2 Tèsàlonikà

¹ À nyak mu Bôl ghàh à Silàs nì Timotì ŋwàklù yìna ha ghàn nôn a ghɨt a bimena ghe a ghɨ mô a yi tèk yi Tèsàlonikà. Ghàn mò ghɨt a Bè ghàhnà Yènfù, fê mô ghɨt a Bâba Jisòs Klistù. ² Yènfù, Bì ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn. ³ Ghàh kəta hi tè fo àyòŋnà ha Yènfù kə yû mù jɨ̀m kum ghàn a wana ne. A mô kə nâ gha yi jûŋì te ghàh nè ni njwo bimî yani ha Klistù ləma yênà kə ashyə̂, kôŋ yani fê ləma yênà kə ashyə̂. ⁴ A ni gha ye a ghàh shihi jìs ha nôn a ghɨt a bimena ale, ghàh hi jala kum ghàn. Ghàh ni nè ni beka ghàn time kə a ghàn a yi bimî nâbi te ghɨta chwoka wulu wanu, ghàn fê yena ngəksu lesu biyani wunhe kə yi wunhî. ⁵ Wunhî yani yina chwùtè a ndan na Yènfù saka lò ghɨta kə nâ chilichili, mô hi nì na ghàn hi kpenê hi tè mò wu lùk wu fə̀n wù Fùyènù afa a ghàn yena ngə̂k kum wunu. ⁶ Yènfù bè folò ngə̂k ha ghɨt ghe a ghɨ chehì fo ngə̂k ha ghàn beka fu nê kə yi gha ye a yi mô chilichili. ⁷ Fu bè nê, ma ghàn ghe a ghàn yena ngə̂k chîn khɨti yutìnì, ghàn shihi khɨtî, ma ghàh boŋà khɨti. Yènfù bè nê gha mɨ ghɨ̂n wu yu afa Bâba Jisòs kaha chwo bena a nyə̂ ma wù chwûtì ngɨŋ à wûn ghê anjèlsu wunsu se a su kəta jyaka. ⁸ À bè hì mô te wù chwo bênà ghê anjèlsu wun mu sê, ma chwûlù wu wùsu hi bame, ma wù kaha lak ghɨt ghe a ghɨ tì mana Yènfù fî tunhi na ghɨ ywo wi gha ye a tum yì jùŋ kum Bâba ghàhnà Jisòs ndùku jîsà. ⁹ Yènfù bè bobhelò ghɨna ma wù ni ma ghɨna khɨti ngə̂k ye a yì bè mê wi, ma ghɨna hi bu wu lùk afa a Bâba bè hì mô atɨ̂n, yena wi jyaka a kanana wuna. ¹⁰ À bè hì mô te wù kaha bênà wu tuk afû, ma ghɨt a Fùyènà à jɨ̀m hi mô nì kani, fo kokhînì ha wûn. Nâ ghàn bê hì boŋa mô a ghɨt mɨ ghɨ̂n a fùtɨ̂n beka ghàn ti bimi a gha afa a ghàh chehì fôktè ha ghàn. ¹¹ A ni gha ye a ghàh jə̀mà ha ghàn kə yû mù jɨ̀m na Yènfù ghàhnà fu ni na ghàn hi chyə chyənà ye a yì kpene ma a ni ye a fu toŋa ghàn na ghàn ben ma ghɨ hi chyə̂. Ghàh jə̀mà na fu fo jyaka ma ghàn hi nê gha a jûŋà ghe a ghàn kòŋà hi tè nì ma ghàn fê nê mihi fêt yani te ghɨt a bimena. ¹² Ghàn shìki nî ni, ma ghàn hi fo yet yi chiki ha Bâba ghàhnà Jisòs, ma wù ni, ma ghàn hi boŋa kəta kokhînì. Gha mɨ ghɨ̂n gànà njwo Yènfù ghàhnà fu ghê Bâba Jisòs Klistù kəta təm a jûŋà ha ghàn.

¹ Ghàh khɨŋa hi jìs ha ghàn kum kə bên yì Bâba ghàhnà Jisòs Klistù, kəbi te ghàhnà nì wun bè hì chîntè mô amok. Ghàh chyate ghàn a wana ne na, ² kə ghàn nê dê ghɨt ghe a ghɨ jîsà na tuk we a Bâba mò hi bè bèn atɨ̂n hì mô ma wu ti bên, chiŋhe ghàn fê bɨla nì tu wanu. Gha mi yina làhi tè mò ma à jis wut, mô na yì fòktè tum ma yì lo ha Yènfù, yu wule ma yì hi mô ma yi fwo yi yikî yile, yu wule ma yi hi mô ma wùt fòkti jis na yi fwo a ŋwàklù ma a nyak chinhi ghàh ha ghàn. ³ Kə ghàn de na wùt lehi ghàn nâ hakoh beka tuk wu tɨnu bè bê wi a bu na ghɨt a dona bê hi ta nì to ha Yènfù, ma wùt à təm a be fwo timi. Yènfù bê mihi wùt a təm a be mu wuna wu lùk wu wùsu. ⁴ Wùt wù be mu wuna bè fwo ma wù no yèn mùlè nâbi nì gha ghə a ghɨta ngumle, hi chwùtì na yi ta chyâlò yèn mù tɨ̂n. Ma wù bê yê lyê ndoko a ndâ Fùyèn yì chìk ma wù hi jîsà na à mò kə nâ yi Fùyèn. ⁵ Mu khəlò na ghàn baha kwàktèlò te mu ndùku jîsà gha mɨ ghɨ̂n ha ghàn te ghàhnà ndùku baha mô amok. ⁶ Nâ ghàn khəlò gha ye a yi tàhè na kə wùt a gha a be mu wuna fwo timi chîn. Wù bè fwo time kə wu yu afa Yènfù khɨŋa. ⁷ À mò nâ chin ni ghɨ nyamte fètà hi nì na ghɨta hi tunhe Yènfù. Gha ye a mu jìsà nè gânà mihè wijə a ndan, a bu kə na Yènfù ti chyâkhì wùt we a wù mò a wu lum chin tâhè na kə gha mɨ ghɨ̂n gan. ⁸ Ghɨ chwûtì wùt mu wuna a ndan ma a ni wùt a təm a be. Bâba Jisòs bè bênà nâbi wùni tuku ma wù ywî wun nì yuksu ma su fwo a wun a yi jwô, kəbi nì ban yi chiki wuni. ⁹ Wùt a gha a be mu wuna bè bênà nì jyaka, ma à fo Satàn ma wù hi kama nê gha a kanana ale, chwùtè chwesu fəmsu su lesu ha ghɨta. ¹⁰ Wù bè hì kəta təm a be, jɨ̂ŋhè ghɨt ghe a ghɨ kəta hi kputî, kə a tu lum tu dô kə ni. Ghɨna bè kpute beka ghɨna tà tì koŋ jə hi ywo tum ye a yì mò hamok kum Bâba ghàhnà shyəma Yènfù bonhi ghɨna. ¹¹ A ni gha ye a yi bè nê na Yènfù jɨŋhi ghɨna ma ni na ghɨna hi bime gha a fəma, ¹² ma wù fê sak à bobhi ghɨna ghe a ghɨ tunhi hi bime tum yì jùŋ ye a yì mò hamok nâ à jɨ̀m hì kôŋà kə gha a be. ¹³ Ghàh kəta hi tè fo àyòŋnà ha Yènfù kə yû mù jɨ̀m kum ghàn a wana ne. Bâba ti kôŋ ghàn, ghàn hì mô a nòn a ghɨt ghe a fu chwoka kə ha yìmi hi bònhì tohne yi fèt afa a Yohnà Yulena tì ne hi lèmà ghàn nì yulînì, fê tohne yi bimî afa a ghàn kəta kum a gha ghe a ghɨ mô hamok. ¹⁴ Yènfù tî toŋa ghàn tohne a tum yì jùŋ afa a ghàh tì fòkte ha ghàn shyəma ghàn ben ma ghɨ hi boŋa kəta ghak ye a Bâba ghàhnà Jisòs Klistù kəta. ¹⁵ Ghàh wu hì jîsà ha ghàn a wana ne na, ghàn khɨti bimî yani, kə ghàn bimi na wùt ni ma ghàn de yiki hamok ye a ghàh tì yike ha ghàn, fî nyak ha ghàn a ŋwàklù. ¹⁶ Bâba ghàhnà Jisòs Klistù nâ nì ngɨŋ à wûn ghê Bè ghàhnà Yèn fe a fu kôŋà ghàhnà ti ni na ghàhnà hi kəta təm a yutena kə yu mù jɨ̀m, fê khə hamok na ghɨ bè khɨte lò mwə̀ me a wù chwùne kum təm a jûŋà wuna. ¹⁷ Fu nê na ghàn hi kəta təm a yutena nì jyaka hi tè nè gha a jûŋà fê jîsà kə gha a jûŋà yu mù jɨ̀m.

¹ Hi gòkhì a wana ne ghaha, ghàh jìsà na ghàn hi jə̂mà ha ghàh shyəma ghàh ni ma tum yì jùŋ yì Bâba ləma yen kə luk tù jɨ̀m shyəma ghɨta bimi ma ghɨ hi fo kokhînì ha Yènfù kəbi te ghàn tì bime hì fô. ² Ghàn jəm kəbi na Yènfù fihi ghàh a ghɨt ghe a wo a ghɨ kəta təm a be nì ghe a ghɨ nê gha a be. Ghàn khəlò na ghɨt ale tà bime jə tum yì jùŋ yina. ³ Biyani Yènfù jîsà nâbi na ghə, nê kə yâ. Wù nê nêlò ma təm a ghana hi tâ ma wù bobhi ghàn a deblì a wô. ⁴ Bâba ti ni ghàh tê hì yikte kə ghàn wu wùn. Ghàh khəlò na ghàn chyə kə nâ te ghàh jìsa na ghàn hi chyə̂ fê mô hi tè chyə yèn kə yâ. ⁵ Ghàh jə̀mà na Bâba ni ghàn yen kôŋ ye a Yènfù kòŋà ghàn ma wù fê ni na ghàn hi wunhe kə yi wunhî te Klistù. ⁶ Ghàh jìsà ha ghàn a Bâba ghàhnà Jisòs Klistù a jyak a wana ne na, kə ghàn hi gbê ghàn à ghɨt a bimena ghe a ghɨ yole, nê wi gha ye a ghàh tì yike ghàn na ghàn hi nê. ⁷ Nâ ghàn a ghàn a sù ngɨŋ khəlò na ghàn kəta hi tè fèt kə te ghàh ndùku fêtà. Ghàh ndùku yole wi te ghàh ndùku baha mô ghàhnà. ⁸ Ghàh tà tì yə jə shyə a wûtà faŋ hi làk. Ghàh ndùku fêtà nâ nì jyaka. Ghàh ndùku fêtà nchwì fêtà ntuksu beka ghàh ndùku kôŋà wi hi tè fo ngə̂k ha ghàn. ⁹ Ghàh ndùku kətalò kə nâ jyaka hi jìs na ghàn lak ghàh a yi fèt afa a ghàh ndùku nê biyani ghàh faŋ hì fêtà kə yi fêt shyəma ghàn sina ma ghɨ hi boŋa fêtà kəbi te ghàh. ¹⁰ À ndùku mô nâbi te ghàhnà baha mô amok, ghàh jis ha ghàn na, “À tunhi nâbi nde na yi fètà wi, kə wùt ha ghàn fo shyə na wù yə.” ¹¹ Ghàh ni jìsà ni beka ghàh ywo na ghɨt ale mò a ghàn a fùtɨ̂n ma ghɨna ti tunhi na ghɨna nè fê fêtà wi nâ shyə ale hi gàmtè ngɨŋsu ghɨna su, faŋ hì lye chyâ kə ghɨta a ghâ. ¹² Ghàh jìsà ha ghɨt mɨ ghɨ̂n a Bâba Jisòs Klistù a jyak, jîsà kə nâ nì jyaka na, ghɨna hi fate chyə kə nâ te ghɨta kəta hi tè chyə̂, fêtà hi tè khɨte shyə hi gàmtè ngɨŋsu ghɨna su atɨ̂n. ¹³ Ha ghàn a wana ne, kə ghàn bot, hi tè nè kə gha a jûŋà. ¹⁴ Wùt shìki tunhi na yi nè wi gha ye a ghàh nyàka ha ghàn a ŋwàklù afân, ghàn lem yi se a wun wu wùn. Ghàn lem ya, kə ghàn hi fê nê kwônà gha nì wûn, shyəma wù yen ngɨŋ à wûn ma wù wumi. ¹⁵ Biyani kə ghàn hi nê gha ha wun ni te ghàn nè ha bànà yânì, ghàn hi bɨlà fo tobhînì ha wûn kə nâ te ghàn fo ha wâ nì wânù. ¹⁶ Mu jə̀mà chin na Bâba we a wù fo yutìnì ni ghàn hi kəta yutìnì kə yû mù jɨ̀m, makə à gan nâbi ghə. Bâba hi mô kə ha ghàn à jɨ̀m. ¹⁷ À nyak kə nâ mu Bôl toŋtînì a wu lùk afân chin ha ghàn nì wo a ma. A mô chwena ghe a mu nyàkà yet yi mi nâbi a yìni ŋwàklù, mu lem na. ¹⁸ Bâba ghàhnà Jisòs Klistù chwuti təm a jûŋà wuna kə ha ghàn à jɨ̀m.