FILIPOS

FILIPOS

¹ Ahos Pablo kagsorat has fagayo fag manga taw kantohoyan han Diyos sas banwa Filipos, hanggan has manga fagtahinan, manga fangibolon san Diyos Tifonan. To fag sorat gi yadin Timotiyo. Hami da Timotiyo, mi pariho in Kiristo Hisos nasali manga sogowan. ² Ham nangos fag domog kitay, is Diyos intam Ama hanggan is Kiristo Hisos kagfon intam mahoway ha hayo fagaba, hanggan igfalokmay hayo manga fangayofan. ³ Nyawa ginahin aho nogtohod hayo, hogbaya in Diyos, kangko fagsyagon. ⁴ Hanggan nyawa ginahin aho nogdarangin kawa ha hayo, aho kasolong wan, ⁵ maskin hogtohod no kinday ham natogbong angko igfadog ka Fiya fag Barita has taw, gi yapdis hyabi gis nanya fag sirang tam no bago di nanladlagan hanggan wa kati. ⁶ Yakanga, ho twa matohoyanan kitay is Diyos, ka nafabago gibolon kitonyak fiya sa hayo manga fangayofan, hanya fadagos yapdi gibolon hanggan wamtabo it fakasayaon, gis nanya fag sirang is Kiristo Hisos nombangkad ya hastay. ⁷ Hogtohod hayo fagaba, yakanga maangay aho nogbaya kawa ha hayo, maskin ham fagayo igtogbong angko, aho nogfatonglos in Diyos nadisag angko to fag ibolonon malayonan. Nyawa hyabi aho no syagan yapdig sabang has iba banwanan, hanggan wa kati, aho no maporisowan, ham igtogbong yapdingko. ⁸ Is Diyos twag faorongan kitay ahodwag bohag aho noglwang kitay, aho kito yadin Kiristo Hisos no galwasi hayo. ⁹ Hogdarangin han Diyos kitay, ham fag fadagos kalabi wan no gadgalwasiyan, kaarakitay ham imdonong orongan hanggan twag fatohoyan no kana ka fiya. ¹⁰ Ginya madi ham twag fili no kana ka fiya man has fagayo fag manga ogali. No kitonya ham idwa ha aktom dwat sa hayo manga fangayofan, hanggan tadwa ha fagsogaton hayo gis nanya fag sirang aban is Kiristo nombangkad ya. ¹¹ Hayo manga ogali imbali sonson wa maangay orongan, kawas Kiristo Hisos lamang ka syagan igfabali hayo kitonya, kaarakitay manga taw mamasayagdog in Diyos kafiyan. ¹² Ho kasaya kitay ham, angko manga fadwasay, ham fag tomwa kitay kangko manga nadalanan natogbong hasagfahaskat ka Fiya fag Barita. ¹³ Kawangko manga nadalanan, ka manga sondalo kagbantay sas balay gorangon, hanggan ka manga tiba taw istay, ta fagayo natwa kitay ahon poriso kawa aho in Kiristo wa sogowan. ¹⁴ Hanggan ka fakaaywanan fag manga fadwasay labi wanrigon nogsyag hantam Fon, yakanga, labi man inrigon yadig barita in Diyos hampang, idwa ha madala. ¹⁵ Anod ngay, tiba nogbarita kawa han Kiristo, kaingli odingko, kasaya odig daraogan sas hampang, dapat ay, tiba nogbarita kafiyaon it fakasayaon. ¹⁶ Ka manga fiya it fakasayaon igbarita kawa ta galwasingko, maskin ta natwa wagdog kitay, ahon poriso kawa ahog fadahit kitay ka Fiya fag Barita orongan wan. ¹⁷ Dapat ka tiba fag manga taw nogbarita kawa han Kiristo, idwa sonson wa fiya ista fakasayaon. Ta kasaya nangos, fag hanya kambantog, hanggan ta gayfan ta falabi wangko kahoriyan aho no maporisowan istay kati. ¹⁸ Nyawa kindawan, hodwa kahori, hogbaya wa ngap. Ka fiya is Kiristo fag imbarita wa ngay, nyawa dwat, nyawa fiya kasta fakasayaon ta nogbarita. Hogfadagos yapdi kasolong, ¹⁹ maskin hogsyag kitay aho aba malfas ya gistay maskin ham igdarangin kawangko, hanggan in Kiristo Hisos Falad igtogbong yadi. ²⁰ Angko fakasayaon bondi kito ka tiba, aho fag fatonglos fiya fiya angko bato ibolonon, hanggan nyawa ginahin, aho fag idwa madalaon, dapat labi man kati, kaarakitay manga taw noglag angko manga ogali fagayo, ta mamasayagdog in Diyos, nyawa aho boyagan yapdi, nyawa ta fahatay angko. ²¹ Kanat fakinabang tam no boyagan, ham gayfan? No sadingko, it fakinabang aho no kilala in Kiristo. Ginya madi aho no matay, labi man inyak fiya. ²² Dapat ay, aho no boyagan yapdistay, aho no syagan yapdig fadagos gibolon bondi kito katfagonan, hodwa twa no sida kangko fagfiliyon, ngatay haboyagan, ngatay kahatayan. ²³ Dowa angko fakasayaon. Bago bago, ho fag malin gistay fag haboyagan, kaarakitay aho fag san Kiristo akbang, maskin tonya ka fiya wa dahol sangko. ²⁴ Dapat ay, no has baliw angko isip, fiya man aho no boyagan yapdistay, kaarakitay tomogbong hayo. ²⁵ Kawa kitonya ho twa kitay ho domogay yapdistay. Ho omofod yapdi hayo fagayo, kaarakitay tomogbong yapdi hayo mamadagos masolong nogsyag in Kiristo. ²⁶ No kitonya, tam no mangofodan ya aban, ham labi man bomaya in Kiristo Hisos, kawa hogtogbong hayo haboyagan kansadi sa hanya. ²⁷ Kati yabay, ka mahalga, hayo manga ogali fag maangay han Kiristo Fiya fag Barita fagsagadon. Ginya madi, no kitonya, nyawa ho syagan igsabang hayo, nyawadwan, ho domog kitay, ham idwag fagomon kawa hayo fangayofan sadi di, hanggan hayo fakasayaon sadi di yadi kitay, ham igtarogbongan gibolon mahogod, kaarakitay manga taw igsyag han Kiristo no kinday ka maangay has manga taw ka katiwala ka Fiya fag Barita. ²⁸ Ham fag idwa kadala ka mangag fahoriyan hayo, hayo fangayofan fag marigon fagaba. Ginya madi, kagfahoriyan hayo tomwa waglag kitay tandaog wan, hanggan ham ka domaog is taw kawas Diyos kagfasyagan hayo domaog. ²⁹ Maskin is Diyos igfaangay kitay hanggan wa ham, ham fag gibolon in Kiristo ibolon, bondi kitay igsyag hanya, dapat gagwanta yadi mahori maskin galwasi hanya. ³⁰ Yabay kati, ham goyon angko, iglaban has toltol ka kasayag faoman ka Fiya fag Barita. Tonya yadi kangko faglabanon hyabi, hanggan ham igdog, angko faglabanon hanggan wa kati.

¹ Maskin tam insadi san Kiristo, marigon intam manga fangayofan, hanggan tam idwa galabawan, maskin is Kiristo galwasi intam. Tam gamigosan han Kiristo Falad, hanggan tam mahoway ya, kaawa ya ha sadi ha sadi. ² Maskin kitonya, gwadi ham fagfasolong wa dahol dahol igdog angko. Ham fag kasadi, fag gadgalwasiyan, fag sadi di hayo fangayofan. ³ Nyawa kana, tam fag idwa kasaya intam sadili odi fakinabang, ngatay kasaya odig fatakas taw. Yatokitay, tam fag fasodsolonan wan, fag gisip kitay iba taw ka fiya man intam. ⁴ Fag bohondi hantam sadili fakasayaon tam nogligaw halimbawan, fag hanggan has tiba taw. ⁵ Intam fangayofan fag libaba, kito yadin Kiristo Hisos, ⁶ Gi yapdis hyabi hyabi, is Kiristo Hisos Diyos yadi wan. Nyawa kitonya, hanyadwag pilit kitay it kangayanan fagsohod yadin Diyos kangayanan fagaba. ⁷ Yatokitay, hanya naobon yapdit kangayanan, natikis wa nafabalit sadili kito odis sogowan. Hanyan bali taw, kito yadin tam, pariho has iba taw no kalag di. ⁸ Hanya natikis wa nafalibabat kangayanan, inbali wa matanogon, hanggan wa has kahatayan, ala ngay, hanggan wat kahatayan sas nafatimbangan hayo. ⁹ Yakanga yabay, is Diyos nafaabwat in Hisos kangayanan abwat man has fagayo fagayo, idwa ha abwat man inya. Nafabali yadin Hisos ngayan mahalga man has iba ngayan fagayo fagayo, ¹⁰ Kaarakitay fagayo fagayo ka san Diyos banwanan sam tongod, hanggan ka sas baba daga, hanggan ka sas Daga Salad, Manlibabaan hanggan gomalang in Hisos. ¹¹ Ginya fagayo fagayo lomwang kitay, Is Kiristo Hisos kagfon intam fagayo fagayo, kaarakitay mamasayagdog in Diyos intam Ama. ¹² Maskin ngay, angko manga fakilalaon fiya fiya, kawa ham fagabag talinga angko, aho no gofod hayo hyabi, kati labi man ham fag talinga yapdingko fwayong, nyawa ahodwas nyamo hayo. Tam fag kadalag sway in Diyos, kafang gogali kadwa maangay ha hanya, hanggan katanog fagabat fwayong. No kitonya tam igfalag kitay, tam in Diyos nabawi fag manga taw, ¹³ maskin is Diyos ka gibolon fagaba santam manga fangayofan, kaarakitay tam kasaya katanog hanggan syagan katanog it fakasayaon. ¹⁴ Nyawa kana fag bagay, tam fag idwag sarogatan, fag idwag daraogan, ¹⁵ kaarakitay manga taw idwa ha fabangdanan intam, sonson wa fiya intam ogali, kito ka maangay han Diyos manga anak kafiyaon, kagbanwanan istay sas baba daga sas fagbokngan fakaaywanan manga taw madayaon, kadwag fagomon gogali dwat. ¹⁶ Tam nogfadog has taw ka barita kagfaboyag intam, intam ogali fag yawa fiya fiya sasta fagbokngan, kitos fanggasan kagyawa sam tongod no yabi. Hayo ogali no kitonya, ho bomaya wa hayo aban san Kiristo kabangkadan fag sirang, maskin giwa hayo ogali imlag wa kitay, kangko naibolon hanggan syagan yapdi, bonwa fagfaanogonon. ¹⁷ Ham nogsyag in Kiristo, tonya ka hayo disag han Diyos. Twa man, ngatay ta fahatay angko aban, ginya madi angko folot nomwatwat, bilang wagdogang ha hayo disag han Diyos. No kitonya kam-anod, ho bomaya wan, hanggan hogfasolong yadigdog hayo fagayo. ¹⁸ Ham fag kitonya yadi, ham fag baya wan, fag fasolong yadigdog angko. ¹⁹ Is Hisos, kagfon intam nogfaangay, idya dogay aban, ho somogo nangos in Timotiyo has nyamo hayo, kaarakitay angko fangayofan imrigon ya, maskin ho kasaya domog no kinday ham is nyamo. ²⁰ Is Timotiyo sadi di ka ha fangayofan kitongko kitay, gafalo wa dahol hayo. ²¹ Tibak taw fagayo kalibang odit sadili manga fakasayaon, bonwan Kiristo ibolon it fagisipon. ²² Dapat ham fadi wadtwa in Timotiyo ogali kawa gofod angko, kitos anak no koyog it ama, mi nogtarogbongan gibolon kaarakitay manga taw domog ka Fiya fag Barita. ²³ Maskin ngay, hanya kangko sogoon has nyamo hayo, aho no domog no kinday kasta ibolonon hangko istay. ²⁴ Hogsyag yadi marigon hantam Fon kitay, ngalay wa aban aho wa nangos kambangkad has nyamo hayo. ²⁵ Ho naayfan kitay aho fag somogo ha hayo intam fadwasay is Ifapradito. Hanya ka hayo nasogo natogbong angko istay, angko yadi ofod fangibolon, hanggan fanlaban, mi nogfaaronganon has taw kitay, in Diyos Fiya fag Barita ka fakaoronganan. ²⁶ Is Ifapradito galwad hayo fagayo, hanggan inrongkot it fangayofan kawa ham nadog kitay hanya ha fagdogon. ²⁷ Orongan wansagit itfagonan, ganong wa natay. Dapat is Diyos in-awa hanya, hanggan bondis Ifapradito in Diyos fakaawaon, hanggan wa aho, is Diyos in-awa yadingko kaarakitay idwam abagat angko karongkotan. ²⁸ Maskin ngay ho kasayag faoli hanya has nyamo hayo kaarakitay ham igbaya waglag hanya, ginya madi angko karongkotan kawas Ifapradito nonsagit, imliyam wa balinya. ²⁹ Hanya no mwali has nyamo hayo, tanggapan ya hanya fiya fiya, fag baya hanya kawa hanya intam wa fadwasay santam Fon. Fag magalang has fagayo fag manga taw ka ha fangayofan kiton Ifapradito, ³⁰ maskin hanya ganong wa natay kaarakitay omibolon in Kiristo ibolon. Hanya naibolon kitonya kaarakitay manogbong angko nyawad bohonwa ham, kawa ham idwa syagan igtogbong angko gis nyamo.

¹ Angko manga fadwasay, sas katabowanan tingko sorat, hogfatohod intam kitay, tam fag kasolong fagaba maskin tam insadi hasagfon intam. Hodwa kaya golit angko soraton ha hayo kati, hanggan fiya man ha hayo aho nogfatagak hayo. ² Ham fag matagahan ka manga taw kadwa fiya it ibolon, it ogali kito odis hayopan, ka manga ama ka garonganon kitay fag imlifong ogbot gista habilogan. ³ Bonwa tonya fag manga taw, dapat tam ka manga ha natanggap ogali hasagfatoli orongan, maskin tam idwag syag kitay tam nangafiyan han Diyos kawa tam ha naogali santam labi anit. Tam ka manga ha tandaan orongan maskin in Diyos Falad kagfasyagan intam igfasayagdog in Diyos, hanggan tam igbaya fagaba kawa tam insadi san Kiristo Hisos. ⁴ No kitay di, aho no kasaya di, ho syagan digsyag kitay, ho mangafiyan han Diyos aho nogfatonglos kitonya fag manga ogali. No ha taw gayfan kitay hanya nangafiyan han Diyos kawag fatonglos manga ogali malagan, aho labi man, aywan man kangko nafatonglos ogali malagan. ⁵ Hyabi, aho no masagayan sadik simba, ta natoli angko. Angko manga magorang baliw baliw in Israil manga hasokfonan. Aho gin Binhamin fag layonan, hanggan angko manga hafofowan sonson wa manga Hibriyo. No hadis Batasan Hodyo baliwa, hyabi ho katanog fagayo fag manga togon Hodyo, kawa aho sadik Farisiyo. ⁶ Maskin ho mahogod no gibolon in Diyos ibolon, aho hanggan wa gisog in Diyos Tifonan. Ka manga taw ka gayfan kitay tam mangafiyan han Diyos kawa tam no katanog ka Batasan Hodyo fwayong, tadwa ha oliton angko. ⁷ Dapat ay, kati, maskin is Kiristo lamang kangko fagsyagon, tonya fag manga ogali kangko manga fagfatakaon hyabi, hogdog idwa ha kahologan sangko kati. ⁸ Bondi tonya fag manga ogali kangko nangayan, hanggan fagayo angko manga ogali hyabi, hogfatimbang kitay idwa ha kahologan, maskin labi man mahalga man inya kangko fakasayaon, aho fag homilala in Kiristo Hisos, kagfon angko. Kawa ha hanya, ho nadayo wan angko fagfatakaon hyabi, kitos manga boga fag-okason, kaarakitay ho fag sa di ngan Kiristo gamat, fiya wan, ⁹ hanggan imsadi orongan ha hanya. Kati hodwa gayfan kitay aho nangafiyan han Diyos maskin ho katanog ka Batasan Hodyo. Kati ho twa wa kitay, aho nangafiyan han Diyos kawa hogsyag in Kiristo, yakangas Diyos igfatohoyan kitay aho nangafiyan hanya. ¹⁰ Hodwa ha fakasayaon domwag no bonwa kitay, aho fag homilala wa fiya fiya in Kiristo, aho fag domog in Kiristo karigonan hanya nonboyag ya, katahin yadi sat fakahoriyon hanggan hat kahatayan. ¹¹ No kitonya hogsyag wa kitay, ahom bangon yadi gis kahatayan aban. ¹² Hodwag lwang kitay ho nasyagan wan. Bonwa kitay angko ogali inbali wa hosto. Dapat ay, hodwag fagomon igdalandan kaarakitay ho omafo angko bato tanggapon, kan Kiristo Hisos natanggap kawa hangko, hanya no nadalandan hyabi. ¹³ Manga fadwasay, ka orongan, hodwa gayfan kitay ho nafatonglos tonya, dapat ay, sadi di kangko fagisipon, no bali day angko fagsyaganon, ho homogodan wan has fagonan, hodwam libang maayfanan ka hyabi. ¹⁴ Yakanga hogdalandan madagos has fagonan kaarakitay ho omafo angko bato tanggapon. To fag tanggapon ka haboyagan bago san Diyos banwanan sam tongod, kan Diyos fagfatawagon angko gin Kiristo Hisos. Tonya kangko fagisipon nangos. ¹⁵ Kitonya yadi nangos intam manga fangayofan fagayo, tam, ka mangan ganit santam Fon. No ha akwa tiba santam kadya kitonyat manga fangayofan, is Diyos mamatwagdog has taw tonya. ¹⁶ Nyawa kindawan, tam fag fadagos intam lahawan ogaliyon has fagonan, kito kantam fakatwawon balis kati. ¹⁷ Angko manga fadwasay, ham fagayo, ham fag tolad angko manga ogali. Ka hyami naogali sa hayo faglagan ka fiya hayo fagtoladon. Ham fag matohodan ka gogali kitonya. ¹⁸ Ho fagabag fwayong ha hayo hyabi, hanggan kati ho galowan wan no golit ha hayo kitay, aywan santam it manga ogali igfabali bilang idwa ha kahologan in Kiristo kahatayan sas nafatimbangan hayo. ¹⁹ Ka kitonyat ogali, hawas fadosaan it hadasogan, maskin it manga habilogan fakasayaon dwat ka bilang wat fagsimbaon. Tagfatakagdog it manga ogali ka fiya orongan it fakayaon. It fagayfanon ka odi ka manga tagastay is baba daga fagfagayfanon. ²⁰ Dapat ay tam, tam manga taga banwa sam tongod, maskin sinya wantam banwanan ka orongan. Tam gwayan wagfanayan intam Famawi, is Kiristo Hisos, kagfon intam, kambangkad ginya aban. ²¹ Hanya fabago intam manga magomo fag habilogan ka ha kahatayan, fabali kito yadit sadili habilogan kafiyaon, maskin hanya somangkap it kadonongan ka syagan igsakop fagayo fagayo fag manga bagay.

¹ Maskin ngay, angko manga fadwasay kafiyaon, ham nogtohod angko togon fagayo ha hayo, hayo manga fangayofan kansadi santam Fon, fag imganit wan. Ham angko wa fakabaloon, ho galwasi wa dahol hayo. Ham angko fagbayaon, hogfasayagdog has manga taw hayo manga ogali. ² Ham da Iyodiya da Sintiki, hogfaaronganon ha hayo, gwadi ham fag gamigosan wan, kawa ham myasa wansadi santam Fon. ³ Hanggan wa haw, angko ofod fangibolon kafiyaon, hogfwayong yadi ha hyamo, ha nangos togbongan to fag dowak ina, kaarakitay tadwa ha fagbotangon ha sadi ha sadi, maskin hyabi ta naofod inda Kiliminti, naibolon mahogod no natogbong angkog fahaskat ka Fiya fag Barita. Tonya fagayo angko manga ofod fangibolon, it manga ngayan insorat san Diyos listahan kat nadisag haboyagan bago. ⁴ Tam fag kasolong fagaba kawa tam insadi santam Fon. Ho golit ya hayo, tam fag kasolong wan. ⁵ Fag mahoway intam ogali has fagayo fag manga taw. Kagfon intam kaakbang wan. ⁶ Tam fag idwa galibitan nyawa kana fag bagay, dapat, fag darangin, fag baya yadin Diyos tam nogsagad ka manga korang santam. ⁷ Ginya madi in Diyos kahowayan, kagsagaya intam nagdogan hyabi, ka omano intam manga fangayofan hanggan isip kansadi san Kiristo Hisos. ⁸ Angko katabowanan fag manga togon kito, angko manga fadwasay, tam fag fili intam fagayfanon. Fag ka lamang ka orongan, ka fiya, hanggar maslong kantam fagayfanon, ka manga maliyaw, magalang, kadwa ha aktom dwat, ka fiya fagbayaon, hanggan ka tam idwa kayag fadog has taw fag tonya lamang kantam fagayfanon. ⁹ Sadi ya, ka hayo natohodan angko manga togon, hanggan hayo lagan fagtoladon gingko manga hampan hanggan manga ogali, fag tonya wa ka hayo fagogaliyon fagaba. Ginya madi Diyos kagfon kahowayan sawa hayo fagaba. ¹⁰ Kawa ahon sadi santam Fon, hogbaya wa dahol kitay sadi ya ginan ham nalag hayo halimbawan kaarakitay falag angko hayo kahowayan. Angko bato lwangon, bonwa kitay ham idwa mahoway angko fagaba, kakitay dogay ogbot ham idyag lag hayo halimbawan falag angko hayo kahowayan. ¹¹ Bonwa yadi kitay ho kalonos maskin hoglwang kitonya. Hodwag manaw, honyayom wan, nyawa dahoday sangko, fiya wan. ¹² Ho ha nadalanan yadi wan, nyawa korang, nyawag labi angko fakasayaon. Honyayom di nyawa kinday, hodwag manaw. Nyawa siday aho, nomtoon napsog, nomtoon kalonos, nomtoon angko kwarta iglabi angko fakasayaon, nomtoon korang di. ¹³ Is Kiristo kagfarigon angko fagaba, yakanga ho syagan digfadagos nyawa kana kangko lagan. ¹⁴ Nyawa hoglwang kitonya, hogbaya wa dahol hayo kawa ham natogbong angko, aho no ha mahori. ¹⁵ Ham manga taga Filipos, ham fadi wadtwa kitay, aho no nalahaw gis sakop Masidonya hyabi, aho no fagabag toltol ka Fiya fag Barita sa hayo ligongan, ham lamang fag Tifonan ka naisip ka manga gastoson hanggan tanggapon kwarta. ¹⁶ Hyabi, aho no sas banwa Tisalonika, bondi sadi ginan ham nafadiya angko hayo kwarta, no korang angko sadili. ¹⁷ Bonwa kitay ho kasayag tanggap fagaba hayo manga disag. Kangko fakasayaon hayo nabotang san Diyos faglagan, fag kaaywan. ¹⁸ Toy wa toy fag sorat kati hogfatohoyan ha hayo kitay ho natanggap hayo disag fagayo, iglabi angko fakasayaon. Hodwa ha korang kati, maskin is Ifapradito natibo angko hayo manga disag fagayo, bilang sadik disag banglo han Diyos, kitos sinogba, maangay hanya hanggan it fagbayaon. ¹⁹ Hanggan angko Diyos fahosto ha hayo ka hayo manga kakorangan fagayo, git kaakwaan kadwa twa haminon, gin Kiristo Hisos. ²⁰ Tam fag fasayagdog intam Diyos kantam Ama hanggan aban aban. Fag kitonya wa ngay. ²¹ Ho gwas hayo, igsadig sadi, ka mangan tohoyan han Diyos, ka mangan sadi san Kiristo Hisos. Intam manga fadwasay istay gwas yadi hayo. ²² In Diyos fag manga taw fagayo istay, labi man ka manga gibolon sasta Gorangon fag Sisar balay, gwas yadi hayo. ²³ Ham nangos fag domog kitay, is Kiristo Hisos kagfon intam fagaba mahoway ha hayo fagayo.