2 Bità

¹ À nyàkà mu Samùn Bità ŋwàklù yina. Mu mô wut wù fètana ha Jisòs Klistù fê mô kəbi wut wù tum ha wûn. Mu nyàkà ŋwàklù yina ha ghàn ghe ghàn bime ha Jisòs Klistù kəbi te ghàh. Bimi yina jwòfàlò ha ghàn kəbi yi ghəl te yi jwôfà ha ghàh. Jisòs Klistù ni ma ghàhnà hi kəta bimî yîn beka wù mò chilichili. Wù mò Yènfù ghàhnà fu ma wù ti bônhì ghàhnà a sùbe. ² Yènfù chwuti təm a jûŋà ha ghàn nâ haŋaŋ ma wù fo yutìnì ha ghàn beka ghàn khə wûn fê khə Bâba ghàhnà Jisòs Klistù. ³ Yènfù ti fo nâbi ghə te ghàhnà khɨŋa shyəma ghàhnà hi chyə chyənà yì yulena ye a yì kpene. Fu fo mwə̀ muna tohne a wun a jyak wu lum na fu ti ni na ghàhnà hi khə wûn. Fu ti toŋa ghàhnà na ghɨ hi chyə a wun atɨ̂n à yi ban yi chiki, gbê a funfu lumtu jûŋ tù. ⁴ A mô wu lum mu wuna a Yènfù tì lunhe chwuna te a fu tì chwùne na fu bè folò fo tu jûŋ tù kana tu, ma tu gamti ghàhnà na ghɨ tet à fwo a gha a be afa a njyàsu wùnsu bènà nì ghɨna a mbye afân, ghɨ bobhe à ghɨ̂t, ghàn hi chyə chyəna Fùyènà. ⁵ Te ghàn hì mô ghɨt a bimena ni, ghàn mòmhi nâ nì jyaka ma ghɨ hi nê gha a jûŋà hi kpenhi a ghàn a tô yi bimî. Ghàn hi chyə chyənà yì jùŋ mi yìna, fê tofâ. ⁶ Ghàn shihi chyə te ghɨt a tofana, ghàn hi boŋa khə hi khɨti ngɨŋ sanisu, khə kəbi hi wunhî, wunhe wi kə yi wunhî biyani fê chyə chyənà ye a yì nè Yènfù saŋlê. ⁷ Ghàn shihi chyə chyənà mi yìna, ghàn hi kôŋà kəbi wana ne, kôŋà wi kə wana ne biyani fê kəta yi kôŋ kə ha ghɨt à jɨ̀m. ⁸ Ghàn shìki ləmâ ghàn a chyənà wu lum afân, ma ghàn hi nê gha kə yi ghəl, fê mo wu tam, yi chwûtè na khə ye a ghàn khə Bâba ghàhnà Jisòs Klistù ləhà wijə halô. ⁹ Biyani ghɨt ghe a ghɨ chyə wi wu lum afân mò te ghɨt a fefana, ke yena wijə shyə. Ghɨna mô ma ghɨ ti yità na Yènfù ti su ghɨna a ghɨna besu shyəsu. ¹⁰ A ni gha ye a mu chyate ghàn, a wana ne, na ghàn tòkà khɨti gha mɨ ghɨ̂n, ma ghɨ ta, hi chwùtì na Yènfù ti chwokte ghàn toŋa fihi na ghàn hi mô ghɨt a wuna. Ghàn nè ni, ma ghàn bê tè fên a ghàn a yi bimî, ¹¹ ma Yènfù ni, ma lumu ban à mihi shyəma ghàn lyi wu lùk wu fə̀n wu Bâba, a Bònhì ghàhnà Jisòs Klistù, a mô fə̂nù ma wu ti faŋ kə hamok. ¹² Kum ni, mu wu hì yɨ̂ŋtè gha mɨ ghɨ̂n ha ghàn nâbi te ghàn hì khə fê mô ma ghàn ti khɨti gha mɨ ghɨ̂n a ghɨ mô hamok ni, ghɨ tâ. ¹³ Yi mô chilichili na mu hi yɨ̂ŋtè kə yi yɨ̂ŋtì gha atɨna ha ghàn nâ shyəma mu bê kpu ma ghàn hi kwâktè. ¹⁴ Mu jìsà ni beka Bâba ghàhnà Jisòs Klistù hì mô ma wù ti chwûtì banhi ha mu na, yu mu fè dâfà wijə a mbye afân. ¹⁵ Yi ni chwùtè na mu mòmhè nâ nì jyaka hi nì shyəma mu nê kpu ma ghàn hi yɨ̂ŋtè gha mɨ ghɨ̂n. ¹⁶ Gha ghe a ghàh fòktè ha ghàn kum bên yì Bâba ghàhnà Jisòs Klistù nì jyaka a wuna ni mò a gha ma ghàh ti yen kə nâ a ghàh a sù ngɨŋ. A bu mù màgân mù yîm te wùt tofana wùlè fate. ¹⁷ À ndùku mô te bè wûn, Bâba Yènfù kokhe wûn na wù khɨti ban yi chiki, ghàh yên. Ghàh tî yu te Yèn fe a fu kəta kə jyak à jɨ̀m jìsà na, “Wùna ni mò wâ mù wù kòŋ, mu saŋle kum wûn hanɨ̂ŋ” ¹⁸ Ghàh tî yû jyə̀ mi yìna kə nâ a ghàh a ngɨŋ te ghàh à ghɨna ndùku mô a tô kùn yì yulena. ¹⁹ A ni gha ye a yi ne ghàhnà ti hì fate khə kə nâ tum ye a fòktì su chiksu tì fòkte kum wûn mò kə nâ hamok. Tum àtɨ̂n mò ni te lâm a yì bana a bɨn a finana. Ghàn hi ywo tum àtɨ̂n shyəma tuku bê kpen ma Klistù we a wù bana te yuchwî yi satani fo ban yi wuni a ghàn a təm. ²⁰ Ghàn kəta hi tè fate khə nâ a lum hanɨ̂ŋ na gha yile wijə a ŋwàklù Fùyèn, a fòktì yì chìk yìlè tì nyàka kə ha wun a ngɨŋ. ²¹ Yi mô ni beka nâbi yìni gha ghɨ nyàka a ŋwàklù Fùyèn mò ma à tì fòkti a Yohnà Yulena ghɨ Fùyènà. Wùt tà tì nyak jə gha yile a wun wu tof wu ngɨŋu.

¹ Chichà su fəmsu tì fwo kwok a ghàn a fùtɨ̂n kəbi yi ghəl te à ndùku mô a mu tuk mùlè, fòktìsu fəmsu fwo kwok a ghɨta fùtɨ̂n. Su fwo kwoka nyamte yike yi yikî yi fəmi, yi nê na ghɨta fen. Su fwu, ma su hi tunhe Bâba we a wù tì yuna tû ghɨna; kum ni, ma Yènfù nê buŋhê bobhi ghɨna. ² Ghɨt a Fùyènà ghɨ le nè sinelò chyəna a ghɨna tu fiŋa ghɨ̂n, dô kə ni, ma ghɨta yimi hi jìs jîs yi be kum Lum we a wu mô hamok. ³ Chichà su fəm mu sîn ndùku kôŋà chyâhèlò ka, mô hi tè mà màgân mù yîm, lehe kə ghàn, fye mwə̀ mânù. Yu ti daf te Yènfù yìme hi baktî hi bobhe ghɨna. Fu bwune wi! ⁴ Ghàn khə na Yènfù tà tì de jə̂ hi fo ngə̂k nâbi ha anjèlsu wun se a su ndùku nê be. Fu ti mak chwohi ghɨna wu lùk wu bobhenu kwut ghâŋtà ghɨna a bɨn a finana, ghɨna chyə kə afû, yute wu tuk wu saku. ⁵ Yènfù tà tì de jə̂ ghɨt a mbyî wu tuk wu shyə hi fo ngək ha ghɨna. Fu tì bobhi ghɨt ghe a ghɨ ndùku ywo wijə ha wûn nì kwuŋa, à bon kə Nuwà, te wù ndùku yike kum chyənà chilichili, ghê ghɨt ale sàmba. ⁶ Yènfù tì nyok lak yi Sodòm nì lak yi Gòmoliyà nì wusu, lak mi tɨ̂n fimi milò, a mô chwena hi chwùtì na à ni mò gha ye a yi bè gânà ha ghɨt ghe a ghɨ ywo wijə ha wûn. ⁷ Wù tì shihi bobhe lak mu tɨ̂n bônhì Lôt. Lôt mô wut à chilichili, ke chyənà sube se a ghɨt a yi lak afu ndùku chyə, gha tɨni fo ngə̂k ha wûn nâ haŋaŋ. ⁸ Lôt ndùku chyə kə nâ a ghɨna fùtɨ̂n te wut wù jùŋ, təm a wuna hì fo ngə̂k ha wûn nâ haŋaŋ, kə mu tuk mù jɨ̀m kum gha a be ghe a wu ndùku ywo na ghɨt mu ghe ndùku nê fê yena nâ a wun a ngɨŋ. ⁹ Yi ni chwùtè na Bâba khəlò lum we a fu mô hi bònhè ghɨt a wuna atɨ̂n a ghɨna sù ngə̂k, khə kəbi lum we a fu mô hi khɨte lèm a ghɨt a be atɨ̂n hi tàn wu tuk wu saku. ¹⁰ Yènfù bakte ngə̂k à ghɨt ale hanɨ̂ŋ ma a ni ghɨt ghe a ghɨ tunhe jyak a wuna, nê kə a gha a liŋa ghe a njyàsu wùnsu ghɨna su kòŋà. Chichà su fəm mu sîn ni fànà wijə shyə, yute wijə gha ha wùt. Ghɨna ni ngumle wijə nâbi anjèlsu Fùyènsu a nyə̂, bɨlà sûlè yi sûlì sinsu. ¹¹ Anjèlsu Fùyènsu time a Bâba ashyə̂ ghɨna shihi ngane chichà su fəm mu sîn, su hì jìsà wi jîs yi yafani nâbi te su kəta jyaka chyâ ghɨna. ¹² Biyani chichà su fəm mu sîn buma nê kə a gha ni te nyamsu a ghə̀n, na ghɨta hi kwo ywitê. Ghɨna chaha a gha khə wi. Yènfù bè bobhelò ghɨna kə ni te nyamsu ghə̀n mu sîn. ¹³ Yènfù bè lâkàlò ghɨna kəbi nì ngək ye a ghɨna fo. Ghɨna shihi khɨŋ hi ywo yi fôm, ghɨ hi buma kwote nâbi ghə, nê kə yi nî, nâbi nchwì tâ. Ghɨna ndokò hi yə ghàn à ghɨna, gha tɨni hi wume nâ haŋaŋ. Ghɨna lehe ghàn nâbi wùni yu, ghɨna hi saŋlê. ¹⁴ Ghɨna mô nâbi wùni yu, kwâktè kə ywên a ghɨ̂tà. Ghɨna nê be, bota wi, ghɨna yen ghɨt ghe a bimî yi ghɨna bota, ghɨ lehilò, ghɨna lye a be. Ghɨna fwəkti kwâktì tu ghɨna tu a fo wu kâ. Yènfù ti sûlì ghɨna! ¹⁵ Ghɨna ti de lum wu jûŋù hì gbê a Balàm wu lûm, a wâ Beyò we a wù ndùku kôŋà ka we a wù ndùku kəta, a fo a gha a be ghe a wù nè. ¹⁶ Biyani Yènfù kɨn ha fòktì mi yìna wu lum na njàkâs à wûn jîs kə nâ te wut ha wûn njaŋ kum gha a jyakana ghe a wu ndùku nê yâ. ¹⁷ Ghɨt mu ghɨ̂n mò te yi tok a wu yu afa yi yima. Ghɨna ni mò te sù mbàk a wu yu afa fuf a ta chyàlà. Yènfù hì mô ma fu ti fati luk wu ghɨna, wu fina kə ni tìk. ¹⁸ Ghɨna ghaŋhe jìsà nâ haŋaŋ fê jîsà jîs yi ngwoni, lehe ghɨt ghe a ghɨ hì teta fwo bênà a fùtɨ̂n à ghɨt ghe a ghɨ khə wi lum wu Fùyènù, khɨŋa na ghɨt atɨna ben ma chinti nì ghɨna, ma ghê ghɨna hi nê a gha ghe a njyàsu ghɨna su wùnsu kòŋà. ¹⁹ Ghɨna chwùnè ghɨt mɨ ghɨ̂n jîsà na ghɨna nè nêlò, ma ghɨt atɨna hi fê bu wu kwôs, biyani mô wu kwôs ha be nâ ha ghɨna sù ngɨŋ. Yi mô ni beka nâbi ghə shihi tihe wût, wu hi fêtà kə a kwôs ha ghɨna. ²⁰ Ghɨta ki khɨle Bâba, Bònhì ghàhnà Jisòs Klistù tet fwo a gha a mbyî be fî kaha lye atɨ̂n, ghɨ hì fè tihe ghɨna, ma ghɨt atɨna hi befa chyâ te ghɨna ndùku mô ashyə̂. ²¹ Yi shìki mô ni, ma à hi mô na yi yê hì bɨlà jwôfà na ghɨna faŋ teka khɨli lum wu chilichili nâ hakoh, chyâ shyəma ghɨna khɨli ma fê kahà hi ywo wi sak yi yuleni ye a ghɨ tì fo ha ghɨna. ²² Gha ye a yi gana ha chichà su fəm mu sin ti chwûtè na ngàn yina mò hamok na, “Bû sùkà a shyə, yi kaha lalò,” ni mò kə nâ hamok. Yìna na, “Ghɨ su nâbi à kùnduk, ma ghɨ fê kahà lyê hi bɨŋle kə a wu chyàklù,” mô kə nâ hamok.

¹ Yìna mò a kùmti à ŋwàklù à mì ha ghàn a sun sam su jûŋ sù, à mò nâbi yìni gha a mu yɨ̀ŋte mò ma ghàn hì khəlò shyəma ghàn kahà kwakti gha tɨna nì kwâktì yi yuleni. ² Mu khɨŋa na ghàn kahà kwakti gha ghe a fòktì su yulesu ndùku jîsà nâ ashyə̂, nì sak ye a Bâba, Bònhè ghàhnà tì jìsa ha ghɨt a tuma fo ha ghàn. ³ Nâ gha yi ta ye a mu khɨŋa na ghàn hi khə mò na, à bè hì mô a mu tuk mù gòkhemù ma ghɨta fwo ben, chînà chyə̂ kə yi chyə̂ ma ghɨ hi nyikhè ghàn, ⁴ bufa na, “Ba Bâba tî chwûnà na yi bè kaha bênàlò agha? Wù ha lâ? Be ghàhnà hì mô ma ghɨ ti kputî biyani teka gha kwuna te ghɨ tì fate mbyî.” ⁵ Ghɨt mɨ ghɨ̂n teta kə nâ yi têt hi tè khə na à ndùku mô wu tuk wu shyə, Yènfù jis kə yi jîs na nyə̂ nì chyə fwo kwok, mòlû hì mô hanɨ̂ŋ. ⁶ Yènfù tì lyî kəbi mòlû bobhi mbyî atɨ̂n a mu tuk mù shyə̂. ⁷ Nyə̂ ghe a ghɨ mô chîn nì chyə ni mò, ma wù behi yi behî shyəma yu bê kpen ma wù bobhi nì wusu. Wù behi shyəma yu bê kpen ma wù sak à bobhi ghɨt ghe a ghɨ ywo wi ha wûn. ⁸ Biyani kə ghàn yìta gha yina a sun sam su jûŋ sù na à mò ha Bâba, tuk wù mòk mò kə te wu lɨ̂m kam, lɨ̂m kam mô kə te tuk wù mòk ⁹ Bâba ghale wi yi ghalî hi nè yi gha ye a wù chwùne te ghɨt ale kwàktè. Wù bɨlà fo kə wu yu ha ghàn beka wù khɨŋa na nâ ghɨt à jɨ̀m kahi təm a ghɨna a sùbe, kôŋà wijə na nâ wùt wù mòk bê ləha. ¹⁰ Biyani Bâba bè bûŋhè bênà, wùt khə wi, kə te wut wù chwoŋana. À bè hì mô a mu tuk afû, ma shyə bwat a nyə̂, ma ghɨ sami, ma wusu nyok nâbi ghə ghe a ghɨ mô atɨ̂n, ma chyə boŋà sami bakhi nâbi nì ghə ghe a ghɨ mô atɨ̂n. ¹¹ Te ghɨ kəta hi nyòk à mwə̀ muna nâ mù jɨ̀m wu lum afân ni, ghàn kəta hi tè chyə yàni? Ghàn kəta hi tè yulî, fê nê na Yènfù saŋli kə ghàn a gha à jɨ̀m. ¹² Ghàn kəta hi tè mò yute wu tuk we a Yènfù lèma na Klistù bè bênàlò atɨ̂n, mômhè hi nì na wù nyâŋhè ben. À bè hì mô wu tuk afû, ma wusu nyok nâbi ghə ghe a ghɨ mô a nyə̂. ¹³ Biyani ghàhnà mô chin, yute kə na nyə a fe nì chyə a fe ben, nâbi ghə atɨ̂n mô kə chilichili, kə yi ghəl te Yènfù tì chwùne. ¹⁴ Yi ni mò a sun sam su jûŋ sù na, te ghàn gbùtè tuk mu we, ghàn momhi nâ nì jyaka hi tè yulî, kəta wi njahi a Yènfù ashyə̂, fê chyə̂ nì yutìnì. ¹⁵ Ghàn hi khə na Bâba ghàhnà wunhe ni, fo wu lum ha ghàn shyəma ghàn bon. Wâ nè ghàhnà Bôl we a ghàhnà kòŋà yâ ti nyak kəbi gha mɨ ghɨ̂n ha ghàn nì tofu ma à fo Fùyèn ha wûn. ¹⁶ À mò a wun a sù ŋwàklù nâ sù jɨ̀m, wâ nè ghàhnà Bôl ti nyak jis kə gha mɨ ghɨ̂n. Wù ti nyak gha ale, ghɨ tâ hi yu hi khɨlî. Ghɨt ghe a ghɨ tà yiki jə gha Fùyènì, nèkàlò a ghɨna yi bimî fwəkâ, kə te ghɨna ndùku fwəkte luktu ŋwàklù Fùyèn tu letu. Ghɨna nê ni, bênà kə nì bobhînì a ghɨna a tû. ¹⁷ Te ghàn hì khə gha mɨ ghɨ̂n a sun sam su jûŋ sù, ghàn hi tofâ kə ghɨt mɨ ghɨ̂n a ghɨ fwəkte gha Fùyènì ni ghàn lye a ghɨna fùtɨ̂n yì fə̂m afân ma ghàn fwu yi gha afa a ghàn mò atɨ̂n. ¹⁸ Ghàn hi bɨlà ləma kə yi ləmâ a Bâba tɨn à jùŋ, Bònhì ghàhnà Jisòs Klistù, fê yike hi tè khə wûn. Ghɨta kəta hi tè kokhe wûn chîn fê kokhe wûn a yû mù jɨ̀m. Àmèn.