1 Timotì

¹ À nyak mu Bôl, ŋwàklù yìna, ma à mu chwok Fùyèn ghê Klistù Jisòs na mu hi mô wut à tum ha Klistù Jisòs. A mô Fùyèn fe a fu bonhe ghàhnà a ghàhnà sùbe ghê Klistù Jisòs we a ghàhnà ndùku yute, khə hamok na wù bènàlò. ² Mu nyàkà ŋwàklù yìna ha wò a Timotì. Wo mô kə nâ wan ha mu beka ghàh à wò kəta kə yi bimî yì mòk. Yènfù, a mô Bì, ghê Klistù Jisòs, Bâba ghàhnà chwuti təm a wuna ghɨ jûŋà ha wò nì kwohi seni, ma wò nê hi chyə̂ nì yutìnì. ³ À ndùku mô te mu lo hi yèn a yi lak yi Màsìdoniyà, mu jis ha wò na wò faŋ à kə yi tèk yi Efisùs. Mu ndùku khɨŋa na wò faŋ à kə afû ma wò kɨn na ghɨt ale ghe de yikî yi fəm ye a ghɨna yike afû yâ. ⁴ Jis na, kə ghɨt mɨ ghɨ̂n hi chyâhè yu, ghɨna gbê mâ mù màgân mù yîm kum gha be ghɨna. Gha mu ghe nê, ghɨta kûnè tu ghɨna kə halô, fê tâhè na kə ghɨta bimi hi nè fêt ye a Yènfù khɨŋa. Wùt mò kə hi nè fêt mi yîn a wu yu afa wù bime ha Yènfù. ⁵ Mu jìsà gha yîn ha wò ni beka mu khɨŋa na ghɨt a bimena khɨti kôŋ ye a yi fwo a təm a yulena, kəta wi kwâktì yi be fê kəta yi bimî ye a yi mô hamok. Ghɨna shìki kəta kôŋ mi yîn, ma yi hi chwûtè na ghɨna ywolò yikî ye a ghɨt a bimena kəta hi tè khə. ⁶ Ghɨt ale ti de yikî mi yîn faŋ kə yi yikî yi ngwòni. ⁷ Ghɨna kôŋà hi tè mô chichàsu saksu Fùyènsu biyani khə wi nâbi gha ghe a ghɨna jìsà nì ghe a ghɨna yike, chwûtè na ghɨ khəlò. ⁸ Ghàhnà khə na Sak yi Fùyènì jwòfàlò a wu yu afa ghɨta lèmà kə nâ te ghɨ kəta hi tè lèm. ⁹ Ghàhnà kəta kəbi hi tè khə na ghɨ tà fati jə̂ sak mu tɨ̂n ha ghɨta jûŋà. Ghɨ bɨli fate ha ghɨt ghe a ghɨ khɨma saki nì ghê a ghɨ ta nì tu nì ghɨt ghe a ghɨ ngumle wi Yènfù nì ghe a ghɨ nê gha a be nì ghe a ghɨ jə̂mà wi ha Yènfù nì ghe a ghɨ sûlè Yènfù nì ghɨt a ghe a ghɨ ywite be ghɨna makə ne ghɨna nì ghe a ghɨ ywite ghɨt ale. ¹⁰ Ghɨ fate ha ghɨt ghe a ghɨ chyə nì ywena, a bu ywena ghɨna, makə nì lɨmànà, a bu a lɨm a ghɨna, a fi fati kəbi ha lɨmànà ghe a ghɨ kaha chyə nì lɨmànà ale, nì ghɨt ghe a ghɨ bəkle ghɨta te wu kwòs nì ghɨta fəma, nì bɨ̀n à sak su fəmsu nì ghe a ghɨ nê nâbi gha ghe yikî jûŋì tunhe. ¹¹ Gha mɨ ghɨ̂n mò atɨ̂n à tum yì jùŋ afa a Yènfù fo na mu fokti. A mô Yènfù kana fe a ghɨta kokhe. ¹² Mu fo àyòŋnà ha Bâba ghàhnà Klistù Jisòs te wù fo jyaka na mu hi nê fêt mi yîn, fî chwok mu na mu kokne kpenelò hi nè fêt yi wuni. ¹³ Yènfù kwohi yi sen ni gha mɨ ghɨ̂n ha mu nâbi te mu ndùku yike gha a be kum wûn fê nyâblè, sûlè wûn, beka mu ndùku baha mô teka mu bimi, khə wi gha ye a mu nè. ¹⁴ Bâba ghàhnà chwûtì təm a wuna ghɨ jûŋà ha mu nâ haŋaŋ, ni na mu bimi ha wûn hi tè fê kôŋà ghɨt à jɨ̀m. A ni gha ghe a ghɨ kəta hi tè gàn a wu yu afa ghàhnà nì Klistù Jisòs mò amok. ¹⁵ Gha mi yîn na Klistù Jisòs tì ben a mbyî hi bònhè ghɨt a be ni mò kə nâ hamok, ma wùt wu wi hi tunhî. Mu mô kə nâ fə̀n atɨ̂n à ghɨt a be mɨ ghɨ̂n. ¹⁶ Yènfù tì chwûtì seni kwolani ha mu beka mu ndùku mô fə̀n a gha a be. Yi gan ni shyəma Klistù Jisòs chwûtè mihi wunhî yi wuni hi nì na mu hi mô te chwena ha ghɨt ale shyəma ghɨna yen gha ye a wù ne ha mu ma ghɨ bimi ha wûn ma ghɨ hi kəta chyə ye a yi bè mê wi. ¹⁷ Ghàh ni jə̀mà na ghɨ hi kokhe fə̀n we a wù saka a yu mù jɨ̀m, a mô kə wûn Yènfù, bu hi bè kpû, ghɨta yena wi wûn. Ghàh ni jə̀mà na ghɨta faŋ à hi ngumle kə wûn nâ a yû mù jɨ̀m. Àmèn. ¹⁸ Wâ mù Timotì, mu jìsà ha wò na wò kəta hi tè kwàktè gha ghe a fòktì su chiksu tì jìsa kum wò. Lyì gha mɨ ghɨ̂n ha mwə̀ mâ mù wòŋ ma wò fati ma wò hi nô fòktìsu fəmsu atɨ̂n. ¹⁹ Fate khɨti bimî ya ha Jisòs Klistù ma hi kəta kwâktì yi yuleni. Ghɨt ale ti tunhî hi tè nè gha ye a kwàktì yi yuleni mi yîn tì chwùte mâkà yi bimî yi ghɨna. ²⁰ Hèmenìyùs nì Àlèksandà mò ghɨt ale atɨ̂n à ghɨt mɨ ghɨ̂n. Mu hì mô ma mu ti fo ghɨna ha Satàn na wù fo ngək ha ghɨna shyəma ghɨna yiki tofu ma ghɨna tê fè yike jə̀ gha a fəma kum Fùyèn.

¹ Gha yi ta atɨ̂n à gha afân a mu jìsà ni mò na, ghàn hi jə̂mà ha ghɨt à jɨ̀m, jə̂mà na Yènfù gamti ma wù fo mwə̀ me a ghɨna khɨŋa. Ghàn hi fo kəbi yòŋnà ha wûn kum a gha a jûŋ ghe a wù nè ha ghɨta. ² Ghàn hi jə̂mà ha fə̂ntù nì ghɨt ghe a ghɨ tihe ghɨta shyəma ghàhnà hi chyə kə nâ nì yutìnì fê gbê kə a lumtu jûŋ tù jɨ̀m afa a Yènfù khɨŋa na ghɨ hi gbê atɨ̂n, chyə̂ chyənà yì jùŋ a ghɨta ashyə̂. ³ Ghàn shìki jə̂m ha ghɨta ni, ma gha tɨni hi jwôfà fê nê na Yènfù, Bònhè ghàhnà hi saŋlê. ⁴ Yènfù khɨŋa na ghɨt à jɨ̀m bon fê khɨŋa kəbi na ghɨt à jɨ̀m khɨli gha ye a yi mô hamok. ⁵ Yi mô ni beka Yènfù mò kə fù mòk, wùt fê mô kə wù mòk a ghɨta tohne a wûn yênà ha Yènfù. Wùt wunâ mô Klistù Jisòs, a mô kəbi wut te ghàhnà. ⁶ Wù ti fo ngɨŋ à wûn hi kpu hi yun a tu ghɨt à jɨ̀m. Yènfù tì ni gha mi yîn kə wu yu afa a fu ndùku khɨŋa hi chwùtè a chwena na fu kôŋàlò hi bònhè ghɨt à jɨ̀m. ⁷ Ghɨ tì chwok mu ha wùt à wûn wù tum kum gha mi yîn na mu fokti gha Fùyènì ma mu fê yiki tumu nì gha ye a yi mô hamok. Gha yîn a mu jìsà ni mò kə nâ hamok. Mu wama wi. ⁸ Mu khɨŋa na ghàn hi yûŋtè nâbi afa hi jə̀m, lɨmànà hi jə̂mà, kəta təm a yulena, kəta wi bâŋhì wu la nì gùfna ha wùt. ⁹ Mu khɨŋa kəbi na ywena hi fate lafâ, a bu yi laf ye a yi mô hi fo ngək a ghɨta. Kə ghɨna hi fate chyâhè tu, tuŋa chyâhè chyaksu makə fwatu njentetu. Kə ghɨna hi labhe ngɨŋsu ghɨna su nì nju se su ta chyâhè wu kâ. ¹⁰ Ghɨna hi bɨlà fati ngɨŋsu ghɨna su nì gha jûŋà ghe a ghɨna nè ha ghɨta hi chwùtì na ghɨna mò a ywena bimena. ¹¹ Ywena kəta hi tè yute gha ghe a ghɨ yike ha ghɨna mô moŋ nì ngumlînì. ¹² Mu ti tunhi na kə ywena hi time wu lùk, yike à lɨmà makə kəta a jyak hi tè sak a ghɨna. Ghɨna kəta hi tè mò kə moŋ. ¹³ Yi mô ni beka Yènfù tì bwəm Adàm ashyə̂ ki bwəma Îf ¹⁴ Ghɨ tà tì jɨ̂ŋhì jə Adàm. Ghɨ tì jɨ̀ŋhi kə wùt ywên, wù khɨm yi sak yi Fùyènì. ¹⁵ Biyani Yènfù bônhì nâbi wùni wùt wù ywên te wù bwɨ mwəlà, a wu yu afa wù kwuta təmi faŋ hì ta a wun a yi bimî, fê kôŋà ghɨt ale, fê chyə̂ chyənà ye a yì kəta wi njahi. Wù kəta hi tè nè gha mɨ ghɨ̂n nì tofu.

¹ À khɨŋa nâbi nde hi tè mò wut wù tihena a ndâ Fùyèn, wu hi khə na wù khɨŋa yi fèt yi kokne jwòfà kə ni. Gha mi yîn mô kə nâ hamok te ghɨ jîsà. ² Wùt wù tihena wuna kəta hi tè mò wut, ghɨta ngane wi wûn a yi ghâ yile, wu kəta kə wut wù ywên wù mòk, khə hi khɨte ngɨŋ à wûn, kokhe ngɨŋ à wûn, tôknè nì ghɨt a benana, fê khə hi yike ghɨt a bimena nâ a jûŋ. ³ A kəta hi tè mò wut, nyo chyâhè wi lùkû, shɨŋa nê wi yi nî gha, nê wi gha hi yikte yi yiktî ghɨta, njaŋa chyâhè wi, se a wuna fwo wi a wu kâ. ⁴ A kəta hi tè mò wut fate khɨte sah yi nda yi wuni nâ a jûŋ. Wu kəta hi tè nì na wana wuna hi ywo wûn fê kəta yi ngumlî. ⁵ Wùt hì khə wi hi khɨte ghɨt a wuna a ndâ, ma wù nê khɨli yàni hi khɨte ndâ Fùyèn agha? ⁶ A kəta hi tè mò wut teka wù kùktê bimi, bu yani ma wù hi ghaŋhe wunu, ma Yènfù fo ngə̂k ha wûn kə te wù tì fo ha deblì. ⁷ A kəta hi tè mò wut, nâ ghɨt ale ghe a ghɨ baha mô teka ghɨ bimi ke wun, wu koknê shyəma deblì faŋ hi kwo a wûn a wu wə̀, na wù wumi. ⁸ Gha mɨ ghɨ̂n a mu jìsà ni, yènà kəbi ha ghɨt ghe a ghɨ fêtà a ndasu Fùyènsu. Ghɨna kəta hi tè kəta chyənà yì jùŋ, jîsà hamok, nyo chyâhè wi lùkû, se ghɨna fwo wi a wu kâ. ⁹ Ghɨna kəta hi tè kəta kwâktì yi yuleni, fê bime gha kanana ghe a Yènfù chwùtè kum yi bimî yi ghàhnà. ¹⁰ Ghɨt a bimena kəta hi fo yi mômhì ha ghɨt mɨ ghɨ̂n laŋ, ghɨna ki chyâ, ma ghɨ ki de na ghɨna hi fêtà a ndâ Fùyèn. ¹¹ Ywen a ghɨna ghe a ghɨ fêtà a ndâ Fùyèn boŋa kəta hi tè kəta chyənà yì jùŋ, lêmà wi kowòŋ, mô kə a ghɨna yi tof, nê nâbi ghə kə hamok. ¹² Nâbi wùni wùt wù fètana a ndâ Fùyèn kəta hi tè kəta kə wùt ywên wù mòk, fê tôknè nì wana wuna fê tôknè kəbi nì sah yi nda yi wuni nâ a jûŋ. ¹³ Ghɨt ghe a ghɨ nê fêt yi ghɨna a jûŋ kətalò yet yi jûŋì fê kəta təm a ta hi tè jìs gha kum yi bimî ye a ghɨna kəta ha Klistù Jisòs. ¹⁴ Mu nyak ŋwàklù yina ha wò, kəta kə nâ yi kwâktì na mu nè bê yenalò wò, ¹⁵ ma gha yile ki nî na mu lala, ma wò hi khə lum te a ghàhnà kəta hi tè chyə̂ atɨ̂n te sah yi ndâ Fùyènì, a mô ghɨt a bimena Fùyènà fe a fu chyə. Nôn mɨ ghɨ̂n tòkà gha ye a yi mô hamok. Ghɨ tôkà yikî hamok kəbi te tôkù nì chyə a ndâ yè tôkà, fê khɨte ndâ na yì timè hi tâ. ¹⁶ Yi mô kə nâ hamok na bimî yi ghàhnà kətalò gha yi leteni te Yènfù chwùtè banhe, yi ghaka kə ni: Klistù ti ben lyi wu wun wu wûtù, Yohnà Yulena chwûtì na wù mô a jûŋ a Yènfù ashyə̂, Anjèlsu Fùyènsu yen wûn, ghɨ yiki a gha kum wûn lak tù jɨ̀m, ghɨta bimi ha wûn a mbyî, Yènfù lyi kwok nì wûn a nyə̂. Gha a letena a kanana mɨ ghɨ̂n a Klistù ndùku chwûtè ha ghàhnà kum ngɨŋ à wûn mô hamok, nâ wùt bu hi tunhî.

¹ Yohnà Yulena chwùtè banhe na, à bè hì mô a mu tuk mù gòkhemù, ma ghɨt ale tunhi hi bime yikî ye a yi mô hamok kum Klistù Jisòs ma ghɨ hi bɨlà bime yikî yi fəmi ye a yohnù wu be yike. ² Nki tu yikî mi tɨ̂n mô a yike chichàsu fəmsu, kwâktì tu ghɨna tu bu chilichili, ma tu ti kpû hì mô te ghɨ nyok nì wusu. ³ Ghɨt mɨ ghɨ̂n yike à ghɨ̂t na kə ghɨna hi fê malâ fê jîsà na ghɨna hi bama nki tu mwə̀ mù yə̂ mùlè. Biyani ma Yènfù fate mwə̀ mùna na ghɨt a bimena hi yə̂, fo àyòŋnà ha wûn, a ghe a ghɨ mô ma ghɨ ti bimi hamok kum Klistù. ⁴ Nâbi ghə ghe a Yènfù fate mò a jûŋ. Ghɨta kəta wi hi tè tunhi nâ a shyə à mòk wu yu afa ghɨna shihi fî, ghɨ hì chyate fo àyòŋnà ha wûn. ⁵ Mwə̀ mù yə̂ mù mùna mò a jûŋ a Yènfù ashyə̂ beka jə̂mì nì gha Fùyènì ye a yi nê yi ben bakhe atɨ̂n. ⁶ Wò ki yike gha mɨ ghɨ̂n a mu jìsà ni ha ghɨt a bimena, ma wò hi mô kə nâ wut wù fètana wù jùŋ ha Klistù Jisòs. Wò ki khɨte yikî hamok mi yîn, ma yi gamti wò ma yi ni na bimî ya hi tâ. ⁷ Kahi a yi bàm yi màgân mù yîm me a mù bu a jûŋ a Yènfù ashyə̂. Yiki ngɨŋ yâ ma wò hi khə gha yi Fùyènì. ⁸ Wò shìki mômhì hi tè yàŋhè wun wa, ma yi hi kəta kəbi mbì, biyani ma wò ki mômhì hi tè khə gha Fùyènì, ma wò khɨti mbì kə bâh wù jɨ̀m. Yi mô ni beka wò kəta chyə chîn, a Yènfù hì mô ma fu ti chwûnà, ma wò bê fê khɨti kəbi chyə yîn a yû mù jɨ̀m. ⁹ Gha mi yin mò kə nâ hamok, ma wùt wijə hi tunhî. ¹⁰ Ghàhnà nò fê fêtà nì jyaka hi khɨte chyə mi yîn beka ghàhnà lèmà kwâktìnì ha Yènfù fe a fu chyə. A mô wûn a wù bônhè ghɨt à jɨ̀m, fê bônhè ghɨt ghe a ghɨ bime ha wûn hanɨ̂ŋ. ¹¹ Yikî gha mɨ ghɨ̂n ma wò chyàhi ha yi sâk na nâbi nde hi nê gha ye a wò jìsà. ¹² Kə wò de na wùt kehi wò beka wò mò walà. Wò kəta hi tè mò ha ghɨt a bimena ni te chwena a tu lum afa a wò jìsà atɨ̂n. Wo chyə chyəna jûŋà, kôŋà à ghɨ̂t, chwùtè na wò bime ha Klistù fê mô nì yulînì. ¹³ Wo mômhè, taŋa ŋwàklù Fùyèn ha ghɨta, fôktè tum yì jùŋ, fê yike à ghɨ̂t hi tàn shyəma mu bê ben. ¹⁴ Kə wò yìta fo ye a Yohnà a Yulena tì fo ha wò ni te fòktì su chiksu jìsa gha ghe kum wò, nòn à sù chəh a ndâ Fùyèn lem a wo a wò a tû. ¹⁵ Lèm ngɨŋ yâ hi tè nè kwôk kə nì gha ghɨ̂n a mu jìsà ha wò ni, shyəma nâbi nde yen te wò ləma kə nâ atɨ̂n à yì fèt te wùt wù bimena. ¹⁶ Wo tôknè nì chyəna gha, fê tôknè nì lum we a wò yike ghɨta atɨ̂n. Wò shìki nî kə ni, ma Yènfù bonhi wò, ma wù fê bonhi nâ ghɨt ghe a wò yike.

¹ Mu jìsà ha wò na kə wò hi jîsà ha wùt wù ləmâ ha jyak. Wò shihi jìs, wò hi lyê kə nâ wun te bâ. Wò shihi nè yi gha ha wùt wu ləma chyâ wûn, wò hi lyê wûn kə te wâ nâ. ² Wo lyê ywena ghɨ ləmanà kə te nì gha, lyê sù ngòn kə te jâmtù sasu. Wo nê gha mɨ ghɨ̂n ni, kə nì kwâktì yi yuleni. ³ Ghàn hi tôknè nì ywena nkwô ghe a ghɨ kəta wi ghɨta shyəma ghɨ hi tôknè nì ghɨna. ⁴ Biyani, ywê nkwû shìki kəta mwəlà, makə wana wana, wu ni ghɨna yiki hi nè a gha ghe a ghɨt a bimena kəta hi tè nì yi sah yi nda ashyə̂. Yènfù kòŋàlò a wu yu afa ghɨna kahe lâkà be ghɨna makə ne ghɨna. ⁵ Ywê nkwû we a wù kəta wi wùt na wù hi tôknè ha wûn, kəta kə hi lèmà yi kwâktì yi wuni kə ha Yènfù jə̂mà, lona yi gâmtì ha wûn ntuksu nì nchwì. ⁶ Ywê nkwû we a wù mòmhè kə hi tè chyə atɨ̂n à dɨ̀ŋ hì mô ma yohnà a wuna ti kpû nâbi te wù baha gbê. ⁷ Fokti gha mɨ ghɨ̂n ha ghɨna shyəma wùt ha ghɨna hi kəta wi njahi. ⁸ À ki tunhe nâbi nde na yi tòknè wi nì ghɨt a wuna, ma yi hi chwûtè na wù ti tunhî gha ghe a wùt bimena kəta hi tè nì kahi hì bəma chyâ nâ wùt we a wù tà timi hì mô wut wù bimena nâ hakoh. Mu tòkà jîsà nâ ha ghɨt a yi sah yi nda wùt mu wûn. ⁹ Ywê nkwû ki faŋ hi tàn lɨ̂m mtufa, kə wò lyi na wù chinti a nòn a ywena nkwô. À kəta hi tè mò wut ma wù ti malâ kə wu yu wù mòk, ¹⁰ ghɨta khə na wù kəta chyənà yì jùŋ, ma wù ti tôknà kwok nì wana wuna, fê fye ghɨt a benana nâ a jûŋ. À kəta hi tè mò wut ma wù ti gâmtì ghɨt a bimena fî gâmtì ghɨt ghe a ghɨ kəta ngəksu. A kəta hi tè mò wut ma wù ti fî lem ngɨŋ à wûn hì nè fêt tu jûŋ tù kə tu nkì a tu nkì. ¹¹ Kə ghàn chinti ywena nkwû ghe a ghɨ tà ləma tan a leŋ afân a nòn a ywena nkwû beka kwâktì ghɨna làhi lòtì, ma ghɨna nê hi fê khɨŋa hi malâ ma tunhi Klistù, ¹² ma ngək ben ha ghɨna beka ghɨna tà lem jə fah ye a ghɨna lèma ha Klistù. ¹³ Ghɨna gbê làtè, lyê kə ndâ nì ndâ, lêmà kowòŋ, yi fê befa chyâ na ghɨna fê jîsà a ghâ a bu luk wu ghɨna hi tè jìs. ¹⁴ Mu khɨŋa na ywena nkwû ghe a ghɨ tà ləmâ, kahà malâ ma ghɨ bwɨ mwəlà ma ghɨna hi tôknè nì sah a ghɨna sù ndâ shyəma bànà su ghàhnà su hi kəta wi lumu hi tè jìs gha a be kum ghàhnà. ¹⁵ Mu jìsà ni beka ywena nkwû ghɨ le hì mô ma ghɨna ti kahi hì jûmtè yê kə nì Satàn. ¹⁶ À shìki mô nâbi wùni wùt ywên wù bimena makə wùt lɨmà, kəta ywena nkwû a wun yi sah yi nda, wu hi tôknè nì ghɨna. Kə wù lem ngək a ghɨt a bimena a tû. Yi shìki mô ni ma ndâ Fùyèn hi tôknè kwoka kə nì ywena nkwû ghe a ghɨ kəta wi ghɨta shyəma ghɨ hi tôknè nì ghɨna. ¹⁷ Ghɨ kəta hi tè ngumlî, fê lâkà kunte chəh se a su fate nê fêt yi ghɨna, fê fate lâkà yomte ghe a ghɨ fôktè tum yì jùŋ nâ hanɨ̂ŋ, yike à ghɨ̂t, ¹⁸ beka ŋwàklù Fùyèn jìsà na, “Kə wò bè kwuta jwo yi mbòŋì, yi chika a saŋ.” Yì ti fî jis na, “Nâbi wùni wùt wù fètana kəta hi tè kəta maktu wunu.” ¹⁹ Wùt ben hì jîsà yi gha yi be ha wò kum chəh à ndâ Fùyèn, kə wò yuti, a bu kə na wù jis ni, nâ ghɨt ale tok wûn. ²⁰ Chəh à ndâ Fùyèn shìki nê be, wò njaŋ ha wûn kə a ndan shyəma ghɨt ale yû ma ghɨ hi fânà ghaka hi tè boŋa nè be. ²¹ Mu jìsà ha wò nâ nì jyaka, mô a Yènfù ashyə̂ nì Klistù Jisòs nì anjèl se a Yènfù chwokte na, wò fate khɨtè lem gha ghɨ̂n a mu jìsà ni ha wò. Wò shihi nè gha mɨ ghɨ̂n, kə wò hi nê ha ghɨt ale hanɨ̂ŋ nâ hakoh. ²² Kə wò fobli hi lèmà a wo a wùt a tû hi nì na wù hi kpenê hi tè nì yi fêt a ndâ Fùyèn, bu ni ma wò hi chîntè nì wùt àtɨ̂n a wun fùtɨ̂n à gha a be. Mòmhi hi tè mò nì yulînì. ²³ Kə wò hi nyo kə mòlû, wò nyute lùkû shyəma mù gamti yablà me a mù nyàŋhè fo ngə̂k a wò wu là yâ. ²⁴ Ghɨt ale nè a gha a be, ghɨ hi bana a ndan, chwùtè kə nâ na ghɨ hì mô kə nâ shyəma Yènfù sak ghɨna, ghɨt ale nê a gha a be, ghɨ lyê wu yu shyəma ghɨ ban. ²⁵ Yi mô kəbi te ghɨta nè jùŋ, yi nyâŋhì ban a ndan ma yì faŋ nâbi hi bân a wu yu mefû, ma yi nê hi ta shyəma ghɨ lèt jùŋ àtɨ̂n.

¹ Ghɨt ghe a ghɨ fêtà te wu kwôs kəta hi tè ngumli be ghɨna ghɨ fètà shyəma ghɨta hi jîsà wi gha a be kum yi yet yi Fùyènì makə kum a gha ghe a ghàhnà yike. ² Kwôs we a wu fêtà ha ghɨta, a mô ghɨt a bimena kəta wi hi tè kehe ghɨna beka be ghɨna ghɨ fètà mu ghe mò kəbi ghɨt a bimena te ghɨna. Ghɨna kəta hi tè bɨlà fèt nì jyaka beka mbì àtɨ̂n ni yênà ha wùt, a mô wut wù bimena, ghɨna kôŋà wûn. Wò kəta hi fate yike gha mɨ ghɨ̂n ha ghɨna. ³ À hì fê yike nâbi nde gha, a bu a gha ghe a mu fo ha wò, fê chwûtè na gha ghe a ghɨ yike kum Bâba ghàhnà Jisòs Klistù ni mò yi fə̂m, fê tunhe lum te a ghɨ yike na ghɨt a bimena hi chyə atɨ̂n, ⁴ wu hi khə na wù ghaŋhe kə wu wun halô, khə wi nâ gha, təm a wuna bu a jûŋ. Wu khɨŋa kə hi tè gùfnà a gha fê njaŋa ghê ghɨta kum tof ye a yi mô a mu ghalà. Gha mɨ ghɨ̂n ni bènà kə nì ghə̀k nì nô nì ndisu nì kwâktì yi be kum à ghɨ̂t, ⁵ fê bênà nì gùfna ha ghɨt ghe a tof tu ghɨna tu ti têt, ghɨna fê khə wi gha ye a yi mô hamok. Ghɨna kwâktè na gha Fùyènì mò lum wu ka ha ghɨna. ⁶ Yi mô hamok na gha Fùyènì làhi nì na wùt hi mô wùt wù chìk, kəta gha a jûŋà a wun a yi təm, kə wu yu afa wù kəta wi se a fwona. ⁷ Beka ghàhnà tà tì ben jə nì shyə ale a mbyî afân, bu hi bè shihi lò hi lyè a shyə ale. ⁸ Ghàhnà shìki kəta njusu nì shyə a yəna, kə ghàhnà hi fê fo ngə̂k ha ngɨŋsu ghàhnàsu. ⁹ Mômhìnì bènà ha ghɨt ghe a ghɨ nyiŋa yi bàm wu kâ. Ghɨna lye yi mòmhì afân, tama kwo ghɨna, ghɨna faŋ hi khɨŋa kə mwə, mu kəta wi fêtì biyani bobhe kə yi bobhî ghɨna, ghɨ be ghaŋ a ghâ ghɨ kpu kə yi bàm yi mwə̀ afân. ¹⁰ Ghɨt ghe a ghɨ kôŋà ka nyàŋhè lye lò a be. Ghɨt ale ti nyɨŋ chyâhì yi bàm atɨ̂n, mâkà yi bimî yi ghɨna hì kəta sù ngə̂k a ghɨna təm, su dô kə ni. ¹¹ Wùt à Fùyèn, kəta hi tet a kahi a yi bàm yi gha afân. Wo bɨlà mômhè hi tè mò chilichili, fate khɨte gha Fùyènì, kəta yi bimî ha Klistù, kôŋà à ghɨ̂t, mômhè hi tè kwut yi təm fê chyə̂ nì yutìnì ghàn à ghɨta. ¹² Mômhè fêtà nâ nì jyaka hi khɨte yi bimî ya te wut we a wù nyɨŋa yə shyəma wò bê khɨti chyənà ye a yì bè mê wi. Yin ni mò chyənà ye a Yènfù tì toŋa wò na wò khɨti, te wò tì time a ghɨta ashyə̂ jis a ndan na wò ti bimî ha Klistù nâ nì təm gha à jɨ̀m. ¹³ Mu jə̀mà na Yèn fe fu nê na mwə̀ mù jɨ̀m hi mô nì Klistù Jisòs we a wù tì time a Bontiyùs Balèt ashyə̂ jis hamok hi chwùtì yi bimî yi wuni, na ghɨna hi mô te bɨ̀n à sak a gha afân. ¹⁴ Wò lem sak yîn a mu chyàhe ha wò kə hamok hi bè tàn shyəma Bâba ghàhnà Jisòs Klistù bê kahà ben. ¹⁵ Bên yi wuni yîn hì mô ma Yènfù ti fati lem yu tɨnu. A mô Fùyèn fe a ghɨta kokhe, a mô kə wûn we a wù saka mbyî yì jɨ̀m, a mô wûn fə̀n à tùfə̀n, fê mô Bì ha Bâba, ¹⁶ bu hi bè kpû, chyə a fùtɨ̂n à yi ban afa a wùt bu hi yàhè a se a wuna hi kî. Wùt tà timi yen jə Yèn fûn, bu hi bè yên. Ghɨta kəta hi tè kokhe wûn. Wù saka mbyî yìna nâ nì jyaka a yû mù jɨ̀m! Àmèn. ¹⁷ Chyàhi te yi sâk ha ghɨt ghe a ghɨ kəta ghak yi mwə̀ mù mbyî, na kə ghɨna hi jala makə lêmà kwâktì tu ghɨna tu a mwə̀ mù chyàlamù afân. Jìs na ghɨna hi bɨlà lêmà kwâktì yi ghɨna kə ha Yènfù a fe a fu fo nâ mwə̀ mù jùŋ mù jɨ̀m me a ghàhnà kəta. ¹⁸ Jìs na ghɨna hi nê gha a jûŋà, fê mô à ghɨ̂t kpenê, tohne a gha afa a ghɨna nè, mômhè fo fihe, fê jyâtè mwə̀ me a ghɨna kəta ghê ghɨt ale. ¹⁹ Ghɨna shìki nî ni, ma ghɨna hi lêmà chyə a ndâ ha ngɨŋsu ghɨna su, ghɨ tâ kə ni ma ghɨ bê hi kəta chyənà ye hamok a yì be mê wi. ²⁰ Timotì, wo fate tôknè nì nâbi ghə ghe a Yènfù tì fo ha wò. Kə wò hi yute jîs ye yi fo wi kokhînì ha Yènfù. Kə wò hi gûfnè gha a ngwò ghe a ghɨta jɨŋtena gùfnè, jîsà na à mò a gha tofana. ²¹ Beka ghɨna hì mô ma ghɨna ti chwûtì na ghɨna tofalò yità lumu hì bime wi yikî ye a yi mô hamok kum Klistù. Bâba chwuti təm a wuna ghɨ jûŋà ha ghàn.