Jêms

¹ À ŋwàklù yina nyak mu Jêms we mu mò wùt wù fètana ha Yènfù fê mô wùt wù fètana ha Bâba Jisòs Klistù: Mu toŋte ha ghɨt a Isalì ghɨ bimena ghe ghɨna mô ma ghɨna ti jyâhì yen a tu lak tu mbyi tu tù jɨ̀m. ² Mômhìtù shìki bên ha ghàn a tu lum a tu lûm, ghàn lyi na à mò yi saŋlî chiki a wana noma, ³ beka ghàn khə na a wu yu afa ghɨ shìki mômhì yi bimî yani, ghàn yiki hi tè wunhî. ⁴ Ni, wunhînì kəta kə hi nè mìhì yi fêt a ghàn a wùn shyəma ghàn ghəknà kpena hi tè nè fêt yì Fùyènì kə yì jɨ̀m, gha wi shyə ale. ⁵ Biyani à hì gha nâbi nde tofu a ghàn a fùtɨ̂n wu buf ha Yèn fe fu fô ghə̂kà wi. Wù ki bûf, ma fu nê fo ha wûn. ⁶ Wù shihi bûf, wu hi bimî na Yènfù nè folò ha wûn. Kə wù hi kanti yi kantî beka à hì kanti nâbi nde na Yènfù nè nêlò gha, wu hi mô ni te mòlû a jwô yì chìk a wu yu afa fufa shìkà mu kwoka chwolâ. ⁷ Kə nki wût mu wûn nê hi kwâktè na Bâba làhi fo a shyə ghe wù bufa. ⁸ Nki wût mu wûn kəta a təm à bà, chiŋtê nâbi a ghə wù nè. ⁹ Wùt wù bimena we wù fufa, wù kəta hi tè jâl na Yènfù ti lem wun wu lùk wu ngaŋtenu. ¹⁰ Ma we wù kəta ghaki kəta hi tê jâl na Yènfù ti chwohi wun a chyə̂. Beka wùt wù ghaka mu wuna chyàlà kəbi te wu wəlâ a ghə̀n. ¹¹ Yuchwî sat yi ban talò yi nyok ghə̂n wù tɨnu, bwùsù tɨnu yâtàlò, jwôf yì wuni milò. Yi mô kəbi yi ghəl te wùt wù kâ yè gbê nê gha wuna, biyani wu ne bûŋtì kpu kə yi kpû. ¹² Jùŋ mò ha wùt we mômhìnì bènà ha wûn, wu hi wunhe kə yi wunhî beka wù ki ta chyà yi mômhì mi yê, ma wù bê hi kəta maktunu, a mô a chyəna ghe Yènfù chwùne lema ha ghɨt ghe ghɨna kòŋà wûn. ¹³ Mômhìnì ki bên ha wùt, kə wù jis na à mò Fùyèn te fu momhe yi. Gha yile wijə ye yi mô hi nì na Yènfù ni be, Yènfù bu hi nì na wùt ni be. ¹⁴ Biyani mômhìnì shihi bèn ha wùt, a yè mô kwâktì yi be a yi lehe wûn guf lihi wûn atɨ̂n. ¹⁵ Ni, kwâktì be mi yîn yi ba a wùt yi təm, yi ni na wù ni be, be mi yinâ ləma kpen yi ben nì kpu. ¹⁶ Kə wùt bè lehe ghàn, wana noma ghɨ jûŋà. ¹⁷ Nâbi ghə ghê ghàhnà kəta ghɨ jwôfà kpenê mò ma ghɨ lo ben kə a nyə̂, à fo Bâ we wù fate nâbi ghə ghe ghɨ fo bani. Bâ mu wunâ yè kwuna wijə. Wù gbè wijə te chwî ye yì yè nê yu mù lè luktu hi fê finâ. ¹⁸ À koŋ kə wûn hi lyè ghàhnà te à wan, kəbi yi ghəl te wù mò ma wù ti jîs shyəma ghàhnà hi kəta luk wu shyə, kokne chyâ nâbi ghə ghe wù mò ma wù ti fatî. ¹⁹ Ghàn tokâ yuti yìna wana noma a jûŋà: Ghɨ shihi tè jìs yi ghâ nâbi nde wu lem a tû, wu hi tôkà yutê, wùt hi mô hi jìs wu tok kwâktìlò shyəma wù jis. Kə wùt nè shɨŋa bâŋhè lâ a yi ghâ. ²⁰ Lâ baŋanu wûtù wi hi bèn nì chyənà chilichili ye Yènfù khɨŋa. ²¹ Yi ni chwùtè na ghàn kəta hi chwok a màkà chyənu wu be nì nâbi ghə ghe ghɨ kəta liŋi a ghàn a fùtɨ̂n, hi bona bime gha ye yi mô hi bònhè ghàn, a mô ye ghɨ hì mô ma ghɨ ti yomi a ghàn a təm. ²² Kə ghàn nè lehe ngɨŋ sanisu hi tê yute kə yi yutî gha Fùyènì. Ghàn hi nê ni te yi jîsà. ²³ Wùt we wù yute kə yi yutî gha Fùyènì nê wi te yi jîsà, mò te wut we wu ke kə̂k yi wuni a mìjô, ²⁴ wu lo afu metì kə fu yulâ wu kahi yità te wù yê hì kə̂kà. ²⁵ Biyani wùt we wù tòka yute kə yi yutî sak yi Fùyènì ye yi kpene, wi hi tè fè mò a kwôs a gha mbye. Wùt mu wunâ ywo yi ghâ wu tê yìtà, wu hi nê kə te wù ywo. Wù nî, wu hi kəta yi bonhî nì nâbi nì gha ghe wù nè. ²⁶ Wùt ki jîs na yi mò wut wù bimena biyani, bu hi tihe chwûlù wunu, wu hi khə na wù lehe kə nâ ngɨŋ à wûn bimî wuni kpene wi yi gha yile. ²⁷ Bimî ye Bè ghàhnà Yènfù lyê na yi jwôfàlò kpenê, mò wu yu afa wùt wù bimena tòknè ha wana nkwô, nì ywena nkwô fê fihe ngɨŋ à wûn na kə gha mbye nê yok wûn nì fiŋtu.

¹ Wana noma, ghàn te ghɨt a bimena ha Bâba ghàhnà Jisòs Klistù a we wù kəta ban yi chiki kəta wi hi tè lyê wùt na wù chyàlò wùlè. ² Ma ghɨ lyi na ghɨt à bà ti lyi ben a ghàn a ndâ yì yùŋtì, wùlè mô ma wù ti laf nâ a jûŋ, lihi su chyak a wun a wô ma ghɨ fati nì kah ghe ghɨ fate ka atɨ̂n, wùlè mô wùt wù fufana ma wù ti mak kə shyàklà mù sùnju. ³ Te ghɨna bèna ni, wò ki tôknà nì we wù ye lafa a jûŋ yâ hanɨ̂ŋ chwûtì kpok wu jûŋù ha wûn, biyani ki jîs ha wùt wù fufana we na wù time a fokô makə wù ndòko a chyə̂ a wo ngwùŋ wu wù. ⁴ Wò ki nî ni, ma à hi mô na wò ti chwûtì na ghɨt ale mò a ghàn a fùtɨ̂n chyâ ale, ma yi hi chwûtè na ghàn ti kahi gan ghɨt a sakana kəta kwàktì tu be tu. ⁵ Ghàn yuti a wana noma ghɨ jûŋà. Ba ghàn khəlò na Yènfù ti chwokti ghɨt ghe ghɨ yena na à mò ghɨt a fufana a mbye afân, ni na ghɨna bimi ma ghɨna khɨti kə nâ ghaki, ma ghɨna bê yə fə̂n we Yènfù chwùne ha ghɨt ghe ghɨ kôŋà wûn. ⁶ Biyani ghàn ti sûlì ghɨt a fufana. Ba à mò ghɨt a chika ghe ghɨ kwo fye mwə̀ mânù, fê lyê yê nì ghàn a lùk wu sù saku? ⁷ Ba a jìsà sùlì ghɨna yet yi wùt wù jùŋ we wù kəta ghàn? ⁸ Ghàn shìki lêmà sak yi fə̂n wù Fùyènù te yi mô a ŋwàklù Fùyèn na, “Kòŋ wâ nâ kə yi ghəl te wò kòŋà ngɨŋ yâ,” ma à hi mô na ghàn nè kə nâ a jûŋ. ⁹ Biyani, ghàn shìki lyî na ghɨt ale chyàlò ghɨ le, ma à hi mô na ghàn nè be, ma saki kwo ghàn kəbi yi ghəl te yi kwo kəbi nde we wù khɨma saki. ¹⁰ Yi ni chwùtè na, à lem nâbi nde sak tù jɨ̀m ki khɨm kə yì mòk ma à hi mô na wù ti khɨm tù jɨ̀m. ¹¹ Yi mô ni beka wùt we a wù tì jìsa na, “Kə wùt chyə nì wùt a bu lɨm à wûn makə ywê wûn,” tî jis kəbi na, “Kə wùt ywi.” Wò ki faŋ hi chyə̂ nì wùt a bu lɨm wâ, makə ywi wâ biyani ywi wùt, ma à hi mô na wo ti khɨm saktu tɨntu nâ tù jɨ̀m. ¹² Ghàn hi jîsà fê nê kəta ghɨt ghe Yènfù mô hi bè saka ghɨna nì sak ye yi nê na kə ghɨta hi fê mô wu kwôs. ¹³ Beka Yènfù bè shihi sak nâbi nde we wù kwohe wi seni ha wùt ma wù bê tê kwohe jə̀ seni ha wûn. Wùt we wù kwohe seni ha ghɨt ale kəta wi hi tè fàn a yi sâk. ¹⁴ Wana noma, wùt shìki jîs kə na wù ti bimi ha Yènfù, chwûtè wijə a wun a yì fèt, ma jùŋ àtɨ̂n nê hi mô nâ ghə. A nki yi bimî mi yîn làhi bè bònhè wuna? ¹⁵ Ma ghɨ lyi na wâ nâ ki bên kəta wi shyə ale hi yə̂ wu tuk afû, kəta wi njusu hi màk, ¹⁶ Wù shihi lò ghàn jis kə ha wun na, “Wò gbê kə a jûŋ. Wò yen, ma wò hi mâkà mwə̀ mù lùmtêmù, fate yə̂,” biyani faŋ hi fo a shyə ale atɨ̂n à mwə̀ afân ha wûn, ma jùŋ àtɨ̂n nê hi mô nâ ghə? ¹⁷ Yi ni mò kəbi yi ghəl te wùt kəta kə yi bimî biyani chwûtè wijə bimî tɨni a tô gha afa wù nè ma à hi mô kə bimî yi kponi. ¹⁸ Wùt lè làhi jìs na wò bime ki yi bimî nê wi fêt yì wut wù bimeni, biyani yi nê. Mu jyâna, wò wi hi jìs ha mu na wò ti bimi Yènfù bu kə na wò nè yi fêt nì bimi ya mi yê. Gha ghe mu nè chwùtè yi bimî mi. ¹⁹ Yi jwôfàlò ni te wò bime na Yènfù mò kə fù mòk! Nâbi yohnù wu be bimelò nâbi ni, fê fânà chiŋtê a ngək ye Yènfù bè fo ha ghɨna. ²⁰ Ngwo shyə̀ ghɨ̂n! Wò khɨŋa hi yen a chwena na bimînì mò kə yi kponi a wu yu afa yi chwûtè wi a wùt yì fèt ²¹ Yènfù tì lyi bè bè ghàhnà Ablàhâm te wùt à chilichili njwô ghə? Ba à ndùku mô te wù tì lyi wâ wûn Isìk hì mô hi fo ha Yènfù a tô baŋ a yi fo. ²² Yi ni chwùtè na bimî wuni nì fêt yi wuni ndùku mô kə a shyə̀ mòk. À tì ni yi fêt yi wuni na bimî yi wuni hi kpenê. ²³ Yi tì gan ni hi lunhi luk wu ŋwàklù Fùyèn we wu tì jìsa na, “Ablàhâm tî bimî ha Yènfù, fu fyi wûn ha wùt à chilichili,” Wù hì fê toŋte wûn na sô à wûn. ²⁴ Yi ni chwùtè na, Yènfù lyè wut te wut à chilichili njwo yi fêt yi wuni, a bu kə kum nì bimînì yimi. ²⁵ Ba Yènfù tî lyi wùt ywên wù gbèna we ghɨ ndùku toŋte na Lahàb yâ ha wùt à chilichili beka wù tì fye ghɨt ghe Joshwà tì tuma a wun a ndâ tesi ghɨna, ghɨna tet chya wu lum wu lô? ²⁶ Yìnâ ni chwùtè na wùt shìki kəta yi bimî yi chwùtè wijə a gha afa wù nè ma à hi mô kə yi bimî yi kponi kəbi te chyaka wùna ghe ghɨ kəta wi yohnà mò ma ghɨ ti kpû.

¹ Kə ghàn a dona hi khɨŋa hi tè mò a sù chichà a wana noma, beka Yènfù bè saka lò ghàn ghe ghɨ yike ghɨta hanɨ̂ŋ. ² Ghàhnà à jɨ̀m njahalò. Wùt shìki mô jîsà njaha wi, ma à hi mô na wùt mu we mò wùt à chilichili, ma wù hi mô na wù làhi tihe ngɨŋ à wûn ³ Ghàhnà làhi fwək a nyàm a kwaŋ ma yì bɨ̀nhi a wu yu afa ghàhnà lèma chyâk a yinì yì jwô shyəma yì hi ywo ghàhnà. ⁴ Ghàn fê lyi baŋ a jwôlà a chika ha chwena. Ghɨ yè ghaka nâbi yàni, a hi china kə a fuf a ta ghɨ gbê, wùt gùfana àtɨ̂n hi tihe kə te wù kòŋà nì mbàŋlà fù, fu tobte kə ni. ⁵ Yi mô kəbi yi ghəl te chwûlù wûtù. A mò wu luk wu wùnu tobte kə ni, biyani ma wu làhi jìs a gha ghɨ dô bəma kə ni. Ghàn yen lê sese fu wùs fu, fu nê fu nyok a kwo ghɨ ghaka kə ni. ⁶ Chwûlù wûtù mò nâbi ni mô kəbi wu wus, fè mô tôk à gha be a wùt wu wùn, be fwo atɨ̂n bobhe kə wunu wûtù wù jɨ̀m. Chwûlù nyòkà nâbi ghə a mbyî nì wusu ma wu lo kə nâ wu lùk wu bobhenu. ⁷ Wùt làhi kwote sù nyâm a ghə̀n, nì su jwòsù nì se su ŋâŋlè nì nyɨ̀mû, hi yike mwə̀ munâ, na mù hi chyə a ndâ, a mô gha ma wùt hi nê lò. ⁸ Biyani, wùt wi hi tihe yikte wu chwû wu lum afân. Chwûlù wûtù mò a shyə be, yè yutè wi, ma wu ti lûn nì lef, yi ywê. ⁹ Ghàhnà kokhe Bâba a we wù mò Bì ha ghàhnà nì jwo, sùlè kəbi à ghɨ̂t ma à fati Fùyèn ghɨ fune wûn nì jwo tɨni. ¹⁰ Ghɨ kokhe Fùyèn nì jwo fè sûlè kəbi ghɨta nì yini. Yi kəta wi hi tê mò ni a wana noma. ¹¹ Mòlû mù jùŋ nì mòlû mù be wi hi tê fwu atɨ̂n yì tôk yì mòk. ¹² Kâk fu fikfù wana noma, wi hi mo lùkàmù, kâk fù fikfu wi hi mu nâbi kɨlìbsù, à mò kəbi yi ghəl te mòlû mu fù mbâŋ wi hi fo mòlû mù jùŋ. ¹³ Wùt shìki mô a ghàn a fùtɨ̂n tofa fè khə a ghâ, wu chwûtì a wun a chyəna jûŋà. Wù shìki mô, wu chwûtì atɨ̂n à gha afa wù nè nì ngumlînì nì tofu. ¹⁴ Biyani yi shìki mô a dûtè kə ghə̀k nì təm a be a ghàn a fùtɨ̂n, nâbi nde kwâktè kə ngɨŋ à wûn, kə wùt ha ghàn hi wama fəmi kùn à ngàŋtù jîsà na yi tofalò. ¹⁵ Nki tof mi yîn bênà wi a nyə̂ yi bênà ha deblì kə chyə afân. A bu yi tof yi Yòhnànì. ¹⁶ À yè mô a wu yu afa ghɨta ghə̀kà ghɨta, nâbi nde hi taŋa kə a to wuna, ghɨ hi chìnà chyə kə yi chyə̂, kwote nâbi yìni gha yi be nê kə yi nî. ¹⁷ Tof we wu lo bê ha Yènfù, mô ashyə̂ yule kpenê, kôŋà yi yutì, kwâktè a ghâ, bonê, chyə chyənà chilichili, kwohe yi sen nâ haŋaŋ, gha jûŋà fwo atɨ̂n dô kə ni. Tof wu tɨnu nê nâbi ghə kə yi ghəl, lehînì bu atɨ̂n. ¹⁸ Ghɨt a yutena yome yi yutì a ghɨta fùtɨ̂n, yi ləmâ, yi nî ghɨta hi chyə chyənà chilichili.

¹ À bè ghə nì nô nì gùfna a ghàn a fùtɨ̂n? Ba gha mɨ ghɨ̂n gànà ni beka ghàn mò yu mù jɨ̀m se fwona nê ghàn na là mânù hi lûmà hanɨ̂ŋ yi bàm yi mwə̀ mù mbyî. ² Se ghana shihi fwu a mwə̀, ghàn khɨte wi, ghàn hi ywê, njaŋâ fê nô, biyani khɨte wi. Ghàn kəta wi mwə̀ munâ beka ghàn bufa wi ha Yènfù. ³ Ghàn bufa nâbi yi bûf, Yènfù fo wi beka ghàn bufa wijə nì kwâktì jûŋì. Ghàn bufa kə na ghɨ fo ma ghàn hi nê gha ghe ghàn kòŋà hi nì nì mwə̀ mù tɨ̂n. ⁴ Ghɨt ghɨ̂n ghɨ kokhe mwə̀ mbyî ni! Ba yi ni mò na ghàn khə wi na ghàn hì kôŋà mwə̀ mù mbyî, ma à nê hi mô na ghàn bànàlò Yènfù. Ni, à kòŋà nâbi nde mwə̀ mù mbyî ma wù hi bânà Yènfù. ⁵ Ba ghàn khəlò luk wu ŋwàklù Fùyèn we wu jîsà na, “Yènfù kòŋàlò yohnà ghe fu fo ha ghàhnà nâ haŋaŋ. Luk mu wûn jìsà kə hamok.” ⁶ Mwə̀ mù mbyî foma nâbi ha ghàhnà ni, Yènfù kəta kə təm a jûŋà ha ghàhnà. À ni gha ye ŋwàklù Fùyèn jìsà na, “Yènfù bànà ghɨt ghe ghɨ ghaŋhe wunu, biyani tôknà ha ghê ghɨ ngumle ngɨŋsu ghɨna su.” ⁷ Yi mô ni, ghàn fo ngɨŋ sanisu ha Yènfù. Ghàn tunhi deblì ma yì tet à kahi a ghàn a yi bàm. ⁸ Ghàn bê bakhi ha Yènfù. Ma fu nê bê bakhi ha ghàn. Ghɨt a gha be ghɨ̂n! Ghàn kəta a təm à bà. Ghàn su wo wanu a gha be ma ghàn sô jobhi təm ghana. ⁹ Ghàn hi kwohe seni bwata jyê nâ haŋaŋ. Kə ghàn hi chyəktê, ghàn hi bɨlà jyê yi jî. Kə ghàn hi fê saŋlê, ghàn hi jyê wunu. ¹⁰ Ghàn chwohi ngɨŋ sanisu a Yènfù ashyə̂ ma fu bê lohi ghàn a nyə̂. ¹¹ Kə ghàn hi bobhe yet a wana nì ghana a wana noma. À bobhi nâbi nde yet yi wâ nè wuni makə wù sakalò wûn, ma yi nê hi chwûtè na wù jis gha yi be mi yê kum yi sâk fê saka kəbi sak yi tɨni. Wùt shìki sak a yi sâk, ma à hi mô na wù ti kwok ndokò a tô àtɨ̂n hì lêmà wijə sak yi tɨni. ¹² À mô kə Yènfù fe fu fo saktu, fu saka ghɨta. À mò kə wûn we wù mô hi bònhè à ghɨ̂t, à fê mô kə wûn we wù mô hi bobhe ghɨna. Wò mô nâ nde hi tè saka ghɨt ale agha? ¹³ Ghàn ghɨ̂n a ghàn jìsà na ghàn nè lô lân makə yi bîs hi yèn a yi tèk afân ni, makə ha yòkô hi chyəte kwok afû a lɨ̀m, nê bəkli khɨte kâ, ghàn yuti. ¹⁴ Njwô ghə te ghàn yè jîsà ni khə wi na à bè gânà ghə yi bîs agha? Yi mô kə te sù mbàk se su yè fwo bê kə fu yulâ ni su fî kaha sami kə yi samî. ¹⁵ Ghàn bɨlà kəta hi tè jìs na, “Yi shìki kpenâ ha Bâba, na ghàh chyətè kwok, ma ghàh ni gha yîn makə yòkô ni.” ¹⁶ Ghàn ghɨ̂n chîn bɨlà ghaŋhe kə wu wun jîsà kə yi jîs tôkà fôktè gha ghe ghàn bakte hi nì. Ghaŋhi wùn mi yîn mò be. ¹⁷ Yi ni chwûtè na à khə nâbi nde gha jûŋ yê wù kəta hi nì, faŋ hi nì, ma yi hi mô na wù ti ni be.

¹ Ghàn ghɨt a chika, ghàn yuti! Ghàn hi bwata jyê nâ haŋaŋ beka ngə̂k yì chìk bènàlò ha ghàn. ² Mwə̀ munâ a ghàn kəta ni, mù bè befa ləhnè kə halô. Sekuseku bè kutalò nju sanisu. ³ Ka mânù mê ghɨ fate nì gûl nì silfà ni, bè bâŋàlò. Ka mu wûn bè bâŋàlò ma wu chwùtè mihi sah yani wu tuk afa Yènfù bè saka ghàn beka wu bè bâŋà ni ma wu fê kahè hi kuta njà sanisu wùnsu ni te wu wus. Yì ni chwùtè na ka munâ a ghàn tuka lêmà a mu tuk mu gòkhemù afân bè bɨlà bê lô nì ngə̂k ha ghàn. ⁴ Ghɨta ti fêt a ghàn a mu fùk, ghàn faŋ hi làk à ghɨna, ghɨna ghɨ hì jyê ha Yènfù. Bâba bè jyak à jɨ̀m ti yu, chin te ghɨt ghê ghɨ che kpe mwə̀ mânù jyè. ⁵ Yu ti kpên shyəma ghɨ seti ghàn! Ghàn ti yə wun yani a chyə afân ni hì ghakle te sù nyâm te ghɨ yəhe hi sê. ⁶ Ghàn ti bobhi ghɨta fî ywiti ghɨta kə halô, teka ghɨna bobhi gha yile, ghɨna nô wijə ghàn. ⁷ Ghàn hi wunhe kə yi wunhî wana noma hi tàn wu tuk afa Bâba bè kaha bênà. Ba ghàn khəlò te wùt fètà fûkà wu yomilò, wu hi wunhe kə yi wunhî hi bè tàn shyəma bɨ̀ŋ chu, ma mwə̀ mù yə̂mù wûn mù jùŋ ləma ma wù kpi. ⁸ Ghàn faŋ à kə yâ ma ghàn hi wunhe kə yi wunhî beka yu ti bakhâ shyəma Bâba kahà ben. ⁹ Kə ghàn hi sunle ngɨŋ sanisu a wana noma kə ghɨ bê sak ghàn. Wùt wù sakana mò kə yi jwô ndâ. ¹⁰ Ghàn lyi chwesu ha fòktìsu chiksu a wana noma ma ghàn hi wunhê. Ghɨna ndùku yena ngə̂k, biyani fôktè tum à Bâba. ¹¹ Hamok ghàhnà bime na Yènfù bonhe à ghɨ̂t ghe ghɨ wunhe. Ba ghàn ti yu te Jûb tì shihi yen a ngə̂k hì wunhe nâ kə a jûŋ fî yen yi gha ye Bâba tì ne ha wûn a gòkhi. Bâba mò ni, khə sù ngə̂k su ghɨ̂tsù, kôŋà ghɨna, fê kwohe yi sen ha ghɨta nâ haŋaŋ. ¹² À ne fî gan nâbi ghə a wana noma, kə wùt bè kânà yi kân gha. Kə wùt bè kânà yet yi Fùyènì makə yet yi shyə̀ ale a chyə afân makə nâbi yet yi ghə. Gha hì mô hi bimî, ghàn bimi kə yi bimî, yi hì mô hi tunhî ghàn tunhi kə yi tunhî, kə Yènfù bê sak à bobhi ghàn. ¹³ Wùt ha ghàn hì kəta ngəksu wu jəm ha Yènfù ma fu gamti wûn, hì saŋle yi saŋlî wu hi yema sù njàŋ kokhe Fùyèn. ¹⁴ Wùt ha ghàn hì yafâ, wu toŋa chəhsu ndâ Fùyènsu ma su bê jəm ha wûn ma yuhi wûn nì gutû a Bâba yi yet. ¹⁵ Ghɨ shihi jə̀m ghɨ bimi na Yènfù nè chwukalò wùt àtɨ̂n, ma Bâba chwuk wûn ma wù lohi wûn wu khɨ̀ wu yafanu. Wùt àtɨ̂n shìki mô ma à ni nâbi be na wù hi yafâ, ma Yènfù nê lehêfo be wûn mi yê. ¹⁶ Ghàn hi fôktè be sanisu jə̂mà ha ngɨŋ sanisu, shyəma Yènfù nê chwuk ghàn. Wùt à chilichili jə̀màlò Yènfù yu yi jə̂m yì wuni, gha jwo yimana hi gânà. ¹⁷ Ìlajà ndùku mô kəbi wut te ghàhnà, yu wule bên, wù jə̂m nâ nì jyaka na kə wuli na yi faŋ hi nà a wu lɨ̀m wù tât nì bəha. ¹⁸ Wù fî jə̂m na wuli na, yi nâ, ni chyə bonâ mwə̀ mù yə̂mù ləmâ. ¹⁹ Wana noma wùt ha ghàn ki njaha lum wu Fùyèn we wu mô hamok, wùt lè nî wù kaha fwu wu lûm, ²⁰ wù hi khə na a chwùti nâbi nde lumu ha wùt à gha be wu lum afân, ma, wù bònhi wûn a yi kpû ma wù fê baŋ gha be ale ghɨ dô kə ni.