ROMA

ROMA

¹ Ahos Pablo, in Kiristo Hisos nasali sogowan. Hanya nafatawag angko kaarakitay ahom bali it Fandiya-Barita, nafabokod yadingko hastay fag ibolon. ² Hyabi yapdi is Diyos nafasorat hat manga fangampang it Fiya fag Barita sas manga Kasoratan maliyaw. ³ To fag Fiya fag Barita kawa hat Anak, is Kiristo Hisos, kagfon intam. No has habilogan taw baliwa, hanya gin Dabid hasokfonan, ⁴ dapat ay, no hat Falad kahalyawan baliwa, intohoyan kitay hanyan Diyos wa Anak, ka ha akwa it sadili karigonan, maskin inboyag ya gis kahatayan. ⁵ Gi mandin Hisos hami natanggap in Diyos disag fiya kitay, maskin mi galwasi in Hisos, hami fag imbali it manga Fandiya-Barita, kaarakitay igtaban manga taw gis fagayo fag manga layonan daga, hasagsyag in Hisos hanggan katanog hanya. ⁶ Ham manga taga Roma, ham in-aktom yadi wa sinya, maskin ham yadi kan Diyos manga nafatawag. ⁷ Maskin ngay hogsorat ha hayo fagayo sas banwa Roma, kan Diyos manga fagalwasiyon, kat nafatawag kaarakitay ham imtohoyan ha hanya. Ham nangos fag domog kitay, is Diyos, intam Ama, hanggan is Kiristo Hisos, kagfon intam, mahoway ha hayo fagaba, hanggan igfalokmay hayo manga fangayofan. ⁸ Bago bago, hogbaya han Diyos gin Kiristo Hisos, kawa indog wa fiya fiya sadik dahonya baba daga kitay ham katiwala in Hisos. ⁹ Ho gibolon in Diyos ibolon aho nogfaadal mahogod ka Fiya fag Barita kawa hat Anak, yakanga hanya twag faorongan kitay, aho fagaba wagdarangin kawa ha hayo. ¹⁰ Aho fagaba wagsagad kitay, aho nangos fag lomag halimbawan kaarakitay somabang has nyamo hayo, is Diyos nogfaangay di. ¹¹ Ho gwayan wa kasaya lomag hayo, kaarakitay ho fahoray ha hayo manga disag has fangayofan baliwa, ka mamarigon ya domwag hayo manga fangayofan. ¹² Ka orongan angko bato fwayongon, ho kasayag sabang hayo, kaarakitay tam igtarogbongan igfaridrigonan ha sadi ha sadi, kawa tam pariho igsyag han Diyos. ¹³ Manga fadwasay, hogfadog ha hayo, aho fagaba wagfatalaga, aho kalahaw wa nangos has nyamo hayo, no kitay di, dapat idwa katonglos. Ho kasaya yapdig fatiwala nangos han Kiristo tiba is nyamo hayo, kito kangko nafatiwala manga Hintil sas tiba banwanan. ¹⁴ Aho ha sagoton mamaadal has fagayo, nyawa ka sas banwa, nyawa ka sas manga moyod, nyawa has manga naadal, nyawa has manga idya ha nagadalan. ¹⁵ Maskin kitonya, ho kasaya wa dahol mamaadal ka Fiya fag Barita is nyamo hayo sas banwa Roma. ¹⁶ Hodwa kayag fadog has taw ka Fiya fag Barita, maskin tonyan Diyos wa kadonongan kagbawi fagayo fagayo ka mangag syag hanya, bago bago manga Hodyo, ginya madi hanggan wa manga Hintil. ¹⁷ Ka Fiya fag Baritag lwang is Diyos igfatohoyan kitay, tam manga taw nangafiyan wa han Diyos tam nogsyag hanya. Sinyat fabagowanan, sinya yadi wa kat nakatabowanan, tam nogsyag hanya. Kito kansorat, Ka mangag syag in Diyos nangafiyan wa hanya, hanggan fagaba boyagan. ¹⁸ Kawas Diyos igfadog git banwanan sam tongod kitay, hanya kaisog is taw kawag sagaya wa ogali ta nogsway hanya, yakanga tagtaktak ka fakaoronganan. ¹⁹ Is Diyos kaisog has taw maskin ka han Diyos baliwa, malpos tohodon, twa wa kadog, kawas Diyos igfatohoyan has taw. ²⁰ Gi yapdis kalig daga, manga taw noglag in Diyos manga nahalig, katwa wagdog no kinday is Diyos, kadwa malagan, kakitay kalag kan Diyos kadonongan kadwa ha katabowanan, hanggan katwa wagdog kitay hanya ka Diyos orongan. Yakanga manga taw idwa ha fabangdanan. ²¹ Nyawa ta twa kitay ha akwa wa Diyos, tadwag galang hanya, idwa yadig baya hanya kito ka maangay. Yatokitay, ta gisip di ngap kadwa ha kahologan. Ista manga fangayofan kaidagdog odi, inharom wan. ²² Tagfaniring kitay ta madonong wan, dapat ay, inlag kitay manga taw paong paong odi, maskin ²³ tagdayo di ngap in Diyos kafiyan, ka Diyos kadwa katay, hadi ngap is manga tolad ta nogsyag, manga tolad odi taw ka katay, manga tolad manok, manga tolad hayopan, manga tolad odi ka manga gilafang, ta nogsyag. ²⁴ Yakangas Diyos igfabayaan was taw hasta ogali has kahayan baliwa, manga ogali dwat ha sadi ha sadi has habilogan. ²⁵ Maskin tadwa kasayagdog no hadin Diyos, nyawa hanya ka orongan, kasaya di ngap igdog has mangadwa orongan. Kasta faglohodon, hanggan fakatanogon ka odi manga bagay kanhalig, bonwa ka Nahalig fagayo. Nangos fag ka Nahalig kantam fagbayaon, hanggan wa aban aban. Fag kitonya wa ngay. ²⁶ Yakangas Diyos igfabayaan wan ka manga taw has mahaya wa dahol fag manga ogali has taw baliwa. Manga ina kafang igdoyog has ama, igdoyog di ngap has kapariho ina. ²⁷ Kitonya yadi ka manga ama kafang igdoyog has ina, kapariho ama it fakasayaon fagdoyogon. Gibolon mahaya has kapariho ama. Yakangas Diyos igfadosa hosto sat manga sadili, ka gibolon kitonya fag dwat. ²⁸ Maskin ta dayo igtohod ka fakaoronganan han Diyos baliwa, is Diyos igfabayaan wan ista manga fangayofan has manga sitam sitam, yakanga manga taw gogali kadwa fiya. ²⁹ Ista manga ogali sonson wa dwat, gisip odi ka dwat, masayaon ya ngadi, kasayag fahoriyan has taw. Maingliyon ya, iglibon taw, igdaraogan ya, madayaon ya, mafadahiton ya. ³⁰ Igfadwat igdog has taw, kaisog in Diyos. Idwag galang has manga taw, ha takan ya, mafasalagwaon ya, igsayak ya domwag has kadwatan, fanway hat magorang. ³¹ Manga idagdog wa dahol dahol, idwag fatonglos it manga togon. Idwa mahoway has tiba taw, idwa twa kaawa. ³² Is Diyos fadi wadagfadala wagdog is taw kitay, ka gogali kitonya, fag matay wan, dapat tagfadagos di ngap gogali kitonya fag dwat. Hanggan bondi kitay kitonya, tagbaya di ngap iglag tiba taw no gogali yadi kitonya.

¹ Yakanga, haw awkin ka kabaya ka tiba, ha gayfan? Ongay, hadwa ha faglwangon, nyawa faktaw, maskin haw no gogali kito yadi kam fakabayaon, haw igfatohoyan yadim sadili has fadosaan. ² Tam twa kitay fakafiyan wan is Diyos nogfatohoyan has fadosaan, ka manga taw ka gogali kitonya. ³ Haw no gogali kito yadi kam fakabayaon, ha awkin gayfan is Diyos idwa fatohoyan hyamo has fadosaan? ⁴ Ngatay ha gayfan kitay ogbot di fag bagay kawas Diyos mahoway wa dahol, maagwantaon, idya dagos kaisog? Ha awkin idwa twa kitay is Diyos mahoway wa dahol ha hyamo maskin igfanaya yapdi kitay, haw nangos fag somoyo wan, fag fabago im fangayofan? ⁵ Dapat im fangayofan maganit, no hadisagsoyo baliwa, yakanga hagfabagat wagfahabyat is Diyos nogfadosa hyamo sas katabowanan fag Sirang mahalga. Gis nanya fag Sirang in Diyos kaisogan hanggan it kahaslongan imlag wan hanya nogfadosa has manga taw. ⁶ Maskin hanya ka gomanti has fagayo fagayo fag manga taw, no kinday ista manga naogali. ⁷ Is Diyos domisag haboyagan idwa ha katabowanan has manga taw ka fadagos gogali has fiya, maskin ta kasaya ka fakafiyan, ka maangay, hanggan ka haboyagan kadwa ha katabowanan. ⁸ Dapat ay, is Diyos omisog marigon ka manga taw ka fagabag daraogan, dayo katanog ka fakaoronganan, katanog odi ka manga dwat fagaba. ⁹ Fagayo kagfadagos gogali has dwat lomag mahori, maalibitan wan, bago bago manga Hodyo, ginya hanggan manga Hintil. ¹⁰ Dapat ay, is Diyos domisag it kafiyan, kangayanan, hanggan kahowayan has fagayo kagfadagos gogali has fiya, bago bago has manga Hodyo, ginya hanggan has manga Hintil, ¹¹ maskin is Diyos idwa ha fagihidon taw. ¹² Ka manga Hintil idyapdi nadog ka Batasan Hodyo, yakanga ta no gogali dwat, hawas kadwatan, nyawa bonwa ka Batasan Hodyo kagfatohoyan. Dapat, ka manga Hodyo ha akwa ka manga Batasan Hodyo, yakanga ta no gogali dwat, ka Batasan ka mamatohoyan has taw it fadosaan. ¹³ Maskin is Diyos iglwang ka manga taw kagtalinga hanggan katanog ka Batasan Hodyo ka nangafiyan hanya, bohondi kitay, ka mangag talinga odi. ¹⁴ Ka manga Hintil no danwa gogali has fiya, ka maangay sas Batasan Hodyo, nyawadyan sakop sinya, inlag wa kitay ha akwa yadit sadili batasan. ¹⁵ It manga ogali no fiya kitonya igfatohoyan kitay ka Batasan Hodyo fakasayaon bilang wansorat sasta basad fangayofan. Gista sadili isip kagfatohoyan yadi tonya, maskin it sadili fangayofan ha fagtagahon nomtoon, nomtoon kabaya, nomtoon igbaliwat sadili naogali. ¹⁶ Yakanga, angko fagfwayongon Fiya fag Barita iglwang kitay, tonyam anod wan sas Mahalga fag Sirang aban, is Diyos nogfatohoyan ngatay fiya, ngatay dwat ista manga fangayofan, is Kiristo Hisos nogfatohoyan yadi fagayo fag manga taw it manga fagayfanon kadyag fadogon has tiba taw. ¹⁷ Dapat haw noglwang kitay, Aho Hodyo wan, hanggan igsyag kitay haw fiya di, kawa haw nadog ka Batasan Hodyo, igfadaholon yadi kitay haw in Diyos wa nafili, ¹⁸ haw natwa wan in Diyos fakasayaon, ha kilala wan ka fiya fag manga ogali maskin ka Batasan Hodyo kagfwayong. ¹⁹ Sama, ya hono haw noglwang, haw wa ka gamit ka bilang bota, haw kagfayawa has manga taw basad marom, ²⁰ no kadog di, haw ka kabaya man ka mangag falamang, haw kagfaadal has manga idya twagdog fiya fiya, maskin haw ha botang ka Batasan Hodyo, haw gayfan haw twa wa fagayo, hanggan im fwayong sonson wa orongan. ²¹ Haw igfaadal has manga iba, dapat ay, haw awkin igfaadal yadim sadili? Haw igfaadal kitay fag idwag nahaw, dapat haw awkin ignahaw yapdi? ²² Haw iglwang has taw fag idwag fabayowan, dapat haw awkin igfabayowan yadi? Anod, haw kadwat iglag manga tolad faglohodon, dapat haw awkin ignahaw lamang ginya fag manga fanimbaan? ²³ Haw igfadaholon hyamo kitay, haw igfasakop has Batasan Hodyo, dapat haw awkin igfadwat igdog in Diyos maskin hadwa katanog ka Batasan Hodyo? ²⁴ Anod wan, insorat kitay, Maskin tam manga Hodyo idya fiya intam manga ogali, yakanga ka manga Hintil igyod in Diyos. ²⁵ No kadi kitay haw intoli wan, ha fakinabang wan haw no katanog ka Batasan Hodyo. Dapat, idwa ha kahologan haw nontoli, haw nogfalamang ka Batasan. ²⁶ Sadik Hintil it ogali no maangay sas Batasan Hodyo, nyawa hanya idyan toli, is Diyos noglag, hanya bondi kito kantoli ik fiya. ²⁷ Yatokitay, ka mangadwan toli fatohoyan man hayo, ka mangan toli has habilogan, fatohoyan hayo has fadosaan, maskin ka mangadwan toli katanog ka Batasan Hodyo, dapat ham ka ha akwa ka Batasan Hodyo insorat wan, ham di ngap kagsway tonya. ²⁸ Ham bonwa orongan manga Hodyo, nos Diyos kaglag, ka odi kitay in-ngayan Hodyo maskin hayo manga magorang manga Hodyo, hanggan ham intoli odi sas habilogan. ²⁹ Dapat ay, kanbago it fangayofan ka orongan wa Hodyo nos Diyos kaglag. Ka mahalga san Diyos, ka manga taw ka ha tandaan sas fangayofan, bonwa ka tandaan toli sas habilogan, ka Batasan Hodyo fagfwayongon. Is Diyos, bonwa manga taw, kagfasayagdog has taw ka ha tandaan sas fangayofan.

¹ No kitonya mangharaw, kanat fakinabang tam no manga Hodyo? Kanat fakinabang nontoli, ham gayfan? ² Aywan fag fakinabang. Bago bago, is Diyos nafabahala has manga Hodyo it manga bato fwayongon. ³ Kinda araw tiba Hodyo nodwan tanog? It kahologan awkin in Diyos hampang idwa ha kahologan maskin ka tiba idwa katanog, ham gayfan? ⁴ Balaw kitonya. Is Diyos igfaanod wan it fwayong nyawa fagayo fag manga taw bohagon. Kitonya wa kansorat, Kaarakitay ta homilala kitay im manga hampang myasa wa maanod, Nyawa faktaw nogsolay hyamo, hadwam daog. ⁵ Dapat kinday nangos tonya, ham gayfan, intam manga ogali dwat nogfahilala kitay fakafiyan wan is Diyos nogfadosa? No kitonya, no fangayofan odi taw, tam lomwang ka ogali dwat ha fakinabang ogbot. No kitonya, is Diyos awkin idwa maslong nogfadosa intam, ham gayfan? ⁶ Yatokitay, bon lamang. Is Diyos nodwa maslong, idwa syagan fatohoyan, ngatay fiya, ngatay dwat, ista manga naogali sadik baba daga. ⁷ Halimbawa nangos, aho no lomwang kitay maskin aho bohagon, in Diyos kafiyan labi man imlag, kawat fakaoronganan imtohoyan, kana mayon nogfatohoyan angko has fadosaan kawa ha ogali dwat, ham gayfan? ⁸ Kana ara tam nodwag maswag kitay, Tam fag gogali dwat no fiya kamlag ginya? Ka mangag fadwat igdog angko iglwang hono, kitonya angko fwayong. Fakafiyan wan tonya fag manga taw nomtohoyan has fadosaan. ⁹ Kinda ara tonya? Tam manga Hodyo fiya man aw has manga Hintil, ham gayfan? Idwan. Maskin ho nafatohoyan kitay tam fagayo fagayo, nyawa Hodyo, nyawa Girigo, tam insakop has karigonan ogali dwat. ¹⁰ Kito kansorat, Idwa ha akwa maslong it ogali, ngadi sadik taw. ¹¹ Idwa ha twagdog, idwa hagsayak in Diyos. ¹² Fagayo fag manga taw igtalang gin Diyos, fagayo igfalamang wan. Idwa ha gogali fiya, ngadi sadik taw. ¹³ Ista manga bibig bilang wagtaban manga taw has kahatayan. Podo wa madaya ista manga dila hampang. Ista manga anit bibig hampang bilang wa ha dalit kitos abyanon. ¹⁴ Sonson wa sabayon ista manga hampang, madwat wa ngap igdog. ¹⁵ Ista manga bitis igdali hasaglibon taw. ¹⁶ Nyawa hadak nalahaw igfahoriyan hanggan igfarongkot manga taw. ¹⁷ Tadwag lag ka kahowayan fag dalan ogali, ¹⁸ tadwa yadin yayom katanog in Diyos. ¹⁹ Yabay tam twa kitay ka manga Batasan Hodyo fagayo intoon has mangag fasakop tonya fag manga Togon, kaarakitay nyawa faktaw idwa ha fabangdanan aban, is Diyos no mamatohoyan has taw it fadosaan, ²⁰ maskin is Diyos idwag fatohoyan kitay, tam mangafiyan wa hanya, kawa tam no katanog ka Batasan Hodyo, kawa ka manga Batasan Hodyo igfatwagdog intam kitay, tam ha ogali dwat. ²¹ Dapat kati, in Diyos halimbawan, kadwan ganit sas manga Batasan, kagfalag no kinday tam mangafiyan wa hanya. Ka Batasan Hodyo, hanggan in Diyos manga fangampang igfaorongan yadit halimbawan, ²² kagfatohoyan kitay, tam fagayo kantiwala, nyawa Hodyo, nyawa Hintil, tam fagayo mangafiyan wa han Diyos tam nogsyag lamang han Kiristo Hisos, ²³ maskin fagayo fag manga taw ha naogali dwat, idwag sohod in Diyos kafiyan. ²⁴ Kawa malooy in Diyos kahowayan, it disag hantam kitay, tam mangafiyan wa hanya kawas Kiristo Hisos igfalfas intam. ²⁵ Is Hisos kan Diyos nafatalaga fangafiyan kaarakitay it folot nomwatwat, hanggan tam nogsyag hanya, intam manga naogali dwat imliyam wan. Maskin hyabi is Diyos idya kasadi ginan in-isog, gagwanta yapdista manga ogali dwat, yakanga hanya nafatalaga fangafiyan kaarakitay it sadili kahaslongan imlag. ²⁶ Kati yadi tam fag ha fangafiyan han Diyos kaarakitay faorongan kitay, is Diyos maslong hanggan hanya kagfatohoyan kitay, fagayo kagsyag in Hisos mangafiyan wa hanya. ²⁷ Kati tam awkin syagan igfadaholon intam sadili, ham gayfan? Idwan. Kana mayon? Maskin ka lamang tam nogsyag han Kiristo, is Diyos nogfatohoyan kitay tam mangafiyan wa hanya, bonwa kitay kawantam ogali no fiya. ²⁸ Maskin katwa wa kadog fiya fiya is Diyos igfatohoyan kitay tam mangafiyan wa hanya, bonwa kitay kawa tam katanog ka manga Batasan Hodyo, dapat kawa tam nogsyag lamang han Kiristo. ²⁹ Ham awkin gayfan is Diyos nogbahala, ha odis manga Hodyo? Idwa awkin igbahala yadi has manga Hintil? Yatokitay, hanya kagbahala has fagayo fag manga layonan taw. ³⁰ Is Diyos idwam dowa, nyawa Hodyo, nyawa Hintil, is Diyos igfatohoyan kitay tam mangafiyan wa hanya kawa tam nogsyag han Kiristo. ³¹ No kitonya, ham awkin gayfan tam nogsyag han Kiristo, tam igfabali ka Batasan Hodyo idwa ha kahologan? Idwan. Yatokitay, kati tam ngap igfarigon ka Batasan Hodyo.

¹ Kana kantam tohodon gin Abraham, ka manga Hodyo hafofowan? Kanat nadalanan hastay baliwa? ² Is Abraham no nangafiyan han Diyos kawat manga ogali fiya, is Abraham syagan igfatakas taw. Dapat is Abraham idwa ha fagfatakaon san Diyos faglagan. ³ Maskin ka Kasoratan iglwang, Is Abraham igsyag han Diyos, yakangas Diyos nafatohoyan kitay is Abraham nangafiyan wa hanya. ⁴ Tam no ha disag is taw maskin gibolon, bonwa kitay disag odi, dapat tangdanan wan kawa naibolon. ⁵ Dapat intam fagsyagon no bohonwantam sadili ogali, dapat, nos Diyos intam fagsyagon, kagfafiyan hanya ka manga taw ka ha ogali dwat, ginya madis Diyos igtanggap intam, kawa tam igsyag ha hanya. ⁶ Yakangas Dabid nalwang, ka taw bomaya wan is Diyos noglwang kitay, tonya fag taw nangafiyan wa hanya, bonwa kitay kawa ha naibolon fiya. Is Dabid iglwang, ⁷ Ka manga taw bomaya wan is Diyos nogfaliyam it manga naibolon dwat, Nodwag botang it manga naogali kadwa fiya. ⁸ Yabay, nyawa faktaw bomaya yadi wan, kagfon intam nodwag tohod it naogali dwat. ⁹ Ham gayfan awkin ka mangan toli lamang ka bomaya kito? Bohondi ka mangan toli, hanggan kadwan toli, fiya yadi no bomaya kitonya. Tam naolit kitay is Abraham nangafiyan wa han Diyos maskin, igsyag hanya. ¹⁰ Ginahin tonya nonlag, ham gayfan? Is Diyos danwag lwang kitay is Abraham nangafiyan wa hanya, nyawas Abraham idyan toli hyabi. ¹¹ Aban yas Abraham intoli, bilang odi falagon kitay is Diyos igfatohoyan kawas Abraham nangafiyan wa hanya, maskin is Abraham igsyag in Diyos hyabi, nyawa idyapdin toli. Inlag kitonya kaarakitay is Abraham imbali ista wa pinagkaama has fagayo kagsyag han Diyos, yakangas Diyos kagfatohoyan kitay nangafiyan wa hanya, nyawadwan toli. ¹² Kitonya yadi, is Abraham ista wa pinagkaama has mangan toli, manga Hodyo, kagsyag han Diyos kiton Abraham kagsyag in Diyos nyawa hanyadyan toli. ¹³ Is Diyos idwa natogon han Abraham hanggan hat manga hasokfonan kitay, tonya wa ka omafo sadik baba daga, kawa ta no katanog ka Batasan Hodyo, dapat ta no mangafiyan wa han Diyos kawag syag hanya. Kawa nogsyag in Diyos, is Diyos iglwang is Abraham nangafiyan wa hanya. ¹⁴ Ka omafo in Diyos togon bato disagon, no ka odi ka manga katanog ka Batasan Hodyo, idwa ha kahologan nogsyag in Diyos, bonwa yadi disagon in Diyos natogon. ¹⁵ Maskin ka manga Batasan Hodyo nafadog wa has taw, yakangan Diyos kaisogan inlag wan ta nogsway, dapat no nangos idwa ha akwa ka Batasan Hodyo, bonwa kitay manga taw igsway. ¹⁶ Maskin ngan tohoyan kawa ka mangag syag han Diyos ka tomanggap it togon bato disagon, kawa malooy in Diyos kahowayan. Yakangam bali sadik disag matohoyanan han Abraham manga hasokfonan, bondi ka mangag fasakop has Batasan Hodyo, dapat has fagayo kagsyag in Diyos, kito yadin Abraham nogsyag, kawas Abraham intam fagayo pinagkaama hasagsyag baliwa. ¹⁷ Kito kansorat Hogfabali hyamo ista pinagkaama has aywan fag manga layonan taw. To fag togon ha fakaanodan wan san Diyos faglagan, kan Abraham fagsyagon. Hanya kagfaboyag ya ka manga natay hanggan kagfabangkad yadi fagayo fag manga bagay kadya haraw ha akwa. ¹⁸ No ogali di taw, is Abraham idwa gasolop kitay it babay omanak aban, dapat ay, idwag fagomon igsyag kan Diyos nafwayong kitay, hanyam bali ista pinagkaama has aywan fag layonan taw. Is Abraham kasyag wa ngap kitay, im-anod wan in Diyos togon hanya kitay, Hyamo hasokfonan kayo was fanggasan aban. ¹⁹ Gis nanyas Abraham kaakbang wa sadik daan ik fangaraw it kagorangan, mayan mayan odi noglahaw, hanggan it babay, is Sara idwa ganak. Nyawa kitonya, is Abraham idwag fagomon igsyag in Diyos. ²⁰ Is Abraham idwa gadowan kitay, in Diyos togon bato disagon idwam anod, labi wa ngap inrigon di ngap nogsyag in Diyos, nafasayagdog yadi hanya. ²¹ Orongan wa ngap is Abraham kasyag kitay is Diyos syagan igfaanod it togon bato disagon. ²² Kawa kitonya, is Diyos igfatohoyan kitay is Abraham nangafiyan wa hanya. ²³ Dapat ka manga hampang kansorat kitay is Abraham nangafiyan wa han Diyos, idwan sorat kaarakitay igfarigon lamang in Abraham fangayofan, ²⁴ dapat hanggan wa hantam kati kat fagfwayongon. Is Diyos iglwang kitay, tam mangafiyan wa hanya tam nogsyag hanya ka nafaboyag ya kagfon intam, kawas Hisos. ²⁵ Is Hisos kasta nafahatay kawa hantam manga ogali dwat, ginyan boyag ya kaarakitay tam mangafiyan han Diyos.

¹ Yakanga maskin tam igsyag han Kiristo Hisos, intam Fon, tam nangafiyan wa han Diyos hanggan tam inbalit manga fakilalaon. ² Kawa tam igsyag han Kiristo Hisos, hanyag disag hantam in Diyos malooy fag kahowayan kantam fagbayaon kati. Ginya madi tam igbaya wa dahol maskin tam ha fagsyagon yapdi kitay, aban tam mangofodan yadi wan san Diyos kayawaan. ³ Bondi tonya madi ngap kantam fagbayaon. Tam igbaya yadi tam no basad mahori, maskin tam twa kitay ka mahori kagfabali intam maagwantaon. ⁴ Tam no maagwantaon, tam idwa ha fagadowanon. Hanggan tam nodwa ha fagadowanon, tam ha fagsyagon wan. ⁵ Tam nogsyag in Diyos kitonya, tam idwam balaw maskin is Diyos igfatohoyan fiya fiya santam basad fangayofan kitay, hanya galwasi intam. Ka Maliyaw fag Falad kan Diyos disag hantam kagfatohoyan intam kitonya. ⁶ Maskin tam nodya ha fagsyaganon, gis nanya fag masohod kan Diyos nafatalaga, is Kiristo natay kawa has manga taw dwat. ⁷ No tam di, tam imhafang wa matay kaarakitay bomawi sadik taw, nyawa fiyat ogali. Twa man, ngatay ka tibak taw idwam hafang matay kaarakitay bomawi sadik taw mahoway wa dahol dahol. ⁸ Dapat ay, is Diyos nafatohoyan kitay hanya galwasi wa dahol dahol intam, kawa tam no ha ogali yapdi dwat, is Kiristo natay kawa hantam. ⁹ Yabay, kawan Kiristo folot intam fangafiyan han Diyos, labi was Kiristo bomawi intam gin Diyos kaisogan aban, ¹⁰ kawa hyabi, tam nogdayo yapdi hanya, tam inbalin Diyos wa manga fakilalaon, kawat Anak natay, labi wa matohoyanan kitay, kati, kawas Kiristo boyagan, hanya bomawi intam kawa tam in Diyos wa fakilalaon. ¹¹ Bondi kitay kitonya, tam igbaya wa dahol in Diyos, maskin kagfon intam, kawas Kiristo Hisos, nafabali intam in Diyos wa manga fakilalaon. ¹² Kito it kahologan, bago bago sadi dik taw ka nafabangkad ogali dwat istay is baba daga. It ogali dwat nataban kahatayan. Ginya wa ginan ka kahatayan nasakop fagayo fag manga taw, maskin fagayo ha naogali dwat. ¹³ Nyawa manga taw idya natanggap hyabi ka Batasan Hodyo, ta danwa ha ogali dwat, dapat nodya ha manga batasan, idya ha somogat kitay manga taw igsway ka togon. ¹⁴ Nyawa kitonya, giyapdin Adan ginan, balin Mwisis, ka manga taw danwan sakop has karigonan kahatayan, nyawasta manga ogali dwat idwa fagayo kito kan Adan, ka nasway fiya fiya sadik batasan. Is Adan hyabi ka nafahalimbawa sadi yak taw fiya ka kabangkad aban. ¹⁵ Dapat tonya fag dowa idwa pariho, maskin in Diyos disag, kadwa ha bayad, idwa kiton Adan naogali dwat. Nyawa ka kahatayan nalafit has fagayo fag manga taw, maskin is Adan nasway, labi man inyak marigon in Diyos malooy fag kahowayan, hanggan it disag kadwa ha bayad, kawa gi yadi sadik taw, kawas Kiristo Hisos, giwat malooy fag kahowayan, in Diyos disag igdasog has fagayo fag manga taw. ¹⁶ In Diyos disag idwa kiton Adan nafabangkad kadwatan. Maskin sadik taw nasway sadi ginan, intohoyan wa ka fadosaan, dapat giwan Diyos disag, tam, nyawa ayo intam naogali dwat, intohoyan kitay tam nangafiyan wa han Diyos. ¹⁷ Orongan wan, kawa ka sadik taw nasway, fagayo insakop wa ngap has kahatayan, dapat labi man inyak marigon in Diyos malooy fag kahowayan disag kitay, tam ka manga nangafiyan hanya, nyawa tam idwa ha nabayad, tam omofod yadi hanya, bomahala aban sas haboyagan, kawas Kiristo Hisos intam fagsyagon. ¹⁸ Yakanga, no kinday ka sadik taw it nafalamang nafatohoyan fagayo has fadosaan, kitonya yadi, sadik taw it ibolon maslong ka nafatohoyan kitay is Diyos igfaliyam ista manga naogali dwat fagayo, hanggan faboyag fagayo. ¹⁹ Maskin kawa sadik taw nasway in Diyos, aywan kanbali ha ogali dwat, kitonya yadi, kawa sadik taw intanog in Diyos, aywan kan Diyos nafatohoyan kitay nangafiyan wa ha hanya. ²⁰ Ka Batasan Hodyo indisag kaarakitay imlag kawa ka ogali dwat kaaywan. Dapat ay, no kaaywan wa ka ogali dwat, in Diyos malooy fag kahowayan bondi kitonya no kabagat has fiya. ²¹ Maskin ngay, no kinday ka ogali dwat nasakop ka manga taw kawa ha kahatayan, kitonya yadi in Diyos malooy fag kahowayan kagsakop intam kati, kawa ha kahaslongan kagtaban intam has haboyagan, tam nogsyag in Kiristo Hisos kagfon intam.

¹ Kinday tam kati, ham gayfan? Tam aw fag fadagos has ogali dwat kaarakitay bondi kitonyan Diyos malooy fag kahowayan hantam? ² Yatokitay, kinday tam ka natay has ogali dwat no kaboyag yapdi hanya baliwa? ³ Tam fadi wadtwagdog kitay fagayo kantogna, kansadi han Kiristo Hisos, insadi yadi hat kahatayan. ⁴ Tam nontogna, intam fangayofan dan intahin wa han Hisos kahatayan hanggan inlobgob. In-anod wa kitonya kaarakitay, no kinday intam Ama kadonongan nafaboyag ya in Kiristo, tam kitonya yadi kaboyag has bago fag ogali. ⁵ Intam fangayofan dan no orongan intahin han Kiristo kahatayan, matohoyanan yadi kitay tam imtahin yadi hanya, tam imboyag ya yadi has haboyagan bago. ⁶ Tam twa wagdog kitay intam fangayofan dan intahin wan Hisos hanya nonpako wan sas nafatimbangan hayo, kaarakitay intam dwat fag ogali karigonan fag matay yadi wan, hanggan tam fag idwam bali domwag it sogowan, ⁷ kawa ka natay nalfas wan gis karigonan ogali dwat. ⁸ Yabay, tam katiwala kitay intam fangayofan dan nontahin wan Kiristo kahatayan, tam kitonya yadi, tam imtahin hanya has haboyagan, ⁹ hanggan tam twa kitay is Kiristo inboyag ya, fawa matay domwag. Ka kahatayan fawa bomolay domwag hanya. ¹⁰ Kawa sadi ginan lamang hanya natay kawa has ogali dwat, hanggan kati, in Kiristo haboyagan kawa han Diyos wa malayon. ¹¹ Tam fag tohod kitay intam sadili fangayofan fag kitonya yadi, natay has karigonan ogali dwat, dapat boyagan han Diyos, kawa tam insadi han Kiristo Hisos. ¹² Intam habilogan ka katay fag idwag fasakop has ogali dwat, kaarakitay tam idwa katanog intam bali fangayofan masayaon. ¹³ Tam fag idwag fasakop ngadi sadik layonan gintam manga habilogan has ogali dwat, ka kabali sangkap kadwatan. Yatokitay, tam fag fasakop sadi wak dahonya han Diyos, kitos manga taw natay, ginyan boyag ya. Tam fag fasakop intam habilogan han Diyos, manga sangkap has fiya fag ogali. ¹⁴ Fag bonwa ka ogali dwat kantam fakatanogon kawa tam idwan sakop has manga Batasan Hodyo kati, dapat tam insakop han Diyos malooy fag kahowayan. ¹⁵ Kati tam awkin igfadagos ya has ogali dwat, ham gayfan, kawa tam bonwa sakop manga batasan, dapat tam in Diyos malooy fag kahowayan it sakop? Yatokitay, ¹⁶ tam fadi wadtwa tam nogfasakop, nyawa haday, bilang sogowan, tam kabali wasta sogowan wa orongan. Tam no sogowan karigonan ogali dwat, kamlag kahatayan, dapat tam no sogowan has katanog in Diyos, kamlag is Diyos igfatohoyan kitay tam nangafiyan wa ha hanya. ¹⁷ Tam igbaya wa dahol dahol in Diyos kitay, nyawa tam danwa sogowan ogali dwat hyabi, dapat kati tam intanog wa ngap, sadi wak dahonya, kantam donggon barita. ¹⁸ Kawa tam nalfas wa gis karigonan ogali dwat, kati tam inbali yadi manga sogowan kahaslongan. ¹⁹ Hogfwayong ha hayo ka malpos malpos katwagdog. Hyabi tam nafasakop intam sadili, sadi wak dahonya, bilang sogowan has manga karigonan ogali dwat has ka taw, kalabi wa has kadwatan. Kati tam fag fasakop intam sadili, sadi wak dahonya, kitonya yadi, dapat sogowan has kahaslongan, intohoyan malayonan wa han Diyos ibolon. ²⁰ Tam hyabi no sogowan yapdi karigonan ogali dwat, tam idwag fasakop has kahaslongan. ²¹ Dapat ay, tam awkin ha nafakinabang ngay gis dwat fag ogali hyabi, ham gayfan? Idwa akwa. Ka dwat fag ogali hyabi intam odi fakayaon kati. Ka kitonya fag manga ogali kagtaban has kahatayan. ²² Dapat kati tam nalfas wa gis karigonan ogali dwat, inbali in Diyos manga sogowan. Ka kati ka santam, fakinabang wan, kawa tam intohoyan han Diyos, sadi wak dahonya, hanggan tonya kagtaban has haboyagan idwa ha katabowanan. ²³ Maskin ka ogali dwat igbayad it tangdan, kawa kahatayan. Dapat in Diyos disag, kadwa ha bayad, haboyagan kadwa ha katabowanan, kansadi san Kiristo Hisos kagfon intam.

¹ Angko manga fadwasay, ham fadi wad natwagdog angko bato fwayongon kawa tam inyayom has manga ogali taw. Intam ogali fawag sakop sadik taw hanya no natay wan. ² Halimbawa, intam ogali iglwang ka sadik ina fag fasakop hat indogan, it indogan no boyagan yapdi. Dapat no kawa kitay it indogan natay wan, yadwag fasakop domwag hanya. ³ No kitay di, no tam kaglwang, fabayowan wa dahol, ka ina no gofod has iba ama, it indogan no boyagan yapdi. Dapat, it indogan no natay wan, idwa ha fagbandoon. Nyawa omindogan ya domwag has iba ama, ya bohonwa kitay fabayowan. ⁴ Tam kitonya yadi, angko manga fadwasay. Tam nonsadi san Kiristo habilogan, tam bilang wa natay has Batasan Hodyo. Kati is Kiristo, kanboyag ya domwag kagfon intam, kaarakitay tam bilang wagbohad han Diyos baliwa, tam no gogali ka maangay hanya. ⁵ Hyabi tam nogfasakop yapdi hantam bali fangayofan masayaon, ka manga Batasan igfatohod yapdi intam manga ogali dwat, kagfaoyon intam habilogan has manga ogali kagbohad has kahatayan baliwa. ⁶ Dapat kati tam natay wan has manga ogali dwat kagfasognod intam hyabi, yakanga tam nalfas gis Batasan Hodyo karigonan. Kati ka Maliyaw fag Falad ogali bago kantam fakatanogon, bonwa ka manga batasan masoratan hyabi. ⁷ No kitonya, ham awkin gayfan kitay ka Batasan Hodyo idwa fiya? Balaw kitonya. Nodya ha manga Batasan Hodyo, hodya twagdog no kana fag manga ogali kadwa fiya. Ka Batasan Hodyo nodyag lwang, Fag idwa kaingli, hodyapdi twa no kana ka kaingli. ⁸ Kawa ha togon kitay, Fag idwa kaingli, ka karigonan ogali dwat igfatohod ngap angko kaingli has aywan fag manga bagay. Nodya ha batasan igbando, idya kalwang dwat ka ogali. ⁹ No hyabi ho gayfan angko fangayofan boyagan di, nyawa tadya ha togon angko. Dapat, ho no natwa wan ka manga batasan, ho bago di nadog ka karigonan ogali dwat, ginya ho natwa kitay angko fangayofan natay wan. ¹⁰ To fag batasan, ka nangos faboyag angko, igfatohoyan di ngap angko has kahatayan. ¹¹ Kawa ka karigonan ogali dwat nadaya angko gis manga batasan, ginya madi nafahatay di ngap angko gi yadis manga togon. ¹² Yakanga ka Batasan Hodyo maliyaw, hanggan ka manga fasognod maliyaw, maslong hanggan fiya. ¹³ No kitonya, ka fiya fag bagay awkin kagtaban angko has kahatayan, ham gayfan? Yatokitay, ka karigonan ogali dwat kagtaban angko has kahatayan hyabi. Ka ogali dwat igsangkap ka fiya, kaarakitay labi man imtohoyan kitay dwat wa dahol ka ogali dwat. Yakanga kawa ka batasan kagfatohoyan ka manga bagay kadwa fiya, labi man intohoyan kitay ka ogali dwat madaya wa dahol dahol. ¹⁴ Tam twa kitay ka Batasan Hodyo igtogbong ka fangayofan fiya, dapat aho ha bali fangayofan masayaon, aho ka ogali dwat it sogowan. ¹⁵ Hodwa twagdog angko sadili ogali, maskin hodwa katanog angko fakasayaon fiya, kalabi wa ngap ho no katanog yapdi ka manga bagay kangko fagdayoon. ¹⁶ Kati aho no gogali ka bonwa angko fakasayaon, hogfaanod kitay ka Batasan Hodyo hyabi fiya ngay. ¹⁷ Yabay, no kitonya, bonwa aho orongan ka gogali kitonya, ka karigonan ogali dwat kadyapdi galin gingko basad fangayofan, tonya wa ka gogali kitonya. ¹⁸ Ho twa kitay idwa ha kafiyan sangko sadili fangayofan, kangko faglwangon sangko bali fangayofan masayaon. Nyawa ho gwayan wa kasaya gogali ka fiya, idwa kaanod kitonya. ¹⁹ Hodwa gogali ka has fiya kangko fakasayaon, dapat ay, ka has dwat ngap hodwag fagomon gogali, nyawa ho dayo wan, no kitay di. ²⁰ Aho no katanog ngap ka bohonwa angko fakasayaon, bonwa aho ka orongan gogali kitonya, ka karigonan ogali dwat kadwa galin gingko basad fangayofan kagfasognod has dwat. ²¹ To kangko lagan, aho no kasaya gogali fiya, kadi ngap ka dwat ka gakbang dingko. ²² Ho no maayfanan sangko basad fangayofan, ahog baya wan Diyos manga batasan. ²³ Dapat hogdog tiba ginan sangko fangayofan, ho ha ogali iba. Toy iglaban angko fangayofan it baliw. Kawa kitonya, ka karigonan ogali dwat kagbanwanan yapdi sangko bali fangayofan masayaon, igsakop yapdingko. ²⁴ Yabay, yabay, isyay wan no kitonya aho. Faktaw ka bomawi angko gistay fag habilogan kagtaban angko has kahatayan? ²⁵ Fadi wan, hogbaya wan han Diyos, kawas Kiristo Hisos, kagfon intam, ka bomawi angko gingko bali fangayofan masayaon. Kawa kitonya, no aho odi, gingko fangayofan bago, ho kasaya katanog in Diyos manga togon, dapat kawa gingko bali fangayofan masayaon, ho kasaya yapdi katanog has karigonan ogali dwat.

¹ Yakangas Diyos idwag fatohoyan has fadosaan ka manga taw kansadi san Kiristo Hisos, ² kawa, tam nonsadi san Kiristo Hisos, ka karigonan gintam boyagan fag fangayofan igfalfas intam gis karigonan ogali dwat, hanggan gis karigonan kahatayan. ³ Ka manga Batasan Hodyo idwa nasyagan nafalfas manga taw gis ogali dwat maskin magomo di ka fangayofan taw. Dapat ay, is Diyos nasyagan nafalfas manga taw gis ogali dwat. Hanya nasogot Anak hastay, ha habilogan taw, kitontam ka ha manga ogali dwat, kaarakitay imbali intam fangafiyan. Kawa hanya ha habilogan taw, ka ogali dwat fagayo intohoyan has fadosaan. ⁴ Is Diyos naibolon kitonya kaarakitay ka Batasan Hodyo fasognodon fag ogali imlag santam ka gogali ka maangay sas Falad Maliyaw, kadwa katanog intam bali fangayofan masayaon. ⁵ Ka manga taw no gogali fagabat bali fangayofan masayaon fasognod, igfasakop yapdi hat bali fangayofan masayaon. Dapat ay, ka gogali fagaba ka bago fag fangayofan fasognod, igfasakop has fangayofan bago. ⁶ Tam nogfasakop hantam bali fangayofan masayaon, tam imdiya has kahatayan. Dapat ay, tam nogfasakop has fangayofan bago, imdiya has haboyagan hanggan has kahowayan. ⁷ Maskin, nyawa faktaw, no hadit bali fangayofan masayaon nogfasakop, iglaban in Diyos. Hanyadwa katanog in Diyos togon, idwa yadi somyagan katanog tonya. ⁸ Ka gogali fagabat bali fangayofan masayaon fasognod, idwa syagan kabali in Diyos fagbayaon. ⁹ Dapat ay, ka Maliyaw fag Falad no sawantam orongan, tam idwa gogali has bali fangayofan masayaon baliwa, dapat tam gogali intam bago fag fangayofan fasognod. In Kiristo Falad nodya santam, tam idyan bali in Kiristo sakop. ¹⁰ Dapat ay, is Kiristo no sawantam basad fangayofan, nyawantam habilogan matay wa aban kawa has ogali dwat, intam fangayofan bago boyagan fagaba kawa tam nangafiyan wa han Diyos. ¹¹ Ka nafaboyag ya in Hisos, it Falad no santam, hanya mamaboyag yadintam manga habilogan ka katay. ¹² Yakanga, angko manga fadwasay, tam ha sagoton. Tam fag idwa gogali kantam bali fangayofan masayaon fasognod. ¹³ Tam no gogali yapdintam bali fangayofan masayaon fasognod, tam katay wan. Dapat, no ka Maliyaw fag Falad kagfasyagan intam igfahatay ka manga ogali dwat, tam kaboyag wan. ¹⁴ Kawa non Diyos Falad kantam fagtahinan, tam in Diyos wa manga anak. ¹⁵ Maskin kantam natanggap fangayofan bago idwag fabali intam sogowan ya domwag madalaon. Yatokitay, kantam natanggap in Diyos wa manga anak fangayofan. Yakanga tam igngayan in Diyos kitay, Mama, intam Ama. ¹⁶ In Diyos Falad hanggan intam sadili fangayofan bago goyonan igfaorongan kitay, tam in Diyos wa manga anak. ¹⁷ Maskin tam in Diyos wa manga anak, tam omafo yadi aban kan Diyos bato disagon. Tam ha horay yadi hat disag han Kiristo kawa tam nonsadi hanya, gagwanta yadit manga donggon mahori, aban tam imsadi yadi ha hanya, omafo wat kafiyan. ¹⁸ No sa dingko, ogbot di kantam manga fagdogon mahori kati, tam nogtohod kitay labi man inyak fiya ka kafiyan kantam lagon aban. ¹⁹ In Diyos manga nahalig fagayo fagayo gwayan wa kasaya lomag aban is Diyos nogfahilala it manga anak. ²⁰ Fagayo fag manga bagay kanhalig kabway wan. Is Diyos ka nafabali kitonya, bonwa ka manga bagay kanhalig fasadan. Dapat nyawa kitonya, ha fagfanayaon yapdi, ²¹ maskin fagayo kanhalig imfafiyowan ya, malfas gis sakop kaboyohan, mafalfasan kafiyaon aban, kito yadin Diyos manga anak. ²² Tam twa kitay, balis kati, kanhalig sadi wak dahonya, bilang wagdyang sas basad mahori. ²³ Dapat ay, bondi tonya ka bilang wagdyang, hanggan wa tam ka natanggap in Diyos Falad, it disag gona, tam bilang wagdyang basad fangayofan, kawa tam gwayan wagfanaya is Diyos nogfatohoyan kitay, tam it manga wa anak, tam no mafalfasan orongan. ²⁴ To kantam fagfanayaon tam nonbawi. Tam no nalag intam fagfanayaon tanggapon aban, bonwa kitay tam ha fagfanayaon yapdi. Nyawa faktaw, fawag syag yapdi kitay ha tanggapon aban, no malagan wa kati. ²⁵ Dapat tam no ha fagfanayaon yapdi, kadyan lag, tam idwa kayayag fanaya. ²⁶ Kito in Diyos Falad nogtogbong intam kagomowan, kawa tam idya twag darangin hosto han Diyos, dapat it Falad mandi kagfalo intam igdyang nogsagad gin Diyos, bondi kito kantam no kampang. ²⁷ Is Diyos ka twa waglag santam basad fangayofan, tomwa yadi wagdog it Falad fwayong, kawat Falad igfalo igsagad it manga sakop hakorangan, no kinday in Diyos fakasayaon. ²⁸ Tam twa wa kitay ka manga galwasi in Diyos, kan Diyos manga nafatawag maskin tonya wat fasadan, it manga madalanan fagayo imaraktoman has kafiyan baliwa. ²⁹ Gi yapdis hyabi hyabi, is Diyos danwa kilala ka manga taw kambalit sakop, ginya nafatohoyan kitay tonya fag manga taw fag imbali kito yadi kat Anak, kaarakitay it Anak imbali intam man ahan has fadwasay aywan. ³⁰ Is Diyos nafatawag kat manga danwa nafatohoyan ha hanya hyabi. Kan Diyos manga nafatawag, tonya yadi kat nangafiyan wa hanya. Ginya madi, kan Diyos manga nangafiyan, tonya yadi kat manga nafahafod it sadili kafiyan. ³¹ No kitonya mangharaw, kana yapdi kantam bato fwayongon hanya baliwa? Is Diyos nogbaliwa intam, fakta ka lomaban intam, ham gayfan? ³² Hanyadwa nahwangit it sadili Anak, dapat nafabali hanya fangafiyan hantam fagayo. No nadisag wat Anak hantam, idwa awkin domisag yadi hantam fagayo fag manga bagay koyogan wa hat Anak, ham gayfan? ³³ Fakta ka somombong han Diyos it manga nafili naibolon? Is Diyos yadi kaglwang it manga nafili nangafiyan wa hanya. ³⁴ Fakta ka fatohoyan intam has fadosaan, ham gayfan? Idwa akwa. Is Kiristo Hisos ka natay hyabi, ka san Diyos balis sihon kati, bondi kitay hanya natay, hanyan boyag ya domwag, kati inbali wa ngap intam fagalan, igfaaronganon han Diyos kawa hantam. ³⁵ Fakta ka syagan igfaoman kitay is Kiristo idwa galwasi intam, ham gayfan? Idwa akwa. Nyawa kana kantam madalanan, nyawa kana fag fakabalawon, fakaalibiton, manga taw nogfahoriyan intam maskin tam intiwala, ngatay kalonosan, ngatay kalobasan, ngatay manga fakadalaon, ngatay talibong, nyawa kitonya, is Kiristo idwa kaoman no galwasi intam. ³⁶ Kito kansorat, Kawa hami galwasi hyamo, sadi wak sirangan mi kadala wa kitay, mi ngan wa matay. Tagfatimbang hyami kito odis manga topa ista bato fahatayon. ³⁷ Dapat ay, tam syagan digdaog fiya fiya, nyawa tam ha lagan to fag manga mahori fagayo, kawas Hisos, ka galwasi intam, kagfasyagan intam. ³⁸ Kawa ho twa matohoyanan kitay nyawa kana kantam madalanan, nyawa kahatayan, nyawa haboyagan, nyawa manga anghil, nyawa manga karigonan, nyawa ka kati fag manga bagay, nyawa ka manga bagay kamdasog aban, ³⁹ nyawa ka manga kaabwatan, nyawa ka manga kaabasadan, nyawa kana kanhalig, idwa ha syagan igfaoman in Diyos fangayofan no galwasi intam, kantohoyan hantam gin Kiristo Hisos kagfon intam it naagwanta.

¹ Orongan wan angko bato fwayongon kati, kawa ahonsadi san Kiristo, hodwag bohag. Ka Falad Maliyaw kagfarigon yadingko fangayofan kitay hodwa ha fagtagahon aban kitay ho nabohag, nyawa hoglwang kito ha hayo. ² Kito kangko bato fwayongon ha hayo, ho kabalaw wa dahol dahol, hanggan hogdog angko fangayofan idwa kahoway. ³ Ho kaawa wa dahol dahol angko manga kapariho Hodyo. Bilang fiya man no aho kan Diyos fadosaon, hanggan aho nomsaman gin Kiristo, no nangos angko manga kapariho imbawi yap man. ⁴ Angko manga kapariho kan Israil manga hasokfonan. No kitay di, is Diyos nafabali tonyat manga wa anak. Nafalag yadit kafiyan has taw, nanaranggapan has taw, nadisag yadi has taw ka Batasan Hodyo. Ta natwa no kinday nogfasayagdog in Diyos, hanggan is Diyos natogon yadit manga bato disagon has taw. ⁵ Angko manga kapariho, inda Abraham yadi manga hasokfonan. Ginya madi, gi wasta kaiban is Kiristo nonbali taw. Fag is Diyos kagbahala has fagayo fagayo kantam fagfasayaon igdog hanggan aban aban. Fag kitonya wa ngay. ⁶ Hodwag fwayong kitay in Diyos natogon bato disagon idwan anod maskin idwa fagayo ka manga taga Israil in-aktom han Diyos nafili fag manga taw. ⁷ Idwa yadi fagayo ka gin Abraham in-ngayan it manga hasokfonan anak. Is Diyos nafwayong han Abraham kitay, Ka lamang gin Isaak fag hasokfonan kamngayan hyamo hasokfonan. ⁸ Kitot kahologan, bonwan Abraham manga anak fagayo kanngayan in Diyos wa manga anak. Ka lamang in Abraham manga hasokfonan kansagaya maskin in Diyos wa togon bato disagon, tonya lamang kan-ngayan in Abraham manga hasokfonan orongan. ⁹ Maskin kiti in Diyos togon han Abraham, Aban, gis nanya sangko nafatohoyan fag kasohodan, ho kabangkad ya, ginyas Sara omanak, sadik anak ama. ¹⁰ Dapat bondi gis nanya tam noglag kitay, idwa myasa kitonyan Abraham manga hasokfonan. Kitonya yadi sanda Ribika manga anak ama dowa. Ista ama sadi di, tonya yadi, kawantam hafofowan, is Isaak. ¹¹ Dapat ay, is Diyos nafatwagdog kitay hanya nogfili manga taw, giwat sadili kafangayofanan, idwa gista manga naibolon. Maskin inda Ribika anak nodyan sagaya, idya nasyagan gibolon, ngatay fiya, ngatay dwat, ¹² is Diyos danwa nafwayong han Ribika, kat foyo fag anak fasognod man hat ahan. ¹³ Kito kansorat sas Kasoratan, Angko fagalwasiyon is Hakob, Dapat ho kadwat diglag in Isaw. ¹⁴ No kitonya, tam awkin lomwang kitay is Diyos idwa fiya, bilang wa ha fagihidon taw? Balaw kitonya, ¹⁵ maskin is Diyos igfwayong han Mwisis, No faktaw kangko fakasayaon angko fakaawaon, ho kaawa tonya. Hanggan no faktaw kangko fakasayaon angko fagtogbongon, ho tomogbong wa tonya. ¹⁶ Yakangas Diyos no kaawa manga taw, bonwa kitay manga taw ka kasaya, ngatay kafiyaon ista naibolon, kawas Diyos ka kasaya kaawa. ¹⁷ Maskin insorat kitay is Diyos nafwayong han Faraon, ka gorangon sas sakop Ihipto, Ho nafabali hyamo ha kangayanan kaarakitay giwa hyamo ibolon ho mamalag angko karigonan, hanggan angko ngayan imbantog sadi wak dahonya baba daga. ¹⁸ Yakanga nyawa faktaw is Diyos no kasaya kaawa, ya kaawa wan, hanggan nyawa faktaw hanya no kasayag faganit it fangayofan, yamganit wan. ¹⁹ Haw awkin somagot angko kitay, No kitonya, kana mayon is Diyos nogsogat yapdi manga taw? Fakta ka lomaban in Diyos kafangayofanan, ham gayfan? ²⁰ Dapat tam taw odi, kinda araw tam no somagot kitonya han Diyos? Maangay awkin, ham gayfan, ka anglit nogsogat ka nahalig hanya, noglwang, Kana haw no nahalig angko kitoy? ²¹ Halimbawa, no tam ka ganglit, idwa awkin tam ha bahala kalig nyawa sadik dahol, sadik ogbot, ginya mandi fag foholan daga? ²² Kitonya yadi, is Diyos bahala wan no kasayag falag it kaisogan hanggan it karigonan. Dapat ay, dogay is Diyos naagwanta ka manga taw, nyawa fiya wa isogon, nyawan tohoyan kitay, tonya fag manga taw imliyam wa aban. ²³ Is Diyos kasaya yadig falag it maakwa fag kafiyan kat nadisag mahogod hantam it manga fakaawaon, hantam it manga nafatalaga has kafiyan gi yapdis hyabi. ²⁴ Tam wa tonya fag manga taw kat nafatawag, bohondi gis manga Hodyo, dapat gi yadis manga Hintil. ²⁵ Kito kan Diyos nafwayong san Osiyas Kasoratan, kitay, Ka manga taw ka bonwangko sakop hyabi, ho ngomayan angko wa sakop Ka layonan manga taw ka bonwa angko fagalwasiyon hyabi, ho ngomayan angko fakabaloon kati. ²⁶ Hanggan, sinya mandi fag banwanan aho noglwang hyabi, Ta bonwa angko sakop fag manga taw, Sinya mandi kati ho ngomayan has taw kitay, ka boyagan fag Diyos, it manga wa anak. ²⁷ Ginya madi, is Isayas nafwayong kawa han Israil, Nyawa kayowas onay dagat in Israil manga hasokfonan, dapat sayok di kambawi. ²⁸ Maskin madali hanggan marigon intam Fon nogfatonglos it nafatohoyan fadosaan sas baba daga. ²⁹ Kito yadin Isayas fwayong gona, Tam inbali yadi wa ara kitos taga Sodoma, Manga taga Gomora, idwa hansawad, no bonwa kitay intam Fon, ka marigon man has fagayo, nafasawad yapdi ka tiba gintam layonan taw. ³⁰ Kinda odi kati kantam fagfwayongon, ham gayfan? Ka manga Hintil kadyapdi kasaya kabali fiya san Diyos faglagan hyabi, kati is Diyos igfatohoyan kitay, ta nangafiyan wa hanya, kawa tagsyag hanya. ³¹ Dapat ka taga Israil kagsayak ka manga ogali kagfabali hanya fiya san Diyos faglagan, idwa nangafiyan ha hanya. ³² Kana mayon no kitonya, ham gayfan? Maskin ista sadili odi ibolon kasta fagsyagon, bonwa kitay tagsyag in Diyos. Ta bilang wantahid sas bato fatahidon. ³³ Kito kansorat, Lag ngay, hogfwalid sas banwa Siyon sadik bato kagfatahid manga taw, Sadik bato dahol kagfahakfo manga taw. Dapat nyawa faktaw kagsyag hanya fag bato, idwa aban imbway.

¹ Angko manga fadwasay, no kawangko manga kapariho Hodyo, ho gwayan wa kasaya, hanggan angko fagdaranginon yadi han Diyos kitay, ta fag imbawi nangos. ² Hoglag kitay angko manga kapariho Hodyo mahogod gibolon, kaarakitay is Diyos nangos, fag bomaya was taw no kitay di, dapat ay, tadwa twagdog no kana kan Diyos fagbayaon orongan. ³ Tadya twagdog no kinday is Diyos nogfatohoyan kitay manga taw mangafiyan wa hanya, yakanga, tadwag fagomon kalig it sadili halimbawan, idyag fasakop han Diyos halimbawan. ⁴ Is Kiristo kagfatonglos ka Batasan Hodyo, kaarakitay nyawa faktaw kagsyag hanya, is Diyos iglwang tonya fag taw nangafiyan ha hanya. ⁵ No kinday tam no mangafiyan han Diyos, no hadis Batasan Hodyo baliwa, is Mwisis ka nasorat kitay ka syagan gogali ka kahaslongan ka maangay has Batasan Hodyo, ka Batasan Hodyo faboyag hanya. ⁶ Dapat, kawa tam no mangafiyan wa han Diyos maskin tam igsyag in Kiristo, iglwang kiti, Haw fag idwa gayfan kitay fakta ka domasog han Diyos banwanan ham tongod, it kahologan fadokson in Kiristo gim tongod, ⁷ ngatay fakta ka domasog ham daga has Daga Salad, it kahologan faboyag ya in Kiristo. ⁸ Dapat kito kat bato fwayongon, Ka barita no kinday tam no mangafiyan wa han Diyos idwa ayayo gintam. Sawantam manga bibig hanggan fangayofan. Kat kahologan kawa hyami fagbaritaon, kawa hasagsyag han Kiristo akbang hantam. ⁹ Nontam wa bibig kagfaanod kitay is Hisos kagfon intam, hanggan intam fangayofan katiwala kitay is Diyos nafaboyag ya hanya, is Diyos bomawi intam. ¹⁰ Maskin ngay, intam fangayofan fag syag han Kiristo, kaarakitay is Diyos mamatohoyan kitay, tam nangafiyan wa hanya. Hanggan intam bibig fag fadog has taw kitay, hanya wantam fagsyagon, ginya tam imbawi wan. ¹¹ Ka kasoratan iglwang, Nyawa fakta fag taw kagsyag hanya, idwam balaw. ¹² Idwa ha giba ka Hodyo has Hintil, no pariho igsyag han Hisos. Is Diyos sadi di kagfon fagayo, hanggan hanya kagdisag mahogod it kafiyan has fagayo kagdarangin ha hanya. ¹³ Kito ka Kasoratan iglwang, Fagayo kagsyag hasagfon intam imbawi wan. ¹⁴ Kinda ara ta no somyag hanya, nodya katiwala, ham gayfan? Kinday ta nomtiwala nodya nadog kawa ha hanya? Kinda ara ta no domog nodya hagfwayong has taw? ¹⁵ Kinda ka barita nomdog nodya ha manga Fandiya-Barita nasogo? Kito kansorat sas Kasoratan, Masaya waglag ka mangag diya ka Fiya fag Barita nondasog wan. ¹⁶ Dapat nyawa nadog wan, idwa fagayo intiwala has Fiya fag Barita. Kito kan Isayas nafwayong, Angko Fon, fakta kantiwala hyami nafwayong? ¹⁷ Yakanga ta nogtalinga ka Fiya fag Barita, ta bago di katiwala. Ka Fiya fag Barita imdog no hagtoltol kawa han Kiristo. ¹⁸ Dapat angko intaw ha hayo kiti, Manga taw idwa awkin nadog ka Fiya fag Barita, ham gayfan? Ta nadog wa ngay, maskin insorat kitay, Ista manga hasnog indog wan sas fagayo fag banwanan, Hanggan ista manga fwayong naskat wa sadi wak dahonya baba daga. ¹⁹ Tongko intaw sadi ya, Ka manga taga Israil idwa awkin natwagdog, ham gayfan? Gwadi hyabi yapdi is Mwisis nalwang, Ho aba bago digfainglig lag hayo ka manga taw kadyan bali sadik layonan orongan. Ho aba faisog hayo ha sadik layonan taw kadya manga madonong. ²⁰ Ginya madis Isayas nafwayong yadi marigon, Ka mangadyag sayak angko ka nalag angko. Kati aba ho falag wangko sadili has manga idya galingawan angko hyabi. ²¹ Dapat is Isayas yadi ka nafwayong kawa has manga taga Israil kitay, Sadi wak sirangan hogfaaronganon ha sadik layonan taw kadwa katanog angko fwayong, malaban wa dahol.

¹ Kati tongko intaw ha hayo sadi ya, Is Diyos nadayo aw it sadili layonan fag manga taw, ham gayfan? Idwa ngap nadayo. Aho sadi yadik taga Israil, gin Abraham hasokfonan, ho gi yadin Binhamin hasokfonan. ² Is Diyos idwa nadayot sadili layonan fag manga taw, kat nahilala gis bago bago yapdi. Ham awkin idwa natwa ka Kasoratan fwayong kawa han Iliyas, ka galibitan igdarangin igfaawaon hanya han Diyos, kawa kasayag fadosa ka manga taga Israil? ³ Is Iliyas nalwang, Angko Fon, ta nafahatay wa hyamo manga fangampang. Ta natastas wa hyamo manga fanogban. Aho odi kansawad, isyay wan. Kati ta kasaya ya fahatay angko. ⁴ Dapat kinday kan Diyos sagot han Iliyas? Is Diyos nalwang, Aho ha nafasawad yapdi 7,000 ama kadwag lohod hasta tolad fagsyagon, kawas Baal. ⁵ Kitonya mandi kati fag manga masohod, kawa malooy in Diyos kahowayan, ha akwa yapdi mangan sawad gin Diyos manga nafili. ⁶ Is Diyos nafili tonya fag manga taw, bonwa kitay maskin it manga ogali fiya, dapat kawa malooy in Diyos kahowayan. Is Diyos no nafili lamang manga taw ka fiya it manga ogali, bohonwa kitay in Diyos malooy fag kahowayan kan-awas taw. ⁷ Kinda kati, ham gayfan? Ka manga taga Israil, it fakaaywanan, idya ha nabol it fakasayaon han Diyos baliwa. Dapat kan Diyos nafili, sayok, ha nabol. Ka tiba in-ganit odista manga fangayofan. ⁸ Kito ka Kasoratan fwayong, Is Diyos idyag fatwagdog ista manga fangayofan, Igfatapyaton wan ista manga mata, igfabongkohon wan ista manga talinga hanggan wa kati fag masohod. ⁹ Is Dabid yadi ka nafwayong, Fag gi yadista manga fanohodan ta nomtahid, nom-iktan nangos. Fag imtobong, fag imdosa wan. ¹⁰ Ista manga mata fag imharom wa nangos, kaarakitay tadwag lag. Ta no boyagan yapdi, fag fagaba mabokongan it goyoy, kawat manga fakabyaton. ¹¹ Ho gintaw ya ha hayo manga Hintil. Ka manga taga Israil dagos wa nakfo aw, nontahid wan? Idwa twa kabangon aw, ham gayfan? Bonwa kitay. Dapat kawa ka manga taga Israil nafalamang wan, ka Famawi nadasog has manga Hintil. Ginya madi aban, ka manga taga Israil im-ingli waglag ka manga Hintil nomtiwala. ¹² Maskin ka manga taga Israil nadayo, kawa tiba fag manga layonan taw ka nalag fiya. Manga Hintil nalag fakinabang dahol maskin manga taga Israil nafasigpala wan. Ginya madi, manga taga Israil, it fakaaywanan, no somoyo ya, fagayo lomag labi man inyak fiya. ¹³ Kiti nangos angko bato fwayongon ha hayo, has manga Hintil. Kawa aho Fandiya-Barita has manga Hintil, mahogod aho nogfatonglos angko bato ibolonon, ¹⁴ kaarakitay angko manga iba, manga Hodyo, im-ingli waglag hanggan ka tiba imbawi yadi wan. ¹⁵ Maskin kawas Diyos no nadayo in Israil fag layonan manga taw, ka nafabali tiba taw it manga fakilalaon. Yabay, is Diyos nogtanggap yan Israil fag layonan manga taw, labi man kafiyaon. Bilang kitos nafaboyag ya ka manga natay. ¹⁶ Halimbawa, ka tinapay gona gis sadik foholan nondisag han Diyos, bilang yadi sadi wak dahonya foholan indisag. Ka dalid hayo, nondisag wa han Diyos, hanggan wat manga sanga indisag yadi wan. ¹⁷ Ta nalifong tibat sanga gi sadik fon olibo, kasta tanom, ginya madi, ham, bilang manga sanga gis iba fon olibo, ka natobo odi basad talon, ta nafasokfon has fon olibo ista tanom, kaarakitay ham ha tagok yadi hanggan dalid ginya fag fon olibo. ¹⁸ Yakanga, ham fag idwag fasalagwa ka danwa manga sanga gona. Ham idwa ha fagfatakaon. Ham fag tohod kitay bonwa ham, ka manga sanga, kagdiya dalid, ka dalid kagdiya hayo. ¹⁹ Dapat, ngatay sadik Hintil somagot wa kitay, Gwadi ka manga sanga gonan lifong wan kaarakitay ahom sokfon. ²⁰ Anod wa tonya, ta nalifong wan kawa nodwag syag han Kiristo, dapat haw insokfon wan kawa haw igsyag hanya. Haw fag idwag fadaholon hyamo. Yatokitay, haw fag kadala wan. ²¹ Is Diyos nodwag faanogon ka manga Hodyo, ka bilang ka dan wat manga sanga, idwa yadig faanogon hyamo. ²² Istay tam iglag in Diyos kahowayan hanggan it kaisogan. Maisog has manga idwag syag han Kiristo, dapat mahoway ha hayo ham nogfadagos hat malooy fag kahowayan. Dapat nodwan, ham is manga Hintil kamlifong aban. ²³ Ka manga Hodyo nodwag faganiton domwag kitay, dayo igsyag in Kiristo, fiya mandi kamsokfon ya, maskin is Diyos syagan igfasokfon ya. ²⁴ No haw, sadik sanga olibo ka natobo odi basad talon, insokfon has orongan wa fon olibo, nyawadwa ginya nogbanwan, malpos man inya is Diyos nogfasokfon ya ka mandit manga sanga gona, ginya mandi fag fon. ²⁵ Manga fadwasay Hintil, ho kasaya ham tomwa nangos sadik bagay madolaw, kaarakitay ham idwa ha takan. Ka manga taga Israil, nyawa kitay maganit ista manga fangayofan, idwa fagaba kitonya hanggan aban. Ka manga Hintil, sadi wak kayonya kan Diyos nafili, nomtiwala hanya, ²⁶ gis nanya aban, ka manga taga Israil, it fakaaywanan, imbawi yadi wan, kawan sorat kiti, Ka Famawi kabangkad aban gis banwa Siyon, Bomol fagayo fag kadwatan gin Hakob manga hasokfonan. ²⁷ Tongko taranggapan has taw aban, Aho no bomol ista manga ogali dwat. ²⁸ Maskin ka manga Hodyo nadayo ka Fiya fag Barita, tanbalin Diyos manga kaaway, hanggan ham manga Hintil nalag fakinabang. Dapat, maskin is Diyos igtohod yapdi ka manga Hodyo hafofowan, kat manga nafili, ka manga Hodyo in Diyos wa manga fakilalaon yapdi. ²⁹ Maskin is Diyos idwag faoman it fangayofan no fakta kat fagfiliyon, hanggan no haday it bato disagon it malooy fag kahowayan, ³⁰ ham manga Hintil, nyawa ham hyabi danwag sway in Diyos, kati ham it fakaawaon, kawa ka manga taga Israil nasway in Diyos. ³¹ Kitonya yadi ka manga Hodyo igsway in Diyos kati, kawa ham nonbalin Diyos fakaawaon, kaarakitay ka manga Hodyo imbali yadit fakaawaon aban. ³² Maskin is Diyos nafatohoyan kitay fagayo fag manga taw dan wa sogowan has karigonan ogali dwat, kaarakitay falag has taw kawa hanya kaawa has fagayo. ³³ In Diyos kaakwaan, it kadonongan hanggan it fakatwawon idwa twa haminon. Tam idwa syagan fahalposan it manga kafangayofanan. Tam idwa kamin gisip it manga ogali. Kito kansorat sas Kasoratan, ³⁴ Fakta kagsarom intam Fon fangayofan, ham gayfan? Fakta ka syagan igfaadal hanya? ³⁵ Fakta ka ha nadisag han Diyos nyawa kana Kaarakitay is Diyos bahala gomanti bomayad ya hanya? ³⁶ Yatokitay, giwa ngap hanya kanginan fagayo fag manga bagay, hanya ka gano fagayo, hanggan fagayo igfalag it kafiyan. Fag is Diyos wa ngap ka tomanggap fiya fiya, fagayo fag kangayanan, nyawa ginahin. Fag kitonya wa ngay.

¹ Yakanga manga fadwasay, maskin in Diyos kaawaan hantam idwa twa haminon, hogfaaronganon ha hayo kitay, tam fag disag ngap intam sadili han Diyos, sadik disag boyagan, intohoyan hanya hanggan maangay. No kitonya, tam orongan wagfasayagdog in Diyos. ² Tam fag idwag tolad kastay is baba daga fag manga ogali taw. Dapat fag is Diyos ka faoman intam ogali nogfabago intam manga fangayofan, kaarakitay tam tomwa no kana kan Diyos kafangayofanan, no kana ka fiya, ka maangay hanya, hanggan hosto wa orongan. ³ Maskin in Diyos malooy fag kahowayan indisag hangko, hogfwayong ha hayo fagayo kitay, tam fag idwa gisip santam basad fangayofan kitay tam kafiyaon. Yatokitay, fag fakafiyan wan tam no gisip intam fagsyaganon no kinday is Diyos nogtogbong intam igsyag hanya. ⁴ Santam manga habilogan aywan fag manga layonan, dapat fagayo it manga ibolonon bokod bokod. ⁵ Kitonya yadi, nyawa tam aywan kantiwala, no kitay di, dapat tam inbali sadik habilogan, insadi san Kiristo, insarokfonan ha sadi ha sadi. ⁶ Maskin malooy in Diyos kahowayan hantam, hanya nadisag hantam intam manga fakatwawon, bokod bokod, yakanga tam fag faanod gibolon tonya. Not disag hantam fakatwawon igtoltol in Diyos hampang, no kinday tam nogsyag hanya, tam fag toltol wan. ⁷ Not disag hantam kitay tam matogbongon, tam fag togbong has taw. Tam no natanggap ka fagsyaganon igfaadal, tam fag faadal wan. ⁸ Not disag hantam fagsyaganon igfarigon ista manga fangayofan, tam fag farigon wa ngay. Tam nogdisag fag idwa kwangit. Kagbahala in Diyos sakop, fag gano wa fiya fiya. No ka maawaon, fag kasolong kaawa is taw. ⁹ Fag orongan tam no galwasi manga taw. Tam fag dayo marigon ka manga dwat. Fag matawidan marigon ka manga fiya. ¹⁰ Fag kitos manga fadwasay tam no gadgalwasiyan. Fag idwag fasalagwa hantam manga iba, yatokitay fag fasayagdog ha sadi ha sadi. ¹¹ Tam fag idwa kaoman no galwasi intam Fon, fag mahogod gibolon it ibolon. ¹² Tam fag kasolong fagaba kawa tam ha fagfanayaon. Ta nogfahoriyan intam maskin tam intiwala, tam fag gagwanta wan. Fag darangin fagaba. ¹³ Intam manga fadwasay no ha manga kakorangan, tam fag togbong has taw. Tam fag mafasakbawon manga famaklay. ¹⁴ Fag darangin kitay kagfahoriyan intam lomag fiya. Fag idwag sabayon tonya fag manga taw. ¹⁵ Tam fag tarogbongan igbaya, nyawa bonwantam sadili fagbayaon. Tam fag tarogbongan yadi karongkot, iba taw no ha mahori. ¹⁶ Tam fag kasadi intam manga fangayofan. Tam fag idwag fadaholon intam sadili, fag idwa kafang gofod has manga taw kadya ha kangayanan. Tam fag idwa gayfan kitay tam madonong man has iba taw. ¹⁷ Fag idwag ganti ka dwat has dwat. Tam fag gogali ka maangay sasta faglagan fagayo. ¹⁸ No baliday intam fagsyaganon, tam fag gofodan mahoway has fagayo. ¹⁹ Angko manga fakilalaon, tam fag idwag ganti dwat. Tam fabayaanan wa han Diyos kagfadosa ka mangag fahoriyan intam, maskin insorat sas Kasoratan kitay, Intam Fon iglwang, aho wa ka bahalag ganti, hanggan aho gomanti wan. ²⁰ Yatokitay, hyamo wa kalaban no kalonos, ha fahwanan ya, no kainom, ha fainoman wan. Ginya madi hanya maya wan. ²¹ Tam fag idwa gadaogan ka dwat, yatokitay fag ka fiya fag ogali kagdaog ka dwat.

¹ Tam fagayo fag fasakop has gobirno, maskin idwa ha gobirno ka bonwan Diyos nafaangay. Ka manga gobirno kati is Diyos ka nafabahala. ² Yakanga, kaglaban has gobirno, iglaban in Diyos nafabahala hantam a, igfatohoyan yadit sadili has fadosa. ³ Kagbahala sas gobirno bonwa fakadalaon, no fiya intam ogali, dapat fakadalaon ngay tam no gibolon dwat. Tam awkin kasaya kitay tam fag idwa kadala kagbahala sas gobirno? No kitonya, fag fiya intam ogali, ginya madi kagbahala mamasaya wagdog intam. ⁴ Kagbahala sas gobirno in Diyos wa sogowan kaarakitay tomogbong wantam. Dapat tam fag kadala hanya, tam no gibolon dwat, maskin hanya bahala wagfadosa ka gibolon dwat. Kagbahala sas gobirno in Diyos wa sogowan kaarakitay igfadosa ka gibolon dwat. ⁵ Yakanga tam fag dan wagfasakop has gobirno, bondi kitay maskin tam kadala in Diyos, hanya nogfadosa maisog, tam fag fasakop kaarakitay tam idwa ha fagtagahon santam fangayofan. ⁶ Kitonya yadi, tam fag bayad bohis maskin ka mangag bahala, gibolon in Diyos ibolon ta nogfatonglos it manga ibolonon. ⁷ No fagbayadon wa fiya fiya, tam fag bayad wan, nyawa has fangaboyagon hanggan has daga. Tam fag magalang yadi has taw ka fiya wa faggalangon. ⁸ Tam fag idwa ha bayadon nyawa haday no bohonwa kitay tam fag galwasi ha sadi ha sadi, ka bilang wantam fagsagoton yapdi. Ka galwasi iba taw, tonya wa ka katanog ka Batasan Hodyo. ⁹ Ka manga togon fagayo, kitos Haw fag idwag fabayowan, fag idwag fahatay taw, fag idwag nahaw, fag idwa kaingli, hanggan fagayo fag manga togon ka kitonya, imsakop sa sadi dik fwayong kitay, Fag galwasi intam kapariho kito mandintam sadili. ¹⁰ Ka galwasi iba taw idwa gogali dwat has iba taw, yakanga katanog ka Batasan Hodyo sadik dahonya. ¹¹ Tam fag imtanog wa tonya maskin tam twa wan no ginahin fag manga kasohodan kati, tam fag kafolaw wan. Kati ka Famawi kaakbang wa dahol dahol, kabagat wa kaakbang, bondi kito ka hyabi tam no bago digsyag hanya. ¹² Ka yabi kasagaya wa kati, kaakbang wa ka balabagan. Tam fag dayo wa marigon ka manga dwat fag ogali, ka basad marom. Tam fag dan wagsangkap ka manga sangkap yawa, manga fanlaban has dwat. ¹³ Tam fag gogali ka maangay kitos manga taw basad sirang. Tam fag idwa kalibang kalango, ngatay has manga dwat fag kasolongan, tam fag idwag fabayowan. Tam fag dayo ka manga bagay has hayan baliwa, manga gidgisogan, manga kaid-ingliyan. ¹⁴ Fag is Kiristo Hisos, kagfon intam, kantam bilang fagsolongon kitos fanaktak has ogali dwat. Fag idwag talinga intam bali fangayofan masayaon kaarakitay tam idwam diya hat manga fakasayaon dwat.

¹ Tam fag tanggap ka malombay yapdi no katiwalan Diyos, bonwa kitay maskin kasaya odig daraogan. ² Tiba taw kantiwala in Diyos iglwang fiya di no kwan, nyawa kana. Dapat, ka malombay yapdi katiwala, it fanganon ofi odi. ³ Ka kwan nyawa kana, fag idwag yod ka kwan ofi odi, hanggan ka kwan manga ofi odi, fag idwa gato ka kwan nyawa kana, maskin is Diyos igtanggap yadi hanya. ⁴ Kana tam no gato ista sogowan? Gwadi ista fon lamang ka lomwang ngatay fiya ista ibolon, ngatay idwan. It fon ka fabali hanya maangay, maskin it fon syagan wan. ⁵ Tiba taw igfahalga ka sadik sirang fiya man has iba sirang. Tiba taw iglwang myasa di kitonya ka manga sirang fagayo. Tam fagayo fag fatohoyan intam sadili fangayofan hanya fag manga bagay. ⁶ Kagfabokod sadik sirang, igfabokod maskin iggalang intam Fon. Ka kwan nyawa kana iggalang yadintam Fon maskin igbaya in Diyos it nahwan. Kadwa kwan kitonya, iggalang yadi hantam Fon, igbaya yadi han Diyos it nahwan. ⁷ Tam no boyagan yapdi, intam ogali ha kahologan has iba taw. Tam no matay aban, ha kahologan yadi has iba taw. ⁸ Tam no boyagan yapdi, intam haboyagan ha kahologan hantam Fon. Ginya madi, tam no matay aban, intam kahatayan ha kahologan yadi hantam Fon. Yakanga, nyawa tam boyagan, nyawa tam matay, is Diyos kagfon intam. ⁹ Maskin hyabi is Kiristo natay, ginya madin boyag ya domwag, kaarakitay hanya wa kagfon ka manga natay hanggan ka manga boyagan. ¹⁰ Yakanga, kana tam no gato yapdintam manga fadwasay? Kana tam nogyod hanya? Tam fagayo aban somagot san Diyos fanokawan fangabayan, ¹¹ maskin ka Kasoratan iglwang, Kagfon intam iglwang, aho boyagan fagaba, yakanga fagayo fag manga taw manlingkohodan sangko atobangan aban, Fagayo fag manga bibig taw mamasayagdog in Diyos. ¹² Yakanga, tam fagayo somagot han Diyos aban kantam manga ogali istay sas baba daga. ¹³ Maskin kitonya, tam fag idwa gato ha sadi ha sadi. Ka fiya man tam nogfatohoyan santam basad fangayofan kitay tam idwag falag intam fadwasay has ogali dwat. ¹⁴ Kawa ahon sadi san Hisos, intam Fon, ho twa kitay idwa ha fanganon inhalig fagbaybayon. Dapat nyawa faktaw no gayfan sadik fanganon fagbaybayon, ya kawa ha hanya, fagbaybayon ngay. ¹⁵ Ya tam idwa galwasi intam fadwasay tam no nahwan di ngap it fagbandoon. Is Kiristo natay kaarakitay igbawi hanya, yakanga tam fag idwag faadowan hanya kawa tam ha nahwan. ¹⁶ Tam no gayfan bonwa fagbaybayon, tam fag matagahan kitay idwam bali gagran has iba taw tam no kwan. ¹⁷ In Diyos sakop bohonwa kitay ha fagbaybayon fanganon, manga inomon, ngatay idwa ha fagbaybayon, dapat in Diyos sakop kawa ha kahaslongan, kahowayan hanggan kasolongan, sas Maliyaw fag Falad. ¹⁸ Ka katanog in Kiristo kitonya, in Diyos wa fagbayaon, hanggan manga taw magalang yadi hanya. ¹⁹ Yakanga tam fag idwag fagomon gogali ka manga bagay ka has kahowayan baliwa hanggan kagfarigon ha sadi ha sadi. ²⁰ Tam fag idwag fadwat in Diyos ibolon kawa tam kasamok fanganon. Idwa ha fanganon inhalig fagbaybayon. Ka dwat tam no ha nahwan kagfalag iba taw has ogali dwat. ²¹ Fiya man tam nodwa kwan tagoban, idwa yadi ginom alak, idwa yadi gibolon nyawa kana fag bagay, intam manga fadwasay no somokfon yadi kitonya, nyawa ta gadowan yapdi kitay ngatay dwat ka kitonya. ²² Tam lamang hanggan is Diyos ka fiya fag tomwa no kinday intam fangayofan ka has fanganon baliwa. Nyawa faktaw masolong it fangayofan nodwa ha fagtagahon no gibolon ka manga bagay idwa ha fagadowanon sa hanya. ²³ Dapat ay, nyawa faktaw no gadowan yapdi, dapat kwan wan, is Diyos igfatohoyan hanya has fadosaan maskin no kwan, idwag syag hanya. Nyawa kana fag bagay, tam nodwag syag in Diyos, ya ogali wa dwat.

¹ Tam ka manga marigon intiwala, fag togbong ka manga malombay kaarakitay tamrigon. Fag bonwantam sadili fakasayaon lamang intam fagayfanon. ² Yatokitay, tam fag fasolong ngap igdog intam iba has fiya baliwa, kaarakitay tamrigon no katiwala. ³ Kawas Kiristo idwan tanog it sadili fakasayaon kito kansorat, Ta nogyod hyamo, aho kasta fagyodon. ⁴ Fagayo kansorat sas Kasoratan hyabi insorat kaarakitay tam tomwa wagdog kitay, tam no omagwanta wan, hanggan intam manga fangayofan nomrigon gis Kasoratan, ginya madi tam ha fagsyagon orongan. ⁵ Is Diyos kagfasyagan intam gagwanta hanggan kagfarigon intam, hanya fabali nangos intam manga fangayofan sadi di, kawa tam igtolad in Kiristo Hisos, ⁶ kaarakitay tam fagayo gofodan, bilang sadi dik bibig kagfasayagdog in Diyos, kan Kiristo Hisos, intam Fon, it Ama. ⁷ No kindas Kiristo natanggap intam, tam fag kitonya yadi igtanggap ha sadi ha sadi, kaarakitay in Diyos kafiyan imlag. ⁸ Hogfwayong ha hayo kitay is Kiristo inbali sogowan Hodyo kaarakitay igfatohoyan kawas Diyos igfaanod it manga togon hasta manga hafofowan hyabi. ⁹ Hanggan manga Hintil mamasayagdog yadin Diyos, kawas Diyos kaawa was taw, kito ka Kasoratan fwayong kitay, Yakanga ho mamasayagdog hyamo sas manga Hintil fagdogan. Ho mangambahan bomaya hyamo ngayan. ¹⁰ Nalwang ya domwag, Ham manga Hintil ham fag gofodan han Diyos nafili fag layonan taw, fag baya yadin Diyos. ¹¹ Ginya nafwayong ya domwag, Ham manga Hintil fagayo fag fasayagdog intam Fon. Fagayo fag manga layonan taw fag fasayagdog hanya. ¹² Is Isayas nadogang yat hampang kitay, In Hisi hasokfonan imdasog aban. Hanya ka bomahala has manga Hintil. Hanyam bali ka manga Hintil fagsyagon. ¹³ Is Diyos kagfasyag intam, fabali nangos intam fangayofan kasolong wa dahol hanya, hanggan fahoway yadintam, tam no katiwala hanya, kaarakitay ka Maliyaw fag Falad karigonan fahogodan intam igsyag in Diyos. ¹⁴ Angko manga fadwasay, hogbaya wa hayo kitay, ham kafiyaon, hosto wa hayo kadonongan, ham twa yadi wagfatohod ha sadi ha sadi. ¹⁵ Nyawa kitonya, hodwa kayag fatohod ha hayo marigon ka tiba bagay kangko nasorat istay fag sorat. Ho nasorat kito kawas Diyos nadisag hangko it malooy fag kahowayan, ¹⁶ kaarakitay hombali in Kiristo Hisos fangibolon has manga Hintil. Ho bilang sadik fagalan-han-Diyos aho nogtoltol has taw ka Fiya fag Barita gin Diyos, kaarakitay ka manga Hintil imbali sadik disag, ka Maliyaw fag Falad fagfalayonon han Diyos, maangay hanya. ¹⁷ Yakanga, kawa ahon sadi san Kiristo Hisos, fiya di aho nogfasayagdog angko naibolon, ¹⁸ maskin kangko faglwangon, aho nogtoltol has manga Hintil, hanggan gibolon, ka orongan is Kiristo ka gibolon, kaarakitay manga Hintil imtanog yadi hanya. ¹⁹ Ka lamang angko fagwason, ka Maliyaw fag Falad karigonan kanlag sas manga falagon hanggan ibolon madolaw. Yakanga ho nafahaskat ka Fiya fag Barita kawa han Kiristo has fagayo fag manga banwanan gi yapdis banwa Hirosalim hanggan balis sakop Iliriko. ²⁰ Dandi angko fakasayaon gis bago, kangko fagbaritaon fag kayapdidya nadog kawa han Kiristo, kaarakitay kangko fagbaritaon fag manga taw bohonwa ka danwagdog gis iba taw. ²¹ Kito ka Kasoratan fwayong, Kadya ha nagdogan barita kawa ha hanya, homilala wa hanya, Ka mangadya nadog hyabi, tomwa yadi domog aban. ²² Kawa honlibang yapdig barita fagaba, maskin ngay ahodya nadagos has nyamo hayo. ²³ Dapat kati hontabo wagbarita istay fag manga banwanan taw. Gi yapdis hyabi ho danwa kasaya manabang hayo, ²⁴ yakanga hogsyag wa kitay ho manabang hayo, aho no domalan aban, ho no hawas layonan daga Ispanya. Ginya madi ho kasaya kitay, aho no domogay ogbot is nyamo hayo aban, ham nangos tomogbong angko, fadagos angko lahawan has Ispanya. ²⁵ Dapat kati aho hayapdis Hirosalim, ha diya togbong han Diyos Tifonan sinya. ²⁶ Maskin gis manga Tifonan sas sakop Masidonya hanggan sakop Akaya, ta nadisag togbong hantam manga fadwasay myabog sas Hirosalim. ²⁷ Tagbaya wagdisag, talaga wa kitay ta kasaya omibolon kitonya. No kitay di, ta ha sagoton tomogbong has taw, maskin ka manga Hodyo igfahoray yadi has manga Hintil it manga fagbayaon has fangayofan baliwa, yakanga fiya yadi ka manga Hintil no tomogbong has manga Hodyo git manga fagbayaon malagan. ²⁸ Nomtabo wan, aho no nadisag wan ka togbong kasta nafadiya has manga fadwasay sas Hirosalim, homginan wan, ho domalan las nyamo hayo sas banwa Roma, bago di has layonan daga Ispanya. ²⁹ Ho twa wa kitay, aho nomdasog is nyamo hayo, aywan intam donggon gin Kiristo, hasagbaya baliwa. ³⁰ Angko manga fadwasay, maskin tam pariho igsyag in Kiristo Hisos intam Fon, hanggan gadgalwasiyan, kawa tam insadi sat Falad, hogsagad kitay ham fag togbong igdarangin han Diyos kawa hangko kitay, ³¹ aho no hawas Hirosalim, ka mangadya katiwala hasagfon intam sas sakop Hodiya, ta fag idwa nangos omiktan angko. Hanggan fag darangin kitay intam manga fadwasay sas banwa Hirosalim, fag nangos bomaya yadi angko diya togbong has taw. ³² Ginya madi, non Diyos wa kafangayofanan, ho bomaya wan ho nombangkad has nyamo hayo, hanggan angko fangayofan imhoway ya sa hayo akbang. ³³ Is Diyos kagfon kahowayan fag sawa hayo fagayo. Fag kitonya wa ngay.

¹ Hogfaano ha hayo in Fibi, intam fadwasay ina kagtogbong in Diyos Tifonan sas banwa Kinkiriya itfagonan. ² Ham tanggapan wa hanya kito ka fiya has manga kapariho intiwala. Nyawa kana ka korang sa hanya, togbongan, maskin aywan yadit natogbong, hanggan wa aho kat sadi. ³ Fag fwayong handa Pirisila da Akila kitay ho gwas hanya. Tonya kangko manga ofod, in Kiristo Hisos yadi manga fangibolon. ⁴ Ta natogbong angko, nyawa ta natwa kitay, ngandayo hanya wa kasta fagfahatayon. Yakanga bondi aho kagbaya hanya, hanggan intam Fon manga Tifonan fagayo sas manga banwanan Hintil igbaya yadi wan. ⁵ Fag fadog yadi han Diyos Tifonan kagtifonan sat balay, kitay ho gwas yadi was taw. Ham fadogan yadi hangko fakilalaon fiya fiya, is Ipinito, ka gonan tiwala han Kiristo sas sakop Asya, kitay, ho gwas hanya. ⁶ Ho gwas yadin Mariya kadwag fagomon gibolon sinyas nyamo hayo. ⁷ Ho gwas yadi inda Andoroniko, da Honya, manga kapariho Hodyo, ka naofod angko sas porisowan. Tonya gona man angko intiwala, manga Fandiya-Barita ya ngadi. ⁸ Ho gwas yadin Ampiliyato, angko yadi fakilalaon fiya fiya, kawa minsadi santam Fon. ⁹ Ho gwas yadin Orbano, intam ofod, in Kiristo fangibolon, hanggan is Istagwis angko fakilalaon fiya fiya. ¹⁰ Kitonya yadi ho gwas in Apilis. Inlag wa kitay hanya katiwala orongan hantam Fon, nyawa ha lagan mahori. Ho gwas yadin Aristobolo talanahan, ¹¹ hanggan in Hirodiyon, kapariho Hodyo, hanggan ka mangan sadi hantam Fon, san Narsiso balay. ¹² Ho gwas yadi inda Tirifina da Tirifosa, intam Fon manga fangibolon. Kitonya yadi ho gwas in Pirisida angko fakilalaon fiya fiya. Hanya mahogod no gibolon intam Fon ibolon. ¹³ Ho gwas yadi in Rofo intam Fon fangibolon marigon, hanggan wat ina, ka bilang yadi wangko ina. ¹⁴ Ho gwas yadi inda Asinkirito da Filigonti da Hirmis da Patrobas da Hirmas, hanggan intam manga fadwasay tiba, ista manga ofod. ¹⁵ Ho gwas yadi inda Filologo da Holya da Niriyo, hanggan wat fadwasay ina. Kitonya yadi ho gwas in Olimpas, hanggan intam manga fadwasay fagayo ka gofod is taw. ¹⁶ Tam nogladlagan, tam fag badbayaan ha sadi ha sadi. In Kiristo manga Tifonan fagayo gwas yadi hayo. ¹⁷ Angko manga fadwasay hogfaaronganon ha hayo kitay, ham fag matagahan fiya fiya ka mangag faagran hayo, mangag faadowan hayo, bilang odig fadayo hayo gi hayo naadal Barita. Ham fag idwag talinga ista fwayong. ¹⁸ Ka kitonya fag manga taw idwa gibolon in Kiristo kagfon intam it ibolon. Ista fagtogbongon ista sadili odi bali fangayofan masayaon. Ista hampang no kadog di, bilang wa fakyason, dapat ista toltol igfatalang odi gintam Fon ka mangadya ha fakatwawon. ¹⁹ Ho kasolong wagdog kitay indog wa fiya fiya nyawa siday, kawa ham igfadagos katiwala han Kiristo. Dapat angko fakasayaon, no hadis manga fiya, ham fag myasa wa madonong, dapat no kadi has manga dwat, ham fag idwa ha fakatwawon. ²⁰ Ginya madi, idwa dogay aban, is Diyos, kagfon kahowayan, romogrog wan Satanas sa hayo daga bitis. Ham nangos fag domog kitay is Hisos kagfon intam mahoway ha hayo fagaba. ²¹ Is Timotiyo angko ofod fangibolon, hanggan da Losyo da Hason da Sosipatro, angko yadi manga kapariho Hodyo, gwas hayo. ²² Ahos Tirsiyo kagfalo igsorat to fag sorat, ho gwas yadi hayo santam Fon ngayan. ²³ Is Gayo kangko fandogayan gwas yadi hayo. Sat balay in Diyos Tifonan nogtifonan. Is Ilasto yadi, kagbahala has kwarta sas banwa, hanggan intam fadwasay is Kwarto, gwas yadi hayo. ²⁴ (Ham nangos fag domog kitay is Kiristo Hisos intam Fon fagaba mahoway ha hayo fagayo. Fag kitonya wa ngay.) ²⁵ Fag fasayagdog in Diyos, ka syagan igfarigon intam manga fangayofan, kito kangko natoltol ha hayo Fiya fag Barita, kawa han Kiristo Hisos. To fag Fiya fag Barita sadik bagay madolaw, dogay gis hyabi hyabi bilang matagowan yapdi, dapat kati inlag wa fiya fiya. ²⁶ Hanggan indog wa gin Diyos manga fangampang ka nasorat, indog sas fagayo fag manga layonan taw, sadik baba daga, maskin is Diyos, kadwa ha katabowanan, kagfasognod kitay, fag imdog wan kaarakitay manga taw imtiwala hanggan imtanog yadi hanya. ²⁷ Kawas Kiristo Hisos intam wa Fangafiyan hanggan Fagalan, tam fag fasayagdog in Diyos fagaba, ka sadi di ka madonong. Fag kitonya wa ngay.