1 Tèsàlonikà

¹ À nyàk mu Bôl, nì Silàs nì Timotì ŋwàklù yìna ha ghàn, nôn a ghɨt a bimena ghe a ghɨ mô a yi tèk yi Tèsàlonikà. Ghàn mô ghɨt a Fùyènà a Bì ha ghàhnà nì Bâba Jisòs Klistù. Yènfù chwuti təm a jûŋà ha ghàn ma wù ni ma ghàn hi chyə nì yutìnì. ² Ghàh fo àyòŋnà ha Yènfù kə yû mù jɨ̀m fê jə̂mà toŋte a yet ghana. ³ Ghàh shihi jə̀m ha Yènfù, a Bì ha ghàhnà, ghàh hi kwâktè te ghàn nè fêt yi jûŋì njwo ghàn bime ha Bâba ghàhnà Jisòs Klistù fê kwàktè te ghàn chehì fêtà nâ nì jyaka njwo ghàn kòŋà wûn. Ghàh fê kwâktè te ghàn yute wûn, khə kə nâ na wù bè kaha bênàlò. ⁴ Wana ne, ghàh khəlò na Yènfù ti koŋ ghàn, chwok ghàn na ghàn hi mô ghɨt a wuna, ⁵ njwo ghàh tà tì yiki jə tum yì jùŋ kum Jisòs Klistù ha ghàn kə a tô yi jwô. Ghàh tì chwûtì gha kanana ghe Yohnà Yulena ne ha ghàn. Ghàh ndùku jîsà a gha, khə kə nâ na ghɨ mô hamok. Ghàn khəlò te ghàh ndùku chyə a ghàn a fùtɨ̂n. Chyəna mɨ ghɨ̂n ndùku mô hi nì na ghàn yiki gha. ⁶ Nâ ghàn tî sina chyənà yahì fî sina chyənà Bâba. Nâbi te ghàn ndùku yena ngə̂k nâ haŋaŋ, Yohnà Yulena ben ni ghàn fyi tum àtɨ̂n nì saŋlînì. ⁷ Kum ni, ghàn kahi hì mô te chwena ha ghɨt a bimena a Màsìdoniyà nì Àkayà. ⁸ Ghàn ti nî ghɨta fati yu tum à Bâba a Màsìdoniyà nì Àkayà fî yû kə luktu tù jɨ̀m na ghàn ti bimi ha Yènfù, nâ ghàh fè kəta wi gha hi fè jìs ha wùt. ⁹ Ghàh khə na ghɨt mɨ ghɨ̂n tì yû beka ghɨna ndùku jîsà kum te ghàn tì fye ghàh nâ wu lum wu jûŋù te ghàh bèna hi jikte ghàn, fî fôktì te ghàn ti de mosòmù hì fêtà kə ha Yèn fe a fu chyə fê mô hamok. ¹⁰ Ghɨna fî fôktì te ghàn yute na Wâ Fùyèn bè kaha bênàlò a nyə̂. Jisòs Wâ Fùyèn mu wùna ni mò ma wù tî nî wù lôtì a yi kpû. Wù ti bônhì ghàhnà na kə Yènfù bê fo ngə̂k ha ghàhnà wu tuk wu saku.

¹ Wana noma, nâ ghàn, a ghàn a sù ngɨŋ khə na bên ye ghàh tì bèna hi jikte ghàn yâ tà tì ləhà jə halô. ² Ghàn khə na à ndùku mô nâ shyəma ghàh ben a Tèsàlonikà ma ghàh ti yen ngə̂k nâ haŋaŋ, ghɨ fî sûlì ghàh nâ a jûŋ a yi tèk yi Fìlibây. Yènfù ghàhnà fu ni na ghàh fokti tum yì jùŋ ha ghàn ma yì lo ha wûn nâ nì təm a ta, nâbi te ghɨta ndùku baha kôŋà wi hi yutî. ³ Bên yahi mi yîn tà ləhà jə halô beka ghàh tà tì jah jə hi chyate na ghàn fyi tum yì jùŋ mi yìna. Ghàh tì chyati ghàn nì kwâktì yi jûŋì, mômhè wi hi lehe wût. ⁴ Ghàh bɨlà jîsà kə te Yènfù khɨŋa beka fu ti chwok ghàh na ghàh hi fôktè tum yì jùŋ mi yìna, ghàh fôktè wi wu lum afa ghɨta khɨŋa. Ghàh fòktè hi nì na Yènfù hi saŋlê beka fu khəlò təm ghaha. ⁵ Ghàn khəlò na ghàh tà tì ben jə ha ghàn hì jîsà na ghàn hi saŋlê. Yènfù khəlò kə nâ hamok na ghàh ndùku fôktè wi tum yì jùŋ ha ghàn na ghàn fo shyə ale ha ghàh. ⁶ Ghàh ndùku nê wi gha na wùt ha ghàn, makə nâbi nde hi bəmhe ghàh. ⁷ Ghàh ndùku làhi tè bufa mwə̀lû ha ghàn te ghɨt ghe Klistù tuma biyani ghàh bonhi china kə moŋ. Ghàh ndùku mô ha ghàn ni te nè wan a wu yu afa wù lè wana wuna. ⁸ Ghàh tì fòkti tum yì jùŋ ha ghàn ma à fo Fùyèn, kum yi kôŋ yi nè wani mi yina a ghàh ndùku kəta ha ghàn, fî mômhì nâ tu lum tù jɨ̀m hi gàmtè ghàn beka ghàh ndùku kôŋà nâ jûŋ. ⁹ Wana ne, ghàn khəlò kə nâ te ghàh ndùku fêtà nâ nì jyaka. Ghàh ndùku fêtà nchwì fêtà ntuksu njwo ghàh ndùku kôŋà wijə hi fo ngə̂k ha ghàn te ghàh fòktè tum yì jùŋ mi yìna ha ghàn a Yènfù fo na ghàh fokti. ¹⁰ Ghàn mô bɨ̀n à sak a gha afa ghàh chehì nê, nâ Yènfù fê khə. Ghàh chehì nê a gha ha ghàn te ghɨt a bimena, ghɨ mô kə chilichili, yulê, kəta wi njahi. ¹¹ Ghàh chehì khɨte ghàn kə te bè wan khɨte wana wuna, ¹² chyate ghàn na ghàn hi kəta təm a ta, chyə chyənà ye a Yènfù kòŋà. Wù toŋa ghàn na ghàn bê chìnti wu lùk wu wunu wu fə̀nù ma boŋà khɨti ban yi chiki. ¹³ Ghàh fo àyòŋnà ha Yènfù kə yû mù jɨ̀m beka à ndùku mô te ghàh bèna hi fòktì tum ye a Yènfù jìsà na ghàh bê fokti ha ghàn, ghàn yû bimilò, na à mò tum ma yì lo kə nâ ha Yènfù, a bu ha wùt. Tum mi yìna ndùku fêtà a ghàn a fùtɨ̂n ghɨt a bimena. ¹⁴ Wana ne, a gha afa ghɨ ndùku gânà ha nôn a ghɨt ghe a ghɨ bime ha Klistù Jisòs a Jùdiyà ti gan kəbi ha ghàn. Ghɨta a ghàn a yi lak tì fo ngəksu ha ghàn, a mô kəbi ngək se a ghɨt a Jûs tì be fo ha ghɨt a bimena mu ghê. ¹⁵ Ghɨt a Jûs ghɨ le tì ywiti fòktì su chiksu, ghɨ le ywi Bâba Jisòs, fî jim fihi ghàh a tu tèk. Ghɨna nî na lâ Fùyènù hi bâŋà, fê mô sù bànà nâbi ha nde, ¹⁶ a wu lum na ghɨna chehì mômhè hi tàhì na kə ghàh fokti tum yì jùŋ ha tumu shyəma yì ni ma Yènfù bonhi ghɨna. Ghɨna ti ni kə besu ni su ti kwok kpên. Lâ Fùyènù ti bâŋ, Fu hì mô hi chwùtè gha ha ghɨna chîn! ¹⁷ Ghàh ni khɨŋa hi jìs a wana ne ghaha na, à ndùku mô te ghɨt ale ne na ghàh lo de ghàn a fu yulâ ni, ghàh lo kə nì wun yahi biyani təm mâhù faŋ hì kwâktè kə ghàn. Təm mâhù ndùku fê kwola wi a jûŋ kum ghàn, ghàh hì mômhè nâ nì jyaka hi kaha bèn hi yen a ghàn. ¹⁸ Ghàh chehì kəta kə nâ hi kaha bèn hi yen a ghàn, nâ mu mômhì hi tân a ghan à bà biyani, Satàn tê dè na ghàh ben. ¹⁹ Mu ndùku khɨŋa hi bèn ha ghàn njwo à mò ghàn ghe a ghàn ne na ghàh hi kəta kwâktìnì fê nê ghàh saŋlê, mô hi bè tê jâl kum shyə ghe a ghàh ni ke hi bè khɨti a wu yu afa Bâba ghàhnà Jisòs kaha bênà. Ba shyə atɨna ni mò kə nâ ghàn? ²⁰ Hamok, à nè kə nâ ghàn na ghàh hi jala fê saŋlê.

¹ À ndùku mô te ghàh yena na ghàh wi hi fè kwut a təm hi tè mò yena wi ghàn, ghàh ki lêm na ghàh nè faŋa ma ghɨ hi chyə a tèk yi Atèn, ² ghàh chinhi wâ nì wâhù Timotì we a wù fètà ha Yènfù ghàh à wûn, fòktè tum yì jùŋ kum Klistù. Ghàh tum na wù bê ni ma ghàn hi kəta təm a ta, tôkà samhe ha Klistù, ³ hi fè nì na kə wùt ha ghàn nê hi fê samhe wi ha Klistù kum ngə̂k ye a ghɨta ndùku fo ha ghàn. Nâ ghàn khəlò na à ni Fùyèn na ghɨta hi fo ngə̂k mi yina ha ghàhnà. ⁴ Ghàn khəlò gha tɨni beka à ndùku mô te ghàhnà baha mô amok, ghàh fôktì ha ghàn kə wu tuk afu na, ghɨ bè folò ngə̂k ha ghàhnà, yi che kpen kə ya te nâ ghàn khə. ⁵ A ni mò gha ye a yi che ne mu chinhi Timotì. Mu che chinhi na wù bê yen nâ ghàn tòkà samhelò ha Klistù agha beka mu ndùku wi hi fè kwut a təm hi tè chyə̂, khə wi na à gànà ghə ha ghàn agha. Mu chehì kwâktè kə na deblì làhi tè mò ma yì ti mômhì ghàn, fêt yi ghàhnà ləhà halô. ⁶ Timotì ti kaha ben chin fôktì gha yi jûŋì ha ghàh na ghàn baha samhe kə ha Klistù, fê kôŋà ghɨt ale. Wù ti fî jis na ghàn kwàktè ghàh nâbi wùni yu, ghàn hi saŋle kə ni, kôŋà hi yen a ghàh kəbi te ghàh à wûn kòŋà hi yen a ghàn. ⁷ Ghàh saŋle kə ni kum ghàn beka gha yi jûŋì mi yina a wana ne ghaha, nâbi te ghàh à wûn yena ngə̂k nâ a be. Lum we a ghàn samhe a Klistù atɨ̂n nè ghàh saŋle kə ni. ⁸ Ghàh ni saŋle hi tè chyə chin fê fânà wi beka ghàn ti faŋ hì chyə kə ghàn à Bâba kə a shyə̀ àmòk. ⁹ Ghàh à wûn fo àyòŋnà ha Yènfù ghàhnà fu kum ghàn, fê fô kum saŋlî ye a fu ne na ghàh hi kəta kum ghàn. ¹⁰ Ghàh lona ha funfu nâ yû mù jɨ̀m nì təm ghaha à jɨ̀m na fu ni ghàh à wûn yena kə nâ ghàn ma ghàh fo gha ye a ghàn baha khɨŋa hi khɨlî a ghàn a yi bimî ha Klistù. ¹¹ Ghàh jə̀mà na Yènfù ghàhnà fu, a Bì nâ ha wun a ngɨŋ ghê Bâba ghàhnà Jisòs ni na kə gha yile tàhi na kə ghàh à wûn bê yen ghàn. ¹² Bâba nê ni ma ghàn ləma atɨn à yì kòŋ ma ghàn hi tôkà kôŋà ngɨŋ sanisu fê kôŋà ghɨt à jɨ̀m kəbi te ghàh kòŋà ghàn. ¹³ Ghàn skìki nî ni, ma wù ni ma təm ghana hi tâ shyəma ghàn hi kəta wi be, ma wùt bê hi kəta wi gha hi jìs kum ghàn a Yènfù ashyə̂, a Bì ha ghàhnà, wu yu afa Bâba ghàhnà Jisòs kaha bena ghê ghɨt a wuna yulena.

¹ Wana ne, à ni faŋ ghɨn shyəma mu jis à mihi ha ghàn. Ghàh ti yiki ghàn, ghàn ghɨ hì khə lum we a ghàn kəta hi tè chyə atɨ̂n hi tè nì na Yènfù hi saŋlê, a mô a gha ma ghàn hì nêlò. Ghàh chyate ghàn chin nâ haŋaŋ, a Bâba Jisòs a jyak na ghàn fê nê chya nâ ni. ² Ghàh ni chyate ni beka ghàn hì khə gha ghe a ghàh tì yike ghàn. Gha mɨ ghɨ̂n mô ma ghɨ lo ha Bâba ghàhnà Jisòs. ³ Yènfù khɨŋa na ghàn hi chyə chyənà ye a fu khɨŋa, ma fu ni khɨŋa na, kə wùt ha ghàn nê chyə nì ywê wùt makə ghê lɨm à wùt nâ hakoh, ⁴ fê kôŋà na nâbi wùni wùt wù lɨmà hi khə hi fate khɨte ywê wûn wu lum afa Yènfù kòŋà, ghɨta boŋa kôŋà. ⁵ Wùt kəta wi hi tè nyàblì nì ywê wûn wu lum tu gha njyàsu wùnsu te ghɨt ghe a ghɨ khə wi gha ye a Yènfù khɨŋa na ghɨ hi nê. ⁶ Mu jìsà na kə wùt ni gha yi be yile hi yikte wùt wù bimena wùlè a gha afân nâ hakoh. Ghàh hì mô ma ghɨ ti jis gha ghɨ̂n ha ghàn, ghàh ghɨ hì fê jîsà chîn nâ nì jyaka na, Bâba bè folò ngə̂k ha ghɨt ghe a ghɨ chyə chyənà yi be mi yina, ⁷ beka Yènfù tà tì toŋa jə ghàhnà na ghàhnà fwo ben ma hi chînà chyə kə yi chyə̂ nì ywena makə nì lɨmànà. Fu tì bɨ̀li toŋa na ghàhnà fwo ben ma ghɨ hi chyə te ghɨt a wuna. ⁸ À shìki tunhe nâbi nde gha ye a ghàh yike, ma wù hi tunhe Yènfù te fu fo Yohnà a Yulena ha ghàn, tunhe wi wùt. ⁹ Mu yena na ghàh kəta wi hi tè fê nyàk yi gha ha ghàn kum lum we a ghàn kəta hi tè kòŋà ghɨt a bimena ghɨ le atɨ̂n. Nâ Yènfù nì ngɨŋ à wûn ti yiki lum we a ghàn kəta hi tè kòŋà ngɨŋ sanisu atɨ̂n. ¹⁰ Ghàn hì mô ma ghàn ti chwûtì kôŋ mi yina ha wana ne ghana à jɨ̀m a yi lak yi Màsìdoniyà, ghàh chyate ghàn a wana ne ghaha na, ghàn hi kôŋà chyâ nâ ni. ¹¹ Ghàn momhi nâ nì jyaka ma lem na wùt ha ghàn bè shìkà wi njaŋi wu lùk. Kə ghàn hi lye ghɨta a ghâ. Ghàn hi fêtà nì wo wanu hi khɨte mwə̀ me a ghàn khɨŋa. Ghàn hi nê kə te ghàh ndùku jîsà na ghàn hi nê. ¹² Ghàn shìki nî ni ma ghɨt ghe a ghɨ bu ghɨt a bimena ma ghɨ hi ngumle ghàn, ma ghàn hi yə kə kum yukhà a ghana, ke wi wùt. ¹³ Wana ne, ghàh khɨŋa na ghàn hi khə gha ye a yi mô hamok kum ghɨt ghe a ghɨ tì kpute. Ghàh ni khɨŋa na ghàn hi khə gha mi yina shyəma ghàn hi jyə̂ wi te ghɨt ale ghe a ghɨ kəta wi kwâktìnì na ghɨta bè lôtèlò a yi kpû. ¹⁴ Ghàhnà bimelò na Jisòs tî kpû kahi lôtì a yi kpû, fê bime na Yènfù bè nêlò ma Jisòs lyi ghɨt ghe a ghɨ tì shihi kpû ma ghɨ ti bime ha wûn a mbyî, ma ghê ghɨna hi chîntè mô amok. ¹⁵ Gha ye a ghàh yike ha ghàn ni mò kə yi gha ye a Bâba tì yike. Ghàhnà ghe a ghɨ baha mô bè yênà wi ashyə̂ ha ghɨt ghe a ghɨ kpute hi kwònà nì Bâba wu tuk afa a wù kaha bênà. ¹⁶ À bè hì mô wu tuk afû, ma Bâba nâ nì ngɨŋ à wûn chwo ben a nyə̂, ma wù fo saki, ma anjèl à Fùyèn yi chik jis, ma ghɨta fê yu te ghɨ toŋa soŋ yi Fùyènì, ma ghɨt ghe a ghɨ tì shihi kpû samhe Klistù kaha loti a yi kpû ashyə̂. ¹⁷ Yènfù bê lyi ghɨna nâ nì ghàhnà à jɨ̀m ghe a ghɨ baha chyə, ma ghɨ yê kwona nì Bâba a sù mbàk a nyə̂, ma ghàhnà nì wûn faŋ à kə amok a yû mù jɨ̀m. ¹⁸ Kum ni, ghàn hi fôktè gha mɨ ghɨ̂n a ghàh nyàka ni hi nì na təm mù wana ne ghàhnà hi saŋlê.

¹ Yi kəta wi nâbi fêt yile shyəma ghàh nyak à fokti ha ghàn a wana ne na à mò wu tuk makə wu yu we a Bâba bè kaha bênà atɨ̂n. ² Ghàh jìsà ni njwo nâ ghàn khəlò a ghàn a sù ngɨŋ na, tuk we a Bâba bè kaha bênà atɨ̂n bè kpenalo, wùt khə wi, kəbi ni te wùt wù chwoŋana yè bênà ntuksu. ³ Ghɨta bè hì jîsà na, “Yutìnì làwû, ngə̂k wijə,” ma ngə̂k bûŋhè ben ha ghɨna bəma kə ni kəbi te yi nê hi mô ha wùt ywên wu yu wu bwənu. Nâ wùt bè teta wi. ⁴ Ghàn mò ni a wana noma bu te ghɨt ghe a ghɨ chyə atɨ̂n à yi fîn shyəma Tuk wu Bâba mu wuna bê buŋhè ben ha ghàn ni te wùt wù chwoŋana, ⁵ njwo nâ ghàn à jɨ̀m chyə chyənà yì jùŋ te ghɨt ghe a ghɨ nê gha chwì banâ. Ghàhnà nè wi gha ni te ghɨ nê a lèt makə a bɨn a finana. ⁶ Te gha tɨni hì mô ni, ghàhnà kəta wi hi tè chìnà bwuni kə ni te ghɨt ale, ghàhnà kəta hi tè bɨlà mô, gbûtè fê khɨte ngɨŋsu ghàhnà su, ⁷ beka ghɨta yè bwune kə ntuksu, ale nyô, mu lûk mu kwo ghɨna kə ntuksu. ⁸ Ghàhnà hi bɨlà nê gha chwì banâ. Yi ni chwùtè na ghàhnà kəta hi tè khɨte sù ngɨŋ. Ghàhnà kəta hi tè samhe Fùyèn, hi tè kòŋà wûn, kôŋà ghɨta shyəma yi hi chwûtè na ghàhnà ti mak kôŋì nì bimînì yina te shyə hi khɨ̀ŋtè wu wun wu ghàhnà atɨ̂n, na kwâktì ye a ghàhnà kəta na Yènfù bè bônhèlò ghàhnà hi mô te shyə te ghàhnà so hi khɨ̀ŋtè tu ghàhnà nì ghɨna. ⁹ Ghàhnà kəta hi tè khɨ̀ŋtè ni beka Yènfù tà tì chwok jə ghàhnà afân hi fo ngə̂k ha ghàhnà. Fu tì ni ni shyəma Bâba ghàhnà Jisòs Klistù bonhi ghàhnà. ¹⁰ Wù tî kpû kum ghàhnà shyəma ghàhnà nì wûn bê hi mô amok a wu yu afa wù kaha bena, makə ghàhnà mò wu tâ, makə ghɨ ti kpû. ¹¹ Kum ni, mu wu hì jîsà na, ghàn hi fo təm a ta ha wana ne ghana, gâmtè ghɨna nâbi te ghàn hì gâmtè kwoka kə nâ chîn. ¹² Wana ne, ghàh chyate na, ghàn hi fate ngumle ghɨt ghe a ghɨ fêtà a ghàn a fùtɨ̂n ni te wu tû a nòn a ghɨt a bimena. Ghɨna tihe ghàn fê tôknà nì ghàn. ¹³ Ghàn hi kôŋà ghɨna fê ngumle ghɨna nâ a jûŋ kum kə gha à jɨ̀m afa a ghɨna nè ha ghàn. Ghàn hi mô nì yutìnì kə yû mù jɨ̀m. ¹⁴ Ghàh chyate kəbi ghàn a wana ne na, ghàn fo tobhînì ha ghɨt ghe a ghɨ kòŋà wi hi tè fèt, ma ghɨ nî na ghɨna hi fêtà kəta təm a ta, ghàn gâmtè ghɨt ghe a ghɨna khɨŋa gâmtìnì. Ghàn hi kəta wunhînì nâbi ha nde. ¹⁵ Kə wùt ha ghàn hi fîsè be nì be, ghàn hi mômhè hi tè nè gha a jûŋà ha ngɨŋ sanisu, fê nê ha ghɨt à jɨ̀m. ¹⁶ Ghàn hi mômhè hi tè saŋlî kə yû mù jɨ̀m, ¹⁷ jə̂mà ha Yènfù kə yû mù jɨ̀m. ¹⁸ A ne gan nâbi ghə, ghàn hi fo kə àyòŋnà ha Yènfù. A ni gha ghe a Yènfù khɨŋa na ghàn hi nê beka ghàn à Klistù Jisòs mò amok. ¹⁹ Kə ghàn hi tàhè fêt ye a Yohnà Yulena nè a ghàn a fùtɨ̂n, ²⁰ makə tunhe tum ye a ghɨta fòktè ha ghàn ma yì lo ha Yènfù. ²¹ Ghàn hi bɨlà fate kine nâ gha à jɨ̀m hi yen nâ, ghɨ lo kə nâ ha Yènfù agha. Ghàn yen ghɨ mô hamok, ghàn bimilò, ²² ghàn yen ghɨ bu hamok, ghàn tunhilò. ²³ Yèn fe a fu fo yutìnì ha ghàhnà ni ma ghàn hi mô nì yulînì nâbi wùni lumu, ghàn lem chyənà yanì nì yohnà ghana nì wun wanu, ma wùt bê tè ngane jə̀ ghàn a yi gha nâ hakoh wu tuk afa a Bâba ghàhnà Jisòs Klistù kahà bênà. ²⁴ Yènfù tì toŋa ghàn na ghàn hi mô ghɨt a wuna, ghàh khə na ghàn hi mô kə yâ beka fu tà timi jis jə gha, faŋ hi nì. ²⁵ Wana ne, ghàn hi jə̂mà ha ghàh. ²⁶ Ghàn toŋti wana ne nâ à jɨ̀m kə nâ wu lum afa yi chwûtè kôŋ yi ghɨt a bimena. ²⁷ Mu chyate ghàn a Bâba a jyak na ghàn taŋ ŋwàklù yina ha ghɨt a bimena nâ à jɨ̀m. ²⁸ Bâba ghàhnà Jisòs Klistù chwuti təm a jûŋà a wuna ha ghàn.