Filemu

Ŋwaʼaŋlɨ

Filemu

Kāoŋ nu pa thɔ nnu

A nāʼaŋ Pɔɔ nāʼaŋ ŋwaʼaŋlɨ yei mfɛ ni Filemu nɔ lɨ̄gəɨ nu vi nthɛ khwǎ, ŋa a piŋ Oneshimu mbɨnɨ nuʼuŋ ndɔ̄gɔ vi, ki lɔ nuʼuŋ mbɔ pi nɔ ŋkǔna, mbɔ pi nɔ ndǐŋ vi moŋ piŋ. Ŋwaʼaŋlɨ ghɔ fɨ̄ʼɨ kwrí ŋa a lɔ̄gɔ lɨʼɨ moŋ chɔmbhi Oneshimu nɛ. Njiŋ Oneshimu pɔ ŋa, “yaoŋ ŋa a fāʼo ghɛ̀rɛ.” Filemu ni mbɔ ŋkiɛŋ ŋgaŋ piŋ haʼaŋ pi ya nji vi laʼataoŋ Koloshe. Oneshimu ni mbɔ ŋkǔna yi ŋa a ni ntei, ŋga ŋgə̄ɨ, njəɨ Pɔɔ mbiŋ Minnwi mbhɔ yu.

Māʼaŋ nu chrà

¹Ŋwaʼaŋlɨ yei llɔ mbhɔ mu Pɔɔ, mbɔ ŋgaŋ chə́ɨŋ nthɛ Krishto Jishɔ; a pigi Timoti, ndǐŋ via.

Ŋwaʼaŋlɨ yei ghə̄ɨ pi mbhɔ Filemu taannu via mbɨnɨ mbɔ ŋgaŋ kwò fàʼa pia pugu kaʼa ²ni Afia mbɔ ndǐŋ via yi miŋgwɛ, ni Akipu ŋa pia pugu māʼaŋ nchhɔ̀ moŋ piŋ kaʼa nɛ, ni chɔshi ŋa a ghà mbāoŋ nda ghɔ nɛ.

³Pwapuŋ pugu pa ghɨghrɨ llɔ mbhɔ Minnwi, mbɔ Tǎa via, pugu Jishɔ Krishto, mbɔ Taathɔ, pɔ ni pəɨ.

Khwǎ pugu piŋ ŋa Filemu fāʼo nɛ

⁴Ǹtōo Minnwi a ŋguoŋ ndɨɨ nthɛ ghɔ sheshe ndɨɨ ŋa ŋga ǹchhɔ nduoŋ Minnwi mfɛ nu vɛ nɛ, ⁵nthɛ ŋa ǹjaʼo fɨʼɨ piŋ yɔ mbɨŋ Jishɔ Taathɔ pugu pa fɨʼɨ khwǎ ŋa ɔ fāʼo mbɨŋ ŋguoŋ ŋgwa Minnwi pi taoŋtaoŋ nɛ. ⁶Ǹduoŋ ŋa pɔ nu yia kaʼa nɔ ghaŋ piŋ shi nchwīe pia pɨnɨ nji ŋguoŋ mbɔrɔ ŋa ŋguoŋ yia fāʼo moŋ chɔmbhi yia moŋ pɔ nu kaʼa pia pa Krishto. ⁷Nthɛ ŋa ŋ̀kwo fāʼo ntou pwanjuʼɔ pugu pa pɔ nu shiʼi llɔ moŋ khwǎ ŋa ɔ fāʼo nɛ ma ndǐŋ a, nthɛ ŋa njùʼɔ ŋgwa Minnwi pi taoŋtaoŋ gū ntɔgɔ pi mbhɔ ghɔ.

Pɔɔ fɛ lɨ̀gəɨ nthɛ Oneshimu

^8-9Nthɛ yie ghɔ, ǹdɨ̄gəɨ ghɔ ŋa ɔ chwīe nnu ŋa ɔ fāʼo nɔ chwīe nu nɛ. Ni ghrɨ́ mbhɔ Krishto, a kaŋ nthɛ m̀fāʼo tɨnɨnjuʼɔ nɔ fɛ nu gɨ́ vɛ ŋa ɔ chwīe. Ndɔ nthɛ pi khwǎ ŋa pɔgɔ fāʼo nɛ, ǹdɨ̄gəɨ ghɔ lɨ̄gəɨ, mbɔ mu Pɔɔ ndunu ŋoŋ ndɔ mbɨnɨ mbɔ ŋgaŋ chə́ɨŋ nthɛ Krishto Jishɔ.

¹⁰Ǹdɨ̄gəɨ ghɔ nthɛ muuŋ a, Oneshimu, ŋa mi ni ŋgū tǎa vi moŋ piŋ nɔ haʼaŋ m̀bɔ moŋ chə́ɨŋ hɛiŋ nɛ. ¹¹A shini ndɔ mfǔoŋ mfāʼo ghɛ̀rɛ vɛ, ndɔ ti ndwɛ a fāʼo ghɛ̀rɛ vɛ mbɨnɨ mfāʼo vəɨ. ¹²Ǹthɔ ntaoŋ vi ŋa a pɨnɨ nthɔ njəɨ ghɔ, nja mbɔ pi njùʼɔ a nɛnnɛ ŋa ǹtaoŋ nu vɛ.

¹³Ŋ̀ka ni ŋkhwā nɔ mieŋ nu vi yəɨ mu, nnɛ ŋa minthɛ a ghɛ̄rɛ a nɔ lɨʼɨ yɔ moŋ pɨɨ ndɨɨ ŋa m̀bɔ moŋ chə́ɨŋ nthɛ pwa pishaʼakhɔ nɛ. ¹⁴Ndɔ ŋ̀khwā ŋa kiʼi ǹchwīe sheshe nnu ki ɔ lɔ mbiŋ, nnɛ kiʼi shiʼi yɔ pɔ pi ŋa pi fra ghɔ fra. Â pɔ pi ŋkwaŋ haʼaŋ njùʼɔ yɔ chhu nɛ. ¹⁵Nthɛ ŋa kəʼɨchəɨ a ni nchwīe yie ghɔ pi fɛ̄nɛ vəɨ yu nɔ kuo ndɨɨ nnɛ ŋa ɔ shi mbɨnɨ mfāʼo vi nɔ ŋguoŋ ndɨɨ ¹⁶ki lɔ nuʼuŋ mbɔ pi nɔ ŋkǔna, ndɔ a chaa ŋkǔna, mbɔ nɔ ŋkiɛŋ ndǐŋ, mīʼɛŋ mbɔ vəɨ. Ndwɛ a shi nja mfāʼo ntou ghɛ̀rɛ vɛ nɔ ŋkǔna yɔ pugu pa ndǐŋ ghɔ moŋ piŋ.

¹⁷Nnɛ ä mbɔ ŋa nɔ ŋgaŋ kwò fàʼa a, ɔ līi a nɔ ndǐŋ ghɔ, ɔ piŋ mbɨnɨ ndɔ̄gɔ vi ndɔ haʼaŋ ɔ lɔ̄gɔ pi mmu. ¹⁸Ä mfāaŋ sheshe nnu mbɨŋ ghɔ, ki sheshe ŋkrù yɔ pɔ puŋ yu, ɔ̂ nāʼaŋ nɔ ligi a. ¹⁹Ǹāʼaŋ yei lɨʼɨ pi ni nyaŋ mbhɔ: Mmu, Pɔɔ, nshi nduʼu vɛ. Ǹdɔ nuʼuŋ mfāʼo nɔ kwiŋ nu ghɔ ŋa ŋkrù a puŋ ghɔ yiɛŋ ti ŋgaʼa nthɛ ŋa ɔ tɔgɔ pi mbhɔ mu mfāʼo chɔmbhi ki mmɛ.

²⁰A yie, ma ndǐŋ a, ǹtāʼa shéi mbhɔ ghɔ nthɛ ligi Taathɔ. Māʼaŋ njùʼɔ a nɔ ndǐŋ ɔ moŋ piŋ nu Krishto.

²¹M̀fāʼo tɨnɨnjuʼɔ ŋa ɔ shi nchwīe nnu ŋa ǹchhu nɛ, ǹāʼaŋ mfɛ vɛ, nji nu ŋa ɔ shi nchwīe ti a ka chaa fɨʼɨ yɛ ŋa ǹchhu nɛ chaa. ²²Taʼa nnu nɔ pɨnɨ nu mbīgi pɔ ŋa ɔ pīri njiɛŋ nda vəɨ, nthɛ ŋa m̀fāʼo kwàʼa ŋa pi shi ŋkhwɛ̄ luoŋ yəɨ ghao, mfuʼu a moŋ chə́ɨŋ ǹthɔ njəɨ vəɨ.

Ndugwi chrā nu

²³Epafra, mbɔ ŋgaŋ kwò chə́ɨŋ a nthɛ Krishto Jishɔ, māʼaŋ chrà yɔ. ²⁴Maaku, ni Arishtaku, ni Dema, ni Luka mbɔ ghaŋ kwò fàʼa paŋ, māʼaŋ chrà yəɨ ŋkaa pugu.

²⁵Pwapuŋ Jishɔ Krishto mbɔ Taathɔ pɔ ni pəɨ ghao.