1 Bità

¹ À nyàkà mu Bità, a wut wù tum ha Jisòs Klistù ŋwàklù yina ha ghàn ghɨt a Fùyèn ghe a fu chwokte, ma ghɨ ti jum fihi ghàn waŋhi kat a yi lak yi Lûm, a bàh wu Bontùs nì Gàlesiyà nì Kàbàdosiyà nì Esiyà nì Bìtinìyà, ghàn chyə atɨ̂n biyani chyâ wu lûm. ² Yènfù, a Bì ndùku hì mô ma wù ti lem hi chwokte ghàn te ghɨt a wuna ghɨ yulena tohne yi fèt yi Yohnà Yulena. Fu ni ni shyəma ghàn hi ywo Jisòs Klistù, luŋ mù wûn sô ghàn. Yènfù chwuti təm a jûŋà ha ghàn nâ haŋaŋ ma wù fo yutìnì ha ghàn. ³ Ghàhnà hi kokhe Yènfù, Bè Bâba ghàhnà Jisòs Klistù! Wù ti kwohi seni ha ghàhnà nâ haŋaŋ fo chyənà yì fê ha ghàhnà wu lum na wù ti lôhì Bâba Jisòs Klistù a yi kpû, ghàhnà ghɨ hì chyə khə hamok na ghɨ bè khɨtelò chyə ye a yi bè mê wi; ⁴ ma fê khɨti ghaki a nyə̂ te Yènfù lèma, yi bu hi fwɨ̀, bu hi bêf, ma yi wi hi kwunâ. Ghak yina mô ha ghàn ghe a Yènfù kine. ⁵ Yènfù kine ghàn nì jyak ghe a fu kəta kum yi bimî yani, ghàn mô hi bè khɨte bôn ye fu gbûtè hi fo ha ghàn a gòkhi à mbyî. ⁶ Ghàn hi saŋle lê kum a gha mɨ ghɨ̂n nâbi te à mò chin ghàn kəta tu mômhì kə a tu lum, a tu lûm. ⁷ Mômhì tɨ̂n bènà ha ghàn, nê na ghɨta yen à khɨli na ghàn kətalò kə nâ kàntè yi bimî. Ghɨ boŋa mômà gûl nì wusu nâbi te a mò a shyə kokne chema wi te yi bimî, yi mô hi bêf. Yi ni chwùtè na, ghɨ kəta kəbi hi tè mòmà yi bimî yani beka à mò a shyə kokne chyâ gûl shyəma à bê hì mô wu tuk afa a Jisòs Klistù kaha bênà, ma Yènfù yen à khɨli ghàn, ma wù bəmhi ghàn ma wù fê fo ghak yi wuni ha ghàn. ⁸ Ghàn kòŋàlò wûn nâbi te ghàn tà timi yen jə wûn, ma ghàn ti fî bimi ha wûn, yena wi nâbi wûn chîn. Ghàn saŋle nâ haŋaŋ, wu lum wu kana wule a wùt wi hi tè fòktì. ⁹ Ghàn saŋle ni beka Yènfù ti fo bônì ha ghàn, a mô yi gha ye a ghàn bime kum yini. ¹⁰ Fòktìsu chiksu ndùku mô ma su ti jîs kum tôknà yi kanani mi yîn a Yènfù ndùku bakte lêmà ha ghàn ni. Ghɨna ndùku fate khɨŋa kə yi khɨ̂ŋ hi tè khə gha kum bôn mi yîn, ¹¹ fê khɨŋa na Yohnà a Klistù ghe a ghɨ mô ha ghɨna chwùti yu nì lum we a Klistù ndùku mô hi bè yena ngə̂k, hi fè chwùtè jyak a wuna. ¹² Yènfù ti chwûtì banhi ha fòktìsu chik mu sîn na ghɨna ni fòktè tum yina fêtà wi ha ngɨŋsu ghɨnasu, na ghɨna ni bɨlà fêtà ha ghàn. Yènfù hì mô ma fu ti chinhi Yohnà Yulena ha ghɨta ma ghɨ lo a nyə̂, ghɨ fôktè a gha mɨ ghɨ̂n ha ghàn tohne a tum yì jùŋ, a mô a gha nâbi anjèlsu Fùyènsù kôŋà hi tè khə. ¹³ Ghàn fati lê ngɨŋ sanisu ma hi gbùtè hi nè yi fêt ye Yènfù khɨŋa. Ghàn hi fate khɨte ngɨŋ sanisu, lêmà kə kwâktì yani a yi yùtì afan a Yènfù mò hi bè fo ha ghàn wu tuk afa Jisòs Klistù kaha bena. ¹⁴ Ghàn hi ywo ha Yènfù te mwəlà mù wûn. Kə ghàn hi fê nê gha ghe a njyàsu wùnsu chehì khɨŋa na ghàn hi nê te ghàn baha mô khə wi Yènfù. ¹⁵ Ghàn khə na Yèn fe fu chwokti ghàn na ghàn hi mô ghɨt a wuna yule lò. Ghàn hi boŋa yule lê a ghàn a sù chyənà, ¹⁶ kə yi ghəl te ghɨ tì nyàka a ŋwàklù à Fùyèn na, “Ghàn hi chyə chyənà su yulesu beka mu yule.” ¹⁷ Ba ghàn shihi jə̀m ha Yènfù, ghàn hi toŋte wun na Bâba, a mô wûn we a wù saka ghɨt à jɨ̀m, saka ni, saka nâbi nde kə yi ghəl. Yi ni chwùtè na ghàn kəta hi tè ngumle wûn nâ haŋaŋ te ghàn chyàlà a mbye afân. ¹⁸ Ghàn khə na Yènfù ti yun fihi ghàn ha chyənà yì mwu afa a bì ghana ndùku chyə. Yènfù tà tì yun jə ghàn nì shyə ni te wu kâ wu mô hi bêf. ¹⁹ Fu tì yun ghàn kə nâ nì luŋ mù Klistù, a mô mu luŋ kəta a jyak. Klistù ni mò ni te Wâ Njyə̀, wu kəta wi lata nâ hakoh. ²⁰ Yènfù ndùku hì mô ma fu ti chwok wûn lemlò shyəma fu fati mbyî, hì mô ma fu ti chwûtì wûn a mu tuk mù gokhena afân ha ghàn a jùŋ. ²¹ A mô beka Klistù mu wûn a ghàn bime ha Yènfù a fu tì lòhe wûn a yi kpû, lem wûn a wu lùk wu ngaŋtenu, gha tɨni nî, ghàn ghɨ hì kəta bimînì fê ke yênà kə ha Yènfù. ²² Ghàn hì mô ma ghàn ti su yuhi təm ghana beka ghàn ti yu gha Fùyèn ye a yi mô hamok hì kôŋà ngɨŋ sanisu. Ghàn hi kôŋà lê ngɨŋ sanisu kə nâ hamok nì təm à jɨ̀m. ²³ Ghàn kəta hi tè mò ni beka ghɨ ti kahi bwɨ ghàn a fê tohne yi gha yi Fùyènì afa a yi chyə ma yi ti faŋ kə hamok. À tà bwɨ jə wùt ghàn wu mô hi kpû. ²⁴ Yi mô kə yi ghəl te ghɨ nyaka a ŋwàklù Fùyèn na: “Ghɨt à jɨ̀m mò kə ni te wu wəlâ a ghə̀n, jwôf yi ghɨna mô kə ni te wu bwùs a ghə̀n. Bwùsà kpû, bwùsà yatàlò, ²⁵ biyani gha Bâba yi mô ma yi ti faŋ kə hamok.” Yìna mò tum yì jùŋ ye a ghɨ tì fòkte ha ghàn.

¹ Yènfù hì mô ma fu ti fo chyənà yì fê ha ghàn. Ghàn maka lê təm a be nì lehenì nì kama nì, nì ghə̀k nì jîs yi be. ² Ghàn hi bɨlà mô kə ni te mwəlà mù bot, mô yu mù jɨ̀m khɨŋa kə hi tè nyoŋ a yi ghə̂n, a mô yi gha yi Fùyènì, shyəma ghàn faŋ à hi ləma kə yi ləmâ nâ shyəma ghàn bê khɨtè mihi bônì. ³ Ghàn kəta hi tè nì kə ni beka ghàn hì mô ma ghàn ti yen a ghàn a sù chyənà na Bâba tòknèlò. ⁴ Ghàn bê bakhi ha Bâba Jisòs Klistù. Wù mò yi ti, yi chyə̂, ma ghɨta tî tum mâkà na yì jwôfà wi biyani Yènfù yen na yì kokne kpenelò, chwok lemlò. ⁵ Ghàn hì boŋa mô kəbi te yi ti chyə̂. Yi ni chwùtè na ghɨ kəta hi lyè ghàn hi bâ ndâ Fùyèn atɨ̂n, na ghàn hi mô ngàŋsu ndâ Fùyènsu yulesu, fo tu fô tu yohnà tù ha Yènfù, tu kpenê, tohne a Jisòs Klistù. ⁶ Yi mô ni beka ghɨ ti nyak a ŋwàklù Fùyèn na: “Ghàn yen! Mu ti lem ti a yi tèk yi Sayòn, a mô yi ti bûlà nda te mu chwoka, yi jwôfà nâ haŋaŋ. À bimi nâbi nde ha wûn, ma wù bê tè wumî.” ⁷ A mô ha ghàn ghe a ghàn bime, ti mi yîn yi jwôfà nâ haŋaŋ, biyani a mô ha ghɨt ghe a ghɨ tà bimi jə̂: “Ti mi ye a ghɨt a bana tì tuma maka ti kahi gan yi ti yi bûlà nda.” ⁸ Ghɨ ti fî nyak kəbi a ŋwàklù Fùyèn na: “À mò yi ti, ghɨta damta atɨ̂n, a mô yi wô, mô hi nì na ghɨta hi fentê.” Ghɨta ni damta atɨ̂n beka ghɨna ywo wi tum à Fùyèn, a mô yi gha ye a Yènfù tì lèma na ghɨna ni. ⁹ Biyani, a mô ha ghàn, ghàn mò ghɨta te Yènfù chwoka. Ghàn mô ngàŋsu ndâ Fùyènsù, fêtà ha Fə̀n. Ghàn mô ghɨt a yulena ma Yènfù ti lyi ghàn ha ghɨt a wuna shyəma ghàn hi fôktè gha a kanana ghe a fu ne. Fu ti toŋa fihi ghàn atɨ̂n à yì fîn lihi ghàn a wun a yi ban yi kanani. ¹⁰ Ghàn ndùku wijə ghɨt a Fùyènà ashyə̂, biyani hì mô chîn. Yènfù ti kwohe seni ha ghàn biyani hì kwohe chin nâ haŋaŋ. ¹¹ Sun samsu, ghàn mò ni chyà yi chyâ, ghàn wijə ghɨt a mbye afân. A ni gha ye a mu chyate ghàn na kə ghàn hi nê gha ghe a jyà sanisu wùnsu khɨŋa beka gha mɨ ghɨ̂n nòlò yohnà ghana. ¹² Ghàn hi chyə chyənà su jûŋ sù shyəma ghɨt ghe a ghàn à ghɨna chyə, ghɨna khə wi Yènfù hi kama ngane nâbi ghàn, biyani yena gha a jûŋà ghe a ghàn nè, ma à bê hi mô te Yènfù kaha bênà wu tuk wu saku, ma ghɨna hi kokhe funfu. ¹³ Ghàn fo ngɨŋ sanisu hi tè ywo nâbi nde we a ghɨta lèma na wù hi saka ghàn. Ghàn hi nê ni kə nâ njwo ghàn fànà Yènfù. Ghàn hi ywo fə̀n wù chìk we a wù saka ghɨt à jɨ̀m, ¹⁴ ywo nâbi ha be tèka ghe a wù chwokte lema, ghɨ sakâ, fo ngə̂k ha ghɨt ghe a ghɨ nê gha a be, bəmhe ghe a ghɨ chyə chyənà su chilichili su. ¹⁵ Ghàn hi chyə wu lum afân shyəma ngwo ghɨ̂t we a wu chînà jîsà kə yi jîs, hi fê kəta wi gha hi jìs kum ghàn. Yìna mò gha ye a Yènfù khɨŋa. ¹⁶ Ghàn hi chyə̂ kə nâ te ghɨt ghe a ghɨ kəta ngɨŋsu ghɨna su, bu wu kwôs ha wùt. Biyani, kə ghàn lyi yìna hi tè lètè be a ghàn a sù chyənà. Ghàn hi bɨlà chyə te ghɨt ghe a ghɨ fêtà ha Yènfù. ¹⁷ Ghàn hi ngumle kə ghɨt à jɨ̀m, kôŋà ngɨŋ sanisu te ghɨt a bimena, fânà Yènfù, fê ngumle fə̀n we a wù saka ghàn. ¹⁸ Ha ghàn a ghɨt a fetana, ghàn hi ywo ha bì ghana ghɨ fètà, ngumle ghɨna kə nâ hamok. Kə ghàn hi ngumle kə ghe a ghɨ tôknè ha ghàn, fê bonê, ghàn hi ngumle nâbi ghe a ghɨ bəma. ¹⁹ Ghàn khə na Yènfù saŋlelò kum wùt we ghɨ yikte wûn, fo ngə̂k ha wûn kə halô, wu wunhe kə yi wunhî beka wù khə Yènfù. ²⁰ Biyani, wùt shìki wunhî wu yu te ghɨ sama wûn ma wù ti bobhi gha, ma mbè àtɨ̂n hi mô nâ ghə? Wù shìki wunhî te wù yena ngə̂k ma wù bɨ̀li ni jùŋ, ma Yènfù bonhi wûn. ²¹ A mò luk wanu hi tè yena ngə̂k mi yina beka Klistù tì yen kəbi ngə̂k kum ghàn chwûtì chwena ha ghàn na ghàn hi yena kə ngə̂k te wûn. ²² Ghɨ ti nyak a ŋwàklù Fùyèn na, “Wù tà tì ni jə gha yi be yile, wù tà tì timi wam jə fəmi nâ hakoh.” ²³ À ndùku mô nâbi te ghɨ sûlè wûn, wù tê fìsì. À ndùku mô te ghɨ fo ngə̂k ha wûn, wù tê faha jə̀ gha. Wù fo kə ngɨŋ à wûn ha Yèn fe a fu saka kə chilichili. ²⁴ Wù ti bêkà besu ghàhnàsu kə nâ a wun wu wùn, a tô kàkfùtàfù. Wù tì ni ni shyəma ghàhnà hi bɨlà chyə̂ chyəna su chilichili su, be fê kəta wi gha hi nì a ghàhnà sù chyənà. À mò lemtu we a wù tì khɨte na ghàn ta, ²⁵ beka ghàn ndùku chînà gbê kə te sù njyə̀ su ləha su, biyani chîn hì mô ma Yènfù ti kahi lyi ben nì ghàn ha Chìn à sù njyə̀, ma à ni wut we a wù kine yohnà wanu.

¹ Ghàn hi ngumle lɨm ghana a ywena. Ghàn nè ni, chyəna ghana jûŋà làhi nì ma lɨm ghana ghe a mô teka ghɨ bimi, kwuna təm a ghɨna ma ghɨ bimi ha Yènfù teka ghàn fê jis nâbi gha ha ghɨna, ² wu yu te ghɨna yena chyənà sanisu, su jwôfà fê yulê. ³ Ghɨ kəta wi hi tè yen na ghàn jwôfà kə kum a tu te ghàn tòka fate, bu kum sù chyâk te ghàn tuŋa, bu kum nju se a ghàn màka. ⁴ Jwôf yi tɨni ni bɨlà kəta hi tè mò a ghàn a sù chyənà. Nki jwòf mi yîn ni mò yi jwôf yi yohnà, bonê, yê mwuhe wi, fê kokne a Yènfù ashyə̂. ⁵ A ni mò lum we a ywena tuk wu shyə ghe ghɨ tì samhe ha Yènfù ndùku chyə atɨ̂n hi tè jwòf ha lɨm a ghɨna. Te ghɨna ndùku ngumle lɨm a ghɨna. ⁶ Sèla ndùku chyə̂ kə chyənà mi yîn, ngumle lɨm à wûn Ablàhâm, fê toŋte wun na bâba. Ghàn ki sina chyənà yì jùŋ mi yìna, ma ghàn hi mô kə nâ wana Sèla. Ghàn shìki nî ni, ma ghàn nê hi fê fânà wi gha nâ hakoh. ⁷ Ghàn hi boŋa chyə chyənà su jûŋ sù ha ywen ghana a lɨmànà, khə na ghɨna bota chyâlò ghàn. Ghàn chwuti na ghàn kəta hi tè tòknà nì ghɨna beka Yènfù ti chîntì fo chyənà ye ha ghàn à yì bè mê wi kə ha ghàn à jɨ̀m. Ghàn hi chyə kə ni shyəma ghàn nê shihi jə̀m, gha hi fê tâhè wijə jə̂m yani. ⁸ Hi gòkhì, ghàn hi chîntè kəta kə yi kwâktì yì mòk, kwohe seni, kôŋà ngɨŋ sanisu te wana ne, tôknè fê bonê. ⁹ Wùt ni be ha wò, kə wò ni fisi, wù sûlì wò, kə wò sùli fisi. Wò kəta kə hi tè bɨlà jə̀m na Yènfù bonhi nki yi wût mi yîn beka à mò yi bonhî mi yîn a fu chwune hi fo ha wò wu tuk afa fu tì chwoka wò. ¹⁰ Yi mô ni beka ghɨ ti nyak a ŋwàklù Fùyèn na: “Wùt shìki kôŋ hi tè chyə a jûŋ, saŋlê, kə wù hi jîsà yi jîs yi be, kə wù hi jîsà jîs yi leheni. ¹¹ Wùt mu wuna ni kəta hi màkà chyənà yi be hi tè chyə chyənà yì jùŋ. Wù kəta hi khɨŋa lumu hi tè chyə kə nì yutìnì, ¹² beka Yènfù mò ma fu ti lem se a ghɨt ghe wu wùn ghe a ghɨ chyə chyənà chilichili, ywo jə̂m yi ghɨna yu mù jɨ̀m, biyani wu fità jɨm ha ghɨt a gha a be.” ¹³ Ghàn shìki mômhì nâ nì jyaka hi tè nè kə gha a jûŋà mɨ ghɨ̂n a ghɨ nyàka ni, ma wùt nê hi bu hi nè yi gha yi be ha ghàn. ¹⁴ Biyani ghàn shìki yen a ngə̂k kum te ghàn nè gha a jûŋà, ma Yènfù bonhi ghàn. Ghɨ nyak a ŋwàklù Fùyèn na, “Kə ghàn hi fânà ghɨt ghe a ghɨ chwoka wulu wanu, kə lɨmalɨma hi bâtè ghàn.” ¹⁵ Ghàn hi bɨlà ngumle Klistù te Bâba a ghàn a təm. Ghàn hi mô, yute hi fìsì nâbi nde a wu yu afa wù bufa gha kum yi bimî ye a ghàn kəta ha Klistù. Ghàn shihi nì ni ghàn hi bonê, fê ngumlê. ¹⁶ Ghàn shihi nì ni, ghàn hi nê nì təm a yulena shyəma nâbi nde we a wù jìsà jîs yi be kum chyəna a jûŋ ghe a ghàn ghe a ghàn jùmtè Klistù, nê wumi a gha afa a wù jìsà. ¹⁷ Yi bɨlà jwôfàlò hi tè yena ngə̂k kum a gha a jûŋà te wùt nè, a wu yu afa Yènfù kòŋa, chyâ hi tè yen kum a gha a be. ¹⁸ Yi jwôfàlò hi tè yena ngə̂k wu lum afân njwo nâ Klistù ha wun a ngɨŋ tì yen ngə̂k kpu lò kum besu ghàhnàsu mihì fêt yi wuni kə wu yu wù mòk. Wù ndùku mô wut à chilichili biyani wù kpû hi bònhè ghɨt a gha a be hi nì na ghàhnà ben ha Yènfù. Ghɨta tî ywi wûn, biyani à kpu kə chyak a wuna ghɨ wùna, Yènfù nî yohnà a wuna faŋ hì chyə̂ kə yi chyə̂. ¹⁹ À mò a yohnà a wun mɨ ghɨ̂n a ghɨ tì ye fokte gha yi Fùyènì ha yohnù a ndâ a chyâk, ²⁰ ma a ni yohnù we a wu ndùku ywo wi Yènfù biyani fu wunhi kə yi wunhî hi tàn wu tuk afa a Nuwà tì ba baŋa atɨna. À ndùku mô wu tuk afû, ghɨta bôn atɨ̂n à baŋ afû a ghɨ ndùku mô a tû mòlû, tobte kə ni. Ghɨna ndùku mô kə fama. ²¹ Mòlû muna a ghɨna ndùku lele a tû bonlò ndùku chwûtè fye yi mòli ye a ghàn fye chîn bônà tohne a Jisòs Klistù hi chwùtì na ghàn ti mâkà be sanisu. Mu jìsà wi kum mòlû me a ghàn sò wun wanu atɨ̂n, mu jìsà kum yi chwuna ye a ghàn nè sò yuhi təm ghana atɨ̂n a Yènfù ashyə̂. Mòlû muna bònhè ghàn tohne a yi lòtì afa a Jisòs Klistù tì lòte a yi kpû. ²² Wù tì lôtì a yi kpû kahi yen a nyə̂, chin wù hì mô a Yènfù kpen wu wo ta, saka anjèlsu Fùyènsu kə sù jɨ̀m, fê saka yohnù nì jyaka nâ wù jɨ̀m.

¹ Te ghàhnà hì khə na Jisòs Klistù tì yen ngə̂k a chyak a wùna, ghàn hi boŋa kəta kə kwâktì ye a wù ndùku kəta, gbùtè hi yen a ngə̂k beka à yena nâbi nde ngə̂k a chyə afân te Klistù, ma wù bê tè fè nè be. ² Wù nè ni, ma wù bê tè fè chyə̂ te njyàsu wùnsu khɨŋa, ma wù hi chyə̂ kə te Yènfù khɨŋa. ³ Ghàn hì mô ma ghàn ti bobhi yu wu donu, chyə chyənà ye a ghɨt ghe a ghɨ khə wi Yènfù kòŋà. Ghàn ndùku chyə chyəna liŋa, fwo nì se, ghàn nyo lùkû mu kwo ghàn, ghàn yen wu lùk wu yənu, ghàn hi nê kə te sù bû. Ghàn kokhe mosòmù, sak yi Fùyènì bime wi. ⁴ Chin hì mô ghɨt ghe a ghɨ khə wi Yènfù mô nì kani na ghàn fè yə wi ghàn à ghɨna, fê chyə̂ wi chyənà yì be yì ghɨna mi yê. Yìna ti ni, na ghɨna kahè hi sûlè ghàn. ⁵ Biyani, tuku kwoka bênàlò shyəma Yènfù sak kə ghɨt à jɨ̀m, saka ghɨt a ta saka ghɨt a kputena. Ghɨna bè taŋlelò jwo yi ghɨna ha wûn. ⁶ A ni gha ye a ghɨ tì fòkte tum yì jùŋ nâbi ha ghɨt ghe a ghɨ tì kpute. Yènfù hì mô ma fu ti sak ghɨna wu tuk afa ghɨna baha chyə a chyak a wùna kə yi ghəl te fu saka ghɨt à jɨ̀m. Ghɨ tì fôktì tum yì jùŋ mi yìna ha ghɨna shyəma ghɨna hi chyə a yohnà kə te Yènfù khɨŋa. ⁷ Ghàn hi fate khɨte ngɨŋ sanisu, fê gbùtè hi tè jə̀m beka gokhi mbyî ti bakhâ. ⁸ Nâ gha yi ta mò na ghàn hi kôŋà ngɨŋ sanisu beka kôŋì nèlò, ghɨ lêhèfo besu, su dô kə ni. ⁹ Ghàn hi fate fye wana ne ghana a ghàn a sù ndâ, fye kə nâ nì təm à mòk, dûmlè wi. ¹⁰ Yènfù ti bônhì ghàn fo tu fô kə tu nkì a tu nkì. Yi ni chwùtè na nâbi nde ni kəta hi tè lyè fo wuni ye a Yènfù fo nê jùŋ ha ghɨt ale atɨ̂n ni te ghɨt a fetana a Fùyènà jûŋà. ¹¹ Wùt hì fôktè gha yi Fùyènì, wu hi fôktè kə nâ gha ye a yi lo bena ha Yènfù. Wùt hì mô wut wù fètana, wu hi fêtà kə nì jyak ghe a Yènfù fo ha wûn. Ghàn hi nê kə ni shyəma ghɨta hi kokhe Yènfù tohne a Jisòs Klistù we a wù kəta kokhînì nì jyaka a yu mù jɨ̀m. Àmèn. ¹² Sun samsu, kə ghàn hi mô nì kani wu yu afa mômhìnì yi bəmani bènà ha ghàn. Gha mi yin ni gànà kə hi mòmhè yi bimî yani. Kə ghàn hi lyê gha tɨni ha yi gha yi fe. ¹³ Ghàn hi bɨlà saŋlê na ghàn boŋa yena ngə̂k kəbi te Klistù shyəma wù bê kahà ben a wun atɨ̂n à yi ban yi chiki, ma ghàn hi saŋlê nâ haŋaŋ. ¹⁴ Ghɨta shìki sûlè ghàn kum te ghàn mò jùmtìbàmsù Klistù, ghàn hi saŋlê kə yi saŋlî beka yìna chwùtè na Yohnà a kanana a mô Yohnà Fùyènà mò ha ghàn. ¹⁵ Kə wùt ha ghàn bê hi yena ngə̂k na wù ywi wût, makə wù chwoŋlò, makə wù ni gha yi be, makə wù lihi jwo wuni a wùt à yi ghâ. ¹⁶ Biyani, wùt ha ghàn hì yena ngə̂k beka wù jùmtè Klistù, kə wù hi wumê, wù hi bɨlà kokhe kə Fùyèn beka wù ti bime a Klistù yì yet. ¹⁷ Yi mô ni beka yu ti kpên shyəma Yènfù sak mbyî, wu mô hi yìmì nì ghɨt a wuna, ma fu ki bɨlà yìmi hì saka ghàhnà ashyə̂, ma yi hi bəma nâ haŋaŋ ha ghɨt ghe a ghɨ bime wi tum yì jùŋ? ¹⁸ “Yi shìki ta ha ghɨt a jûŋà hi bòn, ma yi bê hi mô nâ yàni ha ghɨt a be ghe a ghɨ khə wi Yènfù?” ¹⁹ Yi ni chwùtè na ghɨt ghe a ghɨ yena ngə̂k, a mô yi kôŋ yi Fùyènì, kəta hi faŋ hi tè nè kə jùŋ, hi fè fo ngɨŋsu ghɨna su ha Yènfù beka à fati wun ghɨna. Fu nê nâbi ghə ghe a fu chwune.

¹ - ² Mu chyate chəhsu ndâ Fùyèn se a su mô a ghàn a fùtɨ̂n na su hi fate tôknè nì ghɨt ghe a Yènfù fo ha ghɨna ni te sù njyə̀. Ghàn khə na mu boŋa mô kəbi chəh ma mu tì yen te Klistù yena ngə̂k. Mu mô kəbi atɨ̂n à yi ban afa a Yènfù bè chwûtè wu tuk afa Klistù kaha bena. Ghàn shihi tòknà nì ghɨna, ghàn hi chwûtè na ghàn kòŋàlò gha ye a ghàn nè. Kə ghàn hi nê ni te ghɨ china ghàn yi chîn, beka Yènfù kòŋàlò na ghàn hi nê wu lum afân ni. Ghàn hi ghâblè, nê yi fêt. Kə se ghana hi fwo a wu kâ. ³ Kə ghàn hi yikte ghɨt ghe a ghɨ fo na ghàn hi tôknè ni ghɨna. Ghàn hi bɨlà mô chwena ha ghɨna. ⁴ Ghàn nè ni, ma wùt we a wù mò ni te a tû a chìn à sù njyə̀ bê kaha ben nâbi wùni tuku ma wù fo fot a tù fə̀nà te wu maktu ha ghàn, ghɨ njêntè kə ni, yê mwuhe wi. ⁵ Ngwàk, ghàn hi boŋa ywo chəhsu ndâ Fùyènsu. Nâ ghàn à jɨ̀m mak ngumlînì a ghàn a wu wùn ha sù nju ma hi ngumle ngɨŋ sanisu. Ghàn khə na Yènfù bànàlò ghɨt ghe a ghɨ ghaŋhe wunu, biyani tôknè nì ghe a ghɨ ngumle ngɨŋsu ghɨna su. ⁶ Ghàn hi ngumle lê ngɨŋ sanisu a Yènfù sah à jyak shyəma yu bê kpen, ma wù lohi ghàn. ⁷ Ghàn lyê ben nì fum ghana nâ à jɨ̀m ma ghɨ fo ha wûn beka wù khəlò gha ghana. ⁸ Ghàn hi mô yute fê khɨte ngɨŋ sanisu beka bànà yanì, ma a ni deblì ni dùmà chyàktè kata kə te bìkəm bufa, khɨŋa wut hi mɨ̀. ⁹ Ghàn timè hi tâ a ghàn a yi bimî shyəma ghàn ta chya wûn. Ba ghàn khəlò na wana ne ghana a mbyî yì jɨ̀m yena kəbi ngə̂k ni. ¹⁰ Ghàn yena ngə̂k kə a fu yu là ni, ma Yènfù tihi ghàn, ma wù fo jyaka ha ghàn, ma ghɨ ni ma ghàn hi ta nâ haŋaŋ. Wù mò Fùyèn, kwohe seni nâ haŋaŋ. À tì toŋa wûn ghàn na ghàn bê lye a wun atɨ̂n à yi ban yi chiki tohne a Klistù, a mô yi ban, bu hi bè mì. ¹¹ Jyak a wuna faŋ à kə yi fâŋ a yu mù jɨ̀m. Àmèn. ¹² À gàmti Silàs mu na mu nyak ŋwàklù funa ha ghàn. Wù mò kə nâ wâ nì wù jùŋ a yi bimî, mu khə na wù ywolò. Mu nyàkà ghalà mu funa hi lùmhè ghàn, hi fè chwùtì ha ghàn na Yènfù fate tôknèlò kə nâ ghàn. Ghàn timè hi ta kə ni a tô yi tòknà mi yîn. ¹³ Wâ nì wânù we a wù mò a Babilòn, a mô a nôn a ghɨt a bimena ghe a Yènfù chwoka afû ti chinhi toŋtînì ha ghàn. Mâk, a mô wâ mù a yi bimî ti chinhi kəbi toŋtînì ha ghàn. ¹⁴ Ghàn toŋti ngɨŋ sanisu kə nâ wu lum hi chwùtì kôŋ yi ghɨt a bimena. Mu jə̀mà na yutì yì Fùyènì faŋ kə yi fâŋ nâ ha ghàn à jɨ̀m ghe a ghàn bime ha Klistù.