1 Kòlitiyàns

¹ À nyak mu Bôl ŋwàklù yìna. À chwok Fùyèn mu kə nâ te fu kôŋà na mu hi mô wut wu tum ha Klistù Jisòs. Mu nyak ŋwàklù mi yin ghàh à wâ nè ghàhnà Sòstenìs. ² Mu nyak ŋwàklù yìna ha nôn à ghɨt a bimena a Fùyènà ghe a ghɨ mô a yi tèk yi Kolèn, a ghe Yènfù chwoka, ni na ghɨna hi yulê, ha ghɨt a wuna tohne a Klistù Jisòs. Mu nyak ha ghàn, fî nyak kəbi ha ghɨt à jɨ̀m nâbi afa te ghɨna mò, toŋte yi yet yi Bâba ghàhnà Jisòs Klistù. Wù mô Bâba ha ghɨna, fê mô Bâba ghàhnà. ³ Yènfù, a Bì ha ghàhnà, ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn. ⁴ Mu fo àyòŋnà ha Yènfù kə yu mù jɨ̀m kum ghàn, njwo təm a jûŋà ghe a fu chwute ha ghàn tohne a Klistù Jisòs. ⁵ Klistù ti ni na ghàn hi kəta mwə̀ mù jùŋ kə mù jɨ̀m, fate khə hi fòktè tum à Fùyèn, fê kəta tof tù jɨ̀m. ⁶ Gha ye a ghàn ywo kum Klistù ti khɨti ghaŋtu hì ta kə ni a ghàn a fùtɨ̂n. ⁷ Yi ti ni na ghàn hi gha wi nâbi yìni fo a Yohnà Fùyènà fo, shyəma ghàn hi yute na Bâba ghàhnà Jisòs Klistù kahà ben. ⁸ Wu nê na ghàn hi kəta jyaka hi tàn a gòkhi shyəma wùt bê tê ngane jə̀ ghàn wu tuk afa a Bâba ghàhnà Jisòs Klistù kaha bena atɨ̂n. ⁹ Yènfù chwùnè nâbi ghə, nê kə yâ. A mô wûn a wù toŋa ghàn na ghàn hi mô ghàn à Wâ wûn amok, a Bâba ghàhnà Jisòs Klistù. ¹⁰ Mu chyate ghàn a wana noma a Bâba ghàhnà Jisòs Klistù yi yet na, ghàn hi mô kə jwo yì mòk a gha afa a ghɨ jîsà shyəma jyàhènà hi bu a ghàn a fùtɨ̂n. Ghàn kəta hi tè bɨlà mò kə à shyə̀ à mòk, kəta kə kwâktì yì mòk, fê ke gha kə wu lum wù mòk. ¹¹ Mu jìsà ni a wana noma beka ghɨt ale a Kɨ̀lowè a ndâ ti fôktì ha mu na njaŋi làwû a ghàn a fùtɨ̂n. ¹² Gha ye a mu jìsà ni mò na nâbi nde a ghàn a fùtɨ̂n hì jîsà kə hanɨ̂ŋ. Ghɨt ale jîsà na, ghɨna mò ghɨt a Bôl; ghɨ le jîsà na, ghɨna mò ghɨt a Àbolòs, ghɨ le jîsà na, ghɨna mò ghɨt a Sefàs; ghɨ le jîsà na, ghɨna mò ghɨt a Klistù. ¹³ A ni mò na ghɨ jyati lô Klistù ma? À mò Bôl a ghɨ tì bante a ghàn wu lùk ma? Ghɨ tì fo mòlû ha ghàn a Bôl yi yet ma? ¹⁴ Mu fo àyòŋnà ha Yènfù na mu tà tì fo jə mòlû ha wùt ha ghàn, a bu kə ha Kɨ̀lisibùs ghê Gayùs. ¹⁵ Yi ni chwùtè na wùt ha ghàn wi hi tè jìs na ghɨ tì fo mòlû ha yi a mu yi yet. ¹⁶ Mu tì boŋ fo kəbi mòlû ha ghɨt a Sɨ̀tèfanàs a yi sah yi nda. Mu baha fè kwâktè khɨle wi wùt wùlè te mu fo mòlû ha wûn a bu kə ha ghɨt mɨ ghɨ̂n. ¹⁷ Klistù tà tì tum jə mu na mu bê hi fo mòlû ha ghɨta. Wù tì tum na mu bê hi fôktè tum yì jùŋ, fôktè wi nì tof yi ghɨ̂tì. Mu hì fôktè ni, ma kpû yi wuni a kàkfùtàfù hi chwûtè wi jyak ghe a ghɨ kəta. ¹⁸ Ghàhnà khə na tum à yì kpû yì Klistù a kàkfùtàfù mò yi gha yi ngwoni ha ghɨt ghe a ghɨ ləhà yênà, biyani ha ghàhnà ghe a Klistù bònhe, yi chwûtè jyak a Fùyènà. ¹⁹ Yi mô kə yi ghəl te ghɨ nyaka a ŋwàklù Fùyèn na: “Mu nè bobhelò gha ghe a ghɨt a tofana lyè na à mò gha tofana, ma mu ni ma ghɨt ghe a ghɨ khə gha, hi fê khə wi nâ gha yile.” ²⁰ Wùt wù tofana lâ? Chichà yi sak lâ? Nâ wùt we a wù khə hi gùfnà gha a mbye afân lan lâ? Ba Yènfù ti nî tof yi ghɨ̂tì a mbyî ti kahi hì mô kə à ngwò? ²¹ Yènfù ti yen kə nâ nì tof wu wunu na wùt bè khɨle wi wûn nì tof wu wunu wu ngɨŋu. Fu ti bɨlì lem na fu bè bônhè ghɨt ghe a ghɨ ywo tum ye a ghàh fòktè ghɨ bimi lò nâbi te ghɨt ale jìsà na à mò ngwòna yi gha. ²² Ghɨt a Jûs khɨŋa kə chwena su kanasu, ghɨt a Gɨlìs khɨŋa hi tè kəta yi tof, ²³ biyani ghàh bɨlà fôktè kə yi gha kum Klistù te ghɨ tì bante. Gha mi yin yafa ghɨt a Jûs, a mô yi gha yi ngwoni ha tumu. ²⁴ Biyani ha ghɨt ghe a Yènfù chwokte, makə à mò ghɨt a Jûs makə à mò wu tûm, ghɨna khə na Yènfù chwùtè jyak a wuna nì tof wu wunu tohne a Klistù. ²⁵ Gha ye a yi kə̂kà te gha ngwoni ha ghɨta kum Yènfù chyàlò gha tofana ghɨ̂tì, ye a yi chwûtè na Yènfù kəta wi jyaka, kəta a jyak ghɨ chyâ jyak a ghɨ̂tà. ²⁶ Wana noma, ghàn kahà kwakti te ghàn ndùku mô shyəma Yènfù toŋa ghàn. Ghàn ki ke a ghàn a fùtɨ̂n, ma ghàn yen na ghɨt ghe a ghɨta ndùku lyê ha a ghɨt a tofana ndùku dô wi, ghê a ghɨ ndùku yena na à mò ghɨt a jyaka dô wi, ghe a ghɨ yena na ghɨ fwo a sah a nda a ta dô wi. ²⁷ Biyani Yènfù chwok gha ghe a ghɨt a mbye ndùku yena na à mò a gha ngwona ni na ghɨt a tofana wumi, wù fî chwok gha ghe a ghɨta yena na à mò gha a bota, ni na ghɨt a jyaka wumi. ²⁸ Yènfù chwok ghɨt a bota ghe a ghɨ lyê wi ghɨna a shyə̀ ale, fî chwokti mwə̀ me a ghɨta yena na mù wijə yi gha hi bobhi me a ghɨ yena na à mò kàntè mwə̀, ²⁹ shyəma wùt hi kəta wi gha hi ghaŋhe wu wun atɨ̂n a Yènfù ashyə̂. ³⁰ Biyani a nê Yènfù na ghàn hi chyə̂ kum Klistù Jisòs. Fu ti ni na wù hi mô tof wu ghàhnà, ni na ghàhnà hi mô chilichili tohne a wûn, fi ni na ghàhnà hi yulê, yun tu wu ghàhnà. ³¹ A ni gha ye a yi mô kə yi ghəl te ghɨ tì nyàka a ŋwàklù Fùyèn na, “À hì jala nâbi nde, wu hi jala kə kum gha ye a Bâba ne.”

¹ À ndùku mô te mu bèna hi yen a ghàn a wana noma, hi fòktì gha ye a yi mô hamok kum Yènfù, mu hì jîsà wi jîs yi fomani, jîsà wi nâbi te wùt à ŋwàklù. ² Mu ndùku mô ma mu ti lem na mu fè khə wi gha yile, a bu kə hi tè jìs kum Jisòs Klistù, nì kpu yi wuni a tô kàkfùtàfù. ³ Mu ndùku mô ghàhnà ghɨ̂n, wun wu mu botê, chiŋtê, fànà nâ haŋaŋ. ⁴ Mu ndùku jîsà fê fôktè tum yì jùŋ bu nì tofu ma wu lo ha wùt, à ndùku mô tof hi nì na wùt bimi gha, biyani mu ndùku fôktè, yi chwûtè jyaka Yohnà Yulena. ⁵ Mu jìsà ni hi nì na kə bimî yani hi yikte a ghɨta wu tof biyani na ghàn hi yikte kə jyak a Fùyènà. ⁶ Nâbi te mu jìsà gha mɨ ghɨ̂n à jɨ̀m ni, ghàh yike a gha nì tofu ha ghɨt ghe a ghɨ ti ghəkna a ghɨna yi bimî. Tof wu tɨnu wijə tof wu mbyi makə tof wu ghɨt ghe a ghɨ saka mbyî yîn, a mô a ghɨt hi bè chyà mì. ⁷ Tof ye ghàh jìsà à mò tof yi leteni wu Fùyènù, ma ghɨ ti let ha ghɨta. Yènfù tì lem shyəma wù fati mbyî yin na, tof wu tɨnu bè nêlò ma ghàhnà hi boŋa yule kəbi te Klistù. ⁸ Nâ wùt sakana wù mòk a mbyî afân khə wi tof mu wûn. À ndùku mô na ghɨna hi khə, ma ghɨna tà tì banti jə Bâba we a wù kəta kokhînì. ⁹ Ghàh yike kə te ghɨ nyaka a ŋwàklù Fùyèn na: “Wùt tà timi yen jə̂, teka wùt timi yû, wùt tà timi kwâktì kəbi yi kwâktì gha ye a Yènfù bakte lema ha ghɨt ghe a ghɨ kôŋà wûn.” ¹⁰ Biyani ma Yènfù ti ni Yohnà wuna chwûtè banhi gha a letena wuna ha ghàhnà. Yohnà Fùyènà yena kə gha à jɨ̀m, yena nâbi ghə ghe Yènfù lèta. ¹¹ À mò kə yohnà ghe a ghɨ mô wùt wù wùn a ghɨ khə mihè wùt àtɨ̂n. Yi ni mò kəbi yi ghəl te wùt wi hi tè khə gha ye a yi mô a Yènfù yi kwàktì, a bu kə Yohnà wuna. ¹² Ghàhnà tà fyi jə yohnà ma ghɨ lo a mbyî, ghàhnà bɨlì fyi Yohnà ghe a ghɨ lo ha Yènfù shyəma ghàhnà hi khə mwə̀ me a fu fo ha ghàhnà. ¹³ Yi ni mò na ghàh shihi yikî, ghàh hi yike wi gha nì tofu ma wu lo ha ghɨta. Ghàh yike gha a chwûtè Yohnà Fùyènà. Ghàh yike banhi gha yòhnà ha ghɨt ghe a ghɨna kəta Yohnà mɨ ghɨ̂n. ¹⁴ Wùt we a wù kəta wi Yohnà Yulena wi hi fye mwə̀ me a Yohnà Fùyènà fo, beka à mò mwə̀ mù ngwo mù ha wûn. Wù wi hi tè khə mwə̀ munâ beka à mò hi nè kə Yohnà Yulena na wù hi khə. ¹⁵ Wùt we a wù kəta Yohnà Yulena yen a khɨle lò kə mwə̀ mù jɨ̀m, biyani ma wùt lè wi hi yen a khɨle yi gha kum wûn. ¹⁶ Yi mô kə te ghɨ tì nyàka a ŋwàklù Fùyèn na: “Wùt khə wi gha ye a Bâba kwàktè hi tobhi wûn.” Biyani ghàhnà kəta kwâktì yi Klistù.

¹ Mu wi hi tè jìs ha ghàn a wana noma te mu jìsà ha ghɨt ghe a ghɨ kəta Yohnà Yulena. Mu jìsà ha ghàn kə te mu jìsà ha ghɨt a mbye, a mwəlà a yi bimî ha Klistù. ² Gha ye a mu tì yike ha ghàn yi mô kə ni te yi ghə̂n ye ghɨ fo ha mwəlà mù bot, a bu mwə̀ mù yə̂mù mù tâ beka ghàn ndùku baha mô teka ghàn ləmà kpen. Nâ chîn, ghàn baha mô teka ghàn ləmà kpen. ³ Ghàn baha chyə kə te ghɨt a mbye. Ghàn hi khə na ghə̀k nì njaŋi shìki tè mò a ghàn a fùtɨ̂n, ghàn nê gha ghe ghɨt a mbye nè, fê chyə kə te ghɨna, ya mò na ghàn nè kəta ghɨt a mbye. ⁴ À mò wu yu afa wùt wù mòk jìsà na, “Mu jùmtè Bôl,” wùlè jîsà na, “Mu jùmtè Àbolòs,” yi hi chwûtè na ghàn baha chìnà mô kə te ghɨt a mbye. ⁵ Nâ biyani, Àbolòs mò nde, Bôl mô nde? Hi nì na ghàn hi njaŋa? Ba à mò kə ghɨt a fetana te Yènfù fo ha ghàn na ghɨna hi fôktè tum yì jùŋ ma ghàn yu ma ghɨ bimi. Nâbi nde nè kə fêt ye a Bâba fo na wù hi nê. ⁶ Mu yome ngwìk a ghàn a təm, Àbolòs sûhà mòlû yi sah àtɨ̂n, biyani a nê Fùyèn na yi ləma. ⁷ Yi mô na wùt we a wù yome nì wùt we a wù sùhà mòlû kpene wi yi gha yile, à kpene kə Yènfù te fu nê yi ləmnê. ⁸ Wùt we a wù yome nì wùt we a wù sùhà mòlû mò kə yi ghəl, nâbi nde mô hi bè khɨte maktu wunu kə te wù chehì fêtà. ⁹ Ghàh chìntè fêtà kə ha Yènfù. Ghàn mô a fûk a Fùyènà, fê mô ndâ Fùyèn. ¹⁰ Mu ti lyi fo ye a Yènfù fo ha mu lem a chyə a nda te wut we wù fate khə ba, ghɨt ale hi ba a tô àtɨ̂n. Nâbi nde hi tôknè wu lum afa wù ba atɨ̂n. ¹¹ Yènfù hì mô ma fu ti lem Jisòs Klistù na à mò kə a chyə a nda ghe a ghɨ mô, wùt bu hi fè lèm chyə nda ale. ¹² Ghɨta ba a tô chyə nda mɨ ghɨ̂n. Ghɨt ale ba nì gûl, ghɨ le nì silfà, ghɨ le ba nì te jûŋà, ghɨ le ba nì kàkû, ghɨ le ba nì wunu. ¹³ Ghɨ bè chwùtè banhelò nâbi fet yi nde a ndan. À bè hi mô mu tuk shyəma Klistù kahà ben atɨ̂n, ma ghɨ mom nâbi fêt yi nde nì wusu, ma wù chwuti nâbi yìni nki fèt ye a wùt chehì fêtà. ¹⁴ Yènfù bè folò maktu nâbi ha nde we a ghɨ moma fêt yi wuni nì wusu, yi faŋ hi fimî. ¹⁵ Ghɨ ki môm nâbi fêt yi nde, yi fimî, ma ghɨ tê fo jə̀ maktunu ha wûn ma wù bon biyani wù bon kə te wùt te wù nyɨŋa tohne a wu wùs. ¹⁶ Ba ghàn khəlò na ghàn mò ndâ Fùyèn, Yohnà Fùyènà chyə a ghàn a fùtɨ̂n agha? ¹⁷ Wùt ki bobhi ndâ Fùyèn, ma Yènfù boŋà bobhi wûn beka ndâ Fùyèn yulelò, nâbi nde a ghàn a fùtɨ̂n mô a ndâ Fùyèn mi yê. ¹⁸ Kə wùt lehi ngɨŋ à wûn. Wùt shìki mô a ghàn a fùtɨ̂n kwâktè na yi tofalò wu lum afa a ghɨt a mbye afân ke atɨ̂n, wu bɨlì kahi ha ngwò shyəma wù khɨti kàntè yì tof. ¹⁹ Wù kəta hi nì ni beka tof ye a ghɨt a mbye ghɨ̂n kəta mò kə nâ a ngwò ha Yènfù. Ghɨ ti nyak a ŋwàklù Fùyèn na, “Yènfù tama kwo ghɨt a tofana kə ghɨna yi tof.” ²⁰ Ghɨ ti fî nyak kəbi na, “Bâba khəlò na kwâktì ghɨt a tofana fètà wi gha yile.” ²¹ Kum ni, kə wùt hi ghaŋhe wunu jîsà na yi mò wût, njwo Yènfù ti fo kə mwə̀ mù jɨ̀m ha ghàn. ²² Yi mô na, makə à mò Bôl makə à mò Àbolòs makə à mò nâbi Sefàs makə à mò mbyî yìna, makə à mò chyəna, makə à mò yi kpû, makə à mò yu wun chîn, makə yu we a wu bè bênà, mwə̀ mu muna nâ mù jɨ̀m chìntè kəta kə ghàn. ²³ Yi mô ni a kəta Klistù ghàn, a kəta Fùyèn Klistù.

¹ Ghɨta kəta hi tè lyè ghàh te ghɨt a fetana ha Klistù ghe a ghɨ fo gha a letena ghe a ghɨ mô kum Yènfù a ghɨna wô. ² Nâ gha yi ta ha ghɨt a fetana mò na ghɨna hi chwûtè na, ghɨna fètà kə nâ hamok. ³ Ha mu, à mò kə nâ gha yi tetani na ghàn hi saka mu makə à saka ghɨt ale. Nâbi mu saka wi ngɨŋ à mì. ⁴ Mu kwàktè khɨle wi gha yi be yile te mu ne, biyani yi chwûtè wi na mu tà bobhi jə gha. À mò kə Bâba hi sak a mu. ⁵ Kum ni, kə ghàn kat sak a wùt lè tû teka yu tɨnu kpen. Ghàn yuti ma Bâba ben. Wù bênà hi chwùtè banhe gha a letena ghe a ghɨ nyamte nê a bɨn a finana, a fôktè kwâk te a ghɨta lètà a ghɨna təm, ma Yènfù ki bəmhe nâbi nde a wun yi fèt. ⁶ Mu jìsà gha mɨ ghɨ̂n a wana noma kum ngɨŋ à mì ghàh à Àbolòs kə ha chwena shyəma ghàn yiki, ghàn hi nê kə gha ye a ghɨ nyaka a ŋwàklù à Fùyèn. Kə wùt ha ghàn hi ghaŋhe wunu kum wùt wùlè, kəhe wùlè. ⁷ À jis nde ha wò na wò chyàlò ghɨt ale agha? Wò kəta nâ ghə teka ghɨ fo yi fô agha? Wò shìki kəta a shyə ma ghɨ fo yi fô, wo hi ghaŋhe wunu te ghɨ tà fo jə yi fô njwô ghə? ⁸ Ghàn hì mô ma ghàn ti khɨti nâbi ghə te ghàn khɨŋa ma? Ghàn hì mô ma ghàn ti ghak kpên ma? Ghàn jìsà na ghàn mò tu fə̂n, biyani ghàh bu tu fə̂n. Nde fo ma ghàn hi mô kə nâ tu fə̂n hamok shyəma ghàhnà hi saka amok agha? ⁹ Yi kə̂kà ha mu na Yènfù ti lem na à kəta ghàh ghɨt a tuma lùk wu gokhenu, hi kputî a ghɨta ashyə̂. Yi kə̂kà na ghàh mò ghɨta te ghɨ saka hì mô hi ywî kə mbyî yì jɨ̀m ashyə̂ bakhe nì anjèlsù Fùyènsù. ¹⁰ Ghàh mò wù ngwò ha ghɨta kum Klistù, ghàn mô ghɨt a tofana a Klistù a ghâ. Ghàh yolelò biyani ghàn tâ. Ghɨta kokhe ghàn biyani lyê wi ghàh a shyə̀ ale. ¹¹ Hi tàn chîn, jìŋ yafa ghàh, kuŋ à mòlû fê yima ghàh. Ghàh mâkà kə shàklà mù sùju, ghɨ sama ghàh, ghàh jɨ̂ŋà, kəta wi luku hi chyə̂. ¹² Ghàh fêtà nì jyaka, kə nâ nì wo wahu. Ghɨta shihi sùlè ghàh, ghàh hi bɨlà jə̂mà na Yènfù bonhi ghɨna, ghɨ fo ngə̂k ha ghàh, ghàh hi wunhe kə yi wunhî. ¹³ Ghɨta bobhe a yet ghaha biyani ghàh jîsà kə nì jyə̀ yì bonana. Ghɨta lyê ghàh ha mwə̀ mù màknemù a mbyî, fê lyê ghàh a yi liŋ. ¹⁴ Mu nyàkà wi gha ghɨ̂n ni, hi wumhe ghàn, mu bɨlà nyâkà hi yike ghàn te wana ma ghɨ kòŋà. ¹⁵ Ghàn shìki kəta kəbi ghɨta ghɨ tôknè tobhe ghàn kum Klistù, ghɨ taŋa ghɨ mê wi biyani kəta kə bì wù mòk. Mu hì mô ma mu tì ben te bì ha ghàn yi gha yi Klistù Jisòs tohne a tum yì jùŋ yi wun afa a mu ndùku yike ghàn. ¹⁶ Mu chyate ghàn na, ghàn hi sine chyənà à mì. ¹⁷ A ni gha ye a mu tuma Timotì ha ghàn. Wu mô wâ mù wù kòŋ, mu samhe ha wûn beka wù jùmtè Bâba nâ a jûŋ. Wu nê ghàn yɨ̂ŋtè chyənà ye a mu chyə te wùt à Klistù. Mu yike chyənà mi yìna a chìnti à ghɨt a bimena kə tu luk tù jɨ̀m. ¹⁸ Ghɨt ale a ghàn a fùtɨ̂n ghaŋhe wu wun, kə̂kà na mu bê wi hi yen a ghàn. ¹⁹ Biyani ma Bâba ki bimî, ma mu motè kə ni ma mu bê yen ghàn. Mu bênà hi tè ywo kə gha ghe a ghɨna ghaŋhe wunu jìsà, hi fê yen kə nâ jyak ghe a ghɨna jìsà na ghɨ kətalò. ²⁰ Fə̂n wù Fùyènù mò ni, a bu yi jwo yi kumani, ghɨ yena jyak atɨna a gha afa a ghɨta nè. ²¹ Ghàn kòŋà na mu shihi bèn ha ghàn, ma mu ben nì ghə? Ghàn kòŋà na mu ben nì wàn ma, ma mu ben nì kôŋì nì bonanì agha?

¹ Mu ti yu te ghɨ jîsà, yi mô kə nâ hamok na ghàn ghɨ le chyə chyənà su liŋsu. Lum we a ghàn chyə atɨ̂n befa chyâ nâ te ghɨt ghe a ghɨ khə wi Yènfù chyə. Mu ti yu na wùt làwû a ghàn a fùtɨ̂n, chyə̂ nì ywê bè à wûn. ² Gha ni kə̀kà ni, ghàn ghaŋhe wu wun kum ghə? Ba ghàn bɨlà mô hi tè jì hi fè jùmà fihi wùt we a wù mòmà nki yi gha mi yîn a ghàn a nòn? ³ Nâbi te mu bu ghàhnà ghɨ̂n, ghàhnà mò kə amok a yòhnà. Mu hì mô ma mu ti kat sak kum wùt mu wuna a wù mòmà gha mi yîn, kə yi ghəl te ghàhnà ye hì mô kəbi amok, ma mu kat. ⁴ Ghàn yûŋtì nâbi wùni yu, yohnà ma hi boŋa mô a ghàn a fùtɨ̂n. Ghàn fî yûŋtì, ghàn lyi a jyak ghe a Bâba Jisòs fo ha ghàhnà, ⁵ ghɨ fo wùt mu wuna ha Satàn, ma wù bobhi chyak a wuna a wùna, shyəma ghɨ bê bonhi yohnà a wuna a wu tuk afa a Bâba Jisòs kaha bênà atɨ̂n. ⁶ Ghaŋhi wùn mi yîn jwòfà wi. Ba ghàn khə na chɨmlana tobte nâbi yàni, ghɨ gbi kə a bân a kwaŋa à jɨ̀m. ⁷ Yi ni chwùtè na ghàn kəta hi màkà be a ghàn a fùtɨ̂n hi kahi hi tè mò te tuk à bân chɨmlana bu atɨ̂n. Mu khə na ghàn hì mô te tuk a bana chɨmlana bu atɨ̂n beka Klistù we à mò wâ njyə̀ Dàŋa chyalana ha ghàhnà hì mô ma ghɨ ti se wun ha yi fô. ⁸ Ghàhnà yə lê tuk wu Daŋa chyalanu mu wûn. Ghàhnà shihi yə, kə ghàhnà hi yə nì təm a be makə nì be. Be mò kə te chɨmlana a bân. Ghàhnà bɨlà yə ban ghe a ghɨ kəta wi chɨmlana a mô təm a yulena nì gha ye a yi mô hamok. ⁹ Mu tì nyak ha ghàn na, kə ghàn hi chîntè ghàn à ghɨt ghe a ghɨ chyə chyənà kpàlà. ¹⁰ Mu tà tì jis ni bakhe ghɨt ghe a ghɨ ngumle wi Yènfù a mbye afân ni te ghɨt a se a fwona nì ghɨt a chwoŋana nì ghɨt ghe a ghɨ kokhe mosòmù, beka wùt shìki mô hi tet ghɨt mɨ ghɨ̂n, ma yi hi mô na wù làhi fwo chyà a mbyî. ¹¹ Mu tì bɨlì nyak hi jìs na, kə ghàn hi chîntè ghàn à wùt wu toŋte ngɨŋ à wûn na wâ nì biyani jûmtè ywena makə lɨmànà, se a wuna fwô, wu fê kokhe mosòmù. Mu ndùku jîsà na kə ghàn hi chîntè ghàn à ghɨt ghe a ghɨ bobhe yet a ghɨ̂tà, fê nyo lùkû mu kwo ghɨna kəbi nì ghɨt a chwoŋana. Kə ghàn mom kə nâ hi tè yə ghàn à nki ghɨt mɨ ghɨ̂n. ¹² Nâbi ha nkàn, mu te wut wù bimena kəta wi hi tè sak à ghɨ̂t, ghɨna bu a ghàhnà a nòn. Ghàn kəta hi tè sak kə ghɨt ghe a ghɨ mô a ghàhnà nòn. ¹³ À saka kə Fùyèn ghɨt ghe a ghɨ bu a ghàhnà nòn. Ghɨ nyak a ŋwàklù Fùyèn na, “Ghàn jum à fihi wùt wù be a ghàn a fùtɨ̂n.”

¹ Wùt ha ghàn ki lyê sak ghê wâ nè wûn atɨ̂n à yi bimî, hi lyè yèn ni yìni ha ghɨt a Fùyènà, wu bɨlì yen nì yinì ha ghɨta, a bu ghɨt a chilichili na ghɨna sak njwô ghə? ² Ba yi ni mò na ghàn khə wi na à bè saka ghɨt a Fùyènà mbyî ma? À shìki tè mò hi bè saka ghàn mbyî, ghàn hi ma yàni hi tè sak a saklà mù bot a ghàn a fùtɨ̂n agha? ³ Ba yi ni mò na ghàn khə wi na à bè saka ghàhnà anjèlsu Fùyènsu ma? Ghàhnà shìki hi tè mò hi bè sak a anjèlsu Fùyènsu, ghàhnà hi ma yàni hi sak gha a mbye agha? ⁴ Yi ni mò ni, ghàn hi kwote saksu lyê yênà nì sinsu ha ghɨt a sakana, ghɨ kpene wi nâ yi gha yile a ndâ Fùyèn njwô ghə? ⁵ Ghàn wume wi? Ba yi ni mò na wùt tofa kpene wi a ghàn a fùtɨ̂n hi tè kàtà saksu atɨ̂n à wana ne ma? ⁶ Chîn ni mò wâ nì bɨlà lyê yênà nì wâ nè wûn wu lùk wu saku na ghɨta sak, a bu a ghɨt a bimena. ⁷ Sak mu sin a ghàn kəta a ghàn a fùtɨ̂n ni chwùtè kə nâ na ghàn ti fên. Yi jwôfà na ghɨta hi bɨlà nê be ha ghàn. Yi jwôfà na à hi bɨlà lô ghɨta lehe ghàn, fye mwə̀ mânù. ⁸ Biyani nâ ghàn a ghàn a sù ngɨŋ nèlò besu ha wana ne ghana fê lehe ghɨna, fye mwə̀ mù ghɨna. ⁹ Ba yi ni mò na ghàn khə wi na ghɨt ghe a bu chilichili bè lye wi wu lùk wu fə̀n wù Fùyènù ma? Kə wùt lè bè lehe ngɨŋ à wûn. Ghɨt ghe a ghɨ chyə nì ywena makə ghê lɨmànà, a kəta wi ghɨna, nì ghe a ghɨ kokhe mosòmù makə ghe a ghɨ khɨma sak yi malâ, nì lɨmànà ghe a ghɨ kaha chyə nì ghɨ le, ¹⁰ nì ghɨt a chwoŋana nì ghɨt a se a fwona, nì ghe a ghɨ nyo lùkû, mu kwo a ghɨna, nì ghɨt ghe a ghɨ bobhe yet a ghɨ̂tà, nì ghe a ghɨ chwoŋa chwoŋ yi ta, bè lye wi wu lùk wu fə̀n wù Fùyènù. ¹¹ Ghɨt ale a ghàn a fùtɨ̂n ndùku mô kəbi ni, biyani chin hì mô ma ghɨ ti su fihi be sanisu, ghàn ti yulî fî ni ghàn hi mô chilichili a Yènfù ashyə̂. Gha mɨ ghɨ̂n mò ma ghɨ gan a Bâba Jisòs Klistù a jyak ma à ni a Yohnà Fùyèn fu ghàhnà fu. ¹² Wùt wùlè làhi jìs na, “Mu làhi nì nâbi ghə.” Yi mô kə nâ hamok biyani a bu gha à jɨ̀m a ghɨ mô hi gàmtè a wût. À mò ha mu, ma mu làhi nì nâbi ghə, biyani bu hi tè mò a kwôs nâ a yi gha yile. ¹³ Wùt làhi jìs kəbi na, “Ghɨ yə nâbi ghə, ghɨ yênà kə wu là, lâ mô kə hi tè fye mwə̀ mù yə̂mù.” Yi mô kə nâ hamok biyani Yènfù mô hi bè bobhi lâ tɨnu bakhe kə nì mwə̀ mù yə̂mù. Wun wu wûtù wijə na ghɨ hi nê gha a tu liŋa atɨ̂n, wu bɨlà mô hi tè nè yi fêt atɨ̂n ha Bâba, a mô Bâba a wù tòknè nì wun wu tɨnu. ¹⁴ Yènfù tì lôhì Bâba a yi kpû, ghɨ mô hi bè lòhè kəbi ghàhnà a wun a jyak. ¹⁵ Ba yi ni mò na ghàn khə wi na wun yani mò bâh à wùna a Klistù ma? A ni jìsà na mu làhi lyè bâh à wùna Klistù hi nì na à hi mô bâh à wùna a kpàlànà agha? Yi wi hi tè mò ni! ¹⁶ À ki chyə nâbi nde ghê kpàlànà, ma ghê ghɨna hi mô kə a shyə̀ à mòk! Yi mô kə yi ghəl te ghɨ nyaka a ŋwàklù Fùyèn na, “Ghɨna à bà bè kahe ma ghɨ hi mô kə a shyə̀ à mòk.” ¹⁷ À mò ha wùt we a wù chìnte ghê Bâba, kəta kə təm yì mòk ghê wûn. ¹⁸ Ghàn tet à kahi a yi bàm a gha tu liŋa. Wùt ni nâbi yìni gha yi be yi wi hi bobhi wun wu wunu, biyani ma wù ki nê yi gha tu liŋa ghê wùt ywên makə ghe wùt lɨmà, ma wù bobhi wun wu wunu. ¹⁹ Ba yi ni mò na ghàn khə wi na wun yani mò ndâ Yohnà Yulena te Yènfù fo na ghɨ hi chyə̂ a ghàn à fùtɨ̂n ma? À baha fê kəta wi ghàn, ngɨŋ sanisu, à kəta Fùyèn. ²⁰ Yènfù hì mô ma fu ti yun ghàn laklò. Ghàn lyi lê wun yani ma hi nê gha atɨ̂n, ghɨ fo kokhînì ha Yènfù.

¹ Mu jìsà gha chin kum gha ghe a ghàn tì nyàka bufa ha mu. Yi jwôfà kə nâ na kə wùt mala. ² Biyani kum te mômhìnì làhi bèn, ma wùt lye a chyənà à tu fiŋ, mu wu hì jîsà na nâbi wùni wùt lɨmà kəta hi tè kəta ywê wûn, nâbi wùni wùt ywên kəta hi tè kəta lɨm à wûn. ³ Wùt lɨmà kəta hi fo ngɨŋ à wûn ha ywê wûn kə nâ te saki khɨŋa, wùt ywên kəta hi nì kəbi ni ha lɨm à wûn. ⁴ Yi mô ni beka wùt ywên kəta wi jyaka a wun wu wùn, biyani à kəta lɨm à wûn, kəbi yi ghəl te wùt lɨmà kəta wi jyaka a wun wu wùn, a kəta ywê wûn. ⁵ Kə wùt nè tunhe hi fo ngɨŋ à wûn ha wùt wùlè, a bu kə na à bimi ghàn à jɨ̀m beka ghàn khɨŋa hi lyè wu yu hi jə̀m. Biyani yu tɨnu mî, ghàn kahi hì chyə chyəna malâ, bu ya, ma mômhì Satàn ni, ma ghàn fen beka ghàn wi hi khɨte ngɨŋ sanisu. ⁶ Mu jìsà gha mi yin ha ghàn, chyâhè wi ha yi sâk. ⁷ Mu làhi kòŋ na nâ ghɨt à jɨ̀m hi mô kə te mu. Biyani Yènfù mò ma fu ti fo fotu, nâbi nde kəta yi wuni, kə hanɨ̂ŋ. ⁸ Mu jìsà ha ghɨt ghe a ghɨ baha mô teka ghɨ mala, kəbi nì ywen a nkwô na, yi jwôfà na ghɨna faŋ à kə yâ, ma ghɨ hi mô kə te mu. ⁹ Biyani ghɨna shìki bu hi khɨte ngɨŋsu ghɨna su, ghɨna malâlò, beka yi jwôfà hi malâ chyâ hi tè mò nâbi yini, kwâktè kə wùt ywên makə wùt lɨmà. ¹⁰ Chin ha ghɨt ghe ghɨ ti malâ, mu fo a yi sak, a bu a yi sak yi mi, a mô yi sak yi Bâba na, wùt ywên kəta wi hi dè lɨm à wûn. ¹¹ Biyani wù ki dê, wu faŋ kə wù nɨ̂ŋ, bu ya wu kaha yen bakti ghê lɨm à wûn. Wùt lɨmà ni boŋa kəta wi hi jùm à ywê à wûn. ¹² Ha ghɨt ale, à ni jìsà mu, à jìsà wi Bâba na, wùt bimena shìki kəta ywi, a bu wut wù bimena, wùt ywên àtɨ̂n bimi hi tè chyə ghê wûn, kə wù jum wûn. ¹³ Wùt ywên wù bimena shìki tê kəta lɨm, a bu wùt wù bimena, wù bimi hi tè chyə ghê wûn, kə wùt ywên àtɨ̂n de wûn. ¹⁴ Yi mô ni beka Yènfù nèlò lɨm we a wù tà bimi jə̂ na wù hi yule kum ywê à wûn, fê nê wùt ywên we a wù tà bimi jə̂ na wù hi yule kum lɨm à wûn. Yi yê hì bu ni, ma wana ghɨna hi bu nì yulînì biyani yi hì mô hamok na ghɨna yulelò. ¹⁵ Wùt we wù tà bimi jə̂ ki kôŋ hi dè lɨm à wûn makə ywê wûn, wu de kə yi dê. Yi gan ni, sak yi malani tà fî khɨti jə wùt bimena makə à mò wù ywên, makə à mò wùt lɨmà. Yènfù toŋa ghàhnà na ghàhnà ben hi chyə nì yutìnì. ¹⁶ Wò wùt ywên wù bimena khɨli ha ghə na wò wi hi bònhè lɨm wâ agha? Wò wùt lɨmà wù bimena khɨle ha ghə na wò wi hi bònhè ywi wâ agha? ¹⁷ Yi ni mò na nâbi nde kəta kə hi tè chyə kə a wu lum afa a Bâba lèma na wù hi chyə̂, fê chyə kə te wù ndùku chyə wu tuk afa Yènfù toŋa wûn. À mò gha ye a mu yike ha ndasu Fùyènsu sù jɨ̀m. ¹⁸ À shìki mô nâbi nde ma ghɨ ti se nam a wuna shyəma ghɨ toŋa wûn, kə wu let. Wùt shìki mô ma wù ti bimi ha Yènfù, teka ghɨ se nam a wuna, kə wù fi jis na ghɨ se. ¹⁹ Hi se nam a wûtà makə hi faŋ hi sê, yi kəta wi gha hi nì. Gha yi ta mò kə hi tè lèma sak yi Fùyènì. ²⁰ Nâbi nde kəta hi tè mò kə wu lum afa a ghɨ tì shihi toŋa wun, wu mô atɨ̂n. ²¹ Wùt hì mô ma wù ndùku mô a kwôs wu tuk afa Yènfù toŋa wûn, kə wù jis gha, biyani wù shìki kəta wu lum hi tè mô ha ngɨŋ, wu hi mô. ²² Yènfù toŋa wùt na wù hi jûmtè Bâba, wu mô a kwôs, wu hi mô wut a wun a ngɨŋ ha Bâba kəbi yi ghəl te fu toŋa wùt, wu mô a wun a ngɨŋ, wu hi mô a kwôs ha Klistù. ²³ Yènfù hì mô ma fu ti yun ghàn laklò. Kə ghàn fi kahi hi mô wu kwôs ha ghɨta. ²⁴ Mu wu hì jîsà a wana noma na, Yènfù hì mô ma fu ti toŋa wùt, wu mò nâbi yàni, wu faŋ kə yâ wu hi mô kə ghê wûn. ²⁵ Mu jìsà yi gha chin kum ghɨt ghe a ghɨ baha mô teka ghɨ mala. Mu kəta wi saki ma yi lo ha Bâba, mu jìsà kə yi gha ye a mu kwàktè te wùt we Bâba kwohi seni ha wûn ni wu kpenê na ghɨ hi samhe ha wûn. ²⁶ Mu kwàktè na, yi jwôfàlò na wùt faŋà kə ya beka ngə̂k se a su mô chîn. ²⁷ Wò hì kəta ywi, kə wò jum, wò hì mô kəta wi, kə wò mala. ²⁸ Biyani ma wò ki malâ, ma à hi mô na wò tà ni jə be, ma walà wù ywên shìki mò ma wù ti malâ, ma à hi mô na wù ya tà ni jə be. Ghàn hi khə na ghɨt ghe a ghɨ mala kəta ngəksu a mbye afân, a mô ngə̂k mi sin a mu mòmhè hi bukhî na kə ghàn hi kəta. ²⁹ Nâ gha ye a mu jìsà a wan a noma ni mò na, yu we a ghɨ lema hì mô ma wu ti bakhî. Hi yìmì chîn hi yèn ashyə̂, ghɨt ghe a ghɨ kəta ywena kəta hi tè chyə kə te ghɨna kəta wi, ³⁰ ghe a ghɨ jyê yi mô kə te ghɨ jyê wi, ghɨt ghe a ghɨ saŋle hi mô kə te ghɨna saŋli wi. Ghɨt ghe a ghɨ yuna mwə̀lû kəta hi tè mò kə te ghɨna kəta wi shyə. ³¹ Ghɨt ghe a ghɨ fêtà nì mwə̀ mù chyə̂ kəta hi tè mò kə te ghɨ kəta wi gha kum mwə̀ mù tɨ̂n. Mu jìsà ni beka mwə̀ me a mù mò a mbyî chîn chyàlà kə yi chyâ. ³² Mu khɨŋa na kə gha hi fumhe ghàn. Wùt we a wù tà mala jə lèmà to kə hi tè nè gha a Bâba, mòmhè hi nè na Bâba hi saŋlê. ³³ Biyani wùt wù malana lêmà to a wuna kə gha a mbye, hi tè nì na ywê wûn hi saŋlê. ³⁴ Wù yê kəta kwâktì yì mòk. Wùt ywên we a wù tà mala jə̂ makə walà wù ywên lèmà kə gha Bâba hi tè mò nì yulînì wu wùn fê mô nì yulînì a yòhnà, biyani wùt ywên wù malana lêmà tô kə gha a mbye, hi tè nì na lɨm à wûn hi saŋlê. ³⁵ Mu jìsà gha mi yina beka mu khɨŋa hi gàmtè ghàn, a bu na mu khɨŋa hi fo a jita ha ghàn. Mu khɨŋa kə hi nì na gha hi gbê kə wu lum afa a ghɨ kəta hi tè gbì atɨ̂n, hi fè nì na ghàn fo ngɨŋ sanisu sù jɨ̀m ma ghɨ hi fêtà kə ha Bâba. ³⁶ Wùt shìki mô nâbi wùni yu, kwâktè kə wan wù ywên ma ghê wûn tî lem na ghê wûn bè fê mala wi, wu ləma yênà, wù kaha yen na yi tà tì ni jə a jûŋ, wù hì kôŋà wu kaha yen ghê wun malâlò. Wu ki nî ni, ma à hi mô na wù tà ni jə be. ³⁷ Biyani ma à ki lèmà nâbi nde a wun a yi kwàktì na yi nè hì mô kə yâ, khə hi khɨte ngɨŋ à wûn faŋ teka wù mala, a bu na ghɨ fihilô wûn, ma à lem kə nâ wun a wun a yi kwàktì na yi mala wi wan wù ywên àtɨ̂n, ma à hi mô ma wù ni kə yi gha yi jûŋì. ³⁸ Yi ni mò na wùt we a wù mala wan wù ywên wù wûn mò ma wù ni kə nâ yi gha yi jûŋì, we a wù faŋ hi malâ wu ti ni gha, yi jwôfà chyâ ye meti. ³⁹ Wùt ywên wù malana fè kəta wi hi malâ hi tàn te lɨm à wûn baha chyə, ma lɨm à wûn ki kpû, ma wù mala nâbi nde we a wù kòŋà, biyani a kəta hi tè mò wut, jûmtè Bâba. ⁴⁰ À mò a mu yi kwàktì, ma wùt ywên àtɨ̂n hi saŋle chyâ wu yu afa wù faŋa kə yâ. Mu kwàktè na Yohnà Fùyènà nè tihe lò kəbi jîs yi mi.

¹ Mu khɨŋa hi jìs yi gha chin kum mwə̀ mù yə̂mù me a ghɨ fo ha mosòmù. Ghàhnà khə na ghàhnà à jɨ̀m kətalò tofu. Tofu bênà kə nì ghaŋhi wùni biyani kôŋì ba à ghɨ̂t. ² Wùt we a wù kwàktè na yi khəlò gha baha mô teka wù khɨlè tan te wù kəta hi tè khə. ³ Biyani ma wùt shìki kôŋà Fùyèn, ma Yènfù hi khə wûn. ⁴ Hi jìs yi gha kum mwə̀ mù yə̂mù me a ghɨ fo ha mosòmù, ghàhnà khə na mosòmù wijə shyə ale. Ghàhnà khə kəbi na Yènfù mò kə fù mòk. ⁵ Nâbi ghɨt ale kwàktè na yèn mùlè nì bâba làwû a mbyî, fê mô a nyə̂, dô kə ni, ⁶ a mô ha ghàhnà, ghɨ khə na, Yènfù mò kə fù mòk, a mô Bì. À fati wun nâ mwə̀ mù jɨ̀m, ni na ghàhnà hi chyə̂, ngumle wûn. A fê mô kə Bâba wù mòk, a mô Jisòs Klistù, ma ghɨ tì fati mwə̀ mù jɨ̀m tohne a wûn, ghàhnà hì chyə̂ kə kum wûn. ⁷ Nâbi ya, a wijə ghɨt à jɨ̀m a ghɨ khə gha mɨ ghɨ̂n. Ghɨt ale hì mô ma gha mù yèn mu yîn ti khəta ha ghɨna, ghɨna tê hì yə mwə̀ mù yə̂mù ma ghɨ fo ha yènû, gha tɨni ti faŋ kə a ghɨna yi kwàktì. A ni gha ye a yi bobhe kwâktì yi ghɨna beka yi bota. ⁸ Mwə̀ mù yə̂mù wi hi nè na ghàhnà nì Yènfù hi bu a jûŋ. Ghàhnà lə̀hènè wijə shyə ale a wu yu afa ghàhnà faŋa hi yə̂, mbì bu wu yu afa ghàhnà yə. ⁹ Ghàn tòkna, kə lum we a ghàn nè gha ghana ghɨ ngɨŋa atɨ̂n a ghɨt ghe a fùtɨ̂n a bimî yi ghɨna bota na kə ghɨna lye a be. ¹⁰ Wò khə na wùt ki yena wò nì tof we a wò kəta, wo mô a ndâ fù mosò wu lùk wu yəna, ma yi ni wûn a wu yu afa wù kəta kwâktì yi boti, na wù yə mwə̀ mù yə̂mù ma ghɨ fo ha yèn mù. ¹¹ Yi ki gân ni, ma à hi mô na tof ya ti bobhi wâ nâ we kwâktì yi wuni bota, ma Klistù tì kpu kum wûn. ¹² Ghàn hi khə na ghàn nè ni, ma à hi mô na ghàn ti ni be ha wana ne ghe te ghàn bobhe kwâktì yi ghɨna, yi baha botâ, a mô be te ghàn ne ha Klistù. ¹³ Yi ni mò na, nyàm shìki mô hi nì na wâ nôm ni be, ma mu bê tè fè kut a nyâm, kə mu ni na wù fen.

¹ Mu mò kə nâ wùt wù tum, a kəta kə nâ mu ngɨŋ à mì. Yi mô na mu tà tì yen jə Jisòs a Bâba ghàhnà ma? Ba ghàn mò tam wu fèt wu mu ha Bâba? ² Mu shìki bu wut wù tum ha ghɨt ale, ma mu hi mô wut wù tum ha ghàn, beka lum we a ghàn mò atɨ̂n ha Bâba chwûtèlò kə nâ fêt yi mi te wut wù tum. ³ A ni lum we a mu nè hì jîsà atɨ̂n hi gàmtè ngɨŋ à mì a wu yu afa ghɨta ngane mu. ⁴ Yi ni mò na ghɨ kəta wi hi tè fo mwə̀ mù yə̂mù makə shyə hi nyû a ghàh yì fèt afa a ghàh nè ma? ⁵ Yi ni mò na ghàh kəta wi jyaka hi lyè wùt wù ywên wù bimena ha ywi, hi tè gbì nì wûn kəbi te wâ nè Bâba nì Sefàs nì ghɨt a tuma ghɨ le ma? ⁶ A ghɨ ni jìsà na à mò kə ghàh à Bànabàs a ghɨ kəta hi tè fèt kə yi fêt shyəma ghɨ yə ma? ⁷ À mò yìni sojà ye a yì fètà fê kaha lâkà ngɨŋ à wûn agha? À mò nde hi fèt a fùk, bu hi la tam we wu fwo a fùk afû agha? À mò yìni chìn à sù nyâm ye yì kama wi ghəni nyâmì hi nyo agha? ⁸ “Mu jìsà wijə kə gha mɨ ghɨ̂n te wût, nâ Saki jìsà kəbi ni. ⁹ Ghɨ ti nyak a Musìs ŋwàklù yì Sak na, kə wò bè kwuta jwo mbòŋì yi chika a saŋ.” A Yènfù ni jìsà a gha wu lùk afân kum kə mbòŋsù ma? ¹⁰ Yi mô hamok na fu jîsà kum ghàhnà beka wùt wù fètana nì wùt wu kpèna shihi nè yi fêt, ghɨna hi khə hamok na ghɨna kətalò mwə̀ mù yə̂mù hi yə̂ nâ a ghɨna sù ngɨŋ. ¹¹ Ghàh shìki mô ma ghɨ ti yomi tum yì jùŋ a ghàn a təm, ma à hi bu gha yi be shyəma ghàn hi fo mwə̀ mù yə̂mù ha ghàh. ¹² Ghɨt ale shìki kəta a jyak hi tè kî na ghàn fo mwə̀ mu yə̂mù ha ghɨna, ma ghàh hi kəta chyâ nâ yâ. Biyani ghàh shìki mô teka ghàh ni gha kum a jyak mɨ ghɨ̂n a ghàh kəta hi te fyi mwə̀lû ha ghàn. Ghàh bɨlà wunhe kə yi wunhî beka ghàh kòŋà wi hi nè gha shyəma yì tàhi tum yì jùŋ yì Klistù na kə yì ləma. ¹³ Ba ghàn khə na ghɨt ghe a ghɨ fêtà a ndâ Fùyèn kəta mwə̀ mù yə̂mù ghɨna, mu fwo kə afû? Nâbi ghê a ghɨ fêtà a tô baŋ a yi fo yə kəbi a mù mwə̀ afa a ghɨ fo afû. ¹⁴ Yi ni mò kəbi yi ghəl te Bâba fo ha yi sak na, ghɨt ghe a ghɨ fôktè tum yì jùŋ mò kə hi tè yə kum yinì. ¹⁵ Mu shìki mô teka mu ni gha nì jyak mɨ ghɨ̂n, nyâkà wi chin na ghàn fo shyə ale a mu mwə̀ afû ha mu. Yi jwôfà na mu bɨlà kpu yi kpû, chyâ shyəma wùt tàhi na kə mu hi jala kum lum we a mu fòktè tum yì jùŋ atɨ̂n. ¹⁶ Mu kəta wi hi tè ghaŋhe wu wun kum te mu fòktè tum yì jùŋ. A hì mô yi fêt ma ghɨ ti lem na mu hi nê, ma mu faŋ hi nì, ma ngə̂k yi kanana hi mô a mu a tû! ¹⁷ Mu shìki nê fêt mi yina ma ghɨ chwoklô mu, ma ghɨ hi kəta hi làk a mu. Biyani ma mu shìki nî kə beka à mò yi gha, mu kəta kə hi nì, ma à jis Fùyèn na mu hi nê. ¹⁸ Maktu mu mò nâ ghə? Maktu mu ni mò kə na mu hi fôktè tum yì jùŋ, bufa wi shyə, tòkà lye yênà wi a jyak afa a mu kəta te wut we wù fòktè tum yì jùŋ. ¹⁹ Mu wijə a kwôs ha wùt nâbi te mu fate ngɨŋ à mì ha kwòs ha ghɨt à jɨ̀m shyəma mu ni ma ghɨt a dona fê tòkà bimi. ²⁰ Mu yênà ha ghɨt a Jûs, mu hi mô kə te wùt à Jûs, hi nì na ghɨna fê tòkà bime, dô kə ni, mu yen ha ghɨt ghe a ghɨna lèmà Saki, mu hi mô kə te wut we a wù lèmà Saki nâbi te mu bu a yi sah à yi Sâk. Mu nè mu hi nê ni shyəma ghɨna fê tòkà bimi, dô kə ni. ²¹ Mu yen ha ghɨt ghe a ghɨ lêmà wi saki, mu hi mô kə te wut we a wù lèmà wi saki. Yìna chwùtè wi na mu mò ya, lêmà wi sak yi Fùyènì. Mu lèmà kə nâ sak yi Klistù, biyani mu yen ha ghɨt ghe a ghɨ lêmà wi saki, mu hi nê kə ya hi nì na ghɨna tôkà bimi, dô kə ni. ²² Mu yênà ha ghɨt ghe a ghɨna bota, mu hi mô kə te wut wù botana, kə hi nì na ghɨna fê bimi. Mu ti kahi hì mô kə lum tù jɨ̀m kə ha ghɨt à jɨ̀m, shyəma mu ni, ma ghɨt ale bon nâbi a wùni lumu. ²³ Mu nè gha ghɨ̂n nâ à jɨ̀m kə hi nì na tum yì jùŋ ləma yen ashyə̂ shyəma mu boŋà khɨti yutì ye a yi mô atɨ̂n. ²⁴ Ba ghàn khə kə nâ na ghɨ sina nyɨŋi, ghɨta hi nyɨŋa, dô kə ni, biyani a ne nyɨŋ yə kə wùt wù mòk wu khɨti maktu tɨnu. Yi ni chwùtè na ghàn kəta hi fate nyɨ̂ŋ wu lum afa ghàn mò hi yə̂ hi khɨte maktu tɨnu. ²⁵ Nâbi nde sine yi gha, wu hi yike hi nè yi gha mi yê, fate khɨte ngɨŋ à wûn kə lum tù jɨ̀m. Ghɨna ni nè ghɨ hi nê ni hi khɨte wu maktu, wu bu hi faŋ, biyani ghàhnà mô hi bè khɨte wu maktu, wu mô hi bè fâŋ. ²⁶ A ni gha ye a mu chìnà nyɨŋa wi kə yi nyɨ̂ŋ; mu jɨ̀ŋà wi kànfù te wut we a wù sama kə luk wu yimu. ²⁷ Mu fo ngək ha wun wu mu shyəma wu khəta ma wu hi ywo ha mu, bu ya ma mu fokti tum yì jùŋ, ma à bê hi mô a gòkhi, ma Yènfù lem na mu kpene wi hi khɨte maktu tɨnu.

¹ Mu khɨŋa a wana noma na ghàn fê yɨngti te be ghàhnà ndùku gbê a dèt yi sù mbàk a lak yi sùsi, su khɨ̂ŋtè ghɨna nâ à jɨ̀m, ghɨna gbî yen tan a jwô yì bàŋana, yì tenâ, ghɨna daŋ nâ à jɨ̀m. ² Yènfù fo mòlû ha ghɨna atɨ̂n à sù mbàk afû nâ à jɨ̀m wù fî fo kəbi mòlû a jwô yì bàŋana, ghɨna hì mô jùmtìbàmsu Musìs. ³ Ghɨna à jɨ̀m tì yə shyə a yəna à mòk ma à fo Fùyèn, ⁴ fî nyu kəbi mòlû mù mòk ma à fo Fùyèn. Mòlû muna tì fwu a yi wo afa a yi ndùku gbê a ghɨna fùtɨ̂n. Wo yina ndùku mô Klistù. ⁵ Yènfù ndùku nê nâbi ni, saŋle wi ha ghɨt a dona a ghɨna fùtɨ̂n, ghɨna gbê kpute yênà a lak yi sùsi. ⁶ Gha mɨ ghɨ̂n mò chwena hi fo tobhînì ha ghàhnà na kə ghàhnà hi kôŋà gha be te ghɨna, ⁷ ngumle mosòmù te ghɨna ghɨ le ndùku ngumle. Ghɨ nyak a ŋwàklù Fùyèn na, “Ghɨta tì ndokò a chyə̂ yə lò, fî nyu lò, a yi bàm atɨ̂n lôtì hì binâ, fo kokhînì ha mosòmù.” ⁸ Ghàhnà kəta wi hi tè lye a chyənà su besu afa a ghɨna ghɨ le ndùku chyə, gha tɨni ni, ghɨna kpu kam mbà njwòsù tât kə wu tuk wù mòk. ⁹ Ghàhnà kəta wi hi tè mòmà Bâba te ghɨna ghɨ le ndùku mômà, gha tɨni ni, ywosu lumli ywiti ghɨna. ¹⁰ Ghàhnà kəta wi nâbi hi tè dùmlè njâŋ te ghɨna ghɨ le ndùku njaŋa, gha tɨni ni, anjèl à Fùyèn ye a yì ndùku ywite ghɨta ya, ywiti ghɨna. ¹¹ Gha mɨ ghɨ̂n tì gan ha ghɨna ha chwena, ghɨ fî nyak lem hi fo tobhînì ha ghàhnà beka yu ti bakhâ shyəma mbyi mi. ¹² Yi ni chwùtè na nâbi nde we a wù kwâktè na yi chilò kəta hi tè tòknà, kə wù nê boŋà fen. ¹³ Nâ mômhìnì yile wijə hi bèn ha ghàn teka yi timè ben ha wùt lè. Yènfù tòknèlò. Fu nè de wi na mômhìnì ben ha ghàn ta chyâ jyak ghana. Mômhìnì ki bên ha ghàn, ma Yènfù chwuti lum we ghàn mò hi tet atɨ̂n, ma mômhìnì tɨni tê ta ghak a ghàn. ¹⁴ Kum ni, kə ghàn hi ngumle mosòmù a sun samsu jûŋsù. ¹⁵ Mu jìsà ha ghàn te ghɨt ghe a ghɨ kəta tofu. Ghàn kwakti gha ye a mu jìsà nâ a ghàn a sù ngɨŋ. ¹⁶ Ghàhnà ndokò wu lùk wu yəna hi kwàktè kpu Klistù, ghɨ jəm a to mu lùk hi nyû, yi chwùtè na luŋ mù Klistù ti ni ghàhnà chîntè nì wûn a kak à mòk. Ghàhnà jyàtè mwə̀ mù yə̂mù wu yu afa ghɨ yə, yi hi chwûtè na wun wu Klistù ti ni ghàhnà nì wûn ti chîntì a kak à mòk. ¹⁷ Yi mô ni beka ghàhnà nè ghɨ hi dô kəbi yi dû, ghɨ chîntì ghɨ yə kə a ban à mòk, yi chwûtè na ghàhnà mò kə wun wù mòk. ¹⁸ Ghàn yen lê ghɨt a Isalì! Ghɨna jyàtè a shyə ghe a ghɨ fo a tô a baŋ a yi fo ghɨ yə̂, yi hi chwûtè na ghɨna ti chîntì ghê Yènfù ¹⁹ A ghàn ywo khɨlelò nâbi gha ye a mu jìsà agha? Mu jìsà hi fwo na mwə̀ mù yə̂mù me a ghɨ fo ha mosòmù mò nâ shyə ale ma, nâ mosò mù tɨ̂n mò shyə ale agha? ²⁰ Ngàŋ. Mu jìsà na, begànsù fo fotu ha yohnù wu be, ghɨna fo wi ha Yènfù. Mu kòŋà wi na ghàn à yohnù wu be hi yə chîntè. ²¹ Ghàn wi hi tè nyû a Bâba bom fê nyô kəbi yohnù wu be a bom. Ghàn wi hi tè yə a Bâba a tô baŋ, fê yênà yə kəbi yohnù wu be a tô baŋ. ²² Ghàhnà shìklè na lâ Bâba hi yafa ma? Ma ghàhnà kəta a jyak chyâ wun agha? ²³ Ghɨt ale jìsà na ghàhnà kətalò jyaka hi nì nâbi ghə, biyani a bu a gha à jɨ̀m a ghɨ gâmtè ghàhnà. Ghɨt ale jîsà na ghàhnà kətalò jyaka hi nì nâbi ghə, biyani a bu a gha à jɨ̀m a ghɨ jwôfà. ²⁴ Kə ghàn hi fêtà kə ha ngɨŋ sanisu, ghàn hi fêtà hi gàmtè ghɨt ale. ²⁵ Ghàn hi kuta nâbi yìni nki yi nyâmì ye a ghɨ bəkle a wu wən. Ghàn shihi kût, kə ghàn hi kante gha kum nyàm àtɨ̂n, lêmà a gha a ghàn a yi kwâktì. ²⁶ Ŋwàklù Fùyèn jis na, “Chyə ghɨ̂n mò ni, a kəta Bâba, nâbi nì ghə ghe a ghɨ mô atɨ̂n.” ²⁷ Wùt we a wù baha mô teka wu bimi ha Klistù ki jîs na wò bê yə a yi a ndâ, wò yenlò, wò yə nâbi ghə ghe a ghɨ chyahe na wò yə. Wò shihi yə̂, kə wò de na gha yile hi fo ngək a wò yi kwàktì. ²⁸ Biyani wò ki shihi yə̂, wùt jis mihì ha wò na, “Ghɨ ti fo mwə̀ mù yə̂mù muna ha mosòmù,” kə wò fî yə kum yi gha ye a wò mò hi lèm a wùt we yi kwàktì a wù fòkte gha yina ha wò. ²⁹ Mu jìsà na wò fatè ki kwâktì wuni, a bu ya, beka kwàktì yi wùt lè kəta wi hi tàhì na kə mu ni te mu kòŋà. ³⁰ Mu shìki yə mwə̀ mù yə̂mù, fo àyòŋnà ha Yènfù, ma ghɨ nê hi kəta hi tè ngane mu kum shyə ghe a mu yə, a mô ni mu yə, fo àyòŋnà. ³¹ Yi ni chwùtè na, ghàn hi yə nâbi ghə makə ghàn nyo yi nyû, makə ghàn nè nâbi ghə, ghàn hi nê kə hi tè fo yi kokhî ha Yènfù. ³² Kə ghàn hi chyə a wu lum hi nì na ghɨt a Jûs makə ghɨt a Gɨlìs makə ghɨt a Fùyènà ghɨ bimena lyi a be. ³³ Ghàn hi nê kə te mu mòmhè hi tè nì na ghɨt à jɨ̀m hi saŋlê, nâbi ghə te mu nè. Mu khɨŋa wijə kə jùŋ à mì yi ngɨŋ, mu khɨŋa jùŋ ha dùdû à ghɨ̂t shyəma Yènfù bonhi ghɨna.

¹ Ghàn hi sine chyənà mì kəbi te mu sine yì Klistù. ² Mu bəmhe ghàn njwo ghàn tà yità jə mu nâ hakoh, fê fate khɨte yikî ye a mu tì yike ghàn, ³ biyani khɨŋa na ghàn hi khə na, Klistù mò a tû ha lɨmànà à jɨ̀m, wùt lɨmà mô a tû ha ywê wûn, Yènfù mô a tû ha Klistù. ⁴ Wùt lɨ̂mà ki baŋa a to a wuna a wu yu afa wù jə̀mà makə wu yu afa wù fòktè tum ma yì lo ha Yènfù, wu hi khə na wù wumhe Klistù, a mô wùt we a wù mò a tû ha wûn. ⁵ Ha wùt ywên, ma wù ki chyatî makə wù fòktè tum ma yì lo ha Yènfù teka wù baŋ to a wuna, ma wù hi wumhe lɨm à wûn, a mô wùt we a wù mò a tû ha wûn. Wù hì nê ni, ma hanɨ̂ŋ hi bu ha wun nì wùt ywên we wù kwoma to a wuna. ⁶ Wùt ywên shìki bu hi kwut a shyə a wun a tû, ma yi hi jwôfà na wù lahà kwom to atɨna, biyani te à mò yi gha yi wumeni hi kwom a tû, wu kwut a shyə atɨ̂n. ⁷ Ha wùt lɨmà, wù kəta wi hi kwut a shyə a wun a tû beka Yènfù ti ni na wù hi fune wûn, chwùtè ban yi wuni, biyani ha wùt wù ywên, wu chwùtè ban yi lɨm à wuni. ⁸ Ghàn khə na ghɨ tà tì lyi jə bâh à wùna a wùt ywena hi fate wùt lɨmà atɨ̂n, ghɨ tì bɨ̀li lyi bâh à wùna a wùt lɨmà fate wùt ywên nì ghɨna. ⁹ Yi ni mò kəbi yi ghəl te ghɨ tà tì fati jə wùt lɨmà ha wùt ywên, ghɨ tì fati wùt ywên ha wùt lɨmà. ¹⁰ A ni gha ye a wùt ywên kəta hi tè kwut a shyə a wun a tû a chwena hi chwùtì na wù mò yi sah à sak, kə anjèlsu Fùyènsu hi bâŋhè lâ. ¹¹ Nâbi ya, ha ghàhnà ghe a ghɨ bime ha Bâba, wùt ywên wijə a wun a ngɨŋ, a bu kə ghê wùt lɨmà, wùt lɨmà bu ha ngɨŋ, a bu kə ghê wùt ywên. ¹² Ghɨ tì lyi wun wu wùt lɨmà fati wùt ywên atɨ̂n, wùt ywên boŋa bwə wùt lɨmà, ma à fate Fùyèn mwə̀ mù jɨ̀m. ¹³ Ghàn buf kə nâ a ghàn a sù ngɨŋ nâ, yi mô a jûŋ na wùt ywên hi mô a ghɨta fùtɨ̂n, chyate teka wù baŋ to a wuna agha? ¹⁴ Ba lum we mbyî mò atɨ̂n chwùtè kə nâ na, à mô yi gha yi wumeni ha wùt lɨmà hi tè kokhe a tû? ¹⁵ Biyani ha wùt ywên, a mô yi jâl hi te kokhe a tû. Yènfù fo nyuŋsu tusu ha wùt ywên, su dâblè na wù hi baŋa ngɨŋ à wûn atɨ̂n. ¹⁶ À khɨŋa nâbi nde hi tè gùfnà gha mi yina, a mu jìsà, ghàh fè kəta wi lum wule hi tè fate nè gha mɨ ghɨ̂n atɨ̂n, nâbi ndâ Fùyèn yìlè kəta wi. ¹⁷ Gha ale làwû a mu khɨŋa hi jìs ha ghàn chîn, bəmhe wi ghàn beka ghàn bè yùŋtè nâbi wùni yu hi kokhe Fùyèn, ghàn hi fate nê wi gha, ghàn hi bɨlà bobhi yi bobhî. ¹⁸ Gha yi shyə ye a mu khɨŋa hi jìs mò na, ghɨta ti fôktì ha mu na ghàn bè yûŋtè a ndâ Fùyèn, ghàn hi kəta jyàhènà a ghàn a fùtɨ̂n, mu bime na gha ale mò atɨ̂n te ghɨ jîsà, ghɨ mô nâ hamok. ¹⁹ Jyàhènà kəta kə hi tè mò a ghàn a fùtɨ̂n, shyəma ghɨ hi fate yena khɨle ghɨt a Fùyènà. ²⁰ Ghàn yùŋtè wu lùk wu tat hì nê ni, a hi bu a tat à Bâba te ghàn bèna hi yə̂. ²¹ Beka ghàn shihi yə̂, ghɨt ale hi kwâktè kə mwə̀ mù yə̂mù ha ngɨŋsu ghɨna su, ghɨ le kpo jiŋ, ghɨt ale nyo mu lûk, mu kwo ghɨna. ²² Ghàn kəta wi ndasu hi tè yə atɨ̂n fê nyo ma? Yi mô ni, kəhe ndâ Fùyèn! Ghàn khɨŋa hi tè wumhe ghɨt ghe a ghɨ kəta wi shyə ma? À gan nâ ghə ha ghàn? Ghàn khɨŋa na mu hi bəmhe ghàn a gha mɨ ghɨ̂n ma? Mu wi hi mòm. ²³ Gha ye a mu tì ywo ha Bâba mò kə yì yin ye a mu yike ghàn. Yi mô na, à ndùku mô ntuksu wu tuk afa a ghɨ nè bəkle Bâba Jisòs, wù lyi a bân, ²⁴ fo àyòŋnà ha Yènfù, bəktilò jis na, “Wùna mò wun wu mu, a mu fo kum ghàn. Ghàn hi nê yìna ni, kwâktè mu.” ²⁵ À hì mô te ghɨ yə mihe, wu ni kəbi ya nì bòm, jis na, “Bòm yina mò bòm à mù kàn mù fê te ghɨ baŋa nì luŋ mâmù. Ghàn lyi hi nyu nâbi wùnu yu, ghàn hi nyo kwâktè mu.” ²⁶ Yi chwûtè na ghàn shìki yə ban ghɨ̂n, nyo bòm yìna nâbi wùni yu, ma à hi mô na ghàn fòktè tum à yì kpû yì Bâba hi tàn shyəma wù bê kahà ben. ²⁷ Yi ni mò na, nâbi nde shìki yə ban a Bâba ghɨ̂n fê nyo bòm à Bâba mi yìna wu lum, yi fo wi kokhînì ha Bâba, wu hi khə na wù nè be ha wun wu Bâba nì luŋ mù wûn. ²⁸ Nâbi nde kina lê ngɨŋ à wûn laŋ shyəma wù yə ban atɨna ma wù fê nyu bòm àtɨ̂n, ²⁹ beka à shìki yə nâbi nde ban mɨ ghɨ̂n fê nyo bòm mi yìna, kwàktè wi shyə ghe a wù yə, wu hi khə na wù toŋa kə ngə̂k a wun a tû. ³⁰ A ni mò gha ye a ghɨta yafa a ghàn a fùtɨ̂n dô kə ni, ghɨ le botâ, ma ghɨ le ti kputî. ³¹ Biyani ma ghàhnà ki saka ngɨŋsu ghàhnàsu hamok, Yènfù bê tè fè sak a ghàhnà. ³² Bâba shìki saka ghàhnà, ma à hi mô wu lum hi yike ghàhnà shyəma ghɨ bê faŋ hi sak a bobhe ghàhnà nì ghɨt a mbyî amok. ³³ Yi ni chwùtè a wana noma na, ghàn ben yûŋtì nâbi wùni yu hi yə̂, ghàn yuti nâ ghɨt à jɨ̀m, ghɨ benlò. ³⁴ Wùt shìki hì mô jìŋ yafa wûn, wu yə a ndâ shyəma wù ben, bu ya ma ghɨ hi bênà a chìnti, wu hi nê kə na Yènfù sak à bobhi wûn. Mu bè tihe lò kə gha ale ghe a ghàn tì nyàka yâ wu yu afa mu bèna hi yen a ghàn.

¹ Wana noma, mu khɨŋa chin na ghàn hi khə gha kum fo te a Yohnà Yulena fo ha ghɨta. ² Ghàn khə na, à ndùku mô te ghàn baha mô teka ghàn bimi, ghɨ lehe ghàn, lyê yênà nì ghàn ha mosòmù, mu jîsà wi. ³ A ni gha ye a mu khɨŋa na ghàn hi khə na wùt wi hi jìs sûlè Jisòs, Yohnà Fùyènà tihe wut àtɨ̂n. Wùt wi hi jìs na, “Jisòs mò Bâba,” a bu kə na Yohnà Yulena tihe lò wûn. ⁴ Nki tu fo tu dô kə ni, biyani a fo kə Yohnà Fùyènà mɨ ghɨ̂n à mòk. ⁵ Nki tu fèt tu dô kə ni, biyani ghɨ fêtà kə ha Bâba Jisòs mu wùna. ⁶ Lum tu fèt tù dô kə ni, biyani Yènfù chwûtè lum tù jɨ̀m ha ghɨt à jɨ̀m a mô kə Yènfù mòk ⁷ Yènfù fo Yohnà wuna nâbi ha nde na ghɨ hi gâmtè wûn na wù hi nè fêtì kə ha ghɨt à jɨ̀m a jûŋ ⁸ Yohnà mɨ ghɨ̂n à mòk yênà ha wùt wùlè, ghɨ ni na wù hi jîsà nì tofu, ghɨ yen ha wùt wùlè ghɨ ni na wù hi khə hi fòktè gha ghe a ghɨ chwute ha wûn. ⁹ Yohnà mɨ ghɨ̂n à mòk yênà ha wùt lè, ghɨ ni na bimi yi wuni hi tâ, ghɨ yen ha wùt lè, ghɨ fo jyaka na wù hi chwuka yaftu ghɨ̂tù. ¹⁰ Yohnà mɨ ghɨ̂n kə à mòk yênà ha wùt lè, ghɨ ni na wù hi fêtà fêt tu kana tu, ghɨ yen ha wùt lè, ghɨ fo a jyak na wù hi fôktè gha ma ghɨ lo ha Yènfù. Ghɨ yen ha wùt lè, ghɨ ni na wù hi khə hanɨ̂ŋ, ye a yì mò atɨ̂n à gha afa a ghɨ lo ha Yohnà Yulena nì ghe a ghɨ lo ha yohnù wule. Yohnà atɨna yen ha wùt lè, ghɨ ni na wù hi khə jîs tù teka wù yiki ha wùt, ghɨ yen ha wùt lè, ghɨ ni na wù hi ywo khɨle jîs tu tɨntu, fôktè gha ye a tu jîsà. ¹¹ Gha mɨ ghɨ̂n nâ à jɨ̀m nè kə Yohnà mɨ ghɨ̂n à mòk. Ghɨ fo nâbi yìni nki yi fo, nâbi ha nde, kə te ghɨ kôŋà. ¹² Ghàhnà khə na wunu wûtù mò kə wù mòk biyani kəta wu bâh, wu dô kə ni. Bâh wùnu mu wuna chîntè mô kə wu wùn afân wù mòk. Yi ni mò kəbi ni ha Klistù. ¹³ Ghàhnà tì kahi hì mô kə ha wùn wù mòk wu tuk afa ghàhnà fye mòlû a Yohnà Yulena, makə à ndùku mô ni, ghàhnà mô ghɨt a Jûs, makə ghàhnà mô wu tûm, makə ghàhnà mô wu kwôs ha wùt, makə ghàhnà mô a ghàhnà sù ngɨŋ. Yènfù tì fo Yohnà mɨ ghɨ̂n à mòk, kə ha ghàhnà à jɨ̀m. ¹⁴ Wunu mò ni kəta wijə kə bâh à mòk, wu kəta bâh wu dô kə ni. ¹⁵ Wula ki jîs na, “Mu wijə bâh a wùna beka mu wijə a wô,” ma yìna tê nè jə̀ na kə ghɨ hi fê mô bâh à wùna. ¹⁶ Tûŋlana ki jîs kəbi ya na, “Mu wijə bâh à wùna beka mu wijə yi sê,” ma yìna tê nè jə̀ na kə ghɨ hi fê mô bâh à wùna. ¹⁷ Wun wù jɨ̀m shìki mô kə yi sê, ma wu hi ywo yàni gha? Wun wù jɨ̀m shìki mô kə a tûŋlu, ma wu hi lɨ̂mtè yàni shyə agha? ¹⁸ Wun wu wûtù mò ni ma Yènfù ti lem na nâbi ghɨ̀ni bâhà hi mô kə wu lum afa a fu kôŋà atɨ̂n. ¹⁹ Bâh mu wuna hì chîntè mô kə bâh à mòk, ma wunu hi mô nâ afa? ²⁰ Yi mô na, bâh wù wùnu mò kə nâ hidù biyani, wunu mô kə wù mòk. ²¹ Se wi hi jìs ha wo na, “Wò kəta wijə fêtì ha mu,” ma to wijə hi jìs ha wula na, “Wò kəta wijə fêtì ha mu.” ²² Bâh wù wùn we a ghɨ yena na wu tòkà ta wi, ni bɨlà mò we a wu bu, ma wùt kpu. ²³ Ghàhnà ni bɨlà tôknè nì bâh wù wùn we a ghàhnà yena na wu tôkà kokne wi, we a wu bênà nì wumînì mò we a ghɨ fate tôknè nì wunu, ²⁴ chyâ nâ te ghɨ tôknè nì bâh we a wu jwôfà. Biyani Yènfù fate wunu wu lum afa ghɨ kokhe bâh we a ghàhnà yena na wu tòkà kəta wi fêtì. ²⁵ Yi mô ni shyəma wunu hi mô kə ha shyə̀ à mòk, nâbi ghɨ̀ni bâh à wùna hi tôknè nì ale. ²⁶ Bâh a wùna à mòk shìki kəta ngə̂k, ma bâh wù wùnu wù jɨ̀m hi chîntè mô kə a ngə̂k. Ghɨ shìki hì bəmhe bâh à wùna à mòk, ma bâh wù wùnu wù jɨ̀m hi saŋle kə yi saŋlî. ²⁷ Ghàn à jɨ̀m mò ni chîntè mô wu wun wu Klistù, nâbi nde a ghàn a fùtɨ̂n mô bâh à mòk atɨ̂n. ²⁸ A mô a ndâ Fùyèn ma Yènfù ti jyâhì ghɨta lem tu fêt a tu nkì a tu a nkì. Fu ti lem ghɨta ashyə̂, a mô ghɨt a tuma, a kûmtè, a sù fòktì. Yi bàm atɨ̂n lem chichàsu, fî lem kəbi ghɨt ghe a ghɨ nê gha a kanana, fî lem ghɨ le na ghɨ hi chwuka ghɨta, nì ghe a ghɨ gâmtè ale. Fu ti lem ghɨta na ghɨ hi tihe ghɨta, lem ghɨ le na ghɨ hi khə jîs tu letu, teka wùt yiki ghɨna. ²⁹ Ghàn tà yen jə na à wijə ghɨt à jɨ̀m à mò ghɨt a tuma agha? À wijə ghɨt à jɨ̀m a ghɨ mô à sù fòktì makə sù chichà. A nê wijə ghɨt à jɨ̀m gha a kanana. ³⁰ A kəta wijə ghɨt à jɨ̀m, fo hi tè chwuk à ghɨ̂t. A kəta wijə ghɨt à jɨ̀m fo hi tè jìs tu jîs teka ghɨ yiki ghɨna, a kəta wijə ghɨna à jɨ̀m fo hi tè khə gha ye a ghɨ jîsà a tu jìs afân. ³¹ Ghàn hi nô hi khɨle fo te a tu kəta fêt yi chiki. Mu chwùtè wu lum ha ghàn chîn, wu jwôfà kpenê.

¹ Mu shìki tè khə hi jìs tu jîs kə a tù nkì a tu nkì, makə à mò jîs yi anjèlsu Fùyènsu, biyani kəta wi kôŋì, ma mu hi tàhè kə tûŋlu ghɨ̂tù te ngə̀m makə mbɨŋlu wu yu afa ghɨ buka. ² Mu shìki kəta yi fô hi tè fate khə hi fòktè yi gha Fùyènì, ywo khɨle a gha a letena, kə à jɨ̀m, kəta tofu kum kə mwə̀ mù jɨ̀m fê kəta yi bimî, yi nê na mu hi mûkà kunsu biyani kəta wi kôŋì, ma mu hi kpene wijə yi gha yile nâ hakoh. ³ Mu ki fo fihe nâbi ghə te mu kəta, fî fo nâ wun wu mu na ghɨ nyok biyani hì kəta wi kôŋì, ma yìna bê tê gàmtè jə̀ mu. ⁴ Wùt shìki kôŋà ghɨta, ma mu hi wunhê fê tôknè, wùt shìki kôŋà à ghɨ̂t, ma wù hi ghə̂kà wijə ghɨna, ma wù kûnà wi ngàŋtànà, ghaŋhe wunu. ⁵ Wùt shìki kôŋà à ghɨ̂t, ma wù hi nê wijə te wù ke yena wijə ghɨna, ma wù nê hi kwâktè wijə kə kum ngɨŋ à wûn, ma wù hi bâŋhè wijə lâ, ma wù hi taŋte wi gha ghe a ghɨ ne bobhe ha wûn. ⁶ Wùt shìki kôŋà à ghɨ̂t, ma wù nê hi saŋle wi kum gha yi be, ma wù hi saŋle kum kə gha ye a yi mô hamok. ⁷ Wùt shìki kôŋà à ghɨ̂t, ma chyəna wûtà bê tè befa ghaka wûn, ma wù hi yena wi njahi ghɨ̂tì, ma wù hi chyə, khə na nâbi ghə ghe a wù baha ke yi kî bê hì mô kə yi ghəl te wù khɨŋa. Wùt shìki kôŋà à ghɨ̂t, ma wù hi wunhe kə yi wunhî gha à jɨ̀m. ⁸ Wùt shìki kôŋà à ghɨ̂t, ma wù hi kôŋà yê kə yi yên. Gha ghe fòktìsù jìsà a mô yi fo te ghɨ fo ha ghɨna bè mê lò, ma jîs te a ghɨ fo yi fô ha ghɨta mi, ma tof ye a ghɨta kəta ma ghɨ fo lô ma yi bê hi bu. ⁹ Yi mô ni beka ghàhnà tofa kə a bəh a bəh, fôktè tum à Fùyèn kə a bəh a bəh. ¹⁰ Gha fublànà bè bênà, ma bək wu gha mi. ¹¹ À ndùku mô te mu baha mô wan, mu jîsà kə te wan, yena kə a gha te wan, kwâktè kəbi te wan. Chin te mu hì mô wut wù ləmâ mu ti de gha mwəlà. ¹² Ghàhnà yena gha chîn kə te ghɨ yena a sù bàk, yena tohne te a mìjô ye yì tòkà bana wi. Tuku bènàlò, ma ghàhnà fate yen à mihi. Chin mò, mu khə gha kə a bəh a bəh, tuku mô hi bè bèn na mu fate khɨlè mihi gha à jɨ̀m kə yi ghəl te Yènfù khə mu. ¹³ Chin mò, gha ghɨ̂n à tât, a mô yi bimî nì gha ghe a ghàhnà ke yênà nì ghɨna, khə hamok na ghɨ bè hì làwû, nì kôŋì ma yi ti faŋ kə hamok biyani nâ gha ye a yi ta chyâ atɨ̂n à gha afân mô yi kôŋ.

¹ Ghàn hi khɨŋa lumtu kə yû mù jɨ̀m hi tè chwùtè kôŋì ha ghɨta. Ghàn hi nô hi khɨte fo te a Yohnà Yulena fo, nô nâ hanɨ̂ŋ hì tè khə hi fòktè tum à Fùyèn. ² Wùt we a wù jìsà jîs tu letu teka wù yiki, jìsà wi ha ghɨta, wù bɨlà jîsà ha Yènfù beka wù jìsà gha letena a Yohnà a jyak, wùt ywo khɨle wi gha ye a wù jìsà. ³ Biyani ha wùt we a wù fòktè gha ma ghɨ lo ha Yènfù, jìsà ha ghɨta gâmtè na ghɨna ghəkna, ma hi kəta təm a ta, fê kəta yi saŋlî. ⁴ Wùt we wù jìsà jîs tu letu gàmtè kə ngɨŋ à wûn, biyani we wù fòktè tum ma yi lo ha Yènfù, nâbi nde ywo khɨle gha ye a wù jìsà gâmtè ghɨt a bimena. ⁵ Mu kòŋà na ghàn hi jîsà jîs tu lôtù biyani tòkà kôŋà na ghàn hi bɨlà fòktè gha ma ghɨ lo ha Yènfù, nâbi nde ywô. Wùt we wù fòktè gha ma ghɨ lo ha Yènfù chyâlò wùt we a wù jìsà kə jîs tu lôtù, a bu kə na wù shihi jìs, wùt hi mô hi tè fòktè banhi gha ghe a wù jìsà, shyəma ghɨt a bimena ghe a ghɨ mô a chìnti hi ləma nâ à jɨ̀m. ⁶ Mu ki bên ha ghàn chîn, a wan a noma hì jîsà ha ghàn a jîs tu lôtù, ghàn ywo khɨle wi, mbè àtɨ̂n hì mô nâ ghə? A bu kə na mu ben nì gha te Yènfù chwùte banhe ha mu, makə mu ben hi nì na ghàn hi kəta tofu, makə mu ben hi fòktè tum à Fùyèn, makə hi yike ghàn nì gha yile. ⁷ Yi mô kəbi yi ghəl te wò ki lyê a ndoŋ hì chìnà toŋa kə yi tôŋ makə wò lyi yi luŋ hì chìnà buka kə yi bûk, ma wùt tê ywo khɨlî. ⁸ Wùt we a wù buka ngə̀m hi fòktì na woŋi ye yi bênà ki fâŋ hi buk a jûŋ, ma ghɨ khɨli yàni hi fate wu wun a yi wòŋ agha? ⁹ Yi boŋa mô kəbi ni ha ghàn. Ghàn shìki jîsà jîs tu lôtù, ghɨ ywo khɨle wi, ma wùt tê khɨlî na ghàn jìsà na ghə agha? Yi shìki mô ni, ma gha ghe a ghàn jìsà ma ghɨ hi chyàlà kə te a fûf. ¹⁰ Jîs tù dò kə ni a mbyî, ghɨta mô ghe ghɨ ywo nâbi yìni. ¹¹ Mu shìki ywo khɨle wi jîs yi wûtì, ma mu hi mô wut à tûm ha wùt mu we, wu mô wut à tûm ha mu. ¹² Mu jìsà na, te ghàn lùmà hi khɨte fotu Yohnà Yulena ni, ghàn momhi nâ nì jyaka hi fèt nì te tu gâmtè hi ləmhe a ndâ a Fùyèn. ¹³ Yi ni chwùtè na wùt we a wù khə hi jìs jîs tu lôtù kəta hi jə̀m na Yohnà fo kpenhi jyaka, ma wù khɨli hi fòktè banhe gha ghe a wù jìsà. ¹⁴ Mu shìki jə̂m yi jìs yi lô, ma yi hi chwûtè na mu jə̀mà a mu yohnà hamok, biyani kwâktì mi fêtà wi. ¹⁵ Yi shìki mô ni, ma mu ni nâbi ghə? Yohnà a ma kəta hi tè jə̀m, kwâktì mi boŋa jə̂mà, yohnà a ma ghɨ yema njàŋ, kwâktì mi boŋa yemâ. ¹⁶ Ghàn shìki jə̂m fo àyòŋnà, a jə̂mà kə a yohnà, wùt we a wù tà yikî jə̂, nê gbi yàni hi tòkà gha tɨni hi jìs na, “Àmèn” teka wù ywo khɨli gha ghe a ghàn ye hì jə̂mà, fo àyòŋnà atɨ̂n agha? ¹⁷ Jə̂m yani hi fo àyòŋnà ha Yènfù làhi tè jwòf, biyani ma yi tê gàmtè jə wùt lè nâ hakoh. ¹⁸ Mu fo àyòŋnà ha Yènfù te mu khə hi jìs jîs tu lôtù chyâ ghàn nâ à jɨ̀m. ¹⁹ Biyani mu shihi jìs a ndâ Fùyèn, ma mu hi kôŋà hi jìs kə gha à tân na ghɨta ywo khɨli ma yike gha chyâ shyəma mu jis gha kam ìwûm ma mu jis a jìs tu lôtù, ghɨta bu hi yû. ²⁰ Kə ghàn hi kwâktè ni te mwəlà, a wana noma, ghàn hi bɨlà mô kə mwəlà ha be biyani kwâktè gha te ghɨt a kpenana. ²¹ Ghɨ ti nyak a ŋwàklù yi Sak na: “Mu Bâba jìsà na, Mu bè nêlò, ma tumu hi fôktè tum à mì ha ghɨt ghɨ̂n. Mu bè nêlò, ma ghɨ jis ha ghɨna yi jis yi tumi. Ghɨ bè nê kəbi ni, ma ghɨna tunhi na ghɨ ywo wi gha ye a mu jìsa.” ²² Yi chwùtè na, jîs tu lôtù mò chwena ha ghɨt ghe a ghɨ baha mô teka ghɨ bimi, a bu ha ghɨt ghe a ghɨ ti bimî. Fo ye a yi mô hi tè fòktè gha ma ghɨ lo ha Yènfù mò chwena ha ghɨt a bimena, a bu ha ghɨt ghe a ghɨ baha mô teka ghɨ bimi. ²³ Yi ni chwùtè na, ghàn à jɨ̀m ki yûŋtì a ndâ Fùyèn, nâbi nde hi jîsà kə yi jîs yi lô, ghɨt ghe a ghɨ baha mô teka ghɨ bimi, lyi bên, makə a ghɨt a benana, ma ghɨna tê jìs na ghàn jyakalò. ²⁴ Biyani ghàn à jɨ̀m shìki fôktè tum ma yì lo ha Yènfù, ghɨt ghe a ghɨ baha mô teka ghɨ bimi lyi ben yu lò makə à lyi ben ghɨt a benana, ma tum àtɨ̂n ni, ma ghɨna bimi nâ ha ghɨna sù ngɨŋ ma ghɨ ni ma ghɨna yen à khɨli gha ghɨna be, ma gha ghe a ghɨna ywo fê sak ghɨna ²⁵ ma ghɨ fihi gha a letena ghe a ghɨ mô a ghɨna təm, ma ghɨna ngumte a chyə̂ ma ghɨ hi kokhe Yènfù jîsà na, “Yènfù mò kə nâ a ghàhnà fùtɨ̂n hamok.” ²⁶ Ghàhnà mò hi jìs nâ na ghə a wana noma? Ghɨ làhi jìs na, ghàn yûŋtì nâbi wùni yu, wùt hì kəta njàŋ hi yêm, wùlè kəta yi gha hi yikî, wùlè kəta yi gha te Yènfù chwùte banhe ha wûn, wùlè kəta yi gha hi jìs yi jìs yi lô, wùlè mô hi fòktè gha ghe a ghɨ jîsà yi jìs afû. Ghàn hi nê gha mɨ ghɨ̂n à jɨ̀m kə hi gàmtè ghɨt a bimena. ²⁷ Ghɨta shìki mô hi jìs yi jìs yi lô, ghɨ jis kə hi tàn à bà makə à tât. Ghɨ shihi jìs, ghɨ de wùt wù mòk jis kə ni mihì lò, wùt lè fòktì gha ye a wù jìsà shyəma wùt lè fê jis shyəma ghɨ ywo à khɨli gha ghe a ghɨna jìsà. ²⁸ Wùt shìki bu hi fòkte gha ye a ghɨ jîsà, ghɨna china moŋ, nâbi nde wu hi jîsà kə ha ngɨŋ à wûn, fê jîsà kə ha Yènfù. ²⁹ Fòktì se a su jîsà, su jis kə sù bà makə sù tât. Ghɨna jis, ghɨt ale kahi chyâhì gha ye a ghɨna jìsa. ³⁰ Fòktì yîmì hi jìs yi ghâ, Yènfù fo tum yì fê ha wùt lè, fòktè àtɨ̂n chinalò shyəma wùt àtɨ̂n boŋà jis. ³¹ Nâ ghàn à jɨ̀m làhi tè fòktè tum ma yì lo ha Yènfù, wu yu afa wùt mòk jìsà, china shyəma wùt lè fê jis shyəma ghɨta yiki gha atɨ̂n ma fê khɨti təm a ta. ³² Ghɨt ghe a ghɨ kəta fo hi tè fòktè tum ma yì lo ha Yènfù kəta hi tè fate khə hi khɨte tum àtɨ̂n. ³³ Beka Yènfù kòŋà wi na ghɨta hi chînà nê yi nî gha. Fu khɨŋa na ghɨta hi chyə nì yutìnì. Yi mô kə ni a chìntisu ghɨt a Fùyènà nâbi afa. ³⁴ Ywena hì mô a chìnti, kə ghɨ hi jîsà beka ghɨ tà fo jə jyaka na ghɨna hi jîsà. Ghɨna kəta hi tè mò kə lɨmànà sah à yi sak kə te Saki jìsà. ³⁵ Wùt ha tɨ̂n shìki kôŋ hi tè khə yi ghâ, wu buf ha lɨm à wûn a ndâ, beka à mô yi gha yi wumeni ha wùt wù ywên hi tè jìs a ndâ Fùyèn. ³⁶ Gha yi Fùyènì mò teka yi yime ha ghàn! Yi baha ben kə ha ghàn. ³⁷ Wùt shìki kwâktì na yi mò fòktì makə wù kəta Yohnà Yulena, ma wù hi khə na gha ye a mu jìsà ha ghàn mò ma à jis Bâba. ³⁸ Wùt tê lye gha yina ha yi ghâ, ma Yènfù boŋà mana wûn. ³⁹ Ghàn hi nô lê nâ nì jyaka, a wan a noma, hi tè fòktì tum ye a yì lo ha Yènfù. Kə ghàn hi tunhi na kə ghɨta hi jîsà jîs tu lôtù a ndâ Fùyèn. ⁴⁰ Biyani, ghàn shihi nè nâbi ghə, ghàn hi nê kə wu lum wu jûŋù, fê nê kə yi ghəl.

¹ Mu khɨŋa chin a wan a noma hi yɨ̀ŋtè tum yì jùŋ ye a mu tì fòkte ha ghàn, ghàn yû bimilò hì mô kə atɨ̂n. ² A mô tum yì jùŋ mi yîn a ye yì bònhè ghàn, wu yu afa ghàn fate khɨte gha ye a mu tì fòkte ha ghàn, bu ya, ma bimî yani ləha kə halô. ³ Nâ gha yi ta ye a mu tì yike ghàn mò kə nâ yin ye a ghɨ tì boŋa yike mu na, Klistù tî kpu kum gha ghàhnà ghɨ be, kə yi ghəl te ghɨ tì nyàka a ŋwàklù Fùyèn; ⁴ ghɨ gûmà wûn, à hì mô a mu tuk mù tât, ghɨ lôhì wûn a yi kpû kə yi ghəl te ghɨ tì nyàka a ŋwàklù Fùyèn ⁵ nâ wù chwûtì ngɨŋ à wûn ha Sefàs fî chwûtì kəbi ha ghɨt a tuma ghe njwòsù bà. ⁶ Wù ti chwûtì kəbi ngɨŋ à wûn ha jùmtìbàmsu wunsu su chyâ yi ghə yì tân kə wu yu wù mòk, ghɨt a dona a ghɨna fùtɨ̂n baha làwû hi tàn lân, su lesu mô ma su ti kputî. ⁷ Wù ti chwûtì ngɨŋ à wûn ha Jêms fî chwûtì ha ghɨt a tuma, nâ à jɨ̀m. ⁸ A yi bàm atɨ̂n wù ki chwûtè gòkhì ngɨŋ à wûn ha mu nâbi te mu mò te wut a ghɨ tì bwə teka yu kpen. ⁹ Beka mu mò wut we a wù gokhe atɨ̂n à ghɨt a tuma, kpene wi na ghɨ hi tè toŋte mu na wut wù tum beka mu tî fo ngə̂k ha chìnte ghɨt a Fùyènà. ¹⁰ Biyani kum təm a jûŋà a Fùyènà, mu wu hì mô shyə ghe a mu mò ghɨna chîn. Təm a jûŋà mɨ ghɨ̂n tà ləhà jə halô. Mu ti bɨlì fêt nâ haŋaŋ, fêtà chyâ nâbi nde atɨ̂n à ghɨt a tuma nâbi te à chehì laha bu fêt yi mi, à chehì fêtà təm a jûŋà a Fùyènà mu ghe a mu wùn. ¹¹ Yi mô na, makə à tì fòkti mu tum yì jùŋ ha ghàn, makə à tì fòkti ghɨt ale mu ghê, gha yi ta mò kə na, ghɨ ti fôktì, ghàn bimî. ¹² Ghɨ tî yikî na ghɨ tì lôhì Klistù a yi kpû, ghɨt ale ghàn a fùtɨ̂n gbi yàni hi tè fê jìs na ghɨta bè lôtè wi a yi kpû agha? ¹³ Nâbi ni, yi shìki mô hamok na ghɨta lòtè wi a yi kpû, ma yi hi chwûtè na ghɨ tà tì lôhì jə Klistù. ¹⁴ Yi shìki mô na ghɨ tà tì lôhè jə Klistù a yi kpû, ma yi hi chwûtè na yikî yahi mò kə halô, ma nâbi bimî yani hi fêtà wi gha yile. ¹⁵ Yi shìki mô ni, ma yi hi fê chwûtè na ghàh wama kə yi fə̂m kum Yènfù beka ghàh jìsà na Yènfù tî lôhì Klistù a yi kpû. Yi shìki mô hamok na ghɨta bè lôtè wi a yi kpû, ma yi hi chwûtè na fu tà tì lôhì jə wûn a yi kpû. ¹⁶ Yi shìki mô hamok na ghɨ lôhè wi ghɨta a yi kpû, ma yi hi chwûtè na ghɨ tà tì boŋ lôhè jə Klistù. ¹⁷ Yi shìki mô na ghɨ tà tì lôhì jə Klistù a yi kpû, ma bimî yani hi mô kə halô, be sanisu baha mô kə a ghàn a tû ¹⁸ Yi mô ni, ma yi hi chwûtè kəbi na ghɨt ghe a ghɨ tì kpo ma ghɨ ti bimi ha Klistù, ti ləhà kə halô. ¹⁹ Ghàhnà shìki mô ma ghɨ ti fo ngɨŋsu ghàhnàsu ha Klistù na wù gamti ghàhnà, wu mô hi gàmtì kə kum chyənà ye a ghàhnà chyə a mbyî chîn, ma yi hi kpene shyəma ghɨ hi kwohe seni ha ghàhnà chyâ te ghɨ kwohe nâbi ha nde a mbyî. ²⁰ Biyani yi wijə ni. Yi mô kə nâ hamok na ghɨ tì lôhì Klistù a yi kpû, a mô wûn we a wù tì lòte a yi kpû ha ghɨta ashyə̂ à jɨ̀m hi chwûtì na ghɨ bè lôhèlò kəbi ghɨta a yi kpû. ²¹ Beka kpû tì ben a chyə̂ ma à ni wùt, à fî ni kəbi wùt lè na ghɨta hi lôtè a yi kpû. ²² Yi ni mô kəbi yi ghəl te ghɨt à jɨ̀m kpo beka Adàm tì kpo, a mô be ghɨna, ghɨt à jɨ̀m ghe a ghɨ bime ha Klistù mò hi bè hi tê chyə̂, kə yi ghəl te Wù tì lòte hì chyə̂. ²³ Nâbi nde bè lôtèlò a yi kpû kə a wun wu yu. Klistù ndùku mô wut wù shyə̂ hi lòtì, mô hi bè shihi bèn ma ghɨ lohi ghɨt ghe à mò ghɨt a wuna. ²⁴ Klistù bè tâ chyâlò nâ yohnù wu be wù jɨ̀m te wu saka mbyî bakhe nì jyak wù jɨ̀m. A yi bàm atɨ̂n, ma mbyî mi, ma wù kahà fo fə̂n wù wunu ha Bì, Yènfù. ²⁵ Yi mô ni beka Klistù kəta hi faŋ hi tè sak kə yi sâk hi tàn shyəma wù tum bànàsu wunsu nâ sù jɨ̀m a chyə̂, hi tomte wulu wunu a ghɨna tû. ²⁶ Bànà wûn yì gòkhena ye a wù nè bobhe mô yi kpû. ²⁷ Ŋwàklù Fùyèn jìsà na, “Yènfù ti lem mwə̀ mù jɨ̀m a wun yi dèt yi wùlu na wù hi sakâ.” Ghàn ki jîs na, “Ghɨ ti lem mwə̀ mù jɨ̀m a wun yi dèt yi wùlu,” ghàn hi jîsà ni bakhe Yènfù atɨ̂n, yi kə̂kà kə nâ a ndan na à lem Fùyèn nì ngɨŋ à wûn lem mwə̀ muna a Klistù yì dèt yi wùlu. ²⁸ Yènfù bè lèmà mihèlò mwə̀ mù jɨ̀m a Klistù yì dèt yi sak, ma nâ Klistù lem ngɨŋ à wûn a yi dèt yi sak nì we a wù tì lèma mwə̀ mù jɨ̀m a Klistù yì dèt yi sak, shyəma Yènfù hi saka fə̂n wù wunu kə a to mwə̀ mù jɨ̀m. ²⁹ Ghɨta shìki lôtè wi a yi kpû hamok, ghɨta ta hì fye mòlû a ghɨt a kputena yi yet, ma tofu atɨ̂n hi mô nâ ghə? Yi shìki mô na ghɨ lôhè wi ghɨta a yi kpû, ghɨta hi fye mòlû a ghɨt a kputena yi yet njwô ghə? ³⁰ Yi shìki mô hamok na ghɨ lôhè wi ghɨta a yi kpû, ma yahi hi mô nâ ghə hi tè mò kə jwô yi kpû yû mù jɨ̀m agha? ³¹ Mu mò kə jwô yi kpû mu tuk mù jɨ̀m a wana noma! Mu jìsà ni, jala kum ghàn beka ghàn à Klistù Jisòs, a Bâba ghàhnà mò amok. ³² Mbè mì ni mò nâ ghə te mu chehì nô a Efisùs ghàh à ghɨta, ghɨna mô te nyamsu a ghə̀n, wu yu afa yi shìki mô kə nâ hamok na ghɨta bè lôtè wi a yi kpû agha? Yi shìki mô ni, ma yi hi chwûtè na ghɨt ale jìsà kə nâ hamok na, “Ghàhnà hi yə kə yi yə̂, fê nyô beka à bè hì mô a yi bîs ma ghàhnà kputè ləha.” ³³ Kə wùt bè lehe ghàn. Ghàn hi khə na, “Sunsu besu bobhelò chyəna jûŋà.” ³⁴ Ghàn kaha yɨngti ngɨŋ sanisu, ma ghàn de be yina a ghàn nè ni. Mu jìsà ni na ghàn wumi beka ghàn ghɨ le fate khə wi Yènfù. ³⁵ Wùt lè làhi buf na, “Ghɨ mô hi bè lòhè yàni ghɨta a yi kpû agha? À mò yìni nki wùni ghɨna bè hì kəta agha?” ³⁶ Wo bufa yi gha, yi kəta wi tofu! Wò ki yome yi se shyə̀ le, yi ki faŋ hi kpû, yi wi hi fù. ³⁷ Ngwìk ye a wò yome wijə wun wu shyə̀ we a wu nè ləma kwoka. À mò kə yi se shyə̀ yile ni te se ngwìk à wît makə yi se yi ngwìk yile. ³⁸ Yènfù fo kə wu wun we a fu kôŋà nâbi ha yìni nki ngwìk, a mô kə wu wun we a wu kpene ha nki ngwìk mi yê. ³⁹ Wun wu mwə̀ mù yòhna mù jɨ̀m wijə yi ghəl. Ghɨta kəta kə yi ghɨna nki wùni, nyamsu kəta kə yi ghɨna. Nyɨ̀mû kəta yi ghɨna nki wùni, yila kəta kəbi yi ghɨna nki wùni. ⁴⁰ - ⁴¹ Mwə̀ me a mù mò a nyə̂, kəta wu wun hanɨ̂ŋ, me à mù mò a chyə̂, kəta wu wun hanɨ̂ŋ. Mwə̀ me a mù mò a nyə̂ kəta kə yi ghɨna nki jwôfì, me a mù mò a chyə̂ kəta kə yi ghɨna nki jwôfì. Yuchwî kəta jwôf yi wuni, njoŋ kəta yi wuni, njènû boŋa kəta yi ghɨna. Nâbi fùni njênfù kəta kə jwôf yi wuni hanɨ̂ŋ. ⁴² A ni te yi bè hì mô wu yu afa ghɨta lòte a yi kpû. Wun we a ghɨ guma bè fwɨ̂lò, ma we a ghɨ lohe yi kpû bê tè fè fwɨ̀ jə̀. ⁴³ À mò wu yu afa ghɨ guma wunu, wu hì jwôfà wi, fê kpene wi nâ a yi gha. Ghɨ lôhì a yi kpû, wu hi jwôfà, fê kəta a jyak. ⁴⁴ Ghɨ shihi gùmà, a hi mô wun wu chyaku, ghɨ lôhè a yi kpû, a hi mô wun wu yòhnà. Wun wu chyaku mô hi chwùtì na wun wu yòhnà boŋa làwû. ⁴⁵ Ghɨ ti nyak a ŋwàklù Fùyèn na, “Adàm wù shyə̂ ndùku mô wut te Yènfù fate, wù hì chyə̂”, Adàm wù gòkhena mô Klistù bên hì mô yohnà ghe a ghɨ nê na ghɨta hi chyə̂. ⁴⁶ À wijə wun wu yohnà we a Yènfù tì fo ashyə̂, à yìti ben wun wu chyaku, wun wu yòhnà kûmtì. ⁴⁷ Wùt ashyə ndùku mô ma wù fwu a chyə̂ ma ghɨ fati nì bûtù, kùmti hì mô, ma wù lo a nyə̂. ⁴⁸ Ghɨt ghe a ghɨ mô a chyə̂ mò kə te wut we a ghɨ tì fate nì bûtù, ghɨt ghe a ghɨ mô a nyə̂ mô hi bè tè mò te wut we a wu tì lo a nyə̂. ⁴⁹ Ghàhnà fune wùt we a ghɨ tì fate nì bûtù chîn, mò hi bè tè boŋa funa wut we a wù tì lo a nyə̂. ⁵⁰ Gha ye a mu jìsà a wana noma mò na, wùt bè yena wijə fə̂n wù Fùyènù nì chyak a wùn ghɨ̂n, shyə ghe a ghɨ fwɨ̂, wi hi khɨte shyə ghɨ fwɨ̂ wi. ⁵¹ Ghàn yuti, mu fòktè yi gha, wùt khə wi. Ghàhnà bè kpo mihè wijə à jɨ̀m, biyani mô hi bè bùŋhè kwuna kə à jɨ̀m kə wu yu wù mòk. ⁵² Ghɨ bè toŋalò soŋ yi gokheni, ma gha mi yina bûŋtê gan kə ni. Ghɨ be toŋ soŋ yi tɨni, ma ghɨ lohi ghɨta a yi kpû, ma ghɨna hi mô bu hi bè fè kpû. Ghàhnà mò ni, mô hi bè kwunâ, hi tè kəta wun wu fe. ⁵³ Yi mô ni beka te wun wu ghàhnà wuna a wu bè kpu ni, ma wu fê fwɨ kəta hi bè kahi a wu wùn, wu bu hi fè fwɨ̀, kpo wi. ⁵⁴ À bè hì mô te wun wu ghàhnà kwune ma wu bê fê bu hi fwɨ̀, ma gha ye a ghɨ nyàka a ŋwàklù Fùyèn kpen. Ghɨ nyak na, “Ghɨ ti tum yə kpu.” ⁵⁵ “Kpû, jyak gha ghe lâ? Fɨ̀l ya ye lâ?” ⁵⁶ Fɨ̀l yi kpu fwo a be, jyak a be fwo a yi Sâk. ⁵⁷ Biyani yòŋnà yênà ha Yènfù a fu ne na ghàhnà tum à yə kpû tohne a Bâba ghàhnà Jisòs Klistù. ⁵⁸ Mu wu hì jîsà ha ghàn a wana noma ghɨ jûŋà na, ghàn fate khɨti bimî yani, kə ghàn hi nêkà. Ghàn hi ghâblè, fêtà ha Bâba kə yû mù jɨ̀m beka ghàn khə na fêt yani ha wûn wi hi bè lə̀hà jə̀ halô.

¹ Mu jìsà yi gha chin kum mwə̀ me a ghɨ yuŋte hi fo yi gâmtì ha ghɨt a Fùyènà. Mu tî jis na chìntisu ghɨt a bimena se a su mô a Gàlesiyà ni gha, ghàn kəta hi nì kəbi yâ. ² À shìki tê mò nâbi wùni tuk wu shyə a ngâm, nâbi nde fihi shyəlâfù atɨ̂n à mwə̀ afa wù khɨte wu lem lò, shyəma mu bê ben, ma ghɨ hi fê kəta wi hi chwute yi chwutî mwə̀lû. ³ À bè hì mô a wu yu afa mu bèna, ma mu tum ghɨt ghe a ghàn chwokte nì ŋwàklù, ma ghɨna lyê yen nì fo mi yina a Jèlusalèm. ⁴ Yi shìki hì mô a jûŋ ha mu hi yèn afû, ma ghàh à ghɨna yen amok. ⁵ Mu bê chyâ lumu a Màsìdoniyà shyəma mu bê jikti ghàn. ⁶ Mu bênà hi chyəti ghàhnà a fu yulâ hi tàn shyəma lɨ̀m ban, ma mu bê shihi lò hi tè yèn nâbi afa, ma ghàn gâmtè fo mwə̀ me a mu mò hi lò nì munù. ⁷ Mu kòŋà wi hi bè yena ghàn kə ni te mu dàŋhè chyà yi chyâ. Mu khə na Bâba ki bimî, ma ghàhnà ghɨ̂n chyəti. ⁸ Mu kwàktè nâ biyani, mô hi chyəti a Efisùs afân hi tàn wu tuk wu Bentikòs, ⁹ beka lumu ti gan ha mu na mu fatè ni kə nâ fêtì afân, nâbi te ghɨta nò mu, dô kə ni. ¹⁰ Timotì ben nâbi wùni yu, ghàn ni wu hi mô kə nâ a jûŋ a ghàn a fùtɨ̂n beka wù nèlò fêt yi Bâba kəbi yi ghəl te mu. ¹¹ Kə wùt nè kehe wûn. Ghàn gamti wûn, ma wù gbê kə nì yutìnì ma wù kahà ben beka ghàh à wana ne ale yutelò wûn. ¹² Kum wâ nè ghàhnà Àbolòs, mu ti chyati wun nâ haŋaŋ kə ghan hi dù na, ghê wana ne ale bê jikti ghàn biyani wu kôŋà wi hi bèn chîn. Yu nè kpenalò, ma wù ben. ¹³ Ghàn hi mô gbûtè. Ghàn fate khɨti bimî yani. Ghàn hi kəta təm a ta fê tâ, fânà wijə shyə ale. ¹⁴ Ghàn hi nê nâbi ghə, kə nì kôŋì. ¹⁵ Ghàn khəlò Sɨ̀tèfanàs a wana noma, ghê ghɨt a wuna nda. À tì yìti bimi ghɨna a Àkayà. Ghɨna ti fo ngɨŋsu ghɨna su hi gàmtè ghɨt a Fùyènà. Mu wu hì chyate ghàn na, ¹⁶ ghàn hi ywo ha ghɨta te wûn nâbi nì nde wùlè we a wù fètà ghê ghɨna. ¹⁷ Mu saŋlelò kum te Sɨ̀tèfanàs nì Fòtùnatùs nì Àkaykùs ti ben ha mu, beka ghɨna tì ben hi lyè luk wanu. ¹⁸ Ghɨna ti bonhi təm a ma kəbi yi ghəl te ghɨna ndùku bonhe ghana. Ghàn hi ngumle ghɨta te ghɨ̂n ni. ¹⁹ Ndasu Fùyèn se a su mô a bàh à Esiyà afân jis na mu toŋti ha ghàn. Àkwɨlà ghe Bìsilà nì chìnte ghɨt a bimena ghe a yì yùŋtè a ghɨna ndâ jis na mu toŋti ha ghàn nâ a jûŋ a Bâba yi yet. ²⁰ Nâ wana ne ghàhnà à jɨ̀m ti chinhi toŋtînì ha ghàn. Ghàn toŋti ngɨŋ sanisu kə nâ a lum hi chwùtè kôŋì yi ghɨt a bimena. ²¹ A nyàk kə nâ mu Bôl toŋtînì wu lùk afan chin ha ghàn nì wo a ma. ²² Wùt hì kòŋà wi Bâba, ma lòn kwo wûn. Bî, a Bâba wâhù! ²³ Bâba Jisòs chwuti təm a jûŋà a wuna ha ghàn. ²⁴ Mu kòŋà ghàn nâ à jɨ̀m beka ghàhnà chìntè mô nì Klistù Jisòs a kak à mòk. Àmèn.