Gàlesiyà

Gàlesiyà

¹ A nyàkà mu Bôl ŋwàklù yîn. Mu mô wut à tum teka à lem à ghɨ̂t. À tà chwok jə wùt mu. A chwok Jisòs Klistù mu ha wut wù tum ghê Yènfù, a Bì we a wù tì ne wù lôtì a yi kpû. ² Mu chinhe toŋtî yîn ghàh à wana ne ghe a ghɨ mô afân ha ghàn a nôn a ghɨt a bimena ghe a ghɨ mô yi lak yi Gàlesiyà. ³ Yènfù, a Bì ghê Bâba ghàhnà Jisòs Klistù chwuti təm a jûŋà ha ghàn, ma wù fo yutìnì ha ghàn. ⁴ Klistù tì fo ngɨŋ à wûn ha kpu kum besu ghàhnàsu bônhì ghàhnà a mbyî yì be afân, a mô kə yi gha ye a Yènfù, Bì ha ghàhnà ndùku khɨŋa. ⁵ Kokhînì hi mô ha wûn a yû mù jɨ̀m. Àmèn. ⁶ Mu mò nì kani na ghàn ti nyâŋhì kahi kə ni a yi bàm yi wùt we a wu tì toŋa ghàn kum təm a jûŋà Klistù, hì jûmtè yê nì tum yì lò. ⁷ Mu jìsà wijə na yìna mò tum yì jùŋ. Mu jìsà na ghɨt ale bɨlà nê yi tof yani bu a jûŋ, mômhè hi fwəkte tum yì jùŋ yì Klistù. ⁸ Biyani, nâbi wùt ha ghàh makə anjèl à Fùyèn ki fê fòktè tum, yi mô hanɨ̂ŋ atɨ̂n à ye a ghàh tì fòkte ha ghàn, Yènfù sûlì wùt àtɨ̂n. ⁹ Ghàh che jis ha ghàn, mu wu hì fê jîsà kpenhe chin na, wùt ki fôktè tum yì lò ha ghàn, a bu ye a ghàn tì ywo ha ghàh, Yènfù sûlì wùt àtɨ̂n. ¹⁰ Yi ni chwùtè chin na, mu nè yi gha ye a ghɨta khɨŋa ma, à ye a Yènfù khɨŋa agha? A ni mò na mu nè na ghɨta hi saŋle ma? Mu shìki khɨŋ kə hi tè nì na ghɨta hi saŋlê, ma mu hi fê bu wut wù Klistù wù fètana. ¹¹ Wana noma, mu khɨŋa na ghàn hi khə na tum yì jùŋ ye a mu fòktè yì tà lo jə ha wùt. ¹² Mu tà tì yu jə tum mi yîn ha wùt, wùt tà tì yike jə mu nì gha yile. À tì chwuti Jisòs Klistù. ¹³ Mu khəlò na ghàn tì yû chyənà ye a mu ndùku chyə te mu ndùku baha jûmtè chyəna ghɨt a Jûs. Ghàn khə te mu ndùku fo ngə̂k ha nôn à ghɨ̂t a bimena nâ haŋaŋ fê mômhè hi bobhe ghɨna. ¹⁴ Mu ndùku khəlò hi chyə chyənà yì lak mi yîn chyâ ngwàk à mì yì dona, lêmà a tô atɨ̂n nâ haŋaŋ. ¹⁵ Biyani, Yènfù tì chwok mu shyəma ghɨ bwɨ mu, toŋa mu kum təm a wuna a jûŋà na mu hi fêtà ha wûn. ¹⁶ À ndùku mô te Yènfù kòŋa hi chwùtè Wâ wûn ha mu shyəma mu fokti tum yì jùŋ kum wûn ha tumu, mu tê yèn hi buf a yi gha ha wùt. ¹⁷ Mu tà tì kwok jə nâ a Jèlusalèm hi buf a yi gha ha ghɨt a tuma ghe a ghɨ ndùku hì mô a mu ashyə̂. Mu bɨlì lo yen lumu a Àlabiyà, mu lo afû kaha ben kə a Dàmaskùs. ¹⁸ Mu tì kwok a Jèlusalèm kə yi bàm wu lɨ̀m wu tât hi yen a Bità, ghàh à wûn chyə kwok a mu tuk njwòsù tân. ¹⁹ Mu tà tì fî yen jə wùt tum wùlè afû a bu kə Jêms, a mô wâ nè Bâba. ²⁰ Gha yin a mu nyàkà ha ghàn ni mò kə nâ hamok. Yènfù khəlò na mu wama wijə fəmi! ²¹ Mu tì lo afû yen wu lùk wule a Siliyà nì a Sìlisiyà. ²² À ndùku mô yâ nôn a ghɨt ghe a ghɨ tì bime ha Klistù a Jùdiyà khə wijə mu. ²³ Ghɨna ndùku ywo kə yi yû gha te ghɨta ndùku jîsà kum mu na, “Wùt we a wù chehì chwoka wulu ghàhnà ashyə̂ yâ ti kahi hi tè fòktè yi gha kum kəbi yi bimî ye a wù chehì khɨŋa na yi mi.” ²⁴ Ghɨna hì bəmhe Yènfù kum mu.

¹ A hì mô yi bàm yi lɨ̀m njwòsù kìk, mu fî kaha kwok a Jèlusalèm ghàh à Bànabàs. Mu lyi kəbi Taytùs. ² Mu kwok afû beka Yènfù chwùte ha mu na mu kəta hi kwôk. À ndùku mô te mu mò afû, mu nyamte jis a yi bàm ghàh à ghɨt ghe a ghɨ ndùku tihe ndâ Fùyèn, fôktè kwoka nì tum yì jùŋ ye a mu ndùku fôktè ha tumu. Mu ndùku fôktè ni shyəma fêt ye a mu nè chîn nì ye a mu chehì nê ma yi tê ləhà jə̀ halô. ³ Taytùs ndùku mô kəbi ghàh à wûn biyani ghɨ faŋ hi kàn na ghɨ kəta hi se nam a wuna nâbi te wù ndùku mô wut à Gɨlìs. ⁴ Gha mi yin na ghɨ se nam a Taytùs ni ndùku fwo ma à lòhè ghɨt a bimena yi fəma ghɨ le afû, te ghɨ bena lye a ghàh a fùtɨ̂n hi yute hi yen na ghàh yə yàni jùŋ ye a ghàh kəta a Klistù Jisòs agha. Ghɨna ndùku khɨŋa kə lumu hi kahe ghàh a wu kwòs ghɨt a Jûs yi sak. ⁵ Ghàh tà tì bimi jə gha yi ghɨna mi ye nâ hakoh beka ghàh ndùku khɨŋa na tum yì jùŋ faŋà kə hamok ha ghàn. ⁶ Ghɨt ghe a ghɨ ndùku lyê ha ghɨt a tihena afû ndùku fê kəta wijə gha hi kpenhe a tô yi gha afa a mu yike. Makə ghɨna ndùku mô kəbi ghɨt a tihena ma ghɨna ndùku wijə, yìna chwùtè wijə gha yile ha mu beka Yènfù lyè wijə wùt wùlè hanɨ̂ŋ. ⁷ Ghɨna ndùku bɨlà yena na Yènfù ti fo fêtì ha mu na mu fokti tum yì jùŋ ha tumu, kəbi yi ghəl te fu tì fo ha Bità na wù fokti ha ghɨt a Jûs. ⁸ Yèn fe a fu tì ne na Bità hi mô wut à tum ha ghɨt a Jûs mò kəbi wun we wù ne na mu hi mô wut à tum ha tumu. ⁹ A nê hì mô te ghɨt a tihena ghɨ tâ mu ghɨ̂n ni te Jêms ghê Bità nì Jon yena na Yènfù ti chwûtì təm a jûŋà ha mu fî ni mu hì boŋa fôktè tum yì jùŋ, ghɨna fo a wo ha ghàh à Bànabàs, hi chwûtì na ghàh à ghɨna hì mô kə a shyə̀ à mòk. Ghàh à ghɨna ki lêm na, ghàh hi fôktè tum yì jùŋ ha tumu, ghɨna fôktè ha ghɨt a Jûs. ¹⁰ Ghɨna fî jis kpenhi na kə ghàh nè yità hi tè gàmtè ghɨt a fufana, a mô kə gha ye a mu kòŋà nâ haŋaŋ hi tè nì. ¹¹ À ndùku mô te Bità bèna a Antiyòk, mu njaŋ ha wûn kə a ghɨta ashyə̂ kum gha ye a wù ndùku nê yi bu chilichili. ¹² À ndùku mô shyəma ghɨt ale lo ha Jêms ma ghɨ ben afû, Bità yə ghê tumu. Ghɨt atɨna bên, Bità yîmì hi kòtì a yi bàm, wù ghaŋ a gha hì fê yə wijə ghê tumu mu we beka wù ndùku fânà ghɨt mɨ ghɨ̂n a ghɨ ndùku jîsà na, ghɨ kəta hi tè se nam wu tumu we a wu tì bime. ¹³ Ghɨt a Jûs ale hì boŋa nê yê kəbi te wûn, nâbi Bànabàs sina gha fəmi mi yîn. ¹⁴ À hì mô te mu yena na ghɨna nè a gha ghɨ bu chilichili te tum yì jùŋ ye a yì mò hamok yike, mu jis ha Bità kə ghɨta ashyə̂ à jɨ̀m buf na, “Wò gbi yàni hi tè mò wut à Jûs, chyə̂ te wu tûm, bɨlà kânà na tumu hi chyə te ghɨt a Jûs agha? ¹⁵ “Ghàhnà nâ a ghàhnà à sù ngɨŋ mò ghɨt a Jûs kə nâ a yi bwɨ̂, bu wu tûm we a ghɨ jîsà na à mò ghɨt a gha a be, ¹⁶ biyani khə na ghɨ lêmà wijə kə na wùt hì mô chilichili beka wù lèmà Saki. Wùt mò chilichili kə wu yu afa wù bime ha Jisòs Klistù. Ghàhnà hì mô ma ghɨ ti boŋ bimî ha Klistù Jisòs shyəma ghàhnà hi mô chilichili a Yènfù ashyə̂ kum yi bimî yi ghàhnà ha Klistù, khə na Saki wi hi nì na wùt hi mô chilichili a Yènfù ashyə̂ kə njwo wùt àtɨ̂n lèmà Sak mi yê. ¹⁷ Biyani ghàhnà shìki mômhì hi tè mò chilichili a Yènfù ashyə̂ beka ghàhnà nì Klistù mò hamok, ghɨ fê yena na ghàhnà boŋa nê be, yi hi chwûtè na Klistù tòkà be ma? Yi wijə ya nâ hakoh! ¹⁸ Mu ki kahi hì bime a gha, ma mu chehì tunhelò, ma yi hi chwûtè na mu ti khɨm Saki. ¹⁹ Mu chehì chyə yi dèt yi Sak biyani mu de Saki shyəma mu nè hi chyə̂ kə hi tè kokhe a Fùyèn. Ghɨ tì banti mu a kàkfùtàfù ghàh à Klistù. ²⁰ Mu hi mô chîn, fê chyə wijə a mu a ngɨŋ, à hì chyə Klistù a mu fùtɨ̂n. Chyənà ye a mu chyə chîn mò beka yi bimî ye a mu kəta ha Wâ Fùyèn we a wù tì kòŋà mu fo ngɨŋ à wûn kpu kum mu. ²¹ Mu wijə hi tè tunhe təm a jûŋà a Fùyènà. Wùt shìki tê mò chilichili ghê Yènfù kə njwo wù lèmà Saki, ma à hi mô na Klistù ni tì kpu kə halô.”

¹ Ngwònu ghɨt a Gàlesiyà wûn! Ghɨ loklô ghàn ma? Ba ghɨ tî chwûtì mihì kə nâ te ghɨ tì bante Jisòs Klistù a kàkfùtàfù ha ghàn? ² Ghàn fòkti gha ha mu. Ghàn fokti ha mu nâ, ghàn tì khɨti Yohnà Fùyènà beka ghàn lèmà Saki ma, ma ghàn tì khɨti beka ghàn ywo tum yì jùŋ bimilò ma? ³ Ghàn ngwò ghə ni? Ghàn yìmi hì chyə̂ beka Yohnà Fùyènà, ghàn khɨŋa hi chyə mihì a ghàn a jyak a ngɨŋa njwô ghə? ⁴ Yi ni chwùtè na ghàn chehì yena ngə̂k nâ haŋaŋ ni kə halô ma? Ghàn wijə hi tè yena kə ngə̂k ni halô. ⁵ Yènfù tî fo Yohnà wuna ha ghàn fî nî a gha a kanana a ghàn a fùtɨ̂n njwo ghàn lèmà Saki ma, ma njwo ghàn ywo tum yì jùŋ ghɨ bimilò agha? ⁶ Ghàn yen lê Ablàhâm! Wù tî bimî ha Yènfù, fu lyi wûn ha wùt à chilichili. ⁷ Ba ghàn ti yen chîn na wana Ablàhâm mò ghɨt ghe a ghɨ bime Yènfù? ⁸ Ŋwàklù Fùyèn hì mô ma yì ti fôktì na Yènfù bè nê ma tumu hi mô ghɨt a chilichili beka yi bimî yi ghɨna. A yi bàm atɨ̂n Yènfù ki fôktì tum yì jùŋ ashyə̂ ha Ablàhâm na, fu bè bònhèlò ghɨta tu lak tù jɨ̀m kum wûn. ⁹ Yi chwûtè na nâbi nde we a wù bime kətalò bônì kəbi yi ghəl te Yènfù tì bònhe Ablàhâm kum yi bimî yi wuni. ¹⁰ Ghɨt ghe a ghɨ yikte ha Saki kəta ndi Fùyèn njwo ghɨ ti nyak a ŋwàklù Fùyèn na, “Ndi Fùyèn mò nâbi ha nde we a wù lèmà sak tê a tu mô a ŋwàklù yì Sak dâŋà yile.” ¹¹ Yi ti fwu kə a ndan chin na wùt wijə hi tè mò chilichili a Yènfù ashyə̂ kə njwo wù lèmà Saki, njwo ghɨ ti nyak kəbi a ŋwàklù Fùyèn na, “Ghɨt ghe a ghɨ mô chilichili kum yi bimî yi ghɨna bè khɨte lò chyə ye a yi bè mê wi.” ¹² Saki kəta wijə gha kum yi bimî. Ghɨ ti bɨlà nyak na, nâbi nde we a wù nè te Saki khɨŋa bè hì chyə kə kum yini. ¹³ Klistù tî yun tu ghàhnà a ndi afa Saki tì bèna nì yini a wu lum na wù tì fyî ndi àtɨ̂n a ghàhnà wu lùk njwo ghɨ ti nyak na, “Ndi Fùyèn mò nâbi ha nde we a ghɨ banti wûn a fukàk.” ¹⁴ Klistù Jisòs tî nî na bôn ye a Yènfù tì chwùne ha Ablàhâm na yi boŋà yen ha tumu. Wù tì ni ni shyəma bimî yi ghàhnà ni ma ghàhnà boŋa khɨti Yohnà Yulena mu ghe a ghɨ tì chwùne. ¹⁵ Wana noma, mu fo chwena yi gha ha ghàn, yi gânà kə tuk mù jɨ̀m. Ghɨt à bà ki bime yi gha ki yə mu kân, wùt wi hi fè chwôk, makə hi kpenhe yi gha atɨ̂n. ¹⁶ Yènfù tî fo chwunu ha Ablàhâm ghê wâ wûn. Ŋwàklù Fùyèn tà jis jə na ghɨ tì fo ha ghê wana hidù. Ghɨ toŋti kə wan wù mòk, wan mu wùna mô Klistù. ¹⁷ Mu ni jìsà hi fwu na, Yènfù tî yə̂ kànû chwûnà yi gha ashyə̂, fu bu hi bè faŋ hi nì. Ghɨ tì fate Saki a yi bàm, ma lɨ̂m mù ti chya yi ghə yì kìk nì lɨ̂m mtât te ghɨ yə kànû, ma Sak yi tɨni wi hi fè kwuna mu kân mù tɨ̂n hi tunhe chwùna wûn. ¹⁸ Yènfù shìki fo yi fo yi wuni ha ghɨta beka ghɨ lêmà Saki, ma fo tɨni hi fê bê wi ha wùt kum wu chwùna. Fu tì fo yi fo mi ye ha Ablàhâm kum wu chwunu we a fu tì ne. ¹⁹ Saki ni hì fêtà nâ ghə? Ghɨ fo Saki hi kpenhe a tô wu chwùna shyəma wùt hi fena wu hi khə na yi ti ni be. Saki kəta hi tè mò kə yi mô hi tàn shyəma wâ Ablàhâm we a Yènfù tì fo chwunu wûn kum wûn ben. Ghɨ tì tum anjèlsu Fùyènsu nì sak yi tɨni ha Musìs na wù chyàhi ha ghɨta. ²⁰ Wùt wijə hi tè mò a ghɨta fùtɨ̂n, chyâhè yi chyâhì gha, a bu na ghɨt atɨna mò à bà. Biyani Yènfù tà tì tohne jə a wùt hi fo chwunu wunu ha Ablàhâm. ²¹ Yi ni chwùtè na Saki tunhe chwunu te Yènfù tì chwune ma? Yi wijə yâ nâ hakoh. À shìki mô ma Yènfù tì fo sak yile shyəma yi ni na ghɨta hi chyə̂, ma sak yi tɨni hi mô hi nì kə nâ na ghɨta hi mô chilichili a Yènfù ashyə̂. ²² Biyani ŋwàklù Fùyèn jis na nâ ghɨt à jɨ̀m a mbyî fètà a kwôs ha be. Yi gan ni shyəma Yènfù fo chwuna we a fu tì chwùna ha ghɨt ghe a ghɨ bime ha Jisòs Klistù. ²³ À ndùku mô ashyə̂ shyəma bimînì hi mô, ghàhnà ghɨt a Jûs gbê kə yi dèt yi Sâk te ghɨt a ndâ chyâk, hi tàn shyəma Yènfù bè chwùtê banhi bimî mi yîn. ²⁴ Saki tòknà kə yi tôknà nì ghàhnà hi tàn shyəma Klistù bê ben hi nì na ghàhnà hi mô chilichili kum yi bimî. ²⁵ Chîn te ghàhnà hì kəta bimînì, Saki fè tôknà wijə nì ghàhnà. ²⁶ Ghàn à jɨ̀m mò wana Fùyènà beka ghàn ti bime ha Klistù Jisòs. ²⁷ Nâ ghàn à jɨ̀m te ghàn tì fye mòlû ghàn chîntì ghàn à Klistù hì mô ma ghàn ti lyi chyəna wuna. ²⁸ Hanɨ̂ŋ fè wijə ha wùt à Jûs ghê wùt à Gɨlìs. Hanɨ̂ŋ bu ha wùt we a wù mò a wun a ngɨŋ ghê wùt we a wù mò a kwôs, bu ha wùt wù lɨmà ghê wùt wù ywên beka ghàn à jɨ̀m hì chîntè mô kə a shyə̀ à mòk ghàn à Klistù Jisòs. ²⁹ Ghàn shìki mô ghɨt a Klistù ni, ma ghàn hi mô wana ha Ablàhâm ma ghàn bê khɨti shyə ghe a Yènfù tì chwùne ha wun.

¹ Mu jìsà na, ghɨ ki lêmà walà ha yə̂ bɨn, wu baha tobtê, wù hi mô kəbi te a kwôs a bɨn afû, nâbi te mwə̀ mù tɨ̂n kəta kə nâ wûn a bɨn afû. ² Wu kəta ghɨta te ghɨ tôknè nì mwə̀ mù wûn fê tôknè nâ nì wûn hi tàn shyəma wù ləmà kpen te bè wun khɨŋa. ³ Yi ni mò kəbi yi ghəl te à ndùku baha mô te ghàhnà baha mô teka ghɨ khɨli gha ghe a ghɨ mô hamok, ghàhnà fêtà te wu kwôs ha yohnù we a wu saka mbyî. ⁴ Yu ben kwok kpên, Yènfù tum Wâ wûn na ghɨ bwɨ te wût, wù ləma kwôk a ghɨt a Jûs yi dèt yi Sak, ⁵ shyəma wù yun tu ghɨt ghe a ghɨ ndùku mô yi dèt yi Sak afû, hi nì na ghàhnà hi mô wana ha Yènfù ⁶ Te ghàn hì mô wana ha Yènfù, fu ti fo Yohnà Wâ wuna ha ghàhnà a təm, ghɨ nê ghàhnà toŋte Yènfù na, “Bàba, Bàba mù.” ⁷ Yi ni chwùtè na ghàhnà fè wijə wu kwôs. Ghàhnà bɨlà mô a wan ha Yènfù, kum ni, kəta mwə̀ me a fu fo ha wana wuna. ⁸ À ndùku mô ashyə̂ te ghàn ndùku baha mô teka ghɨ khɨli Yènfù, ghàn mô wu kwôs ha mwə̀ mùlè, a bu mù yèn. ⁹ Biyani ghàn ghɨ hì khə Yènfù chîn, nâbi te à bɨlà lo wun hi khɨle ghàn. Yi mô hi tè fè mò yàni na ghàn kahi ma ghɨ hi fêtà kwôsà ha yohnù wu bot wuna, wu befa nyàblè mô ni agha? Njwô ghə te ghàn khɨŋa hi fè kahi ha wu kwôs ha yohnù wuna agha? ¹⁰ Ghàn lèmà na tuk mùlè nì njoŋ su lesu nì ngàm su lesu kəbi nì lɨ̀m wule mò hanɨ̂ŋ. ¹¹ Mu fànà na fèt yi mi ye a mu tì ne a ghàn a fùtɨ̂n ti ləha kə halô! ¹² Mu chyate ghàn a wana noma na ghàn hi mô kə te mu beka mu hì mô kəbi te ghàn. Ghàn tà ni jə be yìlè ha mu. ¹³ Ghàn khə na mu tì ben hi fòktè tum yì jùŋ ha ghàn ashyə̂ ma à ni yi yaf te mu ndùku yafa. ¹⁴ Yaf mi ye hì mô kəbi ha ghàn ni te yi mômhì yile biyani, ghàn tà tì nyahi jə mu, ghàn faŋ hi màkà mu. Ghàn fyi kə mu te ghàn fyi anjèl à Fùyèn. Ghàn tì fyi kə nâ mu te ghàn fyi Klistù Jisòs. ¹⁵ À tì gan ghə kum saŋlî ye a ghàn ndùku kəta? Mu jìsà kə nâ hamok na, à ndùku mô na yi hi bonê ma ghàn ti chwokti se a ghana fo ha mu. ¹⁶ Ba mu ti kahi hì mô bànà chîn ha ghàn kə kum mu jìsà hamok ma? ¹⁷ Ghɨt mi ghe yusa lùmà a ghàn a yi ghâ, biyani kəta kə kwâktì yi be. Ghɨna khɨŋa na ghàn de mu ma ghàn hi lûmà kə a ghɨna yi ghâ. ¹⁸ Yi jwôfàlò kə nâ hi tè lùm a gha a jûŋà nâbi wùni yu, a bu kə wu yu afa ghàhnà mò hamok. ¹⁹ Wana noma ghɨ jûŋà, mu ywolò lûmì kum ghàn kə nâ te nè wan wu yu afa wù lima, hi tàn shyəma ghàn hi chyə chyənà ye a Klistù kəta. ²⁰ Nde fo ma ghàhnà hi mô amok chîn shyəma mu khɨli lum we a mu mò hi jìs atɨ̂n ha ghàn agha? Kwâktì yi mi fo ngə̂k ha mu kum ghàn nâ haŋaŋ. ²¹ Ghàn ghe a ghàn khɨŋa hi tè chyə yi dèt yi Sak, ghàn fokti lê ha mu nâ, ghàn ywo wi gha ye a Saki jìsà ma? ²² Ghɨ ti nyak a ŋwàklù Fùyèn na, Ablàhâm ndùku kəta wana lɨmànà à bà. Wùlè mô ma à bwɨ wut wù ywên, a mô a kwôs, wùlè mô ma à bwɨ wut wù ywên, a bu a kwôs. ²³ Wan we a nè wûn ndùku mô a kwôs yâ mô ma ghɨ bwɨ kə nâ te ghɨ yè bwə nâbi nde biyani we a nè wûn ndùku bu a kwôs mô ma ghɨ bwɨ kum chwunu we a Yènfù tì chwùne. ²⁴ Ghàhnà làhi lyè gha ghɨ̂n ma fəkna gha atɨ̂n. Ywen ghɨ̂n mò kə ni te kànû mù bà. Wù mòk lyê luk wu mu kàn me a Yènfù tì yə ghê Musìs a kun à Sinà, ma wù ti bwɨ wana, ghɨna mô hi tè mò wu kwôs. Yet yi wùt ywên wuna mô Hagà. ²⁵ Hagà ni mò ni te kùn à Sinà yi lak yi Àlabiyà. Wu lyê luk wu Jèlusalèm ye a yì mò chîn njwo ghɨt a Jèlusalèm mò wu kwôs ha saki. ²⁶ Biyani Jèlusalèm ye a yì mò a nyə̂ wijə a kwôs, a mô nì ha ghàhnà. ²⁷ Beka ghɨ ti nyak a ŋwàklù Fùyèn na: “Wo saŋlê a wùt ywên we a wò tà timi bwɨ jə wan Wo jala a wo we a wan tà timi yaf jə wò, beka wùt ywen we a ghɨ maka bè hì kətalò wana, ghɨ dô chyâlà wana wùt ywên we a wù kəta lɨm.” ²⁸ Wana noma, ghàn mò te Isìk beka ghɨ ti boŋ bwɨ kəbi ghàn kum chwunu wu Fùyènù. ²⁹ À ndùku mô a wu tuk mefû, wan we a ghɨ bwə kə nâ te ghɨ yê bwə nâbi wùni wan hì chwoka wulu wan we a ghɨ tì shihi bwɨ ma à ni a Yohnà Yulena yâ. Yi ni gànà kəbi ya chîn. ³⁰ Biyani ŋwàklù Fùyèn jìsà na ghə ni agha? Yì jìsà na, “Jum kwôs a wut ywên ghê nì wâ wûn, beka wâ à kwòs wuna bè yə wi shyə bè ghɨna, a bu kə wâ wùt ywên we à bu a kwôs.” ³¹ Ghàn ti yen wana noma na, ghàhnà wijə wana wùt ywên we à mò kwôs yâ. Ghàhnà mò wana wùt ywên we wù wijə a kwôs.

¹ Klistù ti fihi ghàhnà a yi fèt yì kwòsì shyəma ghàhnà hi khɨte ngɨŋsu ghàhnà su. Ghàn fatè khɨti lê ngɨŋ sanisu, kə wùt nè fê kaha lihe ghàn a yi fèt yi kwòsì. ² Ghàn yuti! Mu Bôl jìsà ha ghàn na, kə ghàn de na ghɨ se nam wanu, ma yi hi chwûtè na Klistù tà ni jə gha ha ghàn nâ hakoh. ³ Mu fè fate fôktè kə nâ yi fôktì ha ghàn na, à fi bimi nâbi nde na ghɨ se nam a wuna, ma wù hi khə na wù kəta hi tè lèmà kə Sak tù jɨ̀m. ⁴ Ghàn ghe a ghàn khɨŋa hi tè mò chilichili a Yènfù ashyə̂ kə njwo ghàn lèmà Saki hi khə na, ghàn ti jyâhì ngɨŋ sanisu ghàn à Klistù. Ghàn ti tunhi hi khɨte a təm a jûŋà a Fùyènà. ⁵ Yohnà Fùyènà nèlò na ghàh hi khə hamok na ghàh mò chilichili a Yènfù ashyə̂ kum yi bimî yahi. ⁶ Yi mô ni beka ghàhnà shìki mô ghàhnà Klistù Jisòs, makə wùt ti se nama a wuna makə wù tà se jə̂, ma yin hi fêtà wijə gha yile. Gha yi ta ni mò kə na wùt hi chwûtè bimî yi wuni tohne a yì kòŋ. ⁷ Ghàn chehì gbê kə nâ wu lum wu jûŋù. Mu khə wi nâ à che fi tahe ghə ghàn na kə ghàn khɨti gha ye a yi mô hamok agha? ⁸ Kwâktì mi yîn tà che lo jə ha wun we a wù toŋa ghàn. ⁹ Ngàn yìlè mò na, chɨmlana tobte nâbi yàni, ghɨ làhi gbì kə bana kwaŋa chika à jɨ̀m. ¹⁰ Mu khə na te ghàhnà chìntè mô kə a shyə̀ à mòk a Bâba yì dèt, na ghàn jùmtè wi gha wûtì, a bu kə yi gha ye a mu jìsà, bime na, Yènfù nè folò ngə̂k ha wùt we a wù fumhe ghàn, makə à mò nâbi nde. ¹¹ Ghɨ chehì fê chwoka kə wulu mu, a wana noma njwô ghə, a wu yu afa yi shìki mô hamok na mu yike na ghɨ kəta hi tè fate ghɨta agha? Yi shìki hì mô hamok, ma yiki ye a mu yike kum yi fêt yi Jisòs a tô kàkfùtàfù hi fê yafa wijə ghɨt a Jûs. ¹² Mu jə̀mà na ghɨt ghe a ghɨ fumhe ghàn lahà yak à yen nì ngɨŋsu ghɨna su kə hamok! ¹³ Yènfù ti chwokti ghàn a wana noma na kə ghàn hi fê mô wu kwôs ha saki biyani, kə ghàn lem kə na ghàn hì mô a ghàn a sù ngɨŋ na ghàn hi kwoti nâbi ghə ghe a ghɨ foma, nê nì wun wanu. Ghàn hi bɨlà kôŋà ngɨŋ sanisu, fêtà ha wana ne ghɨ le. ¹⁴ Nâ sak tù jɨ̀m chìntè bê fwo kə a yi sak yì mòk na, “Kòŋ wâ nâ, kə yi ghəl te wò kòŋà ngɨŋ yâ.” ¹⁵ Biyani ma ghàn ki kahe ha nyamsu ghə̀n sù hì lumle ngɨŋ sanisu, ma ghàn hi khə na chîntì yani làhi mè mìhì. ¹⁶ Mu khɨŋa hi jìs ha ghàn na, ghàn hi gbê kə te Yohnà Yulena tihe ghàn. Ghàn shìki nî ni, ma ghàn hi fê nê wi gha ghe a ghɨ foma a njyàsu wùnsu. ¹⁷ Gha ghe a ghɨ foma a njyàsu wùnsu kòŋàlò na ghàhnà hi nô gha ghe a Yohnà Fùyènà khɨŋa na ghɨ hi nê, Yohnà Fùyènà boŋa nô ghe a ghɨ foma a njyàsu wùnsu na ghàhnà hi nê. Gha mɨ ghɨ̂n wijə nì sunu, fê nê na wùt hi nê wi gha ghe a wù khɨŋa hi nì. ¹⁸ Biyani ma Yohnà Fùyènà shìki tihe ghàn, ma ghàn hi fê chyə̂ wi yi dèt yi Sak. ¹⁹ Gha ghe a njyàsu wùnsu kòŋà hi tè nì kə̀kà kə a ndan. Hi kòŋ na ghɨta hi chyə nì ywena makə nì lɨm à ghɨ̂tà, chyə chyənà su liŋ su, chyə te sù bû, ²⁰ ngumle mosòmù, fiŋa sù njwòk, bânà à ghɨ̂t, nô, kəta ghə̀k, nyâŋhì bâŋhè wu lâ, kwâktè kə kum ngɨŋsu ghɨna su, bênà nì nôhìnì nì jyàhènà, ²¹ kəta se a fwona, nyo chyâhè lùkû, kòŋà hi tè yùŋtì a tu lùk tu yə tu be tu. Gha atɨna dò kə ni. Mu kɨna ha ghàn chîn kəbi te mu tì kɨna ashyə̂ na, “Ghɨt ghe a ghɨ nê gha mɨ ghɨ̂n bè khɨte wi luk wu fə̀n wù Fùyènù.” ²² Biyani Yohnà Yulena mo tam wu jûŋù nê na ghɨta hi kôŋà ghɨ le, saŋlê, kəta yi yutì, wunhê, tôknè fê nê jùŋ ha ghɨta, kəta yi bimî, ²³ kəta yi ngumlî, khə hi khɨte sù ngɨŋ. Sak yile tunhe wi nâ gha yì mòk atɨ̂n à gha afân. ²⁴ Ghɨta Klistù Jisòs mò ma ghɨ ti banti njyàsu wùnsu ghɨna su bakhe nì gha ghe a ghɨ foma na ghɨ hi nê a kàkfùtàfù. ²⁵ Chin te ghàhnà hì chyə kum Yohnà Yulena, ghàhnà kəta hi tè gbì kə wu lum afa a ghɨ tihe ghàhnà atɨ̂n. ²⁶ Kə ghàhnà hi ghaŋhe wunu, kə ghàhnà hi shikà təm a wana ne, kə ghàhnà fî ghək ngɨŋsu ghàhnàsu.

¹ Wana noma, wùt ha ghàn ki nî nâbi yìni gha be, ghàn ale ghe a Yohnà Yulena tihe, ghàn mômhì hi chwùtè lumu ha wûn kə nâ nì yutìnì. Ghàn shihi chwùtì, ghàn hi tôknè nì ngɨŋ sanisu bu ya, ma nâ ghàn boŋà fen. ² Ghàn hi gâmtè bêkà ngəksu wana ne ghana. Ghàn shìki tê nì ni, ma ghàn hi lunhe sak yi Klistù. ³ À shìki kwâktè nâbi nde na yi mò a shyə, biyani bu, ma wù hi lehe kə ngɨŋ à wûn. ⁴ Nâbi nde fatè ki chyənà à wûn yì ngɨŋ. Yì shìki jwôf, ma wù hi jala nâ a wun a ngɨŋ, a bu kum te wù fə̀knè ghê wùt, ⁵ beka nâbi nde kəta kə hi tè nè bâh a wuna yi fètà. ⁶ Wùt we a ghɨ yike wun nì chyənà yi bimena kəta hi tè jyatè fo chichàsu wunsu nì mwə̀ mù jùŋ me a wù kəta, nâ mù jɨ̀m. ⁷ Kə wùt nè lehe ngɨŋ à wûn. Wùt wi hi nyìkhè Fùyèn. Wùt yome nâbi ghə, ma wù bê kpê kə ghɨna. ⁸ Wùt ki yome kə shyə ghe a ghɨ foma a njyàsu wunsu wùnsu, ma wù bê kpê kə ghɨna, a mô yi kpu. Wùt ki yome shyə ghe a Yohnà khɨŋa, ma Yohnà bê ni, ma wù kpê kə ghɨna, a mô chyə ye a yì bè mê wi. ⁹ Kə ghàhnà bot hi nè jùŋ, beka ghàhnà ki faŋ hi bôt, ma tuku bê kpen, ma ghàhnà kpi. ¹⁰ Yi ni chwùtè na ghàhnà shìki kəta wu lum nâbi yini hi nè jùŋ, ghàhnà hì mômhè nê kə ha ghɨt à jɨ̀m, fê nê nâ hanɨ̂ŋ ha ghɨt ghe a ghàhnà ghɨna kəta bimî yì mòk. ¹¹ Ghàn yen a se a ŋwàklù a chika ghe a mu nyaka a ŋwàklù afân ha ghàn kə nâ nì wo ma. ¹² Ghɨt ghe a ghɨ chinte ghàn na ghɨ se nam wanu mò ghê a ghɨ khɨŋa hi tè chwùtì wunu a gha a njyàsu wùnsu. Ghɨna nè gha mi yîn beka ghɨna fànà na ghɨna shìki yikî na ghɨta bimi kum kpu yi Klistù a kàkfùtàfù, ma ghɨ nê chwok wulu ghɨna. ¹³ Nâbi ghɨt mu ghe a ghɨ se nam wu ghɨna lèmà nâbi wi Saki, biyani khɨŋa kə na ghɨ se nam wanu shyəma ghɨna hi gbê kûnà dòk, jîsà na ghàn ti ni gha ye a ghɨna yê hì khɨŋa. ¹⁴ Biyani ha mu, mu kùn à wi dòk kum gha yile, a bu kə kâkfùtàfù Bâba ghàhnà Jisòs Klistù. A mô à ghɨ̂n ghe a ghɨ ne, mwə̀ mù mbyî hì mô kə ha mu te mwə̀ mù kputemù, nâbi mu mô kə te shyə a kpona ha mwə̀ mù mbyî. ¹⁵ Makə ghɨ ti se nam wanu makə ghɨ tà se jə̂, yìna kəta wijə gha yile hi nì. Gha yi ta ni mò kə na, Yènfù ni, ma wò kahà hi mô wut wù fê. ¹⁶ Yutì Fùyènì nì kwohi seni hi mô ha ghɨt ghe a ghɨ chyə ni te mu jìsa, fê mô ha ghɨt à Fùyènà à jɨ̀m. ¹⁷ Hi mihì, mu wu hì jîsà na, kə wùt nè fê fo ngə̂k ha mu kum lat wuna a mu wu wùn chwùtè fêt yi mi ha Jisòs. ¹⁸ Bâba ghàhnà Jisòs Klistù chwuti təm a jûŋà wuna ha ghàn a wana noma. Àmèn.