1 Jon

¹ Ghàh tî nyak ha ghàn kum Tum à Fùyèn ye a yì fo chyə ye yi bè mê wi. Tum yina ndùku lâwû shyəma mbyi yimi. Ghàh tî yû te wù ndùku jîsà kə nâ a ghàh a sù ngɨŋ, ghàh yen wûn kə nâ nì se ghaha, fî kum wûn kə nâ nì wo wahu, ghàh ghɨ hì jîsà chin kum wûn. ² Tum yina a yì fo chyə yina yi bè mê wi ni, chwûtì ngɨŋ à wûn, ghàh yên, hì fôktè kum wûn. Ghàh jìsà ha ghàn kum Tum mi yin te yì ndùku mô a Bì à ngwùŋ chwûtì ngɨŋ à wûn ha ghàh. ³ Ghàh ni jìsà a gha ha ghàn, a mô ghe a ghàh yena fî yu lò, shyəma ghàhnà chintê faŋ kə ha shyə̀ à mòk, nì Bì ghê Wâ wûn Jisòs Klistù. ⁴ Ghàh ni nyak a gha mɨ ghɨ̂n ha ghàn ni shyəma ghɨ ni, ma ghàhnà khɨti saŋlî ye a yi kpene. ⁵ Tum yin a ghàh ni lâkà ha ghàn chîn ni mò ma ghàh yu ha Jisòs Klistù. Yi mô na: Yènfù mò yi bân, kəta wi gha hi nì nì bɨn a finana nâ hakoh. ⁶ Ghàhnà shìki jîs na ghàhnà mò nì Yènfù amok biyani fê gbê a bɨn a finana, ma yi hi chwûtè na ghàhnà wamalò, nê wi gha ye a yi mô hamok. ⁷ Biyani, ghàhnà shìki gbî a fùtɨ̂n à yi bân kəbi yi ghəl te Yènfù mò a fùtɨ̂n à yi bân, ma ghàhnà hi chîntè mô kə ha shyə̀ à mòk, ma luŋ mù Jisòs, a Wâ Fùyèn nê sô jihi ghàhnà a sùbe kə sù jɨ̀m. ⁸ Ghàhnà shìki jîs na ghɨ wi hi nè be ma ghàhnà hi lehe kə ngɨŋsu ghàhnàsu, hamok bu a ghàhnà a təm. ⁹ Ghàhnà ki jî, lon a yi lêhìfo a ghàhnà sùbe, ma Yènfù nê lehêfo besu ghàhnàsu, ma wù sô yuhi ghàhnà nâbi ha ghə ghe ghɨ bu chilichili a ghàhnà a chyənà beka Yènfù jìsà nâbi ghə, nê kə yâ, nê nâbi ghə kə chilichili. ¹⁰ Ghàhnà shìki jîs na ghàhnà tà ni jə be, ma ghàhnà hi lyê wûn ha wùt à yì fə̂m, ma gha wuni hi kəta wi luku a ghàhnà chyənà.

¹ Mu nyak a gha ghɨ̂n ha ghàn a mwəlà mâmù shyəma ghàn hi fê nê wi gha a be. Biyani, a ni nâbi nde gha be, wu hì khə na ghàhnà kətalò wùt à chilichili, a mô Jisòs Klistù, wu chyate Bì a ghàhnà wù lùk. ² A mô wûn we a ghɨ fo te yi fô shyəma Yènfù nê hi fê bâŋhè wi lâ, ma wù lèhefo besu ghàhnàsu, bakhe nâbi nì ghɨt à jɨ̀m a mbyî. ³ Ghàhnà shìki nî te saktu Fùyèn tù jìsà, ma ghàhnà yen à khɨli hamok na ghàhnà khəlò wûn. ⁴ Wùt shìki jîs na yi khəlò Yènfù, nê wi te saktu wun tu jìsà, ma wùt àtɨ̂n hi wama yi fə̂m, hamok bu a wun a yi təm. ⁵ Biyani à shìki nê nâbi nde gha ye a wù jîsà, ma kôŋì Fùyènì hi mô ma yi ti kpên a wun a chyənà. A ni mò lum we a ghàhnà khə na ghàhnà mò a Yènfù a bàh. ⁶ À hì jîsà nâbi nde na yi mò ghê Yènfù, ma wù hi kəta hi tê gbì kə te Jisòs ndùku gbê. ⁷ Mu nyàkà wi sak yi fe ha ghàn a sun samsu. Mu nyàkà sak yi mwu, ma ghàn ndùku khəlò nâ a yìmi. Sak yi mwu mi yîn mô tum ye a ghàn hì mô ma ghàn tî yû. ⁸ Biyani sak mi yîn a mu nyàkà ha ghàn yè yusa mô kə yi fê. Klistù chwûtì tohne a wûn a chyənà na sak mi yîn mò hamok, nâ ghàn hi boŋa chwûtè beka ban ye a yi mô hamok yi hì banalò, fini mê mihè yênà. ⁹ À ki jîsà nâbi nde na yi chyə a yi bân, biyani fê bânà wâ nè wûn, ma yi hi chwûtè na wù baha chyə kə a bɨn a finana. ¹⁰ Biyani à hì kôŋà nâbi nde wâ nè wûn, ma yi hi chwûtè na wù chyə a yi bân, gha yile bu a wun a chyənà hi nì na wùt fen a fùtɨ̂n à be. ¹¹ Wùt we a wù bànà wâ nè wûn chyə a bɨn a finana, gbê chyâ atɨ̂n à bɨn a finana, ma ghɨ ti nî wûn wu yena wi na yi yênà afa agha. ¹² Mu nyàkà a gha mɨ ghɨ̂n ha ghàn a mwəlà mâmù beka Yènfù ti lêhìfo be sanisu a Jisòs Klistù yi yet. ¹³ Mu nyàkà a gha mɨ ghɨ̂n ha ghàn a ləmanà beka ghàn hì mô ma ghàn ti khɨli wûn we a wù ndùku mô kə nâ a yìmi. Mu nyâkà a gha mɨ ghɨ̂n ha ghàn a ngwàk beka ghàn hì mô ma ghàn ti ta chya deblì. Mu nyâkà a gha mɨ ghɨ̂n ha ghàn a mwəlà mâmù beka ghàn hì khəlò Bì. ¹⁴ Mu nyâkà a gha mɨ ghɨ̂n ha ghàn a ləmanà beka ghàn hì khəlò wun we a wù ndùku mô kə nâ a yìmi. Mu nyâkà a gha mɨ ghɨ̂n ha ghàn a ngwàk beka ghàn ta, gha Fùyènì mô a ghàn a chyənà, ma ghàn ti fî ta chya deblì. ¹⁵ Kə ghàn hi kôŋà mbyî yinâ nì mwə̀ me mù mò atîn. À kôŋà nâbi nde mbyî yinâ, ma yi hi chwûtè na wù kòŋà wi Bì, ¹⁶ beka nâbi ghə ghe à mò a shyə a mbye ni te gha a be ghe a wun wu ghàhnà china ghàhnà na ghɨ hi nê, a mô se a fwona nì ghaŋhi wùni kum mwə, lo kə a mbyî, bu ha Bì. ¹⁷ Mbyi chyàlà yi chyâ, bakhe nì mwə̀ me a ghɨta nyɨŋa yi bàm atɨ̂n, biyani wùt we a wù nè kə te Yènfù khɨŋa kəta hi bè chyə fâŋ. ¹⁸ Tuk mù gòkhemù ti bakhâ a mwəlà mâmù. Ghɨ tî fôktì ha ghàn na bànà Klistù kətalò hi bè bèn. Bànàsù Klistù su ni mò chîn dô kə ni. À mò gha ye ghàhnà yena khɨle na tuk mù gòkhemù ti bakhâ. ¹⁹ Bànàsù Klistù mu sîn fwu kə nâ a ghàhnà fùtɨ̂n, biyani ghɨna chehì laha wijə nì ghàhnà a kak à mòk, bu ya ma ghɨna che faŋ kə ghàhnà ghɨna. Fwu yi ghɨna chwùtè na ghɨna chehì wijə ghàhnà ghɨna a kak à mòk. ²⁰ Biyani, Klistù ti fo Yohnà Yulena ha ghàn, ghɨ bênà nâ ha ghàn à jɨ̀m, na ghàn hi khə gha ye a yi mô hamok. ²¹ Mu nyàkà wi gha ghɨ̂n ha ghàn beka ghàn khə wi gha ye a yi mô hamok. Mu nyàkà beka ghàn khə na fəmi kəta wi hi tè mò a yi gha, yi mô hamok. ²² Wùt we a wù mò a wut à yì fə̂m ni mò wùni? À mò we a wù tunhe na Jisòs wijə we a ghɨ chwoka lema. Nki wùt mu wûn mò bànà Klistù, tunhe Wan, fê tunhe kəbi Bì. ²³ À tunhi nâbi nde Wan, ma à hi mô na wù ti tunhi Bì, à bimi nâbi nde Wan, ma à hi mô na wù bimi Bì. ²⁴ Ghàn fate lem gha ye a ghàn tì ywo kə nâ a yìmi a ghàn a təm. Ghàn ki nî ni, ma ghàn faŋ hi mô kə ghàn à Wan nì Bì amok. ²⁵ Yìna ni mô shyə ghe a wù tì chwùne hi fo ha ghàhnà kə nâ nì ngɨŋ à wûn: A mô chyə ye a yi bè mê wi. ²⁶ Mu nyàkà a gha mɨ ghɨ̂n ha ghàn ni, tobhe ghàn kum ghɨt ghe a ghɨ khɨŋa hi tè lehe ghàn. ²⁷ À mò ha ghàn ma Klistù hì mô ma wù ti fo Yohnà a wuna ghɨ hì mô ha ghàn, ghàn fê khɨŋa wi wùt na wù hi yike ghàn, beka Yohnà wuna yike ghàn nâbi nì ghə, yike ni, yike kə hamok, fəmi bu atɨ̂n. Ghàn kəta hi tè ywo yi yikî ye a Yohnà a wuna yike ha ghàn kə te ghɨ hì mô ma ghɨ ti yikî, shyəma ghàn faŋ à hi mô kə ghàn à Klistù. ²⁸ Nì chîn, a mwəlà mâmù yi ni chwùtè na, ghàn kəta hi faŋ kə ghàn à Klistù shyəma wù bê buŋhê fwu nâbi yini a wun wu yu benanu, ma ghàhnà bê hi mô kə nâ a jûŋ, wume wi a wun ashyə̂. ²⁹ Ghàn shìki khə na wù mò chilichili, ma ghàn hi khə na nâbi nde we a wù nè gha ye a yi mô chilichili boŋa mô wâ Fùyèn.

¹ Ba ghàn ti yen te Yènfù chwùte kôŋì ha ghàhnà yi ghaka kə ni. Fu ti nî na ghɨ hi toŋte ghàhnà na wana Fùyènà. Yi mô kə nâ hamok. Ghàhnà mô wana Fùyènà. Ghɨt a mbye tà timi hì khə Yènfù, a ni mò gha ye a ghɨna khə wi ghàhnà. ² Ghàhnà mô chîn, mô wana Fùyènà a sun samsu, bu hi tè khə nâ na, ghàhnà bè hì mô nâ yàni. Gha ye a ghàhnà khə hamok mô na, wù bè bûŋtè fwo ma ghàhnà yen wûn kə nâ te wù mò, ma ghàhnà hi boŋa mô kə nâ te wûn. ³ Nâbi nde we a wù yute wûn, lèmà ngɨŋ à wûn nì yulînì kəbi yi ghəl te Klistù mò nì yulînì. ⁴ Nâbi nde we a wù nè be khɨma sak yi Fùyènì, beka be mò ni, a mô yi khɨm yi saki. ⁵ Ghàn khə na Klistù tì ben a mbyî hi chikhe besu ghɨ̂tsù. Wù tà timi ni jə be. ⁶ Yi ni chwùtè na wùt lè wi hi tè mò ghê wûn, chyə̂ a be. Nâbi nde we a wù chyə a be ni mò teka wù timè yen wûn, khə wi wûn. ⁷ Kə ghàn de na wùt jiŋhi ghàn a mwəlà mâmù! À ni nâbi nde gha ye a yi mô chilichili, ma wù hi mô kəbi wut à chilichili te Klistù. ⁸ À hì nê nâbi nde be ma wù hi mô wut à deblì beka deblì yisa nê kə a gha a be kə nâ a yìmi. Gha ye a Wâ Fùyèn tì bèna a mbyî mò hi bobhi fêt yi deblì. ⁹ Nâbi nde we a mò wâ Fùyèn chyə wijə a be beka wù kəta chyəna Fùyènà, wu bu hi fè nè be beka Yènfù mò Bè wûn. ¹⁰ A ni mò lum we a ghɨ yen a khɨle ghɨt ghe a ghɨ mô wana Fùyènà nì ghe a ghɨ mô wana deblì. Wùt we a wù nê wi gha ye a yi mô chilichili wijə wâ Fùyèn. We a wù kòŋà wi wâ nè wûn wù boŋa wijə wâ Fùyèn. ¹¹ Ghàn tî yû tum yina kə a yìmi na, ghàhnà kəta hi tè kòŋà sù ngɨŋ. ¹² Ghàhnà kəta wi hi tê mò te Kên. Wù ndùku mô ghê deblì, ywi wâ nè wûn. Wù ywi wûn njwô ghə? Wù ywi wûn beka wâ nè wûn ndùku nê gha chilichili, wu nê gha a be. ¹³ Ghɨt a mbyî shìki bânà ghàn a wana noma, kə ghàn hi mô nì kani. ¹⁴ Ghàhnà khə na ghàhnà hì mô ma ghɨ ti fwu a yi kpû hì chyə̂ beka ghàhnà kòŋà wana ne ghàhnà. Wùt we a wù kòŋà wijə wâ nè wûn baha chyə kə a fùtɨ̂n à yi kpû. ¹⁵ Wùt we a wù bànà wâ nè wûn ywelò, ghàn khə na wùt we a wù ywi kəta wi chyəna ghe ghɨ bè mê wi. ¹⁶ Ghàhnà yena khɨle gha ye a kôŋì mò yini tohne a Jisòs Klistù te wù tì fo ngɨŋ à wûn hi kpû kum ghàhnà. Ghàhnà boŋa kəta hi tè mò hi fo ngɨŋsu ghàhnàsu hi kpû kum wana ne ghàhnà. ¹⁷ Kôŋì Fùyènì shìki mô ha wùt, wu kəta mwə, yen a wâ nè wûn wu kəta wi biyani kwohe wi seni ha wûn ma kôŋì Fùyènì nê hi mô yàni ha wûn agha? ¹⁸ Wana ma, kə ghàhnà hi kôŋà kə a tô yi jwô. Ghàhnà kəta hi tè chwùtì yi kôŋ a gha afa a ghàhnà nè, kôŋà kə nâ hamok. ¹⁹ À mò a tu lum afân a ghàhnà yen a khɨle na ghàhnà mò a bàh afa a ghɨ mô hamok, yi fê nê təm a ghàhnà kəta yutìnì a Yènfù ashyə̂, ²⁰ saka wi ghàhnà, beka Yènfù ngaŋte chyâlò kwâktì tù ghàhnà tù, khə nâbi ghə. ²¹ Təm mu ghàhnà shìki saka wi ghàhnà a sun samsu, ma yi hi bɨlà chwùtè na ghàhnà mò a jûŋ a Yènfù ashyə̂ ²² ma ghàhnà nê hi bufa nâbi ghə ha wûn, wu fo beka ghàhnà ywo saktu Wun tu, nê a gha ghe fu kôŋà. ²³ Sak yi Fùyènì mi yina mò na, ghàhnà bimi ha Wâ wûn Jisòs Klistù, ma ghɨ hi kôŋà ngɨŋsu ghàhnàsu te wù jìsà. ²⁴ Ghɨt ghe a ghɨ nê te saktu wun tu jìsà chyə ghê wûn kə nâ hamok. Ghàhnà hi khə na fu chyə nì ghàhnà amok tohne a yohnà afa a wù fo ha ghàhnà.

¹ À ki bên nâbi nde ha ghàn a sun samsu jis na yi kəta Yohnà Fùyènà, kə ghàn bimi kə yi bimî. Ghàn kəta hi fate ke wùt we wù jìsa na yi kəta Yohnà Fùyènà hi yen na wù jìsà hamok agha. Ghàn kəta hi nì ni beka fòktìsù fəmsu gbè a mbyî dô kə ni. ² Ghàn mò hi khɨli na wùt kəta Yohnà Fùyènà a wù lum afân na, nâbi nde we a wù kəta Yohnà Fùyènà bimelò na Jisòs Klistù tî bên a mbye afân a wu wùn wu wûtù. ³ Nâbi nde we a wù bime wi ha Jisòs kəta wi Yohnà Fùyènà, bɨlà kəta yohnà a bànà Klistù, a mô ghe a ghàn tì ywo na ghɨ bênàlò. Ghɨ hì mô kə nâ a mbyî chîn. ⁴ Ghàn mò ghɨt a Fùyènà, a mwəlà mâmù, ma ghàn ti ta chya ghɨt mɨ ghɨ̂n beka We a wù mò a ghàn a fùtɨ̂n chyàlò we a wù mò a mbyî. ⁵ Fòktìsu fəmsu mò kəbi ghɨt a mbyî, à ni mò gha ye a ghɨna jìsà kə jîs yi ghɨt a mbye, ghɨt a mbye ywo jîs yi ghɨna. ⁶ Ghàhnà mò ghɨt a Fùyènà, ma à khə nâbi nde Yènfù, ma wù hi ywo gha ye a ghàhnà jìsà, à hì ma nâbi nde Yènfù, ma wù nê hi ywo wi. A ni mò lum we a ghɨ khɨle yohnà ghe a ghɨ mô hamok nì ghɨ fəma. ⁷ Yi jwôfàlò a sun samsu na ghàhnà hi kôŋà ngɨŋsu ghàhnàsu, beka kôŋì lò bênà ha Yènfù. À shìki kôŋà nâbi nde ghɨt ale, ma wù hi mô wâ Fùyèn, khə Yènfù. ⁸ Nâbi nde we a wù kòŋà wi ghɨt ale khə wi Yènfù beka Yènfù mò yi kôŋ. ⁹ Yènfù tî chwûtì kôŋ yì wuni ha ghàhnà a wu lum na wù tì tum Wâ wun a mbyî, kə wù mòk we a wù ndùku kəta, shyəma ghàhnà khɨti chyənà tohne ha wûn. ¹⁰ Kàntè yì kòŋ mò yìna ni: Yi bu na ghàhnà ndùku kôŋàlò Yènfù, biyani fu koŋ ghàhnà tum Wâ wûn te yi fô na wù bê kpu shyəma fu nê hi fê bâŋhè wi lâ ha ghàhnà lehèfo besu ghàhnàsu. ¹¹ Ghàhnà ni kəta hi tè boŋa kòŋà ngɨŋsu ghàhnàsu a sun samsu, beka Yènfù tî koŋ ghàhnà wu lum afân. ¹² Wùt tà timi yen jə Yènfù, biyani ma ghàhnà shìki kôŋà ngɨŋsu ghàhnàsu, ma Yènfù hi mô a ghàhnà fùtɨ̂n, kôŋ yì wuni kpenê a ghàhnà chyənà. ¹³ Ghàhnà khə na Yènfù làwû a ghàhnà fùtɨ̂n, ghàhnà mô a wun a fùtɨ̂n beka wù ti fo Yohnà a wuna ha ghàhnà. ¹⁴ Ghàh ti yên, hì fôktè ha ghɨt ale na Bì ti tum Wâ wûn na wù bê bonhi mbyî. ¹⁵ À bimi nâbi nde na Jisòs mò Wâ Fùyèn, ma wù hi mô ghê wûn, wu mô ghê Yènfù. ¹⁶ Ghàhnà hi fate khə kôŋ ye Yènfù kəta ha ghàhnà fê yikte kə atɨ̂n. Yènfù mò yi kôŋ. À kòŋà nâbi nde ghɨta ma wù hi chyə̂ ghê Yènfù, Yènfù chyə ghê wûn. ¹⁷ Yènfù ti nî na kôŋì hi mô a ghàhnà chyənà shyəma ghàhnà bê hi mô kə nâ a jûŋ wu tuk wu saku, beka chyəna ghàhnà a mbye afân mò kəbi te ghɨ Klistù. ¹⁸ Fânì wijə a fùtɨ̂n à yi kòŋ. Kôŋ ye a yi kpene jùmà fihelò fânì nâ yì jɨ̀m, beka fânì chwùtè na ghɨ kəta hi fo ngə̂k ha wùt. Wùt shìki fân, ma kôŋì Fùyènì hi kpene wi a wun a fùtɨ̂n. ¹⁹ Ghàhnà kəta kôŋì beka Yènfù tî yitì koŋ ghàhnà ashyə̂. ²⁰ À ki jîs nâbi nde na, “Mu kòŋàlò Yènfù,” biyani bânà wâ nè wûn, wù ya wamalò fəmi beka wùt wi hi tè bànà wâ nè wûn we wù yena, jîsà na yi kòŋàlò Yènfù teka wù timè yen. ²¹ Sak ye a Yènfù fo ha ghàhnà mò na, à hì kôŋà nâbi nde Yènfù, wu hi boŋa kôŋà wâ nè wûn.

¹ Nâbi nde we a wù bime na Jisòs mò we a ghɨ chwoka lema, mò wâ Fùyèn. À kòŋà nâbi nde Bì, ma wù hi boŋa kôŋà kəbi wan we a Bì kəta. ² Ghàhnà làhi khɨlî na ghɨ kôŋàlò wana Fùyènà a wu yu afa ghɨ kôŋà wûn, nê gha ghe a wù jîsà. ³ Ghàhnà shìki fate kòŋà Fùyèn, ma ghɨ hi lêmà saktu wun tu. Yi ta wi hi tè lèm a saktu wun tu, ⁴ beka nâbi wùni Wâ Fùyèn wù hì mô ma wù ti tum yə mbyî. A mô yi bimî ghàhnà ye yi nê na ghàhnà tum à yə mbyî. ⁵ À mò hi tum a yə nde mbyî agha? À mò hi tum a yə kə we a wù bime na Jisòs mò Wâ Fùyèn. ⁶ A mô Jisòs Klistù mu wûn a wù lo a nyə̂ ben a chyə̂ fyi mòlû, fî kpulò suh luŋ mù wûn. Wù tà fyi jə kə mòlû, wù kpû suh luŋ mù wûn. À mò Yohnà Yulena a ghɨ fôktè gha mɨ ghɨ̂n beka ghɨ mô hamok. ⁷ À mò mwə̀ mù tât te mù fòktè: ⁸ A mô Yohnà Yulena nì mòlû nì luŋû. Mwə̀ munâ mù tât chwùtè kə gha yì mòk. ⁹ Ghàhnà bime a gha ghe a ghɨta time fôktè, jîsà, biyani ye a Yènfù jìsà yi chyâ yi wùtì beka yi Fùyènì, wu jîsà kum Wâ wûn. ¹⁰ Nâbi nde we a wù bime ha Wâ Fùyèn khəlò gha mi yîn a wûn a yi təm. Nâbi nde we a wù faŋa hi bimî ha Yènfù lyè wûn ha wut à yì fə̂m beka wù tà bimi jə gha ye a fu jîsà kum Wâ wûn. ¹¹ Gha yina a Yènfù jìsà mô yìna na, fu fo chyəna ghe ghɨ bè mê wi ha ghàhnà, chyəna ghɨ̂n mô ha Wâ wûn. ¹² Wùt we a wù mò a kak à mòk ghê wan kəta chyəna ghe ghɨ bè mê wi, we wù bu a kak à mòk ghê Wâ Fùyèn kəta wi chyəna ghe ghɨ bè mê wi. ¹³ Mu nyàk gha ghɨ̂n ha ghàn ghe a ghàn bime ha Wâ Fùyèn shyəma ghàn hi khə na ghàn kətalò chyə ye a yi bè mê wi. ¹⁴ Ghàhnà ki time a Yènfù ashyə̂ buf nâbi ghə wu lum afa a fu khɨŋa, ma ghàhnà hi khə hamok na fu nè ywolò ghàhnà. ¹⁵ Ghàhnà shìki khə na fu ywolò ghàhnà, ma ghɨ nê buf nâbi ghə ha funfu, khə na fu nè folò ha ghàhnà. ¹⁶ À ki yena nâbi nde wâ nè wûn wu nê be, a bu be ye yì mò hi jyàhè wûn ghê Yènfù, wu jəm ha wûn na Yènfù ni ma wâ nè wûn mu we hi chyə̂. Mu jìsà ghe a ghɨ nê be yi bu hi jyàhè ghɨna ghê Yènfù. Be yìlè làwû à yì nè wùt jyâhè ghê Yènfù, mu jìsà wi na ghàn jəm kum nki be mi yîn. ¹⁷ Nâ gha a be à jɨ̀m mò be, biyani, be yìlè mô a bu ye à yì mò hi jyàhè wùt ghê Yènfù. ¹⁸ Ghàhnà khə na wana Fùyènà wi hi tè nè yê kə nì be, beka Wâ Fùyèn tòknàlò nì ghɨna, ma deblì wi hi nè ngə̂k ha ghɨna nâ hakoh. ¹⁹ Ghàhnà khə na ghàhnà mò wana Fùyènà, mbyî yì jɨ̀m mô a deblì sah à yì sâk. ²⁰ Ghàhnà khə kəbi na Wâ Fùyèn tì ben yiki ghàhnà shyəma ghɨ hi khə Yènfù, a fe fu mô hamok, ghàhnà chîntè mô kə ha shyə̀ à mòk ghàhnà nì funfu nì Wâ wûn Jisòs Klistù. Wu mô Fùyèn fe a fu mô hamok, fo chyə ye a yi bè mê wi. ²¹ Kə ghàn bè hì kəta gha yile hi nì nì yèn mù tu fə̂m a mwəlà mâmù.