NAFALAG

NAFALAG

¹ To fag sorat kagfwayong in Diyos nafalag han Kiristo Hisos, kaarakitay is Kiristo Hisos man ka fatohoyan hat manga sogowan ka manga bagay kaakbang wamlag aban. Ginya madis Kiristo nasogo ya domwag it anghil kaarakitay falag to fag manga bagay han Hwan, it sogowan. ² Ginya madis Hwan nafwayong it mata lagan fagayo, kawan Diyos nafalag hanya, hanggan is Kiristo Hisos nafaorongan yadi wan. ³ Kagbasa to fag sorat bomaya wan, hanggan ka mangag talinga hanggan igfaanod kan Diyos manga nafwayong istay, bomaya yadi wan, maskin to fagayo fag manga bagay kaakbang wamlag aban. ⁴ Ahos Hwan kagsorat ha hayo san Diyos fitok tifonan sas sakop Asya. Ham nangos fag domog kitay is Diyos, ka kati, hanggan ka hyabi, hanggan ka kabangkad aban fag Diyos, hanggan ka fitok falad ka san Diyos tokawan fanokawan gorangon akbang, ⁵ hanggan is Kiristo Hisos ka fiya wak faorongan, ka bago bago fag natay kanboyag ya, hanggan Hari has manga gorangon istay is baba daga, ham nangos fag domog kitay tonya fag tolo mahoway ha hayo, hanggan igfalokmay hayo manga fangayofan. Is Kiristo Hisos galwasi intam, hanggan it folot ka nafalfas intam gintam manga ogali dwat, ⁶ ginya madi nafabali intam it sakop kafiyaon, manga fagalan-han-Diyos, kaarakitay omibolon in Diyos hanggan it Ama ibolon. Tam fag fasayagdog hanya hanggan fag faanod it kafiyan hanggan karigonan hanggan aban aban. Fag kitonya wa ngay. ⁷ Is Kiristo Hisos kaakbang wamdasog sas linyabo. Fagayo fag manga taw lomag hanya, hanggan ka naoros in Hisos daga tagyangan, ta lomag hanya aban. Gis nanya, sas fagayo fagayo fag manga banwanan taw, ta omoraw was kadalan Hisos. Fadi wan, fag kitonya wa ngay. ⁸ Is Diyos kagfon intam, kadwa ha bosal, ka kati, hanggan ka hyabi, hanggan ka kabangkad aban fag Diyos iglwang, Aho ka Alfa hanggan ka Omiga. ⁹ Ahos Hwan, hayo fadwasay ka kito yadi hayo gagwanta manga mahori, kasadi santam Hari, hanggan idwag fagomon kawa tam insadi san Hisos. Kawa ta kahori angko, aho nogfaadal in Diyos hampang, hanggan ka fakaoronganan kawa han Hisos, yakanga ta nafaalin angko ha sadik foyo dagat, it ngayan Patmos. ¹⁰ Itfagonan, santam Fon sirang, hogfaangay ka Maliyaw fag Falad kafasadan sangko, ginya ho nadog kitay ha nahasnog dahol gingko dayo goyoy, dahosag bodyong no kaato. ¹¹ Ka nahasnog iglwang, Soratan sa sadik famasaan nyawa kana kam manga lagon, ginya ha fadiyan aban kam manga nasorat han Diyos fitok Tifonan sas manga banwa Ifiso, Ismirna, Pirgamo, Tiyatira, Sardis, Filadilfiya, hanggan has Lawdisiya yadi. ¹² Ho natakfili kaarakitay lomag ka kampang hangko. Kangko lagan fitok salangan ginto. ¹³ Ginya ho ha lagan sadi, ka bilang Kanbali Taw, malindogan sas fagbokngan manga salangan. It rotay balis bisngilan a, ginto it fogong sas boknga dobdob. ¹⁴ It manga bok bohondi kitos gafas ik kaabohayan. It mata kito was afoy nogsinay. ¹⁵ It bitis kito wasta nafalayon tanso gis basad afoy sawas kasinayan. It hasnog kito wasag fawas danom kagtarapsahan. ¹⁶ Ha bitbit yadi fitok fanggasan sat balis sihon fag gamat, ha baladaw ha tayom baliw baliw kabangkad git basad bibig. It walong masilaw kito was myanit nogyawa sas boknga sirang. ¹⁷ Ho no nalag di ngay hanya, ho nakfo hat atobangan, bilang wa mahatayan. Dapat hanya natawid angko it gamat ka balis sihon, ginyag lwang, Haw fag idwa kadala, aho ka nagona hanggan kamgoyan, ¹⁸ aho ka boyagan yadi kati. Hyabi ho natay wan, dapat fanlag ngay, kati ahon boyag ya, ho fawa matay domwag hanggan aban aban. Aho wa ka ha manga sosi has kahatayan hanggan has Daga Salad. ¹⁹ Yakanga ha fag sorat ka hyamo lagan, ka kati fag masohod fag manga bagay, hanggan ka manga bagay kamlag aban. ²⁰ To kat kahologan kadya nafatwagdog has taw, kangko bitbit fitok fanggasan hanggan ka fitok salangan ginto. Ka fitok fanggasan kawa ka manga anghil gis fitok tifonan, hanggan ka fitok salangan ginto, kawan Diyos fitok tifonan taw.

¹ Ha soratan han Diyos Tifonan sas banwa Ifiso, hat anghil kitay, Ka ha bitbit fitok fanggasan sat balis sihon fag gamat, hanggan kaglahaw sas fagbokngan fitok salangan ginto ka nafwayong angko, soratan kitay, ² Ho fadi wadtwa hyamo manga naibolon, hanggan im nakayayan, hanggan kitay hadwag fagomon. Ho twa wa kitay haw kadwat iglag ka manga gogali dwat. Haw nasolay ka mangag faniring odi in Diyos manga Fandiya-Barita. Haw natwa waglag kitay manga odi bohagon tonya. ³ Ho twa kitay maskin haw galwasi angko haw nadog mahori, dapat hadwag fagomon, hadwan bway. ⁴ Dapat, to kangko lagan dwat sa hyamo kati, hagfasigpala wa bangan angko, idwa kito ka hyabi ha no galwasi angko bago bago. ⁵ Ha fag tohod haw no kinday hyabi no galwasi angko. Ha fag soyo wan hanggan fag dayo ka manga dwat fag ogali. Im ogali fag kito mandi ka hyabi ha no galwasi angko. Dapat, ha nodwag soyo, ho ngalay dimbangkad has nyamo, ho bomol kam salangan. ⁶ Dapat to fag bagay kangko nabayaan hyamo, haw kito yadingko, haw kahori wa dahol dahol ka manga Nikolayta ibolon. ⁷ Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. Hogfaangay kitay aban, sas fiya fag oliyanan ka manga natay, ka manga nadaog has kadwatan, ta fag homwan ka bohad hayo kagfaboyag is taw. ⁸ Ha soratan han Diyos Tifonan sas banwa Ismirna, hat anghil kitay, Ka nalwang yadi kitay, Aho ka nagona hanggan kamgoyan, ka natay, ginyan boyag ya, ka nafwayong hangko, soratan kitay, ⁹ Ho natwa wan ka hyamo nadalanan manga mahori. Ho twa kitay haw myabog, dapat ka orongan haw maakwa. Ho fadi wadtwa kitay kagfaniring manga Hodyo igyod hyamo, dapat ka orongan tonya fag manga taw in Satanas di sakop. ¹⁰ Ha fag idwa kadala ka manga mahori kamdasog ha hyamo aban. Haw fag danwa twa kitay is Fandaya faporiso tiba aban sa hayo safolok yabi, kaarakitay somolay hayo. Haw fag idwag fagomon nyawa ta hanggan wa fahatay hyamo, ginya madi ho domisag ha hyamo haboyagan ka bilang wa sangbaw kagfalag kitay haw nadaog has kadwatan. ¹¹ Ham no ha manga talinga ya ngadi, fag talinga ka Maliyaw fag Falad fwayong han Diyos manga Tifonan Kagdaog has kadwatan idwa domalan has fadowa fg kahatayan. ¹² Ha soratan han Diyos Tifonan sas Pirgamo, hat anghil kitay, Ka ha bitbit baladaw, ka ha tayom baliw baliw, ka nafwayong hangko, soratan kitay, ¹³ Ho fadi wadtwa kitay im banwanan sawan Satanas tokawan fanokawan gorangon, dapat ay, nyawa kitonya, hadwag fagomon igsyag angko. Nyawat fagonan, sa hyamo banwanan, in Satanas wa oliyanan, ta nafahatay angko matanogon fag fangibolon, is Antipas, hadwa nafagomon igsyag angko. ¹⁴ Dapat to kangko fakabayaon hyamo maskin tiba sa hayo igtalinga in Balaam faadal, ka nafadonong in Balak ka nafayayom manga taga Israil has ogali dwat. Ginya, nyawa ta nahwan famiyan has labang taw, hanggan ta naogali dwat has ka taw baliwa. ¹⁵ Tiba ya ngadi sa hayo igtalinga has adal Nikolayta. ¹⁶ Yakanga ham fag soyo wan, dayowan wan hayo manga ogali dwat. Ham nodwa somoyo, hombangkad wa madali has nyamo hayo, yakanga ho omisog tonya fag manga taw, kawa baladaw gingko basad bibig kangko fanlaban has taw. ¹⁷ Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. Ho domisag angko nabotang fanganon gingko banwanan sam tongod has mangag daog has kadwatan. Ho fahafod yadi ha sadi ha sadi myasa sadik bato abohay, masoratan yadi sinya bago fag ngayan, idwa ha taw twa ka ngayan bago, no bohonwa ka tomanggap tonya fag bato. ¹⁸ Ha soratan han Diyos Tifonan sas banwa Tiyatira, hat anghil kitay, In Diyos Anak, kat mata kito was afoy nogsinay, hanggan it bitis kito was tanso nogsilaw siwas kasinayan, ka nafwayong hangko, soratan kitay, ¹⁹ Ho fadi wadaglag hyamo manga ogali, kawa haw galwasi angko hanggan has taw, hadwag fagomon, haw gibolon in Diyos ibolon, hanggan gagwanta manga mahori. Ho twa yadi kitay bohondi kito ka hyabi im manga ibolon fiya kati. ²⁰ Dapat to kangko fakabayaon hyamo, haw igfaangay in Hisibil, ka ina kaglwang kitay hanya in Diyos wa fangampang, dapat it manga adal nabalag odingko manga fangibolon, nafadogay odi has ogali dwat has ka taw baliwa, nafaoyon ya ngadi kitay nyawasta famiya, fakwan lamang. ²¹ No kitay di, ho dogay wagfanaya kitay, tonya fag ina fag somoyo, fag domayo it manga ogali mahaya, dapat dayo kaoman. ²² Haw fag danwa twa kitay, ho fagomo tonya fag ina, hanggan ka manga ama ka kasaya hanya, sat baba sagmak kaarakitay dogay idwam bangon. Ka manga kasaya hanya fag ina domog mahori, idwa hat dayo fag mahori ta nodwa somoyo ista manga naogali dwat ginya fag ina. ²³ Ho fahatay yadi wat manga anak, hanggan in Diyos manga Tifonan fagayo tomwa kitay, aho wa ka twaglag fiya fiya sasta manga fangayofan hanggan isip. No kinday ka hayo manga naibolon ha sadi ha sadi, ho gomanti wa hayo fagayo fagayo. ²⁴ Hodwa mamahoriyan domwag hayo tiba sas Tiyatira kadwag talinga han Hisibil adal, kadwan donong hasta faglwangon in Satanas manga abasad fag kadonongan mafyaloman. ²⁵ Dapat ay, no baliday ahodya kabangkad, ham fag idwa kaoman hayo manga ogali ka fiya. ²⁶ Ho domisag has idwag fagomon igdayo has dwat, hanggan kagfadagos katanog angko manga togon hanggan has katabowanan, ho domisag kangayanan igbahala has fagayo fag manga layonan banwanan taw, kito yadingko natanggap kangayanan gingko Ama. ²⁷ Kito was baol mabyat hanya no bomahala aban, tomoltog ka manga layonan banwanan taw, kito wasag bakbak anglit hanggan wagfaarogbotan ²⁸ Ho domisag yadi hanya ka faramnag dayo kasirang. ²⁹ Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan.

¹ Ha soratan han Diyos Tifonan sas banwa Sardis, hat anghil kitay, Ka ha akwa in Diyos fitok falad, hanggan fitok fanggasan, kaglwang kitay, Ho fadi wadtwa hyamo manga ogali. No kalag di haw boyagan di, dapat ka orongan haw mahatayan wan. ² Ha fakafolaw wan, farigonan ka manga bagay fiya kansawad yapdi ha hyamo, kaarakitay ka fiya fag manga bagay idwa fagayo imliyam. Ho natwa wagdog kitay, sangko Diyos faglagan, hadwa nafatonglos im manga ibolonon. ³ Haw fag idwag liyam kam natanggap hyamo donggon manga adal. Fag katanog wa tonya, fag soyo wa a, fag dayo im manga dwat fag ogali. Ha no bilang didwa kafolaw, ho has nyamo wan, ho bilang di kitos fangnahaw, hodwa tomogon no ginahin fag masohod aho no kadasog. ⁴ Nyawa kitonya, ha akwa yapdi sayok is nyamo sas Sardis kadwa nafaowing it manga rotay, yakanga ta omofod angko ha manga solong rotay abohay, maskin ta maangay wan. ⁵ Kadwag fagomon igdaog ka kadwatan somolong yadi ka kitonya fag rotay abohay, ahodwa bomol it ngayan gis listahan manga taw ka ha haboyagan. Ho fahilala yadi wa hanya sangko Ama atobangan hanggan hat manga anghil. ⁶ Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. ⁷ Ha soratan han Diyos Tifonan sas banwa Filadilfiya, hat anghil kitay, Ka Maliyaw hanggan ka fiya fag fandaliyan hanggan ka mabitbitan yadi in Dabid sosi, kaglwang kitay hanya no naboklas, idwa ha twagtahop, hanya no natahop, idwa ha twag boklas. ⁸ Ho fadi wadtwa im manga ogali, ho twa kitay hadwa bangan madonong, dapat haw katanog angko togon, hadwag tangkod angko, hadwag dayo. Yakanga ho naboklas ka sik sakbawan sa hyamo fagonan, idwa ha syagan tomahop to, nyawa faktaw. ⁹ Fandog ngay, ho fabangkad ha hyamo in Satanas sakop manga bohagon, kagfaniring odi kitay manga Hodyo, ho falingkohodan lamang tonya fag manga taw sa hyamo atobangan kaarakitay ta tomwa waglag kitay ho galwasi hyamo. ¹⁰ Maskin haw intanog angko togon kitay fag idwag fagomon, gis nanya fag masohod aban, ka kahoriyan kagsolay fagayo fag manga taw sadik baba daga nomdasog, ho omano wa fiya fiya hyamo. ¹¹ Ho ngalay dimbangkad is nyamo. Ha anowan fiya fiya ka hyamo wa fagbotangon kaarakitay idwa ha homagaw hyamo sangbaw, nyawa faktaw. ¹² Ho fabali kagdaog has kadwatan bilang sadik torok sangko Diyos Fanimbaan-Dahol, hanya idwa yadi malin ginya, hanggan aban aban. Ho somorat angko Diyos ngayan sa hanya, hanggan angko Diyos it banwa ngayan, ka bago fag Hirosalim, ka domokson gingko Diyos banwanan sam tongod. Ho somorat yadi sa hanya angko ngayan bago. ¹³ Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. ¹⁴ Ha soratan han Diyos Tifonan sas banwa Lawdisiya, hat anghil kitay, It ngayan is Fadi wa ngay, fag kitonya wan, ka maanod hanggan fiya nogfaorongan, hanya kagfabago in Diyos nahalig fagayo, kaglwang kitay, ¹⁵ Ho fadi wadtwa im manga ogali, ho twa kitay hadwa matamis, hadwa yadi matabang. Fiya man nangos haw no matamis, ngatay matabang. ¹⁶ Maskin haw bilang mataka wagdog, bohonwa yadi matamis, bohonwa yadi matabang, ho somofa di hyamo. ¹⁷ Haglwang, ha maakwa wan, hosto wan fagayo fagayo fag kaakwaan. Yatokitay, hadwa ngap twa kitay haw marongkot, haw maawa waglag, myabog wa dahol haw, bota hanggan malobasan odi. ¹⁸ Gwadi ka fiya, ha saliyan gingko ginto kanlayon fiya fiya kaarakitay hambali maakwa orongan, manga yadi rotay abohay kaarakitay hadwa kaya kitay hadwa ha solong, manga famolong has mata kaarakitay im mata imfoga ya. Fagayo saliyan gingko. ¹⁹ Ho gato hanggan gadal fiya fiya fagayo kangko fagalwasiyon. Yakanga ha fag kabagat wa has fiya, fag soyo wan, hanggan fag dayo im ogali dwat. ²⁰ Fandog ngay, ho malindogan sas dayo sakbawan, hogsagam wan, nyawa faktaw no domog angko hasnog, ginya fasakbaw angko, ho somakbaw wa hat fangayofan a, mi mangilhodan wan, hyami sagaba sadi wan, mi manayowan fagaba. ²¹ No kinday aho nadaog has kadwatan hanggan matokawan kati, sangko Ama akbang, sat tokawan fanokawan gorangon, kitonya yadi kagdaog has kadwatan, ho fatokaw yadi hanya sangko akbang, sangko tokawan fanokawan gorangon. ²² Ham no ha manga talinga ya ngadi, ham fag talinga wan ka Maliyaw fag Falad fwayong han Diyos manga Tifonan.

¹ Aho nontabo wagsorat han Diyos fitok Tifonan, bokod angko lagan madolaw. Ginya ho ha lagan ya, san Diyos banwanan sam tongod, sadik sakbawan maboklasan. Aho sadi ya ginan nadog ya domwag ka nahasnog, bilang igbodyong, iglwang kitay, Ha fag sakbaw wa hastay, ho falag hyamo kam-anod aban kasta faglagon. ² Ginya madi hogfaangay ka Maliyaw fag Falad kafasadan sangko, ginya ho nalag sadik tokawan fanokawan gorangon san Diyos banwanan sam tongod, hanggan ka matokawan sinya. ³ Ka matokawan sinya it walong di masilaw waglag, kito was bato aspiro a, bato kornalina, fiya kabantay, sinay sinayon. Ha akwa yadi sadik balangaw malatoy kitos bato ismiralda maligongan sinya fag tokawan. ⁴ Sas ligongan fanokawan gorangon ha dowa yak safolo ha ofat ik manga tokawan fanokawan gorangon. Ka mangag tokaw sinya fag manga tokawan dowak safolo ha ofat ik manga fagtahinan. It manga solong rotay sonson wa abohay, sat manga boknga alfoyo ha sangbaw ya ngadi ginto. ⁵ Ginya fag tokawan gis fagbokngan, ha tahin wa barikos hilat a, igsohodan wan has hinagoman, hanggan linti di, katik wan. Ha fito yadik salong igyawa sas akbang tokawan fanokawan gorangon. Tonya kan Diyos fitok falad. ⁶ Sas fagonan tokawan ha dagat, bilang wa salamin it kahalyawan, kito was bato matikyas it kaabohayan. Ginya madi ho nalag in Diyos nahalig boyagan ofat, maligonan sas tokawan fanokawan gorangon, sonson wa mata sas fagonan hanggan wa ginanan alfoyo. ⁷ Kangko lagan bago bago kanhalig boyagan, bilang wa liyon, it fadowa bilang wa anak baka aman, it fatolo bilang wa taw it walong, it faofat bilang wa boyaw kaglayog sam tongod, daga banwa. ⁸ To fag manga inhalig boyagan ofat, myasa wa onom it fakfak, naskat wa mata sas babaw hanggan sas basad. Idwa ha katohasan gambahan yabi sirang, iglwang, Maliyaw, maliyaw, maliyaw is Diyos kagfon intam, kadwa ha bosal, Ka hyabi, hanggan ka kati, hanggan ka kabangkad aban fag Diyos. ⁹ No baliday tonya fag ofat kan Diyos nahalig boyagan gambahan yapdi, igfasayagdog, igfadaholon hanggan igbaya has matokawan sas tokawan fanokawan gorangon, ka boyagan hanggan aban aban, ¹⁰ ka dowak safolo ha ofat ik fagtahinan nanlibabaan sas atobangan tokawan, igfasayagdog has matokawan sinya, ka boyagan hanggan aban aban. Ta nafwalid yadi ista manga sangbaw ginto sas fagonan tokawan, ginya taglwang, ¹¹ Haw hyami Diyos, kagfon hyami, haw ka fiya ista fagfasayaon igdog, ista fagfadaholon hanggan ka fiya tomanggap karigonan, Maskin haw wa ka nahalig fagayo fag manga bagay, No kinday kam kafangayofanan haw nahalig fagayo, hanggan haw mandi ka gano yapdi fagayo.

¹ Ginya madi ho nalag kitay ka matokawan sas tokawan fanokawan gorangon ha bitbit, sat balis sihon fag gamat, ka sadik famasaan malohotan. Baliw baliw labong ha sorat, hanggan ha faganitan fitok tatak sas boknga lohotan sorat. ² Ho nalag sadik marigon fag anghil kampang marigon has taw, iglwang, Fakta ka fiya gomisi ka manga faganitan hanggan bomoskad ka famasaan malohotan? ³ Dapat, nyawa san Diyos banwanan sam tongod, nyawa sas baba daga, nyawa ka sas daga daga, basad daga, tadwa ha lagan fiya bomoskad ka famasaan hanggan bomantay no kana kat sorat sinya. ⁴ Honyaya wa goraw maskin idwa ha lagan fiya bomoskad hanggan bomantay ka famasaan. ⁵ Yakanga gis dowak safolo ha ofat ik fagtahinan, ka sadi nalwang hangko, Ha fag idwa goraw. Fanlag ngay, bantayan ka Liyon gin Hoda hasokfonan, in Dabid yadi hasokfonan, hanya wa ka nadaog has kadwatan, yakanga fiya di no gomisi ka fitok faganitan hanggan bomoskad ka malohotan fag famasaan. ⁶ Ginya madi Anak Topa kangko lagan, malindogan sas fagbokngan manga fagtahinan hanggan sas fagbokngan ofat kanhalig boyagan, sawasta boknga boknga, sas tokawan fanokawan gorangon. Ka Anak Topa ha manga nagbaranan, yakanga twa wa kalag kitay tonya fag Anak Topa kasta nafahatay. Ka Anak Topa ha mata fito, ha songay fito. Ka fitok mata kan Diyos fitok Falad kat nasogo hastay sas baba daga sadik dahonya. ⁷ Ka Anak Topa naakbang ka matokawan sas tokawan fanokawan gorangon a, kat sihon fag gamat nabol ka malohotan fag famasaan. ⁸ Ginya madi ka Anak Topa no nabol tonya fag famasaan, ka ofat kanhalig boyagan, hanggan ka dowak safolo ha ofat ik fagtahinan, nanlibabaan sat atobangan. Kafod wa diya alpa, bilang gitara, ha bitbit yadi finggan mangkok ginto, napno wa kamangyan, it anos banglo. To fag anos banglo kawa manga darangin manga taw kantohoyan han Diyos. ⁹ To kat ambahan bago kasta fagambahanon, Haw lamang ka fiya bomol ka malohotan fag famasaan Hanggan gomisi ka manga faganitan sinya, Kawa haw kasta nafahatay, hanggan im kahatayan Ka natobos manga taw gis fagayo fag layonan daga, gis fagayo fag sanglitan taw, gis fagayo fag hasokfonan, hanggan gis fagayo fag dahol fag layonan banwanan, ha akwa wan kam natobos, kaarakitay imtohoyan han Diyos. ¹⁰ To fag manga taw kam natobos, ha nafabali intam hari it sakop manga fagalan, kaarakitay omibolon intam Diyos ibolon. Ta abam bali yadi manga gorangon istay is baba daga. ¹¹ Ginya ho nabantay ya domwag hanggan ho nadog manga hasnog anghil kaaywanan wa kaaywanan wan, hadwa mamin bomilang manga anghil sas kaaywanan. Ka manga anghil maligongan ka tokawan fanokawan gorangon, hanggan ka ofat kanhalig boyagan, hanggan ka dowak safolo ha ofat ik fagtahinan. ¹² Kiti ta no gambahan, dahol yadi ta no kasnog, Ka Anak Topa, kasta nafahatay, Hanya wa ka fiya tomanggap kadonongan, kaakwaan, fakatwawon, Fagsyaganon, kangayanan hanggan kafiyan. Tam fag fasolong igdog hanya. ¹³ Ginya madi ho nadog yadi fagayo ka mangan halig san Diyos banwanan sam tongod, hanggan sas baba daga, hanggan ka sam daga, sas basad daga, hanggan ka basad dagat, fagayo fagayo ka mangan halig sadi wak kayonya, igsohodan garambahanan, iglwang kitay, Ka matokawan sas tokawan fanokawan gorangon, hanggan ka Anak Topa kaghari fagaba, Hanya ka ha kangayanan hanggan kafiyan. Tam fag fasayagdog hanya hanggan aban aban. ¹⁴ Ka ofat kanhalig boyagan nasagot, Fadi wa ngay, fag kitonya wan. Hanggan ka manga fagtahinan nanlibabaan, nafasayagdog yadi han Diyos.

¹ Ginya ho nalag kitay ka Anak Topa nagisi ka bago bago fag faganitan gis fitok faganitan sas famasaan. Ginya madi ho nadog ka sadi kanhalig boyagan no nahampang dahowas hasnog dalogdog, nalwang, Ha fag hastay wan. ² Aho no nabantay, ho nalag sadik habayo abohay, hanggan ka masahayan sinya ha diya famana. Ha nadisag hanya sangbaw. Ginya hanyan lahaw wan kaarakitay domaog it kalaban. ³ Ginya ka Anak Topa no nagisi ya kat fadowa fag faganitan, ho nadog ka fadowa fag inhalig boyagan iglwang, Ha fag hastay wan. ⁴ Ginya sadi yak habayo, dararag, kanbangkad. Ha nafaangay ka masahayan sinya kitay, hanya kagbahala igfabago awayan istay is baba daga, kaarakitay manga taw igfahadhatayan ha sadi ha sadi. Ha nadisag hanya sadik talibong aba. ⁵ Ka Anak Topa no nagisi ya kat fatolo fag faganitan, ho nadog ka fatolo fag inhalig boyagan noglwang, Ha fag hastay wan. Kangko lagan sadi yak habayo, masding. Ka masahayan sinya ha bitbit timbangan. ⁶ Ginya madi ho nadog bilang wa ha nahasnog gis fagbokngan ofat kanhalig boyagan, iglwang, Sadik dinariyo it sali sadi lamang ik sarok tirigo, dapat tolok sarok sibada sadik dinariyo. Dapat ha fag idwag fadwat ka langis gis bohad olibo hanggan ka alak. ⁷ Ka Anak Topa no nagisi ya ka faofat fag faganitan, ho nadog ka faofat fag inhalig boyagan iglwang, Ha fag hastay wan. ⁸ Ho nalag sadik habayo kaabohay wat anit, kawa kagomo. Ka masahayan sinya is Kahatayan it ngayan, hanggan is Daga Salad sa odit dayo habot. Ha nadisag hanyas dowak masahayan kitay, ta fag bahalag fahatay it faofat fag layonan gis fagayo fag manga taw sadik baba daga. Tiba ta nabasing talibong no natay, tiban lonos, tiban sagit fanalafod, tiba kawa manga hayopan maisog nahagat. ⁹ Ka Anak Topa no nagisi ka falima fag faganitan, ho nalag kasta manga nafahatay kawa ta galwasi in Diyos barita, hanggan tadwag fagomon igfaorongan kawa han Diyos. Ho nalag it manga falad sasta daga fanogbaan. ¹⁰ Tagrokyaw dahol, igsyag in Diyos kitay, Haw kagfon hyami, haw ka maliyaw hanggan orongan, mayaya wagfanaya. Ginahin kin haw no fatohoyan has fadosaan hanggan gomanti has taw sas baba daga ka nafahatay hyami? ¹¹ Ha nadisag rotay abohay has fagayo kasta manga nafahatay. Ha nafwayong yadi has taw kitay ta fag mafahowayan yapdi ogbot. Kagfon intam bago di fadosa tonya nodwa hamaktom domwag gista manga fadwasay, hanggan gista manga ofod fangibolon ka kito yadis taw no matay aban. ¹² Ginya madi ho nabantay hanggan ho nalag kitay ka Anak Topa no nagisi ka faonom fag faganitan, nalinog marigon. Ka myanit inbali wa masding kito was rotay magwang magwang. Ka magdanon bilang wa folot dararag. ¹³ Ka manga fanggasan indagdag gis banwa kitos manga bohad igos no karabak nogbagyo marigon. ¹⁴ Ka banwa sam tongod inliyam wan kitos kasoratan no kalohot madali hanggan ka manga moyod hanggan manga foyo dagat nalin git fagoliyanan. ¹⁵ Ginya fagayo fag manga taw, ka manga gorangon istay is baba daga, hanggan ka manga ha kangayanan, kasta manga tahinan, hanggan ka manga maakwa, ka manga ha kadonongan, fagayo fagayo, nyawasta nasali sogowan, nyawa bohonwan, fagayo igtago wan sayo basad lohib, sayo faktaban manga bato sas moyod. ¹⁶ Tagtawag yadi has manga moyod, taglwang, Ham tabonan wa hyami kaarakitay ka matokawan sas tokawan fanokawan gorangon idwa lomag hyami, hanggan ka Anak Topa idwa omisog hyami. ¹⁷ Maskin kati, ka madala fag Sirang fadosaan indasog wan. Faktaw wa kamtolas no kitonya wan, ham gayfan?

¹ Ginya madi ho nalag ofat ik anghil malindogan bali bali ofat ik fongfongan daga igtaktak yapdi ka ofat ik bagyo, fag idya bomagyo has baba daga, nyawa has baba dagat nyawa has manga fon hayo. ² Ginya ho nalag sadi yak anghil gindahod gis salogan myanit baliwa, ha diya in Diyos boyagan it fantanda. Natawag marigon has ofat ik anghil kan Diyos nagtogonan ka bahala igfabagyo, hanggan aywan kat bato fadwaton hastay has baba daga hanggan baba dagat, iglwang, ³ No baliday hami idya nafatanda in Diyos manga fangibolon sat boknga angas, ham fag idyag fabagyo marigon has baba daga hanggan has baba dagat, hanggan has manga fon hayo. ⁴ Ginya ho nadog no kayoday kat natandaan, gamtanan 144,000 gis fagayo fag manga layonan in Israil manga hasokfonan. ⁵ san Hoda hasokfonan 12,000 san Robin hasokfonan 12,000 san Gad hasokfonan 12,000 ⁶ san Asir hasokfonan 12,000 san Niptali hasokfonan 12,000 san Manasis hasokfonan 12,000 ⁷ san Simyon hasokfonan 12,000 san Libi hasokfonan 12,000 san Isakar hasokfonan 12,000 ⁸ san Sabolon hasokfonan 12,000 san Hosi hasokfonan 12,000 san Binhamin hasokfonan 12,000 ⁹ Ginya madi ho nabantay ya, kangko lagan kaaywanon kaaywanon fag manga taw, hadwa mamin bomilang, nyaa faktaw. To fag manga taw giwas fagayo fag manga dahol fag layonan banwanan taw, hanggan gis fagayo fag manga layonan ogbot, manga banwanan hanggan manga sanglitan sinya. Ta malindogan sas fagonan tokawan fanokawan gorangon hanggan sas atobangan Anak Topa. Fagayo ha solong rotay abohay, ha bitbit yadi manga labong bilang manga labong tagisi. ¹⁰ Tagsohodan igtarawagan marigon, iglwang, Intam Diyos, ka matokawan is nwa fag tokawan, hanggan ka Anak Topa kagbawi intam. ¹¹ Ginya madi, fagayo fag manga anghil naligong malindogan tonya fag tokawan, naligong has manga fagtahinan, hanggan has ofat kanhalig boyagan, nanlibabaan sas fagonan tokawan hanggan nafasayagdog in Diyos. ¹² Nalwang, Fadi wa ngay, fag kitonya wan. Intam Diyos ka maangay bomaya, hawa hanya ka kafiyan, kadonongan, fasalamat, kangayanan, karigonan hanggan fagsyaganon hanggan aban aban. Fag kitonya wa ngay. ¹³ Ginya madi sadik fagtahinan naintaw angko kitay, Fakta fag manga taw tonya, hanggan ginday ka ha manga solong rotay abohay, ha gayfan? ¹⁴ Ginya hoglwang, Twa man, hodwa twa. Haw wa ngap ka twa. Ginya hanya nafwayong angko, To ka mangadwa nafagomon nyawa ta nafahoriyan wa dahol dahol has taw. Ta nafabali fiya hanggan nafaabohay it manga rotay sas Anak Topa folot. ¹⁵ Yakanga ta sawan Diyos fagonan tokawan fanokawan gorangon, gibolon it ibolon yabi sirang, sat Fanimbaan Dahol. Hanggan ka matokawan sinya fag tokawan ka somakop has taw. ¹⁶ Tadwam lonos domwag, idwa yadim inom, idwa yadim alhagan afali basad myanit. ¹⁷ Maskin ka Anak Topa ka sas baba tokawan fanokawan gorangon ka omano is taw, kito wa ka fangano topa. Tomaban manga taw has manga bolbogan danom kagfaboyag has manga taw. Is Diyos wa ka fomyad ka manga lowa fagayo gista manga mata.

¹ Ginya madi ka Anak Topa no nagisi ka fafito fag faganitan, manga sadik tama sinyahod idwa ha naawang ngadi kana san Diyos banwanan sam tongod. ² Ginya madi ho nalag ha nafahafod ha sadi ha sadi has fitok anghil, ka malindogan san Diyos atobangan, myasa sadik bodyong. ³ Ginya sadi yak anghil ka ha bitbit finggan mangkok ginto, it sohadan kamangyan, nalindog sas bilog fanogbaan. Ha nadisag kaaywanon fag kamangyan hanya fag anghil kaarakitay fasoglat in Diyos manga nafili it manga darangin, nogsonog sas baba ginto fag fanonogan, sas fagonan tokawan fanokawan gorangon. ⁴ Ka anos kamangyan masoglatan in Diyos manga nafili it manga darangin, nasongaw gi basad finggan mangkok san anghil gamat, nasongaw han Diyos akbang. ⁵ Ginya madi yabay, ka anghil nabol manga baga gis fanonogan, nafahapno basad finggan mangkok a, ginya naokas has boknga daga. Dagos wa nadalogdog, manbang wan, nahilat ya, nalinog ya. ⁶ Ginya madi ka fitok anghil dan wa matalagaan faoni it manga bodyong. ⁷ Ka gona fag anghil no nafaoni it bodyong, dagos nahwayan has baba daga, yilo hanggan afoy, ha soglat ya ngadi folot. Kat fatolo fag layonan daga insonog, kat fatolo fag layonan manga fon hayo, hanggan fagayo fag lamnon latoy sadik baba daga insonog wan. ⁸ Ka fadowa fag anghil nafaoni it bodyong, ginya ka bilang sadik dahol fag moyod gigang in-okas ha basad dagat. Kat fatolo fag layonan dagat inbali wa folot. ⁹ Kat fatolo fag layonan manga boyagan basad dagat natay wan, hanggan kat fatolo fag layonan sahayan baba dagat indwat lamang. ¹⁰ Ka fatolo fag anghil nafaoni it bodyong, ginya sadik dahol fag fanggasan gigang, kito was fatay iyanay, indagdag has fatolo fag layonan manga safa hanggan manga bolbogan danom. ¹¹ Ta nafangayan tonya fag fanggasan is Lamnon Mayat. Kat fatolo fag layonan danom safa hanggan bolbogan inbali mayat, hanggan kaaywanon fag manga taw natay wan no nainom, kawa mayat wan. ¹² Ka faofat fag anghil nafaoni it bodyong, ginya ka fatolo fag layonan myanit, ka fatolo fag layonan magdanon, hanggan fatolo fag layonan fanggasan in-iktan wan, yakanga ka myanit it fatolo fag layonan, hanggan ka fatolo fag layonan magdanon, hanggan fatolo fag layonan manga fanggasan inharom wan. No sirang idwa hagyawa sas fatolo fag layonan, hanggan no yabi kitonya yadi, idwa ha nayawa sas fatolo fag layonan. ¹³ Ginya madi ho nalag sadik boyaw iglayog sam tongod, sas daga banwa. Ho nadog yadi no goni, igtawag marigon, iglwang, Isyay, isyay wan, kat sawad tolok anghil no faoni dit bodyong, madala wa dahol dahol kasta lagon fagayo istay is baba daga.

¹ Ginya madi ka falima fag anghil nafaoni it bodyong. Ginya ho nalag sadik fanggasan kandagdag gin Diyos banwanan sam tongod has baba daga. Ha nadisag hanya ka sosi has ohang kadwa ha saragan. ² Ka fanggasan naboklas ka ohang, ginya ha anos dahol dahol, dahos nagfagbaan anglit ayo ayo, inbangkad ginyas basad ohang, nalanbong wa myanit hanggan wa baba daga, marom wan. ³ Ginya madi aywan fag manga fan inbangkad gis basad anos, nanarowayan has baba daga. Ha nadisag has manga fan kitay, fag somyagan homagat ka manga taw, myasa wa masagit, kito was inonay no kagat. ⁴ Ha natogon has manga fan kitay, hawag dwat ka manga lamnon, hanggan manga fon hayo, nyawa kana fag tanom. It bato hagaton ka manga taw lamang kadwa ha akwa in Diyos tanda sat boknga angas. ⁵ Idwa ha nafaangay kitay ka manga fan fag fahatay tonya fag manga taw, fahoriyan odi balis limak magdanon. Ka fan nogfahoriyan is taw bilang wa ha korit kito was inonay no kagat. ⁶ No kandogay day ka fan no kagat yapdis taw aban, ka manga taw kasaya wa matay nangos, dapat tadwa yadi katay. ⁷ No kalag di ka manga fan kito was manga habayo ta nogfatalaga has awayan, ha bilang manga sangbaw ginto, hanggan it manga walong bilang yadi wa walong taw. ⁸ It manga bok bilang wa bok ina, it manga ngifon kito was ngifon liyon. ⁹ Ka manga fan bilang wa ha fanaktak baol sat manga boknga dobdob. Kat manga fakfak nograbog, kito was manga habayo no ha goyod kalisa no hawas awayan, kadkalingan wan. ¹⁰ Ha sogod sas dayo habot, kitos inonay. Ka gis basad ihog ka syagan igfasagit manga taw limak magdanon. ¹¹ Ka anghil gorangon fan ka gano ka ohang daga kadwa ha saragan. It ngayan, sas fangampangan Hibriyo, kawas Abadon, no sas fangampangan Girigo, is Apolyon, it kahologan, kawas Fandwat. ¹² Ka gona fag madala kanboyaw nafwayong intolas wan, dowa ya ka kadasog. ¹³ Ginya ka faonom fag anghil nafaoni it bodyong, hanggan ho ha donggon ya sadik hasnog gis basad ofat fag solok sas ginto fag fanonogan ka san Diyos atobangan. ¹⁴ Ka hasnog nafwayong has faonom fag anghil ka ha bodyong, Falfasan ka ofat ik anghil ka magafosan sas gobang safa dahol, ka safa Ifratis. ¹⁵ Yakanga nafalfas ngay ka ofat ik anghil ka danwa nafatalaga hat bato ibolonon, kaarakitay homamin wa fahatay ka fatolo fag layonan gis manga taw, sadi wak dahonya baba daga, gis nanya fag oras, gis nanya fag sirang, magdanon hanggan fangaraw. ¹⁶ Ta nafwayong angko kitay ka manga sondalo masahayan baba habayo, 200,000,000 it kaaywanan. ¹⁷ Ho nalag ka manga habayo hanggan ka masahayan sinya, ta ha manga fanaktak sat boknga dobdob, it kadararagan bilang wa afoy, it kalatoyan bilang wa bato sapiro, it kaboragawan kitos asopri. Ka alfoyo habayo bilang wa alfoyo liyon. Ha afoy ya, ha anos ya, ha asopri ya, kabangkad git manga basad bibig. ¹⁸ Tonya tolok kahoriyan ka nafahatay ka fatolo fag layonan gis fagayo fag manga taw sadik baba daga, gis afoy, gis anos hanggan gis asopri kanbangkad gis basad manga bibig habayo. ¹⁹ Maskin ka karigonan manga habayo sawat manga bibig, hanggan giwat manga ihog. It manga ihog ha alfoyo kito was abyanon, kagfasagit has manga taw. ²⁰ Ka mangan sawad yapdi istay is baba daga, ka mangadwa natay ginya fag kahoriyan, idwa yadi nasoyo. Tadwa nadayot manga sadili gamat nahalig fag manga fagsyagon, igfasayagdog yapdi has manga labang, manga tolad ginto, manga tolad pilak, tanso, bato, ngatay hayo. ²¹ Tadwa yadi nasoyo it manga ogali dwat, kitos iglibon taw, igsyag has iba fag kadonongan, mangag fabayowan, mangag nahaw.

¹ Ginya madi ho nalag sadi yak anghil marigon igdokson gin Diyos banwanan sam tongod, bilang wa masafotan sayo manga linyabo linyabo, ha balangaw ya ngadi sat tongod alfoyo. It walong igsinay kito was myanit hanggan it bitis bilang wa manga igang nogsaroray aba aba. ² Hanya ha bitbit sadik famasaan ogbot maboklasan. It bitis ka balis sihon, malidan sas baba dagat, kat balis wala has baba daga. ³ Hanya narokyaw, it hasnog kitos liyon nogngayong. Hanya no narokyaw ha fitok dalogdog nasagot, nafawas, bilang wa nanogonan. ⁴ Ka fitok dalogdog nonsagaya wa kampang, ho gayfan ho somorat, dapat ay, ho nadog sadik hasnog gin Diyos sam tongod kaglwang, Fag idya man igfadog ka fitok dalogdog nafwayong. Haw fag idwag sorat tonya. ⁵ Kangko lagan anghil ka matorangan, insadi it bitis has baba dagat, insadi has baba daga, nafaabwat it gamat balis sihon a, igsiyo han Diyos banwanan sam tongod. ⁶ Naowas ka boyagan fagaba fag Diyos it ngayan, ka nahalig ka banwa sam tongod, ka daga, hanggan ka dagat hanggan fagayo ka sinya, naowas tonya kaarakitay faorongan it fwayong, noglwang, Idwa fadogay domwag. ⁷ Ka fafito fag anghil no faoni it bodyong, is Diyos fatonglos wan it bato ibolonon kadya nafadog has taw, kito kat nafwayong hyabi hat manga fangampang fag manga fangibolon. ⁸ Ginya madi kangko donggon hasnog ka nahampang gin Diyos banwanan sam tongod, nahampang ya domwag hangko, nalwang, Fag gakbang has anghil ka matorangan, insadi it bitis has baba dagat, insadi has baba daga, fag bol ka bitbit famasaan maboklasan ⁹ Ho naakbang nga anod has anghil a, ho nasagad ka famasaan. Ka anghil nalwang hangko, Bol to a, hwan wa dagos. Ha domog mayat no sam daga dobdob, dapat im dayo kwan matamis, kito was dyahot salbod it katamisan. ¹⁰ Ho nagamit wa a, ho nahwan wan ka ogbot fag famasaan. No kitay di matamis ngawan, kito was dyahot salbod, dapat ho no natolon wan, mayat sangko daga dobdob. ¹¹ Gin ka naghil nafwayong hangko kitay, Ha fag fadog ya has taw kan Diyos nafagona nafwayong hyabi kawa has manga taw gis fagayo fag banwa, hanggan gis fagayo fag layonan banwanan taw, hanggan manga sanglitan, hanggan kawasta manga gorangon.

¹ Ginya madi ka anghil nadisag angko sadik fanokat ka kitos sokod, nalwang kitay, Ha fag kalindog wan, sokatan in Diyos Fanimbaan Dahol hanggan ka fanogbaan. Tapan yadi ka mangag fasayagdog in Diyos sinya, no kayoday. ² Dapat ay, fag idwag sokat ka basad aladan Fanimbaan-Dahol maskin indisag wan has manga Hintil kagbahala sinya. Balis ofat ik safolo ha dowak magdanon ta lomid lamang, domwat ka banwa ka nafabokod han Diyos. ³ Dapat ho somogo angko sogowan dowa, ka mamaorongan has taw balis 1,260 ik sirang, ta nogfadog angko hampang. It manga rotay manga odi sagodang. ⁴ To fag dowak sogowan kagfaorongan, kawa dowak fon olibo, hanggan dowak salangan ka sawasagfon daga atobangan fagaba. ⁵ No ha akwa taw kasaya omisog aban hanya fag dowak taw kagfaorongan, yabay ha akwa wa afoy imbangkad gista manga basad bibig a, matohoyanan ka mangag laban hanya fag dowak taw matay wan. ⁶ Tonya fag dowak taw kagfaorongan, syagan digtaktak ka mwayan sam tongod is banwa, kaarakitay idwa homwayan no kandogay day ta nogtoltol yapdi in Diyos hampang. Ta syagan yadig fabali ka danom kito was folot, hanggan no ginahin ta no kasaya, ta syagan digfabangkad nyawa kana fag kahoriyan sas baba daga. ⁷ Dapat ay, ka dowak sogowan nonsagaya wagfaorongan, ka hayopan maisog imbangkad gis basad ohang kadwa ha saragan, lomaban has taw, domaog hanggan wa fahatay. ⁸ Ista manga habilogan mahatayan aban basta odi boknga karsada basad banwa dahol, dapat ta nogfatimbang tonya fag banwa, bilang wa banwa Sodoma, ngatay Ihipto. Sinya yadi manga taw no nafapako ista sadili Fon sas naftimbangan hayo. ⁹ Tolok sirang hagboknga ka manga taw, nyawa ginda fag manga banwa, hanggan manga layonan taw, manga sanglitan, manga layonan daga dahol, mabantayan yapdi, tadwa nafaangay kitay fag imlobgob kat manga habilogan. ¹⁰ Fagayo fag manga taw sas baba daga tamsolong waglag kitay to fag dowak taw natay wan. Ta manolodan ya ngadi. Ta mandidisagan manga fasalamat ha sadi ha sadi, maskin tonya fag dowak fangampang nafahoriyan wa dahol has taw. ¹¹ Dapat ay, nonsagaya tonya fag tolok sirang hagboknga, is Diyos nafafwali ya hanya fag dowak fangampang ka ipsaw haboyagan. Ta nalindog ya. Ka manga taw indolaw wan, tandala waglag. ¹² Ginya madi, in Diyos manga fangampang dowa, kanboyag ya, nadog sadik hasnog marigon gim tongod, nalwang hanya fag dowak taw, Ham fag sakbaw wa hastay. Ginya ista manga kalaban no mabantayan yapdi, ka dowak taw hawas tongod, hawa basad linyabo, in-anggong wa has tongod. ¹³ Dagos wa nalinog yadi marigon marigon gis nanya, ka manga balay nakfo sas fasafolo fag layonan sinya fag banwa, hanggan 7,000 taw natay kansakop sas linog. Ka manga in-goyan sinya indala wan, ta bago di nafasayagdog in Diyos kagfon ka banwa sam tongod. ¹⁴ Ka fadowa fag madala kan boyaw nafwayong intolas wan. Ka fatolo fag madala madali yadi wamlag aban. ¹⁵ Ginya madi ka fafito fag anghil nafaoni it bodyong hanggan ha manga hasnog nahampang marigon san Diyos banwanan sam tongod, kaglwang, Kati ka manga gorangon sakop fagayo fagayo, sadi wak baba daga, inbali kagfon intam, it sakop, hanggan it natogon-Famawi, it sakop. Kagfon intam inbali wa hari sadi wak baba daga, hanggan has aban aban. ¹⁶ Ginya madi, ka dowak safolo ha ofat ok fagtahinan ka matokawan sat manga tokawan fanokawan gorangon, san Diyos atobangan, nanlibabaan a, nafasayagdog han Diyos. ¹⁷ Taglwang, Haw Diyos, kadwa ha bosal, kagfon hyami, Ka hyabi hanggan ka kati fag Diyos, Migbaya wa dahol hyamo, kawa haw nabangkad wam karigonan kadwa ha katabowanan. Gis kati ginan haw igfabago waghari. ¹⁸ Hyabi ka mangadya kilala hyamo gisog wan. Dapat haw nafalag yadi wa kati im kaisogan. Kati haw igfatohoyan yadi has manga natay it fadosaan. Dapat ha domisag yadi manga fasalamat ha hyamo manga fangibolon, ka manga fangampang, Hanggan ha hyamo manga nafili, Hanggan has fagayo ka katanog hyamo manga fwayong, nyawa ka manga ha kangayanan, nyawa ka mangadwa ha akwa. Kati wa fag masohod haw no fadwat ka mangag dwat manga banwanan taw. ¹⁹ Ginya madi in Diyos Fanimbaan-Dahol san Diyos banwanan sam tongod inboklas wa a, sinya yadi wa basad fanimbaan ka haban taranggapan inlag wan. Ginya ha hilat nandadalakan nafawas wan, nadalogdog yadi dahol dahol. Nalinog ya ngadi, nahwayan ya yilo.

¹ Ginya madi sadik tanda madolaw wa dahol dahol inlag sas banwa sam tongod, sadik ina mabalokasan ka myanit, ka magdanon sat daga bitis, ha sangbaw yadi safolo ha dowak fanggasan sat boknga alfoyo. ² Ka ina gabosog wan, igdyang, igrokyaw wan it kasagitan, kawa mahori igfasagaya it anak. ³ Ginya sadi yak tanda inlag sas banwa sam tongod, sadik daragon gorangon, dararag. It alfoyo fito, hanggan it songay safolo, talafod wa ha sangbaw sat manga boknga alfoyo. ⁴ Ka daragon nafabayabayan it ihog ka nafadagdag ka fatolo fag layonan gis manga fanggasan, in-od-okasan lamang has baba daga. Ginya madi, ka ina no kaakbang wagfasagaya it anak, ka daragon nalindog sas ina dayo bitis kaarakitay homwan wa madali madali ka anak dararag nomsagaya git ina. ⁵ Ka ina nafasagaya sadik anak ama, kantalaga bomahala has fagayo fag dahol fag layonan daga, kito was baol fag maganit no bomahala has taw, ginya dagos ha akwa naanggong ka anak gis ina akbang, nadiya wa han Diyos sat tokawan fanokawan gorangon. ⁶ Ka ina nalagyo yadi wan has basad fakahyabogan, ha sadik foyo kan Diyos nafatalaga hanya, kaarakitay is Diyos omano hanya sinya, balis 1,260 ik sirang. ⁷ Ginya madi haglabanan san Diyos banwanan sam tongod. Is Migil hanggan it ofod manga anghil iglaban in Daragon hanggan it manga anghil. Da Daragon iglaban yadinda Migil, ⁸ dapat indaog di. Ginya ta nafaalin inda Daragon gin Diyos banwanan sam tongod. ⁹ Ta naokas lamang ka dahol fag daragon, kawa hyabi hyabi it ngayan is Abyanon, it ngayan is Fandaya yadi, hanggan is Satanas, kawag fatalang manga taw istay sadik baba daga. Ta naokas lamang hanya hanggan it manga sakop anghil hastay is baba daga. ¹⁰ Ginya madi ho nadog sadik hasnog marigon san Diyos banwanan sam tongod kaglwang, Giwas kati ginan is Diyos igbawi intam. Nafalag wantam it karigonan, hanggan kati hanyan bali hari, Hanggan nafalag it natogon-Famawi it kangayanan, Maskin in-okas kati gin Diyos banwanan kagsombong yabi sirang han Diyos, intam manga ogali, manga dowasayan. ¹¹ Dapat ta nadaog in Fandaya Kawa ka Anak Topa it folot, Hanggan ka barita kat fagfaoronganon kat manga fanlaban no nadaog hanya, Kawa tadwa nafaanogon it manga haboyagan, nyawa hanggan wa matay. ¹² Yakanga ham, in Diyos banwanan sam tongod, hanggan fagayo ka mabanwanan sinya, ham fag masolong wan. Dapat ay, isyay wan, ka ham sas baba daga hanggan ka sas dagat, Maskin is Fandaya nadokson has nyamo hayo, hanggan it mahori fag kaisogan tomoon wa ha hayo, Kawa hanya twa wa kitay it karigonan ngalay wamliyam aban. ¹³ Ka daragon no nalag kitay hanyan okas wan has baba daga, naalaw ya domwag ka ina ka nafasagaya anak dararag ama. ¹⁴ Dapat ay, ha nadisag bilang manga fakfak boyaw dahol has ina, kaarakitay syagan lomayog ha sadik foyo basad fakahyabogan, sinya ha akwa falogaw, omano yadi hanya balis tolok fangaraw hagboknga, kaarakitay ka ina lomagyo gin Abyanon dahol. ¹⁵ Kawa kitonya is Abyanon naolob danom, inbali kitos safa kaarakitay falimos nangos ka ina. ¹⁶ Dapat ay, ka daga natogbong ka ina, nasngi lamang, yakanga ka danom kan Daragon naolob intoyong lamang has daga, yakanga ka ina inbawi di. ¹⁷ Yakanga kawas Daragon kaisog wa dahol dahol ka ina, nabaring wa ka ina manga hasokfonan kansawad, kaarakitay omaway has taw, has manga katanog in Diyos togon hanggan idwag fagomon katiwala in Hisos nafadog ka fakaoronganan. ¹⁸ Ginya madi yabay, is Daragon nalindog sas bahalan dagat, baba onay.

¹ Ginya madi ho nalag sadik hayopan maisog kabangkad gi basad danom dagat. It alfoyo fito, it songay safolo. Fagayo fag songay kafod ha sangbaw, fagayo fag alfoyo ha ngayan masoratan, igsway in Diyos. ² Kangko lagan hayopan maisog, bilang wa liyopardo, it bitis kitos bitis oso, it bibig bilang wa bibig liyon. Is Daragon nadisag wa has hayopan maisog it sadili kadonongan hanggan it tokawan fanokawan gorangon, hanggan it dahol fag kangayanan. ³ Ka hayopan maisog, kat alfoyo sadi ha baran, no kalag di fakatayon wan, dapat infakdat ya. Ka manga taw sadi wak baba daga intaka waglag kitay infiya di, ta ngap natahin wa has hayopan maisog. ⁴ Manga taw nafasayagdog han Daragon maskin is Daragon kagdisag it kangayanan has hayopan maisog. Ta nafasayagdog yadi has hayopan maisog, taglwang, Idwa ha tomolad in Hayopan maisog. Fakta ka lomaban hanya, ham gayfan? ⁵ In-angay kitay ka maisog fag hayopan fag mafatakaon igdog, igsway in Diyos, hanggan hanya fag ha kangayanan balis ofat ik safolo ha dowak magdanon. ⁶ Igyod wa nga in Diyos, in Diyos ngayan, in Diyos banwanan sam tongod, hanggan fagayo ka maoliyanan sinya. ⁷ In-angay yadi kitay ka hayopan maisog lomaban hanggan domaog in Diyos manga nafili. Indisag yadi has hayopan maisog ka kangayanan igbahala has fagayo fag manga layonan taw, manga banwanan, manga sanglitan, hanggan fagayo fag manga dahol fag layonan daga. ⁸ Fagayo fag manga taw ka boyagan istay is baba daga mamasayagdog hanya, no bonwa ka manga taw ka odit manga ngayan insorat sas listahan manga taw ka ha haboyagan. Ista manga ngayan danwan sorat sinya ka daga nodyan halig, hanggan ka Anak Topa, ka manga taw nafahatay, ka gano tonya fag listahan. ⁹ Ham no ha manga talinga ya ngadi, fag talinga wan. ¹⁰ No faktaw kantohoyan kitay ta pomilit wa tomaban wan, ya ta tomaban wa hanya. No faktaw kantohoyan kitay ta lomibon wa hanya, tonya wa kat lagon aban. Yakanga in Diyos manga nafili fag danwadwag fagomon, fag syag wa orongan han Diyos. ¹¹ Ginya madi, ho nalag sadi yak hayopan maisog kanbangkad gis basad daga. It songay dowa, kitos anak topa songay, dapat it hasnog kitos hasnog daragon. ¹² To fag hayopan ha natanggap kangayanan gis gona fag hayopan maisog, hanggan ka gona mabantayan di, ka fadowa nogbahala has taw. Igpilit fagayo fag manga taw sas baba daga fag fasayagdog has gona fag hayopan maisog, ka hyabi ha baran, no kalag di fakatayon wan, dapat infakdat ya. ¹³ Ay ay, ka fadowa fag hayopan maisog, madolaw wa dahol it nafalag manga fatimawa. Nafabangkad yadi afoy gis banwa sam tongod, has baba daga sas faglagan manga taw. ¹⁴ Igfaadowan fagayo fag manga taw sas baba daga kawat manga nafatimawa sas gona fag hayopan maisog faglagan. Nafasognod is taw kitay, haligan sadik tolad, igtolad ka gona fag hayopan maisog, ka ha baran talibong hyabi, dapat idwa natay. ¹⁵ In-angay yadi kitay, ka goyan fag hayopan maisog fag domisag yadi ipsaw kasta nahalig tolad ka gona fag hayopan maisog. Yakanga ka tolad syagan yadi wa kampang, igfahatay yadi fagayo ka dayog fasayagdog hanya. ¹⁶ Nafwalid ka gona fag hayopan tanda sas fagayo fag manga taw, ngatay sasta gamat balis sihon, ngatay sas boknga angas, napilit wa fagayo, nyawa ka ha kangayanan, nyawa kadwa ha kangayanan, nyawa ka maakwa, nyawa ka myabog yadi, nyawa kasta sogowan, nyawa ka bohonwasta sogowan. ¹⁷ Nodwa ha akwa ka gona fag hayopan maisog it tanda, ngatay it nomiro ka pariho it ngayan, tadwag faangay manga taw igsali, ngatay igfasali nyawa kana. ¹⁸ Tam idwa tomwagdog to tam nodwa ha fakatwawon. Nyawa faktaw ka ha fakatwawon tomwa wagdog it kahologan ka nomiro ka gona fag hayopan maisog, kagfatohoyan sadik ama it ngayan. It nomiro kawa 666.

¹ Ginya madi ho no nabantay wan, hoglag kitay ka Anak Topa malindogan sas baba moyod Siyon, hanggan it manga ofod 144,000 ik taw. Ka Anak Topa ngayan hanggan it Ama ngayan masoratan sasta boknga angas fagayo fagayo. ² Ho nadog yadi sadik hasnog gin Diyos banwanan sam tongod, bilang wa sadik danom gis boknga tiwan nogtarapsahan, igfawas wan, kito was dalogdog katik wan. Kangko donggon hasnog bilang wa mangag faoni, kaskas it manga alpa. ³ Ta garambahanan wan sadik ambahan bago, sas atobangan tokawan fanokawan gorangon, hanggan sas akbang ofat kanhalig boyagan, hanggan sas akbang dowak safolo ha ofat ik fagtahinan. Idwa ha taw twagdog ista ambahan no bohonwa ka odi ka 144,000 ik taw kan Diyos natobos gistay is baba daga ka syagan igtohod tonya fag ambahan. ⁴ To fagayo manga ama kadwa naofod has manga ina, idwa nababay. Ta matahinan fagaba has Anak Topa nyawa haday it hadasogan. Ka Anak Topa natobos tonya fag manga ama gis fagayo fag manga foro taw kawan disag han Diyos hanggan has Anak Topa, bilang bohad bago bago. ⁵ Tadwa nabalibad nyawa ginahin. Manga taw idwa ha lagan dwat sasta manga ogali. ⁶ Ginya ho nalag sadi yak anghil iglayog sas boknga halayawan, ha diya ka Fiya fag Barita kadwa kaoman, kaarakitay fadog has manga taw sas baba daga sas fagayo fag manga dahol fag layonan daga, fagayo fag layonan taw, fagayo fag sanglitan taw, hanggan fagayo fag banwanan. ⁷ Hanya nafwayong marigon, Ham fag katanog in Diyos manga fwayong a, ham fag fasayagdog hanya, maskin kati wa fag masohod hanya mamatohoyan has manga taw it fadosaan. Ham fag fasayagdog hanya ka nahalig ka banwa sam tongod, hanggan ka daga hanggan dagat, hanggan manga bolbogan danom. ⁸ Ginya kat fadowa fag anghil nasoson ka gona, nalwang, Ka gorangon fag banwa, banwa Babilonya, intodtolagan wan, intodtolagan wan. Ka Babilonya nafainom ya ngadi manga alak has fagayo fag dahol fag layonan daga, kawat sadili wa nahalig alak, it ogali podo wa dwat has ka taw, napilit wa nafainom has taw, yakanga tonya fag alak kan Diyos fakaisogon. ⁹ Ka fatolo fag anghil nasoson yadi ka dowak anghil gona, igtawag marigon, Nyawa faktaw kagfasayagdog has hayopan maisog, ngatay hat tolad, hanggan igfafwalid it tanda sat boknga gamat, ngatay sat boknga angas, ¹⁰ hanya ominom in Diyos alak kaisogan, natalin han Diyos basad ongot kahoriyan, idwa ha aktom kahowayan sinya. Hanya domog mahori basad afoy hanggan asopri, saya ngadis Anak Topa faglagan hanggan ka manga maliyaw fag manga anghil fag lagan yadi. ¹¹ Ka anos gis afoy kagfahoriyan has taw maanosan wa sadik kaban ya. Ka mangag fasayagdog has hayopan maisog, hanggan hat tolad, hanggan ka ha akwa it tanda, idwa ha kahowayan yabi sirang. ¹² Yakanga kan Diyos manga nafili, ka manga katanog in Diyos togon, hanggan idwag fagomon igsyag in Hisos, fag matohoyanan idwag fagomon. ¹³ Ginya ho nadog sadik hasnog gin Diyos banwanan sam tongod, kaglwang, Ha fag sorat kitay, Ka manga mahatayan, ka katay gis kati ginan, dapat, gis dayo boyagan, insadi hasagfon intam, bomaya wan. Ka Maliyaw fag Falad iglwang, Anod wan, ta bomaya wan maskin ta mamahoway git nakayayan, kawa ka kasoratan it manga naogali gofod yadis taw. ¹⁴ Ginya ho nabantay ya, hanggan nalag sadik linyabo abohay hanggan ha matokawan sinya sadi, ka bilang taw, ha sangbaw ginto, ha bitbit sadik karit matayom. ¹⁵ Sadi yak anghil ka nadokson gis basad Fanimbaan Dahol, natawag marigon has matokawan sas baba linyabo, nalwang, Ha fag matawidan im karit, ha fag gafas wan maskin loto wa kati ka aniyon sas baba daga. ¹⁶ Yakanga ka matokawan sas baba linyabo igfasayang wat fangarit a, gafas wat aniyon sas baba daga. ¹⁷ Ginya madi ho nalag sadi yak anghil ka nadokson gis basad Fanimbaan Dahol, san Diyos banwanan sam tongod, ha bitbit yadi sadik karit matayom. ¹⁸ Ginya sadi yak anghil kagbahala has afoy inbangkad gis fanogbaan. Natawag marigon has anghil ka ha bitbit karit matayom, iglwang, Ha fag matawidan im karit, ha fag gani wan ka manga obas gis fagayo fag manga obasan sas baba daga, maskin loto wa kati. ¹⁹ Yakanga ka anghil nafasayang it karit a, naani ka manga obas, naokas has basad dahol fag fanlidan obas. Tonya fag fanlidan obas in Diyos mahori fag kaisogan. ²⁰ Ta nalid ka manga obas sas sokayan banwa hanggan ka folot gis basad fanlidan obas nabaha wan, 400 ik liho it kaayayowan hanggan balis liyog taw it kaabasadan gis baba daga has tongod, sonson wa folot.

¹ Ginya ho nalag sadi yak falagon madolaw sas banwa sam tongod, fitok anghil ha diya fitok kahoriyan has fakaaywanan. Tonya kawa goyan goyan fag manga kahoriyan has fakaaywanan kawan Diyos mahori fag kaisogan imtabo wa balinya. ² Ginya kangko lagan bilang sadik dagat kito was matikyas it kasinayan, ka ha aktom afoy. Ho nalag yadi ka manga nadaog has hayopan maisog, hanggan hat tolad, hanggan hat ngayan nomiro. Ta malindogan sas akbang dagat ka bilang matikyas, ha bitbit in Diyos manga alpa. ³ Ta gambahan in Mwisis, ka ngan Diyos sogowan, it ambahan hanggan ka Anak Topa, it ambahan kiti, Haw Diyos kagfon hyami, haw kadwa ha bosal, Kafiyaon hanggan madolaw wa dahol dahol im manga ibolon. Maslong hanggan orongan im manga ogali Haw noghari has manga dahol fag layonan daga. ⁴ Hyami Fon, fakta fag manga taw idwam tanog hyamo, ha gayfan? Fagayo fag manga taw mamasayagdog kitay haw kafiyaon. Maskin haw sadi lamang ka maliyaw, Manga taw gis fagayo fag dahol fag layonan daga manlibabaan ha hyamo atobangan, Maskin im manga ibolon maslong inlag wan. ⁵ Ginya madi ho nalag ka nafabokod ya domwag fag lingoban sas Fanimbaan Rotay, san Diyos banwanan sam tongod, inboklas wan. Tonya fag lingoban ista fanaranggapan han Diyos hanggan has taw. ⁶ Ka fitok anghil ka ha diya fitok kahoriyan has fakaaywanan nadokson ginya basad lingoban. Ista solong rotay abohay, malinay yadi, ha fagyahos ginto sas boknga dobdob. ⁷ Sadi kanhalig boyagan nadisag has fitok anghil fitok mangkok ginto, napno in Diyos mahori fag kaisogan, ka boyagan fagaba fag Diyos. ⁸ Napno wa anos sas basad lingoban ka nafabokod ya domwag maskin in Diyos kangayanan hanggan karigonan sinya. No baliday idyan tolas ka fitok anghil diya fitok kahoriyan has fakaaywanan, idya twag sakbaw hanyas basad lingoban.

¹ Ginya madi ho nadog sadik hasnog marigon gis basad lingoban sas Fanimbaan Rotay, igsogo ka fitok anghil, iglwang, Sogi, ham fag hanya wan, bohosan ka manga mangkok it sohad, in Diyos mahori fag kaisogan, has baba daga. ² Yakanga ka anghil gona nawatwat ngay kat sohad, kat diya basad mangkok, has baba daga. Yakanga ka manga taw ka ha akwa in hayopan maisog it tanda, hanggan kaglohodan hat tolad, nabangbangan mahori a, masagit ya, baw ya. ³ Ka fadowa fag anghil nabohos yadi kat sohad git basad mangkok has baba dagat. Ka danom inbali folot bilang folot taw mahatayan, hanggan fagayo ka manga boyagan basad dagat natay wan. ⁴ Ka fatolo fag anghil nabohos yadi kat sohad git basad mangkok has manga basad safa, hanggan has manga bolbogan, ginyan bali yadi wa folot sinya. ⁵ Ho nadog ka anghil ka gano has manga danom iglwang, Haw ka maliyaw, ka boyagan kati hanggan ka gis hyabi hyabi, Fakafiyan wan kam naibolon haw nogfatohoyan it fadosaan has taw. ⁶ Maskin kam disagon inomon has taw ka nafaolan in Diyos nafili fag manga taw, it folot, hanggan it manga fangampang folot, Folot mandi kasta inomon. Tonya ka fiya fag fadosa has taw. ⁷ Ginya madi ho nadog to fag manga hampang gis bilog fanogbaan. Haw Diyos kagfon fagayo hanggan kadwa ha bosal, Maanod hanggan orongan wa fakafiyan haw nogfatohoyan has taw it fadosaan. ⁸ Ka faofat fag anghil nabohos has myanit kat diya basad mangkok, ginya ka myanit nafafali was taw afoy. ⁹ Yakanga ka manga taw nafali ngay. Dapat, nyawa kitonya, bohonwa ngap has mangag soyo, mangag fasayagdog in Diyos, ta ngap igfadwat odigdog in Diyos ngayan, ka syagan igfabangkad kitonya fag manga kahoriyan has fakaaywanan. ¹⁰ Ka falima fag anghil nabohos has maisog fag hayopan tokawan fanokawan gorangon, nabohos it sohad git bitbit basad mangkok, ginyan hayopan maisog it banwanan inharom wan. Manga taw kagat it sadili dila kawa kasagit wa dahol. ¹¹ Ta nafadwat yadigdog in Diyos kagfon it banwanan sam tongod, kawa ta nogdog mahori ista manga sagit hanggan manga bangbang. Dapat ay, tadwa yadi nasoyo, tadwa yadi nadayo it manga ogali dwat. ¹² Ka faonom fag anghil nabohos kat sohad git basad diya mangkok, nabohos ha basad dahol fag safa, ka safa Ifratis. Ka danom inmaya, kaarakitay ka manga gorangon gis salogan myanit baliwa ha dalan has basad bintalan. ¹³ Ginya ho nalag tolok dwat dwat fag labang, bilang wa fihaw inbangkad gis basad bibig daragon, gi yadis basad bibig hayopan maisog, hanggan gis basad bibig fangampang bohagon. ¹⁴ To fag manga labang gibolon manga madolaw. Ta somabang has fagayo fag manga gorangon, sadik baba daga, kaarakitay fatifon nangos ka manga gorangon, kawa aban, san Diyos Sirang mahalga, ka Diyos kadwa ha bosal, ta manlabanan wan. ¹⁵ Ham fag matalingan, kito odis fangnahaw aho no kadasog. Ka mafolawan fagaba, kadwag loslos it manga rotay, idwam toon kitay idwa ha solong noglahaw, idwa maya sasta faglagan hanggan hanya bomaya wan. ¹⁶ Ka manga labang nafatifonan ka manga gorangon sa sadik foyo tagngayan Armagidon sas fangampangan Hibriyo. ¹⁷ Ka fafito fag anghil nabohos kat sohad git basad bitbit mangkok, nabohos has boknga halayawan. Ginya madi ha nahampang marigon gis tokawan fanokawan gorangon sas Fanimbaan Dahol, nalwang, In-anod wa kati. ¹⁸ Ginya nahilat ya, nafawas ya, nadalogdog ya, nalinog ya. Marigon marigon fag linog, marigon man ka hyabi fag manga linog gona. ¹⁹ Ka dahol fag banwa insigsig tolok layonan. Kadi tiba fag manga banwa dahol sadik baba daga, fagayo nakfo wan. Ka banwa Babilonya kanbantog kitay gorangon, fawa ha nalfas gin Diyos fadosaan. Yatokitay, is Diyos nafainom it mahori fag kaisogan fag alak ha hanya. ²⁰ Fagayo fag foyo dagat intaklob wan, fagayo fag moyod intanas lamang. ²¹ Nahwayan myasa wa dahol fag lifong yilo, it kahabyatan ka sik lifong, kito was sadik sako fayay, indagdag has taw. Kawa kitonya tagsogat ya ngawan Diyos, maskin to fag kahoriyan has fakaaywanan taw mahori wa dahol dahol.

¹ Ginya madi sadi gis fitok anghil ka ha diya fitok mangkok naakbang angko, nalwang, Ha fag hastay wan, lag ngay, ho falag hyamo ka fadosaan kamtohoyan has ina ka ha kangayanan has fabayowan baliwa. Hanya ka matokawan sat tokawan fanokawan gorangon, sas baba danom safa aywan. ² Ka manga gorangon istay sas baba daga insaya tonya fag ina, hanggan manga taw sas baba daga intahin yadi waglag, bilang yadi wanlango git alak kahayan. ³ Ginya ka Maliyaw fag Falad naboklas angko fangayofan hanggan sadik anghil nafangolo angko ha sadik foyo basad fakahyabogan. Ho nalag sinya sadik ina masahayan baba hayopan maisog, it olad dararag. Ka hayopan ha fitok alfoyo hanggan safolok songay. Ha manga ngayan, fagayo wagsway in Diyos, masoratan sas boknga habilogan hayopan. ⁴ Ka ina solong rotay ha dararag, ha akwa yadi bilang obi dongon it kahasdingan. It manga dayag manga ginto, manga bato fiya kabantay, hanggan manga ono bolawan. Ka ina ha bitbit sadik fanginoman ginto napno ka manga dwat fag ogali, hanggan wa ngap ka mahaya kawa nogfabayowan. ⁵ Sadik ngayan, mafyaloman yapdit kahologan, insorat sat boknga angas, kiti, Ka gorangon fag banwa Babilonya tonya wa ka bilang wasta ina has mangag fabayowan hanggan fagayo fag mahaya donggon sas baba daga, sinya wa fagayo. ⁶ Ho nalag yadi kitay tonya fag ina bilang wanlango gin Diyos manga nafili, it folot, kawasta nafahatay maskin tagfaorongan kawa han Hisos. Ho no nalag ka ina, hondolaw wa dahol dahol. ⁷ Dapat ay, ka anghil naintaw angko kitay, Kana mayon haw no kadolaw? Ho fomwayong hyamo it kahologan ka ina hanggan it nagsahayan hayopan, ka fito it alfoyo hanggan safolo it songay. ⁸ Kam lagan hayopan maisog boyagan hyabi, dapat kati natay wan, dapat ay, aban imbangkad ya gis basad ohang kadwa ha saragan, ginya hawas kadwatan. Ka manga taw boyagan yapdi sas baba daga, kat manga ngayan, gi yapdis kabali daga, idwan sorat sas listahan manga taw ka ha haboyagan, ta no lomag ka hayopan maisog, tamlipto wan, maskin ha nafahatay tonya hyabi, dapat ay imbangkad ya aban. ⁹ Ka fiya ka manga madonong fag twagdog. Ka fitok alfoyo kawa fitok fongso ka ina fanokawan. Ka fitok fongso igfahalimbawa fitok gorangon. ¹⁰ Indaog wa ka lima, sadi ya kan-goyan ha kangayanan yapdi, ka fafito idyan dasog. Hanya nomdasog, ngalay odi it kangayanan. ¹¹ Hanggan ka hayopan maisog, ka boyagan hyabi, dapat kati idwa akwa, kambali ka fawalo fag gorangon aban, dapat ay, tomobos ka sadi gis fito. It hadasogan hawas kadwatan aban. ¹² Kam lagan safolok songay kawa safolok gorangon kadya ha nagdogan kangayanan, dapat aban ta mangoyogan has hayopan maisog no mamahala balis manga dowak tama sinyahod it kadogayan. ¹³ To fag safolok gorangon insadi it fangayofan hanggan mamasakop it kadonongan hanggan kangayanan has hayopan maisog. ¹⁴ Ta lomaban has Anak Topa, dapat ay, ka Anak Topa domaog di tonya maskin hanya ka Fon has manga fon, hanggan Hari has manga gorangon. Ka Anak Topa manga nafatawag, manga nafili, hanggan kadwag fagomon katanog hanya, gofodan yadi has Anak Topa nogdaog has taw. ¹⁵ Ginya ka anghil nafwayong ya domwag angko, Ka hyamo lagan danom, ka ina nagtokawan, kawa manga banwa, manga fakaaywanan taw, manga layonan daga dahol, hanggan manga sanglitan taw. ¹⁶ Kam lagan safolok songay, hanggan ka hayopan maisog, omisog aban has ina ka ha kangayanan has fabayowan baliwa. Ta homagaw it manga sangkap fagayo fagayo, ta lomobas wa a, omobon wa malobasan. Ta homwan wat manga faknol a, ta somonog wa kansawad. ¹⁷ Is Diyos igfaangay wa kitay, ta fag kasadi it fangayofan hanggan fasakop ista kangayanan hanggan kadonongan has hayopan maisog, hanggan wamtonglos in Diyos manga hampang. ¹⁸ Kam lagan ina kawa ka gorangon fag banwa kagfasognod has manga gorangon istay is baba daga.

¹ Ginya madi ho nalag sadi yak anghil ka ha kadonongan dahol, igdokson gin Diyos banwanan sam tongod. It kasinayan igyawa wa sadik baba daga. ² Igrokyaw di kamin wan, iglwang, Ka gorangon fag banwa Babilonya intodtolagan wan, intodtolagan wan. Kati manga odi oliyanan labang sinya. Inbali odi porisowan labang, manga manok sitam sitam kagfogad sinya. ³ Maskin hanya nafainom has fagayo fag dahol fag layonan daga, it alak kawat ogali dwat has ka taw. Ka manga gorangon sas baba daga insaya hanya, hanggan aywan inbali maakwa noglag it fangaboyagon gis Babilonya manga ogali mahaya. ⁴ Ginya madi ho nadog sadi yak hasnog gin Diyos banwanan sam tongod kaglwang, Ham kangko sakop, ham fag danwag lagyo, Ham fag idwam aktom hat manga ogali dwat Kaarakitay ham idwa yadim aktom has taw ta nomdosa. ⁵ It manga ogali dwat digtarongbawan wan hanggan wagdasog ham tongod is banwa. Is Diyos fawag liyam it manga naogali dwat. ⁶ No kinday kat naibolon has taw, ham fag ganti yadi kitonya. Ham fag ganti, igfaparihowan wan kat naibolon ha hayo, Ham fahapnowan wat ongot fanginoman, Fag mayat man kat nadisag ha hayo. ⁷ No kinday ka banwa Babilonya nogfadaholon it sadili, hanggan fagaba has kasolongan, Ham fag fatakagdog yadi hanya, hanggan fag fahori yadig dog hanya, Maskin it fangayofan fagabag lwang, Aho ka ina ha kangayanan, ista gorangon. Aho bohonwa ina balo, Nyawa ginahin ahodwa lomag kahoriyan ⁸ Nyawa ka banwa Babilonya iglwang kitonya, yatokitay igsohodan wa kadasog gis nanya fag sirang ka manga kahoriyan Manga sagit, tamrongkot yadi kawa ha natay, hanggan wamlonos, Imsogba wa has basad afoy, hanggan wamyagaw. Maskin is Diyos kagfon intam marigon kagfatohoyan ista fadosaan. ⁹ Ka manga gorangon istay is baba daga, kansaya hanya hanggan kansolong sat akbang omoraw wan. Ta nogbantay ka banwa ganos wan, kasonog wan, ¹⁰ ta lomindog wa sas ayayo maskin ta kadala kitay, ta ngandayom lafit yadi kat kahoriyan. Ta lomwang, Liwas liwas, manga dowa lamang ik tama sinyahod in-anod wan ka madala has gorangon fag banwa Babilonya. ¹¹ Kawa kitonya ka manga nalag it fangaboyagon ginya, istay is baba daga, omoraw a, imrongkot yadi wa dahol maskin idyadi wa ha manali ista manga fagfasaliyon. ¹² Idwa ha manali ista balidya ginto, pilak, manga bato fiya kabantay, hanggan ono bolawan, manga rotay kadya mahaligan, manga rotay dararag hanggan bilang obi dongon it kahasdingan, hanggan fagayo fag hayo banglo, ista sangkap manga fangil, kawa manga hayo fiya, manga tanso, manga baol, manga bato marmol, ¹³ manga haningay, manga famabanglo ofi, kasta fagsonogon banglo mira, hanggan kamangyan, manga alak, langis, harina, manga tirigo, manga baka, manga topa, manga habayo, hanggan wat kalisa, manga fasaliyon sogowan, nyawa hanggan wasta fangayofan hanggan wa habilogan. Idwa ha somali domwag. ¹⁴ Ka mangag lag it fangaboyagon ginya fag banwa lomwang hanya, Namin wan ka manga bagay fiya kam fakasayaon. Hadwa ha lagon domwag im kaakwaan fagayo, hanggan hyamo kafiyan inliyam yadi wan. ¹⁵ Ka manga nalag it fangaboyagon kawag fasali tonya fag manga bagay, hanggan inbali maakwa ginya fag banwa, tadwa omakbang domwag, kawa ta kadala kitay ta ngan yadim lafit has mahori. Ta omoraw wan hanggan imrongkot wa dahol. ¹⁶ Ta lomwang, Liwas liwas, tonya fag banwa gorangon no kana mayon nonsonog. Hyabi it solong rotay myasa wa fiya fag manga rotay dararag, manga obi dongon it kahasdingan, Manga ginto, manga bato fiya kabantay hanggan ono bolawan it manga dayag. ¹⁷ Manga dowa lamang ik tama sinyahod inliyam wa tonya fagayo. Ka manga kapitan sahayan baba dagat, hanggan it manga sahay, it manga bantay sas basad sahayan nabantay yadi gis ayayo, hanggan fagayo kaglag it fangaboyagon sas baba dagat, ¹⁸ ngadit anos ta nabantay, ta godgorawan wan ta noglag kitay ka banwa kasonog wa yabay. Taglwang, Idwa ha natolad it kafiyan tonya fag banwa gorangon. ¹⁹ Ta nafwalid fogis sat sadili baba alfoyo, kawa no ha fakahoriyon. Taglwang, Isyay wa isyay wan ka gorangon fag banwa nadalanan. Fagayo fag sahayan kagtorosan hat fangadagsaan kabali wa maakwa haraw, no kitay di. Dapat ay, manga dowa odik tama sinyahod inliyam yadi wan it kafiyan hanggan kaakwaan. ²⁰ Dapat ay, kati, haw in Diyos banwanan sam tongod, fag kasolong wan, kawa tonya fag banwa insonog wan. Ham in Diyos manga nafili, ka manga gona fag Fandiya-Barita, hanggan manga fangampang, ham fag kasolong yadi maskin kati is Diyos nafatohoyan ista fadosaan kawasta naibolon dwat ha hayo. ²¹ Ginya sadik anghil marigon nabol sadik bato bilang dahol fag gilingan. Hanggan ya ngadi ha karigonan no ganggong ka bato, naokas has basad dagat, igsohodan wagrokyaw iglwang, Kitoy ka banwa Babilonya nomdwat aban, Hadwa aba ha lagon domwag. ²² Hadwa aba ha dogon domwag ista manga hasnog garambahanan, Hadyadi wa ha dogon sinya aban manga kaskas alpa, mangag faon manga palawta, manga bodyong. Hadwa ha lagon aban sa hyamo, nyawa kana fag kadonongan has fangalig baliwa. Hadyadi wa ha dogon aban manga gilingan igrabog. ²³ Idwa ha somantik ngadi sadik salong is nyamo, Hadwa aba ha dogon domwag masolong fag manga hasnog kagbabay hanggan gindogan no hawat fangsawan. Maskin hyamo fangaboyagon hyabi inbali marigon sadik baba daga gi hyamo fagfasaliyon. Haw nadaya fagayo fag manga taw sadik baba daga maskin haw nafasayagdog has fagayo in Satanas kadonongan. ²⁴ Inlag sas ina in Diyos manga fangampang folot, in Diyos manga nafili it folot, hanggan fagayo kasta nafahatay istay is baba daga.

¹ Ginya madi ho nadog kaaywanon fag manga taw sas banwa sam tongod, it manga hasnog inbali bilang di sadi ta no gambahan kiti, Tam fag fasayagdog kagfon intam Is Diyos lamang ka ha kafiyan, ka ha kadonongan hanggan igbawi intam. ² Orongan wa fakafiyan hanya nogfatohoyan ista fadosaan. Nafadosa ka ina ka ha kangayanan has hayan baliwa, Kagfadwat manga taw istay is baba daga kawat ogali nogfabayowan. Is Diyos nafadosa hanya maskin kawa nogfahatay intam Fon manga fangibolon. ³ Ta nangarambahanan ya domwag kitay, Fag fasayagdog kagfon intam. Sinya dik ganos ganos ham tongod, idwa kapsa sadi wak kaban ya, ka gorangon fag banwa no kasonog. ⁴ Ka dowak safolo ha ofat ik fagtahinan hanggan ka ofat kanhalig boyagan nanlibabaan a, nafasayagdog in Diyos, ka matokawan sas tokawan fanokawan gorangon, nalwang, Fadi wan, fag kitonya wa ngay. Fag fasayagdog kagfon intam. ⁵ Ha nahampang gis tokawan fanokawan gorangon iglwang, Ham fagayo fagayo in Diyos manga fangibolon Nyawa ka ha kangayanan, Nyawa kadwa ha kangayanan, ham ka manga katanog it fwayong, ham fag fasayagdog intam Diyos. ⁶ Ho dagos wa nadog kasta manga hasnog kaaywanon fag manga taw kanbali bilang sadi dik hasnog, bilang wa tarapsakan danom gis tongod tiwan, no gambahan kito was dalogdog ganingalan wan, fiya wa donggon. Taglwang, Tam fag fasayagdog hanya maskin intam Diyos hanggan kagfon intam kadwa ha bosal, inbali wa hari. ⁷ Tam fag baya, fag kasolong wan. Tam fag fasayagdog in Diyos kadaholan, Maskin ka Anak Topa kaakbang wa kababay. It fakasayaon ina nandayagan, ⁸ nasolong rotay kaabohayon, malinay ya ngadi. Ka rotay abohay kawan Diyos manga nafili it manga naogali fiya. ⁹ Ginya ka anghil nafwayong angko, Soratan to, Kasta manga nasabang kaarakitay omofod yadi has Anak Topa nafatalaga fanganon has fangsawan, bomaya wan. Nadogang yat hampang, nalwang kitay, To orongan wan in Diyos manga hampang. ¹⁰ Ginya ho nanlibabaan san anghil atobangan kaarakitay mamasayagdog hanya, dapat hanya nalwang hangko, Fag idwa hangko haw nogfasayagdog, aho it sogowan yadi, kito yadi hyamo, hanggan kito kam manga fadwasay kagfaorongan kawa han Hisos. Fag is Diyos ka hyamo fagfasayaon igdog. Maskin ka fakaoronganan sawan Hisos hanggan fagayo in Diyos manga fangampang nafwayong hanggan nasorat, sinya wa kan-anod san Hisos. ¹¹ Ginya madi ho nalag kitay in Diyos banwanan sam tongod maboklasan wan. Ginya ho nalag sadik habayo abohay. Ka masahayan sinya it ngayan is Matanogon, hanggan is Orongan maskin sawas fakafiyan hanya noglaban hanggan nogfatohoyan ista fadosaan. ¹² It manga mata bilang wa afoy gigang. Aywan kasta nafasangbaw hat baba alfoyo. It ngayan insorat yadi sat boknga habilogan, dapat hanya lamang ka twa no kanat ngayan kansorat sinya. ¹³ It rotay di foloton wan. Manga taw igngayan hanya in Diyos Hampang. ¹⁴ Ka manga tifonan sondalo gin Diyos banwanan sam tongod gofod hanya sat ginanan, masahayan yadi sas baba manga habayo abohay. Ista manga rotay myasa wa abohay, malinay ya ngadi. ¹⁵ Sadik talibong matayom inbangkad yadi git basad bibig, it fanlaban has manga layonan daga dahol. Hanya no bomahala has taw it karigonan gamat bilang wa baol. Hanya fabolos gis fanlidan obas ka alak gin Diyos, kadwa ha bosal, kawan Diyos mahori fag kaisogan. ¹⁶ Insorat sat manga rotay hanggan boknga balangbang ka ngayan, Hari has fagayo fag manga gorangon, hanggan Fon has manga fon. ¹⁷ Ho nalag yadi sadik anghil malindogan sas baba myanit. Ka anghil igtawag ka manga manok kaglayog sas boknga halayawan iglwang, Ham fag hastay, ham fag kabangkad han Diyos dahol fag talagaan fanganon. ¹⁸ Ham fag hastay wan, kaarakitay homwan ka manga gorangon it manga habilogan, manga sondalo, hanggan wat manga fagtahinan, ka manga habayo hanggan ka manga masahayan haraw sinya. Ham hwan wan ista habilogan fagayo fag manga taw, nyawa kasta sogowan, nyawa ka bohonwan, nyawa kadwa ha kangayanan, nyawa ka ha kangayanan. ¹⁹ Ginya madi ho nalag ka hayopan maisog, ka mandi ka ha baran kanfakdat wan, hanggan ka manga gorangon istay is baba daga, hanggan wat manga ofod sondalo intifon ya, kaarakitay lomaban ka masahayan baba habayo abohay, hanggan hat manga ofod sondalo. ²⁰ Dapat ay, ta nagamat ka hayopan maisog. Ta nagamat yadi ka fangampang bohagon ka naibolon manga madolaw sas hayopan maisog faglagan. It manga naibolon madolaw kat fandaya has manga taw, ka manga taw ka ha akwa ka maisog fag hayopan tanda hanggan kaglohod hat tolad. To fagayo dowa in-okas boyagan has basad linaw asopri gigang. ²¹ Ka masahayan baba habayo it talibong ka famahatay ka hayopan maisog manga sondalo. Ka manga manok fadi wad nahwan, idyadi wa namin ista manga habilogan ka natay.

¹ Ginya madi ho nalag sadik anghil igdokson gin Diyos banwanan sam tongod ha bitbit kadina dahol hanggan sosi has ohang idwa ha saragan. ² Ka anghil nagamat ka daragon, ka yapdista nangayan Abyanon hyabi hyabi, kawas Fandaya, it ngayan is Satanas. Ka anghil nagafos hanya, ginya madi is Satanas magafosan 1,000 fangaraw. ³ Ginya madi ka anghil naokas hanya hawas basad ohang daga kadwa ha saragan, ginya madi natahop a, nafwalid tanda sas boknga faganitan sosi kaarakitay idwa malfas, idwa syagan domaya domwag ka manga taw istay sas baba daga nodyam sagaya 1,000 fangaraw. Nomsagaya tonya fag 1,000 fangaraw, ta fag fomalfas ya in Satanas sadik ngalay. ⁴ Ginya madi ho nalag manga tokawan fanokawan gorangon hanggan ha nadisag ka manga matokawan sinya kangayanan. Ho nalag yadi kasta falad kasta nalifong hyabi it manga liyog, kawa nogfaorongan han Hisos hanggan igfadog in Diyos hampang. Tadwa nalohod has hayopan maisog, nyawa hat tolad. Tadwa yadi nafaangay kitay fag ha tanda gis maisog fag hayopan sasta boknga angas, ngatay boknga gamat. Is Diyos nafaboyag ya tonya fag manga taw kaarakitay gofod in Kiristo ha kangayanan balis 1,000 fangaraw it kadogayan. ⁵ To ka manga gona fag natay kanboyag ya gis kahatayan. Is Diyos faboyag ya yadi aban ka tiba fag manga natay, nomsagaya 1,000 fangaraw. ⁶ Maliyaw ka mangan aktom has manga gona fag imboyag ya gis kahatayan maliyaw, hanggan ta bomaya yadi wan. Ka fadowa fag kahatayan idwa syagan domaog tonya fag manga taw. Tambali in Diyos manga fagalan hanggan in Diyos-natogon-Famawi it manga fagalan, ta mangofodan yadi han Kiristo, bomahala has taw balis 1,000 fangaraw. ⁷ Nonsagaya 1,000 fangaraw, ta fomalfas ya in Satanas. ⁸ Hanya domaya ya ka manga taw istay is baba daga, kawa ka taga Gog hanggan Magog it fagdayaon sas ofat ik fongfongan daga manga layonan banwanan. Is Satanas tomifon it manga sakop kaarakitay lomaban wan. In Satanas ofod sondalo kayowas onay dagat. ⁹ Ta nanarowayan wan ha sadik baba daga a, naligong in Diyos manga nafili nahalig alad fanaktak ista kalaban, naligong yadi in Diyos faganoon banwa. Dapat ay, ha akwa afoy inbangkad gin Diyos banwanan sam tongod a, nafayagaw was taw. ¹⁰ Ginya madis Fandaya kagdaya has taw in-okas wan, hawas basad linaw afoy hanggan asopri, hayadin anghil nagokasan in hayopan maisog, hanggan ka manga fangampang bohagon. Ta fagayo mangofodan wan domog mahori yabi sirang, hanggan aban aban. ¹¹ Ginya madi ho nalag sadik dahol fag tokawan fanokawan gorangon abohay, ho nalag yadi ka matokawan sinya. Ka daga hanggan ka banwa sam tongod inliyam wa kitonya git faglagan ka matokawan sinya, idwa hanlag domwag. ¹² Ginya madi ho nalag ka manga natay hyabi, nyawa ka manga ha kangayanan, nyawa kadwa ha kangayanan, malindogan sas tokawan fanokawan gorangon akbang. Ta naboklas ka manga listahan. Naboklas yadi ka sadi yak listahan, ka listahan manga taw ka ha haboyagan. Ginya ta no nafatohoyan ista hadasogan ka manga natay, kawasta manga naogali, no kinda kansorat sas listahan. ¹³ Ka dagat nafabangkad ya ka manga natay sas basad dagat. Ka kahatayan hanggan ka Daga Salad nafabangkad ya ka manga natay ka sinya. Kitonya yadi ta no nafatohoyan ista hadasogan kawasta manga naogali. ¹⁴ Ginya madi ka kahatayan hanggan ka Daga Salad in-okas ha basad linaw afoy. To fag linaw afoy kawat fadowa fag kahatayan. ¹⁵ Nyawa faktaw kat ngayan kadwan sorat sas listahan manga taw ka ha haboyagan, ta naokas wan ha basad linaw afoy.

¹ Ginya madi ho nalag ka bago fag banwa sam tongod, hanggan ka bago fag daga. Ka gona fag banwa hanggan daga inliyam wan. Ka dagat fayadi wa ha akwa. ² Ho nalag yadi ka banwa kantohoyan han Diyos wa malayon, kawa bago fag Hirosalim, kadokson gis banwa sam tongod, giwan Diyos, kitos sadik ina kaginan wa hat fangsawan, nandayagan wan, kawa managbo wan kat fakasayaon ama ka bomabay hanya. ³ Ho ha donggon sadik hasnog marigon gis tokawan fanokawan gorangon, nalwang, Kati in Diyos oliyanan sawas manga taw fagbokngan. Is Diyos bomanwanan sasta akbang, gofodan yadi was taw, tambali in Diyos wa sakop fag manga taw, hanyam bali wasta Diyos. ⁴ Is Diyos fomyad ista manga lowa fagayo. Idwa ha kahatayan domwag, yakanga idwa karongkot ista fangayofan. Idwa ha fagorawon, idwa yadi kasagit, kawa ka manga bagay gona inliyam wan. ⁵ Ginya madi ka matokawan sas baba tokawan fanokawan gorangon nalwang kitay, Kati ahog fabago ya fagayo fag manga bagay. Nafwayong ya domwag angko, Ha fag sorat to fag manga hampang maskin fiya wa fagsyagon, orongan yadi wan. ⁶ Nafwayong yadingko, Kati in-anod wa fagayo. Ahos Alfa hanggan ahos Omiga, aho ka fabagowanan hanggan ka katabowanan. Nyawa faktaw ka kainom, ho domisag danom kadwa ha bayad, gis bolbogan kagdisag haboyagan. ⁷ Kagdaog has kadwatan, tonya wat tanggapon, hanggan ahom bali wat Diyos, hanyam bali yadi wangko anak. ⁸ Dapat ay, isyay wan, mahori wa dahol ista lagon aban ka manga madalaon wa dahol dahol, ka mangadwa katiwala, ka manga fagaba has sitam sitam it ogali, ka mangag libon taw, ka mangag fabayowan, ka ha fagsyagon gis iba kadonongan, kagsimba has manga tolad, hanggan fagayo ka manga bohagon. Tonya fag manga taw fagayo hawas linaw asopri, igang digrabog wan. Tonya wa kat fadowa fag kahatayan. ⁹ Kat fafito fag anghil ka ha bitbit yadi sadik finggan mangkok, kawat fafito fag kahoriyan has manga taw, naakbang hangko, nalwang, Ha fag hastay, ho falag hyamo ka ina ka omindogan has Anak Topa. ¹⁰ Ka Maliyaw fag Falad naboklas angko fangayofan, ginya sadik anghil nataban angko ha sadik baba moyod abwat abwat, nafalag angko ka banwa Hirosalim, ka banwa kanbokod han Diyos, kadokson gis banwa sam tongod, giwan Diyos. ¹¹ In Diyos kafiyan fagayo sinya wan. Masilaw wan kitos bato haspi, kitos manga matikyas maliyaw wa dahol. ¹² It alad madamol a, abwat. It sakbawan safolo ha dowa, talafod sakbawan ha bantay anghil. In Israil manga hasokfonan safolo ha dowa it manga ngayan insorat sas boknga manga tahop sakbawan. ¹³ Tolo ka balis salogan myanit, myasa wa tolo baliw baliw balitangan, tolo yadi balis sangdayan myanit. ¹⁴ Ka alad ha safolo ha dowak torok bato it fagrigonan, hanggan ka Anak Topa it safolo ha dowak Fandiya-Barita ka gona man tiba, ista manga ngayan insorat sinyas boknga torok bato. ¹⁵ Ka anghil ka kampang hangko ha bitbit fanokat ginto kaarakitay somokat ka banwa, it manga tahop sakbawan hanggan it alad. ¹⁶ Myasa kaban ya ka banwa kadaholan hanggan it kaaban. Ka anghil nasokat ka banwa. It kaaban hanggan it kadaholan hanggan it kaabwatan myasa wa dahonya, 24,000 ik liho. ¹⁷ Ka anghil nasokat yadi ka alad, ofat ik safolo h sadik dofa it kaabwatan, ka anghil nogsokat it diya fanokat. ¹⁸ Ka alad bato haspi wan, ka banwa sonson wa ginto idwa ha aktom iba, maliyaw wa kitos salamin. ¹⁹ Ha akwa fagayo fagayo fag manga bato ka fiya kabantay, matokban sas torok bato ka fagrigonan alad. Ka gona fag bato kawa haspi, malatoy fag bato ha aktom bilang ginto, ka fadowa sapiro, malatoy fag bato, maliyaw yadi, kat fatolo kalsidonya, malatoy fag bato dapat masinay, kat faofat ismiralda, sadik bato malatoy wa dahol dahol. ²⁰ Kat falima, onisi, sadik bato igsoglatan sayo dararag, sayo abohay, kat faonom, kornalina, sadik bato boragaw boragaw, kat fafito, kirisolito, sadik bato bilang wa loto soli it kadararagan. It fawalo birilo, kitos dagat it kahasdingan, it fasiyam topasyo, boragaw wa dahol dahol, kat fasafolo kirisopiraso, sadik bato bilang wa kaliboyong it kalatoyan. It fasafolo ha sadi, hasinto, sadik bato bilang wa obi dongon it kahasdingan, ginya madit fasafolo ha dowa, amatista, sadik bato bilang obi dongon yadit kahasdingan. ²¹ Ka safolo ha dowak fanahop sakbawan sonson inhalig gis basad boga sihi. Gi sadik boga sihi ka sadik fanahop nonhalig. Ka manga karsada basad banwa inhalig ginto wa malayon, maliyaw wan, kitos salamin. ²² Hodwa ha lagan Fanimbaan-Dahol sinya fag banwa, maskin is Diyos kadwa ha bosal, kagfon intam, hanggan ka Anak Topa, tonya wa ka Fanimbaan-Dahol sinya. ²³ Tam fawa ha fakasayaon manga magdanon, manga myanit kitay igfayawa tonya fag banwa, maskin in Diyos kafiyan kagfayawa sinya hanggan ka Anak Topa intam wa salong. ²⁴ Tonya fag yawa kagfayawa has fagayo fag manga dahol fag layonan daga ka manga taw noglahaw sinya. Hanggan ka manga gorangon sas baba daga domiya yadi sinya basad banwa, it manga kaakwaan. ²⁵ Ka manga fanahop sakbawan banwa maboklasan fagaba sadi wak sirangan maskin fawa ha yabi sinya. ²⁶ Ta domiya ka kaakwaan hanggan kangayanan gis fagayo fag manga dahol fag layonan daga hanya basad banwa. ²⁷ Dapat ay, nyawa kana ka sitam san Diyos faglagan, hanggan kasta manga ogali mahaya kalag, hanggan ka manga bohagon idwa somakbaw sinya. Ka lamang ista manga ngayan kansorat san Anak Topa listahan ka manga taw ka ha haboyagan ka somakbaw sinya fag banwa.

¹ Ginya madi ka anghil nafalag angko sadik safa kagdisag haboyagan. Tonya fag danom maliyaw kito was matikyas, igbolbogan gin Diyos hanggan ka Anak Topa tokawan fanokawan gorangon. ² Ginya madi igbolos has boknga manga karsada sinya basad banwa. Bali bali safa ha fon hayo kagdisag haboyagan. Magdanon di magdanon di igbohad wan. It manga labong igfiya yadi sagit sas manga dahol fag layonan daga. ³ Hadwa ha lagon sinya nyawa kana kan Diyos nafatohoyan has kadwatan. Dapat ay, kam lagon sinya aban in Diyos hanggan ka Anak Topa tokawan fanokawan gorangon hanggan it manga fangibolon mamasayagdog hanya. ⁴ In Diyos manga fangibolon lomag wa aba in Diyos mata, in Diyos ngayan imsorat yadi wa aba sasta manga boknga angas. ⁵ Idwa ha yabi domwag, tadwa ha fakasayaon manga salong, manga yawa gis myanit, maskin kawas Diyos kagfon intam imbali wasta yawa hanggan tambali ha kangayanan igbahala hanggan has aban aban. ⁶ Ginya madi ka anghil nalwang hangko, To fag manga hampang fiya wa fagsyagon, orongan yadi wan. Is Diyos kagfon intam ka nafaisip it manga fangampang, hanya yadi ka nasogo it anghil kaarakitay fadog hat manga fangibolon ka manga bagay ka kaakbang wamlag aban. ⁷ Is Hisos iglwang, Ham fag danwa matalingan, ho kaakbang wa kadasog. Kagfaanod ka manga nagona wa nafwayong istay fag famasaan bomaya wan. ⁸ Ahos Hwan ka nadog hanggan nalag to fag manga bagay fagayo. Aho, nonsagaya wagtalinga hanggan igbantay has fagayo, ho nanlibabaan san anghil akbang, ka nafalag angko to fag manga bagay kaarakitay mamasayagdog hanya. ⁹ Dapat ay, ka anghil nalwang, Balaw kitonya, ahot sogowan di kito yadi hyamo, kito yadi wam manga fadwasay fangampang hanggan kito yadis fagayo kagfaanod ka manga hampang kansorat istay fag famasaan. Fag is Diyos ka hyamo fagfasayaon igdog. ¹⁰ Ka anghil nafwayong yadingko, Haw fag idwag fyalom kansorat istay fag famasaan kamlag aban, maskin to fag manga bagay kaakbang wamtonglos. ¹¹ Ka dwat igfadagos has dwat, ka has hayan igfadagos has hayan. Dapat ay ka has fiya igfadagos wa has fiya, hanggan ka maliyaw it fangayofan igfadagos wa maliyaw yapdi. ¹² Is Hisos iglwang kitay, Ham fag danwa matalingan, ho kaakbang wa kadasog. Ho danwa ha diya manga fasalamat, ho fahafod wa domisag ha sadi ha sadi kawasta naogali. ¹³ Ahos Alfa hanggan is Omiga. Aho ka nagona hanggan kamgoyan. Aho ka fabagowanan hanggan ka katabowanan. ¹⁴ Ka mangag falinay it manga rotay bomaya wan maskin is Diyos igfaangay kitay ta fag somakbaw has nwa basad banwa, homwan yadi ka bohad hayo kagdisag haboyagan. ¹⁵ Dapat ay, imgoyan di sas dayo banwa ka manga taw it ogali bilang odi ido, ka manga ha fagsyagon gis iba kadonongan, mangag fabayowan, ka mangag libon taw, ka mangag lohod has manga tolad, ka manga bohagon it manga hampang hanggan ogali. ¹⁶ Ahos Hisos ka nasogo angko anghil kaarakitay fadog to fag manga bagay ha hayo, ka sawas manga Tifonan. Aho gin Dabid hasokfonan. Aho ka faramnag dayo kayawa. ¹⁷ In Diyos Maliyaw fag Falad hanggan ka ina ka kaakbang kaindogan iglwang, Fag hastay wan. Fagayo kagtalinga tonya fag manga hampang iglwang yadi, Ham fag hastay wan. Nyawa faktaw ka kainom, ham fag danwa gakbang, ka kasaya wan, fag danwag bol ka danom kagdisag haboyagan, todwa ha fagbayadon. ¹⁸ Ahos Hwan kagfatagak has manga taw kitay, nyawa faktaw kagtalinga kansorat istay fag famasaan, ka manga bagay kamlag aban, dapat igfalabi kat nafwayong istay fag famasaan, nogtoltol is taw, is Diyos domogang yadi hanya ka manga kahoriyan has taw kansorat istay. ¹⁹ Kitonya yadi, nyawa faktaw nogbohin nyawa kana fag bagay kansorat istay, manga bagay kamlag aban, is Diyos bomol yadit ngayan gis listahan ka manga fiya homwan ka bohad hayo kagdisag haboyagan, hanggan bomohin it ngayan gis listahan ka maangay somakbaw has banwanan kanbokod han Diyos kanowas istay fag famasaan. ²⁰ Kagfaorongan to fag manga bagay fagayo iglwang, Matohoyanan ho kaakbang wa kadasog. Fadi wan, fag kitonya wa ngay, Hisos, kagfon hyami, fag imdasog wa ngay hastay. ²¹ Ham nangos fag domog kitay is Kiristo Hisos kagfon intam mahoway ha hayo fagayo. Fag kitonya wa ngay.