2 Timotì

2 Timotì

¹ À nyak mu Bôl, ŋwàklù yina ha wò a Timotì. Mu mô wut à tum wù Klistù Jisòs ma à chwok Fùyèn. Fu chwok mu na mu fokti tum yì jùŋ kum chyənà ye a yi bè mê wi kə te fu tì chwùne. Chyənà mi yîn mô a wu yu afa ghàhnà mò a kak à mòk nì Klistù Jisòs. ² Timotì, wâ mù wù kòŋ, Yènfù, a mô Bì, ghê Klistù Jisòs, Bâba ghàhnà, chwuti təm a wuna ghɨ jûŋà ha wò nì kwohi seni, nì yutìnì. ³ Mu fo àyòŋnà ha Yènfù njwo wò fêtà ha wûn nì kwâktì yi yuleni kə te bom ghɨ̂n ndùku fêtà. Mu jə̂mà ha wò kə yû mù jɨ̀m, yità wi hi toŋte yi yet ya ha Yènfù a mu yi tɨ̂nà yì jə̀m. ⁴ Mu kwâktè te wò ndùku jyê, mu hì kôŋà nâ a jûŋ hi yen a wò shyəma yi ni, ma mu hi saŋlê. ⁵ Mu baha kwâktèlò nki yi bimî hamok ye a wò kəta ha Klistù, a mô kə yi bimî ye a Lôs a nè ni wâ ghe Yunìs a ni wâ ndùku kəta. Mu khə hamok na wò kəta kə yi bimî mi yê. ⁶ Kum gha mi yîn, mu wu hì yɨ̂ŋtè ha wò na wò kahà kwakti fo ye a Yènfù tì fo ha wò te mu tì lèma wo a wò a tû ⁷ Mu jìsà ni beka Yènfù tà tì fo jə yohnà a fanana ha ghàhnà. Fu fo yohnà na ghɨ hi nê ghàhnà kəta təm a ta, kôŋà ghɨta, fê khə hi khɨte ngɨŋsu ghàhnàsu. ⁸ Yi ni chwùtè na wò kəta wi hi tè wumî hi fòktì kum Bâba ghàhnà makə hi chwùtì na wò khəlò mu te mu mò a ndâ chyâk beka mu bime ha Klistù. Mu jîsà na wò bɨlà lyi jyak ghe a Yènfù fo ha wò, ma wò hi mô nì fati wùni hi yena ngə̂k ye a mu mò atɨ̂n kum tum yì jùŋ. ⁹ Yènfù ti bônhì ghàhnà ni na ghàhnà hi mô a ghɨt a wuna. Fu tà tì ni ni beka ghàhnà nè gha yi jûŋì yile ha wûn. Fu tì ni kə ha wun a ngɨŋ kum təm a jûŋà. Fu ti lêm nâ shyəma mbyî yimi, na wù nè nêlò gha mɨ ghɨ̂n tohne a Klistù Jisòs hi chwùtì təm a wuna ghɨ jûŋà. ¹⁰ Chin te à hì mô ma wù ti chwûtì təm a jûŋà mɨ ghɨ̂n wu lum na Klistù Jisòs, Bònhì ghàhnà tî bên. Wù ti nî kpû hì fê kəta wi jyaka kum ghàhnà, yiki tum yì jùŋ hi nì na ghàhnà hi khə chyənà ye a yì bè mê wi. ¹¹ Yènfù ti chwok mu na mu hi mô wut à tum, fôktè tum yì jùŋ mi yîn, fê yike ghɨta. ¹² A ni gha ye a mu yena ngə̂k kum yì yîn, biyani wume wi beka mu khəlò wùt we a mu bime ha wûn khə na wù tòknèlò nì mu hi tàn wu tuk wu gokhenu. ¹³ Fati khɨti hamok mi yìna a mu yike wò ni ma wò hi boŋa yike ghɨta. Wò shìki nê gha mɨ ghɨ̂n, wo fati khɨti bimî ya nì kôŋ ye a ghàhnà kəta ha Klistù Jisòs. ¹⁴ Fati khɨti gha a jûŋ ghe a ghɨ tì fo ha wò nì jyak ghe Yohnà Yulena ghe a ghɨ mô a ghàhnà fùtɨ̂n fo ha wò. ¹⁵ Wò khəlò na nâ ghɨt a bimena ghe a ghɨ mô yi lak yi Esiyà à jɨ̀m ti tet de mu. Nâ Fìjelùs nì Hèmòjenès ti boŋ têt. ¹⁶ Mu jə̀mà na Bâba chwuti seni kwolani ha ghɨt a Ònesfolùs yi sah yi nda beka wù che ni mu hì saŋle kə ni. Wù chehì wume wi na mu mò wut à ndâ chyâk. ¹⁷ Wù tì ben tan a Lûm kə wu yu, gbi khɨŋ kə mu ni, yen mu. ¹⁸ Mu jə̂mà na Bâba bê chwuti seni kwolani wuni ha wûn wu Tuk wu gokhenu. Nâ wò khəlò te wù ndùku gâmtè mu a Efisùs.

¹ A mô ha wò a wâ mù Timotì, wo kəta hi tè tâ kum təm a jûŋà ghe a Klistù Jisòs tì chwùte ha wò. ² Wò ndùku ywo lò te mu ndùku yike a ghɨta ashyə̂. Wò kəta hi lyè yiki tɨni chîn hi lèm ha ghɨt a jûŋà wu wô, ma ghɨna hi gbê yike ghɨt ale. ³ Wò kəta hi tè yen a ngə̂k te sojà yì jùŋ ye a yì ywo ha Klistù Jisòs. ⁴ Nâbi yìni sojà mòmhè hi tè nè fêt yi wuni a jûŋ, hi nì na wùt wù chìk à wûn hi saŋlê. Wu lèmà wi ngɨŋ à wûn a yi gha yile, a bu fêt yi sojà. ⁵ Wùt nyɨŋana wi hi nyɨŋ a yə̂, a bu kə na wù ti nyɨ̂ŋ te saktu nyɨŋ tu khɨŋa. ⁶ À hì fêtà nâbi nde a wun a fùk nì jyaka, ma wù bê boŋà kpì kəbi ashyə̂. ⁷ Kwàkti gha ghɨ̂n a mu jìsà ni, beka Bâba nè nêlò, ma wò ywo khɨli gha tɨna nâ à jɨ̀m. ⁸ Wo kwâktè Jisòs Klistù te Yènfù tì lôhì wûn a yi kpu. Wu mô ma wù fwo a Defìt yi sah yi nda. Yìna mô tum yì jùŋ ye a mu fòktè. ⁹ Mu yena ngə̂k, ghɨ fa mu te wut à ndâ à chyâk ni kə njwo mu yike tum yì jùŋ ha ghɨta. Biyani gha Fùyèn mi yîn mò ghɨ bu hi fà a chyâk. ¹⁰ À mò kum gha mɨ ghɨ̂n a mu kəta hi tè kwut a təm kə a gha à jɨ̀m kum ghɨt ghe a Yènfù chwokte shyəma ghɨna bê khɨti bônì tohne a Klistù Jisòs hi khɨte kokhînì a yû mù jɨ̀m. ¹¹ Gha yîn a ghɨ jîsà ni mô kə nâ hamok na: “Ghàhnà shìki mô ma ghàhnà ti kpû nì wûn amok, ma ghàhnà bê kaha hi chyə̂ kəbi nì wûn amok. ¹² Ghàhnà shìki wunhe kə yi wunhî, ma ghàhnà nì wûn bê hi saka mbyî. Ghàhnà ki tunhi na ghàhnà khə wi wûn, ma wù bê boŋà tunhi na yi khə wi ghàhnà. ¹³ Ghàhnà ki fît a jɨ̀m ha wûn, ma wù bê tè kwuna jə̀ a yi tô yi gha afa wù jìsa, beka wù wi hi bè tunhe ngɨŋ à wûn.” ¹⁴ Wo yɨ̂ŋtè gha ghɨ̂n a mu jìsà ha wò ni ha ghɨta, chyàhi ha ghɨna te yi sâk a Yènfù ashyə̂ na, kə ghɨna hi gbê gufnà chyâ nì gha, yike a ghâ ghɨ kəta wi gâmtìnì. Gha mɨ ghɨ̂n gàmtè kə hi bobhe ghɨt ghe a ghɨ yute. ¹⁵ Mòmhi nâ nì jyaka hi nì na Yènfù yen na wò mò wut wù fètana wù jùŋ, a we wù wume wi hi tè nè fêt yi wuni, fê fate yike kə hamok ye a yì mò a tum yì jùŋ. ¹⁶ Kə wò hi yute jîs yi ngwoni ye a ghɨ jîsà a mbyî afân beka yi fo wijə kokhînì ha Yènfù. Nki tu jìs mi tɨ̂n nè kə na ghɨta de lum te a Yènfù khɨŋa. ¹⁷ Jîs yi ghɨna mô te à jì ghe a ghɨ yè kuta mihè jyà wùt yi wùn, yima wi. Ghɨt ale ghe a ghɨ jîsà jîs mi yîn mò Hèmenìyùs ghê Filitùs. ¹⁸ Ghɨna yike na Yènfù hì mô ma fu tì lôhì ghàhnà a yi kpû. Yikî mi yîn mô nâ yikî yi fəmi. Yi ti nî na ghɨt ale tunhi ma hi fê bime wi ha Klistù. ¹⁹ Biyani yi ta hi nèkhè a chyə a nda ghe a Yènfù hì mô ma wù ti lêm. Ghɨ tì nyak atɨ̂n na, “Fu khəlò ghê a mò ghɨt a wuna,” fî nyak na, “Nâbi nde we a wù jìsà na yi jùmtè Bâba kətalò hi dè gha wuna ghɨ be ghe a wù nè.” ²⁰ Wò khəlò na, a nê hì mô a wùt wù chìk a ndâ, kaŋu dô kə ni. Wule mô ma ghɨ fate nì silbà, wule mô ma ghɨ fati nì kaha, wule mô ma ghɨ chwùf mu kâk, wule mô ma ghɨ bwəm nì chyaka. Ghɨ nê ghɨ lyi nki kaŋ we a ghɨ fate nì silbà makə nì kaha, ghɨ lem a mwə atɨ̂n wu yu afa ghɨ naŋhe gha, lyi wule we lem a mwə atɨ̂n nâbi wùni yu. ²¹ À ki de nâbi nde gha be ma wù hi mô nì yulînì, ma Yènfù lyi wûn kə nâ ha kàntè wùt beka wù ti mâkà ngɨŋ à wûn hì mô kə nâ wut wù fètana ha wûn, gbùtè hi tè nì kə nâ fêt tu jûŋ tù jɨ̀m. ²² Tet kahi a yi bàm a tu mômhì afa a tu fo ngə̂k ha ngwàk, mòmhi hi tè mò chilichili, bimi ha Klistù ma wò hi kôŋà ghɨta, fê chyə nì yutìnì. Wo nê gha mɨ ghɨ̂n nâ à jɨ̀m ghàn à ghɨt ghe a ghɨ jə̂mà ha Bâba nì təm a yulena. ²³ Kə wò nè yute jîs yi ngwò ye a yi fêtà wi gha. Wò khəlò na jîs mi yîn bè kə nì njaŋi. ²⁴ Wo khə na wùt wù fètana wù Fùyèn kəta wi hi tè njâŋ. Wù kəta hi tè bonâ nâbi ha nde fê fate yike ghɨta kə nâ a jûŋ, kəta yi wunhî, ²⁵ tihe ghɨt ghe a ghɨ khɨmne gha ye a wù jìsà nì yutìnì, khə na Yènfù nè nêlò ma ghɨna kahi təm a ghɨna a ghɨna sùbe ma kahà hi khə gha ye a yi mô hamok. ²⁶ Ghɨna hì mô ma ghɨ ti fên a deblì a tâm hì nê fêt yi wuni, ma wò ki nî ni ma Yènfù làhi nì ma tof wu ghɨna kahà ben, ma ghɨna tet à fwu a tam afû.

¹ Mu khɨŋa kəbi na wò hi khə na, à bè hì mô a mu tuk mù gòkhemù, ma ngəksu hi mô nâ hidù. ² Ghɨta bè hi tôknè kə nì ngɨŋsu ghɨnasu, kôŋà wu kâ nâ à jûŋ, ghaŋhe wu wun, lyi wi na wùt lè mò shyə ale. Ghɨna bè hi sûlè à ghɨ̂t, fê tâ nì tu ha be ghɨna nì ne ghɨna. Ghɨna bè hi fo wi yòŋnà ha wùt kum nâ gha yi tetani yile te wùt ne ha ghɨna, fânà wi Yènfù. ³ Ghɨna bè hì kəta wi kwohi seni ha wùt, lehèfo wi ghɨta, jîsà gha a be kum ghɨta, khɨte wi ngɨŋsu ghɨnasu, chyə̂ kə te sù nyâm, kôŋà wi hi tè yen a yi gha yi jûŋì. ⁴ Ghɨna bê hi bəkle ghɨta nì jîs yi ghɨna, shɨŋa nê kə yi nî gha teka ghɨ kwakti, chaha à ghɨ̂t. Ghɨna bè hì kôŋà wi Yènfù, bɨlà kôŋà kə mwə̀ me a mù nè na ghɨna hi ywo jùŋ. ⁵ Ghɨna bè hì funa yi funâ ghɨt ghe ghɨ kokhe Yènfù, biyani ywo wi ha Yènfù nâ hakoh. Kə wò hi kəta gha yile hi nì ghàn à nki yi ghɨt mɨ ghɨ̂n. ⁶ Ghɨ le mò a ghɨna fùtɨ̂n, gbê fìklè lye a ghɨta sù ndâ, lehe à ywên ghe a ghɨ kəta təm a bota, mô ma ghɨna ti ni chyâhì gha be gha tɨna fo ngə̂k ha ghɨna. Ghɨna wu hì chyə kə ghɨna tɨ̂n à sù səm. ⁷ Ywên mɨ ghɨ̂n yusa mòmhè kə hi tè khə gha yi fe, biyani teka ghɨna timè khɨli kum yikî ye a yi mô hamok. ⁸ Ghɨt mɨ ghɨ̂n nò yikî ye a yi mô hamok kəbi te Janìs ghê Jambès tì be hì nô yikî yi Musìs. Ghɨna kəta kwâktù betu, fê kpene wi yi gha yile atɨ̂n à yì bimî. ⁹ Ghɨna nè yênà wijə ha ghaf beka a tuk wule ghɨta bè yena mihèlò na ghɨna mô wù ngwò. À ni mò kəbi te sah yi Janìs ghe Jambès tì bana a ndan. ¹⁰ Timotì, wò hì mô kə nâ chîn ma wò ti jûmtì kwôk nì yikî mi nì chyəna ma, nì gha ye a mu chehì kwâktè hi bè nì. Wò ti yen lum we a mu samhe ha Klistù atɨ̂n, kəta təm a yutena, kôŋà ghɨta, khə hi kwut a təm. ¹¹ Wò tì yên te ghɨ chehì chɨma wulu mu nì ngəksu nì gha ghe ghɨ tì gàna ha mu a yi tèk yi Antiyòk. Wò khə kəbi ghe a ghɨ ndùku ngane mu a yi tèk yi Ìkonìyùm nì Lìsɨtɨlà, mu kwut kə a təm kum ngəksu tɨnsu, biyani Bâba fihe mu a sù ngə̂k afû nâ sù jɨ̀m. ¹² Mu jìsà hamok na, à shìki kôŋà nâbi nde hi tè chyə chyəna Fùyènà, jûmtè Klistù Jisòs, ma ghɨta hi chɨma wulu wunu. ¹³ Ghɨta be nì ghɨt ghe a ghɨ chwûtè na ghɨ mò a shyə bu, bè hì befa yê kə ashyə̂, jɨ̂ŋhè à ghɨ̂t, ghɨt ale boŋa jɨ̂ŋhè kəbi ghɨna. ¹⁴ Biyani Timotì, bimi kə hamok ye a ghɨ tì yike wò nì yini. Nâ wò khəlò chichà se a su tì yike wò nì gha mi yîn. ¹⁵ Wo kwâktè kəbi te ghɨ ndùku yike wò nì gha ma ghɨ fwo a ŋwàklù Fùyèn kə nâ wo baha mô walà. Gha mɨ ghɨ̂n mò hi fo tofu ha wò shyəma wò bimi ha Klistù Jisòs ma wù bonhi wò. ¹⁶ Nâbi yìni gha te ghɨ nyàka a ŋwàklù Fùyèn mò ma à fo Fùyèn na ghɨ nyak, jwôfà kpenê na ghɨ hi yike ghɨta atɨ̂n, fôktè njahi ghɨ̂tì atɨ̂n, tihe à ghɨ̂t atɨ̂n, chwûtè ha ghɨt atɨ̂na shyəma ghɨ hi chyə chyəna chilichili. ¹⁷ Gha mɨ ghɨ̂n ni mò hi nì na wùt wù fètana wù Fùyèn hi kpene mihè hi tê nì nâ nki tu fèt tu jûŋ tù jɨ̀m.

¹ Klistù Jisòs bê bênà te fə̀n ma wù sak ghɨt à jɨ̀m, ghe a ghɨ baha chyə nì ghe a ghɨ tì kpute. Kum ni, mu wu hì jîsà ha wò nâ nì jyaka, a Yènfù ashyə̂ nì Klistù Jisòs na, ² wò hi fôktè tum yì jùŋ ha ghɨta. Wo fôktè kə yi fôktì makə ghɨta kòŋàlò hi yû, makə ghɨ kôŋà wi. Wo chwûtè banhe gha ye a ghɨta nè bobhe, jîsà na kə ghɨna fi ni, chyate na ghɨna hi ywo gha mɨ ghɨ̂n. Wò shihi yike ghɨna, wò hi fate yike nì təm a yutena. ³ Mu jìsà ni beka yu wu hì bakhe bênà, ghɨta nè hi yute wi yikî ye a yi mô hamok, biyani khɨŋa hi ywo gha ghe a ghɨna kôŋà, ghɨ hi gbê lyê bê nì chichà se a su nè bê yike gha mɨ ghɨ̂n ha ghɨna. ⁴ Ghɨna ti de gha ye a yi mô hamok hì bɨlà yute màgân mù yîm. ⁵ Ha wò, wò kəta hi khɨte ngɨŋ yâ, hi kwut a təm hi bèkà ngə̂k yâ hi tè fòktè yèn nì tum yì jùŋ fê nê fêt ya yì jɨ̀m te wut à Fùyèn wù fètana. ⁶ Ha mu, mu hì mô ma mu hì fo yênà nì ngɨŋ à mì ha Yènfù te a yi fô. Yu mu kponu ti bakhâ. ⁷ Mu ti nô kwok kə nâ a jûŋ. Mu ti nyiŋ tan te ghɨ khɨŋa, fî fati khɨti bimî mi. ⁸ Mu hì yute kə maktu mu chyənà chilichili chîn. A Bâba ghàhnà we a wù saka ghɨta kə chilichili bè fo maktu mi wûn ha mu wu tuk wu gokhenu. Wù bè fo wi kə ha mu, wù bè folò kəbi ha ghɨt ghe a ghɨ chehì yute bên yi wuni yi chiki nì kôŋì. ⁹ Mòmhi nâ nì jyaka hi nyàŋhè bèn hi yen a mu, ¹⁰ beka Demàs ti kôŋ mwə̀ mù mbyî, tet de mu, yen a Tèsàlonikà. Kɨ̀lisèns ti boŋ lô yen a Gàlesiyà, Taytùs ti yen a Dàlàmàtiyà. ¹¹ À faŋ kə Lûk afân ghàh à wûn. Wò shihi bèn wo ben ghàn à Mâk shyəma wù nê hi gâmtè mu nì fêtì. ¹² Mu ti tum Tichikùs a Efisùs. ¹³ Wò shihi bèn, wo ben nì nju samsu wafa sê a mu tì de a Kabùs nda a Tɨ̀luwàs yâ. Nâ kəbi nì ŋwàklù sam se a ghɨ lima yi lîm yâ, nâbi nì se a ghɨ fate nì gwusu nyâmsù yâ. ¹⁴ Àlèksandà we wù twe mwə̀lû yâ che mom gha ha mu, yi bəma kə ni. Bâba nè folò ngə̂k ha wûn kum gha mi yê. ¹⁵ Nâ wò a wo ngɨŋ boŋa kəta hi tè tòknà kum wûn beka wù chehì jîsà gha nâ ha jyak, ghɨ jwôfà wi kum tum yì jùŋ ye a ghàhnà yike. ¹⁶ À hì mô te mu timi wu lùk wu saku hi jìs hi gàmtè ngɨŋ à mì a wu tuk wu shyə, ghɨta tet kə yi têt, nâ wùt tê fwo bèn hi tòk à mu. Mu jə̂mà na Yènfù lehèfo ghɨna te ghɨna che tet a de mu. ¹⁷ Bâba tî time hi tòk à mu shyəma mu khɨti jyaka hi fòktè mihì tum yì jùŋ ha tumu wù jɨ̀m. Wù fî bônhì mu a yi kpû. ¹⁸ Mu khəlò na Bâba nè fihelò mu nâ a sù ngə̂k sù jɨ̀m, ma wù fê lyi mu na mu fate gbi kə ni hi lye wu lùk wu wunu fə̀nù a nyə̂. Ghɨta hi kokhe wûn a yû mù jɨ̀m. Àmèn. ¹⁹ Toŋti ha Bìsilà nì Àkwɨlà nì ghɨt a Ònesfolùs ndâ ha mu. ²⁰ Èlastùs tì faŋ a yi tèk yi Kolèn. Mu che shihi lò, de Tìlofimùs a yi tèk yi Mìlitùs, wu yafâ. ²¹ Mòmhi nâ nì jyaka hi bèn teka bɨ̀ŋ chwu. Yùbulùs nì Budèns nì Lanùs nì Kɨ̀lodiyàs nâ nì ghɨt a bimena à jɨ̀m jis na mu toŋti ha wò. ²² Bâba nè gàmtèlò wò. Yènfù nè chwùtè lò təm a jûŋà ghe ha ghàn à jɨ̀m.