Ìsayà tì nyàka na: Wùt lè toŋa jîsà yi lak yi Sùsi na, Ghàn fati lumu Bâba; ghàn fati lumlà mù wûn, ma mù hi nânà. ⁵ Nâbi ghɨ̀ni foŋlana kəta hi lûn, kunsu chiksu nì su tetasu chwo. Lumtu ngonletu kəta hì nàntì, na ghɨ lunhi bùklàmù a tu lum nâ tù jɨ̀m ma luk tù jɨ̀m hì mô yi bat. ⁶ Ma nâbi nde bê yen bôn yê Yènfù bè bê nì yini.” ⁷ À hì mô te nôn à ghɨta fwo bena hi fye mòlû, Jon njaŋ ha ghɨna jyâna, “Ywosu be sîn, a ghàn tobhi nde na ghàn momhi hi teta ngə̂k ye Yènfù khɨŋa hi tum ha ghàn? ⁸ Ghàn mu tamu a ghàn a sù chyənà hi chwùtì na ghàn ti kahi təm ghana a ghàn a sùbe. Kə ghàn hi kwâktè na ghàn làhi tet a ngə̂k à Fùyèn yina beka ghàn jìsà na, ghàn mò wana wana Ablàhâm. Mu fòktè ha ghàn na, Yènfù làhi nì ti ghɨ̂n kahi ha mwəlà, ma wù fo ha Ablàhâm. ⁹ Ghàn hi khə na njàm làwû a sah à mù kàk kə nâ chîn ma à faŋ nâbi fùni kâk fù hi mo tamu jûŋù, ma ghɨ bê gbet à mak wu wùs.” ¹⁰ Nôn à ghɨt ghe buf ha wun nâ, “Ghàh ti nê nâ ghə chîn?” ¹¹ Wù jis ha ghɨna na, “À hì kəta nâ nâbi nde nju sùbà, wu fo sù mòk ha wùt we wù kəta wijə hakoh, à hì kəta nâbi nde mwə̀ mù yə̂mù, wu jyatì fo ghɨt ale.” ¹² Ghɨt ghe ghɨ ndùku fenà ŋwàklànà boŋ ben hi fye mòlû buf ha wun nâ, “Ghàh ti nê nâ ghə a Chichà?” ¹³ Wù boŋ jis ha ghɨna na, “Kə ghàn fi ni na wùt lak ka ŋwàklànù wu chyâ te wu kəta hi tè mò.” ¹⁴ Sojàsù boŋ ben hì bufa na, “Nâbi ghàh ni ghə?” Wù jis na, “Kə ghàn fî fyi shyə ha wùt ha jyak, kə ghàn fi jis na wùt ti ni gha teka wù ni njwô ghàn khɨŋa shyə ale. Ghàn hi yə kə ka we ghɨ lâkà ghàn atɨ̂n.” ¹⁵ À nê hì mô te ghɨta hì ke Jon hì nyama kana kə ghɨna ngɨŋ nâ a mò wun we a ghɨ chwoka lema ma. ¹⁶ Jon kahi jis ha ghɨna à jɨ̀m na, “Mu fo mòlû ha ghàn kə nì mòlû mu jwò, biyani wùt bènàlò a mu yi bàm chyâ mu, mu kpene wi hi tè fèt te kwôs ghe ghɨ mô hi yèntè kùlsù gwusu wùsu wunsu, wù mô hi bè fo mòlû ha ghàn nì Yohnà Yulena, nì wusu. ¹⁷ Nâ chîn, wù kəta khət à khɨ̀ŋa à wûn, a wun a wô hi febti a saŋ hi lèm a wun wu tân, biyani ma wù nyok kpûlànù wu wùs wu bame limne wi.” ¹⁸ Wù jis ni, hì fôktè tum yì jùŋ ha ghɨta kaha tobhe ghɨta a tu lum tu dô kə ni. ¹⁹ À ndùku mô ni, ma Jon ti njâŋ ha Helòd we wù ndùku saka bâh à laka ale, a mô te wù khɨte fye Hèlodiyà, ywê wâ nè wûn, fî ni gha be ale. ²⁰ À hì mô te Jon njaŋa ha wun ni, wù fî ni kə yile kwo fa Jon a ndâ chyâk. ²¹ Gha mɨ ghɨ̂n ndùku shihi gàn ni, ma Jon ti fo mihì mòlû ha ghɨta, wu tuk wule Jisòs bên, wù boŋ fo mòlû ha wûn, wù hì jə̂mà. Kə ni, nyə jîmì. ²² Yohnà Yulena chwo ben a wun a tû kə te fùlàtà, jyə̀ fwo a nyə̂ jyana, “Wò mò kə nâ Wâ mù wù kòŋ, mu saŋle kum wò hanɨ̂ŋ.” ²³ Jisòs ti shihi yìmì fêt yi wuni a chyə afân, mô wu lɨ̂m mtât, mô wâ Josèf nâ te ghɨta ndùku kwâktè, ma bè Josèf ndùku mô Helì, ²⁴ Helì mô wâ Matàt, Matàt mô wâ Lefì, Lefì mô wâ Melkì, Melkì mô wâ Janay, Janay mô wâ Josèf, ²⁵ Josèf mô wâ Màtàtiyàs, Màtàtiyàs mô wâ Emòs, Emòs mô wâ Nawùm, Nawùm mô wâ Èsilì, Èsilì mô wâ Nagày, ²⁶ Nagày mô wâ Mât, Mât mô wâ Màtàtiyàs, Màtàtiyàs mô wâ Simùn, Simùn mô wâ Josèk, Josèk mô wâ Jodà, ²⁷ Jodà mô wâ Jùwanàn, Jùwanàn mô wâ Lesà, Lesà mô wâ Sèlobabèl, Sèlobabèl mô wâ Shetlèl, Shetlèl mô wâ Nelì, ²⁸ Nelì mô wâ Melkì, Melkì mô wâ Adì, Adì mô wâ Kosàm, Kosàm mô wâ Èmadàm, Èmadàm mô wâ Êl, ²⁹ Êl mô wâ Joshwà, Joshwà mô wâ Èliyesà, Èliyesà mô wâ Yolìm, Yolìm mô wâ Matàt, Matàt mô wâ Lefì, ³⁰ Lefì mô wâ Simùn, Simùn mô wâ Judà, Judà mô wâ Josèf, Josèf mô wâ Jonàm, Jonàm mô wâ Èliyakìm, ³¹ Èliyakìm mô wâ Mìliyà, Mìliyà mô wâ Menà, Menà mô wâ Màtatà, Màtatà mô wâ Natàn, Natàn mô wâ Defìt, ³² Defìt mô wâ Jesì, Jesì mô wâ Obèt, Obèt mô wâ Bowàs, Bowàs mô wâ Salmùn, Salmùn mô wâ Nashòn, ³³ Nashòn mô wâ Àminadàb, Àminadàb mô wâ Adɨ̀mîn, Adɨ̀mîn mô wâ Anì, Anì mô wâ Hesilòn, Hesilòn mô wâ Belìs, Belìs mô wâ Judà, ³⁴ Judà mô wâ Jakòb, Jakòb mô wâ Isìk, Isìk mô wâ Ablàhâm, Ablàhâm mô wâ Telà, Telà mô wâ Nawò, ³⁵ Nawò mô wâ Selùk, Selùk mô wâ Lû, Lû mô wâ Belèk, Belèk mô wâ Ebà, Ebà mô wâ Shelà, ³⁶ Shelà mô wâ Kenàn, Kenàn mô wâ Afasàt, Afasàt mô wâ Shêm, Shêm mô wâ Nuwà, Nuwà mô wâ Lamèk, ³⁷ Lamèk mô wâ Mètuselà, Mètuselà mô wâ Enòk, Enòk mô wâ Jalèt, Jalèt mô wâ Malalè, Malalè mô wâ Kenàn, ³⁸ Kenàn mô wâ Enòs, Enòs mô wâ Sêt, Sêt mô wâ Adàm, Adàm mô wâ Fùyèn.

¹ Jisòs kahi fwu lo a jwô à Jodàn, ma wù ti lûn nì Yohnà Yulena, ghɨ lyi wûn yen nì wûn a yi lak yi Sùsi. ² Afû deblì mômhì wûn a mu tuk mù kìk. Wù chyə tuk muna ni, teka wù yə shyə ale nâ hakoh, jìŋ hì yafa wûn. ³ Deblì ki jîs ha wun na, “Wò hì mò kə nâ wâ Fùyèn, jìs lê ha ti ghɨ̂n ma ghɨ kahi ha mwə̀ mù yə̂mù ma wò yə.” ⁴ Jisòs ki fîsì ha wun na, “Ghɨ ti nyak a ŋwàklù Fùyèn na, ‘Wùt wi hi tè chyə kə kum nì shyə yəna.’” ⁵ Deblì lyi wun afû kwok nì wun a lùk wu ngaŋtenu wule, kə afu yulâ ni, wù chwûtì lak tu mbyi tu ha wun kə tù jɨ̀m, ⁶ ki jîs ha wun na, “Mu nè folò jyaka ha wò na wò sak luk tù jɨ̀m nì dɨ̀ŋ ghe ghɨ mô atɨ̂n, beka ghɨ ti fo ha mu nâ tù jɨ̀m, ma mu ki kôŋ ma mu fo nâbi ha nde. ⁷ Wò ki ngumle mu, ma à nê hi kəta kə wò nâ tù jɨ̀m.” ⁸ Jisòs ki fîsì na, “Ghɨ ti nyak a ŋwàklù Fùyèn na, ‘Wò kəta kə hi ngumle Bâba Yènfù fêtà kə ha wûn.’” ⁹ Wù lyi Jisòs afû yen nì wûn a Jèlusalèm kwok tom wun a fùdòŋndôŋfu ndâ Fùyèn yì chìk, jis ha wun na, “Wò hì mô kə nâ Wâ Fùyèn, chyàkti chwo wu lùk afân ma mu yen, ¹⁰ beka ghɨ ti nyak kəbi a ŋwàklù Fùyèn na: ‘Wù nè tumalò anjèlsù wunsu a wò yi bàm, na su nê kina wò; ¹¹ su nè kwo njiŋhelò wò a nyə̂ teka wò kun nâbi wulu wa a yi ti.’” ¹² Biyani, Jisòs jis ha wun na, “Ghɨ ti nyak a ŋwàklù Fùyèn na, ‘Kə wò nè mômhè Bâba Yèn fafu.’” ¹³ À hì mô te deblì mòmhe wun kə lum tù jɨ̀m, wù kahi a Jisòs yi bàm wu tuk afû. ¹⁴ Jisòs kaha kolo yen a Galìlî, baha gbê kə Yohnà Yulena jyak. Gha kum wûn gbî kə yi lak afû yì jɨ̀m. ¹⁵ Wù hì gbê yike a ghɨna ndasu yuŋtesu, nâbi nde kokhe wûn. ¹⁶ Jisòs lo yen a Nasalì, a mô yi tèk ye wù tì ləma kwoka atɨ̂n, yen lye a ghɨna ndâ yùŋtì a ghɨna tuk wu laku, kə te wù ndùku nê, wù lôtì chya yen hi taŋa ŋwàklù Fùyèn. ¹⁷ Ghɨ fo ŋwàklù fòktì Ìsayà ha wûn, wù bəh khɨŋ yen luk we ghɨ tì nyàka atɨ̂n na: ¹⁸ “Yohnà Bâba mò a mu tû beka wù ti chwok mu na mu fokti tum yì jùŋ ha ghɨt a fufana. Wù ti tum mu na mu toŋà laka ha ghɨt ghe ghɨ ndùku mô ma ghɨ ti khɨti ghɨna, na tuku ti kpên shyəma ghɨ yat ghɨna, fî tum mu na mu laka ha ghɨt a fefana na tuku ti kpên shyəma ghɨna yen luktu, hi fè fihe a ghe ghɨ nyâblè nì ghɨna a ngə̂k. ¹⁹ Hi lâkà ha ghɨt mɨ ghɨ̂n na ghɨ̂n mò a lɨ̂m ghe Bâba nè bônhè ghɨt a wuna atɨ̂n.” ²⁰ Te wù taŋa mihe luk mu we, wù kaha baŋ ŋwàklù atɨ̂n, fo ha wùt we wù ndùku lêmà, ki chwo ndòkò. Nâbi nde a ndâ yùŋte afân hì duŋà ke kə wun ni. ²¹ Wù ki jîs ha ghɨna na, “Gha mɨ ghɨ̂n te ghàn ywo te mu taŋa ni, ghɨ ti kpên lân.” ²² Nâbi nde yen na wù ti jis a jûŋ hì kana na jîs yi fomani yîn fwo kə nâ a wun yi jwo ni agha? Kə afu metì ghɨna kahi hì bufa na, “Ba wùna ni mò kə nâ wâ Josèf agha?” ²³ Wù jis ha ghɨna na, “Mu khə na ghàn nè jîsà lò ngàn yinâ ha mu na, ‘Wùt à ngàŋ, chwok lê ngɨŋ yâ.’ Nì lê gha ghe a ghàh ywo na wò chehì nêlò a yi lak yi Kàbanùm chin a wo yi lak.” ²⁴ Wù jis na, “Mu jìsà ha ghàn hamok na ghɨ fye wi fòktì yi Fùyèn a luk afa ghɨ bwə wun atɨ̂n. ²⁵ Ghàn hi khə hamok na ghàn mò kəbi yi ghəl te ghɨt a Isalì ghe ghɨ ndùku mô a Ìlajà wu tuk, ywena nkwô ndùku dô kə ni a Isalì, Yènfù nî na kə wuli na a wu lɨ̀m wù tât nì beka, jìŋ yì tâ kwo kə lak yì jɨ̀m. ²⁶ Biyani, Yènfù tum Ìlajà kə ha ywê nkwû wù mòk yi tèk yi Selafàt a yi lak yi Sidòn. Nâbi te ywena nkwû ndùku dô yi lak yi Isalì. ²⁷ Yi mô kəbi yi ghəl te yi ndùku mô a fòktì Èlashà mu tuk, ghɨta ndùku yafa nì kùhù dô kə ni, nâ biyani Yènfù tê chwuk nâ wùt wù mòk, a bu kə Namàn, a mô wùt à tûm ma wù lô ben a Siliyà.” ²⁸ À ndùku mô te ghɨta ywo gha ghe wù jìsa a ghɨna ndâ yùŋtena ni, lâ baŋ ghɨna nâ haŋaŋ. ²⁹ A afû ghɨna lôtì guf fwo nì wûn yi tèk afû, lyi kwok nì wûn a tô kùn afa yi ndùku mô yi tèk afû hì khɨŋa hi bɨŋhe wun a ba. ³⁰ Biyani wù fî kaha tohna kəbi a ghɨna fùtɨ̂n chya yen a wun wu lùk. ³¹ Wù chwo yen a yi tèk yile a Galìlî. Ghɨ toŋte na Kàbanùm, hì yike a ghɨna wu tuk wu laku. ³² Jwo yim à ghɨ̂t beka yikî wuni ndùku kəta jyaka. ³³ À ndùku mô a ghɨna ndâ yùŋtì wùt lè mô a ghɨna fùtɨ̂n kəta a yohnà a be. Wù bwat a jyə̂ yì tâ jyâna, ³⁴ “Fùshâŋ! Wò khɨŋa ghə a ghàh a fùtɨ̂n a Jisòs, wâ wùt à Nasalì wunâ, wò ben hi bobhe ghàh ma? Mu khəlò shyə ghe wò mò ghɨna. À mò kə nâ wò wùt yulena à Fùyèn.” ³⁵ Jisòs kântì Yohnà be ghe jis na, “China moŋ, chyà fwu a wùt wunâ wù wùn!” Yohnà be ghê tum wùt atɨ̂n a chyə̂ a ghɨta ashyə̂, fwu a wun wu wùn teka ghɨ lemhi wûn. ³⁶ Ghɨna hì mô nì kani bufa nâ, “Wù jìsà na ghə ni agha? Wù kântè a ghâ yohnù be fwo a ghɨta wu wùn beka jyak ghe wù kəta.” ³⁷ Gha ghɨ̂n kum wûn gbî kə luk tù jɨ̀m a bàh à yi lak afû. ³⁸ Te Jisòs fwo a ndâ yùŋte afa yen a Samùn a ndâ. À ndùku mô ni, nè ywê Samùn kəta gut a ta. Ghɨna jis ha Jisòs na wù gamti wûn. ³⁹ Wù timi a wun ashyə̂ wu khɨ̀ kântì a ghâ ha gut atɨna, ghɨ mî. Kə wu yu, wù lôtì chyâhì mwə̀ mù yə̂mù ghɨna yə̂. ⁴⁰ Yuchwî shihì lyî, nâbi nde we wù ndùku kəta wùt yafana, wu yafa nâbi nì ghə, ghɨ lyi bên nì wûn ha Jisòs. Wù lem a wo a ghɨna tû, ghɨna à jɨ̀m tâ. ⁴¹ Yohnù be fwo a ghɨna fùtɨ̂n, dô kə ni, bwata jîsà na, “Jisòs wò mò Wâ Fùyèn!” Biyani wù kântì na kə ghɨna fî jis beka ghɨna ndùku khəlò na wù mò wùt we Yènfù chwoka lema. ⁴² Tuku yû, Jisòs lo yen wu lùk wu letenu kə wù nɨ̂ŋ. Nôn à ghɨ̂tà fwu yi tèk afû, hì gbê khɨŋa wûn, ghɨna yen yen wun hì mômhè hi tàmtè wûn, na kə wù lo de ghɨna. ⁴³ Biyani wù jis ha ghɨna na, “Mu kəta kəbi lò hi fòktè tum yì jùŋ kum fə̂n wù Fùyènù a tèk tu letu, beka a mò gha ye a ghɨ tuma mu, na mu bê ni.” ⁴⁴ Ni, wù lô yen hì gbê fôktè tum àtɨ̂n a tu tèk tu Jûs tù ndasu yuŋtesu a Jùdiyà.

¹ À ndùku mô wu tuk wule, Jisòs yen time yi bi wu lwi afa ghɨ ndùku toŋte na Gènesalèt, nôn à ghɨ̂tà hì fahe bênà a wun yi kə̀k hi ywo gha Fùyènì. ² Wù yen ngwùksù a bi jwô afû sùbà ma ghɨt ghe ghɨ ndùku kwola yila atɨ̂n ti fwu ndokò yi bàm, hì sô wətu ghɨna tu. ³ Wù lyi atɨ̂n à yìlè a kəta Samùn, jis ha wun na, wù chinte liti yinì a jwô. Te Samùn chinte yena nì yinì, wù chwo ndokò atɨ̂n hì yike à ghɨ̂t. ⁴ Te wù yike mihe, kahi jis ha Samùn na, “Liti kpenhi ndù nì ngwùk àtɨ̂n a jwô, ma ghàn tum à chwohi wətu a jwô ma ghàn kwo yila.” ⁵ Samùn jis ha Jisòs na, “Ghàh te chyə hì tumâ a Bâba, tê kwo jə̀ shyə ale, biyani beka à jis wò, mu tê jîsà lò na ghɨ tum à chwohi.” ⁶ Ghɨna tum wətu kwo yila ghɨ dô kə ni, wətu ghɨna tu hì khɨŋa hi tentî. ⁷ Ghɨna lâptì a wô ha ghɨt ghe, ghê ghɨna ndùku fêtà na ghɨna bê gamti ghɨna, ghɨna bên nì ngwùk yìlè, lunhi sunsu sùbà nì yila su hì khɨŋa hi mitâ a jwô. ⁸ À hì mô te Samùn Bità yena gha ye yi gana ni, wù chwo tum ngwuksu a Jisòs ashyə̂ jis ha wun na, “Lô chyà a mo ngwùŋ a Bâba. Mu mò wùt wù be!” ⁹ Wù tì jis ni beka wù ndùku mô nì kani nì ghɨt ghê ghɨna ndùku mô, ha yila dona ghe ghɨna tì kwola. ¹⁰ Wana Sebedì ghe ghê Samùn ndùku fêtà amok ndùku mô Jêms ghê Jon ghɨna hì mô kəbi nì kani. Jisòs ki jîs ha Samùn na, “Kə wò fî fan, hi yìmì chîn hi yèn ashyə̂, wò nè hì kwo à ghɨ̂t.” ¹¹ Ghɨna kaha ben nì ngwùksù yi bi jwolì lo de nâbi ghə ghɨ ghɨna, jûmtì Jisòs. ¹² Jisòs yen yi tèk yile, wùt lè ben ha wûn ma kùhà ti kût wun wu wunu nâ wù jɨ̀m. Te wù yena Jisòs, fen a wun ashyə̂ chyati wûn na wù chwuk yi jyâna, “Wò hì kôŋà ma wò chwuk mu a Bâba.” ¹³ Jisòs nâhì a wo kum wûn jis na, “Mu kòŋàlò, ta lê.” Kə wu yu kùh àtɨna mî a wun wu wùn. ¹⁴ Jisòs chîhì ha wun na, “Kə wù mom hi fòktì ha wùt, ndù, chwùti ngɨŋ yâ ha tu ndâ Fùyènù, ma wò fo fo ye sak yi Musìs tì jìsa na, wùt ki tâ nì kùhà wu fo yi fô shyəma ghɨta khɨli na wò ti tâ.” ¹⁵ Gha mi yîn kum Jisòs waŋ kə luk tù jɨ̀m, nâbi te wù ndùku khɨŋa na wùt yafa we let gha tɨni. Nôn à ghɨ̂tà hì bênà hi ywo yikî wuni fê bênà na wù chwuk yaftu ghɨna tu. ¹⁶ Biyani, wù ndùku faŋa wi hi lò dè ghɨta hi yèn wu lùk wule kə wù nɨ̂ŋ hi jə̀m. ¹⁷ À hì mô wu tuk wule kəbi afû, Jisòs hi yike wu lùk wule ghɨt a Falàsî nì chichàsù saksu mô afû ma ghɨna fwu ben a tu tèk tù jɨ̀m a Galìlî nì Jùdiyà nâbi nì Jèlusalèm. À ndùku mô ni, jyaka Bâba mô ha Jisòs wu chwuka tu yâf. ¹⁸ Kə ni, ghɨta ben nì wùt ma wù ti kə̂blì, ma ghɨ ti nîŋhì wûn a fughàm, hì khɨŋa lumu hi lyi nì wûn a ndâ afa Jisòs ndùku mô atɨ̂n hi nìŋhè a wun a Jisòs ashyə̂. ¹⁹ Biyani lumu ndùku wi shyəma ghɨna lyi nì wûn beka ghɨta ndùku dô. Ghɨna kwok nì wûn lumu a tô ndâ, chwok a bûk, chwohi wûn atɨ̂n à nôn afû nìŋhì wûn a Jisòs ashyə̂. ²⁰ À hì mô te Jisòs yena bimî ye ghɨna ndùku kəta, jis ha wùt kə̀blena we na, “Bə mu ti lehìfo be sasu!” ²¹ Chichàsù saksu nì ghɨt a Falàsî hì bufa ha ngɨŋsu ghɨna su nâ, “Wùna mô nde a wù sùlè Yènfù ni? À mò hi lèhèfo nde besu wûtsù, a bu kə Fùyèn?” ²² Jisòs khɨli gha ye ghɨna kwàktè ki buf ha ghɨna nâ, “Ghàn kante gha ghɨna ni kum ghə? ²³ À bona yìni, hi jìs na, ghɨ ti lehìfo be sasu ma hi jìs na, ‘Lòti gbê’ agha? ²⁴ Mu chwùtè ha ghàn chîn na Wâ Wùt kətalò jyaka a chyə afân hi lehèfo besu ghɨ̂tsù.” Wù ki jîs ha wùt kə̀blena we na, “Mu jis ha wò na, wò loti ma wò lyi shɨ̂ŋ fafu ma kolo.” ²⁵ Wù lôtì kə yu mòk a ghɨna ashyə̂ lyi ghâm fe a ghɨ tì nìŋhe wûn atɨ̂n hì kolê, kokhe yê nì Yènfù. ²⁶ Ghɨt à jɨ̀m afû hì mô ni kani, fânì kwo ghɨna, ghɨna hi bəmhe Yènfù jîsà na, “Ghàhnà ti yen gha kanana lân!” ²⁷ Yi bàm yi gha mɨ ghɨ̂n, Jisòs fwu hì yênà, yen wùt lè wu kâtà ŋwàklànà, yet yi wuni mô Lefì, wu mô a wì afa ghɨ kâtà ŋwàklànà atɨ̂n, Jisòs jis ha wun na, “Jùmti mu.” ²⁸ Kə wu yu, wù lôtì lo de nâbi ghə yen a wun yi bàm. ²⁹ Lefì fî fati tat yi chìk a wun a ndâ ha Jisòs. Ghɨta bên bakhi nì ghɨt ghe ghɨ kâtà ŋwàklànà, ben afû dô kə ni ghê ghɨna hì yə̂. ³⁰ Ghɨt a Falàsî ale nì chichàsù làŋsù hì njaŋâ, bufa ha jùmtìbàmsu Jisòs su na, “Kum ghə te ghàn yə fê nyô nì ghɨt ghe ghɨ kâtà ŋwàklànà nì ghɨt a be ghɨ le agha?” ³¹ Jisòs buf ha ghɨna na, “A yule ndâ nde ma wù fê shik hi khɨŋa a fu agha? A shika kə ghɨt a yablena. ³² Mu tà ben hi tihe ghɨt ghe a ghɨ mô chilichili, mu ben kum ghɨt a be hi fòktì na ghɨna kahi təm a ghɨna.” ³³ Ghɨna jis ha Jisòs na, “Jùmtìbàmsù Jon su bama yi jwô jə̂mà, su Falàsî sù bama yi jwô, jə̂mà biyani sasu yə̂ fê nyô kə te ghɨna kòŋà.” ³⁴ Jisòs buf ha ghɨna na, “A ghɨ làhi bimi na ghɨta bam jwo wu lùk wu malanu lɨm à wùt ywên baha mò kə afû agha? ³⁵ Tuku bènàlò a ghɨ bè lyê lô nì lɨm à wùt ywên a ghɨna fùtɨ̂n, ma ghɨna bê hi bama jwo.” ³⁶ Wù jis ni kaha ma kəbi ngàn yìlè ha ghɨna kum chyənu mwu nì wu fe jyâna, “Wùt wi hi lyè bâh à sù nju a fe hi bàt njùsu mwusu atɨ̂n. Wùt ki nî ni, ma wù bobhi njùsu fe sê halô, bâh à fe ghê nè kwônà wijə nì njusu mwu sê. ³⁷ Yi mô kəbi yi ghəl te wùt wi hi lyè sìŋ à mù lùk hi lèm a sàlsù gwusu nyâmsù mwusu, beka wù ki nî ni, ma lùk mù tɨ̂n nê shihi tâ ma mù bâtì sàlsù, ma wù gha lùkû nì sàlsù. ³⁸ A kəta kə hi lèm à sìŋ à mu lùk a sàlsù fesu. ³⁹ Yi mô kəbi hamok na wùt shìki nyo lùk mu tâ, wù nê hi fê kòŋà wi hi nyo lùk mù tofamù, wù faŋ kə na, ‘Lùk mù tâ jwòfàlò.’

¹ Tuku tî yû wu tuk wu lak wule, Jisòs ghê jùmtìbàmsù wunsu hì tohna chyâ yi bat yi saŋa bota ale, hì yole tû saŋu le, fikhe kutâ. ² Ghɨt a Falàsî ale buf ha ghɨna na, “kum ghə te ghàn nè gha wu tuk wu laku, saki bime wi agha?” ³ Jisòs buf ha ghɨna na, “Ghàn tà taŋ yu gha ye Defìt tì ne te jìŋ yafa wun ghê ghɨt a wuna agha? ⁴ Wù lyi yen a ndâ Fùyèn, lyi yə mwə̀ mù yə̂mù Fùyèn, saki chwûtè na a yə kə ngàŋsù ndâ Fùyènsu.” ⁵ Wù jis ni ki jîs ha ghɨna na, “Wâ Wùt kətalò jyaka hi jìs na ghɨ ni nâbi ghə wu tuk wu laku.” ⁶ À hì mô kəbi wu tuk wu lak wule, Jisòs yen lye a ndâ yùŋtì hì yikê, wùt lè mô afû ma kpen wu wunu wu wo ta ti kpû. ⁷ Chichàsu làŋsù, ghê ghɨt a Falàsî lem yi se a wun wù wùn hi yen nâ wù nè chwukalò wùt wu tuk wu laku shyəma ghɨna khɨli gha ye ghɨna nè ngane wûn atɨ̂n. ⁸ Biyani wù khɨli kwâktì ghɨna jis ha kpû kpên we na, “lòti chyà bî timi a ghɨta ashyə̂.” Wù lôtì yen timilò. ⁹ Jisòs buf ha ghɨna nâ, “Saki bimilò na ghɨ nî jùŋ wu tuk wu laku ma be, yi bime na ghɨ bonhi wùt ma ghɨ ywi agha?” ¹⁰ Wù jis ni, kaha ki tala ghɨna à jɨ̀m, kaha jis ha wùt we na, “Nànti kpen wâ,” Kə wu yu te wù nànte, kpen wu tɨnu tâ. ¹¹ Biyani gha tɨni yaf ghɨt atɨna nâ haŋaŋ, ghɨna hì kwàktè gha ye ghɨna mò hi nì ha Jisòs. ¹² Tuk wule a wu yu kolô, Jisòs kwok a kun chyə jə̂m kə ha Yènfù ni, tuku yû. ¹³ Tuku kpên, wù toŋa jùmtìbàmsù wunsu chwokti ghɨta ìwûm njwòsù bà lem kəbi ghɨna ha ghɨt a wuna ghɨ tuma. ¹⁴ À hì mô Samùn we wù fo kpenhe yeti ha wun na Bità, a mô wâ nè Bità ghɨ toŋte na Andùlù, nì Jêms, nì Jon, nì Filîp nì Bàtòlòmiyà. ¹⁵ Màches nì Tomòs, nì Jêms wâ wùt à Àfeyòs nì Samùn wùt lùmana à ghɨt a Jûs. ¹⁶ Nì Judàs a wâ Jêms ghê Judàs Ìskaliyòt we wù tì kaha bəkle Jisòs. ¹⁷ Jisòs kaha chwo a kun afû, ghê ghɨna timi wu lùk wule yi bat bakha nì jùmtìbàmsù wunsu su dô kə ni. Nôn à ghɨ̂tà fwu ben kəbi afû dô kə ni ma ghɨ fwu ben kə bûlà tu Jùdiyà tù jɨ̀m nâ nì Jèlusalèm. Ghɨt ale mô kəbi afû ma ghɨ fwu a Tayà nì Sidòn wu luk wu bakhe a bì jwolì chìk. ¹⁸ Ghɨt atɨna ndùku mô à jɨ̀m ma ghɨ fwu ben kə hi yu yi yikî Jisòs, na wù fê chwuk yaftu ghɨna tu. Nâbi ghɨt ghe ghɨ ndùku yafa kum nì yohnà be ghɨ tâ. ¹⁹ À ndùku mô nâbi nde a nòn afû nô kə hi kùm à wûn, beka jyaka ndùku fwo a wun wu wùn chwuka kə ghɨt à jɨ̀m. ²⁰ Wù lôhì a se ki yen nì jùmtìbàmsù wunsu, jis ha ghɨna na: “Jùŋ mò a ghàn ghɨt a fufana beka jùŋ à Fə̂n wù Fùyènù kəta ghàn. ²¹ Jùŋ mô ha ghàn ghe jiŋsu yafa ghàn chîn, beka ghàn bè yə kpenalò kə te ghàn kòŋà. Jùŋ mô ha ghàn ghe ghàn jyè chîn, beka ghàn bè chəkalò.” ²² “Jùŋ mô ha ghàn chîn, te ghɨta bànà ghàn, jùmà ghàn a ghɨna ndasu chintesu, sùlè ghàn fê bobhe a yet ghana kə kum Wâ Wùt. ²³ Ghɨta shìki nî ha ghàn ni, ghàn hi saŋlê binâ beka maktu chiku yute ghàn a nyə̂. À mò kəbi yi ghəl te be ghɨna ndùku nê ha fòktìsù chiksu. ²⁴ Biyani ngə̂k yì chìk mô ha ghàn ghɨt a mu ka beka jùŋ yanì mò a ghàn a wô. ²⁵ Ngə̂k yì chìk mô ha ghàn ghe ghàn yə kwuta chîn beka jiŋsu bè fê yafalò ghàn. Ngə̂k yì chìk mô ha ghàn ghe ghàn chəka chîn beka ghàn bè hì kùnà wunu fè jyê.” ²⁶ “Ngə̂k yì chìk mô ha ghàn ghe nâbi nde jìsà jùŋ kum ghàn beka à mô kəbi gha ye be ghɨna ndùku nê ha fòktìsù fəmsu.” ²⁷ “Biyani ha ghàn ghe ghàn yute ha mu chîn, mu jìsà na, ghàn hi kôŋà bànà sanisu nê jùŋ ha ghe a ghɨ bànà ghàn. ²⁸ Ghàn hi bonhê ghe a ghɨ sùlè ghàn, jə̂mà ha ghe ghɨ nyâblè nì ghàn. ²⁹ Wùt sam a wô a wo jyə̀k, wo bɨnhì ale, ma wù sam à mihi. Wùt ki fye à waf gha, kə wò ta nâbi nì nju sasu a wò màka a fùtɨ̂n. ³⁰ À lon nâbi nde shyə ha wò, wo fo kə yi fô ha wûn. Wùt ki khɨte fye mwə̀ mâ ha jyak kə fi buf. ³¹ Ghàn hi nê gha ha ghɨta te ghàn kòŋà na ghɨ ni ha ghàn”. ³² “Ghàn shìki kôŋà kə ghɨt ghe ghɨ kôŋà ghàn, nâ jùŋ àtɨ̂n nê hì mô ghə a Yènfù ashyə̂ agha? Beka nâbi ghɨt a be kòŋà ghɨt ghe ghɨ kôŋà ghɨna. ³³ Ghàn shìki nê jùŋ kə ha ghɨt ghe ghɨ nê jùŋ ha ghàn, Yènfù nê yen yàni jùŋ àtɨ̂n agha? Beka nâbi ghɨt a be nè kəbi ni. ³⁴ Ghàn shìki mô hi samhe a shyə ha wùt kə beka ghàn kwàktè na wù nè kaha folò, nâ jùŋ àtɨ̂n a Yènfù ashyə̂ nê hi mô ghə? Beka nâbi ghɨt a be samhelò mwə̀lû ha ghɨt a ghɨna beka ghɨna khə na ghɨna bè kaha kwotelò shyə ghê ghɨna tì fo.” ³⁵ Biyani mu jìsà ha ghàn na, ghàn hi kôŋà bànà sanisu, nê jùŋ ha ghɨna, samhe ghɨna nì mwə̀lû, nâbi ghe ghàn khə wi na ghɨna bè kaha folò. Ghàn ki nî ni, maktu wanu bê hi ghaka kə ni, ma ghàn nê fè chwuti na ghàn mò wana Yèn fe fu ngaŋte kpene, beka fu tôknè ha ghɨt a be nì ghɨt ghe a ghɨ laha yena wi jùŋ. ³⁶ Ghàn hi kwohe seni ha ghɨta kəbi te Bì wânù. ³⁷ “Kə ghàn sak ghɨta kə Yènfù bê sak ghàn. Kə ghàn nè bobhe ghɨta kə Yènfù bê bobhi ghàn. Ghàn hi lehèfo ghɨta, ma Yènfù bê lehêfo ghàn. ³⁸ Ghàn hi fo ghɨta nì mwə̀lû ma Yènfù bê fo ghàn, ghɨ shihi fô tòkà lêmà bàlì sanisu, shikhè, yiktê, fê lunhe nâ ni, na su hi sûlè fwo a chyə̂. Beka ghàn shìki fo mwə̀lû ha ghɨta nâbi a ghɨ̀ni fêkà, ma Yènfù bê fo ha ghàn kəbi a fèk àtɨna.” ³⁹ Te wù jìsa ni kaha ma ngàn yìlè ha ghɨna na, “Fèfà wi hi chwùte wu lum ha ghɨ le, beka ghɨ ki môm ma ghɨna fen a yi be kə à jɨ̀m.” ⁴⁰ Wù fî ma kəbi ngàn yìlè na, “Wan wù yikena wi hi bè chyà chichà à wûn, biyani, à fati yiki nâbi nde ma wù nê hi mô kəbi te chichà à wûn.” ⁴¹ Wù fî ki buf nâ, “Kum ghə te wò ke kə namtà fe fu mô a wâ nâ yi sê, biyani yena wi a fûŋ à fùkàk ghe ghɨ mô a wo yi se? ⁴² Wò ki faŋa kə ni, ma wò nê jis yàni ha wâ nâ na, ‘Tek ma mu fihi namtà fù a wò yi sê wâ nôm,’ mô ni, yena wi a fûŋ à fùkàk ghe a ghɨ mô a wò yi sê agha? Wò, wùt wunâ, wò kama nê gha ni! Fihi fûŋ à fùkàk ghê a mô a wò yi sê, ma yi yuli laŋ, shyəma wò khɨli hi yena namtà fê a fu mô a wâ nâ yi sê.” ⁴³ “Ghàn hi khə na kâk fù jûŋ fù tà timi hì mo tamu be, fu be fu mo wi tamu jûŋù. ⁴⁴ Ghɨ yena khɨle fukâk wu tam afa fu mo. Ghɨ bè time kônà wi fiksù a ghə̀n a sù sòndoŋa, nâbi lùkàmù a tàŋsù kwòsù. ⁴⁵ Wùt jùŋ nê jùŋ, yi mô ma yì fwo kə a fùtɨ̂n à gha jûŋà afa wù bakte lema a wun a yi təm, wùt be nê kə be ye wù bakte lema a wun a yi təm. Beka jwo wùtì jìsà kə gha ye yi mô a wun a yi təm ma yi ti lûn.” ⁴⁶ “Njwô ghə te ghàn toŋte kə mu na ‘Bâ, Bâba,’ yu mù jɨ̀m, nê wi gha ye mu jìsà ha ghàn? ⁴⁷ Mu nè chwûtè lò mô ye wùt bènà ha mu wu hi mô hi ywo jyə̂ mì, nê kə te mu jìsa, wu nê hi mô. ⁴⁸ Wù mò te wut we wù tì shihi ba ndâ wûn fati chum a chyə atɨna nâ jûŋ lem a ti, kwuŋa bên chin ndâ àtɨ̂n, yì tê nèklì beka yì ndùku mô ma ghɨ ti fati bâ. ⁴⁹ Biyani wùt we wù ywo jyə̀ mì faŋ hi nì te mu jìsà, mò te wut we wù shihi ba ndâ, faŋ hi lèm a chyə nda, kwuŋa chwo bak ndâ atɨ̂n yì fen bwutì nâ yì jɨ̀m shyə ale tê fâŋ.”

¹ À ndùku mô te Jisòs jìsa mihe gha ghe wù ndùku khɨŋa na ghɨta yu, wù kahi chwo yi tèk yi Kàbanùm. ² To sù Sojà ghɨt a Lûm ale mô afû, kəta wùt à wun wù fètana kôŋà wûn nâ jûŋ. Wùt fètana àtɨ̂n ndùku yafa nâ haŋaŋ kpo yênà. ³ To sù Sojà ghɨ̂n yu kum Jisòs, tum chəhsu Jûs su lesu na su yê chyati wûn ma wù bê chwuk wùt à wûn wù fèt. ⁴ Ghɨna yen yen Jisòs chyati wûn nâ haŋaŋ jis na, “Gàmti wùt wunâ, a mò kə nâ wut shyəma wò gamti. ⁵ Wù kòŋàlò ghɨt a ghàhnà, ma wù tî gâmtì ba ndâ ghàhnà yì chìntì.” ⁶ Ni, Jisòs lo ghê ghɨna. À hì mô te wù gbe hì bakhe yênà a to sù sojà ghe ndâ, to sù sojà ghê tum sunsu wunsu na, su yê jis ha Jisòs na, “Bâba, kə fi yen ngə̂k yâ hi bèn a mo ndâ beka mu kpene wi shyəma wò lye a mu ndâ, ⁷ à mò gha ye yi yê hì bona wi na mu bê yen wò nì ngɨŋ à mì, biyani jis kə yi jîs na wùt à mù wù fètana ta ma wù ta, ⁸ mu jìsà ni beka mu boŋa fètà a ghɨta yi dèt, kəta nâbi sojàsù a mu yi dèt. Mu jîsà ha wun na, ‘Wu yen!’ Wu yen kə yi yên, mu jis ha wùlè na, ‘Bì!’ Wu ben kə yi bên. Mu jis ha wùt mù wù fetana na, ‘Wu nì ni!’ Wu ni kə yi nî.” ⁹ Jisòs yu gha yê wù jìsa ni, jwo yim wûn, wù jis a nôn à ghɨ̂t ghe ghɨ ndùku jûmtè wûn na, “Mu fòktè ha ghàn na, mu tà timi yen jə wùt wù kəta yi nki bimi yîn nâbi a Isalì.” ¹⁰ Sunsu to sù sojà se kaha kolo a ndâ yen yen kə ma wùt fètana we ti tâ. ¹¹ Yi bàm yi tɨ̂n Jisòs lo yen a yi tèk yile ghɨ toŋte na Nân, jùmtìbàmsù wunsu nì nôn à ghɨ̂tà ghɨ dô kə ni, yen ghê wûn. ¹² À hì mô te wù bakhe bênà yi jwô yi tèk afû, wù yen ghɨta te ghɨ beka wùt kpona hì fwo bênà nì wûn. Wùt kpona wunâ ndùku mô kə wan wù lɨmà wù mòk we nè wûn ndùku kəta, nè wûn àtɨ̂n mô ywê nkwû. Ywê nkwû atɨ̂n ndùku mô ghê nôn à ghɨ̂tà ghɨ dô kə ni te ghɨ lo a yi tèk afû. ¹³ Te Bâba yena wùt ywên wunâ, kwohi yi sen ha wûn nâ haŋaŋ, jis ha wun na, “Chinâ, kə fî ji.” ¹⁴ Jisòs jis ni fwuti yenlò, yen kum khɨ̀na wùt kpona ghê, ghɨt ghe ghɨ tì bèka timî, wù jis na, “Wan wù kpuŋ, lòtî.” ¹⁵ Wùt kpona we lôtì ndokò yîmì hi tè jìs. Jisòs khɨti wûn kaha fo wun ha nè wûn. ¹⁶ Fânì kwo ghɨt à jɨ̀m afû. Ghɨna hì kokhe Yènfù jîsà na, “Fòktì wù chìk ti ben a ghàhnà fùtɨ̂n. Yènfù ti ben hi kina ghɨt a wuna!” ¹⁷ Gha ghɨ̂n kum Jisòs waŋ Jùdiyà yì jɨ̀m, nâ nì lak tù jɨ̀m a bàh afû. ¹⁸ Jùmtìbàmsu Jon Fo Mòlû fôktì kwok gha ghe Jisòs ndùku nê. Jon toŋa a ghɨt à bà ¹⁹ tum na ghɨ yê buf ha Bâba Jisòs na, “À mò wò we wò ndùku kəta hi bèn ma, ma ghàh kəta hi tè yute wùt lè agha?” ²⁰ Ghɨt ghɨ̂n yên yen Jisòs, jis ha wun na, “Jon Fo Mòlû tum na ghàh bê buf ha wò na ‘À mò wò we wò ndùku kəta hi bèn ma, ma ghàh kəta hi te yute wùt wùlè agha?’” ²¹ À ndùku mô a yu afû yâ, Jisòs chwuka ghɨta a tu yaf tu dô kə ni, jûmà fihe yohnù be fê nê na ghɨt a fefana kaha yen luktu. ²² Jisòs kaha jis ha ghɨt a tum ghe na, “Ghàn boŋà kaha yê fokti ha Jon gha ghe ghàn yena nì ngɨŋ sanisu fî yu lò: Fèfù kaha yena tu luk, ghɨt a kəblena gbê, ghɨt a kuhana tâ, kwùkù ywo a ghâ, ghɨt a kputena lôtè a yi kpû, ghɨ fòktè tum yì jûŋ ha ghɨt a fufana. ²³ Jûŋ mò ha wùt we wù kante wijə mu.” ²⁴ Te ghɨt a tuma Jon ghe tì kaha lo, Jisòs yîmì hi jìs ha nôn à ghɨ̂t ghe kum Jon, buf nâ, “Ghàn tì yèn a yi lak yi sùsi hi yen a ghə? Ghàn tì yen hi yen a wùt wù nêkà te yi jyâŋà a yu afa fufa chyàlà ma? ²⁵ Bu yâ, ghàn tì yen hi yen a ghə? A wùt te wù lafa laf yi jûŋì ma? Ghàn hi khə na ghɨt ghe ghɨ lafa wu lum afû fî yə̂ mwə̀ mù jùŋ chyə kə tôk. ²⁶ Ghàn tì yen yi lak yi sùsi hi yen a wùt hì khɨŋa hi yen a ghə, a fòktì yì chìk ma? Yi mô kə nâ ni. Mu jìsà ha ghàn na wù chyàlò fòktì yì chìk. ²⁷ À mò Jon we ghɨ tì nyàka a ŋwàklù Fùyèn kum wun na, ‘Kike, mu bè tumalò wùt à mù wù tum ma wù yen a wo ashyə̂ ma wù fati lumu ha wò.’ ²⁸ Mu jìsà ha ghàn na, wùt tà timi hì mô a chyə afân, we wù chyàlà Jon Fo Mòlû, biyani nâbi we wù tobte chyâhè a luk wu fə̀n wù Fùyèn chyàlò wûn.” ²⁹ Ghɨt à jɨ̀m tì yu jis yi Jisòs bakhi nì ghɨt ghe ghɨ ndùku kâtà ŋwaklànà bimi gha ye Jisòs ndùku jîsà hì kokhe Yènfù beka ghɨna tì fye mòlû ha Jon. ³⁰ Biyani ghɨt a Falàsî nì chichàsu saksu tunhî hi khɨlî kwàktì ye Yènfù ndùku kəta kum ghɨna kəbi yi ghəl te ghɨna tì tunhe hi fye mòlû ha Jon. ³¹ Jisòs fi kahi jis ha ghɨna na, “Mu lyi ma mu fəknà ghɨt a mbyî lân nâ nì ghə, ghɨna mò nâ te ghə agha?” ³² Ghɨna mò te mwəlà me ghɨna mò a wu wən, ghɨna toŋa jîsà bênà ha ghɨ le na, ‘Ghàh ti yem njàŋsù fomasu na ghàn bɨn, ghàn tê bɨ̂n, fî yem njàŋsù kpusu na ghàn ji, ghàn tà jì.’ ³³ Mu jìsà ni beka Jon fô Mòlû tî bên yə wi hidù, nyo wi lùkû, ghàn jis na ‘Wu kəta yohnà be.’ ³⁴ Wâ Wùt ti bên hì yə̂ fê nyô, ghàn ti jis na, yen wùt wunâ ‘Wù yə chyàhèlò fê nyo chyâhè fê mô nì sunu ghê ghɨt ghe ghɨ kâtà ŋwàklànà nì ghɨt a be ale!’ ³⁵ “Biyani Yènfù chwùtè tof wu wunu wu mô tohna a gha afa ghɨt a wuna à jɨ̀m nè a ghɨna chyənà.” ³⁶ Wùt à Falàsî wùlè toŋa Jisòs na wù ben a wun a ndâ, ma ghê wûn yə. Wù yên chwo ndokò a lùk wu yənu. ³⁷ Wùt ywên wù gha be wùlè we wù ndùku chyə yi tèk afû yu na Jisòs yə a wùt à Falàsî a ndâ lyi sòk yìlè ma ghɨ fati nì ti yile ghɨ toŋte na àlàbastà, yûhì lìmtena mô atɨ̂n, yen nì yinì afû. ³⁸ Te wù yèna yâ, timi a Jisòs a ngwùŋ hì jyê, semù chemle a Jisòs wu wù, wù ngumti yah nì nyuŋsu wunsu tusu, wù baŋli wulu wunu fî yuhi nì yûhì lìmtena yê. ³⁹ Wùt à Falàsî we wù tì toŋa Jisòs yen gha ye hì jîsà ha ngɨŋ à wûn na, “Wùt wunâ ye hì mô kə nâ fòktì wù chìk, ma wù khəlò na wùt ywên we wu kùmà wun ni, na wù mò ni mô kə nâ wùt à gha be.” ⁴⁰ Jisòs toŋti Samùn jis na, “Samùn mu kəta lò gha hi jìs ha wò.” Wù fîsì jis na, “Chichà, jìs à bî, mu yutelò.” ⁴¹ Jisòs jis na, “Ghɨt à bà ndùku kətalò ka ha wùt we wù ndùku samhe ghɨta nì ka, wùt wù mòk ndùku kəta ka wu kwoka yake yi ghə yì tân, wùt lè kəta mtân. ⁴² Nâ wùt mòk a ghɨna ndùku kəta wi ka hi kaha làk. Bì wu kâ atɨ̂n de yen nì ka tɨnu wù jɨ̀m ha ghɨna. Wò ni kwàktè na à mò nde atɨ̂n à ghɨ̂t afân à bà a wù ndùku kôŋà bè wu ka wùna chyâ wùlè agha?” ⁴³ Samùn fîsì na, “Mu kwàktè na a mò we a ghɨ tì de ka donu ha wûn.” Jisòs jis ha wun na, “Wò jìsà kə nâ hamok.” ⁴⁴ Wù fî kahi wu wun fî ki wùt ywên àtɨ̂n jis ha Samùn na, “Wò ti yen wùt ywên wùna? Mu ye ben a wò ndâ, wò ti faŋ hi fo mòlû na mu su wulu mu atɨ̂n, biyani wù ti sû wulu mu nì semù yah nì nyuŋsu wunsu tusu. ⁴⁵ Wò tà ye baŋli jə mu a yu afa mu ye bena, nâ kə wu yu afa mu ye bena, wù ti faŋ hi yahlè mu. ⁴⁶ Wò tà ye tânhì jə to ma nâ kəbi nì chìnà mgut, biyani wù ti yuhi wulu mu nì yûhì yì lìmtena. ⁴⁷ Kum ni mu wu jîsà ha wò na, Koŋ yi chik ye wù chwùte ha mu chwùtè na Yènfù ti lehìfo gha wuna be nâ à jɨ̀m, biyani ghɨ lehèfo fùjiti boŋa chwûtè yi kôŋ fùjiti.” ⁴⁸ Jisòs ki jîs ha wùt ywen wùna na, “Mu ti lehìfo gha ghɨ be gha.” ⁴⁹ Ghɨt ale ghe a ndùku mô nì wûn wu lùk wu yənu hì kante a ghɨna sù ngɨŋ na, “À mò nâ nde mu wuna a wù lèhèfo besu ghɨ̂tsù?” ⁵⁰ Jisòs ki jîs ha wùt ywên àtɨ̂n na, “Bimî ya ti bônhì wò. Kolô kə nì yutìnì.” A chyəna ghɨt a Jûs, wùt ki bên a wò ndâ, wò ki fo mòlû na wù su wulu wunu atɨ̂n, ki tânhè mgut a wun a tû chwùtè na wu saŋlelò hi fye wûn a wò ndâ.

¹ Yi bàm atɨ̂n Jisòs hì gbê fôktè tum yì jùŋ kum nì fə̂n wù Fùyènù a tu tèk tu chiktu nì tu tetatu. A mô ni wu mô ghê jùmtìsùbàmsù wunsu ìwûm njwòsù bà, ² Bakhe nì ywen ale ghe Jisòs ndùku mô ma wù ti chwuk yaftu ghɨna tu nì ghɨt ghe wù tì jùma fihe yohnù wu be a ghɨna fùtɨ̂n. A mô Mèli wù Màgdalà a we Jisòs tì jùma fihe yohnù be we wu ndùku fo ngə̂k ha wûn, sàmba, ³ a mô Jùwanà a ywê wùt we wù ndùku fêtà ha Helòd ghɨ toŋte na Chusà, nì Sùsanà bakhe nì ywen a dona ale. Ghɨna hì gâmtè tôknè kwoka nì Jisòs nì jùmtìbàmsù wunsu nì mwə̀ mù ghɨna. ⁴ À ndùku mô te ghɨta fwo bena a tu tèk, a tu tèk, yûŋtì dô kə ni. Jisòs ki mâ ngàn yîn ha ghɨna na: ⁵ “Wùt tì shik hi mò ngwìk à wûn, yîmì hi mù yìlè chemli a sùbelâ, ghɨta jelì, nyɨ̀mû ben chupli kut kə yì jɨ̀m. ⁶ Yìlè chemlî a to mù chyə̂, woli mô a yi dèt yîmì hi ləmâ biyani kaha yimlò beka chyəfu yute fu ndùku wi. ⁷ Yìlè chemlî a lùk wu tù tùŋù, yîmì hì ləmâ nì sònjoŋsu, sònjoŋsu tɨnsu ləma solì. ⁸ Yìlè chemlî kə nâ chyəfu jûŋ fù, saŋ atɨna kwôk bwuslò, bilò ghɨ hi sama nâbi ghɨ̀ni to saŋa, se saŋa fwo atɨ̂n dô chema wu wə.” Jisòs jis ni kahi fî jis a jyə̂ yì tâ na, “Nâbi nde wù kəta tofu ma wù yu.” ⁹ Jùmtìbàmsu Jisòs sù hì bufa ha wûn nâ, “Ngàn yina fòktè na ghə agha?” ¹⁰ Jisòs fîsì na, “Yènfù ti fô tofu ha ghàn na ghàn hi ywo khɨle gha letena ghe ghɨ mô kum fə̂n wù Fùyènù, biyani ha ghɨt ale mu nè hì jîsà a sù ngàn shyəma ghɨna nê hi ke luktu yena wi shyə ale, ywo ghâ khɨle wi na ghɨ jis na ghə agha.” ¹¹ “Ngàn yina yike gha ghɨ̂n ni, ngwìk atɨ̂n mò yi gha Fùyènì.” ¹² Ngwìk yê yì tì chemle wu lûm yi mò te ghɨt ghe ghɨ ywo gha Fùyènì, deblì ben fihi a ghɨna təm na kə ghɨna bimi ma ghɨ bon. ¹³ Ye yì tì chemle yi wo yì mò te ghɨt ghe ghɨ ywo gha Fùyènì nyâŋhì bimî nì saŋlînì, biyani yi faŋ hi tòkà lye a ghɨna təm. Ghɨna bimi kə afu yulâ mômhìnì ben, ghɨna fen kə yi fên. ¹⁴ Ngwìk yìlè ye yì tì chemle a tutùŋ yâ, mò te ghɨt ghe ghɨ ywo gha Fùyènì, chyəti yen kə ni, fuma mbye, ghɨna khɨŋa yi ghak, nyɨŋa kə yi bàm yi mwə̀ mù mbyî, gha ghɨ̂n tàhì na kə ghɨna ləma a ghɨna àtɨ̂n yi bimî. ¹⁵ Ye yì tì chemle a chyəfu jûŋ fù mò te ghɨt ghe ghɨ ywo gha Fùyènì ghɨ khɨti kə hamok nì təm a ghɨna a jûŋà hì wunhê yi mo wu tam a ghɨna chyənà. ¹⁶ “Wùt wi hi dàn a lâm hi baŋ nì shyə ale, bu hi lèt yi dèt wu khɨ̀, biyani wù kəta hi dàn à tom a lùk wu ngaŋtenu, a lùk afa à lyi nâbi nde ma wù yen ban yi tɨni.” ¹⁷ Ghàn hi khə na ghɨ let kat chya nâbi nì ghə, ghɨ bè yenalò, ghɨ leti nâbi yìni gha, yi bè faŋa wi hi fwo a ndan. ¹⁸ “Ghàn hi tôknè wu lum afa ghàn yute atɨ̂n. À hì kəta nâbi nde ma ghɨ fo kpenhi ha wûn, à hì gha nâbi nde ma ghɨ fyi nâbi fu teta fe wù khə na yi kətalò.” ¹⁹ Kə yu mefû nè Jisòs nì wana ne wuna ben hi yena wûn, lumu hì bu kum nôn à ghɨt ghe a ghɨ ndùku mô afû. ²⁰ Wùt lè fôktì ha wun na, “Nìni wâ, nì wana na mò a bɨn khɨŋa hi yen a wò.” ²¹ Jisòs jis ha ghɨna na, “Nìni mù nì wana noma mò ghɨt ghe ghɨ ywo gha Fùyènì nê te yi jîsà.” ²² À ndùku mô tuk lefu, Jisòs lyi a ngwùk ghê jùmtìbàmsù wunsu jis ha ghɨna na, “Ghàhnà daŋ à yen yi jin yi lwi fokô.” Ghɨna lô hì yênà. ²³ Te ghɨna ndùku daŋà yênà, Jisòs hì bwunê. Fufa ta yîmì hi chyà shikà mòlû mu lye a ngwùk. Ngwùk atɨ̂n hi khɨŋa hi sàŋà. ²⁴ Ghɨna yen shik yemhì wûn jis na, “Bèbɨn, Bèbɨn, yemâ, ghàh te kputelò!” Wù yemà kântì fuf atɨna nì jwò ghɨ tenâ luktu china kə ni moŋ. ²⁵ Jisòs buf ha ghɨna na, “Kum ghə te ghàn kəta wi bimînì agha?” Ghɨna hì mô nì kani fê fânà, buf ha ngɨŋsu ghɨna su nâ, “Wùna mò nâ nde wù kàntè fufa nì jwò ghɨ ywo wûn.” ²⁶ Yi bàm yi tɨ̂n, Jisòs nì jùmtìbàmsù wunsu daŋ yen yi lak yi Gelàsèn yi jin yi lwi yi ke dâŋhè Galìlî. ²⁷ À hì mô kə te Jisòs fwo toma bê nì wula yi bi jwolì tɨni ni, kwônà nì wùt ma wù lo yi tèk yile afû. Wùt àtɨ̂n kəta yohnù be a wun a fùtɨ̂n, ma wu ti chyə̂ nâ hadà, wu mâkà wi shyə ale a wun wu wùn, chyə wi a ndâ, chyə kə sù gùma. ²⁸ Te wù yena bena nì Jisòs ni, khək yi jî fen a wun ashyə̂ bwat nâ a jyə̂ yì tâ jis na, “Wò khɨŋa ghə ha mu a Jisòs, Wâ Yènfù ngaŋte fu? Mu chyate wò kə fo ngək ha mu.” ²⁹ Wù ndùku jîsà ni, beka Jisòs tì kànte na yohnù be we fwu a wun wu wùn. Yohnù tɨnu ndùku fo ngə̂k ha wûn a mu yu, a mu yu. Ghɨ hì mô hi fo ngə̂k ha wûn nâbi wùni yu, ghɨ kwut khəni wuni nì fwəni wuni nì chyaksu ghɨ lem wûn wu lùk. Ghɨ lem ni, wu tenti kə yi tentî chyaksu tɨnsu, yohnù be tɨnu lyi yen nì wun a yi lak yi sùsi. ³⁰ Jisòs ki buf ha wùt àtɨ̂n nâ, “Yet ya mò nde?” Wù fîsì na, “Yet yi mi mò ‘A nôn’” beka yohnù be tì lye a wun wu wùn dô kə nì. ³¹ Yohnù be tɨnu chyati Jisòs na kə wù jum à fihi wunu hi tum a lihi yi be afa yi lye gokhe wi yâ. ³² À ndùku mô ni, nôn à kùnduku a chika ale bakhe afû, yə a wùn wu kunu, yohnù be we chyati Jisòs na wù de ghɨna ma ghɨna yê lyi a kùnduku we fùtɨ̂n, Jisòs dê. ³³ Yohnù tɨnu fwu a wùt we wùn yen lye a kùnduku we fùtɨ̂n, wu shɨ̂ŋ nì nyiŋi yen fen a ba yìlè a yi bi lwi, chemli a jwô kputilò. ³⁴ Ghɨt ghe ghɨ ndùku kine kùnduku we yen gha ye yi gana nyiŋ kolo yen fôktì gha ye yi gana a yi tèk afû, hì gbê fôktè ha ghɨta a mu fùk. ³⁵ Ghɨ yû ni, yen hi yè yên gha ye yi gana. Ghɨna ben yen Jisòs fî yen wùt we yohnù be we tì fwo a wun wu wùn, ma wù ti ndokò a Jisòs ashyə̂, ma wù ti mak njusu, mô kə nâ a wun wu tof. Ghɨt atɨna yen ni, hì fânà. ³⁶ Ghɨt ghe ghɨ ti yena te gha tɨni gana, fôktì te wùt àtɨ̂n tì gbê shyəma wù ta. ³⁷ Ni, nâ ghɨt à jɨ̀m a bètu lak tu Galìlî jis ha Jisòs na wù lo a ghɨna fùtɨ̂n, beka ghɨna ndùku fânà nâ haŋaŋ. Jisòs lye a ngwùk hì khɨŋa hi lò. ³⁸ Wùt we yohnù wu be we tì fwo a wun wu wùn yen chyati na wù lo ghê wûn. Biyani Jisòs tunhî jis ha wun na, ³⁹ “Kahi kolô, ma ye fokti gha ye Yènfù ne ha wò.” Wùt àtɨ̂n lô kolo hì gbê kata yi tèk yi tɨni yì jɨ̀m, fôktè kə gha ye Jisòs ne ha wûn. ⁴⁰ À hì mô te Jisòs kaha daŋa bena a bàh a lwi afa a wù tì lo atɨ̂n, nôn à ghɨ̂tà ben fyi wûn beka ghɨna à jɨ̀m ndùku mô yute wûn. ⁴¹ Kə ni, wùt lɨmà wùlè a mô wùt wù tihena a ndâ chìnti, yet yi wuni mô Jalòs, ben fen a Jisòs ashyə̂ chyati wûn na wù ben a wun a ndâ, ⁴² beka wù ndùku kəta kə wan wù ywên wù mòk, wu mô lɨ̂m njwòsù bà wu kpo yênà. Te Jisòs lo hì yênà ghê wûn, nôn à ghɨ̂tà hì fahe yênà kə wun a yi bàm. ⁴³ À ndùku mô atɨ̂n à nòn afû wùt ywên wùlè mô afû, motè kə ni yena yu wunu, ma yaf yi tɨni ti chyə̂ na wun wu wùn a wu lɨ̀m njwòsù bà, teka wùt a ngàŋ wùlè chwuk wûn na wu ta. ⁴⁴ Wùt ywên wunâ fahi yen lyi a wun a yi bàm kum soŋ yi wuni yi sùnju, kə wu yu, yu wun we mi kə yi mî. ⁴⁵ Jisòs shɨ̂ŋ buf nâ, “À kum nde mu agha?” Nâbi nde tunhî na yi tà kum jə wûn. Bità ki jîs ha wûn na, “Bâ, ghɨta ti jɨŋ kat wò a mô nâbi nde kumlè kə wò?” ⁴⁶ Biyani Jisòs jis na, “Wùt ti kum mu beka mu ti yu te jyaka fwo a mu wùn.” ⁴⁷ Wùt ywen wuna yen na ghɨ ti khɨli na à kum yi wûn, fwu ben, chiŋtê, fen a Jisòs ashyə̂ fôktì gha ye yi ne na wù kum Jisòs. Ghɨt à jɨ̀m yû. Wù fî jis na yi ye kum Jisòs nâbi wùni yu ta kə yi tâ. ⁴⁸ Jisòs ki jîs ha wun na, “Wâ mù, bimî ya ti ni na wò ta. Kolo kə nì yutìnì.” ⁴⁹ Te Jisòs ndùku baha jîsà, wùt bên ma wù lô tô ndâ chintena ghê, jis ha wûn na, “Wan wâ we ti kpû. Kə wò fi fô ngə̂k ha chichà.” ⁵⁰ Jisòs yu ni, jis ha Jalòs na, “Kə wò fan, khɨti kə bimî ya ma wù ta.” ⁵¹ Jisòs yen tan a ndâ afû, shihi lye a ndâ, kan na kə wùt lye ndâ ghê wûn, a bu kə Bità nì Jon nì Jêms kə nì bè wan nì nè wan. ⁵² Ghɨt à jɨ̀m afû hì jyê, fê sama wu wun kum wan àtɨ̂n. Jisòs jis ha ghɨna na, “Ghàn china, kə ghàn fi ji. Wù tà kpu jə̂, wù bwune kə yi bwunî.” ⁵³ Ghɨna yu ni, hì chyəka kə yi chyə̂k wûn, beka ghɨna ndùku khə na wù ti kpû. ⁵⁴ Biyani, Jisòs lyi khɨti a wo wuna jis a jyə̂ yi tâ na, “Wan lòtî!” ⁵⁵ Yohnà wuna kaha ben kə wu yu afû, wù lôtì kə yi lôtì, Jisòs jis na ghɨ khɨŋ à fô shyə ale ma wan àtɨ̂n yə. ⁵⁶ Jwo yim bè wan àtɨ̂n nì nè wûn, biyani Jisòs chîhì na kə ghɨna nè fôktè ha wùt gha ye yi gana.

¹ Jisòs toŋa yûŋtì ghɨt a tuma wuna njwòsù bà fo a jyak à jɨ̀m ha ghɨna shyəma ghɨna nê hi jûmà fihe yohnù wu be nâ wù jɨ̀m, fê chwuka yaftu, ² chinhi ghɨna na ghɨna fwo yen ma ghɨ hi fôktè gha kum Fə̂n wù Fùyènù fê chwuka ghɨt a yablena. ³ Wù fî kaha jis ha ghɨna na, “Kə ghàn nè lyê shyə ale, kə wùt nè lyê mbàŋ yì gbèna nâbi nì bàlì, kə wùt nè lyê shyə yəna nâbi nì ka, kə wùt nè lyê nju sùbà. ⁴ Ghàn yen nâbi yìni tèki, lye a ndâ, ghàn hi chyə kə atɨ̂n hi bè tàn a wu tuk afa ghàn bè lô a yi tèk afû. ⁵ Ghàn yen nâbi afa, ghɨt atɨna faŋ hi fye ghàn, ghàn yah wulu wanu shyəma ghɨna nê khɨli na ngə̂k bè bênàlò ha ghɨna.” ⁶ Ghɨt a tuma ghê fwu hì gbê yênà a tu tèk, a tu tèk, fôktè yênà nì tum yi jùŋ, fê chwuka ghɨta nâbi afa te ghɨna yènà. ⁷ Helòd we wù ndùku saka bâh à Galìlî ale yu nâ gha à jɨ̀m ghe ghɨ ndùku gânà, gha atɨna hì fumhe wûn, beka ghɨt ale ndùku jîsà ha wun na, Jon Fo Mòlû ti kaha lôtì a yi kpû, ⁸ ale jîsà na fòktì Ìlajà ti kaha bên, ale jîsà na à mò fòktì wù chìk wùlè kə te se su ndùku mô ashyə̂ te yì kaha lote a yi kpû. ⁹ Helòd yu gha tɨni, hì kante kə wun a ngɨŋ jîsà na, “Mu tì nî ghɨ kat tô Jon Fo Mòlû. À fè mô nde wuna ghɨ jîsà gha ghɨ̂n kum wûn agha?” A yu mefû wù yîmì hì khɨŋa hi yena Jisòs. ¹⁰ À ndùku mô te ghɨt a tuma Jisòs kaha kolo bena, ghɨna fôktì nâ gha à jɨ̀m ghe ghɨna tì ne, wù nyamti lyi ghɨna, ghɨna yen lumu yi tèk yile, ghɨ toŋte na Bèsadà. ¹¹ Ghɨta tì khɨli nâbi wùni yu na a mò luk we wù mò atɨ̂n ni, jûmtì yen nì wun afû. Jisòs fyi ghɨna nâ jûŋ jis ha ghɨna kum fə̂n wù Fùyènù, fî chwuk ghe ghɨ ndùku yafa. ¹² À hì mô wu yu kolô, jùmtìbàmsù wunsu njwòsù bà yen jis ha wun na, “Jìs ha ghɨt ghɨna na ghɨna jyahi ma lyê yen a tu tèk, ne a tu lùk afa fùkmù mò bakhe, ma ghɨna khɨŋ shyə ma ghɨ yə nì luku hi chyə̂ beka luk wûn mô a yi bàm.” ¹³ Biyani Jisòs fîsì ha ghɨna na, “Nâ ghàn fo shyə ma ghɨna yə.” Ghɨna jis ha wun na, “Ghàh kəta kə ban wu kwaŋu wù tân nì yila à bà. Wò khɨŋa na ghàh yê yun mwə̀ yə̂mù ha nôn à ghɨ̂t ghɨna à jɨ̀m ma?” ¹⁴ Ghɨt a lɨmànà ndùku mô a nôn à afân kwoka tânà yê kamsù tân. Jisòs jis ha jùmtìbàmsù wunsu na, “Nê ma ghɨna ndoko wu tuk, wu tuk mtân, mtân.” ¹⁵ Ghɨna jis ghɨt atɨna chwo ndokò a chyə̂. ¹⁶ Jisòs fyi ban wu kwaŋ we wù tân nì yila à bà ki kokhe yen a nyə̂, fo àyòŋnà ha Yènfù bəkti fo ha jùmtìbàmsù wunsu na ghɨna jyati ha ghɨt ghê. ¹⁷ Ghɨna à jɨ̀m yə̂ kwut, jùmtìbàmsù wunsu kumti chyàksù bansu su lun kà sù ìwûm njwòsù bà. ¹⁸ À ndùku mô tuk lefu, Jisòs hì chyate wu lùk kə ghê jùmtìbàmsù wunsu, ki buf ha ghɨna nâ, “Ghɨta jìsà na mu mò nde?” ¹⁹ Ghɨna jis na, ghɨta jìsà na, “Wò mò Jon Fo Mòlû, ale jîsà na, wò mò fòktì Ìlajà, ghɨ le jîsà na wò mò fòktì wù chìk wùlè te wù kaha lote a yi kpû.” ²⁰ Jisòs buf ha ghɨna na, “Nâ ghàn jìsà na mu mò nde?” Bità jis na, “À mò wò Klistù, a we Yènfù chwoka lema.” ²¹ Jisòs kântì na kə ghɨna nè fôktè gha mi yîn ha wùt, ²² Fî jis na, “Wâ Wùt kəta hi yena ngə̂k yì chìk, na chəhsu nì ngàŋsù ndâ Fùyènsu chiksu nì chichàsu saksu mana wûn, ma ywi wûn, ma à nê hi mô yi bàm yi mu tuk mtât ma wù kahà loti a yi kpû.” ²³ Jisòs jis ni, ki jîs ha nôn à ghɨ̂t ghe ghɨ ndùku bênà na, “À kòŋà nâbi nde hi jùmtè mu, wu mâkà ngɨŋ à wûn, wu hi bêkà kâkfùtàfù tuk mù jɨ̀m jûmtè mu. ²⁴ À mòmhi nâbi nde hi bònhè ngɨŋ à wûn, ma wù ləha, ma à lesi nâbi nde ngɨŋ à wûn kum mu, ma wù bê bon. ²⁵ Mbè wùt mò ghə a yu afa wù khɨte mbyî jɨ̀m lesì ngɨŋ à wûn agha? ²⁶ Nâbi nde shìki wumî kum mu nì yiki mi, wu hi khə na Wâ Wùt bè boŋa wumelò kum wûn a yu afa Wâ Wùt bè kaha bênà atɨ̂n à ban yi chiki bè wûn nì anjèlsù wunsu yulesu. ²⁷ Mu jìsà ha ghàn hamok na, ghɨt ale mò afân lân, bu hi bè kpû nâ hakoh, bu na ghɨna yen fə̂n wù Fùyènù.” ²⁸ À hì mô kwoka yênà mu tuk fama te Jisòs jìsa gha ghɨ̂n ni, wù lyi Bità nì Jon nì Jêms ghê ghɨna kwok a kun hi jə̀m. ²⁹ Te Jisòs ndùku jə̂mà, kə̂k yi wuni kwuna, njusu wunsu hì fufa kə ni, njêntè. ³⁰ Kə ni, ghɨt a bà timi hì bitè a gha nì wûn. À ndùku mô Musìs nì Ìlajà. ³¹ Ghɨna hì mô nâ fùtɨ̂n à ban yi chiki. Ghɨna hì jîsà kum nì kpu yê Jisòs kəta hi kpû a Jèlusalèm hi lunhe gha yê Yènfù ndùku mô ma wù ti lem ha wûn. ³² À ndùku mô yâ, Bità ghê ghɨt ale bwunê nâ haŋaŋ ghɨna yemà, yen yi ban yi chiki Jisòs, fî yen kəbi ghɨt à bà ghe, ghê Jisòs mô amok. ³³ Ghɨt atɨna shihi lò, Bità ki jîs ha Jisòs na, “Yi jwôfàlò a bèbɨn na ghàhnà hi mô afân. Ghàh nè balò wìmù mù tât, ma wò nê hi kəta à mòk, Musìs kəta à mòk, Ìlajà kəta ale.” Wù ndùku jîsà ni, khə wi gha ye wù jìsà. ³⁴ Kə te Bità ndùku baha jîsà kə yi jîs, bàksù chwo baŋ ghɨna, fânì kwo ghɨna. ³⁵ Jyə̀ fwu fùtɨ̂n à sìmbàk afû jis na, “Wùna mò wâ mù we mu chwoka. Ghàn hi ywo ha wûn!” ³⁶ Te jyə̀ àtɨ̂n tì jìsa mihe, ghɨna yen Jisòs mô afû kə wù nɨ̂ŋ. Ghɨna china kə yi chinâ, tê fòktì ha wùt mòk gha ye ghɨna yena mu tuk afû. ³⁷ Tuku yû, Jisòs ghê jùmtìbàmsù wunsu sù tât kaha chwo kun, nôn à ghɨ̂tà bên, dô kə ni hi bè yen a wûn. ³⁸ Wùt lè atɨ̂n à nòn afu metì bwat a jyə̂ yì tâ jis ha Jisòs na, “Chichà, chichà gàmti wâ mù lɨmà wunâ, beka mu kəta kə wûn. ³⁹ Yohnà be faŋa wi hi khɨte wun na wù shɨŋ à bwat à ji, ma wù fen a chyə̂, fufutu fwo a wun a yi jwô. Ghɨ ni ya, ghɨ fo ngə̂k ha wun ghɨ de wûn ma wù ti bôt nâ haŋaŋ. ⁴⁰ Mu ye chyati jùmtìbàm sasu na su jum à fihi, biyani ghɨ ti ta ghak ghɨna.” ⁴¹ Jisòs fîsì jis na, “À mò nâ yìni mbyi yì be ni a yì ta hi bimî ni, mu nè chyə tânà yàni nì ghàn shyəma ghàn bimi?” Wù jis ni, ki jîs ha wùt àtɨ̂n na, “Bi nì wan wâ we afân.” ⁴² Wù shihi fwo yèn nì wûn, yohnà be atɨna mak wan àtɨ̂n a chyə̂, wù hì tâkà. Biyani Jisòs kântì yohnà be ghê, ghɨ fwû, wan àtɨ̂n tâ. Wù kaha lyi fô wun ha bè wûn. ⁴³ Nâ ghɨt à jɨ̀m afû hì mô nì kani kum a jyak a Fùyènà. Ghɨta ndùku baha kante kə gha à jɨ̀m ghe Jisòs ndùku nê, Jisòs jis ha jùmtìbàmsù wunsu na, ⁴⁴ “Ghàn fatè yu gha ye mu khɨŋa hi jìs ha ghàn. Ghɨ nè bəklelò Wâ Wùt ha ghɨta.” ⁴⁵ Biyani ghɨna te ywo khɨlî gha tɨni beka à ndùku mô ni, ma gha yile ti ni na kə ghɨna ywo khɨli. Ghɨna hì fânà ghaka hi buf ha wûn nâ gha tɨni mò na ghə agha? ⁴⁶ Gùfna tì lôtì a jùmtìsùbàmsu Jisòs sù a fùtɨ̂n, nâ a mò nde we a wù ngaŋte chyâ a ghɨna fùtɨ̂n agha? ⁴⁷ Jisòs khɨli gha ye ghɨna ndùku kwâktè, lyi walà tom bakhi a wun a ngwùŋ ⁴⁸ jis ha ghɨna na “À tòkna nâbi nde nì wan wù teta wuna kum mu, ma à nê hi mô na wù ti tôknà nì mu. We wù tòkne nì mu, ma wù hi khə na wù tòknà ha we wù tuma mu. Ghàn hi khə na we wù tobte gokhè a ghàn a fùtɨ̂n mò we wù ngaŋte chya.” ⁴⁹ Jon jis yi wuni na, “Bèbɨn, ghàh tê yen wùt, wu jûmà fihe yohnù wu be a wo yi yet, ghàh ti jis na kə wù fi mom beka wù wijə wùt mòk a ghàhnà fùtɨ̂n.” ⁵⁰ Jisòs jis ha ghɨna na, “Kə ghàn fi tamti lô wûn, beka we wù nò wijə ghàn mò a ghàn a bàh.” ⁵¹ Jisòs tî lem na yi nè kwoka lò a Jèlusalèm beka yu ndùku bakhe bênà shyəma ghɨ lyê kwok nì wûn a nyə̂. ⁵² Wù tum ghɨta na ghɨ yen ashyə̂ yi tèk yile a Sàmaliyà ma yê fati nâbi ghə ha wûn afû. ⁵³ Biyani ghɨta afû tê fye jə̀ Jisòs beka yi ndùku mô na wù ndùku chyâ yê kə a Jèlusalèm. ⁵⁴ Jùmtìbàmsù wunsu mô Jêms nì Jon yen gha yîn ni, jis na, “Bâba, wò khɨŋa na ghàh toŋa wusu a nyə̂ ma wu chwo ywiti ghɨna agha?” ⁵⁵ Biyani Jisòs bɨ̂nhì wu wun ki ghɨna kan na kə ghɨna nè mômà. ⁵⁶ Ni, Jisòs ghê jùmtìbàmsù wunsu lô yen a yi tèk yile. ⁵⁷ Ghɨna hì gbê yênà wu lum, wùt wù lɨmà wùlè ben jis ha Jisòs na, “Mu nè jûmtèlò wò hi yèn nâbi afa wò yènà.” ⁵⁸ Jisòs fîsì jis ha wûn na, “Sòŋàtù kətalò bûkù ghɨna, nyɨ̀mû kəta ndasu, biyani Wâ Wùt kəta wi luku hi nìŋhè a tô wuna àtɨ̂n hi yùtì.” ⁵⁹ Jisòs fî jis ha wùt lè na, “Jumti mu.” Biyani wùt atɨ̂n jis ha wun na, “bâ. de ma mu kolò yê guma bôm shyəma mu bê jumti wò.” ⁶⁰ Biyani Jisòs jis ha wun na, “De ma ghɨt ghe ghɨ mô te ghɨt a kputena guma ghɨt a ghɨna ghɨ kputena. Biyani ha wò, wò kəta hi tè fòktè yèn gha kum fə̂n wù Fùyènù.” ⁶¹ Wùt le fî jis na, “Mu nè jûmtè lò wò Bâba, biyani de ma mu yê toŋte ha ghɨt a ma laŋ.” ⁶² Jisòs jis ha wun na, “Nâbi nde we wù yìmi fêtì hì kaha ke yi bàm kpene wi a fə̀n wù Fùyènù.”

¹ À hì mô yi bàm yi gha afân, Bâba chwokti ghɨt ale msàmba njwòsù bà tum ghɨna, à bà, à bà na ghɨna yen ashyə̂ a tèk tù jɨ̀m nì luk te wù ndùku kəta hi yèn atɨ̂n, ² fî jis ha ghɨna na, “Mwə̀ mù yə̂mù hi kpì dô kə ni, biyani ghɨt a kpene tobte kə ni. Ghàn jəm lê ha Yèn fe fu mô bè fùk, ma wù tum à kpenhi ghɨt a fetana ma ghɨ shik à kpê kolo nì ghɨna. ³ Ghàn yen. Ghàn shihi yèn, ghàn hi khə na mu tuma ghàn te wana sù njyə̀ atɨ̂n à nyamsu basu. ⁴ Kə ghàn lyi ka nâbi nì bàlì wafana. Kə ghàn lyi kpenhi gwusu wùsu lesu. Kə ghàn lyi yu hi toŋte ha wùt wu lûm. ⁵ Ghàn yen lyi nâbi ghɨ̀ni bɨna, ghàn yitì toŋti ghɨt atɨna jis na, ‘Yènfù fo yutìnì ha ghàn a bɨn a afân.’ ⁶ Wùt shìki tê mò a bɨn afû kpenâ hi tè kəta yutìnì, ma yutìnì yen ha wûn. Wùt shìki bu ma yutìnì tɨni kahà ben ha ghàn. ⁷ Ghàn lyi, ghàn faŋ kə bɨn a afû, yə, nyo nâbi ghə ghe ghɨ fo ha ghàn, beka ghɨ kəta hi tè làk a wùt fètana. Kə ghàn hi dâŋtè bɨnû. ⁸ Ghàn lyi nâbi yini tèki, ghɨ fyi ghàn lem nâbi afa ghàn, ghàn yə nâbi ghə ghe ghɨ fo ha ghàn. ⁹ Ghàn lyi yi tèk afû, ghàn chwuk ghɨt a yablena ghe ghɨ mô afû, fòktè ha ghɨna na fə̂n wù Fùyènù ti bakha ha ghɨna. ¹⁰ Biyani ghàn ki lyi yi tèk, ghɨ tê fye ghàn, ghàn fwu yen a lumtu tatu jis ha ghɨt atɨna na, ¹¹ ‘Ghàh bukte châkhè but wanu tèku a ghàh wu wù ni, hi chwùtè chwena na ngə̂k ti fâŋ ha ghàn.’ ¹² Mu jìsà ha ghàn hamok na, à bè hì mô a wu tuk wu saku Fùyènù, ma ngə̂k bê hi mô ha ghɨta a yi tèk afû chyâ te yì ndùku mô ha ghɨt a Sodòm.” ¹³ “Ngə̂k yì chìk bè hì mô ha ghàn ghɨt a Kolasîn kəbi nì ha ghàn ghɨt a Bèsadà! À ndùku mô na ghɨ ni gha kanana ghɨ̂n ha ghɨt a Tayà nì ghɨt a Sidòn, ma ghɨna tî ndokò a wu bùt fuk wu bwû a ghɨna wùn mâk njusu finasu kahi təm a ghɨna a sùbe. ¹⁴ À bè hì mô wu tuk wu saku Fùyènù, ma ngə̂k bê hi mô ha ghàn chyâ te yì ndùku mô ha ghɨt a Tayà nì Sidòn. ¹⁵ Ghàn ghɨt a Kàbanùm, ghàn kwàktè na Yènfù bè kokhe ghàn na ghàn kwok à tan a nyə̂ ma?” Yi wijə yâ. Ghɨ bè bɨlà tumhe ghàn a yi be afa yi lye kokhè wi yâ. ¹⁶ Wù jis ni, kaha jis ha ghɨt a tuma ghe na, “Nâbi nde we wù ywo ha ghàn, wù ti yû ha mu. Nâbi nde we wù tunhe hi yu ha ghàn, wù ti tunhi hi yu ha mu, we wù tunhe mu, wù ti tunhi we wù tuma mu.” ¹⁷ Ghɨt ghɨ̂n msàmba njwòsù bà tî gbi kaha kolo nì saŋlînì jîs ha Jisòs na, “Bâba nâbi yohnù wu be tì yu ha ghàh a wu yu afa ghàh kàntè gha a wo yi yet!” ¹⁸ Jisòs jis ha ghɨna na, “Mu tê yên te Satàn lô a nyə̂ fen te wuli mwanani. ¹⁹ Ghàn hi khə na mu ti fô jyaka ha ghàn na ghàn jeli yosu besu nì nyak mù chyə̂, fî fô a jyak na ghàn ta chya bànà sanisu, kə tu lum tù jɨ̀m. Nâ shyə ale bè fo wi ngə̂k ha ghàn. ²⁰ Biyani kə ghàn hi saŋle na yohnù wu be ywo ha ghàn, ghàn hi bɨlà saŋle na ghɨ ti nyak yet ghana a ŋwàklù a nyə̂.” ²¹ À hì mô kə yu afû, yohnà yulena ni Jisòs hì saŋle nâ haŋaŋ ki jə̂m na, “Bâ mù, Bâba we wù saka nyə nì chyə, mu fô àyòŋnà ha wò beka wò ti let gha ghɨ̂n ha ghɨt ghe ghɨna kwàktè na ghɨna tofalò. Chwûtì ha ngwònu hamok a Bâ, à kòŋà kə wò hi nì ni.” ²² Te wù tì jìsa ni, kaha jis ha jùmtìbàmsu wunsu na, “Bom ti fô mwə̀ mù jɨ̀m ha mu. Wùt fate khə wi wùt we Wan wùna mò wunù, a bu kə Bì. Wùt fate khə wi wùt we Bì mò wunù a bu kə Wan nì ghɨt ghe Wan chwoka hi chwùtè Bì ha ghɨna.” ²³ Wù jis ni, kahi wu wun nyamti jis ha jùmtìbàmsu wunsu lesu na, “Jùŋ mò ha ghɨt ghe ghɨna yena gha ghe ghàn yena! ²⁴ Mu jìsà ha ghàn na, fòktìsù chiksu dosu nì fə̂ntù ndùku kôŋàlò hi yen a gha ghe ghàn yena, fê kôŋà hi ywo gha ghe ghàn ywo, biyani yi faŋ hi gàn.” ²⁵ Chichà yì sak wùlè timi a nyə̂ hi mòmhè Jisòs buf na, “Chichà, mu mò hi nè nâ ghə hi bè khɨti chyəna ghe ghɨ bè mê wi agha?” ²⁶ Jisòs kaha buf ha wun na, “Ghɨ nyak na ghə a Musìs ŋwàklù làŋ agha? Wò taŋa ywo na ghə atɨ̂n?” ²⁷ Wùt àtɨ̂n fîsì na, “Wò kəta hi tè kòŋà Bâba Yènfù nì təm gha à jɨ̀m nì yohnà gha à jɨ̀m nì jyak gha à jɨ̀m nì kwâktì ya yì jɨ̀m fê kôŋà wâ nâ te wò kòŋà ngɨŋ yâ.” ²⁸ Jisòs jis ha wun na, “Wò ti fîsì kə nâ jûŋ. Ndù ma hi nê yâ ma wò bê khɨti chyəna ghe ghɨ bè mê wi.” ²⁹ Chichà yi sak wuna mômhì hi chwùtì na gha ye yi ye hì bufa yi yê mò yi ghəl, fî kaha buf ha Jisòs na, “Wâ nôm mò nde agha?” ³⁰ Jisòs fîsì ki jîs na, “Wùt tì lo a Jèlusalèm hì chwo yênà a Jèlikù. Ghɨt a chwoŋana khɨti wûn chwokti njusu wunsu, sam wûn, wù faŋ kə fùjiti hi kpû. ³¹ Yi gan na ngàŋ à ndâ Fùyèn yìlè ndùku chwo yênà kəbi wu lum afû, wù yen te wùt àtɨ̂n nìŋe, wù mbâmtì chyâ. ³² Wùlè hi fê chyâ kəbi wu lum afû, a mô wut yì fèt a ndâ Fùyèn, ma wù fwo a Lefì sah yi nda yen te wù nìŋe a chyə̂ boŋ chyâ kə yâ. ³³ Biyani wùt yi lak yi Sàmaliyà wùlè hì yênà yi gbî chya kəbi wu lum afû, boŋ yen wûn, seni kwo wûn ³⁴ Wù su lemtu wun tê, yok nì fo, kwut nì bâh à sùnju, lyi wûn kokhi a wun a tô nyàm, yen nì wûn a ndâ ghɨt a benana, chyə tôknà nì wûn afû. ³⁵ Tuku yû, wù fihi ka a wun a bàlì fo ha bè à ndâ àtɨ̂n jis na, ‘Wò tokna nì wùt wunâ. Wò faŋ kpenhi nâbi ghə a tô wu ka afân, ma mu nê bu hi kaha bèn, ma mu lak ha wò.’” ³⁶ Jisòs jis mihì ki buf ha chichà yì sak wuna na, “A wo yi kwàktì à mò wùni atɨ̂n à ghɨt ghɨ̂n à tât a wù tì chwute na yi mò wâ nè wùt mu we ghɨt a chwoŋana tì khɨte?” ³⁷ Wù fîsì na, “À mò we wù tì chwùte seni kwolani ha wûn.” Jisòs ki jîs ha wun na, “Wù yen, ma wù hi nê kə yâ.” ³⁸ Jisòs ghê jùmtìbàmsù wunsu hì gbê yênà, lyi a yi tèk yile, wùt ywên wùlè mô atɨ̂n ghɨ toŋte na Matà. Jisòs lye a wun a ndâ, wù fyi wûn nâ jûŋ. ³⁹ À ndùku mô Matà kəta wâ nè wun wùlè yet yi wuni mô Mèli. Mèli ben ndokò a Bâba ashyə̂ hì yute yikî wuni. ⁴⁰ Matà hi fuma nì fêt yì doni, ben ha Jisòs jis na, “Bâba, wò yena wi na wâ nôm ti de mu na mu hi fuma nì fêtì kə mu nɨ̂ŋ agha? Jìs ha wun na wù bê gamti mu.” ⁴¹ Bâba toŋti Matà jis ha wun na, “Matà, Matà, wò nè gha fo ngə̂k ha wò dô kə ni. ⁴² Biyani à mò kə yi gha yì mòk ye wùt kəta hi kwàktì. Mèli ti lyi gha jûŋì tɨni, ghɨ bu hi fê fyi ha wûn.”

¹ À ndùku mô tuk lefu Jisòs hì jə̂mà wu lùk. À hì mô te wù jə̀ma mihe, jùmtìbàmsù wunsu lesu jis ha wun na, “Bâba, yiki ghàh nì gha ghe ghàh kəta hi tè jìs a wu yu afa ghàh jə̂mà, kəbi yi ghəl te Jon tì yike jùmtìbàmsù wunsu.” ² Jisòs jis ha ghɨna na, “Ghàn mò hi jə̀m, ghàn hi jîsà na: ‘Bâ, nì ma ghɨta hi kokhe yet ya, nì ma fə̂n wa ben. ³ Yəhi ghàh lân, ma wò yəhi ghàh tuk mù jɨ̀m. ⁴ Lèhifo ghàh a ghàh a gha a be beka ghàh lèhèfo lò nâbi nde we wù ne be ha ghàh. Kə wò de na mômhìnì ben ha ghàh.’” ⁵ Wù fî jis ha ghɨna na, “Wùt a ghàn a fùtɨ̂n làhi yèn a sô wùn a ndâ ntên ntuksu hi jìs ha wûn na, ‘Sô mù, fo mu nì ban wù tât, ⁶ beka sô mù wùlè ti lyi ben a mô ndâ chyâ yênà gbî, mu kəta wi shyə yəna hi fo ha wûn.’ ⁷ Sun wâ we làhi kaha fîsì kə fùtɨ̂n à ndâ na, ‘Kə wò fi fo ngə̂k ha mu. Mu ti nîŋì nì mwəlà mâmù, mu wijə hi kaha lòtì hi fo a shyə ha wò,’ ⁸ ma wò ni ghə? Mu fòktè ha ghàn na, wù shìki bu hi lòte fô a shyə ha wò kum wu sun, ma wù nê lòtê fo nâbi ghə te wò khɨŋa beka wò mò kə afû chyate kə wûn. ⁹ Kum ni, mu jìsà ha ghàn na, ghàn hi bufa kə yi bûf, ma ghɨ nê fo ha ghàn, khɨŋa kə yi khɨ̂ŋ, ma ghàn nê yen, kûmtè kə yi kûmtì ndâ ma ghɨ nê jimi ha ghàn. ¹⁰ Beka à buf nâbi nde, ma ghɨ fo, à khɨŋa nâbi nde wù yen lò, à kùmti nâbi nde jwo ndâ, ma ghɨ jimi ha wûn. ¹¹ À mò wùni bè wan a ghàn a fùtɨ̂n a we wù mò hi fô ywò ha wan, a wu yu afa wan bufa yili agha, ¹² à mò wùni wù mò hi fô nyakfu chyəfu ha wan, a wu yu afa wan bufa wumi agha? ¹³ Ghɨt a be te ghàn hì khə hi fô mwə̀ mù jùŋ ha mwəlà, nâ Bì wânù we wù mò a nyə̂ nê faŋ hi fo Yohnà Yulena ha ghɨt ghe ghɨ bufa ha wûn agha?” ¹⁴ À ndùku mô tuk lefu Jisòs hì jûmà fihe yohnù wu be a wùt wu wùn, a mô yani, wù nê na wùt àtɨ̂n hi mô jîsà wi. Te wù jùma ya, wùt àtɨ̂n yîmì hi tè jìs. Nôn à ghɨ̂t ghe ghɨ ndùku mô afû, hì mô nì kani. ¹⁵ Biyani ghɨt ale jis na, “Wù jùmà fihe yohnù wu be a Bèlsibùl a jyak, fə̀n wù yohnù wu be.” ¹⁶ Ghɨta kəbi a nòn afû, hì khɨŋa lumu hi kwo Jisòs atɨ̂n, ki jîs na wù ni gha kanani yile hi chwûtì na jyak a wuna lo kə nâ ha Yènfù. ¹⁷ Jisòs khɨli kwâktì tu ghɨna tu jis ha ghɨna na, “À mò nâbi yìni laki a yi kəta jyàhè wùna, ma yi nê fen. Sah yi nda shìki bu jwo yì mòk, ma yi bê jyahi.” ¹⁸ Kum ni, Satàn shìki nô ngɨŋ à wûn, ma fə̂n wù wunu nê timi yàni? Mu jìsà ni, beka ghàn jìsà na mu jùmà fihe yohnù wu be a jyak a fo Bèlsibùl. ¹⁹ Mu shìki jûmà fihe yohnù wu be nì jyaka a fo Bèlsibùl, ghɨt ghana ghê jûmà fihe ya, a fo nde jyaka ha ghɨna agha? À nè chwûtè kə ghɨt ghɨ̂n na ghàn wàmalò, ma ghàn jìsà hamok kum mu. ²⁰ À fo Yènfù jyaka na mu hi jûmà fihe yohnù wu be wûn. Yi chwûtè na fə̂n wù Fùyènù ti ben ha ghàn. ²¹ “À hì mô wu yu afa wùt à jyak bakte mwə̀ mù wûn mù wòŋ hì chînà bɨn a wuna, mwə̀ mù wûn mù jɨ̀m bonlò.” ²² Wùt à jyak wùlè ki bên, tâ chyâ wûn, nô yə wûn, ma wù kumti mwə̀ mù wòŋ mù wun me wù ndùku samhe atɨ̂n bakhe nì mwə̀ mù wûn mù jɨ̀m, ma wù jyàtê yen ha ngwàk à wûn. ²³ “À shìki bu nâbi nde a wô mòk ghàh à wûn, ma yi nê hi chwûtè na wù nòlò mu. À shìki gâmtè wi nâbi nde mu hi tè chìntè ghɨt a Fùyènà, ma wù hi sahà yi sâh.” ²⁴ “À yè mô a wu yu afa yohnà be fwo a wùt wù wùn, ghɨ yen hi gbê kata kə luktu yim tù jɨ̀m, khɨŋa wu luk hi yutì, ghɨ faŋ hi yên, ghɨ jis a wun a ngɨŋ na, ‘Mu nè kaha yênàlò a ndâ afa mu ye fwo atɨ̂n.’ ²⁵ Ghɨ kaha yen a ndâ afû, ma ghɨ ti fî fati yah bakti mwə̀lû atɨ̂n, ²⁶ wù kaha yen lyi ben nì yohnù wu be wùlè sàmba, wù bəma chya ghê ma wu lyê hi chyə a wùt atɨ̂n wu wùn. Yi gan ni, wùt atɨ̂n hi bəma chyâ te wù ndùku mô ashyə̂.” ²⁷ A ndùku mô te Jisòs jìsa mihe gha ghɨ̂n, wùt ywên wùlè atɨ̂n à nòn afû bwat jis na, “Jùŋ mò ha we wù tì bwə wò nyoŋhi kwok nì wò!” ²⁸ Jisòs fîsì na, “Jùŋ bɨlà mô ha ghɨt ghe ghɨ ywo gha Fùyènì, nê te yi jîsà!” ²⁹ Nôn à ghɨ̂tà hì dûtè bênà a Jisòs a ngwùŋ, wù jis na, “Ghɨt a mbyî chîn yinâ mò kə nâ ngwàk yì be. Ghɨ khɨŋa hi yena chwena ha mu. Ghɨna nè yena wi chwena ale, a bu kə yì Jonà. ³⁰ Wâ Wùt boŋa mô chwena ha ngwàk kəbi yi ghəl te Jonà ndùku mô chwena ha ghɨt a Ninifì. ³¹ À bè hì mô a Yènfù tuk wu saku, ma nè fə̀n, a mô wùt we wù saka lak yi bûlà mbyi, bàh à nchwô, timi hi ngane ngwàk yina beka, wù tî lô a wun yi lak a lum wu dâ hi yute yikî tofini fə̀n Sòlomùn. Biyani ngwàk yinâ kəta wùt lè wù chyâ Sòlomùn ywo wi yikî wuni. ³² À bè hì mô a Yènfù tuk wu saku, ghɨt a Ninifì bê timi ma ghɨ hi ngane ngwàk yinâ beka ghɨna tì yu yikî Jonà kahi a təm a ghɨna sùbe. Ngwàk yinâ kəta wùt lè wù chyâ Jonà, kahe wi təm a ghɨna a sùbe.” ³³ Jisòs fî kaha jis ha ghɨna na, “Wùt tà timi dan lâm hi baŋ a kà. Wù dan, wù tum a lùk wu ngaŋtenu, shyəma à hi lye nâbi nde a ndâ wu yen ban yi tɨni. ³⁴ Se ya mò te lâm a wò wùn. Se ya shìki mô a jûŋ, ma wun wa wù jɨ̀m hi mô nì bani. Biyani se gha ki fêf, ma wun wa nê hi mô finâ. ³⁵ Ghàn hi tôknè kə ban ye ghàn kəta nê kahi a yi fîn. ³⁶ Wun wa wù jɨ̀m hì kəta yi bân, ma fini hi fê bu atɨ̂n, ma wu nê hi bana kəbi te lâm a wu yu afa ghɨ dana mihe, yi hì bana ha wò.” ³⁷ À ndùku mô te Jisòs jìsa mihe, wùt à Falàsî wùlè jis ha wun na, wù ben ma ghê wûn yê yə a wun a bɨn. ³⁸ Wùt à Falàsî we hì mô nì kani hi yen na Jisòs ti yə teka wù su wo. ³⁹ Bâba ki jîs ha wun na, “Ghàn ghɨt a Falàsî, ghàn lyè kaŋ wanu nì bom sanisu, ghàn tôk su kə jumsu tɨnsu, biyani tɨna atɨna mô ma ghɨ lun kə nì gha be. ⁴⁰ Ghàn mò kə nâ wù ngwò ghɨ̂tù! Ghàn kwàktè na Yènfù tì fati kə jumsu tê fate jə̀ fùtɨ̂n ma? ⁴¹ Ghàn hi fô fihe mwə̀ me ghàn kəta ha ghɨt a fufana nì təm a jûŋà, ma nâbi ghə hi mô nì yulînì ha ghàn.” ⁴² “Ngə̂k yì chìk mò ha ghàn ghɨt a Falàsî, beka ghàn lyè nâbi mwə̀ mù tetamù me mù fwo a ghàn a fùk, ghàn jyâtì luktu ìwûm ghàn lyi bâh à mòk ghɨ fo ha Yènfù, nê wi gha ghe ghɨ mô chilichili ha ghɨt ale, kəta wi kôŋì ha Yènfù, ghàn hi nê gha ghɨ̂n de wijə yile.” ⁴³ “Ngə̂k yì chìk mô ha ghàn, ghɨt a Falàsî, beka ghàn kòŋà hi yèn a ndâ su chintesu kwoka ndokò kə ashyə̂, fê fwo yênà wu fwəh, ghàn hi kôŋà na ghɨta hi nyiŋa bê toŋte ha ghàn. ⁴⁴ Ngə̂k yì chìk mô ha ghàn, a ghàn mò te tusî te ghɨ gumà ghɨta atɨ̂n, teka lem chwena, ghɨta gbê chyâ a tû khə wi.” ⁴⁵ Chichà wùlè jis ha Jisòs na, “Chichà, wò jìsà gha ghɨ̂n sûlè nâbi ghàh.” ⁴⁶ Jisòs jis ha ghɨna na, “Ngə̂k yì chìk mò kəbi ha ghàn, chichàsu saksu, beka ghàn tòktè na ghɨta hi nê gha ghe, ghɨ ta ghaka ghɨna, ghɨna bêkà ghɨ jîtà kə ni, kôŋà wi hi gàmtì nâbi fùjiti. ⁴⁷ Ngə̂k yì chìk mô ha ghàn ghe ghàn bwɨma Sîtù fòktìsù chiksu se bì ghana tì ywite. ⁴⁸ Yi chwûtè kə nâ na ghàn tòkàlò gha ghe bì ghana ndùku nê, beka ghɨna tì ywite fòktì mu se, ghàn ghɨ hì ba Sîtù ghɨna tu.” ⁴⁹ Kum ni, ye ghɨ toŋte na, ‘Tof wu Fùyènù’ jis na, ‘Wù nè tumalò fòktìsù chiksu nì ghɨt a tuma ha ghɨna, ma ghɨna nê ywiti ghɨna, ma fo ngə̂k ha ghɨna.’ ⁵⁰ Kum yìna, mbyê chin yina bè fòktè jwo ghɨna kum mu luŋ mù fòktìsù chiksu sù jɨ̀m se ghɨ ywite, hi yìmì kə te ghɨ tì fate mbyî, ⁵¹ hi yìmì a Abèl hi kwok à tàn a Sàkàliyà we ghɨ tì ywi a faklu su baŋ nì luk we wu lye a ndâ Fùyèn. Mu jìsà ha ghàn na ngwàk yinâ bè fòktèlò jwo ghɨna ha Yènfù. ⁵² “Ngə̂k yì chìk mò ha ghàn chichàsu saksu beka ghàn ti letì chwok ghe ghɨ chwoka jwo yi tofi, nâ ghàn bè lye wi atɨ̂n, fê tâmtè ghɨt ghe ghɨ khɨŋa hi lye a ndâ yi tof afân.” ⁵³ À hì mô te Jisòs lô a ndâ afû, chichàsu saksu ghê ghɨt a Falàsî yîmì hi tè fumhe wûn, bufte agha dona, ⁵⁴ jîsà, tama hi kwo jyə̂ wûn, hi khɨte wûn.

¹ À ndùku mô te Jisòs lo afû, ghɨta hi yûŋtè bê ha wûn nâ hidù ghɨ mô hi tè jèlè ale a chyə̂, wù yîmì hi tè jìs ha jùmtìbàmsu wunsu na, “Ghàn hi tôknè nì ghɨt a Falàsî ghɨ̂n ghɨ kama nê gha ni, chyəna ghɨna mò te fùshìk atɨ̂n à ban a kwaŋa.” ² Ghàn hi khə na shyə ale wijə a ghe ghɨ baŋa, ghɨ bè faŋa hi ŋakhî, kəbi we ghɨ lete ghɨ bè khɨlelò. ³ Kum ni, nâbi yìni gha te ghàn nyamte jîsà, yi bè fwolò a ndan, ghɨ bè taŋa fòktèlò gha ye ghàn nyamte jîsà wu wən. ⁴ “Sun samsu, mu jìsà ha ghàn na, kə ghàn hi fânà ghɨt ghe ghɨ mô hi ywi kə chyak a wùna, biyani fê kəta wi gha yile hi nì yi bàm atɨ̂n.” ⁵ Mu tè fòktèlò we ghàn kəta hi tè fàn. Ghàn hi fânà kə Yènfù. A wun we wù kəta jyaka hi ywe ghàn, fê kəta a jyak hi lèm a ghàn a wu wùs. Mu jìsà ha ghàn na, ghàn hi fânà kə wûn! ⁶ “Ba ghàn bəkle mbwu mù tân kə fu katà ni, biyani ma Yènfù wi hi yìtà nâ fù mòk. ⁷ Nâbi nyuŋ sasu tusu mò, Yènfù khə te su mô. Kə ghàn hi fânà beka ghàn kokne chyâlò, mbwu mù nâ hidù.” ⁸ “Mu jìsà ha ghàn na, a chwùtì nâbi nde a ghɨta ashyə̂ na yi mò wut à mù, ma Wâ Wùt bê boŋà timi anjèlsù Fùyènsu ashyə̂, ma wù jis na wù mò wut à wûn.” ⁹ Biyani à mana nâbi nde mu a ghɨta ashyə̂, ma Wâ Wùt bê boŋà mana wûn a anjèlsù Fùyènsù ashyə̂. ¹⁰ “Yènfù bè lehèfo lò nâbi nde we wù jìsa gha be kum Wâ Wùt, biyani ma wù bê tè lehèfo jə̀ wùt we wù jìsa gha be kum Yohnà Yulena.” ¹¹ “Ghɨ bè khɨte yênàlò nì ghàn a ghɨt a saka ndâ yùŋtì, kə ghàn nê hi kana mbyî kum nì gha ye ghàn nè jîsà, kə ghàn hi kana na ghàn nè jîsà nâ ghə agha, ¹² beka Yohnà Yulena nè fòktèlò gha ye ghàn nè jîsà kə yu afû.” ¹³ Wùt lè atɨ̂n à nòn afû jis ha Jisòs na, “Chichà, jìs ha wâ nôm na wù jyati mwə̀ me bom tì de ha ghàh ma wù fo mâmù.” ¹⁴ Jisòs fîsì ha wun na, “Ghɨ tà chwôk jə mu na à mò mu wùt we mu nè jyâhè gha yîn ha ghàn,” ¹⁵ Jisòs fî jis ha nôn ghe na, “Ghàn hi tôknè kum se fwona, beka chyəna wûtà wijə kə kum mwə̀ mù dô me wù kəta, wù kôŋ wù hi kəta nâbi yàni.” ¹⁶ Chîn, Jisòs ma ngàn yinâ na, “Wùt chìk wùlè ndùku kəta a fûk ma mwə̀lû ti kwok atɨ̂n nâ jûŋ, ¹⁷ wù buf ha ngɨŋ à wûn na, ‘Mu nè nê ghə nì mwə̀ munâ ni, kəta wi luku hi lèm atɨ̂n agha?’ ¹⁸ Wù fî kaha jis kə a wun a ngɨŋ na, ‘Mu ti khɨli gha ye mu mò hi nì. Mu nè shàktèlò ndâ sîn ma mu kahà ba su chiksu, ma mu nê lem mwə̀ munâ atɨ̂n, nì nâbi ghə ghe mu kəta. ¹⁹ Ki jîs ha ngɨŋ à wûn na, Jwòf à tû, wò kəta lò mwə̀ mù jùŋ hi yə nâ wu yu dâ. Wo dɨ̂ŋhè chyə kə yi chyə̂. Wo yə̂, nyô fê saŋlê.’ ²⁰ Biyani Yènfù jis ha wun na, ‘Ngwòna shyə ale, wò nè kpo lò lân ntuksu ma à bê yə nde mwə̀ mâ muna a wò bakte lema ha ngɨŋ ya agha?’” ²¹ Jisòs jis mihì jyana, “À mò te yi bè hì mô ha wùt we wù bakte lema mwə̀lû ha ngɨŋ à wûn, bu a shyə ale a Yènfù ashyə̂.” ²² Jisòs jis ni, kaha jis ha jùmtìbàmsù wunsu na, “Mu jìsà ha ghàn na, kə ghàn hi kana mbyî kum nì chyəna ghana. Kə wùt hi kana mbyî na yi nè yə ghə agha nâbi nì wunu, nâ yi nè mâkà ghə agha.” ²³ Beka yohnà wûtà chyàlò mwə̀ mù yə̂mù, wunu wûtù chyâ njusu. ²⁴ Ghàn yen lê ngwòngwòtù. Ghɨna fètà wi mwə̀ mù yə̂mù, kpo wi jìŋ, kəta wi saŋkwàsù nì tantu hi yane mwə̀lû atɨ̂n, biyani Yènfù yəhe ghɨna. Nâbi ghàn tà yen jə na ghàn chyàlò nyɨ̀mû? ²⁵ Wùt wi hi dàbhè yu wunu wu kpu nâ hakoh njwo wù kana mbyî. ²⁶ Ghàn shìki bu hi nè fu ghalà te fùna ni, ghàn hi kana mbyî kum nì gha ale njwô ghə? ²⁷ Ghàn ke yen te flawà ləma kwoka bwuslò. Wù tà yê timi fet jə shyə ale kəbi hi taha sù nju hi màk. Mu jìsà ha ghàn na, nâbi fə̀n Sòlomùn a wun yi ghak nâ yì jɨ̀m ndùku lafa tânà wi te flawà yìna. ²⁸ Yènfù shìki tê labhe flawàsu a ghə̀n sîn ni, a se su bè hì mô yi bîs ma ghɨ təm à nyok a wu wùs, ma fu nê labhi yàni ghàn agha, bimî yani tobte ghə ni? ²⁹ Kə ghàn hi fumhe kwâk tanitu na ghàn nè yə ghə, ma ghàn nyu ghə agha. ³⁰ À nyiŋa ghɨt a mbye yi bàm yi mwə̀ afân, biyani Bì wânù khəlò na ghàn khɨŋalò mwə̀ mù tɨ̂n. ³¹ Ghàn bɨlà mô hi khɨŋa jùŋ à fə̂n wù Fùyènù a nyə̂ ma fu nê fo kpenhi mwə̀ munâ ha ghàn. ³² “Kə ghàn hi fânà, kəbi te nôn ghana tobte, beka Bì wânù ti kôŋ ghàn fo luk wu wunu tu fə̀nù ha ghàn. ³³ Ghàn bəkli mwə̀ mânù ma ghàn fo ka tɨnu ha ghɨt a fufana. Ghàn fati bàlì se su wi hi bêf ma lem nâbi ghə atɨ̂n, a me mù bu hi mì ma lema a nyə̂ afa ghɨt a chwoŋana wi hi yè tàn hi lyì, fulu bu hi yè tàn afû hi kut a bobhî. ³⁴ Ghaki wûtì mò nâbi afa, to wuna hi mô kə afû.” ³⁵ Jisòs fî jis ha jùmtìbàmsù wunsu na, “Ghàn bakti ngɨŋ sanisu hi nì yi fêt, ghàn ndan lâm sanisu ma ghàn hi yutê ³⁶ te ghɨt a fetana ghe ghɨna yute bì fèt à ghɨna na wù kahà kolo wu lùk wu malanu ma jimi jwo nda nâbi wùni yu te wù kùmte. ³⁷ Bì fèt ki kaha kolô ki yen ghɨt a fetana wuna kə̂kà ma saŋlînì hi mô ha ghɨna. Mu jìsà ha ghàn hamok na, ma wù nê ni ma ghɨna ndoko wu lùk wu yənu ma wù fati ngɨŋ à wûn ma wù chyahi mwə̀ mù yə̂mù ha ghɨna. ³⁸ Wù ki bên, ntênàsê makə wu yu afa tuku yula bênà, yen ghɨna kə̂kà ma saŋlî yi chiki nê hi mô ha ghɨna. ³⁹ Ghàn hi khə na, bè ndâ shìki khə yu we wùt wù chwoŋana mò hi bèn, wù wi hi dè na wù bê khɨm ndâ wûn. ⁴⁰ Nâ ghàn kəta hi tè mò nâbi wùni yu gbûtè beka Wâ Wùt bè bênà wu yu afa wùt lè kwàktè wi na wù bè kaha bênà atɨ̂n.” ⁴¹ Bità buf ha Jisòs na, “Bâba, wò ma ngàn yina kə ha ghàh ma, wò ma ha ghɨt à jɨ̀m agha?” ⁴² Bâba fîsì na, “Wùt wù fètana we wù ywo ha bì fèt à wûn fê tofâ mò wùni? À mò we bì fèt à wûn bu hi yèn a yi gbî, wu lem wûn ashyə̂, wù fo a jyak ha wûn shyəma wù nê hi tôknè nì ndâ wûn, fo mwə̀ mù yə̂mù ha ghɨta a wu yu afa ghɨna khɨŋa.” ⁴³ Wùt fètana àtɨ̂n hi saŋlê a wu yu afa bì fèt à wûn kaha bena yen wûn, wu nê gha ye wù tì jìsa. ⁴⁴ Mu jìsà ha ghàn hamok na, yi ki gân ni, ma bì fèt à wûn nê lem wûn ma wù hi tôknè nì mwə̀ mù wûn nâ mù jɨ̀m. ⁴⁵ Biyani wùt fètana àtɨ̂n ki ndokò kwàktì a wun a ngɨŋ na, bì fèt à wûn nè chyətelò shyəma wù kahà kolo, ki yîmì hi tè sama mwəlà me mù fètà a ndâ, sama mwəlà mù lɨmà, sama mwəlà mù ywên fê yə chyâhè, nyu mu lûk, mu kwo wûn, ⁴⁶ ma bì fèt a wûn bê kahà ben tuk wule wu yu afa wù kwàktè wi na wù nè kaha bê atɨ̂n, ma wù nê fo ngə̂k ha wûn nâ haŋaŋ, ma wù chinti wûn nì nôn à ghɨ̂t ghe ghɨ tà bimi jə Yènfù. ⁴⁷ Wùt wù fètana we wù khə gha ye bì fèt à wûn khɨŋa, faŋ hi fate wu wun hi nì yini, ma ghɨ nê sam wûn nâ haŋaŋ. ⁴⁸ Biyani wùt we wù khə wi gha ye wù nè na ghɨ nê sam wûn haŋaŋ, “Ma ghɨ nê sam wun kə fùjiti. Ghɨ fo nâ nâbi nde hidù ma ghɨ nê hi kaha khɨŋa kəbi hidù ha wûn, ghɨ ki samhe nâbi nde hidù, ma ghɨ nê hi khɨŋa nâbi hi fye hidù ha wûn.” ⁴⁹ Jisòs jîs ha jùmtìbàmsù wunsu na, “Mu ben hi kpà wu wus a ghɨta fùtɨ̂n. Nde fo na wu hi mô ma wu hì bamê! ⁵⁰ Mu kəta hi khɨte yi lûm a chyə̂. Gha tɨni fo ngə̂k ha mu nâ haŋaŋ, mu jə̂mà na yi bê chya! ⁵¹ Ghàn kwàktè na mu ben a ghàn a fùtɨ̂n na ghɨta hi chyə a bonà ma? Yi wijə yâ. Mu bɨ̀li ben nì jyàhè wùna. ⁵² Hi yìmì chîn, yi sah yi nda afa yi kəta ghɨt a tân, yi jyàhè ghɨt a tât nô ghɨt à bà, ghɨt a bà nô ghɨt a tât. ⁵³ Ghɨna jyàhè bì nô wâ wûn wù lɨmà, nì nô wâ wûn wù ywên, nâ nè lɨm nô ywê wan.” ⁵⁴ Jisòs ki jîs ha ghɨt à jɨ̀m na, “Ghàn yen a mbàksù a bàh afa yuchwî lye atɨ̂n, nâbi wùni yu, ghàn jis na wuli yi hì bê, yi ben kə yâ”. ⁵⁵ Fî yu te fufa bènà a bàh a nchwô, nâbi wùni yu, ghàn jyan na tùmà nè hì suktèlò, yi nê hì mô kə yâ. ⁵⁶ Ghàn ghɨt ghɨ̂n a kam kama nê gha ni! Ghàn khə hi fòktì te bɨna nè hì mô, Njwô ghə te ghàn yena khɨle wi gha ye Yènfù nè chin agha? ⁵⁷ “Njwô ghə te ghàn yena khɨle wi a ghàn a sù ngɨŋ gha jûŋ ye Yènfù kəta hi nì chin hi bimî? ⁵⁸ Wùt ki lyê wò hì yèn nì wò a lùk wu saku, wo mômhì na ghàn à wûn fati wu lûm, à hì bu yani, wù lye yen nì wò a wùt sak ashyə̂, ma wù sak wò ma wù fo wò ha ghɨt ghe ghɨ fâ ghɨta a ndâ chyâk, ma ghɨ lem wò a ndâ chyâk. ⁵⁹ Mu jìsà ha wò na, yi ki gân ni, ma wò nê faŋ a ndâ chyâk afû hi tàn wu tuk afa wò bè lâkà mihè ka tɨnu nâ wù jɨ̀m.”

¹ À ndùku mô kəbi a wu yu afû, ghɨt ale afû fwu ben fôktì ha Jisòs kum ghɨt a Galìlî ale te Balèt tì ywite lyi luŋ mù ghɨna chîntì nì luŋ mù sù nyam se ghɨ tì sete hi fo te yi fô. ² Jisòs buf ha ghɨna nâ, “Ghàn kwàktè na ngə̂k yîn tì kwoti ghɨt a Galìlî ghɨ̂n ni beka ghɨna ndùku mô ghɨt a be chyâ ghɨt ale ma? ³ Yi ndùku wijə yâ nâ hakoh, biyani mu jîsà ha ghàn na, ghàn ki fâŋ hi kahe təm ghana a ghàn a gha be ma ghàn à jɨ̀m bê ləha kəbi yâ. ⁴ Ghàn fê kwakti gha ye yi tì gàna ha ghɨta njwò fama. Ndâ ti ye ghɨ tì ba ghɨ toŋte na Silàm, yi dàfà kə ni tì fên ywiti ghɨna nâ à jɨ̀m. Ghàn kwàktè na ghɨna tì nilô besu chyâ ghɨt à jɨ̀m a Jèlusalèm ma? ⁵ Yi wijə yâ nâ hakoh, biyani mu jìsà ha ghàn na, ghàn ki faŋ hi kahe təm ghana a ghàn a sùbe, ma ghàn bê ləha kəbi ghàn à jɨ̀m.” ⁶ Jisòs ki mâ ngàn yîn ha ghɨna na, “Wùt lè ndùku kətalò kâk fù wùmfu a wun a fùk te wù yome, hì yênà yu mù jɨ̀m hi yen na fu ti mù tamu agha, biyani yena wi tamu atɨ̂n nâ hakoh.” ⁷ Wù ki jîs ha wùt à wûn wù fèt na, ‘Mu ti ben a sah à fùkàk afan kə yùŋ a yùŋ a wu lɨ̀m wù tât tê yena jə̀ shyə ale a tô àtɨ̂n, gbèt à màka funfu, njwô ghə te fu bobhe chyəfu halô agha?’ ⁸ Wùt fètana àtɨ̂n fîsì na, ‘Bâba, dè kə funfu a lɨ̀m afân, ma mu nê chɨm à kat sah yi tɨni ma mu lem mbaŋfu a sah àtɨ̂n’. ⁹ Tamu ki mo atɨ̂n a lɨ̀m à benana ma ghɨ de funfu, biyani fu ki faŋ hi mù ma gbet à màka. ¹⁰ À ndùku mô wu tuk wu lak wule, Jisòs lye a ndâ chìnti yìlè hì yike ghɨta. ¹¹ Wùt ywên wùlè mô afû ma yohnà be ti fo ngə̂k ha wûn a wu lɨ̀m njwò fama, wù guma faŋ hì bu hi lòtè gbì chilichili. ¹² - ¹³ Jisòs yen wûn ni toŋa wûn, wù fwu bên. Jisòs nâhì a wô kum wûn, jis na, “Wùt ywên, wò ti bonâ, bonlò.” Kə wu yu tɨnu, wù timi gbî chilichili hi bəmhe kokhe yênà nì Yènfù. ¹⁴ Biyani to ndâ chìnti ghê hì bâŋhè wu lâ beka Jisòs tì chwuk wùt a ghɨna tuk wu laku, wù ki jîs ha ghɨta na, “Tuk mâhù mù fèta mù mò tufa a ngâm, ghàn kəta hi bèn na ghɨ chwuk ghàn a mu tuk afân a bu wu tuk wu laku.” ¹⁵ Bâba fîsì na, “Fùshâŋ, ghɨt a kama ne ghɨ̂n! Nâ wùt lè làwû a ghàn a fùtɨ̂n, a wù mò hi dè nyàm à wûn hi yèntì na yì nyu mòlû a tuk wu laku agha? ¹⁶ Wùt ywên wunâ mò wùt a yi sah yi nda bè ghàhnà Ablàhâm ma Satàn ti kwut ghâŋtà wûn a wu lɨ̀m njwò fama, ma ghɨ faŋ hi yèntè wûn a tuk wu laku agha?” ¹⁷ Te wù jìsa ni, bànàsu wunsu wumî. Ghɨt a dona fwu hi saŋle kum gha kanana à jɨ̀m ghe wù ndùku nê. ¹⁸ Jisòs ki buf ha ghɨta na, “Fə̂n wù Fùyènù mò te ghə? Mu mò hi fə̀k à wunu nâ nì ghə? ¹⁹ Wu mô kəbi te sêlà fu ngwìk fùkàkfu lefu ghɨ toŋte na mostà, te wùt tì yome a wun a fùk, fu ləma kwôk ha fùkàk, nyɨ̀mû ben hi bâ ndasu ghɨna su a tô tu kpoŋ tu tɨntu.” ²⁰ Jisòs buf kpenhi na, “Mu fè fəknà fə̀nù nì ghə? ²¹ Wu mô kəbi te fùshìk fe wùt ywên lyè lêmà a mu kwùŋ mù kwaŋ nâ hidù fu gbi kùŋ mù tɨ̂n nâ mù jɨ̀m.” ²² Jisòs chyâ hì gbê yênà a Jèlusalèm tohna yi tèk yi tèk yike ghɨta. ²³ Wùt lè buf ha wun na, “Bâba, ghɨt ghe ghɨ bê bônà bè hì tobte kə ni ma?” Wù jis kə ha ghɨt à jɨ̀m na, ²⁴ “Ghàn momhi nì jyaka hi tohna yi jwô ndâ falani hi lye lùk wu fə̀n wù Fùyènù. Mu fòktè ha ghàn na ghɨt a dona bè khɨŋalò hi lye atɨ̂n, biyani ma yi tâ ghak ghɨna.” ²⁵ Yu kpene bê lò, ma bè ndâ nê lòte à fa jwo ndâ, ma ghàn timè faŋ a bɨn, ma ghàn hi kûmtè jîsà na, ‘Bâba, jìmi jwo nda ha ghàh,’ ma wù fisi ha ghàn na, ‘Mu khə wi na ghàn lô afa agha.’ ²⁶ Ma ghàn ki yîmì hi tè jìs na, ‘Ghàhnà ndùku yə fê nyô amok, wo fê yike a ghàh a tù tèk.’ ²⁷ Biyani ma wù fê jis na, mu jis na, mu jìsà ha ghàn hamok na mu khə wi na ghàn lò afa agha? Ghàn lô a mu jwô nda, ghàn ghɨt a be ghɨ̂n! ²⁸ Ghàn bè yenalò Ablàhâm nì Isìk nì Jakòb nì fòktìsù chiksu sù jɨ̀m wu lùk wu fə̀n wù Fùyènù ma ghàn hi luŋle jyê ma ghɨ ti fa de ghàn a bɨn. ²⁹ Ghɨta bè fwo bê a bûlà tu mbyi tù jɨ̀m ma ghɨ ndoko hi yə̂ wu lùk wu fə̀n wù Fùyènù. ³⁰ Mu jìsà na, “Ghɨt ghe ghɨ mô yi bàm chîn bè hì mô ashyə̂, ghe ghɨ mô ashyə̂ chîn, bê hì mô yi bàm.” ³¹ Kə wu yu afû, ghɨt a Falàsî ale ben yen Jisòs jis ha wun na, “Wò kəta hi lò afân beka fə̀n Helòd khɨŋa hi ywe wò.” ³² Wù jis ha ghɨna na, “Ghàn yê fokti ha sòŋà ye na, ‘Mu jùmà fihelò yohnù be lân fê chwuka hi bè tàn yi bîs. Ma hi mô yi bàm atɨ̂n, ma mu ki mihè fêt yi mi.’” ³³ Jisòs kaha jis ha ghɨna na, “Nâbi te yi mò ni, mu kəta hi tè yèn nì fêt yì mi ashyə̂ lân nì yi bîs hi yaka shyəma mu bê tan a Jèlusalèm beka fòktì wù chìk kəta ki hi kpu kə a Jèlusalèm.” ³⁴ Wonê, ghàn ghɨt a Jèlusalèm, ghàn tì ywiti fòktìsu chiksu tumli ywiti ghɨt ghe ghɨ tì tuma ha ghàn! Mu ti mômhì a mu yu, a mu yu, hi yùŋtè ghàn te nè ngwû yè yûŋtè wana wuna, a wun a tù ghà. Biyani ghàn ti tet kə yi têt! ³⁵ China ni, Yènfù ti tum mâkà tèk yani. Mu jìsà ha ghàn na ghàn bè fè yena wijə mu, bu kə na a bè hì mô wu tuk afa ghàn jìsa na, ‘Bônì mò ha wùt we wù bênà a Bâba yi yet.’

¹ À ndùku mô wu tuk wu laku wule, Jisòs lo yen a wùt lè ndâ à mô kəbi to ghɨt a Falàsî hi yə̂, ghɨt ghe ghɨ ndùku mô afû lem yi se a wun wu wùn nâ haŋaŋ. ² Wùt lè mô wun ashyə̂ yafa nì kùhà. ³ Jisòs ki buf ha chichàsu saksu nì ghɨt a Falàsî na, “Saki bimelò na ghɨ chwuk wùt wu tuk wu laku ma, yi tunhelò?” ⁴ Biyani ghɨna china kə moŋ. Jisòs kum wùt àtɨ̂n, chwuk wûn, jyan na, lô ma wò hi kolê, ⁵ ki kaha buf ha ghɨta na, “À mò nde a ghàn a fùtɨ̂n à wâ wûn makə nyàm à wûn ki fen a yi be yi mòli wu tuk wu laku ma wù faŋ hi fihi kə wu yu agha?” ⁶ Ghɨna hì kəta wi gha hi jìs. ⁷ Jisòs ki yen ghɨt ghe ghɨ laka na ghɨ ben a wu lùk wu yənu afû, ghɨna bên hì khɨŋa kə hi ndòkò wu lùk wu ngaŋtenu. Wù tobhi ghɨna na, ⁸ “Wùt ki lâkà wò na wò ben a wu lùk ma ghɨ yə malâ, wò bên, kə wò ndòko a wu lùk wu ngaŋtenu beka à làhi tè mò ma wù ti lâkà wùt lè wu kokne chyâ wò. ⁹ Ma wù lyi ma wù jis ha ghàn à jɨ̀m na, ‘Lòti fo luku ha wùt wunâ.’ Ni, ma wò nê wumi hi lòtì hi ndòko wu lùk wu tetanu. ¹⁰ Wùt ki lâkà wò, wò yên, wò bɨlì ndokò wu lùk wu tetanu shyəma wù nê lyê jis ha wò na, ‘So mù, kokti bi ndòko wu lùk wu ngaŋtenu afân.’ Ni, ma wò nê hi ngaŋtê ha ghɨt ghe ghɨ mô a wu lùk wu yənu afû. ¹¹ Nâbi nde we wù kokhe ngɨŋ à wûn a nyə̂, ma Yènfù nê chwohi wûn a chyə̂, ma nâbi nde we wù lye ngɨŋ à wûn a chyə̂, ma Yènfù nê kokhi wûn a nyə̂.” ¹² Jisòs kaha jîs ha wùt we tì wù làka wûn na, “Wò hì lâkà à ghɨ̂t na ben a wo lùk wu gha nâbi wùni yu, kə wò làka kə sun sasu nì wana na, nì ghɨt gha ghɨ sah yi nda nì ghɨt a chik ghe ghàn à ghɨna chyə bakhe, beka ghɨna nè boŋa lâkàlò wò a ghɨna gha, ma kahà lak wò. ¹³ Wò lyi gha ya, wò bɨlì lâkà wù fèf nì ghɨt a fufana, nì ghɨt a ngəhana, nì ghɨt a kəblena.” ¹⁴ “Wò ki nî ni ma bônhìnì ben ha wò beka ghɨna bè kahà lâkà wijə wò. Ma Yènfù bê lak wò wu tuk afa ghɨt ghe a chyə chilichili a wun ashyə̂ bè kahà lôtè a yi kpû.” ¹⁵ À hì mô te wùt le atɨ̂n à nòn afû ywo gha ghɨ̂n ni, wù jis ha Jisòs na, “Saŋlînì bè hì mô ha ghɨt ghe ghɨ bè yə wu lùk wu fə̀n wù Fùyènù!” ¹⁶ Jisòs jis ha wun na, “Wùt lè ndùku kəta bin yi chiki lâkà ghɨta, ghɨ dô kə ni. ¹⁷ Yu kpên, wù tum wùt à wûn wù fèt na wù gbê fokti ha ghɨt ghe wù tì làka na ghɨna ben beka ghɨ ti fati mihì gha à jɨ̀m. ¹⁸ Biyani ghɨna yîmì kə wù mòk wù mòk hi lona wu lûm. Wùt ashyə̂ jis na, ‘Mu ti yun fukà kəta hi yè kinâ. Ndù ma chyati ba wâ na kə wù bàŋhi lâ.’ ¹⁹ Wùt lè jis na, ‘Mu ti yun mbòŋsù ìwûm na su fêt fûk a ma, mu yè hi mòmhè sù sîn. Ndù chyati ba wâ na kə wù bàŋhi lâ ha mu.’ ²⁰ Wù yen ha wùt lè, wù jis na, ‘Mu bè wi beka ghàh à ywê mù ti kwuk malâ kə ni.’ ²¹ Wùt fètana wùna kaha yen fôktì gha ghɨ̂n ha bì wûn wù fèt. Lâ baŋ wûn, wù jis ha wan àtɨ̂n na, ‘nyàŋhi fwu ndù a lumtu tatu nì tu tetatu yi tèk ma kumtè ben nì fèfù we wu mô afû nì ghɨt a fufana nì ghɨt a ngəhana nì ghɨt a kəblena.’ ²² Wùt fètana àtɨ̂n yen kaha ben jis ha wun na, ‘Bèbɨn, mu ti ni nâbi ghə ghe wò jìsa, biyani ndâ tà lun jə̂.’ ²³ Ni, bè wûn wù fèt fî jis ha wun na, ‘Fwu ma wò yen a lumtu fùktù nì lumtu tetatu a nki ghɨt ghɨ̂n mò hi tè mò atɨ̂n ma wò laka ghɨna ma ghɨ ben ma ndâ mì tahi lûn. ²⁴ Mu jìsà ha wò na, nâ wùt nè mômà wi shyə yəna atɨ̂n à ghɨ̂t afa mu ye laka ghɨna ti têt yâ.’” ²⁵ À ndùku mô te wù lo hì gbê yênà, nôn à ghɨ̂tà lô hì jûmtè yênà wûn. Wù kahi bɨnhì wu wun jis ha ghɨna na, ²⁶ “Wùt kpene wi hi tè mò jùmtìbàm à mì a bu kə na wù kòŋàlò mu chyâ te wù kòŋà bè wûn nì nè wûn nì ywê wûn nì wana wuna nì wana ne wuna, nâbi nì ngɨŋ à wûn.” ²⁷ À faŋ nâbi nde hi bèkà kâkfùtàfù wun fu hi jùmtè mu, wù wi hi tè mò jùmtìbàm à mì. ²⁸ Kî, à mò nâbi nde a ghàn a fùtɨ̂n a we wù khɨŋa hi ba ndâ yì chìk ki faŋ hi ndòko hi khɨli na yi nè lyê afa ka hidù hi mìhè ndâ yîn atɨ̂n agha? ²⁹ Wù ki faŋ hi nì ni biyani lem a chyə ndâ, faŋ hi ba mìhè ndâ àtɨ̂n ma à nê hi chyâ nâbi nde wu lûm yena chəka yê nì wûn, ³⁰ jîsà na, ‘Wùt wunâ ti yîmì ba hì bu hi mìhì.’ ³¹ Bu ni, à mò wùni fə̀n wù bakte hi shika yi woŋ ghê fə̀n wù wùlè kəta kə ghɨta yi wòŋa kam ìwûm, ma wù faŋ hi ndòkò hi yên nâ ghɨt ghɨ̂n ta kpenelò hi nò ghɨt a fə̀n wùlè we kam mbà agha? ³² Wù ki yen na wù wi hi mòm, ma wù tum ghɨt a tuma ma ghɨ yê yen fə̀n wùlè we, wu baha yê bè hadà, hi fate gha tɨni. ³³ Yi mô kəbi yi ghəl te nâbi nde a ghàn a fùtɨ̂n we wù tê faŋ hi dè nâbi ghə te wù kəta ma wù hi bu hi tè mò jùmtè à mì. ³⁴ “Ghàn hi khə na mbaŋfu jwòfàlò, biyani ma fu shìki fê tofa wi, ma ghɨ nê ni nâ ghə na fu fê tof agha? ³⁵ Fu nè hì jwôfà wi na ni gha yile atɨ̂n, bu kə na ghɨ suh à màka. À tofa nâbi nde wù hi tòkà yutê.”

¹ Tuk lefu tuku yû, ghɨt ghe ghɨna ndùku kâtà ŋwàklànà nì ghɨt a be ale, chîntì à jɨ̀m hì yênà a Jisòs a ngwùŋ, hi ywo yikî wuni. ² Ghɨt a Falàsî ale nì chichàsu saksu yen ni hì dùmlè njaŋa jîsà na, “Wùt wunâ bimelò na ghɨt a be hi bênà a wun a ngwùŋ, fê yə nâ nì ghɨna.” ³ Jisòs ki mâ ngàn ha ghɨna bufa nâ: ⁴ Wùt ha ghàn shìki kəta njyə̀sù wu wə, yì mòk ki ləhà ma wù ni ghə? Yi gan ni, ma wù de sule se mbulamòk njwò bulamòk a ghə̀n ma wù hi gbê khɨŋa yênà yì mòk shyəma wù nê yen. ⁵ Wù ki yên, ma wù nê hi saŋlê nâ jûŋ, ma wù beka yinì a wûn yi wôm ⁶ ma wù kolò toŋa sunsu wunsu nì ghɨt ale ghe ghɨ khə wûn ma wù jis ha ghɨna na, ‘Ghàn ben ma ghàhnà ghɨ̂n hi saŋlê beka mu ti yên njyə̀ mì ye yì tì lèhne, gha tɨni ti jwôf ha mu nâ jûŋ.’ ⁷ Mu jìsà ha ghàn na, yi mô kəbi ni a nyə̂. Saŋlînì làwû a nyə̂ kum nì wùt wù be wù mòk we wù kahe təm yi wuni, kaha ben ha Yènfù chyâ ghɨt a dona ghe ghɨna chyə chilichili fê kwàktè wi na ghɨna kətalò hi kahe təm a ghɨna. ⁸ “Nâbi ni, wùt ywên wùlè shìki kəta ka wunu te wù lèma wu ləhà, ma wù ni ghə? Yi gan ni, ma wù ndan lâm, ma wù yah ndâ ma wù fatè khɨŋ hi yè tàn a wu yu afa wù nè yena.” ⁹ Nâbi yini te wù yena ma wù toŋa sunsu wunsu nì ghɨt ghe ghɨ khə wûn, ma wù jis ha ghɨna na, ‘Ghàn ben ma ghàhnà hi saŋlê beka mu ti yen ka mu we wu tì lə̀ha.’ ¹⁰ “Mu jìsà ha ghàn na, wùt wu be wù mòk ki kahe təm yi wuni kahi yen ha Yènfù ma anjèlsù wunsu nê hi saŋlê kəbi yâ.” ¹¹ Jisòs tî fî fôktì kəbi na, “Wùt lè ndùku kəta wana wuna à bà, ¹² wù tetana jis ha bè wûn na, ‘Jyatì mwə̀lû bàba ma wò fo mâmù.’ Bè wûn jyâtì fo mù wûn.” ¹³ Tuk mù tê chyâ jə̀ mù sek, wan wù tetana we bəkli mwə̀ mù wûn nâ mù jɨ̀m yen yi gbî yi lak yile, nâ hadà, te wù ye tana afû, hì chînà chyə kə yi chyə̂, chînà yə kə yi yə̂ ka wunu. ¹⁴ Wu ghaŋ a ghâ milò. Jìŋ yì tâ kwo lak yi tɨni, wù hì fè kəta wi shyə ale hi yə̂. ¹⁵ Wù yen chyati hi tè fèt ha wùt lè yi lak afû. Wù tum wûn na wù ye hi kine kùnduku wunu a ngûn. ¹⁶ Wù yên hì fêtà, wùt lè fo wi shyə na wù yə. Wù hì jyê kə nâ na nde fo ma yi hi mô hi yə mwə̀ mù yə̂mù kùnduk muna agha. ¹⁷ Tofu wunu kaha bên, wù kwâktì, buf ha ngɨŋ à wun na, ‘Mu kpo yênà nì jìŋ afân ni njwô ghə? Bom kəta ghɨt a fetana, ghɨ dô kə ni, ghɨna yə̂ mwə̀ mù yə̂mù, mu ghakne ghɨna agha? ¹⁸ Yi jwôfà na mu lo kahà kolo ma mu yê yen bôm ma mu jis ha wun na, Bàba, mu ti ni be ha Yènfù, fî ni be ha wò. ¹⁹ Mu fè kpene wi ha wo wan. Lyì kə mu te wùt wâ wù fèt.’ ²⁰ Wù jis ni, lo kaha kolo yen ha bè wûn. “Bè wûn yen wûn wu baha bênà hadà, seni kwo wûn, wu nyɨŋ yên baŋli wûn.” ²¹ Wâ wûn wuna jis kə gha ye wù ndùku kwâktè na, ‘Bàba, mu ti ni be ha Yènfù, fî ni ha wò. Mu fè kpene wi ha wo wan.’ ²² Bè wûn jis ha ghɨt a wuna ghɨ fètana na, ghàn nyaŋhê ben nì njusu jûŋ sù ma labhi wûn atɨ̂n ma lihi chyakfu a wun a wô, ma tuŋ gwusu wùsu a wun a wù, ²³ fî jis ha ghɨna na, ‘Ghàn lyê ben nâ nì yaka chik ghe ma ghɨ se, ma ghàhnà yə tuk wu lan nì saŋlînì. ²⁴ Wâ mù wuna mò ma mu ndùku khə na wù ti kpû, à mò wûn afan ni, mô wu tâ. Mu chehì jîsà kə na wù ti ləhà yên, wù ti kaha bên.’ Ghɨna yîmì hì yə̂ saŋlê. ²⁵ “Gha yîn ndùku gânà ni, wâ wùt wuna wù ləmâ mô a fùk. Te wù ndùku kole bakhe bênà a bɨn, yu te ghɨ yema njàŋsù buka a mwə. ²⁶ Wù toŋa wan à bɨn wùlè buf ha wûn nâ, à gànà ghə a bɨn agha? ²⁷ Wù jis ha wun na, ‘À kaha ben wâ nâ. Ba wâ ti se nâ yaka chik ghe ha wûn beka wù kaha bena, mô kə nâ wun wu tâ.’ ²⁸ Wan wù shyə we bâŋhì wu lâ na yi nè fê lye wi a bɨn. Bè wûn fwu yên hì chyate wûn. ²⁹ Wù jis ha bè wûn na, ‘Mu ti fêt ha wò a wu lɨ̀m, wò jîsà yi ghâ ha mu, mu nê kə yì yîn. Biyani wò tà timi fo jə kə nâ wâ bwû na ghàh à sun samsu kut. ³⁰ Ma wan wâ wunâ yen hi bèn ma wù tî lyi ka wa yen bobhi ghê kpàlànù, wò wu hì mô chîn ma wò ti se nâ yaka chik ghe ha wûn!’ ³¹ Bè wûn ki jîs ha wun na, ‘Wâ mù, wò jìsà ni mô kə ghàh à wò nâ yu mù jɨ̀m, nâbi ghə ghe a mu kəta, à kəta wò ³² Yi yê hì jwôfàlò na ghàhnà yə tuk wu chik wunâ beka yi chehì kə̂kà na wâ nâ wunâ ti kpû, wu mò chîn mò kə nâ wu tâ, mu ndùku mô ma mu ti lem na wù ti ləhà. Wù ti kaha bên. Wo jyâna kə ghàhnà hi saŋlê agha?’”

¹ Jisòs fî fôktì màgân fu lefu ha jùmtìbàmsù wunsu na, “Wùt chìk wùlè ndùku kəta wùt fètana lem na wu hi kine mwə̀ mù wûn. Tuk lefu ghɨta hì bê jîsà ha wun na, wù bobhe kə mwə̀ mâ halô. ² Wùt chìk we toŋa wûn buf ha wun na, ‘Mu ywo na ghə ni kum wò? Chwùti ha mu te wò chehì fêtà, beka yu ti kpên shyəma wò de fêtì.’ ³ Wùt fètana àtɨ̂n hì kana nâ yi nè nê nâ ghə te bì fèt khɨŋa hi fihe yi a yi fèt agha. Yi kəta wi jyaka hi tè gbì chɨm a chyà luktu a wu kâ, wumê ghaka hi tè gbè lun a chyà. ⁴ À fî kaha jis kə wun a wun a ngɨŋ na, ‘Mu ti khɨli gha ye mu mò hi nì a yu afa ghɨ fihe mu a yi fèt ma ghɨta bê hi saŋlê hi fye mu a ghɨna sù ndâ.’ ⁵ Wù kwâktì ni, hì toŋa kə wùt wù mòk, wù mòk atɨ̂n à ghɨt afa ghɨ ndùku kəta fôlì ha bì fèt à wûn, ghɨna bênà. Wù shyə̂ bên, wù buf ha wun na wù kəta ghə hi làk ha bì fèt a mù agha? ⁶ Wù jis ha wun na, ‘Yi kəta kaŋ wu mgutu wu wə.’ Wù jis ha wun na wù ko lêŋì ŋwàklù ma wù nyaŋhê nyak na yi kəta kaŋ wu mgutu mtân. ⁷ Wùt kùmtena bên, wù buf ha wûn na wù kəta hi fo ghə ha bì fèt à wûn agha? ‘Wù jis ha wun na mu kəta hi fo bàlìsù wîtsù wu wə.’ Wù jis ha wun na wù ko ŋwàklù ma wù nyak na yi kəta hi fo bàlìsù mfama. ⁸ Bì fèt à wûn yen gha ye wùt fètana wuna ndùku kama nê hì bɨnhì lumu tofanu we wù ne gha yîn atɨ̂n.” Jisòs jis ni, ki jîs na, “Ghɨt a mbye tofalò wu lum afa ghɨna fate gha ghɨna atɨ̂n, chyâ wana yi bana.” ⁹ “Mu jìsà ha ghàn na, ghàn hi kwo sunsu nì ka wanu we wu bu hi bèn nì ngə̂k a yu afa wu me, ma ghàn bê hi kole yênà yi laka afa yi bè mê wi ma ghɨ bê fyi ghàn wo bwà.” ¹⁰ Wùt ki fate khɨte mwə̀ mù tetamù ma ghɨ bê fo mwə̀ mù chìk, ma wù fatè khɨti kəbi yâ. Wùt shìki bu hi khɨte mwə̀ mù tetamù, wò fo nâbi mwə̀ mù chìk ma wù tê fate khɨtî. ¹¹ Ghàn shìki mô ma yi ti ghak ghàn hi khɨte ghak yi mbyi, ma à bê fo nde kàntè ghak ha ghàn agha? ¹² À hì mô na wùt lè wi hi fo a shyə wuna na ghàn fatè lem, ma à bê fo nde ghana agha? ¹³ “Wùt wi hi tè mò wùt fètana ha ghɨt à bà. Yi hì mò ni ma wù nê hi bânà wù mòk, kôŋà wùlè; à hì bu yâ ma wù nê hi ngumle wù mòk, kehe wùlè. Wò wi hi tè fèt ha Yènfù nì ha ka.” ¹⁴ Ghɨt a Falàsî ale yû jis yîn kum ka hì chəka Jisòs beka ghɨna ndùku kôŋà ka. ¹⁵ Jisòs ki jîs ha ghɨna na, “À mò ghàn ghe a ghàn gbè kata chwûtè ha ghɨta na ghàn mò ghɨt a jûŋà, biyani Yènfù khə təm ghana. Shyə ghe ghɨta ke na ghɨ kpenelò mò te wu chyâklù a Yènfù ashyə̂.” ¹⁶ “Ghɨ bè hì gbê a Musìs sah à yì sak, fê gbê yi yiki fòktìsù chiksu hi kwoka chem a tuk wu Jon Fo Mòlû. Chîn ghɨ fôktè yênà tum yì jùŋ kum fə̂n wù Fùyènù, nâbi nde hì nô kə yi nô hi lye lùk wu fə̀nù afân.” ¹⁷ Biyani yi chwûtè wi na saki Musìs ti mî. Yi bonelò shyəma nyə nì chyə mi, chyâ te silàfu sakfu a làŋ à Fùyènà bê chyâ a chyə̂. ¹⁸ “À jùm nâbi nde ywê wûn, yen lyi wùlè, ma à hi mô na wù ti khɨm sak yi malani, wùt lɨmà wùlè lyi wùt ywên àtɨ̂n, ma à hi mô kəbi na wù ti khɨm sak yi malani.” ¹⁹ Wù jis ni, fî fôktì màgân fu lefu na, “Wùt wù chìk wùlè ndùku mô ma wù ti mak mwə̀ mù tù fə̀n, fê yəhe wun wu wunu nì nâbi ghə kə mu tuk mù jɨ̀m. ²⁰ A mô ni ma ghɨ ti ben lem wùt wù jɨ̀ŋana wùlè a wun a jwô bɨn, ghɨ toŋte na Lasalòs, wun wu wunu wù jɨ̀m mô wù jì. ²¹ Wu jə̂mà nâ na nde fo beka shyə yəna ha yi ma yi yə, kə nâ me mù chemle a chyə̂ a wùt chìk we baŋa yəna. Wu jîsà ni, busu bê la luktu wun tu yable tê. ²² Wù kpû, anjèlsù Fùyènsu lyi wûn yen lem a Ablàhâm a ngwùŋ. Wùt chìk we boŋ kpû, ghɨ gûmà wûn. ²³ Wù yen wu lùk wu ghɨt a kpona hì yena ngə̂k yì kanana afû, wù lôhì a se wuna ki yen Ablàhâm hadà Lasalòs mô a wun a ngwùŋ ²⁴ Wù toŋti wûn jis na, ‘Ablàhâm kwohi seni ha mu a bâ, ma wò tum Lasalòs ma wù tuŋ kə nâ wan à wô wûn a mòlû ma wu bê chemhi a mu yi jwô beka toŋu mu yima kə ni. Mu ywolò lûmì kanani atɨ̂n à wu wùs afân.’ ²⁵ Ablàhâm jis ha wun na, ‘Wan, khɨlî na wò ndùku yəlò jùŋ te wò ndùku baha mô a chyə̂, Lasalòs boŋa yena ngə̂k. Chin mò, wu mô yi yùtì ywo jùŋ afân wo boŋa ywo yi lûm. ²⁶ Nâbi ha kàn, foŋlana ale mò ghaka kə ni, a ghe ghɨ jyâhè ghàhnà, ma wùt lo a ghàh a bàh afân hì khɨŋa hi dàŋ à bèn afâ, ma wù tê yena jə̀ lumu, wùt ki lô afâ hì khɨŋa hi dàŋ à bèn ha ghàh, ma wù tê khɨlî hi dàŋ.’ ²⁷ Wù jî, jis ha Ablàhâm na, ‘Mu chyate wò a bâ te yi mô ni, kaha tum Lasalòs ma wù yen a bom a ndâ, ²⁸ ma wù yê tobhi wana noma kum nì gha yîn kə ghɨna bê boŋa lyi a nki ngə̂k afân. Ghɨna baha faŋ à tân.’ ²⁹ Ablàhâm jis na, ‘De ghɨna kətalò ŋwàklù sù Musìs sù ghê fòktìsù chiksu tì nyàka.’ Ghɨna yu ha ghɨna. ³⁰ Wù jis ha Ablàhâm na, ‘Ngàŋ a bâ, wùt ki lôtì a yi kpû yen ha ghɨna ma ghɨna nê kahi təm a ghɨna a sùbe.’ ³¹ Ablàhâm ki jîs ha wun na, ‘Ghɨna ki fâŋ hi yu gha ye Musìs ghê fòktìsù chiksu tì nyàka, ma ghɨna bê tê yû, nâbi wu yu afa wùt kahe yena ha ghɨna ma wù lòte a yi kpû.’”

¹ Jisòs tî jîs ha jùmtìbàmsù wunsu na, “Gha ghe ghɨ nê na ghɨta hi nê be wi hi faŋ hi gàn, biyani ngə̂k yì chìk mò ha wùt we wù nè na ghɨt ale njah lumu!” ² Yi jwôfàlò hi chuŋ a yi ti a wun wu mɨ̀, hi tum a màkà wun a jwô yì chìk chyâ shyəma wù ni na wan wù mòk atɨ̂n à mwəlà afân na wù ni be. ³ Ghàn hi tôknè ha ngɨŋ sanisu! “Wâ nâ ki nê be ha wò, wò njaŋti ha wûn, wù de gha tɨni, wo lehìfo wûn. ⁴ Wù ni gha be ha wò kəbi ghan à sek wu tuk, nê kəbi wùni yu ben chyati wò, jis na, yi bè fê mômà wi, wò lehìfo wûn.” ⁵ Ghɨt a tuma Jisòs kahi jis ha Bâba na, “Nì ma ghàh tôkà khɨti bimînì ha Yènfù!” ⁶ Bâba jis ha ghɨna na, “Ghàn hì kəta yi bimî yi tobte nâbi te yi se ngwìk yi mostà, ghàn làhi jìs ha kâk fun na fu chyâ lyê timi ma fu hi ləmnê atɨ̂n à jwò yì chìk, ma fu nê kə yâ.” ⁷ “Ghàn lem lê na wùt a ghàn a fùtɨ̂n shìki kəta wùt wu fêtà a wun a fùk ma wù chìnà nâbi sù bwû. Wù ki kaha kolo bèn a ngûn ma wù jis ha wûn na nyàŋhi bi yə ma? ⁸ Ba wù kolo bê ni, wo jis na wù kwuna njusu, wù khɨŋ shyə wu fo wò yəlò wu fî fo a shyə wo nyu lò shyəma nâ wûn boŋà yə ma wù nyu? ⁹ Wùt fètana àtɨ̂n wi hi tê ki na ghɨ fo yòŋnà beka wù nè kə fêt ye ghɨ ye jisa. ¹⁰ À mò ni te yi kəta hi tè mò ha ghàn. Ghɨ ki fo yi fêt ghàn nì mihì, ghàn lem na ghàn fet te wu kwôs, ghàn ni kə yi fêt ghàn yê hì kəta hi nì.” ¹¹ Jisòs lô hì fê yênà a Jèlusalèm lyi lum we wu tohne wu kpì nì Sàmaliyà ghê Galìlî, ¹² ben hì lye yênà kə yi tèk yile ni, ghɨt a kuhana ale ìwûm yen wûn afû timi kə hadà ¹³ toŋa jis ha wun na, “Bâ, Jisòs kwohi seni ha ghàh.” ¹⁴ Jisòs yen ghɨna jis na, “Ghàn yen ma ngàŋsù ndâ Fùyènsu kina ghàn.” Ghɨna fwu tan wu lum yen kə ma ghɨna ti tâ. ¹⁵ Wùlè atɨ̂n, te wù yena na yi ti tâ, kahi hì bəmhe yê nì Yènfù nâ jyə̂ yì tâ ¹⁶ te wù ye yena ye nì Jisòs ni, fen a wun ashyə̂ kuhi kə̂k yi wuni fo àyòŋnà ha wûn. Wùt wunâ mô wut à Sàmaliyà. ¹⁷ Jisòs ki buf na, “Mu ye chwuk ghɨta ìwûm, ghɨta bulamòk ti yen afa agha? ¹⁸ Ba yi mô na wùt ha ghɨna tà kwâktì jə hi kaha bè fo yòŋnà hi kokhe Fùyèn, a bu kə wùt à tum wuna agha?” ¹⁹ Te wù jìsa ni, ki jîs ha wùt à Sàmaliyà we na, “Lô ma wò yen a wo lùk. Bimî ya ti nî wò ti tâ.” ²⁰ Ghɨt a Falàsî ale buf ha Jisòs na, “Yènfù bè yîmè yini hi sak a fə̂n wù wunu?” Wù jis ha ghɨna na, “Chwena ale bè hì wijə hi chwùtì na fə̂n wù Fùyènù ti yîmì hi tè bèn ni. ²¹ Wùt bè jîsà wi na yen ke, a yìmè bê wunu ni, ghàn hi khə na Yènfù hì sakalò fə̂n wu wunu kə nâ ghàn a fùtɨ̂n chîn.” ²² Wù ki kaha jìs ha jùmtìbàmsù wunsu na, “Tuk mù bènàlò ghàn bè hì jyê hi yena Wâ Wùt kə nâ afu yulâ ni, biyani yena wi.” ²³ À bè hì mò a mu tuk mù tɨ̂n ma ghɨta hi jîsà na, ‘Wù mò a fokô, wù wunâ afân!’ Ghàn ki yû, kə wùt yen afû. ²⁴ Bên yì Wâ Wùt bè hì mô kə a ndan kəbi te wuli yè shihi mwàn, ghɨ yen kə te yi bana bûlà tu mbyi tù jɨ̀m. ²⁵ Shyəma gha mɨ ghɨ̂n gan, wù kəta hi yena ngə̂k a tu lûm tu dô kə ni, na ghɨt a mbyî mana wûn shyəma gha ghɨ̂n gan. ²⁶ Wâ Wùt bè shihi bèn ma gha hì gânà te ghɨ ndùku gânà Nuwà mu tuk. ²⁷ Ghɨta ndùku yə̂, nywô, lyê a ywên, lyê lɨmà, fê fo wana ha lɨm atɨna hi kwok a tàn a wu tuk afa Nuwà tì lye a bâŋ, kwuŋa bên ywiti ghɨt ghe ghɨ tì faŋa nâ jɨ̀m. ²⁸ Gha bè gânà kəbi wu tuk afa Wâ Wùt bè bênà kəbi te ghɨ tì gàna wu tuk nì Lôt. À ndùku mô a mu tuk afû ghɨta yə̂, nywô, yuna mwə̀lû, bəkle mwə̀lû, yome mwə̀lû, ba sù ndâ. ²⁹ À ndùku mô wu tuk afa Lôt fwo a Sodòm, Yènfù suh chwohi wusu a nyə̂ te fimi te mu kân, ywiti ghɨt ghe Lôt tì lo de nâ à jɨ̀m. ³⁰ À mò kəbi te gha bè hì mô a tuk afa Wâ Wùt bè bênà. ³¹ “Gha ghɨ̂n bè shihi gàn, wùt mô nâbi a tô ndâ, kə wù chwo hi lyè shyə atɨ̂n à ndâ shyəma wù tet. Wùt hì mô kəbi a fùk, kə wù fi kahi kolo a ndâ hi lyè a shyə shyəma wù tet. ³² Kə wùt nè yità gha ye yi tì gàna ha ywê Lôt. ³³ À mòmhi nâbi nde hi chìnà yohnà wuna, ma wù kpu, à màka nâbi nde yohnà wuna ma wù nê lem ghɨna. ³⁴ Mu jìsà ha ghàn na à bè hì mô mu tuk afû ma ghɨt à bà bê hi mô wu khɨ̀, ma ghɨ bê lyi wù mòk ma de wùlè. ³⁵ - ³⁶ Ywena bè hì gwô bana yi ti à bà, ma ghɨ bê lyi wù mòk ma ghɨ de wùlè.” ³⁷ Jùmtìbàmsù wunsu ki buf ha wun nâ, “Gha mɨ ghɨ̂n bè gânà afa a Bâba?” Wù jis ha ghɨna na, “Shyə kpona mò nâbi afa, à mò wu lùk afa ngùluŋu nè yûŋtè.”

¹ Jisòs tî fî ma kəbi ngàn yìlè ha jùmtìbàmsù wunsu yike ghɨna na ghɨna kəta hi tè jə̀m yu mù jɨ̀m bota wi. ² Wù jis na, “Tô sù sak ale ndùku mô yi tèk yile fânà wi Yènfù, lyê wi na wùt mò a shyə ale. ³ Ywê nkwû wùlè hì mô kəbi yi tèk afû, yênà a wun a ndâ tuk mù jɨ̀m, jîsà na, ‘Sak fyi to ma ha bànà mì.’ ⁴ Wù bê jîsà to sak ghɨ̂n bukhe kə yi bukhî. Te wù faŋa hì yênà kə yi yên, à be kaha kwâktì kə wûn hi kâtà sak atɨ̂n, nâbi te yi fànà wijə Yènfù, lyê wijə na wùt mò a shyə ale, ⁵ bu ni, ma bên yì wuni a mu ndâ yu mù jɨ̀m nê hi fo ngə̂k ma mu nê hi kəta wijə yutìnì.” ⁶ Bâba jis ni, ki jîs ha jùmtìbàmsu wunsu na, “Ghàn yu lê na to sù sak ghɨ̂n tì jis ni yàni bu chilichili agha. ⁷ À bɨlà mò lô hi faŋa Yènfù hi ywo jî ghɨt a wuna ghe wù mò ma wù ti chwokti ghɨ jyê ha wûn, ntuksu nì nchwì agha? Fu làhi tê wunhe kə yi wunhî ghɨna agha? ⁸ Mu jìsà ha ghàn na, Yènfù wunhe wi hi sak a fo sak yâ. Nâbi yâ Wâ Wùt bè shihi kaha bèn a mbye afân ma wù yen ghɨta ghɨ baha samhe ha Yènfù agha?” ⁹ Wù tì fî ma ngàn yìlè ha ghɨna ghe ghɨna ndùku ke ngɨŋsu ghɨna su na ghɨna mò chilichili, kehe ghɨt ale, jis na, ¹⁰ “Ghɨt ale à bà tî kwok lyi yen a ndâ Fùyèn hi jə̀m, wù mòk mô wùt à Falàsî, wùlè kâtà ŋwàklànà. ¹¹ Wùt à Falàsî we yen timi hanɨ̂ŋ hì jə̂mà, jyana, ‘Mu fo àyòŋnà ha Yènfù beka mu wijə ni te ghɨt ale ghe ghɨna nyâŋhè fye mwə̀ mù ghɨt halô, bu te ghê ghɨna khɨma saki, jûmtè wijə ywen a ghɨ̂tà. Mu wijə ni te wùt wunâ wù kàtà ŋwàklànà ni. ¹² Mu bama yi jwô a ghan à bà a ngâm, jyâtè mwə̀ mâmù wu bàh ìwûm, mu fo à mòk ha wò.’ ¹³ Wùt we wù ndùku kâtà ŋwàklànà yîmì hi jə̀m, timi kə hadà te kòŋ hi ke kwok a nyə̂ biyani lem wo wuna a ngàŋtù kwohe yi sên jîsà na, ‘Yènfù, kwohi seni ha mu, mu mò wùt wù be!’ ¹⁴ Mu jìsà ha ghàn na wùt mu we tì shihi kolo lye a wun a ndâ mô chilichili biyani wùt à Falàsî we kolo bu chilichili. Nâbi nde we wù kokhe ngɨŋ à wûn a nyə̂ ma Yènfù nê chwohi wûn a chyə̂, nâbi nde wù lye ngɨŋ à wûn a chyə̂ ma Yènfù nê kokhi wûn a nyə̂.” ¹⁵ Ghɨta ndùku lye bê nì mwəlà ha Jisòs na wù kum ghɨna ma wù bonhi ghɨna. Jùmtìbàmsù wunsu yen yâ hì njaŋa ha ghɨt atɨna. ¹⁶ Biyani wù toŋa mwəlà mù tɨ̂n jis na ghɨna ben, ki jîs ha jùmtìbàmsù wunsu na, “Ghàn de mwəlà ma ghɨna ben ha mu. Kə ghàn fi tamti ghɨna beka fə̂n wù Fùyènù kəta ghɨt ghe ghɨ mô te ghɨna. ¹⁷ Mu jìsà ha ghàn hamok na, à faŋ nâbi nde hi bimî fə̂n wù Fùyènù te wan wù bot ma wù bê tê lye jə̀ wu lùk wu fə̀nù tɨnu.” ¹⁸ Wùt wù tâ ghɨt a Jûs wùlè ki buf ha wun na, “Chichà wù jùŋ, mu mò hi nè nâ ghə hi khɨte bôn ye yi bè mê wi agha?” ¹⁹ Jisòs buf ha wun na, “Njwô ghə te wò toŋte mu na wùt wù jûŋ agha? Nâ wùt wù jùŋ wi a bu kə Fùyèn. ²⁰ Wò khəlò sak te tu jîsà na, ‘Kə wùt chyə nì ywê wùt makə nì lɨm à wùt, kə wò ywi, kə wùt chwoŋ, kə wùt timi bɨ̀n à sak yì fə̂m, ngumli bâ nì nâ.’” ²¹ Wùt tâ we ki jîs na, “Mu ti lem sak tɨ̂n hi yìmì ha wan wù bot.” ²² Jisòs yu ni ki jîs ha wun na, “Wò baha kətalò gha yì mòk hi nì, ndù bəkli mwə̀ mâ nâ mù jɨ̀m ma wò fo ka tɨnu ha ghɨt a fufana ma wò tahi khɨte ghaki a nyə̂. Wò ni yâ, wò ben jûmtì mu.” ²³ Wùt wù ta we yu gha ghɨ̂n ni, wun wu wunu bôt beka wù ndùku mô nâ wùt wù chìk. ²⁴ Jisòs ki wun ni ki jîs na, “Yi ta nâ haŋaŋ ha ghɨt a chika shyəma ghɨna bê lye lùk wu fə̀n wù Fùyènù! ²⁵ Yi bonelò ha nyàm à kwaŋ hi lye tohna a bùk à saka chyâ shyəma wùt wù chìk lye yi lak yi fə̀n wù Fùyènù.” ²⁶ Ghɨt ghe yu jis yîn ki buf ha wun nâ, “Yi hì mô ni, ma à bê bon nâ nde?” ²⁷ Wù jis ha ghɨna na, “Gha ye yi ghaka wùt yi bone kə ni ha Yènfù.” ²⁸ Bità buf ha wun na, ba wò ti yen te ghàh de mwə̀ mâhù hì jûmtè kə wò agha. ²⁹ Jisòs kahi fîsì ha ghɨna na, “Mu jìsà ha ghàn hamok na, wùt chin ma wù ti de bɨn a wuna, de ywê wûn nì wana ne wuna, kəbi bè wùn nì nè wûn, kəbi mwəlà mù wûn kum gha fə̂n wù Fùyènù, ³⁰ ma Yènfù nê kpenhi mwə̀ mù tɨ̂n ha wûn nâ hidù a chyə afân, ma wù bê hi kəta bôn ye yi bè mê wi a mbye afa yì bè bênà.” ³¹ Jisòs lyi lô nì ghɨt a tuma wuna njwòsù bà jis ha ghɨna na, “Ghàn hi khə na ghàhnà kwok a yênà a Jèlusalèm chin ni, nâbi ghə fòktìsù chiksu tì nyàka kum Wâ Wùt mô hi kpên. ³² Ghɨ nè lyê folò wûn ha tumu, ma ghɨna nyikhi wûn, ma ni gha wumena ha wûn, ma fê chwuli chwâmù à wun wu wùn. ³³ Ghɨ nê sam wûn nì wànsù ma khɨtè ywi wûn, ma à nê hi mô yi bàm mu tuk mù tât, ma wù kahà lòti a yi kpû.” ³⁴ Te wù jìsa ni, ghɨna tê khɨlî na wù jis nâ ghə agha, beka tof ye yi ndùku mô atɨ̂n à gha tɨna ndùku mô ma ghɨ ti lêt ha ghɨna. ³⁵ Te Jisòs ndùku bakhe yê a Jèlikù, wùt wu fèfana wùlè mô yi bi lumi lonâ. ³⁶ Wù yu te nôn à ghɨ̂tà chyàlà buf nâ, à gànà ghə agha? ³⁷ Ghɨ jis ha wun na a chyàlà Jisòs wâ wùt a Nasalì. ³⁸ Wù bwat jis na, “Jisòs Wâ Fə̀n Defìt, kwohi seni ha mu!” ³⁹ Ghɨt ghe ghɨ ndùku yênà ashyə̂ kântì wûn jîsà na wù china moŋ. Wù fî bɨlì bwat yen kə ashyə̂ jîsà kə na, “Wâ Fə̀n Defìt, kwohi seni ha mu!” ⁴⁰ Jisòs timi jis na ghɨ lyê ben nì wûn ha yi. Ghɨ lyi bakhi bên nì wûn a wun ashyə̂, Jisòs buf ha wun nâ, ⁴¹ “Wò khɨŋa na mu ni ghə ha wò?” Wù jis na, “Bâba, nê ma mu kahà yen luktu!” ⁴² Wù ki jîs ha wun na, “Bimi ya ti nî wò ti tâ. Kaha yen luktu.” ⁴³ Kə wu yu tɨnu, wù kahi yen tu luk lô hì jûmtè yê nì Jisòs, kokhe yênà nì Yènfù. Nâbi nde ndùku ywo gha ye yi gana, hì boŋa kokhe yê Yènfù.

¹ Jisòs yen lye a Jèlikù hì tohne chyâlà. ² Wùt lè mô yi tèk afû, a toŋte na Sàkiyòs, a mô to ghɨt ghe ghɨ ndùku kâtà ŋwàklànà, wu kəta wu kâ nâ jûŋ. ³ Wù hì khɨŋa hi yen a Jisòs, hì yena wijə beka ghɨta ndùku dô chyâhè, wu fê tumhe chyâhè. ⁴ Wù nyiŋ yen ashyə̂ kwok a tô fùkàk fu sikamò fù shyəma Jisòs shihi bèn hi chyà ma wù yen beka Jisòs ndùku yênà hi chyà lumu afû. ⁵ Jisòs ben tan afû ki kokhe a tô fùkàk afa Sàkiyòs ndùku mô atɨ̂n, jis ha wun na, “Sàkiyòs, nyàŋhi chwo bî, mu kəta hi chyə a wo ndâ lân.” ⁶ Wù nyâŋhì chwo ben hì mô nì saŋlînì hi lyè yèn nì Jisòs a wun a ndâ. ⁷ Ghɨta yen ni hì sunnê, fê njaŋa, jîsà na, “Wù ti shik jiki a wùt wù be a ndâ.” ⁸ Sàkiyòs lôtì timi jis ha Bâba na, “Kike, a Bâba, mu nè jyâtèlò mwə̀ me a mu kəta ghàh à ghɨt a fufana kə yi ghəl, à hì mô ma mu tì lehi wùt fyi a shyə wuna ma mu nê kaha fo mù kìk.” ⁹ Jisòs jis ha wun na, “Ghɨt a ndâ afan ti bôn lân. Wùna mò kəbi wâ Ablàhâm. ¹⁰ Gha ye yi tì ne na Wâ Wùt ben mò hi khɨŋa ghɨt ghe ghɨ lehne nì hi bònhè ghɨna.” ¹¹ Te ghɨta tì baha yute jîs yì Jisòs yê, wù ma ngàn ha ghɨna beka wù ndùku bakhe yênà a Jèlusalèm, ghɨna hi kwâktè kə na Yènfù khɨŋa hi yìmì hi saka fə̀nù a yu mefû. ¹² Jisòs ma ngàn yina jis na, “Wan tôk wùlè tî lô hì yênà yi gbî wu lùk wule, nâ hadà na ghɨ yê tuk wûn ma wù kahà bê sak bâh a ghɨna ghɨ laka, ¹³ wù toŋti ghɨt a wuna ghɨ fetana ìwûm hì jyàtè bàlì wu kâ ha ghɨna jis na, ghɨna hi bəkle atɨ̂n hi tàn wu tuk afa yi bè kaha bênà.” ¹⁴ À ndùku mô ni, ghɨta bàh à lak afû bânà wûn. Wù lo ni, ghɨna tum na ghɨta yê jis wu lùk afa wù yènà na ghɨna kòŋà wi na wù hi saka ghɨna. ¹⁵ “Wù tì kaha ben ma ghɨ ti tuk wûn na wù hi saka ghɨt a wuna, wù ki jîs na ghɨ toŋti ghɨt a wuna ghɨ fetana ghe wù tì fo ka ha ghɨna yâ, ghɨna ben ma yi yu na ghɨna che bəkli mbì ti fwu yàni agha.” ¹⁶ Wù shyə̂ bên jis na, ‘Bâ, bàlì wu kâ yâ yê yì mòk ti ben nì mbì kam malàm.’ ¹⁷ Wù jis ha wùt wù fètana atɨ̂n na, ‘Wò ti nî kə nâ afû! Wò mô kə nâ wùt wù fètana wù jùŋ! Wò nè hì saka tu tèk ìwûm chîn beka mu ti yen na wò khəlò hi tòknà nì mwə̀ mù tetamù.’ ¹⁸ Kùmtê wùt wù fèt bên jis na, ‘Bâ, bàlì wu kâ yê yì mòk ti bên nì mbì kamsu tân.’ ¹⁹ Wù jis ha wun na, ‘Wò nè hì saka tù tèk tù tân.’ ²⁰ Wùlè bên jis na, bâ, à mò bàlì wu kâ yâ ye ni à mu tì kwute lema a bàh à sù njwo, ²¹ beka mu ndùku fànà wò. Wò mò ni bəmâ, khə hi lyè a shyə teka wò lem, ‘khə hi kpì teka wò yomi.’ ²² Wan tok we jis ha wun na, ‘Mu nè saka wò kə wu lum afa wò jìsa atɨ̂n. Wò mò kə nâ wùt wù fètana wù be! Wò ndùku khə kə nâ na mu bəmalò, lyê tì lèm, kpê teka mu yomi, ²³ à tì ni ghə na kə wò lem ka mu a ndâ wu kâ, ma mu nê ben hi lyì, ma mu lyê bakhi nì mbì agha?’ ²⁴ Wù jis ha ghɨt ghe ghɨ ndùku mô afû na, ‘Ghàn fyi kam ye ha wûn ma ghàn fo ha wùt we wù kəta kam se ìwûm yâ.’ ²⁵ Ghɨna buf ha wun nâ, ‘Kəbi ha wun agha a bâ! Ma wù hì kəta kamsu ìwûm agha?’ ²⁶ ‘Mu jìsà ha ghàn na, à hì kəta nâbi nde ma ghɨ nê fo kpenhi, à hi gha nâbi nde ma ghɨ nê fyi fu teta fê wù kəta. ²⁷ Ha bànà sam sê su chehì kânà na kə ghɨ tuk mu na mu hi saka ghɨna yâ, ghàn lyê ben nì ghɨna ma ghàn ywitè kə mu ashyə̂ afân.’ ²⁸ Te Jisòs jìsa ni, chya yen a ghɨta ashyə̂ hì kwoka yênà a Jèlusalèm, ²⁹ ni te wù ndùku bakhe yê a tu tèk tê ghɨ ndùku toŋte na Betfàs nì Betanì, a kùn ye ghɨ toŋte na kùn à sù Olìf, tum jùmtìbàmsù wunsu sùbà, ³⁰ jis na “Ghàn lyê yen a fùtɨ̂n à yì tèk afân a ghàn ashyə̂. Te ghàn nè hì lye yênà ma ghàn yen wâ jàkâs te ghɨ chuŋa teka wùt timè kwok a tû. Ghàn yên, ghàn yêntì ben nì yinì afân. ³¹ Ghàn yen hi yèntì, a buf nâbi nde ghàn jis na, ‘Bâba kətalò gha hi nì nì yinì.’” ³² Ghɨt ghe wù tì tuma yâ, lo yên, yen gha à jɨ̀m gan kə te wù ye jisa. ³³ Te ghɨna tì yèna yîmì hì yèntì, ghɨt ghe ghɨ ndùku kəta nyàm àtɨ̂n buf ha ghɨna na, “Ghàn yèntè jàkâs yina njwô ghə?” ³⁴ Ghɨna jis na, “Bâba kətalò gha hi nì nì yinì.” ³⁵ Te ghɨna tì jìsa ni, lyi ben nì yinì ha Jisòs yîmhì njumù ghɨna, kokhi Jisòs a tô àtɨ̂n. ³⁶ Jisòs hì yênà a tô nyàm afû, ghɨta chwokti njumù ghɨna mak wu lûm, Jisòs hì gbê yênà a tô àtɨ̂n. ³⁷ Te wù bakhe a Jèlusalèm hì chwo yênà a kùn à sù Olìf, nâ nôn à jùmtìbàmsù wunsu sù jɨ̀m hì saŋle kə yi saŋlî, kokhe Yènfù nâ nì jyesu tasu kum a gha kanana ghe ghɨna ndùku mô ma ghɨna ti yên. ³⁸ Ghɨna hì jîsà na, “Yutìnì mô ha fə̀n we wù bènà a Bâba yi yet. Yutìnì mô a nyə̂. Yènfù kəta yi kokhî wu lùk afa wu ngaŋte kpene!” ³⁹ Ghɨt a Falàsî ale ghe ghɨ tì gbê kəbi a nòn afû jis ha Jisòs na, “Kanti jùmtìbàm sa sîn a chichà ma ghɨna china moŋ.” ⁴⁰ Wù jis ha ghɨna na, “Ghɨna china kəbi yi chinâ ma te nê hi kokhe Yènfù.” ⁴¹ Te wù ndùku bakhe mihè yênà a Jèlusalèm ki yen nì tèk yi tɨni, seni kwo wûn, wù jî, ⁴² jis na, “À nè nê nde na ghàn, ghɨt a Jèlusalèm khɨli yutì yê yi bênà ha ghàn lân, chîn mò ghàn bu hi yên! ⁴³ Tuk mù be mu bakhe bênà ha ghàn. Bànà sanisu nè balò mbàn, ma yì jɨŋ à kat ghàn ma yì baŋ à kə yi bâŋ ghàn. ⁴⁴ Ma ghɨna bê chikhi ghàn à jɨ̀m bakhi nì mwəlà me mù mò a ghàn a sù ndâ. Ti bè faŋa wi a tô yile afân beka ghàn tà yen khɨli jə̂ yu we Yènfù bè hi bònhè ghàn.” ⁴⁵ Wù yen lye bɨn a ndâ Fùyèn yì chìk hì jûmà fihe ghɨt ghe ghɨ ndùku bəkle mwə̀lû atɨ̂n, ⁴⁶ jîsà ha ghɨna na, “Ghɨ nyak a ŋwàklù Fùyèn na, ‘Ndâ mì bè hì mô a ndâ jə̀mana’ biyani ghàn ti kahi chîn ha ndâ ghɨt a chwoŋana.” ⁴⁷ Jisòs yîmì hì yusa yikê a nda Fùyèn kə mu tuk mù jɨ̀m. Ngàŋsù ndâ Fùyèn su chiksu nì chichàsu saksu nì chəhsu lak su hì khɨŋa wu lum hi ywe wûn, ⁴⁸ biyani tê yena jə̀ gha ye ghɨna mò hi dàŋ atɨ̂n hi kwo wûn beka ghɨta ndùku mô kə wun a ngwùŋ ywo kə gha ye wù ndùku yike.

¹ Tuku yû tuk wule, Jisòs hì yike ghɨta a ndâ Fùyèn, fôktè tum yì jùŋ ha ghɨna. Ngàŋsù ndâ Fùyènsu chiksu nì chichàsu saksu bakhi nì chəhsu, fwu bên ² ki buf ha wun nâ, “Fôkti ha ghàh na gha ghɨ̂n wò nè ma jyaka lo afa agha?” À fo nde jyak ghɨ̂n ha wò agha? ³ Jisòs jis ha ghɨna na, “Mu ti boŋa bufalò gha ha ghàn. Ghàn fokti ha mu nâ, ⁴ à tì fo Fùyèn jyaka ha Jon na wù hi fo mòlû ha ghɨta ma, à tì fo à ghɨ̂t agha?” ⁵ Ghɨna kanti gha tɨni ha ghɨna sù ngɨŋ jis na, “Ghàhnà ki jîs na, ‘À tì fo Fùyèn jyaka ha wûn,’ ma wù buf na, ‘Ghàn tê bimî gha ye wù ndùku jîsà njwô ghə?’ ⁶ Ma ghàhnà ki jîs na, ‘À tì fo à ghɨ̂t jyaka ha wûn,’ ma ghɨt à jɨ̀m nê tumle ywiti ghàhnà nì te beka ghɨna ndùku lyê na Jon mò fòktì wù chìk.” ⁷ Te ghɨna kwàkte ni, jis kə na ghɨna khə wi luk we jyaka wuna tì lo atɨ̂n. ⁸ Jisòs ki jîs ha ghɨna na, “Nâ mu te boŋa fôktè wi luk afa mu lye jyaka hi tè nè gha ghɨ̂n atɨ̂n.” ⁹ Te wù jìsa ni, ki ma ngàn ha ghɨna à jɨ̀m na, “Wùt lè ti jîmì fûk à mu tama fo na ghɨta hi fêtà, jyâtè fo wun nì mwə̀ me mù fwo atɨ̂n. Wu fo ni, yen yi gbî yi lak yile hi chyə a wu yu dâ. ¹⁰ Yu kpenu kpên, wù tum wùt à wûn wù fèt wùlè na wù yê jis ha ghɨt ghe wù tì fo fûk ghe ha ghɨna na ghɨna fo tam wule ha wûn. Ghɨt a fetana atɨna yen khɨti wùt we wù tuma, sam jûm wûn, wù kahi kolô kə nì wo yumu. ¹¹ Wù fî tum kpenhi wùt wù fètana wùlè, ghɨna fî sam kə yi sâm wûn fî nyâblì nì wûn a lum wu wumenu fî jum wûn, wù lo kə nì wo yumu. ¹² Wu fî tum wùlè na à hi mô ghɨt à tât, ghɨna sam ləmhi wûn, chin fihi wun a fùk afû. ¹³ Bè fùk kwâktì nâ gha ye wù mò hi nì, jis kə wun a ngɨŋ na, ‘Mu nè tuma kə nâ wâ mù wù kòŋ yu lefu ma ghɨna yê fan wûn.’ ¹⁴ Wâ wûn we yên, ghɨna yen wûn jis na, ‘Wûn mò kə nâ yə̂ ndâ bè fùk wuna ni. Ghàhnà khɨtè ywi wûn shyəma ghàhnà kwoti mwə̀ me wù ndùku mô hi bè khɨtî.’ ¹⁵ Ghɨna jis ni, khɨti fwu nì wun a fùk afû yen ywilò.” Jisòs ki buf ha ghɨt ghe ghɨ ndùku yute ha wun na, “Yi ki gân ni ma bè fùk mu wuna hi mô hi nì nâ ghə ha ghɨt ghɨ̂n agha? ¹⁶ Yi hì mô yâ, ma wu bê ywiti ghɨt a fetana ghê, ma wù kahà lyi fùk à tɨna ma wù fo ha ghɨt a lô.” Jisòs mihì ngàn mi yinâ ghɨt ghe yuti ni, jis na kə Yènfù bè bime na nki gha yîn bê gan ha ghàh ni. ¹⁷ Jisòs ki ke ghɨna ni buf na, “Luk wu ŋwàklù Fùyèn wûn chwùtè na ghə, wu jîsà na: ‘Ti ye ghɨt a bana tì tuma maka yi ti kahi ha ti bûlà ndâ’ agha? ¹⁸ A damta nâbi nde yi ti bûlà nda afân, ma wù fen ma wù kati kə wu kòm a wu kòm ma yi fen nâbi a nde tû ma yi gwohi kə yi gwôhì wûn.” ¹⁹ Jisòs ma mihì ngàn mi yina, chichàsu saksu nì ngàŋsu ndâ Fùyènsu chiksu khɨlî na wù yê hì mâ ngàn yina kum ghɨna, hì mòmhè hi khɨte wûn kə yu mefû fî fan kə se ghɨ̂tà. ²⁰ Ghɨna lem yi se a wun wu wùn fî lem à ghɨ̂t a wun a yi bàm na ghɨna hi kama nê kə te ghɨna mò ghɨt a jûŋà, hì yute kə na wù jis gha ma ghɨ kwo wûn ma fo ha wùt à Lûm we wu ndùku saka bâh à lak mi ghê. ²¹ Ghɨna ki jîs ha wun na, “Chichà, ghàh khə na wò jîsà kə nâ hamok, yike kə gha ghe ghɨ mô hamok, chwûtè wi na wùt lè chyàlò wùlè, fate yike kə te sak tu Fùyèn tu mò. ²² Fòkti ha ghàh chîn nâ saki bimelò na ghàhnà mak ŋwàklànà ha Fə̀n wù chìk Sisà a Lûm, ma yi bimi wi agha?” ²³ Kə wu yu, Jisòs kwo tof yi ghɨna ki jîs na, ²⁴ “Ghàn chwùtê ben nì ka kahu ha mu ni.” Ghɨna chwûtì, wù buf na, “À mò lîŋhà nde atɨ̂n nì yeti agha?” Ghɨna jis na, “À mò yi kə̂k yi Sisà fə̀n wù chìk a Lûm nì yet yi wuni.” ²⁵ Jisòs ki jîs na, “Yi hì mô ni, ghàn hi fo mwə̀ mù fə̀n Sisà ha Sisà, fo mwə̀ mù Fùyèn ha Yènfù.” ²⁶ Yi ghak ghɨna, ghɨna tê yena jə̀ gha ye ghɨ mô hi khɨte wun a ghɨta fùtɨ̂n kum yini, jwo yim ghɨna, ghɨna china kə moŋ. ²⁷ Ghɨt a Sadùsî ben ha Jisòs, a mô ghɨt ghe ghɨ bime wi na wùt bè lôtèlò a yi kpû, buf ha wun nâ, ²⁸ “Chichà, ba Musìs tì nyak ha ghàhnà na, ‘Wâ nè wùt ki kpû, kəta ywi, biyani kəta wi mwəlà, ma wâ nè wùt kpona lyi wùt ywên àtɨ̂n, ma ghê wûn bwɨ mwəlà ha wâ nè wûn wù kpona we agha?’ ²⁹ Wana ne ale ndùku lâwû sàmba, wù shyə̂ lyi wùt ywên kpulò, kəta wi mwəlà. ³⁰ Jɨ̀m à wûn lyi wùt ywên àtɨ̂n fî kpu kəbi yâ.” ³¹ Kùmti fî lyî wùt ywên àtɨ̂n fî boŋ kpu kəbi yâ kəta wi mwəlà. Ghɨna à jɨ̀m ghe sàmba a ghɨna tì lye wùt ywên àtɨ̂n kputî mihì mwəlà bu, ³² shyəma wùt ywên àtɨ̂n bê boŋà kpu. ³³ “À bè hì mô wu tuk afu metì a ghɨ bè lôtè a yi kpû, ma wùt ywên àtɨ̂n bê hi mô ywê nde, beka wana ne wùt wù mòk ndùku kəta kə wûn kə ghɨna à jɨ̀m ha ywi agha?” ³⁴ Jisòs jis ha ghɨna na, “Ghɨt a mbyî chîn lyè a ywên, ywena bime à lɨmà, ³⁵ Biyani yi bè kwunalò ha ghɨt ghe a ghɨ kpene hi lòtì a yi kpû hi tè chyə te wù bênà. ³⁶ Yi bè hì mô yâ beka ghɨna bè fê kpo wi. Ghɨna bè hì mô kə yi ghəl te anjèlsù Fùyènsu, fê mô wana Fùyènà beka ghɨna ti lôtì a yi kpû. ³⁷ Nâbi Musìs ti chwûtì gha mi yîn na ghɨ lôhèlò ghɨta a yi kpû a lùk wu ŋwàklù Fùyèn we wu jîsà kum fukâk fe wusu bame atɨ̂n yani. À mò wu lùk wu ŋwàklù afân ma wù ti toŋti Bâba Yènfù na à mò fù Yèn fe Ablàhâm nì Isìk nì Jakòb ndùku ngumle. ³⁸ Yènfù wijə Yènfù ghɨt a kputena, fu mô Yènfù ghɨt ghe ghɨ chyə, ha wun ghɨt à jɨ̀m mò wu tâ.” ³⁹ Jisòs jis mihì chichàsu saksu lesu jis ha wun na, “Wò jìsà kə nâ a jûŋ ni a chichà.” ⁴⁰ Ghɨna jis yâ, nâ wùt wùlè wù mòk tà fî mômhì jə hi buf a yi gha ha wûn. ⁴¹ Wù ki buf ha ghɨna na, “Wùt ni mò yàni hi fè jìs na wùt we a ghɨ chwoka lema mò wâ Defìt agha? ⁴² Defìt nì ngɨŋ à wûn tî jis a ŋwàklù Sù njàŋ na: ‘Bâba Yènfù jis ha Bâba mù na, Ndòko a mu bàh à kpen wu wo ta ⁴³ ma wò hi yutê hi tàn te mu nè nê bànà sasu ma su lye a wo sah yì sak.’ ⁴⁴ À shìki mô ma Defìt ti toŋti wun na Bâba, ma wù hi fê mô yàni wan ha Defìt agha?” ⁴⁵ Wù yîmì hi tè jìs ha jùmtìbàmsù wunsu wu lum afa nâbi nde mò hi yû, jis ha ghɨna na, ⁴⁶ “Ghàn hi tôknè nì chichàsu sak sîn. Ghɨna kòŋà hi tè gbê chyâ nì dàlasu chiksu, fwo yê wu wən na ghɨta hi nyiŋa bênà toŋte ha ghɨna, yênà a ndasu chintesu, ghɨ kwok ndokò kə ashyə̂, ghɨ yena luk wu yənu ghɨ kwok ndokò kə lùk wu ngaŋtenu. ⁴⁷ Ghɨna kôŋà hi fye mwə̀ mù ywena nkwô kə mù jɨ̀m, biyani kama chwùtè na ghɨna mò ghɨt a jûŋà jə̂mà làtè. Yènfù bè folò ngə̂k ha ghɨna a tu lum hanɨ̂ŋ.”

¹ Jisòs ndùku baha mô kə a ndâ Fùyèn ki yen nì luk we ghɨ ndùku fo fotu atɨ̂n yen te ghɨta chika fo fotu ghɨna tu, ² yen kəbi te fufa ywê nkwû ale boŋa be fo katà fu wun fu. ³ Wù ki jîs na, “Mu jìsà ha ghàn hamok na, fufa ywê nkwû ghɨ̂n ti fo fo yi chyâ na fotu ghɨt ghɨ̂n nâ à jɨ̀m, ⁴ beka ghɨna ye fabti kə ka we wu dô ghakne ghɨna ben folò, biyani wùt ywên wunâ nâbi te wù fufa ni, ti fo mihì kə yi mihì katà fu wun fu kəta wi nâbi hi yə̂.” ⁵ Ghɨta hì jîsà kum ndâ Fùyèn, na ghɨ ti fati bâ nì te jûŋà fê jîsà kum mwə̀ mù jùŋ mùlè ghɨta fo na ghɨ lem a ndâ Fùyèn àtɨ̂n. Jisòs ki jîs na, ⁶ “Ghàn yena bɨn ghɨ̂n ni, yu khɨŋte bè lò shyəma ghɨ shyakti ndasu tɨnsu ma nâ ti yì mòk bê hi bu a tô yile.” ⁷ Ghɨna buf ha wun nâ, “Chichà, gha mɨ ghɨ̂n bè gânà a wùni tuku agha? Ghɨ bè shihi yìmì hi gàn, ma chwena bê hi mô ghə?” ⁸ Wù jis na, “Ghàn hi tôknè, kə wùt bê jìŋhi ghàn. Ghɨta bè hì bê lò, dô kə ni, ghɨna bênà jîsà na ghɨna bènà a mu yet. A bê nâbi nde jîsà na, ‘À mò kə nâ mu we ni!’ Fê jîsà na, ‘yu ti kpên chîn! Ghàn yu yâ, kə wùt yen a ghɨna yi bàm.’ ⁹ Ghàn bê ki yû na woŋtu ti yîmì, fî yu na ndùm sù ti yîmì, kə ghàn hi fânà na gokhini ti bakhâ beka gha ghɨ̂n kəta hi yìtà gàn ashyə̂.” ¹⁰ Te wù jìsa ni, fî jis na, “Lak tu bè hì nô lak tu letu, fə̂ntù nô tu letu.” ¹¹ Chyə bê hi senalò, ma jìŋ fê kwo kə a tu lùk a tu lùk. Yaf tê tu dâŋà bê hi fwô, ma chwesu bəmasu fwu a nyə̂ fânhè à ghɨ̂t. ¹² Ma gha ghɨ̂n bê shihi gàn ma ghɨ ti khɨti ghàn fo ngə̂k ha ghàn, lyi yen nì ghàn ashyə̂ yì sâk a ndasu chintesu lem ghàn a chyâk. Ghɨ bè lyê yênà nì ghàn a fə̂ntù ashyə̂ nì ghɨt a sakana ale ashyə̂ kum mu. ¹³ À mô kə wu tuk we ghàn bè fôktè tum à mì yì jùŋ ha ghɨna atɨ̂n. ¹⁴ Ghàn lem a ghàn a təm na ghàn bè kwâktè wi gha kum lum we ghàn bè fîsè gha ghe ghɨ bufte ha ghàn ¹⁵ beka nâ mu bè folò jîs yi tofani ha ghàn, wùt bê tê gàn hi tunhe gha ye ghàn jìsa. ¹⁶ Nâbi bì ghana nì wana ne ghana nì sun sanisu nì sah yani nda bè folò ghàn, na ghɨ hi nê gha mɨ ghɨ̂n ha ghàn ma ywiti ghàn ghɨ le. ¹⁷ Nâ ghɨt à jɨ̀m bè hì bànàlò ghàn kə kum mu. ¹⁸ Biyani nyuŋ yì mòk wi hi bè ləhà a ghàn a tû. ¹⁹ Wunhî yani bè nêlò ma ghàn kwoti yohnà ghana. ²⁰ “Ghàn bê ki yên ma sojàsù ti jɨ̂ŋ kat Jèlusalèm ni, ghàn khɨli na tuku ti kpên na bobhi Jèlusalèm.” ²¹ Yi gan ni, nâbi nde a Jùdiyà wu tet kwok a su kùn, ghɨta tet atɨ̂n à yi tèk afû. Wùt hì mô a fùk, kə wù kaha lyi a yi tèk afû. ²² Munâ mò mu tuk me Yènfù bè chə̂bhè ghɨta atɨ̂n te ghɨ ti nyàka, hi nì na gha ghɨ̂n à jɨ̀m a ghɨ tì nyàka lema a ŋwàklù Fùyèn na ghɨ kpen. ²³ Tuk mù tɨn bè hì bəma hanɨ̂ŋ ha ywen ghe ghɨ mô mu lâ nì ghe ghɨna lè mwəlà, beka lùmchuŋ, nì ngə̂k yì kanana bè hì mô ha ghɨna. ²⁴ Ghɨ bè sòlè ywiti ghɨna nì nywimù, ma ghɨ kwoti ghɨna ma yê lem ha wu kwòs kə bàh wù mbyi wù jɨ̀m. A mô kə te tumu tì yikte kə Jèlusalèm ni fî nyâblì nì ghɨna hi yaka te yu we Yènfù lèma ha ghɨna kwok à kpen. ²⁵ “À bè hì mô a wu yu mefû ma yuchwî chwuti chwesu, njoŋ nì njènû chwûtè. Jwò yì tâ bê hi nêkà fè dûmà bê nì lùmchuŋ a mbyî ma tu ghɨt à jɨ̀m bê fwu. ²⁶ Ghɨta fentê kum yi fân kum gha ye yi mô hi gàn a mbyî, beka mwə̀ me mù mò a nyə̂ bê hi nêkà. ²⁷ Ma à nê hi mô yi bàm yi tɨ̂n ma ghɨna yen Wâ Wùt, wu chwo bênà atɨ̂n à sù mbàk kəta jyaka nì ban yi chiki. ²⁸ Gha ghɨ̂n ki yîmì hi tè gàn nâbi wùni yu, ghàn lôhì tu wanu ki a nyə̂ beka yu wu bakhe bênà shyəma Yènfù yun tu wanu.” ²⁹ Jisòs fî ma gàn yina ha ghɨna jis na, “Ba ghàn yenalò kâk fù fikfù nâ nì kàk mùlè.” ³⁰ Ba futu tɨntu yàtàlò, tu yîmì nâbi wùni yu hi tè kaha tô, ghàn yen yâ ghàn hi khə ha ghàn a sù ngɨŋ na bɨ̀ŋ hì chwô bênàlò. ³¹ Yi mô kəbi yi ghəl te ghàn bè yena gha mɨ ghɨ̂n te ghɨ gânà. Ghàn yên, ghàn hi khə na fə̂n wù Fùyènù wu hi bakhe bênà. ³² “Mu jìsà ha ghàn hamok na ghɨt a mbye ghɨ̂n chin wi hi bè kpute mìhì teka gha mɨ ghɨ̂n gan à jɨ̀m. ³³ Nyə bè chyàlàlò, ma chyə chya, biyani ma gha bê tè kwuna atɨn à gha afa mu jìsa.” ³⁴ “Ghàn hi tôknè nì ngɨŋ sanisu, bu yani ma jwo yəni nì se mu lùkà nì lâ lumanu kum gha mbye ma ghɨ bukhi se ghana wu tuk afân ma wu bê bûŋtê kwo kə ghàn te a tâm. ³⁵ Yen lê bûŋhì ben yì tɨni ha ghɨt à jɨ̀m a mbye afân. ³⁶ Ghàn hi mô yu mù jɨ̀m, gbûtè kə yi gbûtì, jə̂mà na Yènfù fo jyaka ma ghàn bê timi a Wâ Wùt ashyə̂.” ³⁷ Jisòs yike a ndâ Fùyèn a mu tuk afu metì ni, tuku jyə̂, wù kwok chyə a tô kùn à sù Olìfs, ³⁸ à hì mô mbisìmbisi ghɨt à jɨ̀m yen yûŋtì a ndâ Fùyèn hi yute yikî wuni.

¹ À hì mô te tuk mù chìk kpene bênà hi yə bana kwaŋa chɨmlana bu atɨ̂n, ghɨ toŋte na hi Dàŋà Chyà. ² Ngàŋsù ndâ Fùyènsu chiksu nì chichàsu saksu hì khɨŋa wu lum hi ywe Jisòs, nyamte yi nyamtî beka ghɨna ndùku fânà ghɨta. ³ Satàn lye a Judàs yi təm we ghɨ ndùku toŋte na Ìskaliyòt, a mô kəbi wùt wù mòk atɨ̂n à ghɨ̂t a tuma Jisòs njwòsù bà. ⁴ Wù lo yen yen ngàŋsù ndâ Fùyènsu chiksu nì tu ghɨt ghe ghɨ ndùku chînà ndâ Fùyèn, sîhì lum we wù mò hi bəkle Jisòs ha ghɨna atɨ̂n. ⁵ Ghɨna hì saŋlê lem na ghɨ nè folò ka ha wûn. ⁶ Wù bimî, yîmì hi khɨŋa wu lum hi bəkle wûn ha ghɨna a wu yu afa ghɨta lo a wun à ngwùŋ. ⁷ Tuk we ghɨ ndùku mô hi se njyə̀su Dàŋa Chyala su atɨ̂n à mu tuk afa ghɨ ndùku mô hi yə bana kwaŋa chɨmlana bu atɨ̂n bên, ⁸ Jisòs tum Bità ghê Jon jis na, “Ghàn yê fati mwə̀ mù yə̂mù Dàŋa Chyalamù ma ghàhnà yə.” ⁹ Ghɨna buf ha wun na, “Wò khɨŋa na ghàh yê fati afa mwə̀ mù yə̂mù mù tɨ̂n agha?” ¹⁰ Wù fîsì ha ghɨna na, “Ghàn yuti, te ghàn nè hì lye yênà atɨ̂n à yi tèk yi tɨni ma wùt nê kwona ghàn à ghɨna ma wù ti bêkà khɨŋi mòli. Ghàn yen wûn, ghàn yen kə wun yi bàm, wù yen lyi kəbi yìni ndâ, ghàn lyi kə atɨ̂n, ¹¹ ghàn jis ha bè ndâ àtɨ̂n na, ‘Chichà buf na, Lûm à ndâ ghɨt a benana yê lâ ma mu tahi yə mwə̀ mù yə̂mù Dàŋa Chyalamù atɨ̂n ghàh à jùmtìbàm samsu agha?’ ¹² Ma wù nê chwuti lûm à ndâ yi ghaka kə ni ha ghàn a nyə̂, nâbi ghə ghɨ mô atɨ̂n ma ghàn fati mwə̀ mù yə̂mù àtɨ̂n afû.” ¹³ Ghɨna yen yen nâbi ghə ghɨ mô kə yi ghəl te Jisòs ye jisa, fati mwə̀ mù yə̂mù Dàŋa Chyalamù afû. ¹⁴ Yu kpên, Jisòs ben ndokò hi yə̂ ghê ghɨt a wuna ghɨ tuma ¹⁵ ki jîs ha ghɨna na, “Mu chehì jyê kə nâ yi jî hi yə̂ mwə̀ mù yə̂mù Dàŋa Chyalamù muna nì ghàn shyəma mu yen ngə̂k ma mu kpu. ¹⁶ Mu jîsà ha ghàn na, mu bè fè yə wi mwə̀ mù yə̂ muna nâ hakoh hi bè tàn a tuk afa gha yi yə yîn bè kwoka kpene a fə̂n wù Fùyènù.” ¹⁷ Wù lyi bòm fo àyòŋnà ha Yènfù fî jis na, “Ghàn ko lùk muna, ghàn jyàtê nyu. ¹⁸ Mu jìsà ha ghàn na, hi yìmì chîn hi yèn ashyə̂, mu bè fê nyo wi lùkû hi bê tàn a wu tuk afa fə̂n wù Fùyènù bè bênà.” ¹⁹ Wù lyi a ban a kwaŋa fo àyòŋnà ha Yènfù fî bəktilò fo ha ghɨna jis na, “Wùna mò wun wu mu te mu fo ha ghàn. Ghàn hi nê yìna ni, hi tè kwàktè mu.” ²⁰ Wù fî nì kəbi yâ ni bòm à mù lùk te ghɨ yə mihe fî jis na, “Bòm yinâ mò bòm à mu kàn mu fê te Yènfù baŋa nì luŋ mâmù lunhi na mù sùha ha ghàn.” ²¹ “Mu jìsà ni, wùt we wù nè bəkle mu wù mô kə nâ ghàh à wûn wu lùk wu yənu afân. ²² Wâ Wùt nè lô kə te Yènfù tì lèma, biyani yi nè hì bəma nâ haŋaŋ ha wùt we wù bəkle wûn!” ²³ Ghɨna yìmì hì bufa nâ, yinâ nki gha ni mò hi mòm à nde a ghàhnà fùtɨ̂n agha? ²⁴ Gufnânì tì lôtì a ghɨna fùtɨ̂n na, a mò nde we wù ngaŋte chyâ ghɨna à jɨ̀m agha? ²⁵ Jisòs ki jîs na, “Fə̂ntù mbyi tu kətalò jyaka, saka yikte kə yi yikî ghɨt a ghɨna, biyani khɨŋa na ghɨ hi toŋte ghɨna na gàmtìsù ghɨ̂tsù.” ²⁶ Yi kəta wi hi tè mò yani ha ghàn. Wùt ngaŋtena a ghàn a fùtɨ̂n kəta hi tè mò te wùt we wù tobte gokhe, wùt we wù mò a tû, mò hi tè mò te wùt wù fètana ha ghàn. ²⁷ Wùt ngaŋtena mô hi tè mò wun we wù ndòkò yə kə yi yə̂ ma, ma we wù chyàhè kə yi chyâhì agha? Ba à mò we wù ndòkò yə agha? Ha mu, mu mò a ghàn a fùtɨ̂n te wùt wù fètana. ²⁸ À mò ghàn ghe ghɨ faŋa kə yi fâŋ a mu atɨ̂n à tu mômhì, ²⁹ mu ti fô fə̀nù ha ghàn kəbi te Bôm fo ha mu ³⁰ shyəma ghàn bê hi yə̂ fê nyô a mu wu lùk wu yənu wu tuk te mu saka fə̂n wu mu. “Ghàn bè ndokò a mu kpòk mù tù fə̀n njwòsù bà, saka a te Isalì ghɨ̂n njwòsù bà.” ³¹ Jisòs fî toŋti Samùn jis na, “Samùn, Samùn, wò hi khə na Satàn ti chyati mu hi sèkà ghàn te ghɨ sêkà kùŋû ³² biyani mu ti jə̂m ha wò na kə bimî ya fen à mihi. Wò kaha bên ha mu, wo ni ma təm a wana na hi tâ.” ³³ Bità jis ha wun na, “Bâ, mu gbùtè hi yè chyâk ghàh à wò, hi fè kpû ghàh à wò.” ³⁴ Wù jis ha wun na, “Mu fòktè ha wò Bità na, Lɨm à ngwû nè shihi tôŋ lân ma wò ti mana mu a ghan à tât.” ³⁵ Jisòs fî buf ha ghɨna na, “À mò wùni tuku a mu ndùku tuma ghàn ka bu, bàlì bu, gwusu wùsu bu, ghàn tî gha shyə ale agha?” Ghɨna fîsì na, “Ghàh tà shyə ale tì gha jə̂.” ³⁶ Wù ki jîs ha ghɨna na, “Chîn, à hì kəta nâbi nde ka makə bàlì wu lyi lò. À shìki gha nâbi nde fâ wu bəkli waf a wuna wu yunlò. ³⁷ Mu jìsà ha ghàn na, gha ghɨ̂n ghɨ mô ma ghɨ ti nyak a ŋwàklù Fùyèn ghɨ kəta hi gàn ha mu. Ghɨ tì nyak na, ‘Ghɨ ti taŋ wûn te wùt wù mòk atɨ̂n à ghɨ̂t ghe ghɨ khɨma saki.’ Yi mô ni beka nâbi ghə ghɨ tì nyàka kum mu yi kəta hi gàn.” ³⁸ Ghɨna jis ha wun na, “Yen ke bâ, afân mô tufâ tù bà.” Wù jis ha ghɨna na, “Ghàn de yen.” ³⁹ Jisòs fwu yi tèk afû kwok à kùn à sù Olìfs, kəbi te wù ndùku kwoka, jùmtìbàmsù wunsu kwok a wun yi bàm. ⁴⁰ Ghɨna kwok tan afû, wù jis ha ghɨna na, “Ghàn jəm kə ghàn lye a yi mômhì.” ⁴¹ Jisòs jis yani lô a ghɨna ngwùŋ khɨŋti yen timi kəbi te wùt mò hi tum a yi ti ma yi yê chem, tum sù ngwuk a chyə̂ hì jə̂mà, jyana, ⁴² “Bâ mù, wò hì kôŋà wo fihi bòm à ngə̂k yinâ a mo wô. Nâ biyani, nì kə gha ye wò khə na yì kpenalò ha wò, kə wò ni yami.” ⁴³ (Kə yu tɨnu, anjèl à Fùyèn lo a nyə̂ ben fo a jyak ha wûn. ⁴⁴ Wù kwâktì ngə̂k yì chìk ye wù ndùku mô atɨ̂n, yi bəma chyâhè, wù fî tôk chyati yukhênà fwo a wun wu wùn, kə̂kà te mu luŋ chemle a chyə̂.) ⁴⁵ Wù jəm mihì lôtì shihi kaha yèn, yen jùmtìbàmsù wunsu bwunê te gha tɨni fo chyâhè ngə̂k ha ghɨna, ghɨna bôt. ⁴⁶ Wù jyan ha ghɨna na, “Ba ghàn mò na ghàn bwune kə yi bwunî agha? Ghàn lòti ma ghàn hi jə̂mà kə mômhìnì ben ha ghàn.” ⁴⁷ Te Jisòs ndùku baha jîsà kə yi jîs, nôn à ghɨ̂tà fwu ben, ashyə̂ mô Judàs, kəbi wùt wù mòk atɨ̂n à jùmtìbàmsù wunsu njwòsù bà. Wù khɨŋti ben hì khɨŋa hi baŋle Jisòs. ⁴⁸ Jisòs buf ha wun na, “Judàs, a wò jyana wò baŋle Wâ Wùt hi fo ha ghɨta agha?” ⁴⁹ À hì mô te ghɨt ghe a ndùku mô ghê ghɨna yena gha ye yi mô hi gàn, ghɨna buf ha wun na, “Bâba, ghàh kakli nì fâtù agha?” ⁵⁰ Kə ni, wùlè fihi yi fâ kak fihi tûŋla wo tâ wùt wù fètana à ngàŋ à ndâ Fùyènà yì ngaŋtena. ⁵¹ Jisòs kân jis na, “Kə ghàn fî mom; kə wu yu tûŋla tɨna ta kə yi tâ.” ⁵² A mô yâ ma ngàŋsù ndâ Fùyènsu chiksu nì tû ghɨt ghe ghɨ ndùku chînà ndâ Fùyèn yi ghakana nì chəhsu lak su ma ghɨ ye fwu ben hi khɨte wûn. Wù buf ha ghɨna na, “Ghàn fwu ben nì fâtù nì mbàŋsù te ghàn nyiŋa a wùt chwoŋana yi bàm njwô ghə? ⁵³ Ba mu chehì yusa kə ghàhnà tuk mù jɨ̀m a ndâ Fùyèn, ghàn khɨte wi mu? Nâ ha nkàn, à kpen kə nâ yu wanu a bè jyaka bɨn a finana saka atɨ̂n.” ⁵⁴ Te wù jìsa ni, ghɨ khɨti wun yen nì wun a bɨn a ngàŋ à ndâ Fùyèn yì ngaŋtena, Bità jûmtè yênà mô nâ hadà. ⁵⁵ Ghɨ yen kpa wusu atɨ̂n à bɨn hì yohâ. Bità boŋ yên ndokò chîntì ghê ghɨna. ⁵⁶ Wusu shihi bamî, wan wù ywên wùlè we wù ndùku fêtà a bɨn afû, yen te wù ndòkne a ngwùŋ à yì tê, wù duŋ ki kə wun ni, jis na, “Wùt wunâ ndùku boŋa gbêlò ghê wûn.” ⁵⁷ Bità tunhî jis na, “Wùt ywên, mu khə wijə wûn.” ⁵⁸ Ghɨ motì kə afu yulâ, wùt lɨmà wùlè fî yen wûn jis na, “Wò mò bi a wùt wunâ à nòn.” Bità bəm wûn jis na, “Yema, bə wunâ nyâ mu!” ⁵⁹ Mbɨŋlu yì mòk shihi chyà, wùt wùlè fî kûmtì jis kə na, “Yi mô kə nâ hamok na bə wunâ chehì gbêlò ghê wùt wunâ beka wù mô kə nâ wùt à Galìlî.” ⁶⁰ Biyani Bità fîsì jis na, wùt wuna jìsà na ghə ni? Te wù jìsà mihè yênà kə ni, lɨm à ngwû tôŋ. ⁶¹ Kə wu yu Bâba bɨ̂nhì ki yen kə Bità yi kə̀k, wù kaha kwâktì gha ye Jisòs ye jisa ha wûn na, “Lɨm à ngwû nè shihi tôŋ lân ma wò ti mana mu ghàn à tât.” ⁶² Kə wu yu, Bità fwo a bɨn ji nâ haŋaŋ. ⁶³ Ghɨt ghe ghɨ tì khɨte Jisòs shìki nyikhè wûn fê sama wûn, ⁶⁴ ma ghɨ ti kwut se wuna hì bufa ha wun na, “Fôkti lê na wò sam nde agha?” ⁶⁵ Ghɨna tî jîs gha dona ha wûn ghɨ yafa kə ni. ⁶⁶ Tuku yû, chəhsu lak su nì ngàŋsù ndâ Fùyènsu chiksu nì chichàsu saksu khɨti yi yûŋtì, ghɨ ben nì Jisòs ashyə̂ yì yùŋtì, ⁶⁷ ghɨna jis ha wun na, “Wò hì mô kə nâ Klistù we Yènfù chwoka, wò fôktì ha ghàh.” Wù fîsì na, “Mu fòkti nâbi yi fôktì, ma ghàn tê bimî, ⁶⁸ nâbi mu nè bufalò gha ha ghàn, ma ghàn tê fìsì. ⁶⁹ Biyani hi yìmì chîn hi yèn ashyə̂, Wâ Wùt nè ndòkò lò a Yènfù kpen wu wò ta, bè jyak à jɨ̀m.” ⁷⁰ Ghɨna chîntì buf kə à jɨ̀m na, “Ba yi ni mò na wò mò Wâ Fùyèn agha?” Wù fîsì na, “Yi mô kə ni te ghàn jìsa.” ⁷¹ Kum ni, ghɨna jis na, “Ghɨ fê khɨŋa nâ hi nè ghə nì bɨ̀n à sak, ba ghàhnà ti yû kə nâ a wun a yi jwô?”

¹ Kə wu yu, yûŋtì tɨni yì jɨ̀m lôtì lyi yen nì Jisòs ha Gòbnà Balèt, ² yîmì hi tè ngane wûn jyana, “Ghàh kwo wùt wunâ wù gbê lehe à ghɨ̂t a ghàhnà yi lak jîsà na, kə ghɨ hi mâkà ŋwàklànà ha fə̀n wù chìk a Lûm, fê mô kə nâ à mò yi we ghɨ chwoka lema na yi mò fə̀n.” ³ Ni, Balèt buf ha wun na, “Wò mò fə̀n ha ghɨt a Jûs?” Jisòs fîsì jyan na, “Yi mô kə te wò jìsa.” ⁴ Balèt ki jîs ha ngàŋsù ndâ Fùyènsu chiksu nì ha nôn à ghɨ̂t ghe ghɨ ndùku mô afû na, “Mu yena wijə gha be yile ye wùt wuna ne.” ⁵ Ghɨna hì kântè a ghâ jîsà na, “Yiki wuni bènà nì nô atɨ̂n à yì lak yi ghɨt a Jûs nâ yì jɨ̀m, hi yìmì a Galìlî hi bè tàn yi tèk afân.” ⁶ Balèt yuti gha mɨ ghɨ̂n buf na, wù mò ni a mô wùt à Galìlî? ⁷ Wù yu na Jisòs fwo a bàh a lak afa Helòd ndùku saka, jis na ghɨ kwok nì wûn ha Helòd beka wù ndùku mô a Jèlusalèm a mu tuk afû. ⁸ Helòd yen yen Jisòs hì saŋlê nâ jûŋ beka wù ndùku mô ma wù ti yu gha ale kum wûn hì chyə kôŋà hi yen a wûn na wù mom gha kanani yile ma yi yen. ⁹ Wù lyi wu yu bufte a gha ha Jisòs wù tê fìsì jə̀ nâ yì mòk. ¹⁰ Biyani, ngàŋsù ndâ Fùyènsu chiksu nì chichàsu saksu hì mô kə afû, kântè kə a ghâ ngane wûn. ¹¹ Helòd ghê sojàsu wunsu nyâblì nì Jisòs nyikhì wûn fî mak dàla yì jùŋ a wun wù wùn kaha tum wûn ha Balèt. ¹² À mò kə wu tuk afân a Balèt ghê Helòd kaha kwo sunu atɨ̂n beka à ndùku mò ni ghɨna bânnè. ¹³ Balèt toŋa ngàŋsu ndâ Fùyènsu chiksu nì ghɨt a tihena ale nì ghɨt ale ¹⁴ jis ha ghɨna na, “Ghàn ye ben nì wùt wunâ jis ha mu na, wù jɨ̀ŋhè à ghɨ̂t nê na ghɨna hi ta nì to. Biyani ba ghàn ti yen te mu bufte gha ha wûn kə nâ a ghàn ashyə̂ faŋ tè yena jə̀ gha be yile ye ghàn jìsa na wù ti nî. ¹⁵ Nâbi Helòd tà boŋ yen jə̂ gha beka wù ti kaha tum ben nì wun ha ghàhnà. Yi mô kə hamok na wù tà ni jə gha shyəma ghɨ ywi wûn. ¹⁶ Mu ti jîsà na, ghɨ sam à kə yi sâm ma ghɨ de wûn.” ¹⁷ (À ndùku mô yâ, a bê nâbi mùni tuk mù Dàŋa Chyalamù, ghɨt a Jûs chwok wùt à ghɨna wù kòŋ, Balèt fihi a ndâ chyâk.) ¹⁸ Te wù jìsà bê ni, ghɨna bwat kə jyə̂ yì mòk na, “Wù nè yenalò gha! Ghàh khɨŋa na ghɨ bɨlà fihi lô Bàlabàs.” ¹⁹ Yi mô ni, ma ghɨ tì lihi Bàlabâs wunâ a ndâ chyâk beka wù ti yìme nô yi tèk fî ywi wût. ²⁰ Balèt fî jis ha ghɨna beka wù ndùku kôŋà na ghɨ fihi Jisòs. ²¹ Biyani ghɨna hì bwate yè kə ashyə̂, jîsà na, “Ghɨ banti wûn a kàkfùtàfù, ghɨ banti wûn a kàkfùtàfù!” ²² Wù fî kûmtì buf, na à hì mô a ghan à tât na, “À mò kum ghə? Ghàn fokti gha be ye wùt wunâ ne. Mu tà yen jə̂ gha be ye ghɨ mô hi ywe wun atɨ̂n. Mu nè jîsà ma ghɨ sam à kə yi sâm wûn ma ghɨ de wûn.” ²³ Ghɨt ghe fî bwati yen kə ashyə̂ jîsà kə na ghɨ banti wûn a kàkfùtàfù. Yi ghak Balèt, ²⁴ - ²⁵ wù kat sak bimi na ghɨ banti Jisòs ma fihi wùt we ghɨ tì lèma a chyâk te wù fihe nô yi lak ywi wùt yâ, ma wù ya ni kə gha ye ghɨna yê hì khɨŋa. ²⁶ Ghɨ lo nì wûn shihi yên kwônà nì Samùn wùlè wu lûm a mô wùt à Sìlên, ma wù lo a sù ngûn hì kaha kolê. Ghɨ khɨti wûn fo kâkfùtàfù Jisòs ha wûn, kan na wù beka ma wù jumti Jisòs. ²⁷ Ghɨta fwu nâ hidù hì yênà a wun yi bàm bakhe nì ywena, ghɨ jyê yênà, khɨmte wu wun kum wûn. ²⁸ Jisòs ne kaha bɨnhì wu wun jis ha ghɨna na, “Ywena Jèlusalèm, kə ghàn fi ji mu, ghàn hi jyê ha ngɨŋ sanisu nì ha wan ghana.” ²⁹ Ghàn hi khə na tuk mù bakhe bênà lò shyəma ghɨta hi jîsà na, ‘Yi bɨlà mô a jûŋ ha kânù ywenu wù mô teka wu timè bwɨ wana, teka ghɨna yê timè nyoŋhi wan!’ ³⁰ Ghɨta bè hì jyê a mu tuk afû, jîsà ha kunsu chiksu na, ‘Ghàn fen a ghàh a tû, jîsà ha kunsu tetasu na, ghàn baŋ ghàh.’ ³¹ Ghɨ shìki jîf nì kâk fù yûfù te mu ni, ghɨ bê ni nâ ghə nì fu yima fu? ³² À ndùku mô yani, ghɨ yênà hi yè ywe wûn nì ghɨt ale à bà, a mô à ghɨ̂t ghê ghɨ ndùku khɨma saktu. ³³ À hì mô te ghɨ ye tana wu lùk afa ghɨ ndùku toŋte na Wok yi tu, ghɨ banti wûn a kàkfùtàfù afû fî banti ghɨt ghe ghɨna ndùku khɨma saktu yâ, banti wùlè a kàkfùtàfù a bàh a kpen wu wo ta, banti wùlè a kpen wu wo kôwì. ³⁴ Jisòs jis ha Bè wûn na, “Lèhifo ghɨna a bâ, beka ghɨna khə wi gha ye ghɨna nè.” Ghɨna lem njusu wunsu hi tuma kàŋ, a yə nâbi nde, lyê. ³⁵ Gha mɨ ghɨ̂n tì gânà ghɨta mô ke. Nâbi ghɨt ghe ghɨ ndùku tihe ghɨna hì chəktê kə wûn, jîsà na, “Wù chehì bònhè à ghɨ̂t, wù bònhi lê ngɨŋ à wûn chîn, a yu afa wù mò kə nâ Klistù we Yènfù chwoka lema!” ³⁶ Sojàsù hì boŋa nyikhè nâbi wûn, lyi mu lûk ma mù ti tâ yen fo ha wûn ³⁷ fî jis ha wun na, “Wò hì mô nâ fə̀n à Jûs hamok, wo bônhì ngɨŋ yâ!” ³⁸ Ghɨ nyak yi gha a bàŋ à fùkàk banti a wun a tô kàkfùtàfù na, “Wûn mò fə̀n à ghɨt a Jûs.” ³⁹ Wùt lè we ghɨ tì bante ghê ghɨna hì sùlè kə Jisòs, jîsà na, “Ba wò mò kə nâ Klistù wê, bonhi lê ngɨŋ yâ ma wò bonhi ghàh!” ⁴⁰ Wùlè we njaŋ ha wâ nì fî buf na, “Ba yi mô na wò fànà nâbi wi Yènfù, ghɨ nè boŋa ywe kəbi wò ni, ⁴¹ wò kwàktè wijə na ghàhnà nè kpo hamok kum ni gha be ghe ghàhnà ne biyani wùt wuna kpo kə halô.” ⁴² Wù jyan yâ jis ha Jisòs na, “Wò be shihi saka fə̂n wa, kə wò yìta mu.” ⁴³ Jisòs jis ha wun na, “Mu jìsà ha wo hamok na, ghàh à wò nè hì mô a Balàdîs lân hamok.” ⁴⁴ - ⁴⁵ Chwì bân tâ, hi fê bana wi luku kaha fîn, kə tù jɨ̀m ne fî kaha ban kə a bɨn a bonana a mbɨŋlu sù tât. Bâh à sùnju ghe ghɨ tì chuŋa daŋhe na ghɨ jyati ndâ Fùyèn yì chìk bâhà kə fùtɨ̂n fùtɨ̂n wu yu mefû. ⁴⁶ Jisòs jî a jyə̂ yì tâ jis na, “Bâ, mu fo a yohnà ma a wo wô!” Wù jis ben ni, yohnà gokhì lò. ⁴⁷ To sù sojà ghe yen gha ghe ghɨ tì gàna ni hì kokhe Fùyèn jîsà na, “Hamok, wùt wuna chehì kəta wi njahi!” ⁴⁸ À hì mô te ghɨt ghe ghɨna ye bena hi yena gha ye ghɨ nê, yena gha ghe ghɨ gana, ghɨna kahi hì khɨmte kole yê wunu. ⁴⁹ Gha ghɨ̂n ndùku gânà ni, sunsu wunsu mô nâ ha ghaf, ke kə yi kî, ghɨ le mô a ywên ghe ghɨ tì lo a Galìlî ben a wun a yi bàm. ⁵⁰ - ⁵¹ Wùt lè ndùku mô kəbi wu tuk afu metì ghɨ toŋte na Josèf, a wùt yi tèk yi Jùdiyà ye ghɨ ndùku toŋte na Àlìmàtiyà, a mò kə nâ wùt wù jùŋ, mò kə nâ chilichili, chyə yute kə yu we lak yi fə̀n à nyə Yènfù bè bênà atɨ̂n. Wù ndùku mô kə nâ wùt atɨ̂n à ghɨt afa ghɨ ndùku saka ghɨt a Jûs, biyani tê bime jə̀ gha ye ghɨ tì fate kum Jisòs fî ni ha wûn. ⁵² Te bante mihe Jisòs wu kpû, Josèf yen jis ha Balèt na, yi khɨŋa hi lyè gun yi wuni hi gùmà. ⁵³ Balèt bimî. Wù yen chwohi wûn a kàkfùtàfù lim nì mbalaŋa, yen gûmà yi sì ma ghɨ chuf a yi wo, sì tɨni mô teka ghɨ yê timè guma wùt atɨ̂n. ⁵⁴ Wù tì gùmà Jisòs ni, hì fate wunu na tuku jə ma à hi mô tuk wu laku. ⁵⁵ A mô yani ma ywen ghe ghɨ tì lo a Galìlî ben a Jisòs yi bàm yâ, jûmtì Josèf yen yen yi sî ye wù gùma Jisòs atɨ̂n. ⁵⁶ Ni te ghɨ niŋhe gun yi wuni, ghɨna kaha kolo yen bakti yûhìsu lɨmtesu jûŋ sù na ghɨ yuhi wûn atɨ̂n. Te tuku ghɨna wu laku bèna, ghɨna yutì kə te saki ndùku jîsà.

¹ Te tuku ndùku yula bênà wu tuk wu shyə a ngâm, ywena yen yi jwô yì sì nì Làmindâ yì jûŋ te ghɨna fate ² yen ti ye ghɨ tì baŋa yi jwô yì sì yâ, ma ghɨ ti bɨŋhi chyâkhì. ³ Ghɨna lyi yi sì te yena jə̀ gun yi Bâba Jisòs ⁴ time afû hì kante gha ye yi gana. Ghɨt a lɨmànà ale à bà bûŋhì timi bakha a ghɨna ngwùŋ ma ghɨna ti mak njusu fufasu fê njêntè. ⁵ Fânì kwo ghɨna, ghɨna tuŋhi tu ghɨna a chyə̂. Ghɨt atɨna buf ha ghɨna na, “Njwô ghə te ghàn khɨŋa wùt wù tâ atɨ̂n à ghɨt a kpona? ⁶ Wù wijə afân, wù ti lôtì a yi kpû. Ghàn yɨŋti te wù tì jìsà ha ghàn baha mô a yi lak yi Galìlî ⁷ na ghɨ kəta hi fo Wâ Wùt ha ghɨt a be wô na ghɨ banti wûn a kàkfùtàfù, ma à hi mô yi bàm yi tuk mù tât ma wù loti a yi kpû.” ⁸ Kə wu yu ghɨna kaha yɨ̂ŋtì jîs yi wuni. ⁹ Ghɨna kaha kolo yi sì fôktì gha ghɨ̂n à jɨ̀m ha jùmtìbàmsù Jisòs sù njwò yì mòk bakhi nâbi nì nde afû. ¹⁰ Gha ghɨ̂n ha jùmtìbàmsù Jisòs sù tì fòkti Mèli wù Màtalà nì Juwanà nì Mèli nè Jêms nì ywen ale. ¹¹ Biyani ghɨna tê bimî jə̀, beka gha tɨna ndùku fune gha fəma ha ghɨna. ¹² Biyani Bità nyɨŋ yen tɨ̂ŋtì ki lihi yi sì, yen kə a gûm, lo hì kolê kante kwâktè yênà gha ye yi gana. ¹³ À ndùku mô kəbi wu tuk afû jùmtìbàmsù Jisòs su lesu, sùbà lo hì yênà a yi tèk yile, ghɨ toŋte na Èmayùs, yi mô mâl sàmba hi lò a Jèlusalèm. ¹⁴ Ghɨna hì gbê jîsà bitè yênà nì gha ghe a ghɨ kwuka gana. ¹⁵ Te ghɨna ndùku jîsà bitè kwoka yênà nì gha, nâ Jisòs nì ngɨŋ à wûn yen bakha hì gbê yênà ghê ghɨna. ¹⁶ Biyani gha tàhì ghɨna hi yen a khɨle wûn. ¹⁷ Jisòs buf ha ghɨna na, “À mô ghə ghàn gbê jîsà yênà kum ghɨna ni agha?” Kə wu yu, ghɨna wuhâ tuŋhi kə̂ktù ghɨna tu a chyə̂ hì jyê wu wun. ¹⁸ Wùt lè a ghɨna fùtɨ̂n ghɨ toŋte na Kèlobàs, kaha buf ha wun na, “À mò kə wò we wò lo be a Jèlusalèm hì khə wi gha ghe a ghɨ che gana a mu tuk afân agha?” ¹⁹ Wù buf na, “À mô ghɨ̀ni gha?” Ghɨna fîsì na, “À mò kə ghe a ghɨ gana ha Jisòs wù Nasalì. Wù chehì mô fòktì wù chìk, jîsà gha kanana, nê ghɨ le. Mô wùt wù tâ a Yènfù ashyə̂ nì a ghɨta ashyə̂. ²⁰ Ngàŋsù ndâ Fùyènsu chiksu nì tu we wu tihe gha che fo wûn na ghɨ ywi, ghɨ lyi wûn yen banti a kàkfùtàfù, ²¹ ma ghàh chehì kwâktè na à mò wun we wù bè yuna tu ghɨt a Isalì a sù ngə̂k. Nâbi yâ, lân mò tuk mù tât te gha tɨni gàna. ²² Fê bakhe na ywen ale a ghàh a nôn te fî nî na ghàh hi mô nì kani te ghɨna bɨsa yena yi jwô yì sì lân, ²³ tè yena jə̀ gun yi wuni afû, kaha ben jis na anjèlsù Fùyènsu lesu te fwu a ghɨna ashyə̂ afû, te su fwo a jem jis ha ghɨna na wù mò wu tâ. ²⁴ Ghɨt ale a ghàh a fùtɨ̂n ti fî lo yen a jwô yì sì afû, yen kə yi sî yimi, kə yi ghəl te ywen ghe ye be jisa, biyani te yena jə̀ Jisòs.” ²⁵ Wù ki jîs ha ghɨna na, “Ghàn mò kə nâ wù ngwò, jɨ̂ŋtè ghaka nâ hi bime gha à jɨ̀m ghe fòktì sù chiksu tì jìsa! ²⁶ Klistù we, yê hì kəta wi hi yen a ngə̂k ni, shyəma wù lye a wun a wù lùk wu koknenu agha?” ²⁷ Wù jis yâ fî jis banhi gha ghe ghɨ tì jìsa a ŋwàklù Fùyèn kum wûn, hi yìmì a ŋwàklù Musìs hi yè tàn a fòktìsu chiksu. ²⁸ À hì mô te ghɨna ndùku bakhe yênà yi tèk afa ghɨna ndùku yênà, Jisòs ni te wù khɨŋa hi chyà yèn ashyə̂. ²⁹ Ghɨna chyati wûn na wù chyə ghê ghɨna beka yu ndùku mô ma wu ti chyâ, ma tuku ti fî jyə̂. Wù lyi yen hi chyə̂ ghê ghɨna. ³⁰ À hì mô wu yu yənu wù lyi a bân bonhilò jyâtì ha ghɨna. ³¹ Se ghɨna yâhì ghɨna yen khɨli wûn kə wu yu, wù ləhà a ghɨna fùtɨ̂n. ³² Ghɨna hì bufa ha ngɨŋsu ghɨna su nâ, “Ba à ye hì mô a wu yu afa wù yê hì jîsà ha ghàhnà wu lûm, hi jìsà banhe gha Fùyènì ha ghàhnà yâ, təm a ghàhnà tê hì lumà agha?” ³³ Kə wu yu ghɨna lôtì kaha yen a Jèlusalèm yen yen jùmtìbàmsù Jisòs sù ìwûm njwò yì mòk nì ghɨt ale ni te ghɨ ndùku mô afû. ³⁴ Ghɨna jis na, “Hamok Bâba ti lôtì a yi kpû. Wù ti chwûtì ngɨŋ à wûn ha Samùn!” ³⁵ Afû, ghɨt ghe à bà ki fòktì te yi ye gana ha ghɨna a wu lûm, fî fôktì te ghɨna ye yena khɨle Jisòs a yu afa wù ye beka bana fo ha ghɨna. ³⁶ Te ghɨna ndùku baha jîsà gha ghɨ̂n, Jisòs nì ngɨŋ à wûn bûŋhì timi a ghɨna fùtɨ̂n jis na, “Yutìnì mò ha ghàn.” ³⁷ Lɨmalɨma bâh ghɨna, ghɨna fân, kwâktè na ghɨna ti yen wùt à chyə̂. ³⁸ Jisòs buf ha ghɨna na, “Njwô ghə te gha ghɨ̂n fo ngə̂k ha ghàn, fê nê na ghàn hi kwâktè chyâhè agha? ³⁹ Ghàn yen wo mu nì wulu mu. À mò mu ni. Ghàn kum mu ma ghàn yen hamok, ma ghàn yen beka wùt à chyə̂ kəta wi jyà wùn nì wuf wu wùnu ni te mu kəta.” ⁴⁰ Wù jis ni ki chwûtè wo wunu nì wulu wunu ha ghɨna. ⁴¹ Ghɨna hì saŋle nâ jûŋ, yi ghak ghɨna hi bimî, ghɨna hi kante kə yi kantî. Wù buf ha ghɨna na, “Ghàn kətalò shyə yəna afan agha?” ⁴² Ghɨna fo kôm à yila nyokana ha wûn. ⁴³ Wù fyi kut kə ghɨna ashyə̂. ⁴⁴ Yi bàm yi tɨ̂n, wù jis ha ghɨna na, “Gha ghɨna ghàn yena ni, à mò gha ghe mu ndùku fôktè ha ghàn te ghàhnà ndùku baha mô amok na, nâbi ghə te ghɨ nyàka kum mu a Musìs ŋwàklù wu làŋ nì ŋwàklù fòktìsù chiksu nì ŋwàklù Sù njàŋ kəta hi bè kpên nâ à jɨ̀m.” ⁴⁵ Te wù tì jìsa ni, banhi mihì tu ghɨna shyəma ghɨna ywo khɨli gha ghe a ghɨ mô a ŋwàklù Fùyèn, ⁴⁶ Wù fî jis ha ghɨna na, “Ghɨ ti nyak na, Wù chwoka lemana kəta hi yen a ngə̂k hi kpû, ma à nê hi mô yi bàm mu tuk mù tât, ma wù kahà loti a yi kpû, ⁴⁷ ma ghɨ nê hi fê kəta hi yìmì a Jèlusalèm hi fòktì gha Fùyèn lak tù jɨ̀m a wun a yi yet, na ghɨta kahi təm a ghɨna ma Bâba Yènfù lehèfo besu ghɨna su. ⁴⁸ Ghàn mô su bɨn à sak hi fòktì a gha ghɨ̂n. ⁴⁹ Ghàn hi khə na, mu nè tuma bè lò we a Bom chwùne ha ghàn. Biyani ghàn faŋ à kə a yi lak afân hi tàn wu tuk afa jyaka bè lô a nyə̂ ma ghɨ chwo a ghàn a tû.” ⁵⁰ Wu jis ni, lyi ghɨna fwu yi lak afû yen bakha yi tèk yi Betanì lôhì wo wunu a nyə̂ hi bonhi ghɨna. ⁵¹ Ni te wù ndùku baha bonhi kə yi bonhî ghɨna, ghɨ lyi kwok nì wûn a nyə̂. Wù lo de ghɨna. ⁵² Ghɨna kokhi wûn lo kaha kolo yen a Jèlusalèm nì saŋlî chiki ⁵³ ghɨna yen faŋ hì yênà a ndâ Fùyèn kə yû mù jɨ̀m kokhe Yènfù.