Efisùs

Efisùs

¹ À nyak mu Bôl ŋwàklù yìna ha ghàn ghɨt a Fùyènà ghe a ghàn mò kə a ghàn a yi bimî ha Klistù Jisòs, chyə a Efisùs. Mu mô wùt wù tum ha Klistù Jisòs ma à chwok Fùyèn. ² Yènfù, Bè ghàhnà ghê Bâba Jisòs Klistù ti chwûtì təm a jûŋà ha ghàn, fo yutìnì ha ghàn. ³ Ghàhnà kokhe Yènfù, a Bè Bâba ghàhnà Jisòs Klistù. Fu ti bonhi ghàhnà a yòhnà nâ nì mwə̀ mù jùŋ mù jɨ̀m me a mù fwo a nyə̂ tohne a Klistù. ⁴ Nâbi shyəma wù fati mbyî, ma wù ti chwokti ghàhnà tohne a Klistù, na ghàhnà bê hi mô ghɨt a yulena, kəta wi njahi a Yènfù ashyə̂. ⁵ Yènfù ndùku mô ma wù ti lem na fu bè lyê ghàhnà a wana wuna tohne a Jisòs Klistù, ma à koŋ kə wûn a wun yi saŋlî lem na yi hi mô ni. ⁶ Yi ni chwûtè na ghàhnà kəta hi tè fo yi kokhî ha Yènfù kum tôknà yi kanani ye a wù chwùte ha ghàhnà tohne a Wâ wûn wù kòŋ. ⁷ Klistù tî yun tu ghàhnà nì luŋ mù wun me a wù tì sùha te wù kpo, Yènfù ki lêhèfo besu ghàhnàsu. Yìna ni chwùtè təm a jûŋà ghe a fu kəta ha ghàhnà. ⁸ Fu ti tôknà nì ghàhnà wu lum wu kananu ni na ghàhnà hi khə gha. ⁹ Yènfù ti nî na ghàhnà khɨli gha ma fu tì lem, a hì khə kə wûn. Fu tì ni ni beka fu khə kə gha à jɨ̀m. Wù tì lem gha mɨ ghɨ̂n na ghɨ gan tohne a Klistù, ma a koŋ kə wûn na yi hi mô wu lum afân ni. ¹⁰ Yènfù ti lem na tuku bè kpenalò, ma fu chinti mwə̀ mù jɨ̀m a nyə̂ nì a chyə̂ ma wù lem kə a Klistù sah yì sak. ¹¹ Fu ti chwok ghàhnà na ghàhnà hi mô ghɨt a wuna tohne a Jisòs Klistù kə yi ghəl te fu tì bakte lema shyəma fu fati mbyî. Nâbi ghə gânà kə wu lum afa a Yènfù khɨŋa na yi gan atɨ̂n. ¹² Fu chwok ni shyəma ghàh ghe a ghɨ tì bime Klistù ashyə̂ na ghɨ hi bəmhe Yènfù kum a jyak ghe fu kəta. ¹³ Yènfù ti fyî kəbi ghàn ghɨt a Efisùs bônhì ghàn tohne a Klistù te ghàn ywo tûm yì jùŋ ye a yì mò hamok, ghàn bimî. À ndùku mô te ghàn bime, fu chwe ghàn nì Yohnà Yulena ghe a fu tì chwùne, ¹⁴ a mô a chwena hi chwùtì na tuku bè kwoka kpenalò, ma ghàhnà khɨti shyə ghe a Yènfù tì chwùne, wu lum afân, ma ghɨta hi kokhe Yènfù kum jyak a wuna. ¹⁵ - ¹⁶ A ni gha ye yi ne na mu hi fo kə yi fô yòŋnà ha Yènfù, kwâktè ghàn a mu yi jə̀m kə yû mù jɨ̀m hi yìmì te mu tì ywo bimî ye a ghàn kəta ha Bâba ghàhnà Jisòs Klistù, nì kôŋ ye a ghàn kəta ha ghɨt a Fùyènà. ¹⁷ Mu shihi jə̀m nâbi wùni yu, mu hi chyate Yènfù Bâba ghàhnà Jisòs Klistù, a mô Bì we a wù kəta jyaka na wù fo Yohnà a wuna ghe a ghɨ fo tofu fê chwûtè banhe gha a kanana wuna shyəma ghɨ ni ma ghàn hi fate khə wûn. ¹⁸ Mu jə̂mà kəbi na Yènfù ni kwâktì yani yema, ma ghàn hi khə na ghàn bè khɨtelò mwə̀ mù jùŋ me a fu bakte ha ghàn nì ghak yi yulani ye a fu lema ha ghɨt a Fùyènà, ¹⁹ jə̂mà kəbi na ghàn yen à khɨli jyak a kanana ghe a Yènfù kəta, a mô à ghɨ̂n ghe a ghɨ gâmtè ghàhnà ghɨt a bimena. A mô kəbi jyak ghe a wù tì lye ²⁰ hi nì na Klistù kahà lòti a yi kpû. Klistù lôtì ni, wù lem wûn a wun a kpen wu wo ta a nyə̂. ²¹ Wù hì mô afû chîn, saka nâ yohnù wù jɨ̀m nì jyak wù jɨ̀m, ngaŋte chyâ nâbi wùni fə̀n a mbyî chîn nì ha mbyî ye a yì bè bênà. ²² Yènfù ti fo mwə̀ mù jɨ̀m a wun a wô fî lem wûn na wù hi mô a tû a gha à jɨ̀m a ndâ Fùyèn. ²³ Ndâ Fùyèn mi yîn mô wun wu Klistù, fye jyak à jɨ̀m ha wun, a nê wun na nâbi ghə hi mô, nâbi afa.

¹ Ghàn mò ni ma ghàn ndùku mô ma ghàn ti kputî a ghàn a yòhnà kum ta tu nì gha a be te ghàn ndùku nê. ² Ghàn ndùku chyə kə a sùbe afân te ghàn ndùku baha jûmtè gha a mbyî, ywo ha fə̀n we a wù saka yohnù wu be ghe a ghɨ fela chyâ a nyə̂, a mô yohnà ghe a ghɨ tihe ghɨt ghe a ghɨ ywo wi ha Yènfù. ³ Ghàhnà à jɨ̀m ndùku chyə kə te ghɨt a be mɨ ghɨ̂n ashyə̂, nê kə a gha a be ghe a njyàsu wùnsu ghàhnàsu kòŋà, a foma nâbi ghə, ghɨ nê kə yi nî. Chyəna jyà wùn mɨ ghɨ̂n chwûtè na ghàhnà kpene kə hi bè khɨtè ngə̂k yì chìk ha Yènfù te ghɨt ale. ⁴ Biyani, Yènfù kwohi seni ha ghɨta nâ ha haŋaŋ koŋ ghàhnà nâ haŋaŋ. ⁵ A ni mò gha ye a fu tì lòhi Klistù boŋ lôhì ghàhnà a yi kpû. À ndùku mô ni, ma ghàhnà ti kputî a yòhnà kum besu ghàhnàsu. Yènfù bônhì ghàhnà beka təm a jûŋà ghe a fu kəta. ⁶ Yènfù tî lôhì Klistù Jisòs bakhe kə nì ghàhnà a kak à mòk lem wûn nì ghàhnà a wu kpòk wu tù fə̀nù a nyə̂ shyəma wù hi sakâ, ghàhnà boŋa sakâ tohne a wûn. ⁷ Wù tì ni ni shyəma à bê hì mô nâbi yini, ghɨta yena na tôknà wuni yi kanani kəta wi fêkà, a mô yê a wù kòŋà ghàhnà chwûtì tohne a Klistù Jisòs. ⁸ - ⁹ Yènfù bônhì ghàn tohne a ghàn yi bimî kum təm a jûŋà ghe a wù kəta. Ghàn tà fet jə shyə ale a ghàn a sù ngɨŋ shyəma Yènfù lak nì bôn mi yîn. À mò kə yi fo yi Fùyènì. Yi ni chwùtè na wùt wi hi tè kùn à ngàŋtù na yi ti fet shyə ale shyəma ghɨ lak yi nì bôn mi yîn ¹⁰ Ghàhnà mò ni a mô yi fêt yi Fùyènì. Wu fate ghàhnà tohne a Klistù Jisòs na ghàhnà hi chyə̂ chyənà yì jùŋ ye a wù hi mô ma wù ti fati lem na ghàhnà hi chyə̂. ¹¹ Ghàn tumu, kə ghàn yìta ghɨt ghe a ghàn ndùku mô ashyə̂. Ghàn mò wu tûm yi bwɨ̂, ghɨt a Jûs toŋte ghàn na, “Ghɨt ghe a ghɨ mô teka ghɨ fati ghɨna,” toŋte ngɨŋsu ghɨna su na, ghɨt ghe a ghɨ mô ma ghɨ ti fati ghɨna. Ghɨna toŋte ni nâbi te fati mi yîn mò ni, a fate wi Fùyèn, a fate à ghɨ̂t nì wo. ¹² Kə ghàn yìta na à ndùku mô ni, ghàn kəta wi gha hi nì nì Klistù, bu a nòn nì ghɨt a Isalì, kəta wi gha a tu chwùna afa a Yènfù tì fo ha ghɨna. Ghàn ndùku chyə kə yi chyə̂ a mbyî, kwàktè wi jùŋ yìlè wu lùk wule, khə wi nâbi Yènfù. ¹³ Ghàn ndùku mô nâ ha ghaf, bakhe wi ha Yènfù, biyani chin hì mô ma ghàn ti ben bakhâ tohne a Klistù Jisòs, kum luŋ me a wù tì sùha a ghàn wu lùk te wù kpo. ¹⁴ Klistù ti yûŋtì ghàhnà, ghàhnà fê befa wi. Wù ti ni na ghɨt a Jûs nì tumu hi mô kə ha shyə̀ à mòk. Wù ti chikhi kpi we a wu tì jyâhè ghàhnà kə nâ nì wun wu wunu. ¹⁵ Wù ti khɨmtî nâ saktu Jûs tù, tù jɨ̀m tohne a wûn yi kpû mi yîn shyəma ghɨt a ghàhnà gan kə ha wut wù mòk tohne ha wûn, ma yutìnì hi mô. ¹⁶ Kpu wuni mi ye a kàkfùtàfù tì nî bef yi ghàhnà mî, wu kahi lyi yen nì ghàhnà ha Yènfù ha shyə̀ à mòk. ¹⁷ Yi ni chwùtè na Klistù tì ben hi fòktè tum yì bonana kə ha ghɨt à jɨ̀m. Wù ti fôktì ha ghàn ghe a ghàn ndùku bakhe wi ha Yènfù, fî fôktì kəbi ha ghàh ghe a ghɨ ndùku bakhe. ¹⁸ À mò kə kum Klistù a ghàhnà à jɨ̀m kəta Yohnà à mòk a ghɨ mô hi yèn a Bì ashyə̂, kə à jɨ̀m. ¹⁹ Yi ni chwùtè na ghàn tumu fè wijə ghɨt a benana, ghàn hì mô kə à ghɨ̂t yi lak yì mòk ghàn a ghɨt a Fùyènà, fê mô à ghɨ̂t a Yènfù yi sah yi nda. ²⁰ Ghàn mô ndâ ma ghɨ lem chyə atɨna nì yikî ye a ghɨta tuma Jisòs nì fòktì su chiksu ndùku yike kum yini, ti bûlà nda mi yîn a mô kə nâ Klistù Jisòs nì ngɨŋ à wûn. ²¹ A mô wun we a wù khɨte nda mi yîn, yì ti kwok fwô ha nda yì chìk yì Bâba. ²² Ghàn nì ghɨta ghɨ le ti chîntì hì mô atɨ̂n à Klistù te mwə̀ mù bamù, fati ghàn na ghàn hi mô luk we a Yohnà a Fùyènà chyə̂ atɨ̂n.

¹ À mò kə kum yi chîntì ghàhnà mi yin a mu jə̀mà ha Yènfù kum ghàn. Mu mô wut à ndâ chyâk kum yi fêt ye a Klistù Jisòs fo ha mu na mu hi fôktè tum yì jùŋ ha ghàn tumu. ² Mu khə na ghàn ti yû te Yènfù chwùtè təm a jûŋà ha mu fo fêt mi yîn na mu hi nê ha ghàn. ³ A mô gha yi leteni ye a Yènfù tì bakte lema, à hì khə kə wûn, chwûtì banhi ha mu, kə yi ghəl te mu hì mô ma mu ti nyak kə yi tum. ⁴ Ghàn taŋ gha mɨ ghɨ̂n nâbi wùni yu, ghàn yen khɨli na mu khə a gha a letana mɨ ghe a Yènfù bakte kum Klistù. ⁵ A mô a gha teka fu chwuti ha ghɨta ashyə̂ te wù chwùte chin ha tumu wunu wu yulenu nì fòktìsù tohne a wun a Yohnà Yulena. ⁶ Gha yi kanani mi ye a ghɨ tì khə wi ashyə̂ mò na, tumu we wu bime tum yì jùŋ bè chîntè yə fə̂n wù Fùyènù ghê ghɨt a Isalì ma fê chintê hi mô a bâh atɨ̂n à wùn wù mòk, fê mô hi bè chìntè khɨte bôn ye a Yènfù tì chwùne tohne a Klistù Jisòs. ⁷ Mu tì yìmi fêt yi tum yì jùŋ mi yîn ma à fo Fùyèn jyaka wuna ha mu na mu hi nê. À tì fo wûn jyaka na ghɨ fet a mu yi təm ma gamti shyəma mu hi nê fêt yi tɨni. Yènfù tì ni ni kum təm a wun a jûŋà. ⁸ Mu mô kə nâ wut we a wù tobte gokhe atɨ̂n à ghɨt a Fùyènà, biyani ma fu ti tôknà nì mu, ni mu na mu hi jîsà ha tumu, fôktè ghak yi kanani ye a ghɨt ghe a ghɨ bime ha Klistù kəta, ⁹ fê fôktè banhi lum we a fêt yi kanani yi Fùyènì mi yîn gbè atɨ̂n nâbi ha nde. A mô gha ye a Yèn fe fu fate mwə̀ mù jɨ̀m lèta ha ghɨta a yìmi hi bè tàn chîn, ¹⁰ fu ni yohnù nì jyak we a wu fela chyâ a nyə̂ hi khə tof wu Fùyènù we fu chwùte kə a tu lum a tu lûm tohne a yi ləmâ yi ndâ Fùyènì, ¹¹ kə yi ghəl te wù hì mô ma wù ti fati lem na yi gan tohne a Bâba ghàhnà Klistù Jisòs shyəma wù fati mbyî. ¹² Bimî ghàhnà nì chîntì ye a ghàhnà kəta nì Klistù ti nî na ghàhnà hi mô hi yèn ha Yènfù fânà wi shyə ale, khə hamok na fu nè fyelò ghàhnà. ¹³ A ni gha ye a mu jìsà ha ghàn na kə ghàn bot kum ngə̂k ye a ghàn ywo na mu yenalò beka mu fòktè tûm yì jùŋ ha ghàn tumu. Ghàn kəta hi tè khə na ngə̂k àtɨ̂n nè yênà kə ha ghàn a jùŋ. ¹⁴ À mò gha ye a yi ne mu na mu tum a lwe ma a Bì ashyə̂ hì jə̂mà kə yi jə̂m ha ghàn, ¹⁵ à mô wûn we a wù yìme sah a sù nda ghe a ghɨ mô a nyə̂ fê mô a chyə̂ nâ à jɨ̀m. ¹⁶ Yènfù kəta yi ghak nâ haŋaŋ. A ni gha ye a mu jə̀mà na fu fo jyaka a ghàn a təm tohne a wun a Yohnà, ¹⁷ shyəma bimî yani ni ma Klistù hi fate chyə̂ kə nâ yi chyə̂ a ghàn a təm. Mu jə̂mà na ghàn ləma atɨ̂n à yi kòŋ ma yi hi tâ, ¹⁸ shyəma ghàn hi chîntè tofa kpene a ghàn a ghɨt a Fùyènà ale, hi tè khə na kôŋì Klistù ghaka kə a lum tù jɨ̀m. ¹⁹ Ma ghɨ hi khə na kôŋì wuni ti chya tofu, shyəma ghàn ghəkna ma kpene hi tè chyə̂ chyəna Fùyènà kə nâ a jûŋ. ²⁰ Kokhînì yen ha Yèn fe a fu kəta jyaka hi fo mwə̀ mù domù nâ haŋaŋ, chyâ me a ghàhnà lona yi jə̀m, nì yu we ghàhnà mò kwàktè wi nâbi hi lôn. A mô yi fêt, a nê jyak a wuna ghe a ghɨ mô a ghàhnà fùtɨ̂n. ²¹ Ban yi wuni mi ye faŋ à kə yi fâŋ ha ghɨt a bimena ghe a ghɨ mô a Klistù Jisòs a yû mù jɨ̀m! Àmèn.

¹ Mu wu hì chyate ghàn kum fêt mi yin a Bâba ne ha ghàhnà na, ghàn hi chyə̂ chyənà, yi kpene wu lum afa Yènfù khɨŋa na ghàn hi chyə̂ atɨ̂n wu tuk afa fu tì toŋa fihi ghàn. Ghàn khə na mu mò ni, mô a wùt à ndâ chyâk kum fêt ye a mu nè ha Bâba. ² Ghàn hi ngumle ngɨŋ sanisu, bonê, fê wunhê, lêhèfo a tu njah tanitu kum yi kôŋ. ³ Ghàn momhi nâ nì jyaka hi tè mò kə a shyə̀ à mòk afa a Yohnà Yulena fate ghàn atɨ̂n tohne yi yùtì afa yi chîntè ghàn. ⁴ Ghàn mô wu bâh atɨ̂n à wu wùn wù mòk, Yohnà Fùyènà ghe a ghɨ fêtà wu wùn afân mô kə à mòk, kə yi ghəl te Yènfù tì toŋa fihe ghàn a mbyî ni ghàn hì khə kə gha yì mòk na, ghàn bè bônàlò. ⁵ Ghàhnà kəta kə Bâba wù mòk, bime kə gha yì mòk, fyi mòlû kə a tô yi gha yì mòk. ⁶ Yènfù ghàhnà fù mò kə fù mòk, mô Bì kə ha ghɨt à jɨ̀m, saka kə ghɨt à jɨ̀m, fêtà tohne kə a ghɨt à jɨ̀m, mô kə fùtɨ̂n à ghɨt à jɨ̀m. ⁷ Biyani nâbi nde a ghàhnà fùtɨ̂n fəkna fo wuni kə yi ghəl te Klistù kòŋa hi fô. ⁸ Gha mi yîn a mu jìsà kum tufô ni mò kəbi te yê a ghɨ nyàka a ŋwàklù Fùyèn na: “À ndùku mô te wù kaha kwoka wu lùk afa a wu ngaŋte kpene, wù kolo nì ghɨta te wù tuma yə a yi wòŋ, ghɨ dô kə ni, wù fî jyâtì tufô ha ghɨta.” ⁹ Ba ghɨ jîsà na wù tì “kwok wu lùk afa a wu ngaŋte kpene” ni chwùtè na wù ti chwo mihì kə nâ a chyə̂ afân? ¹⁰ We a wù tì chwo a chyə̂ ni mò kəbi we a wù tì kaha kwoka wu lùk afa a wu ngaŋte kpene a nyə̂, hi tè mò kə a tû a mwə̀ mù jɨ̀m. ¹¹ A mô wûn we a wù tì chwoka ghɨt ale lem ha ghɨt a tuma, chwok ghɨta lem ha fòktìsu chiksu, wù chwok ghɨt ale lem na ghɨ hi fôktè gha Fùyènì kə a tu lùk a tu lùk, wù fî chwok ghɨta na ghɨ hi mô sù fòktì, wù chwok ghɨt ale ha sù chichà. ¹² Wù tì ni ni hi bakte ghɨt a bimena na ghɨna hi khə hi tè nè fêt yi Fùyènì, na ndâ Fùyèn hi ləmnê, a mô wun wu Klistù ¹³ hi tàn shyəma ghàhnà à jɨ̀m bê chintê hi mô kə ha shyə̀ à mòk a ghàhnà yi bimî fê mô kə ha shyə̀ à mòk a gha afa a ghàhnà khə kum Wâ Fùyèn. Ni, ma ghàhnà ghəknà kpena ma ghɨ hi mô kəbi te Klistù. ¹⁴ Yi hì mô ni, ma ghàhnà hi fê bu hi tè mò te mwəlà hi tè chìnà sama kə yi sâm tu, nâbi yìni nki yikînì yi ben yi lyi chya nì ghàhnà, wut bakti kəbi yi fə̂m wu ben wu lehi kə ghàhnà nì yini. ¹⁵ Ghàhnà shìki bɨlà jìs kə hamok chwûtè yi kôŋ, ma ghàhnà ləma kə lum tù jɨ̀m ma ghɨ hi mô te Klistù we a wù mò a tû ha ndâ Fùyèn. ¹⁶ Wu nê bâh wù wùnu wù jɨ̀m mô kə ha shyə̀ à mòk, nâbi yìni yùŋ à wù wùn gâmtè hi khɨte kə wun wù jɨ̀m. Nâbi ghɨ̀ni bâhà shìki fêt te ghɨ kəta hi tè fèt, ma wun wù jɨ̀m nê fate ləmà ta beka bâh wù tɨnu kòŋà ngɨŋsu. ¹⁷ Mu jìsà ha ghàn a Bâba yi yet fê kumtè na kə ghàn hi fê chyə te wu tûm. Ghɨna kəta kə kwâktì tu yum tu. ¹⁸ Ghɨna ywo khɨle wi gha, khə wi gha yile kum chyəna Fùyènà beka ngwò a ghɨna, ma ghɨ ben beka a to tana ghe a ghɨna kəta. ¹⁹ Ghɨna ti mâkà ngɨŋsu ghɨna su hì buma chyə̂ kə te sù bû, fê wume wi, kwoti nâbi yìni nki gha yi be ghɨ hi nê yê kə yi yên, chyənà àtɨ̂n foma yê kə ashyə̂. ²⁰ Biyani ghɨna wijə gha ghe a ghɨ tì yike ha ghàn kum Klistù! ²¹ Yi mô kə nâ hamok na ghàn tì yû gha kum wûn, ghɨ fî yikî ghàn nì gha ghe a ghɨ mô hamok kum Jisòs. ²² Ghɨ tì yiki na ghàn maka chyənà sanisu mwu su beka kwâktì tanitu betu ndùku bobhelò ghàn. ²³ Ghɨ tì yiki na ghàn maka chyənà yanì yì mwu ma ghàn hi bɨlà kwàktè a wu lum wu fe. ²⁴ Ghɨ tì yiki ghàn na ghàn lyi wun wu fe we a ghɨ tì fate ma wu hi fune Yènfù chyə kàntè chyənà wûn yì chilichili fê yulê. ²⁵ Yi ni chwùtè na ghàn kəta hi mâkà yi fə̂m na nâbi nde hi jîsà kə hamok ha wâ nè wûn beka ghàhnà à jɨ̀m chìntè mô kə bâh à wùna à mòk. ²⁶ Gha ki yaf a wût, kə wù nè nê be. Kə gha yaf wùt, ma wù chyə nì yini a wun wu là. ²⁷ Kə wùt nè fo lumu na deblì lyi a wun a chyənà. ²⁸ À ndùku chwoŋa nâbi nde, kə wù fî chwoŋ. Wù bɨlà kəta hi tè fèt a shyə nì wo wunu, kəta a shyə hi tè gâmtè ghɨt ale ghe a ghɨ kəta wi. ²⁹ Kə gha yi be nè fwo a wùt yi jwô. Ghàn hi bɨlà jîsà kə gha ghe a ghɨ mô hi gàmtè ghɨt ghe a ghɨ kəta fuma shyəma à hi ywo nâbi nde jîs yani, yi gâmtì wûn. ³⁰ Kə ghàn hi nê Yohnà Yulena a Fùyènà ghe ghɨ tì chwe ghàn nì ghɨna na wù hi saŋle wi. Ghɨ tì chwe ghàn nì ghɨna hi chwùtì na tuku bè bênàlò, ma Yènfù yun à mihi tu wanu. ³¹ Ghàn maka kwàktì tu betu nâ tù jɨ̀m nì là mù bàŋamù nì njaŋi nì ndisu nâbi nì yìni befi. ³² Ghàn hi tôknè fê kwohe yi sen ha ghɨt ale, lêhèfo ghɨta kəta Yènfù lèhèfo ghàn tohne a Klistù.

¹ Ghàn mò ni mô wana Fùyènà, fu kôŋà ghàn nâ haŋaŋ. Yi ni chwùtè na ghàn kəta hi tè chyə wu lum afa a Yènfù chyə atɨ̂n. ² Ghàn kəta hi tè kòŋà ghɨt ale kə yû mù jɨ̀m kə yi ghəl te Klistù tì kòŋà ghàhnà fo ngɨŋ à wûn ha yi fô, yi lɨ̂mtè jwôfà kə ni ha Yènfù a ghàhnà wù lùk. ³ Ghàn mô ni mô ghɨt a Fùyènà. Kə ghɨ bè ywo gha kum jûmtì yweni makə jûmtì lɨmànì nì se fwona nì gha tu liŋa ale a ghàn a fùtɨ̂n. ⁴ Yi jwôfà wi na ghàn hi jîsà gha tu liŋa, jîsà gha ngwona fê nyikhè à ghɨ̂t. Ghàn hi bɨlà fo kə àyòŋnà ha Yènfù ⁵ Ghàn hi khə hamok na ghɨt ghe a ghɨ jûmtè ywena makə ghê a ghɨ jûmtè lɨmànà nì ghê a ghɨ nê gha tu liŋa nì ghê ghɨ kəta se fwona (a mô lum wule hi tè kokhe mosòmù) wi hi lyi wu lùk wu fə̀n Klistù ghê Yènfù. ⁶ Kə wùt lè bè lehi ghàn nì jîs yi yimi. À mò kum a gha mɨ ghɨ̂n a Yènfù bàŋhè lâ ha ghɨt ghe a ghɨ ta nì tu ha wûn. ⁷ Yi ni chwùtè na ghàn kəta wi hi tè nè chìntè a ghâ nì ghɨt ghe a ghɨ nê gha mɨ ghɨ̂n. ⁸ Ghàn mò ni ma ghàn ndùku mô kəbi atɨ̂n à bɨn a finana ni te ghɨt mɨ ghɨ̂n, biyani ghàn mô chîn ma ghàn ti lyî a Bâba atɨ̂n à yi bân. Ghàn hi chyə lê te wana yi bana. ⁹ Mu jìsà ni beka bani mò nâbi afa, ma gha a jûŋà hi fwo kwoka afû, ghɨta chyə chyənà su chilichili su fê nê kə gha ghe a ghɨ mô hamok. ¹⁰ Ghàn momhê yiki hi tè khə fê nê a gha ghe a Yènfù kòŋà. ¹¹ Kə ghàn bè lye a chyənà bɨn a finana, gha yi jûŋì bu hi fwu atɨ̂n. Ghàn hi bɨlà fihe bê nì gha mɨ ghɨ̂n a chwî. ¹² À mò gha yi wumeni hi tè jìs nâbi yi jîs kum gha ghe a ghɨta gha a be mɨ ghɨ̂n nè a lèt. ¹³ Biyani ma ghɨ fihi nâbi ghə a chwî, ma ghɨ yen kə a ndan. ¹⁴ Yi mô ni beka à nè yi ban na ghɨ yen nâbi ghə a ndan. A mô gha ye a yi tì ne wùt lè jis na: “Yèmâ a wùt wunâ a sù bwuni, ma wò lòti a yi kpû ma Klistù fo bani ha wò.” ¹⁵ Ghàn hi tôknà lê a wu lum afa a ghàn chyə atɨ̂n. Kə ghàn hi chyə te wù ngwò, ghàn hi chyə te ghɨt a tofana. ¹⁶ Wùt ha ghàn yen wu lûm hi nè jùŋ, wu nyâŋhì ni kə yi nî beka à dò kə be chîn. ¹⁷ Ghàn momhi lê hi te khə gha ye a Bâba khɨŋa na ghàn hi nê. Kə ghàn hi chyə te wù ngwò. ¹⁸ Kə ghàn hi nyo lùkû mu kwo ghàn beka lùkû bênà kə nì chyənà nyàm. Ghàn bɨlà de Yohnà Yulena lunhi təm ghana. ¹⁹ Ghàn hi jîsà ha ngɨŋ sanisu a sù njàŋ. Ghàn hi yema njàŋsù Fùyènsu nì njàŋsu yulesu nì se a Yohnà Yulena nè na ghàn hi yemâ, buka mwə̀lû, kokhe Bâba nì təm ghana à jɨ̀m. ²⁰ Ghàn hi fo àyòŋnà ha Yèn fe a fu mô Bì kum nâbi ghə kə a yû mù jɨ̀m kum Bâba ghàhnà Jisòs Klistù. ²¹ Ghàn hi ngumli ngɨŋ sanisu beka ghàn fànà Klistù. ²² Ywena ghàn hi ngumli lɨm ghana kəbi yi ghəl te ghàn ngumle Bâba. ²³ Ghàn khə na wùt lɨmà ni mò a tû ha ywê wûn kəbi yi ghəl te Klistù mò a tû ha ndâ Fùyèn a mô wun wu wunu, a bônhè wûn ghɨt atɨ̂na. ²⁴ Yi ni chwùtè na ywena kəta hi tè ngumli a lɨm a ghɨna kə gha à jɨ̀m kəbi yi ghəl te ndâ Fùyèn ngumli Klistù. ²⁵ Lɨmànà ghàn hi kôŋà ywen ghana kəbi yi ghəl te Klistù tì kòŋà ndâ Fùyèn fo ngɨŋ à wûn ha kpu kum yinì. ²⁶ Wù ti kpu hi so ghɨt a bimena na ghɨ yuli, tohne a wun a tum yì jùŋ. ²⁷ Wù tì ni ni shyəma wù shihi lyè ndâ Fùyèn ha ywê lɨ̂m, ma yì hi mô chilichili, yule, kəta wi liŋi, kəta wi njah yile. ²⁸ Yi ni mò kəbi te wùt lɨmà kəta hi tè kòŋà ywê wûn kə yi ghəl te wù kòŋà ngɨŋ à wûn. Wùt lɨmà shìki kôŋà ywê wûn, ma à hi mô na wù kòŋàlò ngɨŋ à wûn. ²⁹ Wùt tà timi hì bànà ngɨŋ à wûn. Wù nè wu hi fate yə̂ fê tôknà nì wun wu wunu kə yi ghəl te Klistù tôknà nì ndâ Fùyèn. ³⁰ Ghàhnà mò ni chîntè mô kə bâh wu wùnu wu Klistù. ³¹ Ŋwàklù Fùyèn jìsà na, “A ni gha ye a wùt lɨmà ni wu de bè wûn nì nè wûn, wu yen wu chîntì ghê ywê wûn, ghɨna à bà ghɨ kahi hì mô kə ha shyə̀ à mòk.” ³² Yìna mò yikî yi kanani. Biyani, mu jìsà wu lùk afân kum Klistù ghê ndâ Fùyèn, ³³ nâbi nde a ghàn a fùtɨ̂n kəta hi tè boŋa kòŋà ywê wûn kə yi ghəl te wù kòŋà ngɨŋ à wûn, nâbi nde wu boŋa ngumli lɨm à wûn.

¹ Mwəlà, ghàn hi ywo ha bì ghana nì ha nì ghana beka a mò gha ye a yi mô chilichili. ² Sak yi shyə a atɨ̂n à tu sak afa a Yènfù tì fo yi kəta wu chwuna atɨ̂n mò na, “Ngumli ha bâ nì ha nâ, ³ shyəma gha à jɨ̀m hi gbê kə a jûŋ ha wò, ma wò fê chyəti a chyə afân.” ⁴ Be mwəlà, kə ghàn hi nê wan ghana bâŋhè lâ. Ghàn hi bɨlà lê ghɨna fê tihe ghɨna wu lum afa a Bâba khɨŋa. ⁵ Ghɨt a fetana, ghàn hi ywo ha be fèt ghana, fate ngumle ghɨna kə nì təm ghana à jɨ̀m. Ghàn hi fêtà kə te ghàn fètà ha Klistù. ⁶ Ghàn hi ywo ha ghɨna te ghɨt a fetana Klistù kə nâ hamok, kə yi ghəl te Yènfù khɨŋa. Kə ghàn hi ywo ha ghɨna kə wu yu afa ghɨna lèmà se a ghàn wu wùn beka ghàn khɨŋa na ghɨ hi khə na ghàn fètàlò a jûŋ. ⁷ Ghàn hi fêtà ha ghɨna nì saŋlînì kə te ghàn fètà ha Bâba, a bu ha ghɨta. ⁸ Ghàn khə na wùt ki nê nâbi yìni jùŋ, mô a kwôs makə wù wi a kwôs, ma Bâba bê fo maktu tɨnu ha wûn. ⁹ Be fètà, ghàn hi boŋa fate khɨte ghɨt ghana ghɨ fetana. Kə ghàn hi kàntè yi kântì gha ha ghɨna. Ghàn hi khə na wùt we a wù mò bì fèt ha ghàn à jɨ̀m mò a nyə̂, lyê nâbi nde kə yi ghəl. ¹⁰ Hi gòkhì, mu wu hì jîsà na ghàn yiktè kə Yènfù wù wùn, a fu fo jyaka ha ghàn beka wù kəta jyaka kanana. ¹¹ Ghàn lyi mwə̀ mù wòŋ me a Yènfù fo ha ghàn nâ mù jɨ̀m shyəma ghàn khɨli hi nò mùnàŋ me a deblì bakte. ¹² Ghàn ni ni beka ghàhnà nò wi ghɨta. Ghàhnà ni bɨlà nô yohnù wu be we a wu fela chyâ a nyə̂ nì jyak we wu saka mbyî yinâ nâ yì jɨ̀m nì yèn mù mbyî. ¹³ Ghàn lyi lê mwə̀ mù wòŋ mù Fùyèn nâ mù jɨ̀m shyəma tuku be bê shihi kwok a bèn ma ghàn tum à yə deblì, ma à hi mô a gòkhi, ghàn baha ta kə yi tâ. ¹⁴ Ghàn kwut lê gha ye a yi mô hamok a ghàn a yi sah te wu kwô ma ghɨ baŋ ngàŋtù ghana nì chyənà chilichili ma timè hi yutê. ¹⁵ Ghàn lyi tum yì jùŋ ye a yì fo yutìnì ma ghàn tuŋ a ghàn wu wù te gwusu wùsu ma ghɨ hi yutê. ¹⁶ Ghàn lyê kpenhi bimî yani ma khɨti te khə̀ksù wòŋsu hi tàmtè woŋ te a deblì tumle ghàn nì ghɨna, ghɨ bame te wu wus. ¹⁷ Ghàn lyi kəbi bôn ye a Yènfù bònhe ghàn ha a fot a wòŋa, ma lyi Yohnà ghe a Yènfù fo, a mô gha Fùyènì ha yi fà. ¹⁸ Ghàn shihi ne gha mɨ ghɨ̂n, ghàn hi jə̂mà ha Yènfù kə a yû mù jɨ̀m, bufa nâbi ghə kə yi ghəl te Yohnà a wuna tihe ghàn. Ghàn shihi jə̀m ghàn hi jə̂mà ha ghɨt a Fùyènà nâ à jɨ̀m. Ghàn hi tôknè, kə wùt lè bè yità hi jə̀m. ¹⁹ Ghàn hi jə̂mà kəbi ha mu na mu lyi gha Fùyènì hi fòktì, mu khɨli gha ye a mu mò hi jìs, na mu shihi fòktè gha a letena ghe a Yènfù tì chwùtè ha ghàhnà a tum yì jùŋ, kə mu fan shyə ale. ²⁰ Mu mò ma ghɨ ti tum na mu bê hi fôktè tum yì jùŋ mi yìna nâbi te mu mò chîn a chyak. Ghàn jəm na mu hi fôktè kə te mu kəta hi tè fòktì, fânà wi shyə ale. ²¹ Mu tum Tìkikùs, na wù fokti nâbi ghə ha ghàn shyəma ghàn khɨli gha ye a mu nè. Ghàh kòŋà wûn nâ a jûŋ. Wu mô kə nâ wâ nè ghàhnà wù jùŋ, fêtà ha Bâba kə nâ nì təm a wuna à jɨ̀m. ²² Mu tuma kə nâ wûn ha ghàn ni shyəma wù ben ma wù fokti gha ha ghàn kum ghàh ma wù fè lumhi ghàn a ghàn yi bimî. ²³ Yèn fe à mò Bì ghê Bâba Jisòs Klistù fo yutìnì ha wana ne nì kôŋ ye yi nê na ghɨ hi yikte kə wun a wù wùn. ²⁴ Yènfù nè chwûtèlò təm a jûŋà ha ghàn ghe a ghàn faŋa hi tè kòŋà kə Bâba ghàhnà Jisòs Klistù.