2 Kòlitiyàns

¹ À nyak mu Bôl a wut wù tum ha Klistù Jisòs ma à chwok Fùyèn. Mu nyàkà ŋwàklù yìna ghàh à wâ nè ghàhnà Timotì, ha ghàn chìntê ghɨt a Fùyèn ghe à jɨ̀m a ghɨ chyə a tèk yi Kolèn, kəbi nì ha ghàn ghɨt a Fùyèn ghe a ghàn chyə a bàh a Àkayà nâ à jɨ̀m. ² Yènfù, Bì ha ghàhnà ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn. ³ Ghàhnà hi kokhe Yènfù a Bè Bâba ghàhnà Jisòs Klistù. A Bì kwohe yì sên, A Yèn fe a fu fo gâmtìnì yì jɨ̀m, kə lum tù jɨ̀m. ⁴ Wù gàmtèlò ghàhnà a ghàhnà a sù ngə̂k nâ sù jɨ̀m, shyəma ghàhnà boŋà khɨli hi tè gàmtè ghɨt ale wu yu afa ghɨna yena ngəksu. Ghàhnà làhi gàmtè ghɨna beka Yènfù ti gâmtì ghàhnà. ⁵ Ghàn khə na, Jisòs Klistù tî yen ngə̂k nâ haŋaŋ, ghàhnà ghɨ hì mô ma ghɨ ti boŋ lyi kəbi atɨ̂n à ngək à wûn mi yê, ghɨ hì boŋa kəta kəbi saŋlî yi chiki ye a wù fo. ⁶ Ghàhnà shìki yen a ngək nâbi wùni yu, à hi mô jùŋ, fê mô hi gàmtè ghàn na ghàn bon. Yènfù gàmtèlò ghàhnà nâbi wùni yu, yi hi mô hi nì na ghàh hi lûmhè ghàn. Ni, ma ghàn ta kpen hi tè wunhe nki tu ngək te a ghàhnà à jɨ̀m yena. ⁷ Ghàh khə hamok na bimî yani ta kə yi tâ. Ghàh khə ni beka ghàn ti lyi kəbi atɨ̂n à ngək afa a ghàh ndùku mô atɨ̂n, Yènfù gâmtè ghàn kəbi te fu gamte ghàh. ⁸ Ghàh khɨŋa na ghàn hi khə ngək se a ghàh che yena a Esiyà a wana nì ghaha. Ghàh tì yen ngə̂k afû nâ haŋaŋ hì fânà nâ na ghàh nè kputelò. ⁹ Ghàh chehì khə wi na ghàh nè bônàlò. Biyani yìna che gan ni shyəma ghàh hi chyə wi a ghàh a jyak biyani bɨlà yikte kə Yènfù wù wùn. A mô a wun we a wù lòhè ghɨta a yi kpû. ¹⁰ Fu ti bônhì ghàh a yi kpu, mô hi bè fè bònhè ghàh. Ghàh khə kə nâ hamok na fu bè bônhèlò ghàh. ¹¹ Yènfù gàmtè ghàh a lum afân ni beka ghàn jə̀mà ha ghàh. Fu gâmtè ghàh, ghɨta yen ghɨ hi fo àyòŋnà ha wûn, dô kə ni. ¹² Ghàh jala nâ haŋaŋ beka təm ghaha fòktè ha ghàh na nâbi ghə te ghàh nè a mbyî mò ma ghɨ nê kə nì təm a jûŋà ghe a Yènfù fo, a bu kum gha yile. Yìna chwûtè a ndan wu lum afa a ghàhnà chyə atɨ̂n. Ghàh jala, biyani nê nâbi ghə, nê kə kum təm a jûŋà Fùyènà, a bu kum tof wu mbyi. ¹³ - ¹⁴ Yi ni chwùtè na ghàh ni nyàkà kə yi gha ha ghàn kə ye ghàn mò hi taŋ hi khɨlî. Mu khə na ghàn fate khə wi chyənà mì chîn biyani, mô hi nè khɨlî shyəma à bê hi mô wu tuk afa a Bâba ghàhnà Jisòs kaha bênà, ma ghàn hi jala kum ghàh kəbi yi ghəl te ghàh jala kum ghàn. ¹⁵ - ¹⁶ Mu chehì khə kə na ghàn khəlò mu a wu lum afân. À mò yi gha ye a mu che lema na mu yità jikti ghàn shyəma mu yen a Màsìdoniyà shyəma mu bê shihi kaha bèn hi fè yen a ghàn ma ghàn hi tôkà saŋlê. Mu che lem ni shyəma mu bê shihi kaha bèn ma ghàhnà fê yena, ma ghàn gamti mu, ma mu yen a Jùdiyà. ¹⁷ Yi hì mô na mu che shihi lèm na mu bènàlò hi jikte ghàn, tof wu mu bu ma? À mò na mu bakte yi gha te ghɨt a mbye ma? Ghɨna bime yi gha ghɨ shihi yutî ghɨna fî tunhilò. ¹⁸ Yènfù yê jîsà kə hamok. Mu jîsà ha ghàn kəbi yi ghəl na, mu chehì jîsà wi jyə sù bà ha ghàn. ¹⁹ Ghàn khə na Wâ Fùyèn, a Jisòs Klistù we a ghàh à Timotì nì Silàs chehì fôktè gha yi wuni ha ghàn yê jîsà wi jyə sù bà. Wù yè jîsà kə yi gha ye a yi mô hamok te Wâ Fùyèn. ²⁰ A mô wun a wù nè chwuna tu Fùyèn tù jɨ̀m kpenê. A ni gha ye a ghàhnà jìsà na, “Àmèn” tohne a wun yi yet, kokhe Fùyèn. ²¹ A nè kə nâ Fùyèn na ghàhnà à jɨ̀m hi mô jùmtìsùbàmsu Jisòs Klistù, tâ. A chwokte funfu ghàh. ²² Fu ti tihe ghàhnà wu lum na fu ti fo Yohnà wuna ghɨ Yulena ha ghàhnà a təm hi chwùtì hamok na fu bè fo mihèlò mwə̀ me a fu chwune ha ghàhnà. ²³ Mu che faŋ hi fè bèn a Kòlitiyàns beka mu chehì kôŋà wi hi bèn hi khɨte ghàn a yi ghâ. Yènfù khəlò təm a ma khə na mu jìsà kə hamok. ²⁴ Ghàh khəlò kə nâ hamok na bimi yani talò, kôŋà wi hi tè chin a wût na wù ni gha kum yi bimî yi wuni. Ghàh bɨlà kôŋà kə hi bèn na ghàhnà chintê ni gha, yi bênà kə nì saŋlînì ha ghàn.

¹ A ni gha ye a mu tì lèma na, mu nè fè kaha bênà wi hi jikte ghàn, kə mu ni ma ghàn hi saŋle wi. ² À nè kə ghàn mu, mu saŋlê. Mu chehì bênà hi nè ghàn na ghàn hi saŋle wi, ma à fê ni nde na mu hi saŋlê gha? ³ A ni gha ye a mu chehì bɨlà nyâkà ŋwàklù. Mu ndùku bênà hi yen a ghàn, ma ghàn ni kə na mu hi saŋle wi, a bɨlà mô kə ghàn hi nì na mu hi saŋlê. Mu khə hamok na mu shihi saŋlî, ghàn hi boŋa saŋlê. ⁴ Mu chehì nyâkà ŋwàklù ha ghàn, gha fo ngək ha mu nâ haŋaŋ, mu saŋle wi, a chwo a kə mu sê a mu a sê. Mu chehì khɨŋa hi bobhe təm ghana, mu chehì khɨŋa hi chwùtì na mu kòŋàlò ghàn nâ haŋaŋ. ⁵ Yi mô kə nâ hamok na wùt che ni gha, ghàhnà saŋle wi. Wù tà che tok ni gha mi yina kə ha mu, wù tì ni kə ha ghàn à jɨ̀m, gha tɨni yi hì yafa ghɨt ale chyâ te yi yafa ghɨ le. Mu jìsà kə ni beka mu kòŋà wi hi jìs à chyàhì gha mi yîn. Mu jìsà ni ghakhe wi yi ghâkhî. ⁶ Ghɨt a dona hì mô ma ghɨ ti sak wûn fo ngə̂k ha wûn, yi jwôfà na yi kpen kə yâ ⁷ Ghàn lehêfo wûn chîn ma ghɨ fê fo təm a ta ha wûn à bu ya, ma wù kwaktê chyahi gha ma ghɨ bobhi wûn. ⁸ A ni gha ye a mu chyate ghàn na ghàn kaha ni ma wù hi khə na ghàn baha kôŋàlò wûn. ⁹ Mu che nyak ŋwàklù ye ha ghàn kə nâ hi yen na, ghàn ywolò mu kə gha à jɨ̀m agha. ¹⁰ Ghàn lèhèfo wùt a yi gha te wù ne bobhe, yi hi chwûtè na mu ti boŋ lehìfo wûn. Mu lehêfo wùt wule te ghàn mò hi lèhìfo, ma hi mô na mu lehifo a ghàn a jùŋ, kə yi ghəl te Klistù khɨŋa. ¹¹ Mu nè ni beka mu kòŋà wi na Satàn khɨti jyaka a ghàn tû yi gha mi yîn. Ghàhnà hì khəlò mùnàŋ mù wûn. ¹² À ndùku mô te mu be tana a Tɨ̀luwàs hi fòktè tum yì jùŋ yì Klistù, mu yen na Yènfù hì mô ma fu ti lem na mu fokti, ¹³ biyani mu tê yena jə̀ wâ nè ghàhnà Taytùs afû, gha tɨni hì fo ngək ha mu, mu ki toŋte ghɨta afû, lo hi dàŋ a Màsìdoniyà. ¹⁴ Biyani, yòŋnà yênà ha Yènfù. Wu tihe ghàh kə yu mù jɨ̀m shyəma ghàh hi jûmtè wûn ma ghɨ ti shik tum yə̂, Klistù yênà a ghàh ashyə̂ ghàh bênà a wun a yi bàm. Fu nê, ghàh jyâtè tum à Klistù, ghɨta khɨle wûn, tum àtɨ̂n gbê yênà kə luktu jɨ̀m ni te lɨ̂mà yi leŋi jûŋì. ¹⁵ Yi mô hamok na ghàh mò ni te leŋi te Klistù nyòka ha Yènfù a lum afa ghàh fòktè tum yì jùŋ yì Klistù ha ghɨta ghe a Yènfù bònhe, fôktè kəbi ha ghê a ghɨ ləha. ¹⁶ A mô ha ghɨt ghe a ghɨ ləha, lɨ̂mà yi leŋi tɨni befâ, bênà nì kpu ha ghɨna. Biyani a mô ha ghê a Yènfù bònhe, lɨ̂mà yi tɨni fomâ, fo chyə ye a yì bè mê wi. Yi ni mò ni, à kpene nâ nde hi nè nki fèt mi yîn agha? ¹⁷ Ghàh wi te ghɨt a dona ale a ghɨ lyê gha Fùyènì ha shyə̀ hi bəkle a wu kâ. À tum Fùyèn ghàh na ghɨ hi nê fêt mi yîn, ghàh fòktè kə nâ hamok te ghɨt a fetana a Klistù, Yènfù ke ghàh.

¹ Ghàn kwàktè na ghàh kahi ma hi ywo a ngɨŋ sahisu te ghɨt ale ma? Ngàŋ. Ghàh kəta wi nâbi hi fo ŋwàklù sù ha ghàn te ghɨt ale, hi chwùtì na ghàh mò ghɨt a tuma, khɨŋa wi nâbi na ghàn nyak ŋwàklù sù, ghàh hì gbê nì sinsu. ² Nâ ghàn mò ŋwàklù ye a ghàh kəta ma ghɨ nyak a ghàh a təm shyəma nâbi nde hi taŋâ, ywo khɨle gha ye a yì jîsà. ³ Ghàn mô ŋwàklù te Klistù nyàka kə nâ a wun a ngɨŋ, yì chya a ghàh a wô. Wù tà nyak ŋwàklù yìna nì leŋì yi ŋwàklù, wù bɨ̀li nyak nì Yohnà Fùyèn fe fu chyə. Wu tà nyak a tô yi ti, wù nyak a ghɨt a təm. ⁴ Ghàh khə na gha mɨ ghɨ̂n ni mò kə nâ hamok beka ghàh samhe Yènfù, a mô fêt yi Klistù. ⁵ Ghàh jìsà wi na ghàh kpenelò a ghàh a sù ngɨŋ beka gha yile wijə a yi ne na ghàh hi kwâktè na ghàh kpenelò hi tè nè fêt mi yîn. A ni Fùyèn na ghàh hi kpenê. ⁶ À ni wûn na ghàh hi kpenê hi tè fòktè gha kum kàn mù fê me a wù yə ghê ghɨta. Kàn mu muna wijə sak ye a ghɨ tì nyàka, à mô kàn mù Yohnà Yulena. Sak ye a ghɨ tì nyàka ywelò, Yohnà Yulena nê na ghɨta hi chyə̂. ⁷ Ghàn khə na Saki ndùku mô ashyə̂ a ŋwàklù ma ghɨ nyak a tô yi ti biyani, yi chwûtè jyak a Fùyènà. Saki tì nî kə̂k yi Musìs hì bana nâ haŋaŋ, ghɨt a Isalì bu hi kî, nâbi te yi ndùku bana yâ, lima yênà yi yên. Saki shìki mô ma yi ti chwûtì nki jyak mi yîn ni, bênà kə nì kpu, ⁸ nâ Yohnà Yulena te ghɨ bênà nì chyənà ma faŋ hi tè chwùtè jyaka a Fùyènà, ghɨ chyâ nâ ni agha? ⁹ Saki shìki mô hi nì na ghɨ hi saka bobhi ghɨta biyani kəta nki jyak ni, gha ye a yi nê na ghɨta hi mô chilichili a Yènfù ashyə̂ faŋ yàni hi khɨte chyâ agha? ¹⁰ Yi ni chwùtè na jyaka kàn mu fê ti ben ta chyâ jyak a yi saka, ghɨ tê hì fê kpene wijə yi gha yile. ¹¹ Saki ndùku chwûtè jyak a Fùyènà biyani mê yênà yi yên. Yi ni chwùtè na jyak ghe a ghɨ mô a Yohnà Yulena chyàlò ghɨ saka beka Yohnà Yulena bè mê wi. ¹² Ghàh khə hamok na gha yi kàn mù fê chyàlò yi kàn mu mwu. A ni gha ye a ghàh fòktè tum yìna, fânà wi. ¹³ Ghàh wijə te Musìs a wù ndùku baŋa kə̂k yi wuni na kə ghɨt a Isalì yen te ban yi Fùyènì mè mihè yênà atɨ̂n. ¹⁴ Nâbi ha nkàn, ghɨna hì yena khɨle wi gha, à hì mô nâbi lân yi baha mò kə yâ. Ghɨna taŋa ŋwàklù mù kàn mù mwu, ywo khɨle wi. Yi mô ni beka shyə baha baŋalò tof wu ghɨna, a mô kə Klistù a wù mò hi chyàhè shyə atɨna. ¹⁵ Yi mô kə nâ hamok na à mò hi bè tàn lân, ghɨna taŋa ŋwàklù Musìs yì Sak, ywo khɨle wi beka shyə baha baŋa tof wu ghɨna. ¹⁶ Biyani, a bênà nâbi wùni yu te wùt bɨ̀nli kaha ben ha Bâba, ghɨ chyâhì shyə atɨna. ¹⁷ Yi mô ni beka Bâba ghê Yohnà Yulena mò kə a shyə̀ à mòk. Yohnà a Bâba mô nâbi afa, ghɨta hi bu wu kwôs a shyə̀ ale. ¹⁸ Ghàhnà ghe a ghɨ bime ha Klistù baŋa wi kə̂kì nì shyə. Kum ni, ghɨ yena jyak a Bâba ghàhnà wu wùn kə yû mù jɨ̀m, ghɨ nê na ghàhnà hi kpenê te Bâba, chwûtè kpenhe yênà kə yi yên nì jyak a wun mu ghê. À mò fêt yi Bâba we a wù mò a Yohnà.

¹ Te Yènfù ti kwohi seni ha ghàh fo fêt yina na ghàh hi nê, yi ni chwùtè na ghàh wi hi bot hi tè nì. ² Ghàh ti tunhi nâ gha a wumena à jɨ̀m ghe a ghɨ nyama nê. Ghàh lehe wi wùt, fwəka wi gha Fùyènì. Ghàh bɨlà jîsà kə gha ye a yi mô hamok a Yènfù ashyə̂, chwûtè hamok ha ghɨta na ghàh mò kə nâ ghɨt a jûŋà. ³ Yi ni chwùtè na shyə ki baŋa nâbi tof wu nde na kə wù ywo khɨli tum yì jùŋ ye a ghàh fòktè, ma à hi mô kə wut te wù ləhà yênà. ⁴ Ghɨt mɨ ghɨ̂n ywo khɨle wi gha beka Satàn we wù saka mbyi yìna ti baŋ kwâktì yi ghɨna na kə ghɨna bimi. Wu nê ni na kə ghɨna yen ban ye a tum yì jùŋ à Klistù bènà nì yini. Ghɨna wi hi yena ban mi yîn a tum yì jùŋ bènà nì yini, yi chwûtè jyak a Klistù, Klistù mu wuna mô kə shyə à mòk ghê Yènfù. ⁵ Ghàn hi khə na, ghàh shihi fòktè tum yì jùŋ mi yìna, ghàh hi fôktè wi kum ngɨŋ yahì. Ghàh fòktè kə na Jisòs Klistù mò Bâba, ghàh lyê kə ngɨŋ sahisu ha ghɨt a fetana ha ghàn kum Jisòs. ⁶ Yènfù tì fati mbyî jis na, “Bani ben atɨ̂n à bɨn a finana.” Yèn fûn ti ni na bani ben a ghàhnà a təm, ma wù ya chwùti ban yi wuni ha ghàhnà, a mô ye a ghàhnà yena kə̂k yi Klistù. ⁷ Biyani ghàh ghe a ghɨ kəta ghak yi yohnà mi yîn mò kə ni te a khɨŋ a chyaka, hi chwùtè na jyak a chika kəta Fùyèn, a bu ghàh. ⁸ Ngəksu bènà ha ghàh kə a tu lum a tu lûm biyani, ma su wi hi ta chyà ghàh, à bênà yu lefu ghàh hi kəta à fumhì nâ haŋaŋ biyani ma ghàh wi hi màkà fêt yahi. ⁹ Ghɨta chwoka wulu wahu biyani Yènfù wi hi màkà ghàh. Ghɨna nyâblè nì ghàh biyani ma ghɨ wi hi ywe ghàh. ¹⁰ Ghàh gbùtè hi kpu nâbi yini, kəbi yi ghəl te Jisòs tì kpo, shyəma ghɨta yen na ghàh kətalò chyənà à Jisòs. ¹¹ Ghàh chyə nâbi yi chyə̂, mô kə a yi jwô yì kpû kum Jisòs. Yènfù de na yi hi mô a lum afân shyəma ghɨta hi yena chyənà Jisòs a chyak a wùna ghàhnà afân a wu kəta hi kpu ni. ¹² A ni mò te ghàh mò nâbi yini, mô kə yi jwô yi kpû shyəma ghàn hi kəta chyənà Klistù. ¹³ Ghɨ ti nyak a ŋwàklù Fùyèn na, “Te mu bime, mu kəta hi fòktì.” Ghàh ti boŋ bimî kəbi yâ ha Yènfù, boŋa kəta hi fòktì gha yi wuni. ¹⁴ Ghàh kəta hi fòktì beka ghàh khəlò na Yènfù ti lôhì Bâba Jisòs a yi kpû, wù bè boŋa lôhèlò kəbi ghàhnà ghe a ghɨ mò ghɨt a Jisòs ma wù lyê chìntê lem ghàhnà a wun ashyə̂. ¹⁵ Ghàh bime hi yen a ngə̂k mi yìna a ghàn a jùŋ shyəma Yènfù chwuti təm a jûŋà ha ghɨta kə hi dù hi dù, ma ghɨta kahà hi fo àyòŋnà kokhe wûn, dô kə ni. ¹⁶ A ni gha ye a ghàh bota wi hi tè nè fêt mi yîn. Nâbi te njyàsu wùnsu sahisu bota yênà, Yènfù nè folò jyaka a ghàh a təm kə yu mù jɨ̀m. ¹⁷ Ngək se a ghàh yena chin ni buma bonelò, a mò kə afu yula ni. Ngək mi sîn fati ghàh a jùŋ yì chìk afa a yì bènà, bu hi bè mì, ma ghɨ wi hi fə̀knà ngək mi sîn nì jùŋ àtɨ̂n. ¹⁸ Ghàh ni ke wi mwə̀ me a ghɨ yena nì se. Ghàh bɨlà ke yênà nì mwə̀ me mù baha mô teka ghɨ yen. Ghàn khə na mwə̀ me a ghàh ke yena bè mêlò biyani, mwə̀ me a ghàh ke yena wi bu hi bè mì.

¹ Ghàhnà khə kəbi na ghɨ ki bobhe ndalà fu chyak fu wùn fûn a ghàhnà chyə atɨ̂n a mbye afân ni, ma Yènfù fo ndâ yòhnà ha ghàhnà a nyə̂ teka ghɨ ba nì wo, yi mô hi chyə fâŋ. ² Ghàhnà chyə a mbye afân, gha fo ngə̂k ha ghàhnà, ghàhnà jyê njwo ghɨ kôŋà na Yènfù nyâŋhè fo ndâ yì fê na ghàhnà baŋ wun wu ghàhnà atɨ̂n, yi mô a nyə̂. ³ Ghàhnà kòŋà hi nyàŋhè khɨte wun wu fe mu wûn shyəma ghàhnà bê faŋ hi fè gha wunu nâ tuk wule. ⁴ Ghàhnà chyə wu wùn afân, jyê kə yi jî njwo ngək ye a ghàhnà yena. A bu na ghàhnà jìsà na Yènfù chyakhi wun wu ghàhnà we ghɨ chyə atɨ̂n, ma ghàhnà faŋ nì wun wu yimu. Ghàhnà bɨlà khɨŋa kə na fu fo wun wu fe ha ghàhnà we a wu bu hi kpû, shyəma wu lyi luk wu wùn wunâ. ⁵ À ni Fùyèn na yi hi mô a lum a afân, fo Yohnà a wuna ha ghàhnà hi chwùtì hamok na ghàhnà bè kwotelò wun wu fe mu wûn. ⁶ A ni gha ye a ghàhnà ta a ghàhnà yi bimî nâbi te ghàhnà khə na ghàhnà shìki kəta wun wuna, ma yu hi dâfà wi shyəma ghàhnà hi mô a Bâba ngwùŋ. ⁷ Yi mô ni beka ghàhnà chyə kum yi bimî ye a ghàhnà kəta, a bu kum te ghɨ ke yênà gha. ⁸ Hamok, ghàhnà bota wi a ghàhnà yi bimî, bɨlà kôŋà kə hi dè wun wuna hi yèn hi tè chyə̂ a Bâba ngwùŋ. ⁹ A ni gha ye a ghàhnà mòmhè nâ haŋaŋ hi tè nè gha ghe a ghɨ jwôfà ha Bâba, makə ghàhnà mò wu wùn afân, makə ghàhnà mò wu wùn wu fe. ¹⁰ Yi mô ni njwo nâ ghàhnà à jɨ̀m bè timelò a Klistù ashyə̂, ma wù sak ghàhnà. Wù bè lâkà nâbi nde kə gha afa a wù chehì nê a mbyî, makə à chehì mô gha a be, makə à chehì mô a jûŋà. ¹¹ Ghàh fànà Bâba njwo ghɨ khə na yi jwôfàlò hi tè fànà wûn. A ni gha ye a ghàh chyate ghɨta na ghɨ ben ha wûn. Yènfù khəlò nâbi ghə kum ghàh, mu lèmà na à mò a ghàn a təm ghàn boŋa fate khə ghàh. ¹² Kə ghàn hi kwâktè na ghàh khɨŋa hi chwùtì ha fê na ghàh kpenelò hi tè mò ghɨt a tuma. Ghàh khɨŋa na ghàn hi khə gha ye a ghàn kəta hi tè saŋle kum ghàh shyəma ghàn khɨli hi tè fìsè ghɨt ghe a ghɨ kûnà ngàŋtànà kə kum lum we a ghɨ yena wùt atɨ̂n, khə wi nâbi təm a wuna. ¹³ Tof yahi tà fwu jə̂ te ghɨt ale jìsà. Yi shìki mô ma yi ti fwu kəbi yi fwû, ma à hi mô njwo ghàh fo ngɨŋ yahì ha Yènfù kə yì jɨ̀m. Biyani ghàh mò kə nâ a ghàh wu tof, mô a ghàn a jùŋ. ¹⁴ Ghàh nè fêt yîn ma ghàh wi hi faŋ beka Klistù kòŋàlò ghàh nâ haŋaŋ. Ghàh khə na wù tî kpû kə ha ghɨt à jɨ̀m, yi chwûtè na ghɨt à jɨ̀m ti kpû bakha ha wûn. ¹⁵ Klistù tì kpu kə ha ghɨt à jɨ̀m shyəma ghɨt ghe a ghɨ chyə ma ghɨ hi fê chyə wi a lum afa a ghɨna kòŋà, biyani chyə kə kum Klistù. Yi mô ni beka Klistù tì kpû kum ghɨna kahi lôtìlò. ¹⁶ Hi yìmì chîn, ghàh nè fè lyê wi wùt a wu lum afa a ghɨt a mbye lyè. Yi mô kə nâ hamok na, ghàh tì lyi Klistù a wu lum afân, biyani bu hi lyì yâ. ¹⁷ Wùt shìki mô ghê Klistù, wu hi mô wut wù fê, ma chyənà wun yi mwu ti chyâ, yì fe bên. ¹⁸ Gha mɨ ghɨ̂n à jɨ̀m ni mò ma à ni Fùyèn ha ghàhnà, kahi bakti chyəna ghàhnà nì wûn. Fu ni ni tohne a Klistù. Fu ti fo kəbi fêt mi yîn hi tè bakti chyənà sù ha ghàh. ¹⁹ Gha ye a ghàh jìsà ni mò na Yènfù tî bakti chyənà wûn ghê ghɨt a mbye kum gha ye a Klistù tì ne. Fu ti lehìfo besu ghɨ̂tsù fî fo tum ha ghàh ghɨt a tuma, na ghɨ hi fôktè na fu khɨŋalò na ghɨt à jɨ̀m bakti chyəna ghɨna ghê wûn. ²⁰ A ni lum we, ghàh lyè luk wu Klistù, Yènfù jîsà tohne a ghàh. Ghàh chyate ghàn a Klistù yi yet na ghàn bakti chyənà sanisu ghàn à Yènfù. ²¹ Nâ Klistù a wun a ngɨŋ tà tì ni jə be biyani Yènfù lyi wun ha wut wù be shyəma ghàhnà tohna a wun ma ghɨ hi mô chilichili a Yènfù ashyə̂.

¹ Ghàh fêtà ghàh à Yènfù amok hì chyate ghàn te Yènfù ti kwohi seni ha ghàn ni na kə ghàn nè nê kwohi sen mi yîn ləha halô. ² Bâba Yènfù tì jis na: “À ndùku mô te yu kpena na mu gamti wò, mu yu gha ye a wò jìsa. Tuku kpên na mu bonhi wò, mu gâmtì wò.” Ghàn yuti! Chin mò kə nâ yu we a Yènfù lèma. Lan mô wu tuk shyəma fu bonhi ghàn. ³ Ghàh kòŋà wi hi nè nâ gha yì mòk na yi bobhi fêt yahi. A ni gha ye a ghàh kòŋà wi gha na yi tahi ghɨta na kə ghɨ yen Yènfù. ⁴ Ghàh bɨlà chwûtè kə na ghàh mò ghɨt a fetana Fùyènà nâbi a ghə te ghàh nè. Ghàh wunhe kə yi wunhî ngək yì chìk ye a ghàh yena nì fum ghe a ghɨ bênà ha ghàh nì gha ta ale. ⁵ Ghɨ ti sam ghàh nì kwòmù fa ghàh a ndâ chyâk, ghɨ tum a nôn a ghɨ̂tà na ghɨ hi buka bôŋà a ghàh yi bàm. Ghɨ ti ni ghàh fêtà chyâ jyak ghaha; ghàh ti chyə mu tuk mùlè, kəta wi shyə hi yə̂, kəta wi yu hi bwunî, biyani, wunhe kə yi wunhî. ⁶ Ghàh ti chwûtì na ghàh mò ghɨt a Fùyènà njwo ghàh chyə chyənà su yulesu, khə gha ye a yi mô hamok, wunhê, tôknè, kəta Yohnà Yulena fê kôŋà à ghɨ̂t kə nâ hamok. ⁷ Yènfù ti fo jyaka ha ghàh, ghàh ghɨ hì fôktè kə gha ye a yi mô hamok ha ghɨta. Mwə̀ mù wòŋ me a ghàh nò nì munù fê khɨ̂ŋtè ngɨŋ sahisu atɨ̂n mò lum tu chilichili tu. ⁸ Ghɨt ale ngumle ghàh, ghɨ le jîsà gha a be kum ghàh. Ghɨ le bəmhe ghàh, ghɨ le sûlè. Ghàh jìsà kə hamok nâbi te ghɨ lyê ghàh ha ghɨt a fəma. ⁹ Ghɨ ke ghàh ni te ghɨ khə wi, biyani fate khə kə nâ yi khə ghàh. Ghɨ le yena kə ghàh ha mwə̀ mù kputemù biyani ghàh chyə̂ yênà kə yi yên. Ghɨ nyâblè nì ghàh, biyani wùt bu hi ywe ghàh. ¹⁰ Ghàh yè saŋle kə yi saŋlî nâbi atɨ̂n à ngə̂k. Ghɨ lyê kə ghàh ha ghɨt a fufana biyani ghàh fo yi ghak ha ghɨt a dona a ghɨna yi bimî. Ghàh kə̂kà kə te ghɨ kəta wi shyə, biyani kəta kə mwə̀ mù jɨ̀m. ¹¹ Ghàh ti jis ha ghàn a ghɨt a Kòlitiyàns kə a ndan na, ghàh baha kôŋà kə yi kôŋ ghàn nâ haŋaŋ. ¹² Ghàh kòŋà ghàn nâ haŋaŋ. A mô kə ghàn te ghàn kòŋà wi ghàh. ¹³ Mu jìsà ha ghàn chin kəbi te mu jìsà ha mwəlà. Mu jîsà na ghàn hi boŋa kòŋà ghàh kəbi yi ghəl te ghàh kòŋà ghàn. ¹⁴ Kə ghàn hi mô, chîntè ghàn à ghɨt ghe a ghɨ bime wijə ha Yènfù, kə̂kà na ghàn à ghɨna mò yi ghəl. Ghàn khə na jùŋ kəta wi gha hi nì ghê be, bani kəta wi gha hi nì ghê bɨn a finana. ¹⁵ A Klistù ghê Deblì làwû hi bakte yi gha agha? Wùt wù bimena wi hi tè nè kwònà gha ghê wùt we a wù tà bimi jə ha Yènfù? ¹⁶ Ndâ Fùyèn kəta wi gha hi nì ghê mosòmù. Ghàn khə na ghàhnà mò ndâ Fùyèn fe a fu chyə, kə yi ghəl te fu tì jìsa na: “Mu chyə a ghɨna fùtɨ̂n, mu mô ghàh à ghɨna; Mu mô Yènfù ghɨna fu, ghɨna mô ghɨt a ma.” ¹⁷ A ni gha ye a Bâba tì jìsà na: “Ghàn fwo ben a ghɨt a be fùtɨ̂n ma ghàn hi chyə hanɨ̂ŋ. Kə ghàn kum shyə, ghɨ kəta yi liŋ, shyəma mu fyi ghàn, ¹⁸ ma mu hi mô Bì ha ghàn, ghàn mô wana ma. A jîsà Bâba, a Bè jyak wù jɨ̀m.”

¹ Chin te Yènfù ti chwûnà gha mɨ ghɨ̂n ha ghàhnà a sun samsu jûŋ sù, yi jwôfà na ghàhnà momhi hi tet a kahi a yi bàm a gha afa a ghɨ bênà nì liŋi a njyàsu wùnsu, fê bênà nì liŋi a yohnà. Ghàhnà hi bɨlà fânà Yènfù, yule kpenê. ² Ghàn chwuti kôŋ yani ha ghàh. Ghàh tà ni jah jə gha ha wùt, ghàh tà ni jə na wùt jah lumu, ghàh tà lehi jə wùt. ³ Mu jìsà wi gha mɨ ghɨ̂n hi jìs na ghàn ti bobhi gha yile. Mu hì mô ma mu ti jis na ghàh kòŋàlò ghàn nâ haŋaŋ, mô hi faŋ hi tè kòŋ kə yi kôŋ ghàn, makə à bênà nâbi yi kpû. ⁴ Mu fate khəlò ghàn, kwâktè wi yi kwâktì gha kum ghàn. Mu jala nâ haŋaŋ kum ghàn, kəta yi saŋlî nâ haŋaŋ kum ghàn, fê bɨlà saŋle yê kə yi yên a sù ngək afa a ghàh yena. ⁵ Yi mô hamok na ghàh kətalò ngəksu nâ haŋaŋ njwo à ndùku mô te ghàh bèna a yi tèk yi Màsìdoniyà afân, ngəksu faŋ hì bênà kə yi bên ha ghàh, kə tu lum tù jɨ̀m. Ghàh hì kəta nô ghàh à ghɨta, fê kəta yi fân a ghàh a təm. ⁶ Biyani Yèn fe a fu fo təm a ta ha ghɨt ghe a ghɨ kəta ngəksu tôktì ghàh, chinhi Taytùs ha ghàh. ⁷ Ghàh ndùku kəta kəbi yi saŋlî te ghàh ywo tôktì ye a ghàn tì tòkte wûn na kə wù bot. Wù tì fôktì na ghàn kòŋàlò hi yen a mu nâ haŋaŋ, gbùtè hi tòktè mu, fî fôktì kəbi na ghàn kwohe lò seni kum gha a be ghe a ghàn nè. Mu tì yu gha mɨ ghɨ̂n saŋlîlò. ⁸ Ŋwàklù ye a mu tì nyàka ha ghàn shìki mô ma yì ti fo ngək ha ghàn, ma mu hi kwohe wi seni, nâbi te mu ndùku kwohe seni a fu yulâ ni te mu yena na ŋwàklù àtɨ̂n ti fo ngək ha ghàn. ⁹ Mu bɨlà saŋlelò chîn, saŋle wi na mu tì nyak ŋwàklù, yì ni ghàn hì kwohe yi sên. Mu saŋlê te kwohi sen mi ye che ni ghàn kwuna chyəna ghana ghɨ be. Ghàn chehì kəta ngək kə nâ a lum afa a Yènfù khɨŋa. Yi ni chwùtè na ghàh tà che ni jah jə gha ha ghàn nâ hakoh. ¹⁰ Wùt shìki yena ngə̂k a lum afa a Yènfù khɨŋ, ma wù kwuna ma wù hi chyə chyənà yì jùŋ ma wù bon. Yi shìki mô ni, ma wù hi kwohe wijə seni. Biyani wùt shìki yena ngə̂k a wu lum wu mbyi, ma yi ni na wù bɨlà kpu yi kpû. ¹¹ Ghàn yen lê gha ye a yi gana ha ghàn a sù chyənà te ghàn shihi yen a ngə̂k mi yìna, fânà Yènfù? Ghàn yena te ghàn fuma hi jì ghàn a jwo. Ghàn yen lê te gha tɨni yafa ghàn. Gha tɨni ti nî, ghàn ghɨ hì fânà nâ haŋaŋ. Ghàn chehì kòŋàlò hi yen a mu nâ haŋaŋ. Ghàn tê hì foble hi nè gha kum gha tɨni, fê kôŋà hi fo ngək ha wùt we a wù ne bobhe gha tɨni. Yi ndùku chwûtè kə lum tù jɨ̀m na ghàn chehì khə wi gha mi yîn. ¹² Mu che nyak kə nâ ŋwàklù ha ghàn, biyani a bu kum wùt mu we a wù ne bobhe gha mi yê, makə kum wùt we a wù ne bobhe gha tɨni ha wûn. Mu nyak hi chwùtì ha ghàn na ghàn khəlò gha yahi, Yènfù khə ni. ¹³ Gha mɨ ghɨ̂n ti nî ghàh kəta yi saŋlî. Ghàh chehì fê saŋle nâ haŋaŋ te ghàh yena Taytùs, wu saŋle kum lum we a nâ ghàn à jɨ̀m tì khɨte wûn atɨ̂n tôktì wûn ni lâ wunu yutè. ¹⁴ Mu chehì lûmhèlò gha yani ha wûn, ghàn tà che wumhi jə mu. Ghàh yè jîsà kə hamok ha ghàn. Nâbi ghə ghe a ghàh che jisa ha Taytùs kum ghàn che fî chwûtì kə hamok. ¹⁵ A ni gha ye a wù shihi kwàktì chin te ghàn chehì ywo ha wûn fê kwâktè te ghàn che shihi fye wûn hì chiŋte fânà, kôŋ yi wuni hì ləma yênà kə yi yên ha ghàn. ¹⁶ Mu saŋlê nâ haŋaŋ njwo mu khə na mu lahi yikte kə a ghàn a wùn, kə lum tù jɨ̀m.

¹ Ghàh khɨŋa a wana ne na ghàn hi khə gha ye a Yènfù che tokna ne yi gan a ndasu Fùyènsu se a su mô a Màsìdoniyà. ² Ghɨna che yen ngə̂k nâ haŋaŋ kum mômhì yi kanani ye yi che bena ha ghɨna biyani ghɨna baha kəta kə yi saŋlînì chiki hi fo nâ hi dù hi tòk a yi fêt yi Fùyènì. Ghɨna ndùku fo nâbi ni laha fufa kə nâ yi fûf. ³ Mu fòktè gha ha ghàn, ma mu ti yên. Ghɨna tà tì fo jə kə shyə ghe a ghɨna ndùku kəta hi fô, ghɨna tî fo chyâ. Ghɨna tì fo kə nâ nì kôŋ yi ghɨna, ⁴ fo ni, chyate ghàh na ghàh fo lumu, ma ghɨna fo ma boŋà gamti ghɨt a Fùyènà ghe a ghɨ chyə a Jèlusalèm. ⁵ Ghɨna tî nî chyâ nâ te ghàh ndùku kwâktè. Ghɨna tì shihi fô ma ghɨna ti yitì fo nâ ngɨŋsu ghɨna su ha Bâba hì fê ywo ghàh kə te Yènfù khɨŋa. ⁶ A ni gha ye a ghàh tì chyati Taytùs na wù gamti ghàn ma ghàn nê mihi fêt yi jûŋì mi yina a wù tì ne na ghàn yime ni. ⁷ Yi mô ma ghàn ti fati bimi kə nâ yi bimî hì fê fate fôktè gha yi Fùyènì fê kəta yi tof nâ haŋaŋ. Ghàn ti fati lem tu a ghàn yi gha yi Fùyènì, ghàn fê kôŋà ghàh nâ haŋaŋ. Ghàn boŋà fate khɨti lê fêt yi jûŋì mi yîn. ⁸ Mu jìsà wi na mu fo ha yi sâk. Mu jìsà na wun wu ghɨta Màsìdoniyà hi foma nâ haŋaŋ, mu hi khɨŋa hi yen na ghàn boŋa fate kòŋàlò kəbi ghɨt ale agha. ⁹ Ghàn khəlò kôŋ yi kanani ye a Bâba ghàhnà Jisòs Klistù tì kôŋà ghàhnà. Wu ndùku mô wut wù chìk, wù kahi fuflò kum ghàn shyəma fuf a wuna ni, ma ghàn khɨti ghak yi Fùyènì. ¹⁰ Mu khɨŋa hi jìs gha ye ha ghàn a mu kwàktè kum gha mi yina. À ndùku mô a lɨ̀m a chyalana, a kəta kə ghàn kôŋà hi yìtà fô, fo kə yâ. ¹¹ Yi jwôfà na ghàn ne mihi fêt yi jûŋ mi yina. Ghàn fo kə shyə ghe a ghàn kəta. Ghàn shihi fo, wun wanu hi foma kəbi te wu chehì foma hi bakti yi fo tɨni, ¹² njwo ghàn shihi fo a shyə ghàn hi saŋle hi fô ghe a ghàn kəta, ma Yènfù fyi fo tɨni, ma ghàn shìki kəta wi shyə ale, ma Yènfù hi ke wi na ghàn fo shyə ale. ¹³ Mu jìsà wi na ghàn fo hi nì na gha bona ha ghɨt ale ma ghɨ ta ha ghàn. Mu bɨlà khɨŋa kə na gha hi mô yi ghəl nâbi ha nde. ¹⁴ Ghàn kəta hidù chîn, mu khɨŋa na ghàn fo ha ghɨt ale ghe a ghɨ kəta wi, shyəma ghɨna bê shihi khɨtî ma boŋà tok ghàn a wu yu afa ghàn kəta wi. Yi mô ni, ma gha hi mô kə yi ghəl ha ghàn à jɨ̀m, ¹⁵ kə yi ghəl te ghɨ nyàka a ŋwàklù Fùyèn na, “À ndùku mô te ghɨ ndùku yênà kumte mwə̀ mù yə̂mù, ghɨt ghe a ghɨ ndùku kumte hì dù ndùku kəta, mu dô chyâhè wi, ghe a ghɨ ndùku kumte fùjiti ndùku kəta, mu tobte chyâhè wi.” ¹⁶ Yòŋnà yênà ha Yènfù te fu ne Taytùs tê hì khə gha yani, fê kôŋà hi gàmtè ghàn kəbi te ghàh. ¹⁷ Wù che bimi hi bèn hi yen a ghàn te ghàh jìsa, ghɨ shihi jìs nâbi ya ma wù ndùku kôŋàlò hi bèn nâ a wun a ngɨŋ. ¹⁸ Ghàh tì tum kəbi wâ nì wùlè ghê wûn, a mô wut ghɨta kôŋà wûn a ndasu Fùyèn sù afân nâ a jûŋ beka wù khə hi fòktè tum yì jùŋ. ¹⁹ Hi kpenhi, wù mô ma à wun chwok ndasu Fùyènsu na ghàh à ghɨna hi gbê nê fêt yi jûŋ mi yîn, fo yi kokhî ha Yènfù fê chwûtè na ghàh kòŋàlò hi tè gàmtì. ²⁰ Ghàh mòmhè hi tè fate khɨte fo mi yîn beka ghàh kòŋà wi na wùt wùlè ngani ghàh ma wù jis na ghàh chehì fate kine wi fo tɨni. ²¹ Ghàh ni nè ni njwo ghàh ti lem hi tè nè kə gha ghe a ghɨ jwôfà ha ghɨta, fê jwôfà ha Yènfù. ²² Ghàh shihi tum ghɨna ghɨ tum bakhe kəbi nì wâ nì wâhù wùlè, wu mô ma ghàh ti mômhì wûn, wù chwûtè ha ghàh, kə a ghan a ghan na wù kòŋàlò hi tè gàmtì, fî chwûtì mihì chin te wù samhe ghàn nâ haŋaŋ na wù kòŋàlò hi gàmtè ghàn. ²³ Ha Taytùs, wu fêtà ghàh à wun amok, gâmtè ghàn. Wana ne ghɨ le ghɨ̂n a ghê ghɨna mò amok lyê luk wu ndasu Fùyèn se a su mô afân. Fêt yi ghɨna nê, ghɨta kokhe Klistù. ²⁴ Ghàn chwuti lê ha ghɨt mɨ ghɨ̂n na ghàn kòŋàlò ghɨna, na gha ghe a ghàh jìsà kum ghàn mò kə nâ hamok, shyəma ndasu Fùyènsu yen nâ sù jɨ̀m.

¹ Mu khəlò na ghɨ yê hì fê kəta wi hi nyàk ha ghàn kum yi gâmtì ye a ghàn kəta hi chinhî ha ghɨt a Fùyènà a Jèlusalèm, ² beka mu khəlò na ghàn hì yute hi gàmtì. Mu ghaŋhe lò wunu kum ghàn ha ghɨt a Màsìdoniyà jîsà na, ghàn ghɨt a Àkayà ndùku yute hi fô nâ a lɨ̀m a chyalana. Ghɨna yu wun wanu wu fomanu hì boŋa kôŋà nâ haŋaŋ hi fô. ³ Chin hì mô, mu tuma wana ne ghɨ̂n na ghɨna ben shyəma ghàn ni kə te mu tì jìsa na ghàn hì nêlò. Yi jwôfà wi na ghɨna bê yen na ghàh ndùku ghaŋhe wu wun kum ghàn kə halô. ⁴ Yi ki gân na ghàh à ghɨt a Màsìdoniyà bènàlò, ghɨna ben teka ghàn bakti, ma ghàh hi wumê kum gha ghe a ghàh chehì jîsà kum ghàn, nâbi ghàn hi boŋa wumê nâ haŋaŋ. ⁵ A ni gha ye a mu che yena na yi jwôfàlò na mu jis wana ne ghɨ̂n ben ma yità yen ghàn, ma ghàn à ghɨna nê mihi baktînì kum fo ye a ghàn che chwune, hi chwùtì na à kòŋà kə nâ ghàn hi fô, ghɨ chinte wi ghàn shyəma ghɨ fo. ⁶ Ghàn kəta hi te khə na à yome nâbi nde fùjiti, ma wù bê boŋà kpi kəbi fùjiti, à yomi nâbi nde hi dù, ma wù bê kpi kəbi hi dù. ⁷ Nâbi nde shihi fô, wu fo kə shyə ghe a wù lèma a wun yi kwàktì na yi nè folò. Kə wùt nè fo ni te ghɨ chintelò wûn. Kə wùt nè shihi fô wu hi kwohe kɨ̀n beka Yènfù kòŋàlò wùt we a wù fo nì saŋlînì. ⁸ Yènfù kətalò jyaka hi bonhi ghàn nì mwə̀lû mu dô chyâ me a ghàn khɨŋa shyəma ghàn hi kəta kə yi kət yu mù jɨ̀m fê kəta kpene hi tè nè gha a jûŋà atɨ̂n, ⁹ kə te ghɨ nyàka a ŋwàklù Fùyèn na, “Wùt à chilichili khə hi fo mwə̀ nâ hi dù ha ghɨt a fufana. Jùŋ à wûn faŋa kə hamok.” ¹⁰ À fo Fùyèn ngwìk ha ghɨta na ghɨ yomi, a fo kəbi wûn mwə̀ mù yə̂mù, mô kəbi hi nè fo kpenhe ngwìk ha ghàn a chyənà shyəma ghàn yomi ma ghàn nê kpi jùŋ kəbi hi dù. ¹¹ Yènfù nè bônhèlò ghàn ma wù fo nki tu mwə̀ tu ha ghàn kə tù jɨ̀m, ma ghàn hi gâmtè ghɨta atɨ̂n. Ghàn nè fo ha ghàh ma ghàh shihi fo ha ghɨta, ma ghɨna hi fo yòŋnà ha Yènfù, ¹² beka fo mi yîn a ghàn fo ni gàmtè wi kə ghɨt a Fùyènà. Yi nê na ghɨna hi fo kəbi yòŋnà ha Yènfù, nâ haŋaŋ. ¹³ Fêt mi yin a ghàn nè ni chwùtè təm a jûŋà ghe a ghàn kəta ha ghɨta fê chwûtè mihè na ghàn ywolò tum yì jùŋ yì Klistù ye a ghàh gbè nì yinì. Gha tɨni nê, na ghɨta hi kokhe Yènfù, dô kə ni. ¹⁴ Ghɨta yena ni ghɨ hi kôŋà ghàn nâ haŋaŋ, jə̂mà ha ghàn beka tôknà yi kanani ye a Yènfù tòknà nì ghɨna tohne a ghàn. ¹⁵ Yòŋnà ni yènà ha Yènfù kum Wâ wûn we a wù fo ha ghàhnà. A mô yi fo yi jwo yumani!

¹ À chyate kə nâ mu Bôl ghàn chîn. Mu khəlò na ghɨt ale jìsà na mu shihi nyàk yi gha, bu a ghàn a fùtɨ̂n, mu hi jîsà kə nâ nì təm a ta, biyani ben tan a ghàn ashyə̂, mu hi bone jîsà kə yi jîs. Mu wu hì chyate ghàn kə nâ a Klistù yi yet te wù tòknè fê bonê. ² Mu chyate ghàn na kə ghàn ni, ma mu nê ben ma mu hi kântè ghàn. Mu khə na mu bènà ma mu hi kântè kə nâ yi kântì ghɨt ghe a ghɨ jîsà na ghàh chyə te ghɨt a mbye. ³ Yi mô kə nâ hamok na ghàh chyə a mbyî biyani nô wi a gha afa a ghɨt a mbye nò atɨ̂n. ⁴ Mwə̀ mù wòŋ mâhù ni mò, a fate wi wùt, à fo Fùyèn na ghàh hi tuma woŋi atɨ̂n, bobhi jyak wu sù bànà. ⁵ Ghàh bobhe gùfna ye ghɨta fihe hi chwùtè wu wun, ghɨ tâmtè na kə ghɨta khɨli Yènfù. Ghàh tihe kwâktì tu ghɨ̂tù, nê na ghɨta hi kwâktè gha a wu lum afa a Klistù khɨŋa na ghɨ hi kwàktè atɨ̂n. ⁶ Ghàn ki chwûtì ha ghàh nâbi wùni yu na ghàn ywolò, ma ghàh ki fo ngə̂k ha ghɨt ghe a ghàn a fùtɨ̂n a ghɨ ywo wi. ⁷ Ghàn yen kə gha ye a yi gânà a ghàn ashyə̂. Wùt shìki jîs na yi mò wut wù Klistù, wu tok kwâktìlò wu hi khə na ghàh boŋa mô kəbi ghɨt a Klistù te wûn. ⁸ Bâba ti fo jyaka ha mu a ghàn a tû, ma mu shìki jal kəbi yi jâl kum a jyak atɨna, ma mu hi wume wi beka wù fo na mu fati ghàn nì ghɨna, wù tà fo jə na mu bobhi yi bobhî ghàn nì jyak atɨna. ⁹ Nâbi te mu kòŋà wi na ghàn hi kwâktè na mu fànhè yi fânhì ghàn nì ŋwàklù samsu. ¹⁰ Ba ghɨt ale jìsà na mu shihi nyàk à ŋwàklù, yi hi tâ, fune a shyə hi chwùtè a jyak biyani mu ne bɨlì ben a ghàn ashyə̂ mu bonalò hi fê khə wi hi jìs a ghɨta fùtɨ̂n. ¹¹ Mu kòŋàlò na nki yi ghɨt mɨ ghɨ̂n hi khə na gha ye a ghàh ndòkò nyâkà ghɨ chinhilò ni mò kə ye a ghàh bènà nâbi a ghàn a fùtɨ̂n, ma ghàh ni. ¹² Ghàh jìsà wi na ghàh mò atɨ̂n à ghɨt ghe a ghɨ jîsà kum ngɨŋsu ghɨna su. Ghàh jìsà na, ghɨna lem fə̂kà kə a ghɨna sù ngɨŋ ma hi fə̂kà ngɨŋsu ghɨna su atɨ̂n. Ghɨna nè yi gha yi kəta wi tofu. ¹³ Ghàh wi hi tè jâl kum gha ghàh bu hi nì. Ghàh ni jala kə yi gha afa a Yènfù fo ha ghàh na ghɨ hi nê, fêt ye a ghàh nè a ghàn a fùtɨ̂n yi bakhe kəbi atɨ̂n. ¹⁴ Ghàh tà jal jə chya leŋa te ghàh ndùku baha mô teka ghɨ bê tan ha ghàn nì tum yì jùŋ kum Klistù. Ghàh hì mô ma ghɨ ti ben tan ha ghàn. ¹⁵ Ghàh tà dâŋhì jə kpi hi tè jâl kum fêt yi ghɨt ale. Ghàh khɨŋa kə na ghàn ləma a ghàn yi bimî shyəma fêt ye a ghàh nè a ghàn a fùtɨ̂n boŋà ləma. ¹⁶ Yi shìki hì mô ni, ma ghàh fê fôktè yen nì tum yì jùŋ a tu lak tu letu, ma bê tè jâl tuk wule kum yi fêt ma à ni ghɨt ale. ¹⁷ Ghɨ ti nyak a ŋwàklù Fùyèn na, “À hì jala nâbi nde, wu hi jala kə kum gha ye a Bâba tì ne.” ¹⁸ Yi mô ni beka Bâba yena wùt na wù mô a jûŋ, wù shìki kpenâ, a bu na à lyi wut ngɨŋ à wûn na yi kpenalò, ma wù hi kpenê.

¹ Mu hì jìsà chin kə te à ngwò, chyate ghàn na mu shihi jìs, ghàn hi fate yute kə yi yutî. Ghàn yuti! ² Ghàn hi khə na mu kə̀ktè ghàn nâ haŋaŋ kəbi yi ghəl te Yènfù kə̀ktè. Mu hì mô ma mu ti chwûnà hi fo ghàn ha lɨm wù mòk, a mô Klistù, khɨŋa na kə ghàn nê hi kəta njahi nâ hakoh wu yu afa mu fo ghàn ha wûn. ³ Mu jìsà ni fânà na ghɨta làhi bèn hi lehe ghàn ma ghàn hi fê ywo wi ha Klistù kə nì təm à jɨ̀m kəbi yi ghəl te Satàn tì bèna nì mùnàŋ mù wûn lehi Îf. ⁴ Mu fànà ni beka mu ti yen na chichàsu su fəmsu yike ghàn kum Jisòs wùlè, a bu we a ghàh che yike ghàn kum wûn, ghàn de kə yi dê. Wùt bènàlò, ghàn fyi yohnà ha wûn, a bu Yohnà Yulena ghe a ghàh tì be fo ha ghàn, fî bimî kə yi bimî tum ye a wù fòktè, a bu tum yì jùŋ ye a ghàh tì fòkte ha ghàn. ⁵ Ghɨt a tum mɨ ghɨ̂n a ghàn lèma na à mò nâ ghɨt a tuma a ta chyâ wijə mu nâ yi gha yile. ⁶ Mu khəlò kə nâ na mu khə wi hi jìs a ghɨta ashyə̂ biyani, khə yi gha ye a mu jìsà. Ghàh hì mô ma ghɨ ti chwûtì yìna ha ghàn kə lum tù jɨ̀m. ⁷ Ba yi ni mò na mu che chwohi ngɨŋ à mì ni ghàn ghɨ hì kokne fôktì tum yì jùŋ yì Yènfù ha ghàn, bufa wi shyə ale, a mô be ma? ⁸ Mu fètà ha ghàn, kə̂kà te mu chwoŋa yi chwôŋ ndasu Fùyèn su lesu beka mu ndùku fêtà ha ghàn, a bɨlà lâkà ghɨna nì mu. ⁹ Mu hì mô ghàhnà, yu wule ben kpên, mu hì kəta wi shyə ale nâ hakoh biyani mu hi fo wi ngək ha wùt. À tì bɨlì tum kə wana ne ghàhnà a Màsìdoniyà mwə̀lû ha mu. Mu tà tì buf jə shyə ale ha ghàn nâ wu tuk wule, bu hi bè bûf. ¹⁰ Mu jala na mu fye wi shyə ale ha ghàn, mô hi tè jâl kə ni a bàh yi lak yi Àkayà nì ghàn mɨ ghɨ̂n à jɨ̀m. Mu jìsà kə hamok, Klistù khə ni, shyə ale wi hi tàmtè mu. ¹¹ Ghàn kwakti na mu jìsà ni beka mu kòŋà wijə ghàn ma? Mu kòŋàlò ghàn, Yènfù khə ni! ¹² Mu nè faŋa kə ni ma mu hi nê kə gha ye a mu nè chîn, ma mu baŋ jwo ghɨt ghe a ghɨ jîsà na ghɨna mò ghɨt a tuma a Klistù yâ, kə ghɨna hi ghaŋhe wunu jîsà na ghàh à ghɨna fètà kə lum wù mòk. ¹³ Ghɨt mɨ ghɨ̂n wamalò na ghɨna mò ghɨt a tuma, ghɨna mò ghɨt a fetana ghɨ lehena, kama chwûtè na ghɨna mò ghɨt a tuma a Klistù. ¹⁴ Nâbi ha nkàn, kə ghàn hi mô nì kani na nâbi Satàn nì ngɨŋ à wûn nè wu hi kama chwûtè kəbi na yi mò anjèl yì Yènfù yì banana. ¹⁵ Yi ni chwùtè na ghàn kəta wi hi tè mò nì kani na ghɨt a fetana a Satàn boŋa kama chwûtèlò kəbi na ghɨna mò kə nâ ghɨt a fetana a Fùyènà ghɨ jûŋà. Ngək ye a Yènfù bè fo ha ghɨna a gòkhi bè kpenelò a ghɨna yi fèt afân. ¹⁶ Mu baha kûmtèlò na kə ghàn hi kwâktè na mu mò à ngwò, biyani ghàn hì mô hi lyè mu a ngwò, ghàn de ma mu boŋà jis te à ngwò a fu yulâ ni. ¹⁷ Mu ghaŋhe jîsà yênà nì gha afân kə te a ngwò, jîsà ni kə a mu a ngɨŋ. A tà jis jə Bâba na mu hi jîsà ni. ¹⁸ Mu hì boŋa jîsà, ghaŋhe yênà nì wunu kəbi te ghɨt a dona a mbyî. Ba ghɨna ghaŋhe wunu kum mwə̀ mù mbyî? ¹⁹ Ba ghàn jìsà na ghàn tofalò nâ a jûŋ, ghàn yen wù ngwò, ghàn nyamti de na wu hi jîsà ha ghàn! ²⁰ Ghàn ti de ghɨta, ghɨ hì lyê ghàn a wu kwòs, nyâblè nì ghàn. Ghàn ti de ghɨna lehe ghàn, yikte ghàn fê sûlè ghàn. ²¹ Mu wume hi jìs na ghàh chehì nê gha mɨ ghɨ̂n ha ghàn. Ghɨ lyê na ghàh chehì yole yi yolî! Mu hì jîsà chin kə nâ te à ngwò, biyani ma ghɨt ale shìki hì ghaŋhe wu wun kum nâbi ghə, ma mu hi boŋa tahe nê kəbi yâ. ²² Ghɨna kokhe wu wun jîsà na ghɨna mò ghɨt a Hibùlùs. Mu mò kəbi wut à Hibùlùs. Ghɨna jìsà na ghɨna mò ghɨt a Isalì. Mu mô kəbi wut à Isalì. Ghɨna ghɨ le ni jîsà kəbi na ghɨna mò ghɨt a yi sah yi nda Ablàhâm. Mu mô kəbi wut a yi sah yi nda Ablàhâm. ²³ Ghɨna jìsà na ghɨna mò ghɨt a fetana ha Klistù. Mu boŋa fêtà kəbi ha Klistù, nè yi fêt yi tɨni chyâ nâ ghɨna. Mu hì jîsà yênà kə nâ te mu jyaka a yi jyâk. Mu ti fet chya ghɨna. Ghɨ ti fa mu a ndâ chyâk a ghan hi dù chyâ te ghɨ fa ghɨna. Ghɨ ti sam mu a ghan hi dù fî lanti hi ywe mu a ghan hi dù. ²⁴ Ghɨt a Jûs ti sam mu ghan à tân, a mô nâbi wùni yu te ghɨ sama, ghɨ sam wànsù mtât njwò bulamòk. ²⁵ Ghɨ ti sam mu nì bàŋsù ghan à tât, tumle mu nì te wu yu wù mòk. Ngwùk tì bɨ̂nlì nì mu a jwô a ghan à tât. Jwò lyi mu, mu yus wu tuk wu fublùnù. ²⁶ Kwuŋa lanti hi lyè mu nâ ghan hi dù te mu yènà gbî, mu fî lanti hi kpû a ghɨt a chwoŋana wô. Mu lanti hi kpû a ghɨt ghaha yi laka wô, tumu lanti kəbi hi ywe mu. Mu ti lanti hi kpû a tèk tu chiktu, lanti kəbi a lak tu ghə̀ntu. Mu ti lanti hi kpû a jwosu chiksu, lanti hi kpû a ghɨta a wo ghe ghɨ kama chwûtè na ghɨ ti bimî. ²⁷ Mu ti fet chyâhì ghan a dona chyə kə nì kə̂kì, mu ben yu wule, mu chyə teka mu yə shyə ale teka mu nyo nâbi mòlû. Mu faŋa wi hi tè mò, kəta wi nâ shyə ale hi yə̂, kəta wi ndâ hi chyə atɨ̂n, kəta wi nâbi njusu hi màk. ²⁸ Lumtu dò kə ni a mu yena ngək atɨ̂n biyani baha bu hi tè tâŋ. À mò kə yi gha yì mòk a yi mô a mu yi kwàktì kə yu mù jɨ̀m, a mô gha nda chintisu ghɨt a bimena, kə sù jɨ̀m. ²⁹ Mu yen wùt wu bota kum gha Fùyènì, gha tɨni hi fo ngək ha mu, a hi mô kə ni te à mò mu. Ghɨ nê wùt fen atɨ̂n à be, gha tɨni hi fo ngək ha mu nâ haŋaŋ. ³⁰ Mu shìki mô hi tè ghaŋhe wu wun, ma mu hi ghaŋhe kum gha ghe a ghɨ chwûtè na mu botalò. ³¹ Bè Bâba Jisòs, Yèn fe a fu kəta kokhînì a yu mù jɨ̀m khəlò na mu wama wi. ³² À ndùku mô te mu mò a yi tèk yi Dàmaskùs, wùt we a fə̀n Àletàs lèma na wù hi saka tèk mi yê jis ghɨta timè baŋ luktu gbûtè hi khɨte mu, ³³ biyani ghɨ lem mu a kəm tesi fihi mu a bùk a wu wùn wu mbàn a bɨn afû chwohi mu, mu têt, wù tê kwo mu.

¹ Mu hì jala kə yi jâl nâbi te mbì bu atɨ̂n. Mu fòktè gha ha ghàn chin te Bâba ne, ghɨ ben ha mu ni te à chyə jem mu, nì ghe a wù chwùte banhe ha mu a mu yi kwàktì. ² Mu khəlò wùt wù bimena wùlè a Yènfù tì lye kwoka a nyə̂ nâ wu lùk afa a wu tì ngaŋte kpene. Mu laha khə wi nâ, wù tì kwok kə nâ nì wun wu wunu ma à tì kwok a yohnà. À tòkà khə kə Fùyèn. Chîn mô lɨ̂m njwòsù kìk te gha yina gàna. ³ Mu khə kə te mu tì jìsa na Yènfù ti lyi wùt wuna, wù kwok a nyə̂ wu lùk afa a wù mò atɨ̂n biyani laha khə wi nâ, wù tì kwok kə nâ nì wun wu wunu ma, wù tì kwok a yòhnà agha. À tòkà khə kə Fùyèn. ⁴ Wù yen tan afû yu gha jwo yumana ale, wùt bu hi fòktì nì jwo. ⁵ Mu chehì jala kum wùt mu wuna, bu hi jâl kum ngɨŋ à mì. Gha ye a mu bu hi jal kum ngɨŋ à mì atɨ̂n mò kə na mu botalò. ⁶ Mu hì jala kum ngɨŋ à mì, ma mu hi bu te à ngwò, njwo mu yè jìsà kə gha ye a yi mô hamok. Nâbi yâ, mu nè jala wi, bu ya ma wùt ne lyi mu wu lùk wu chyâ gha ghe a mu nè, nì ghe a mu jìsà. ⁷ Yènfù tà che koŋ jə na mu hi jala chyâhè kum gha a kanana ghe a fu chwute ha mu, ghɨ dô kə ni. A ni gha ye a fu tì de yafi yi ben lye a mu wu wùn hì fo ngək ha mu nâ haŋaŋ. Yaf yi tɨni tì fwo kə nâ ha wùt wù tum te Satàn tuma na wù bê hi fo ngə̂k ha mu, kə mu hi ghaŋhe chyâhè wunu. ⁸ Mu chyati ha Bâba ghan à tât na wù fihi yaf mi yina a mu wu wùn, ⁹ chyate nâbi yini, wu jis kə ha mu na, “À Kpen kə yi tôknà ye a mu tòknè nì wò, njwo wùt shìki tè bôt, wu shìki yen te jyak a ma fate fêtà a wun wu wùn.” Yi ni chwùtè na mu jala nâ haŋaŋ kum gha ghe a mu bota atɨ̂n shyəma jyak a Klistù hi baŋa mu. ¹⁰ Mu nè mu hi saŋlê wu yu afa mu bota, ghɨta sûlè mu, gha ta ha mu, ghɨ chwoka wulu mu, ngəksu lesu fê bênà ha mu kə kum Klistù. Yi mô ni beka à bènà wu yu afa a mu bota, mu hi bɨlà kəta a jyak. ¹¹ Mu jìsà te à ngwò ma à ni ghàn na mu hi jîsà ni. Mu ti bəmhe ngɨŋ à mì, a mô luk wanu hi tè bəmhe mu, ghàn faŋ hi bəmhî. Mu kpene wi nâbi yi gha biyani ghɨt a tum ghɨ̂n a ghàn lyè na ghɨ koknelò nâ haŋaŋ chyâ wijə mu nâ hakoh. ¹² Mu tì bonhi lyi yu hi chwùtè chwènasu gha su ha ghàn nì nki tu gha kanana ale nì fêt tu kana tu, tu chwûtè na mu mò kə nâ wùt wù tum. ¹³ À mò yìni gha yi jûŋì a mu che ne ha nôn a ghɨt a bimena ale faŋ hi nì ha ghàn agha? Gha ye a mu che faŋa hi nì ha ghàn chehì mô kə na mu tà tì fo jə ngək ha ghàn. A hì mô yi gha yi be te mu che ne, ghàn lehìfo mu! ¹⁴ Ghàn hi khə na chin hì mô ghan à tât te mu bèna hi yen a ghàn, mô hi bèn bu hi buf a shyə ale ha ghàn beka mu khɨŋa kə ghàn, a bu mwə mânù. À bɨlà kəta bè wan hi tè tòknà nì wana ghɨna, a bu wana hi tè tòknà nì ghɨna. ¹⁵ Mu saŋle hi bobhi nâbi ghə hi fè fo ngɨŋ à mì hi gàmtè ghàn. Njwô ghə mu kòŋà chyâhè ghàn ni, ghàn kôŋà kə mu fùjiti? ¹⁶ Ghàn ti yen kə nâ hamok na mu chehì bufa wi shyə le ha ghàn, biyani a fê jîsà kəbi ghàn na mu che lehi ghàn wam yi fə̂m ha ghàn. ¹⁷ Mu che lehi yàni ghàn? Wùt wùlè atɨ̂n à ghɨt afa a mu che tuma ha ghàn che lehilô ghàn agha? ¹⁸ Mu che chyati Taytùs na wù bê yen ghàn, mu tum kəbi wâ nì wùlè ghê wûn. Yi ni mò na Taytùs che ben fi shyə le ha ghàn ma? Ba ghàh à Taytùs mò kə a tô yi gha yì mòk, chyə kə chyənà yì mòk? ¹⁹ Ghàn kwàktè na ghàh nyàkà gha ghɨ̂n njwo ghàh khɨŋa hi yə sak a ghàn ashyə ma? Ngàŋ! Ghàh jìsà te ghɨt a Klistù a Yènfù ashyə̂. Ghàh jìsà gha mɨ ghɨ̂n ha ghàn nâ à jɨ̀m ni kə njwo ghàh kòŋà ghàn, khɨŋa na ghàn ləma a wu lum afa a Yènfù khɨŋa. ²⁰ Mu fànà na mu nè bênà, ghàn bu te mu khɨŋa na ghàn hi mô, ma ghàn boŋà yen mu, mu bu te ghàn khɨŋa na mu hi mô. Mu làhi shihi bèn, mu yu njaŋi a ghàn a fùtɨ̂n, nì ghə̀k, nì là mù bàŋamù, nì mu, nì jîs yi be, nì kowòŋ nì ghaŋhi yi wùni, ma mu fê yen ghàn buma chyə kə yi chyə̂. ²¹ Mu fànà na mu nè bênà, ma Yènfù fê ni, ma mu hi wumê kum ghàn, na mu bênà hi yen ghɨta teka ghɨ kwuna chyənà ghɨna yì be ye a ghɨna chehì chyə, ghɨta ghɨ jûmtè ywena nâ haŋaŋ nì ywena ghɨ gbê nâ haŋaŋ, nâbi nde chyə yênà kə te bû. Mu fànà na mu nè bênà, ma gha mɨ ghɨ̂n ni ma mu ji.

¹ Mu hì bênà hi yena ghàn ni na à hi mô ghan à tât. Ŋwàklù Fùyèn jìsà na, wùt hì mô hi jìs na wùt ti ni bobhi gha, bɨ̀n à sak su wunsu hi mô ghɨt à bà makə ghɨt à tât. ² À ndùku mô te mu be gokhe hi yena ghàn na à hì mô ghan à bà, mu fo tobhînì ha ghɨt ghe a ghɨ chehì nê gha a be, fî fo nâbi ha nde. Mu fô tobhî tɨni chin, bu nâbi a ghàn a ngwùŋ. Mu jìsà na mu ki fê kahà bèn, ma mu fo ngə̂k nâbi ha nde we a wù ne bobhe gha. ³ Mu bênà hi chwùtì ha ghàn na mu jìsà nâbi ghə, a mô ma à jis Klistù beka à mò yi gha ye a ghàn khɨŋa hi yû. Mu chwùtè ha ghàn na Klistù bota wi, na wù bɨlà chwùtè kə nâ jyak a wuna a ghàn a fùtɨ̂n. ⁴ Yi mô hamok na wù ndùku kəta wi jyaka wu yu afa ghɨ tì banti wun a kàkfùtàfù biyani, wù kaha lôtì hì chyə kum jyak a Fùyènà. Yi ni chwùtè na à mò a chyəna ghe a ghàh chyə ha ghàn, ghàh gha kəbi jyaka te wûn biyani boŋa chyə kə atɨ̂n à ghe a Yènfù fo ha wûn. ⁵ Ghàn fate kina ngɨŋ sanisu ma yen nâ, a ghàn chyə lò kə nâ te ghɨt a bimena agha. Ghàn fate kina ngɨŋ sanisu. Ba yi ni mò na ghàn yena na Jisòs Klistù chyə lò kə nâ a ghàn a fùtɨ̂n ma? Ghàn kəta hi tè yên, a bu kə na ghàn chyə wi chyənà ghɨt a bimena. ⁶ Mu khə na à hì mô ha ghàh ma ghàh ti chwûtì na ghàh mò kə nâ ghɨt a tuma Jisòs. Ba ghàn khəlò ni? ⁷ Ghàh jə̀mà na ghàn hi chyə̂ chyənà su jûŋ sù, nê wi be. Ghàh jìsà wi ni shyəma ghàn shihi chyə̂, ma ghàn hi chwûtè na ghàh mò kə nâ ghɨt a tuma a jûŋà. Ghàh bɨlà khɨŋa kə na ghàn hi nê gha ye a yi mô chilichili nâbi wu yu afa ghàn chwùtè na ghàh nè wi fêt yahi a jûŋ. ⁸ Ghàh wi hi tè fòktè yi gha, ghàh kòŋà kə yi gha ye a yi mô hamok. ⁹ Ghàn shìki ta yi gha Fùyènì, ma ghàh hi saŋlê nâbi wu yu afa ghɨ yena wi jyak ghe a ghàh kəta. Ghàh jə̀mà kə na ghàn hi ləma yi gha Fùyènì. ¹⁰ Mu nyàkà ŋwàklù yìna na yì ben ha ghàn ashyə̂ shyəma mu ben, shyəma mu shihi bèn ma ghàn ti kwunâ, ma mu faŋ hi fè chwùtè jyak a ma ha ghàn. Ghàn khə na jyak ghe a Yènfù fo ha mu mò na mu hi ləmhe ghàn yi ləmhî nì ghɨna, wù tà fo jə na mu hi bobhe yi bobhî ghàn atɨ̂n. ¹¹ Hi gòkhì a wana noma, mu wu hì jîsà na, ghàn faŋ à kə a jûŋ. Ghàn fati chyənà sanisu. Ghàn fate khɨti gha ye a mu jìsa. Ghàn hi chyə kə a shyə̀ à mòk, chyə nì yutìnì shyəma Yèn fe a fu kòŋà ghɨta fê fo yutìnì ha ghàn, hi mô ghàn à ghɨna. ¹² Ghàn toŋti ngɨŋ sanisu kə nâ wu lum hi chwùtè kôŋ yi ghɨt a bimena. ¹³ Ghɨt a bimena afân nâ à jɨ̀m toŋte ha ghàn. ¹⁴ Bâba Jisòs Klistù chwuti təm a jûŋà ha ghàn, ma Yènfù chwuti kôŋì ha ghàn, ma Yohnà Yulena faŋ ha ghàn à jɨ̀m.