TITO

TITO

¹ Ahos Pablo kagsorat to fag sorat. Aho in Diyos nasali sogowan, hanggan in Kiristo Hisos Fandiya Barita. Is Diyos ka nasogongko kaarakitay ho farigon it manga nafili fag manga taw ta nogsyag hanya. Hogfatwagdog has mangag syag has haboyagan kadwa ha katabowanan, ka fakaoronganan kantam fakatiwalaon. ² Hyabi hyabi, is Diyos nodya kalig intam daga, is Diyos natogon kitay, hanya ha bato disagon haboyagan kitonya, hanggan hanyadwa yadi twag bohag. ³ Ginya madi aban, gis nanya fag masohod ka maangay hanya, is Diyos, intam Famawi, nafatwagdog has taw to fag haboyagan. Is Diyos ka nafasognod kitay, fag aho ka bomarita tonya has taw. ⁴ Hogsorat ha hyamo, Tito. Haw bilang wangko anak orongan santam fakatiwalaon pariho. Haw nangos fag domog kitay, is Diyos intam Ama, hanggan is Kiristo Hisos intam Famawi mahoway ha hyamo, hanggan igfalokmay im fangayofan fagaba. ⁵ Itfagonan ho nafagoyan yapdi hyamo sas foyo dagat Kirita, kaarakitay haw fatabo yapdi ka manga bagay kadyan fafiyan. Angko togon hyamo itfagonan kitay, filiyan manga fagtahinan san Diyos manga Tifonan sas fagayo fag manga banwa. ⁶ Kam fagfiliyon fag kawa manga ama ka manga iba taw idwa ha fagoliton hanya, sadi dit babay. It manga anak katiwala yadin Diyos, fiyat manga ogali, magalang has taw. ⁷ Ka gano Tifonan fag kadwa ha fabangdanan maskin kat faganoon kawa han Diyos. Fag kadwa ha takan, idwa maisog, idwa yadig lango, idwag faawangan has taw, idwa madaya has kwarta baliwa. ⁸ Dapat fag kawa mafasakbawon famaklay, ka galwasi has fiya, twag dahan, idwa ha fagihidon taw, matanogon yadi han Diyos, idwag falabit sadili fakasayaon, nyawa kana. ⁹ Hanya fag twagdog fiya fiya ka barita kantam fagsyagon maganit, kitontam fagfaadalon. No kitonya, hanya syagan igfarigon ista manga fangayofan kawag faadal fiya, syagan yadi fabohag has taw kaglaban has fakaoronganan. ¹⁰ Kati aywan kaglaban has adal orongan. Ista manga hampang kadwa ha kahologan, igdaya ka tiba. Ka fakaaywanan ka kitonya, kawa ka mahogod has ogali Hodyo. ¹¹ Ka fiya fag idwag faawang kagfaadal kitonya, maskin tagfaagran kat manga ofod balay, idwa yadi kayag faadal kadwa orongan, kaarakitay lomag kwarta. ¹² Ka mandi sadik taga Kirita, ka matoltolon kaglwang, Ka manga taga Kirita fagaba wa bohagon, bilang wa hayopan, masamohon, mafang ya ngadi. ¹³ Orongan wat fwayong. Maskin kitonyasta ogali, ¹⁴ haw fag marigon nogfatohod has taw, kaarakitay ta katiwala yapdi marigon in Diyos, idwa katiwala has manga toltol odi manga Hodyo, hanggan ista manga faadalon ka nadayo ka fakaoronganan. ¹⁵ Ista fangayofan no fiya, fagayo fag manga bagay fiya has taw, idwa ha fagliyon. Dapat ay, kasta fangayofan nodwa fiya, nodwa yadi katiwala in Diyos, fagayo fag manga bagay fagliyon wan, maskin it fangayofan fagayo has dwat, tadwa twagdog no kana ka dwat orongan. ¹⁶ Taglwang kitay, Mi kilala yadi wan Diyos, dapat ay, it manga ogali igfabohag it manga hampang. Dwat wa dahol ista ogali, fanway hanggan idwa ha fagibolonon fiya.

¹ Dapat ay, hyamo fagfwayongon fag kagfaanod ka adal orongan. ² Fag lwang has manga magorang ama kitay, ta fag mahoway, magalang, idwag falabit sadili fakasayaon, fag orongan wagsyag in Diyos, galwasi manga taw, hanggan maagwantaon. ³ Haw fag fwayong yadi has manga ina magorang kitay, fag magalang han Diyos, fag idwa mafadahiton ka manga dwat donggon, fag idwag lango. ⁴ Fag fiya ista faadalon has taw kaarakitay fayayom fiya fiya ka manga ina bago kitay, ta fag galwasit manga indogan, it manga anak, ⁵ idwag falabit sadili fakasayaon, fiya yadit manga fangayofan, mahogod no gibolon, mahoway hanggan matanogon hasta manga sadili indogan, kaarakitay manga iba taw idwa ha faglwangon igfadwat igdog in Diyos hampang. ⁶ Ha fag faaronganon yadi has manga anahan kitay, ta fag idwag falabit sadili fakasayaon. ⁷ Hanggan haw, Tito, im manga ogali fagayo fag fiya,ista fagtoladon. Fag kawa maanod haw nogfaadal, fag idwa mahakot. ⁸ Fag filim hampang ka fiya, maanod yadi, kaarakitay idwa ha fabohag hyamo. No kitonya, ka kasayag laban intam maya wan, idwa yadi ha faglwangon. ⁹ Ha fag togon yadi hasta manga nasali sogowan kitay, ta fag fasakop hat fagoliyanan nyawa kana, ta fag idwa masongat. No baliday ista fagsyaganon, fag gibolon fiya fiya. ¹⁰ Ta fag idwa mahomiton, yatokitay, fag fiya ista ogali fagayo fagayo, kaarakitay manga taw lomwang kitay, fiya mangharaw in Diyos, intam Famawi, fagfaadalon. ¹¹ Maskin is Diyos nafalag hantam it malooy fag kahowayan kaarakitay fagayo fag manga taw fag imbawi wa nangos. ¹² To in Diyos kahowayan kagfayayom intam domayo ka dwat fag manga ogali, hanggan domayo ka bali fangayofan masayaon, ¹³ no kandogay day tam no mafanayan yapdistay is baba daga. In Diyos kahowayan kagfayayom intam gogali ka fiya, idwag falabi intam sadili fakasayaon, igtolad in Diyos, kantam fagbayaon fag fagsyagon, kawas Kiristo Hisos, intam Diyos hanggan Famawi, kamlag aban sat fagbokngan masilaw fag kafiyan. ¹⁴ Hanya nadisag it sadili kaarakitay fomalfas intam, fahaliyaw intam manga fangayofan, igfabali intam it nafili fag sakop, talaga wa omogali fiya. ¹⁵ Fag danwag fadog to fag manga togon fagayo has taw maskin haw ka ha kangayanan igfarigon ista fangayofan, hanggan fatohod hosto ka mangag talinga hyamo. Nyawa kindawan ta fag idwag yod hyamo.

¹ Tito, haw fag fatohod ya has taw kitay, ta fag fasakop has manga gorangon, ka manga ha kangayanan. Ta fag katanog yadi tonya, fag talaga wa omibolon fagayo fag fiya fag ibolon. ² Ha fag bando has taw kitay, ta fag idwa kampang dwat, nyawa hada fag idwa kampang dwat, nyawa hada fag taw. Ta fag idwag sarogatan, ta fag magop wan, idwa kasayag faagran nyawa kindawan. ³ Hyabi hyabi tam bilang odi paong paong, idagdog fagaba. Hyabi tam igtalang odi, intam bali fangayofan masayaon kantam fakatanogon fagaba. Hyabi intam fangayofan sonson wa dwat hanggan kaingli odis taw. Tam kadaddwatan odig lag ha sadi ha sadi. ⁴ Dapat ay, is Diyos intam Famawi no nafalag it kahowayan hantam, hanggan kawa hanya galwasi intam, ⁵ hanya nabawi intam. Bohonwa kitay tam ha naibolon fiya, dapat kawas Diyos maawaon wan. Ka Maliyaw fag Falad ka nafabago intam manga fangayofan, tam nonsagaya ya domwag, kawan tohoyan kitonya sas danom, ka tandaan has fadowa fag kasagayan. ⁶ Kawas Diyos nadisag hantam it Falad sadi wak kayonya gintam Famawi is Kiristo Hisos, ⁷ kaarakitay in Kiristo Hisos malooy fag kahowayan fahaliyaw intam manga fangayofan, hanggan fatohoyan hantam ka haboyagan kadwa ha katabowanan, kantam fagsyagon. ⁸ To fag manga adal sonson wa orongan. Yakanga angko fakasayaon haw fag faaronganon ka mangag syag in Diyos kitay, ta fag katiwala to fag manga bagay kaarakitay igfatohoyan it sadili, malayonan wa has ogali fiya. Tonya fag manga fwayongon kafiyaon, ha fakinabang yadi has manga taw. ⁹ Tam fag idwa kalibang iglabanan no kadidwa ha kahologan hanggan fag fatawas wan ka golit golit manga listahan manga hasokfonan, hanggan kagfabarohagan hanggan iglabanan kawa has Batasan Hodyo baliwa, maskin idwag togbong has fiya. ¹⁰ No ha taw igfasamanon, igfaagran san Diyos tifonan, tam fag mangabaya balis dowa ginan, ginya fag bayai mandi tonya fag taw. ¹¹ Tam twa wa kitay ka kitonya fag taw idwa fiya it fangayofan, hanggan it manga ogali dwat igfalag kitay hanyag falamang. ¹² Ho somogo in Artimas, ngatay in Tikiko has nyamo hayo. Ta nondasog wan is nyamo, ha nangos pilitan wa hyamo hastay has Nikopolis maskin ahostay wak domogay hanggan wamsagaya abagat. ¹³ No baliday im fagsyaganon, togbongan in Sinas kagtabo hampangan, hanggan in Apolos kaarakitay lomahaw wa madali. Fag fatohoyan kitay hosto ista manga diyaon fagayo. ¹⁴ Fag fwayong hantam manga ofod kitay, fag mahogod no gibolon kaarakitay lomag ista fangaboyagon hosto, hanggan idwa kabali malahawan malahawan. ¹⁵ Angko manga ofod fagayo istay gwas hyamo, Tito. Fag fwayong yadi hantam manga fadwasay kamtiwala kitay, mi gwas yadi has taw. Ham nangos fag domog kitay is Diyos mahoway ha hayo fagayo.