FILIMON
11 Ahos Pablo kanporiso kawa ho gibolon in Kiristo Hisos ibolon. Hami da Timotiyo, intam fadwasay, igsorat ha hyamo, Filimon, hyami kapariho fangibolon. 2 Migsorat yadi han Diyos Tifonan kagtifonan sam balay, han Apiya, hyami fadwasay ina, hanggan han Arkipo, ka kito yadi hyami, idwag fagomon iglaban has dwat. 3 Ham nangos fag domog kitay is Diyos intam Ama, hanggan is Kiristo Hisos kagfon intam, mahoway ha hayo, hanggan igfalokmay hayo manga fangayofan. 4 Nyawa ginahin aho nogdarangin kawa ha hyamo, Filimon, hogfasalamat fagaba hangko Diyos. 5 Maskin ta nafadahit hangko kitay, haw igsyag han Hisos kagfon intam, hanggan haw galwasi hanya hanggan fagayo fag manga taw kantohoyan ha hanya. 6 Hogdarangin yadi kitay, ham nogfadog has taw kitay ham igsyag han Kiristo Hisos, tam fagayo fag labi man tomwa wagdog kitay, kafiyaon intam fagbayaon, kawa tam insadi san Kiristo. 7 Fadwasay Filimon, hogbaya wa dahol igdog, hanggan inhoway yangko fangayofan, ta nogfadahit kitay, kawa haw mahoway has manga taw kantohoyan han Diyos, ista manga fangayofan inrigon ya. 8 Kati aho nangos ha fagsagadon. No kitay di, fiya di aho nogfwayong hyamo kitay, haw fag katanog angko fagsagadon kawa han Kiristo. 9 Dapat ay, kawa ho galwasi hyamo, fiya man aho no kampang mayan mayan ha hyamo nogfadog angko sagadon. Ho kampang mayan kitonya, nyawa ahos Pablo in Kiristo Hisos nasogo, hanggan kati ahon poriso kawa ha hanya. 10 Kangko fagfwayongon ha hyamo kawas Onisimo. Is Onisimo bilang wangko anak san Kiristo, kawa aho nafatiwala hanya istay, aho no maporisowan. 11 Hyabi hadwa ha fakinabang gi hanya, dapat kati aban, dahol intam fakinabang gi hanya, tam dowa. 12 Kati hogfaoli ya in Onisimo ha hyamo. Angko fangayofan bilang yadi wantahin hanya. 13 No kitay di, ho kasaya yapdi ongay, is Onisimo fag sa yapdingko akbang, kaarakitay bilang yadi wa haw kagtogbong angko, no baliday aho no maporisowan yapdi, kawa hyabi hogfahaskat ka Fiya fag Barita. 14 Dapat hodwa kasaya gibolon kitonya haw nodwag faangay, kaarakitay bohonwa pilitan, dapat im sadili wa kafangayofanan haw nogtogbong angko. 15 Ngatay itfagonan, is Onisimo idwas nyamo hyamo sadik ngalay, kaarakitay hanya nomfwali ya ha hyamo, hanya domogayan hanggan wa aban aban. 16 Kati bilang wad bohonwam nasali sogowan, dapat hyamo fagalwasiyon fag fadwasay. No kitay di, ho kawili wa dahol in Onisimo, dapat haw labi man kawili hanya. Kati inbali yadi wam fadwasay santam Fon, bohondi kitay hyamo nasali sogowan. 17 Yakanga, haw no gayfan kitay aho hyamo kapariho igsyag in Diyos, ha tanggapan yan Onisimo, kito yadi haw nangos nogtanggap angko. 18 Is Onisimo no ha naibolon dwat ha hyamo hyabi, ngatay ha bayadan, fag gingko haw nogsohot. 19 Aho ka nasorat istay. Ahos Pablo ka bomayad hyamo. No kitay di, hodwag lwang kawa haw bilang wa ha bayadan angko, kawa gingko nabarita ha hyamo, haw ha haboyagan wan. 20 Kati, fadwasay, bilang ganti tonya, haw nangos faangayan angko fagsagadon, kawa tam insadi hasagfon intam. Aho fag bomaya wagdog nangos hyamo sagot kawa tam dowasay han Kiristo. 21 Angko fangayofan ha ngan wa faanod kangko faglwangon istay fag sorat, hanggan bohondi kitonyak fiya. 22 Ha nangos fag fatalaga yadingko bato hadasogan, maskin hogsyag wa kitay ahom fwali ya has nyamo hayo, kito ka hayo fagdaranginon, non Diyos wa kafangayofanan. 23 Is Ifras kangko ofod kanporiso yadi kawa han Kiristo Hisos, gwas hyamo, Filimon. 24 Kitonya yadi da Markos da Aristarko, da Dimas da Lokas, angko manga ofod yadi fangibolon, gwas yadi hyamo. 25 Ham nangos fag domog kitay is Kiristo Hisos kagfon intam mahoway ha hayo fagayo.