Kòlosiyàns

¹ À nyak mu Bôl ŋwàklù yìna. Mu mô wut wu tum ha Klistù Jisòs, ma à chwok Fùyèn. Ghàh à Timotì a wâ nè ghàhnà a yi bimî toŋte ha ghàn. ² Ŋwàklù yina mò ha ghàn ghɨt a Fùyèn ghe a ghɨ mô a tèk yi Kòlosè, ma à ni ghàn wana ne ghe a ghàn mò ghàn à Klistù a shyə̀ à mòk, jûmtè wûn nâ a jûŋ. Yènfù, Bì ha ghàhnà chwute təm a jûŋà a wuna ha ghàn, ma wù fo yutìnì ha ghàn. ³ Ghàh shihi jə̀m nâbi wùni yu, ghàh hì fo àyòŋnà ha Yènfù, Bì ha Bâba ghàhnà Jisòs Klistù kum ghàn, ⁴ beka ghàh ti yû kum bime yani ha Klistù Jisòs, na ghàn fê kôŋà ghɨt a Fùyènà nâ à jɨ̀m. ⁵ Ghàn nè ni beka ghàn khə mwə̀ me a Yènfù lèma ha ghàn a nyə̂. À hì mô te ghɨ be fokte tum yì jùŋ hamok ha ghàn ha shyə̂, ghàn yu yi gha kum mwə̀ me a ghàn yute. ⁶ Tum yì jùŋ mi yîn ləma yê kə luk tù jɨ̀m a mbyî, nê na gha a jûŋà hi gânà a ghɨta su chyənà, ghɨna fê ləmâ yê kə shyə̂. Tum yì jùŋ mi yîn ti boŋ ben tan ha ghàn ni na gha a jûŋà gan a ghàn a fùtɨ̂n, yi boŋa ləma yê kə ashyə̂. Tum àtɨ̂n ni nè fêt mi yîn a ghàn a fùtɨ̂n kə hi yìmi wu tuk afa a ghàn tì ywo khɨle hamok kum təm a jûŋà ghɨ Fùyènà. ⁷ À tì yiki Èbàfàlàs tum yì jùŋ mi yîn ha ghàn, ghàh kòŋà wûn nâ a jûŋ. Ghàh à wûn mô ghɨt a fetana ha Klistù. Wu lyê luk wahu ha wut wù fètana wù jùŋ ha Klistù. ⁸ Wù ti fôktì ha ghàh te Yohnà Yulena nè ghàn kôŋà ghɨta. ⁹ Gha mi yîn che nî na ghàh hi jə̂mà kə yi jə̂m ha ghàn kə wu tuk te ghàh ywo, lona na Yènfù fê fo tofu ma fu ni na ghàn hi ywo khɨle gha à jɨ̀m ghe a Yohnà Yulena nè na ghɨta khɨle shyəma ghàn khɨlè mihi gha ye a fu khɨŋa. ¹⁰ Ghàn kəta hi tè chyə̂ chyənà ye a Bâba khɨŋa, a mô yê a yì nè wu saŋlê kə lum tù jɨ̀m, ma chyənà mi yîn ni na ghàn hi nê nki tu fèt tu jûŋ tù kə tù jɨ̀m fê tòkà khə Fùyèn. ¹¹ Mu jə̂mà na Yènfù fo jyaka wuna ghɨ kanana ha ghàn shyəma ghàn hi tâ, kwuta a təm nâ a jûŋ, fê wunhê, ¹² fo àyòŋnà ha Bì nì saŋlînì te wù ti ni ghàn, ghàn ti kpenâ hi tè boŋa kəta shyə ghe a wù lèma ha ghɨt a wuna wu lùk wu bananu. ¹³ Wù ti bônhì ghàhnà atɨ̂n à jyak a finana, lyi ben nì ghàhnà wu lùk wu fə̀n wù Wâ wûn wù kòŋ. ¹⁴ Wâ wûn mu we ti yun tu ghàhnà fî lehìfo besu ghàhnàsu. ¹⁵ Wùt wi hi yen a Fùyèn. Wâ Fùyèn mò a lɨ̂ŋhà Fùyènà. Wù ti chwûtì mihì te Yènfù mò. A mô wûn a tû ha mwə̀ me a Yènfù fate a mbyî nâ mù jɨ̀m, a Wan wù shyə̂ wù Yènfù. ¹⁶ Ghê Yènfù tî fate nâbi ghə ghe a ghɨ mô a nyə̂ nì mwə̀ mù jɨ̀m me a mù mò a chyə̂. Ghê wûn tì fati mwə̀ me a ghɨ yena nì me a ghɨ yena wi. Ghê wûn tì fati yohnù we a wu kəta jyaka nì we a wu saka nì we a wu tihe. Yènfù tì fati mwə̀ mù jɨ̀m tohne a wûn. Wù fati kəbi mwə̀ mù tɨ̂n na mù hi ywo ha wûn. ¹⁷ Klistù ndùku lâwû shyəma nâbi ghə hi mô. A mô wûn we a wù ne na nâbi ghə hi mô wu lùk afa ghɨ kəta hi tè mò atɨ̂n. ¹⁸ Wu mô a tû ha ghɨt a bimena nâ à jɨ̀m ma à ya mò wu wun wu wunu. Wù mô yìmi, à mô wut wù shyə̂ we a ghɨ tì ne wù kahi lôtì a yi kpû, shyəma wù lyi luk wu shyə nâbi ha ghə. ¹⁹ Yi mô ni beka Yènfù tì koŋ wûn lem wûn na wù hi mô kə yi ghəl te wûn nâbi afa. ²⁰ Wù ti lem nâ mwə̀ mù jɨ̀m me a mù mò a chyə̂ nì me a mù mò a nyə̂, kahà bakti chyəna ghê wûn tohne a wun a Wan afân, fî ni na yutìnì hi mô kum luŋ me a Wan àtɨ̂n tì sùha a kàkfùtàfù kpulò. ²¹ Hi jìs yi gha kum yi baktî yi chyənà, ghàn khə na à ndùku mô ashyə̂, ghàn mô kə ha dà ghàn à Yènfù, bânà wûn, kəta yi kwâktì yi be, fê nê a gha a be, ²² biyani Yènfù hì mô chin ma fu ti ni ghàn, ghàn ti kahi bakti chyəna ghana nì wûn kum kpu yi chyak a wùni ye a Wâ wûn tì kpo shyəma ghàn hi time a wun ashyə̂ yulê, mô a jûŋ, kəta wi njahi yile. ²³ Ghàn kəta kə nâ hi khɨte bimî yani na yi hi ta kə yi tâ. Kə ghàn de na gha nekhi kwâktì ye a ghàn kəta kum gha ghe a tum yì jùŋ hì mô ma yi ti chwunà, nâ ghàn boŋ yû. Nâ mu Bôl mô wut wù fètana, fôktè kə tum mi yìna, a mô yì yîn ye a ghɨ hì mô ma ghɨ ti fôktì nâ ha ghɨt à jɨ̀m a mbyî. ²⁴ Mu saŋlelò chîn te mu yena ngə̂k kum ghàn. Ngə̂k mi yîn mô a mu wu wùn ni beka mu khɨŋa hi nè mihè gha ye a Klistù ndùku yena ngə̂k hi nì ha ghɨt a bimena a mô wu wun wu wunu. ²⁵ Yènfù chwok mu ha wùt wù fètana a ghɨna nòn. Fêt mi yîn mô na mu fôktè mihi tum à Fùyèn mi yîn ha ghàn. ²⁶ Gha ye a Yènfù tì bakti ndùku mô ma fu ti lêt ha ghɨt ashyə nâ à jɨ̀m, biyani chwûtì chin ha ghɨt a wuna. ²⁷ Yènfù ndùku khɨŋa na ghɨt mɨ ghɨ̂n hi khə nâ gha yi leteni ye a fu bakte lema a mô yi gha yi kanani, a mô yi gha hi gàmtè kə ghɨt a tu lak tu mbyî tu kə tù jɨ̀m. Gha mi yîn mô na Klistù mò kə nâ a ghàn a təm, yi chwûtè na ghàn khə hamok na ghàn bè chyə lò ghàn a wûn a wun atɨ̂n à yi ghak. ²⁸ A ni mò gha ye a ghàh fòktè tum kum wûn, fo tobhînì, fê yike ghɨt à jɨ̀m nì tof wù jɨ̀m, shyəma ghàh ni ma ghɨna hi mô ghê Klistù Jisòs amok, bênà a Yènfù ashyə̂ te ghɨt a kpenana. ²⁹ A mô kum gha mɨ ghɨ̂n a mu ghàŋnè, fêtà nì jyak ghe a wù fo ha mu nâ à jɨ̀m.

¹ Mu khɨŋa na ghàn hi khə te mu ghàŋnè nì fêtì nâ nì jyaka hi gàmtè ghàn, hi fè gàmtè a ghɨt ghe a ghɨ chyə a Làdisìyà nâ nì ghɨt à jɨ̀m ghe a ghɨ tà timi yen jə mu. ² Mu nè ni shyəma ghàn à ghɨna hi kəta təm a ta, mô kə ha shyə̀ à mòk, kôŋà ngɨŋ sanisu. Mu khɨŋa na ghàn hi fate khə gha ghe a Yènfù tì lète shyəma ghàn tokâ khɨti gha mɨ ghɨ̂n ma ghàn hi kəta yutì chiki. Gha mɨ ghɨ̂n a Yènfù mò ma fu ti chwûtì banhi chin ha ghàhnà mò kum Klistù nì ngɨŋ à wûn. ³ A mô Klistù mu wûn a wù ne na ghàhnà khɨti tofu ma hi fê yena khɨle gha. Tof mi yîn jwôfà kpenê. ⁴ Mu nyàkà a gha mɨ ghɨ̂n ha ghàn, shyəma ghɨ ni ma nâ wùt bê tê lehe jə̀ ghàn nì jîs yi fomani. ⁵ Mu mô yû mù jɨ̀m kwâktè ghàn nâbi te mu wijə ghàhnà amok. Mu saŋlelò te ghàn fate chyə fê saŋle kum lum we a ghàn tòkà khɨte bimî yani atɨ̂n ha Klistù. ⁶ Te ghàn hì mô ma ghàn ti fî Klistù Jisòs na à mò Bâba wânù, ghàn hi chyə̂ lê te ghɨt ghe a ghɨ mô nì wûn ha shyə̀ à mòk. ⁷ Ghàn faŋ nì wûn ma ghɨ hi tâ kə yi tâ, kə te kâkfù ta beka fu kəta ghaŋtu. Ghàn ba chyə yani a wun wù wùn kə te ghɨ ba ndâ a tô chyə a ndâ a jûŋà, ghàn fatè khɨti bimî yani a ye ghɨ tì yike ghàn, ma yi hi ta yê kə a shyə̂. Ghàn hi fo yòŋnà ha Yènfù nâ haŋaŋ. ⁸ Ghàn hi tôknè kə wùt nê lehi ghàn nì tof yi yimi ma wù lyi ghàn ha wu kwòs. Nki tof mi yîn kəta gha kum kə chyənà à ghɨna yì lak nì yohnù we a wu saka mbyî. Tof wu tɨnu kəta wi gha kum Klistù. ⁹ Yènfù mò a Klistù wù wùn kə lum tù jɨ̀m. ¹⁰ Ghàn à Klistù mô kə à shyə̀ à mòk, a ni mò gha ye a ghàn kəta chyənà ye a yì kpene. Wu mô a tû ha yohnù wù jɨ̀m we a wu saka fê kəta a jyak. ¹¹ Ghɨ ti boŋ se nam wanu te ghàn hì mô ha shyə̀ à mòk ghàn à wûn. Yi se nam mi yîn wijə nki ye a ghɨta se. À mò ye a Klistù tì se, hi fihi təm a be a ghàn wu wùn. ¹² À ndùku mô te ghàn fye mòlû, ghɨ gûmà ghàn, ghàn à Klistù, ghàn à wûn kahi lôtì a yi kpû kə amok. À tì ni yi bimî ye ghàn kəta kum jyak a Fùyènà na ghàn kahà loti. A mô kəbi jyak a Fùyèn mi ghe a ghɨ tì lòhe Klistù a yi kpû. ¹³ À ndùku mô ashyə̂, ghàn mô ma ghàn ti kputî a ghàn a sùbe, fê mô teka ma ghɨ fihi təm a be afa a ghàn ndùku kəta. Yènfù nî ghàn à Klistù kahi lôtì hì chyə̂. Fu ti lehìfo gha ghàhnà ghɨ be kə à jɨ̀m, ¹⁴ fî chikhi fô ye a ghàhnà chehì kəta hi làk. À ndùku mô te ghàhnà khɨma saki, yi hì mô na ghàhnà kəta yi fô hi làk. Chin hì mô ma Yènfù ti lyi fôlì tɨni banti a kàkfùtàfù. ¹⁵ À ndùku mô te Klistù kpo a kàkfùtàfù, Yènfù ni shyəma yohnù we a wu saka nì we a wu tihe na wu hi fê kəta wi jyaka, wumhi yohnù wù tɨnu wù jɨ̀m a mbye ashyə̂. A ni mò wu lum we a fu tì tuma yə yohnù mu wûn atɨ̂n. ¹⁶ Yi ni chwùtè na kə ghàn de wùt time te wut wù sakana hi tè fo saktu ha ghàn kum shyə ghe a ghàn yə makə ghe a ghàn nyo. Kə ghàn de wùt hi khɨte ghàn na ghàn hi ngumle Yènfù hanɨ̂ŋ a mu tuk mù chìk mùlè a lɨ̂m makə a njoŋ su lesu makə a mu tuk mù lak mùlè. ¹⁷ Mwə̀ muna mò kə wu lɨ̂ŋhù gha te ghɨ ndùku kəta hi bè bèn; biyani hamok ye a yì mò atɨ̂n à gha afân mô kə Klistù. ¹⁸ Kə ghàn de wùt jis ha ghàn na ghàn hi chwohe ngɨŋ sanisu a chyə̂ fê ngumle anjèlsu Fùyènsu, a bu ya ma ghàn gha maktu wanu. Ghɨna kama jîsà na gha fwo ha ghɨna ni te à chyə su jem, ghaŋhe wu wun kə halô, kwâktì ghɨna mô kə kwâktì yi mbyi. ¹⁹ Ghɨna fè chîntè wi ghê Klistù we a wù mò a tû. A mô wun we a wù fo jyaka ha wunu wù jɨ̀m na wu hi ləma a lum afa a Yènfù ne na wu hi ləma atɨ̂n. Klistù khɨte wun wu wunu mu wûn wù jɨ̀m kə yi ghəl te ghàŋû yùŋtè chîntè khɨte wunu wûtù a shyə̀ à mòk. ²⁰ Ghàn hì mô kə ni te ghàn à Klistù ti kpû amok kum yohnù we a wu saka mbyî. Yi ni mò ni, ghàn hi baha lêmà kə saktu ghɨta mbyî tu kum ghə? Njwo ghə te ghàn lèmà sak te a ghɨta jìsà na ghàn hi lêmà agha? ²¹ Ghɨna jìsà kə na, kə ghàn khɨti shyə ghɨ̂n, kə ghàn mom shyə a yəna ghɨ̂n, kə ghàn kum shyə ghɨ̂n. ²² Sak mi tɨ̂n jìsà kum kə mwə, mu mô hi bêf. A mô kə a gha a ghɨ̂tà te ghɨ fate hì gbê yikê. ²³ Ghɨta ti fate lumu hi kokhe Fùyèn atɨ̂n. Ghɨna kama chwûtè kəbi na ghɨ chwohe ngɨŋsu ghɨna su a chyə̂ fê fo ngə̂k ha wunu ghɨna. Nâ gha mɨ ghɨ̂n à jɨ̀m fune kə yi funâ na tofu làwû atɨ̂n biyani kəta wi nâ gha yile hi gàmtè wût na wù hi khɨte ngɨŋ à wûn kum a gha a njyàsu wùnsu.

¹ Te ghàn hì mô ma Yènfù ti lôhì ghàn à Klistù a yi kpû amok, ghàn hi lêmà təm ghana a gha afa a ghɨ mô a nyə̂, wu lùk afa a Klistù mô atɨ̂n a Yènfù bàh kpen wu wo ta. ² Ghàn hi lêmà kwâktì tanitu a gha afa a ghɨ mô a nyə̂, a bu a gha afa a ghɨ mô a chyə̂, ³ Beka ghàn hì mô ma ghàn ti kpû, ghɨ ti letì chyənà yanì ghê Klistù we a wù mò ghê Yènfù amok. ⁴ Klistù mô chyənà yanì. A bê hì mô te wù kaha bênà a ndan, ma ghàn hi boŋa mô ghàn à wûn a wun atɨ̂n à yi ghak. ⁵ Ghàn maka lê gha a mbyî nâ à jɨ̀m. Kə wùt hi chyə̂ nì wùt ywên a bu ywê wûn makə nì wùt wù lɨmà a bu lɨm à wûn. Ghàn maka chyənà su liŋsu. Kə ghàn hi kəta kwâktìnì nì kôŋì hi tè nè be. Ghàn maka se fwona beka se fwona chwùtè na ghàn ngumle mwə̀ mù mbyî, a bu Fùyèn. ⁶ Yènfù bàŋhèlò lâ, mô hi bè fo ngək yì chìk ha ghɨt ghe a ghɨ ywo wi wûn, nê a gha mɨ ghɨ̂n. ⁷ Ghàn ndùku nê kəbi lò gha a be mɨ ghɨ̂n wu lum afa a ghàn chehì chyə̂ atɨ̂n. ⁸ Biyani mu wu hì jîsà ha ghàn chin na ghàn maka gha mɨ ghɨ̂n nâ à jɨ̀m ni te bâŋhì wu la nì be. Kə ghàn hi bakte hi nè be ha ghɨta makə hi wama yi fə̂m hi bobhi yi yet yi wûtì, kə jîs yi liŋi hi fwo a ghàn yi jwô. ⁹ Kə wùt ha ghàn hi wama fəmi a wùt wùlè, beka ghàn ti de chyənà su mwusu nì gha ghe a ghàn chehì nê, ¹⁰ ghàn bɨlà khɨti chyənà yì fê. Yì ghɨt a Fùyènà mɨ ghɨ̂n ghe Yènfù bwəma hi nì na ghàn hi fune wûn a gha afa a ghàn nè shyəma ghàn hi tôkà khə wun nâ a jûŋ. ¹¹ Beka, hanɨ̂ŋ nè hi fê wijə ha wùt, makə à mô wut wù Jûs makə à mò wut wù Gɨlìs, makə ghɨ ti se nam a wuna makə ghɨ tà se jə̂, makə à mò wut à tûm makə à mò wut à ghə̀n. Hanɨ̂ŋ wi ha ghɨt ghe à mò wu kwôs nì ghɨt ghe a ghɨ mô a ghɨna ngɨŋ, biyani gha yi ta mò kə Klistù. Wu mô kə ghɨt a wuna fùtɨ̂n à jɨ̀m. ¹² Te ghàn hì mô ghɨta te Yènfù chwokte ha ghɨt a wuna, hì kôŋà, ghàn kəta hi tè chwùtè seni kwolani, tôknè nì ghɨta, lyê ngɨŋ sanisu a chyə̂, bonê, fê wunhê. ¹³ Ghàn hi kəta təm a yutena ha ngɨŋ sanisu, lehèfo ngɨŋ sanisu nâbi wùni yu te wùt khɨte ngə̂k ghe wâ nè wûn. Ghàn hi lehèfo ngɨŋ sanisu kə yi ghəl te Bâba tì lehêfo ghàn. ¹⁴ Ghàn bakhi kôŋì a tô a gha afân à jɨ̀m. À mò yi kôŋ a yi kwuta nâbi ghə kə ha shyə̀ à mòk, nê ghɨ jwôfà kpenê. ¹⁵ Ghàn de yutì ye a Klistù fo ma yi hi tihe kwâktì tanitu. Yènfù toŋa ghàn na ghàn fwo ben ma ghɨ hi mô ha wùn wù mòk, kəta yutìnì mi yîn. Ghàn hi fo yòŋnà ha wûn. ¹⁶ Tum à Klistù hi fate chyə kə nâ yi chyə̂ a ghàn fùtɨ̂n. Ghàn lyi tof wù jɨ̀m ma ghàn hi yikê fê fo tobhînì ha ngɨŋ sanisu. Ghàn hi yema njàŋsù Fùyènsu nì njàŋsu yulesu nì se a Yohnà Yulena nè na ghàn hi yemâ. Ghàn hi yemâ, fo àyòŋnà ha Yènfù a ghàn a təm. ¹⁷ Ghàn hi nê nâbi ghə makə ghàn jìsà yi jîs, jîsà kə a Bâba Jisòs yi yet, fo àyòŋnà ha Yènfù, Bì tohne ha wûn. ¹⁸ Ghàn kəta hi tè ngumli lɨm ghana a ywena a malana te ghɨt ghe a ghɨ jûmtè Bâba. ¹⁹ Ghàn kəta hi tè kòŋà ywên ghana a lɨmànà a malana. Kə ghàn hi bəma ha ghɨna. ²⁰ Mwəlà, ghàn hi ywo bì ghana nì ha nì ghana kə gha à jɨ̀m beka yìna nè na Bâba hi saŋlê. ²¹ Be mwəlà, kə ghàn hi njaŋa chyâhè ha wan ghana, a bu ni ma ghɨna hi yena kə na ghàn fè kôŋà wi ghɨna. ²² Ghàn kwôsù, ghàn hi ywo ha bì ghana ghɨ fètà ghe a ghɨ mô a mbyî kə a gha à jɨ̀m. Kə ghàn hi nê kə a gha a wu yu afa ghàn khɨŋa na ghɨna yen ma ghɨ hi kôŋà ghàn. Ghàn hi fêtà nì təm ghana kə à jɨ̀m te ghɨt ghe a ghɨ fânà Bâba. ²³ Ghàn hi fêtà nâbi ghə, ghàn hi fêtà kə nì təm a ghana à jɨ̀m, te ghàn fètà ha Bâba, a bu njwo ghàn fètà ha wùt, ²⁴ khə na Bâba nè maktèlò ghàn nì mwə̀ me a wù lèma ha ghɨt a wuna. Ghàn mò ni, fêtà kə ha Bâba, Klistù. ²⁵ Wù bè kaha lâkà nâbi wùni wùt wù be kə yi ghəl a be afa a wù chehì nê. Wù lyê wi wùt wùlè hanɨ̂ŋ.

¹ Ghàn hi khɨte ghɨt ghe a ghɨ fêtà ha ghàn a lumtu jûŋ tù a be yi fètà, fê fo mwə̀ me a ghɨna kəta hi tè kət. Ghàn hi khə na, nâ ghàn boŋa kətalò bì yì fèt, wu mô a nyə̂. ² Ghàn hi jə̂mà kə yi jə̂m, kə ghàn bot. Ghàn shihi jə̀m, ghàn hi tôkà yute gha ghe a ghàn jîsà, fo àyòŋnà ha Yènfù. ³ Ghàn hi boŋa jə̂mà ha ghàh na, Yènfù ni ma ghàh khɨti lumtu hi tè fòktè tum yì jùŋ kum a gha a letena ghe a Yènfù chwùte banhe ha ghàh kum Klistù. Mu mò a ndâ chyâk beka tum yì jùŋ mi yîn a mu fòktè ni. ⁴ Ghàn hi jə̂mà kəbi na mu hi fôktè banhi tum mi yîn a lum afa a mu kəta hi fòktì atɨ̂n. ⁵ Ghàn hi tofa a lum afa a ghàn chyə atɨ̂n ghàn à ghɨt ghe a ghɨ mô teka ghɨ bimi, bobhi wi yu we a ghàn kəta ghàn à ghɨna. ⁶ Jîs yani kəta hi tè bonâ fê fomâ kə yû mù jɨ̀m, shyəma ghàn hi khə hi fate fìsè nâbi nde. ⁷ Wâ nè ghàhnà Tìkikùs nè fòktèlò nâ gha à jɨ̀m ha ghàn kum mu. Ghàh kòŋàlò wûn nâ a jûŋ, chîntè fêtà ha Bâba amok, wu fêtà kə nâ nì təm a wuna à jɨ̀m. ⁸ Mu tum kə nâ wun ha ghàn ni shyəma wù ben ma wù fokti gha ha ghàn kum ghàh, ma wù fê lumhi ghàn a ghàn a yi bimî. ⁹ Wù bênà ghê Ònesimùs a wâ nè ghàhnà we à mò kəbi wut a ghàn a nòn. Wù mô kəbi wut wù bimena wù jùŋ, ghàh kôŋà wûn nâ a jûŋ. Ghɨna nè fòktèlò nâbi ghə ghe a ghɨ gana kwoka afân. ¹⁰ Àlìstakùs te ghàh à wûn mò a ndâ chyâk, jis na mu toŋti ha ghàn, Mâk a wâ nè Bànabàs ti jis kəbi yâ. Ghɨ hì mô ma ghɨ ti jis ha ghàn kum Mâk. Wù bên, ghàn fyi wûn nâ a jûŋ. ¹¹ Jisòs we a ghɨ toŋte kəbi wun na Jûstùs ni, jis na mu toŋti kəbi ha ghàn. À mò kə ghɨna ghɨt a Jûs ghɨ bimena ghe a ghɨ fêtà ghàh à ghɨna. Mu fètà ghàh à ghɨna hi nì na ghɨta yen fə̂n wù Fùyènù. Ghɨna ti nî mu tê hì mô kə nâ a jûŋ. ¹² Èbafàlàs we a wù mò kəbi wut a ghàn a nòn, a fê mô wùt wù fètana ha Klistù Jisòs ti jis kəbi na mu toŋti ha ghàn. Wù shihi jə̀m nâbi yini, wu hi kwâktè ghàn a wun a yi jə̀m nâ a jûŋ, chyate na Yènfù ni ma ghàn faŋà kə ghàn atɨ̂n à yi bimî, ma ghàn ghəkna atɨ̂n, ghàn hi fate khə, fê nê a gha à jɨ̀m ghe a fu khɨŋa. ¹³ Mu làhi fòktì na wù ti fêt ha ghàn nâ nì jyaka fî fêt ha ghɨt ghe a ghɨ chyə a Làdisìyà nì ghê a ghɨ chyə a Hìlabolìs. ¹⁴ Lûk, a mô doktà we a ghàh kòŋà nâ a jûŋ yâ ghe Demàs jis na mu toŋti kəbi ha ghàn. ¹⁵ Ghàn toŋti wana ne ghàhnà ghe a ghɨ mô a Làdisìyà ha ghàh, ghàn fê toŋti kəbi Nimfà nì ha nôn a ghɨt a bimena ghe a ghɨ chîntè a wûn a ndâ. ¹⁶ Ghɨ taŋ ŋwàklù yîn a ghàn a fùtɨ̂n, ghàn ni ghɨ yen taŋ kəbi ha nôn a ghɨt a bimena ghe a ghɨ mô a Làdisìyà. Ghàn fê taŋ à kəbi yê a mu nyàka, yi mô hi lò a Làdisìyà hi bèn ha ghàn. ¹⁷ Ghàn jis ha Àkibùs na wù hi khə na wù kəta hi mihè fêt yi Bâba ye a ghɨ fo ha wûn na wù ni. ¹⁸ A nyàk kə nâ mu Bôl toŋtînì a wu lùk afân chin ha ghàn nì wo ma. Kə ghàn yìta na mu mò a ndâ chyâk, Yènfù chwûtè təm a jûŋà wuna ha ghàn.