1 Pita

Fǔoŋ ŋwaʼaŋlɨ

Pita

Kāoŋ nu pa thɔ nnu

Ŋwaʼaŋlɨ yei nāʼaŋ Pita, mbɔ taʼa ŋgaŋ younjiŋ shɨna paanchrɔ ŋa Jishɔ ni nchuʼɔ nɛ. A ni nāʼaŋ mfɛ ni pa ghaŋ piŋ haʼaŋ pugu ni ntɔgɔ nu moŋ pa ntou ŋgəʼɨ nsha moŋ mbhi nthɛ tɨtɨnɨ ŋgəʼɨ ŋa pi ni mfɛ nu ni pugu nɛ, ŋa pugu thi a tɨnɨ moŋ piŋ yugu. A ni nchwīe yei ntɔgɔ pi ŋkuoŋ kwiŋ nu vugu ni pwa pishaʼakhɔ Jishɔ, ŋa nnu gu yi, ni nnu kuʼɔ nu mi moŋ gu pugu pa mbra thɔ nu mi, fɛ kwàʼa ni pugu nɔ ghaŋ piŋ. Nthɛ pi yei, pugu fāʼo nɔ tīi nu shii moŋ ŋgəʼɨ, mbɔ ni tɨnɨnjuʼɔ ŋa ŋgəʼɨ yei thɔ pi nɔ mōoŋ nu piŋ yugu njəɨ ŋa a yi tithi. A ni mbɨnɨ ŋkwiŋ vugu ŋa Minnwi shi ŋkɨ̄nɛiŋ piŋ yugu ndɨɨ ŋa Jishɔ shi mbɨnɨ nuʼuŋ nthɔ nɛ.

Māʼaŋ nu chrà

¹Ŋwaʼaŋlɨ yei llɔ pi mbhɔ mu Pita mbɔ ŋgaŋ ntaoŋ Jishɔ Krishto.

M̀fɛ pi ni pa ŋgwa Minnwi ŋa a chuʼɔ nɛ. Ŋgwa pei sha, nchhɔ nu nɔ pa ghɨ̀nɨ moŋ ŋgei pa laʼataoŋ Pontu, Galashia, Kapadoshia, Eshia pugu pa Bitinia. ²Minnwi Tǎa ni nji vəɨ, ndɔ nchuʼɔ vəɨ ŋa pəɨ pɔ yi taoŋtaoŋ ntɔgɔ pi ŋkuoŋ Jijwɛ yi, nnɛ nɔ yaʼo nu nchò Jishɔ Krishto ndɔ mbɨnɨ mbɔ yi shɨ̄gao ni chhǐ yi.

Pwapuŋ pugu pa ghɨghrɨ pɔ yəɨ ti nja njiɛŋ.

Pi phi ghɔ ŋkamuʼɔŋ ŋa ɔ fāʼo kwàʼa maoŋ

³Mbɔrɔ pɔ ni Minnwi ndɔ mbɨnɨ mbɔ Tǎa Taathɔ via Jishɔ Krishto! Ntɔgɔ pi ŋkuoŋ mmɛ kwoshɨnɨ yi, a chwīe pia pɔ phi ŋkamuʼɔŋ ntɔgɔ pi ŋkuoŋ kuʼɔ nu ni Jishɔ Krishto moŋ gu. Yei chwīe pia fāʼo kwàʼa maoŋ, ⁴nchhɔ njwɛrɛ nu nɔ fāʼo nu pa maoŋ shiʼi ŋa Minnwi shi mfɛ nɛ, ŋa a shiʼa ma mbɨrɨ ndɔ paʼa ndɔ mfāʼo kɔ̀rɔ, ndɔ mbaʼa a ma ŋkhu, ŋa Minnwi nūʼɔŋ po ni pəɨ nɛ. ⁵Maoŋ pighɔ pɔ pi yəɨ, mbɔ pəɨ ŋa ntɔgɔ ŋkuoŋ piŋ, Minnwi chhɔ ŋkɛ̄ʼi vəɨ ni ghrɨ́ yi, ti pəɨ shi nuʼuŋ mfāʼo lūgu nu ŋa Minnwi shi nōoŋ ni pəɨ moŋ ndugwi llɛ́ nɛ.

⁶Nthɛ pa nnu pei, pəɨ thɔ mfāʼo pwatua, njiʼi nthɛ nɔ haʼaŋ nɔ muuŋ kuo ndɨɨ, a pie ŋa pəɨ fāʼo pəʼɨ njùʼɔ nthɛ ntou pa mooŋ nu nɛ, ⁷nnɛ ŋa piŋ yɔ shi nōoŋ noŋ yi ŋa a ŋkiɛŋ yi, wuʼɔ nɔ haʼaŋ pi ghà njwɛʼi laoŋgo ni móŋoŋ nɔ chwīe nu a pɔ yi taoŋtaoŋ nɛ. Ndɔ piŋ yɔ ŋkiɛŋ yi nchaa laoŋgo, nthɛ ŋa laoŋgo ghà mbɨrɨ. Ndɨɨ ŋa piŋ yɔ nōoŋ noŋ yi ŋa a ŋkiɛŋ yi nɛ, kaŋ ɔ shi mfāʼo tōo nu pugu pa ndighaʼo ni ghaʼo nu ndɨɨ ŋa Jishɔ Krishto shi mbɨnɨ nōoŋ noŋ yi nɛ.

⁸Njiʼi nthɛ nɔ haʼaŋ pəɨ lɔ njəɨ vi nɛ, pəɨ khwā vi. Njiʼi nthɛ nɔ haʼaŋ pəɨ lɔ njəɨ vi ndwɛ nɛ, pəɨ piŋ vi, mfāʼo pwanjuʼɔ ni fɨʼɨ ŋkwaŋ pwatua pwapwa ŋa minthɛ paʼa ŋoŋ lɔ mfɨ̄ʼɨ, ⁹nthɛ ŋa pəɨ shi mfāʼo kɨ̀nɛiŋ piŋ yəɨ, mbɔ ŋa nchə̌ɨ yəɨ lūgu.

¹⁰A ni mbɔ nthɛ pi lūgu nu yei ŋa pa njəɨlɨʼɨ Minnwi ni ntaʼa, ndɔ mbie pɔpɔrɔ njəɨ, nchrā nthɛ fɛ́ yei ŋa Minnwi shi mfɛ ni pəɨ nɛ. ¹¹Pugu ni ŋkāa nɔ ji nu ŋa ndɨɨ ghɔ shi mbɔ pi ndɨɨ khɔ pugu pa ŋa a shi mbɔ pi ŋkwaŋ nɛiŋ. Yei ni mbɔ ndɨɨ yɛ ŋa Jijwɛ Krishto ŋa a pɔ mbɨŋ pugu nɛ ni nthɔ nshwei vugu ni ŋgəʼɨ ŋa Krishto shi ntīi shii moŋ ghɔ nɛ ŋkaoŋ ndɨɨ maa ŋkāʼo pugu pa ndighaʼo ŋa a shi njōu njiŋ yi nɛ.

¹²Minnwi ni nōoŋ ni pugu ŋa pugu lɔ njiʼi mfāʼa nu nthɛ pi noŋ yugu, pugu fāʼa nthɛ pi pəɨ, nɔ haʼaŋ pi kwo chīi ndwɛ ni pəɨ ntɔgɔ pi mbhɔ ŋgwa pɛ ŋa pugu ni nchīi ŋkɨ̀nɨ pwa pishaʼakhɔ ni pəɨ ntɔgɔ pi mbhɔ Jijwɛ Minnwi ŋa pi taoŋ llɔ po. Pa nnu pei ni mbɔ pa nnu ŋa njiʼi nthɛ pi ghaŋ ntaoŋ Minnwi shigi nɔ pɛʼi nu.

Gɛ̀ ŋa pəɨ chhɔ chɔmbhi taoŋtaoŋ

¹³Nthɛ yie ghɔ, p̂əɨ pīri njùʼɔ yəɨ nɔ fàʼa, nchhɔ ni lɨna, nūʼɔŋ ŋguoŋ njùʼɔ yəɨ ŋkuoŋ pwapuŋ ŋa pi shi nōoŋ ni pəɨ ndɨɨ ŋa Jishɔ Krishto pɨnɨ nōoŋ noŋ yi nɛ. ¹⁴Nɔ puoŋ yaʼo nchò, kiʼi pəɨ yiʼi mfɛ njùʼɔ yəɨ ni ŋkwaŋ shɔ̄rɔ nu ŋa pəɨ ni mfāʼo ndɨɨ ŋa pəɨ ni mbɔ moŋ ki ji nɛ. ¹⁵Ndɔ nɔ haʼaŋ ju ŋa a mɛ̄iŋ vəɨ pɔ pi yi taoŋtaoŋ nɛ, p̂əɨ ŋkaa pəɨ pɔ taoŋtaoŋ moŋ ŋguoŋ mbha nnu pəɨ ghao, ¹⁶ŋa pi nāʼaŋ ŋa, “P̂əɨ pɔ yi taoŋtaoŋ nthɛ ŋa mi yi taoŋtaoŋ.”

¹⁷P̈əɨ ŋkə̄ɨ ghɔ nɔ Tǎa ŋa a ghà nshaʼa ŋguoŋ ŋgwa ghao ki lɔ nōoŋ shieligi, nshaʼa pa ŋgwa pi ŋkwaŋ nɔ haʼaŋ mbha nnu yugu nōoŋ nɛ, a pie ŋa nɔ pa ghɨ̀nɨ ŋkuoŋ shhɛ hɛiŋ, p̂əɨ chhɔ pɨgəɨ chɔmbhi yəɨ ŋkuoŋ shhɛ hɛiŋ pi ni pɔ́gɔ Minnwi, ¹⁸mbɔrɔ nthɔ nji nu ŋa pi ni njuoŋ vəɨ mfuʼu moŋ mbha nnu chɔmbhi ki ghɛ̀rɛ ŋa pəɨ ni njɛʼi llɔ mbhɔ pa ŋkhu pa tǎa pəɨ nɛ, ki lɔ mbɔ pi ni pa maoŋ ŋa a ghà ndaʼa mbɨrɨ nɛ nɔ pa maoŋ tɨnɨnchuoŋ pugu pa laoŋgo. ¹⁹Pi ni njuoŋ vəɨ pi ni mbwa chhǐ Krishto, mbɔ chhǐ ŋa a pɔ nɔ yi muuŋ minjɨɨ ŋa a lɔ njiʼi mfāʼo ntəɨ ki kɔ̀rɔ nɛ. ²⁰Ŋkaoŋ Minnwi maa nchwīe mbhi, a ni ŋkwo chuʼɔ Krishto, ndɔ nōoŋ vi moŋ ndugwi llɛ́ pei nthɛ pi pəɨ, ²¹ŋa pəɨ tɔgɔ mbhɔ yu mbiŋ Minnwi nɛ. A ni mbɨʼɨ Minnwi ghɔ mbɨʼɨ vi moŋ gu mfɛ ndighaʼo ghɔ, nnɛ ŋa piŋ yəɨ pugu pa kwàʼa yəɨ pɔ pi mbɨŋ Minnwi.

²²Ndwɛ ŋa pəɨ chwīe noŋ yəɨ mbɔ yi taoŋtaoŋ ntɔgɔ pi ŋkuoŋ yaʼo nu nnu shini ndɔ nchwīe nɛ, ndɔ mbɨnɨ mfāʼo ŋkiɛŋ khwā noŋ nɔ pa lǐŋ moŋ piŋ nɛ, p̂əɨ khwā noŋ pəɨ shishiʼi ni taʼanjuʼɔ, ²³ŋa pi phi vəɨ ŋkamuʼɔŋ, paʼa ndɔ ntɔgɔ pi ŋkuoŋ mbhɛ̌ yaoŋ ŋa a ghà mbɨrɨ nɛ, pi phi vəɨ ntɔgɔ pi ŋkuoŋ yaoŋ ŋa a shiʼa njiʼi mbɨrɨ nɛ, mbɔ chrà Minnwi. Chrà ghɔ yi maoŋ ndɔ ŋkɨna ki ndugwi yi. ²⁴Nthɛ ŋa,

“Ŋguoŋ chɔmbhi ŋgwamishua pɔ pi nɔ trǔ,

ŋguoŋ ndighaʼo yugu ghao pɔ pi nɔ frawa trǔ.

Trǔ ghà mbrāo, frawa chuʼɔ ŋgū.

²⁵Ndɔ chrà Taathɔ kɨna ki ndugwi yi.”1:25 Ishaya 40:6,8.

Ndɔ chrà yei pwa pishaʼakhɔ ŋa pi ni nchīi ni pəɨ nɛ.

Ŋgùʼɔ ŋa a yi maoŋ pugu pa ŋgwa taoŋtaoŋ

¹Nnɛ, p̂əɨ mīʼaŋ ŋguoŋ mbha nnu pɨphɨ ghao, pugu pa lɛʼiŋgiɛŋ, pugu pa mbha nnu mifɨɨ, ni kighɨʼə, pugu pa chhu nu phɨ thɔ ŋgwa. ²Nɔ puoŋ prɔ ŋa pi wuʼɔ ŋka phi vugu phi nɛ, p̂əɨ shigi nuaŋ nu ŋkiɛŋ pɨnɨ shiʼi mbɔ yi jijwɛ nnɛ ŋa pəɨ shi ntɔgɔ ŋkuoŋ ghɔ ŋkuʼɔ moŋ lūgu nu. ³Ŋa Ŋwaʼaŋlɨ Minnwi chhu ŋa, “Pəɨ ŋkaa pəɨ ni njwɛʼi njəɨ ŋa Taathɔ ya mbwa.”

⁴Nɔ haʼaŋ pəɨ thɔ nu njəɨ vi nɔ ŋgùʼɔ ŋa a yi maoŋ, ŋgwamishua lāa, ndɔ ŋga mbɔ ligi Minnwi nɛ, mbɔ pi ŋgùʼɔ ŋa pi chuʼɔ ndɔ mbɔ ŋkiɛŋ yi. ⁵Pəɨ nduthɔ yəɨ pɔ nɔ pa ŋgùʼɔ maoŋ ŋa pi thɔ ŋkrao nu ŋkuʼɔ nu nɔ ghɔ nɔ nda moŋ Jijwɛ nɔ pɔ nu ghaŋ fɛʼiŋgiɛŋ Minnwi yi taoŋtaoŋ, nɔ fɛ nu maoŋ fɛʼiŋgiɛŋ ŋa Minnwi piŋ nɛ, mbɔ yi moŋ jijwɛ ntɔgɔ pi mbhɔ Jishɔ Krishto. ⁶Nthɛ ŋa a pɔ moŋ Ŋwaʼaŋlɨ Minnwi ŋa,

“Līi njəɨ, ǹūʼɔŋ ŋgùʼɔ chəɨ Shayaoŋ,

mbɔ ŋgùʼɔ nchini nda ŋa nchuʼɔ nūʼɔŋ, mbɔ ŋgùʼɔ pwapwa.

Shesheŋoŋ ŋa a piŋ vi nɛ

mbaʼa a lɛ ma mfāʼo lrithɔ.”

⁷Nnɛ ndighaʼo ghɔ pɔ pi ni pəɨ ŋa pəɨ piŋ nɛ, ndɔ ni ŋgwa pɛ ŋa pugu lɔ njiʼi mbiŋ nɛ,

“Ŋgùʼɔ yɛ ŋa

ghaŋ krao nda ni ndāa nɛ pɨnɨ mbɔ ju ndugwi ŋgùʼɔ shiʼi,”

⁸mbɨnɨ mbɔ,

“Ŋgùʼɔ kɨʼɨŋgɨnɨ,

mbɨnɨ mbɔ ŋgùʼɔ māʼaŋ ŋgwa shhɛ.”

Pugu kɔ̄rɔ nthɛ ŋa pugu chɨ̄ʼə chrà Minnwi, nɔ haʼaŋ pi ni nūʼɔŋ vugu ŋa pugu chwīe nɛ.

⁹Ndɔ pəɨ pɔ pi ŋgwrɛiŋgwa ŋa pi chuʼɔ, mbɔ ghaŋ fɛʼiŋgiɛŋ Minnwi ndɔ mbɔ pa pifuoŋ, ŋgwa taoŋtaoŋ, ŋgwa ŋa pugu pɔ pi ji nɛ, ŋa pəɨ chīi ndìpwa Ju ŋa a gɛ̄ vəɨ mfuʼu vəɨ moŋ njiŋ niʼiŋ vəɨ moŋ líʼɛ pwapwa yi. ¹⁰Yichəɨ ndɨɨ ni mbɔ paʼa pəɨ lɔ njiʼi mbɔ ŋgwa Minnwi, ndɔ ndwɛ pəɨ ŋgwa pi, yichəɨ ndɨɨ ni mbɔ paʼa pəɨ lɔ nji kwoshɨnɨ Minnwi ndɔ ndwɛ pəɨ fāʼo kwoshɨnɨ yi.

¹¹Pa ŋkiɛŋ lǐŋ paŋ, ǹdɨ̄gəɨ vəɨ, pəɨ nɔ pa ghɨ̀nɨ ndɔ mbɔ nɔ ŋgwa ŋa pi yōu vugu nɛ, p̂əɨ ləʼɨ pa nnu khwā nu pa nnu tɔtrɔ ŋa pugu thɔ māʼaŋ nchhɔ̀ pugu pa nchə̌ɨ yəɨ nɛ. ¹²Mbha nnu pəɨ shɨna pa ŋgwa pɛ ŋa pugu lɔ njiʼi mbiŋ Minnwi nɛ pɔ yi chɨɨchɨɨ, nnɛ ŋa ndɨɨ ŋa pugu chrā nthɛ vəɨ nɔ ghaŋ phɨ nɛ, pugu nthɛ pugu yəɨ mbha nnu shiʼi pəɨ ŋgaʼo Minnwi llɛ́ ŋa a lɛ nthɔ nɛ.

Yaʼo nu nchò pa thishɨ

¹³Nthɛ pi Taathɔ, p̂əɨ yaʼo nchò ŋguoŋ pa thishɨ ŋa ŋgwamishua nūʼɔŋ nɛ. Yaʼo nchò fùoŋ Roma, mbɔ mmɛ taathɔ, ¹⁴njaʼo nchò ghaŋ shaʼa ŋgwa nɔ ŋgwa ŋa Minnwi tɔgɔ mbɔ fùoŋ Roma ntaoŋ vugu nɔ fɛ nu njɔ́ ni ŋgwa pɛ ŋa pugu chwīe phɨ nɛ, ndɔ mbɨnɨ ŋgaʼo ŋgwa pɛ ŋa pugu chwīe shiʼi nɛ.

¹⁵Nthɛ ŋa a nnu ŋa Minnwi tāʼa nu nɛ, ŋa pəɨ kie ŋkuoŋ chwīe nu shiʼi, nchri chrà ki ji ŋa pa nàna ghà nchrā nɛ. ¹⁶P̂əɨ chhɔ chɔmbhi yəɨ nɔ pa ŋgwa ŋa pugu lɔ njiʼi mbɔ pa kǔna, ndɔ ki lɔ ndɔ̄gɔ ji nu ŋa pəɨ lɔ njiʼi mbɔ pa kǔna nɛ ŋkuru pi nnu pɨphɨ nɔ ghɔ, pəɨ chhɔ pi nɔ puoŋ fàʼa Minnwi. ¹⁷P̂əɨ ghaʼo ŋguoŋ ŋgwa ghao. Ŋkhwā pa lǐŋ moŋ piŋ, mfāʼo pɔgɔ Minnwi, ŋgɨnɔ fùoŋ Roma.

Ntɨ́gɨ ni pa puoŋ fàʼa

¹⁸Pa puoŋ fàʼa, p̂əɨ yaʼo mbhɔ taathɔ pəɨ ni ŋguoŋ ghaʼo nu ghao, njaʼo nchò yugu ki lɔ ŋguʼɔ mbɔ pi pɛ taathɔ ŋa pugu ŋgwa shiʼi mbɨnɨ mbɔ ŋgwa juju nɛ, njiʼi nthɛ pi pi pɨphɨ ŋkaa pugu. ¹⁹Minnwi shi mfɛ mbɔrɔ ni pəɨ nthɛ yie, nɔ haʼaŋ pəɨ ntīi shii moŋ ŋgəʼɨ ki mbhɔ yəɨ lɔ mbɔ nɔ ghɔ, nthɛ pi ŋa pəɨ ji nnu ŋa Minnwi tāʼa nu nɛ. ²⁰Nthɛ ŋa pəɨ shi nshei pi khɔ nɔ haʼaŋ pəɨ nchwīe phɨ, pi wie vəɨ, pəɨ tīi shii moŋ ghɔ? Ndɔ ti p̈əɨ nchwīe shiʼi pi wie vəɨ, Minnwi fāʼo pwatua ni pəɨ nthɛ yie. ²¹Nthɛ ŋa pi gɛ̄ vəɨ nthɛ pi yei, nthɛ ŋa Krishto ni njəɨ ŋgəʼɨ nthɛ vəɨ, mieŋ lì ni pəɨ, nnɛ ŋa pəɨ chuʼɔ chhɨkwo yi. ²²A shini ndɔ nchwīe phɨ, ndɔ paʼa kaŋ taʼa chrà mifɨɨ lɔ mbɔ nchò yu.

²³Ndɨɨ ŋa pi ni ŋgwɛʼi vi nɛ, a shini ndɔ nduʼu, ndɨɨ ŋa a ni njəɨ ŋgəʼɨ nɛ, a shini ndɔ ŋgūru ŋoŋ, a ni ŋguʼɔ ŋgə̄ɨ shhɨ nthɔ mfɛ noŋ yi ni Minnwi, mbɔ ŋoŋ ŋa a ghà nshaʼa ŋgwa ni ndɨndɨ nɛ. ²⁴Ju nduthɔ yi ni ntiɛŋ phɨ yia mbɨŋ yu ŋkuoŋ wáʼa nnɛ ŋa pia khu nthɛ phɨ, mbɔ yi maoŋ moŋ ndɨndɨ. Ntɔgɔ pi ŋkuoŋ pa fɨ́ pi, ghɨ̌nɔ yəɨ pɔ yi yɨ̄gɨ. ²⁵Pəɨ ni nchhɔ fāaŋ ndaoŋ nɔ pa minjɨɨ, ndɔ ŋkwo pɨ̄nɨ ndwɛ njəɨ ŋkɛ̄ʼi vəɨ, mbɔ ŋgaŋ lɨna ni nchə̌ɨ yəɨ.

Pa piŋgɛ láŋ pugu pa laoŋ pugu

¹Wuʼɔ nɛnnɛ, pa piŋgɛ láŋ, p̂əɨ yaʼo nchò laoŋ pəɨ, nji ŋa s̈hesheŋoŋ vugu mieŋ ki lɔ mbiŋ chrà Minnwi, a nthɛ pugu shi ŋkara mbiŋ pi wuʼɔ nɔ yəɨ nu mbha nnu ŋgwɛ pugu, pi ki pəɨ lɔ nchrā nnu, ²ndɨɨ ŋa pugu yəɨ ŋkwaŋ haʼaŋ mbha nnu pəɨ yi yaʼo nchò ndɔ mbɔ yi taoŋtaoŋ nɛ.

³Kiʼi chwīe nu noŋ yəɨ pɔ pi yi ŋgrào noŋ nɔ pa paʼa nu thɔ, pa gwɛ nu shɨ́ga tɨnɨnchuoŋ, ki ŋkwaŋ ndhwí ŋa pəɨ māʼaŋ nu nɛ. ⁴Chwīe nu noŋ yəɨ mbwa pɔ pi yi moŋ njùʼɔ, mbɔ yɛ ndìpwa ŋa a shiʼa ma mbɨrɨ nɛ, mbɔ yi jijwɛ juju pugu pa yi chichhi. A yie ŋa a pwa ligi Minnwi. ⁵Nthɛ ŋa yei ŋkwaŋ haʼaŋ piŋgɛ taoŋtaoŋ llɛshhɨ, ŋa pugu ni nūʼɔŋ kwàʼa yugu mbɨŋ Minnwi, ni nchhɔ nchwīe noŋ pugu mbwa, tɔgɔ pi ŋkuoŋ yaʼo nu nchò laoŋ pugu, ⁶wuʼɔ nɔ haʼaŋ Shera ni njaʼo nchò Abrahaŋ ti nchhɔ mɛ̄iŋ vi pi ni taathɔ. Ndɔ pəɨ pa puoŋ pi nɔ haʼaŋ pəɨ nchhɔ nchwīe shiʼi ki lɔ mbɔgɔ sheshe yaoŋ.

⁷Wuʼɔ nɛnnɛ, pimbia, p̂əɨ chhɔ pəɨ pa gwɛ pəɨ moŋ ŋkwaŋ shɛndaoŋ ŋa a kāʼo nɛ, ni ji nu ŋa pugu shi lɔ ntɨnɨ nɔ pəɨ. Ŋgaʼo vugu nthɛ ŋa pəɨ pugu shi mfāʼo fɛ́ chɔmbhi ŋa Minnwi shi mfɛ nɛ kaʼa. Pəɨ chwīe nnɛ nji ŋa kiʼi luoŋ Minnwi yəɨ fāʼo kɨʼɨŋgɨnɨ.

Yəɨ nu ŋgəʼɨ nthɛ ŋa pəɨ chwīe nnu ndɨndɨ

⁸Nɔ lūgwi nu, p̂əɨ pɔ ni taʼa nchò, mfāʼo kwoshɨnɨ ni noŋ pəɨ, mfāʼo khwā noŋ shɨna pəɨ, ni njùʼɔ pɔpɔrɔ ndɔ mfāʼo jū noŋ. ⁹Kiʼi nduʼu phɨ ni phɨ, ki wɛ́ʼi ni wɛ́ʼi, ndɔ ka luʼu pi ni mbɔrɔ, nthɛ ŋa mbɔrɔ yaoŋ ŋa Minnwi ni ŋkāʼa nɔ fɛ nu vɛ ndɨɨ ŋa a ni ŋgɛ̄ ghɔ nɛ. ¹⁰Nthɛ ŋa Ŋwaʼaŋlɨ Minnwi chhu ŋa,

S̈hesheŋoŋ ntāʼa nu mfāʼo nchhɔ́ shiʼi ndɔ njəɨ pa nnu shiʼi ŋa a thɔ ndɔ̄gɔ lɨʼɨ nɛ,

kiʼi pa chrà pɨphɨ taoŋ nchò yu, ki pa chrà lɛʼiŋgiɛŋ,

¹¹a pāʼa ŋkǔnu yi ni phɨ ndɔ nchwīe shiʼi,

a shigi ghɨghrɨ ndɔ njōu njiŋ yi.

¹²Nthɛ ŋa ligi Taathɔ pɔ mbɨŋ pa ŋgwa ndɨndɨ a lɔ mbɨnɨ njaʼo luoŋ Minnwi yugu.

Ndɔ Taathɔ ghà mbɨrɨ ligi yi ni pa ghaŋ chwīe phɨ.

¹³A shi mfɛ gɔ̌ ŋgəʼɨ ni pəɨ nɔ haʼaŋ pəɨ shigi chwīe nu shiʼi? ¹⁴Ndɔ p̈əɨ njiʼi njəɨ ŋgəʼɨ nthɛ ŋa pəɨ chwīe nnu ŋa a kāʼo nɛ Minnwi fɛ mbɔrɔ ni pəɨ. Kiʼi pəɨ pɔgɔ shesheŋoŋ, ndɔ kiʼi njùʼɔ yəɨ ghana vəɨ. ¹⁵Ndɔ p̂əɨ ghaʼo Krishto nɔ Taathɔ moŋ njùʼɔ pəɨ, mbīri noŋ yəɨ ŋguoŋ ndɨɨ nɔ fɛ nu khwɛ̀ ni shesheŋoŋ ŋa a pie vəɨ ni nnu nthɛ kwàʼa ŋa pəɨ fāʼo mbɨŋ pəɨ nɛ, ¹⁶ndɔ p̂əɨ chwīe ni juju pugu pa pɔ́gɔ. Ŋ̂gaŋthɔ yəɨ pɔ yi shieshie, nnɛ ŋa pi nchhu nnu pɨphɨ thɔ pəɨ, lrithɔ wɛ̄iŋ ŋgwa pighɔ ŋa pugu wɛʼi mbha nnu shiʼi yəɨ moŋ Krishto nɛ. ¹⁷Nthɛ ŋa a pwa nɔ yəɨ nu ŋgəʼɨ nthɛ chwīe nu nnu shiʼi nɔ haʼaŋ a mbɔ nnu ŋa Minnwi tāʼa nu nɛ, nchaa yəɨ nu ŋgəʼɨ nthɛ nchwīe nu phɨ.

¹⁸Nthɛ ŋa Krishto ni njəɨ ŋgəʼɨ3:18 Pichəɨ pa Ŋwaʼaŋlɨ Minnwi chhu pi ŋa nthɛ ŋa Krishto ni ŋkhu nthɛ phɨ. ŋkaa yu taʼa ŋgɛ́ nthɛ phɨ, mbɔ ŋoŋ ndɨndɨ nɔ ligi ŋgwa pɨphɨ, nnɛ nɔ thɔ nu ni pia njəɨ Minnwi nɔ ghɔ. Pi ni njwi vi moŋ frɛinoŋ, ndɔ pi chwīe a pɔ yi maoŋ moŋ Jijwɛ Minnwi3:18 Yichəɨ shɛndaoŋ nɔ chhu nu nnu yei pɔ ŋa, moŋ jijwɛ yi..

¹⁹Moŋ Jijwɛ ghɔ, a ni ŋgə̄ɨ nchīi chrà ni pa jijwɛ ŋa pugu pɔ moŋ chə́ɨŋ nɛ, ²⁰mbɔ pa jijwɛ ŋa pugu ni ma ntɨnɨthɔ ndɨɨ ŋa Minnwi ni nthɔ mfāʼo wɛ̄iŋ njùʼɔ moŋ llɛmbhi Noa, nɔ haʼaŋ pi ni nthɔ nchwīe ŋkiɛŋ mmɛ pie ŋa pɔ nɔ nda nɛ, ŋa shɨgɛi ŋgwa, mbɔ fúoŋ ŋgwa, ni ndūgu moŋ ghɔ ntɔgɔ ŋkuoŋ ŋkhǐ. ²¹Ŋa a ni mbɔ lì nchhɔ nōoŋ kwe ŋkhǐ ŋa a lūgu ni pəɨ ndwɛ, ki lɔ mbɔ pi nɔ yaoŋ fuʼu nchhí mbɨŋ noŋ, ndɔ a pɔ pi píe ni Minnwi nɔ chwīe nu ŋgaŋthɔ yia pɔ yi taoŋtaoŋ3:21 Yichəɨ shɛndaoŋ nɔ chhu nu nnu yei pɔ ŋa A pie ni Minnwi llɔ moŋ ŋgaŋthɔ yia ŋa a yi taoŋtaoŋ nɛ., ntɔgɔ pi ŋkuoŋ kuʼɔ nu Jishɔ Krishto moŋ gu.

²²Jishɔ Krishto yei ŋoŋ ŋa a ghə̄ɨ po, nchhɔ ŋgei mbhɔ Minnwi yi jɨ, nthɔ nshaʼa pa ghaŋ ntaoŋ Minnwi pugu pa thishɨ moŋ po pugu pa ghaŋ njɨ.

Chɔmbhi ŋa a fāʼo kwrí nɛ

¹Nthɛ ŋa Krishto ni njəɨ ŋgəʼɨ moŋ frɛinoŋ nɛ, p̂əɨ pīri noŋ yəɨ moŋ taʼa ŋkwaŋ pīʼi nu, nthɛ ŋa shesheŋoŋ ŋa a yəɨ ŋgəʼɨ moŋ frɛinoŋ nɛ lɔ nuʼuŋ nchhɔ nu moŋ phɨ. ²Llɔ ndwɛ ŋgə̄ɨ nu shhɨ, pəɨ chhɔ pɨgəɨ chɔmbhi yəɨ ŋkuoŋ mbhi hɛiŋ ki lɔ nthɔ nchwīe pi nnu haʼaŋ ŋgwamishua shɔ̄rɔ nu nɛ, pəɨ chwīe pi nnu ŋa Minnwi tāʼa nu nɛ. ³Nthɛ ŋa ndɨɨ ŋa a tɔgɔ nɛ kwo yiɛŋ nɔ chwīe nu nnu ŋa pa ghaŋ ki piŋ Minnwi khwā nɔ chwīe nu nɛ. Pəɨ ni nchhɔ chɔmbhi tɔtrɔ, nshɔ̄rɔ njùʼɔ, mbaa làʼo, ŋgə̄ɨ nu moŋ pa lɨʼɨ jɨ ki tou, pa lɨʼɨ nnu làʼo, niʼiŋ noŋ yəɨ moŋ wuwuru ghaʼo nu pa nnwi. ⁴Moŋ ŋguoŋ pa nnu pei, pugu ghà ŋgrāo ŋa pəɨ lɔ nuʼuŋ ntūru pəɨ pugu nɔ chwīe nu pa nnu ŋa a shi mbɨrɨ vəɨ pɨrɨ nɛ, nnɛ pugu chhu phɨ thɔ ghɔ, ⁵ndɔ pugu shi ntaa noŋ yugu ni Minnwi, ŋa a pīri noŋ yi nɔ shaʼa nu ŋgwa maoŋ pugu pa ŋgwa khu nɛ. ⁶Nthɛ yei nnu, pi chīi ŋkɨ̀nɨ pwa pishaʼakhɔ njiʼi nthɛ ni ŋgwa pɛ ŋa pugu khu nɛ, ŋa njiʼi nthɛ nɔ haʼaŋ pi shaʼa vugu moŋ frɛinoŋ nɔ haʼaŋ pi ghà nshaʼa ŋgwamishua nɛ, minthɛ pugu fāʼo chɔmbhi moŋ jijwɛ ŋkwaŋ haʼaŋ Minnwi ghà nchhɔ nɛ.

Ŋkiɛŋ ŋgaŋ lɨna ni pa maoŋ ŋa Minnwi fɛ nɛ

⁷Ndɨɨ ŋa ŋguoŋ pa yaoŋ ghao shi ndugwi nɛ kwo para, nthɛ yie ghɔ, p̂əɨ fāʼo wɛ̄iŋ noŋ, nchhɔ ni lɨna məɨ nnɛ ŋa minthɛ pəɨ luoŋ Minnwi. ⁸Ŋkiɛŋ mmɛ nnu ŋa a nchaa ŋguoŋ yi nɛ pɔ ŋa p̂əɨ khwā noŋ pəɨ ni taʼanjuʼɔ, nthɛ ŋa khwǎ ghà ŋkuru ntou phɨ. ⁹P̂əɨ ghrā maoŋ ŋa pəɨ fāʼo nda pəɨ nɛ shɨna pəɨ ki lɔ nduo nu. ¹⁰Nɔ ŋkiɛŋ pa ghaŋ lɨna ni pa ŋkwaŋ ŋkwaŋ yaoŋ fɛ llɔ mbhɔ Minnwi, ŝhesheŋoŋ ghɛ̄rɛ vichəɨ ni ŋkiɛŋ yaoŋ fɛ́ ŋa Minnwi fɛ ghɔ nɛ. ¹¹Shesheŋoŋ ŋa a chrā nɛ, chrā nɔ ŋoŋ ŋa a chhu pi pa ŋkɨ̀nɨ llɔ mbhɔ Minnwi, shesheŋoŋ ŋa a fāʼa nu nɛ, fāʼa nɔ haʼaŋ a fāʼa pi ni ghrɨ́ ŋa Minnwi fɛ nɛ, nnɛ ŋa moŋ ŋguoŋ yaoŋ ghao, Minnwi shi mfāʼo ndighaʼo yi ntɔgɔ pi mbhɔ Jishɔ Krishto, mbɔ ju ŋa ndighaʼo pugu pa ghrɨ́ pɔ pi ji ki ndugwi yi nɛ. A pɔ nɛnnɛ.

Yəɨ nu ŋgəʼɨ nɔ ŋgaŋ piŋ

¹²Ŋkiɛŋ pa lǐŋ paŋ, kiʼi pəɨ ghrāo tɨtɨnɨ mōoŋ nu ŋa a nii vəɨ nɔ mōoŋ nu vəɨ, pi nɔ haʼaŋ a thɔ ndɔ̄gɔ yichəɨ ŋgɨ̀nɨ nnu ndɔ̄gɔ lɨʼɨ mbɨŋ pəɨ. ¹³Ndɔ pəɨ ka fāʼo pi pwatua ŋa pəɨ fāʼo yəɨ ghrà ŋgəʼɨ ŋa Krishto ni njəɨ nɛ, nnɛ ŋa minthɛ pəɨ ŋkaa pəɨ fāʼo pwatua pugu pa pwanjuʼɔ ndɨɨ ŋa Krishto shi mbɨnɨ nuʼuŋ nthɔ moŋ ndighaʼo yi nɛ. ¹⁴P̈i ŋgwɛʼi vəɨ nthɛ pi ligi Krishto, kaŋ pəɨ fāʼo mbɔrɔ, nthɛ ŋa Jijwɛ ndighaʼo pugu pa yi Minnwi pɔ mbɨŋ pəɨ. ¹⁵Ndɔ kiʼi shesheŋoŋ vəɨ yəɨ ŋgəʼɨ nthɛ pi ŋa a njwi ŋoŋ, ki ŋgɨna, ki ŋgūo nnu mbɨmbhɨ, ki chəɨŋkichini. ¹⁶Ndɔ ti s̈hesheŋoŋ vəɨ njəɨ ŋgəʼɨ nthɛ pi ŋa a Krishitɛŋ, kiʼi a fāʼo lrithɔ, a fɛ pi ndighaʼo ni Minnwi ŋa a piŋ ligi Krishto. ¹⁷Nthɛ ŋa ndɨɨ shaʼa kwo kāʼo, ndɔ pi fǔoŋ njɛ̄ shaʼa pi moŋ mbaanda Minnwi. Ti ä njɛ̄ pi ni pia, kaŋ a shi mbɔ pi nɛiŋ ni ŋgwa pɛ ŋa pugu lɔ njiʼi mbiŋ pwa pishaʼakhɔ Minnwi nɛ? ¹⁸Nɔ haʼaŋ Ŋwaʼaŋlɨ Minnwi chhu ŋa,

“Ä ŋgaʼa ni ŋoŋ ndɨndɨ nɔ lūgu nu,

kaŋ shwéi yi shi mbɔ pi nɛiŋ ni pa ghaŋ ki ghaʼo Minnwi, pugu pa ghaŋ phɨ?”

¹⁹Nthɛ yie ghɔ, ŋgwa pɛ, ŋa pugu yəɨ ŋgəʼɨ nthɛ ŋa a nnu ŋa Minnwi tāʼa nu nthɛ vugu nɛ, fɛ nchə̌ɨ yugu ni Minnwi mbuoŋ vugu ŋa a kàʼa ki fɨ̄ɨ, nɔ haʼaŋ pugu ghə̄ɨ shhɨ nthɔ nchwīe nnu ŋa a kāʼo nɛ.

Kɛ̄ʼi minjɨɨ Minnwi

¹Nɛnnɛ, m̀āʼaŋ ghrɨ́ pa thishɨ ŋa pugu thɔ njɛʼi ŋgwa shɨna pəɨ nɛ, nɔ yichəɨ taʼa nthishɨ ŋa a ghà njɛʼi ŋgwa ndɔ mbɔ miŋkwentie pa ŋgəʼɨ Krishto ndɔ mbɨnɨ mbɔ ŋoŋ ŋa a shi mfāʼo ghrà moŋ ndighaʼo ŋa pi shi nōoŋ nɛ, ²ŋa p̂əɨ kɛ̄ʼi minjɨɨ Minnwi shɨna pəɨ, ndɨna ni pugu ki lɔ nthɛ pi ŋa pi yīʼi vəɨ yīʼi, ndɔ a pɔ pi moŋ khwā njùʼɔ yəɨ ŋkwaŋ nɔ haʼaŋ Minnwi tāʼa nu ŋa pəɨ chwīe nɛ, ki lɔ mbɔ nthɛ pi njùʼɔ mbɨŋ, mbɔ nthɛ pi khwā njùʼɔ nɔ fàʼa. ³Ki lɔ nthɔ nshaʼa ŋgwa pɛ ŋa pəɨ lɨna nu ni pugu nɛ, pəɨ nōoŋ pi lì ni pa minjɨɨ pighɔ. ⁴Ndɨɨ ŋa Taathɔ pa Ŋkɛ̄ʼi Minjɨɨ thɔ nɛ, pəɨ shi mfāʼo ŋkie ndighaʼo ŋa a shiʼa ma ŋkhu nɛ. ⁵Wuʼɔ nɛnnɛ, p̂əɨ ŋa pəɨ pa mikəʼɨ nɛ, yaʼo nchò pa thishɨ ŋa pugu yɛʼi ŋgwa nɛ. Ŋguoŋ vəɨ ghao pɔ pa ghaŋ jū noŋ ni noŋ pəɨ nthɛ ŋa, “Minnwi lāa ŋgwa haʼaŋ pugu kə̄rə noŋ yugu tɔthɨ nɛ, nōoŋ pwapuŋ yi ni ŋgwa haʼaŋ pugu shwiʼi noŋ yugu shhɛ nɛ.” ⁶Nthɛ yie ghɔ, p̂əɨ shwiʼi noŋ yəɨ shhɛ shhɨ Minnwi ŋa a fāʼo njɨ nɔ lɨʼɨ nu vəɨ nɛ, nji ŋa ndɨɨ shi ŋga ŋkāʼo, a kə̄rə vəɨ tɔthɨ. ⁷P̂əɨ thɔ nchaʼa ŋguoŋ pa lrì pəɨ mfɛ nu ghɔ nthɛ ŋa a ghà ndɨna ni pəɨ. ⁸P̂əɨ chhɔ ni lɨna məɨ, nchhɔ njra nu. Mbɨ̌na vəɨ, mbɔ devɨ, nyīeŋ nu nɔ paʼo ŋa a wara nu, nthɔ ntāʼa ŋoŋ nshāa vi. ⁹Ndɔ p̂əɨ lɨʼɨ vi, nthi a tɨnɨ moŋ piŋ yəɨ, nji nu ŋa ŋkwaŋ ŋgəʼɨ ŋa pəɨ tɔgɔ nu moŋ ghɔ nɛ, pa lǐŋ pəɨ moŋ ŋguoŋ mbhi ghao tɔgɔ nu moŋ ghɔ ŋkaa pugu. ¹⁰Pəɨ shi ŋga ŋkwo yəɨ ŋgəʼɨ nɔ kuo ndɨɨ, Minnwi ŋa a fāʼo ŋguoŋ pwapuŋ, ŋgɛ̄ vəɨ ŋa pəɨ fāʼo yəɨ ghrà ndighaʼo yi ŋa a lɔ mfāʼo ndugwi yi moŋ Krishto nɛ, ju nduthɔ yi shi nchwīe pəɨ kāʼo, ntuoŋ vəɨ, māʼaŋ ghrɨ́ yəɨ ndɔ mbɨnɨ nchwīe pəɨ thi shiʼi. ¹¹Ŋguoŋ ghrɨ́ ghao, ŋguoŋ ndɨɨ ghao pɔ pi ji ki ndugwi yi. A pɔ nɛnnɛ.

Ndugwi njiŋ māʼaŋ nu chrà

¹²Shaila5:12 Gri fāʼo pi ŋa Shivanu, mbɔ ŋkwaŋ haʼaŋ pi ghà mbɨnɨ mɛ̄iŋ Shaila ghɔ nɛ., ndǐŋ via, ŋa minthɛ ŋoŋ yɨʼə noŋ yi mbiŋ yu nɔ haʼaŋ njəɨ nɛ, ghɛ̄rɛ a nɔ nāʼaŋ nu muuŋ kuo ŋwaʼaŋlɨ yei. Ǹthɔ māʼaŋ ghrɨ́ yəɨ ndɔ nchhu nu ni pəɨ ŋa yei pwapuŋ Minnwi shishini. Pəɨ thi moŋ ghɔ a tɨnɨ. ¹³Yichəɨ taʼa chɔshi nɔ yəɨ ŋa a pɔ Babiloŋ nɛ, ŋa pi chuʼɔ vi ŋkaa yu nɛ māʼaŋ chrà yəɨ. Maaku muuŋ a māʼaŋ chrà yəɨ ŋkaa yu. ¹⁴P̂əɨ chrā ni noŋ pəɨ ni paŋ nu nɔ nōoŋ nu khwǎ ghaŋ piŋ.

Ghɨghrɨ pɔ mbɨŋ ŋguoŋ vəɨ ghao ŋa pəɨ pɔ moŋ Krishto nɛ.